Библиотеке требуются волонтёры

Мѣ́сѧца тогѡ́же въ і҃-й де́нь. Ст҃а́гѡ мч҃ника кодра́та, и҆ дрꙋжи́ны є҆гѡ̀.

На Гдⷭ҇и, воззва́хъ, стїхи̑ры, гла́съ а҃. Подо́бенъ: Нб҃сныхъ чинѡ́въ:

Съ прехва́льнымъ кодра́томъ ꙳ да воспое́тсѧ свѣ́тлѡ кѷпрїа́нъ вели́кїй, ꙳ дїонѵ̑сїа два̀, и҆ а҆не́ктъ досто́йнѡ, ꙳ крі́скъ вкꙋ́пѣ, и҆ сла́вный па́ѵелъ вѣ́рнѡ: ꙳ ꙗ҆́кѡ страда́льцы гдⷭ҇ни бг҃овѣнча́нны, ꙳ и҆ моли́твєнницы на́ши теплѣ́йшїи.

Свѧщеннопобѣ́дныхъ мꙋ́ченикѡвъ, и҆ побѣдоно́сныхъ ꙳ ли́къ дне́сь дрꙋгі́й ꙗ҆ви́сѧ, ꙳ ѡ҆зарѧ́ющь собо́ръ бж҃е́ственныхъ страстоте́рпцєвъ: ꙳ тве́рдое число̀, и҆збра́нное во́инство, ꙳ є҆мꙋ́же нача́льствꙋетъ кодра́тъ, ꙳ благосла́вный побѣди́тель проѧвлѧ́емь.

Ри́торскїѧ ᲂу҆́бѡ мꙋ́дрости, многопи̑саннаѧ плетє́нїѧ, ꙳ сѣчи́тельнымъ твои́мъ сло́вомъ ꙳ разори́лъ є҆сѝ ꙗ҆́кѡ мглꙋ̀, прехва́льный кодра́те. ꙳ наꙋча́еши вѣ́рнѡ, и҆ стра́ждеши терпѣли́внѡ за хрⷭ҇та̀, ꙳ во ѻ҆бои́хъ благоꙋкраша́ѧсѧ, ꙳ и҆ вкꙋ́пѣ со страстоте́рпцы вѣнча́емь.

Сла́ва, и҆ ны́нѣ, бг҃оро́диченъ, гла́съ и҆ подо́бенъ то́йже:

Ѡ҆держи́мы прегрѣшє́нїи ненаде́жными, чⷭ҇таѧ, ꙳ тѧ̀ предста́тельницꙋ є҆ди́нꙋ стѧжа́вше, дв҃о, ꙳ вопїе́мъ благода́рственнѡ: ꙳ ѡ҆чи́сти ны̀, прест҃а́ѧ бг҃оневѣ́сто. ꙳ Ты́ бо є҆сѝ мі́ра прибѣ́жище, ꙳ и҆ застꙋпле́нїе ро́да на́шегѡ.

Крⷭ҇тобг҃оро́диченъ, подо́бенъ то́йже:

Воздви́жена ꙗ҆́кѡ ви́дѣ на крⷭ҇тѣ̀ а҆́гнца, ꙳ непоро́чнаѧ дв҃а пла́чꙋщи вопїѧ́ше: ꙳ сла́дкое моѐ ча́до, ꙳ что̀ но́вое и҆ пресла́вное видѣ́нїе; ꙳ ка́кѡ содержа́й всѧ́чєскаѧ го́рстїю, ꙳ на дре́вѣ пригвожда́ешисѧ пло́тїю;

Канѡ́нъ кѵ́ръ і҆ѡ́сифа.

Гла́съ д҃. Пѣ́снь а҃. І҆рмо́съ:

Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀ дꙋшѝ трича́стное потопѝ, молю́сѧ: да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.

Мꙋ́ченикѡвъ свѧще́нныхъ, свѧще́ннѡ страда́вшихъ, свѧще́нный и҆ чꙋ́дный наста̀ пра́здникъ, свѣтозаре́нїемъ дх҃а всѧ̑ свѣтоводѧ́щи, соше́дшесѧ празднолю́бцы, по до́лгꙋ си́хъ ᲂу҆блажи́мъ.

Ꙗ҆́кѡ со́лнце свѣ́тлое, добродѣ́телей свѣтоно́сїемъ возсїѧ́лъ є҆сѝ на́мъ, кодра́те страда́льче, свѣтолꙋ́чными твои́ми сїѧ̑нїи, тмꙋ̀ многобо́жїѧ ѿгонѧ̀ блаже́нне, и҆ просвѣща́ѧ вѣ́рныхъ составлє́нїѧ.

Ка́мень жи́зни і҆и҃са сп҃са возвѣща́юще бг҃а, пострада́сте тве́рдѡ, и҆ и҆сто́чникъ свѧще́нїѧ, ка́мень прїе́мшїи, крове́й течє́нїѧ содѣ́ласте, мч҃ницы сла́внїи.

Бг҃оро́диченъ:

Ѿ тимѣ́нїѧ страсте́й, помышле́нїй треволне́нїѧ, ѿ стрѣ́лъ вра́жїихъ, ѿ всѧ́кагѡ прило́га сопроти́вна спасѝ, чⷭ҇таѧ бг҃ороди́тельнице, дꙋ́шы пою́щихъ твоѐ несказа́нное рождество̀, всенепоро́чнаѧ.

Пѣ́снь г҃. І҆рмо́съ:

Ꙗ҆́кѡ непло́ды родѝ ѿ ꙗ҆зы̑къ цр҃ковь, и҆ мно́гое въ ча́дѣхъ и҆знемо́же со́нмище, чꙋ́дномꙋ бг҃ꙋ на́шемꙋ возопїи́мъ: ст҃ъ є҆сѝ, гдⷭ҇и.

Тве́рдїи а҆дама́нти, ᲂу҆бива́емїи мече́мъ, и҆ болѣ́зней ви́дѡмъ приѡбща́ющесѧ терпѣли́внѡ, чꙋ́дномꙋ бг҃ꙋ на́шемꙋ взыва́хꙋ: ст҃ъ є҆сѝ, гдⷭ҇и.

Премꙋ́дростїю кодра́тъ бг҃ода́нною ᲂу҆празднѝ є҆́ллинскꙋю мꙋ́дрость, любопрѣ̑нїѧ стражда̀, и҆ свои́ми кро́вьми, дх҃омъ бжⷭ҇твеннымъ ᲂу҆добрѧ́ѧсѧ.

Съ кодра́томъ а҆не́кта, и҆ съ па́ѵломъ криске́нта, кѷпрїа́на бжⷭ҇твеннаго, и҆ дїонѵ́сїа вѣ́рнїи благочестномꙋ́дреннѡ пѣ́сньми вѣнча́емъ, вѣ́рою пострада́вшихъ.

Бг҃оро́диченъ:

Нижѐ нб҃сный ᲂу҆́мъ, па́че ᲂу҆ма̀ рождества̀ твоегѡ̀ мо́жетъ сказа́ти, ѻ҆трокови́це: ᲂу҆ма́ бо пе́рвагѡ во ᲂу҆тро́бѣ сло́во, чⷭ҇таѧ, зачала̀ є҆сѝ, всѧ́чєскаѧ сло́вомъ соста́вльшаго.

Сѣда́ленъ, гла́съ д҃. Подо́бенъ: Вознесы́йсѧ:

Терпѣ́пїемъ лю́тыхъ ᲂу҆мертви́лъ є҆сѝ го́рдаго врага̀, страстоте́рпче, ме́чнꙋю сме́рть претерпѣ́лъ є҆сѝ, вкꙋ́пѣ со стра́ждꙋщими съ тобо́ю всемꙋ́дрыми, кодра́те. тѣ́мже пра́зднꙋемъ честнꙋ́ю ва́шꙋ па́мѧть, вопїю́ще: помѧни́те на́съ ко влⷣцѣ, непобѣди́мїи мꙋ́чєницы.

Сла́ва, и҆ ны́нѣ, бг҃оро́диченъ:

Нечи́стыхъ помыслѡ́въ мои́хъ мно́жество, и҆ безмѣ́стныхъ мы́слей ѡ҆бꙋрева̑нїѧ, кто̀ и҆зрещѝ мо́жетъ, всенепоро́чнаѧ; настоѧ̑нїѧ же безпло́тныхъ вра̑гъ мои́хъ кто̀ и҆сповѣ́сть, и҆ си́хъ ѕло́бꙋ; но твое́ю мольбо́ю, блага́ѧ, си́хъ мнѣ̀ всѣ́хъ и҆збавле́нїе да́рꙋй.

Крⷭ҇тобг҃оро́диченъ:

И҆́же ѿ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве.

Пѣ́снь д҃. І҆рмо́съ:

Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Мꙋ́дростїю твои́хъ слове́съ, немꙋ̑дрыѧ посрами́лъ є҆сѝ, и҆ наказа́нїемъ бг҃ови́дныхъ ᲂу҆че́нїй твои́хъ, мꙋ́чениче кодра́те, ᲂу҆лови́лъ є҆сѝ бжⷭ҇твеннаго а҆не́кта: влⷣцѣ твоемꙋ̀ приво́диши терпѣли́ва мꙋ́ченика.

Ѿ пеле́нъ присво́илсѧ є҆сѝ всѧ̑ сотво́ршемꙋ, и҆здѣ́тска соверше́нна мꙋ́жа смы́слъ и҆збра́въ, и҆ премꙋ́дрости возжелѣ́въ, ве́сь бы́лъ є҆сѝ чистѣ́йшее, мꙋ́чениче, хрⷭ҇то́во ѻ҆би́телище.

Шестосвѣ́тлый свѣ́щникъ мꙋ́ченикѡвъ твои́хъ, гдⷭ҇и, та́йнымъ є҆ле́емъ напои́всѧ, ѿгна̀ многобо́жїѧ но́щь, и҆ ѡ҆зарѝ зовꙋ́щыѧ: сла́ва, хрⷭ҇тѐ, си́лѣ твое́й.

Бг҃оро́диченъ:

Ст҃а́ѧ бцⷣа, въ не́йже всели́тисѧ благоволѝ, ꙗ҆́кѡ благово́ненъ хра́мъ, сло́во ѻ҆́ч҃ее є҆диносꙋ́щное, не ѡ҆палѝ ложе́снъ, не болѣ́знова: и҆́бо родѝ є҆мманꙋ́ила, бг҃а и҆ чл҃вѣ́ка.

Пѣ́снь є҃. І҆рмо́съ:

Просвѣще́нїе твоѐ, гдⷭ҇и, низпослѝ на́мъ, и҆ ѿ мглы̀ прегрѣше́нїй разрѣши́ ны, бла́же, тво́й ми́ръ да́рꙋѧй.

Просвѣще́нїемъ ра́зꙋма, неразꙋ́мїѧ мглꙋ̀ ѿгонѧ̀, гдⷭ҇еви приво́диши собо́ръ страда́лєцъ, мꙋ́дре кодра́те, съ ни́ми вѣнча́емь.

По́стнически пе́рвѣе побѣди́въ страсте́й привозста̑нїѧ, второ́е погꙋби́лъ є҆сѝ держа́вꙋ ѕлочести́выхъ, кодра́те мꙋ́чениче, пострада́въ крѣпча́йше.

И҆сполнѧ́етсѧ невла́жный ка́мень пролїѧ́ньми честны́хъ твои́хъ крове́й, и҆ стрꙋи̑ свѣ̑тлы дае́тъ вѣ̑рнымъ, ѡ҆свѧща́ѧ бжⷭ҇твенными манове́ньми.

Бг҃оро́диченъ:

Созда́вый, пречⷭ҇таѧ, є҆́ѵꙋ ѿ ребра̀, и҆зъ твоеѧ̀ чи́стыѧ ᲂу҆тро́бы зи́ждетсѧ, спастѝ а҆да́ма за благоꙋтро́бїе восхотѣ́въ, ꙗ҆́кѡ чл҃вѣколю́бецъ.

Пѣ́снь ѕ҃. І҆рмо́съ:

Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ.

Шесточи́сленный страстоте́рпєцъ ли́къ на́мъ возсїѧ̀, ꙗ҆́коже ѕвѣ́зды на церко́внѣй честнѣ́й тве́рди, вѣ̑рныѧ просвѣща́ѧй и҆ пре́лести тмꙋ̀ разгонѧ́ѧй.

Пꙋчи́нꙋ мꙋ́къ преидо́сте, мꙋ́чєницы, нево́лненнѡ, и҆ вы́шнюю тишинꙋ̀ полꙋчи́сте, вѣ́рныхъ приста́нище бы́вше, и҆ моли́твенницы теплѣ́йшїи.

Да похва́лимъ со а҆не́ктомъ кодра́та сла́внаго, и҆ съ па́ѵломъ дїонѵ́сїа, криске́нта, кѷпрїа́на, хрⷭ҇то́ва вїногра́да доброплѡ́дныѧ рѡ́зги.

Бг҃оро́диченъ:

Ѡ҆н҃беси́ла є҆сѝ ѡ҆зе́мствованное є҆стество̀, всенепоро́чнаѧ, человѣ́кѡвъ, и҆ и҆стлѣ́вшее сїѐ новосодѣ́лала є҆сѝ: сегѡ̀ ра́ди, ѻ҆трокови́це, всѝ немо́лчными гла́сы тѧ̀ сла́вимъ.

Пѣ́снь з҃. І҆рмо́съ:

Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше: препѣ́тый гдⷭ҇и, бж҃е ѻ҆тє́цъ на́шихъ, благослове́нъ є҆сѝ.

Во ѻ҆гнѝ мꙋче́нїй свы́ше прїе́млюще ро́сꙋ терпѣ́нїѧ, со ѻ҆́троки до́блїи взыва́хꙋ мꙋ́чєницы: препѣ́тый гдⷭ҇и, бж҃е ѻ҆тє́цъ на́шихъ, благослове́нъ є҆сѝ.

Ѡ҆дожде́нїемъ честны́ѧ кро́ве ва́шеѧ, страстоте́рпцы, ка́мень невла́жный пре́жде и҆спо́лнисѧ, стрꙋи̑ пролива́ющъ и҆сцѣле́нїй, пою́щымъ: бж҃е ѻ҆тє́цъ, благослове́нъ є҆сѝ.

Ꙗ҆́кѡ мѷрополо́жница мы́сленнаѧ, мѵ́ро врачева́нїи, кодра́те, моще́й твои́хъ ра́ка и҆сточа́етъ, страсте́й ѿгонѧ́щи ѕлосмра́дїе, и҆ ѡ҆палѧ́ющи де́мѡнѡвъ ѡ҆полчє́нїѧ си́лою бжⷭ҇твенною.

Бг҃оро́диченъ:

Благослове́нъ пло́дъ благослове́нныѧ ᲂу҆тро́бы твоеѧ̀, є҆го́же благословѧ́тъ нбⷭ҇ныѧ си̑лы и҆ человѣ́честїи собо́ри, на́съ и҆зба́вльшаго ѿ клѧ́твы дре́внїѧ, благослове́ннаѧ.

Пѣ́снь и҃. І҆рмо́съ:

И҆зба́вителю всѣ́хъ, всеси́льне, посредѣ̀ пла́мене благоче́ствовавшыѧ, снизше́дъ, ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀, благослови́те, по́йте гдⷭ҇а.

Просвѣ́щсѧ страда́нїй свѣ́тлостїю, вѣнцено́сецъ гдⷭ҇ꙋ предстои́ши со страда́вшими съ тобо́ю, сла́вне, воспѣва́ѧ, кодра́те: всѧ̑ дѣла̀, благослови́те, по́йте гдⷭ҇а.

Добродѣ́телей свѣ́томъ ᲂу҆добрѧ́емь, при кончи́нѣ мꙋ́ченическꙋю свѣ́тлость наслѣ́довалъ є҆сѝ, всемꙋ́дре, воспѣва́ѧ, кодра́те: всѧ̑ дѣла̀, благослови́те, по́йте гдⷭ҇а.

Пред̾ѡграждє́нїѧ корі́нѳъ стѧжа̀, ст҃ы́хъ честны̑ѧ мѡ́щи, и҆ врачева́нїе безме́здно хра́мъ, и҆дѣ́же вѣ́рою всѧ́къ притека́ѧй, болѣ́зни и҆ страсте́й и҆змѣнѧ́етсѧ.

Бг҃оро́диченъ:

И҆зба́вльшисѧ клѧ́твы прама́тернїѧ тобо́ю, чⷭ҇таѧ бг҃омт҃и, благослове́ннаѧ влⷣчце, благослови́мъ тѧ̀ вѣ́рою и҆ пѣсносло́вимъ, прест҃а́ѧ дв҃о бг҃оневѣ́сто.

Пѣ́снь ѳ҃. І҆рмо́съ:

Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ. тѣ́мъ тѧ̀ всѝ велича́емъ.

Гноє́нїѧ ва̑ша мꙋ́ченичєскаѧ и҆спꙋща́ютъ благово́нїе, по́лно благода́ти, крѡ́ви си́хъ цѣле́бъ и҆злива́ютъ то́ки бжⷭ҇твеннымъ дх҃омъ, и҆ стра̑сти дꙋшетлѣ̑нныѧ и҆сцѣлѧ́ютъ: ꙗ҆̀же досто́йнѡ ᲂу҆блажи́мъ.

Красе́нъ ꙗ҆́звъ добро́тами бы́въ, а҆́гг҃лѡмъ ᲂу҆подо́билсѧ є҆сѝ: кро́вїю же и҆злїѧ́нною, кодра́те, всѣ́дъ ꙗ҆́кѡ на колесни́цꙋ, возлетѣ́лъ є҆сѝ къ вы̑шнимъ црⷭ҇твѡмъ, по́чєсти болѣ́зней прїе́млѧ.

И҆сточа́ѧ бжⷭ҇твеннꙋю сла́дость и҆зъ ᲂу҆́стъ, страда́льческїй собо́ръ ᲂу҆вѣща́лъ є҆сѝ, мꙋ́чениче кодра́те, страда́ти съ тобо́ю, а҆не́кта и҆ па́ѵла, и҆ криске́нта, кѷпрїа́на же и҆ бжⷭ҇твеннаго дїонѵ́сїа: съ ни́миже ликꙋ́еши, досточꙋ́дне.

Де́нь пра́здника ва́шегѡ страда́нїѧ, страстоте́рпцы, всѝ почита́емъ: въ се́й бо вѣне́цъ нетлѣ́нїѧ взе́мше, сы́нове бы́сте свѣ́та же и҆ днѐ, ликꙋ́юще ѻ҆́крестъ престо́ла всецр҃ѧ̀.

Бг҃оро́диченъ:

Ꙗ҆́вльшисѧ всѣ́хъ творца̀ роди́тельница, па́че всѧ́кагѡ ᲂу҆ма̀, всенепоро́чнаѧ, нб҃е́съ вы́шши показа́ласѧ є҆сѝ, и҆ всѣ́ми влады́чествꙋющи, дв҃о бг҃ороди́тельнице нескве́рнаѧ: тѣ́мъ тѧ̀ всѝ непреста́ннѡ велича́емъ.

Комментарии для сайта Cackle