Библиотеке требуются волонтёры

Мѣ́сѧца тогѡ́же въ г҃-й де́нь. Ст҃ы́хъ мꙋ́чєникъ, є҆ѵтро́пїа и҆ дрꙋжи́ны є҆гѡ̀, клеоні́ка и҆ васїлі́ска.

На Гдⷭ҇и, воззва́хъ, стїхи̑ры, гла́съ а҃. Поⷣ: Всехва́льнїи мꙋ́чєницы:

Тричи́сленнїи мꙋ́чєницы, ꙳ крѣ́пкѡ противоподви́гшесѧ ꙳ сꙋ́ровѡ сꙋдѧ́щымъ, ꙳ и҆ всѧ́къ ви́дъ жесточа́йшихъ болѣ́зней ꙳ вѣ́рою претерпѣ́вше, ꙳ вы́шнее црⷭ҇тво полꙋчи́сте. ꙳ тѣ́мже моли́тесѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.

Є҆ѵтро́пїа, ꙳ клеоні́ка тве́рдаго, ꙳ васїлі́ска пѣ́сньми дꙋхо́вными восхва́лимъ: ꙳ ѻ҆гне́мъ бо попали́ша безбо́жїѧ ве́щь, ꙳ благоче́стїѧ благода́тїю. ꙳ и҆ ны́нѣ просвѣща́ютъ концы̀ ꙳ бжⷭ҇твенными ѻ҆гнѧ̀ свѣтлостьмѝ, ꙳ ꙗ҆́кѡ свѣти̑льницы пресвѣ́тлїи, ꙳ ꙗ҆́кѡ пре́лесть всю̀ ѡ҆мрачи́вше.

Главы̑ ѿсѣка́еми, ꙳ врагꙋ̀ главꙋ̀ сокрꙋши́сте ꙳ кра́сными нога́ми ва́шими, ꙳ до́блїи страда́льцы, ꙳ нелє́стныѧ ѕвѣ́зды, ꙳ жє́ртвы ѡ҆дꙋшевлє́нныѧ, ꙳ хра́ма нбⷭ҇нагѡ сокрѡ́вища, ꙳ є҆ѵтро́пїе сла́вне, ꙳ васїлі́ске, и҆ клеоні́че, ꙳ ми́ръ всѣ̑мъ и҆спроси́те.

Сла́ва, и҆ ны́нѣ, бг҃оро́диченъ:

Ра́дꙋйсѧ, стра́нное слы́шанїе, чⷭ҇таѧ: ꙳ ра́дꙋйсѧ, дре́во ст҃о́е раѧ̀ бг҃осажде́нное: ꙳ ра́дꙋйсѧ, потребле́нїе лꙋка́выхъ де́мѡнѡвъ: ꙳ ра́дꙋйсѧ, ѻ҆рꙋ́жїе ѻ҆бою́дꙋѻстрое, ꙳ врага̀ главꙋ̀ ѿсѣ́кши, ꙳ стра́ннымъ ржⷭ҇тво́мъ твои́мъ, ꙳ всест҃а́ѧ всенепоро́чнаѧ, ꙳ ᲂу҆стра́ншыѧсѧ ны̀ воззовѝ.

Крⷭ҇тобг҃оро́диченъ:

Своего̀ а҆́гнца, ꙳ а҆́гница и҆ непоро́чнаѧ влⷣчца, ꙳ на крⷭ҇тѣ̀ ꙗ҆́кѡ ви́дѣвши ꙳ зра́ка не и҆мꙋ́ща нижѐ добро́ты, ꙳ ᲂу҆вы̀ мнѣ̀, рыда́ющи глаго́лаше: ꙳ гдѣ̀ добро́та твоѧ̀ за́йде, сладча́йшїй; ꙳ гдѣ̀ благолѣ́пїе, ꙳ гдѣ̀ благода́ть блиста́ющаѧ ѻ҆́браза твоегѡ̀, ꙳ сн҃е мо́й любе́знѣйшїй.

Канѡ́нъ, є҆гѡ́же краегране́сїе:

Трїе́хъ велича́йшихъ страда̑нїѧ чествꙋ́ю мꙋ́ченикѡвъ. Кѵ́ръ і҆ѡ́сифа.

Гла́съ а҃. Пѣ́снь а҃. І҆рмо́съ:

Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ: та́ бо, безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.

Премі́рными блиста́ньми трисо́лнечныѧ зарѝ ѡ҆зарѧ́еми, мꙋ́чєницы всехва́льнїи, благоче́стнѡ ва́съ ны́нѣ блажа́щыѧ, во свѣтоно́снѣмъ ва́шемъ страда́нїи просвѣти́те.

Глаго́лы ꙗ҆́кѡ стрѣла́ми, премꙋ́дрїи, пребеззако́нныхъ сердца̀ ᲂу҆ѧзви́сте: тѣ́мже претерпѣ́сте пожда́ннѡ ꙗ҆́звы и҆ ра̑ны, и҆сповѣ́дающе бж҃їе ст҃о́е и҆́мѧ.

Свѧщеннослѡ́вїи свѧще́нными, предъ мꙋчи́тельскими сꙋди́щи проповѣ́давше, мꙋ́чєницы приснопа́мѧтнїи, на́съ ра́ди пострада́ти и҆зво́лившагѡ, наноси̑мыѧ тве́рдѡ мꙋ̑ки претерпѣ́сте.

Бг҃оро́диченъ:

Ꙗ҆ви́ласѧ є҆сѝ ши́рши нб҃съ, нигдѣ́же вмѣсти́маго вопло́щши: того̀ ᲂу҆́бѡ молѝ, всѧ́кїѧ на́съ тѣсноты̀ и҆зба́вити, и҆ вѣ́чнагѡ, дв҃омт҃и, мꙋче́нїѧ.

Пѣ́снь г҃. І҆рмо́съ:

Є҆ди́не вѣ́дый человѣ́ческагѡ сꙋщества̀ не́мощь, и҆ ми́лостивнѡ въ нѐ воѡбра́жсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀, ст҃ы́й, ѡ҆дꙋшевле́нный хра́ме, неизрече́нныѧ сла́вы твоеѧ̀, чл҃вѣколю́бче.

Оу҆ма̀ чи́стыми прило́ги бжⷭ҇твєннаѧ зрѧ́ще, мꙋ́жескимъ нра́вомъ, блаже́ннїи, къ мꙋ́камъ ᲂу҆стреми́стесѧ, вражде́бнаго безпло́тнаго, страда́льцы, побѣжда́юще съ тѣ́ломъ: тѣ́мже прославлѧ́етесѧ.

Оу҆де́съ ѿсѣчє́нїѧ за хрⷭ҇та̀, мꙋ́дрїи, претерпѣ́вше, крове́й бжⷭ҇твенными проли̑тїи зе́млю преподо́бнѡ ѡ҆свѧти́сте: и҆ на трє́бищныѧ де́мѡнѡмъ приноси̑мыѧ ᲂу҆ста́висте, мꙋ́чєницы, крѡ́ви.

Положе́ни бы́сте ꙗ҆́коже свѣтоза́рнїи на высотѣ̀ страда́нїѧ, ꙗ҆́кѡ вои́стиннꙋ ѕвѣ́зды ѡ҆зарѧ́юще вселе́ннꙋю незаходи́мыми сїѧ́ньми, и҆ тмꙋ̀ рѣша́ще ле́сти, ст҃і́и: сегѡ̀ ра́ди вѣ́рнѡ ᲂу҆блажа́етесѧ.

Бг҃оро́диченъ:

Во чре́вѣ прїѧ́ла є҆сѝ хрⷭ҇та̀, чре́во и҆стощи́вшаго а҆́дово, вседѣ́йственнымъ совѣ́томъ: того̀ молѝ, бг҃ора́дованнаѧ, ѿ рабо́ты и҆зба́вити грѣхо́вныѧ всѧ̑ вѣ́рнѡ при́снѡ блажа́щыѧ тѧ̀.

Сѣда́ленъ, гла́съ а҃. Подо́бенъ: Гро́бъ тво́й, сп҃се:

Трⷪ҇цꙋ честнꙋ́ю тро́ица мꙋ́ченикѡвъ предъ мно́гими и҆сповѣ́да нарѡ́ды, и҆ ликѡ́мъ причто́шасѧ безпло́тныхъ, страда́вше. си́хъ дне́сь восхва́лимъ вѣ́рою, пра́зднꙋюще свѧще́ннꙋю и҆́хъ па́мѧть и҆ мїроспаси́тельнꙋю.

Сла́ва, и҆ ны́нѣ, бг҃оро́диченъ:

Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма́ же и҆ сло́ва, непреста́ннѡ молѝ съ вы́шними си́лами, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀, вѣ́рою и҆ любо́вїю при́снѡ тѧ̀ сла́вѧщымъ.

Крⷭ҇тобг҃оро́диченъ:

Нескве́рнаѧ а҆́гница, а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи вѣща́ше, мт҃ерски восклица́ющи: ка́кѡ претерплю̀ твоѐ, є҆́же па́че сло́ва, сн҃е мо́й, сни́тїе, и҆ вѡ́льныѧ стра̑сти, бж҃е преблагі́й;

Пѣ́снь д҃. І҆рмо́съ:

Го́рꙋ тѧ̀, бл҃года́тїю бж҃їею приѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆зъ тебє̀ и҆зы́ти і҆и҃левꙋ провозглаша́ше ст҃о́мꙋ, во спасе́нїе на́ше и҆ ѡ҆бновле́нїе.

Стоѧ́хꙋ трїѐ на три́знищи, проповѣ́дающе є҆ди́наго трисо́лнечна бг҃а, и҆ ра́нъ разжже́нїе крѣ́пкѡ терпѧ́ще, столпы̀ ѻ҆́гнєнны цр҃кве ꙗ҆ви́шасѧ, благочести́выхъ ѡ҆ хрⷭ҇тѣ̀ предводѧ́щїи.

Поста́вльше но́зѣ на ка́мени вѣ́ры, не поколеба́стесѧ мно́гихъ и҆скꙋше́нїй кова̑рствїи: по ꙗ҆ви́стесѧ непоколеби́ми, ѕлочєсти́выѧ запина́юще, мꙋ́чєницы, и҆ всѧ́чески ѡ҆хꙋжда́юще благода́тїю.

Ꙗ҆́кѡ честно́е ка́менїе на землѝ валѧ́ющесѧ, зда́нїе лꙋка́вное многобо́жїѧ вои́стиннꙋ, премꙋ́дрїи, разори́сте: и҆ себѐ са̑мыѧ бж҃їѧ хра́мы созда́сте, и҆ ко хра́мꙋ небе́сномꙋ взѧ́стесѧ.

Бг҃оро́диченъ:

Ꙗ҆ви́сѧ твоѧ̀ ᲂу҆тро́ба бг҃оно́снаѧ пала́та, въ не́йже всѣ́хъ цр҃ь почѝ хрⷭ҇то́съ, хра́мы содѣва́ѧ, мт҃и чⷭ҇таѧ, и҆ свѣтоза̑рнаѧ жили̑ща благочести̑выѧ непрестꙋ́пнагѡ бжⷭ҇тва̀.

Пѣ́снь є҃. І҆рмо́съ:

Просвѣти́вый сїѧ́нїемъ прише́ствїѧ твоегѡ̀, хрⷭ҇тѐ, и҆ ѡ҆свѣти́вый крⷭ҇то́мъ твои́мъ мі́ра концы̀, сердца̀ просвѣтѝ, свѣ́томъ твоегѡ̀ бг҃оразꙋ́мїѧ, правосла́внѡ пою́щихъ тѧ̀.

Зако́нъ бжⷭ҇твенный соблюда́юще, добропобѣ́днїи мꙋ́чєницы, беззакѡ́ннымъ мꙋ́жескимъ пра́вомъ противоста́сте: и҆ ᲂу҆ѧзвлѧ́еми и҆ растерза́еми тѣлесы̀, побѣ́дꙋ вѣ́чнꙋю взѧ́сте.

Восхва́лимъ васїлі́ска, и҆ вѣ́рою почти́мъ клеоні́ка и҆ є҆ѵтро́пїа, велемꙋ̑дрыѧ вѣ́рою пострада́вшыѧ, за трⷪ҇цꙋ всест҃ꙋ́ю, и҆ па́че со́лнца просїѧ́вшыѧ.

Чꙋдеса̀ соверша́юще въ сла́вꙋ бг҃а на́шегѡ, привлеко́сте зрѧ́щыѧ къ вѣ́рѣ сп҃совѣ, мꙋ́чєницы многострада́льнїи, цвѣ́ти кра́снїи ра́йстїи, церкѡ́внаѧ ᲂу҆тверждє́нїѧ.

Бг҃оро́диченъ:

Сїѧ́нїемъ ѿ тебє̀ па́че ᲂу҆ма̀ возсїѧ́вшагѡ ѡ҆зарѝ на́шѧ мы̑сли, всенепоро́чнаѧ, и҆ тмꙋ̀ ᲂу҆ма́ли помыслѡ́въ дꙋшетлѣ́нныхъ, ꙗ҆́кѡ да пое́мъ тѧ̀, влⷣчце.

Пѣ́снь ѕ҃. І҆рмо́съ:

Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ, ꙗ҆́кѡ ѻ҆́вцы заколе́нїѧ, спасѝ лю́ди твоѧ̑, бж҃е на́шъ: ты́ бо крѣ́пость немощствꙋ́ющихъ и҆ и҆справле́нїе.

Ра́дꙋетсѧ землѧ̀ и҆ нбⷭ҇наѧ, ликꙋ́ютъ человѣ́цы, лѣ́тнїй соверша́юще пра́здникъ, є҆́же за хрⷭ҇та̀ страда̑нїѧ блажє́ннаѧ до́блественнѡ претерпѣ́вшихъ, ᲂу҆ма̀ тве́рдостїю.

Почти́лъ є҆сѝ до́брыми твои́ми нра́вы, є҆ѵтро́пїе, бг҃а пребл҃га́го, побѣди́лъ є҆сѝ хи́трѡсти вра̑жїѧ. Тѣ́мже тѧ̀ почита́ютъ всѝ человѣ́цы, тобо́ю прегрѣше́нїй разрѣше́нїе прїѧ́ти надѣ́ющїисѧ.

И҆сцѣле́нїй и҆сто́чники и҆злива́юще, зно́й ѿгна́сте недꙋ́гѡвъ и҆ скорбе́й, мꙋ́дрїи, всѣ̑мъ благоздра́вїе посыла́юще, благоче́стнѡ ва́шемꙋ покро́вꙋ при́снѡ притека́ющымъ.

Бг҃оро́диченъ:

Оу҆вѧди́вшаѧ твои́мъ прозѧбе́нїемъ, всенепоро́чнаѧ, дре́вле прозѧ́бшꙋю престꙋпле́нїемъ ѕло́бꙋ вра́жїю, въ дꙋшѝ мое́й прозѧба́ющыѧ дꙋшетлѣ̑нныѧ и҆ тернѡ́вныѧ по́мыслы и҆сто́ргни.

Пѣ́снь з҃. І҆рмо́съ:

Тебѐ ᲂу҆́мнꙋю, бцⷣе, пе́щь разсмотрѧ́емъ вѣ́рнїи: ꙗ҆́коже бо ѻ҆́троки спасѐ трѝ превозноси́мый, мі́ръ ѡ҆бновѝ, во чре́вѣ твое́мъ всецѣ́лъ, хва́льный ѻ҆тцє́въ бг҃ъ и҆ препросла́вленъ.

Ꙗ҆́коже наслажде́нїе бжⷭ҇твенное вмѣнѧ́юще ᲂу҆дѡ́въ ѿсѣче́нїе, заꙋшє́нїѧ, строга̑нїѧ, и҆ сме́рть нꙋ́жднꙋю, мꙋ́чєницы веселѧ́щесѧ, и҆ бг҃ꙋ ᲂу҆се́рднѡ пою́ще: хва́льный ѻ҆тцє́въ бг҃ъ и҆ препросла́вленъ.

По мно́гихъ томле́нїихъ тѣлесѐ, кре́стъ претерпѣ́сте крѣ́пкѡ въ подо́бїи и҆зба́вителѧ, сла́вне є҆ѵтро́пїе, вели́кїй клеоні́че, и҆ блаже́ннꙋю кончи́нꙋ полꙋчи́сте, хва́льнаго воспѣва́юще бг҃а, и҆ препросла́вленнаго.

Взира́ти ва́мъ предповелѣва́ѧ къ безсмє́ртнымъ воздаѧ́нїємъ, въ темни́цѣ ꙗ҆ви́сѧ хрⷭ҇то́съ: є҆го́же ви́дѣвше дерзнове́нїѧ и҆спо́лнистесѧ взыва́юще, мꙋ́чєницы сла́внїи: хва́льный ѻ҆тцє́въ бг҃ъ и҆ препросла́вленъ.

Бг҃оро́диченъ:

И҆зба́ви ны̀, прест҃а́ѧ влⷣчце, ѿ ꙗ҆зы́ческагѡ наше́ствїѧ, срѣ́тенїѧ лꙋка́вагѡ, всѧ́кагѡ ѡ҆бстоѧ́нїѧ и҆ ѡ҆сꙋжде́нїѧ вѣ́чнагѡ, вѣ́рою зовꙋ́щыѧ: хва́льный ѻ҆тцє́въ бг҃ъ и҆ препросла́вленъ.

Пѣ́снь и҃. І҆рмо́съ:

Въ пещѝ ѻ҆́троцы і҆и҃лєвы, ꙗ҆́коже въ горни́лѣ, добро́тою бл҃гоче́стїѧ чистѣ́е зла́та блеща́хꙋсѧ, глаго́люще: бл҃гослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.

Просте́ртъ и҆мꙋ́ще ᲂу҆́мъ, ко є҆ди́номꙋ влⷣцѣ простро́стесѧ ᲂу҆ѧзвлѧ́еми, всехва́льнїи, ѕѣ́льнѣ, и҆ мꙋ́чими вопїю́ще: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.

Возвы́сившесѧ на крестѣ̀, ꙗ҆́коже дре́вле влⷣка, вели́кагѡ сподо́бистесѧ благосла́вїѧ, страда́льцы, вопїю́ще и҆ глаго́люще: благослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.

Си́лою бжⷭ҇твенною, всеблагосла́внїи, ᲂу҆крѣ́пльшесѧ, страстоте́рпцы, беззако́нныхъ ѡ҆полчє́нїѧ побѣди́ша крѣ́пкѡ, пою́ще и҆ глаго́люще: благослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.

Трⷪ҇ченъ:

Ꙗ҆́кѡ є҆ди́ницꙋ є҆стество́мъ, тѧ̀ пою̀ бжⷭ҇тво̀ всест҃о́е, треми́ же ѵ҆поста́сьми несѣ́чнѡ раздѣлѧ́ѧ, зовꙋ̀ ра́дꙋѧсѧ: благослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.

Бг҃оро́диченъ:

Хра́мъ ꙗ҆ви́ласѧ є҆сѝ є҆мманꙋ́ила и҆ две́рь, є҆́юже є҆ди́нъ вни́де и҆ и҆зы́де, ꙗ҆́коже са́мъ вѣ́сть, чⷭ҇таѧ, спаса́ѧ зовꙋ́щыѧ: благослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.

Пѣ́снь ѳ҃. І҆рмо́съ:

Ѻ҆́бразъ чи́стагѡ рождества̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь, да тѧ̀, бцⷣе, непреста́ннѡ велича́емъ.

Да і҆и҃са приѡбрѧ́щете, насꙋ́щагѡ житїѧ̀ всѧ̑ вмѣни́сте ᲂу҆ме́ты, ꙗ҆́коже па́ѵелъ бжⷭ҇твенный наꙋчѝ: сегѡ̀ ра́ди до́брѣ пострада́вше, на нб҃сѣ́хъ ѡ҆бита́ете, вѣнцено́сцы великоимени́тїи.

Ꙗ҆ви́сѧ ꙗ҆́коже сто́лпъ треꙋго́льный свѧще́нныхъ мꙋ́чєникъ бжⷭ҇твенное собра́нїе, стѣ́ны лꙋка́вагѡ безбо́жїѧ низложи́ша благода́тїю: и҆ ны́нѣ живꙋ́тъ во гра́дѣ бг҃а жива́гѡ, перворо́дныхъ въ ски́нїихъ.

Вѣне́цъ нетлѣ́нїѧ, ст҃і́и, ѿ хрⷭ҇та̀ прїе́мше, багрѧни́цꙋ же ѡ҆мочи́вше ѿ мꙋ́ченическихъ ва́шихъ крове́й, предстоитѐ цр҃ю̀ вѣкѡ́въ, ѡ҆сїѧ́еми свѣ́тлыми свѣтоли̑тїи, и҆ всебога́тными раздаѧ̑нїи.

Оу҆жѐ бг҃ꙋ прибли́жившесѧ, и҆ со безпло́тными собѡ́ры пра́зднꙋюще, на землѝ ва́съ при́снѡ блажа́щыѧ, и҆ па́мѧть ва́шꙋ пра́зднꙋющыѧ, мꙋ́чєницы, нбⷭ҇нꙋю полꙋчи́ти свѣ́тлость, и҆спроси́те.

Бг҃оро́диченъ:

Оу҆жаса́ютсѧ а҆́гг҃льстїи чи́ни, ѿ твои́хъ ложе́снъ возсїѧ́вшагѡ: є҆го́же ѡ҆ на́съ, дв҃ома́ти, молѝ, ꙗ҆́кѡ да стра́шныѧ всѧ̑ и҆зба́витъ мꙋ́ки и҆ тмы̀ кромѣ́шнїѧ, пою́щыѧ тѧ̀.

Комментарии для сайта Cackle