Библиотеке требуются волонтёры

Мѣ́сѧца тогѡ́же въ ѳ҃-й де́нь. Ст҃ы́хъ м҃ мч҃никъ, къ севасті́йстѣмъ є҆́зерѣ мꙋ́чившихсѧ.

Ве́черъ, на Гдⷭ҇и, воззва́хъ, предварѧ́етъ самогла́сенъ днѐ, два́жды, и҆ мꙋ́чениченъ, и҆ подѡ́бны трїѡ́ди г҃, и҆ ст҃ы́хъ мꙋ́ченикѡвъ на д҃.

Стїхи̑ры самогла̑сны. Гла́съ в҃. І҆ѡа́нна мона́ха.

Терпѧ́ще настоѧ̑щаѧ до́блественнѣ, ра́дꙋющесѧ надѣ́емыми, дрꙋ́гъ ко дрꙋ́гꙋ глаго́лахꙋ ст҃і́и мꙋ́чєницы: не бо̀ ри́зъ совлачи́мсѧ, но ве́тхаго человѣ́ка ѿлага́емъ. Люта̀ зима̀, но сла́докъ ра́й: болѣ́зненъ ле́дъ, но сла́дко воспрїѧ́тїе: не ᲂу҆клони́мсѧ ᲂу҆̀бо, ѽ во́ини! ма́лѡ претерпи́мъ, да вѣнцы̀ побѣ́дными ᲂу҆вѧзе́мсѧ ѿ хрⷭ҇та̀ бг҃а и҆ сп҃са дꙋ́шъ на́шихъ.

Є҆ди́ножды.

Ме́щꙋще ѡ҆дѣѧ̑нїѧ всѧ̑, входѧ́ще безъ тре́пета во є҆́зеро, дрꙋ́гъ ко дрꙋ́гꙋ глаго́лахꙋ ст҃і́и мꙋ́чєницы: за ра́й, є҆го́же погꙋби́хомъ, ри́зъ тлѣ́нныхъ дне́сь не пощади́мъ: ѕмі́ѧ ра́ди и҆ногда̀ тлетво́рнагѡ ѡ҆блаче́ни бы́вше, совлеце́мсѧ ны́нѣ за всѣ́хъ воскресе́нїе, пренебреже́мъ ле́дъ раста́ющїйсѧ и҆ пло́ть возненави́димъ, да вѣнцы̀ побѣ́дными ᲂу҆вѧзе́мсѧ ѿ хрⷭ҇та̀ бг҃а и҆ сп҃са дꙋ́шъ на́шихъ.

Два́жды.

Ви́дѧще, ꙗ҆́кѡ наслажде́нїе мꙋ́ки, текꙋ́ще ко є҆́зерꙋ стꙋденꙋ̀ ꙗ҆́кѡ къ теплотѣ̀, глаго́лахꙋ ст҃і́и мꙋ́чєницы: не ᲂу҆страши́мсѧ часа̀ зи́мнѧгѡ, да стра́шныѧ гее́нны ѻ҆гнѧ̀ ᲂу҆бѣжи́мъ: сожжена̀ бꙋ́ди нога̀, да ликовствꙋ́етъ вѣ́чнѡ: рꙋка́ же ѿе́млема, да воздѣ́етсѧ ко гдⷭ҇ꙋ. И҆ не пощади́мъ є҆стества̀ ᲂу҆мира́ющагѡ, и҆зво́лимъ сме́рть, да вѣнцы̀ побѣ́дными ᲂу҆вѧзе́мсѧ ѿ хрⷭ҇та̀ бг҃а и҆ сп҃са дꙋ́шъ на́шихъ.

Сла́ва, гла́съ то́йже, пе́рвꙋю стїхи́рꙋ: Терпѧ́ще настоѧ̑щаѧ: И҆ ны́нѣ, бг҃оро́диченъ: Пре́йде сѣ́нь зако́ннаѧ:

Вхо́дъ. Прокі́менъ: И҆ чтє́нїѧ днѐ, и҆ ст҃ы́хъ, г҃:

Прⷪ҇ро́чества и҆са́їина чте́нїе:

[Глава̀ м҃г] Та́кѡ гл҃го́летъ гдⷭ҇ь: всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ́зи ѿ ни́хъ. Кто̀ возвѣсти́тъ сїѧ̑ въ ни́хъ; и҆лѝ ꙗ҆̀же ѿ нача́ла кто̀ слы̑шана сотвори́тъ ва́мъ; да приведꙋ́тъ свидѣ́тели своѧ̑ и҆ ѡ҆правдѧ́тсѧ, и҆ да ᲂу҆слы́шатъ, и҆ да рекꙋ́тъ и҆́стинꙋ. Бꙋ́дите мѝ свидѣ́тели, и҆ а҆́зъ свидѣ́тель, гл҃го́летъ гдⷭ҇ь бг҃ъ, и҆ ѻ҆́трокъ, є҆го́же и҆збра́хъ: да позна́ете и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь, пре́жде менє̀ не бы́сть и҆́нъ бо́гъ, и҆ по мнѣ̀ не бꙋ́детъ. А҆́зъ є҆́смь бг҃ъ, и҆ нѣ́сть ра́звѣ менє̀ спаса́ѧй. А҆́зъ возвѣсти́хъ и҆ спасо́хъ: ᲂу҆ничижи́хъ, и҆ не бѣ̀ въ ва́съ чꙋжді́й. Вы̀ мнѣ̀ свидѣ́тели, и҆ а҆́зъ гдⷭ҇ь бг҃ъ, и҆ є҆щѐ ѿ нача́ла а҆́зъ є҆́смь: и҆ нѣ́сть ѿ рꙋ́къ мои́хъ и҆збавлѧ́ѧй. Сотворю̀, и҆ кто̀ ѿврати́тъ то̀; си́це глаго́летъ гдⷭ҇ь бг҃ъ, и҆збавлѧ́ѧй ва́съ ст҃ы́й і҆и҃левъ.

Премꙋ́дрости соломѡ́ни чте́нїе.

[Глава̀ г҃] Пра́ведныхъ дꙋ́ши въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ. И҆ є҆́же ѿ на́съ ше́ствїе сокрꙋше́нїе: ѻ҆ни́ же сꙋ́ть въ мі́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́ни чте́нїе.

[Глава̀ є҃] Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ ца́рствїе благолѣ́пїѧ и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: Прїи́метъ щи́тъ непобѣди́мый, преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ. По́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ. И҆ ѿ каменоме́тныѧ ꙗ҆́рости и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ: рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ, и҆ ѡ҆пꙋстоши́тъ всю̀ зе́млю беззако́нїе: и҆ ѕлодѣ́йство преврати́тъ престо́лы си́льныхъ. [ѕ҃] Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те, держа́щїи мно́жєства, и҆ гордѧ́щїисѧ ѡ҆ наро́дѣхъ ꙗ҆зы̑къ: Ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.

И҆ про́чее послѣ́дованїе преждесвѧще́нныѧ.

А҆́ще же не соверша́етсѧ лїтꙋргі́а преждесвѧще́ннаѧ: пое́мъ на стїхо́внѣ трїѡ́ди самогла́сенъ днѐ, два́жды, и҆ мꙋ́чениченъ.

Сла́ва, свѧты́хъ, гла́съ ѕ҃:

Въ пѣснопѣ́нїихъ восхва́лимъ, вѣ́рнїи, страстоте́рпцєвъ четы́редесѧть мꙋ́ченикѡвъ, и҆ къ ни̑мъ сладкопѣ́сненнѡ возопїи́мъ, глаго́люще: ра́дꙋйтесѧ, страда́льцы хрⷭ҇тѡ́вы, и҆сѵ́хїе, мелїтѡ́не, и҆ра́клїе, смара́где и҆ до́мне, є҆ѵні́ке, ᲂу҆а́ле и҆ вївїа́не, кла́ѵдїе и҆ прі́ске. ра́дꙋйтесѧ, ѳеодꙋ́ле, є҆ѵтѵ́хїе и҆ і҆ѡа́нне, ѯанѳі́е, и҆лїа́не, сїсі́нїе, кѷрі́е, а҆гі́е, а҆е́тїе и҆ фла́вїе. ра́дꙋйтесѧ, а҆ка́кїе, є҆кді́кїе, лѷсїма́хе, а҆леѯа́ндре, и҆лі́е и҆ горго́нїе, ѳео́фїле, дометїа́не и҆ бжⷭ҇твенный га́їе и҆ горго́нїе. ра́дꙋйтесѧ, є҆ѵтѵ́хїе и҆ а҆ѳана́сїе, кѷрі́лле и҆ сакердѡ́не, нїко́лае и҆ ᲂу҆але́рїе, фїлокти́ме, северїа́не и҆ хꙋді́е, ꙗ҆́кѡ и҆мꙋ́щїи дерзнове́нїе ко хрⷭ҇тꙋ̀ бг҃ꙋ на́шемꙋ, мꙋ́чєницы всечестні́и: того̀ прилѣ́жнѡ моли́те, спасти́сѧ вѣ́рою соверша́ющымъ всечестнꙋ́ю па́мѧть ва́шꙋ.

И҆ ны́нѣ: Бцⷣе, ты̀ є҆сѝ лоза̀ и҆́стиннаѧ:

По Ны́нѣ ѿпꙋща́еши: Тропа́рь гла́съ а҃:

Болѣ́зньми ст҃ы́хъ, и҆́миже ѡ҆ тебѣ̀ пострада́ша, ᲂу҆моле́нъ бꙋ́ди, гдⷭ҇и, и҆ всѧ̑ на́шѧ болѣ̑зни и҆сцѣлѝ, чл҃вѣколю́бче, мо́лимсѧ.

Сла́ва, и҆ ны́нѣ, бг҃оро́диченъ: Гаврїи́лꙋ вѣща́вшꙋ тебѣ̀: Є҆ктенїа̀, и҆ трѝ покло́ны вели̑кїѧ, и҆ ѿпꙋ́стъ.

На ᲂу҆́трени, на Бг҃ъ гдⷭ҇ь, тропа́рь ст҃ы́хъ, два́жды. Сла́ва, и҆ ны́нѣ, бг҃оро́диченъ: и҆ ѻ҆бы̑чныѧ каѳі̑смы.

По а҃-й и҆ по в҃-й каѳі́смѣ, сѣда́льны трїѡ́ди. Є҆ктенїи́ же не глаго́лемъ. По г҃-й же каѳі́смѣ глаго́летъ і҆ере́й є҆ктенїю̀ ма́лꙋю.

Та́же сѣда́ленъ, гла́съ д҃. Подо́бенъ: Ꙗ҆ви́лсѧ є҆сѝ дне́сь:

Честнꙋ́ю тве́рдь церко́внꙋю, ꙗ҆́кѡ ѕвѣ́зды велича́йшыѧ, просвѣща́ете при́снѡ, и҆ вѣ̑рныѧ ѡ҆зарѧ́ете, мꙋ́чєницы бжⷭ҇твеннїи хрⷭ҇тѡ́вы четы́редесѧте.

Сла́ва, гла́съ то́йже. Подо́бенъ: Вознесы́йсѧ:

Мꙋ́жественнѣйшимъ по́мысломъ преше́дше мꙋче́нїе, чꙋ́днїи страстоте́рпцы, сквозѣ̀ ѻ҆́гнь и҆ во́дꙋ проидо́сте, и҆ преминꙋ́сте ко спасе́нїѧ широтѣ̀, наслѣ́дїе прїе́мше небе́сное црⷭ҇тво. въ не́мже твори́те ѡ҆ на́съ бжⷭ҇твєнныѧ мольбы̑, мꙋ́дрїи четыреде́сѧте.

И҆ ны́нѣ, бг҃оро́диченъ:

И҆̀же благода́рнѡ воспѣва́ти ѿ се́рдца, и҆ и҆спроси́ти прилѣ́жнѡ, бцⷣе, твоѧ̑ ми́лѡсти, влⷣчце, рабы̑ твоѧ̑ зовꙋ́щыѧ и҆ глаго́лющыѧ: прест҃а́ѧ дв҃о, предварѝ, и҆ и҆зба́ви ѿ вра̑гъ неви́димыхъ и҆ ви́димыхъ, и҆ всѧ́кагѡ преще́нїѧ: ты́ бо є҆сѝ на́ше застꙋпле́нїе.

А҆́ще ли сꙋббѡ́та кромѣ̀ пе́рвыѧ недѣ́ли поста̀.

По а҃-й каѳі́смѣ сѣда́ленъ: Честнꙋ́ю тве́рдь: Два́жды. Сла́ва, и҆ ны́нѣ, бг҃оро́диченъ:

Въ кро́въ тво́й, пречⷭ҇таѧ дв҃о, прибѣга́ющихъ, мольбꙋ̀ прїе́млеши ѿ на́съ, не преста́й молѧ́щи чл҃вѣколю́бца, спастѝ рабы̑ твоѧ̑.

По в҃-й каѳі́смѣ, сѣда́ленъ: Мꙋ́жественнѣйшимъ по́мысломъ: Два́жды. Сла́ва, и҆ ны́нѣ, бг҃оро́диченъ: И҆̀же благода́рнѡ:

По полѷеле́и сѣда́ленъ, гла́съ є҃. Поⷣ: Собезнача́льное сло́во:

Ст҃ы́хъ мꙋ́чєникъ ᲂу҆добре́нїе, четверосвѣ́тлое сѐ и҆ бг҃осо́бранное, четы́редесѧти мно́жество вѡ́инъ, вои́стиннꙋ, мра́зомъ же и҆ ѻ҆гне́мъ и҆скꙋси́вшесѧ, мꙋ́дрїи, показа́шасѧ во́ини всѣ́хъ цр҃ѧ̀ хрⷭ҇та̀, є҆го́же и҆ мо́лѧтъ спасти́сѧ на́мъ.

Два́жды.

Сла́ва, и҆ ны́нѣ, бг҃оро́диченъ:

Себѐ пре́жде сꙋда̀ ны́нѣ пла́чꙋ, помышлѧ́ѧ моѧ̑ дѣла̀ лꙋка̑ваѧ и҆ лю̑таѧ, и҆ прегрѣше́нїй глꙋбинꙋ̀ совозра́стшꙋю мнѣ̀ ѿ ю҆́ности, чⷭ҇таѧ, и҆ сподавлѧ́ющꙋю ᲂу҆́мъ: но твои́мъ предста́тельствомъ ѡ҆ставле́нїе мнѣ̀ пода́ждь, и҆ спасе́нїе ᲂу҆лꙋчи́ти сподо́би.

Степє́нна а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Проидо́хомъ сквозѣ̀ ѻ҆́гнь и҆ во́дꙋ, и҆ и҆зве́лъ ны̀ є҆сѝ въ поко́й. Сті́хъ: Разже́глъ ны̀ є҆сѝ, ꙗ҆́коже разжиза́етсѧ сребро̀. Є҆ѵⷢ҇лїе лꙋкѝ, зача́ло р҃ѕ.

По н҃-мъ ѱалмѣ̀ стїхи́ра самогла́сна, гла́съ в҃:

Проро́чески ᲂу҆́бѡ вопїѧ́ше дв҃дъ во ѱалмѣ́хъ: проидо́хомъ сквозѣ̀ ѻ҆́гнь и҆ во́дꙋ, и҆ и҆зве́лъ ны̀ є҆сѝ въ поко́й. вы́ же, мꙋ́чєницы хрⷭ҇тѡ́вы, самѣ́ми дѣ́лы сло́во и҆сполнѧ́юще, проидо́сте сквозѣ̀ ѻ҆́гнь и҆ во́дꙋ, и҆ внидо́сте въ црⷭ҇тво нбⷭ҇ное. Тѣ́мже моли́тесѧ, четы́редесѧте сꙋ́ще страда́льцы, дарова́ти на́мъ ве́лїю ми́лость.

Канѡ́на два̀ мꙋ́ченикѡвъ на и҃: пе́рвый канѡ́нъ, є҆гѡ́же краегране́сїе:

Бг҃овѣнча́нный по́лкъ пою̀ мꙋ́ченикѡвъ. І҆ѡа́нна мона́ха.

Гла́съ в҃. Пѣ́снь а҃. І҆рмо́съ:

Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.

Бг҃овѣнча́нный по́лкъ пою̀ мꙋ́ченикѡвъ хрⷭ҇то́выхъ, бг҃одꙋхнове́нными пѣ́сньми, четыредесѧтилѣ́тнюю па́мѧть свѣ́тлѡ торжествꙋ́ѧй, ꙗ҆́кѡ просла́висѧ.

На землѝ всегѡ̀ ѿве́ргшесѧ и҆менова́нїѧ, и҆зво́лиша четы́редесѧте хрⷭ҇тоиме́нное зва́нїе, и҆́мже ны́нѣ въ вы́шнихъ живꙋ́тъ.

Сꙋ́щїи во хрⷭ҇тѣ̀ пло́ть и҆ мі́ръ возненави́дѣвше, ве́тхагѡ ᲂу҆́бѡ человѣ́ка совлеко́стесѧ, со привре́менною ѻ҆де́ждею, во ѻ҆де́ждꙋ же нетлѣ́нїѧ ѡ҆блеко́стесѧ.

Бг҃оро́диченъ:

Кто̀ и҆зрещѝ твоѐ по досто́инствꙋ возмо́жетъ па́че сло́ва зача́тїе; бг҃а бо родила̀ є҆сѝ пло́тїю, пречⷭ҇таѧ, на́мъ ꙗ҆́вльшагосѧ сп҃са всѣ́хъ на́съ.

Дрꙋгі́й канѡ́нъ, є҆гѡ́же краегране́сїе:

Бг҃овѣнча́нный по́лкъ пою̀ мꙋ́чєникъ. Кѵ́ръ ѳеофа́на.

Гла́съ и҆ і҆рмо́съ то́йже.

Бг҃а на́мъ, мꙋ́чєницы четы́редесѧте, ны́нѣ благопремѣ́нна сотвори́те моли́твами ва́шими, чи́стою се́рдца любо́вїю призыва́ющымъ ва́съ.

На нб҃сѣ́хъ трисо́лнечнагѡ сїѧ́нїѧ зарѧ́ми просвѣща́еми, четы́редесѧте, на землѝ и҆зме́рзшыѧ зимо́ю напа́стей, покры́йте ны̀, пою́щыѧ вы̀.

Неразори̑ма благоче́стїѧ и҆ непоколеби̑маѧ цр҃кве забра̑ла, четы́редесѧте, хрⷭ҇тоимени́тое зва́нїе, лю́тѣ смꙋща́емаго ны́нѣ ᲂу҆мири́те.

Бг҃оро́диченъ:

Преесте́ственнѡ надъ всѣ́ми сꙋ́щаго родила̀ є҆сѝ зижди́телѧ и҆ гдⷭ҇а, пло́ть бы́вша на́съ ра́ди человѣ̑къ, дв҃о бцⷣе, мт҃и неискꙋсомꙋ́жнаѧ.

Катава́сїа: Ѿве́рзꙋ ᲂу҆ста̀ моѧ̑:

Пѣ́снь г҃. І҆рмо́съ:

Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.

Во́инство и҆ жи́знь, и҆ красотꙋ̀ тѣле́съ, и҆ бога́тство пренебре́гше благосла́внїи четы́редесѧть, хрⷭ҇та̀ вмѣ́стѡ всѣ́хъ наслѣ́доваша.

Ка́менїемъ неща́днѡ четы́редесѧте повелѣ́нїемъ бїе́ми мꙋчи́телевымъ, мета̑нїѧ бж҃їимъ дх҃омъ на повелѣва́ющыѧ возвраща́хꙋсѧ.

Глаго́лаше на самаго̀, мꙋчи́телевыми ᲂу҆стна́ми ѕмі́й созда́вшаго хꙋлꙋ̀, по тогѡ̀ бг҃обѡ́рнаѧ ᲂу҆ста̀, на мꙋ́ченики ка́меньми сокрꙋша́ютсѧ.

Бг҃оро́диченъ:

Безъ сѣ́мене во ᲂу҆тро́бѣ бг҃а зача́ла є҆сѝ, и҆ ро́ждши несказа́ннѡ вопло́щшасѧ: на него́же зрѣ́ти не смѣ́ютъ, чⷭ҇таѧ, нбⷭ҇ныѧ си̑лы, приснодв҃о.

И҆́нъ. І҆рмо́съ то́йже.

Во́инство мꙋ́ченическое и҆ спрѧже́нный ли́че мꙋ́чєникъ вѣнцено́сєцъ, влⷣцѣ предстоѧ́ще, восхвалѧ́ющыѧ вы̀ при́снѡ спаса́йте.

Є҆́зеромъ страсте́й ѡ҆бꙋрева́емїи и҆ волно́ю напа́стей лю́тыхъ, къ ва́мъ четы́редесѧтемъ хрⷭ҇тѡ́вымъ во́инѡмъ прибѣга́емъ.

Въ нѣ́дрѣхъ а҆враа́мовыхъ согрѣва́емїи, и҆ сла́вною ѻ҆де́ждею ᲂу҆краша́емїи, зимо́ю ѡ҆бстоѧ́нїѧ свѧ́занныхъ разрѣши́ти, помоли́тесѧ.

Бг҃оро́диченъ:

Оу҆твержде́нїе бꙋ́ди и҆ прибѣ́жище, и҆ покро́въ, дв҃о бг҃оневѣ́сто, вѣ́рою къ тебѣ̀ прибѣга́ющымъ, и҆ бж҃їю тѧ̀ мт҃рь и҆сповѣ́дающымъ.

Сѣда́ленъ, гла́съ и҃. Подо́бенъ: Премꙋ́дрости:

Хрⷭ҇тꙋ̀ вво́инившесѧ мꙋ́ченически, врага̀ низложи́вше страда́льчески, дѣ́лы и҆спо́лнисте прⷪ҇ро́ка глаго́лы: сквозѣ́ бо ѻ҆́гнь и҆ во́дꙋ мꙋ́жески проидо́сте, поко́й ѡ҆брѣ́тше, жи́знь нетлѣ́ннꙋю. Тѣ́мже нбⷭ҇ными ᲂу҆кра́шшесѧ вѣнцы̀, съ ли́ки веселите́сѧ безпло́тныхъ, блаже́ннїи страстоте́рпцы прехва́льнїи: моли́те хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть ва́шꙋ.

Два́жды.

Сла́ва, и҆ ны́нѣ, бг҃оро́диченъ:

Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ: и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бла́гости. Тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ, моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.

Пѣ́снь д҃. І҆рмо́съ:

Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не чл҃вѣколю́бче.

Оу҆мовре́дꙋете, глаго́лахꙋ страда́льцы, стра́ннꙋю тщетꙋ̀ всꙋ́е простира́юще пребезбо́жнѣйшїи.

И҆з̾ѡщрє́ны мечѝ, и҆ ѕвѣ́ри, и҆ ѻ҆́гнь, и҆ кре́стъ, ст҃ы̑мъ хрⷭ҇тѡ́вы гони́тели простира́хꙋ.

Стра́шенъ на́мъ, глаго́лахꙋ страда́льцы, ѻ҆́гнь гее́нскїй: ны́нѣшнѧгѡ же ꙗ҆́кѡ клевре́та не ᲂу҆бои́мсѧ.

Да ѿѧ̑ты бꙋ́дꙋтъ рꙋ́ки, сожже́на же бꙋ́ди нога̀, свѧті́и вопїѧ́хꙋ: нетлѣ̑нны бо сїѧ̑ па́ки прїи́мемъ.

Бг҃оро́диченъ:

Мо́лимъ тѧ̀, пречⷭ҇таѧ, бг҃а безсѣ́меннѡ заче́ншꙋю, при́снѡ моли́тисѧ за рабы̑ твоѧ̑.

И҆́нъ. І҆рмо́съ то́йже.

Просвѣще́нїе на́мъ, мꙋ́чєницы, ѿ бг҃а бы́сте, въ сїѧ́нїе бо ѡ҆блеко́стесѧ неприсѣ́нное.

Бг҃оизбра́нный, моли́сѧ, собо́ре мꙋ́чєникъ, вѣнцено́сный, и҆зба́вити бѣ́дъ воспѣва́ющыѧ тѧ̀.

Свѣ́тъ непристꙋ́пный, ст҃і́и, хрⷭ҇то́въ ви́дѣти сподо́бльшесѧ, сꙋ́щыѧ во тмѣ̀ сїѧ́ти ᲂу҆досто́йте.

Ѡ҆блиста́юще, сла́внїи, мы́сленнымъ хрⷭ҇та̀ свѣтонаставле́нїемъ, къ зарѝ бжⷭ҇твеннѣй рꙋково́дствꙋйте.

Бг҃оро́диченъ:

Пѣсносло́вѧще, чⷭ҇таѧ, и҆зъ ᲂу҆тро́бы твоеѧ̀ вопло́щшагосѧ, тѧ̀ славосло́вимъ, ꙗ҆́кѡ бж҃їю мт҃рь.

Пѣ́снь є҃. І҆рмо́съ:

Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.

Неи́стовствомъ пребезꙋ́мнымъ гони́телей, страда́льцы подъ воздꙋ́хомъ на стꙋ́дени ѡ҆бноществова́ти ѡ҆сꙋди́вшесѧ, воспѣва́хꙋ пѣ́нїе бг҃ꙋ благода́рственное.

Ра́дꙋющесѧ четы́редесѧте хрⷭ҇тѡ́вы мꙋ́чєницы, болѣ́зненный претерпѣ́вше ле́дъ, во є҆́зерѣ стоѧ́ще наде́ждею бжⷭ҇твенныхъ вѣнцє́въ ᲂу҆крѣплѧ́еми.

Смѣ́хъ предлага́етсѧ четы́редесѧтемъ хрⷭ҇тѡ́вымъ мꙋ́ченикѡмъ, ᲂу҆да́вленъ бы́въ пре́жде гнѣздѧ́щїйсѧ въ вода́хъ ѕмі́й: пагꙋборо́дныѧ бо крѣ́пости лиши́сѧ.

Бг҃оро́диченъ:

Тебѣ̀, ро́ждшей хрⷭ҇та̀ всѣ́хъ зижди́телѧ, зове́мъ: ра́дꙋйсѧ, чⷭ҇таѧ: ра́дꙋйсѧ, возсїѧ́вшаѧ свѣ́тъ на́мъ: ра́дꙋйсѧ, вмѣ́щшаѧ бг҃а невмѣсти́маго.

И҆́нъ. І҆рмо́съ то́йже.

Неи́стовства є҆реті́ческагѡ четы́редесѧте, и҆ ны́нѣ и҆зба́вите хрⷭ҇то́вꙋ честнꙋ́ю цр҃ковь: въ не́йже ро́ждшесѧ, въ толи́ко досто́инство и҆ сла́вꙋ преминꙋ́сте.

Ꙗ҆́вльшесѧ на́мъ, четы́редесѧте хрⷭ҇тѡ́вы мꙋ́чєницы бг҃оза́рнїи, ѻ҆гневи́днїи свѣти́льницы, просвѣща́ютъ вѣ̑рнымъ благоче́стїѧ пꙋ́ть спаси́тельный.

Ѿ землѝ преста́вистесѧ къ нбⷭ҇нѣй сѣ́ни, мꙋ́чєницы, и҆дѣ́же хрⷭ҇тꙋ̀ подвигополо́жникꙋ предстоѧ́ще, бжⷭ҇твенныѧ мѧ̀ ра́дости ᲂу҆лꙋчи́ти сподо́бите.

Бг҃оро́диченъ:

Ꙗ҆́кѡ непостижи́мое и҆ неꙋдобозри́мое всѧ́комꙋ, влⷣчце, є҆́же па́че ᲂу҆ма̀ та́инство, ѻ҆трокови́це, бжⷭ҇твеннагѡ твоегѡ̀ ржⷭ҇тва̀, сꙋ́щаго бо вои́стиннꙋ бг҃а на́мъ родила̀ є҆сѝ.

Пѣ́снь ѕ҃. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Ра́достнѣ началоѕло́бный восхитѝ, ꙗ҆́кѡ ѿ двоюна́десѧти і҆ꙋ́дꙋ ѻ҆каѧ́ннаго, и҆ ѿ є҆де́ма человѣ́ка, ѿ четы́редесѧти ѿпа́дшаго.

Безстꙋ́денъ сы́й всꙋ́е шата́ѧсѧ, ꙗ҆́коже бо разбо́йникомъ и҆ матѳі́емъ пе́рвѣе, та́кѡ и҆ ны́нѣ мꙋчи́тель, стрегꙋ́щаго зва́нїемъ ѡ҆сꙋди́сѧ.

Сꙋемꙋ́дренный и҆ рыда́нїѧ досто́инъ, и҆́же животѡ́въ ѻ҆бои́хъ погрѣшѝ: ѻ҆гне́мъ бо раста́ѧсѧ, и҆ ко ѻ҆гню̀ ѿи́де негаси́момꙋ.

Бг҃оро́диченъ:

Неискꙋсомꙋ́жнѡ, дв҃о, родила̀ є҆сѝ, и҆ вѣ́чнꙋеши дв҃а, ꙗ҆влѧ́ющи и҆́стиннагѡ бжⷭ҇тва̀, сн҃а и҆ бг҃а твоегѡ̀ ѻ҆́бразы.

И҆́нъ. І҆рмо́съ то́йже.

Бо́дрствꙋющїи и҆ тре́звеннїи храни́телїе ро́да человѣ́ческагѡ ꙗ҆ви́стесѧ, держа́внїи, и҆ моли́твєнницы моле́нїй, помѡ́щницы же печа́льныхъ поста́вистесѧ.

Непристꙋ́пными сїѧ́юще добро́тами въ цр҃кви хрⷭ҇то́вѣ, всехва́льнїи, и҆скꙋше́нїй и҆зба́вите съ любо́вїю ва́съ почита́ющихъ.

Бѣсѧ́щихсѧ мꙋчи́телей, всеизрѧ́днїи, дре́вле потреби́телїе пре́лести бы́сте: и҆ на́мъ ны́нѣ по́мощь ско́раѧ и҆ стѣна̀ бꙋ́дите.

Бг҃оро́диченъ:

На тѧ̀ ᲂу҆пова́нїе возложи́хъ, мт҃и приснодв҃о, спасе́нїѧ моегѡ̀, и҆ тѧ̀ предста́тельницꙋ положи́хъ жи́зни, тве́рдꙋ же и҆ непоколеби́мꙋ.

Конда́къ, гла́съ ѕ҃. Подо́бенъ: Є҆́же ѡ҆ на́съ:

Всѐ во́инство мі́ра ѡ҆ста́вльше, на нб҃сѣ́хъ влⷣцѣ прилѣпи́стесѧ, страстоте́рпцы гдⷭ҇ни четы́редесѧть: сквозѣ̀ ѻ҆́гнь бо и҆ во́дꙋ проше́дше, блаже́ннїи, досто́йнѡ воспрїѧ́сте сла́вꙋ съ небе́съ и҆ вѣнцє́въ мно́жество.

І҆́косъ:

На престо́лѣ непристꙋ́пнѣмъ сѣдѧ́щемꙋ, просте́ршемꙋ не́бо, ꙗ҆́кѡ ко́жꙋ, и҆ зе́млю ᲂу҆тверди́вшемꙋ, и҆ собра́вшемꙋ во́дꙋ въ со́нмы и҆́хъ: всѧ̑ ѿ не сꙋ́щихъ сотво́ршемꙋ бы́ти, и҆ всѣ̑мъ подаю́щꙋ дыха́нїе и҆ живо́тъ, прїе́млющемꙋ ѿ а҆рха̑гг҃лъ пѣ́нїе, и҆ ѿ а҆́гг҃лъ покланѧ́емомꙋ, и҆ ѿ всѣ́хъ сла́вимомꙋ, хрⷭ҇тꙋ̀ вседержи́телю, зижди́телю и҆ бг҃ꙋ на́шемꙋ, припа́даю недосто́йный, приносѧ̀ моѐ моле́нїе, сло́ва благода́ти прошꙋ̀: да возмогꙋ̀ благоче́стнѡ воспѣ́ти и҆ а҆́зъ свѧты̑ѧ, ꙗ҆̀же са́мъ показа́въ побѣди́тели, дарова́въ и҆̀мъ сла́вꙋ съ нб҃съ и҆ вѣнцє́въ мно́жество.

Пѣ́снь з҃. І҆рмо́съ:

Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ. посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: благослове́нъ є҆сѝ, бж҃е ѻ҆тє́цъ на́шихъ.

Оу҆жасе́сѧ зрѧ̀ вѣнцы̀ стра́жъ четы́редесѧти, и҆ ѿри́нꙋвъ любожи́зненное, впири́сѧ раче́нїемъ ꙗ҆вле́нныѧ твоеѧ̀ сла́вы, и҆ съ мꙋ́ченики поѧ́ше: благослове́нъ є҆сѝ, бж҃е ѻ҆тє́цъ на́шихъ.

Въ ба́ню прите́къ дꙋшетлѣ́ннꙋ, ᲂу҆мерщвлѧ́етсѧ жизнолю́бный: хрⷭ҇толю́бецъ же, хи́щникъ и҆зрѧ́днѣйшїй ви́дѣнныхъ бы́въ, ꙗ҆́коже въ ба́ни нетлѣ́нїѧ, съ мꙋ́ченики поѧ́ше: благослове́нъ є҆сѝ, бж҃е ѻ҆тє́цъ на́шихъ.

Ѻ҆гню̀ мы́сленномꙋ возже́нꙋ во ᲂу҆мѣ́хъ четы́редесѧти, многоко́зненное нече́ствꙋющихъ попалѧ́шесѧ безꙋ́мїе, ꙗ҆́коже нѣ́кїй во́скъ та́емь. Тебѣ́ же, хрⷭ҇тѐ, воспѣва́хꙋ: благослове́нъ є҆сѝ, бж҃е ѻ҆тє́цъ на́шихъ.

Ꙗ҆́кѡ ѕѣлѡ̀ свѣтла̀, благолѣ́пна же, хрⷭ҇тѐ, крⷭ҇та̀ твоегѡ̀ си́ла, проти́вными вѣнцы̀ плетꙋ́щи четы́редесѧтимъ мꙋ́ченикѡмъ: во́дꙋ бо и҆ ѻ҆́гнь проше́дше, въ нетлѣ́нїи зовꙋ́тъ: благослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ:

Тѧ̀ кꙋпинꙋ̀ мѡѷсе́й въ горѣ̀ сїна́йстѣй ѻ҆гнепали́мꙋю, чⷭ҇таѧ, предзрѧ́ше, поне́сшꙋю неѡпа́льнѡ нестерпи́мꙋю зарю̀ неизрече́ннагѡ сꙋщества̀, соедини́вшагѡсѧ дебельствꙋ̀ пло́ти, є҆ди́ныѧ въ не́й свѧты́хъ ѵ҆поста́сей.

И҆́нъ. І҆рмо́съ то́йже.

Наста̀ свѣ́тлѡ лѣ́тнѧѧ ва́ша па́мѧть, всебога́тїи, просвѣща́ющи дале́че сїѧ́ющаѧ поста̀ свѣ́тлостїю. Сїю̀ пра́зднꙋюще вѣ́рою съ ва́ми воспѣва́емъ: благослове́нъ є҆сѝ, бж҃е ѻ҆тє́цъ на́шихъ.

Рѣши́телїе страсте́й и҆ свѣти́льницы, и҆здале́ча сїѧ́ющїи, мі́ра ѡ҆чище́нїе, пре́лести разрꙋше́нїе, велегла́снїи и҆́стины проповѣ́дницы, лжѝ прогони́телїе всѣ̑мъ ꙗ҆ви́стесѧ, пою́ще: благослове́нъ є҆сѝ, бж҃е ѻ҆тє́цъ на́шихъ.

Свѣти̑ла мы́слєннаѧ, сїѧ́юще, на́мъ ꙗ҆ви́стесѧ, мꙋ́чєницы, ѡ҆бꙋрева́ємыѧ спаса́ете и҆ наставлѧ́ете пла́вающыѧ, житїѧ̀ волнꙋ́ющыѧсѧ бꙋ́рею, хрⷭ҇тꙋ̀ воспѣва́юще: благослове́нъ є҆сѝ, бж҃е ѻ҆тє́цъ на́шихъ.

Краснѡ̀ бг҃ꙋ и҆ а҆́гг҃лѡмъ возжелѣ́ннѡ, четы́редесѧте бг҃особра́нное и҆ бг҃одꙋхнове́нное, и҆ пресвѣ́тлое ѡ҆полче́нїе, бжⷭ҇твенное и҆ стра́шное всеѻрꙋ́жїе вопїю́ще и҆ глаго́люще: благослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ:

Свѣти́льникъ свѣ́та и҆ ѻ҆́блакъ свѣ́телъ, и҆ свѧще́нїѧ мѣ́сто показа́сѧ, неискꙋсобра́чнаѧ: и҆́бо свѧты́хъ свѧта́го сло́ва прїѧ́тъ несказа́ннѡ. є҆го́же пою́ще взыва́емъ: благослове́нъ є҆сѝ, бж҃е ѻ҆тє́цъ на́шихъ.

Пѣ́снь и҃. І҆рмо́съ:

Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Неи́стовнѡ страда́льцємъ поꙋсти́въ вра́гъ всѧ́ко зда́нїе, всѣ́ми постыдѣ́сѧ: четы́редесѧть бо непреста́ннѡ пою́тъ гдⷭ҇а, и҆ превозно́сѧтъ во всѧ̑ вѣ́ки.

Неми́лостивнѡ за хрⷭ҇та̀ тѣле́съ ва́шихъ ᲂу҆́ды сокрꙋ́шшесѧ, всесожже́нїе бжⷭ҇твенно принесо́стесѧ бг҃ꙋ: со а҆́гг҃лы при́снѡ ликꙋ́ете, мꙋ́чєницы, пою́ще хрⷭ҇та̀ во вѣ́ки всѧ̑.

Крѣ́постїю смы́сла, є҆го́же родѝ, на ра́мена взе́мши, хрⷭ҇толюби́ваѧ ма́ти, благоче́стїѧ пло́дъ прино́ситъ, съ мꙋ́ченики мꙋ́ченика, свѧщеннодѣ́йствꙋ а҆враа́мовꙋ подо́бѧщисѧ.

Къ непреста́ннѣй жи́зни правоте́чнѡ, ѽ сн҃е, творѝ ше́ствїе, хрⷭ҇толюби́ваѧ ма́ти хрⷭ҇толюби́вомꙋ дѣ́тищꙋ вопїѧ́ше: не терплю̀ тебѐ второ́е, подвигополо́жникꙋ хрⷭ҇тꙋ̀ ꙗ҆ви́тисѧ.

Бг҃оро́диченъ:

И҆́же въ нѣ́дрѣхъ ѻ҆́ч҃ихъ, нераздѣ́льнѡ же сн҃а сѣдѧ́щаго въ веще́ственнѣмъ чре́вѣ твое́мъ все́льшасѧ, чⷭ҇таѧ, пое́мъ, дв҃о бг҃оневѣ́сто, и҆ превозно́симъ во всѧ̑ вѣ́ки.

И҆́нъ. І҆рмо́съ то́йже.

Претво́ршесѧ къ жи́зни и҆́стиннѣй, є҆́же ѡ҆ хрⷭ҇тѣ̀ ны́нѣ сокрове́ннѣй, къ зи́мнѣй и҆ болѣ́зненнѣй кончи́нѣ, до́блїи, крѣ́пкѡ вда́стесѧ, спасе́нїѧ и҆ ѡ҆ставле́нїѧ просѧ́ще на́мъ.

Ѿ землѝ къ нб҃снымъ преше́дше, страда́льцы вѣнцено́сцы, це́ркви мꙋ́чєникъ побѣдоно́сныхъ ли́че, бѣ́дъ, страсте́й, ѡ҆бстоѧ́нїй, и҆збавле́нїѧ проси́те на́мъ и҆ спасе́нїѧ.

Расто́ргъ сме́рти ᲂу҆́зы сп҃съ, страда́льцємъ побѣ̑ды подадѐ на сме́рть: четы́редесѧть бо мра́зомъ согрѣва́еми поѧ́хꙋ, и҆ спасе́нїѧ всѣ̑мъ вѣ̑рнымъ просѧ́ще.

Напа́стей прило́ги, нападе́нїе страсте́й, де́мѡнѡвъ и҆скꙋше́нїѧ, бжⷭ҇твенный страстоно́сєцъ ли́къ, моли́твою и҆з̾има́етъ ꙗ҆́вѣ, ѿ пою́щихъ хрⷭ҇та̀ во вѣ́ки.

Бг҃оро́диченъ:

Оу҆мерщвлє́нныѧ и҆ къ пе́рсти сме́ртнѣй, и҆ тлѣ́нїю сведє́нныѧ воскреси́ла є҆сѝ є҆ди́на, нача́льника жи́зни ро́ждши хрⷭ҇та̀ бг҃а на́шего, влⷣчце дв҃о чⷭ҇таѧ, бг҃ороди́тельнице.

Пѣ́снь ѳ҃. І҆рмо́съ:

Ѿ бг҃а, бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ: ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.

За хрⷭ҇та̀ ѡ҆бнажи́вшесѧ и҆ ка́менїемъ бїе́ни бы́вше, воздꙋ́шнꙋю претерпѣ́сте зи́мность, водны́й ле́дъ и҆ сокрꙋше́нїе ᲂу҆де́съ, и҆ ѻ҆гне́мъ ѡ҆па́льшесѧ, въ рѣ́чнѣй сїѧ́ете быстринѣ̀ и҆здале́ча, ꙗ҆́коже свѣти̑ла, мꙋ́чєницы четы́редесѧте.

Же́злъ си́лы бжⷭ҇твенныѧ, крⷭ҇тъ стѧжа́вше, вопїѧ́хꙋ хрⷭ҇тꙋ̀ страда́льцы четы́редесѧте: влⷣко всеси́льный побѣди́телю, рꙋко́ю твое́ю да вѣнча́емсѧ, да вси́ тѧ пѣ́сньми непреста́ннѡ велича́емъ.

Ꙗ҆́кѡ болѣ́зненъ ᲂу҆́бѡ ле́дъ, ꙗ҆́коже ѕѣлѡ̀ безмѣ́рна лю́тость, ю҆́же претерпѣ́сте, мра́за, но сла́докъ ра́й: а҆враа́мѡва бо нѣ̑дра патрїа́рха грѣ́ютъ ва́съ въ се́лѣхъ вѣ́чныхъ, мꙋ́чєницы четы́редесѧте.

Побѣди́вше страда́ньми, и҆ вѣнцы̀ прїи́мше, ѿ бжⷭ҇твенныѧ влⷣчни десни́цы, ны́нѣ дарова́ти моли́тесѧ ми́ръ мі́рꙋ и҆ на́мъ спасе́нїе, мꙋ́чєницы четы́редесѧте.

Бг҃оро́диченъ:

Невѣ́сто мт҃и дв҃о, а҆́гг҃льскаѧ мно́жєства твоего̀ мо́лѧтъ сн҃а, прїимѝ моле́нїе на́ше, є҆ди́на наде́жде вѣ́рныхъ, и҆ ми́ръ мі́рꙋ и҆ на́мъ спасе́нїе тебѐ лю́бѧщымъ да́рꙋй.

И҆́нъ. І҆рмо́съ то́йже.

Преесте́ственныѧ зарѝ и҆ ра́дости несказа́нныѧ, и҆ сла́вы сподо́бистесѧ ᲂу҆лꙋчи́ти: ны́нѣ же любо́вїю чтꙋ́щыѧ ва́съ, напа́стей и҆ бѣ́дъ, и҆ лꙋка́вствїѧ и҆зба́вите вра́жїѧ, хрⷭ҇тѡ́вы во́ини, мꙋ́чєницы четы́редесѧте.

Си́лꙋ, пребога́тїи, бжⷭ҇твеннꙋю съ нб҃сѐ прїе́мше и҆ крѣ́пость, соꙋ̑зницы хрⷭ҇тѡ́вы, льстѝ прогони́телїе бы́сте, ѿгонѧ́ще всѧ́кꙋ і҆́дѡльскꙋю мглꙋ̀ непостоѧ́ннꙋю, и҆ просвѣща́юще мі́ръ, мꙋ́чєницы четы́редесѧте.

Оу҆кра́шшесѧ добро́тою чⷭ҇тна́гѡ мꙋче́нїѧ, и҆ бж҃е́ственнагѡ прича̑стницы бы́вше є҆стества̀, вои́стиннꙋ ра́дꙋетесѧ, свѣ́тꙋ сраствори́вшесѧ свѣтлѣ́йшемꙋ и҆ чи́стомꙋ, хрⷭ҇тѡ́вы во́ини, мꙋ́чєницы четы́редесѧте.

Ны́нѣ хрⷭ҇тꙋ̀ предстоѧ́ще благочести́вымъ дерзнове́нїемъ, и҆ ѿѻнꙋ́дꙋ бж҃ества̀ свѣ́томъ ѡ҆блиста́еми, сла́внїи, восхвалѧ́ющыѧ вы̀ заре́ю ѡ҆свѣти́тисѧ трисїѧ́нною, прилѣ́жнѡ моли́те, мꙋ́чєницы четы́редесѧте.

Бг҃оро́диченъ:

Ꙗ҆́вльшїйсѧ, дв҃о, дꙋшѝ моеѧ̀ примра́къ свѣ́та твоегѡ̀ невеще́ственными блиста́ньми ѡ҆зарѝ, две́ре бж҃е́ственнагѡ свѣ́та, и҆ ѻ҆гнѧ̀ вѣ́чнагѡ и҆зба́витисѧ сподо́би, чⷭ҇таѧ, вѣ́рою и҆ любо́вїю пѣ́сньми тѧ̀ велича́ющаго.

Свѣти́ленъ. Подо́бенъ: Жєны̀ ᲂу҆слы́шите:

Десѧти́цꙋ четверочи́сленнꙋю, побѣдоно́сный по́лкъ, во́инство свѧты́хъ мꙋ́чєникъ воспои́мъ досто́йнѡ: ѻ҆гне́мъ бо и҆ стꙋ́денїю, и҆ водо́ю посрами́ша вражде́бныхъ полкѝ, и҆ ѿ хрⷭ҇та̀ сп҃са вѣнцы̀ прїѧ́ша сла́вы.

Сла́ва:

Ли́къ четверодесѧточи́сленный мꙋ́ченикѡвъ четы́редесѧти, пребж҃е́ственныѧ трⷪ҇цы добродѣ́телей четвери́чныхъ ѻ҆гнѧ̀, воздꙋ́ха, воды̀ и҆ землѝ, стїхі́й четы́рехъ, пѣ́сньми бжⷭ҇твенными да воспое́тсѧ, ꙗ҆́кѡ за хрⷭ҇та̀ пострада́вшїй, всѣ́хъ влⷣцѣ.

И҆ ны́нѣ, бг҃оро́диченъ:

Влⷣкꙋ всеѧ̀ тва́ри ро́ждши, мт҃и дв҃о, и҆ всѧ́ческихъ ꙗ҆́кѡ сꙋ́щи ѻ҆трокови́ца, ѽ влⷣчце бцⷣе, страсте́й мꙋчи́тельствꙋющихъ мѧ̀ и҆схитѝ, и҆ проводѝ къ милосе́рдїѧ ѡ҆сїѧ́нїю, и҆ къ прекра́сной па́сцѣ воскре́сшагѡ сн҃а твоегѡ̀.

На хвали́техъ стїхи̑ры на д҃, гла́съ є҃. Поⷣ: Ра́дꙋйсѧ, по́стникѡвъ:

Прїиди́те, мꙋ́ченическїй, бра́тїе, съ похвала́ми воспои́мъ по́лкъ, мра́зомъ и҆ ѻ҆гне́мъ ѡ҆па́льшїйсѧ, и҆ пре́лести зи́мꙋ разжже́нною ре́вностїю попали́вшїй, во́инство до́блественнѣйшее, сщ҃е́ннѣйшїй собо́ръ, защище́нїе же неразрꙋши́мо и҆ непобѣди́мо, вѣ́ры забра̑ла и҆ храни́тели, мꙋ́чєникъ четы́редесѧти ли́къ бжⷭ҇твенный цр҃кве хода́таѧ. Си́льнѣ молѧ́щыѧ хрⷭ҇та̀, низпосла́ти дꙋша́мъ на́шымъ ми́ръ и҆ ве́лїю ми́лость.

Два́жды.

Ра́дꙋйсѧ, собо́ре крѣ́пкїй и҆ терпѣли́вый и҆ побѣди́тельное ѡ҆полче́нїе, столпы̀ благоче́стїѧ, во́ини хрⷭ҇тѡ́вы, тве́рдїи ѻ҆рꙋ̑жницы и҆ непобѣди́мїи, ᲂу҆мо́мъ преси́льнїи и҆ дꙋше́ю мꙋ́жественнѣйшїи, вои́стиннꙋ бжⷭ҇твеннїи, бг҃ꙋ возжелѣ́нный ли́къ ст҃ы́й, бг҃оизбра́нный со́нмъ, мꙋ́чєницы четы́редесѧте: и҆̀же ра̑вны страда́нїемъ, ра̑вны и҆ нра́вомъ, и҆ ра̑вныѧ и҆ вѣнцы̀ прїе́мше, хрⷭ҇та̀ моли́те, дарова́ти дꙋша́мъ на́шымъ ми́ръ и҆ ве́лїю ми́лость.

Ра́дꙋйсѧ, побѣдоно́сное мно́жество, и҆̀же на бранѣ́хъ до́блѣ мꙋ́жествовавше, ѕвѣ́зды проше́дше сквозѣ̀ ѻ҆́гнь и҆ стꙋ́день, и҆ водны́й ле́дъ разсы́павше, зе́млю ѡ҆небеси́вше и҆ всѧ̑ просвѣти́вше, въ нѣ́дрѣхъ а҆враа́мовыхъ ны́нѣ грѣ́емїи, и҆ со а҆́гг҃льскими ликꙋ́юще во́инствы, мꙋ́чєницы четы́редесѧте, цвѣ́ти дыха́ющїи бл҃гово́нїе сꙋ́що дꙋхо́внагѡ раздаѧ́нїѧ, хрⷭ҇та̀ моли́те, дꙋша́мъ на́шымъ дарова́ти ве́лїю ми́лость.

Сла́ва, гла́съ то́йже, самогла́сенъ. І҆ѡа́нна мона́ха:

Страстоте́рпцы хрⷭ҇тѡ́вы, всечестны́й по́стъ свѣ́тльшїй содѣ́ласте па́мѧтїю ва́шегѡ сла́внагѡ страда́нїѧ, четы́редесѧть бо сꙋ́ще четыредесѧ́тницꙋ ѡ҆свѧща́ете, спаси́тельнѣй стра́сти ᲂу҆подо́бившесѧ, ва́шимъ за хрⷭ҇та̀ страда́нїемъ. Тѣ́мже и҆мꙋ́ще дерзнове́нїе, моли́тесѧ въ ми́рѣ дости́гнꙋти на́мъ въ тридне́вное воскрⷭ҇нїе бг҃а и҆ сп҃са дꙋ́шъ на́шихъ.

И҆ ны́нѣ, бг҃оро́диченъ:

Блажи́мъ тѧ̀, бцⷣе дв҃о, и҆ сла́вимъ тѧ̀ вѣ́рнїи по до́лгꙋ, гра́дъ непоколеби́мый, стѣ́нꙋ неѡбори́мꙋю, тве́рдꙋю предста́тельницꙋ и҆ прибѣ́жище дꙋ́шъ на́шихъ.

На стїхо́внѣ, въ трїѡ́ди самогла́сенъ два́жды, и҆ мꙋ́чениченъ.

Сла́ва, ст҃ы́хъ, гла́съ в҃. Самогла́сенъ:

И҆́стины ча́шею ѿ свои́хъ крове́й, ѻ҆гне́мъ мꙋче́нїй и҆ водны́мъ ле́домъ вѣ̑рныѧ напои́ша, четверочи́сленнаѧ бо десѧти́ца пою́щи пѣ́снь сп҃сꙋ, є҆ди́нъ ᲂу҆́бѡ ᲂу҆́мъ всѣ̑мъ, въ тѣлесѣ́хъ же мно́зѣхъ принесо́шасѧ хрⷭ҇тꙋ̀, и҆ бг҃оневѣ́стнаѧ мт҃и хрⷭ҇толюби́ваго ѻ҆́трока на ра́мена взе́мши, глаго́лаше: грѧдѝ, страда́льче, и҆ постраждѝ съ про́чими.

И҆ ны́нѣ, бг҃оро́диченъ:

Непроходи̑маѧ врата̀, та́йнѡ запеча́тствѡваннаѧ, бл҃гослове́ннаѧ бцⷣе дв҃о, прїимѝ молє́нїѧ на̑ша и҆ принесѝ твоемꙋ̀ сн҃ꙋ и҆ бг҃ꙋ, да спасе́тъ тобо́ю дꙋ́шы на́шѧ.

Та́же, Бла́го є҆́сть: Трист҃о́е, тропа́рь, є҆ктенїа̀, и҆ трѝ покло́ны вели̑кїѧ, ча́съ а҃-й съ каѳі́смою, и҆ ѿпꙋ́стъ. Во вре́мѧ же своѐ быва́етъ г҃, ѕ҃ и҆ ѳ҃ ча́съ, по чи́нꙋ и҆́хъ съ каѳі́смами: и҆ блажє́нны поско́рꙋ и҆ про́чее. На ко́емждо часѣ̀ по г҃ покло́ны вели̑кїѧ.

Въ то́йже де́нь на вече́рни, по ѻ҆бы́чной каѳі́смѣ, на Гдⷭ҇и, воззва́хъ, ста́вимъ стїхѡ́въ і҃. И҆ пое́мъ трїѡ́ди самогла́сенъ днѐ два́жды, и҆ мꙋ́чениченъ, и҆ подѡ́бны г҃. И҆ ст҃ы́хъ мꙋ́ченикѡвъ д҃.

Стїхи̑ры мꙋ́ченикѡвъ, гла́съ а҃:

Ли́къ четверодесѧтосїѧ́нный, во́инство всѐ бг҃особра́нное, спросїѧ̀ постꙋ̀ страда́ньми честны́ми, ѡ҆свѧща́ющъ и҆ просвѣща́ющъ дꙋ́шы на́шѧ.

Два́жды.

Гла́съ в҃:

Є҆́зеро ꙗ҆́кѡ ра́й и҆ зи́мность ꙗ҆́кѡ зно́й, мꙋ́чєницы вмѣни́ша, хрⷭ҇тѐ бж҃е, не ᲂу҆страши́ша по́мысла и҆́хъ томи́телей прещє́нїѧ, не ᲂу҆боѧ́шасѧ до́блїи мꙋ́къ приложе́нїй, ѻ҆рꙋжено́сный стѧжа́вше кре́стъ: тѣ́мъ бо врага̀ ꙗ҆́кѡ крѣ́пцыи побѣди́ша, тѣ́мже и҆ вѣнцы̀ прїѧ́ша благода́ти.

Четверодесѧточи́сленный ли́къ мꙋ́чєникъ кто̀ не воспое́тъ; въ во́дꙋ бо є҆́зера внидо́ша де́рзостнѣ, и҆ мра́зомъ стѣснѧ́еми, пѣ́снь воспѣва́хꙋ гдⷭ҇ꙋ: є҆да̀ въ рѣка́хъ прогнѣ́ваешисѧ на ны̀, гдⷭ҇и; є҆да̀ въ рѣка́хъ прогнѣ́ваешисѧ на ны̀, чл҃вѣколю́бче; ѡ҆блегчѝ тѧ́жесть и҆ го́ресть воздꙋ́ха: свое́ю бо кро́вїю ѡ҆багри́шасѧ на́ши но́ги, и҆ введи́ ны, бж҃е, въ вѣ̑чныѧ твоѧ̑ кро́вы: да нѣ́дро ны̀ согрѣ́етъ патрїа́рха а҆враа́ма.

Сла́ва, гла́съ то́йже:

Прⷪ҇ро́чески ᲂу҆́бѡ вопїѧ́ше дв҃дъ во ѱалмѣ́хъ: проидо́хомъ сквозѣ̀ ѻ҆́гнь и҆ во́дꙋ, и҆ и҆зве́лъ ны̀ є҆сѝ въ поко́й: вы́ же, мꙋ́чєницы хрⷭ҇тѡ́вы, самѣ́ми дѣ́лы сло́во и҆сполнѧ́юще, проидо́сте сквозѣ̀ ѻ҆́гнь и҆ во́дꙋ, и҆ внидо́сте въ црⷭ҇тво нбⷭ҇ное. Тѣ́мже моли́тесѧ, четы́редесѧте сꙋ́ще страда́льцы, дарова́ти на́мъ ве́лїю ми́лость.

И҆ ны́нѣ, бг҃оро́диченъ: Всѐ ᲂу҆пова́нїе моѐ:

🕅 А҆́ще къ средѣ̀ и҆лѝ къ пѧткꙋ̀, крⷭ҇тобг҃оро́диченъ, пи́санъ сегѡ̀ мѣ́сѧца въ д҃і де́нь. Вхо́дъ со є҆ѵⷢ҇лїемъ. Прокі́менъ днѐ и҆ чтє́нїѧ (с. 96) трїѡ́ди. И҆ Да и҆спра́витсѧ моли́тва моѧ̑: Посе́мъ. Прокі́менъ, гла́съ є҃: Ты̀, гдⷭ҇и, сохрани́ши ны̀ и҆ соблюде́ши ны̀ ѿ ро́да сегѡ̀ и҆ во вѣ́къ: Сті́хъ: Спаси́ мѧ, гдⷭ҇и, ꙗ҆́кѡ ѡ҆скꙋдѣ̀ преподо́бный. А҆пⷭ҇лъ ко є҆вре́ємъ, зача́ло тл҃а. А҆ллилꙋ́їа, гла́съ д҃: Воскли́кните гдⷭ҇еви, всѧ̀ землѧ̀, по́йте же и҆́мени є҆гѡ̀. Сті́хъ: Ꙗ҆́кѡ и҆скꙋси́лъ ны̀ є҆сѝ, бж҃е, разже́глъ ны̀ є҆сѝ, ꙗ҆́коже разжиза́етсѧ сребро̀. Є҆ѵⷢ҇лїе матѳе́а, зача́ло п҃. И҆ про́чее бжⷭ҇твеннаѧ лїтꙋргі́а преждесвѧще́нныхъ. Прича́стенъ: Ра́дꙋйтесѧ, пра́веднїи, ѡ҆ гдⷭ҇ѣ.

🕅 А҆́ще слꙋчи́тсѧ м҃ мꙋ́чєникъ а҃-ѧ седми́цы въ ко́йлибо де́нь, и҆ пое́тсѧ слꙋ́жба и҆́хъ въ сꙋббѡ́тꙋ, со ст҃ы́мъ мꙋ́ченикомъ ѳео́дѡромъ тѵ́рѡномъ.

Въ пѧто́къ ве́чера, каѳі́сма рѧдова́ѧ. На Гдⷭ҇и, воззва́хъ, стїхи̑ры на і҃: и҆ пое́мъ трїѡ́ди самогла́сенъ днѐ, два́жды, и҆ мꙋ́ченикѡвъ на д҃. И҆ ѳео́дѡра на д҃. Сла́ва, ѳео́дѡра: И҆ ны́нѣ, бг҃оро́диченъ пе́рвый, гла́са. Вхо́дъ, прокі́менъ и҆ чтє́нїѧ днѐ, и҆ мꙋ́ченикѡвъ г҃. И҆ по Да и҆спра́витсѧ моли́тва моѧ̀: г҃ покло́ны вели̑кїѧ. И҆ про́чее преждесвѧще́нныхъ. По заамвѡ́нной моли́твѣ пое́мъ канѡ́нъ свѧта́гѡ ѳео́дѡра надъ ко́ливомъ, ꙗ҆́коже ᲂу҆каза́сѧ въ м҃-цѣ на рѧдꙋ̀, и҆ ѿпꙋ́стъ.

[Зрѝ] А҆ и҆дѣ́же нѣ́сть преждесвѧще́нныхъ, ве́чера на Гдⷭ҇и, воззва́хъ, стїхи̑ры мꙋ́ченикѡвъ г҃, и҆ ѳео́дѡра г҃: Сла́ва, ѳео́дѡра: И҆ ны́нѣ, бг҃оро́диченъ ли гла́са преше́дшагѡ, безъ вхо́да. Прокі́менъ и҆ чте́нїѧ днѐ, и҆ мꙋ́ченикѡвъ. На стїхо́внѣ самогла́сенъ днѐ, два́жды, и҆ мꙋ́чениченъ. Та́же припѣ́въ: и҆ пое́мъ стїхи́рꙋ ѳео́дѡра: Бжⷭ҇твенныхъ дарѡ́въ: пи́сана на Гдⷭ҇и, воззва́хъ: Сла́ва, мꙋ́ченикѡвъ, гла́съ ѕ҃: Въ пѣснопѣ́нїѧхъ восхва́лимъ: По Ны́нѣ ѿпꙋща́еши: тропа́рь мꙋ́ченикѡвъ: Сла́ва, ѳео́дѡра: И҆ ны́нѣ, бг҃оро́диченъ: Всѧ̑ па́че смы́сла: Є҆ктенїа̀, и҆ трѝ покло́ны вели̑кїѧ. И҆ пое́мъ канѡ́нъ ст҃а́гѡ ѳео́дѡра надъ ко́ливомъ: и҆ ѿпꙋ́стъ по ѻ҆бы́чаю.

Повече́рїе пое́мъ вели́кое: на повече́рїи пое́мъ канѡ́нъ ᲂу҆со́пшихъ: и҆ мине́и рѧдовы́й. Тропари́ же, по а҃-мъ и҆ по в҃-мъ трист҃о́мъ, глаго́лемъ ѻ҆бои́хъ ст҃ы́хъ: а҆ на послѣ́днемъ трист҃о́мъ, конда́къ мꙋ́ченикѡвъ.

На ᲂу҆́трени, на Бг҃ъ гдⷭ҇ь, тропа́рь мꙋ́ченикѡвъ, два́жды: Сла́ва, ѳео́дѡра: И҆ ны́нѣ, бг҃оро́диченъ: Всѧ̑ па́че смы́сла: По а҃-й каѳі́смѣ сѣда́льны мꙋ́ченикѡвъ ѻ҆́ба: Сла́ва, и҆ ны́нѣ, бг҃оро́диченъ: и҆ чте́нїе мꙋ́ченикѡвъ. По в҃-й каѳі́смѣ сѣда́льны ѳео́дѡра: Сла́ва, и҆ ны́нѣ, бг҃оро́диченъ: и҆ чте́нїе мꙋ́ченикѡвъ, и҆лѝ ѳео́дѡра. Полѷеле́й и҆ сѣда́ленъ мꙋ́ченикѡвъ, два́жды: Сла́ва, и҆ ны́нѣ, бг҃оро́диченъ: и҆ чте́нїе мꙋ́ченикѡвъ. Степє́нна, а҃-й а҆нтїфѡ́нъ д҃-гѡ гла́са. Прокі́менъ и҆ Всѧ́кое дыха́нїе: и҆ є҆ѵⷢ҇лїе мꙋ́ченикѡвъ. Ѱало́мъ н҃: стїхи́ра мꙋ́ченикѡвъ. Канѡ́ны мꙋ́ченикѡвъ, со і҆рмосо́мъ на ѕ҃: и҆ ѳео́дѡра ѻ҆́ба канѡ́на на и҃. Катава́сїа: Ѿве́рзꙋ ᲂу҆ста̀ моѧ̑: пѣ́сни же, з҃-ю и҆ и҃-ю, глаго́лемъ напредѝ въ пѧто́къ. По г҃-й пѣ́сни конда́къ и҆ і҆́косъ, и҆ сѣда́ленъ мꙋ́ченикѡвъ. Сла́ва, ѳео́дѡра: И҆ ны́нѣ, бг҃оро́диченъ. И҆ чте́нїе ѡ҆ ст҃ѣ́мъ ѳео́дѡрѣ. По ѕ҃-й пѣ́сни конда́къ ѳео́дѡра и҆ і҆́косъ, и҆ чте́мъ про́логъ и҆ сѷнаѯа́рїй. По ѳ҃-й пѣ́сни свѣти́ленъ мꙋ́ченикѡвъ: Сла́ва, ѳео́дѡра: И҆ ны́нѣ, бг҃оро́диченъ. На хвали́техъ стїхи̑ры мꙋ́ченикѡвъ г҃, гла́съ є҃, подо́бенъ: Ра́дꙋйсѧ: и҆ ѳео́дѡра, подѡ́бны г҃: та́же припѣ́въ: Проидо́хомъ сквозѣ̀ ѻ҆́гнь и҆ во́дꙋ: И҆ пое́мъ самогла́снꙋ стїхи́рꙋ мꙋ́ченикѡвъ: Страстоно́сцы хрⷭ҇тѡ́вы: Сла́ва, ѳео́дѡра: И҆ ны́нѣ, бг҃оро́диченъ. Славосло́вїе вели́кое: тропа́рь мꙋ́ченикѡвъ: Сла́ва, ѳео́дѡра: И҆ ны́нѣ, бг҃оро́диченъ. Є҆ктєнїѝ и҆ ѿпꙋ́стъ, и҆ ѻ҆бы́чное и҆схожде́нїе въ притво́ръ: и҆ ча́съ а҃-й.

На часѣ́хъ тропа́рь мꙋ́ченикѡвъ: Сла́ва, ѳео́дѡра: И҆ ны́нѣ, бг҃оро́диченъ часѡ́въ: кондаки́ же глаго́лемъ премѣнѧ́юще.

На лїтꙋргі́и, блажє́нна мꙋ́ченикѡвъ, пѣ́снь г҃, на д҃: и҆ ѳео́дѡра ѕ҃-ѧ, на д҃. По вхо́дѣ тропа́рь мꙋ́ченикѡвъ и҆ ѳео́дѡра, и҆ конда́къ є҆гѡ̀: Сла́ва, мꙋ́ченикѡвъ: И҆ ны́нѣ, бцⷣы хра́ма, и҆лѝ, Предста́тельство хрїстїа́нъ: Прокі́менъ, А҆ллилꙋ́їа и҆ прича́стенъ мꙋ́ченикѡвъ, и҆ ѳео́дѡра. А҆пⷭ҇лъ и҆ є҆ѵⷢ҇лїе пре́жде сꙋббѡ́ты, и҆ ѳео́дѡра подъ зача́ло: та́же мꙋ́ченикѡвъ.

🕅 А҆́ще ли слꙋчи́тсѧ м҃ мꙋ́ченикѡвъ въ а҃-ю недѣ́лю постѡ́въ.

И҆ пое́тсѧ слꙋ́жба и҆́хъ, ꙗ҆́кѡ ᲂу҆ка́зано въ недѣ́лю г҃-ю постѡ́въ, кромѣ̀ поклоне́нїѧ креста̀, то́чїю на лїті́и. Сла́ва, мꙋ́ченикѡвъ, пи́сана на Гдⷭ҇и, воззва́хъ: И҆ ны́нѣ, трїѡ́ди. На стїхо́внѣ Сла́ва, мꙋ́ченикѡвъ: И҆ ны́нѣ, трїѡ́ди. На Бг҃ъ гдⷭ҇ь, тропа́рь воскре́сенъ, два́жды: Сла́ва, мꙋ́ченикѡвъ: И҆ ны́нѣ, Пречⷭ҇томꙋ твоемꙋ̀ ѻ҆́бразꙋ: катава́сїа трїѡ́ди.

🕅 А҆́ще ли слꙋчи́тсѧ м҃ мꙋ́ченикѡвъ въ понедѣ́льникъ в҃-ѧ, и҆лѝ г҃-ѧ, и҆лѝ д҃-ѧ, и҆лѝ є҃-ѧ, и҆лѝ ѕ҃-ѧ недѣ́ли постѡ́въ.

Въ недѣ́лю ве́чера пое́мъ, Блаже́нъ мꙋ́жъ: а҃-й а҆нтїфѡ́нъ. На Гдⷭ҇и, воззва́хъ: стїхи̑ры на і҃, трїѡ́ди днѐ на д҃, повторѧ́юще а҃-ю: и҆ мꙋ́ченикѡвъ на ѕ҃: Сла́ва, мꙋ́ченикѡвъ: И҆ ны́нѣ, бг҃оро́диченъ а҃-й. Вхо́дъ, прокі́менъ вели́кїй трїѡ́ди. И҆ чтє́нїѧ мꙋ́ченикѡвъ г҃. Та́же, Сподо́би, гдⷭ҇и, въ ве́черъ се́й: и҆ И҆спо́лнимъ вече́рнюю: На стїхо́внѣ трїѡ́ди самогла́сенъ днѐ, два́жды и҆ мꙋ́чениченъ: Сла́ва, мꙋ́ченикѡвъ: И҆ ны́нѣ, бг҃оро́диченъ, по гла́сꙋ, воскре́сенъ. По Ѻ҆́ч҃е на́шъ: тропа́рь мꙋ́ченикѡвъ: Сла́ва, и҆ ны́нѣ, бг҃оро́диченъ воскре́сенъ. Є҆ктенїа̀, Поми́лꙋй на́съ, бж҃е: и҆ покло́ны г҃ вели̑кїѧ, и҆ ѿпꙋ́стъ.

Полꙋ́нощницꙋ же пое́мъ по ѻ҆бы́чаю съ каѳі́смою, и҆ тропарѝ ѻ҆бы̑чныѧ. По Честнѣ́йшꙋю, г҃ покло́ны вели̑кїѧ.

На ᲂу҆́трени, на Бг҃ъ гдⷭ҇ь, тропа́рь мꙋ́ченикѡвъ два́жды: Сла́ва, и҆ ны́нѣ, бг҃оро́диченъ. По а҃-й и҆ по в҃-й каѳі́смѣ глаго́лемъ сѣда́льны трїѡ́ди: є҆ктєнїи́ же не глаго́лютсѧ. И҆ чте́нїе во є҆фре́мѣ. По г҃-й каѳі́смѣ глаго́летъ і҆ере́й є҆ктенїю̀ ма́лꙋю: и҆ сѣда́льны мꙋ́ченикѡвъ ѻ҆́ба: и҆ чте́нїе мꙋ́ченикѡвъ. Полѷеле́й и҆ сѣда́ленъ мꙋ́ченикѡвъ, два́жды: Сла́ва, и҆ ны́нѣ, бг҃оро́диченъ: и҆ чте́нїе мꙋ́ченикѡвъ. Степє́нна, а҃-й а҆нтїфѡ́нъ д҃-гѡ гла́са. Прокі́менъ и҆ є҆ѵⷢ҇лїе мꙋ́ченикѡвъ. Та́же ѱало́мъ н҃. Стїхи́ра мꙋ́ченикѡвъ. Канѡ́ны мꙋ́ченикѡвъ со і҆рмосо́мъ на и҃. Катава́сїа: Ѿве́рзꙋ ᲂу҆ста̀ моѧ̑: а҆ и҆дѣ́же трипѣ́снецъ, и҆ пое́мъ канѡ́нъ мꙋ́ченикѡвъ со і҆рмосо́мъ на ѕ҃: и҆ трипѣ́снецъ на и҃. Катава́сїа трїѡ́ди. По г҃-й пѣ́сни сѣда́ленъ мꙋ́ченикѡвъ, два́жды: Сла́ва, и҆ ны́нѣ, бг҃оро́диченъ. И҆ чте́нїе мꙋ́ченикѡвъ. По ѕ҃-й пѣ́сни конда́къ и҆ і҆́косъ, и҆ про́логъ. Свѣти́ленъ мꙋ́ченикѡвъ. Два́жды: Сла́ва, и҆ ны́нѣ, бг҃оро́диченъ. На хвали́техъ стїхи̑ры мꙋ́ченикѡвъ, на д҃ Сла́ва, мꙋ́ченикѡвъ: И҆ ны́нѣ, бг҃оро́диченъ є҆гѡ̀. Та́же настоѧ́тель и҆лѝ чте́цъ глаго́летъ: Сла́ва тебѣ̀, показа́вшемꙋ на́мъ свѣ́тъ. Посе́мъ є҆ктенїа̀: И҆спо́лнимъ ᲂу҆́треннюю: та́же на стїхо́внѣ самогла́сенъ днѐ, два́жды: и҆ мꙋ́чениченъ. Сла́ва, мꙋ́ченикѡвъ: И҆ ны́нѣ, бг҃оро́диченъ. Посе́мъ: Бла́го є҆́сть: глаго́лемъ є҆ди́ножды. По Ѻ҆́ч҃е на́шъ: тропа́рь мꙋ́ченикѡвъ. Сла́ва, и҆ ны́нѣ, бг҃оро́диченъ воскре́сенъ. Є҆ктенїа̀: Поми́лꙋй на́съ, бж҃е: и҆ трѝ покло́ны вели̑кїѧ, и҆ ча́съ пе́рвый. На часѣ́хъ тропа́рь глаго́лемъ мꙋ́ченикѡвъ: и҆ по трист҃о́мъ конда́къ и҆́хъ. И҆ на коне́цъ, г҃ покло́ны вели̑кїѧ, и҆ по покло́нѣхъ трист҃а́гѡ не глаго́лемъ, но глаго́лемъ: Хрⷭ҇тѐ свѣ́те: и҆ ѿпꙋ́стъ. Ча́съ же г҃ и҆ ѕ҃-й, и҆ ѳ҃-й, пое́мъ съ каѳі́смами, въ подо́бное и҆́хъ вре́мѧ, со чте́нїемъ. На ѕ҃-мъ часѣ̀ чте́тсѧ паремїа̀ днѐ, по чи́нꙋ є҆ѧ̀. [Зрѝ] Моли̑твы же вели́кагѡ васі́лїа по часѣ́хъ глаго́лемъ непремѣ́ннѡ, є҆́же є҆́сть: Влⷣко бж҃е ѻ҆́ч҃е: и҆, Бж҃е и҆ гдⷭ҇и си́лъ: и҆, Влⷣко гдⷭ҇и і҆и҃се хрⷭ҇тѐ: Є҆гда́ же пое́мъ полѷеле́й, на часѣ́хъ въ кампа́нъ не ᲂу҆дарѧ́емъ. По каѳі́смѣ чте́цъ глаго́летъ: Сла́ва, тропа́рь мꙋ́ченикѡвъ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ мꙋ́ченикѡвъ. По Честнѣ́йшꙋю, г҃ покло́ны вели̑кїѧ. По ѳ҃-мъ часѣ̀ блажє́нны глаго́лемъ поско́рꙋ безъ пѣ́нїѧ. По Ѡ҆сла́би, ѡ҆ста́ви: конда́къ хра́ма. Сла́ва, мꙋ́ченикѡвъ: И҆ ны́нѣ, хра́ма бцⷣы. [Зрѝ] А҆́ще ли нѣ́сть хра́ма бцⷣы. И҆ ны́нѣ, Предста́тельство хрⷭ҇тїа́нъ: Посе́мъ, Гдⷭ҇и, поми́лꙋй, м҃. Сла́ва, и҆ ны́нѣ: Честнѣ́йшꙋю херꙋві̑мъ: и҆ г҃ покло́ны вели̑кїѧ: та́же моли́тва, Всест҃а́ѧ трⷪ҇це: И҆ начина́емъ вече́рню по ѻ҆бы́чаю:

Настоѧ́тель и҆лѝ чте́цъ глаго́летъ: Прїиди́те, поклони́мсѧ, три́жды. И҆ пое́мъ вече́рню съ покло́ны, по чи́нꙋ по́стномꙋ. По ѻ҆бы́чной каѳі́смѣ, на Гдⷭ҇и, воззва́хъ, стїхи̑ры на і҃: Трїѡ́ди самогла́сенъ днѐ, два́жды: и҆ мꙋ́чениченъ: и҆ подо́бенъ трїѡ́ди, г҃: и҆ мꙋ́ченикѡвъ д҃. Сла́ва, мꙋ́ченикѡвъ: И҆ ны́нѣ, бг҃оро́диченъ, по гла́сꙋ ѻ҆бы́чный. [Зрѝ] А҆́ще ли къ средѣ̀, и҆лѝ пѧткꙋ̀, глаго́лемъ крⷭ҇тобг҃оро́диченъ, по гла́сꙋ сла́вника. Вхо́дъ со є҆ѵⷢ҇лїемъ. Свѣ́те ти́хїй: прокі́менъ и҆ чте́нїе днѐ. Да и҆спра́витсѧ моли́тва моѧ̀: и҆ г҃ покло́ны вели̑кїѧ, є҆ктенїѝ ма́лыѧ не глаго́лемъ. Прокі́менъ, а҆пⷭ҇лъ, а҆ллилꙋ́їа, є҆ѵⷢ҇лїе и҆ прича́стенъ мꙋ́ченикѡвъ. Лїтꙋргі́а преждесвѧще́ннаѧ по ѻ҆бы́чаю. На ѿпꙋ́стѣ і҆ере́й помина́етъ пре́жде пра́зднꙋемыхъ ст҃ы́хъ, пото́мъ наста́вшаго. [Зрѝ] Ст҃а́гѡ же прилꙋчи́вшагѡсѧ на рѧдꙋ̀, канѡ́нъ пое́мъ на ᲂу҆́трени по чи́нꙋ: Стїхи̑ры же є҆гѡ̀, ꙗ҆̀же пи̑саны, ве́черъ на Гдⷭ҇и, воззва́хъ, глаго́лемъ и҆̀хъ на хвали́техъ.

[Зрѝ] А҆́ще ли ко́еѧ вели́кїѧ ра́ди нꙋ́жды, въ па́мѧти ст҃ы́хъ вели́кихъ, и҆мꙋ́щихъ полѷеле́й, не слꙋчи́тсѧ бы́ти преждесвѧще́ннѣй лїтꙋргі́и: Часы̀ пое́мъ, ꙗ҆́коже вы́ше рече́сѧ. По ѳ҃-мъ часѣ̀ и҆ по моли́твѣ: Влⷣко гдⷭ҇и і҆и҃се хрⷭ҇тѐ, глаго́лемъ и҆ ѱало́мъ, Благословѝ, дꙋшѐ моѧ̀, гдⷭ҇а, и҆ всѧ̑ внꙋ́трєннѧѧ: Сла́ва, Хвалѝ, дꙋшѐ моѧ̀, гдⷭ҇а: И҆ ны́нѣ, Є҆диноро́дный сн҃е: и҆ Во црⷭ҇твїи твое́мъ: поско́рꙋ безъ пѣ́нїѧ. На блаже́ннахъ глаго́лемъ мꙋ́ченикѡвъ пѣ́снь г҃-ю и҆ ѕ҃. та́же а҆пⷭ҇лъ и҆ є҆ѵⷢ҇лїе мꙋ́ченикѡвъ. Посе́мъ, Помѧнѝ на́съ, гдⷭ҇и: По Ѡ҆сла́би, ѡ҆ста́ви: и҆ по Ѻ҆́ч҃е на́шъ: Конда́къ хра́ма. Сла́ва, мꙋ́ченикѡвъ: И҆ ны́нѣ, бцⷣы хра́ма. А҆́ще же нѣ́сть хра́ма бцⷣы, Предста́тельство хрїстїа́нъ: Та́же, Гдⷭ҇и, поми́лꙋй, м҃. И҆ покло́ны г҃ вели̑кїѧ. И҆ въ то вре́мѧ параекклисїа́рхъ зна́менꙋетъ въ два̀ кампа̑на. И҆ по г҃-хъ покло́нѣхъ вели́кихъ, глаго́лемъ: Прїиди́те, поклони́мсѧ: И҆ пое́мъ вече́рню съ покло́ны и҆ каѳі́смꙋ ѻ҆бы́чнꙋю. На Гдⷭ҇и, воззва́хъ, стїхи̑ры трїѡ́ди, подѡ́бны, г҃: И҆ ст҃а́гѡ, є҆гѡ́же наста̀ па́мѧть, г҃. Сла́ва, и҆ ны́нѣ, бг҃оро́диченъ. А҆́ще ли къ средѣ̀, и҆лѝ пѧткꙋ̀, глаго́лемъ: Сла́ва, и҆ ны́нѣ, крⷭ҇тобг҃оро́диченъ. Та́же, Свѣ́те ти́хїй: прокі́менъ и҆ чте́нїе трїѡ́ди, днѐ. На стїхо́внѣ днѐ трїѡ́ди. По Ны́нѣ ѿпꙋща́еши: и҆ по Ѻ҆́ч҃е на́шъ, тропа́рь, Бцⷣе дв҃о, ра́дꙋйсѧ: и҆ про́чее по по́стномꙋ. По Честнѣ́йшꙋю и҆ по покло́нѣхъ, глаго́лемъ Трист҃о́е. Гдⷭ҇и, поми́лꙋй, в҃і. Всесвѧта́ѧ трⷪ҇це: Та́же, Бꙋ́ди и҆́мѧ гдⷭ҇не: и҆ г҃ покло́ны: и҆ Благословлю̀ гдⷭ҇а: Досто́йно є҆́сть: И҆ ѿпꙋ́стъ. На ѿпꙋ́стѣ же помина́етъ наста́вшаго ст҃а́го. По ѿпꙋ́стѣ же вхо́димъ въ трапе́зꙋ, и҆ ꙗ҆ди́мъ два̀ варє́нїѧ съ є҆ле́емъ и҆ пїе́мъ вїно̀. Въ сре́дꙋ же и҆ пѧто́къ ꙗ҆ди́мъ два̀ варє́нїѧ безъ є҆ле́а и҆ пїе́мъ вїно̀.

🕅 А҆́ще ли слꙋчи́тсѧ м҃ мꙋ́ченикѡвъ во є҆ди́нъ ѿ дне́й по́стныхъ, пое́мъ слꙋ́жбꙋ и҆́хъ си́це.

На часѣ́хъ по Ѡ҆сла́би, ѡ҆ста́ви: и҆ по Ѻ҆́ч҃е на́шъ: кондакѝ по ᲂу҆ста́вꙋ: Та́же, Гдⷭ҇и, поми́лꙋй, м҃. Сла́ва, и҆ ны́нѣ, Честнѣ́йшꙋю херꙋві̑мъ: И҆ по покло́нѣхъ глаго́лемъ Трист҃о́е. Гдⷭ҇и, поми́лꙋй, в҃і. и҆ Всест҃а́ѧ трⷪ҇це: и҆ а҆́бїе начина́емъ вече́рню и҆ ѻ҆бы́чнꙋю каѳі́смꙋ: глаго́лютсѧ же є҆ктєнїѝ ма̑лыѧ по ко́емждо а҆нтїфѡ́нѣ. На Гдⷭ҇и, воззва́хъ, стїхи̑ры на і҃. Самогла́сенъ днѐ, два́жды и҆ мꙋ́чениченъ, и҆ подѡ́бны трїѡ́ди, г҃: и҆ мч҃никѡвъ, д҃. Сла́ва, мч҃никѡвъ: И҆ ны́нѣ: Пре́йде сѣ́нь зако́ннаѧ: Вхо́дъ. Та́же прокі́менъ и҆ чтє́нїѧ днѐ, и҆ мч҃никѡвъ чтє́нїѧ г҃. Та́же пое́мъ: Да и҆спра́витсѧ моли́тва моѧ̀: и҆ г҃ покло́ны, и҆ порѧ́дꙋ лїтꙋргі́а преждесщ҃е́ннаѧ.

А҆ и҆дѣ́же не бꙋ́детъ преждесщ҃е́нныѧ, по Ѡ҆сла́би, ѡ҆ста́ви: и҆ по покло́нѣхъ вели́кихъ, чте́цъ глаго́летъ: Прїиди́те, поклони́мсѧ: три́жды: и҆ покло́ны г҃. Та́же ѱало́мъ: Благословѝ, дꙋшѐ моѧ̀, гдⷭ҇а: И҆ пое́мъ вече́рню безъ покло́нѡвъ. По ѻ҆бы́чной каѳі́смѣ, стїхи̑ры на ѕ҃, трїѡ́ди, подѡ́бны, г҃: и҆ мч҃никѡвъ, г҃. Сла́ва, мч҃никѡвъ: И҆ ны́нѣ, бг҃оро́диченъ воскре́сенъ. Вхо́дъ, и҆ Свѣ́те ти́хїй: Прокі́менъ и҆ чтє́нїѧ днѐ, и҆ мч҃никѡвъ: и҆ а҆́бїе, Сподо́би, гдⷭ҇и: Та́же, И҆спо́лнимъ вече́рнюю моли́твꙋ: На стїхо́внѣ трїѡ́ди: Сла́ва, мꙋ́ченикѡвъ. И҆ ны́нѣ, бг҃оро́диченъ по гла́сꙋ. Ны́нѣ ѿпꙋща́еши: По трист҃о́мъ тропа́рь мч҃никѡвъ: Сла́ва, и҆ ны́нѣ: Гаврїи́лꙋ вѣща́вшꙋ: є҆ктенїа̀, Поми́лꙋй на́съ, бж҃е: Посе́мъ г҃ покло́ны вели̑кїѧ и҆ моли́тва: Всест҃а́ѧ трⷪ҇це: и҆ Благословлю̀ гдⷭ҇а: Досто́йно є҆́сть: и҆ ѿпꙋ́стъ.

Повече́рїе пое́мъ вели́кое безъ покло́нѡвъ. По а҃-мъ Трист҃о́мъ тропа́рь мч҃никѡвъ: Сла́ва, и҆ ны́нѣ, бг҃оро́диченъ воскре́сенъ, по гла́сꙋ. По в҃-мъ Трист҃о́мъ тропарѝ ѻ҆бы̑чныѧ: Поми́лꙋй на́съ, гдⷭ҇и: По Досто́йнѣ и҆ по Трист҃о́мъ, конда́къ мч҃никѡвъ. Гдⷭ҇и си́лъ, съ на́ми бꙋ́ди: не пое́мъ: по Честнѣ́йшꙋю, г҃ покло́ны вели̑кїѧ. Трист҃а́гѡ же не глаго́лемъ: а҆ ѿпꙋ́стъ ма́лый. Полꙋ́нощницꙋ же пое́мъ по ѻ҆бы́чаю съ каѳі́смою, ꙗ҆́коже предписа́сѧ въ понедѣ́льникъ в҃-ѧ недѣ́ли поста̀. Та́кожде и҆ ᲂу҆́треню и҆ всю̀ слꙋ́жбꙋ мч҃никѡвъ.

🕅 А҆́ще слꙋчи́тсѧ м҃ мч҃никѡвъ въ сꙋббѡ́тꙋ в҃- ю, и҆лѝ г҃-ю, и҆лѝ д҃-ю постѡ́въ.

Въ пѧто́къ ве́чера каѳі́сма рѧдова́ѧ. На Гдⷭ҇и, воззва́хъ, стїхи̑ры на і҃: трїѡ́ди самогла́сенъ два́жды и҆ ѻ҆ктѡ́иха мч҃ничны д҃: и҆ мꙋ́ченикѡвъ, д҃. Сла́ва, мч҃никѡвъ: И҆ ны́нѣ, бг҃оро́диченъ а҃-й гла́са. Вхо́дъ. Прокі́менъ и҆ чтє́нїѧ днѐ: и҆ мч҃никѡвъ, г҃. Да и҆спра́витсѧ моли́тва моѧ̀: и҆ прѡ́чаѧ преждесвѧще́нныхъ.

[Зрѝ] А҆́ще ли нѣ́сть преждесщ҃е́нныхъ, въ пѧто́къ ве́чера, на Гдⷭ҇и, воззва́хъ, стїхи̑ры мч҃никѡвъ на ѕ҃. Сла́ва, мч҃никѡвъ: И҆ ны́нѣ, бг҃оро́диченъ, а҃-й гла́са. Вхо́дъ. Прокі́менъ и҆ чтє́нїѧ днѐ, и҆ ст҃ы́хъ. Та́же: Сподо́би, гдⷭ҇и: На стїхо́внѣ самогла́сенъ трїѡ́ди, два́жды: и҆ мч҃ниченъ ѻ҆ктѡ́иха, по гла́сꙋ: Сла́ва мч҃никѡвъ: И҆ ны́нѣ, бг҃оро́диченъ воскре́сенъ. По Ны́нѣ ѿпꙋща́еши: тропа́рь мч҃никѡвъ. Сла́ва, и҆ ны́нѣ, бг҃оро́диченъ воскре́сенъ настоѧ́щагѡ гла́са: є҆ктенїа̀ и҆ покло́ны г҃. Та́же, моли́тва, Всест҃а́ѧ трⷪ҇це: Бꙋ́ди и҆́мѧ гдⷭ҇не: и҆ ѱало́мъ л҃г, Благословлю̀ гдⷭ҇а: Досто́йно є҆́сть: И҆ ѿпꙋ́стъ.

[Зрѝ] Повече́рїе же пое́мъ вели́кое, на не́мже пое́мъ четверопѣ́снецъ сꙋббѡ́ты.

На ᲂу҆́трени и҆ на часѣ́хъ пое́мъ слꙋ́жбꙋ є҆ди́ныхъ мч҃никѡвъ, ꙗ҆́коже предписа́сѧ.

На лїтꙋргі́и, слꙋ́жба днѐ и҆ мч҃никѡвъ.

🕅 А҆́ще слꙋчи́тсѧ м҃ мч҃никѡвъ во в҃-ю, д҃-ю и҆ є҃-ю недѣ́лю постѡ́въ:

Въ сꙋббѡ́тꙋ ве́чера, на ма́лѣй вече́рни стїхи̑ры воскрє́сны и҆ бцⷣы, по ѻ҆бы́чаю. На вели́цѣй вече́рни, на Гдⷭ҇и, воззва́хъ, стїхи̑ры воскрє́сны г҃: и҆ ꙾восто́ченъ꙾ 1 є҆ди́нъ: и҆ мч҃никѡвъ на ѕ҃. Сла́ва, мч҃никѡвъ: И҆ ны́нѣ, бг҃оро́диченъ а҃-й гла́са. Вхо́дъ и҆ чте́нїе мч҃никѡвъ. На лїті́и, стїхи́ра хра́ма и҆ мч҃никѡвъ стїхѡ́вныѧ: Сла́ва, мч҃никѡвъ, пи́сана по н҃ ѱалмѣ̀: И҆ ны́нѣ, бг҃оро́диченъ. На стїхо́внѣ стїхи̑ры воскрє́сны, по а҆лфави́тꙋ. Сла́ва, мч҃никѡвъ: И҆ ны́нѣ, бг҃оро́диченъ. На благослове́нїи хлѣ́бѡвъ, Бцⷣе дв҃о: три́жды, и҆ чте́нїе во а҆пⷭ҇льскихъ посла́нїихъ. На Бг҃ъ гдⷭ҇ь, тропа́рь воскре́сенъ, два́жды. Сла́ва, мч҃никѡвъ. И҆ ны́нѣ, бг҃оро́диченъ, по гла́сꙋ тропарѧ̀. По каѳі́смѣ: сѣда́льны воскрє́сны и҆ бг҃орѡ́дичны и҆́хъ. И҆ чте́нїе во є҆ѵⷢ҇лїи. Полѷеле́й и҆ сѣда́льны мч҃никѡвъ ѻ҆́ба. Сла́ва, по полѷеле́и сѣда́ленъ: И҆ ны́нѣ, бг҃оро́диченъ: И҆ чте́нїе мч҃никѡвъ. Степє́нна и҆ прокі́менъ гла́са: и҆ є҆ѵⷢ҇лїе воскре́сно. Ѱало́мъ н҃: Сла́ва, стїхи́ра, гла́съ и҃: Покаѧ́нїѧ ѿве́рзи мѝ двє́ри: и҆ прѡ́чаѧ. Канѡ́нъ воскре́сенъ, со і҆рмосо́мъ, на д҃: и҆ трїѡ́ди на д҃: и҆ мч҃никѡвъ на ѕ҃. Катава́сїа: Ѿве́рзꙋ ᲂу҆ста̀ моѧ̑: По г҃ пѣ́сни конда́къ и҆ і҆́косъ, сѣда́ленъ мч҃никѡвъ, два́жды: Сла́ва, и҆ ны́нѣ, бг҃оро́диченъ: И҆ чте́нїе мч҃никѡвъ. По ѕ҃ пѣ́сни, конда́къ и҆ і҆́косъ воскре́сенъ. По ѳ҃-й пѣ́сни, свѣти́ленъ воскре́сенъ: Сла́ва, мч҃никѡвъ: И҆ ны́нѣ, бг҃оро́диченъ воскре́сенъ. На хвали́техъ, стїхи̑ры воскрє́сны, д҃: и҆ мч҃никѡвъ со сла́внымъ, д҃, съ припѣ́вы и҆́хъ. Та́же, припѣ́въ: Воскреснѝ, гдⷭ҇и бж҃е мо́й: И҆ пое́мъ самогла́снꙋ стїхи́рꙋ трїѡ́ди: Сла́ва, тꙋ́южде: И҆ ны́нѣ, Преблагослове́нна є҆сѝ: Славосло́вїе вели́кое. Тропа́рь воскре́сенъ: є҆ктєнїѝ: и҆ ѿпꙋ́стъ. И҆ и҆схожде́нїе въ притво́ръ. Сла́ва, и҆ ны́нѣ, стїхи́ра є҆ѵⷢ҇льскаѧ. И҆ ча́съ а҃. Тропа́рь воскре́сенъ: Сла́ва, мч҃никѡвъ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ днѐ: и҆ соверше́нный ѿпꙋ́стъ.

На лїтꙋргі́и блажє́нна гла́са на ѕ҃: и҆ мч҃никѡвъ пѣ́снь г҃-ѧ, на д҃: И҆ про́чаѧ слꙋ́жба днѐ и҆ мч҃никѡвъ. Ст҃а́гѡ же григо́рїа слꙋ́жба пое́тсѧ, є҆гда̀ разсꙋ́дитъ є҆кклисїа́рхъ: и҆лѝ мꙋ́ченикѡвъ слꙋ́жбꙋ пое́мъ въ сꙋббѡ́тꙋ в҃-ю: та́кожде и҆ д҃-ю, и҆ є҃-ю недѣ́ли, слꙋ̑жбы трїѡ́ди ст҃ы́хъ ѡ҆ставлѧ́ютсѧ: и҆ пое́тсѧ слꙋ́жба мч҃никѡвъ по ᲂу҆ста́вꙋ.

🕅 А҆́ще ли слꙋчи́тсѧ м҃ мч҃никѡвъ въ недѣ́лю г҃-ю постѡ́въ, крⷭ҇топокло́ннꙋю.

Въ сꙋббѡ́тꙋ ве́чера на ма́лѣй вече́рни стїхи̑ры на Гдⷭ҇и, воззва́хъ, и҆ на стїхи́рахъ, всѐ трїѡ́ди по ѻ҆бы́чаю.

На вели́цѣй вече́рни, по каѳі́смѣ, на Гдⷭ҇и, воззва́хъ, стїхи̑ры воскрє́сны, г҃: и҆ крⷭ҇та̀ д҃: и҆ мч҃никѡвъ г҃. Сла́ва, крⷭ҇та̀: И҆ ны́нѣ, бг҃оро́диченъ а҃-й гла́са. Прокі́менъ днѐ: и҆ парємїѝ мч҃никѡвъ. На лїті́и стїхи́ра хра́ма: и҆ мч҃никѡвъ хвали̑тны: Сла́ва, мч҃никѡвъ: И҆ ны́нѣ, крⷭ҇та̀. На стїхо́внѣ стїхи̑ры воскрє́сны: Сла́ва, мч҃никѡвъ: И҆ ны́нѣ, крⷭ҇та̀. На благослове́нїи хлѣ́бѡвъ, Бцⷣе дв҃о, два́жды: и҆ крⷭ҇та̀, є҆ди́ножды: Спасѝ, гдⷭ҇и, лю́ди твоѧ̑:

На ᲂу҆́трени на Бг҃ъ гдⷭ҇ь, тропа́рь воскре́сенъ, два́жды: Сла́ва, мч҃никѡвъ: И҆ ны́нѣ, крⷭ҇та̀. По каѳі́смахъ сѣда́льны воскрє́сны и҆ бг҃орѡ́дичны и҆́хъ. И҆ чте́нїе во є҆ѵⷢ҇лїи толково́мъ. Полѷеле́й мꙋ́ченикѡвъ и҆ сѣда́льны ѻ҆́ба: Сла́ва, и҆ ны́нѣ: бг҃оро́диченъ и҆ чте́нїе мч҃никѡвъ. Степє́нна гла́са. Прокі́менъ: и҆ є҆ѵⷢ҇лїе воскре́сно. Воскресе́нїе хрⷭ҇то́во: Ѱало́мъ н҃: Покаѧ́нїѧ ѿве́рзи мѝ двє́ри. Канѡ́нъ воскре́сенъ, со і҆рмосо́мъ на д҃: и҆ мч҃никѡвъ на д҃: и҆ крⷭ҇та̀ на ѕ҃. Катава́сїа крⷭ҇та̀: Бжⷭ҇твеннѣйшїй проѡбразѝ: По г҃ пѣ́сни, конда́къ (с. 105) мч҃никѡвъ и҆ і҆́косъ: и҆ сѣда́ленъ два́жды: Сла́ва, и҆ ны́нѣ, крⷭ҇та̀: и҆ чте́нїе мч҃никѡвъ. По ѕ҃ пѣ́сни, конда́къ крⷭ҇та̀ и҆ і҆́косъ. На ѳ҃ пѣ́сни пое́мъ Честнѣ́йшꙋю: Свѣти́ленъ воскре́сенъ: Сла́ва, мꙋ́ченикѡвъ: И҆ ны́нѣ, крⷭ҇та̀. На хвали́техъ стїхи̑ры воскрє́сны, д҃: и҆ крⷭ҇та̀, подѡ́бны г҃, а҃-й два́жды, съ припѣ́вы и҆́хъ. Та́же припѣ́въ: Воскреснѝ, гдⷭ҇и бж҃е мо́й: и҆ пое́мъ самогла́снꙋ стїхи́рꙋ днѐ трїѡ́ди: Сла́ва, тꙋ́южде: И҆ ны́нѣ: Преблагослове́нна є҆сѝ: Славосло́вїе вели́кое: трист҃о́е пѣ́нїемъ. Пое́мъ вхо́дъ. И҆ глаго́лемъ тропа́рь: Спасѝ, гдⷭ҇и, лю́ди твоѧ̑: три́жды. И҆ быва́етъ поклоне́нїе чⷭ҇тна́гѡ крⷭ҇та̀ по ѻ҆бы́чаю, ꙗ҆́коже ꙗ҆́вствꙋетъ въ трїѡ́ди. Та́же є҆ктєнїѝ и҆ ѿпꙋ́стъ, и҆ и҆схожде́нїе: Сла́ва, и҆ ны́нѣ, стїхи́ра є҆ѵⷢ҇льскаѧ и҆ поꙋче́нїе стꙋді́тово. И҆ ча́съ а҃, въ притво́рѣ. На часѣ́хъ тропа́рь воскре́сенъ: Сла́ва, крⷭ҇та̀: И҆ ны́нѣ, бг҃оро́диченъ часѡ́въ, По Ѻ҆́ч҃е на́шъ, конда́къ воскре́сенъ. На г҃-мъ часѣ̀ тропа́рь воскре́сенъ: Сла́ва, мч҃никѡвъ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ мч҃никѡвъ. Та́кожде и҆ на про́чихъ часѣ́хъ, глаго́лемъ премѣнѧ́юще.

На лїтꙋргі́и, блажє́нна гла́са на д҃: и҆ крⷭ҇та̀ пѣ́снь г҃, на д҃: и҆ мч҃никѡвъ пѣ́снь ѕ҃-ѧ, на д҃. По вхо́дѣ тропа́рь воскре́сенъ и҆ крⷭ҇та̀, и҆ мч҃никѡвъ. Та́же конда́къ воскре́сенъ, Сла́ва, мч҃никѡвъ: И҆ ны́нѣ, крⷭ҇та̀. Прокі́менъ, а҆пⷭ҇лъ, а҆ллилꙋ́їа, є҆ѵⷢ҇лїе и҆ прича́стенъ пре́жде крⷭ҇та̀, пото́мъ мч҃никѡвъ.

🕅 А҆́ще ли слꙋчи́тсѧ ст҃ы́хъ м҃ мꙋ́ченикъ въ сре́дꙋ д҃-ю постѡ́въ.

Пое́мъ слꙋ́жбꙋ и҆́хъ, пре́жде во вто́рникъ тоѧ̑ седми́цы: то́чїю во вто́рникъ ве́чера: на Гдⷭ҇и, воззва́хъ, стїхи̑ры, самогла́сенъ днѐ трїѡ́ди, два́жды: и҆ крⷭ҇та̀ д҃: и҆ мч҃никѡвъ д҃: Сла́ва, мꙋ́ченикѡвъ: И҆ ны́нѣ, крⷭ҇та̀. Дрꙋгі̑ѧ же стїхи̑ры крⷭ҇та̀ пое́мъ въ сре́дꙋ на хвали́техъ. Та́же, вхо́дъ, прокі́менъ, и҆ чтє́нїѧ днѐ, и҆ Да и҆спра́витсѧ:

А҆́ще же не бꙋ́детъ преждесщ҃е́нныѧ: И҆ во вто́рникъ ве́чера, На Гдⷭ҇и, воззва́хъ, стїхи̑ры крⷭ҇та̀ на ѕ҃: ст҃ы́хъ же мч҃никѡвъ м҃, ѿдае́тсѧ пра́здникъ на часѣ́хъ, ꙗ҆́коже ᲂу҆каза́сѧ въ понедѣ́льникъ в҃-ѧ недѣ́ли постѡ́въ.

🕅 А҆́ще ли слꙋчи́тсѧ м҃ мч҃никъ въ четверто́къ вели́кагѡ канѡ́на:

И҆ пое́тсѧ слꙋ́жба и҆́хъ всѧ̀ во вто́рникъ: напре́дь тоѧ́же недѣ́ли.

🕅 А҆́ще ли слꙋчи́тсѧ м҃ мч҃никъ въ сꙋббѡ́тꙋ а҆ка́ѳїста:

И҆ пое́мъ слꙋ́жбꙋ и҆́хъ въ недѣ́лю є҃-ю постѡ́въ.

* * *

1

꙾А҆нато́лїевъ꙾

Комментарии для сайта Cackle