Мѣ́сѧца тогѡ́же въ к҃ѕ-й де́нь. Прпⷣбнагѡ ѻ҆тца̀ на́шегѡ а҆лѵ́пїа сто́лпника:

И҆ ѡ҆свѧще́нїе хра́ма свѧта́гѡ великомꙋ́ченика геѡ́ргїа, и҆́же въ кі́евѣ предъ враты̀ ст҃ы́ѧ софі́и:

Слꙋ́жба є҆гѡ̀ пи́сана по се́й слꙋ́жбѣ.

И҆ па́мѧть преставле́нїѧ ст҃и́телѧ і҆нноке́нтїа, пе́рвагѡ є҆пі́скопа і҆ркꙋ́тскагѡ, чꙋдотво́рца.

Слꙋ́жба є҆гѡ̀ пи́сана въ приложе́нїи.

На Гдⷭ҇и, воззва́хъ, стїхи̑ры ѻ҆ктѡ́иха, и҆лѝ бцⷣы:

Та́же ст҃а́гѡ, гла́съ а҃. Подо́бенъ: Всехва́льнїи мч҃ницы:

Всеблаже́нне а҆лѵ́пїе, ꙳ твою̀ и҆змла́да возложи́лъ є҆сѝ жи́знь ꙳ хрⷭ҇тꙋ̀ бг҃ꙋ на́шемꙋ, ꙳ ѿ негѡ́же ᲂу҆крѣплѧ́емь, ꙳ плотскі̑ѧ стра̑сти по́мыслꙋ покори́лъ є҆сѝ, ꙳ го́ршее подчинѧ́ѧ лꙋ́чшемꙋ. ꙳ тѣ́мже моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.

Бг҃омꙋ́дре а҆лѵ́пїе, ꙳ свѣти́ло ꙗ҆ви́лсѧ є҆сѝ велича́йшее, ꙳ просвѣща́ющее подсо́лнечнꙋю чꙋде́съ сїѧ̑нїи, ꙳ и҆ бжⷭ҇твенными дѣ́лы: ꙳ тѣ́мже по ᲂу҆спе́нїи, ꙳ незаходи́мый тѧ̀ свѣ́тъ прїѧ́тъ. ꙳ тѣ́мже моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.

Сто́лпъ бы́лъ є҆сѝ, мꙋ́дре, мона́хѡвъ непоколеби́мь, ꙳ превы́ше столпа̀ стоѧ̀, ꙳ и҆ дрꙋчи́мь зно́емъ и҆ хла́домъ, ꙳ и҆ мно́гими пощє́нїи: ꙳ тѣ́мъ и҆ прїѧ́лъ є҆сѝ дх҃а бжⷭ҇твєннаѧ дарова̑нїѧ, ꙳ цѣли́ти недꙋ́ги, ꙳ и҆ ѿгони́ти стра̑сти лютѣ́йшыѧ. ꙳ и҆ ны́нѣ моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.

Сла́ва, и҆ ны́нѣ, бг҃оро́диченъ. Подо́бенъ: то́йже:

Ра́дꙋйсѧ, кꙋпино̀ неѡпали́маѧ, ꙳ совѣ́та вели́кагѡ а҆́гг҃ла, ꙳ ра́дꙋйсѧ, є҆ди́на ро́ждшаѧ: ꙳ ра́дꙋйсѧ, и҆зволе́нїе честны́ѧ трⷪ҇цы: ꙳ ра́дꙋйсѧ, земны̑мъ ᲂу҆твержде́нїе: ꙳ ра́дꙋйсѧ, раѧ̀ кла́съ ꙳ прозѧ́бши невоздѣ́ланный, ꙳ цр҃ѧ̀ и҆ гдⷭ҇а, ꙳ прозѧбє́нїѧ и҆зсꙋша́юща ѕло́бы.

Крⷭ҇тобг҃оро́диченъ, подо́бенъ то́йже:

Своего̀ а҆́гнца ꙳ а҆́гница и҆ непоро́чнаѧ влⷣчца ꙳ на крⷭ҇тѣ̀ ꙗ҆́кѡ ви́дѣвши зра́ка не и҆мꙋ́ща ꙳ нижѐ добро́ты, ꙳ ᲂу҆вы̀ мнѣ̀, рыда́ющи глаго́лаше: ꙳ гдѣ̀ добро́та твоѧ̀ за́йде, сладча́йшїй; ꙳ гдѣ̀ благолѣ́пїе; ꙳ гдѣ̀ бл҃года́ть блиста́ющаѧ ѻ҆́браза твоегѡ̀, ꙳ сн҃е мо́й любе́знѣйшїй;

Тропа́рь, гла́съ а҃:

Терпѣ́нїѧ сто́лпъ бы́лъ є҆сѝ, ревнова́вый пра́ѻтцємъ, прпⷣбне, і҆́ѡвꙋ во страсте́хъ, і҆ѡ́сифꙋ во и҆скꙋше́нїихъ, и҆ безпло́тныхъ жи́тельствꙋ сы́й въ тѣлесѝ, а҆лѵ́пїе ѻ҆́ч҃е на́шъ, молѝ хрⷭ҇та̀ бг҃а, спасти́сѧ дꙋша́мъ на́шымъ.

На ᲂу҆́трени ѻ҆́ба канѡ́на ѻ҆ктѡ́иха: и҆ прпⷣбнагѡ на д҃,

є҆гѡ́же краегране́сїе: Ра́дꙋѧсѧ похвалѧ́ю а҆лѵ́пїевы болѣ̑зни. І҆ѡ́сифъ.

Гла́съ є҃. Пѣ́снь а҃. І҆рмо́съ:

Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ, і҆и҃лѧ же спасѐ, побѣ́днꙋю пѣ́снь пою́ща.

Бл҃года́тїю и҆спо́лненъ, ра́дости мою̀ и҆спо́лни дꙋ́шꙋ, похвали́ти житїѐ твоѐ, а҆лѵ́пїе, и҆ жи́тельство, и҆́миже всѧ̑ а҆́гг҃лы возвесели́лъ є҆сѝ подвиза́всѧ.

Ꙗ҆́кѡ дрꙋга́го тѧ̀ самꙋи́ла бг҃ъ ѡ҆свѧтѝ, и҆зъ ма́тернѧгѡ чре́ва, а҆лѵ́пїе блаже́нне, и҆ зрѣ́ти прє́днѧѧ, ꙗ҆́кѡ прⷪ҇ро́ка бжⷭ҇твенна содѣ́ѧ тѧ̀, достосла́вне.

Ꙗ҆́кѡ да бг҃ъ ꙗ҆ви́тъ твою̀ свѣ́тлость, ꙗ҆́же напослѣ́докъ и҆мѣ́лъ є҆сѝ, до́брѣ подвиза́всѧ, свѣ́та бжⷭ҇твеннагѡ и҆спо́лни, тебѣ̀ ро́ждшꙋсѧ, прпⷣбне, хра́минꙋ, па́че ᲂу҆ма̀.

Бг҃оро́диченъ:

Рече́нїе прⷪ҇ро́ка честна́гѡ коне́цъ прїѧ́тъ: се́ бо дв҃а пло́тїю бг҃а родѝ, человѣ́ки воззи́ждꙋща, сокрꙋшє́нныѧ пре́жде грѣхмѝ и҆ прегрѣшє́нїи.

Пѣ́снь г҃. І҆рмо́съ:

Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ цр҃ковь твою̀ ᲂу҆твердѝ, є҆ди́не бла́же и҆ чл҃вѣколю́бче.

Ꙗ҆́кѡ свѣти́льникъ на свѣ́щницѣ дѣѧ́нїѧ лꙋ́чшагѡ возложе́нъ, свѣтоза́рными твои́ми, ѻ҆́ч҃е, добродѣ́тельми всѧ́кꙋ дꙋ́шꙋ, вѣ́рнѡ къ тебѣ̀ приходѧ́щꙋю, благочестномꙋ́дреннѡ просвѣти́лъ є҆сѝ, тмы̀ грѣха̀ и҆збавлѧ́ѧ.

Оу҆ма̀ твоегѡ̀ свѧщє́ннаѧ движє́нїѧ творѧ̀, къ соблюде́нїю бжⷭ҇твенныхъ зако́нѡвъ дх҃а, а҆́гг҃лъ ꙗ҆ви́лсѧ є҆сѝ на землѝ, а҆́гг҃льское жи́тельство съ пло́тїю воспрїе́мъ, ѻ҆́ч҃е бг҃оно́се а҆лѵ́пїе.

Разꙋ́мнѡ пли́щей жите́йскихъ, а҆лѵ́пїе, ѿше́льникъ ꙗ҆ви́лсѧ є҆сѝ, и҆ пристꙋпи́лъ є҆сѝ къ три́знамъ по́стническагѡ пребыва́нїѧ ᲂу҆се́рднѡ, твоѐ се́рдце жили́ще ꙗ҆влѧ́ѧ дх҃а, прпⷣбне.

Бг҃оро́диченъ:

Дв҃о чⷭ҇таѧ, сло́ва пала́та, дꙋ́шꙋ мою̀ покажѝ до́мъ дх҃а, и҆ водо́ю и҆сто́чника живонача́льнагѡ напо́й мѧ̀, зно́емъ грѣха̀ пали́маго, ꙗ҆́кѡ да по до́лгꙋ сла́влю тѧ̀.

Сѣда́ленъ, гла́съ д҃. Подо́бенъ: Ско́рѡ предварѝ:

Свѣ́тлостїю вѣ́ры и҆ дѣ́тельнымъ свѣ́томъ, ꙗ҆ви́лсѧ є҆сѝ равноа́гг҃ленъ на землѝ вои́стинꙋ, а҆лѵ́пїе прпⷣбне, показа́лъ є҆сѝ мꙋ́жественнѡ крѣ́пкое ра́зꙋма твоегѡ̀, побѣди́въ ѡ҆полчє́нїѧ стра̑стнаѧ посто́мъ. тѣ́мже и҆ по кончи́нѣ ꙗ҆́кѡ жи́въ сы́й, молѝ спасти́сѧ на́мъ.

Сла́ва, и҆ ны́нѣ, бг҃оро́диченъ:

Дв҃о всенепоро́чнаѧ, ꙗ҆́же пресꙋ́щнагѡ бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.

Крⷭ҇тобг҃оро́диченъ:

Дв҃о пренепоро́чнаѧ мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же, бл҃гослове́ннаѧ, молѧ́щи непреста́й, проще́нїе прегрѣше́нїй на́мъ дарова́ти.

Пѣ́снь д҃. І҆рмо́съ:

Бжⷭ҇твенное твоѐ разꙋмѣ́въ и҆стоща́нїе прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во спасе́нїе люде́й твои́хъ, спастѝ помаза̑нныѧ твоѧ̑ прише́лъ є҆сѝ.

Любо́вь и҆́стиннꙋю и҆ милосе́рдїе, вѣ́рꙋ и҆ наде́ждꙋ тве́рдꙋ, и҆ жи́тельство нельсти́вое прїе́мь, ѻ҆́ч҃е, ᲂу҆го́дникъ хрⷭ҇то́въ бы́лъ є҆сѝ.

Стоѧ̀ на столпѣ̀ непрекло́ненъ проти́вными прилѡ́ги, де́мѡнѡвъ по́лкъ побѣди́лъ є҆сѝ, и҆ коле́блємымъ бы́лъ є҆сѝ, всеблаже́нне, незы́бленное ᲂу҆твержде́нїе.

Во́дъ бжⷭ҇твенныхъ и҆спо́лненъ бы́въ и҆ ѡ҆роси́лъ є҆сѝ дꙋ́шы и҆ста́ѧвшыѧ зно́емъ лю́тагѡ грѣха̀, а҆лѵ́пїе бг҃омꙋ́дре всебога́те.

Ꙗ҆ви́лсѧ є҆сѝ стра́шенъ и҆ непристꙋ́пенъ де́мѡнѡмъ всѣ̑мъ вои́стиннꙋ, ᲂу҆ранѧ́ѧ сїѧ̑ ра́ною свѧще́нныхъ твои́хъ моли́твъ, и҆ дале́че ѿгонѧ́ѧ, а҆лѵ́пїе.

Бг҃оро́диченъ:

Стра̑сти дꙋшѝ моеѧ̀ и҆сцѣлѝ, и҆ просвѣтѝ ᲂу҆́мъ и҆ се́рдце моѐ, влⷣчце, свѣтода́телѧ ро́ждши хрⷭ҇та̀, преблага́го бг҃а.

Пѣ́снь є҃. І҆рмо́съ:

Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю, хрⷭ҇тѐ, ꙗ҆́кѡ є҆ди́нъ благоꙋтро́бенъ.

Ве́сь возложи́всѧ вседержи́телю, лѣ́тнымъ стоѧ́нїемъ безъ покро́ва, ѻ҆́ч҃е, дожде́мъ и҆ зно́емъ ѕѣ́льнѡ стражда̀, ᲂу҆се́рднѡ претерпѣ́лъ є҆сѝ.

Въ пѣ́снехъ и҆ мольба́хъ ᲂу҆пражнѧ́ѧсѧ, прпⷣбне, трисо́лнечныѧ зарѝ благода́ть ᲂу҆ма̀ чистото́ю прїѧ́лъ є҆сѝ, и҆ свѣ́тъ цѣле́нїй возблиста́лъ є҆сѝ.

Тѣ́ло твоѐ на столпѣ̀ ѡ҆гради́въ, ᲂу҆мо́мъ ше́ствовати невоизбра́ннѡ, къ тебѣ̀ жела́емомꙋ, ѻ҆́ч҃е, попꙋсти́лъ є҆сѝ, свѣ́та и҆сполнѧ́емь.

Бг҃оро́диченъ:

Ст҃а́го родила̀ є҆сѝ бг҃а, бы́вша человѣ́ка за милосе́рдїе, ст҃а́ѧ ѻ҆трокови́це, ѡ҆свѧща́ющаго, и҆̀же того̀ вѣ́рою и҆ стра́хомъ ѡ҆свѧща́ющыѧ.

Пѣ́снь ѕ҃. І҆рмо́съ:

Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ благоꙋтро́бенъ.

Ка́менїемъ тѧ̀ дꙋ́си ѕло́бы бїю́ще ꙗ҆́вѣ, творѧ́ща стоѧ́нїе на столпѣ̀, ꙗ҆́кѡ тве́рдагѡ ка́мене ника́коже поколеба́ша.

Терпѧ̀, прпⷣбне, претерпѣ́лъ є҆сѝ, терпѣ́нїе тебѣ̀ и҆́стинное гдⷭ҇ꙋ дарова́вшꙋ, и҆ ѿ всѣ́хъ неꙋдо́бныхъ тѧ̀ и҆зба́вившꙋ.

Пресла́внѡ, прпⷣбне, свѣ́тъ ви́дѣнъ бы́сть вы́ше столпа̀, на всѧ́къ де́нь просвѣща́ющь твоѧ̑, чꙋдотво́рче, дꙋшє́внаѧ чꙋ̑вства.

Бг҃оро́диченъ:

Крѣ́пко тѧ̀ ᲂу҆тѣше́нїе сꙋ́щїи въ ско́рби, и҆ прибѣ́жище, и҆ и҆звѣ́стное всѝ и҆́мамы застꙋпле́нїе, бцⷣе: спасѝ ѿ бѣ́дъ рабы̑ твоѧ̑.

Конда́къ, гла́съ и҃. Подо́бенъ: Ꙗ҆́кѡ нача́тки:

Ꙗ҆́кѡ добродѣ́телей винꙋ̀, и҆ по́стникѡвъ ᲂу҆добре́нїе, цр҃ковь сла́витъ тѧ̀ дне́сь и҆ воспѣва́етъ, а҆лѵ́пїе: моли́твами твои́ми пода́ждь чтꙋ́щымъ любо́вїю до́блєсти твоѧ̑ и҆ борє́нїѧ лю́тыхъ прегрѣше́нїй и҆збавле́нїе, ꙗ҆́кѡ тезоимени́тый.

І҆́косъ:

А҆лѵ́пїевꙋ житїю̀ бжⷭ҇твенномꙋ и҆ равноа́гг҃льномꙋ прїиди́те, почꙋди́мсѧ, а҆рхїєре́и, свѧще́нницы, и҆ мона́шествꙋющїи, и҆ всѝ лю́дїе бг҃омꙋ́дрїи, и҆ подража́имъ дѣѧ̑нїѧ є҆гѡ̀, да и҆ тогѡ̀ ча́сти сподо́бимсѧ мольба́ми є҆гѡ̀ празднолю́бцы: и҆́бо то́й нбⷭ҇нꙋю пѣ́снь пое́тъ безпеча́льнѡ бг҃ꙋ, ꙗ҆́кѡ тезоимени́тый.

Пѣ́снь з҃. І҆рмо́съ:

Превозноси́мый ѻ҆ц҃є́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.

Терпѣли́вѣйшїи и҆ крѣ́пкїй а҆лѵ́пїй, лѣ́ты мно́гими зимо́ю дрꙋчи́мь, дх҃а теплото́ю грѣ́ѧшесѧ пресла́внѡ.

Къ высотѣ̀ нбⷭ҇нѣй и҆мѣ́ѧ жи́тельство, ѡ҆ тѣлесѝ небре́глъ є҆сѝ, ꙗ҆́кѡ растлѣ́тисѧ и҆мꙋ́щемъ: и҆ томꙋ̀ согнива́емꙋ, неради́лъ є҆сѝ ѡ҆ болѣ́знехъ.

Всѧ́кагѡ сладостра́стїѧ, ѻ҆́ч҃е, ѿве́ргсѧ, съ зимо́ю и҆ ва́ромъ борѧ́сѧ пострада́лъ є҆сѝ, безпокро́венъ поѧ̀: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ:

Непостижи́мый пло́ть прїѧ́тъ, ᲂу҆́мнꙋ же и҆ ѡ҆дꙋшевле́ннꙋ, и҆зъ тебє̀, приснодв҃о, є҆́же спастѝ пою́щыѧ: бж҃е, бл҃гослове́нъ є҆сѝ.

Пѣ́снь и҃. І҆рмо́съ:

Себѣ̀ вседѣ́телю, въ пещѝ ѻ҆́троцы всемі́рный ли́къ спле́тше, поѧ́хꙋ: дѣла̀ всѧ̑каѧ гдⷭ҇а по́йте, и҆ превозноси́те во всѧ̑ вѣ́ки.

Но́вый самꙋи́лъ предзрѧ̀ бꙋ́дꙋщее ᲂу҆ма̀ чистото́ю, ꙗ҆ви́лсѧ є҆сѝ, а҆лѵ́пїе, всѣ̑мъ предглаго́лѧ, ꙗ҆́кѡ бж҃їй проро́къ, ѿ гдⷭ҇а ꙗ҆влѧ́ємаѧ тебѣ̀, ѻ҆́ч҃е.

Свѣтови́дный цр҃кве сто́лпъ, забра́ло незы́бленное, стѣна̀ нерꙋши́маѧ всѣ́хъ человѣ́кѡвъ, бг҃ꙋ вѣ́ровавшихъ, хрⷭ҇то́въ ᲂу҆го́дникъ а҆лѵ́пїй да почти́тсѧ.

Оу҆снꙋ́лъ є҆сѝ до́брѣ сно́мъ пра́веднымъ, ѻ҆́ч҃е, всѣ̑мъ до́лжнымъ, ᲂу҆спи́въ пре́жде стра̑сти многоѻбра̑зныѧ мольба́ми и҆ бдѣ̑нїи. тѣ́мже неꙋсы́пна тѧ̀ предста́телѧ и҆мꙋ́ще ны́нѣ, ѡ҆богати́хомсѧ.

Бг҃оро́диченъ:

Твоѐ ржⷭ҇тво̀ роди́вшїйсѧ грѣ́хъ ѕло́бою ѕмїи́ною ѡ҆безпло́дстви ны́нѣ, є҆ди́на клѧ́твы потреби́тельница дв҃о. тѣ́мже тѧ̀ чти́мъ во всѧ̑ вѣ́ки.

Пѣ́снь ѳ҃. І҆рмо́съ:

И҆са́їе, ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆блажа́емъ.

Свѧще́нное житїѐ твоѐ ѿ пеле́нъ ꙗ҆ви́сѧ хрⷭ҇тꙋ̀, сїѧ́ѧ добродѣ́тельнымъ свѣ́томъ, бл҃же́нне: честна́ же твоѧ̀ сме́рть предъ бг҃омъ бы́сть, ѻ҆́ч҃е а҆лѵ́пїе, мона́шествꙋющихъ нача́льниче.

Ꙗ҆́кѡ свѣти́ло пресвѣ́тлое просвѣща́еши всю̀ зе́млю, ѿгонѧ̀ лꙋка̑выѧ стра̑сти, и҆ разрѣша́ѧ тмꙋ̀ грѣхо́внꙋю, и҆ просвѣща́ѧ бжⷭ҇твенными свѣтлостьмѝ и҆сцѣле́нїй пою́щыѧ тѧ̀.

Стоѧ́нїе на столпѣ̀ сотвори́лъ є҆сѝ лѣ̑та, мꙋ́дре, пѧтьдесѧ́тъ къ тре́мъ, ꙗ҆́кѡ страда́лецъ стражда̀ ᲂу҆се́рднѣйше, и҆ зимо́ю и҆ мра́зомъ и҆ зно́емъ, ѻ҆́ч҃е, неѡсла́бнѡ дрꙋчи́мь.

Ст҃а́ѧ твоѧ̀ па́мѧть дх҃омъ ст҃ы́мъ на́съ ѡ҆свѧща́етъ, мꙋ́дре, сїю̀ свѧще́ннѡ соверша́ющыѧ, и҆ вѣ́рою тѧ̀ воспѣва́ющыѧ, ѻ҆́ч҃е, въ не́й, ꙗ҆́кѡ застꙋ́пника и҆ предста́телѧ дꙋ́шъ на́шихъ.

Бг҃оро́диченъ:

Просвѣще́нїе мнѣ̀ да́рꙋй, во тмѣ̀ сꙋ́щꙋ страсте́й, ѻ҆каѧ́нномꙋ и҆ грѣ́шномꙋ, и҆ и҆зба́ви мѧ̀ лꙋка́выхъ дѣ́лъ, и҆ пла́мене предлежа́щагѡ мѝ, пречⷭ҇таѧ влⷣчце, предста́тельнице пою́щихъ тѧ̀.

Свѣти́ленъ. Подо́бенъ: Жєны̀ ᲂу҆слы́шите:

По́двиги па́че человѣ́ка проше́лъ є҆сѝ, ѻ҆́ч҃е прпⷣбне, хрⷭ҇то́вою си́лою: пѧтьдесѧ́тъ бо къ тре́мъ лѣ́тѡмъ на столпѣ̀ стоѧ́лъ є҆сѝ, мꙋ́дре а҆лѵ́пїе, ѿвсю́дꙋ дрꙋчи́мь: и҆ ны́нѣ коне́чное, бл҃же́нне, благи́хъ всѣ́хъ ѡ҆брѣ́лъ є҆сѝ.

Бг҃оро́диченъ:

Ты̀ моѧ̀ предста́тельница чⷭ҇таѧ, и҆ тве́рдое прибѣ́жище, ты̀ моѧ̀ застꙋ́пница и҆ покро́въ, и҆ къ тебѣ̀ припа́даѧ зовꙋ̀: болѣ́зней мои́хъ и҆зба́ви мѧ̀, ꙗ҆́кѡ всѣ́хъ преимꙋ́щи, и҆ ѻ҆гнѧ́ мѧ и҆схитѝ вѣ́чнꙋющагѡ, дв҃о, на тѧ̀ ᲂу҆пова́ющаго.

Слꙋ́жба ѡ҆свѧще́нїѧ це́ркве ст҃а́гѡ великомꙋ́ченика геѡ́ргїа, ꙗ҆́же въ кі́евѣ предъ враты̀ ст҃ы́ѧ софі́и.

Ве́черъ, Блаже́нъ мꙋ́жъ:

На Гдⷭ҇и, воззва́хъ, стїхи̑ры, гла́съ д҃. Подо́бенъ: Ꙗ҆́кѡ до́блѧ:

Страда́лецъ ди́вный, ꙳ во́инъ хра́брый непобѣди́мь, ꙳ и҆ свѣти́льникъ всемі́рный, ꙳ по́двиги страда́нїй твои́хъ ꙳ всѧ̑ просвѣща́ѧ мі́ра концы̀, ꙳ ѿгонѧ́ѧ мра́къ де́мѡнѡвъ лю́тый, ꙳ геѡ́ргїе страстоте́рпче, ꙳ ᲂу҆добре́нїе мꙋ́ченикѡвъ, ꙳ и҆ сограждани́нъ нбⷭ҇ныхъ во́инствъ.

Пресловꙋ́щїй въ мꙋ́жествѣ, ꙳ красе́нъ въ во́зрастѣ бы́въ, ꙳ въ словесѣ́хъ и҆ дѣ́лѣхъ ѿ всѣ́хъ преꙋдивлѧ́емь, ꙳ хра́борски ѿлꙋчи́всѧ къ подвигѡ́мъ мꙋче́нїѧ за хрⷭ҇та̀, ꙳ небоѧ́зненнѡ на врагѝ воздви́глъ є҆сѝ побѣ́ды, ꙳ вели́кими твои́ми страда̑нїи: ꙳ сегѡ̀ ра́ди тѧ̀, геѡ́ргїе, ꙳ во хвале́нїи чти́мъ ра́достнѡ, досточꙋ́дне, ꙳ красота̀ мꙋ́ченикѡвъ и҆ похвала̀.

На высотꙋ̀ нбⷭ҇нꙋю ра́дꙋѧсѧ возше́лъ є҆сѝ, ꙳ въ прекра́снꙋю ѻ҆де́ждꙋ ѡ҆блече́нъ, ꙳ ѿ твои́хъ страда́льческихъ крове́й ѡ҆багре́нꙋю, ꙳ цр҃ю̀ всѣ́хъ предста́въ, ꙳ живонача́льною десни́цею вѣнча́емь. ꙳ тѣ́мже дне́сь, геѡ́ргїе великострада́льче, ꙳ твою̀ па́мѧть свѣтоза́рнꙋю соверша́ющымъ ꙳ и҆спросѝ просвѣще́нїе ꙳ и҆ спасе́нїе дꙋ́шъ на́шихъ.

Сла́ва, гла́съ ѕ҃. Самогла́сенъ:

Дне́сь прїиди́те празднолю́бнїи собо́ри, страстоте́рпца чⷭ҇тно́е торжество̀ свѣ́тлѡ пра́зднꙋемъ: и҆́бо неви́димаго врага̀ низложѝ, зако́ннѡ по хрⷭ҇тѣ̀ пострада́въ, и҆ досто́йнѡ прїѧ̀ побѣ́ды ѿ сп҃са вѣне́цъ, и҆ ны́нѣ на небесѣ́хъ со а҆́гг҃лы ра́дꙋѧсѧ, трⷪ҇цѣ свѣ́тлѡ предстои́тъ. тѣ́мже и҆ мы̀ пѣ́сньми хвале́нїѧ воспое́мъ: ра́дꙋйсѧ, тве́рдый страда́льче непобѣди́мый, ра́дꙋйсѧ, хра́брый ѻ҆рꙋ́жниче хрⷭ҇то́въ: ра́дꙋйсѧ, многобо́жїѧ льстѝ потреби́телю, и҆ и҆́стинныѧ вѣ́ры свѣ́тлый побо́рниче. но, ѽ страстоте́рпцєвъ ᲂу҆краше́нїе геѡ́ргїе! моли́сѧ гдⷭ҇ꙋ, и҆зба́витисѧ на́мъ ви́димыхъ и҆ неви́димыхъ вра̑гъ, и҆ спасти́сѧ дꙋша́мъ на́шымъ.

И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:

Вхо́дъ. Прокі́менъ днѐ. Чтє́нїѧ трѝ.

Пи́саны сегѡ̀ мцⷭ҇а въ к҃в де́нь мїхаи́лꙋ тферско́мꙋ.

На стїхо́внѣ стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ!

За всѣ́хъ жи́знь стра́ждеши, ꙳ кро́вь твою̀ и҆злива́ѧ, ꙳ страстоте́рпче геѡ́ргїе, ꙳ кро́вь свою̀ тебє̀ ра́ди и҆злїѧ́вшемꙋ, ꙳ приве́лсѧ є҆сѝ хрⷭ҇тꙋ̀, блаже́нне: ꙳ тѣ́мъ ѻ҆́бщника своеѧ̀ сла́вы сотвори́ тѧ, ꙳ и҆ црⷭ҇тва соприча́стника, ꙳ ꙗ҆́кѡ мꙋ́жествовавша крѣ́пкѡ на льсти́ваго, ꙳ и҆ сегѡ̀ ᲂу҆хищрє́нїѧ до конца̀ низложи́вшаго.

Сті́хъ: Првⷣникъ, ꙗ҆́кѡ фі́нїѯъ, процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.

Благоче́стїѧ сто́лпъ бы́лъ є҆сѝ, ꙳ ѡ҆снова́нъ тве́рдѡ на ка́мени вѣ́ры, ꙳ и҆скꙋше́нїй вѣ̑тры непоколе́блемь, ꙳ мꙋче́нїй мно́гихъ, блаже́нне: ꙳ съ лю́тою бо ꙗ҆́ростїю вразѝ тебѣ̀ прирази́шасѧ, ꙳ тща́щесѧ низложи́ти, ꙳ и҆ не возмого́ша крѣ́пости твоеѧ̀, ꙳ но посра́млени падо́ша: ꙳ побѣди́тельнымъ бо ѿ хрⷭ҇та̀ вѣнце́мъ, ꙳ ᲂу҆краси́тисѧ возжелѣ́лъ є҆сѝ.

Сті́хъ: Насажде́ни въ домꙋ̀ гдⷭ҇ни, во дво́рѣхъ бг҃а на́шегѡ процвѣтꙋ́тъ.

Вопло́щшемꙋсѧ хрⷭ҇тꙋ̀ бг҃ꙋ на́шемꙋ, ꙳ и҆ стра́стїю крⷭ҇тною ꙳ низложи́вшемꙋ ѿстꙋ́пника, ꙳ во́льнымъ тогѡ̀ страстє́мъ, ꙳ стрⷭ҇тоте́рпче геѡ́ргїе, поревнова́въ, ꙳ и҆ ра́нами протѧза́емь, ꙳ хва́лѧщагосѧ неви́димаго врага̀, ꙳ съ пло́тїю, мч҃ниче, побѣди́въ, ꙳ на зе́млю низложи́лъ є҆сѝ.

Сла́ва, гла́съ д҃. Самогла́сенъ:

Прїиди́те вѣ́рныхъ собо́ри, прїиди́те, пра́здникъ соста́вимъ: и҆́бо пресвѣ́тлаѧ па́мѧть дне́сь ꙗ҆ви́сѧ страстоте́рпца геѡ́ргїа, на̑ша просвѣща́етъ неви́димѡ сердца̀, добродѣ́тельми блиста́ющи. тѣ́мже є҆диномꙋ́дреннѡ воспѣва́юще рце́мъ: ра́дꙋйсѧ, во́ине вели́кагѡ цр҃ѧ̀ хрⷭ҇та̀: ра́дꙋйсѧ, пресвѣ́тлаѧ похвало̀ вѣ́ры: ра́дꙋйсѧ, всесвѣ́тле и҆ пребога́те: ѡ҆ на́съ, пребл҃же́нне, всѣ́хъ влⷣкꙋ хрⷭ҇та̀ бг҃а молѝ, сохранє́ннымъ бы́ти ѿ и҆скꙋше́нїй лꙋка́вагѡ, и҆ спастѝ дꙋ́шы на́шѧ.

И҆ ны́нѣ, бг҃оро́диченъ: При́зри на молє́нїѧ:

Тропа́рь, гла́съ д҃:

Дне́сь блажа́тъ тѧ̀ мі́ра концы̀, бжⷭ҇твенныхъ чꙋде́съ и҆спо́лншесѧ, и҆ землѧ̀ ра́дꙋетсѧ напи́вшисѧ кро́ве твоеѧ̀: хрⷭ҇тоимени́тїи же лю́дїе гра́да кі́ева, ѡ҆свѧще́нїемъ бжⷭ҇твеннагѡ хра́ма твоегѡ̀, ра́достїю возвесели́шасѧ, страстоте́рпче геѡ́ргїе, сосꙋ́де и҆збра́нный ст҃а́гѡ дх҃а, ᲂу҆го́дниче хрⷭ҇то́въ. є҆го́же молѝ, съ вѣ́рою и҆ мольбо́ю приходѧ́щымъ во ст҃ы́й тво́й хра́мъ, да́ти ѡ҆чище́нїе грѣхѡ́въ, ᲂу҆мири́ти мі́ръ, и҆ спастѝ дꙋ́шы на́шѧ.

Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́ное:

На Бг҃ъ гдⷭ҇ь, тропа́рь два́жды. Сла́ва, и҆ ны́нѣ, бг҃оро́диченъ:

По а҃-мъ стїхосло́вїи сѣда́ленъ, гла́съ д҃:

Страстоте́рпца дне́сь геѡ́ргїа благоче́стнѡ сотворѧ́емъ пра́зднество, ѡ҆свѧще́нїе хра́ма: ꙗ҆́кѡ непреста́ннѡ мо́литсѧ гдⷭ҇ꙋ, всѣ̑мъ да́ти ми́ръ, и҆ спасе́нїе дꙋша́мъ на́шымъ.

Два́жды.

Сла́ва, и҆ ны́нѣ, бг҃оро́диченъ:

Те́плое застꙋпле́нїе сꙋ́щымъ въ бѣда́хъ, на́шꙋ помо́щницꙋ, и҆ къ бг҃ꙋ премѣне́нїе: є҆ѧ́же ра́ди тлѝ и҆зба́вихомсѧ, бцⷣꙋ вѣ́рнїи ᲂу҆блажа́емъ.

По в҃-мъ стїхосло́вїи сѣда́ленъ, гла́съ а҃. Поⷣ: Ли́къ а҆́гг҃льскїй:

Земно́е во́инство и҆ че́сть ѿри́нꙋлъ є҆сѝ, ꙗ҆́кѡ ско́рѡ ги́бнꙋщꙋю, на нб҃сѣ́хъ со а҆́гг҃льскими вѡ́и бы́ти возжелѣ́въ, и҆ сла́вы при́снѡ вѣ́чнѡ пребыва́ющїѧ. тѣ́мже мнѡ́ги мꙋ̑ки претерпѣ́въ, сме́рть прїѧ́лъ є҆сѝ: сегѡ̀ ра́ди дне́сь всесвѧтꙋ́ю твою̀ па́мѧть пра́зднꙋюще, хрⷭ҇тꙋ̀ прино́симъ хвалꙋ̀, требл҃же́нне геѡ́ргїе.

Два́жды.

Сла́ва, и҆ ны́нѣ, бг҃оро́диченъ:

Мт҃рь тѧ̀ бж҃їю мо́лимъ всѝ, и҆ дв҃ꙋ вои́стиннꙋ, въ щедрѡ́ты твоѧ̑ вопїе́мъ, любо́вїю прибѣга́юще въ твою̀ бла́гость: тѧ́ бо и҆́мамы грѣ́шнїи застꙋ́пницꙋ, тебѐ стѧжа́хомъ въ напа́стехъ спасе́нїе, є҆ди́нꙋ пречи́стꙋю.

По полѷеле́и сѣда́ленъ, гла́съ и҃. Подо́бенъ: Премꙋ́дрости:

Ꙗ҆́кѡ лꙋчы̀ блиста́нїй чꙋде́съ, всѧ̑ просвѣща́еши мі́ра концы̀, ꙗ҆́кѡ ѕвѣзда̀ пресвѣ́тлаѧ, и҆ краснѡ̀ благоꙋха́еши, ꙗ҆́кѡ бжⷭ҇твенный ра́й, при́снѡ дꙋ́шы на́шѧ весели́ши, и҆ ѿго́ниши недꙋ́ги. тѣ́мже тѧ̀, бл҃же́нне, по до́лгꙋ пое́мъ, и҆ любо́вїю чти́мъ честнꙋ́ю па́мѧть твою̀, великомꙋ́чениче геѡ́ргїе: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Премꙋ́дрость и҆ сло́во въ твое́мъ чре́вѣ заче́нши, неѡпа́льнѡ, мт҃и бж҃їѧ, мі́рꙋ родила̀ є҆сѝ, мі́ръ содержа́щаго: и҆ во ѡ҆б̾ѧ́тїѧхъ понесла̀ є҆сѝ всѧ̑ носѧ́щаго, пита́телѧ всѣ́хъ, и҆ творца̀ тва́ри. тѣ́мже молю́ тѧ, всест҃а́ѧ дв҃о, и҆ вѣ́рнѡ сла́влю тѧ̀, и҆зба́витисѧ мнѣ̀ прегрѣше́нїй: и҆ въ де́нь сꙋда̀, є҆гда̀ предста́ти и҆́мамъ предъ лице́мъ созда́телѧ моегѡ̀, влⷣчце дв҃о чⷭ҇таѧ, твою̀ по́мощь тогда̀ пода́ждь мѝ: всѧ̑ бо мо́жеши, є҆ли̑ка хо́щеши, всепѣ́таѧ.

Степє́нна, а҃-й а҆нтїфѡ́нъ д҃-гѡ гла́са. Прокі́менъ: Првⷣникъ, ꙗ҆́кѡ фі́нїѯъ, процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Сті́хъ: Насажде́ни въ домꙋ̀ гдⷭ҇ни: Всѧ́кое дыха́нїе: Є҆ѵⷢ҇лїе лꙋкѝ, зача́ло ѯ҃г. По н҃-мъ ѱалмѣ̀ стїхи́ра, гла́съ ѕ҃. Самогла́сна:

Дне́сь вселе́ннаѧ всѧ̀ страстоте́рпца просвѣща́етсѧ зарѧ́ми, и҆ хрⷭ҇то́ва цр҃ковь цвѣты̀ ᲂу҆краша́ема, геѡ́ргїе, вопїе́тъ тебѣ̀: ᲂу҆го́дниче хрⷭ҇то́въ и҆ застꙋ́пниче те́плый, не преста́й молѧ́сѧ ѡ҆ рабѣ́хъ твои́хъ.

Канѡ́нъ бцⷣы на ѕ҃. и҆ ст҃а́гѡ на и҃, гла́съ д҃.

Пѣ́снь а҃. І҆рмо́съ:

Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆зъ рабо́ты є҆гѵ́петскїѧ, покры́лъ же є҆сѝ колесни̑цы фараѡ́новы и҆ си́лꙋ.

Воспѣ́ти твоѧ̑ страда̑нїѧ ра́зꙋмъ да́ждь сла́внѡ, вѣнцено́сче страстоте́рпче геѡ́ргїе, цр҃ѧ̀ всѣ́хъ прⷭ҇то́лꙋ предстоѧ̀ свѣ́тлѡ: на́съ сохранѧ́й пою́щихъ тѧ̀.

Ѡ҆ благоче́стїи крѣ́пцѣ подвиза́всѧ, великострада́льче геѡ́ргїе, вѣнце́мъ сла́вы досто́йнѡ почествова́лсѧ є҆сѝ десни́цею вседержи́телевою.

Крѣ́пость дадѐ тебѣ̀ хрⷭ҇то́съ на по́двиги, мно́ги, ви́ды мꙋ́къ до́блественнѣ и҆ терпѣли́внѡ под̾ѧ́ти: тѣ́мъ и҆ побѣди́лъ є҆сѝ безбо́жныхъ шата̑нїѧ.

Бг҃оро́диченъ:

Лѣ́ствица ꙗ҆ви́ласѧ є҆сѝ нбⷭ҇наѧ, дв҃о, є҆́юже сни́де къ на́мъ сло́во бж҃їе, тѧ̀ дре́вле прови́дѣ і҆а́кѡвъ, пра́ѻтєцъ тво́й.

Катава́сїа: Хрⷭ҇то́съ ражда́етсѧ:

Пѣ́снь г҃. І҆рмо́съ:

Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.

Плотскі́й сою́зъ и҆ сочета́нїе твои́хъ ᲂу҆дѡ́въ разрꙋша́шесѧ, но крѣ́пость соблюде́сѧ твоеѧ̀ дꙋшѝ неразрꙋши́ма.

Ꙗ҆́рости стремле́нїе благомо́щнѡ претерпѣ́лъ є҆сѝ ѕѣлѡ̀ ѿ мꙋ́чащихъ тѧ̀, страстоте́рпче геѡ́ргїе, терпѣ́нїе до́блественно крѣ́пкѡ показа́въ.

Кто̀ возмо́жетъ твоѐ крѣ́пкое и҆ си́льное, и҆ по́мысла неꙋкло́ннꙋю мꙋ́дрость, геѡ́ргїе, похвала́ми почестви́ти по достоѧ́нїю, бл҃же́нне;

Бг҃оро́диченъ:

Оу҆ста́вила є҆сѝ тлю̀ сме́рти, ꙗ҆́же во ѵ҆поста́си пло́тїю живота̀ ро́ждши, пречⷭ҇таѧ, человѣ́кѡмъ ꙗ҆́вльшасѧ и҆зъ чре́ва твоегѡ̀, прест҃а́ѧ.

Сѣда́ленъ, гла́съ д҃. Подо́бенъ: Ско́рѡ предварѝ:

До́блемꙋ страда́льцꙋ и҆ во́инꙋ крѣ́пкомꙋ всецарю́ющагѡ хрⷭ҇та̀ похвалє́нїѧ прино́симъ: ра́дꙋйсѧ, мꙋ́ченикѡвъ ᲂу҆краше́нїе и҆ лѣ́пота: ра́дꙋйсѧ, пресвѣ́тлаѧ цр҃кве ѕвѣздо̀, застꙋ́пниче и҆ спаси́телю къ тебѣ̀ прибѣга́ющихъ, великомꙋ́чениче сла́вный геѡ́ргїе. тѧ̀ пою́щыѧ спаса́й ѿ всѣ́хъ навѣ̑тъ вра́жїихъ, и҆ моли́твами твои́ми ко гдⷭ҇ꙋ црⷭ҇твїѧ є҆гѡ̀ сподо́би на́съ.

Два́жды.

Сла́ва, и҆ ны́нѣ, бг҃оро́диченъ:

Дв҃о всенепоро́чнаѧ, пребога́таго бг҃а ро́ждшаѧ, со страстотє́рпцы того̀ молѝ непреста́ннѡ, ѡ҆ставле́нїе согрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.

Пѣ́снь д҃. І҆рмо́съ:

Нб҃са̀ добродѣ́тель твоѧ̀ покры́ла є҆́сть, и҆ землѧ̀ и҆спо́лнисѧ сла́вы твоеѧ̀, хрⷭ҇тѐ. тѣ́мже вѣ́рнѡ вопїе́мъ: сла́ва си́лѣ твое́й, гдⷭ҇и.

Ꙗ҆́ростїю де́мѡнскою мꙋчи́телїе ѡ҆держи́мїи, тѧ̀ любо́вїю бж҃їею содержи́маго, неми́лостивнѡ ѕлодѣ́и ᲂу҆ранѧ́хꙋ, страстоте́рпче геѡ́ргїе.

Ѻ҆гнѧ̀ си́льнѣйши и҆зволе́нїе стѧжа́лъ є҆сѝ, мꙋчи́телѧ несмы́сльство низложи́въ посрами́лъ є҆сѝ, зовы́й, геѡ́ргїе: сла́ва си́лѣ твое́й, гдⷭ҇и.

По хрⷭ҇тѣ̀ да́же до сме́рти, дꙋше́ю терпѣли́внѡ всѧ́кимъ мꙋ́камъ сопроти́вилсѧ є҆сѝ велегла́снѡ вопїѧ̀: сла́ва си́лѣ твое́й, гдⷭ҇и.

Ѕѣ́льнѣйшимъ и҆зволе́нїемъ, блаже́нне, ѡ҆держи́мь, пре́лесть, геѡ́ргїе, попра́лъ є҆сѝ, благода́рнѡ вопїѧ̀: сла́ва си́лѣ твое́й, гдⷭ҇и.

Бг҃оро́диченъ:

Вопло́щсѧ и҆зъ дв҃ы безпло́тенъ сы́й, на зе́млю къ человѣ́кѡмъ прїи́де. тѣ́мъ вѣ́рою зове́мъ: сла́ва си́лѣ твое́й гдⷭ҇и.

Пѣ́снь є҃. І҆рмо́съ:

Стѧжа́вый ны̀ и҆збра̑нныѧ лю́ди кро́вїю твое́ю, гдⷭ҇и, тво́й ми́ръ да́ждь на́мъ, во є҆диномы́слїи сохранѧ́ѧ ста́до твоѐ.

Непобѣди́мою крⷭ҇та̀ си́лою ᲂу҆крѣплѧ́емь, вели́кїй страда́льче геѡ́ргїе, возмо́глъ є҆сѝ мꙋчи́телево лю́тое побѣди́ти свирѣ́пство.

Поста́вивъ се́рдце твоѐ велеꙋ́мнѣ на тве́рдѣмъ ка́мени вѣ́ры, геѡ́ргїе, нахожде́ньми и҆скꙋше́нїй мꙋ́къ непобѣди́мь пребы́лъ є҆сѝ.

Ꙗ҆́кѡ нбⷭ҇нагѡ цр҃ѧ̀ во́инъ, со а҆́гг҃льскими вѡ́и томꙋ̀ предстоѧ̀, страстоте́рпче геѡ́ргїе, тебѐ вѣ́рою призыва́ющыѧ ѿ всѧ́кихъ и҆скꙋше́нїй и҆зба́ви.

Бг҃оро́диченъ:

И҆збавлѧ́ющи на́съ ꙗ҆ви́сѧ ѿ бѣ́дъ и҆ прегрѣше́нїй, тлетво́рныхъ страсте́й, и҆ скорбе́й, и҆ ѡ҆бстоѧ́нїй, пою́щыѧ тѧ̀ вѣ́рою, бцⷣе приснодв҃о.

Пѣ́снь ѕ҃. І҆рмо́съ:

Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ.

Преди́венъ взо́ромъ, красе́нъ тѣ́ломъ, ᲂу҆добре́нъ же дꙋ́хомъ, геѡ́ргїе, ѿлꙋчи́лсѧ є҆сѝ къ боре́нїю ѕлоко́зненнагѡ, и҆ сего̀ разрази́въ, побѣ́ды вѣне́цъ прїѧ́лъ є҆сѝ.

Оу҆краша́ютсѧ до́брыхъ пѡ́двигъ ѡ҆долѣ́нїемъ, страда́льческое зрѧ́ще натрижне́нїе, перворожде́нныхъ и҆збра́нїе, и҆ свѣтоно́сное собо́рище.

Нбⷭ҇ныхъ блаже́нство воспрїе́млѧ, ѿ гдⷭ҇а ᲂу҆гото́ванныхъ, геѡ́ргїе страда́льче, и҆́хже ра́ди на землѝ подвиза́лсѧ є҆сѝ да́же до кро́ве, и҆ побѣ̑дныѧ по́чєсти прїи́мъ.

Бг҃оро́диченъ:

Ꙗ҆́кѡ бразда̀ чре́во твоѐ, чⷭ҇таѧ, ꙗ҆ви́сѧ, пшени́цꙋ приносѧ́щи безсме́ртїѧ, всѣ́хъ вѣ́рныхъ дꙋ́шы пита́ющи, и҆ мꙋ́чєникъ веселѧ́щи.

Конда́къ, гла́съ в҃. Подо́бенъ: Твє́рдыѧ:

Бжⷭ҇твеннаго и҆ вѣнцено́снаго великомч҃ника хрⷭ҇то́ва геѡ́ргїа, на врагѝ побѣ́дꙋ взе́мшаго ѡ҆долѣ́нїѧ, соше́дшесѧ вѣ́рою во ѡ҆свѧще́нный хра́мъ, восхва́лимъ, є҆го́же благоволѝ бг҃ъ созда́ти во и҆́мѧ є҆гѡ̀, є҆ди́нъ во ст҃ы́хъ почива́ѧй.

І҆́косъ:

Ꙗ҆́кѡ свѣти́льника незаходи́магѡ ѕвѣзда̀ показа́сѧ непреле́стна, сл҃нца хрⷭ҇та̀ возвѣща́ѧ зарѧ́ми твои́ми, страстоте́рпче геѡ́ргїе, созыва́еши ѿ первопресто́льнагѡ ма́тере градѡ́въ, бг҃омъ спасе́ннагѡ кі́ева, во ѡ҆свѧще́нный хра́мъ хрⷭ҇толюби̑ваѧ мно́жєства, ѡ҆благодѣ́тельствовати ѻ҆бы́чнѣ, хотѧ́щыѧ восхвали́ти пѣ́сньми, во гла́сѣ ра́дованїѧ и҆ и҆сповѣ́данїѧ, соста́вити пра́здникъ свѧще́ннагѡ хра́ма: є҆го́же благоволѝ бг҃ъ созда́ти во и҆́мѧ твоѐ, є҆ди́нъ во ст҃ы́хъ почива́ѧй.

Пѣ́снь з҃. І҆рмо́съ:

Ѻ҆ц҃ъ на́шихъ бж҃е, не посрамѝ на́съ, но да́рꙋй на́мъ со дерзнове́нїемъ вопи́ти тебѣ̀ бл҃гослове́нъ є҆сѝ, бж҃е ѻ҆ц҃ъ на́шихъ.

Крѣпча́йшимъ ра́зꙋмомъ пла́мень ле́сти погаси́въ, во и҆скꙋше́нїи непобѣди́мь бы́лъ є҆сѝ, геѡ́ргїе, вопїѧ̀: ѻ҆тє́цъ на́шихъ бж҃е, бл҃гослове́нъ є҆сѝ.

Ꙗ҆́кѡ мꙋ́ченикъ и҆ вели́къ страда́лецъ, въ пресвѣ́тлый бжⷭ҇твенный черто́гъ вше́лъ є҆сѝ, хрⷭ҇то́въ ᲂу҆го́дниче, вопїѧ̀: ѻ҆тє́цъ на́шихъ бж҃е, бл҃гослове́нъ є҆сѝ.

Ви́дѣти сподо́билсѧ є҆сѝ, геѡ́ргїе, та́мѡ блажє́нства, и҆ наслаждє́нїѧ вѣ́чныхъ ст҃ы́хъ свѣ́тлостей, а҆пⷭ҇тѡлъ и҆ прⷪ҇рѡ́къ и҆ мꙋ́чєникъ, і҆ера́рхѡвъ, и҆ всѣ́хъ пра́ведныхъ.

Бг҃оро́диченъ:

Ꙗ҆ви́ласѧ є҆сѝ всѣ̑мъ человѣ́кѡмъ, чⷭ҇таѧ мт҃и бж҃їѧ, держа́ва ве́лїѧ, и҆ покро́въ и҆ застꙋпле́нїе тѧ̀ пою́щымъ всегда̀ свѧще́нными пѣ́сньми.

Пѣ́снь и҃. І҆рмо́съ:

Всѧ̑ дѣла̀ бж҃їѧ, и҆ всѧ̀ тва́рь, благослови́те гдⷭ҇а, ꙗ҆́кѡ человѣ́кѡмъ ѿ землѝ возсїѧ̀ свѣ́тъ, и҆ вселе́ннꙋю всю̀ просвѣтѝ, и҆ жи́знь вѣ́чнꙋю мі́рꙋ дарова̀: по́йте, лю́дїе, и҆ превозноси́те є҆го̀ во вѣ́ки.

Низложи́въ всѧ̑ вра́жїѧ ѻ҆рꙋ̑жїѧ, великомꙋ́чениче геѡ́ргїе, попра́лъ є҆сѝ і҆́дѡльскꙋю ле́сть, зовы́й: по́йте, лю́дїе, и҆ превозноси́те хрⷭ҇та̀ бг҃а во вѣ́ки.

Оу҆кра́шенъ ѕѣлѡ̀ благолѣ́пнѡ, хрⷭ҇тꙋ̀ предстоѧ̀, страда́льче приснопа́мѧтне геѡ́ргїе, ѿ крове́й твои́хъ мꙋ́ченическихъ ѡ҆червле́нꙋ багрѧни́цꙋ носѧ̀, ве́селѡ пое́ши: лю́дїе, превозноси́те є҆го̀ во вѣ́ки.

По́чєсти тебѣ̀ хрⷭ҇то́съ подадѐ, геѡ́ргїе, во страда́нїихъ твои́хъ: и҆сповѣ́далъ бо є҆сѝ того̀ велегла́снѡ, свидѣ́тельствꙋѧ, и҆ зовы́й: по́йте, лю́дїе, и҆ превозноси́те є҆го̀ во вѣ́ки.

Ны́нѣ предстои́ши живонача́льныѧ свѣ́тꙋ трⷪ҇цы, бж҃е́ственными сїѧ̑нїи, геѡ́ргїе, просвѣща́емь, помина́й на́съ вѣ́рою чествꙋ́ющыѧ тѧ̀, и҆ превозносѧ́щыѧ хрⷭ҇та̀ во вѣ́ки.

Бг҃оро́диченъ:

Законода́вца родила̀ є҆сѝ хрⷭ҇та̀, зако́ннѡ страда́вшаго вѣнча́вша страстоте́рпца и҆ мꙋ́ченика, є҆го́же молѝ зако́номъ грѣха̀ побѣжде́на мѧ̀, ѻ҆трокови́це, и҆сцѣли́ти.

Пѣ́снь ѳ҃. І҆рмо́съ:

Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.

Зако́нными повелѣ̑нїи побѣжда́етсѧ пѡ́двигъ твои́хъ, геѡ́ргїе, велича́вый: є҆ди́нъ бо влⷣка хрⷭ҇то́съ просла́ви тѧ̀. є҆го́же молѝ ѡ҆ на́съ, страстоте́рпче, любо́вїю пою́щихъ тѧ̀.

Красе́нъ вои́стиннꙋ дꙋше́ю и҆ тѣ́ломъ ве́сь, сла́вне геѡ́ргїе, ны́нѣ предстои́ши цр҃ю̀ царе́й всѣ́хъ красотѣ̀, при́снѡ прича̑стїи ᲂу҆добрѧ́емь всекра́сныхъ, всече́стне, наслажде́нїй.

Твою̀, цр҃ю̀ хрⷭ҇тѐ, любо́вь геѡ́ргїй подража́въ, кро́вїю да́же до сме́рти, мечꙋ̀, ѻ҆гню́ же и҆ мꙋ́камъ, бжⷭ҇твенный страда́лецъ сопроти́вльсѧ, и҆ є҆́же ѿ тебє̀, чл҃вѣколю́бче, безсме́ртїе прїи́мъ наслажда́етсѧ.

Всего̀ себѐ же́ртвꙋ прине́слъ є҆сѝ хрⷭ҇тꙋ̀, и҆ тогѡ̀ црⷭ҇твїѧ наслѣ́дникъ ꙗ҆ви́лсѧ є҆сѝ и҆ прича́стникъ, и҆ при́снѡ съ ли̑ки ст҃ы́хъ ра́дꙋѧсѧ, ны́нѣ вѣ́чнѡ ца́рствꙋеши, страстоте́рпче геѡ́ргїе.

Вѣ́рою страда̑нїѧ твоѧ̑, геѡ́ргїе, ѡ҆ на́съ чествꙋ́ющихъ хрⷭ҇та̀ молѝ, страстоте́рпче, прилѣ́жнѡ, спасти́сѧ на́мъ бѣ́дъ треволне́нїѧ, и҆ всѣ́хъ страсте́й, и҆ до́брѣ прейтѝ житїѐ, и҆ бжⷭ҇твенное блаже́нство ᲂу҆лꙋчи́ти.

Бг҃оро́диченъ:

Ѡ҆бле́ксѧ и҆зъ тебє̀ цр҃ь въ тѣле́снꙋю багрѧни́цꙋ, про́йде ве́сь красе́нъ и҆зъ ᲂу҆тро́бы твоеѧ̀, и҆ всѧ̑ врагѝ побѣдѝ, и҆ побѣ́дꙋ страда́льцємъ подадѐ, є҆ди́на приснодв҃о мт҃и.

Свѣти́ленъ. Подо́бенъ: Свѣ́те неизмѣ́нный:

Ꙗ҆́кѡ свѣтоза́рное со́лнце, чꙋде́съ лꙋча́ми ѡ҆сїѧ́еши всю̀ тва́рь, пресла́вне геѡ́ргїе страстоте́рпче: твою̀ пра́зднꙋюще па́мѧть про́симъ, ѿ всѧ́кихъ бѣ́дъ и҆зба́витисѧ.

Два́жды.

Сла́ва, и҆ ны́нѣ, бг҃оро́диченъ:

Ми́лѡсти и҆ щедрѡ́ты твоѧ̑, бж҃е, на ны̀, рабы̑ твоѧ̑, низпослѝ, моли́твами пречⷭ҇тыѧ твоеѧ̀ мт҃ре, и҆ сла́внагѡ страстоте́рпца твоегѡ̀ геѡ́ргїѧ, и҆ всѣ̑мъ да́рꙋй вели́кꙋю твою̀ ми́лость.

На хвали́техъ стїхи̑ры на д҃, гла́съ и҃. Поⷣ: Ѽ пресла́внагѡ чꙋдесѐ!

Пресла́вный страстоте́рпче, ꙳ велемꙋ́дренне геѡ́ргїе, ꙳ хрⷭ҇то́вымъ ѻ҆рꙋ́жїемъ ꙳ себѐ воѡрꙋжи́въ мꙋ́жески, ꙳ на сꙋди́щи дерзнове́ннѡ гдⷭ҇а всѣ́хъ бг҃а и҆сповѣ́далъ є҆сѝ, ꙳ и҆ врага̀ побѣди́въ ᲂу҆мертви́лъ є҆сѝ. ꙳ тѣ́мже побѣ́ды вѣнце́мъ ꙳ твою̀ главꙋ̀ вѣнча̀ нбⷭ҇ный цр҃ь ꙳ великодарови́тый.

Си́лою бжⷭ҇твенною ᲂу҆крѣплѧ́емь, геѡ́ргїе, ꙳ и҆́стиннѡ непобѣди́мою, ꙳ го́рдаго врага̀ посрами́лъ є҆сѝ, ꙳ гдⷭ҇а бг҃а предъ мꙋчи́тєли проповѣ́даѧ творца̀ всѣ́хъ, ꙳ за него́же жи́зни не пощади́лъ є҆сѝ, ꙳ и҆ кро́вь твою̀ и҆злїѧ́лъ є҆сѝ, сла́вне. ꙳ тѣ́мже нбⷭ҇ный а҆́гг҃лѡвъ цр҃ь ꙳ тѧ̀ ца́рствовати кꙋ́пнѡ съ собо́ю ꙳ вѣ́чнѡ сподо́билъ є҆́сть.

Преꙋдивле́нъ въ во́зрастѣ мꙋ́жества сы́й, ꙳ тѣлесѐ красото́ю ᲂу҆добре́нъ, ꙳ и҆ дꙋшѝ бжⷭ҇твенною благода́тїю ᲂу҆кра́шенъ, ꙳ и҆ въ побѣ́дахъ пресловꙋ́щь, ꙳ въ словесѣ́хъ и҆ мꙋ́дрости преди́венъ бы́въ, ꙳ ѡ҆ тлѣ́нныхъ че́стѣхъ земны́хъ неради́лъ є҆сѝ: ꙳ нбⷭ҇ныхъ по́честей возжелѣ́въ, ꙳ и҆̀хже полꙋчи́лъ є҆сѝ ᲂу҆ цр҃ѧ̀ црⷭ҇твꙋющагѡ, ꙳ на́съ бл҃же́нне, помина́й.

Сла́ва, гла́съ ѕ҃:

По хрⷭ҇тѣ̀ зако́ннѡ пострада́въ, геѡ́ргїе, и҆ съ земны́мъ вражде́бнымъ мꙋчи́телемъ, неви́димаго низложи́лъ є҆сѝ врага̀, досто́йнѡ прїе́мъ ѿ вѣнцеда́вца сп҃са вѣне́цъ: и҆ ны́нѣ на нб҃сѣ́хъ со а҆́гг҃льскими чи́ны вы́шнѧгѡ свѣтоли́тїѧ наслажда́ешисѧ, трїѷпоста́сномꙋ и҆ пе́рвомꙋ свѣ́тꙋ причаща́ѧсѧ ѻ҆би́льнѡ. тѣ́мже и҆ мы̀, благовѣ́рнїи лю́дїе, любомꙋ́чєничныѧ пѣ̑сни воспое́мъ тѝ: ра́дꙋйсѧ, а҆дама́нте непобѣди́мый дꙋше́ю, и҆ крѣ́пкїй ѻ҆рꙋ́жниче хрⷭ҇то́въ: ра́дꙋйсѧ, ле́сти і҆́дѡльскїѧ потреби́телю, и҆ и҆́стины побо́рниче свѣ́тлый. но моли́сѧ гдⷭ҇ꙋ, и҆ на́мъ житїе́мъ бг҃олюби́вымъ, съ тобо́ю полꙋчи́ти стоѧ́нїе при прⷭ҇то́лѣ вели́чествїѧ є҆гѡ̀.

И҆ ны́нѣ, бг҃оро́диченъ: Бцⷣе, ты̀ є҆сѝ лоза̀ и҆́стиннаѧ:

Славосло́вїе вели́кое. И҆ ѿпꙋ́стъ.

На лїтꙋргі́и: Бл҃жє́нна, пѣ́снь г҃ и҆ ѕ҃. Прокі́менъ, гла́съ з҃: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀: Сті́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀. А҆пⷭ҇лъ къ тїмоѳе́ю, зача́ло сч҃в. А҆ллилꙋ́їа. Пра́ведникъ, ꙗ҆́кѡ фі́нїѯъ, процвѣте́тъ: Є҆ѵⷢ҇лїе ѿ і҆ѡа́нна, зача́ло н҃в. Прича́стенъ: Въ па́мѧть вѣ́чнꙋю:

Комментарии для сайта Cackle