Мѣ́сѧца тогѡ́же въ и҃і-й де́нь. И҆́же во ст҃ы́хъ, ѻ҆ц҃а̀ на́шегѡ кѷрі́лла, а҆рхїепⷭ҇копа і҆ерꙋсали́мскагѡ.

Стїхи̑ры, гла́съ д҃. Подо́бенъ: Ꙗ҆́кѡ до́блѧ:

Ꙗ҆́кѡ ѕвѣзда̀ возсїѧ́въ, ꙳ и҆ вѣ̑рныѧ просвѣти́лъ є҆сѝ ꙳ свѧще́нными свѣтлостьмѝ догма́тѡвъ твои́хъ, и҆ є҆́рєси ѡ҆мрачи́лъ є҆сѝ, ꙳ и҆ до конца̀ побѣди́въ, ꙳ и҆ ꙗ҆́кѡ ра́бъ да́нный тебѣ̀ тала́нтъ ᲂу҆мно́жилъ є҆сѝ, ꙳ благоꙋгоди́въ влⷣцѣ, бг҃омꙋ́дре. ꙳ є҆мꙋ́же въ рꙋ́цѣ ѿложи́лъ є҆сѝ тво́й дꙋ́хъ, ꙳ бг҃облаже́нне кѷрі́лле.

Премꙋ́дростїю слове́съ твои́хъ, ꙳ и҆ сїѧ́нїемъ житїѧ̀ твоегѡ̀, ꙳ ꙗ҆́кѡ ѕвѣзда̀ многосвѣ́тлаѧ, досточꙋ́дне, ꙳ посредѝ собо́ра просїѧ́лъ є҆сѝ ѻ҆тцє́въ, ꙳ безбо́жнаго македо́нїа ꙳ жи́лами ᲂу҆дави́лъ є҆сѝ бл҃года́ти: ꙳ и҆ ст҃ы́й и҆ ѡ҆живлѧ́ющїй всѧ̑ бжⷭ҇твенный дх҃ъ, ꙳ хꙋ́лившаго безꙋ́мнѡ, ꙳ и҆ проѧвле́ннѡ беззако́нновавшаго.

Оу҆́мъ па́гꙋбный посрами́лъ є҆сѝ ꙳ пребезꙋ́мнагѡ ма́нента, ꙳ ѡ҆бличи́въ предо́брѣ и҆ мꙋдрѣ́йше, ꙳ сквє́рнаѧ ᲂу҆чє́нїѧ сегѡ̀ бꙋ́йства, ꙳ ᲂу҆чи́телей нача́льниче, ꙳ і҆ере́євъ бл҃голѣ́пїе, ꙳ бжⷭ҇твенный побо́рниче хрⷭ҇то́вы цр҃кве. ꙳ Сегѡ̀ ра́ди ст҃о́е веселѧ́щесѧ ꙳ соверша́емъ твоѐ ᲂу҆спе́нїе.

Сла́ва, и҆ ны́нѣ, бг҃оро́диченъ, гла́съ и҆ подо́бенъ то́йже:

Покаѧ́нїе и҆зрѧ́дное ꙳ и҆ спаси́тельное врачевство̀, ꙳ ꙗ҆́же бг҃а ро́ждшаѧ сп҃са моего̀, ꙳ и҆ сле́зъ то́ки, ꙳ и҆ часа̀ по́мыслъ гро́знагѡ и҆ стра́шагѡ ³, ꙳ и҆ сꙋда̀ неꙋмы́тнагѡ, ꙳ ты́ ми да́рꙋй и҆збѣжа́ти моли́твами твои́ми, ꙳ ѽ дв҃о! мꙋче́нїѧ тре́петнагѡ, ꙳ и҆ бжⷭ҇твеннꙋю ᲂу҆лꙋчи́ти бл҃года́ть.

Крⷭ҇тобг҃оро́диченъ. Подо́бенъ то́йже:

На крⷭ҇тѣ́ тѧ ꙗ҆́кѡ ᲂу҆зрѣ̀ ꙳ пригвожде́на, гдⷭ҇и, ꙳ а҆́гница и҆ мт҃и твоѧ̀ дивлѧ́шесѧ, ꙳ и҆ что̀ видѣ́нїе сїѐ, взыва́ше, ꙳ сн҃е вожделѣ́нне, ꙳ сїѧ̑ тѝ непокори́вый собо́ръ воздадѐ беззако́нный, ꙳ и҆́же мно́гихъ твои́хъ чꙋде́съ наслади́выйсѧ; ꙳ но сла́ва неизглаго́ланномꙋ ꙳ соше́ствїю твоемꙋ̀, влⷣко.

Канѡ́нъ, є҆гѡ́же краегране́сїе:

Кѷрі́лла пою̀ предсѣда́телѧ і҆ерꙋсали́мскаго. Кѵ́ръ ѳеофа́на.

Гла́съ д҃. Пѣ́снь а҃. І҆рмо́съ:

Трїста́ты крѣ́пкїѧ, рожде́йсѧ ѿ дв҃ы, безстра́стїѧ во глꙋбинѣ̀ дꙋшѝ трича́стное потопѝ, молю́сѧ: да тебѣ̀, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.

Оу҆краси́въ дꙋ́шꙋ добродѣ́телей ви́ды, благода́тей прїѧ́тельнꙋ дх҃а сїю̀ ст҃а́гѡ соверши́лъ є҆сѝ: ѿню́дꙋже бе́зднꙋ премꙋ́дрости ѿры́гнꙋлъ є҆сѝ, є҆ресе́й пꙋчи̑ны и҆зсꙋша́ющꙋ, кѷрі́лле.

Превы́шшїй ᲂу҆́мъ ве́щныхъ содѣ́лалъ є҆сѝ, невеще́ственныхъ слꙋжи́телей соѻ́бщникъ показа́всѧ, ѻ҆гне́мъ же слове́съ твои́хъ всю̀ попали́лъ є҆сѝ ве́щь є҆ресе́й, кѷрі́лле, церко́вное свѣти́ло неꙋсыпа́ющее.

Глагѡ́лъ твои́хъ вонѧ́ми сладкодыха́тельными, неи́стовства тезоимени́тнагѡ, премꙋ́дре, є҆ресе́й всѣ́хъ нестерпи́мый ка́лъ ѿгна́въ, дале́че сотвори́лъ є҆сѝ, ꙗ҆́кѡ па́стырь и҆́стиннѣйшїй, ꙗ҆́кѡ хрⷭ҇то́во благово́нїе бы́въ.

Бг҃оро́диченъ:

Ѿ тимѣ́нїѧ страсте́й, помышле́нїй треволне́нїѧ, ѿ стрѣ́лъ лꙋка́вагѡ, ѿ всѧ́кагѡ прило́га сопроти́внагѡ спасѝ, чⷭ҇таѧ бг҃ороди́тельнице, дꙋ́шы воспѣва́ющихъ твоѐ несказа́нное ржⷭ҇тво̀, всенепоро́чнаѧ.

Пѣ́снь г҃. І҆рмо́съ:

Ꙗ҆́кѡ непло́ды родѝ ѿ ꙗ҆зы̑къ цр҃ковь, и҆ мно́гое въ ча́дѣхъ и҆знемо́же со́нмище, чꙋ́дномꙋ бг҃ꙋ на́шемꙋ возопїи́мъ: ст҃ъ є҆сѝ, гдⷭ҇и.

Сїѧ́ѧ свѣтлостьмѝ дх҃о́вныѧ премꙋ́дрости, трисїѧ́нное бжⷭ҇тво̀ трⷪ҇цы, ѻ҆́ч҃е, свѣ́тлѡ сꙋ́щымъ на землѝ ᲂу҆ѧсни́лъ є҆сѝ, и҆́мже тмы̀ пре́лести и҆зба́вихомсѧ.

Цѣвни́ца ꙗ҆ви́лсѧ є҆сѝ всест҃а́гѡ дх҃а, бг҃омꙋ́дре, возглаша́ющи пѣ́снь ꙗ҆вле́нїѧ хрⷭ҇то́ва: є҆го́же во двꙋ̀ є҆стества́хъ проповѣ́далъ є҆сѝ, ᲂу҆слажда́ѧ дꙋ́шы на́шѧ.

До́мъ ст҃ы́ни твоѧ̀ дꙋша̀ показа́сѧ, въ него́же ѻ҆ц҃ъ, и҆ сн҃ъ, и҆ дх҃ъ живонача́льный преесте́ственнѡ всели́сѧ, є҆мꙋ́же пое́мъ: ст҃ъ є҆сѝ, гдⷭ҇и.

Бг҃оро́диченъ:

Нижѐ ᲂу҆́мъ нбⷭ҇ный, па́че ᲂу҆ма̀ рождества̀ твоегѡ̀ мо́жетъ сказа́ти, ѻ҆трокови́це: ᲂу҆ма́ бо пе́рвагѡ во ᲂу҆тро́бѣ сло́во, чⷭ҇таѧ, зачала̀ є҆сѝ, всѧ́чєскаѧ сло́вомъ соста́вльшаго.

Сѣда́ленъ, гла́съ и҃. Подо́бенъ: Премꙋ́дрости:

Премꙋ́дростїю сло́ва ѡ҆богатѣ́въ, ѿры́гнꙋлъ є҆сѝ ᲂу҆че́нїй рѣ́ки живѡ́тныѧ, и҆ всѧ́кꙋ напои́лъ є҆сѝ благочести́выхъ мы́сль, и҆ па́лицею бжⷭ҇твенною ᲂу҆па́слъ є҆сѝ ста́до на ѕла́цѣ, бж҃е́ственнагѡ напита́лъ є҆сѝ ра́зꙋма. Тѣ́мже ꙗ҆́кѡ па́стырѧ и҆ ᲂу҆чи́телѧ вели́ка, и҆ вѣ́рныхъ застꙋ́пника, восхвалѧ́емъ тѧ̀, кѷрі́лле ст҃и́телю, зовꙋ́ще: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чествꙋ́ющымъ любо́вїю свѧтꙋ́ю па́мѧть твою̀.

Сла́ва, и҆ ны́нѣ, бг҃оро́диченъ:

Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ младе́нца дои́ши зижди́телѧ и҆ гдⷭ҇а. Тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.

Крⷭ҇тобг҃оро́диченъ:

А҆́гнца и҆ па́стырѧ, и҆ и҆зба́вителѧ, а҆́гница зрѧ́щи на крⷭ҇тѣ̀, восклица́ше пла́чꙋщи и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. Долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе вѣ́рою пою́щымъ бж҃е́ствєнныѧ стра̑сти твоѧ̑.

Пѣ́снь д҃. І҆рмо́съ:

Нб҃са̀ добродѣ́тель твоѧ̀ покры́ла є҆́сть, и҆ землѧ̀ и҆спо́лнисѧ сла́вы твоеѧ̀, хрⷭ҇тѐ. Тѣ́мже вѣ́рнѡ вопїе́мъ: сла́ва си́лѣ твое́й, гдⷭ҇и.

Премі́рныѧ мꙋ́дрости стрꙋю̀, преподо́бне, твоѐ се́рдце прїе́мши, ѿры́гнꙋ ᲂу҆че́нїѧ бе́зднꙋ, ᲂу҆мы̀ нече́ствꙋющихъ погрꙋжа́ющꙋю.

Є҆ди́нꙋ крѣ́пость, є҆ди́но сꙋщество̀, є҆ди́нꙋ во́лю, трїѷпоста́снагѡ бжⷭ҇тва̀ проповѣ́далъ є҆сѝ: и҆ многобо́жїѧ, кѷрі́лле, пре́лести пото́къ и҆зсꙋши́лъ є҆сѝ.

Оу҆́мъ ка́льный и҆ пребезꙋ́мный ма́нентовъ, ꙗ҆́кѡ ᲂу҆́мъ и҆мы́й и҆ бг҃онаꙋче́нъ, бл҃же́нне, блиста̑нїи слове́съ твои́хъ попали́въ, ꙗ҆́вѣ ѡ҆бличи́лъ є҆сѝ.

Бг҃оро́диченъ:

Ꙗ҆́кѡ вы́шши всѣ́хъ тва́рей, чⷭ҇таѧ, творца̀ тва́ри зачала̀ є҆сѝ, и҆ па́че є҆стества̀ ро́ждши, є҆стество̀ на́ше ѡ҆бно́вльшаго.

Пѣ́снь є҃. І҆рмо́съ:

Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ вѣ́рою воспѣва́ющыѧ тѧ̀. Жезло́мъ честны́ѧ, свѧти́телю, премꙋ́дрости твоеѧ̀ ᲂу҆па́слъ є҆сѝ на водѣ̀ правосла́внагѡ слꙋже́нїѧ па́ствꙋ твою̀, блаже́нне.

Сло́во твоѐ свѣ́томъ бжⷭ҇твеннымъ ѡ҆блиста́емо, ѽ кѷрі́лле! просвѣще́нныхъ во і҆ерꙋсали́мѣ, мглꙋ̀ неразꙋ́мїѧ разрꙋши́лъ є҆сѝ.

Бг҃оро́диченъ:

Но́щь, пречⷭ҇таѧ, страсте́й, и҆ ѕлы́хъ ѡ҆черне́нїѧ покрыва́етъ дꙋ́шꙋ мою̀, свѣтода́вца ро́ждшаѧ, ѡ҆зари́ мѧ, молю́сѧ.

Пѣ́снь ѕ҃. І҆рмо́съ:

Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ.

Рѣка̀ ты̀ ꙗ҆́кѡ и҆зъ и҆но́гѡ є҆де́ма и҆зше́лъ є҆сѝ, жизното́чныхъ и҆спо́лнена во́дъ дх҃а, и҆ цр҃кѡ́вныѧ, ст҃и́телю, напоѧ́еши бразды̑.

Глагѡ́лъ твои́хъ лꙋче́мъ, ꙗ҆́кѡ ѿ бꙋ́ри морскі́ѧ нече́стїѧ спаса́еши лю́ди, ѡ҆свѧще́ннѣйше, къ ти́хомꙋ приста́нищꙋ правосла́вїѧ тѣ́хъ призыва́ѧ.

Бг҃оро́диченъ:

Ѡ҆небеси́ла є҆сѝ ѡ҆зе́мльствованное є҆стество̀, всенепоро́чнаѧ, человѣ́ческое, и҆ и҆стлѣ́вшее сїѐ новосодѣ́лала є҆сѝ: сегѡ̀ ра́ди, ѻ҆трокови́це, всѝ немо́лчными гла́сы тѧ̀ сла́вимъ.

Конда́къ, гла́съ а҃.

Ѧ҆зы́комъ твои́мъ, мꙋ́дре, бжⷭ҇твенными вдохнове́ньми, просвѣти́лъ є҆сѝ твоѧ̑ лю́ди, є҆ди́нꙋ честѝ трⷪ҇цꙋ, є҆стество́мъ нераздѣ́льнꙋ, раздѣлѧ́емꙋ же ли́цы. Тѣ́мже ра́дꙋющесѧ, всест҃ꙋ́ю твою̀ па́мѧть пра́зднꙋемъ, и҆̀же къ бг҃ꙋ моли́твенника тѧ̀ предлага́ющїи.

Пѣ́снь з҃. І҆рмо́съ:

Ю҆́ношы трѝ въ вавѷлѡ́нѣ, велѣ́нїе мꙋчи́телево на бꙋ́йство прело́жше, посредѣ̀ пла́мене вопїѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.

И҆мѣ́ѧ ѻ҆́гнь во ᲂу҆мѣ̀, ѻ҆́ч҃е, стра́ха бж҃їѧ, ве́щь и҆спепели́лъ є҆сѝ сласте́й, воспѣва́ѧ: благослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Слеза́ми страсте́й пла́мень погаси́въ, блаже́нне, свѣ́тлость сохрани́лъ є҆сѝ неꙋгаси́мꙋ твоеѧ̀ дꙋшѝ, взыва́ѧ: благослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Стрꙋю̀ живꙋ́ю и҆мѣ́ѧ лїѧ́нїемъ дх҃а, въ дꙋшѝ, бг҃омꙋ́дре, и҆сточи́лъ є҆сѝ, ѻ҆́ч҃е, рѣ́ки ᲂу҆че́нїй, цр҃ковь напоѧ́ющыѧ, благоче́стнѡ тѧ̀ чествꙋ́ющꙋю.

Бг҃оро́диченъ:

Всю́ тѧ ѡ҆свѧща́етъ ст҃ы́й, ѿ твоеѧ̀ пло́ти заи́мствовавый пло́ть себѣ̀, бцⷣе, во ст҃ы́хъ гдⷭ҇ь живы́й бг҃ъ на́шъ.

Пѣ́снь и҃. І҆рмо́съ:

И҆зба́вителю всѣ́хъ всеси́льне, посредѣ̀ пла́мене бл҃гоче́ствовавшыѧ, снизше́дъ, ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀, бл҃гослови́те, по́йте гдⷭ҇а.

Дрема́нїе небреже́нїе, блаже́нне, ѿ вѣ́ждей дꙋше́вныхъ ѿри́нꙋвъ, пра́вєднымъ прили́чнымъ ны́нѣ ᲂу҆снꙋ́лъ є҆сѝ сно́мъ, и҆ ко дню̀ невече́рнѧгѡ свѣ́та преше́лъ є҆сѝ.

Мо́лнїѧми слове́съ твои́хъ попали́лъ є҆сѝ хвра́стнꙋю є҆́ресь, приснопа́мѧтне, и҆ вѣ̑рныѧ просвѣти́лъ є҆сѝ, є҆ди́нꙋ честѝ трⷪ҇цꙋ начерта́ньми, во є҆ди́ницѣ сꙋ́щꙋю є҆стества̀.

Ѡ҆свѧти́въ себѐ поще́ньми, ме́ртвꙋ тебє̀ ра́ди бы́вшꙋ, ты̀ безкро́внѡ же́ртвовалъ є҆сѝ, ꙗ҆́кѡ свѧти́тель бжⷭ҇твенный, ꙗ҆́кѡ та̑инъ неизрече́нныхъ слꙋжи́тель, кѷрі́лле.

Бг҃оро́диченъ:

И҆зба́вльшесѧ клѧ́твы прама́тернїѧ тобо́ю, чⷭ҇таѧ бг҃омт҃и, благослове́ннаѧ влⷣчце, благослови́мъ, дв҃и́це препросла́вленнаѧ, прест҃о́е ржⷭ҇тво̀ твоѐ, всечⷭ҇таѧ.

Пѣ́снь ѳ҃. І҆рмо́съ:

Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови бл҃гослове́нїе процвѣла̀ є҆сѝ. тѣ́мъ тѧ̀ всѝ велича́емъ.

Ви́дѣти жела́ѧ хрⷭ҇то́вꙋ неизрече́ннꙋю, свѧти́телю, сла́вꙋ, потща́лсѧ є҆сѝ стра̑сти ᲂу҆мертви́ти дꙋшетлѣ̑нныѧ, прїѧ́телище се́рдце сотвори́ти премꙋ́дрости бо́льшїѧ и҆ лꙋ́чшїѧ. Тѣ́мже тѧ̀ вѣ́рою ᲂу҆блажа́емъ.

Ѕвѣздꙋ̀ многосвѣ́тлꙋю, хрⷭ҇то́съ сл҃нце, на цр҃ко́внѣй высотѣ̀ положи́ тѧ, кѷрі́лле, лꙋча́ми ᲂу҆че́нїй свѧще́нныхъ, ѡ҆зарѧ́юща сердца̀ вѣ́рнѡ соверша́ющихъ твою̀ свѣтоно́снꙋю па́мѧть, преподо́бне.

Собесѣ́дникъ и҆ сослꙋжи́тель бы́лъ є҆сѝ а҆́гг҃лѡмъ: ꙗ҆́кѡ бо безпло́тенъ, ѻ҆́ч҃е, на землѝ пожи́въ, прпⷣбнымъ ꙗ҆ви́лсѧ є҆сѝ соприча́стникъ, и҆ свѧти́телємъ равностоѧ́тель: съ ни́миже ликꙋ́ѧ, на́съ помина́й.

Бг҃оро́диченъ:

Непло́дствꙋющее бжⷭ҇твенныхъ добродѣ́телей, пречⷭ҇таѧ бцⷣе, се́рдце моѐ покажѝ, дв҃о, плодоно́сно, ꙗ҆́же ѿ непло́дове ро́ждшаѧсѧ, во́лею всѧ̑ претворѧ́ющагѡ манове́нїемъ, да тѧ̀ пою̀ всепѣ́тꙋю.