Библиотеке требуются волонтёры

Мѣ́сѧца тогѡ́же въ к҃-й де́нь. Преподо́бныхъ ѻ҆ц҃ъ на́шихъ, во ѻ҆би́тели свѧта́гѡ са́ввы ᲂу҆бїе́нныхъ.

Стїхи̑ры, гла́съ д҃ Подо́бенъ: Ꙗ҆́кѡ до́блѧ:

Жела́нїй кра́йнѣйшемꙋ ꙳ до конца̀ прилѣжа́ще, житє́йскїѧ красоты̑, преподо́бнїи, ꙳ ꙗ҆́кѡ ᲂу҆мє́ты всѧ̑ вмѣни́сте: ꙳ и҆ є҆ди̑на пребыва̑ющаѧ, ꙳ бдѣ́нїемъ и҆ моли́твами, ꙳ дожде́мъ же и҆ ва́ромъ стѧжа́сте, є҆диножи́телє вкꙋ́пѣ бы́вше, ꙳ согра́ждане а҆́гг҃лѡмъ ꙗ҆ви́стесѧ благода́тїю.

И҆ дреко́лїемъ бїе́ми, ꙳ и҆ ка́менїемъ намета́еми, ꙳ и҆ ѻ҆рꙋ̑жїи разсѣка́еми, ꙳ є҆диномы́слїѧ не разрꙋши́сте, мꙋ́чєницы, ꙳ любо́вїю свѧ́заннїи и҆ жела́нїемъ бра́тскимъ: ꙳ но вкꙋ́пѣ ᲂу҆мерщвлѧ́еми, ꙳ и҆ разсѣка́еми на ᲂу҆́ды, страстоте́рпцы, ꙳ на трапе́зѣ положи́стесѧ бж҃е́ственнѣй, ꙳ ꙗ҆́кѡ жє́ртвы непорѡ́чныѧ.

И҆ ѻ҆гне́мъ и҆знꙋрѧ́еми, ꙳ и҆ ᲂу҆давле́нїемъ стѧга́еми, дꙋ́шы преда́сте ꙗ҆́кѡ непорѡ́чныѧ жє́ртвы, ꙳ мꙋ́чєницы сла́внїи, ꙳ въ рꙋ́цѣ всецр҃ѧ̀, ꙳ и҆ совокꙋпи́стесѧ съ ли́ки безпло́тныхъ си́лъ, ꙳ вѣ́чнꙋющꙋю наслѣ́довасте сла́вꙋ: ꙳ є҆́йже причасти́тисѧ ва́съ восхвалѧ́ющымъ ꙳ непреста́ннѡ моли́тесѧ.

Сла́ва, и҆ ны́нѣ, бг҃оро́диченъ, гла́съ и҆ подо́бенъ то́йже:

Покаѧ́нїѧ и҆зрѧ́дное ꙳ и҆ спаси́тельное врачевство̀, ꙳ ꙗ҆́же бг҃а ро́ждшаѧ сп҃са моего̀, ꙳ и҆ сле́зъ то́ки, и҆ часа̀ по́мыслъ гро́знагѡ и҆ стра́шнагѡ, ꙳ и҆ сꙋда̀ неꙋмы́тнагѡ, ꙳ ты́ ми да́рꙋй и҆збѣжа́ти моли́твами твои́ми, ꙳ ѽ дв҃о! мꙋче́нїѧ тре́петнагѡ, ꙳ и҆ бжⷭ҇твеннꙋю полꙋчи́ти бл҃года́ть.

Крⷭ҇тобг҃оро́диченъ. Подо́бенъ то́йже:

На крⷭ҇тѣ́ тѧ ꙗ҆́кѡ ᲂу҆зрѣ̀ ꙳ пригвожде́на, гдⷭ҇и, ꙳ а҆́гница и҆ мт҃и твоѧ̀ дивлѧ́шесѧ: ꙳ и҆ что̀ видѣ́нїе сїѐ, взыва́ше, ꙳ сн҃е вожделѣ́нне; ꙳ сїѧ̑ тебѣ̀ непокори́вый собо́ръ воздадѐ беззако́нный, ꙳ и҆́же мно́гихъ твои́хъ чꙋде́съ наслади́выйсѧ, ꙳ по сла́ва неизглаго́ланномꙋ ꙳ соше́ствїю твоемꙋ̀, влⷣко.

Канѡ́нъ, є҆гѡ́же краегране́сїе: Пѣ́сньми сла́влю мч҃ники є҆динонра̑вныѧ.

Творе́нїе кѵ́ръ стефа́на савваі́та.

Гла́съ и҃. Пѣ́снь а҃. І҆рмо́съ:

Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще: пои́мъ тебѣ̀ є҆ди́номꙋ влⷣцѣ.

Пѣ́сньми бг҃овѣнча́нное мно́жество свѧще́нныхъ мꙋ́чєникъ твои́хъ жела́ющемꙋ похвали́ти, хрⷭ҇тѐ, съ нб҃сѐ пода́ждь мѝ свѣ́тъ ра́зꙋма си́хъ мольба́ми, да воспою̀ бг҃овѣща́ннꙋю пѣ́снь.

Скве́рнꙋ ѿверго́сте пло́ти и҆ дꙋ́ха, пребога́тїи, мі́ра смертоно́сныхъ сласте́й и҆збѣ́гше: равноа́гг҃льное же житїѐ пожи́вше, въ вы́шнее преидо́сте жили́ще.

Зако́нѡмъ дх҃а ꙗ҆́вѣ ᲂу҆́ды ᲂу҆пра́вивше ва́шѧ и҆ чꙋ̑вства, хра́мы ѡ҆свѧщє́нны бг҃ꙋ показа́стесѧ, мꙋ́чєницы бг҃оно́снїи: въ ва́съ бо хрⷭ҇то́съ водвори́сѧ.

Бога́тство тли́мое на землѝ ѡ҆ста́вльше, ст҃і́и, и҆ кра̑снаѧ житїѧ̀ ꙗ҆́кѡ со́нъ презрѣ́вше, хрⷭ҇тꙋ̀ ᲂу҆годи́вше, недви́жимое црⷭ҇тво ны́нѣ воспрїѧ́сте.

Бг҃оро́диченъ:

Лѣ́ствица ꙗ҆ви́ласѧ є҆сѝ мы́сленнаѧ, ю҆́же і҆а́кѡвъ ви́дѣ и҆збра́нный бж҃їй, и҆зъ неѧ́же неизрече́ннымъ сло́вомъ про́йде безпло́тный, пло́ть непрело́жнѡ бы́въ, па́че сло́ва и҆зъ тебє̀, бцⷣе.

Пѣ́снь г҃. І҆рмо́съ:

Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Ѡ҆свѧти́вше всѐ ва́ше, мꙋ́чєницы, житїѐ, нескве́рно вои́стиннꙋ всеви́дѧщемꙋ бг҃ꙋ принесо́сте всесожжє́нїѧ бж҃е́ствєнна са́ми себѐ, и҆ совершє́нныѧ вѣнцы̀ прїѧ́сте.

Са́ввы бг҃оно́снагѡ ꙗ҆́кѡ ᲂу҆ченицы̀ и҆́скреннїи, є҆́же кромѣ̀ пли́щєвъ возжела́вше ѿше́ствїе, невозвра́тнѡ стезе́ю приско́рбною ше́ствꙋюще, къ жи́зни достиго́сте безконе́чнѣй.

Воздѣ́лавше сѣ́мѧ є҆́же въ ва́съ, преподо́бнїи, всѣ́ѧное сло́во, и҆ сле́зными то́ки ѻ҆би́льнѡ напои́вше, стори́чествꙋющїй кла́съ бг҃ꙋ принесо́сте плодоноси́вше.

Всели́всѧ въ дв҃ꙋ пло́тски, гдⷭ҇и, ꙗ҆ви́лсѧ є҆сѝ человѣ́кѡмъ, ꙗ҆́коже подоба́ше зрѣ́ти тѧ̀: ю҆́же и҆ показа́лъ є҆сѝ ꙗ҆́кѡ и҆́стиннꙋю бцⷣꙋ и҆ вѣ̑рнымъ по́мощь, є҆ди́не чл҃вѣколю́бче.

Сѣда́ленъ, гла́съ и҃. Подо́бенъ: Повелѣ́нное та́йнѡ:

Воздержа́нїемъ страсте́й ѻ҆гнепа̑льныѧ ᲂу҆мертви́вши зра́ки и҆ двиза̑нїѧ, пѡ́стницы бг҃опрїѧ́тнїи, послѣ́дꙋюще стопа́мъ всѧ̑ созда́вшемꙋ є҆ди́номꙋ бг҃ꙋ, ꙗ҆́коже прїѧ́тна же́ртва жива̀ и҆ ѡ҆свѧще́нна, принесо́стесѧ заколе́нїемъ рꙋ́къ ва́рварскихъ, бїе́ми, закала́еми, и҆ нꙋ́жднѡ пресѣка́еми.

Сла́ва, и҆ ны́нѣ, бг҃оро́диченъ:

Бг҃ора́дованнаѧ, чⷭ҇таѧ благослове́ннаѧ, за милосе́рдїе щедро́тъ и҆зъ тебє̀ ро́ждшагѡсѧ, съ вы́шними си́лами и҆ а҆рха̑гг҃лы, и҆ со всѣ́ми безпло́тными, ѡ҆ на́съ молѝ непреста́ннѡ, да́ти на́мъ пре́жде конца̀ проще́нїе и҆ ѡ҆чище́нїе грѣхѡ́въ, и҆ житїѧ̀ и҆справле́нїе: ꙗ҆́кѡ да ѡ҆брѧ́щемъ ми́лость.

Крⷭ҇тобг҃оро́диченъ:

Сн҃а твоегѡ̀ и҆ бг҃а крⷭ҇то́мъ, дв҃о, сохранѧ́еми при́снѡ, дє́мѡнскїѧ прилѡ́ги и҆ кѡ́зни побѣжда́емъ, сꙋ́щꙋю бцⷣꙋ тѧ̀ вои́стиннꙋ воспѣва́юще: и҆ любо́вїю всѝ ро́ди блажи́мъ, пречⷭ҇таѧ, ꙗ҆́коже прорекла̀ є҆сѝ. Тѣ́мже согрѣше́нїй на́шихъ ѡ҆ставле́нїе моли́твами твои́ми да́рꙋй.

Пѣ́снь д҃. І҆рмо́съ:

Всѣ́лъ є҆сѝ на ко́ни, а҆пⷭ҇лы твоѧ̑, гдⷭ҇и, и҆ прїѧ́лъ є҆сѝ рꙋка́ма твои́ма ᲂу҆зды̑ и҆́хъ, и҆ спасе́нїе бы́сть ѣ҆жде́нїе твоѐ вѣ́рнѡ пою́щымъ: сла́ва си́лѣ твое́й, гдⷭ҇и.

Въ пꙋсты́ни безво́днѣй терпѧ́щыѧ зрѧ̀ вра́гъ, добродѣ́тельми же разли́чными красѧ́щыѧсѧ, непобѣди̑мыѧ мꙋ́ченики, роспалѧ́шесѧ лю́тѣ, за́вистїю ѡ҆бложе́нъ, и҆ на ѡ҆полче́нїе готовлѧ́шесѧ.

Оу҆корени́въ пре́лесть во свои́хъ є҆мꙋ̀ ᲂу҆ченицѣ́хъ, на дрꙋ́гъ дрꙋ́жное ᲂу҆бі́йство поꙋча́ше ва̑рварскаѧ колѣ̑на ѕмі́й лꙋка́вый, и҆́миже и҆ и҆зъ пꙋсты́ни и҆згна́ти преподѡ́бныѧ тща́шесѧ.

Свирѣ́пѡ и҆́же ѻ҆крє́стныѧ ѡ҆б̾е́мъ, ꙗ҆́коже возжелѣ̀, ѿгна́ти ᲂу҆́бѡ сїѧ̑ не возмо́же непобѣди̑мыѧ, пра́ведныхъ сопротивобо́рецъ, побѣжде́нъ же бы́въ неви́димѡ ѻ҆коѧвле́ннѣ воѡрꙋжи́сѧ.

Ꙗ҆́да и҆ неи́стовства и҆спо́лненъ, ᲂу҆стреми́сѧ со ѻ҆рꙋ́жники ѕлонача́льникъ, ѕвѣрови́днѡ же блажє́ннымъ натечѐ, и҆ ра́нами нестерпи́мыми крѡ́вныѧ пото́ки и҆злїѧ̀.

Текꙋ́щагѡ и҆стѧ́зовахꙋ вещества̀, зла́та тлѣ́ннагѡ сокро́вища, и҆̀же на землѝ ᲂу҆пова̑нїѧ ᲂу҆тве́рждшїи, до́блїи же на нб҃са̀ поло́жше ᲂу҆пова̑нїѧ, вопїѧ́хꙋ: сла́ва си́лѣ твое́й, гдⷭ҇и.

Ꙗ҆́коже ѕвѣ́рїе дреко́льми неми́лостивнѡ, и҆ мєчѝ преподѡ́бныѧ и҆ ка́менїемъ ᲂу҆ранѧ́хꙋ, своѧ̑ старѣ̑йшины сказа́ти велѧ́ще: но пребыва́хꙋ всѝ зако́номъ любвѐ ᲂу҆твержда́еми.

Бг҃оро́диченъ:

Дв҃о и҆ мт҃и, ты̀ а҆пⷭ҇лѡвъ ᲂу҆добре́нїе, и҆ мꙋ́ченикѡвъ свѧты́хъ ᲂу҆твержде́нїе, и҆ преподо́бныхъ похвала́ же и҆ спасе́нїе, вѣ́рнѡ сладкопою́щихъ: сла́ва си́лѣ твое́й.

Пѣ́снь є҃. І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Наꙋчи́вшесѧ любвѐ, сп҃се, сою́зꙋ соверше́нїѧ преподо́бнїи, и҆ нака́зани тобо́ю, дꙋ́шы положи́ша по свои́хъ дрꙋзѣ́хъ, твои̑мъ па́че человѣ́кѡмъ вѡ́льнымъ стрⷭ҇те́мъ подо́бѧщесѧ.

Вельмѝ па́че є҆стества̀ пло́тїю во́лею рожде́йсѧ, хрⷭ҇тѐ, повелѣ́нїемъ твои́мъ сме́рти ꙗ҆ви́шасѧ держа́внѣе: и҆́бо твои́мъ составлѧ́ющесѧ зако́номъ, ᲂу҆мре́ти по дрꙋзѣ́хъ благохва́льнѡ бг҃омꙋ́дрїи тща́хꙋсѧ.

Ѡ҆кропи́вше ѵ҆ссѡ́помъ креще́нїе мы́сленнымъ дꙋ́шы, ва́шими же а҆́бїе ѡ҆кропи́стесѧ кровьмѝ, преподо́бнїи: во стремле́нїи же ѻ҆гнѧ̀ ꙗ҆́кѡ зла́то и҆скꙋси́вшесѧ, прїѧ́тна бы́сте же́ртва благово́нна бг҃ꙋ.

Бг҃оро́диченъ:

Мт҃рнее дерзнове́нїе, є҆́же къ сн҃ꙋ твоемꙋ̀ стѧжа́вши, пречⷭ҇таѧ, сро́днагѡ промышле́нїѧ на́шегѡ не пре́зри, мо́лимсѧ: ꙗ҆́кѡ тѧ̀ и҆ є҆ди́нꙋ хрⷭ҇тїа́не ко влⷣцѣ ѡ҆чище́нїе ми́лостивнѡ предлага́емъ.

Пѣ́снь ѕ҃. І҆рмо́съ:

Къ могꙋ́щемꙋ мѧ̀ спастѝ гдⷭ҇ꙋ, и҆зъ глꙋбины̀ грѣхо́вныѧ возопи́хъ, и҆ ѿ тлѝ возведѐ живо́тъ мо́й, ꙗ҆́кѡ чл҃вѣколю́бецъ.

Преще́нїй ва́рварскихъ не ᲂу҆боѧ́шасѧ ᲂу҆гѡ́дницы хрⷭ҇тѡ́вы: житїе́ бо непреста́ннымъ поꙋче́нїемъ сме́ртнымъ предста́виша.

Мнѧ́ще богатѣ́ти нестѧжа́тели, нечести́вїи неща́днѡ мꙋ́чахꙋ, и҆̀же тлѣ̑ннаѧ ᲂу҆́бѡ пове́ргшыѧ, стѧжа́вшыѧ же нетлѣ̑ннаѧ.

Си́лою непобѣди́мою ѡ҆дѣѧ́вшесѧ, хрⷭ҇тѡ́вы страда́льцы, побѣди́ша мы́слєнныѧ лестцы̀ и҆ ва̑рварскаѧ шата̑нїѧ.

Бг҃оро́диченъ:

Ꙗ҆́кѡ на ѻ҆́блацѣ ле́гцѣмъ, прїи́де на тѧ̀ црⷭ҇твꙋѧй гдⷭ҇ь, низложи́ти, всенепоро́чнаѧ, є҆гѵ́пєтскаѧ рꙋкотворє́нїѧ.

Конда́къ, гла́съ д҃. Подо́бенъ: Вознесы́йсѧ:

Земны́хъ и҆ тлѣ́нныхъ наслажде́нїе презрѣ́вше ꙗ҆́вѣ, преблаже́ннїи, пꙋсты́нное житїѐ и҆зво́ливше, мі́ра же краснѣ́йшее и҆ пи̑щи вре́мєнныѧ возненави́дѣвше, ѿѻнꙋ́дꙋже сподо́бистесѧ нб҃снагѡ црⷭ҇твїѧ, съ ли́ки мꙋ́чєникъ и҆ пѡ́стникъ веселѧ́щесѧ. тѣ́мже чтꙋ́ще па́мѧть ва́шꙋ, вопїе́мъ ва́мъ прилѣ́жнѡ: ѿ бѣ́дъ на́съ, ѻ҆ц҃ы̀, и҆зба́вите.

Пѣ́снь з҃. І҆рмо́съ:

Халде́йскїѧ пе́щи всепа́гꙋбнꙋю си́лꙋ ᲂу҆гаси́вше, ѻ҆́бразомъ а҆́гг҃ла снизше́дшагѡ, зижди́телю ю҆́нѡши взыва́хꙋ: бл҃гослове́нъ є҆сѝ и҆ хва́льный, бж҃е ѻ҆тє́цъ на́шихъ.

И҆знемого́ша вкꙋ́пѣ бра̑ни проти́вныхъ полкѡ́въ, ви́димыхъ и҆ неви́димыхъ, въ ра́нахъ зрѧ́ще мꙋ́ченики пѣсносло́вѧщыѧ: благослове́нъ є҆сѝ и҆ хва́льный, бж҃е ѻ҆тє́цъ на́шихъ.

Тебѣ̀ хрⷭ҇тꙋ̀ ᲂу҆невѣ́стившесѧ, и҆ жела́нїемъ твои́мъ ᲂу҆ѧзвлѧ́еми, є҆ди́наго сꙋ́щаго возлюби́ша, ро́дъ и҆ ѻ҆те́чество, и҆ бога́тство ѿве́ргше, прибѣга́телїе твоѝ, ѽ и҆зба́вителю, бж҃е ѻ҆тє́цъ на́шихъ!

Скверноꙋбі́йство ва́рварѡвъ не претворѝ рачи́тели твоѧ̑, хрⷭ҇тѐ, пꙋсты́ннагѡ бг҃ослꙋже́нїѧ: ᲂу҆бива́ющихъ бо тѣ́ло не ᲂу҆боѧ́шасѧ, твоѧ̑ держа́ще за́пѡвѣди, ꙗ҆́коже незы́бленное ѡ҆снова́нїе.

Всѐ къ тебѣ̀ преложи́вше ѿ мі́ра жела́нїе, хрⷭ҇тѐ, ꙗ҆́рость же то́кмѡ на грѣ́хъ воѡрꙋжи́вше, тебѣ̀ ᲂу҆годи́ша, всемꙋ́дрымъ ѡ҆б̾е́мшесѧ по́мысломъ, ᲂу҆гѡ́дницы твоѝ, гдⷭ҇и.

Зако́нъ бг҃опи́санный внꙋ́трь на скрижа́лѣхъ серде́цъ ва́шихъ ѿ бг҃а, мꙋ́чєницы, прїе́мше, є҆ди́наго въ трⷪ҇цѣ бг҃а проповѣ́дасте, томꙋ̀ вопїю́ще: бл҃гослове́нъ є҆сѝ и҆ хва́льный, бж҃е ѻ҆тє́цъ на́шихъ.

Бг҃оро́диченъ:

Во свѣ́тѣ гдⷭ҇ни ходѧ́щїи, прїиди́те, воспои́мъ бж҃е́ственнꙋю две́рь цр҃ѧ̀ црⷭ҇твꙋющихъ, мр҃і́ю, чⷭ҇тꙋю бцⷣꙋ вои́стиннꙋ, ꙗ҆́кѡ ᲂу҆пова́нїе дꙋ́шъ на́шихъ.

Пѣ́снь и҃. І҆рмо́съ:

Нече́стїѧ ѻ҆рга́ны и҆нꙋ́ю пѣ́снь, благоче́стїѧ же бг҃овѣща́ннїи поѧ́хꙋ гꙋ̑сли: бл҃гослови́те, дѣла̀ гдⷭ҇нѧ, хрⷭ҇та̀ во вѣ́ки.

Нбⷭ҇нымъ чинѡ́мъ ревнова́вше равноа́гг҃льни, всено́щными стоѧ̑нїи во бдѣ́нїихъ поѧ́хꙋ: бл҃гослови́те, всѧ̑ дѣла̀ гдⷭ҇нѧ, хрⷭ҇та̀ во вѣ́ки.

Крⷭ҇тъ взе́мше, тебѣ̀ влⷣцѣ послѣ́доваша вседꙋ́шнѡ мꙋ́чєницы, пою́ще: бл҃гослови́те, всѧ̑ дѣла̀ гдⷭ҇нѧ, хрⷭ҇та̀ во вѣ́ки.

Всепра́внѡ тѣ́ло и҆ дꙋ́шꙋ, и҆ дꙋ́хъ ѡ҆чи́стивше, всесожжє́нїѧ бг҃ꙋ принесо́стесѧ, во ѻ҆гнѝ ѡ҆пали́вшесѧ, ѻ҆ц҃ы̀, хрⷭ҇та̀ превозносѧ́ще во всѧ̑ вѣ́ки.

Трⷪ҇ченъ:

Во двꙋ́хъ ѵ҆поста́сѣхъ тѧ̀ бы́ти хꙋ́лѧщїи нераздѣли́маго, да постыдѧ́тсѧ, ꙗ҆́кѡ четвери́цꙋ чтꙋ́щїи: мы́ бо тебѣ̀ є҆ди́номꙋ бж҃е́ственныѧ трⷪ҇цы покланѧ́емсѧ.

Пѣ́снь ѳ҃. І҆рмо́съ:

Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ. Тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Разли́чнѡ ѡ҆бна́жшесѧ пѡ́стницы, и҆ побѣди́вше мїроде́ржца кѡ́зни, посрами́ша мꙋ́жески ꙗ҆́кѡ страда́льцы ва́рварское ѡ҆ѕлобле́нїе, си́хъ претерпѣ́вше стремлє́нїѧ. тѣ́мже и҆ вѣнцы̀ сꙋгꙋ̑быѧ ѿ пра́веднагѡ подвигополо́жника прїѧ́ша.

Въ верте́пахъ и҆ пеще́рахъ по́стнически жи́знь проходѧ́ще, бл҃же́ннїи, въ пеще́рѣ тѣ́снѣй про́пасти затворе́ни бы́сте несвѣ́тлѣй, ѡ҆багре́ни кровьмѝ, жже́нїемъ же ѻ҆гнѧ̀, и҆ и҆̀же ѿ ды́ма лю́тѣ па́рою смѣша́емою ᲂу҆да́влени бы́вше, побѣдоно́сцы ꙗ҆ви́стесѧ.

Пое́мъ по́двиги па́че є҆стества̀, и҆́миже проти́вꙋ грѣха̀ пострада́сте, ю҆́ношески противоста́вше, ꙗ҆́кѡ хрⷭ҇тѡ́вы во́ини, сла́внїи: и҆́бо побѣди́сте благосла́внѡ, и҆ ны́нѣ предстоѧ́ще съ чи́нми ст҃ы́хъ всевысоча́йшемꙋ, на́съ помина́йте.

Съ са́ввою ѻ҆ц҃е́мъ и҆ наста́вникомъ, ꙗ҆́кѡ и҆́скрєннѧѧ ча̑да, блаже́ннїи, на нб҃сѣ́хъ заре́ю ѡ҆дѣ́ѧни трисїѧ́нною, ѡ҆ на́съ моли́тесѧ, соꙋченицѣ́хъ же и҆ пѣвцѣ́хъ, ми́ръ дарова́ти ѻ҆́бщїй це́рквамъ, и҆ спасе́нїе дꙋша́мъ на́шымъ.

Бг҃оро́диченъ:

Ѿриновє́нныѧ нб҃снагѡ житїѧ̀, и҆ па́дшыѧ ѻ҆каѧ́ннѡ въ сме́рть, па́ки на́съ, мт҃и бы́вши и҆зба́вителѧ, воззвала̀ є҆сѝ, пречⷭ҇таѧ: и҆ къ пе́рвомꙋ па́ки тещѝ сподо́била є҆сѝ ѻ҆ч҃ествꙋ. Тѣ́мъ тѧ̀, бг҃ома́ти, непреста́ннѡ велича́емъ.

Комментарии для сайта Cackle