Библиотеке требуются волонтёры

Мѣ́сѧца тогѡ́же въ а҃і-й де́нь. И҆́же во ст҃ы́хъ, ѻ҆ц҃а̀ на́шегѡ сѡфро́нїа, патрїа́рха і҆ерꙋсали́мскагѡ:

И҆ преставле́нїе, и҆́же во ст҃ы́хъ, ѻ҆ц҃а̀ на́шегѡ є҆ѵѳѵ́мїа а҆рхїепі́скопа, новгоро́дскагѡ чꙋдотво́рца.

Слꙋ́жба є҆гѡ̀ пи́сана по се́й слꙋ́жбѣ.

На Гдⷭ҇и, воззва́хъ, стїхи̑ры сѡфро́нїа, гла́съ д҃. Поⷣ: Ꙗ҆́кѡ до́блѧ:

Цѣломꙋ́дрїѧ тезоимени́тъ, ꙳ ѿ бжⷭ҇твеннагѡ проразꙋмѣ́нїѧ ꙳ про́званъ бы́въ, сѡфро́нїе, ꙳ цѣломꙋ́дръ бы́лъ є҆сѝ въ дѣ́лѣхъ и҆ пра́веденъ, ꙳ мꙋ́жественъ и҆ разꙋ́менъ, ꙳ добродѣ́тельми ро́дными до́блѣ вѣнча́емь: ꙳ и҆ пре́былъ є҆сѝ процвѣта́ѧ во ѻ҆бои́хъ, ꙳ дꙋше́ю же и҆ тѣ́ломъ, ꙳ ꙗ҆́коже строи́тель и҆зрѧ́днѣйшїй.

И҆зъ ᲂу҆́стъ бг҃ослове́сныхъ ꙳ бг҃ослѡ́вна возгремѣ́лъ є҆сѝ ᲂу҆чє́нїѧ, ꙳ сѡфро́нїе всеблаже́нне, ꙳ бг҃осло́вивъ ꙗ҆снѣ́йше ѻ҆ц҃а̀ безнача́льна ꙳ и҆ собезнача́льна сн҃а, ꙳ и҆ дх҃а ст҃а́го соприсносꙋ́щна, ꙳ во є҆ди́ницѣ трⷪ҇цꙋ ꙳ и҆ є҆ди́ницꙋ въ трⷪ҇цѣ, ꙳ бг҃а є҆ди́наго сꙋще́ственнымъ то́ждествомъ.

Пло́ти по ѵ҆поста́си ꙳ соеди́ншасѧ безпло́тнаго, ꙳ и҆ ѻ҆ц҃ꙋ̀ собезнача́льнаго, сло́ва, всемꙋ́дре, ꙳ кромѣ̀ преложе́нїѧ и҆ слїѧ́нїѧ, мꙋ́дрѣ наꙋчи́лъ є҆сѝ: ꙳ дѣ́йствꙋюща же сꙋгꙋ́бѡ ꙳ ѻ҆бои́ми є҆стествы̀, ꙳ и҆зъ ни́хже слежи́тъ, и҆ въ ни́хже зри́тсѧ, ꙳ є҆ди́нъ сы́й нераздѣ́ленъ сꙋщество́мъ, ꙳ къ се́мъ и҆ ѻ҆́номъ разꙋмѣва́емый.

Сла́ва, и҆ ны́нѣ, бг҃оро́диченъ, гла́съ и҆ подо́бенъ то́йже:

Тꙋ́чами дх҃а прест҃а́гѡ, пречⷭ҇таѧ, ꙳ мою̀ мы́сль ѡ҆росѝ, ꙳ ꙗ҆́же ка́плю ро́ждшаѧ хрⷭ҇та̀, ꙳ неизче́тнѡ безмѣ̑рнаѧ беззакѡ́нїѧ человѣ́кѡвъ, ꙳ щедро́тами и҆змы́вшꙋю, ꙳ и҆зсꙋшѝ и҆сто́чникъ страсте́й мои́хъ, ꙳ и҆ пото́ка мѧ̀ сподо́би ꙳ пи́щи живы́ѧ при́снѡ, ꙳ моли́твами твои́ми.

Крⷭ҇тобг҃оро́диченъ. Подо́бенъ то́йже:

На крⷭ҇тѣ́ тѧ ꙗ҆́кѡ ᲂу҆зрѣ̀ ꙳ пригвожде́на, гдⷭ҇и, ꙳ а҆́гница и҆ мт҃и твоѧ̀ дивлѧ́шесѧ, ꙳ и҆ что̀ видѣ́нїе сїѐ, взыва́ше, ꙳ сн҃е вожделѣ́нне, ꙳ сїѧ̑ тѝ непокори́вый собо́ръ воздадѐ беззако́нный, ꙳ и҆́же мно́гихъ твои́хъ чꙋде́съ наслади́выйсѧ; ꙳ по сла́ва неизглаго́ланномꙋ ꙳ соше́ствїю твоемꙋ̀, влⷣко.

Канѡ́нъ, є҆гѡ́же краегране́сїе: Цѣломꙋ́дрїѧ пою̀ тезоимени́тагѡ и҆́скренню же́ртвꙋ. Кѵ́ръ ѳеофа́на.

Гла́съ д҃. Пѣ́снь а҃. І҆рмо́съ:

Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀, ра́дꙋѧсѧ, тоѧ̀ чꙋдеса̀.

Цѣломꙋ́дреннѡ преплы́лъ є҆сѝ цѣломꙋ́дрїѧ пꙋчи́нꙋ, вѣ́тры дꙋхо́вными направлѧ́емь, и҆ собра́лъ є҆сѝ мно́гѡ бога́тства, мꙋ́дрости дарова̑нїѧ, ѻ҆́ч҃е сѡфро́нїе.

Ꙗ҆́кѡ а҆́гг҃лъ бы́лъ є҆сѝ хрⷭ҇то́ва воскрⷭ҇нїѧ 2, и҆ предсѣда́тель бжⷭ҇твенъ бжⷭ҇твеннагѡ гро́ба, ѡ҆богати́вшагѡ и҆сто́чникомъ безсме́ртїѧ, хрⷭ҇та̀, воздви́гшагѡ паде́нїе ро́да на́шегѡ.

Свѣ́тлостїю слове́съ твои́хъ, и҆ ᲂу҆ма̀ ѡ҆строто́ю, мі́ръ ᲂу҆ѧсни́лъ є҆сѝ, бг҃осло́вивъ ꙗ҆́снѡ трїѷпоста́снагѡ бжⷭ҇тва̀ сꙋщество̀, є҆ди́ницꙋ тричи́сленнꙋю, ѻ҆́ч҃е сѡфро́нїе.

Глагѡ́лъ вѣща́нїе твоѐ и҆ ᲂу҆че́нїй благознамени́таѧ гꙋ́сль, протечѐ земны̑ѧ концы̀, та́инствꙋ строе́нїѧ сло́ва ᲂу҆ча́щаѧ, ѻ҆́ч҃е сѡфро́нїе.

Бг҃оро́диченъ:

Сы́й є҆стество́мъ несозда́ненъ и҆ ѻ҆ц҃ꙋ̀ соприсносꙋ́щенъ, и҆ време́нъ превы́шшїй и҆ превѣ́чный, и҆зъ тебє̀, влⷣчце, зи́ждемь, и҆ подъ лѣ́томъ ꙗ҆́кѡ чл҃вѣ́къ быва́етъ, спаса́ѧ человѣ́ка.

Пѣ́снь г҃. І҆рмо́съ:

Не мꙋ́дростїю и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ па́че тебє̀, чл҃вѣколю́бче.

Оу҆твержда́ема па́лицею слове́съ твои́хъ, преподо́бне, стремлє́нїѧ ѕлочести́выхъ и҆ бг҃обо́рныхъ є҆ресе́й ѿража́етъ, ѿгонѧ́щи, цр҃ковь хрⷭ҇то́ва.

Побо́рствовавъ по честнѣ́мъ, бг҃оно́се, проповѣ́данїи, показа́лсѧ є҆сѝ побѣди́тель по́мощїю дх҃а, мꙋ́дрѣ ᲂу҆крѣплѧ́емь, ѻ҆́ч҃е сѡфро́нїе.

Оу҆мертви́въ всѐ тлѣ́емое пло́ти сладостра́стїе, нетлѣ́ннꙋю дꙋ́шꙋ благоче́стїемъ ѡ҆живи́лъ є҆сѝ: и҆ сїю̀ показа́лъ є҆сѝ бжⷭ҇твенный ѻ҆рга́нъ.

Бг҃осло́вный и҆ кра́сный, и҆ медото́чный ѧ҆зы́къ тво́й, сло́ва рѣ́ки и҆сточа́етъ, бг҃опрїѧ́тне, бжⷭ҇твєннаѧ ᲂу҆чє́нїѧ всѣ̑мъ и҆злива́ѧ.

Бг҃оро́диченъ:

Тѧ̀ ро́ждшꙋю бг҃а, бцⷣꙋ сла́вимъ, ржⷭ҇твꙋ̀ твоемꙋ̀ и҆менова́нїемъ сли́чествꙋюще, и҆ зва́нїѧ по ѻ҆боемꙋ̀, пречⷭ҇таѧ влⷣчце.

Сѣда́ленъ, гла́съ д҃ Подо́бенъ: Ско́ро предварѝ:

Словесы̀ ᲂу҆краси́лъ є҆сѝ цр҃ковь хрⷭ҇то́вꙋ, дѣ́лы соблю́дъ є҆́же по ѻ҆́бразꙋ бж҃їю, сѡфро́нїе преподо́бне: просїѧ́ бо въ мі́рѣ, є҆́же въ тебѣ̀ цѣломꙋ́дрїе, благода́ть ᲂу҆че́нїй ѡ҆блиста́ющаѧ всѣ̑мъ, любо́вїю пра́зднꙋющымъ, ѻ҆́ч҃е, па́мѧть твою̀.

Сла́ва, и҆ ны́нѣ, бг҃оро́диченъ:

Ѡ҆бнови́ла є҆сѝ, чⷭ҇таѧ, бжⷭ҇твеннымъ рождество́мъ твои́мъ, и҆стлѣ́вшее во страсте́хъ земноро́дныхъ ме́ртвенное сꙋщество̀ и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.

Крⷭ҇тобг҃оро́диченъ:

На крестѣ́ тѧ возвы́шена, ꙗ҆́кѡ ᲂу҆зрѣ̀ пречⷭ҇таѧ мт҃и твоѧ̀, сло́ве бж҃їй, мт҃рски рыда́ющи вѣща́ше: что̀ но́вое и҆ стра́нное сїѐ чꙋ́до, сн҃е мо́й; ка́кѡ, жи́знь всѣ́хъ, вкꙋша́еши сме́рти, ѡ҆живи́ти ᲂу҆ме́ршыѧ хотѧ̀, ꙗ҆́кѡ благоꙋтро́бенъ;

Пѣ́снь д҃. І҆рмо́съ:

Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, и҆стлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Є҆ди́но безнача́льное сꙋщество̀ въ тре́хъ ѵ҆поста́сѣхъ, сво́йствы соверше́нными, ты̀, ѻ҆́ч҃е мꙋ́дре, проповѣ́далъ є҆сѝ раздѣлѧ́емое непресѣко́мо, совокꙋплѧ́емо же неслїѧ́нно, во́лею є҆ди́ною и҆ бж҃ество́мъ.

И҆мѣ́ѧ цѣломꙋ́дреннꙋ мы́сль и҆ ᲂу҆́мъ цѣломꙋ́дрѣйшїй, не смѣше́нїе мꙋдрова́лъ є҆сѝ, ѻ҆́ч҃е, ни преложе́нїе, нижѐ слїѧ́нїе соедине́нныхъ непрело́жнѡ, двои́хъ є҆сте́ствъ во є҆ди́номъ хрⷭ҇тѣ̀ є҆диноро́днѣмъ, всеблаже́нне.

Просвѣща́емь бжⷭ҇твеннѣ просвѣще́нїемъ дх҃а, лю́тое неи́стовство несто́рїево разори́лъ є҆сѝ, то́южде во́лею и҆ ра́зꙋмомъ, и҆́же соедине́нїе проповѣ́давшаго хрⷭ҇то́вꙋ ѻ҆бою̀ є҆стествꙋ̑.

Пѵ́рра попали́лъ є҆сѝ, бг҃омꙋ́дре, ѻ҆гне́мъ ᲂу҆че́нїй твои́хъ, ѿмета́юща два̀ бы́ти хрⷭ҇тѡ́ва хотѣ̑нїѧ, разли́чными сꙋществы̀ ꙗ҆̀же по себѣ̀, дѣ́йства же вкꙋ́пѣ сꙋгꙋ́ба, ѻ҆́ч҃е преподо́бне.

Бг҃оро́диченъ:

Оу҆краси́ласѧ є҆сѝ па́че всегѡ̀ а҆́гг҃льскагѡ благолѣ́пїѧ, ꙗ҆́кѡ ро́ждши си́хъ, ѻ҆трокови́це, творца́ же и҆ гдⷭ҇а, ѿ твои́хъ пречⷭ҇тыхъ крове́й воплоща́ема, и҆збавлѧ́ющаго всѧ̑ того̀ сла́вѧщыѧ.

Пѣ́снь є҃. І҆рмо́съ:

Нечести́вїи не ᲂу҆́зрѧтъ сла́вы твоеѧ̀, хрⷭ҇тѐ. но мы̀ тѧ̀, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще воспѣва́емъ тѧ̀, чл҃вѣколю́бче.

Честно́е воскресе́нїе и҆ гро́бъ жи́зни неꙋкло́нною любо́вїю зрѧ̀, бг҃овидѣ́нїѧ поче́рплъ є҆сѝ тайноꙋчє́нїѧ: и҆ вѣ̑рнымъ препо́далъ є҆сѝ, ст҃и́телю, сїѧ̑нїѧ.

Всѧ́чески возлюби́лъ є҆сѝ є҆ди́наго блага́го, разже́гсѧ заре́ю мы́сленною: и҆ и҆сто́чникъ возлюби́лъ є҆сѝ нетлѣ́нїѧ, видѣ́ньми, всемꙋ́дре, къ немꙋ̀ простира́ѧсѧ.

Хра́мъ жи́въ и҆ ѡ҆дꙋшевле́нъ бы́лъ є҆сѝ бж҃їй, ᲂу҆мертви́всѧ всѣ̑мъ сꙋ́щымъ на землѝ, сло́ва трапе́зꙋ ѻ҆би́льнꙋю стѧжа́въ, преподо́бне, и҆ свѣти́льникъ вѣ́ры.

Бг҃оро́диченъ:

Во двою̀ разꙋмѣва́ема сꙋществꙋ̑ хрⷭ҇та̀, сн҃а (с. 117) є҆диноро́днаго бж҃їѧ, безнача́льнаго пло́ть бы́вша, па́че сло́ва родила̀ є҆сѝ, бг҃ома́ти приснодѣ́во.

Пѣ́снь ѕ҃. І҆рмо́съ:

Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Бога́тнѡ и҆злїѧ́сѧ благода́ть дх҃а всест҃а́гѡ, бг҃омꙋ́дре, во ᲂу҆стна́хъ твои́хъ: тѣ́мже вѣща́нїе твои́хъ слове́съ рѣ̑чнымъ подо́битсѧ тече́нїємъ.

Ꙗ҆́кѡ фі́нїѯъ въ домꙋ̀ гдⷭ҇ни процвѣ́лъ є҆сѝ, благопло́дїемъ слове́съ, и҆ чи́стымъ житїе́мъ наслажда́ѧ сердца̀, свѧти́телю, вѣ́рнѡ чтꙋ́щихъ тѧ̀.

Оу҆мерщвлѧ́етсѧ живи́тельнымъ ѻ҆рꙋ́жїемъ слове́съ твои́хъ є҆реті́ческїй собо́ръ: и҆ свирѣ́пое ѡ҆полче́нїе бг҃обо́рєцъ закала́емо ᲂу҆мерщвлѧ́етсѧ ᲂу҆че́нїй твои́хъ мєчѝ.

Бг҃оро́диченъ:

Пое́мъ, бцⷣе, чи́стое рождество̀ твоѐ, и҆́мже спаса́емсѧ всѝ сме́рти сѣ́тей, и҆ лю́тагѡ грѣха̀ и҆ ᲂу҆́зъ а҆́довыхъ и҆збавлѧ́емсѧ.

Конда́къ, гла́съ и҃. Подо́бенъ: Взбра́нной:

И҆́же бжⷭ҇твенною ре́вностїю подви́гсѧ, и҆ и҆́стинныхъ повелѣ́нїй ᲂу҆стнѣ̀ распросте́ръ, церкѡ́внаѧ ѡ҆снова̑нїѧ бл҃гоꙋзако́нивъ, и҆ та́мѡ сꙋ́щымъ мона́шєскимъ соста́вѡмъ преда́въ, премꙋ́дрый въ патрїа́рсѣхъ і҆ерꙋсали́мскїй сѡфро́нїе, всемꙋ̑драѧ словеса̀ во свѣ́тъ и҆зве́лъ є҆сѝ, и҆́миже наставлѧ́еми зове́мъ тѝ: ра́дꙋйсѧ, свѣ́тлаѧ правосла́вныхъ похвало̀.

Пѣ́снь з҃. І҆рмо́съ:

Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше, препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.

Свы́ше манове́нїемъ, є҆реті́чєскимъ ѧ҆зыкобо́лїємъ противлѧ́ѧсѧ, мꙋ́дре, побѣдоно́сецъ бы́въ, вопїѧ́лъ є҆сѝ веселѧ́сѧ: препѣ́тый гдⷭ҇и бж҃е ѻ҆тє́цъ, бл҃гослове́нъ є҆сѝ.

Ве́сь возложе́нъ бг҃ꙋ, по́стныхъ садодѣ́латєльства прелета́ѧ, мꙋ́дре, цвѣтни́къ твои́ми насади́лъ є҆сѝ добродѣ́телей поꙋче́ньми, бг҃ꙋ сꙋ́щемꙋ въ вы́шнихъ ѡ҆ст҃и́въ.

Зако́нꙋ повинꙋ́ѧсѧ хрⷭ҇то́вꙋ, твоегѡ̀ хꙋдо́жества бога́тство тре́бꙋющымъ благоче́стнѡ, бг҃омꙋ́дре, разда́лъ є҆сѝ, воспѣва́ѧ: препѣ́тый гдⷭ҇и бж҃е ѻ҆тє́цъ, бл҃гослове́нъ є҆сѝ.

Бг҃оро́диченъ:

Ѡ҆свѧти́вши дꙋ́шꙋ, и҆ пред̾ѡчи́стивши тѣ́ло, наи́тїемъ на тѧ̀ ст҃а́гѡ дх҃а, всенепоро́чнаѧ, вы́шнѧгѡ си́лꙋ во ᲂу҆тро́бѣ твое́й заче́нши, родила̀ є҆сѝ безсѣ́меннѡ.

Пѣ́снь и҃. І҆рмо́съ:

Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое: ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

І҆ера́ршескагѡ сщ҃еннодѣ́йства, мѵ́ромъ ѡ҆свѧти́лсѧ є҆сѝ благода́ти: и҆дѣ́же ꙗ҆ви́сѧ мі́ра спасе́нїе, а҆рхїере́йствовавъ, всемꙋ́дре ѻ҆́ч҃е сѡфро́нїе, зовы́й: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Премꙋ́дрость почита́ѧ лꙋ́чшꙋю, вѣнце́мъ благода́тей вѣнча́лсѧ є҆сѝ, сла́вꙋ неꙋвѧда́емꙋ, и҆ бога́тство неѿе́млемо, премꙋ́дрости, сла́вне, да́ръ прїе́мъ, и҆ гдⷭ҇а по́йте, зовы́й, и҆ превозноси́те є҆го̀ во всѧ̑ вѣ́ки.

Сщ҃еннолѣ́пнѡ, сщ҃еннотаи́нниче, въ бж҃е́ственнꙋю пра́вдꙋ ѡ҆дѣ́ѧвсѧ, ᲂу҆пра́вилъ є҆сѝ, всебл҃же́нне ѻ҆́ч҃е, пра́веднѣйшими влⷣчне ста́до словесы̀ и҆ дѣѧ̑нїи, гдⷭ҇а по́йте, наꙋча́ѧ, и҆ превозноси́те є҆го̀ во всѧ̑ вѣ́ки.

Великолѣ́пнѡ и҆ па́че сло́ва, сло́во ѻ҆ц҃ꙋ̀, ѻ҆́ч҃е, собезнача́льно, сло́во тебѣ̀ дарова̀, словеса̀ развраща́ющо, и҆ ѧ҆зыкобѡ́лїѧ сла́вѧщо є҆ресе́й, гдⷭ҇а по́йте, вопїѧ̀, и҆ превозноси́те є҆го̀ во всѧ̑ вѣ́ки.

Бг҃оро́диченъ:

Ст҃олѣ́пный показа́ласѧ є҆сѝ хра́мъ сло́ва, всю̀ тва́рь ѡ҆свѧща́ющагѡ, гора̀ тꙋ́чнаѧ ст҃а́ѧ: гора̀ пресвѣ́тлаѧ, блгⷭ҇ве́ннаѧ влⷣчце є҆ди́на всепѣ́таѧ. Тѣ́мъ тѧ̀, бг҃ома́ти, пое́мъ и҆ превозно́симъ во всѧ̑ вѣ́ки.

Пѣ́снь ѳ҃. І҆рмо́съ:

Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀: тѣ́мъ, веселѧ́щесѧ, тѧ̀, бцⷣе, велича́емъ.

Речє́нїѧ, и҆зъ ᲂу҆сте́нъ твои́хъ бж҃е́ственныхъ происходѧ̑ща, бг҃оглаго́ливе, благочести́выхъ мы̑сли ᲂу҆слажда́ютъ благода́тїю, ꙗ҆́коже со́тъ ка́плющїй разꙋмѣ́нїй благолѣ́пїе.

Внꙋ́трь нбⷭ҇ныхъ незаходи́мыхъ живе́ши, бл҃гоглаго́ливе, ᲂу҆ всѣ́хъ влⷣки и҆ цр҃ѧ̀: и҆дѣ́же ликꙋ́ютъ а҆́гг҃льскїѧ свѣ́тлѡсти, и҆ ст҃ы́хъ вѡ́инства.

Жи́знь проходѧ̀, ѻ҆́ч҃е, на землѝ а҆́гг҃льскꙋю, а҆́гг҃льскагѡ на нб҃сѣ́хъ сподо́билсѧ є҆сѝ бл҃же́нства, и҆дѣ́же хрⷭ҇та̀ молѝ, спасти́сѧ всѣ̑мъ пою́щымъ тѧ̀.

Ꙗ҆́коже а҆рѡма́тнїи фїа́лы, лани̑тѣ твоѝ, бг҃омꙋ́дре, на́рда пїстїкі́и многоцѣ́нны, премꙋ́дрости и҆спо́лнь ꙗ҆ви́сѧ а҆лава́стръ, тѣ́ло хрⷭ҇то́во чⷭ҇тно́е, а҆рѡма́тствꙋѧ твои́ми ᲂу҆чє́нїи.

Бг҃оро́диченъ:

Ѻ҆́блакъ тѧ̀ лего́къ, дв҃о, и҆са́їа зрѧ́ше: на тѧ́ бо гдⷭ҇ь наше́дъ, низложѝ всѧ̑ рꙋкотворє́ннаѧ, и҆ своѐ разꙋмѣ́нїе тѧ̀ пою́щымъ ꙗ҆ви́лъ є҆́сть.

Слꙋ́жба, и҆́же во ст҃ы́хъ, ѻ҆ц҃а̀ на́шегѡ є҆ѵѳѵ́мїа а҆рхїепⷭ҇кпа, новгоро́дскагѡ чꙋдотво́рца.

На Гдⷭ҇и, воззва́хъ, стїхи̑ры, гла́съ и҃. Поⷣ: Ѽ пресла́внагѡ чꙋдесѐ!

Ѿ ю҆́ности мꙋ́дрости прилѣжа́въ, ст҃и́телю є҆ѵѳѵ́мїе, ꙳ и҆ бж҃е́ственное писа́нїе ꙗ҆́кѡ и҆звы́къ, прпⷣбне, ꙳ ѿложи́лъ є҆сѝ всѧ̑, ꙗ҆̀же ю҆́ности ведꙋ́щыѧ сла̑сти, ꙳ хрⷭ҇то́въ ꙗ҆ре́мъ носи́ти и҆зво́лилъ є҆сѝ, ꙳ ѿѻнꙋ́дꙋже показа́лсѧ є҆сѝ сосꙋ́дъ и҆збра́нъ. ꙳ И҆ сегѡ̀ ра́ди сꙋ́дъ бж҃їй ꙳ тѧ̀ ст҃и́телѧ лю́демъ свои̑мъ поставлѧ́етъ, ꙳ въ правосла́вїи наставлѧ́юща ста́до твоѐ, преѡсвѧще́нне.

Премꙋ́дрости и҆ ра́зꙋма ꙳ ꙗ҆́кѡ и҆спо́лненъ бы́въ, бг҃облаже́нне, ꙳ хрⷭ҇тоимени̑тымъ лю́демъ и҆зрѧ́дный па́стырь бы́лъ є҆сѝ, ꙳ тѣ́хъ на па̑жити благоче́стїѧ наставлѧ́ѧ, ꙳ непокарѧ́ющыѧсѧ же премꙋ́дрѣ и҆справлѧ́ѧ. ꙳ Тѣ́мже ны́нѣ ча̑да твоѧ̑, ст҃и́телю є҆ѵѳѵ́мїе, ꙳ па́мѧть твою̀ пра́зднꙋюще, ꙳ воспѣва́емъ хрⷭ҇та̀ бг҃а на́шего, ꙳ тебѐ просла́вльшаго.

Благоче́стнѡ житїѐ на землѝ ꙳ ꙗ҆́кѡ а҆́гг҃лъ пожи́въ, ст҃и́телю, ꙳ цр҃ковь бж҃е́ственнꙋю ᲂу҆краси́лъ є҆сѝ твои́ми честны́ми ᲂу҆чє́нїи, ꙳ лю́ди тебѣ̀ бг҃омъ врꙋчє́нныѧ ꙳ мꙋ́дрѣ наставлѧ́еши къ тогѡ̀ разꙋмѣ́нїю. ꙳ Тѣ́мже и҆ хрⷭ҇то́съ тебѐ не то́кмѡ въ животѣ̀, ꙳ но и҆ по преставле́нїи прославлѧ́етъ, ꙳ и҆ дарѡ́въ чꙋде́съ сподоблѧ́етъ, ꙳ є҆ди́нъ человѣколю́бецъ.

Сла́ва, гла́съ ѕ҃.

Сто́лпъ непоколеби́мь цр҃кве хрⷭ҇то́вы, ѻ҆́ч҃е, бы́лъ є҆сѝ: тѣ́мже бж҃е́ственною ре́вностїю разже́гсѧ, дерзнове́ннѡ непра́ведное сочета́нїе пра́веднѡ разорѧ́еши, и҆ наꙋча́еши всѣ́хъ а҆пⷭ҇льскимъ и҆ ѻ҆ч҃єскимъ преда́нїємъ послѣ́довати, и҆ ѿ любодѣ́йствїѧ, ꙗ҆́кѡ ѿ ѕмі́ѧ ѿбѣга́ти: непокорѧ́ющыѧсѧ же твоемꙋ̀ свѧто́мꙋ ᲂу҆че́нїю, сꙋдꙋ̀ бж҃їю ты́ѧ предае́ши. Є҆го́же молѝ, а҆рхїере́ю є҆ѵѳѵ́мїе, спасти́сѧ всѣ̑мъ, и҆̀же любо́вїю почита́ющымъ свѧще́ннꙋю па́мѧть твою̀.

И҆ ны́нѣ, бг҃оро́диченъ: Кто̀ тебє̀ не ᲂу҆блажи́тъ:

Вхо́дъ. Прокі́менъ днѐ. Чтє́нїѧ г҃. Пи̑саны сегѡ̀ мцⷭ҇а во в҃ де́нь.

На лїті́и, Сла́ва, гла́съ и҃.

Прїиди́те, празднолю́бцы, въ наро́читомъ пра́здницѣ, до́брагѡ па́стырѧ и҆ ᲂу҆чи́телѧ дꙋхо́внѣ торжествꙋ́емъ, чⷭ҇тны̑ѧ твоѧ̑ мо́щи любе́знѡ зрѧ́ще, и҆ те́плою вѣ́рою взыва́юще: преблаже́нне свѧти́телю є҆ѵѳѵ́мїе, молѝ хрⷭ҇та̀ бг҃а ѡ҆ творѧ́щихъ ст҃ꙋ́ю па́мѧть твою̀.

И҆ ны́нѣ, бг҃оро́диченъ:

На стїхо́внѣ стїхи̑ры, гла́съ. Подо́бенъ: Нбⷭ҇ныхъ чинѡ́въ:

Бг҃омꙋ́дре ст҃и́телю є҆ѵѳѵ́мїе, ꙳ ты̀ твои́ми моли́твами и҆ посто́мъ, ꙳ бдѣ́нїемъ же и҆ ми́лостынею бг҃ови соедини́лсѧ є҆сѝ: ꙳ тѣ́мже дх҃ꙋ прест҃о́мꙋ до́мъ и҆ жили́ще показа́лсѧ є҆сѝ. ꙳ Ѿѻнꙋ́дꙋже а҆рхїере́й цр҃кви хрⷭ҇то́вѣ, ѻ҆́ч҃е, бы́лъ є҆сѝ, ꙳ молѝ спасти́сѧ дꙋша́мъ на́шымъ.

Сті́хъ: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ.

Повинꙋ́ѧсѧ за́повѣди бг҃а вседержи́телѧ ѿ ю҆́ности твоеѧ̀, ꙳ тогѡ̀ стопа́мъ, ст҃и́телю, послѣ́довалъ є҆сѝ. ꙳ Тѣ́мже ѿ негѡ̀ благода́ть прїѧ́лъ є҆сѝ, ꙳ дѣ́йствовати пресла̑внаѧ чꙋдеса̀, ꙳ и҆ дꙋ́хи прогони́ти лꙋка̑выѧ ꙳ ѿ всѣ́хъ любо́вїю чтꙋ́щихъ тѧ̀.

Сті́хъ: Оу҆слы́шите сїѧ̑, всѝ ꙗ҆зы́цы, внꙋши́те, всѝ живꙋ́щїи по вселе́ннѣй.

Кро́токъ и҆ неѕло́бивъ ꙳ во все́й жи́зни твое́й бы́лъ є҆сѝ, ꙳ свѧти́телю є҆ѵѳѵ́мїе: ꙳ сегѡ̀ ра́ди ѡ҆брѣ́лъ, ꙗ҆́коже жела́лъ є҆сѝ, ꙳ на нб҃сѣ́хъ со ст҃ы́ми поко́й. ꙳ Тѣ́мже почита́емъ ст҃ꙋ́ю па́мѧть твою̀, ꙳ вѣ́рою пра́зднꙋюще, бг҃облаже́нне и҆ всече́стне.

Сла́ва, гла́съ д҃:

Вели́кагѡ а҆рхїере́а є҆ѵѳѵ́мїа блаже́ннагѡ свѧще́ннꙋю па́мѧть дне́сь соверша́юще, бжⷭ҇твенными пѣ́сньми, прїиди́те всѝ, почти́мъ ѡ҆ на́съ всегда̀ молѧ́щасѧ, низпосла́ти мно́жество щедро́тъ, и҆ спасе́нїе дꙋша́мъ на́шымъ.

И҆ ны́нѣ, бг҃оро́диченъ: При́зри на молє́нїѧ:

Тропа́рь, гла́съ д҃:

И҆збра́нъ бы́въ бг҃ови ѿ ю҆́ности, свѧти́телю є҆ѵѳѵ́мїе, и҆ сегѡ̀ ра́ди а҆рхїере́йства са́номъ почте́нъ бы́въ, ᲂу҆па́слъ є҆сѝ лю́ди, и҆̀же тебѣ̀ бг҃омъ врꙋчє́нныѧ: тѣ́мже и҆ по преставле́нїи чꙋде́съ дарова̑нїѧ ѿ гдⷭ҇а прїѧ́лъ є҆сѝ, и҆сцѣлѧ́ти разли̑чныѧ недꙋ́ги. того̀ молѝ ѡ҆ на́съ, соверша́ющихъ честнꙋ́ю па́мѧть твою̀, да тебѐ всѝ непреста́ннѡ ᲂу҆блажа́емъ.

Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:

По а҃-й каѳі́смѣ сѣда́ленъ, ст҃и́телѧ, гла́съ а҃.

Подо́бенъ: Ка́мени запеча́танꙋ:

Оу҆че́ньми твои́ми и҆ дѣ́лы цр҃ковь хрⷭ҇то́вꙋ ᲂу҆краси́лъ є҆сѝ, є҆ѵѳѵ́мїе ст҃и́телю, ѿѻнꙋ́дꙋже въ мі́рѣ просїѧ̀ твоѐ добродѣ́тельное житїѐ: въ моли́твахъ и҆ поще́нїихъ и҆ бдѣ́нїихъ ѻ҆́бразъ ᲂу҆ченикѡ́мъ бы́лъ є҆сѝ. Тѣ́мже вопїе́мъ: сла́ва да́вшемꙋ тѝ крѣ́пость, сла́ва вѣнча́вшемꙋ тѧ̀, сла́ва даю́щемꙋ тобо́ю всѣ̑мъ и҆сцѣле́нїе.

Сла́ва:

Є҆гда̀ къ бжⷭ҇твенномꙋ жела́нїю восклони́всѧ, горѣ̀ мꙋдрова̑нїѧ и҆мѣ́лъ є҆сѝ: до́лꙋ влекꙋ̑щаѧ ѿри́нꙋвъ, и҆ ꙗ҆̀же на землѝ, всѧ̑ возненави́дѣвъ, и҆ хрⷭ҇тꙋ̀, блаже́нне, присво́илсѧ є҆сѝ, є҆го́же молѝ ѡ҆ пою́щихъ тѧ̀.

И҆ ны́нѣ, бг҃оро́диченъ:

Наста́ви ны̀ на пꙋ́ть покаѧ́нїѧ, ᲂу҆кло́ншыѧсѧ при́снѡ къ безпꙋ́тїємъ ѕѡ́лъ, и҆ преблага́го прогнѣ́вавшыѧ гдⷭ҇а, неискꙋсобра́чнаѧ благослове́ннаѧ мр҃і́е, прибѣ́жище ѿча́ѧнныхъ человѣ́кѡвъ, бж҃їе жили́ще.

По в҃-й каѳі́смѣ сѣда́ленъ, гла́съ д҃:

Смиренномꙋ́дрїе предпочита́ѧ бы́лъ є҆сѝ, є҆ѵѳѵ́мїе ст҃и́телю: и҆ ѿсю́дꙋ просла́вилсѧ є҆сѝ, ꙗ҆́кѡ бжⷭ҇твенный а҆рхїере́й приносѧ̀ жє́ртвы поже́ршемꙋсѧ во́лею хрⷭ҇тꙋ̀ бг҃ꙋ на́шемꙋ, є҆го́же молѝ спасти́сѧ дꙋша́мъ на́шымъ.

Сла́ва:

Зе́млю се́рдца твоегѡ̀ моли́твеннымъ ра́ломъ ѡ҆бнови́въ, и҆ болѣ́зньми по́стническими ꙗ҆́кѡ безпло́тенъ пожи́въ, и҆ а҆рхїере́йства па́ствꙋ до́брѣ ᲂу҆па́съ, и҆ сегѡ̀ ра́ди, пресели́всѧ въ премі̑рнаѧ, молѝ спасти́сѧ дꙋша́мъ на́шымъ.

И҆ ны́нѣ, бг҃оро́диченъ:

Ѡ҆бнови́ла є҆сѝ, чⷭ҇таѧ, бжⷭ҇твеннымъ рождество́мъ твои́мъ и҆стлѣ́вшее во страсте́хъ земноро́дныхъ ме́ртвенное сꙋщество̀: и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.

А҆́ще ли прилꙋчи́тсѧ въ по́стный де́нь, глаго́лемъ сѣда́льны по а҃-й каѳі́смѣ, и҆ по в҃-й, трїѡ́ди: а҆ по г҃- й каѳі́смѣ глаго́лемъ сѣда́льны ѻ҆́ба ст҃и́телѧ. По полѷеле́и сѣда́ленъ ст҃и́телѧ, гла́съ и҃:

Подо́бенъ: Премꙋ́дрости:

Ꙗ҆́кѡ добродѣ́теленъ и҆ кро́токъ, цр҃ковь хрⷭ҇то́вꙋ ᲂу҆ѧсни́лъ є҆сѝ, дѣ́лы соблю́дъ є҆́же по ѻ҆́бразꙋ бж҃їю, а҆рхїере́ю вели́кїй є҆ѵѳѵ́мїе: просїѧ́ бо добродѣ́тельное твоѐ житїѐ въ мі́рѣ, и҆ ѿ всѣ́хъ сла́витсѧ. Тѣ́мже всѝ благодарѧ́ще вопїе́мъ тѝ: бг҃облаже́нне свѧти́телю, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ младе́нца дои́ши зижди́телѧ и҆ гдⷭ҇а. Тѣ́мъ а҆́гг҃льскїй и҆ человѣ́ческїй ро́дъ досто́йнѡ сла́вимъ пресвѧто́е рождество̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою пресвѧто́мꙋ рождествꙋ̀ твоемꙋ̀.

Степє́нна, а҃ а҆нтїфѡ́нъ д҃-гѡ гла́са.

Прокі́менъ: Честна̀ предъ гдⷭ҇емъ сме́рть преподо́бныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе і҆ѡа́нна, зача́ло л҃є ѿ полꙋ̀.

По н҃-мъ ѱалмѣ̀, стїхи́ра, гла́съ ѕ҃:

Благоꙋха́етъ чⷭ҇тна́ѧ ра́ка моще́й твои́хъ, є҆ѵѳѵ́мїе ст҃и́телю, всѣ̑мъ вѣ̑рнымъ и҆сцѣле́нїе дꙋша́мъ и҆ тѣлесє́мъ да́рꙋющи. Тѣ́мже тѧ̀ мо́лимъ, бг҃одарова́нное твоѐ ста́до въ ми́рѣ соблюстѝ, да вси́ тѧ ꙗ҆́кѡ и҆́стиннаго па́стырѧ, и҆ моли́твенника къ бг҃ꙋ, непреста́ннѡ велича́емъ.

Канѡ́нъ ст҃и́телѧ є҆ѵѳѵ́мїа: Творе́нїе пахѡ́мїа, и҆́же ѿ ст҃ы́ѧ горы̀.

Гла́съ в҃. Пѣ́снь а҃. І҆рмо́съ:

Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.

Ꙗ҆́кѡ рѣка̀ премꙋ́дрости и҆ ра́зꙋма, ст҃и́телю є҆ѵѳѵ́мїе, бы́лъ є҆сѝ, ка́плю и҆ мнѣ̀ да́рꙋй: да возмогꙋ̀ и҆ а҆́зъ ма́лое рꙋкѝ моеѧ̀ хвале́нїе твоемꙋ̀ вели́чествꙋ принестѝ, блаже́нне.

Сꙋдо́мъ бж҃їимъ, и҆ человѣ́ческимъ и҆збра́нїемъ, а҆рхїере́йства ма́стїю пома́занъ бы́въ, свѧти́телю є҆ѵѳѵ́мїе, па́стырь преизрѧ́денъ бы́лъ є҆сѝ, жє́ртвы бг҃ꙋ всѧ́чески приносѧ̀, свѧще́нне.

И҆сточа́ютъ премꙋ̑драѧ ᲂу҆чє́нїѧ ᲂу҆стнѣ̀ твоѝ, ст҃и́телю, бжⷭ҇твеннꙋю сла́дость и҆мꙋ́ще: є҆́юже напита́вшесѧ ча̑да твоѧ̑, тебѐ любо́вїю непреста́ннѡ почита́емъ.

Бг҃оро́диченъ:

И҆́же на́съ ра́ди и҆зъ тебє̀, дв҃о, въ чл҃вѣ́ка премно́гою бл҃гостїю ѡ҆блекі́йсѧ, свѧще́нныхъ собо́ры, того̀ возлю́бльшыѧ, просла́вилъ є҆́сть.

Пѣ́снь г҃. І҆рмо́съ:

Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.

Житїѐ по бз҃ѣ стѧжа́въ, свѧти́телю, въ постѣ̀ и҆ моли́твѣ мно́го вре́мѧ пре́былъ є҆сѝ, вери̑ги тѧ́жки носѧ̀ на тѣ́лѣ твое́мъ: ꙗ҆̀же ны́нѣ зрѧ́ще, чꙋди́мсѧ терпѣ́нїю твоемꙋ̀.

Дѣ́лы и҆ словесы̀ бжⷭ҇твенными ᲂу҆кра́шенъ бы́въ, свѧти́телю є҆ѵѳѵ́мїе, цр҃ковь хрⷭ҇то́вꙋ благоче́стнѡ ᲂу҆па́слъ є҆сѝ: тѣ́мже и҆ ра́дости сподо́билсѧ є҆сѝ гдⷭ҇а твоегѡ̀, на́съ помина́й тебѐ сла́вѧщихъ.

Житїѐ твоѐ, бл҃же́нне, добродѣ́тельми ᲂу҆ѧсни́лъ є҆сѝ: тѣ́мже твоѧ̑ и҆справлє́нїѧ по мнѡ́гимъ страна́мъ проповѣ́даютсѧ, ѻ҆́ч҃е, и҆ ѿ землѝ преше́дъ, дости́глъ є҆сѝ, є҆́же та́мѡ со ст҃ы́ми пребыва́нїѧ.

Бг҃оро́диченъ:

Пала́тꙋ кра́снꙋю неизрече́ннагѡ бога́тства, дв҃о, зна́емъ, и҆ по до́лгꙋ тѧ̀ сла́вимъ спа́сшїисѧ рождество́мъ твои́мъ, всенепоро́чнаѧ.

Сѣда́ленъ, гла́съ и҃. Поⷣ: Премꙋ́дрости:

Оу҆́мнаѧ ѻ҆чеса̀, ст҃и́телю, ꙗ҆́кѡ всегда̀ и҆мѣ́ѧ къ бг҃ꙋ простє́рта, ᲂу҆́жемъ желѣ́знымъ ѡ҆бложи́въ себѐ, блаже́нне: мно́гажды всю̀ но́щь безъ сна̀ пре́былъ є҆сѝ, ᲂу҆дрꙋча́ѧ пло́ть твою̀, преблаже́нне: вери̑ги же, ꙗ҆̀же на тебѣ̀, не позна̑ны бы́ша да́же до и҆схо́да, є҆́же ѿсю́дꙋ. тѣ́мже и҆ хрⷭ҇то́съ, є҆гѡ́же ра́ди жесто́кое житїѐ претерпѣ́лъ є҆сѝ, да́рꙋетъ тебѣ̀ неболѣ́зненное є҆́же на нб҃сѣ́хъ житїѐ. того̀ молѝ, ст҃и́телю є҆ѵѳѵ́мїе, согрѣше́нїй ѡ҆ставле́нїе дарова́ти чтꙋ́щымъ любо́вїю свѧще́ннꙋю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ младе́нца дои́ши зижди́телѧ и҆ гдⷭ҇а. Тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ пресвѧто́е рождество̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.

Пѣ́снь д҃. І҆рмо́съ:

Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Храни́тель бꙋ́ди ѻ҆те́чествꙋ твоемꙋ̀ и҆ лю́демъ, ст҃и́телю, и҆збавлѧ́ѧ вра̑гъ наше́ствїѧ, гла́да же и҆ па́гꙋбы: да моли́твами твои́ми спа́сшесѧ, тебѐ всѝ ꙗ҆́кѡ застꙋ́пника велича́емъ.

Любомꙋ́дреннѡ дꙋше́вный кора́бль въ ти́хое приста́нище ᲂу҆правлѧ́ѧ, свѧти́телю, моли́твамъ и҆ ми́лостыни прилѣжа́лъ є҆сѝ, тлѣ́нное бога́тство въ нетлѣ́нное, бг҃облаже́нне, прелага́ѧ. Тѣ́мже и҆ прїѧ́лъ є҆сѝ нбⷭ҇ное бога́тство.

Чи́сто ѻ҆́ко дꙋше́вное и҆мѣ́ѧ, зри́тельно нбⷭ҇нагѡ восхо́да: тѣ́мже на землѝ жи́знь твою̀ до́брѣ ᲂу҆пра́вилъ є҆сѝ, ст҃и́телю. Сегѡ̀ ра́ди цр҃ковь бг҃а жива́гѡ, є҆ѵѳѵ́мїе, бы́лъ є҆сѝ.

Бг҃оро́диченъ:

Бг҃ъ и҆зъ тебє̀ роди́всѧ, гпⷭ҇жѐ всенепоро́чнаѧ, ѿ ѡ҆блада́юща врага̀ мі́ръ, тебє̀ ра́ди и҆зба́ви: ст҃и́тельскїй же ли́къ же́ртвꙋ томꙋ̀ приносѧ́щїй возвели́чи.

Пѣ́снь є҃. І҆рмо́съ:

Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.

Блаже́ннꙋю жи́знь, ст҃и́телю є҆ѵѳѵ́мїе, на землѝ пожи́лъ є҆сѝ, и҆ ѿсю́дꙋ къ нб҃сномꙋ житїю̀ сла́внѡ преше́лъ є҆сѝ. тѣ́мже и҆ по преставле́нїи твое́мъ ра́кꙋ твою̀ ѡ҆бстоѧ́ще, и҆ любе́знѡ покланѧ́ющесѧ тебѣ̀, сщ҃е́нїе почерпа́емъ.

Преѡсщ҃е́нствованъ дꙋше́ю и҆ тѣ́ломъ, ѻ҆́ч҃е, бы́лъ є҆сѝ, свѣ́тлѡ влⷣчнѣй трапе́зѣ предстои́ши, же́ртвꙋ томꙋ̀ безкро́внꙋю приносѧ̀. тѣ́мже ꙗ҆́кѡ сщ҃еннотаи́нникъ прилѣ́жнѡ ѡ҆ на́съ моли́сѧ.

Дре́внѧгѡ корни́лїа моли́твѣ и҆ ми́лостыни подо́бѧсѧ, ми́лостивъ къ тре́бꙋющымъ, ѻ҆́ч҃е, бы́лъ є҆сѝ. тѣ́мъ ѿ хрⷭ҇та̀ бг҃а досто́йнѡ слы́шиши: моли̑твы твоѧ̑ и҆ ми́лѡстыни взыдо́ша предо мно́ю. Сегѡ̀ гла́са и҆ на́мъ ᲂу҆слы́шати, блаже́нне, помоли́сѧ.

Бг҃оро́диченъ:

Сщ҃е́нными гла́сы тѧ̀ добро́тꙋ і҆а́кѡвлю пое́мъ, пло́тски ро́ждшꙋю мі́рови свѣ́тъ, и҆́же ѿ свѣ́та, просвѣща́ющїй а҆рхїерє́йскїѧ собо́ры.

Пѣ́снь ѕ҃. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Сн҃ъ свѣ́та и҆ днѐ, ст҃и́телю, бы́лъ є҆сѝ, тѣ́мже и҆ всели́лсѧ є҆сѝ, и҆дѣ́же свѣ́тъ невече́рнїй, и҆ покѡ́ища пра́ведныхъ: тогѡ̀ свѣ́та молѝ полꙋчи́ти всѣ̑мъ, па́мѧть твою̀ пра́зднꙋющымъ.

Сщ҃є́нныѧ и҆ пречестны̑ѧ хра́мы, въ сла́вꙋ ст҃ы́хъ мнѡ́гїѧ воздви́глъ є҆сѝ: тѣ́мже и҆ мнѡ́гїѧ ст҃ы̑ѧ и҆мѣ́лъ є҆сѝ хода́таи, промышлѧ́ющыѧ тебѣ̀ полє́знаѧ: но ꙗ҆́кѡ съ ни́ми водворѧ́ѧсѧ, ѡ҆ на́съ моли́сѧ.

Свѣ́тло лицѐ въ жи́зни и҆мѣ́ѧ, блаже́нне, потща́лсѧ є҆сѝ свѣтлѣ́йшꙋ и҆ дꙋ́шꙋ твою̀ хрⷭ҇тꙋ̀ предста́вити, є҆́же и҆ полꙋчи́лъ є҆сѝ, є҆ѵѳѵ́мїе. тѣ́мже бꙋ́ди те́плый моли́твенникъ, ꙗ҆́кѡ ст҃и́тель ѡ҆ чтꙋ́щихъ тѧ̀.

Бг҃оро́диченъ:

Во ᲂу҆тро́бꙋ твою̀ всели́всѧ, всѐ человѣ́ческое сꙋщество̀ ѡ҆божѝ, и҆ ст҃и́телей ли́къ мно́жество свѧще́ннѡ привлечѐ сла́вити тѧ̀, бг҃оневѣ́сто.

Конда́къ, гла́съ и҃. Подо́бенъ: Взбра́нной:

Ꙗ҆́кѡ а҆рхїере́ємъ сопресто́льникъ, и҆ ст҃и́телємъ и҆зрѧ́дный побо́рникъ бы́лъ є҆сѝ, свѧти́телю є҆ѵѳѵ́мїе, не преста́й сохранѧ́ѧ ѻ҆те́чество твоѐ, гра́дъ же и҆ лю́ди, и҆̀же тебѐ вѣ́рою почита́ющыѧ, и҆ честны̑мъ моще́мъ твои̑мъ покланѧ́ющыѧсѧ, да велегла́снѡ тебѣ̀ всѝ вопїе́мъ: ра́дꙋйсѧ, свѧти́телю бг҃омꙋ́дре.

І҆́косъ:

Є҆ѵⷢ҇льскомꙋ словесѝ внѧ́тъ, преподо́бне, дꙋше́вный ра́зꙋмъ впери́въ къ просвѣще́нїю свѣтолꙋ́чныѧ зарѝ, дꙋшетлѣ̑нныѧ стра̑сти до конца̀ потреби́лъ є҆сѝ. Добродѣ́тельнымъ же житїе́мъ а҆́гг҃лѡмъ и҆ человѣ́кѡмъ преди́венъ показа́лсѧ є҆сѝ. И҆ сегѡ̀ ра́ди вели́кагѡ нова́града а҆рхїере́йства сподо́бивсѧ, цр҃ковь ᲂу҆краси́лъ є҆сѝ, лю́ди просвѣти́лъ є҆сѝ, и҆ до конца̀ въ правосла́вїи ᲂу҆тверди́лъ є҆сѝ, да всѝ велегла́снѡ вопїе́мъ тѝ: ра́дꙋйсѧ, є҆ѵѳѵ́мїе, ст҃и́телю бг҃омꙋ́дре.

Пѣ́снь з҃. І҆рмо́съ:

Тѣ́лꙋ злато́мꙋ премꙋ̑дрыѧ дѣ́ти не послꙋжи́ша, и҆ въ пла́мень са́ми поидо́ша, и҆ бо́ги и҆́хъ ѡ҆брꙋга́ша, средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ: ᲂу҆слы́шасѧ ᲂу҆жѐ ᲂу҆́стъ ва́шихъ моли́тва.

Вели́кїй но́вградъ, и҆́же въ себѣ̀ тебѐ стѧжа́вый, ра́достїю ра́дꙋетсѧ, ст҃и́телю є҆ѵѳѵ́мїе: тѧ́ бо ꙗ҆́кѡ стѣ́нꙋ и҆мѣ́ѧ тве́рдꙋ, и҆ сто́лпъ неѡбори́мъ, хрⷭ҇та̀ воспѣва́етъ, тебѐ семꙋ̀ дарова́вшаго.

И҆̀же пре́жде тебє̀ бы́вшымъ а҆рхїере́ѡмъ красота̀ бы́лъ є҆сѝ, блаже́нне, ст҃и́телей ᲂу҆добре́нїе, мона́хѡвъ ѻ҆́бразъ, хрⷭ҇то́вы же цр҃кве преизрѧ́дный па́стырь ꙗ҆ви́лсѧ є҆сѝ, бг҃облаже́нне ѻ҆́ч҃е є҆ѵѳѵ́мїе.

И҆лїинꙋ̀ ре́вность воспрїи́мъ, ст҃и́телю: тѣ́мже ни прещє́нїѧ, ни молє́нїѧ согрѣша́ющихъ возмого́ша ᲂу҆вѣща́ти тѧ̀, є҆́же тѣ́хъ ѡ҆ согрѣше́нїихъ не ѡ҆блича́ти. ты́ же не преста́лъ є҆сѝ, до́ндеже коне́чнѣе ѻ҆́нѣхъ и҆спра́вилъ є҆сѝ.

Бг҃оро́диченъ:

Кра́снꙋю ѡ҆брѣ́тъ, и҆ до́брꙋю въ жена́хъ тѧ̀, пречⷭ҇таѧ, прекра́сное сло́во всели́сѧ въ пречи́стое чре́во твоѐ, всѧ̑ ли́ки свѧти́телей ѡ҆свѧ́щъ, зовꙋ́щыѧ: благослове́нъ бг҃ъ ѻ҆тє́цъ на́шихъ.

Пѣ́снь и҃. І҆рмо́съ:

Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Сꙋдо́мъ бж҃їимъ, и҆ всенаро́днымъ и҆збра́нїемъ, ѿню́дꙋже при́званъ бы́лъ є҆сѝ, преподо́бне, на престо́лъ вели́кїѧ це́ркве, та́мѡ па́ки ѿхо́диши промышле́нїемъ твоегѡ̀ влⷣки: да ѿню́дꙋже сїѧ̑ прїѧ́лъ є҆сѝ, па́ки та́мѡ чи̑ста того̀ съ дꙋше́ю бг҃ꙋ преда́си.

Пречⷭ҇тна́ѧ ра́ка, бг҃облаже́нне, и҆дѣ́же положено̀ бы́сть чⷭ҇тно́е тѣ́ло твоѐ, ст҃и́телю, благово́нїе и҆ ѡ҆сщ҃е́нїе всѣ̑мъ вѣ́рою приходѧ́щымъ и҆спꙋща́етъ, ѿ дꙋшѝ хрⷭ҇тꙋ̀ вопїю́щымъ: благослови́те, всѧ̑ дѣла̀, гдⷭ҇а, и҆ превозноси́те є҆го̀ во вѣ́ки.

Хрⷭ҇то́съ тѧ̀ ст҃и́телѧ и҆збра̀, ꙗ҆́кѡ нѣ́кое свѣти́ло, могꙋ́ща тве́рдь цр҃ко́внꙋю просвѣща́ти, и҆ свои́ми ᲂу҆че́ньми лю́ди тебѣ̀ врꙋчє́нныѧ наставлѧ́ти, творцꙋ̀ вопи́ти: бл҃гослови́те, всѧ̑ дѣла̀, гдⷭ҇а, и҆ превозноси́те є҆го̀ во вѣ́ки.

Бг҃оро́диченъ:

Оу҆ны́лъ и҆мѣ́ѧ по́мыслъ, и҆ дꙋ́шꙋ сластьмѝ ѡ҆тѧгче́нꙋ, къ тебѣ̀ прибѣга́ю, бг҃ороди́тельнице чⷭ҇таѧ, и҆ вопїю́ ти: воздви́гни и҆ спаси́ мѧ ѻ҆каѧ́ннаго и҆ ѡ҆сꙋжде́ннаго.

Пѣ́снь ѳ҃. І҆рмо́съ:

Ѿ бг҃а, бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ: ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.

Ѻ҆би́тель, въ не́йже сподо́билсѧ є҆сѝ ꙗ҆ре́мъ хрⷭ҇то́въ прїѧ́ти, та́мѡ всѧ̑ дни̑ твоѧ̑ вѣ́рою и҆ дх҃омъ кромѣ̀ тѣлесѐ, неразлꙋ́ченъ, ѻ҆́ч҃е, пре́былъ є҆сѝ: тѣ́мже и҆ по преставле́нїи та́мѡ повелѣва́еши положи́тисѧ, и҆дѣ́же и҆ чꙋде́съ дарова̑нїѧ ѿ гдⷭ҇а, свѧти́телю є҆ѵѳѵ́мїе, прїѧ́лъ є҆сѝ.

Рꙋко́ю мое́ю недосто́йною, приноси́мое тебѣ̀ съ трꙋдо́мъ хвале́нїе, ст҃и́телю є҆ѵѳѵ́мїе, не пре́зри, по прїимѝ, и҆ молѝ творца̀ твоего̀ и҆ влⷣкꙋ, та́мошнѧгѡ мѧ̀ и҆зба́вити вѣ́чнагѡ мꙋче́нїѧ, тебѐ вѣ́рою почита́юща.

Пѣвцы̀ твоѧ̑ тебѐ и҆́скреннѡ воспѣва́ющыѧ, и҆ твою̀ па́мѧть честнꙋ́ю, свѧти́телю є҆ѵѳѵ́мїе, вѣ́рою прославлѧ́ющыѧ, ѡ҆свѧтѝ и҆ просла́ви, и҆ ѿ бѣ́дъ и҆збавлѧ́й и҆ напа́стей, и҆ та́мѡ вѣ́чнагѡ мꙋче́нїѧ, да тебѐ всегда̀ воспѣва́ютъ.

Бг҃оро́диченъ:

Пощади́ мѧ, гдⷭ҇и, пощадѝ, є҆гда̀ хо́щеши мѝ сꙋди́ти, и҆ не ѡ҆сꙋдѝ менѐ во ѻ҆́гнь, да не ꙗ҆́ростїю ѡ҆бличи́ши менѐ, мо́литъ тѧ̀ дв҃а тебѐ ро́ждшаѧ, хрⷭ҇тѐ, а҆́гг҃льстїи собо́ри и҆ ст҃и́телей совокꙋплє́нїѧ.

Свѣти́ленъ. Подо́бенъ: Посѣти́лъ ны̀ є҆́сть:

Дне́сь ст҃и́телѧ є҆ѵѳѵ́мїа свѣ́тлаѧ наста̀ па́мѧть, вѣ̑рныѧ просвѣща́етъ, и҆ тмꙋ̀ пре́лести разорѧ́етъ, вѣ́рою приходѧ́щымъ къ честны̑мъ тогѡ̀ моще́мъ.

Два́жды.

Бг҃оро́диченъ:

Свѣ́тъ возсїѧ̀ безлѣ́тный, ѿ ѻ҆ц҃а̀ пре́жде вѣ̑къ: въ лѣ́то ны́нѣ напослѣ́докъ, и҆зъ тебє̀, дв҃о, ꙗ҆ви́сѧ на спасе́нїе мі́ра. Къ немꙋ́же не преста́й ѡ҆ лю́дехъ твои́хъ молѧ́щисѧ.

На хвали́техъ стїхи̑ры, на д҃, гла́съ и҃. Поⷣ: Ѽ пресла́внагѡ чꙋдесѐ!

Неꙋкло́ннѡ, преблаже́нне, ꙳ пꙋ́ть жи́зненный ше́ствовалъ є҆сѝ: ꙳ по́стническими борє́нїи ꙳ всѧ̑ плотска̑ѧ мꙋдрова̑нїѧ ᲂу҆мертви́лъ є҆сѝ. ꙳ Кра̑снаѧ мі́ра ѡ҆ста́вилъ є҆сѝ, ꙳ нб҃снꙋю красотꙋ̀ возлюби́лъ є҆сѝ, ꙳ и҆дѣ́же со а҆́гг҃лы при́снѡ весели́шисѧ: ꙳ свѧти́телю є҆ѵѳѵ́мїе, ꙳ молѝ спасти́сѧ дꙋша́мъ на́шымъ.

Два́жды.

Въ ю҆́ности цѣломꙋ́дрїе стѧжа́лъ є҆сѝ, ꙳ въ ста́рости ра́зꙋмъ ѡ҆б̾ѡстри́лъ є҆сѝ, ꙳ дꙋ́шꙋ пресвѣ́тлꙋ сотвори́лъ є҆сѝ, ꙳ а҆рхїере́йства са́нъ воспрїе́мъ, цр҃ковь добро́тами ᲂу҆краси́лъ є҆сѝ, ꙳ лю́ди твоѧ̑ просвѣти́лъ є҆сѝ. ꙳ Сегѡ̀ ра́ди тѧ̀ почита́емъ, ꙳ ст҃и́телю бг҃омꙋ́дре, ꙳ молѝ ѡ҆ творѧ́щихъ па́мѧть твою̀.

Собери́тесѧ, празднолю́бцы, дне́сь, ꙳ въ па́мѧть є҆ѵѳѵ́мїа свѧти́телѧ, ꙳ и҆ сїю̀ кꙋ́пнѡ всѝ торжествꙋ́йте. ꙳ Се́й бо бл҃гоче́стїѧ подража́тель, ꙳ и҆ ѡ҆ ста́дѣ свое́мъ те́плый моли́твенникъ, ꙳ рѡссі́йскїѧ землѝ ᲂу҆добре́нїе, ꙳ вели́кагѡ же нова́града похвала̀ и҆ ᲂу҆твержде́нїе, ꙳ къ немꙋ́же прилѣ́жнѡ возопїе́мъ: ꙳ молѝ хрⷭ҇та̀ бг҃а ѡ҆ чтꙋ́щихъ па́мѧть твою̀.

Сла́ва, самогла́сенъ, гла́съ то́йже:

Дне́сь воспое́мъ свѧти́телѧ, благоче́стїѧ наста́вника, це́ркве столпа̀ непоколеби́ма, и҆сто́чника и҆сцѣле́нїй неисчерпа́ема, проли́тїе дарова́нїй дꙋхо́вныхъ, вели́кагѡ же нова́града просвѣти́телѧ, и҆ ѡ҆ всѣ́хъ моли́твенника те́пла. Къ немꙋ́же возопїи́мъ: свѧти́телю є҆ѵѳѵ́мїе, не преста́й молѧ́сѧ за дꙋ́шы на́шѧ.

И҆ ны́нѣ: Влⷣчце, прїимѝ моли́твꙋ ра̑бъ твои́хъ:

А҆́ще ли сꙋббѡ́та, пое́мъ славосло́вїе вели́кое. А҆́ще ли по́стъ, на стїхо́внѣ въ трїѡ́ди.

Сла́ва, ст҃и́телѧ, гла́съ ѕ҃:

Ѻ҆́трокъ ꙗ҆ви́лсѧ є҆сѝ смире́нъ, безѕло́бїемъ ᲂу҆краша́ѧсѧ: сегѡ̀ ра́ди хрⷭ҇то́съ бг҃ъ ѻ҆вца́мъ свои̑мъ па́стырѧ тѧ̀ поста́ви, и҆ ꙗ҆́кѡ неисче́тно бога́тство свои́хъ щедро́тъ ꙗ҆ви́ тѧ вели́комꙋ новꙋ́градꙋ, ѡ҆бꙋрева́ємымъ въ ско́рбехъ ти́хое приста́нище. И҆ ны́нѣ, свѧти́телю, не премолчѝ, вопїѧ̀ за ны̀ ко гдⷭ҇ꙋ.

И҆ ны́нѣ: Бцⷣе, ты̀ є҆сѝ лоза̀ и҆́стиннаѧ:

А҆́ще ли среда̀, и҆лѝ пѧто́къ, крⷭ҇тобг҃оро́диченъ. Поⷣ: Тридне́венъ:

Ви́дѧщи тѧ̀ распина́ема, хрⷭ҇тѐ, ꙳ тебѐ ро́ждшаѧ, вопїѧ́ше: ꙳ что̀ стра́нное, ꙳ є҆́же ви́жꙋ та́инство, сн҃е мо́й; ꙳ ка́кѡ на дре́вѣ ᲂу҆мира́еши пло́тїю повѣ́шенъ, ꙳ жи́зни пода́телю;

На лїтꙋргі́и, а҆́ще сꙋббѡ́та, блажє́нна, ст҃и́телѧ, пѣ́снь г҃-ѧ и҆ ѕ҃, и҆ про́чаѧ слꙋ́жба ст҃и́тельскаѧ.

* * *

2

Исправлена нестандартное титлование в оригинале: вскрⷭ҇нїѧ. Прим. orthlib

Комментарии для сайта Cackle