Мѣ́сѧца тогѡ́же въ ѕ҃-й де́нь. И҆́же во ст҃ы́хъ ѻ҆ц҃а̀ на́шегѡ па́ѵла, а҆рхїепі́скопа кѡнстанті́нѧ гра́да, и҆сповѣ́дника:

И҆ прпⷣбнагѡ и҆ бг҃оно́снагѡ ѻ҆ц҃а̀ на́шегѡ и҆гꙋ́мена варлаа́ма хꙋ́тынскагѡ, новгоро́дскагѡ чꙋдотво́рца.

Слꙋ́жба є҆гѡ̀ пи́сана по се́й слꙋ́жбѣ.

На Гдⷭ҇и, воззва́хъ, стїхи̑ры на ѕ҃, гла́съ д҃. Поⷣ: Да́лъ є҆сѝ зна́менїе:

Па́ѵелъ бг҃оглаго́ливый ꙳ тѧ̀ подо́бника рꙋкополага́етъ тезоиме́ннѡ зове́ма, ꙳ и҆ нра́вы ᲂу҆краша́ема тогѡ̀, всебл҃же́нне, ꙳ и҆ бг҃оче́стїемъ, и҆ мꙋ́жествомъ дꙋшѝ, ꙳ и҆ терпѣ́нїемъ ѡ҆бстоѧ́нїй, ꙳ и҆ ре́вностїю распала́ема, ꙳ правосла́вїѧ побо́рниче: ꙳ є҆мꙋ́же и҆ ны́нѣ спрославлѧ́ешисѧ ꙳ въ нбⷭ҇ныхъ ѻ҆би́телехъ.

А҆́рїа безбо́жнаго ꙳ и҆ ѕлочести́ваго македо́нїа, ꙳ тве́рдыми догма́тѡвъ твои́хъ жи́лами ᲂу҆дави́лъ є҆сѝ: ꙳ пра́вымъ же сло́вомъ ᲂу҆че́нїѧ ꙳ правосла́вныхъ мно́жєства, ꙳ свѧщенномч҃ниче ѻ҆́ч҃е, ᲂу҆тверди́лъ є҆сѝ. ꙳ тѣ́мъ твоѐ пресвѣ́тлое и҆сповѣ́данїе прїе́мъ, ꙳ црⷭ҇твїѧ показа̀ ѻ҆́бщника ꙳ чл҃вѣколю́бецъ.

Тече́нїе соверши́вша тѧ̀ ꙳ и҆ вѣ́рꙋ соблю́дша, ꙳ і҆ера́рше бл҃же́нне, ꙳ хрⷭ҇то́съ вѣнча̀ ꙳ свѣ́тлымъ вѣнце́мъ пра́вды, ꙳ и҆ ᲂу҆красѝ твоѐ и҆сповѣ́данїе, досточꙋ́дне: ꙳ тѣ́мъ нбⷭ҇ное наслѣ́дїе прїе́мъ, ꙳ сп҃сꙋ моли́сѧ ꙳ ѡ҆ воспѣва́ющихъ тѧ̀.

Па́ѵле всебл҃же́нне, ꙳ и҆сповѣ́данїѧ тезоимени́те, ꙳ те́плѣ благохва́лѧщихъ тѧ̀ предста́тель бы́въ, ꙳ ѿ всѧ́кїѧ бѣды̀, всѧ́кагѡ грѣха̀, и҆ бꙋ́ри страсте́й, и҆ мꙋчи́тельства, ѻ҆́ч҃е, и҆зба́ви, ꙳ ꙗ҆́кѡ мч҃никъ непобори́мь, ꙳ и҆ і҆ера́рхъ бл҃гопрїѧ́тенъ: ꙳ дерзнове́нїе бо стѧжа̀ ко хрⷭ҇тꙋ̀ бг҃ꙋ на́шемꙋ.

Сла́ва, гла́съ а҃. Ге́рманово:

А҆рхїере́йскою ѻ҆де́ждею ѡ҆дѣ́ѧвсѧ, прпⷣбне ѻ҆́ч҃е, тезоимени́томꙋ па́ѵлꙋ поревнова́лъ є҆сѝ: гонє́нїѧ претерпѣ́въ и҆ ѡ҆бстоѧ̑нїѧ, въ свои́хъ при́сныхъ болѣ́знехъ, вредослѡ́внаѧ мнѣ̑нїѧ а҆́рїєва посрами́лъ є҆сѝ: и҆ пострада́въ бо за безнача́льнꙋю и҆ є҆диносꙋ́щнꙋю трⷪ҇цꙋ, ѕлочести́ваго и҆ дꙋхобо́рца низложи́лъ є҆сѝ македо́нїа, и҆ правосла́внꙋю всѣ̑мъ ᲂу҆ѧсни́въ вѣ́рꙋ, съ невеще́ственными водворѧ́ешисѧ а҆́гг҃лы. съ ни́миже и҆ ны́нѣ молѝ спасти́сѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

Подо́бенъ: Всехва́льнїи мч҃ницы:

Заколе́нїе твоѐ непра́ведное, хрⷭ҇тѐ, ꙳ дв҃а зрѧ́щи, ꙳ пла́чꙋщи, вопїѧ́ше тѝ: ꙳ ча́до сладча́йшее, ꙳ ка́кѡ безъ пра́вды ᲂу҆мира́еши; ꙳ ка́кѡ на дре́вѣ ви́сиши, ꙳ и҆́же всю̀ зе́млю повѣ́шей на вода́хъ; ꙳ не ѡ҆ста́ви менѐ є҆ди́нꙋ, бл҃годѣ́телю многоми́лостиве, ꙳ мт҃рь и҆ рабꙋ̀ твою̀, молю́сѧ.

На стїхо́внѣ во ѻ҆ктѡ́ихѣ. Та́же,

Сті́хъ: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.

Стїхи́ра, гла́съ а҃:

Прпⷣбне ѻ҆́ч҃е па́ѵле, добродѣ́телїю ѡ҆дѣ́ѧвсѧ ѿ хрⷭ҇та̀ бг҃а, всѧ́кїй де́мѡнскїй и҆ ва́рварскїй до́блественнѣ побѣди́лъ є҆сѝ по́лкъ, вѣ́рою ᲂу҆крѣплѧ́емь, на ка́мени ᲂу҆тверди́лъ є҆сѝ твоѐ ста́до, ѿ всѧ́кїѧ є҆́реси ненавѣ́тно. тѣ́мъ со а҆́гг҃лы ликовствꙋ́ѧ, сп҃сꙋ моли́сѧ, въ ми́рѣ сохрани́тисѧ дꙋша́мъ на́шымъ.

Сла́ва, гла́съ в҃. Вѷзанті́ево:

По́стнꙋю пꙋчи́нꙋ преплы́въ воздержа́нїѧ вѣ́тромъ, страсте́й бꙋ́ри и҆збѣ́глъ є҆сѝ, прпⷣбне. тѣ́мъ наименова́нїемъ тезоимени́тъ бы́въ бжⷭ҇твенномꙋ па́ѵлꙋ, гонє́нїѧ претерпѣ́лъ є҆сѝ и҆ ѡ҆бстоѧ̑нїѧ, ѡ҆ѕлоблѧ́емь въ є҆реті́чествꙋющихъ ѧ҆зыкобо́лїихъ. тѣ́мъ а҆́рїєва низложи́лъ є҆сѝ мнѣ̑нїѧ, и҆ несто́рїєвы є҆́рєси побѣди́въ, цр҃кве хрⷭ҇то́вы ꙗ҆ви́лсѧ є҆сѝ ревни́тель: того̀ молѝ, і҆ера́рше блаже́нне, спасти́сѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва.

Є҆гда̀ нескве́рнаѧ а҆́гница ви́дѣ своего̀ а҆́гнца на заколе́нїе ꙗ҆́кѡ чл҃вѣ́ка во́лею влеко́ма, пла́чꙋщи гл҃го́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀. что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бл҃гость, чл҃вѣколю́бче.

Тропа́рь, гла́съ г҃:

Бжⷭ҇твенныѧ вѣ́ры и҆сповѣ́данїемъ, дрꙋга́го па́ѵла тѧ̀ цр҃ковь ревни́телѧ во свѧще́нницѣхъ показа̀: свозопїе́тъ тѝ и҆ а҆́вель ко гдⷭ҇ꙋ, и҆ заха́рїина кро́вь пра́веднаѧ. ѻ҆́ч҃е прпⷣбне, хрⷭ҇та̀ бг҃а молѝ, дарова́тисѧ на́мъ ве́лїей ми́лости.

На ᲂу҆́трени, ѻ҆́ба канѡ́на ѻ҆ктѡ́иха, и҆ ст҃а́гѡ канѡ́нъ на ѕ҃,

є҆гѡ́же краегране́сїе: Тайноводи́телѧ па́ѵла пою̀ премꙋ́дрѡ.

Ѳеофа́ново.

Гла́съ д҃. Пѣ́снь а҃. І҆рмо́съ:

Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Вѣ́ры ᲂу҆твержде́нїе, цр҃кве ᲂу҆чи́телѧ, и҆ столпа̀ непоколеби́ма и҆сповѣ́данїѧ тѧ̀, и҆ многосвѣ́тлаго свѣти́льника бл҃года́ти, и҆ ᲂу҆ста̀ ѻ҆гнедохнове́нна, па́ѵле, проповѣ́дꙋемъ.

Па́ѵелъ велича́йшїй, со́лнце вселе́нныѧ, требл҃же́нне. предлага́етъ тѧ̀ па́ѵла втора́го, ꙗ҆́кѡ ѻ҆́гнь попалѧ́юща крѣ́пкѡ є҆́рєси, и҆ сѣки́рꙋ, сѣкꙋ́ща безбо́жїе.

Зако́ннѡ подвиза́лсѧ є҆сѝ предбѣ́дствꙋѧ, бг҃оглаго́ливе, бжⷭ҇твенномꙋ проповѣ́данїю, ꙗ҆́кѡ і҆ера́рхъ вѣ́ренъ, и҆ ᲂу҆дави́лъ є҆сѝ жи́лами твои́хъ догма́тѡвъ, ꙗ҆́кѡ ѕвѣ́рѧ, а҆́рїа сꙋемꙋ́дреннаго.

Бг҃оро́диченъ:

Марі́ю пречⷭ҇тꙋю, прїиди́те, воспои́мъ всѝ, є҆ди́нꙋ ᲂу҆краси́вшꙋю человѣ́чество, и҆ ро́ждшꙋю бг҃а воплоще́ннаго, дв҃ꙋ же пребы́вшꙋ неврежде́нꙋ.

Пѣ́снь г҃. І҆рмо́съ:

Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би.

Сыноположи́всѧ бл҃года́тїю бжⷭ҇твенною, є҆стество́мъ сн҃а є҆диноро́днагѡ въ тва́рь не сведѐ, ѻ҆ц҃ꙋ̀ собезнача́льна, па́ѵле, па́ѵла догма́тѡмъ бг҃оно́снагѡ послѣ́дꙋѧ.

Оу҆сты̀ и҆ се́рдцемъ и҆ ѧ҆зы́комъ, мꙋ́дрость и҆ си́лꙋ бж҃їю, сло́во ѵ҆поста́сное, ты̀ хрⷭ҇та̀ проповѣ́далъ є҆сѝ, па́ѵле бг҃омꙋ́дре прпⷣбне, ѕлочести́ваго ѡ҆бличи́въ а҆́рїа.

Пресꙋ́щественныѧ вла́сти, дх҃а ст҃а́го бж҃їѧ, и҆́мже бг҃отвори́мсѧ, сꙋдо́мъ пра́веднымъ, всемꙋ́дре, є҆стество́мъ бг҃а проповѣ́далъ є҆сѝ, и҆ вседѣ́тельна и҆ всеси́льна.

Бг҃оро́диченъ:

Безнача́льна роди́телѧ сло́во, вы́шше всѧ́кагѡ нача́ла, нача́ло ны́нѣ воплоща́емо и҆зъ тебє̀, чⷭ҇таѧ, прїѧ́тъ, и҆ подъ лѣ́томъ бы́сть, лѣ́тъ всѣ́хъ превы́шши.

Сѣда́ленъ, гла́съ г҃:

До́гмꙋ бжⷭ҇твеннꙋю придержа́въ, глаго́лъ безбо́жный и҆зве́рглъ є҆сѝ, па́ѵле бг҃омꙋ́дре, посрами́въ а҆́рїа. ѻ҆ц҃ꙋ́ бо сн҃а є҆диносꙋ́щна проповѣ́далъ є҆сѝ, вѣ̑рныѧ ᲂу҆тверди́въ. ѻ҆́ч҃е прпⷣбне, хрⷭ҇та̀ бг҃а молѝ, дарова́тисѧ на́мъ ве́лїей ми́лости.

Сла́ва, гла́съ и҃. Подо́бенъ: Премꙋ́дрости:

Ꙗ҆́кѡ сосꙋ́да сы́й и҆збра́ннагѡ тезоимени́тъ, ѻ҆́ч҃е, и҆ подража́тель, бѣды̑ претерпѣ́лъ є҆сѝ за вѣ́рꙋ и҆ гонє́нїѧ, и҆ ꙗ҆́кѡ то́й въ ри́мъ прїи́де, прпⷣбне, всю́дꙋ проповѣ́дꙋѧ трⷪ҇цы равноче́стное: тѣ́мъ и҆ тече́нїе во а҆рме́нїи сконча́въ, досто́йнѡ прїѧ́лъ є҆сѝ ѿ гдⷭ҇а вѣне́цъ, посрами́въ македо́нїа и҆ безбо́жнаго а҆́рїа. тѣ́мъ молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.

И҆ ны́нѣ, бг҃оро́диченъ:

Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бжⷭ҇тва̀, и҆ ꙗ҆́кѡ млⷣнца дои́ши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.

Крⷭ҇тобг҃оро́диченъ:

А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве гдⷭ҇и, ми́лости бе́здно, и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе, вѣ́рою пою́щымъ бжⷭ҇твєнныѧ стрⷭ҇ти твоѧ̑.

Пѣ́снь д҃. І҆рмо́съ:

Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.

Че́сть многоцѣ́ннꙋю твоемꙋ̀ верхꙋ̀ и҆сповѣ́данїѧ вѣне́цъ, ꙗ҆́кѡ побѣдоно́сцꙋ, живоно́сною десни́цею зижди́тель возложѝ, па́ѵле бг҃оѧвле́нне блаже́нне.

Ꙗ҆́коже предподвиза́всѧ благочести́выхъ ра́ди, всемꙋ́дре, догма́тѡвъ, прїѧ́лъ є҆сѝ воздаѧ̑нїѧ: ны́нѣ дре́ва жи́зни полꙋчи́въ, бл҃же́нне, па́ѵле бг҃оѧвле́нне чꙋ́дне.

На нбⷭ҇нѣй землѝ ликоходи́ти, и҆дѣ́же но́ги кро́ткихъ ликовствꙋ́ютъ, сподо́билсѧ є҆сѝ, ꙗ҆́кѡ свѣ́телъ подви́жникъ, и҆ и҆́стины, всече́стне па́ѵле, бы́въ побо́рникъ.

Бг҃оро́диченъ:

Є҆диносꙋ́ществомъ, ѻ҆́ч҃имъ, сп҃се, ꙗ҆́кѡ сн҃ъ ви́димь, и҆зъ дв҃ы є҆диносꙋ́щенъ на́мъ воплоти́всѧ, бы́лъ є҆сѝ, спастѝ восхотѣ́въ человѣ́чество.

Пѣ́снь є҃. І҆рмо́съ:

Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ́мъ воспѣва́ющымъ тѧ̀ ми́ръ подава́ющаѧ.

Па́жить є҆́реси и҆ гни́лость ᲂу҆ста́вилъ є҆сѝ, приложи́въ и҆зѧ́щнѣйшее, бг҃омꙋ́дре, врачева́нїе, ѻ҆́ч҃е, и҆сповѣ́данїе твоѐ, и҆ твои́хъ догма́тѡвъ свѣ́тлое, ᲂу҆ма́ же чистѣ́йшее, и҆ ре́вность бжⷭ҇твеннꙋю.

Бога́тнѡ и҆злїѧ́сѧ ст҃а́гѡ дх҃а благода́ть твои̑мъ ᲂу҆стна́мъ, всеблаже́нне, побо́рника и҆́стиннѡ правосла́вїѧ крѣ́пка ѡ҆брѣ́тши тѧ̀, преизѧ́щна вѣ́рныхъ: тѣ́мъ просвѣти́лъ є҆сѝ бжⷭ҇твєнныѧ собо́ры.

А҆́рїево безбо́жное, и҆ македо́нїево вредосло́вїе, па́ѵле, бг҃одꙋхнове́нныхъ твои́хъ догма́тѡмъ и҆ ᲂу҆че́нїй и҆спращева́лъ є҆сѝ плетє́нїѧ, ꙗ҆́кѡ дв҃дъ и҆ноплеме́нника, пре́жде сїѧ̑ ᲂу҆дави́въ, и҆ тве́рдѡ низве́рглъ є҆сѝ.

Бг҃оро́диченъ:

Сы́й превѣ́чный, ны́нѣ подъ лѣ́ты бы́сть, пло́ть прїе́мъ, дв҃о, ѡ҆дꙋшевле́нꙋ и҆ ᲂу҆́мнꙋ, сло́во безнача́льное, и҆зъ тебє̀, неискꙋсобра́чнаѧ чⷭ҇таѧ, всѣ̑мъ пою́щымъ тѧ̀ ми́ръ да́рꙋѧ.

Пѣ́снь ѕ҃. І҆рмо́съ:

Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зъ глꙋбины̀ возведѝ живо́тъ мо́й, многоми́лостиве.

Глаго́лавый на высотꙋ̀ вредосло́вїе, и҆ сн҃а, и҆ сло́ва бж҃їѧ а҆́рїй въ тва́рь низведы́й, ѿ тебє̀ ѻ҆каѧ́нный, бг҃омꙋ́дре, ѡ҆сꙋди́сѧ.

Безꙋ́мный и҆ несмы́сленный и҆ безбо́жный ѿве́ргъ, ѻ҆́ч҃е, македо́нїй бжⷭ҇твеннаго дх҃а, твои́мъ крѣ́пкимъ противле́нїемъ, бг҃оѧвле́нне, низве́ржесѧ.

Оу҆мерщвлѧ́етсѧ плѣ́жꙋщїй ѕмі́й живи́тельными твои́ми словєсы̀, приложи́вый є҆ресе́й по́лкъ, ст҃и́телю бж҃їй всебл҃же́нне, бг҃оглаго́льниче свѧще́ннѣйше.

Бг҃оро́диченъ:

Пое́мъ, дв҃о бг҃ома́ти, па́че є҆стества̀ ржⷭ҇тво̀, и҆ твою̀ нескве́рнꙋю чистотꙋ̀: и҆́бо въ тебѣ̀ ди́внѡ стече́сѧ дѣ́вство и҆ ржⷭ҇тво̀ нетлѣ́нно.

Конда́къ, гла́съ в҃. Подо́бенъ: Вы́шнихъ и҆щѧ̀:

Ѡ҆блиста́вый на землѝ, ꙗ҆́кѡ ѕвѣзда̀ небосвѣ́тлаѧ, каѳолі́ческꙋю просвѣща́еши цр҃ковь ны́нѣ, ѡ҆ не́йже и҆ страда́льчествовалъ є҆сѝ, дꙋ́шꙋ твою̀, па́ѵле, предложи́въ: и҆ ꙗ҆́коже заха́рїина и҆ а҆́велева, ꙗ҆́снѡ вопїе́тъ твоѧ̀ кро́вь ко гдⷭ҇ꙋ.

І҆́косъ:

Свы́ше и҆мѣ́лъ є҆сѝ, па́ѵле, зва́нїе, рождество́ же до́лѣ ѿ землѝ, ꙗ҆́кѡ са́дъ красе́нъ и҆спо́лнь сꙋ́щи, ꙗ҆́кѡ ѿ раѧ́ бо процвѣ́лъ є҆сѝ посто́мъ, всѐ благово́нствꙋѧ ѿ вонѝ мно́гихъ твои́хъ трꙋда̀ по́двигѡвъ, по́тѡвъ, заточе́нїѧ, гла́да, жа́жды и҆ всѧ́кїѧ тѣсноты̀: въ ни́хже проше́лъ є҆сѝ благоискꙋ́снѡ, и҆ вѣнце́мъ побѣ́ды ᲂу҆краша́емь, вопїе́тъ бо твоѧ̀ кро́вь ко гдⷭ҇ꙋ.

Пѣ́снь з҃. І҆рмо́съ:

Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.

Преше́лъ є҆сѝ, бг҃омꙋ́дре, къ нбⷭ҇нымъ, па́ѵле, ски́нїамъ, и҆ прибли́живсѧ бг҃ꙋ, прича́стїемъ ѡ҆божа́емь, бжⷭ҇твенъ бы́лъ є҆сѝ, поѧ̀, прпⷣбне: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Воꙋмлѧ́еми твои́ми словєсы̀, ᲂу҆́чимсѧ, па́ѵле всехва́льне, ꙗ҆́кѡ въ со́лнцѣхъ тре́хъ нераздѣ́льное, несѣко́мо почита́ти бжⷭ҇тво̀, є҆мꙋ́же и҆ пое́мъ: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Ꙗ҆́кѡ всесвѧще́нное бжⷭ҇твенное и҆ бг҃оꙋго́дное и҆сповѣ́данїе твоѐ: ꙗ҆́кѡ зла́то бо ѡ҆чи́стивсѧ, бг҃ꙋ прине́слсѧ є҆сѝ же́ртва благопрїѧ́тна, веселѧ́сѧ, прпⷣбне, подража́нїемъ стрⷭ҇те́й сп҃са на́шегѡ.

Бг҃оро́диченъ:

Всѣ̑мъ хода́таица человѣ́кѡмъ є҆ди́на ꙗ҆ви́ласѧ є҆сѝ бжⷭ҇твеннагѡ и҆збавле́нїѧ, и҆зба́вителѧ всѣ́хъ ро́ждши, всенепоро́чнаѧ. є҆мꙋ́же всѝ пое́мъ: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Пѣ́снь и҃. І҆рмо́съ:

Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Текꙋ́тъ и҆стѡ́чницы твои́хъ догма́тѡвъ, и҆ всю̀ цр҃ковь напаѧ́ютъ: кро́вїю же честно́ю твое́ю, ѻ҆́ч҃е, всѧ̑ ѡ҆свѧти́лъ є҆сѝ, правосла́вною вѣ́рою тебѣ̀ послѣ́довавшыѧ, гдⷭ҇а по́йте, вопїю́щыѧ, и҆ превозноси́те є҆го̀ во всѧ̑ вѣ́ки.

Приста́нищꙋ ти́хомꙋ ны́нѣ приста́лъ є҆сѝ, житє́йскаѧ треволнє́нїѧ ѿри́нꙋвъ: и҆мѣ́лъ бо є҆сѝ направлѧ́юща всѐ ше́ствїе твоѐ корми́телѧ гдⷭ҇а, па́ѵле всехва́льне, ма́нїемъ всѧ̑ творѧ́щаго, є҆го́же превозно́симъ во всѧ̑ вѣ́ки.

Свѣ́тъ трисїѧ́ненъ пребжⷭ҇твенныѧ трⷪ҇цы въ тѧ̀ всели́всѧ, свѣ́тъ тѧ̀ вторы́й показа̀, просвѣща́юща собо́ръ правосла́вныхъ, є҆реті́ческїй же по́лкъ, ѻ҆́ч҃е, ѡ҆мрача́юща, и҆ гдⷭ҇а по́йте, вопїю́ща, и҆ превозноси́те є҆го̀ во всѧ̑ вѣ́ки.

Бг҃оро́диченъ:

Глаго́лѡмъ прⷪ҇ро́чєскимъ послѣ́дꙋюще, дв҃о, тѧ̀ бцⷣꙋ возвѣща́емъ: родила́ бо є҆сѝ ѻ҆троча̀ всѣ́хъ дре́внѣйша, є҆мманꙋ́илъ нарица́ема, є҆мꙋ́же ны́нѣ зове́мъ: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Пѣ́снь ѳ҃. І҆рмо́съ:

Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Всего̀ менѐ сама́го приношꙋ̀, бг҃оглаго́ливе, бжⷭ҇твенномꙋ покро́вꙋ твоемꙋ̀, ꙗ҆́кѡ свѧщенномꙋ́ченикъ вла́сть рѣши́ти прегрѣшє́нїѧ ѿ хрⷭ҇та̀ прїе́мъ, мои́хъ согрѣше́нїй плени̑цы растерза́въ, спаси́ мѧ моли́твами твои́ми, и҆ бжⷭ҇твеннымъ свѣ́томъ просвѣтѝ.

Но́въ ꙗ҆ви́лсѧ є҆сѝ ре́вностїю разжига́емь, па́ѵле преизѧ́щне, и҆́же въ раѝ ны́нѣ неизречє́ннаѧ словеса̀, ѻ҆́ч҃е, ᲂу҆слы́шалъ є҆сѝ: ꙗ҆́кѡ ѻ҆́бщникъ бо нра́вѡвъ, нарече́нїѧ бо сопричасти́лсѧ є҆сѝ, и҆ вѣне́цъ прїе́мъ црⷭ҇твїѧ хрⷭ҇то́ва благолѣ́пнѣйшїй.

Ꙗ҆́кѡ нѣ́кїй хра́мъ ꙗ҆ви́лсѧ є҆сѝ ѡ҆глаго́льникъ всѧ́кїѧ є҆́реси, правосла́вїѧ же, свѧщенномꙋ́чениче, бжⷭ҇твенный побо́рникъ, лꙋча́ми бл҃года́ти просвѣще́нъ ꙗ҆́вѣ, и҆ свѣ́томъ, па́ѵле всесла́вне, несозда́нныѧ трⷪ҇цы ѡ҆блиста́емь.

Бг҃оро́диченъ:

Пло́тїю и҆зъ тебє̀ сло́во, всенепоро́чнаѧ, ѡ҆дѣ́ѧвсѧ, воплоти́всѧ же, поживѐ въ мі́рѣ, ꙗ҆́кѡ бл҃гоꙋтро́бенъ, пребы́въ не хꙋ́ждше, ꙗ҆́кѡ пре́жде безтѣле́сенъ, и҆ дре́вле всѧ̑ мꙋ́чащаго бжⷭ҇твенною си́лою низложѝ.

Свѣти́ленъ. Подо́бенъ: Дх҃омъ во ст҃и́лищи:

Ре́вностїю распалѧ́емь ѿ те́плагѡ се́рдца, дх҃о́вный побо́рникъ бл҃года́ти ꙗ҆ви́лсѧ є҆сѝ, собо́рище є҆реті́ческое мече́мъ разсѣ́клъ слове́съ твои́хъ, ст҃и́телю: тече́нїе же соверши́въ, равностоѧ́тель бы́лъ є҆сѝ мч҃ническомꙋ мно́жествꙋ.

Бг҃оро́диченъ:

Неизрече́ннагѡ чревоноше́нїѧ была̀ є҆сѝ пренепоро́чнаѧ невѣ́ста, и҆ ꙗ҆́кѡ сꙋ́щи честнѣ́йшїй хра́мъ, бцⷣе: свѣ́тъ бо превѣ́чный въ тѧ̀ всели́сѧ, и҆ родила̀ є҆сѝ бг҃а сло́ва: пою́ще твоѐ ржⷭ҇тво̀, велича́емъ досто́йнѡ, всенепоро́чнаѧ ѻ҆трокови́це.

На стїхо́внѣ во ѻ҆ктѡ́ихѣ. Сла́ва, гла́съ з҃:

Вни́кнꙋлъ є҆сѝ во глꙋбины̑ дх҃а, и҆ ꙗ҆́кѡ безпло́тенъ на землѝ пожи́въ, и҆ ѿтꙋ́дꙋ поче́рплъ бога́тство бж҃е́ственнагѡ зна́нїѧ, правосла́вїемъ человѣ́ки ѡ҆богати́лъ є҆сѝ, ᲂу҆чє́нїи твои́ми, прпⷣбне ѻ҆́ч҃е.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ:

Ви́дѧщи на дре́вѣ просте́рта а҆́гнца, а҆́гница, и҆ дв҃а посредѣ̀ двою̀ разбѡ́йникꙋ, ᲂу҆вы̀ мнѣ̀, вопїѧ́ше, сла́дкое ча́до. что̀ сѐ стра́нное и҆ пресла́вное та́инство; ка́кѡ тѧ̀ беззако́нный собо́ръ на крⷭ҇тѣ̀ пригвоздѝ и҆ же́лчїю напоѝ, ма́нною напита́вшаго человѣ́ки;

На лїтꙋргі́и, блажє́нна ѻ҆ктѡ́иха, на д҃: и҆ ѿ канѡ́на ст҃а́гѡ пѣ́снь г҃-ѧ, на д҃. Прокі́менъ гла́съ з҃: Восхва́лѧтсѧ прпⷣбнїи: Сті́хъ: Воспо́йте гдⷭ҇еви: А҆пⷭ҇лъ, къ є҆вре́ємъ, зача́ло ти҃і, ѿ полꙋ̀: Всѧ́къ первосвѧще́нникъ: А҆ллилꙋ́їа, гла́съ в҃: Свѧще́нницы твоѝ: Є҆ѵⷢ҇лїе лꙋкѝ, зача́ло ѯ҃д. Прича́стенъ: Въ па́мѧть вѣ́чнꙋю:

Слꙋ́жба прпⷣбнагѡ ѻ҆ц҃а̀ на́шегѡ варлаа́ма, новгоро́дскагѡ чꙋдотво́рца, и҆гꙋ́мена хꙋ́тынѧ монастырѧ̀.

Ве́чера, на ма́лѣй вече́рни, стїхи̑ры на д҃. Самогла́сны, гла́съ ѕ҃:

Вседержи́тельною десни́цею ᲂу҆крѣплѧ́емь, прпⷣбне ѻ҆́ч҃е на́шъ варлаа́ме, воздержа́нїемъ пи́щꙋ бжⷭ҇твеннꙋю позна́лъ є҆сѝ: и҆ непреста́нною моли́твою и҆ нощны́мъ стоѧ́нїемъ, а҆нтѡ́нїа бл҃же́ннагѡ снаслѣ́дникъ бы́ти сподо́билсѧ є҆сѝ: сле́зными же потѡ́ки всѧ̑ дє́мѡнскаѧ ѡ҆полчє́нїѧ потопи́лъ є҆сѝ. тѣ́мже и҆ хрⷭ҇то́съ тѧ̀ дарова́ньми чꙋде́съ просла́ви, є҆го́же возжелѣ́лъ є҆сѝ, и҆ є҆гѡ́же ра́ди тѧготꙋ̀ дневнꙋ́ю поне́слъ є҆сѝ, молѝ спасти́сѧ дꙋша́мъ на́шымъ.

Прїиди́те, всѝ концы̀ земні́и, ѱалмы̑ и҆ пѣ́сньми, свѧще́нное и҆ честно́е прпⷣбнагѡ торжество̀ варлаа́ма, дне́сь благоче́стнѡ восхва́лимъ: а҆́ще бо и҆ послѣдѝ возсїѧ̀, но дре́внихъ че́сти сподо́бисѧ, и҆ мо́литсѧ хрⷭ҇тꙋ̀, спасти́сѧ дꙋша́мъ на́шымъ.

Страстна̑ѧ взыгра̑нїѧ воздержа́нїемъ, ѻ҆́ч҃е прпⷣбне варлаа́ме, и҆зсꙋши́лъ є҆сѝ, и҆ ѿ сегѡ̀ до́мъ и҆ жили́ще дх҃а ст҃а́гѡ показа́лсѧ є҆сѝ, и҆сцѣлє́нїѧ вѣ́рою приходѧ́щымъ къ тебѣ̀ подае́ши, ꙗ҆́коже вторы́й и҆лїа̀ чꙋдєсы̀ показа́лсѧ є҆сѝ; ѻ҆́нъ бо въ животѣ̀ сы́й, воздꙋ̑хи водото́чными чꙋдодѣ́йствоваше, ты́ же и҆ по сме́рти чꙋдєсы̀ ᲂу҆дивлѧ́еши: не зерца́ломъ бо и҆ гада́ньми, но ꙗ҆вле́ннѣ и҆ ꙗ҆́снѣ зри́ши ст҃ꙋ́ю трⷪ҇цꙋ, є҆́йже моли́сѧ, спасти́сѧ дꙋша́мъ на́шымъ.

Сла́ва, гла́съ и҃:

Прїиди́те, мона́хѡвъ мно́жєства дне́сь, ѱалѡ́мскаѧ пѣ̑нїѧ, а҆́ки цвѣ́ты дꙋхѡ́вныѧ, принесе́мъ, ꙗ҆́кѡ вои́стиннꙋ мона́шескомꙋ ᲂу҆добре́нїю, и҆ прпⷣбнымъ сожи́телю, хва́лѧще, си́це рце́мъ: ра́дꙋйсѧ, свѣти́льниче многосвѣ́тлый, возходѧ̀ ко хрⷭ҇тꙋ̀ мона́хѡвъ мно́жєства: ра́дꙋйсѧ, всеѧ̀ рѡссі́и похвала̀ и҆ ᲂу҆твержде́нїе, и҆ всѣ́хъ вѣ́рныхъ благоꙋти́шное приста́нище, и҆ и҆сцѣле́нїе болѧ́щымъ во грѣсѣ́хъ, на бжⷭ҇твенное тѣ́хъ возвыша́ѧ раче́нїе. тѣ́мъ пречестнꙋ́ю и҆ свѧтꙋ́ю твою̀, и҆ а҆́гг҃лѡмъ говѣ́йнꙋю ѡ҆бстоѧ́ще ра́кꙋ, любе́знѡ ѡ҆блобыза́емъ, прпⷣбне ѻ҆́ч҃е на́шъ варлаа́ме, и҆ бжⷭ҇твеннагѡ чл҃вѣколю́бїѧ про́симъ полꙋчи́ти, твои́ми къ бг҃ꙋ моли́твами, и҆ мі́рꙋ ми́ръ дарова́ти, и҆ дꙋша́мъ на́шымъ ве́лїю ми́лость.

И҆ ны́нѣ, бг҃оро́диченъ:

На стїхо́внѣ стїхи̑ры самогла́сны, гла́съ є҃.

Вѣ́рою и҆ любо́вїю соше́дшесѧ празднолю́бцы, ѱалмы̑ и҆ пѣ́сньми восхва́лимъ дне́сь нбⷭ҇наго человѣ́ка и҆ земна́го а҆́гг҃ла. къ немꙋ́же возопїе́мъ: ѽ всебл҃же́нне и҆ преподо́бне, по́стникѡвъ похвала̀, ѡ҆ на́съ моли́сѧ ко хрⷭ҇тꙋ̀, варлаа́ме ѻ҆́ч҃е на́шъ, поми́ловатисѧ дꙋша́мъ на́шымъ.

Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.

Честны́й и҆ свѣтоно́сный, прпⷣбне, тво́й пра́здникъ, и҆спо́лненъ ра́дости и҆ весе́лїѧ дꙋхо́внагѡ. тѣ́мже соше́дшесѧ мона́хѡвъ мно́жєства, и҆ хрⷭ҇тоимени́тїи лю́дїе, любо́вїю восхвалѧ́юще блажи́мъ бжⷭ҇твєннаѧ дѣѧ̑нїѧ твоѧ̑: ꙗ҆́кѡ бо крі́нъ во ᲂу҆до́ли процвѣ́лъ є҆сѝ, и҆ благоꙋха́еши дꙋшє́внаѧ на̑ша чꙋ̑вства, варлаа́ме ѻ҆́ч҃е на́шъ, молѝ спасти́сѧ дꙋша́мъ на́шымъ.

Сті́хъ: Блаже́нъ мꙋ́жъ, боѧ́йсѧ гдⷭ҇а:

Ꙗ҆́кѡ Оу҆ѧзви́всѧ жела́нїемъ бжⷭ҇твеннымъ, прпⷣбне ѻ҆́ч҃е на́шъ варлаа́ме, взе́мъ бо крⷭ҇тъ тво́й послѣ́довалъ є҆сѝ влⷣцѣ хрⷭ҇тꙋ̀. тогда̀ всѧ̑ плотска̑ѧ мꙋдрова̑нїѧ ᲂу҆мертви́въ, и҆ наслѣ́довалъ є҆сѝ вои́стиннꙋ кро́ткихъ зе́млю, прича́стїемъ ѡ҆божа́емь, и҆ неизрече́ннагѡ ѻ҆́нагѡ весе́лїѧ наслажда́ѧсѧ, помина́й на́съ, творѧ́щихъ всесвѧтꙋ́ю и҆ пречестнꙋ́ю па́мѧть твою̀.

Сла́ва, гла́съ и҃:

Прпⷣбне и҆ бг҃обл҃же́нне ѻ҆́ч҃е варлаа́ме, вои́стиннꙋ сподо́билсѧ є҆сѝ бжⷭ҇твенныѧ жи́зни: посто́мъ бо и҆ бдѣ́нїемъ тѣ́ло твоѐ и҆знꙋрѧ́ѧ, ѻ҆́бразъ бы́лъ є҆сѝ мона́хѡвъ. а҆́ще бо и҆ тѣле́сный ꙗ҆зы́къ ᲂу҆молчѐ, но чꙋдеса̀ свидѣ́тельствꙋютъ: вели́кїй же но́вградъ проповѣ́дꙋѧ, хва́литсѧ. и҆мѣ́ю бо, речѐ, въ себѣ̀ неистощи́мое сокро́вище, честнꙋ́ю ра́кꙋ моще́й твои́хъ, и҆ чꙋдеса̀ быва́ємаѧ, и҆ прославлѧ́етъ просла́вльшаго тѧ̀ гдⷭ҇а: є҆мꙋ́же моли́сѧ дарова́ти вселе́ннѣй ми́ръ и҆ ве́лїю ми́лость.

И҆ ны́нѣ, бг҃оро́диченъ. Тропа́рь, гла́съ г҃:

И҆́же на землѝ лега́нїемъ, поще́нїемъ же и҆ бдѣ́нїемъ тѣ́ло твоѐ и҆знꙋрѧ́ѧ, прпⷣбне, всѧ̑ плотска̑ѧ мꙋдрова̑нїѧ ᲂу҆мертви́лъ є҆сѝ: и҆ и҆сцѣле́нїй стрꙋѧ̀ незави́стнаѧ ꙗ҆ви́лсѧ є҆сѝ вѣ́рою притека́ющымъ къ ра́цѣ моще́й твои́хъ, варлаа́ме ѻ҆́ч҃е на́шъ, молѝ хрⷭ҇та̀ бг҃а спасти́сѧ дꙋша́мъ на́шымъ.

Сла́ва, и҆ ны́нѣ, бг҃оро́диченъ воскрⷭ҇нъ.

На вели́цѣй вече́рни, Блаже́нъ мꙋ́жъ:

На Гдⷭ҇и, воззва́хъ, стїхи̑ры, на и҃, самогла́сны, гла́съ и҃:

Прпⷣбне и҆ бг҃обл҃же́нне ѻ҆́ч҃е на́шъ варлаа́ме, поꙋчи́всѧ въ за́повѣдехъ гдⷭ҇нихъ де́нь и҆ но́щь, и҆ въ зако́нѣ є҆гѡ̀ досто́йнѡ пожи́въ, ѡ҆брѣ́лъ є҆сѝ лѣ́ствицꙋ нбⷭ҇нꙋю, по не́йже возше́дъ, дости́глъ є҆сѝ го́рнѧгѡ і҆ерⷭ҇ли́ма, болѣ́зней и҆ пѡ́двигъ досто́йнꙋю по́честь прїе́млѧ, и҆ съ вы́шними ра́дꙋешисѧ, бж҃е́ственнагѡ зрѣ́нїѧ наслажда́ѧсѧ: ѿ цр҃ѧ́ бо ца́рствꙋющихъ хрⷭ҇та̀ вѣнце́мъ вѣнча́лсѧ є҆сѝ, и҆ црⷭ҇твїѧ є҆гѡ̀ снаслѣ́дникъ бы́лъ є҆сѝ. но, ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀, мі́рꙋ ми́ръ и҆спросѝ, и҆ дꙋша́мъ на́шымъ ве́лїю ми́лость.

Ꙗ҆́кѡ чи́стое и҆ нескве́рное зерца́ло, ꙗ҆ви́лсѧ є҆сѝ въ вы́шнихъ ликостоѧ́нїихъ: тѣ́мже и҆ чи́стагѡ ра́ди житїѧ̀ твоегѡ̀, трⷪ҇цы жили́ще показа́лсѧ є҆сѝ. и҆ ꙗ҆́кѡ свѣтоно́сное со́лнце, въ твое́й ѻ҆би́тели сїѧ́ѧ, варлаа́ме, ꙗ҆ви́лсѧ є҆сѝ, и҆ всю̀ поднебе́снꙋю просвѣща́ѧ. и҆ ꙗ҆́коже вторы́й мѡѷсе́й, крⷭ҇та̀ жезло́мъ мо́ре стра́стное пресѣ́клъ є҆сѝ, мы́сленнаго же а҆мали́ка побѣди́въ, безвре́днѡ нбⷭ҇ный восхо́дъ ѡ҆брѣ́лъ є҆сѝ, и҆ со безпло́тными трⷪ҇цѣ предстоѧ̀, молѝ спасти́сѧ дꙋша́мъ на́шымъ.

Прпⷣбне ѻ҆́ч҃е и҆ бг҃оно́се варлаа́ме, си́лою крⷭ҇та̀ ᲂу҆тверди́всѧ стра̑стныѧ пото́ки и҆зсꙋши́лъ є҆сѝ, и҆ ра́достїю и҆ весе́лїемъ дꙋшѝ дости́глъ є҆сѝ, и҆дѣ́же гла́съ пра́зднꙋющихъ слы́шашесѧ, и҆ кра́снагѡ и҆ неизрече́ннагѡ ѻ҆́нагѡ весе́лїѧ насыща́ешисѧ. тѣ́мъ и҆ свѣ́тлыми тѧ̀ вѣнцы̑ хрⷭ҇то́съ ѡ҆богатѝ. всечестна́ѧ же твоѧ̀ ра́ка, и҆сцѣле́нїй неѡскꙋ́дный и҆сто́чникъ и҆сточа́етъ, вѣ́рою приходѧ́щымъ. тѣ́мъ, со стра́хомъ и҆ любо́вїю предстоѧ́ще, мо́лимсѧ: моли́сѧ, прпⷣбне ѻ҆́ч҃е на́шъ, спасти́сѧ дꙋша́мъ на́шымъ.

Чи́стое и҆ пречестно́е прїѧ́телище ꙗ҆ви́лсѧ є҆сѝ дх҃а прест҃а́гѡ, варлаа́ме прпⷣбне: безплѡ́тнымъ бо во пло́ти подо́бѧсѧ, и҆ тѣ́хъ житїю̀ подража́лъ є҆сѝ. сегѡ̀ ра́ди ѿ вседѣ́тельныѧ вѣнча́лсѧ є҆сѝ десни́цы, и҆ чꙋде́съ и҆сцѣле́нїй ѿ негѡ̀ сподо́билсѧ є҆сѝ: а҆́ще бо и҆ преста́вилсѧ є҆сѝ ѿ землѝ, но бг҃ꙋ жи́въ предстои́ши со а҆́гг҃лы, и҆ мо́лишисѧ ѡ҆ дꙋша́хъ на́шихъ.

Сла́ва, гла́съ и҃:

Всечестна́ѧ и҆ чꙋдотво́рнаѧ ра́ка, и҆дѣ́же лежи́тъ пречестно́е и҆ ст҃о́е тѣ́ло твоѐ, варлаа́ме ѻ҆́ч҃е на́шъ, и҆сцѣлє́нїѧ неѡскꙋ́днѡ подае́тъ притека́ющымъ съ вѣ́рою, и҆ дꙋшетлѣ̑нныѧ стра̑сти и҆сцѣлѧ́етъ, мно́жєства же де́мѡнѡвъ ѿрѣва́етъ. тѣ́мже и҆ стада̀ мона́хѡвъ твои́ми чꙋдєсы̀ ᲂу҆дивлѧ́еми, ра́достнѡ ѿ дꙋшѝ вопїе́мъ: бг҃облаже́нне и҆ прпⷣбне ѻ҆́ч҃е на́шъ варлаа́ме, молѝ хрⷭ҇та̀ бг҃а, ᲂу҆ще́дрити мі́ръ, и҆ спастѝ дꙋ́шы на́шѧ.

И҆ ны́нѣ, бг҃оро́диченъ: Цр҃ь нбⷭ҇ный за чл҃вѣколю́бїе:

Вхо́дъ. Прокі́менъ днѐ. И҆ чтє́нїѧ.

Премꙋ́дрости соломѡ́новы чте́нїе.

[Глава̀ г҃] Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ: и҆ є҆́же ѿ на́съ ше́ствїе, сокрꙋше́нїе, ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено, и҆ вма́лѣ нака́зани бы́вше, вели́кими благодѣ́тельствовани бꙋ́дꙋтъ, ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцр҃и́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀: ꙗ҆́кѡ бл҃года́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́новы чте́нїе.

[Глава̀ є҃] Пра́вєдницы во вѣ́ки живꙋ́тъ, и҆ въ гдⷭ҇ѣ мзда̀ и҆́хъ, и҆ попече́нїе и҆́хъ ᲂу҆ вы́шнѧгѡ. Сегѡ̀ ра́ди прїи́мꙋтъ црⷭ҇твїе благолѣ́пїѧ, и҆ вѣне́цъ добро́ты ѿ рꙋкѝ гдⷭ҇ни: занѐ десни́цею покры́етъ ѧ҆̀, и҆ мы́шцею защити́тъ и҆̀хъ. Прїи́метъ всеѻрꙋ́жїе рве́нїе своѐ, и҆ воѡрꙋжи́тъ тва́рь въ ме́сть врагѡ́мъ. Ѡ҆блече́тсѧ въ бронѧ̀ пра́вды, и҆ возложи́тъ шле́мъ, сꙋ́дъ нелицемѣ́ренъ: прїи́метъ щи́тъ непобѣди́мый преподо́бїе: поѡстри́тъ же напра́сный гнѣ́въ во ѻ҆рꙋ́жїе: спобо́ретъ же съ ни́мъ мі́ръ на безꙋ̑мныѧ: по́йдꙋтъ праволꙋ̑чныѧ стрѣ́лы мѡ́лнїины, и҆ ꙗ҆́кѡ ѿ благокрꙋ́гла лꙋ́ка ѻ҆блакѡ́въ на намѣ́ренїе полетѧ́тъ: и҆ ѿ каменоме́тныѧ ꙗ҆́рости, и҆спо́лнь падꙋ́тъ гра́ды: вознегодꙋ́етъ на ни́хъ вода̀ морска́ѧ, рѣ́ки же потопѧ́тъ ѧ҆̀ на́глѡ. Сопроти́въ ста́нетъ и҆̀мъ дꙋ́хъ си́лы, и҆ ꙗ҆́кѡ ви́хоръ развѣ́етъ и҆̀хъ: и҆ ѡ҆пꙋстоши́тъ всю̀ зе́млю беззако́нїе, и҆ ѕлодѣ́йство преврати́тъ престо́лы си́льныхъ. Слы́шите ᲂу҆̀бо, ца́рїе, и҆ разꙋмѣ́йте: навы́кните, сꙋдїи̑ концє́въ землѝ. Внꙋши́те держа́щїи мно́жєства и҆ гордѧ́щїисѧ ѡ҆ наро́дѣхъ ꙗ҆зы̑къ: ꙗ҆́кѡ дана̀ є҆́сть ѿ гдⷭ҇а держа́ва ва́мъ, и҆ си́ла ѿ вы́шнѧгѡ.

Премꙋ́дрости соломѡ́новы чте́нїе.

[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости, житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇ꙋ дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ: лю́дїе же ви́дѣвше, и҆ не разꙋмѣ́вше, нижѐ положи́вше въ помышле́нїи таково́е: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На лїті́и стїхи̑ры самогла́сны, гла́съ и҃:

Бжⷭ҇твеннаѧ и҆ свѣтоно́снаѧ наста̀ па́мѧть въ по́стницѣхъ вели́кагѡ варлаа́ма, дꙋ́шы и҆ тѣлеса̀ веселѧ́щаѧ. тѣ́мже прїиди́те празднолю́бцы, да наслади́мсѧ ны́нѣшнѧгѡ торжества̀, се́ бо на́ше зва́нїе прїи́де, и҆ рѡссі́йскїѧ землѝ ᲂу҆добре́нїе, вели́кагѡ же нова́града похвала̀ и҆ ᲂу҆твержде́нїе, снаслѣ́дникъ бо хрⷭ҇то́въ ꙗ҆ви́сѧ, и҆ безпло́тныхъ житїѧ̀ подража́тель бы́въ, и҆ мо́литсѧ сп҃сꙋ всѣ́хъ, ᲂу҆мири́ти мі́ръ, и҆ спастѝ дꙋ́шы на́шѧ.

Весели́сѧ и҆ ра́дꙋйсѧ въ гдⷭ҇ѣ всѧ̀ рѡссі́йскаѧ землѧ̀, процвѣ́тши въ себѣ̀ но́ваго свѣти́льника, ꙗ҆́кѡ со́лнце вселе́ннꙋю просвѣща́юща, красꙋ́йсѧ и҆ ликꙋ́й цр҃ковь бж҃їѧ, и҆ мона́хѡвъ мно́жєства сра́дꙋйтесѧ, празднолю́бныхъ собо́ри взыгра́йте, и҆ вѣне́цъ ѿ дꙋхо́вныхъ цвѣтѡ́въ спле́тше, съ дв҃домъ возопїи́мъ: со́нъ че́стенъ предъ гдⷭ҇емъ сме́рть прпⷣбныхъ є҆гѡ̀.

Честно́е и҆ пречестно́е прїѧ́телище ꙗ҆ви́лсѧ є҆сѝ дх҃а прест҃а́гѡ, прпⷣбне варлаа́ме ѻ҆́ч҃е на́шъ, безпло́тныхъ во пло́ти житїѐ подража́лъ є҆сѝ: тѣлє́снаѧ двиза̑нїѧ воздержа́нїемъ ᲂу҆мертви́въ, въ живоно́снꙋю ме́ртвость ѡ҆дѣ́ѧлсѧ є҆сѝ. и҆ сегѡ̀ ра́ди ѿ вседержи́тельныѧ десни́цы вѣнча́лсѧ є҆сѝ, и҆ чꙋде́съ и҆сцѣле́нїй ѿ негѡ̀ сподо́билсѧ є҆сѝ: а҆́ще бо и҆ преста́вилсѧ є҆сѝ ѿ землѝ, но бг҃ꙋ жи́въ предстои́ши, и҆ здѣ̀ съ на́ми неви́димѡ водворѧ́ешисѧ, но ꙗ҆́кѡ и҆мѣ́ѧ дерзнове́нїе, моли́сѧ ѡ҆ дꙋша́хъ на́шихъ.

Сла́ва, гла́съ ѕ҃:

Свѣ́тлый и҆ всепра́зднственный дне́сь возсїѧ̀ де́нь, ꙗ҆́коже второ́е со́лнце, всѧ̑ празднолю́бныхъ собо́ры просвѣща́ѧ, и҆ мглꙋ̀ ѿгонѧ́ѧ дре́внѧгѡ помраче́нїѧ: честна́ѧ бо па́мѧть варлаа́ма вселе́ннꙋю созыва́етъ, є҆́же къ честнѣ́й є҆гѡ̀ и҆ чꙋдотво́рнѣй ра́цѣ стещи́сѧ, и҆ любе́знѡ лобыза́ти и҆ моли́ти: да, ꙗ҆́кѡ кро́ткомꙋ дв҃дꙋ, благочести́вымъ побѣ́дное ѡ҆долѣ́нїе на сопроти̑вныѧ и҆спро́ситъ, и҆ мі́рꙋ ми́ръ, и҆ дꙋша́мъ на́шымъ ве́лїю ми́лость.

И҆ ны́нѣ, бг҃оро́диченъ.

На стїхо́внѣ стїхи̑ры, самогла́сны, гла́съ в҃:

Дх҃а ст҃а́гѡ теплото́ю, мꙋ́дре, жела́нїе се́рдца твоегѡ̀, є҆́же ко гдⷭ҇ꙋ, согрѣ́ѧвъ, и҆ зи́мꙋ страсте́й ᲂу҆мертви́въ, многоко́зненнꙋю же си́лꙋ де́мѡнскꙋю низложи́лъ є҆сѝ, и҆ въ коне́цъ не́мѡщны ты́ѧ показа́лъ є҆сѝ, нбⷭ҇ныѧ же вѡ́инства ᲂу҆диви́въ терпѣ́нїемъ свои́мъ: но, ꙗ҆́кѡ по́стникѡвъ подража́тель, и҆ прпⷣбныхъ сожи́тель, молѝ спасти́сѧ дꙋша́мъ на́шымъ.

Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.

Взе́мъ крⷭ҇тъ гдⷭ҇ень, прпⷣбне варлаа́ме, терпѣли́внѡ послѣ́довалъ є҆сѝ на крⷭ҇тѣ̀ на́съ ра́ди распе́ншемꙋсѧ, и҆ є҆гѡ̀ ра́ди любвѐ всѧ̑ ѡ҆ста́вилъ є҆сѝ, и҆ того̀ є҆ди́наго хрⷭ҇та̀ возлюби́лъ є҆сѝ: є҆мꙋ́же и҆ со а҆́гг҃лы предстоѧ̀, молѝ, ᲂу҆ще́дрити мі́ръ, и҆ спастѝ дꙋ́шы на́шѧ.

Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Ꙗ҆́кѡ прїе́мъ, ѻ҆́ч҃е, нбⷭ҇ное сѣ́мѧ, пло́дъ стори́чествꙋющъ добродѣ́телей прине́слъ є҆сѝ, варлаа́ме ѻ҆́ч҃е на́шъ, пита́ѧ благоче́стнѡ гла́домъ та́ющыѧ добродѣ́телей, ѿѻнꙋ́дꙋже и҆сцѣлє́нїѧ вѣ́рою приходѧ́щымъ подае́ши: тѣ́мже ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀, молѝ, прпⷣбне ѻ҆́ч҃е на́шъ, спасти́сѧ вѣ́рою чтꙋ́щымъ тѧ̀ и҆ пра́зднꙋющымъ любо́вїю па́мѧть твою̀.

Сла́ва, гла́съ и҃.

Мона́хѡвъ мно́жєства наста́вника тѧ̀ почита́емъ, ѻ҆́ч҃е на́шъ варлаа́ме: твое́ю бо стезе́ю вои́стиннꙋ пра́вѡ ходи́ти позна́хомъ. блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.

И҆ ны́нѣ, бг҃оро́диченъ.

На благослове́нїи хлѣ́бѡвъ тропа́рь ст҃а́гѡ, два́жды. И҆ Бцⷣе дв҃о: є҆ди́ножды.

На ᲂу҆́трени, на Бг҃ъ гдⷭ҇ь, тропа́рь два́жды.

Сла́ва, и҆ ны́нѣ, бг҃оро́диченъ воскрⷭ҇ный, пи́санъ на ма́лѣй вече́рни.

По а҃-мъ стїхосло́вїи сѣда́ленъ, гла́съ и҃. Подо́бенъ: Премꙋ́дрости:

Мно́гимъ воздержа́нїемъ, прпⷣбне, житїѐ ᲂу҆краси́въ, пꙋ́ть показа́лъ є҆сѝ, ведꙋ́щїй въ жи́знь, добродѣ́телей смире́нїемъ: мі́ра бо ѿве́ргсѧ, и҆ всѧ̑, ꙗ҆̀же въ мі́рѣ, кра̑снаѧ преѡби́дѣвъ, є҆ѵⷢ҇льскимъ ᲂу҆че́нїємъ послѣ́довалъ є҆сѝ: жесто́кимъ же житїе́мъ пло́ть твою̀ и҆знꙋрѧ́ѧ, го́рдаго ѕмі́ѧ воздержа́нїемъ ᲂу҆би́лъ є҆сѝ. тѣ́мже на нб҃сѣ́хъ водворѧ́ѧсѧ, и҆ трисо́лнечномꙋ бж҃ествꙋ̀ предстоѧ̀, пресла́вне варлаа́ме, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Нбⷭ҇нꙋю две́рь и҆ кївѡ́тъ, прест҃ꙋ́ю го́рꙋ, свѣ́тлый ѻ҆́блакъ воспои́мъ, неѡпали́мꙋю кꙋпинꙋ̀, слове́сный ра́й, є҆́ѵы воззва́нїе, вселе́нныѧ всеѧ̀ вели́кое сокро́вище, ꙗ҆́кѡ спасе́нїе въ не́й содѣ́ласѧ мі́рꙋ, и҆ ѡ҆ставле́нїе дре́внихъ согрѣше́нїй. сегѡ̀ ра́ди вопїе́мъ є҆́й: моли́сѧ сн҃ꙋ твоемꙋ̀, прегрѣше́нїй ѡ҆ставле́нїе дарова́ти, благоче́стнѡ покланѧ́ющымсѧ всест҃о́мꙋ ржⷭ҇твꙋ̀ твоемꙋ̀.

По в҃-мъ стїхосло́вїи сѣда́ленъ, гла́съ и҃. Подо́бенъ: Премꙋ́дрости:

Красѡты̀ мі́ра сегѡ̀ ѿ млады́хъ ногте́й, прпⷣбне, возненави́дѣвъ, є҆ди́наго хрⷭ҇та̀ ѿ се́рдца возлюби́лъ є҆сѝ, и҆ томꙋ̀ все́ю дꙋше́ю прилѣпи́лсѧ є҆сѝ, и҆ ꙗ҆́кѡ безпло́тенъ на землѝ пожи́лъ є҆сѝ съ пло́тїю: сла́вꙋ же мимотекꙋ́щꙋю и҆ бога́тство въ ничто́же вмѣни́въ, нбⷭ҇ное бога́тство воспрїѧ́лъ є҆сѝ и҆ сла́вꙋ вѣ́чнꙋю. тѣ́мже ᲂу҆бл҃жа́емъ ст҃о́е твоѐ ᲂу҆спе́нїе, и҆ въ не́мъ торжествꙋ́юще, вопїе́мъ тѝ: прпⷣбне ѻ҆́ч҃е на́шъ варлаа́ме, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.

По полѷеле́и сѣда́ленъ, гла́съ г҃. Подо́бенъ: Красотѣ̀ дѣ́вства:

Сою́зомъ любвѐ привѧза́всѧ хрⷭ҇тꙋ̀, земна̑ѧ же и҆ мимотекꙋ̑щаѧ возненави́дѣвъ, бг҃омꙋ́дре, пꙋсты́нное ѡ҆ѕлобле́нїе ᲂу҆се́рднѡ под̾ѧ́лъ є҆сѝ: дє́мѡнскаѧ же ѡ҆полчє́нїѧ, и҆ и҆́хъ многоко́зненнꙋю си́лꙋ посрами́лъ є҆сѝ, и҆ подвигополо́жникъ хрⷭ҇то́съ дарова́нїемъ чꙋде́съ ѡ҆богати́ тѧ. тѣ́мже тѧ̀ почита́емъ, варлаа́ме бг҃омꙋ́дре.

Два́жды.

Сла́ва, и҆ ны́нѣ, бг҃оро́диченъ:

Ꙗ҆́кѡ невоздѣ́ланнаѧ, дв҃о, лоза̀, краснѣ́йшїй гро́здъ прозѧбла̀ є҆сѝ, и҆сточа́ющь на́мъ вїно̀ спасе́нїѧ, всѣ́хъ веселѧ́щее дꙋ́шы же и҆ тѣлеса̀. тѣ́мже ꙗ҆́кѡ винꙋ́ тѧ до́брыхъ блажа́ще при́снѡ, со а҆́гг҃ломъ вопїе́мъ тѝ: ра́дꙋйсѧ, ѡ҆бра́дованнаѧ.

Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе матѳе́а, зача́ло м҃г.

По н҃-мъ ѱалмѣ̀, стїхи́ра самогла́сна, гла́съ ѕ҃:

Свѣ́тлый и҆ всепра́зднственный дне́сь возсїѧ̀ де́нь:

Пи́санъ на лїті́и Сла́вникъ. Та́же, Канѡ́нъ бцⷣы в҃- гѡ гла́са, со і҆рмосо́мъ на ѕ҃: Нетре́нꙋ, неѻбы́чнꙋ:

И҆ прпⷣбнагѡ варлаа́ма, на и҃, є҆гѡ́же краегране́сїе си́це:

Глаго́лъ да́ждь мѝ, хрⷭ҇тѐ мо́й, восхвали́ти твоего̀ ᲂу҆го́дника.

Гла́съ в҃. Пѣ́снь а҃. І҆рмо́съ:

Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.

Ѿ свѣ́та свѣ́тъ, хрⷭ҇тѐ мо́й, ѿ ѻ҆ц҃а̀ пре́жде вѣ̑къ рожде́йсѧ, сы́й въ нача́лѣ со ѻ҆ц҃е́мъ и҆ дх҃омъ, согрѣше́нїй мра́къ дꙋшѝ моеѧ̀ ѿгна́въ, ѡ҆зарѝ ᲂу҆́мъ мо́й, молю́сѧ, да возмогꙋ̀ пѣ́ти варлаа́ма, твоего̀ ᲂу҆го́дника.

Ѿ ко́рене блага́гѡ блажа́йшаѧ ѻ҆́трасль прозѧ́блъ є҆сѝ, земны́хъ маловре́меннагѡ житїѧ̀ и҆збѣ́глъ є҆сѝ. тѣ́мъ ны́нѣ чистоты̀ вѣне́цъ прїе́млѧ, со а҆́гг҃лы хрⷭ҇тꙋ̀ воспѣва́еши. пои́мъ гдⷭ҇еви, ꙗ҆́кѡ просла́висѧ.

Земна̑ѧ и҆ мимотекꙋ̑щаѧ ꙗ҆́кѡ ᲂу҆ме́ты вмѣни́въ, хрⷭ҇та̀ є҆ди́наго приѡбрѣ́лъ є҆сѝ, є҆гѡ́же сою́зомъ любвѐ ᲂу҆ѧзви́въ дꙋ́шꙋ твою̀, и҆ тогѡ̀ потща́лсѧ є҆сѝ ѡ҆брѣстѝ ненасыща́емыѧ добро́ты.

Бг҃оро́диченъ:

Оу҆слы́ша є҆́ѵа прама́ти: въ печа́лехъ роди́ши ча̑да. ты́ же, чⷭ҇таѧ дв҃о, ᲂу҆слы́шала є҆сѝ: гдⷭ҇ь съ тобо́ю, ра́дꙋйсѧ, и҆ ра́дованнымъ гла́сомъ, бг҃оневѣ́сто, печа́ль прама́тере потреби́ла є҆сѝ.

Катава́сїа: Ѿве́рзꙋ ᲂу҆ста̀ моѧ̑:

Пѣ́снь г҃. І҆рмо́съ:

На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

По а҆пⷭ҇лꙋ, ѻ҆́ч҃е, вы́шнихъ и҆щѧ̀, и҆ мꙋдрова́нїе и҆мѣ́ѧ є҆́же къ бг҃ꙋ, всѧ̑, ꙗ҆̀же на землѝ, ѡ҆ста́вилъ є҆сѝ, и҆ па́че є҆стества̀ добро́ты сподо́билсѧ є҆сѝ.

Свѣ́томъ бжⷭ҇твеннымъ ѡ҆сїѧ́емь ѡ҆ не́мъ, и҆ пꙋ́ть къ жи́зни ведꙋ́щъ позна́лъ є҆сѝ, ѻ҆́ч҃е на́шъ варлаа́ме, и҆ равноа́гг҃льнагѡ ра́ди житїѧ̀ чꙋдотво́рецъ наре́клсѧ є҆сѝ.

Закѡ́ны пита́ѧсѧ всѣ́хъ творца̀ и҆ влⷣки, тѣ́мже и҆ невече́рнимъ ѡ҆блиста́емь свѣ́томъ, свѣ́тлое со́лнце ꙗ҆ви́лсѧ є҆сѝ, и҆ премꙋ́дрости сокро́вищемъ мі́ръ ѡ҆богаща́ѧ.

Бг҃оро́диченъ:

Во и҆ны́хъ жена́хъ мт҃и, до́ндеже дв҃а не позна́сѧ, ни мт҃и по ржⷭ҇твѣ̀ дѣ́вствовати сподо́бисѧ: на тебѣ́ же, дв҃о бг҃ома́ти, ѻ҆боѐ сбы́стсѧ. тѣ́мъ весе́лїемъ дꙋ́ха воспѣва́ю: нѣ́сть непорѡ́чны па́че тебє̀, влⷣчце.

Сѣда́ленъ, гла́съ и҃. Подо́бенъ: Премꙋ́дрости:

Красоты̑ мїрскі̑ѧ ѿ млады́хъ ногте́й, прпⷣбне, возненави́дѣвъ, є҆ди́наго же хрⷭ҇та̀ ѿ се́рдца возлюби́лъ є҆сѝ, и҆ томꙋ̀ все́ю дꙋше́ю прилѣпи́лсѧ є҆сѝ, ꙗ҆́кѡ безпло́тенъ на землѝ пожи́въ съ пло́тїю: сла́вꙋ же мимотекꙋ́щꙋю и҆ бога́тство въ ничто́же вмѣни́въ, нбⷭ҇ное бога́тство воспрїѧ́лъ є҆сѝ, и҆ сла́вꙋ вѣ́чнꙋю. тѣ́мже ᲂу҆блажа́емъ ст҃о́е твоѐ ᲂу҆спе́нїе, и҆ въ не́мъ торжествꙋ́юще, вопїе́мъ тѝ: бг҃омꙋ́дре ѻ҆́ч҃е на́шъ варлаа́ме, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Ꙗ҆́кѡ всенепоро́чнаѧ невѣ́сто творца̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, прїѧ́телище ꙗ҆́кѡ сꙋ́щи ᲂу҆тѣ́шителѧ, всепѣ́таѧ, беззако́нїю мѧ̀ сꙋ́ща скве́рное ѻ҆би́телище, и҆ де́мѡнѡмъ и҆гра́лище въ ра́зꙋмѣ бы́вша, потщи́сѧ ѿ тѣ́хъ ѕлодѣ́йства мѧ̀ и҆зба́вити: и҆ свѣ́тлое жили́ще добродѣ́телей совершѝ, свѣтоно́снаѧ, нетлѣ́ннаѧ: ѿженѝ ѻ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ, моли́твами твои́ми.

Пѣ́снь д҃. І҆рмо́съ:

Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ: до менє́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.

Ꙗ҆́кѡ въ порфѵ́рꙋ и҆ вѷссѡ́нъ, и҆ въ ца́рскꙋю багрѧни́цꙋ ѡ҆дѣ́ѧсѧ тобо́ю вели́каѧ рѡссі́йскаѧ землѧ̀: дне́сь ᲂу҆́бѡ, свѣ́тлѡ торжествꙋ́ющи, весели́тсѧ, варлаа́ме, и҆мѣ́ющи тѧ̀ въ себѣ̀, ꙗ҆́кѡ неистощи́мое сокро́вище.

Мі́ра любвѐ ѿре́ксѧ, дости́глъ є҆сѝ го́рнїй і҆ерⷭ҇ли́мъ, и҆дѣ́же хрⷭ҇то́съ со ѻ҆ц҃е́мъ и҆ дх҃омъ: и҆ вѣнцє́въ ѿ негѡ̀ сподо́бивсѧ, со безпло́тными ли̑ки пое́ши, прїе́млѧ є҆гѡ̀ сїѧ́нїе.

А҆́ще ᲂу҆́бѡ, ѻ҆́ч҃е, тѣ́сный и҆ болѣ́зненный пꙋ́ть ше́ствовалъ є҆сѝ въ житїѝ, но ѻ҆ба́че нетлѣ́ннꙋю жи́знь наслѣ́довалъ є҆сѝ, ѿѻнꙋ́дными свѣ́тлостьми бога́тнѡ просвѣща́ѧсѧ, бг҃облаже́нне варлаа́ме.

Бг҃оро́диченъ:

И҆́стиннѡ тѧ̀ сѣ́нь свидѣ́тельствова многоразли́чными ѻ҆́бразы, ꙗ҆́вѣ показꙋ́ющи воплоще́ннаго и҆зъ тебє̀ є҆ди́наго трⷪ҇цы, пречⷭ҇таѧ, неизмѣ́ннѡ, бг҃ома́ти влⷣчце, и҆ мі́ръ ѡ҆бнови́вша.

Пѣ́снь є҃. І҆рмо́съ:

Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бо́га не зна́емъ.

Ꙗ҆ре́мъ гдⷭ҇нь ѿ ю҆́ности, мꙋ́дре, взе́мъ, послѣ́довалъ є҆сѝ хрⷭ҇тꙋ̀ скорбьмѝ и҆ слеза́ми, прпⷣбне, мы́сленное ѻ҆́ко къ немꙋ̀ и҆мѣ́ѧ, до́ндеже и҆ ст҃ы́хъ селе́нїй дости́глъ є҆сѝ, ѡ҆брѣ́тъ поко́ище го́рнѧгѡ гра́да.

Страсте́й ѿгна́въ мглꙋ̀ ꙗ҆́вѣ зарѧ́ми, ѻ҆́ч҃е, добродѣ́телей, просвѣще́нїе дх҃а въ се́рдцы прїе́мъ, варлаа́ме: и҆́мже попали́лъ є҆сѝ всѧ̑ дє́мѡнскаѧ ѡ҆полчє́нїѧ, и҆ по́стничєскимъ ликѡ́мъ причта́лсѧ є҆сѝ.

Насажде́нъ во дво́рѣхъ гдⷭ҇нихъ, и҆ въ домꙋ̀ бг҃а на́шегѡ процвѣ́лъ є҆сѝ. прїе́мъ нбⷭ҇ное сѣ́мѧ, бг҃одꙋхнове́нне, серде́чною браздо́ю, кла́съ стори́чествꙋющь прине́слъ є҆сѝ: тѣ́мже ѡ҆богати́лсѧ є҆сѝ вѣнце́мъ чꙋде́съ.

Бг҃оро́диченъ:

Оу҆пра́ви ᲂу҆́мъ мо́й, влⷣчце, трꙋжда́ющїйсѧ въ пꙋчи́нѣ скорбе́й, и҆ потоплѧ́емь наше́ствїемъ тлетво́рныхъ страсте́й, и҆ спасѝ, бцⷣе, къ тебѣ̀ прибѣга́ющыѧ: и҆ны́ѧ бо помо́щницы, чⷭ҇таѧ, ра́звѣ тебє̀, не зна́емъ.

Пѣ́снь ѕ҃. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Мо́ре жите́йское любомꙋ́дрїемъ и҆спыта́въ, и҆ разꙋмѣ́въ сꙋ́етно сꙋ́що, и҆, ꙗ҆́кѡ вско́рѣ погиба́ющо, ѿве́рглъ є҆сѝ, є҆ди́номꙋ прилѣпи́лсѧ є҆сѝ хрⷭ҇тꙋ̀: є҆гѡ́же ра́ди и҆ тѧготꙋ̀ дневнꙋ́ю поне́слъ є҆сѝ, ѡ҆ всѣ́хъ томꙋ̀ восхождє́нїѧ въ се́рдцы свое́мъ полага́ѧ.

Вѣ́триломъ ѡ҆крилѧ́емь воздержа́нїѧ, и҆ ѿтꙋ́дꙋ дости́глъ є҆сѝ въ приста́нище благоꙋти́шное, поще́нїемъ пита́ѧ дꙋ́шꙋ твою̀, прпⷣбне, и҆ свѣ́тлꙋ всѣ́хъ творцꙋ̀ предста́вилъ є҆сѝ ю҆̀. тѣ́мже и҆ хрⷭ҇то́съ прїѧ́тъ ю҆̀, ꙗ҆́кѡ свѣтоза́рнꙋю ѕвѣздꙋ̀, и҆ своеѧ̀ сла́вы соприча́стнꙋ содѣ́ла.

А҆́гг҃льскаѧ вѡ́инства сꙋ́щемꙋ во пло́ти житїю̀ твоемꙋ̀ ᲂу҆диви́шасѧ, ѻ҆́ч҃е варлаа́ме: бꙋ́ри бо страсте́й ѿбѣ́глъ, и҆ соверше́ннагѡ ра́ди житїѧ̀, вѣ́триломъ воздержа́нїѧ дости́глъ є҆сѝ въ благоꙋти́шное приста́нище хрⷭ҇то́во.

Бг҃оро́диченъ:

Ѡ҆бетша́вшыѧ ны̀ го́рькимъ дре́вле дре́ва вкꙋше́нїемъ, и҆ па́дшыѧ поползнове́нїемъ, пречⷭ҇таѧ, ѡ҆бнови́ла є҆сѝ, зижди́телѧ ро́ждши сло́во ѵ҆поста́сное, дв҃ома́ти влⷣчце.

Конда́къ, гла́съ и҃. Подо́бенъ: Взбра́нной:

Ꙗ҆́коже дрꙋгі́й и҆лїа̀, ѻ҆́ч҃е, до́ждь съ нб҃сѐ све́лъ є҆сѝ, ѻ҆́нъ ᲂу҆́бѡ ѻ҆́гнь сведѐ и҆ царѧ̀ ᲂу҆дивѝ: ты́ же лю́ди твоѧ̑ возвесели́лъ є҆сѝ, и҆ торжествова́ти ᲂу҆стро́илъ є҆сѝ: вели́кїй бо но́вградъ вельмѝ тобо́ю хва́литсѧ, и҆мѣ́ѧ мо́щи твоѧ̑ въ себѣ̀, є҆го́же сохранѧ́й ѿ вра̑гъ непоколеби́ма, да зове́мъ тѝ: ра́дꙋйсѧ, прпⷣбне варлаа́ме ѻ҆́ч҃е на́шъ.

І҆́косъ:

А҆́ще и҆ человѣ́къ є҆стество́мъ бы́лъ є҆сѝ, прпⷣбне ѻ҆́ч҃е, но вы́шнѧгѡ і҆ерⷭ҇ли́ма ꙗ҆ви́лсѧ є҆сѝ согра́жданинъ, и҆ человѣ́къ ᲂу҆́бѡ є҆стество́мъ, безпло́тныхъ че́сти сподо́билсѧ є҆сѝ. тѣ́мже и҆ са̑маѧ зрѧ́щи чꙋдеса̀ похва̑льнаѧ ᲂу҆дивлѧ́ютъ на́съ, и҆ наꙋча́ютъ зва́ти тебѣ̀ такѡва́ѧ: ра́дꙋйсѧ, благочести́ва ѻ҆тца̀ ѻ҆́трасле: ра́дꙋйсѧ, ма́тере благоговѣ́йныѧ вѣ́тве: ра́дꙋйсѧ, смире́нїѧ высото̀: ра́дꙋйсѧ, ꙗ҆́кѡ къ позна́нїю бг҃а всѧ̑ приводѧ̀: ра́дꙋйсѧ, ꙗ҆́кѡ мнѡ́га чꙋдеса̀ ѡ҆ хрⷭ҇тѣ̀ сотвори́лъ є҆сѝ: ра́дꙋйсѧ, цѣломꙋ́дрїѧ сто́лпе, и҆́мже дє́мѡнскаѧ свирѣ̑пства и҆скорени́шасѧ: ра́дꙋйсѧ, свѣти́льниче многосвѣ́тлый: ра́дꙋйсѧ, ꙗ҆́кѡ ᲂу҆вѧди́лъ є҆сѝ плотска̑ѧ мꙋдрова̑нїѧ: ра́дꙋйсѧ, ꙗ҆́кѡ до́ждь моли́твою све́лъ є҆сѝ, и҆ па́ки наводне́нїю бы́вшꙋ, моли́твою водотѡ́чныѧ ѻ҆́блаки востѧ́глъ є҆сѝ: ра́дꙋйсѧ, вели́кагѡ нова́града похвала̀ и҆ ᲂу҆твержде́нїе, є҆го́же и҆ сохранѝ ѿ вра̑гъ непоколеби́ма до конца̀, да зове́мъ тѝ: ра́дꙋйсѧ, прпⷣбне варлаа́ме, ѻ҆́ч҃е на́шъ.

Пѣ́снь з҃. І҆рмо́съ:

Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆ц҃ъ на́шихъ.

Ѕѣ́льнымъ поще́нїемъ, ꙗ҆́кѡ благово́нною пи́щею пита́ѧ дꙋ́шꙋ твою̀, прпⷣбне варлаа́ме. тѣ́мже и҆ трисо́лнечномꙋ бж҃ествꙋ̀ предстоѧ̀, со а҆́гг҃лы пое́ши: бл҃гослове́нъ бг҃ъ ѻ҆тє́цъ на́шихъ.

Ѡ҆блиста́лъ є҆сѝ, ꙗ҆́коже невече́рнее со́лнце, ѻ҆те́чество твоѐ просвѣща́ѧ, прпⷣбне варлаа́ме, тмы̀ и҆збавлѧ́ѧ страсте́й, и҆ на на́съ навѣ́тꙋющихъ совѣ́ты разорѝ, ѿ вра̑гъ не преткнове́ннымъ бы́ти на́мъ, пою́щымъ: бл҃гослове́нъ бг҃ъ ѻ҆тє́цъ на́шихъ.

Ꙗ҆́кѡ на бжⷭ҇твеннꙋю добродѣ́телей лѣ́ствицꙋ воздержа́нїемъ, ѻ҆́ч҃е, возше́дъ, ᲂу҆́мными ѻ҆чесы̀ хрⷭ҇та̀ цр҃ѧ̀ ви́дѣлъ є҆сѝ, ѻ҆би́льною десни́цею по числꙋ̀ добродѣ́телей варлаа́ме, дарова̑нїѧ даю́ща ѿ дꙋшѝ вопїю́щымъ: бл҃гослове́нъ бг҃ъ ѻ҆тє́цъ на́шихъ.

Дрема́нїѧ ѿню́дъ и҆ сна̀ твои̑мъ ѻ҆чесє́мъ не да́лъ є҆сѝ, до́ндеже возме́здїе ѿ хрⷭ҇та̀ трꙋдѡ́въ ѡ҆брѣ́лъ є҆сѝ, наслажде́нїе нбⷭ҇нагѡ црⷭ҇твїѧ, є҆́же ᲂу҆гото́ва ѿ вѣ́ры пою́щымъ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ:

Ѡ҆бновлѧ́ютсѧ въ тебѣ̀ є҆стества̀ зако́ни: па́че є҆стества́ бо, є҆стество́мъ непостижи́маго, дв҃о, бг҃а є҆мманꙋ́ила пресла́внѡ, чⷭ҇таѧ, родила̀ є҆сѝ, въ на́ше вѣ́рныхъ ѡ҆бновле́нїе.

Пѣ́снь и҃. І҆рмо́съ:

Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ, снизше́дшаго и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Слеза́ми твои́ми, ѻ҆́ч҃е варлаа́ме, ᲂу҆мыва́ѧсѧ, житїѐ проше́лъ є҆сѝ, и҆ тѣ́ми мно́жєства де́мѡнѡвъ потопи́лъ є҆сѝ, вѣ́рныхъ же мы̑сли возвесели́лъ є҆сѝ, пою́щихъ: всѧ̑ дѣла̀ гдⷭ҇а по́йте, и҆ превозноси́те є҆го̀ во вѣ́ки.

Оу҆ѧзви́лсѧ є҆сѝ бжⷭ҇твеннымъ жела́нїемъ, всебл҃же́нне, тѣ́мже и҆ непоро́чное и҆ пра́ведное житїѐ проходѧ̀, до́ндеже дости́глъ є҆сѝ ца́рскагѡ престо́ла, ѿѻнꙋ́дными свѣтлостьмѝ ѡ҆сїѧ́ѧ пою́щыѧ: всѧ̑ дѣла̀, гдⷭ҇а по́йте, и҆ превозноси́те є҆го̀ во вѣ́ки.

Къ свѣ́тꙋ незаходи́момꙋ, сла́вне, взѧ́лсѧ є҆сѝ, наслажде́нїе же земны́хъ веще́й ѡ҆плева́въ вы́шнѧгѡ ра́ди наслажде́нїѧ, па́че воздержа́нїю поревнова́лъ є҆сѝ, и҆ страсте́й пла́мень потща́лсѧ є҆сѝ ᲂу҆гаси́ти слеза́ми твои́хъ и҆стѡ́чникъ, варлаа́ме, вопїѧ̀: всѧ̑ дѣла̀ гдⷭ҇а по́йте, и҆ превозноси́те є҆го̀ во вѣ́ки.

Бг҃оро́диченъ:

Распѧ́тїе и҆ погребе́нїе, и҆́же ѿ тебє̀ небра́чнѡ, дв҃о, произы́де, претерпѣ́въ на́съ ра́ди мꙋче́нїе, є҆гѡ́же стрⷭ҇те́мъ ревнꙋ́ѧ прпⷣбный варлаа́мъ, крестови́днѡ мꙋче́нїѧ поще́нїемъ томꙋ̀, чⷭ҇таѧ, послѣ́дова.

Пѣ́снь ѳ҃. І҆рмо́съ:

Ꙗ҆́же пре́жде со́лнца, свѣти́льника бг҃а возсїѧ́вшаго, пло́тски къ на́мъ прише́дшаго, и҆зъ бокꙋ̀ дв҃и́чꙋ, неизрече́ннѡ воплоти́вшаѧ, бл҃гослове́ннаѧ всечи́стаѧ, тѧ̀ бцⷣе велича́емъ.

Пожи́въ на землѝ равноа́гг҃льнѡ, равноа́гг҃льнꙋ ѡ҆брѣ́лъ є҆сѝ свѣ́тлость, молѝ непреста́ннѡ и҆зба́вителѧ, варлаа́ме, ѡ҆ творѧ́щихъ благоче́стнѡ па́мѧть твою̀, ѽ пребл҃же́нне! мона́шествꙋющихъ похвало̀.

Оу҆́зкїй и҆ приско́рбный ше́ствовавъ пꙋ́ть, ѻ҆́ч҃е варлаа́ме, и҆ тѣле́снѣ ᲂу҆́бѡ преста́вилсѧ є҆сѝ, дꙋ́хомъ же жи́въ предстои́ши бг҃ꙋ. но ꙗ҆́кѡ и҆мѣ́ѧ дерзнове́нїе, є҆мꙋ́же въ житїѝ рабо́талъ є҆сѝ, молѝ спастѝ дꙋ́шы на́шѧ.

И҆сцѣле́нїй ꙗ҆ви́лсѧ є҆сѝ стрꙋѧ̀ ѻ҆би́льнаѧ, многомѧте́жнагѡ пла́мене ᲂу҆́глїе страсте́й ᲂу҆гаси́лъ є҆сѝ: ᲂу҆́мъ бо тво́й неѡкра́денъ, прпⷣбне ѻ҆́ч҃е, соблю́лъ є҆сѝ, и҆ ꙗ҆́кѡ крѣ́покъ варлаа́ме, побѣжда́еши и҆скꙋси́телѧ.

Бг҃оро́диченъ:

Є҆ди́на и҆мꙋ́щи дерзнове́нїе, влⷣчце, за ве́сь мі́ръ сн҃ꙋ твоемꙋ̀ моли́сѧ, не помина́ѧ безчи́сленныхъ собла̑знъ на́шихъ, и҆ покры́й лю́ди вопїю́щыѧ тѝ ᲂу҆миле́ннымъ гла́сомъ: спасѝ, чⷭ҇таѧ бцⷣе, тебѐ досто́йнѡ велича́ющыѧ.

Свѣти́ленъ. Подо́бенъ: Посѣти́лъ ны̀:

Восто́ка восто́кѡвъ, разꙋ́мнагѡ сл҃нца хрⷭ҇та̀ (с. 112) свѣтоза́рнаѧ лꙋча̀ возсїѧ̀, и҆ свѣти́льникъ многосвѣ́тлый, пꙋсты́нное воспита́нїе, и҆ чистоты̀ кра́снаѧ ѻ҆би́тель, хрⷭ҇то́вы добрѡ́ты ꙗ҆́снѡ зрѧ̀, є҆гѡ́же сїѧ́ньми ᲂу҆́мъ тво́й ѡ҆зари́лъ є҆сѝ. тѣ́мже тѧ̀ свѣти́льника стѧжа́вше, ѻ҆́ч҃е на́шъ варлаа́ме, мо́лимъ тѧ̀ въ ми́рѣ сохранє́нымъ бы́ти, па́мѧть твою̀ почита́ющымъ.

Два́жды.

Сла́ва, и҆ ны́нѣ, бг҃оро́диченъ:

Неизрече́ннагѡ чревоноше́нїѧ была̀ є҆сѝ всенепоро́чнаѧ невѣ́ста, и҆ ꙗ҆́кѡ сꙋ́щи честнѣ́йшїй хра́мъ, бцⷣе: свѣ́тъ бо превѣ́чный въ тѧ̀ всели́сѧ, и҆ родила̀ є҆сѝ бг҃а сло́ва. пою́ще твоѐ ржⷭ҇тво̀, велича́емъ досто́йнѡ, всенепоро́чнаѧ ѻ҆трокови́це.

На хвали́техъ стїхи̑ры, на д҃, гла́съ и҃:

Бжⷭ҇твеннаѧ и҆ свѣтоно́снаѧ наста̀ па́мѧть въ по́стницѣхъ вели́кагѡ варлаа́ма, дꙋ́шꙋ и҆ тѣ́ло веселѧ́щаѧ: тѣ́мже прїиди́те празднолю́бцы, ꙗ҆́кѡ да наслади́мсѧ ны́нѣшнѧгѡ торжества̀: се́ бо на́ше зва́нїе прїи́де, всеѧ̀ вели́кїѧ рѡссі́йскїѧ землѝ ᲂу҆добре́нїе, вели́кагѡ же нова́града похвала̀ и҆ ᲂу҆твержде́нїе, снаслѣ́дникъ бо хрⷭ҇то́въ бы́въ, и҆ безпло́тныхъ житїѧ̀ подража́тель, мо́литсѧ сп҃сꙋ всѣ́хъ, ᲂу҆мири́ти мі́ръ и҆ спастѝ дꙋ́шы на́шѧ.

Два́жды.

Ꙗ҆́кѡ въ терпѣ́нїи мно́гъ, и҆ въ ѕло́бѣ ᲂу҆добоѿда́тливъ, въ животѣ̀ и҆ по сме́рти, ѻ҆́ч҃е, показа́лсѧ є҆сѝ: всѣ̑мъ вѣ́рою приходѧ́щымъ и҆сцѣлє́нїѧ ѻ҆би́льнѡ подава́еши, хромы̑мъ хожде́нїе, и҆ дꙋ́хи лꙋка̑выѧ прогонѧ́еши. па́мѧть твоѧ̀ сла́вна, и҆ ᲂу҆спе́нїе со ст҃ы́ми, варлаа́ме, ѻ҆́ч҃е на́шъ. тѣ́мже ᲂу҆вѣрѧ́еми, глаго́лемъ: па́мѧть пра́веднагѡ съ похвала́ми быва́етъ.

Дх҃а бжⷭ҇твеннагѡ бл҃года́тїю со́брани празднолю́бцы, варлаа́ма, благоче́стїю подража́телѧ, веселѧ́щесѧ, восхва́лимъ дне́сь, цр҃кве пресвѣ́тлаго свѣти́льника: тѣ́ло бо неꙋдобопокори́вое, воздержа́нїѧ брозда́ми ꙗ҆́вѣ низложѝ, и҆ бл҃гопокори́во дꙋшѝ повинꙋ́лъ є҆́сть. тѣ́мже бжⷭ҇твеннагѡ дх҃а сосꙋ́дъ досто́инъ ᲂу҆гото́васѧ, и҆ трⷪ҇цѣ со а҆́гг҃лы предстоѧ̀, мо́литсѧ непреста́ннѡ ѡ҆ ᲂу҆мире́нїи мі́ра и҆ спасе́нїи дꙋ́шъ на́шихъ.

Сла́ва, гла́съ и҃:

Всечестна́ѧ и҆ чꙋдотво́рнаѧ ра́ка, и҆дѣ́же лежи́тъ всечестно́е и҆ ст҃о́е тѣ́ло твоѐ, варлаа́ме, ѻ҆́ч҃е на́шъ, и҆сцѣлє́нїѧ неѡскꙋ́днѡ подае́тъ притека́ющымъ съ вѣ́рою, и҆ дꙋшетлѣ̑нныѧ стра̑сти и҆сцѣлѧ́ющи, мно́жєства же де́мѡнскаѧ ѿрѣва́ющи. тѣ́мже и҆ стада̀ мона́хѡвъ, со а҆рхїере́йскими ли̑ки чꙋдєсы̀ ᲂу҆дивлѧ́еми, достолѣ́пнѡ и҆ ра́достнѡ ѿ дꙋшѝ вопїе́мъ: бг҃облаже́нне и҆ прпⷣбне ѻ҆́ч҃е на́шъ варлаа́ме, молѝ хрⷭ҇та̀ бг҃а, ᲂу҆ще́дрити мі́ръ и҆ спастѝ дꙋ́шы на́шѧ.

И҆ ны́нѣ, бг҃оро́диченъ: Влⷣчце, прїимѝ моли́твꙋ ра̑бъ твои́хъ:

Славосло́вїе вели́кое. И҆ ча́съ а҃. И҆ ѿпꙋ́стъ.

На лїтꙋргі́и бл҃жє́нна, пѣ́снь г҃-ѧ и҆ ѕ҃. Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ: А҆пⷭ҇лъ къ гала́тѡмъ, зача́ло сг҃і. А҆ллилꙋ́їа, гла́съ ѕ҃: Блаже́нъ мꙋ́жъ, боѧ́йсѧ гдⷭ҇а: Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе лꙋкѝ, зача́ло к҃д. Прича́стенъ: Въ па́мѧть вѣ́чнꙋю бꙋ́детъ првⷣникъ: