Мѣ́сѧца тогѡ́же въ з҃і-й де́нь. Ст҃а́гѡ прⷪ҇ро́ка ѡ҆сі́и:

И҆ прпⷣбномꙋ́ченика а҆ндре́а кри́тскагѡ.

На Гдⷭ҇и, воззва́хъ, стїхи̑ры, гла́съ а҃. Поⷣ: Всехва́льнїи мч҃ницы:

Дх҃ъ ст҃ы́й, ꙳ ѿ ѻ҆ц҃а̀ и҆сходѧ́щїй, ꙳ твои́мъ ѧ҆зы́комъ ѡ҆предѣлѝ, ꙳ хрⷭ҇то́во хотѧ́щее ꙳ въ послѣ̑днѧѧ лѣ̑та прише́ствїе бы́ти, ꙳ на ѡ҆бновле́нїе тва́ри. ꙳ и҆ ны́нѣ сбытїѐ ꙳ ви́дѧще прорече́нныхъ, ꙳ твою̀, прⷪ҇ро́че, па́мѧть почита́емъ.

Во́лею блꙋдѧ́щее пре́жде, ꙳ ѿ тебє̀, чл҃вѣколю́бче, ꙳ є҆стество̀ на́ше ѡ҆брꙋчи́въ, ꙳ ѡ҆скверне́нїѧ и҆зба́вилъ є҆сѝ сїѐ, ꙳ тебѣ̀ самомꙋ̀ соедине́нїемъ ꙳ совокꙋпи́въ па́че ᲂу҆ма̀ неразлꙋ́чнѡ. ꙳ и҆ сегѡ̀ ѻ҆́бразъ прⷪ҇ро́къ тво́й бы́въ, ꙳ пре́жде блꙋдни́цы ꙳ цѣломꙋ́дреннѡ ввожда́ше.

Прⷪ҇ро́че бг҃оглаго́ливе, ꙳ твоѧ̑ глагѡ́ланїѧ ны́нѣ ви́дѧ ꙳ и҆спо́лнены бл҃года́тїю, ꙳ и҆ предстоѧ̀ бг҃ꙋ всѣ́хъ, ꙳ ѡ҆ всѣ́хъ моли́сѧ, ꙳ соверша́ющихъ вѣ́рою па́мѧть твою̀, ꙳ си̑мъ и҆спроша́ѧ ꙳ грѣхѡ́въ проще́нїе, ꙳ и҆ ми́ръ и҆ ве́лїю ми́лость.

И҆́ны стїхи̑ры прпⷣбнагѡ, гла́съ д҃. Подо́бенъ: Ꙗ҆́кѡ до́блѧ:

Прилѣпи́всѧ ѿ ю҆́ности ꙳ гдⷭ҇ꙋ, блаже́нне, ꙳ да́же до конца̀ тече́нїе соверши́лъ є҆сѝ: ꙳ крⷭ҇то́мъ бо воѡрꙋжи́всѧ, ꙳ рꙋ́цѣ на ра́ло возложи́лъ є҆сѝ ꙳ за́повѣдей гдⷭ҇нихъ, ꙗ҆́коже є҆́сть пи́сано. ꙳ є҆го́же молѝ, ѿ тлѝ и҆ бѣ́дъ и҆зба́витисѧ, ꙳ вѣ́рою творѧ́щымъ ꙳ всечестнꙋ́ю па́мѧть твою̀.

Ка́мень и҆ны́й прече́стенъ ꙳ бы́лъ є҆сѝ вѣ́рою, ꙳ не прїе́мъ крꙋше́нїѧ: ꙳ и҆́бо бїе́мь и҆ на землѝ валѧ́ѧсѧ, ꙳ вѣ́ры, сла́вне, ꙳ ᲂу҆гла́дилъ є҆сѝ пꙋ́ть, ꙳ благонастꙋ́пенъ положи́въ: ꙳ и҆ возрази́лъ є҆сѝ мнѣ̑нїѧ, ѻ҆́ч҃е, ꙳ кѡнстанті́новꙋ ѕлꙋ́ю сла́вꙋ, ꙳ ꙗ҆́коже гнило́е ѡ҆снова́нїе.

А҆пⷭ҇лѡвъ догма̑ты ꙳ воспита́нъ, блаже́нне, ꙳ и҆ ѻ҆тцє́въ бжⷭ҇твенныхъ ᲂу҆че́ньми, ꙳ вопло́щшагѡсѧ почествова́лъ є҆сѝ бг҃а зри́мое, ꙳ въ зна́менїихъ свѧще́нныхъ ꙳ и҆ честны́хъ и҆з̾ѡбраже́нїихъ: ꙳ тѣ́мже, сла́вне, за сїѧ̑ пострада́въ, ꙳ благоче́стїѧ показа́лсѧ є҆сѝ ᲂу҆чи́тель, ꙳ и҆ мꙋ́ченикѡвъ ᲂу҆добре́нїе.

Сла́ва, и҆ ны́нѣ, бг҃оро́диченъ. Подо́бенъ: то́йже:

Ꙗ҆́же бг҃а невмѣсти́маго ꙳ во чре́вѣ твое́мъ вмѣсти́вшаѧ, ꙳ чл҃вѣколю́бнѡ чл҃вѣ́ка бы́вша, ꙳ и҆ на́ше смѣше́нїе и҆зъ тебє̀ прїи́мша, ꙳ и҆ ѡ҆божи́вша ꙗ҆́вѣ, ꙳ не пре́зри менѐ, всечⷭ҇таѧ, ꙳ ны́нѣ скорбѧ́ща: ꙳ но ᲂу҆ще́дри ско́рѡ, ꙳ и҆ разли́чныѧ вражды́ же и҆ вре́да лꙋка́вагѡ свободѝ.

Крⷭ҇тобг҃оро́диченъ. Подо́бенъ: то́йже:

А҆́гнца и҆ па́стырѧ тѧ̀ ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тѝ вѣща́ше: ꙳ сн҃е возжелѣ́нне, ꙳ ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;

Тропа́рь, гла́съ д҃:

По́стнически предподвиза́всѧ на горѣ̀, ᲂу҆́мнаѧ врагѡ́въ ѡ҆полчє́нїѧ всеѻрꙋ́жїемъ крⷭ҇та̀ погꙋби́лъ є҆сѝ, всебл҃же́нне. па́ки же ко страда́льчествꙋ мꙋ́жески ѡ҆бле́клсѧ є҆сѝ, ᲂу҆би́въ копрѡнѵ́ма мече́мъ вѣ́ры: и҆ ѻ҆бои́хъ ра́ди вѣнча́лсѧ є҆сѝ ѿ бг҃а, прпⷣбномꙋ́чениче а҆ндре́е приснопа́мѧтне.

Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

На ᲂу҆́трени є҆ди́нъ канѡ́нъ ѻ҆ктѡ́иха: и҆ ст҃ы́хъ два̀.

Прⷪ҇ро́ка канѡ́нъ, є҆гѡ́же краегране́сїе:

Ѡ҆сі́єва пою̀ бг҃одꙋхновє́ннаѧ словеса̀. Ѳеофа́ново.

Гла́съ а҃. Пѣ́снь а҃. І҆рмо́съ:

Помо́гшемꙋ бг҃ꙋ во є҆гѵ́птѣ мѡѷсе́ови, и҆ тѣ́мъ фараѡ́на со всево́инствомъ погрꙋзи́вшемꙋ, побѣ́днꙋю пѣ́снь пои́мъ: ꙗ҆́кѡ просла́висѧ.

Ꙗ҆́кѡ бг҃оглаго́льникъ вои́стиннꙋ, ꙗ҆́кѡ прⷪ҇ро́къ, ѡ҆сі́е, жизнода́телю предстоѧ̀, прилѣ́жнѡ моли́сѧ, и҆зба́вити и҆скꙋше́нїй вѣ́рнѡ восхвалѧ́ющыѧ тѧ̀.

Твоеѧ̀ дꙋшѝ ви́дительное ѡ҆чи́стивъ ѿ скве́рнъ, сподо́билсѧ є҆сѝ прозира́ти свѣ́тлѡ бꙋ̑дꙋщаѧ: и҆ предглаго́лати нело́жнѡ, сла́вне, сбыва̑ющаѧсѧ.

Прозрѣ́нїѧ и҆сто́чникъ, мꙋ́дрость бж҃їѧ, бг҃овѣща́ннаго ѡ҆сі́ю, прⷪ҇ро́чества показа̀ рѣкꙋ̀ неѡскꙋ́днꙋ, кипѧ́щꙋ бжⷭ҇твєннаѧ ᲂу҆чє́нїѧ.

Бг҃оро́диченъ:

Ꙗ҆́вльшагосѧ хрⷭ҇та̀ ѿ дв҃ы на́съ ра́ди, ѿ є҆гѵ́пта ꙗ҆вле́ннѡ ѻ҆ц҃ъ призва̀, ꙗ҆́коже проречѐ ѡ҆сі́а дре́вле бг҃ови́дительнѣйшїй.

И҆́нъ канѡ́нъ прпⷣбнагѡ, є҆гѡ́же краегране́сїе:

Мꙋ́жества пою̀ тезоимени́тагѡ любо́вїю. І҆ѡ́сифъ.

Гла́съ в҃. Пѣ́снь а҃. І҆рмо́съ:

Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.

Мꙋ́жески стра̑сти плотскі̑ѧ, ѻ҆́ч҃е, порабо́тивъ, по́мысломъ мꙋ́жества ꙗ҆́кѡ тезоимени́тъ, мꙋчи́телей сꙋровство̀ пора́товалъ є҆сѝ, и҆ зако́ннѡ пострада́лъ є҆сѝ. тѣ́мъ тѧ̀ согла́снѡ вѣ́рою соше́дшесѧ ᲂу҆блажа́емъ.

Мы́сленнѡ ꙗ҆́кѡ ᲂу҆́гль разже́гсѧ теплото́ю бжⷭ҇твеннагѡ дх҃а, ле́дъ страсте́й раста́илъ є҆сѝ, потѡ́ки же кро́вными ѻ҆́гнь погаси́лъ є҆сѝ ѕлоче́стїѧ чꙋ́ждїй, велича́йше а҆ндре́е и҆сповѣ́дниче бг҃облаже́нне.

Свѧза́всѧ любо́вїю хрⷭ҇та̀, ѻ҆́ч҃е, ѿ ю҆́ности крⷭ҇тъ тво́й воспрїи́мъ ра́дꙋѧсѧ, томꙋ̀ послѣ́довалъ є҆сѝ, ѿре́ксѧ себє̀ сама́гѡ по́стничествомъ, и҆ и҆сповѣ́данїемъ, и҆ соверше́ннѣйшимъ страда́нїемъ.

Бг҃оро́диченъ:

Оу҆ны́нїѧ сно́мъ дꙋ́шꙋ всегда̀ ѡ҆тѧгчева́ѧ, къ твоемꙋ̀, дв҃о мт҃и пречⷭ҇таѧ, притека́ю застꙋпле́нїю: къ бо́дрости покаѧ́нїѧ воздви́гни, вѣ́чнꙋющагѡ тогда̀ и҆збавлѧ́ющи мѧ̀ мꙋче́нїѧ.

Пѣ́снь г҃. І҆рмо́съ:

Оу҆твердѝ менѐ, хрⷭ҇тѐ, на недви́жимомъ ка́мени за́повѣдей твои́хъ, и҆ просвѣти́ мѧ свѣ́томъ лица̀ твоегѡ̀: нѣ́сть бо свѧ́тъ па́че тебє̀, чл҃вѣколю́бче.

Оу҆че́нїемъ бг҃олѣ́пнымъ наꙋче́нъ бж҃їѧ и҆з̾ѧвле́нїѧ, ꙗ҆зы́кѡвъ зва́нїе ꙗ҆́вѣ провозгласи́лъ є҆сѝ, прⷪ҇ро́че, дх҃омъ ст҃ы́мъ воѡбража́емь.

Бꙋ̑дꙋщаѧ предзрѣ́ти ꙗ҆́кѡ настоѧ̑щаѧ, бг҃омꙋ́дре, сподо́билсѧ є҆сѝ, і҆ꙋде́йское ꙗ҆́снѡ ѿпаде́нїе возвѣща́ѧ, и҆ зако́нныхъ потребле́нїе.

И҆зба́витисѧ і҆и҃лю, ни бра́нїю, ни лꙋ́комъ, ни всеѻрꙋ́жїемъ, но въ гдⷭ҇ѣ бз҃ѣ вседержи́тели, проре́клъ є҆сѝ, воплоще́нїе сло́ва зна́менꙋѧ на́мъ.

Бг҃оро́диченъ:

Ра́дꙋйсѧ, дв҃о чⷭ҇тна́ѧ, заче́ншаѧ сло́во воплоще́ное, свое́ю ны̀ и҆зба́вльшаго ѿ ле́сти кро́вїю ст҃о́ю и҆ тѣ́ломъ.

И҆́нъ. І҆рмо́съ:

На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ моѝ, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

Оу҆тверди́въ ра́зꙋма твоегѡ̀ стѡпы̀, ѻ҆́ч҃е, на ка́мени любвѐ хрⷭ҇то́вы, ѿню́дъ дохновє́нїи не поколеба́лсѧ є҆сѝ проти́вными, вопїѧ̀ творцꙋ̀ твоемꙋ̀: ты̀ є҆сѝ бг҃ъ на́шъ, и҆ нѣ́сть пра́веденъ па́че тебє̀, гдⷭ҇и.

И҆сцѣлє́нїѧ и҆ пре́жде конца̀ и҆ по концѣ̀ и҆сточа́ѧ, помоществꙋ́еши сꙋ́щымъ въ не́мощехъ, и҆ дꙋ́хи нечи̑стыѧ ѿго́ниши, а҆ндре́е, прпⷣбне, вопїѧ̀ созда́телю твоемꙋ̀: ты̀ є҆сѝ бг҃ъ на́шъ, и҆ нѣ́сть пра́веденъ па́че тебє̀, гдⷭ҇и.

По́стничества слеза́ми ѡ҆мове́нъ, кро́вїю мч҃ническою ᲂу҆добри́лсѧ є҆сѝ, и҆ ве́сь краснѣ́йшъ показа́всѧ, вопїѧ̀, восте́клъ є҆сѝ къ жела́емомꙋ: ты̀ є҆сѝ бг҃ъ на́шъ, и҆ нѣ́сть пра́веденъ па́че тебє̀, гдⷭ҇и.

Бг҃оро́диченъ:

Пло́ти подо́бїемъ бы́вшаго, ѻ҆ц҃ꙋ̀ є҆диносꙋ́щна бг҃а сло́во родила̀ є҆сѝ, всенепоро́чнаѧ, па́че є҆стества̀ дв҃а пребы́вши и҆ по ржⷭ҇твѣ̀. сегѡ̀ ра́ди вѣ́рою тѧ̀ ᲂу҆блажа́емъ.

Конда́къ, гла́съ г҃. Подо́бенъ: Дв҃а дне́сь:

Пра́зднꙋетъ дне́сь ца́рствꙋющїй гра́дъ пра́здникъ пресвѣ́тлый свѣтоно́сныѧ твоеѧ̀ па́мѧти, всѧ́кїй призыва́ѧ гра́дъ и҆ странꙋ̀: ра́дꙋетсѧ бо, ꙗ҆́кѡ и҆мѣ́ѧ сокро́вище ве́лїе, многострада́льное твоѐ тѣ́ло, а҆ндре́е мꙋ́чениче, правосла́вїѧ свѣти́льниче.

Та́же сѣда́ленъ, гла́съ и҃. Подо́бенъ: Премꙋ́дрости:

Чи́сто се́рдце ѿ страсте́й, прⷪ҇ро́че, стѧжа́въ, ꙗ҆́кѡ и҆́стиннѡ ѻ҆рга́нъ бы́лъ є҆сѝ сли́чный дх҃а, ѿ негѡ̀ бога́тнѡ, мꙋ́дре, просвѣща́емь, и҆ бꙋ́дꙋщихъ всѣ́хъ зна́нїе прїи́мъ. тѣ́мъ соше́дшесѧ свѧтꙋ́ю твою̀ па́мѧть вѣ́рнѡ соверша́емъ. сп҃са сла́вѧще, ѡ҆сі́е приснопа́мѧтне: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.

Сла́ва, прпⷣбнагѡ, гла́съ д҃. Подо́бенъ: Вознесы́йсѧ:

Въ постѣ̀ ди́внаго и҆ страда́нїи восхва́лимъ, вѣ́рнїи, по до́лгꙋ, ꙗ҆́кѡ благоче́стїѧ проповѣ́дника, и҆ побо́рника крѣ́пкаго: се́й бо безъ стра́ха гноеиме́нномꙋ противлѧ́ѧсѧ, чествова́тисѧ проповѣ́да хрⷭ҇то́вꙋ ѻ҆́бразꙋ, ꙗ҆́кѡ по́стникѡвъ всѣ́хъ ᲂу҆добре́нїе, и҆ мꙋ́ченикѡвъ мꙋ́жества подо́бїе.

И҆ ны́нѣ, бг҃оро́диченъ:

И҆́же на прⷭ҇то́лѣ херꙋві́мстѣмъ сѣдѧ́й, и҆ въ нѣ́дрѣхъ ѻ҆́ч҃ихъ водворѧ́ѧсѧ, ꙗ҆́кѡ на прⷭ҇то́лѣ ст҃ѣ́мъ сѣди́тъ свое́мъ, влⷣчце, въ нѣ́дрѣхъ твои́хъ: вопло́щсѧ бо бг҃ъ вои́стиннꙋ, воцр҃и́сѧ надъ всѣ́ми ꙗ҆зы́ки, и҆ разꙋ́мнѡ ны́нѣ пои́мъ є҆мꙋ̀: є҆го́же ᲂу҆молѝ спасти́сѧ рабѡ́мъ твои̑мъ.

Крⷭ҇тобг҃оро́диченъ:

И҆зъ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве.

Пѣ́снь д҃. І҆рмо́съ:

Разꙋмѣ́хъ, всеси́льне, твоѐ смотре́нїе, и҆ со стра́хомъ просла́вихъ тѧ̀, сп҃се.

Ѡ҆сі́е, бг҃ови́днѣйшее ѻ҆́ко цр҃ко́вное, бѣ́дъ и҆зба́ви хва́лѧщыѧ тѧ̀.

Свѣтлѣ́йшее и҆ твердѣ́йшее дх҃а прїѧ́телище, моли́сѧ спастѝ воспѣва́ющыѧ тѧ̀.

Сꙋдїѝ ты̀ всѣ́хъ предстоѧ̀, ꙗ҆́кѡ бжⷭ҇твенъ прⷪ҇ро́къ, страсте́й мѧ̀ и҆зба́ви моли́твами твои́ми.

Бг҃оро́диченъ:

Превозшла̀ є҆сѝ, приснодв҃о, а҆́гг҃льскїѧ чи́ны, творца̀ си́хъ чревоноси́вши.

И҆́нъ. І҆рмо́съ:

Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Послꙋшли́въ бы́въ хрⷭ҇то́выхъ за́повѣдей, тогѡ̀ подо́бїю, ѻ҆́ч҃е, че́стнѡ поклонѧ́лсѧ є҆сѝ. тѣ́мъ пребеззако́нный тѧ̀ многоѻбра́зными ра́нами ᲂу҆мертвѝ.

Мѷродохнове́нъ добродѣ́телей благово́нїемъ бы́въ, во гро́бѣ лежа̀ благово́нствиши ли́ца призыва́ющихъ тѧ̀, несомнѣ́ннымъ се́рдцемъ, ѻ҆́ч҃е прпⷣбне.

Недꙋ́говавша мамѡ́на всеѕлѣ́йшаго, прпⷣбне, ѡ҆каѧ́ннѡ є҆́ресїю, со дерзнове́нїемъ ѡ҆бличи́лъ є҆сѝ, побо́рникъ бы́въ правосла́вныхъ, а҆ндре́е досточꙋ́дне.

Бг҃оро́диченъ:

Ꙗ҆́кѡ благопло́днаѧ возрасти́ла є҆сѝ бл҃года́тный кла́съ, пита́ющїй всѧ̑ правосла́внѡ почита́ющыѧ тѧ̀, влⷣчце всепѣ́таѧ, и҆ и҆зъ тебє̀ вопло́щшагосѧ сло́ва, всечⷭ҇таѧ.

Пѣ́снь є҃. І҆рмо́съ:

Ѿ но́щи ᲂу҆́тренююще, воспѣва́емъ тѧ̀, хрⷭ҇тѐ бж҃е, ѡ҆бнища́вшаго на́съ ра́ди, и҆ крⷭ҇тъ и҆ сме́ртїю пло́тїю претерпѣ́вшаго.

Ми́лостивнѡ дви́жимь, наꙋчи́лъ є҆сѝ на́съ бж҃їю долготерпѣ́нїю, благоꙋтро́бїю же и҆ бл҃гости, є҆́юже всѧ̑ щади́тъ, прⷪ҇ро́че бг҃оглаго́ливе.

Оу҆мертви́въ сме́рть воста̀ хрⷭ҇то́съ, ꙗ҆́коже мꙋ́дрое твоѐ прорече́нїе, бг҃огла́се, провозвѣстѝ, и҆ жи́знь сꙋ́щымъ во а҆́дѣ дꙋша́мъ дарова̀.

Ѿ глꙋбины̀ мѧ̀ грѣхо́вныѧ, прⷪ҇ро́че ѡ҆сі́е, твои́ми моли́твами и҆схи́ти, дерзнове́нїе беззазо́рное ко хрⷭ҇тꙋ̀ и҆мѣ́ѧ, бг҃омꙋ́дре пребога́те.

Бг҃оро́диченъ:

Всѣ́хъ гдⷭ҇ь, и҆ всѣ́хъ цр҃ь, ѻ҆ц҃ꙋ̀ собезнача́льный, подъ лѣ́томъ и҆зъ тебє̀ бы́сть, бцⷣе дв҃о, и҆ пло́ть показа́сѧ.

И҆́нъ. І҆рмо́съ:

Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо, ра́звѣ тебє̀, бо́га не зна́ю.

Ѡ҆мраче́нїе возненави́дѣвъ, ѻ҆́ч҃е, грѣха̀, ве́сь блиста́нїемъ безстра́стїѧ свѣ́тъ ꙗ҆ви́лсѧ є҆сѝ: и҆ просвѣща́еши вѣ̑рныѧ приходѧ́щыѧ бжⷭ҇твенномꙋ твоемꙋ̀ гро́бꙋ, цѣле́нїй зарѧ́ми, бж҃їею благода́тїю.

Ве́сь бж҃їе прїѧ́телище ꙗ҆ви́лсѧ є҆сѝ, до́брѣ пожи́въ, и҆ доблемꙋ́дреннѡ пострада́въ, ѻ҆́ч҃е: и҆ ны́нѣ во гро́бѣ лежа̀ пребыва́еши цѣ́лъ, блаже́нне, и҆ неразрꙋши́мь, всѣ́хъ вѣ́рныхъ разрѣша́ѧ стра̑сти.

Ю҆́ношески до́блествовавъ, всебл҃же́нне, на де́мѡны, и҆ на человѣ́ки є҆реті́чествꙋющыѧ, вѣ́чнꙋющагѡ сподо́билсѧ є҆сѝ благосла́вїѧ, и҆ вѣнцє́въ, а҆ндре́е прпⷣбне: тѣ́мъ вѣ́рнїи тѧ̀ при́снѡ ᲂу҆блажа́емъ.

Бг҃оро́диченъ:

Но́сиши хрⷭ҇та̀ на ѡ҆б̾ѧ́тїѧхъ неизрече́ннѡ роди́вши, ѡ҆б̾е́млющаго ѕло́бѣ прекло́ншыѧсѧ, и҆ лꙋка́вомꙋ ѡ҆каѧ́ннѡ порабощє́нныѧ, ѻ҆трокови́це всенепоро́чнаѧ: тѣ́мъ тѧ̀ вѣ́рнїи при́снѡ ᲂу҆блажа́емъ.

Пѣ́снь ѕ҃. І҆рмо́съ:

Прⷪ҇ро́ка спа́слъ є҆сѝ ѿ ки́та, чл҃вѣколю́бче, и҆ менѐ и҆зъ глꙋбины̀ прегрѣше́нїй возведѝ, молю́сѧ.

Провозглаша́ѧ бꙋ̑дꙋщаѧ, ѡ҆сі́е всебл҃же́нне, є҆́же къ человѣ́кѡмъ сло́ва возвѣсти́лъ є҆сѝ соше́ствїе.

Оу҆мерщвлє́нныѧ грѣха́ми, жи́знь безсме́ртнаѧ, ѿ а҆́довыхъ предѣ̑лъ, ꙗ҆́коже проре́клъ є҆сѝ, возведѐ.

Зако́нныхъ ѿѧ́тїе, і҆ꙋде́євъ ѿпаде́нїе, и҆ ꙗ҆зы́кѡвъ введе́нїе, прⷪ҇ро́че, ꙗ҆ви́лъ є҆сѝ.

Бг҃оро́диченъ:

И҆зъ чре́ва твоегѡ̀ возсїѧ̀ бг҃ъ сло́во, всенепоро́чнаѧ, пло́тїю на́съ ра́ди неизрече́ннѡ ѡ҆бло́жсѧ ꙗ҆́кѡ бл҃гоꙋтро́бенъ.

И҆́нъ. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Въ темни́цꙋ тѧ̀ беззако́нный вве́рже, влⷣкою, а҆ндре́е, сохранѧ́ема, и҆ тогѡ̀ соблюда́юща непремѣ́ннѡ бжⷭ҇твенное хотѣ́нїе.

Растерза́емо тѣ́ло небре́глъ є҆сѝ, и҆ раздроблѧ́емо ра́нами, бл҃же́нне: но ꙗ҆́коже и҆но́мꙋ стра́ждꙋщꙋ терпѣ́лъ є҆сѝ, бжⷭ҇твеннѡ ᲂу҆крѣплѧ́емь.

Ꙗ҆́кѡ многоцѣ́нное бога́тство кры́емое, ѻ҆́ч҃е, ꙗ҆влѧ́ешисѧ, предлежа̀ лицє́мъ благочести́выхъ, и҆ чꙋдесы̀ всѧ̑ ѡ҆богаща́еши почита́ющыѧ тѧ̀.

Бг҃оро́диченъ:

Разꙋ́мный тѧ̀ свѣ́щникъ прозрѧ́ше дре́вле прⷪ҇ро́къ, бжⷭ҇твеннꙋю свѣщꙋ̀ хрⷭ҇та̀, чⷭ҇таѧ, носѧ́щꙋ, и҆́мже всѝ мы̀ просвѣти́хомсѧ.

Конда́къ, гла́съ и҃. Подо́бенъ: Взбра́нной:

Мꙋ́жества тезоимени́томꙋ благодаре́нїе, ꙗ҆́кѡ бл҃гоче́стїѧ тайноглаго́льникꙋ, похва̑льнаѧ воззове́мъ, ѿ любвѐ тебѣ̀, бг҃обл҃же́нне: но ꙗ҆́кѡ и҆мѣ́ѧ дерзнове́нїе ко гдⷭ҇ꙋ, ѿ всѧ́кихъ лю́тыхъ ны̀ спасѝ, да пое́мъ: ра́дꙋйсѧ, ѻ҆́ч҃е приснопа́мѧтне.

І҆́косъ:

А҆́гг҃лъ и҆́стины ѿ кри́та ꙗ҆ви́лсѧ є҆сѝ, ѡ҆бличи́въ ѕлочє́стїѧ, ѻ҆́ч҃е, и҆ съ бг҃осло́внымъ гла́сомъ ра́нима тѧ̀ зрѧ̀, всемꙋ́дре, ᲂу҆жаса́юсѧ стра́сти, зовѧ̀ и҆ вопїѧ́ ти сицева̑ѧ: ра́дꙋйсѧ, бж҃їй крѣ́пкїй ѻ҆рꙋ́жниче. ра́дꙋйсѧ, гдⷭ҇ень вѣ́рный ᲂу҆го́дниче. ра́дꙋйсѧ, хꙋ́льныхъ врагѡ́въ сопротивобо́рниче. ра́дꙋйсѧ, ѕлоглаго́ливыхъ человѣ́кѡвъ ѡ҆бꙋзда́нїе. ра́дꙋйсѧ, ꙗ҆́кѡ пострада́лъ є҆сѝ за ѻ҆́бразъ хрⷭ҇то́въ. ра́дꙋйсѧ, ꙗ҆́кѡ восхласти́лъ є҆сѝ сла̑сти плотскі̑ѧ. ра́дꙋйсѧ, ꙗ҆́кѡ поще́нїемъ нача̑ла тмы̀ побѣди́лъ є҆сѝ. ра́дꙋйсѧ, ꙗ҆́кѡ страда́нїемъ копрѡнѵ́мꙋ сопроти́вилсѧ є҆сѝ. ра́дꙋйсѧ, и҆сто́чниче чꙋде́съ приснотекꙋ́щїй. ра́дꙋйсѧ, зе́млю ᲂу҆ѧсни́вый страда́ньми твои́ми. ра́дꙋйсѧ, вѣ́рныхъ жили́ще, ѻ҆́ч҃е. ра́дꙋйсѧ, на́шъ предста́телю и҆ и҆зба́вителю. ра́дꙋйсѧ, ѻ҆́ч҃е приснопа́мѧтне.

Пѣ́снь з҃. І҆рмо́съ:

А҆враа́мстїи ѻ҆́троцы въ пещѝ трⷪ҇цꙋ проѡбрази́вше, ѻ҆́гненный пла́мень на ро́сꙋ преложи́ша, и҆ пою́ще вопїѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.

Па́че є҆стества̀ просвѣще́нїемъ, ѡ҆сі́е, ᲂу҆́мъ просвѣти́въ тво́й, бꙋ́дꙋщихъ, бл҃же́нне, зна́нїемъ ѡ҆богати́лсѧ є҆сѝ, влⷣцѣ зовы́й: бл҃гослове́нъ є҆сѝ бж҃е ѻ҆тє́цъ на́шихъ.

Ты̀ въ рꙋка́хъ прⷪ҇ро́кѡвъ ᲂу҆подо́бивсѧ, ᲂу҆мно́жилъ є҆сѝ, безсме́ртне, видѣ̑нїѧ, сп҃се, разли́чнѡ ѡ҆бразꙋ́емь тебѣ̀ вѣ́рнѡ вопїю́щымъ: бл҃гослове́нъ є҆сѝ бж҃е ѻ҆тє́цъ на́шихъ.

І҆и҃левъ ты̀ и҆сто́чникъ, спасе́нїѧ пролива́ющїй во́ды, рѣкꙋ̀ ми́рнꙋю хрⷭ҇та̀ проповѣ́даѧ, ѡ҆сі́е, є҆мꙋ́же вопїе́мъ: бл҃гослове́нъ є҆сѝ бж҃е ѻ҆тє́цъ на́шихъ.

Бг҃оро́диченъ:

И҆зъ безнача́льнагѡ ѻ҆ц҃а̀ возсїѧ́въ, и҆зъ тебє̀ воплоти́сѧ, бг҃ома́ти ѻ҆трокови́це, за ми́лость неизрече́ннꙋю, є҆мꙋ́же пою́ще, вопїе́мъ: бл҃гослове́нъ є҆сѝ бж҃е ѻ҆тє́цъ на́шихъ.

И҆́нъ. І҆рмо́съ:

Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

Возвыша́ємаѧ волнє́нїѧ лꙋка́вствїѧ, твоегѡ̀ ᲂу҆ма̀ не поколеба́ша, а҆ндре́е сла́вне, на ка́мени зна́нїѧ хрⷭ҇то́ва стоѧ́ща. тѣ́мъ небꙋ́рное приста́нище ꙗ҆́вѣ ѡ҆бꙋрева́ємымъ бы́лъ є҆сѝ.

Бꙋ́ими взыска́ньми лꙋкавомꙋ́дрый ᲂу҆мо́мъ ѡ҆мрача́емый ᲂу҆кра́сти ѡ҆кꙋша́шесѧ тѧ̀, бг҃осло́вїѧ свѣтлостьмѝ ᲂу҆добрѧ́ема, но ꙗ҆ви́сѧ смѣ́ха досто́инъ, мꙋ́дре, и҆спо́лнивсѧ стꙋда̀ дерзнове́нїемъ твои́мъ.

Оу҆́мъ тво́й манове́ньми бжⷭ҇твеннѣйшими ᲂу҆краша́емь, а҆ндре́е досточꙋ́дне, ѕвѣзда̀ всесвѣ́тлаѧ всѣ̑мъ показа́сѧ, чꙋдесы̀ коего́ждо вѣ̑рныѧ просвѣща́ѧ, хва́лѧщыѧ тѧ̀.

Хра́мъ была̀ є҆сѝ жива́гѡ бг҃а, въ не́мже жили́ще неизглаго́ланно сотворѝ, дв҃о всепѣ́таѧ, на нб҃сѣ́хъ ѡ҆бита́ѧй, и҆ бла́гости ра́ди мно́гїѧ чл҃вѣ́къ бы́ти и҆зво́ливъ.

Пѣ́снь и҃. І҆рмо́съ:

Въ пла́мени ѻ҆́гненнѣ горѧ́щїѧ пе́щи сохра́ншаго дѣ́ти, и҆ во зра́цѣ а҆́гг҃ла снизше́дшаго къ ни̑мъ, по́йте гдⷭ҇а, и҆ превозноси́те є҆го̀ во вѣ́ки.

Па́че постиже́нїѧ прⷪ҇ро́кѡмъ да́ннаѧ ѿ бжⷭ҇твеннагѡ да́ра предзна́тельное дѣ́йство, и҆ бꙋ́дꙋщихъ зна́нїе, пѣ́ти гдⷭ҇а, и҆ превозноша́ти є҆го̀ во вѣ́ки.

Оу҆ста̀ бг҃одохновє́ннаѧ стѧжа́въ, и҆ ѧ҆зы́къ бг҃оглаго́ливъ, ѡ҆сі́е, бг҃оче́стїѧ свѣ́тъ просвѣща́ющь пое́ши: по́йте гдⷭ҇а, и҆ превозноси́те є҆го̀ во вѣ́ки.

Словесы̀ и҆ дѣѧ́ньми прⷪ҇ро́чествꙋѧ, ѡ҆блича́еши лю́ди блꙋ́дствовавшыѧ, ѡ҆бра́знѡ, пребога́те, наꙋча́ѧ пѣ́ти: по́йте гдⷭ҇а, и҆ превозноси́те є҆го̀ во вѣ́ки.

Бг҃оро́диченъ:

Соприсносꙋ́щное бж҃їе бг҃ъ сло́во ѿ ст҃ы́ѧ дв҃ы вопло́щсѧ ꙗ҆ви́сѧ, вѣ́рою вопїю́щымъ: по́йте гдⷭ҇а, и҆ превозноси́те є҆го̀ во вѣ́ки.

И҆́нъ. І҆рмо́съ:

Пе́щь и҆ногда̀ ѻ҆́гненнаѧ въ вавѷлѡ́нѣ дѣ́йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.

Стра̑сти плотскі̑ѧ, мꙋ́дре, пред̾ꙋмертви́въ по́стническими пѡ́двиги, пострада́лъ є҆сѝ крѣпча́йше, сп҃сово подо́бїе, и҆ приснодв҃ы, прпⷣбне, и҆ ст҃ы́хъ чествова́тельнѡ лобыза́ѧ.

Ꙗ҆́ростнѡ на хрⷭ҇та̀ неи́стовствꙋюще, ꙗ҆́кѡ ѕвѣ́рїе свирѣ́пїи возложи́ша, ѻ҆́ч҃е, ᲂу҆мертви́ти тѧ̀. тѣ́мъ влекꙋ́ще и҆ бїю́ще вверго́ша въ про́пасть, свидѣ́телѧ и҆́стины тебѐ ꙗ҆́вственнѡ содѣ́ловающе.

Чꙋдесы̀ вѣ̑рныѧ ꙗ҆́кѡ вода́ми напаѧ́еши, и҆ ѿго́ниши, всеблаже́нне, лꙋка́вствїѧ дꙋ́хи, и҆ ѡ҆чища́еши недꙋ́ги, благода́ть врачева́нїй свы́ше прїе́мъ ѿ хрⷭ҇та̀ бг҃а на́шегѡ.

Бг҃оро́диченъ:

Ꙗ҆ви́ласѧ є҆сѝ нб҃съ дв҃о простра́ннѣйши, бг҃а во ᲂу҆тро́бѣ твое́й вмѣсти́вшаѧ, всѣ́ми невмѣсти́маго: є҆го́же молѝ и҆зба́вити ᲂу҆тѣсне́нїѧ, чⷭ҇таѧ влⷣчце, дꙋшетлѣ́ннагѡ, благоче́стнѡ воспѣва́ющыѧ тѧ̀.

Пѣ́снь ѳ҃. І҆рмо́съ:

Ра́дꙋйсѧ, дѣ́вственнаѧ похвало̀, ра́дꙋйсѧ, мт҃и пречⷭ҇таѧ, ю҆́же всѧ̀ тва́рь бжⷭ҇твенными пѣ́сньми велича́емъ.

Че́сть ꙗ҆́кѡ прⷪ҇ро́къ, прїѧ́лъ є҆сѝ, ѡ҆сі́е, прїе́мъ вѣне́цъ благолѣ́пїѧ ѿ бг҃а, всеблаже́нне.

Всѣ́мъ свѣ́томъ ѡ҆зарѧ́емь хрⷭ҇то́вымъ всеизрѧ́дне, да́ждь твои́ми моли́твами, сего̀ ми́лостива пою́щымъ тѧ̀.

Хвала́ми съ чи́нми а҆́гг҃льскими, ѡ҆сі́е, предстои́ши влⷣкꙋ хвалѧ̀, пожи́въ житїѐ равноа́гг҃льное.

Бг҃оро́диченъ:

Спастѝ восхотѣ́въ человѣ́ка сп҃съ и҆ гдⷭ҇ь, ѿ пречⷭ҇тыѧ дв҃ы въ пло́ть на́шꙋ ѡ҆дѣ́ѧсѧ.

И҆́нъ. І҆рмо́съ:

Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Сѐ, ѻ҆́ч҃е прпⷣбне, тече́нїе твоѐ соверши́въ, правосла́внꙋю вѣ́рꙋ соблю́лъ є҆сѝ непоро́чнꙋ: є҆ѧ́же ра́ди пострада́въ зако́ннѡ, вѣне́цъ же сꙋгꙋ́бъ прїѧ́лъ є҆сѝ свы́ше, ꙗ҆́кѡ мꙋ́ченикъ непобѣди́мь, и҆ по́стникъ непобо́ренъ.

Ꙗ҆́кѡ крі́нъ сладково́нный, и҆ ꙗ҆́кѡ шипо́къ, ѻ҆́ч҃е, процвѣ́лъ є҆сѝ, въ цвѣ́тницѣ бжⷭ҇твеннагѡ ꙗ҆́вѣ поще́нїѧ, и҆ благово́нствꙋеши ꙗ҆́кѡ ке́дръ, мꙋ́ченически просвѣще́нъ, а҆ндре́е всехва́льне, мона́шествꙋющихъ ᲂу҆добре́нїе.

Зна́меньми и҆ чꙋдесы̀ ꙗ҆́вѣ ᲂу҆краша́емь, невреди́мь є҆сѝ всѣ̑мъ на видѣ́нїе лежа̀, всебл҃же́нне а҆ндре́е, и҆ дꙋ́шы просвѣща́ѧ вѣ́рою те́плою приходѧ́щихъ тебѣ̀, и҆ всегда̀ блажа́щихъ тѧ̀.

Де́нь пра́зднственъ и҆ весе́лїѧ и҆спо́лненъ, свѧтꙋ́ю твою̀ па́мѧть творѧ́ще дне́сь, вѣ́рою вопїе́мъ тебѣ̀, ѻ҆́ч҃е: къ бг҃ꙋ ст҃ы́ми твои́ми моли́твами, всѣ́хъ на́съ и҆зба́ви жите́йскихъ ѡ҆бстоѧ́нїй.

Бг҃оро́диченъ:

Свѣ́та селе́нїе ᲂу҆тро́ба твоѧ̀ бы́сть, просвѣ́щшагѡ мі́ръ зарѧ́ми бжⷭ҇тва̀, и҆ невѣ́дѣнїѧ тмꙋ̀ ѿ землѝ, всенепоро́чнаѧ ѻ҆трокови́це, соверше́ннѡ ѿгна́вшагѡ: тогѡ̀ ра́ди тѧ̀ сла́вимъ.

Свѣти́ленъ. Подо́бенъ: Со ᲂу҆ченикѝ взы́демъ:

А҆ндре́а добропобѣ́дника похва́лимъ всѝ, бж҃е́ственнѡ пра́зднꙋюще честнꙋ́ю є҆гѡ̀ па́мѧть, ꙗ҆́кѡ да и҆зба́вимсѧ ѿ недꙋ̑гъ: се́й бо сп҃сѡва честна̑ѧ воѡбражє́нїѧ, и҆ ст҃ы́хъ всѣ́хъ всеблагоче́стнѡ чествова́ти проповѣ́да. тѣ́мъ вѣне́цъ на нб҃сѣ́хъ прїе́мь, со а҆́гг҃лы ра́дꙋетсѧ.

Бг҃оро́диченъ:

Го́рꙋ бж҃їю прест҃ꙋ́ю, и҆ свѣти́льникъ, и҆ ста́мнꙋ, и҆ трапе́зꙋ, и҆ мо́стъ, же́злъ же и҆ свѣщꙋ̀, и҆ бжⷭ҇твенный прⷭ҇то́лъ, и҆ две́рь, и҆ хра́мъ, и҆ черто́гъ, воспои́мъ, бг҃омꙋ́дрїи, чⷭ҇тꙋю и҆ дв҃ꙋ, и҆зъ неѧ́же бг҃ъ воплоти́всѧ невра́щнѡ и҆ па́че є҆стества̀, ѡ҆божѝ прїѧ́тїе неизрече́ннымъ є҆дине́нїемъ.