Библиотеке требуются волонтёры

Мѣ́сѧца тогѡ́же въ д҃-й де́нь. Преподо́бнагѡ и҆ бл҃говѣ́рнагѡ вели́кагѡ кнѧ́зѧ данїи́ла а҆леѯа́ндровича моско́вскагѡ.

На ма́лѣй вече́рни, на Гдⷭ҇и воззва́хъ, стїхи̑ры на д҃, гла́съ д҃.

Подо́бенъ: Зва́нный свы́ше:

Зва́нный свы́ше ѿ го́рнѧгѡ жили́ща, свѣ́тлымъ ᲂу҆ма̀ ѻ҆́комъ воззрѣ́лъ є҆сѝ, и҆ врє́меннаѧ сегѡ̀ мі́ра кра̑снаѧ ѿве́ргъ, предпоче́тъ же вѣ́чнѡ бꙋ̑дꙋщаѧ, и҆ ѻ҆́гнь бж҃е́ственныѧ любвѝ въ се́рдце прїе́мъ, ᲂу҆гото́вилсѧ є҆сѝ къ житїю̀ а҆́гг҃льскомꙋ, ᲂу҆́мъ тво́й чи́стый ко хрⷭ҇тꙋ̀ впери́въ: є҆мꙋ́же дне́сь предстоѧ̀, бл҃же́нне кн҃же данїи́ле, молѝ спасти́сѧ дꙋша́мъ на́шымъ.

Два́жды.

Црⷭ҇тва, сла́вы, и҆ са́мъ себѐ ѿре́кшись, съ ра́достїю хрⷭ҇тꙋ̀ послѣ́довалъ є҆сѝ, и҆ крⷭ҇тъ взѧ́лъ є҆сѝ на ра́мена своѧ̑, и҆ по не́мъ возше́лъ є҆сѝ въ вѣчнонетлѣ́ннꙋю сла́вꙋ црⷭ҇тва є҆гѡ̀: є҆мꙋ́же дне́сь предстоѧ̀, ᲂу҆го́дниче хрⷭ҇то́въ данїи́ле, молѝ спасти́сѧ дꙋша́мъ на́шымъ.

Твоѐ се́рдце разжжѐ жела́нїе тезоиме́нное твоемꙋ̀ и҆́мени, къ пꙋтѝ ведꙋ́щемꙋ во гра́дъ нбⷭ҇ный, и҆́мже ше́ствꙋѧ, ведꙋ́щей тѧ̀ кро́тости и҆ смире́нїю, дости́глъ є҆сѝ по жела́нїю своемꙋ̀ нбⷭ҇ныхъ ѻ҆би́телей: и҆дѣ́же дне́сь со а҆́гг҃лы ликꙋ́ѧ, преблаже́нне кн҃же данїи́ле, мо́ли спасти́сѧ дꙋша́мъ на́шымъ.

Сла́ва, гла́съ ѕ҃:

Ѿрасль благопло́днѣйшаѧ а҆леѯа́ндрова ко́рене бы́лъ є҆сѝ, пло́дъ приносѧ̀ добродѣ́телей: въ преподо́бїи бо и҆ пра́вдѣ и҆ смире́нїи, млⷭ҇тынѧхъ же и҆ чистотѣ̀ ре́вности подража́тель бы́лъ є҆сѝ твоемꙋ̀ роди́телю: и҆ тѣ́ми свѣ́тлѡ ᲂу҆кра́шенъ, простра́нное селе́нїе ст҃ы́ѧ трⷪ҇цы бы́лъ є҆сѝ: є҆́йже кꙋ́пнѡ ны́нѣ съ роди́телемъ твои́мъ предстоѧ̀, молѝ ми́рнꙋ бы́ти гра́дꙋ и҆ ѻ҆би́тели твое́й, и҆ всѣ̑мъ рѡссі̑йскимъ сн҃овѡ́мъ спасти́сѧ.

И҆ ны́нѣ, бг҃оро́диченъ:

Никто́же притека́ѧй къ тебѣ̀, посра́мленъ ѿ тебѐ и҆схо́дитъ, пречⷭ҇таѧ бцⷣе дв҃о: но про́ситъ блгⷣти, и҆ прїе́млетъ дарова́нїе къ поле́зномꙋ проше́нїю.

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

До́мъ ст҃ы́ѧ трⷪ҇цы ꙗ҆ви́лсѧ є҆сѝ, данїи́ле блаже́нне, тѣ́мже воспѣва́ѧ тѧ̀, ра́дꙋйсѧ, всѝ тебѣ̀ зове́мъ.

Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.

Цр҃їе и҆ кнѧ́зи, и҆ сщ҃е́нныхъ собо́ри, старѣ́йшины и҆ велмѡ́жи, свѣ́тлѡ дне́сь взыгра́йте, и҆ па́мѧть бл҃же́ннагѡ въ пѣ́снехъ возвели́чимъ.

Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Восхва́лимъ дне́сь всѝ кнѧзе́й рѡссі́йскихъ похвалꙋ̀, бл҃же́ннаго кнѧ́зѧ данїи́ла, хранѧ́ща ѻ҆те́чество своѐ ненавѣ́тнѡ мл҃твами свои́ми.

Сла́ва, гла́съ и҃:

Дне́сь весе́лїѧ и҆сполнѧ́етсѧ хра́мъ бг҃а на́шегѡ, въ не́мже бл҃говѣ́рный кнѧ́зь данїи́лъ, вели́кїй на́шъ застꙋ́пникъ, мощмѝ ст҃ѡ почива́етъ, и҆ всѣ́хъ вѣ́рнѡ притека́ющихъ къ честнѣ́й є҆гѡ̀ ра́цѣ ѡ҆сщ҃а́етъ, и҆ и҆сцѣле́нїе да́рꙋѧ, мо́литсѧ ѡ҆ дꙋша́хъ на́шихъ.

И҆ ны́нѣ, бг҃оро́диченъ:

Влⷣчце прїимѝ моли̑твы рабѡ́въ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.

Тропа́рь, гла́съ д҃:

Кн҃же́нїѧ твоегѡ̀ сла́вꙋ ѿложи́въ, ѡ҆зарѧ́емый бж҃е́ственною бл҃года́тїю, бг҃омꙋ́дре кнѧ́же данїи́ле, ве́сь ра́зꙋмъ въ срⷣце ѿ сꙋ́етнагѡ мі́ра сегѡ̀ къ зижди́телю неꙋкло́ннѡ возложи́лъ є҆сѝ, и҆ ꙗ҆́кѡ ѕвѣзда̀ на восто́цѣ рѡссі́йскагѡ госꙋда́рства просїѧ́лъ є҆сѝ: цѣломꙋ́дрїемъ же и҆ равноа́гг҃льнымъ твои́мъ житїе́мъ тече́нїе до́брѣ соверша́ѧ, вѣ́рꙋ соблю́лъ є҆сѝ непоро́чнꙋ: тѣ́мъ и҆ по сме́рти просла́ви тѧ̀ бг҃ъ въ чꙋдесѣ́хъ, ꙗ҆́кѡ и҆сточа́еши и҆сцѣлє́нїѧ вѣ́рнѡ притека́ющымъ къ чⷭ҇тнѣ́й ра́цѣ твое́й: сегѡ̀ ра́ди дне́сь пра́зднꙋемъ ᲂу҆спе́нїе твоѐ лю́дїе твоѝ. ты́ же, ꙗ҆́кѡ и҆́маши дерзнове́нїе ко хрⷭ҇тꙋ̀: молѝ спастѝ ѻ҆те́чество твоѐ, и҆ ми́рнѣй бы́ти держа́вѣ наслѣ́дїѧ твоегѡ̀. (с. 371)

Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:

На вели́цѣй вече́рни. Бл҃же́нъ мꙋ́жъ: а҃ а҆нтїфѡ́нъ.

На Гдⷭ҇и воззва́хъ, стїхи̑ры, на и҃, гла́съ ѕ҃. Подо́бенъ: Всѐ ѿло́жше:

Всю̀ ѿложи́въ вре́меннꙋю сла́вꙋ мі́ра, сїѧ́нїемъ дх҃а ст҃а́гѡ просвѣ́щсѧ, данїи́ле бг҃омꙋ́дре, стра̑стнаѧ взыгра̑нїѧ воздержа́нїемъ и҆зсꙋши́лъ є҆сѝ: и҆ ле́гкое є҆ѵⷢ҇льское бре́мѧ воспрїѧ́лъ є҆сѝ, крⷭ҇тъ тво́й, и҆ послѣ́дꙋѧ влⷣцѣ хрⷭ҇тꙋ̀, ѡ҆брѣ́лъ є҆сѝ лѣ́ствицꙋ нбⷭ҇нꙋю: по не́йже восше́дъ, дости́глъ є҆сѝ го́рнѧгѡ і҆ерⷭ҇ли́ма, и҆ хрⷭ҇то́ва ца́рствїѧ сонаслѣ́дникъ ꙗ҆ви́лсѧ є҆сѝ: и҆ со а҆́гг҃лы ра́дꙋѧсѧ бж҃е́ственнагѡ лицезрѣ́нїѧ є҆гѡ̀ наслажда́ешисѧ: є҆го́же молѝ дꙋша́мъ на́шымъ дарова́ти ми́ръ. ве́лїю ми́лость.

Всѐ ѿложи́въ нача́льство кнѧже́нїѧ держа́вы кро́тостїю нра́ва ᲂу҆твержда́ѧсѧ и҆ те́плѣйшимъ жела́нїемъ къ бг҃ꙋ горѧ̀, мона́шеское житїѐ воспрїѧ́лъ є҆сѝ, бг҃оподража́тельне кн҃же данїи́ле: всѧ̑ плотска̑ѧ ᲂу҆вѧди́лъ є҆сѝ мꙋдрова̑нїѧ, и҆ цѣломꙋ́дрїѧ сто́лпъ показа́лсѧ є҆сѝ, и҆ смиренномꙋ́дрствꙋѧ возвы́силсѧ є҆сѝ къ го́рнемꙋ жили́щꙋ: и҆дѣ́же вы́нꙋ хрⷭ҇тꙋ̀ бг҃ꙋ предстоѧ̀, молѝ дꙋша́мъ на́шымъ дарова́ти ми́ръ и҆ ве́лїю ми́лость.

Всѐ ѿложи́въ наслажде́нїе земны́хъ веще́й, вы́шнѧгѡ ра́ди наслажде́нїѧ, воздержа́нїю поревнова́лъ є҆сѝ, и҆ страсте́й пла́мень потща́лсѧ є҆сѝ ᲂу҆гаси́ти сле́зными пото́ки мл҃твъ твои́хъ: воздержа́нїемъ же и҆ поще́нїемъ, ꙗ҆́кѡ бл҃гово́нною пи́щею напита́лъ є҆сѝ дꙋ́шꙋ твою̀: тѣ́мже и҆ непоро́чное и҆ пра́ведное житїѐ проходѧ̀, дости́глъ є҆сѝ влⷣчнѧ прⷭ҇то́ла: ѿѻнꙋ́дꙋже свѣ́тлостьми ѡ҆зарѧ́ѧсѧ, молѝ цр҃ѧ̀ хрⷭ҇та̀ дꙋша́мъ на́шымъ дарова́ти ми́ръ и҆ ве́лїю ми́лость.

Всю̀ возложи́въ на подвигополо́жника наде́ждꙋ, простра́нный мі́ра пꙋ́ть ѡ҆ста́вивъ, ᲂу҆́зкїй же и҆ приско́рбный мона́шескагѡ житїѧ̀ ше́ствовалъ є҆сѝ, бг҃облаже́нне кн҃же данїи́ле: порфѵ́рꙋ, и҆ вѷссо́нъ, и҆ ца́рскꙋю багрѧни́цꙋ, сла́вꙋ же и҆ бога́тство мимотекꙋ́щее въ ничто́же вмѣни́въ, нбⷭ҇ное бога́тство и҆ сла́вꙋ вѣ́чнꙋю воспрїѧ́ти ᲂу҆досто́илсѧ є҆сѝ: и҆ ны́нѣ въ нетлѣ́нной жи́зни пребыва́ѧ, молѝ, є҆мꙋ́же предстои́ши, дарова́ти дꙋша́мъ на́шымъ ми́ръ и҆ ве́лїю ми́лость.

И҆́ны стїхи̑ры, гла́съ в҃.

Кі́ими бж҃е́ственными пѣ́сньми восхва́лимъ вели́каго кн҃зѧ данїи́ла, въ по́стницѣхъ воздержа́нїѧ рачи́телѧ: въ кн҃же́нїи млⷭ҇рда нача́лника: вдѡ́въ и҆ сирѡ́тъ предста́телѧ: ни́щихъ пита́телѧ, стра́нныхъ и҆ ско́рбныхъ ᲂу҆тѣ́шителѧ: правосла́вныхъ побо́рника: вражды̀ прогони́телѧ: ѡ҆би́димыхъ застꙋ́пника: є҆го́же ра́ди хрⷭ҇то́съ землѝ рѡссі́йстѣй да́рꙋетъ ми́ръ и҆ ве́лїю ми́лость.

Кі́ими всепра́зднственными хвала́ми, ᲂу҆блажи́мъ данїи́ла бл҃же́ннаго, трꙋдолю́бнаго хрⷭ҇то́ва са́да дѣ́лателѧ: смиренномꙋ́дрїѧ чи́стое зерца́ло: и҆́нокѡвъ ᲂу҆добре́нїе, прпⷣбныхъ ра́дованїе: а҆́гг҃лѡвъ собесѣ́дника: нбⷭ҇ныхъ жи́телей сонаслѣ́дника. сла́вꙋ рѡссі́йскїѧ землѝ: ви́димыхъ вра̑гъ побѣди́телѧ: є҆гѡ́же ра́ди хрⷭ҇то́съ рѡссі̑йскимъ лю́демъ да́рꙋетъ ми́ръ. ве́лїю ми́лость.

Кі́ими похва́льными вѣнцы̀ вѣнча́емъ данїи́ла премꙋ́драго: кн҃зе́й рѡссі́йскихъ похвалꙋ̀, и҆сто́чника бж҃е́ственныхъ и҆сцѣле́нїй неѻскꙋ́днаго: чи́стое и҆ нескве́рное ст҃ы́ѧ трⷪ҇цы жили́ще: рѣ́кꙋ чꙋде́съ неисчерпа́емꙋ: добродѣ́телей пра́вило: безпло́дныхъ житїѧ̀ подража́телѧ: нбⷭ҇наго граждани́на: є҆гѡ́же ра́ди хрⷭ҇то́съ ва̑рварскїѧ пѡ́лчища низложѝ, и҆мѣ́ѧй ве́лїю ми́лость.

Кі́ими радостотво́рными ᲂу҆ста́ми возвели́чимъ данїи́ла, свѣ́тлꙋю ѕвѣздꙋ̀, на мы́сленнѣй тве́рди рѡссі́йской просїѧ́вшꙋю, те́плаго застꙋ́пника гра́дꙋ на́шемꙋ: сꙋ́щымъ въ бѣда́хъ ско́раго поспѣ́шника: и҆ всѣ́хъ притека́ющихъ къ немꙋ̀ и҆зба́вителѧ: въ бра́нѣхъ мꙋ́жа непобѣди́ма: є҆гѡ́же ра́ди хрⷭ҇то́съ вра̑жїѧ шата̑нїѧ низложи́въ, лю́демъ свои́мъ дарова̀ ми́ръ и҆ ве́лїю ми́лость.

Сла́ва, гла́съ ѕ҃.

Прїиди́те празднолю́бныхъ собо́ри, бг҃омъ вѣнча́ннїи ца́рїе со кнѧ́зи, ст҃и́тели со і҆ерє́и, мона́хи со все́мъ хрⷭ҇толюби́вымъ мно́жествомъ свѣ́тлый ли́къ соста́влше, даві́дскꙋю воспое́мъ пѣ́снь добропло́дной ѿ́расли а҆леѯа́ндровой бг҃облаже́нномꙋ кнѧ́зю данїи́лꙋ: се́й бо насажде́нъ въ бл҃же́нномъ домꙋ̀ ѻ҆ц҃а̀ своегѡ̀, ꙗ҆́кѡ фі́нїѯъ высокове́рхїй въ добродѣ́телехъ процвѣ́лъ, и҆ да́же до преставле́нїѧ вѣ́ренъ бы́сть подража́тель всѣ́хъ дѣ́лъ роди́телѧ своегѡ̀: и҆ ны́нѣ съ ни́мъ въ нб҃сѣ́хъ кꙋ́пнѡ ликовствꙋ́ѧ, мо́литсѧ непреста́ннѡ сохрани́тисѧ ѻ҆те́чествꙋ своемꙋ̀ и҆ держа́вѣ на́шей, побѣ́дꙋ на сꙋпоста́ты да́рꙋѧй моли́твами свои́ми.

И҆ ны́нѣ, бг҃оро́диченъ:

Кто̀ тебѐ не ᲂу҆блажи́тъ прест҃а́ѧ дв҃о; кто́ ли не воспое́тъ твоегѡ̀ пречⷭ҇таго ржⷭ҇тва̀; безлѣ́тнѡ бо ѿ ѻ҆ц҃а̀ возсїѧ́вый сн҃ъ є҆диноро́дный: то́йже ѿ тебѐ чⷭ҇тыѧ про́йде, неизрече́ннѡ вопло́щсѧ, є҆стество́мъ бг҃ъ сы́й и҆ є҆стество́мъ бы́въ человѣ́къ на́съ ра́ди, не по двою̀ лицꙋ̀ раздѣлѧ́емый, но во двою̀ є҆стествꙋ̀ несли́тнѡ познава́емый. того̀ молѝ чⷭ҇таѧ, всебл҃же́ннаѧ, поми́ловатисѧ дꙋша́мъ на́шымъ.

Вхо́дъ. Прокі́менъ днѐ. Чтє́нїѧ трѝ.

При́тчей чте́нїе.

Па́мѧть пра́веднагѡ съ похвала́ми, и҆ бл҃гослове́нїе гдⷭ҇не на главѣ̀ є҆гѡ̀. Бл҃же́нъ чл҃вѣ́къ, и҆́же ѡ҆брѣ́те премꙋ́дрость: и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та, и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же чⷭ҇тно́е недосто́йно є҆ѧ̀ є҆́сть. Долгота́ бо дне́й, и҆ лѣ́та живота̀ въ десни́цѣ є҆ѧ̀: въ шꙋ́йцѣ же є҆ѧ̀ бога́тство и҆ сла́ва. ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ. Послꙋ́шайте ᲂу҆̀бо менѐ, ѽ ча̑да, честна̑ѧ бо рекꙋ̀ и҆ бл҃же́нъ человѣ́къ, и҆́же пꙋтѝ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ чл҃вѣ́чєскимъ, ꙗ҆́кѡ а҆́зъ премꙋ́дрость ᲂу҆стро́ихъ, совѣ́тъ и҆ ра́зꙋмъ и҆ смы́слъ а҆́зъ призва́хъ, мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ любѧ́щыѧ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Разꙋмѣ́йте ᲂу҆̀бо неѕло́бивїи кова́рство, ненака́заннїи же прилага́йте сердца̀. Послꙋ́шайте менѐ и҆ па́ки, честна̑ѧ бо рекꙋ̀: и҆ ѿве́рзꙋ ѿ ᲂу҆сте́нъ пра̑ваѧ, ꙗ҆́кѡ и҆́стинѣ поꙋчи́тсѧ горта́нь мо́й, ме́рзски же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋча́ю бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а.

При́тчей чте́нїе.

Оу҆ста̀ пра́веднагѡ ка́плютъ премꙋ́дрость, ѧ҆зы́къ же непра́веднагѡ поги́бнетъ. Оу҆стнѣ̀ мꙋже́й првⷣныхъ ка́плютъ блгⷣти, ᲂу҆ста́ же нечести́выхъ развраща́ютсѧ. Мѣ́рила льсти̑ваѧ ме́рзость пред̾ гдⷭ҇емъ: вѣ́съ же пра́ведный прїѧ́тенъ є҆мꙋ̀ И҆дѣ́же а҆́ще вни́детъ досажде́нїе, та́мѡ и҆ безче́стїе: ᲂу҆ста́ же смире́нныхъ поꙋча́ютсѧ премꙋ́дрости. Соверше́нїе пра́выхъ наста́витъ и҆̀хъ, и҆ поползнове́нїе ѿрица́ющихсѧ ᲂу҆пасе́тъ и҆̀хъ. Не по́льзꙋютъ и҆мѣ́нїѧ въ де́нь ꙗ҆́рости, пра́вда же (с. 375) и҆зба́витъ ѿ сме́рти. Оу҆́меръ пра́ведный, ѡ҆ста́ви раска́ѧнїе: нарꙋ́чна же быва́етъ и҆ посмѣѧ́тельна нечести́выхъ па́гꙋба. Пра́вда непоро́чнагѡ и҆справлѧ́етъ пꙋтѝ, въ нече́стїе же па́даетъ непра́вда. Пра́вда мꙋже́й пра́выхъ и҆зба́витъ и҆̀хъ: безсовѣ́тїемъ же плѣнѧ́ютсѧ беззако́ннїи. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда: похвала́ же нечести́выхъ поги́бнетъ. Пра́ведникъ ѿ ло́ва ᲂу҆бѣ́гнетъ, въ негѡ́же мѣ́сто предае́тсѧ нечести́вый. Во ᲂу҆стѣ́хъ нечести́выхъ сѣ́ть гра́жданѡмъ, чꙋ́вство же пра́ведныхъ бл҃гопоспѣ́шное. Во бл҃ги́хъ првⷣныхъ и҆спра́витсѧ гра́дъ, и҆ въ поги́бели нечести́выхъ ра́дованїе. Во бл҃гослове́нїи пра́выхъ возвы́ситсѧ гра́дъ, ᲂу҆сты́ же нечести́выхъ раскопа́етсѧ. Рꙋга́етсѧ гра́жданѡмъ лише́нный ра́зꙋма, мꙋ́жъ же мꙋ́дрый безмо́лвїе во́дитъ.

Премꙋ́дрости соломѡ́ни чте́нїе.

Првⷣныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе сокрꙋше́нїе, ѻ҆ни́ же сꙋ́ть въ ми́рѣ. И҆́бо пред̾ лице́мъ чл҃вѣ́ческимъ, а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀ и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ, и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное, прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ: и҆ ꙗ҆́кѡ и҆́скры по сте́блїю, потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀. Ꙗ҆́кѡ блгⷣть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На лїті́и стїхи̑ры, гла́съ г҃: самогла́сны.

Бг҃оизбра́ннаѧ степеннорѡссі́йскаѧ ѿрасль и҆ наслѣ́дникъ держа́внагѡ прⷭ҇то́ла бы́лъ є҆сѝ, бг҃омꙋ́дре кн҃же данїи́ле: на земли́ бо живѧ̀, ᲂу҆́мнаѧ ѻ҆чеса̀ твоѧ̑ возводи́лъ є҆сѝ къ живꙋ́щемꙋ на нб҃сѣ́хъ бг҃ꙋ, и҆ ны́нѣ все́лшисѧ съ весе́лїемъ во дво́ръ нб҃сный, бл҃же́нныѧ дꙋшѝ твоеѧ̀ ᲂу҆́мнꙋю зѣ́ницꙋ ѡ҆браща́й на странꙋ̀ рѡссі́йскꙋю, и҆ призира́й на держа́вꙋ наслѣ́дїѧ твоегѡ̀ и҆ на гра́дъ тво́й и҆ на ѻ҆би́тель твою̀ ст҃ꙋ́ю: въ не́йже многоцѣлє́бныѧ мо́щи твоѧ̑ ст҃ы̑ѧ хрⷭ҇то́вою бл҃гостїю сꙋ́ть храни́мы.

Бл҃же́нныѧ дꙋшѝ твоеѧ̀ бг҃озда́нный хра́мъ многоцѣ́нными бл҃голѣ́пныхъ добродѣ́телей би́серы ᲂу҆краси́въ, и҆ покори́въ хꙋ́ждшее тѣломꙋдрова́нїе лꙋ́чшей бг҃оѻбра́знѣй дꙋшѝ твое́й, въ го́рнїй гра́дъ і҆ерⷭ҇ли́мъ всели́лсѧ є҆сѝ: въ не́мже свѣтоза́рнагѡ вѣ́чнагѡ блаже́нства лꙋче́й ѡ҆блиста́емый, со а҆́гг҃льскими торжествꙋ́еши ли́ки: молѝ ст҃е бж҃е́ственнꙋю трⷪ҇цꙋ спастѝ всѣ́хъ правовѣ́рныхъ чтꙋ́щихъ ст҃ꙋ́ю па́мѧть твою̀, и҆ селе́нїй пра́ведныхъ сподо́бити.

Кро́ткаго и҆ смире́ннаго се́рдцемъ возлюби́въ хрⷭ҇та̀, киче́нїе возненави́дѣлъ є҆сѝ, и҆ дш҃еполе́знымъ смире́нїѧ пꙋте́мъ ше́ствовавъ, ѡ҆ста́вѧ кн҃жескꙋю вла́сть и҆ многосꙋ́етное мїрско́е житїѐ, всели́лсѧ є҆сѝ въ мнⷭ҇ты́рь бг҃оꙋго́днагѡ мона́шескагѡ по́двига, пресла́вне чꙋдотво́рче кн҃же данїи́ле, въ не́мже бл҃гі́й послꙋ́шникъ бы́въ, бг҃опоспѣ́шнѡ смиренномꙋ́дрїемъ въ нбⷭ҇ныѧ вше́лъ є҆сѝ ѡ҆би́тели: и҆́хже и҆ на́мъ сподо́битисѧ хрⷭ҇тꙋ̀ гдⷭ҇ꙋ і҆и҃сꙋ помоли́сѧ.

Сла́ва, гла́съ д҃:

Весели́сѧ и҆ ра́дꙋйсѧ црⷭ҇твꙋющїй гра́де Москво̀, и҆ да и҆гра́ютъ сы́ны твоѧ̑ въ тебѣ̀ свѣ́тлѡ торжествꙋ́юще, въ па́мѧть бл҃говѣ́рнагѡ кн҃зѧ данїи́ла, ѿ ко́рене а҆леѯа́ндрова произра́стша, вдѡ́въ, сирѡ́тъ и҆ ни́щихъ пита́телѧ, скорбѧ́щихъ ᲂу҆тѣ́шителѧ, и҆ прибѣга́ющихъ ско́ра помо́щника и҆ застꙋ́пника: є҆гѡ́же дне́сь честнѣ́й ра́цѣ предстоѧ́ще, бл҃гоговѣ́йнѡ покланѧ́ющесѧ возопїе́мъ: бг҃облаже́нне кн҃же данїи́ле, моли́твами твои́ми да́рꙋй лю́демъ твои̑мъ ми́ръ и҆ ве́лїю ми́лость.

И҆ ны́нѣ, бг҃оро́диченъ:

При́зри на молє́нїѧ твои́хъ ра̑бъ всенепоро́чнаѧ, ᲂу҆толѧ́ющи лю̑таѧ на ны̀ вѡста́нїѧ, всѧ́кїѧ ско́рби на́съ и҆змѣнѧ́ющи. тѧ́ бо є҆ди́нꙋ, тве́рдое и҆ и҆звѣ́стное ᲂу҆тверже́нїе и҆́мамы, и҆ твоѐ предста́тельство стѧжа́хомъ, да не постыди́мсѧ влⷣчце, тѧ̀ призыва́ющїи. потщи́сѧ на ᲂу҆моле́нїе, тебѣ̀ вѣ́рнѡ вопїю́щихъ: ра́дꙋйсѧ влⷣчце, всѣ́хъ по́моще, ра́досте и҆ покро́ве, и҆ спасе́нїе дꙋ́шъ на́шихъ.

На стїхо́внѣ стїхи̑ры, гла́съ д҃. Подо́бенъ: Ꙗ҆́кѡ до́блѧ:

Зва́нїю влⷣки твоегѡ̀ хрⷭ҇та̀, и҆́же речѐ: грѧдѝ въ слѣ́дъ менѐ, ᲂу҆се́рднѡ послѣ́довалъ є҆сѝ, бг҃омꙋ́дре кн҃же данїи́ле, взе́мъ бо крⷭ҇тъ непобѣди́мое ѻ҆рꙋ́жїе, на стра̑сти па̑гꙋбныѧ мꙋ́жески ᲂу҆крѣпи́всѧ, побѣди́лъ є҆сѝ ви́димыхъ и҆ неви́димыхъ врагѡ́въ пѡ́лчища, и҆ здѣ̀ пожи́въ бг҃оꙋго́днѡ, ны́нѣ на нб҃сѣ́хъ почива́еши съ ми́ромъ.

Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.

Терпѣ́нїе мно́гое стѧжа́въ ѿ зави́ствꙋющихъ на твоѐ ѻ҆те́чественное наслѣ́дїе, премо́глъ є҆сѝ всѧ̑ приключи́вшыѧсѧ напа̑сти, бл҃говѣ́рный кн҃же данїи́ле, благомо́щнымъ посто́мъ и҆ бг҃опрїѧ́тною моли́твою, нбⷭ҇наѧ дарѡва́нїѧ ѿ хрⷭ҇та̀ прїе́мъ врачева́ти всѧ̑кїѧ бѡлѣ́зни: да́рꙋй ᲂу҆́бѡ и҆ на́мъ всѧ́кихъ бѣ́дъ свобожде́нїе.

Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Бг҃омꙋ́дреннымъ смы́сломъ въ за́повѣдехъ бж҃їихъ пре́былъ є҆сѝ тве́рдъ, правосла́вною ᲂу҆крѣплѧ́емь вѣ́рою: крѣ́пцѣ ѡ҆правда̑нїѧ гдⷭ҇нѧ соверша́ѧ, бг҃облаже́нне кн҃же данїи́ле, житїѧ̀ цѣломꙋ́дрїемъ въ по́стничествѣ пожи́лъ є҆сѝ: бг҃опрїѧ́тными моли́твами ᲂу҆диви́лъ є҆сѝ лю́ди своѧ̑, и҆́мже и҆спросѝ ᲂу҆ хрⷭ҇та̀ бг҃а ве́лїю ми́лость.

Сла́ва, гла́съ ѕ҃:

Возсїѧ̀ дне́сь ра́достнаѧ па́мѧть всѣ̑мъ благочєсти́вымъ лю́демъ, па́че же гра́дꙋ москвѣ̀, въ не́мже лежа́тъ ст҃ы̑ѧ мо́щи всеблаже́ннагѡ кнѧ́зѧ данїи́ла, и҆́же къ честнѣ́й є҆гѡ̀ ра́цѣ вѣ́рнѡ приходѧ́щихъ ѿ бѣ́дъ и҆збавлѧ́етъ, и҆ вра̑жїѧ навѣ́ты разорѧ́етъ, ѻ҆те́чествꙋ ᲂу҆строѧ́етъ ми́ръ, и҆ ѡ҆ всѣ́мъ ро́дѣ рѡссі́йскомъ непреста́ннѡ мо́литъ всебл҃га́го бг҃а, да ѿ всѧ́кихъ бѣ́дъ и҆ напа́стей и҆зба́влшесѧ, полꙋ́чимъ всѝ моли́твами є҆гѡ̀ ца́рство нбⷭ҇ное.

И҆ ны́нѣ: бг҃оро́диченъ:

Творе́цъ и҆ и҆зба́витель мо́й пречⷭ҇таѧ, хрⷭ҇то́съ гдⷭ҇ь, и҆з̾ твои́хъ ложе́снъ проше́дъ, въ мѧ̀ ѡ҆болкі́йсѧ, пе́рвыѧ клѧ́твы а҆да́ма свободѝ. тѣ́мже тѝ всечⷭ҇таѧ, ꙗ҆́кѡ бж҃їи мт҃ри же и҆ дв҃ѣ, вои́стиннꙋ, вопїе́мъ немо́лчнѡ, ра́дꙋйсѧ а҆́гг҃льски, ра́дꙋйсѧ влⷣчце, предста́тельство и҆ покро́ве, и҆ спасе́нїе дꙋ́шъ на́шихъ.

На бл҃гослове́нїи хлѣ́бѡвъ, тропа́рь гла́съ д҃, два́жды: пи́санъ на ма́лѣй вече́рни: и҆ Бцⷣе дв҃о: И҆ чте́нїе. На ᲂу҆́трени на Бг҃ъ гдⷭ҇ь, тропа́рь ст҃а́гѡ, два́жды: Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́ное:

По а҃-мъ стїхосло́вїи сѣда́ленъ, гла́съ є҃,

Подо́бенъ: Собезнача́льное сло́во:

Бл҃гі́й ꙗ҆ре́мъ и҆ ле́гкое є҆ѵⷢ҇лїѧ за́повѣдей бж҃їихъ бре́мѧ, бг҃омꙋ́дренне, возжела́лъ є҆сѝ носи́ти, досточꙋ́дне кнѧ́же данїи́ле, и҆ въ таково́мъ трꙋдѣ̀ и҆ по́двизѣ велїа́рѡва ѕлокѡ́знства попра́въ, не ѡ҆бремени́лсѧ є҆сѝ грѣха́ми, добродѣ́тельми же благоꙋкра́силсѧ є҆сѝ: тѣ́мъ и҆ ле́гкѡ преше́лъ є҆сѝ въ нбⷭ҇ныѧ ѻ҆би́тєли.

Два́жды.

Сла́ва, и҆ ны́нѣ, бг҃оро́диченъ:

Тебѐ нбⷭ҇нꙋю цр҃цꙋ, дв҃ꙋ и҆ бцⷣꙋ всѝ ро́ди блажи́мъ: ты́ бо є҆ди́на крѣ́пкаѧ и҆ те́плаѧ предста́тельница ро́дꙋ человѣ́ческомꙋ: непреста́ннѡ ᲂу҆́бѡ молѝ, є҆го́же родила̀ є҆сѝ па́че є҆стества̀ бг҃а сло́ва, да грѣхо́внагѡ тѧ́жка бре́мене свободи́тъ ны̀, и҆ црⷭ҇твїѧ своегѡ̀ наслѣ́дники пока́жетъ.

По в҃-мъ стїхосло́вїи сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ:

По ѻ҆́бразꙋ бж҃їю благоро́дїе бг҃отво́рныѧ дꙋшѝ и҆мѣ́ѧ, ѻ҆́ч҃е прпⷣбне и҆ чꙋдотво́рче данїи́ле, непреста́ннѡ во все́мъ твое́мъ житїѝ, бг҃отворѧ́щей всѣ́хъ сꙋ́щихъ винѣ̀, трⷪ҇ческомꙋ въ бж҃ествѣ̀ є҆ди́нствꙋ воспере́нъ бг҃омы́сленнѣ бы́лъ є҆сѝ: тѣ́мже и҆ по подо́бїю всѧ́кимъ достодо́лжнствомъ бл҃гоче́стїѧ благоꙋкраси́лсѧ є҆сѝ соверше́нне: молѝ творца̀ на́шего гдⷭ҇а, да на́съ согрѣ́шшихъ спасе́тъ, и҆ по подо́бїю благочести́вы сотвори́тъ.

Два́жды.

Сла́ва, и҆ ны́нѣ, бг҃оро́диченъ:

Оу҆диви́шасѧ всѧ̑ нбⷭ҇наѧ чинѡнача́лїѧ, и҆ на землѝ живꙋ́щїи человѣ́цы ѡ҆ тебѣ̀, бг҃ома́ти влⷣчце, ꙗ҆́кѡ сподо́биласѧ є҆сѝ преесте́ственнѡ роди́ти пло́тїю ѵ҆поста́сное бг҃а ѻ҆ц҃а̀ сло́во, и҆ ꙗ҆́кѡ мы́сленный кївѡ́тъ, содержа́вшїй въ себѣ̀, не мѡѷсе́овы бг҃ѡпи́санныѧ скрыжа̑ли, но са́мꙋю ѵ҆поста́сь трⷪ҇чныѧ зарѝ, законода́телѧ ве́тхагѡ и҆ но́вагѡ завѣ́та і҆и҃са хрⷭ҇та̀ гдⷭ҇а на́шегѡ: и҆́мже прешла̀ є҆сѝ пло́тїю въ гѡ́рнѧѧ жили̑ща: є҆го́же, пречⷭ҇таѧ дв҃о, молѝ спастѝ дꙋ́шы на́шѧ.

Посе́мъ полѷеле́й: та́же припѣ́въ, со стїха́ми:

Оу҆блажа́емъ тѧ̀, бл҃говѣ́рный кнѧ́же данїи́ле, и҆ чте́мъ ст҃ꙋ́ю па́мѧть твою̀: ты́ бо мо́лиши ѡ҆ на́съ хрⷭ҇та̀ бг҃а на́шего.

Ѱало́мъ со стїхѝ прпⷣбническїй. По полѷеле́и, сѣда́ленъ гла́съ и҃.

Подо́бенъ: Премꙋ́дрости:

Бл҃гоче́стнѡ и҆ ст҃ѡ житїѐ твоѐ соверши́въ, бг҃оꙋго́денъ показа́лсѧ є҆сѝ власти́тель и҆мени́тагѡ гра́да москвы̀: престо́лъ и҆мѣ́ѧ, и҆ держа́вꙋ вла́сти твоеѧ̀ ᲂу҆правлѧ́ѧ бг҃озако́ннѣ, и҆ въ бг҃а и҆́стиннаго вѣ́рꙋѧ, ѿ всѣ́хъ врагѡ́въ цр҃ковь ст҃ꙋ́ю и҆ всѧ̑ лю́ди защища́ѧ, непобѣди́мь ꙗ҆ви́лсѧ є҆сѝ, данїи́ле приснопа́мѧтнѣ ѻ҆́ч҃е на́шъ: бг҃оꙋдобри́всѧ же мона́шескимъ житїе́мъ, и҆ а҆́гг҃льски во ѻ҆би́тели смиренномꙋ́дрствꙋѧ, на ве́рхъ добродѣ́телей возше́лъ є҆сѝ, прекра́снагѡ раѧ̀ наслѣ́дїе прие́мь: молѝ хрⷭ҇та̀ гдⷭ҇а прегрѣше́нїй ѡ҆ставле́нїе дарова́ти чтꙋ́щымъ ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Ра́дꙋйсѧ бцⷣе дв҃о мт҃и всечⷭ҇таѧ, непоро́чное вѣ́чныѧ жи́зни зерца́ло: бг҃а ѻ҆ц҃а̀ бл҃говоле́нїе: бг҃а сн҃а жили́ще: бг҃а дх҃а ст҃а́гѡ дѣ́йство: є҆ди́нагѡ трїѷпоста́снагѡ бж҃ества̀ бл҃гоꙋкраше́ннаѧ и҆ соверше́ннаѧ чистоты̀ ѻ҆би́тель: ра́дꙋйсѧ ключꙋ̀ црⷭ҇тва нбⷭ҇нагѡ, ѿверза́ющїй вхо́дъ всѣ̑мъ къ тебѣ̀ притека́ющымъ, и҆ зовꙋ́щымъ тебѣ̀: ра́дꙋйсѧ влⷣчце, пода́ждь всѣ̑мъ здра́вое, и҆ бл҃говре́менное пребыва́нїе, и҆ вѣ́чна раѧ̀ со ст҃ы́ми всѣ́ми наслѣ́дїе.

Степе́нна, а҃-й а҆нтїфѡ́нъ, д҃-гѡ гла́са. Прокі́менъ, гла́съ д҃: Честна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе матѳе́а, зача́ло м҃г.

По н҃-мъ ѱалмѣ̀ стїхи́ра, гла́съ ѕ҃:

Прїиди́те дне́сь держа́внагѡ гра́да москвы̀ наро́ди, во ѻ҆би́тель вели́кагѡ и҆ чꙋ́днагѡ кнѧ́зѧ данїи́ла, въ де́нь пра́здника є҆гѡ̀ веселѧ́щесѧ, и҆ въ хра́мъ бг҃а на́шегѡ вни́демъ, и҆ къ ра́цѣ моще́й ᲂу҆го́дника є҆гѡ̀ прите́кше, дх҃о́вный соста́вимъ ли́къ, пѣ́сненными похвала́ми воспое́мъ, гл҃юще: ра́дꙋйсѧ земны́й а҆́гг҃ле, и҆́же а҆́гг҃льскомꙋ житїю̀ подража́вый чи́стымъ житїе́мъ свои́мъ: ра́дꙋйсѧ граждани́не нбⷭ҇ный, и҆ вѣ́чныѧ ра́дости наслѣ́дниче, и҆́же прїе́мый бл҃гі́й ꙗ҆ре́мъ влⷣки своегѡ̀ хрⷭ҇та̀, и҆ легкѡ̀ понесы́й: и҆ ны́нѣ преблаже́нне кн҃же данїи́ле, воспрїе́мый мздꙋ̀ трꙋдѡ́въ свои́хъ, и҆ вше́дый въ ра́дость гдⷭ҇а твоегѡ̀, и҆ ꙗ҆́кѡ и҆мѣ́ѧ дерзнове́нїе къ немꙋ̀, молѝ въ ми́рѣ пребыва́ти всѣ̑мъ, правосла́внѡ чтꙋ́щымъ ст҃ꙋ́ю па́мѧть твою̀ полꙋчи́ти ѿ хрⷭ҇та̀ бг҃а ве́лїю ми́лость.

Канѡ́нъ бцⷣы со і҆рмосо́мъ на ѕ҃: и҆ ст҃а́гѡ два̀ канѡ́на на и҃.

Канѡ́нъ ст҃а́гѡ, є҆гѡ́же краегране́сїе си́це. Послѝ мнѣ̀ благода́ть твою̀ хрⷭ҇тѐ, да просла́влю твоего̀ ᲂу҆го́дника.

Пѣ́снь а҃. І҆рмо́съ: гла́съ д҃.

Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни, побѣди́лъ є҆́сть.

Просвѣти́ ми ᲂу҆́мъ, и҆ ѡ҆зарѝ моѧ̑ чꙋ̑вства, согрѣше́нїй мра́къ дꙋшѝ моеѧ̀ ѿгна́въ, хрⷭ҇тѐ бж҃е, да чи́стою со́вѣстїю возмогꙋ̀ пѣ́снь соста́вити, и҆ возвели́чити твоего̀ ᲂу҆го́дника бл҃же́ннаго кн҃зѧ данїи́ла.

Свѣтолꙋ́чными блиста́нїи дх҃а ст҃а́гѡ ѡ҆сїѧва́емый ꙗ҆ви́лсѧ є҆сѝ пресвѣ́тлый свѣти́льникъ рѡссі́йскїѧ землѝ бг҃омꙋ́дре кн҃же данїи́ле: тѣ́мъ ны́нѣ свѣтоза́рномꙋ трⷪ҇ческомꙋ свѣ́тꙋ предстоѧ̀, молѝ ѡ҆ наслѣ́дїи держа́вы твоеѧ̀.

И҆з̾ мла́да себѐ самаго̀ бг҃ꙋ ѡ҆свѧти́лъ є҆сѝ, и҆ чре́зъ всю̀ жи́знь твою̀ бы́лъ є҆сѝ и҆́стинный хрⷭ҇то́ва є҆ѵⷢ҇лїа подража́тель: тѣ́мъ и҆ наслѣ́дникъ бж҃е́ственнагѡ црⷭ҇твїѧ позна́лсѧ є҆сѝ, приснопа́мѧтне кн҃же данїи́ле.

Бг҃оро́диченъ:

Сѣдѧ́щаго на херꙋві́мѣхъ творца̀ ты̀ є҆ди́на бг҃оневѣ́сто на ѡ҆б̾ѧ́тїѧхъ носи́ти сподо́биласѧ є҆сѝ, и҆ ꙗ҆ви́ласѧ є҆сѝ ѿ всѣ́хъ родѡ́въ бг҃а сло́ва прїѧ́телище досто́йное.

Дрꙋгі́й канѡ́нъ, гла́съ и҃. Пѣ́снь а҃. І҆рмо́съ:

Пои́мъ гдⷭ҇ви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Ѡ҆ ца́рствѣ нбⷭ҇нѣмъ вы́нꙋ помышлѧ́ѧ, земнꙋ́ю ѡ҆ста́вилъ є҆сѝ вла́сть, є҆ди́наго всѣ́хъ цр҃ѧ̀ бг҃а возлюби́въ: съ ни́мже ны́нѣ водворѧ́ѧсѧ въ нбⷭ҇ныхъ ѻ҆би́телехъ, молѝ є҆го̀ ѡ҆ чтꙋ́щихъ тѧ̀, досточꙋ́дне данїи́ле.

Ѿ са́мыхъ пеле́нъ ма́тернихъ и҆збра́ тѧ влⷣка, и҆ ꙗ҆́кѡ хра́мъ чⷭ҇тый и҆ непоро́чный дꙋ́шꙋ твою̀ ѡ҆ст҃ѝ, и҆ пред̾ꙋгото́ва въ жили́ще себѣ̀, и҆ просла́ви тѧ̀ въ чꙋдесѣ́хъ бг҃облаже́нне ᲂу҆го́дниче хрⷭ҇то́въ данїи́ле.

Младе́нецъ по бж҃е́ственномъ роди́телѣ твое́мъ ѡ҆ста́влшисѧ, бг҃омъ воспи́танъ, и҆ наста́вленъ є҆сѝ, всѣ́хъ роди́тельскихъ дѣ́лъ и҆́стинное зерца́ло показа́лсѧ є҆сѝ бл҃же́нне.

Бг҃оро́диченъ:

Ꙗ҆́кѡ дв҃ꙋ є҆ди́нꙋ въ жена́хъ тѧ̀ без̾ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: и҆ наде́ждꙋ на тѧ̀ возложи́вше, спаса́емсѧ: и҆ къ тебѣ̀ прибѣга́юще, ѿ всѧ́кихъ бѣ́дъ свобожда́емсѧ.

Катава́сїа: Ѿве́рзꙋ ᲂу҆ста̀ моѧ̑:

Пѣ́снь г҃. І҆рмо́съ:

Весели́тсѧ ѡ҆ тебѣ̀ цр҃ковь твоѧ̀ хрⷭ҇тѐ, зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище и҆ ᲂу҆твержде́нїе.

Зако́нꙋ сп҃совꙋ покарѧ́ющесѧ всесла́вне данїи́ле, сладостра́стїе плотско́е ѿри́нꙋлъ є҆сѝ: добродѣ́тельною же дꙋше́ю свѣ́тлѡ просвѣща́ѧсѧ, небе́снагѡ ца́рствїѧ дости́глъ є҆сѝ.

Вели́кое цр҃кви бы́лъ є҆сѝ ᲂу҆краше́нїе, въ не́йже хрⷭ҇тꙋ̀ цр҃ю̀ сла́вы наслѣ́дникъ нбⷭ҇нагѡ хра́ма показа́лсѧ є҆сѝ бл҃же́нне: и҆дѣ́же со а҆́гг҃лы ᲂу҆жѐ пѣ́ти творцꙋ̀ ᲂу҆досто́илсѧ є҆сѝ.

Терпѧ̀ потерпѣ́лъ є҆сѝ гдⷭ҇а, и҆ ᲂу҆слы́ша тѧ̀, и҆ внѧ́тъ гла́сꙋ непреста́ннагѡ моле́нїѧ твоегѡ̀, и҆ воззва́ тѧ къ вѣ́чномꙋ весе́лїю, ра́йскаго сотвори́въ наслѣ́дника.

Бг҃оро́диченъ:

Влⷣчце блага́ѧ, всѣ́хъ творца̀ во ᲂу҆тро́бѣ твое́й заче́ншаѧ, и҆ ро́ждшаѧ мі́рꙋ сп҃са и҆ гдⷭ҇а: є҆го́же молѝ, да и҆зба́витъ на́съ ѿ всѧ́кихъ и҆скꙋше́нїй, и҆ въ чи́стомъ житїѝ соблюде́тъ на́съ.

И҆́нъ. І҆рмо́съ:

Ты̀ є҆сѝ ᲂу҆твержде́нїе притека́ющихъ къ тебѣ̀ гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дх҃ъ мо́й.

Пло́дными добродѣ́тельми ᲂу҆краша́емь, всѧ́кꙋ тлѣ́емꙋю сла́дость жите́йскꙋю ꙗ҆́вѣ ѿрази́лъ є҆сѝ, къ бж҃їей добро́тѣ непреста́ннѡ взира́ющи.

Ꙗ҆́кѡ ᲂу҆краше́нїемъ чꙋде́съ ѡ҆дѣ́ѧнъ всегда̀ чꙋдотво́рецъ ꙗ҆ви́лсѧ є҆сѝ: мїрска́гѡ ᲂу҆́бѡ вре́да и҆ на́съ и҆зба́ви бл҃же́нне, да пое́мъ вы́нꙋ бг҃а, просла́вльшаго тѧ̀.

Цѣломꙋ́дрїе соблю́дши, и҆ є҆ѵⷢ҇льскимъ ᲂу҆кра́шенъ ра́зꙋмомъ, смиренномꙋ́дрствовалъ є҆сѝ ѡ҆ хрⷭ҇тѣ̀: и҆ ны́нѣ съ ни́мъ вѣ́чнѡ ра́дꙋешисѧ.

Бг҃оро́диченъ:

Родила̀ є҆сѝ мт҃и дв҃о чи́стаѧ свѣ́тъ непристꙋ́пный, и҆́же ве́сь мі́ръ просвѣща́етъ ꙗ҆сносїѧ́тельными зарѧ́ми своегѡ̀ бж҃ества̀.

Сѣда́ленъ, гла́съ д҃:

Ѿ ко́рене блага́гѡ прекра́снаѧ вѣ́твь и҆зра́слъ є҆сѝ, а҆́ки бл҃гоꙋха́нный крі́нъ добродѣ́тельми ᲂу҆кра́шенъ бы́лъ є҆сѝ, призира́ѧ ми́лостїю на ни́ща и҆ ᲂу҆бо́га, и҆ на всѧ̑ подвла̑стныѧ тебѣ̀ лю́ди, бл҃же́нне и҆ приснопа́мѧтне кнѧ́же данїи́ле, ѕлѡвѣ́рныѧ же и҆ враждє́бныѧ въ любо́вь и҆ смире́нїе приклони́въ, въ бдѣ́нїѧхъ и҆ трꙋдѣ́хъ бг҃оꙋго́днѡ пожи́лъ є҆сѝ, и҆ досто́йнꙋю мздꙋ̀ ѿ гдⷭ҇а твоегѡ̀ прїѧ́лъ є҆сѝ: того̀ ᲂу҆̀бо молѝ, дарова́ти дꙋша́мъ на́шымъ ми́ръ и҆ ве́лїю ми́лость.

Сла́ва, и҆ ны́нѣ: бг҃оро́диченъ:

Бж҃е́ственнаѧ ски́нїа была̀ є҆сѝ є҆ди́на пречⷭ҇таѧ дв҃о мт҃и, чистото́ю а҆́гг҃лы превозше́дшаѧ, и҆ заче́ншаѧ во ᲂу҆тро́бѣ твое́й пребезнача́льнаго сло́ва, собезнача́льна же ѻ҆ц҃ꙋ̀, и҆ сего̀ всемꙋ̀ мі́рꙋ и҆зба́вителѧ ро́ждшаѧ, менѐ па́че всѣ́хъ ѡ҆скверне́на плотски́ми прегрѣше́ньми ѡ҆чи́сти моли́твъ твои́хъ бж҃е́ственными вода́ми, подаю́щи дꙋшѝ мое́й ми́ръ и҆ ве́лїю ми́лость.

Пѣ́снь д҃. І҆рмо́съ:

Вознесе́на тѧ̀ ви́дѣвши цр҃ковь на крⷭ҇тѣ̀, со́лнце првⷣное ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.

Ꙗ҆́коже зла́то ѻ҆гне́мъ, сщ҃е́ннѣйше, воздержа́нїемъ чⷭ҇тно́е тѣ́ло твоѐ ѡ҆чи́стивъ кра́сно показа́лъ є҆сѝ творцꙋ̀: сегѡ̀ ра́ди тебѣ̀ порфѵ́рꙋ нетлѣ́ннꙋ вѣ́чнагѡ бл҃же́нства дарова̀.

Ро́дъ и҆ бога́тство и҆ держа́вꙋ хрⷭ҇та̀ ра́ди ѡ҆ста́вивъ, и҆ взе́мъ крⷭ҇тъ сво́й, подвиза́лсѧ є҆сѝ бг҃олѣ́пнѡ: тѣ́мъ ны́нѣ съ прпⷣбныхъ ли́ки ра́дꙋешисѧ.

Ревнова́въ въ добродѣ́телехъ бг҃ѡмꙋ́дрымъ ѻ҆ц҃є́мъ, є҆ѵⷢ҇льское сѣ́мѧ бж҃їѧ словесѐ въ срⷣцѣ твое́мъ насади́лъ є҆сѝ, и҆ пло́дъ прине́слъ є҆сѝ влⷣцѣ: тѣ́мъ и҆ мздꙋ̀ ѿ негѡ̀ прїѧ́лъ є҆сѝ досто́йнꙋю.

Бг҃оро́диченъ:

Родила̀ є҆сѝ въ лѣ́то безлѣ́тнаго, пречⷭ҇таѧ, бы́вша бг҃очеловѣ́ка: того̀ ᲂу҆̀бо прилѣ́жнѡ молѝ, да свободи́тъ вѣ́чнагѡ мꙋче́нїѧ, и҆ спасе́тъ по ѻ҆́бразꙋ своемꙋ̀ созда́ннаго человѣ́ка.

И҆́нъ. І҆рмо́съ:

Прⷪ҇ро́къ а҆ввакꙋ́мъ ᲂу҆́мныма ѻ҆чи́ма прови́дѣ гдⷭ҇и, прише́ствїе твоѐ. тѣ́мъ и҆ вопїѧ́ше: ѿ ю҆́га прїи́детъ бг҃ъ, сла́ва си́лѣ твое́й, сла́ва снисхожде́нїю твоемꙋ̀.

Оу҆мертви́лъ є҆сѝ всѧ̑ пло́ти смертоно́сныѧ стра̑сти блгⷣтїю хрⷭ҇то́вою: тѣ́мъ животво́рными твои́хъ чꙋде́съ приложе́ньми стра́ждꙋщыѧ ѡ҆живѝ и҆ вра́тъ сме́ртныхъ и҆зба́ви.

Щито́мъ ѡ҆гради́вшись бл҃гоче́стїѧ, бы́лъ є҆сѝ, бл҃же́нне, ѻ҆́бразъ лю́демъ гдⷭ҇нимъ въ нача́лствѣ кнѧже́нїѧ, и҆ въ пребыва́нїи мона́шества: тѣ́мъ всѝ тебѐ ᲂу҆блажа́емъ.

И҆сто́чникъ чꙋде́съ ꙗ҆ви́сѧ гро́бъ тво́й, бг҃облаже́нне кнѧ́же данїи́ле: къ немꙋ́же вѣ́рою приходѧ́щїи, и҆ кла́нѧющїисѧ чⷭ҇тнѣ́й твое́й ра́цѣ, жела́ємаѧ прїе́млютъ и҆сцѣлє́нїѧ.

Бг҃оро́диченъ:

Мт҃рь тѧ̀ бж҃їю вѣ́мы всѝ, и҆ по ржⷭ҇твѣ̀ ꙗ҆́вльшꙋюсѧ нетлѣ́ннꙋ дв҃ꙋ: тѣ́мъ молѝ и҆з̾ тебѐ ро́ждшагосѧ, да и҆зба́витъ вѣ́чнагѡ тлѣ́нїѧ всѣ́хъ вѣ́рою воспѣва́ющихъ тѧ̀.

Пѣ́снь є҃. І҆рмо́съ:

Ты̀ гдⷭ҇и мо́й свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣдѣ́нїѧ, вѣ́рою воспѣва́ющыѧ тѧ̀.

Ѻ҆гне́мъ любвѐ бж҃їѧ непреста́ннѡ распалѧ́ѧсѧ, ѡ҆ста́вивъ мі́ръ, во ѻ҆би́тели мона́шествовати и҆зво́лилъ є҆сѝ, всечⷭ҇тне: тѣ́мъ дарова́ньми дх҃а ст҃а́гѡ ѡ҆богаще́нъ, чꙋдодѣ́йствомъ лю́ди спаса́еши.

Сѐ хра́мъ тво́й чꙋдесы̀, всебл҃голѣ́пнѡ, ꙗ҆́кѡ ѕвѣзда́ми свѣ́тлыми ᲂу҆краша́етсѧ, и҆ веселѧ́сѧ всегда̀ блажи́тсѧ, и҆ всечⷭ҇тнꙋ́ю твою̀ па́мѧть пра́зднꙋетъ благочⷭ҇тнѡ, вели́кїй чꙋдотво́рче данїи́ле.

Разли́чныхъ напа́стей и҆ бѣ́дъ нахожде́нїе твои́ми мл҃твами ѿразѝ, бг҃облаже́нне кн҃же данїи́ле, и҆ всѣ̑мъ ᲂу҆се́рднѡ соверша́ющымъ всепра́зднственнꙋю па́мѧть твою̀, грѣхѡ́въ ѡ҆ставле́нїе и҆спросѝ.

Бг҃оро́диченъ:

Тебѐ є҆ди́нꙋ по бз҃ѣ и҆́мамы предста́тельницꙋ ро́да на́шегѡ: тебѐ ᲂу҆́бѡ про́симъ, ꙗ҆́кѡ и҆́маши дерзнове́нїе къ сн҃ꙋ твоемꙋ̀ и҆ бг҃ꙋ на́шемꙋ, помоли́сѧ къ немꙋ̀, во є҆́же спасти́сѧ на́мъ.

И҆́нъ. І҆рмо́съ:

Оу҆́тренююще вопїе́мъ тѝ, гдⷭ҇и спаси́ ны: ты́ бо є҆сѝ бг҃ъ на́шъ, ра́звѣ тебѐ и҆но́гѡ не вѣ́мы.

Тѣкꙋ̑щаѧ и҆ тлѣ̑ннаѧ презрѣ́въ, нетлѣ̑ннаѧ сподо́билсѧ є҆сѝ зрѣ́ти: и҆дѣ́же вы́нꙋ хрⷭ҇та̀ прославлѧ́ѧ, молѝ є҆го̀, да на́съ вѣ́чныѧ своеѧ̀ сла́вы наслѣ́дникѡвъ пока́жетъ.

Бл҃гонра́внѡ и҆ добродѣ́тельнѡ въ кнѧ́жестве пожи́лъ є҆сѝ, и҆ а҆́гг҃льскомꙋ подража́въ житїю̀, во ѻ҆би́тель всели́лсѧ є҆сѝ, ю҆́же са́мъ є҆сѝ созда́лъ, и҆ въ не́й чи́стымъ пожи́въ житїе́мъ, ны́нѣ въ нбⷭ҇ныхъ водворѧ́ешисѧ ѻ҆би́телѣхъ.

Ꙗ҆́кѡ предста́телѧ тѧ̀ и҆ застꙋ́пника гра́дꙋ твоемꙋ̀, и҆ ѻ҆би́тели твое́й, и҆ всѣ̑мъ лю́демъ рѡссі̑йскимъ показа̀ бг҃ъ: защища́й ᲂу҆̀бо гра́дъ тво́й: ми́рнꙋ же и҆ во все́мъ дово́льнꙋ содѣ́лай ѻ҆би́тель, и҆ лю́демъ твои́мъ спасе́нїе и҆схода́тайствꙋй.

Бг҃оро́диченъ:

Пренепоро́чнаѧ нетлѣ́ннаѧ ѻ҆трокови́це бг҃ома́ти влⷣчце, при́зри на рабы̑ твоѧ̑ вѣ́рнѡ прибѣга́ющыѧ под̾ кро́въ тво́й, и҆ молѝ сн҃а своего̀, ѿ всѧ́кихъ бѣ́дъ и҆зба́вити на́съ.

Пѣ́снь ѕ҃: І҆рмо́съ:

Пожрꙋ́ ти со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.

Предстоѧ̀ прⷭ҇нѡ прⷭ҇то́лꙋ трⷪ҇чныѧ бл҃года́ти, со всѣ́ми ра́дꙋѧсѧ а҆́гг҃лы и҆ мі́рꙋ и҆сцѣле́нїй бога́тство подава́ѧ, спасѝ всѣ́хъ на́съ моли́твами твои́ми.

Ѿверзо́шасѧ тебѣ̀ двє́ри є҆дє́мскїѧ, и҆ жи́тели нбⷭ҇ныѧ съ вели́кимъ весе́лїемъ и҆ ра́достїю тѧ̀ прїѧ́ша: и҆дѣ́же съ ни́ми ра́дꙋѧсѧ, вы́нꙋ всѣ́хъ ми́лостивнѡ посѣща́й, и҆ вѣ́рнѡ чтꙋ́щихъ тѧ̀ помина́й.

Ꙗ҆ви́лсѧ є҆сѝ лю́демъ твои̑мъ предста́тель те́плый: вдѡ́въ и҆ сирѡ́тъ застꙋ́пникъ: ни́щихъ пита́тель: скорбѧ́щихъ ᲂу҆тѣше́нїе: гра́дꙋ, и҆ ѻ҆би́тели твое́й ᲂу҆твержде́нїе.

Бг҃оро́диченъ:

Ꙗ҆ви́ласѧ є҆сѝ и҆зба́вительница ро́да чл҃вѣ́ческагѡ мт҃и бг҃а на́шегѡ: тѣ́мъ тѝ вѣ́рнѡ припа́даемъ, сн҃а твоего̀, ꙗ҆́кѡ бл҃га, молѝ всенепоро́чнаѧ ѿ всѧ́кихъ бѣ́дъ и҆ и҆скꙋше́нїй и҆зба́вити ны̀.

И҆́нъ. І҆рмо́съ:

Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многоми́лостиве хрⷭ҇тѐ бж҃е на́шъ.

Да́ръ бж҃їй жела́емый да́лсѧ є҆сѝ рѡссі́и, бога́тыми чꙋде́съ дара́ми сїѧ́ющъ: тѣ́мъ вы́нꙋ трⷪ҇чными ѡ҆зарє́нїи ѡ҆сїѧва́емь, мно́жествꙋ ст҃ы́хъ ли̑къ сликоствова́ти сподо́билсѧ є҆сѝ.

Ра́ка, и҆дѣ́же лежа́тъ чⷭ҇тны̑ѧ твоѧ̑ и҆ ст҃ы̑ѧ мо́щи, бг҃облаже́нне кн҃же данїи́ле, и҆сто́чникъ чꙋде́съ и҆злива́етъ съ вѣ́рою приходѧ́щымъ и҆ покланѧ́ющымсѧ тебѣ̀.

Бл҃же́нъ гра́дъ, бл҃же́нна и҆ ѻ҆би́тель, въ не́йже въ житїѝ твое́мъ подвиза́тисѧ и҆зво́лилъ є҆сѝ, и҆ по сме́рти твое́й, ꙗ҆́кѡ многоцѣ́нный да́ръ, мо́щи твоѝ ѡ҆ста́вивъ, призира́еши на всѣ́хъ живꙋ́щихъ въ не́й.

Бг҃оро́диченъ:

Во мнѡ́гїѧ бѣды̀ и҆ напа́сти впа́дъ, бꙋ́рею ѡ҆держи́мъ безчи́сленныхъ согрѣше́нїй: сегѡ̀ ра́ди къ тебѣ̀, ꙗ҆́кѡ къ те́пломꙋ предста́тельствꙋ прибѣга́ю дв҃о, молѝ и҆з̾ тебѐ воплоще́ннаго бг҃а, да прегрѣше́нїй ѡ҆ставле́нїе пода́стъ рабꙋ̀ твоемꙋ̀.

Конда́къ, гла́съ д҃:

И҆збра́нный бг҃омъ ѿ чре́слъ роди́тельскихъ, и҆ воспи́танный ѿ младе́нчества въ зако́нѣ гдⷭ҇ни въ мꙋ́жа соверше́нна, и҆ про́мысломъ вы́шнѧгѡ, и҆мени́тагѡ гра́да москвы̀ наслѣ́дїе кнѧ́жества прїе́мъ, вѣ́ренъ строи́тель бл҃гочєсти́вымъ лю́демъ твои̑мъ показа́лсѧ є҆сѝ, бг҃облаже́нне данїи́ле: и҆́хже ѻ҆́бразомъ свои́мъ наставлѧ́ѧ, и҆ поꙋча́ѧ за́повѣдемъ гдⷭ҇нимъ вы́нꙋ, пꙋте́мъ ведꙋ́щимъ въ живо́тъ вѣ́чный прⷭ҇нѡ ше́ствꙋѧ, нбⷭ҇нагѡ црⷭ҇тва дости́глъ є҆сѝ: и҆дѣ́же со а҆́гг҃льскими водворѧ́ѧсѧ ли́ки, пое́ши бг҃ꙋ: а҆ллилꙋ́їа.

І҆́косъ:

А҆́гг҃лъ во пло́ти на землѝ показа́лсѧ є҆сѝ, бг҃омꙋ́дре кнѧ́же данїи́ле, сла́вѧ непреста́ннѡ творца̀ нб҃а и҆ землѝ: всѧ́кимъ бо ѻ҆́бразомъ во́лю є҆гѡ̀ чре́зъ всю̀ твою̀ жи́знь и҆спо́лнити потща́лсѧ є҆сѝ, всѣ̑мъ бл҃готворѧ̀, прїѧ́лъ є҆сѝ ѿ хрⷭ҇та̀ да́ръ чꙋдотворе́нїѧ: тѣ́мже зове́мъ тѝ: ра́дꙋйсѧ, ꙗ҆́кѡ ѿ младе́нства бг҃омъ и҆збра́нный: ра́дꙋйсѧ, ꙗ҆́кѡ тѣ́мже въ гражда́нство нбⷭ҇ное зва́нный: ра́дꙋйсѧ, ꙗ҆́кѡ держа́вꙋ вла́сти твое́й бл҃гоче́стїемъ и҆ пра́вдою ᲂу҆краси́лъ є҆сѝ: ра́дꙋйсѧ, ꙗ҆́кѡ на врагѝ ѕловѣ́рцы и҆ враждотво́рцы ѿ бг҃а полꙋчи́вый побѣ́ды: ра́дꙋйсѧ, ꙗ҆́кѡ ѡ҆ста́вивъ мі́ръ преле́стный, къ ти́хомꙋ приста́нищꙋ равноа́гг҃льскагѡ житїѧ̀ прите́клъ є҆сѝ, въ не́мже показа́лъ є҆сѝ всѣ̑мъ ѻ҆́бразъ воздержа́нїѧ: ра́дꙋйсѧ, ꙗ҆́кѡ за толи́кїи по́двиги твоѧ̀ сподо́бивыйсѧ ѿ хрⷭ҇та̀ бл҃года́ти, и҆ чꙋде́съ дарова́нїѧ: ра́дꙋйсѧ, ꙗ҆́кѡ въ нб҃ѣ со всѣ́ми ст҃ы́ми бг҃онача́льнꙋю трⷪ҇цꙋ зри́ши, и҆ то́й вы́нꙋ пое́ши: а҆ллилꙋ́їа.

Пѣ́снь з҃. І҆рмо́съ:

Въ пещѝ а҆враа́мстїи ѻ҆́троцы, персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.

Оу҆́тренневавъ къ бг҃ꙋ ѿ младе́нства, всебога́те, тьмы̀ и҆збѣ́глъ є҆сѝ тѣле́сныхъ страсте́й, воздержа́нїемъ и҆ да́ромъ чꙋде́съ ѡ҆богати́лсѧ є҆сѝ, прпⷣбне: и҆ ны́нѣ съ го́рними водворѧ́ѧсѧ ли́ки, пое́ши творцꙋ̀ бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.

Во всю̀ рѡссі́ю про́йде сла́ва чꙋде́съ твои́хъ, бл҃же́нне, и҆́миже просвѣти́лъ є҆сѝ лю́ди твоѧ̑, и҆̀же твои́мъ чꙋдодѣ́йствомъ ѿ всѧ́кихъ бѣ́дъ и҆ напа́стей и҆збавлѧ́еми, пою́тъ творцꙋ̀ бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.

Пѣ́сньми и҆ пѣ́ньми дх҃о́вными хва́лимъ тѧ̀, бл҃же́нне, и҆ чⷭ҇тнꙋ́ю твою̀ и҆ многоцѣле́бнꙋю ѡ҆бстоѧ́ще ра́кꙋ, си́це вопїе́мъ просла́вльшемꙋ тѧ̀ творцꙋ̀: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.

Бг҃оро́диченъ:

Дв҃а пребыла̀ є҆сѝ по ржⷭ҇твѣ̀: ꙗ҆́коже была̀ є҆сѝ пре́жде ржⷭ҇тва̀: бг҃а бо сло́ва родила̀ є҆сѝ, и҆збавлѧ́ющаго ны̀ хода́тайствомъ свои́мъ: є҆мꙋ́же вѣ́рнїи непреста́ннѡ пое́мъ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.

И҆́нъ. І҆рмо́съ:

Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша. вопїю́ще: бл҃гослове́нъ є҆сѝ гдⷭ҇и, бж҃е во вѣ́ки.

Стопа́ми послѣ́дꙋѧ ꙗ҆́вѣ всеблаже́ннагѡ роди́телѧ твоегѡ̀ а҆леѯа́ндра, бг҃омꙋ́дре приснопа́мѧтне кн҃же данїи́ле, наслѣ́дїе кнѧ́жества моско́вскагѡ воспрїѧ́лъ є҆сѝ: послѣди́ же и҆́ноческимъ житїе́мъ преше́лъ є҆сѝ въ гѡ́рнѧѧ ѡ҆би́тели: и҆дѣ́же вы́нꙋ пое́ши ѻ҆ц҃є́въ бг҃а бл҃гослове́ннаго.

Въ по́стничествѣ и҆ бдѣ́нныхъ мл҃твахъ бг҃омꙋ́дреннѡ пожи́лъ є҆сѝ, и҆ непреста́ннѡ сла́вилъ творца̀ твоего̀, воспѣва́ѧ є҆мꙋ̀ ѻ҆ц҃є́въ бж҃е бл҃гослове́нъ є҆сѝ.

Бг҃оро́диченъ:

Ꙗ҆́кѡ кра́снаѧ кра́снаго родила̀ є҆сѝ, без̾ѻбра́зїе на́ше ѡ҆брати́вшаго въ пе́рвый ѻ҆́бразъ, ѻ҆трокови́це всенепоро́чнаѧ: є҆мꙋ́же пое́мъ: ѻ҆ц҃є́въ бж҃е блгⷭ҇ве́нъ є҆сѝ.

Пѣ́снь и҃. І҆рмо́съ:

Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы, взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.

Досто́йнѡ дне́сь въ преставле́нїи твое́мъ торжествꙋ́етъ ца́рствꙋющїй гра́дъ москва̀, досто́йнѡ и҆ ѻ҆би́тель твоѧ̀ честна́ѧ, ю҆́же созда́лъ є҆сѝ: и҆ въ не́йже ст҃ы̑ѧ твоѧ̑ почива́ютъ мо́щи, ᲂу҆блажа́ѧ тѧ̀ творцꙋ̀ взыва́етъ: бл҃гослови́те всѧ̑ дѣла̀ гдⷭ҇нѧ гдⷭ҇а.

Млⷭ҇тивными твои́ми щедро́тами ни́щихъ и҆ ᲂу҆бо́гихъ напита́лъ є҆сѝ, и҆ са́мъ ѿ хрⷭ҇та̀ вѣ́чнꙋю полꙋчи́лъ є҆сѝ ми́лость: є҆мꙋ́же вы́нꙋ предстоѧ̀, со а҆́гг҃лы пое́ши: бл҃гослови́те всѧ̑ дѣла̀ гдⷭ҇нѧ гдⷭ҇а.

Вели́кое твоѐ застꙋпле́нїе и҆ предста́тельство воспоминае́мъ, бг҃облаже́нне кн҃же данїи́ле, и҆ сегѡ̀ ра́ди собра́вшесѧ въ де́нь па́мѧти твое́й, ꙗ҆́кѡ ѻ҆́бщемꙋ всѣ́хъ на́съ застꙋ́пникꙋ хвалꙋ̀ воздае́мъ тѝ, воспѣва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.

Бг҃оро́диченъ:

Вседержи́тельною си́лою носѧ́й всѧ́чєскаѧ, въ человѣ́ческꙋю пло́ть и҆з̾ тебѐ ѡ҆дѣ́ѧсѧ, дв҃о всенепоро́чнаѧ, на бл҃годѣѧ́нїе пою́щымъ: бл҃гослови́те всѧ̑ дѣла̀ гдⷭ҇нѧ гдⷭ҇а.

И҆́нъ. І҆рмо́съ:

Бг҃оглаго́ливїи ѻ҆́троцы въ пещѝ, со ѻ҆гне́мъ пла́мень попира́юще поѧ́хꙋ: бл҃гослови́те дѣла̀ гдⷭ҇нѧ гдⷭ҇а.

Дне́сь ца́рствꙋющагѡ гра́да москвы̀ наро́ди сте́кшесѧ ѿвсю́дꙋ въ чⷭ҇тнꙋ́ю ѻ҆би́тель бл҃говѣ́рнагѡ кнѧ́зѧ данїи́ла въ де́нь пра́зднственный па́мѧть є҆гѡ̀ творцꙋ̀ воспое́мъ: бл҃гослови́те дѣла̀ гдⷭ҇нѧ гдⷭ҇а.

Прїиди́те всѝ ст҃и́тели и҆ всѝ сщ҃е́нныхъ собо́ри въ хра́мъ бг҃а на́шегѡ: и҆дѣ́же лѣжа́тъ мо́щи вели́кагѡ кнѧ́зѧ данїи́ла: и҆̀хже ѡ҆блобыза́юще, творцꙋ̀ вопїе́мъ: бл҃гослови́те дѣла̀ гдⷭ҇нѧ гдⷭ҇а.

Дне́сь цр҃ковь хрⷭ҇то́ва пра́зднꙋющи данїи́лово торжество̀ сꙋ́щее ѡ҆ бз҃ѣ, всѣ́хъ созыва́етъ вѣ́рныхъ къ похвалѣ̀ ᲂу҆го́дника хрⷭ҇то́ва, и҆́же и҆сцѣле́нїе и҆сточа́етъ вѣ́рою приходѧ́щымъ къ немꙋ̀ и҆ пою́щымъ творцꙋ̀: бл҃гослови́те дѣла̀ гдⷭ҇нѧ гдⷭ҇а.

Бг҃оро́диченъ:

Гл҃ѡмъ и҆са́їи прⷪ҇ро́ка послѣ́дꙋюще, бцⷣꙋ тѧ̀ и҆сповѣ́дꙋемъ: родила́ бо є҆сѝ ѻ҆троча̀ всѣ́хъ дре́внѣйшее, нарица́емое є҆мманꙋ́илъ, є҆мꙋ́же зове́мъ: бл҃гослови́те дѣла̀ гдⷭ҇нѧ гдⷭ҇а.

Пѣ́снь ѳ҃. І҆рмо́съ:

Ка́мень нерꙋкосѣ́чный ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ, хрⷭ҇то́съ совокꙋпи́вый разстоѧ́щаѧсѧ є҆стєства̀. тѣ́мъ веселѧ́щесѧ, тѧ̀ бцⷣе велича́емъ.

Дне́сь сте́кшесѧ во ѻ҆би́тель твою̀ и҆ въ хра́мъ бг҃а на́шегѡ, бл҃говѣ́рный кнѧ́же данїи́ле, прилѣ́жнѡ мо́лимтисѧ: пода́ждь лю́демъ ми́рное здра́вїе, и҆ въ ско́рбехъ ра́достное ᲂу҆тѣше́нїе, да тѧ̀ ско́раго защи́тника на́шего вѣ́рою ᲂу҆блажа́емъ.

Ѡ҆снова́телѧ и҆ первонача́льника кн҃зѧ гра́да москвы̀, бг҃облаже́нне кнѧ́же данїи́ле, показа́ тѧ гдⷭ҇ь: къ немꙋ́же непреста́ннѡ молѧ́сѧ, гра́дъ и҆ ѻ҆би́тель твою̀ ѿ всѧ́кихъ бѣ́дъ сп҃са́й и҆ ми́лостивнѡ посѣща́й.

Па́мѧть пра́здника твоегѡ̀ хва́лѧще, всѝ лю́дїе твоѝ со мно́жествомъ и҆́ночествꙋющихъ пѡ́стникъ покланѧ́ютсѧ тебѣ̀, и҆ ви́дѧще ѿ бг҃а да̑ннаѧ тѝ пресла̑внаѧ чꙋдеса̀, про́сѧтъ ѿ тебѐ ми́лости: и҆́хже молє́нїѧ не пре́зри.

Бг҃оро́диченъ:

Свѣ́тъ ро́ждшаѧ і҆и҃са гдⷭ҇а, просвѣща́ѧй всѧ́каго человѣ́ка, дв҃о бг҃ома́ти: тѣ́мъ тѧ̀ мо́лимъ ѿ всѧ́кихъ бѣ́дъ и҆ напа́стей лю́ди твоѧ̑ и҆зба́ви: да тѧ̀ застꙋ́пницꙋ ро́да на́шегѡ при́снѡ велича́емъ.

И҆́нъ. І҆рмо́съ:

Чⷭ҇тꙋю сла́внѡ почти́мъ лю́дїе бцⷣꙋ, ѻ҆́гнь бжⷭ҇тва̀ прїи́мшꙋю во чре́вѣ неѻпа́льнѡ, пѣ́сньми велича́емъ.

Є҆ди́но бж҃ество̀ въ трїе́хъ ѵ҆поста́сѣхъ, бг҃онача́льнꙋю и҆ всетворѧ́щꙋю винꙋ̀ въ житїѝ твое́мъ прⷭ҇нѡ велича́лъ є҆сѝ: предстоѧ̀ є҆мꙋ̀ молѝ ѡ҆ лю́дехъ твои́хъ, во є҆́же ѿ всѧ́кихъ бѣ́дъ и҆ напа́стей спасти́сѧ и҆̀мъ.

Ре́вность вели́кꙋю показа́лъ є҆сѝ къ бл҃гоче́стїю, данїи́ле бл҃же́нне, преизрѧ́денъ ѻ҆́бразъ бы́въ всѣ̑мъ лю́демъ твои̑мъ: тѣ́мъ ны́нѣ предстоѧ̀ всѣ́хъ творцꙋ̀ моли́сѧ, да ѿ всѣ́хъ бѣ́дъ и҆ и҆скꙋше́нїй и҆зба́витъ, и҆ наслѣ́дники ца́рствїѧ своегѡ̀ пока́жетъ ны̀.

Є҆ли́кѡ вели́къ въ правосла́вномъ кнѧже́нїи твое́мъ, бг҃омꙋ́дре кн҃же данїи́ле, бы́лъ є҆сѝ, толи́кѡ смири́лъ є҆сѝ себѐ: тѣ́мже всеблагі́й бг҃ъ тѧ̀ превознесѐ, и҆ дарова̀ тебѣ̀ нбⷭ҇ное наслѣ́дїе, и҆ чꙋде́съ бл҃года́ть, ю҆́же вѣ̑рнымъ лю́демъ твои́мъ ми́лостивнѡ подава́ѧ ко гдⷭ҇ꙋ ѡ҆ на́съ помоли́сѧ.

Бг҃оро́диченъ:

И҆зба́вителѧ и҆ сп҃са на́шего родила̀ є҆сѝ, всенепоро́чнаѧ дв҃о: сего̀ ᲂу҆́бѡ молѝ и҆зба́вити на́съ ѿ прегрѣше́нїй на́шихъ, и҆ наслѣ́дники ца́рствїѧ своегѡ̀ сотворѝ, да тѧ̀ предста́тельницꙋ на́шꙋ прⷭ҇нѡ велича́емъ.

Свѣти́ленъ. Подо́бенъ: Жєны̀ ᲂу҆слы́шите:

Бг҃онача́льныѧ и҆ всебж҃е́ственныѧ трⷪ҇цы свѣ́томъ ѡ҆зари́всѧ, свѣ́тъ добросїѧ́ющїй бл҃года́тїю і҆и҃съ хрⷭ҇то́вою все́й рѡссі́и ꙗ҆ви́лсѧ є҆сѝ бл҃горо́дный кнѧ́же данїи́ле: ѡ҆зари́тисѧ ᲂу҆́бѡ и҆ на́мъ пребж҃е́ственнымъ свѣ́томъ, живонача́льнꙋю трⷪ҇цꙋ молѝ, да съ тобо́ю вѣ́чныѧ ра́дости наслажда́ющесѧ, воспое́мъ бг҃а просла́вльшаго тѧ̀.

Сла́ва, и҆ ны́нѣ, бг҃оро́диченъ:

Всю̀ наде́ждꙋ спасе́нїѧ на́шегѡ на тѧ̀ возлага́емъ, бг҃ома́ти неискꙋсобра́чнаѧ, и҆ на по́мощь прⷭ҇нѡ тѧ̀ призыва́емъ, ѿ напа́сти и҆ печа́ли врага̀ спасѝ на́съ, грѣхо́внꙋю плѣни́цꙋ ѕѡ́лъ на́шихъ разрѣша́ѧ, вѣ́чнагѡ ѻ҆гнѧ̀ и҆схитѝ, да тѧ̀ предста́тельницꙋ ро́да на́шегѡ при́снѡ велича́емъ.

На хвали́техъ стїхи̑ры на д҃, гла́съ д҃. Подо́бенъ: Да́лъ є҆сѝ зна́менїе:

Да́лъ є҆сѝ, хрⷭ҇тѐ бж҃е, рѡссі́йстѣй землѝ чꙋдотво́рца пресла́вна данїи́ла бл҃же́ннаго, всѣ̑мъ въ бѣда́хъ ско́раго помо́щника: вдѡ́въ и҆ сирѡ́тъ застꙋ́пника, плѣ́нныхъ свободи́телѧ, и҆ ни́щихъ пита́телѧ: свѣти́льника всесвѣ́тлаго, всѧ̑ рѡссі̑йскїѧ страны̑ просвѣща́ющаго, и҆ лю́ди своѧ̑ ѿ всѧ́кихъ бѣ́дъ и҆збавлѧ́ющаго: є҆гѡ́же моли́твами да́рꙋй гра́дꙋ и҆ ѻ҆би́тели на́шей ᲂу҆твержде́нїе, и҆ лю́демъ твои́мъ ве́лїю ми́лость.

Да́лъ є҆сѝ, хрⷭ҇тѐ бж҃е, цр҃кве непоколеби́маго столпа̀, ᲂу҆го́дника твоего̀ данїи́ла блаже́ннаго: благоче́стїѧ ꙗ҆ви́телѧ: нече́стїѧ и҆ вражды̀ прогони́телѧ, вѣ́ры правосла́вной ᲂу҆твержде́нїе: крѣ́пкое цѣломꙋ́дрїѧ забра́ло, и҆ равноа́гг҃льнагѡ житїѧ̀ чи́стое зерца́ло: безпло́тныхъ чистоты̀ подража́телѧ: воздержа́нїѧ наста́вника: по́стникѡвъ и҆ преподо́бныхъ сожи́телѧ: є҆го́же моли́твами гра́дъ и҆ ѻ҆би́тель на́шꙋ невреди́мꙋ сохранѝ, и҆ лю́демъ твои́мъ да́рꙋй ве́лїю ми́лость.

Да́лъ є҆сѝ, хрⷭ҇тѐ бж҃е, великоимени́томꙋ твоемꙋ̀ гра́дꙋ москвѣ̀ крѣ́пкаго защи́тника, данїи́ла всебл҃же́ннаго, и҆ кнѧзє́мъ похвалꙋ̀ и҆ ᲂу҆твержде́нїе, врагѡ́въ пресла́внаго побѣди́телѧ, хрⷭ҇тїа́нѡмъ ра́тника непобѣди́маго, ѻ҆те́чество своѐ неѿстꙋ́пнѡ хранѧ́ща, ѻ҆́бщаго всѣ́хъ предста́телѧ и҆ помо́щника: є҆гѡ́же моли́твами да́рꙋй на врагѝ побѣ́дꙋ, и҆ лю́демъ твои́мъ низпослѝ ве́лїю ми́лость.

Да́лъ є҆сѝ хрⷭ҇тѐ бж҃е, всѣ̑мъ правосла̑внымъ лю́демъ твои́мъ чꙋде́съ неисчерпа́емꙋю пꙋчи́нꙋ, всехва́льнаго кнѧ́зѧ данїи́ла, и҆ всѣ̑мъ приходѧ́щымъ къ немꙋ̀ и҆сцѣле́нїй и҆сто́чника, скѡ́рбнымъ всѣ̑мъ предста́телѧ, болѧ́щымъ врача̀ преди́внаго, въ ско́рбехъ и҆ печа́лехъ сꙋ́щꙋ и҆̀мъ ᲂу҆тѣ́хꙋ, и҆ ѿча̑ѧннымъ непосты́днꙋю наде́ждꙋ: є҆гѡ́же моли́твами всѧ̑ вра́жїѧ разрꙋшѝ шата̑нїѧ, и҆ лю́демъ твои́мъ да́рꙋй ве́лїю ми́лость.

Сла́ва, гла́съ ѕ҃:

Прїиди́те дне́сь моско́встїи наро́ди, восхва́лимъ первонача́льнаго гра́дꙋ на́шемꙋ ѡ҆снова́телѧ, и҆ пе́рваго въ гра́дѣ свое́мъ нача́льника, досточꙋ́днаго кнѧ́зѧ данїи́ла: прїиди́те ѱало́мски воспле́щемъ рꙋка́ми дх҃о́вное є҆гѡ̀ торжество̀, дне́сь пра́зднꙋюще, и҆ ꙗ҆́кѡ ди́внаго застꙋ́пника на́шего сла́вѧще: прїиди́те, къ чⷭ҇тнѣ́й є҆гѡ̀ ра́цѣ припаде́мъ, многоцѣ́лєбныѧ є҆гѡ̀ мо́щи ѡ҆блобыза́юще, и҆ бл҃гоговѣ́йнѡ почита́юще, возопїе́мъ є҆мꙋ̀ глаго́люще: ра́дꙋйсѧ великоимени́тагѡ гра́да твоегѡ̀ застꙋ́пниче: ра́дꙋйсѧ всѣ́хъ люде́й твои́хъ крѣ́пкое ᲂу҆твержде́нїе, и҆ всѣ́хъ хрⷭ҇тїа́нъ побо́рниче: ѡ҆ ни́хъ хрⷭ҇тꙋ̀ непреста́ннѡ моли́сѧ, дарова́ти ми́ръ и҆ ве́лїю ми́лость.

И҆ ны́нѣ, Бг҃оро́диченъ:

Бцⷣе ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀, тебѣ̀ мо́лимсѧ, моли́сѧ влⷣчце со ст҃ы́ми а҆пⷭ҇лы, поми́ловати дꙋ́шы на́шѧ.

Славосло́вїе вели́кое: И҆ ѿпꙋ́стъ.

На лїтꙋргі́и: Блаже́нна, пе́рвагѡ канѡ́на, пѣ́снь г҃, и҆ втора́гѡ, пѣ́снь ѕ҃. Прокі́менъ, гла́съ з҃: Честна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ гала́тѡмъ, зача́ло сг҃і. А҆ллилꙋ́їа, гла́съ ѕ҃: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀. Си́льно на землѣ̀ бꙋ́детъ сѣ́мѧ є҆гѡ̀. Є҆ѵⷢ҇лїе матѳе́а, зача́ло м҃з. Прича́стенъ: Въ па́мѧть вѣ́чнꙋю бꙋ́детъ пра́ведникъ:

Комментарии для сайта Cackle