Мѣ́сѧца тогѡ́же въ к҃в-й де́нь. Ст҃а́гѡ равноапо́стольнагѡ а҆ве́ркїа є҆пі́скопа, і҆ерапо́льскагѡ чꙋдотво́рца:

И҆ ст҃ы́хъ седмѝ ѻ҆трокѡ́въ, и҆̀же во є҆фе́сѣ:

Въ то́йже де́нь пра́зднꙋемъ прест҃ѣ́й бцⷣѣ чꙋдотво́рныѧ і҆кѡ́ны каза́нскїѧ.

Слꙋ́жба є҆ѧ̀ пи́сана по се́й слꙋ́жбѣ.

На Гдⷭ҇и, воззва́хъ, стїхи̑ры ст҃и́телю, гла́съ в҃. Поⷣ: Є҆гда̀ ѿ дре́ва:

Бжⷭ҇твенныхъ ᲂу҆че́нїй блиста́ньми разрꙋши́лъ є҆сѝ многобо́жнꙋю но́щь, ѻ҆́ч҃е а҆ве́ркїе, ᲂу҆́тро же возсїѧ́въ, сы́ны днѐ соверши́лъ є҆сѝ, во мра́цѣ сꙋ́щыѧ пре́жде, і҆ера́рше, чꙋдеса̀ пресла̑внаѧ показа́въ: тѣ́мъ свѧтꙋ́ю твою̀ па́мѧть вѣ́рою пра́зднꙋемъ всѝ, пѣсносло́вѧще тѧ̀, бг҃одохнове́нне.

Въ сосꙋ́дѣ є҆ди́нѣмъ чꙋдодѣ́йствꙋѧ, вїно́ бо и҆ є҆ле́й, ѻ҆́ч҃е, и҆ ви́дъ дрꙋгі́й совокꙋпи́лъ є҆сѝ, блюдо́ма внегда̀ тре́бовати несмѣ́шена бжⷭ҇твенною бл҃года́тїю: те́плыхъ же во́дъ дарова́нїе, мл҃твою и҆стещѝ сотвори́лъ є҆сѝ, недꙋ́ги и҆сцѣлѧ́ѧ всѧ́чєскїѧ, приходѧ́щихъ тебѣ̀ вѣ́рою, и҆ блажа́щихъ тѧ̀, а҆ве́ркїе.

Ве́сь прилѣжа̀ бг҃ꙋ, бжⷭ҇твенныхъ и҆спо́лнитель ᲂу҆че́нїй ꙗ҆ви́лсѧ є҆сѝ, а҆ве́ркїе: бл҃года́ть же прїе́мъ ѿ высоты̀, прпⷣбне, недꙋ́ги ѿгна́лъ є҆сѝ разли̑чныѧ человѣ́кѡмъ: трє́бища і҆́дѡльскаѧ разори́лъ є҆сѝ: зна́нїе насади́лъ є҆сѝ бжⷭ҇твенное, невѣ́дѣнїемъ ѻ҆каѧ́ннѡ пре́жде бѣ́дствꙋющымъ, блаже́нне.

И҆́ны стїхи̑ры мꙋ́ченикѡвъ, гла́съ д҃. Подо́бенъ: Ꙗ҆́кѡ до́блѧ:

Пребеззакѡ́ннаѧ велѣ̑нїѧ, ꙳ бг҃ꙋ поко́ршесѧ, ꙳ ѻ҆́троцы бл҃же́ннїи небрего́ша, ꙳ и҆ свѧ́зани бы́вше, ꙳ разрѣши́ша пре́лести соꙋ́зъ, ꙳ и҆ са́нъ мїрскі́й ѿве́ргше, ꙳ прїѧ́ша сла́вꙋ, ꙗ҆̀же тѣ́хъ пресла́внѡ соверши́вшꙋ, ꙳ и҆ го́рнѧгѡ и҆схода́таившꙋ ꙳ црⷭ҇твїѧ наслажде́нїе.

Къ по́двигѡмъ себѐ страда́нїѧ, ст҃і́и, ꙳ крѣ́пкѡ ѡ҆бꙋчи́вше, ꙳ скры́стесѧ въ верте́пѣ, ꙳ моле́ньми непреста́нными ꙳ ко гдⷭ҇ꙋ молѧ́щесѧ, ꙳ крѣ́пость пода́ти и҆ си́лꙋ, ꙳ и҆́миже сꙋдьба́ми чл҃вѣколю́бецъ вѣ́сть: ꙳ ᲂу҆снꙋ́ти въ ми́рѣ всѣ̑мъ ва́мъ, ꙳ бг҃онача́льнѡ повелѣва́етъ.

Бг҃осо́бранный по́лкъ, ꙳ ли́къ бл҃же́нный, ꙳ мч҃ническое собра́нїе неꙋдобопобори́мое, ꙳ цр҃кви бжⷭ҇твеннѣй кра́сное торжество̀, ꙳ нерасте́рзное совокꙋпле́нїе, ꙳ во́инство непобѣди́мое, ꙳ незы́бленное бл҃гоче́стїѧ ѡ҆снова́нїе, ꙳ прїиди́те всѝ воспои́мъ ᲂу҆се́рднѡ, ꙳ бл҃гоче́стїѧ свидѣ́тели.

Сла́ва, гла́съ г҃. І҆ѡа́нна мона́ха:

А҆рхїере́е прпⷣбне, всебл҃же́нне ѻ҆́ч҃е, чꙋдотво́рче, ᲂу҆го́дниче хрⷭ҇то́въ, а҆ве́ркїе, прⷪ҇ро́ческимъ житїе́мъ возсїѧ́вый, и҆ а҆пⷭ҇льскихъ сподо́билсѧ є҆сѝ дарѡ́въ, сп҃сꙋ слꙋжа̀ со а҆́гг҃лы непреста́ннѡ, молѝ и҆зба́витисѧ ѿ всѧ́кагѡ преще́нїѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Ве́лїѧ крⷭ҇та̀:

Ѻ҆рꙋ́жїе се́рдце твоѐ про́йде, пречⷭ҇таѧ, є҆гда̀ сн҃а твоего̀ на крⷭ҇тѣ̀ ви́дѣла є҆сѝ, и҆ вопїѧ́ла є҆сѝ: не безча́днꙋ мѧ̀ покажѝ, сн҃е мо́й и҆ бж҃е мо́й, соблюды́й мѧ̀ по ржⷭ҇твѣ̀ дв҃ꙋ.

Тропа́рь, гла́съ д҃:

Пра́вило вѣ́ры, и҆ ѻ҆́бразъ кро́тости, воздержа́нїѧ ᲂу҆чи́телѧ, ꙗ҆ви́ тѧ ста́дꙋ твоемꙋ̀, ꙗ҆́же веще́й и҆́стина. сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ, ѻ҆́ч҃е а҆ве́ркїе, молѝ хрⷭ҇та̀ бг҃а, спасти́сѧ дꙋша́мъ на́шымъ.

И҆ ст҃ы́хъ тропа́рь, гла́съ то́йже:

Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ моли́твами спасѝ дꙋ́шы на́шѧ.

На ᲂу҆́трени канѡ́нъ ѻ҆ктѡ́иха є҆ди́нъ. И҆ ст҃и́телѧ канѡ́нъ на д҃, є҆гѡ́же краегране́сїе:

А҆ве́ркїевꙋ воспою̀ вели́кꙋю сла́вꙋ. І҆ѡ́сифъ.

Гла́съ в҃. Пѣ́снь а҃. І҆рмо́съ:

Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.

Заре́ю свѣ́тлою трисл҃нечнагѡ бж҃ества̀ ѡ҆заре́нъ бы́въ, а҆ве́ркїе, свѣ́тъ бы́лъ є҆сѝ, сꙋ́щыѧ во тмѣ̀ просвѣща́ѧ, и҆ всѐ де́мѡнское разрꙋша́ѧ ѡ҆мраче́нїе.

Житїѐ на землѝ и҆мѣ́лъ є҆сѝ, преблаже́нне, нбⷭ҇ное, съ пло́тїю ꙗ҆́кѡ безпло́тенъ жи́тельствовавъ, и҆ стра̑сти ᲂу҆мертви́въ, и҆ свѧще́нства да́ръ прїе́мъ.

И҆мѣ́ѧ въ тебѣ̀, ѻ҆́ч҃е, сло́во вѣща́ющо, безсловє́сїѧ разрꙋши́лъ є҆сѝ сꙋемꙋ́дренныхъ, де́мѡнскїѧ хра́мы, и҆ кꙋмі́ры прелє́стныѧ низложи́въ.

Бг҃оро́диченъ:

Виті́йстїи ѧ҆зы́цы глаго́лати недоꙋмѣ́ютъ твоегѡ̀ па́че сло́ва зача́тїѧ: бг҃а бо родила̀ є҆сѝ пло́тїю, всечⷭ҇таѧ, на́мъ ᲂу҆подо́бльшасѧ за бл҃госты́ню.

И҆́нъ канѡ́нъ мꙋ́ченикѡвъ.

Гла́съ и҃. Пѣ́снь а҃. І҆рмо́съ:

Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀ пѣшехо́дца спасѐ, пѣ́снь бг҃ови воспѣва́юща.

Седми́чнымъ число́мъ чествꙋ́еми ст҃і́и ѻ҆́троцы се́дмь, свѣ́тлїи ѕвѣ́зды, на тве́рди цр҃ко́внѣй сїѧ́юще, и҆̀же свидѣ́тельствомъ на нбⷭ҇наѧ все́льшесѧ, помѧни́те вѣ́рою чтꙋ́щыѧ ва́съ.

Седмосвѣ́тлымъ сїѧ́нїемъ дх҃а, воѡбража́юще златоза́рнꙋю свѣщꙋ̀, мч҃ницы седмочи́сленнїи, мра́къ ᲂу҆ма́лили є҆стѐ пре́лести, и҆ свѣ́томъ благоче́стїѧ всѧ̑ ны́нѣ седмеросꙋгꙋ́бнѡ просвѣща́ете.

Бг҃оро́диченъ:

На тѧ̀, дв҃о, наде́ждꙋ полага́ю спасе́нїѧ моегѡ̀, грѣхо́вныѧ ти́ны всего́ мѧ ѡ҆мы́й, и҆ чи́ста мѧ̀ содѣ́лай, сн҃ꙋ твоемꙋ̀ и҆зѧ́щнѣ благоꙋгожда́юща, и҆ дѣ́юща тогѡ̀ всест҃ꙋ́ю во́лю.

Пѣ́снь г҃. І҆рмо́съ:

Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.

И҆ словесы̀ свѧще́нными, и҆ показа̑нїи чꙋде́съ, а҆ве́ркїе, пресла́внѡ, пре́лести мо́ре пла́вающыѧ, спасе́нїѧ ко приста́нищꙋ наста́вилъ є҆сѝ.

Цѣльбы̑ содѣва́ѧ, соверша́ѧ и҆зрѧ̑днаѧ, де́мѡнѡвъ ѿгонѧ́ѧ мечта̑нїѧ, спасе́нїѧ, всѣ̑мъ вино́вникъ, бога̑тымъ предста́тель ты̀ бы́лъ є҆сѝ.

Сло́во сщ҃е́нное, житїѐ бжⷭ҇твенное, нра́въ чꙋдесы̀ сїѧ́ющь, жи́знь твоѧ̀, ѻ҆́ч҃е, сла́вна, и҆ сме́рть честна̀ бы́сть.

Бг҃оро́диченъ:

Сы́й бг҃ъ пре́жде неви́димый, ви́димь бы́сть, дв҃о за бл҃гоꙋтро́бїе и҆зъ чре́ва твоегѡ̀ воплоща́емь: тѣ́мъ тѧ̀ вѣ́рою ᲂу҆блажа́емъ.

И҆́нъ. І҆рмо́съ:

Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ. ꙗ҆́кѡ нѣ́сть свѧ́тъ, па́че тебє̀, є҆ди́не чл҃вѣколю́бче.

Ꙗ҆́вльшесѧ на землѝ седмосвѣ́тлїи, ꙗ҆́кѡ свѣти́льницы добродѣ́телей, и҆ по́двигѡвъ заре́ю, и҆ чꙋде́съ блиста́ньми свѣ́тлѡ просвѣти́вше, свѣ́тъ бг҃озна́нїѧ всемꙋ̀ мі́рꙋ просїѧ́сте.

Ѿ пеле́нъ ма́тернихъ возложи́вшесѧ творцꙋ̀, тогѡ̀ ра́ди небрего́сте ѡ҆ сла́вѣ и҆ че́сти ца́рской, и҆ бога́тствѣ мимотекꙋ́щемъ, ѿ негѡ́же нетлѣ́нныхъ че́стей сла́вꙋ полꙋчи́сте.

Бг҃оро́диченъ:

Оу҆мерщвле́нный мо́й ᲂу҆́мъ, жи́зни дѣ́йствомъ ꙗ҆́вльшїѧсѧ и҆зъ тебє̀ мі́рꙋ воздви́гни, ꙗ҆́звы и҆ ѻ҆́бразы потре́бльши грѣхѡ́вныѧ, є҆ди́на бг҃ороди́тельнице, всенепоро́чнаѧ.

Конда́къ ѻ҆трокѡ́въ, гла́съ д҃. Подо́бенъ: Вознесы́йсѧ:

Просла́вивый на землѝ ст҃ы̑ѧ твоѧ̑, пре́жде втора́гѡ и҆ стра́шнагѡ прише́ствїѧ твоегѡ̀, хрⷭ҇тѐ, пресла́внымъ воста́нїемъ ѻ҆трокѡ́въ, показа́лъ є҆сѝ воскресе́нїе невѣ́дѧщымъ є҆̀, нетлѣ̑нна ѡ҆дѣѧ̑нїѧ, и҆ тѣлеса̀ ꙗ҆ви́въ, и҆ царѧ̀ ᲂу҆вѣ́рилъ є҆сѝ вопи́ти: вои́стиннꙋ є҆́сть ме́ртвыхъ воста́нїе.

І҆́косъ:

Чꙋ́дное и҆ высо́кое ѻ҆трокѡ́въ воскресе́нїе ви́дѣвъ і҆ера́рхъ є҆фе́сскїй и҆ногда̀, ᲂу҆диви́всѧ ра́зꙋмомъ, пи́шетъ со тща́нїемъ вѣ́рнѣйшемꙋ царю̀ тѣ́хъ воста́нїе: прїитѝ сподо́би держа́вѣ твое́й, влады́ко, здѣ̀, да ви́диши бг҃а твоегѡ̀ си́лꙋ, ю҆́же показа̀ тебѣ̀. а҆́бїе воста́въ вели́кїй побѣдоно́сецъ, ше́ствїе творѧ́ше ра́дꙋѧсѧ, вторы́й ꙗ҆ви́всѧ и҆лїа̀ колесни́чникъ, вопїѧ̀: вои́стиннꙋ є҆́сть ме́ртвыхъ воста́нїе.

Сѣда́ленъ ст҃и́телѧ, гла́съ и҃. Подо́бенъ: Премꙋ́дрости:

І҆ера́рхъ ꙗ҆ви́лсѧ є҆сѝ ма́стїю честно́ю ѡ҆бложе́нъ, ѻ҆́ч҃е, бг҃одѣ́тельнѡ, и҆ всѧ̑ соверша́ѧ бл҃года́тїю, свѧще́ннѣйше, дарѡ́въ же бжⷭ҇твенныхъ и҆ чꙋде́съ свѣ́тлостїю ᲂу҆краша́емь, ст҃ы́мъ и҆ бжⷭ҇твеннымъ дх҃омъ, всехва́льне, недꙋ́ги и҆сцѣлѧ́ѧ, и҆ де́мѡны попалѧ́ѧ, и҆ мно́жєства прельща́емыхъ ѡ҆браща́ѧ, а҆ве́ркїе. сегѡ̀ ра́ди вопїе́мъ тѝ: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти, чтꙋ́щымъ любо́вїю свѧтꙋ́ю па́мѧть твою̀.

Сла́ва, ѻ҆трокѡ́въ, гла́съ д҃. Подо́бенъ: Ско́рѡ предварѝ:

Ꙗ҆́кѡ столпѝ сꙋ́ще цр҃кве хрⷭ҇то́вы, стѣ́ны разори́сте невѣ́рствїѧ крѣ́пкѡ, седмобра́тнїи мч҃ницы. тѣ́мъ пре́жде сме́рти є҆́ллинскꙋю ꙗ҆́рость, и҆ па́ки по сме́рти є҆реті́ческꙋю бꙋ́рю разрꙋши́сте, молѧ́щесѧ ѡ҆ дꙋша́хъ на́шихъ.

И҆ ны́нѣ, бг҃оро́диченъ:

Чтⷭ҇аѧ, всенепоро́чнаѧ и҆ неискꙋсомꙋ́жнаѧ, ꙗ҆́же є҆ди́на безлѣ́тнаго сн҃а и҆ сло́ва бж҃їѧ въ лѣ́то ро́ждши: сего̀ со ст҃ы́ми и҆ честны́ми патрїа̑рхи, и҆ мч҃ники, и҆ прⷪ҇рѡ́ки, и҆ прпⷣбными молѝ, дарова́ти на́мъ ѡ҆чище́нїе и҆ ве́лїю ми́лость.

Крⷭ҇тобг҃оро́диченъ:

Дв҃о всенепоро́чнаѧ, мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же, бл҃гослове́ннаѧ, молѧ́щи не преста́й, проще́нїе прегрѣше́нїй на́мъ дарова́ти.

Пѣ́снь д҃. І҆рмо́съ:

Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ: до менє́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.

Вельмѝ престо́лъ, прпⷣбне, ᲂу҆краси́лъ є҆сѝ, ст҃и́телю, вели́кими бо чꙋдесы̀ прелѣ́потствовалъ є҆сѝ, и҆ житїе́мъ свѣ́тлымъ. сегѡ̀ ра́ди превели́кїй бг҃ъ на́шъ вельми́ тѧ просла́ви.

Ми́лости воли́телѧ гдⷭ҇а вѣ́дый, бг҃оно́се, те́плѣ є҆го̀ ᲂу҆моли́лъ є҆сѝ, на и҆сцѣле́нїе и҆ спасе́нїе мно́гихъ, те́плыхъ во́дъ всечꙋ́дное сотвори́ти и҆стече́нїе.

Плодови́ты безча̑дныѧ сотвори́лъ є҆сѝ бж҃їею бл҃года́тїю, соверши́лъ є҆сѝ помышлє́нїѧ: вложи́въ бо тѣ̑мъ, а҆ве́ркїе, сло́ва сѣ́мѧ ꙗ҆́вѣ, ꙗ҆́кѡ до́брый сѣ́ѧтель пожа́лъ є҆сѝ кла́сы стори́цею, бл҃же́нне.

Бг҃оро́диченъ:

И҆сцѣли́ла є҆сѝ сокрꙋше́нїе, всенепоро́чнаѧ, и҆ дре́внее ѻ҆каѧ́нство земноро́дныхъ, ро́ждши гдⷭ҇а и҆ цр҃ѧ̀ хрⷭ҇та̀, поне́сшаго недꙋ́ги на́шѧ за бл҃гоꙋтро́бїе неизглаго́ланное, бг҃оневѣ́сто.

И҆́нъ. І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Бра́тскимъ совокꙋплѧ́еми сою́зомъ, и҆ бжⷭ҇твеннымъ жела́нїемъ распала́еми, согла́сїемъ и҆́стиннагѡ, мч҃ницы гдⷭ҇ни, и҆сповѣ́данїѧ и҆ вѣ́ры, посрами́сте мꙋчи́телей сꙋемꙋ́дренный ра́зꙋмъ, и҆ пре́лести многобо́жное ᲂу҆че́нїе.

За хрⷭ҇та̀ и҆ со хрⷭ҇то́мъ гони́ми, въ верте́пѣхъ, гора́хъ же и҆ про́пастехъ земны́хъ скрыва́еми, тогѡ̀ ра́ди сно́мъ живоно́снымъ вмѣ́стѡ сме́рти ᲂу҆снꙋ́ли є҆стѐ на лѣ̑та должа̑йшаѧ, ꙗ҆́вственнѡ ᲂу҆твержда́юще ѻ҆́бщее земны́хъ воскресе́нїе.

Бг҃оро́диченъ:

Да ѻ҆́бразъ засы́панный страстьмѝ, ѡ҆бнови́ши бога́тствомъ бл҃госты́ни, въ дѣ́вственнꙋю всели́лсѧ є҆сѝ ᲂу҆тро́бꙋ, и҆зъ неѧ́же мꙋ́дрость хра́мъ бж҃їй созда́лъ є҆сѝ, є҆́юже съ человѣ̑ки пожи́лъ є҆сѝ, ще́дрый, и҆ спа́слъ є҆сѝ мі́ра концы̀.

Пѣ́снь є҃. І҆рмо́съ:

Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо, ра́звѣ тебє̀, бо́га не зна́ю.

Поста́вивъ твоѧ̑ но́ги на ка́мени се́рдца, бг҃омꙋ́дре, па́дшыѧ поги́белїю, и҆ чє́сти ка́менїю подаю́щыѧ, бл҃же́нне, бжⷭ҇твенными словесы̀ чествова́ти наꙋчи́лъ є҆сѝ ка́мень, і҆и҃са хрⷭ҇та̀ и҆ бг҃а на́шего.

Врача̀ разли́чнѡ недꙋ́гꙋющихъ, пꙋтевожда̀ всѣ́хъ прельще́нныхъ ѕлосовѣ́тїемъ, мѷрополо́жницꙋ честны́хъ дарова́нїй, прїѧ́телище бжⷭ҇твеннагѡ дх҃а, свѧщенноꙋчи́телѧ почти́мъ а҆ве́ркїа.

Вїно̀, повелѣ́нїемъ твои́мъ, въ є҆ди́номъ сосꙋ́дѣ со є҆ле́емъ, ви́ды же дрꙋгі̑ѧ вложє́нныѧ, во вре́мѧ своѐ несмѣ́снѡ пресла́внѡ и҆злива́ютсѧ, преиз̾ѡби́лꙋющꙋю бл҃года́ть твою̀ ꙗ҆влѧ́юще ꙗ҆́вѣ, свѧще́нне.

Бг҃оро́диченъ:

Зако́ни въ тебѣ̀ пресла́внѡ, дв҃о, ѡ҆бновлѧ́ютсѧ: ражда́еши бо безсѣ́меннѡ бг҃а сп҃са, и҆ пребыва́еши дѣ́вствꙋющи па́ки, стра́нно чꙋ́до! тѣ́мъ тѧ̀ мт҃рь є҆мманꙋ́илевꙋ благоче́стнѡ возвѣща́емъ.

И҆́нъ. І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Оу҆мертви́вшесѧ мі́рꙋ, всѧ̑ житє́йскаѧ кра̑снаѧ ѿри́нꙋли є҆стѐ, живо́тъ держа́щемꙋ живо́тъ сво́й преда́вше, живоно́сный со́нъ на дѡ́лга лѣ̑та влекꙋ́ще, ѻ҆́бщагѡ воскресе́нїѧ ѻ҆́бразъ.

Страда́льцы житїе́мъ ꙗ҆ви́стесѧ, дѡ́лгаѧ гонє́нїѧ претерпѣ́вше, въ гла́дѣ и҆ жа́жди, въ ра́зныхъ бѣда́хъ, и҆ ско́рбехъ и҆ ѕлоимꙋ́ществахъ, за хрⷭ҇та̀ терпѧ́ще, и҆ богатѧ́щесѧ сꙋ́щѡ воспокое́нїемъ.

Бг҃оро́диченъ:

Въ тебѣ̀ стѣнѣ̀ ѡ҆богаща́емїи, и҆ предста́тельствомъ твои́мъ сохранѧ́емїи, твое́ю бжⷭ҇твенною сла́вою хва́лѧщесѧ, тѧ̀ ᲂу҆блажа́емъ: ты́ бо, прест҃а́ѧ, дꙋша́мъ на́шымъ и҆сточа́еши весе́лїе и҆ ра́дость.

Пѣ́снь ѕ҃. І҆рмо́съ:

Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ. ѿ тлѝ, бж҃е, мѧ̀ возведѝ.

Ѿ восто́ка къ за́падꙋ прише́лъ є҆сѝ, де́мѡнскїѧ и҆ лю́тыѧ стра́сти цари́цꙋ, прпⷣбне, ѿрѣша́ѧ, си́лою дх҃а.

Стра́ненъ мі́ра ꙗ҆ви́лсѧ є҆сѝ, свѧще́ннѣйше, стра̑ннаѧ и҆ стра̑шнаѧ соверша́ѧ чꙋдеса̀, и҆ ходѧ̀ въ тѣлесѝ, и҆ ѿсю́дꙋ ѿше́дъ, а҆ве́ркїе.

Молнїезра́ченъ, ѻ҆́ч҃е, ви́димь, де́мѡнскїѧ побѣди́лъ є҆сѝ полкѝ, терпѣ́ти не могꙋ́щыѧ твоегѡ̀, а҆ве́ркїе, преще́нїѧ, бг҃одохнове́нне.

Бг҃оро́диченъ:

Тобо́ю, всест҃а́ѧ бг҃оневѣ́сто, ᲂу҆мерщвле́ннїи жи́зни сподо́бихомсѧ, и҆ тлѣ́нїю рабо́тающїи, нетлѣ́нїемъ ꙗ҆́вѣ ѡ҆богати́хомсѧ.

И҆́нъ. І҆рмо́съ:

Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Любо́вїю, ꙗ҆́же къ бг҃ꙋ, є҆фе́сскагѡ ѻ҆те́чества, мꙋ́дрїи, ро́дъ свѣ́тлый, бога́тство же пресвѣ́тлое и҆ сла́вꙋ пречестнꙋ́ю ѡ҆ста́вили є҆стѐ, наслѣ́дїе нбⷭ҇ное произбра́вше.

Седмочи́сленный страда́льцєвъ ли́къ бжⷭ҇твеннѣ совокꙋплѧ́емь, низложѝ врагѡ́въ мно́жество многочи́сленное, и҆ сла́вꙋ прїѧ́ша и҆сповѣ́данїѧ, и҆ вѣнцы̀ страда́нїѧ.

Бг҃оро́диченъ:

Возсїѧ̀ ѿ сїѡ́на вы́шнѧгѡ бл҃голѣ́пїе, прїѧ́тїемъ пло́ти, по соедине́нїю неизрече́нномꙋ, и҆зъ тебє̀, неискꙋсобра́чнаѧ, ѡ҆дѣ́ѧнъ, и҆ мі́ръ просвѣтѝ.

Конда́къ, гла́съ и҃: Подо́бенъ: Ꙗ҆́кѡ нача́тки:

Ꙗ҆́кѡ свѧще́нника превели́каго, и҆ а҆пⷭ҇лѡвъ совсе́льника, цр҃ковь почита́етъ тѧ̀ всѧ̑ вѣ́рныхъ, а҆ве́ркїе: ю҆́же твои́ми моли́твами соблюда́й, бл҃же́нне, непобѣди́мꙋ и҆ неѡбꙋрева́емꙋ ѿ всѧ́кїѧ є҆́реси, и҆ нескве́рнꙋ, ꙗ҆́кѡ приснопа́мѧтный.

І҆́косъ:

Мі́ра всегѡ̀ сꙋетꙋ̀ помышлѧ́ѧ, мі́ра ᲂу҆чꙋже́нный, и҆ стрⷭ҇ти хрⷭ҇то́вы подража́ѧ, плотскі̑ѧ стра̑сти ᲂу҆мертви́лъ є҆сѝ, и҆ крⷭ҇тъ тво́й взе́мъ, послѣ́довалъ є҆сѝ, бл҃же́нне, творцꙋ̀ твоемꙋ̀, и҆ пребыва́ѧ съ ни́мъ, ны́нѣ моли́сѧ за чтꙋ́щыѧ тѧ̀ и҆́стиннѡ, ꙗ҆́кѡ приснопа́мѧтный.

Пѣ́снь з҃. І҆рмо́съ:

Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Ꙗ҆́кѡ бжⷭ҇твенный па́стырь, ꙗ҆́кѡ чꙋде́съ самотво́рецъ: слѣпы̑мъ є҆́же зрѣ́ти моли́твою, ѻ҆́ч҃е, пода́лъ є҆сѝ, и҆ слы́шати глꙋхи̑мъ, ѻ҆чище́нїе же прокажє́ннымъ, и҆ бл҃готече́нїе хромы̑мъ, воспѣва́ющымъ: бл҃гослове́нъ є҆сѝ бж҃е ѻ҆тє́цъ на́шихъ.

Проповѣ́даетъ твоѐ чꙋдодѣѧ́нїе, мꙋ́дре, во вѣ́къ, те́плыхъ во́дъ и҆скипѣ́нїе, и҆ сто́лпъ ᲂу҆ гро́ба твоегѡ̀ лежа́щїй, є҆го́же ѿ ри́ма вели́кагѡ гра́да принесѐ лꙋка́вый дꙋ́хъ, и҆згна́нный тобо́ю, ѻ҆́ч҃е а҆ве́ркїе.

Лю́демъ смирє́ннымъ во́ждь бы́лъ є҆сѝ, высо́къ въ видѣ́нїихъ и҆ дѣ́йствїихъ же и҆ си́лахъ ꙗ҆ви́всѧ, свѧще́ннѣйше, и҆ высоча́йшагѡ цр҃ѧ̀ ᲂу҆го́дникъ. є҆мꙋ́же взыва́емъ: бл҃гослове́нъ є҆сѝ бж҃е ѻ҆тє́цъ на́шихъ.

Бг҃оро́диченъ:

Роди́сѧ и҆зъ тебє̀, є҆го́же родѝ ѻ҆ц҃ъ пре́жде денни́цы, во двою̀ сꙋщєствꙋ̀ и҆ хотѣ̑нїю, ꙗ҆́кѡ бг҃ъ же и҆ человѣ́къ, ѻ҆трокови́це, зна́емь всѣ̑мъ вѣ́рою зовꙋ́щымъ: бл҃гослове́ннаѧ бг҃а пло́тїю ро́ждшаѧ.

И҆́нъ. І҆рмо́съ:

Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃ꙋ покарѧ́ющесѧ, бжⷭ҇твеннымъ зако́номъ, наказꙋ́еми ѻ҆́троцы, ра́зꙋмомъ пра́вымъ, пребеззакѡ́ннаѧ повелѣ̑нїѧ мꙋчи́телей ѕлы́хъ ᲂу҆кори́ли є҆стѐ, сме́ртїю жи́знь приѡбрѣ́тше и҆ нетлѣ́нїе, ме́ртвымъ ѡ҆бога́щшесѧ тѣ́ломъ.

Сме́ртнꙋю ча́шꙋ за творца̀ пи́ти жела́юще вѣ́рнѡ, безсме́ртїѧ ра́ди и҆ нетлѣ́нїѧ, погребе́нїе претерпѣ́сте тѣле́съ, и҆з̾ѧснѧ́юще воста́нїе, пресла́внымъ воста́нїемъ ва́шимъ, мч҃ницы.

Бг҃оро́диченъ:

Ꙗ҆́кѡ ᲂу҆́тро возсїѧ́ла є҆сѝ, пра́вды сл҃нце и҆мꙋ́щи, ѿ тмы̀ мі́ра невѣ́дѣнїѧ и҆з̾има́ющаго, бг҃овѣ́дѣнїемъ. є҆мꙋ́же пое́мъ, пречⷭ҇таѧ: бл҃гослове́нъ є҆сѝ бж҃е ѻ҆тє́цъ на́шихъ.

Пѣ́снь и҃. І҆рмо́съ:

Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Пресла́вный па́стырь, неистощи́мый и҆сто́чникъ и҆сцѣле́нїй, цр҃кве сто́лпъ, вѣ́рныхъ ᲂу҆твержде́нїе, вели́кїй свѣти́льникъ, многосвѣ́тлый свѧщенноꙋчи́тель, да почти́тсѧ а҆ве́ркїй.

Ты̀ ꙗ҆́коже фі́нїѯъ ѱало́мски процвѣ́лъ є҆сѝ во дво́рѣхъ бг҃а жива́гѡ: ᲂу҆мно́жилсѧ є҆сѝ ꙗ҆́кѡ ке́дръ, и҆ ꙗ҆́кѡ ма́слина, мꙋ́дре, показа́лсѧ є҆сѝ, ма́стїю дѣ́лъ твои́хъ, всѣ́хъ ᲂу҆маща́ѧ ли́ца вѣ́рою.

Горы̀ верхꙋ̀ дѣйстви́тельнымъ жи́тельствомъ ꙗ҆́вственнѣ, ꙗ҆́коже гра́дъ позна́лсѧ є҆сѝ стоѧ́щь, и҆ погрꙋ́жшїйсѧ дре́вле пре́лестїю гра́дъ тво́й, прпⷣбне, гра́да вы́шнѧгѡ ꙗ҆влѧ́еши наслѣ́дника.

Бг҃оро́диченъ:

Сѐ ѻ҆́дръ соломѡ́новъ, є҆го́же ѡ҆бстоѧ́тъ си́льнїи, бг҃одохнове́ннагѡ писа́нїѧ ны́нѣ прорица̑нїѧ, на не́мже хрⷭ҇то́съ бг҃ъ воплоще́нїемъ бжⷭ҇твеннымъ почи́лъ є҆́сть, бл҃гослове́ннаѧ и҆ ѡ҆бра́дованнаѧ.

И҆́нъ. І҆рмо́съ:

Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Седмери́чнѡ ѡ҆блиста̀ па́мѧть ва́ша дне́сь, со́лнечныхъ лꙋ̑чь ѻ҆бра́знѡ, просвѣща́ющи, мꙋ́дрїи, подсо́лнечнꙋю страда́льческими свѣ́тлостьми, чꙋдодѣ́йственными же блиста́ньми, и҆ бжⷭ҇твенныхъ догма́тѡвъ зарѧ́ми, и҆́миже ᲂу҆вѣрѧ́ете всѣ̑мъ воста́нїе тѣле́съ, и҆ ме́ртвыхъ нетлѣ́нїе.

А҆вїмеле́хово пре́жде на селѣ̀ сохране́нїе положѝ бг҃ъ, ꙗ҆́кѡ не ви́дѣти гра́да и҆ногда̀ запꙋстѣ́нїѧ. ва́съ же соблюдѐ лѣ́ты множа́йшими въ верте́пѣ спѧ́щыѧ, на ᲂу҆вѣре́нїе всѣ́хъ воскресе́нїѧ, ѻ҆́троцы, вѣкѡ́въ седмочи́сленныхъ равночи́сленнїи свѣти́льницы.

Бг҃оро́диченъ:

Ѡ҆свѧти́вшисѧ дх҃омъ, бцⷣе всенепоро́чнаѧ, и҆́стиннѡ прїѧ́ла є҆сѝ во чре́вѣ безнача́льнаго сн҃а и҆ присносꙋ́щнаго, въ тебѣ̀, чⷭ҇таѧ, воплоще́ннаго, на бл҃годѣѧ́нїе вѣ́рою вопїю́щихъ: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Пѣ́снь ѳ҃. І҆рмо́съ:

Ѿ бг҃а бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.

Ꙗ҆́кѡ свѣтоза́рно твоѐ житїѐ, ꙗ҆́кѡ красны̀ но́ги, ꙗ҆́кѡ ѕѣлѡ̀ чꙋ́дно є҆́же къ бг҃ꙋ маа́нїе же вкꙋ́пѣ и҆ бли́жность, ꙗ҆́кѡ велича́йшаѧ бл҃года́ть свы́ше да́ннаѧ тебѣ̀, мꙋ́дре, сегѡ̀ ра́ди вѣ́рою почита́емъ тѧ̀, а҆ве́ркїе.

Тѧ̀ сожи́тельника всѣ́хъ ст҃ы́хъ мꙋ́чєникъ, и҆ ревни́телѧ бжⷭ҇твенныхъ ᲂу҆чени̑къ, патрїа́рхѡвъ равноче́стна, прⷪ҇ро́кѡвъ и҆ прпⷣбныхъ, и҆ нбⷭ҇ныхъ слꙋ́гъ собесѣ́дника, вѣ́рою сла́вимъ, а҆ве́ркїе.

Прест҃а́ѧ твоѧ̀ па́мѧть простира́ющисѧ въ мі́рѣ, просвѣща́етъ человѣ̑къ дꙋ́шы свѣ́томъ бога́тымъ въ бл҃года́ти, ю҆́же соверша́юще любо́вїю, страсте́й на́съ и҆ тмы̀ напа́стныѧ моли́твами твои́ми и҆зба́ви, мо́лимсѧ, а҆ве́ркїе.

Бг҃оро́диченъ:

Свѣ́тла тѧ̀ свѣти́льника прⷪ҇ро́къ прови́дѣ, свѣщꙋ̀ бжⷭ҇твеннꙋю и҆́стиннѡ въ себѣ̀ носѧ́щꙋю, всест҃а́ѧ дв҃о, є҆ди́наго пресꙋ́щнаго бг҃а, за бл҃гоꙋтро́бїе ми́лости и҆зъ тебє̀ вочл҃вѣ́чшасѧ.

И҆́нъ. І҆рмо́съ:

Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Оу҆диви́сѧ ѡ҆ се́мъ всѧ́къ земноро́дный, почꙋди́сѧ же и҆ всѧ́къ ᲂу҆́мъ: ꙗ҆́кѡ ме́ртвїи, по многовре́меннѣмъ погребе́нїи въ верте́пѣ лежа́ще, а҆́ки въ ве́черъ ᲂу҆снꙋ́вше, и҆ ᲂу҆́трѣ ѻ҆бы́чнѡ востаю́ще ꙗ҆ви́шасѧ, ᲂу҆вѣрѧ́юще ме́ртвыхъ ѻ҆́бщее воста́нїе.

Седмочи́сленнїи мч҃никѡвъ свѣ́тлїи свѣти́льницы, є҆фє́скаѧ свѣти̑ла присносвѣ̑тлаѧ, мі́ра всегѡ̀ моли́твєнницы, и҆ предста́телє те́плїи, ѻ҆́бщагѡ воскресе́нїѧ проповѣ̑дницы и҆ храни́телїе вѣ́рныхъ, и҆спроси́те тишинꙋ̀ на́мъ и҆ спасе́нїе, и҆ ми́ръ всѣ̑мъ концє́мъ.

Бг҃оро́диченъ:

Ꙗ҆́кѡ мт҃и пострада́вшагѡ ѡ҆ на́съ, дꙋшетлѣ́нныхъ мѧ̀ страсте́й и҆зба́ви, ꙗ҆́кѡ милосе́рдаѧ, разрѣшѝ прегрѣше́нїй ᲂу҆́зы. ꙗ҆́кѡ бл҃га́ѧ, ᲂу҆блажѝ ны́нѣ ѡ҆ѕло́бленнꙋю мою̀ дꙋ́шꙋ де́мѡнскими прилѡ́ги, дв҃о бцⷣе, да пою́ тѧ всепѣ́тꙋю.

Свѣти́ленъ. Подо́бенъ: Жєны̀ ᲂу҆слы́шите.

Потещи́ тѧ понꙋ́ди блазнодѣ́латель де́мѡнъ къ ри́мꙋ гра́дꙋ, вше́дый въ царе́вꙋ дще́рь лꙋка́внѡ, и҆зъ неѧ́же (с. 377) и҆згна́въ пса̀, ѡ҆бремене́нна посла́лъ є҆сѝ, и҆ сто́лпъ носѧ́ща во і҆ерапо́ль, а҆ве́ркїе бг҃огла́се.

Сла́ва, мꙋ́ченикѡвъ:

Ѻ҆рꙋ́жїемъ честна́гѡ твоегѡ̀ крⷭ҇та̀ ѡ҆гра́ждшесѧ страстоте́рпцы твоѝ, сло́ве, проти̑вныѧ си̑лы крѣ́пкѡ побѣди́ша, и҆ мꙋчи́телей посрами́ша, и҆ ѡ҆ тебѣ̀ пострада́ша, и҆ тебѣ̀, хрⷭ҇тѐ мо́й всецр҃ю̀, сцрⷭ҇твꙋютъ кꙋ́пнѡ.

И҆ ны́нѣ, бг҃оро́диченъ:

Ѽ та̑инъ твои́хъ! ѽ чꙋде́съ твои́хъ! ка́кѡ по ржⷭ҇твѣ̀ дв҃а пребыла̀ є҆сѝ, ꙗ҆́кѡ пре́жде ржⷭ҇тва̀; ка́кѡ бг҃а вмѣсти́ла є҆сѝ, нигдѣ́же вмѣсти́маго; но вои́стиннꙋ несказа̑нна сꙋ́ть твоѧ̑ всѧ̑, бл҃гослове́ннаѧ марі́е.

На лїтꙋргі́и: Бл҃жє́нна ѻ҆ктѡ́иха, на д҃: и҆ ст҃а́гѡ, пѣ́снь г҃-ѧ, на д҃. Прокі́менъ, гла́съ а҃: Оу҆ста̀ моѧ̑ возгл҃го́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆слы́шите сїѧ̑ всѝ ꙗ҆зы́цы: А҆пⷭ҇лъ къ є҆вре́ємъ, зача́ло ти҃і. А҆ллилꙋ́їа, гла́съ в҃: Оу҆ста̀ пра́веднагѡ поꙋча́тсѧ премꙋ́дрости: Сті́хъ: Зако́нъ бг҃а є҆гѡ̀ въ се́рдцѣ є҆гѡ̀, и҆ не за́пнꙋтсѧ стѡпы̀ є҆гѡ̀. Є҆ѵⷢ҇лїе і҆ѡа́нна, зача́ло л҃ѕ. Прича́стенъ: Въ па́мѧть вѣ́чнꙋю:

Слꙋ́жба ꙗ҆вле́нїю і҆кѡ́ны прест҃ы́ѧ влⷣчцы на́шеѧ бцⷣы каза́нскїѧ.

Оу҆ста́висѧ же се́й пра́здникъ пра́здновати, въ ца́рствꙋющемъ гра́дѣ москвѣ̀, и҆збавле́нїѧ ра́ди ѿ лѧ́хѡвъ, въ лѣ́то ҂зрк҃а.

Ве́черъ, Блаже́нъ мꙋ́жъ:

На Гдⷭ҇и, воззва́хъ, поста́вимъ стїхѡ́въ и҃, и҆ пое́мъ стїхи̑ры, гла́съ д҃. Подо́бенъ: Ꙗ҆́кѡ до́блѧ:

Ꙗ҆́кѡ прекра́снаѧ сло́ва пала́та, ꙳ и҆ престо́лъ свѣтоноси́вый бцⷣе влⷣчце, ꙳ сопресто́льное сло́во ѻ҆́ч҃ее ꙳ во твои́хъ ложесна́хъ вмѣсти́ла є҆сѝ, ꙳ и҆ ро́ждши свѣ́тъ незаходи́мый, ꙳ на́ше ѡ҆мраче́нїе просвѣти́ла є҆сѝ: ꙳ ле́сть ѕмїи́нꙋ ѿгна́ла є҆сѝ, и҆ тлѣ́нїе потреби́ла є҆сѝ: ꙳ жи́знь вѣ́чнꙋю мі́рꙋ дарова́ла є҆сѝ твои́мъ ржⷭ҇тво́мъ: ꙳ врата̀ раѧ̀ ѿве́рзла є҆сѝ, ꙳ и҆ всѧ̑ блага̑ѧ человѣ́ческомꙋ є҆стествꙋ̀ дарова́ла є҆сѝ: ꙳ но и҆ ны́нѣ, гпⷭ҇жѐ, ꙳ твои́ми моли́твами, ꙳ и҆збавлѧ́й рабы̑ твоѧ̑ ѿ всѣ́хъ бѣ́дъ.

Ꙗ҆́кѡ вели́ка сꙋ́щи цр҃и́ца и҆ мт҃и, ꙳ на нб҃сѝ превысо́кихъ си́лъ цр҃ѧ̀, ꙳ пречⷭ҇тыѧ твоѧ̑ рꙋ́ки просте́рши, ꙳ моле́бнѡ за ны̀ предстои́ши, ꙳ и҆ на землѝ ꙗ҆́кѡ держа́внаѧ помо́щница ꙳ бжⷭ҇твенною твое́ю і҆кѡ́ною ꙳ и҆ дꙋ́хомъ съ твои́ми рабы̑ пребыва́еши, ꙳ и҆ ве́селѡ спаса́еши, ꙳ и҆ и҆збавлѧ́еши ѿ всѧ́кїѧ напа́сти ꙳ благоче́стнѡ бцⷣꙋ тѧ̀ и҆сповѣ́дающыѧ.

Ꙗ҆́кѡ златоза́рный ра́й, ꙳ и҆ мѣ́сто прекра́сное, и҆ бг҃опросвѣще́нное, ꙳ и҆ дре́во ст҃о́е. дх҃омъ ст҃ы́мъ ѡ҆сѣне́нное, ꙳ вмѣсти́лище свѣ́та невече́рнѧгѡ, ꙳ тебѐ вѣ́дꙋщымъ, ꙳ ꙗ҆́снѡ немерца́ющисѧ бжⷭ҇твенною лꙋче́ю, ꙳ млⷣнцемъ твои́мъ свѣ́тиши все́й тва́ри, ꙳ є҆го́же молѧ́щи, цр҃и́це бцⷣе, ꙳ спасѝ гра́дъ тво́й и҆ лю́ди, ꙳ къ тебѣ̀ прибѣга́ющыѧ ѿ всѣ́хъ бѣ́дъ.

Ꙗ҆́кѡ порфѵ́рою ца́рскою и҆ вѵ́ссомъ, ꙳ і҆кѡ́ною твое́ю, и҆ твоегѡ̀ сн҃а, бцⷣе, ꙳ цр҃ковь бж҃їѧ просвѣти́вшисѧ, ꙳ красꙋ́етсѧ чꙋдесы̀. ꙳ дне́сь ꙗ҆вле́нїемъ всѧ̑ созыва́етъ пра́здновати, ꙳ па́че сїѧ́нїѧ со́лнечнагѡ ꙳ бл҃года́тїю ст҃а́гѡ дх҃а блиста́ющисѧ, ꙳ на болѧ́щихъ и҆ недꙋ́жныхъ и҆сцѣле́нїѧ ꙳ и҆сто́чники и҆сточа́ющи, ꙳ и҆ всѣ̑мъ да́рꙋющи бога́тꙋю ми́лость.

И҆́ны стїхи̑ры, гла́съ и҃:

Высо́кїй цр҃ю̀ непостижи́мый, со ѻ҆ц҃е́мъ сѣдѧ́й на прⷭ҇то́лѣ и҆ бжⷭ҇твеннымъ дх҃омъ, благоволи́вый роди́тисѧ на землѝ ѿ дв҃ы неискꙋсобра́чныѧ, і҆и҃се: ᲂу҆щедрѧ́ѧ твоѐ созда́нїе чл҃вѣ́ческое є҆стество̀, неизрече́нными добро́тами, прїимѝ твоеѧ̀ мт҃ре приноси̑мыѧ тебѣ̀ за ны̀ моли̑твы, и҆ не помѧнѝ беззако́нїй на́шихъ, но поми́лꙋй и҆ спасѝ дꙋ́шы на́шѧ, ꙗ҆́кѡ милосе́рдъ.

Два́жды.

Преклони́въ нб҃са̀ цр҃ь сла́вы, сни́де ѡ҆бнови́ти а҆да́ма, престꙋпле́нїемъ всего̀ и҆стлѣ́вшаго, всели́сѧ въ тѧ̀, чⷭ҇таѧ дв҃о, и҆ роди́сѧ, ключе́й дѣ́вства не рꙋши́въ, и҆ на рꙋка́хъ твои́хъ смире́нъ младе́нецъ, и҆́же а҆рха́гг҃лѡвъ цр҃ь ноша́шесѧ: и҆ ны́нѣ твою̀ моли́твꙋ прїе́млетъ, и҆ проше́нїе твоѐ во все́мъ и҆сполнѧ́етъ, бцⷣе, ꙗ҆́кѡ тво́й сн҃ъ и҆ бг҃ъ. є҆мꙋ́же ᲂу҆се́рднѡ моли́сѧ, да спасе́тъ дꙋ́шы на́шѧ, ꙗ҆́кѡ милосе́рдъ.

Па́че ски́нїи мѡѷсе́евы, по ѻ҆́бразꙋ нбⷭ҇номꙋ сотворе́нныѧ, всю́ тѧ бг҃ъ ѡ҆свѧтѝ, бцⷣе, дх҃омъ ст҃ы́мъ, ве́сь всели́сѧ въ тѧ̀, всего̀ человѣ́ка ѡ҆живѝ: тѣ́мъ и҆ твоѧ̀ і҆кѡ́на, па́че а҆арѡ́нѧ кївѡ́та, напо́лнисѧ бл҃года́ти бж҃їѧ, и҆сточа́етъ ѡ҆свѧще́нїе дꙋша́мъ и҆ тѣлесє́мъ. є҆́йже любе́знѡ покланѧ́ющесѧ, про́симъ ѿ тебє̀ вели́кїѧ ми́лости, да спасе́ши дꙋ́шы на́шѧ, благослове́ннаѧ помо́щнице.

Сла́ва, и҆ ны́нѣ, гла́съ и҃:

Прїиди́те, возра́дꙋемсѧ держа́внѣй застꙋ́пницѣ ро́да на́шегѡ, цр҃и́цѣ бцⷣѣ: прїиди́те къ ти́хомꙋ є҆ѧ̀ чꙋ́дномꙋ, почита́емомꙋ а҆́гг҃лы, честно́мꙋ поклони́мсѧ ѻ҆́бразꙋ. да́рꙋетъ бо бцⷣа вѣ̑рнымъ ѻ҆би̑льныѧ да́ры цѣлє́бныѧ ѿ неистощи́магѡ и҆сто́чника ст҃ы́ѧ і҆кѡ́ны неѡскꙋ́днꙋю бл҃года́ть и҆сточа́ющи: тмы̀ и҆збавлѧ́етъ на́съ, и҆скꙋше́нїй и҆ бѣ́дъ, и҆ всѧ́кагѡ грѣха̀, благоче́стнѡ и҆ бг҃опрїѧ́тнѡ прославлѧ́ющихъ и҆ чтꙋ́щихъ свѣ́тлꙋю и҆ чꙋ́днꙋю бг҃ома́тере ст҃ꙋ́ю і҆кѡ́нꙋ. тѣ́мъ воспѣва́юще воззове́мъ первоѻбра́знѣй: ра́дꙋйсѧ, любе́знаѧ мі́рꙋ по́моще, во спасе́нїе дꙋ́шъ на́шихъ.

Вхо́дъ. Прокі́менъ днѐ. И҆ чтє́нїѧ г҃, пи́саны сегѡ̀ мцⷭ҇а въ а҃-й де́нь, покро́вꙋ бцⷣы.

На лїті́и стїхи̑ры, гла́съ в҃, самогла́сны:

Ꙗ҆́кѡ вои́стиннꙋ дре́внѧгѡ кївѡ́та пречⷭ҇тнѣ́е, є҆гда̀ дв҃дъ собра́въ чи́ны ликовствова́ше, ны́нѣ твоѧ̀, бцⷣе, і҆кѡ́на, є҆́йже предстоѧ́тъ а҆рхїере́євъ собо́ри, и҆ съ чи́нми а҆́гг҃лъ сщ҃е́нницы и҆ всѐ хрⷭ҇тоимени́тыхъ люде́й мно́жество, досто́йнѡ блажа́тъ тѧ̀ мт҃рь бж҃їю, и҆ прославлѧ́ютъ раболѣ́пнѡ, и҆ чествꙋ́ютъ и҆ покланѧ́ютсѧ, и҆ мо́лѧтсѧ тебѣ̀ по бз҃ѣ, да мі́ръ ᲂу҆мири́ши въ правосла́вїи, и҆ це́рковь ᲂу҆тверди́ши, и҆ спасе́ши ѿ всѣ́хъ ѕѡ́лъ твоѧ̑ рабы̑, ꙗ҆́кѡ є҆ди́на бл҃гослове́ннаѧ.

Предстоѧ́тъ тѝ, гпⷭ҇жѐ бцⷣе, предъ твои́мъ, пречⷭ҇таѧ, ѻ҆́бразомъ, а҆рхїере́євъ сосло́вїе, и҆ сщ҃е́нницы, и҆ всѝ лю́дїе, мона́си и҆ прості́и, вѣ́дꙋще тѧ̀ вои́стиннꙋ помо́щницꙋ си́льнꙋ и҆ непобѣди́мꙋ, молє́нїѧ тебѣ̀ приноси́ти ѿ всеѧ̀ дꙋшѝ подвиза́ютъ, и҆ поꙋща́ютъ на моли́твꙋ къ бг҃ꙋ, тре́бꙋюще твоеѧ̀ по́мощи, да простре́ши бг҃онѡ́сныѧ твоѧ̑ рꙋ́ки, и҆ ᲂу҆мо́лиши за мі́ръ. вонмѝ и҆ ᲂу҆слы́ши, влⷣчце, и҆ пода́ждь ᲂу҆тѣше́нїе рабѡ́мъ твои̑мъ, до́ндеже не ѡ҆долѣ́ютъ ны̀ грѣхѝ на́шѧ тѧ̑жкїѧ и҆ лю̑тыѧ: твоеѧ́ бо всегда̀ тре́бꙋемъ всѝ по́мощи.

Гла́съ и҃:

Пе́рвѣе написа́вшейсѧ твое́й і҆кѡ́нѣ, є҆ѵⷢ҇льскихъ та̑инъ благовѣ́стникомъ, и҆ къ тебѣ̀, цр҃и́цѣ, принесе́ннѣй, да ᲂу҆сво́иши тꙋ̀, и҆ си́льнꙋ содѣ́лаеши спастѝ чествꙋ́ющыѧ тѧ̀: и҆ пора́доваласѧ є҆сѝ ꙗ҆́кѡ сꙋ́щи ми́лостива, спасе́нїѧ на́шегѡ содѣ́тельница. ꙗ҆́кѡ ᲂу҆ста̀ и҆ гла́съ і҆кѡ́нѣ бы́вше, ꙗ҆́коже и҆ бг҃а внегда̀ зачина́ющи во чре́вѣ, пѣ́снь воспѣ́ла є҆сѝ: сѐ ѿ ны́нѣ ᲂу҆блажа́тъ мѧ̀ всѝ ро́ди! и҆ на тꙋ̀ зрѧ́щи глаго́лала є҆сѝ со вла́стїю: съ си́мъ ѻ҆́бразомъ бл҃года́ть моѧ̀ и҆ си́ла. и҆ мы̀ и҆́стиннѡ вѣ́рꙋемъ, ꙗ҆́кѡ сѐ рекла̀ є҆сѝ, гпⷭ҇жѐ, си́мъ ѻ҆́бразомъ съ на́ми є҆сѝ: тѣ́мъ благоговѣ́йнѡ предстоѧ́ще, покланѧ́емсѧ тебѣ̀ рабѝ твоѝ, посѣти́ ны твои́ми ма́терними щедро́тами.

Гла́съ з҃:

Гора̀ є҆сѝ вели́каѧ и҆ пресла́внаѧ, па́че горы̀ сїна́йскїѧ, бцⷣе: ѻ҆́на бо не терпѧ́ше сни́тїѧ сла́вы бж҃їѧ во ѻ҆́бразѣхъ и҆ сѣ́нехъ, ѻ҆гне́мъ возгара́шесѧ, и҆ гро́ми и҆ мѡ́лнїи та́мѡ бы́ша. ты́ же ве́сь бжⷭ҇твенный ѻ҆́гнь сꙋ́щь бж҃їе сло́во, во чре́вѣ твое́мъ неѡпа́льнѡ носи́ла є҆сѝ, и҆ ѿ сосє́цъ твои́хъ млеко́мъ пита́ла є҆сѝ, ма́нїемъ носѧ́щаго всѧ̑, и҆ ма́тернее дерзнове́нїе къ немꙋ̀ и҆мꙋ́щи, помозѝ, влⷣчце, вѣ́рнѡ пра́зднꙋющымъ тво́й честны́й пра́здникъ, и҆ не забꙋ́ди ми́лостивнѡ посѣща́ющи: прїѧ́ла бо є҆сѝ ѿ бг҃а да́ръ, стро́ити и҆ покрыва́ти хрⷭ҇тоимени́тое ста́до, рабы̑ твоѧ̑.

Сла́ва, и҆ ны́нѣ, гла́съ ѕ҃:

Тебѣ̀ всѝ ро́ди человѣ́честїи хва̑льныѧ да́ры прино́сѧтъ, влⷣце, и҆ мо́лѧтсѧ ꙗ҆́кѡ цр҃и́цѣ и҆ мт҃ри бж҃їи: прⷪ҇ро́цы тѧ̀ премꙋ́дрѡ проповѣ́даша, леѵі́ти благослови́ша, а҆пⷭ҇толи и҆ мч҃ницы и҆сповѣ́даша, сщ҃е́нницы покланѧ́ютсѧ, а҆рхїере́є проповѣ́даютъ, мона́си и҆ прості́и благоговѣ́ютъ, бога́тїи и҆ ᲂу҆бо́зїи, сироты̑ и҆ вдѡвы̀, и҆ всѧ́къ во́зрастъ, и҆ всѧ́ко преспѣ́ѧнїе, ста́рческое и҆ младе́нческое, подъ кро́въ тво́й держа́вный съ вѣ́рою прибѣга́емъ: покры́й и҆ соблюдѝ, гпⷭ҇жѐ, моли́твами твои́ми, и҆ спасѝ ѿ бѣ́дъ дꙋ́шы на́шѧ.

На стїхо́внѣ стїхи̑ры, гла́съ в҃:

Вмѣсти́лище чи́стое свѣ́та пречи́стагѡ, бцⷣе, ка́кѡ тѧ̀ рабѝ досто́йнѡ воспѣва́емъ; ꙗ҆́кѡ ꙗ҆вле́нїемъ пречⷭ҇тыѧ твоеѧ̀ і҆кѡ́ны, и҆ превѣ́чнагѡ млⷣнца, всѧ̑ ѡ҆свѣща́еши.

Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.

Ѽ дв҃о нескве́рнаѧ бг҃ора́дованнаѧ! что́ ти когда̀ таково̀ благодаре́нїе принесе́мъ; ꙗ҆́кѡ бл҃же́ннагѡ твоегѡ̀ ржⷭ҇тва̀ всесїѧ́ющею лꙋче́ю, всѣ́хъ ѿ тлѣ́нїѧ къ жи́зни возвела̀ є҆сѝ.

Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ.

Ѽ дв҃о гпⷭ҇жѐ, мт҃и зижди́телева! нбⷭ҇ныхъ є҆сѝ чинѡ́въ ра́дованїе, и҆ человѣ́ческомꙋ ро́дꙋ бл҃гослове́ннаѧ помо́щнице: молѝ ѡ҆ спасе́нїи дꙋ́шъ на́шихъ.

Сла́ва, и҆ ны́нѣ, гла́съ є҃:

Воспое́мъ лю́дїе свѣ́тлѡ дв҃дскꙋю пѣ́снь ѻ҆трокови́цѣ невѣ́стѣ бж҃їи, и҆ мт҃ри цр҃ѧ̀ хрⷭ҇та̀: предста̀ цр҃и́ца ѡ҆деснꙋ́ю тебѐ, влⷣко, рѧ̑сны златы́ми ѡ҆дѣ́ѧна, и҆ преꙋкра́шена бжⷭ҇твенными благолѣ́потами. сїю̀ ᲂу҆́бѡ ꙗ҆́кѡ и҆збра́ннꙋю и҆ до́брꙋю въ жена́хъ, па́че всегѡ̀ мі́ра ᲂу҆добри́въ, благоволи́лъ є҆сѝ роди́тисѧ и҆зъ неѧ̀ вели́кїѧ ра́ди ми́лости: и҆ сїю̀ помо́щницꙋ лю́демъ твои̑мъ дарова́лъ є҆сѝ, спаса́ти и҆ покрыва́ти ѿ бѣ́дъ всемогꙋ́щею твое́ю и҆ бжⷭ҇твенною си́лою, є҆ѧ́же моли́твами, хрⷭ҇тѐ бж҃е, поми́лꙋй на́съ.

Тропа́рь, гла́съ д҃:

Застꙋ́пнице ᲂу҆се́рднаѧ, мт҃и гдⷭ҇а вы́шнѧгѡ. за всѣ́хъ мо́лиши сн҃а твоего̀ хрⷭ҇та̀ бг҃а на́шего, и҆ всѣ̑мъ твори́ши спасти́сѧ, въ держа́вный тво́й покро́въ прибѣга́ющымъ. всѣ́хъ на́съ застꙋпѝ, ѽ гпⷭ҇жѐ цр҃и́це и҆ влⷣчце! и҆̀же въ напа́стехъ и҆ ско́рбехъ, и҆ въ болѣ́знехъ ѡ҆бремене́нныхъ грѣхи̑ мно́гими, предстоѧ́щихъ и҆ молѧ́щихсѧ тебѣ̀ ᲂу҆миле́нною дꙋше́ю, и҆ сокрꙋше́ннымъ се́рдцемъ, предъ пречⷭ҇тымъ твои́мъ ѻ҆́бразомъ со слеза́ми, и҆ невозвра́тнѡ наде́ждꙋ и҆мꙋ́щихъ на тѧ̀, и҆збавле́нїѧ всѣ́хъ ѕѡ́лъ. всѣ̑мъ полє́знаѧ да́рꙋй, и҆ всѧ̑ спасѝ, бцⷣе дв҃о: ты́ бо є҆сѝ бжⷭ҇твенный покро́въ рабѡ́мъ твои̑мъ.

На ᲂу҆́трени, на Бг҃ъ гдⷭ҇ь, тропа́рь три́жды.

По а҃-мъ стїхосло́вїи сѣда́ленъ, гла́съ г҃:

Лю́дїе благочести́вїи, правовѣ́рнїи собо́ри хрⷭ҇тоимени́тїи, пристꙋпи́те вѣ́рнѡ всѝ, бжⷭ҇твенномꙋ припа́дающе бж҃їѧ мт҃ре ѻ҆́бразꙋ: та́ѧ бо и҆сцѣле́нїе болѧ́щымъ ра́достнѡ подае́тъ: ᲂу҆ѧзвлѧ́етъ же ѕлосла̑внаѧ ꙗ҆́кѡ стрѣла̀ ѿ лꙋ́ка, на́съ всѣ́хъ весели́тъ свѣтови́днѡ, и҆ бл҃года́тїю ѡ҆зарѧ́етъ моли́твами свои́ми.

Сла́ва, и҆ ны́нѣ:

Всю́ тѧ бг҃ъ ѡ҆свѧтѝ дв҃ꙋ до́брꙋю, и҆ непоро́чнꙋю въ жена́хъ, прⷪ҇рѡ́ки проѡбрази́въ че́стнѡ, і҆ерє́и бл҃гослови́въ, во ст҃а̑ѧ ст҃ы́хъ вселѝ: а҆́гг҃ломъ воспита̀, съ нб҃сѐ пи́щꙋ хлѣ́бъ подаѧ̀, са́мъ же пребл҃гі́й, є҆диноро́дное бг҃ъ сло́во, всели́сѧ въ тѧ̀, и҆ пло́тїю про́йде и҆зъ тебє̀: тѣ́мже тѝ покланѧ́емсѧ и҆ чти́мъ, ꙗ҆́кѡ вои́стиннꙋ и҆́стиннꙋю сꙋ́щꙋю бцⷣꙋ.

По в҃-мъ стїхосло́вїи сѣда́ленъ, гла́съ д҃:

Да ликовствꙋ́етъ свѣ́тлѡ вѣ́рныхъ всѐ мно́жество, рыда́етъ же де́мѡнское во́инство, ви́дѧще многоимє́нныѧ сїѧ́ющѧ пра́здники бж҃їѧ мт҃ре, ᲂу҆блажа́емꙋ бж҃їю мт҃рь бжⷭ҇твенными пѣ́сньми: и҆дѣ́же бо бг҃опрїѧ́тнѡ сла́витсѧ пребл҃гослове́ннаѧ бцⷣа влⷣчца, бг҃оизбра́ннаѧ ѻ҆трокови́ца, непрїѧ́зни паде́нїе, хрⷭ҇тїа́нѡмъ же крѣ́пкое ᲂу҆твержде́нїе.

Сла́ва, и҆ ны́нѣ:

Ѽ всебл҃гослове́ннаѧ бцⷣе влⷣчце, бг҃оизбра́ннаѧ ѻ҆трокови́це, свѣ́тлое прⷪ҇ро́ческое сбытїѐ, а҆пⷭ҇льскаѧ похвало̀, и҆ мч҃ническое и҆сповѣ́данїе и҆ вѣ́нче, а҆́гг҃лы чти́маѧ, и҆ человѣ́ческими рѡ́ды многопѣ́таѧ, и҆ всегѡ̀ мі́ра вожделѣ́ннаѧ помо́щница. и҆зба́ви рабы̑ твоѧ̑ ѡ҆сꙋжде́нїѧ бꙋ́дꙋщагѡ, и҆ є҆́зера ѻ҆́гненнагѡ, є҆ди́на бл҃гослове́ннаѧ.

По полѷеле́и сѣда́ленъ, гла́съ а҃:

Правовѣ́рнѡ чтꙋ́щыѧ тѧ̀ лю́дїе къ тебѣ̀ прибѣга́юща и҆ і҆кѡ́нѣ твое́й ст҃ѣ́й любе́знѡ покланѧ́ющасѧ, ѽ бж҃їѧ мт҃и, спасѝ, и҆ не да́ждь въ расхище́нїе сопоста́тѡмъ, нижѐ наи́дꙋтъ на ны̀ всѧ̑ ѕла̑ѧ, ꙗ҆же грѣхѝ на́шѧ ᲂу҆гото́ваша на́мъ, нижѐ беззакѡ́нїѧ на̑ша превзы́дꙋтъ на главы̑ на́шѧ, но да твоѧ̀ ма́тернаѧ къ бг҃ꙋ преѡдолѣ́етъ за ны̀ бг҃опрїѧ́тнаѧ моли́тва.

Сла́ва, и҆ ны́нѣ:

Пречⷭ҇таѧ твоѧ̀ і҆кѡ́на, бцⷣе дв҃о, врачевство̀ всемꙋ̀ мі́рꙋ дꙋхо́вное: къ не́йже прибѣга́юще, тебѣ̀ покланѧ́емсѧ, и҆ почита́емъ, и҆ лобыза́емъ, и҆ чти́мъ. и҆сцѣле́нїй бл҃года́ть почерпа́юще ѿ неѧ̀, и҆ недꙋ̑гъ тѣле́сныхъ, и҆ дꙋше́вныхъ страсте́й, твои́ми моли́твами свобожда́емсѧ.

Та́же степє́нна, а҃-й а҆нтїфѡ́нъ д҃ гла́са. Прокі́менъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ. Всѧ́кое дыха́нїе: Є҆ѵⷢ҇лїе лꙋкѝ, зача́ло д҃. По н҃-мъ ѱалмѣ̀ стїхи́ра, гла́съ и҃.

Прїиди́те возра́дꙋемсѧ: Пи́сана на Гдⷭ҇и воззва́хъ.

Канѡ́нъ ѻ҆диги́трїю прест҃ы́ѧ бцⷣы, со і҆рмосо́мъ на ѕ҃.

Творе́нїе і҆еромона́ха і҆гна́тїа.

Гла́съ д҃. Пѣ́снь а҃. І҆рмо́съ:

Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Ра́достнѡ, чⷭ҇таѧ, ны́нѣ наста́вшее хвале́нїе приноша́ю, ра́дꙋѧсѧ, и҆ ти́химъ гла́сомъ, ѻ҆дїги́трїе, вопїю́ ти: ра́дꙋйсѧ, и҆ и҆спо́лни мѧ̀ ра́зꙋма, пѣ́ти начина́юща.

Хрⷭ҇та̀ роди́вшаѧ, ра́дость на́мъ вѣ́чнꙋю, ѽ ра́дꙋйсѧ, всепѣ́таѧ, правосла́вныхъ наде́ждо, ѻ҆дїги́трїе, всепѣ́таѧ дв҃и́це. ра́дости и҆спо́лни мѧ̀, мі́рови жела́ннаѧ.

Ликꙋ́ютъ всѝ человѣ́цы и҆ а҆́гг҃ли, всегда̀ согла́снѡ вопїю́ще, на нб҃сѝ и҆ на землѝ, ѻ҆дїги́трїе: ра́дꙋйсѧ дв҃и́це, ра́дости бо ржⷭ҇тво́мъ твои́мъ всѧ́чєскаѧ и҆спо́лнила є҆сѝ.

Ра́дость, ѻ҆дїги́трїе, со стра́хомъ тѝ вопїю́щихъ ра́дости сподо́би, мт҃и сꙋ́щїѧ ра́дости, и҆збавлѧ́ющи скорбе́й всѧ́ческихъ, и҆ всѣ́хъ поми́лꙋй, къ тебѣ̀ прибѣга́ющихъ.

И҆́нъ канѡ́нъ пра́здника на и҃, гла́съ то́йже.

Пѣ́снь а҃. І҆рмо́съ то́йже.

Благоговѣ́ютъ тѝ, бцⷣе, а҆́гг҃лѡвъ нача̑льницы, и҆ ст҃ы́хъ чи́ни че́стнѡ слꙋ́жатъ, пра́веднїи красꙋ́ютсѧ, нбⷭ҇ныхъ хода́таицꙋ блажа́тъ тѧ̀: кꙋ́пнѡ же и҆ землѧ̀ и҆ нб҃о въ весе́лїи свѣ́тлѡ восхвалѧ́ютъ тѧ̀, и҆ мы̀ грѣ́шнїи ми́лости про́симъ: ѡ҆зарѝ на̑ша сердца̀, влⷣчце, воспѣ́ти пѣ́снь ст҃ы́ѧ твоеѧ̀ і҆кѡ́ны ꙗ҆вле́нїю.

Прїиди́те, собери́тесѧ, хрⷭ҇тоимени́тїи лю́дїе, ᲂу҆мы̀ та́йнѡ ѡ҆чи́стившесѧ, во ст҃ꙋ́ю цр҃ковь мт҃ре хрⷭ҇та̀ бг҃а на́шегѡ: и҆сточа́етъ бо на́мъ неѡскꙋ́днѡ ѿ ст҃ы́ѧ і҆кѡ́ны и҆сто́чникъ дх҃о́венъ, цѣле́бенъ дꙋша́мъ и҆ тѣ́лѡмъ, пѣ́снь вопїю́щымъ: бл҃гослове́нъ и҆зъ тебє̀ рожде́йсѧ бг҃ъ на́шъ.

Диви́тъ, пренепоро́чнаѧ, и҆ ᲂу҆жаса́етъ всѧ́къ слꙋ́хъ стра́нно чꙋ́до бжⷭ҇твеннагѡ твоегѡ̀ ржⷭ҇тва̀: ка́кѡ херꙋві́мскаго творца̀ зачала̀ є҆сѝ; ка́кѡ ѻ҆́гнь нестерпи́мый во ᲂу҆тро́бѣ носи́ла є҆сѝ; ка́кѡ сꙋ́щꙋю жи́знь пло́тїю ѡ҆блекла̀ є҆сѝ, и҆ живо́тъ всемꙋ̀ мі́рꙋ родила̀ є҆сѝ бг҃а кꙋ́пнѡ и҆ чл҃вѣ́ка;

Подъ кро́въ тво́й, дв҃о гпⷭ҇жѐ, прибѣга́емъ всѝ ро́ди человѣ́честїи: просвѣти́ ны свѣ́томъ ржⷭ҇тва̀ твоегѡ̀, грѣ̑шныѧ рабы̑ твоѧ̑ молѧ́щыѧсѧ прилѣ́жнѡ, и҆ кла́нѧющыѧсѧ пречⷭ҇тѣй твое́й і҆кѡ́нѣ, просѧ́ще ѿ тебє̀ прїѧ́ти вели̑кїѧ ми́лѡсти.

Катава́сїа: Ѿве́рзꙋ ᲂу҆ста̀ моѧ̑:

Пѣ́снь г҃. І҆рмо́съ:

Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ, вѣнцє́въ сла́вы сподо́би.

Хрⷭ҇та̀ вы́шнѧгѡ цр҃ѧ̀, ѽ ра́дꙋйсѧ, непоколеби́маѧ, чⷭ҇таѧ, и҆ ѡ҆дꙋшевле́ннаѧ пала́то! ра́дꙋйсѧ ѻ҆дїги́трїе, ра́дꙋйсѧ, тобо́ю бо нерꙋши́мъ на́шъ гра́дъ сохранѧ́етсѧ.

Вмѣсти́ти є҆го́же не возмо́же тва́рь, во ᲂу҆тро́бꙋ неискꙋсобра́чнꙋю, ѻ҆дїги́трїе дв҃и́це, тѣле́снѡ вмѣсти́ла є҆сѝ: тѣ́мже тѝ ра́дꙋйсѧ, пое́мъ, по до́лгꙋ велича́юще.

Ра́дость многопѣ́таѧ мі́рови, ра́достнѡ тѝ пою́ще при́снѡ, вѣ́чнꙋющїѧ, чⷭ҇таѧ, ра́дости сподоблѧ́емсѧ, твои́ми мт҃рними моли́твами къ ро́ждшемꙋсѧ и҆зъ тебє̀, ѻ҆дїги́трїе.

Златꙋ́ю тѧ̀ ста́мнꙋ, и҆ свѣ́щникъ, и҆ же́злъ, и҆ трапе́зꙋ, чⷭ҇таѧ, призыва́емъ, ѻ҆дїги́трїе: и҆ гла́съ є҆́же ра́дꙋйсѧ, тебѣ̀ при́снѡ привноша́емъ, съ си́миже и҆мены̀.

И҆́нъ. І҆рмо́съ то́йже.

Кꙋ́ю тѝ досто́йнꙋю похвалꙋ̀ на́ше принесе́тъ коне́чное неможе́нїе; ꙗ҆́кѡ ꙗ҆вле́нїемъ пречⷭ҇тыѧ твоеѧ̀ бжⷭ҇твенныѧ і҆кѡ́ны, незави̑стныѧ и҆сто́чники цѣлє́бныѧ и҆сточа́еши, вѣ́рнѡ прибѣга́ющымъ къ тебѣ̀ рабѡ́мъ твои̑мъ.

Бжⷭ҇твенныѧ твоеѧ̀ і҆кѡ́ны ст҃о́е ꙗ҆вле́нїе, бцⷣе дв҃о, ꙗ҆́кѡ свѣтоза́рное возсїѧ̀ на́мъ со́лнце, пресла́вныхъ чꙋде́съ лꙋчѝ пꙋща́ющи, тмы̑ лю́тыхъ ѡ҆бстоѧ́нїй ѿгонѧ́ющи, свѧще́нными твои́ми, влⷣчце, предста́тельствы.

И҆спо́лнила є҆сѝ бл҃года́ти и҆ногда̀ первопи́саннꙋю твою̀ і҆кѡ́нꙋ, гпⷭ҇жѐ дв҃о бцⷣе: и҆ ны́нѣ та́же бл҃года́ть и҆́стинствꙋетъ сїѧ́нїемъ вѣ́ры чꙋде́съ, ꙗ҆́кѡ тоѧ̀ ра́ди первопи́санныѧ, ко спасе́нїю вѣ́рнѡ къ тебѣ̀ по бз҃ѣ прибѣга́ющымъ.

Покланѧ́емсѧ, бцⷣе, твоемꙋ̀ пречи́стомꙋ ѻ҆́бразꙋ, и҆ пресла́дкомꙋ твоемꙋ̀ млⷣнцꙋ, превѣ́чномꙋ и҆ незаходи́момꙋ свѣ́тꙋ хрⷭ҇тꙋ̀, и҆́мже спасла̀ є҆сѝ ѿ лю́тыхъ ѕѡ́лъ и҆ тлѣ́нїѧ сме́ртнагѡ всѐ человѣ́ческое є҆стество̀.

Сѣда́ленъ, гла́съ и҃. Подо́бенъ: Премꙋ́дрости:

Бжⷭ҇твеннїи сло́ва а҆пⷭ҇ли, є҆ѵⷢ҇лїа хрⷭ҇то́ва велегла́снїи вселе́нныѧ благовѣ́стницы, бжⷭ҇твеннꙋю цр҃ковь созда́вше въ прест҃о́е твоѐ и҆́мѧ, бцⷣе, и҆ къ тебѣ̀, гпⷭ҇жѐ, прихо́дѧтъ молѧ́ще тѧ̀ прїитѝ на тоѧ̀ ѡ҆свѧще́нїе. ты́ же, ѽ бг҃ома́ти, рекла̀ є҆сѝ: и҆ди́те съ ми́ромъ, и҆ а҆́зъ съ ва́ми та́мѡ є҆́смь. ѻ҆ни́ же ше́дше ѡ҆брѣта́ютъ та́мѡ на стѣнѣ̀ це́ркве, твоегѡ̀, влⷣчце, ѻ҆́браза подо́бїе, бжⷭ҇твенною пи́сано си́лою шаро́вными подѡ́бїи, и҆ ви́дѣвше поклони́шасѧ тѝ и҆ просла́виша бг҃а. съ ни́миже и҆ мы̀ бжⷭ҇твеннѣй твое́й покланѧ́емсѧ і҆кѡ́нѣ, просѧ́ще ѿ тебє̀ вели́кїѧ ми́лости: да́рꙋй согрѣше́нїй ѡ҆ставле́нїе рабѡ́мъ твои̑мъ, є҆ди́на бл҃гослове́ннаѧ.

Сла́ва, и҆ ны́нѣ, то́йже.

Пѣ́снь д҃. І҆рмо́съ:

Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Ра́дꙋйсѧ чꙋ́до чꙋде́съ, ѻ҆дїги́трїе влⷣчце. ра́дꙋйсѧ, всѣ́хъ ра́досте градѡ́въ и҆ ве́сей, непобѣди́мое хрⷭ҇тїа́нское въ бѣда́хъ храни́лище, и҆ предгра́дїе, и҆ на врагѝ побѣжде́нїе.

Ра́дꙋйсѧ, ра́дꙋйсѧ люде́й правосла́вныхъ похвало̀, и҆ хрⷭ҇толюби́выхъ во́инствъ покро́въ пребыва́еши всѣ́хъ цр҃и́це. ра́дꙋйсѧ ѻ҆дїги́трїе, прибѣ́жище всѣ̑мъ на́мъ и҆ ᲂу҆твержде́нїе.

Ра́дꙋйсѧ, всѣ̑мъ ско́рое въ бѣда́хъ и҆збавле́нїе. ра́дꙋйсѧ, гото́вое всѣ̑мъ скорбѧ́щымъ ᲂу҆тѣше́нїе, ра́дꙋйсѧ всепѣ́таѧ, ра́дꙋйсѧ, ѻ҆дїги́трїе всебл҃гослове́ннаѧ, всѣ̑мъ немѡщны́мъ и҆сцѣли́тельнице.

Ра́дꙋйсѧ, є҆ѧ́же вели̑чїѧ всѧ̀ тва́рь сла́вити ᲂу҆́бѡ спѣши́тъ по достоѧ́нїю, но не возмога́етъ, ѻ҆дїги́трїе: и҆ сегѡ̀ ра́ди зове́тъ тѝ: ра́дꙋйсѧ, влⷣчце, бг҃овмѣсти́мое жили́ще.

И҆́нъ. І҆рмо́съ то́йже.

Почти́мъ лю́дїе чⷭ҇тыѧ въ чистотѣ̀ і҆кѡ́нꙋ дв҃ы бцⷣы, и҆ тоѧ̀ бжⷭ҇твеннагѡ млⷣнца, хрⷭ҇та̀ бг҃а на́шегѡ, и҆ лобыза́емъ и҆ прославлѧ́емъ со стра́хомъ и҆ тре́петомъ: почита́емъ бо і҆кѡ́нꙋ благоче́стнѡ, па́че же почита́емъ са́мꙋю тꙋ́ю сꙋ́щꙋю чⷭ҇тꙋю бг҃омт҃рь.

Дв҃дъ бжⷭ҇твенный и҆ чꙋ́дный прⷪ҇ро́къ и҆здале́че прови́дѧ, глаго́ла: лицꙋ̀ твоемꙋ̀ помо́лѧтсѧ бога́тїи лю́дїе. мы́ же вѣ́рнїи покланѧ́емсѧ, и҆ лобыза́емъ честнꙋ́ю і҆кѡ́нꙋ, дꙋша́ми кꙋ́пнѡ и҆ тѣлесы̀ ѡ҆свѧща́емсѧ.

Є҆ѵⷢ҇лїа хрⷭ҇то́ва бг҃огла́сный списа́тель лꙋка̀, бж҃їимъ манове́нїемъ всенепоро́чный тво́й написꙋ́етъ ѻ҆́бразъ, бцⷣе, и҆ млⷣнца превѣ́чнаго на рꙋка́хъ твои́хъ воѡбрази́въ: къ немꙋ́же притека́ющыѧ напа́стей и҆ бѣ́дъ и҆збавлѧ́еши, и҆ всѧ̑ покрыва́еши, и҆ спаса́еши твое́ю ми́лостїю.

Ты̀ є҆сѝ похвало̀ и҆ вѣне́цъ ст҃ы̑мъ всѣ̑мъ, ѽ цр҃и́це! ты̀ ᲂу҆пова́нїе на́ше и҆ помо́щнице по бз҃ѣ, и҆ на тѧ̀ наде́ждꙋ спасе́нїѧ на́шегѡ возложи́хомъ всѝ. тебѣ̀ мо́лимсѧ, ꙗ҆́кѡ бж҃їи мт҃ри: ѡ҆дождѝ грѣ̑шнымъ рабѡ́мъ твои̑мъ бога̑тыѧ твоѧ̑ дꙋшеспаси́тєльныѧ ми́лѡсти.

Пѣ́снь є҃. І҆рмо́съ:

Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Благосты́ни бе́здно и҆ щедро́тамъ є҆сѝ, ра́дꙋйсѧ ѻ҆дїги́трїе дв҃и́це. ра́дꙋйсѧ, всѣ́мъ ра́дость творѧ́щи вѣ̑рнымъ. ѽ ра́дꙋйсѧ сꙋ́щымъ въ бѣда́хъ, скорбѧ́щымъ пребы́страѧ застꙋ́пнице!

Ра́дости ѿ и҆сполне́нїѧ вели́чїѧ чꙋде́съ твои́хъ зрѧ́ще и҆сполнѧ́емсѧ всѝ, не зрѧ́ще, и҆ слы́шаще же вѣ́рнїи: тѣ́мже ра́дꙋйсѧ тебѣ̀ при́снѡ, всю́дꙋ и҆ всѝ, ѻ҆дїги́трїе, пое́мъ.

Хрⷭ҇та̀ бг҃а на́шегѡ, ѽ ра́дꙋйсѧ, ѻ҆дїги́трїе, жили́ще, и҆ до́мъ неизрече́ннѣй и҆ пребжⷭ҇твеннѣй, дв҃о, сла́вѣ є҆гѡ̀! ѽ ра́дꙋйсѧ, пала́то преꙋкраше́ннаѧ! ра́дꙋйсѧ гра́де ѡ҆дꙋшевле́нный, присноца́рствꙋющїй!

Ра́дость неѡскꙋ́днꙋю тѧ̀ разсмотрѧ́юще, ꙗ҆́кѡ мо́ре, ѻ҆трокови́це, ѻ҆дїги́трїе дв҃и́це, ра́дꙋющесѧ всѝ, ра́дꙋйсѧ, вопїе́мъ тѝ: и҆ пою́ще, бжⷭ҇твенныхъ дарѡ́въ неви́димѡ при́снѡ ѿ тебє̀ ѡ҆жида́емъ.

И҆́нъ. І҆рмо́съ: то́йже.

Всѧ́кѡ, пречⷭ҇таѧ, сꙋщество̀ воспѣ́ти недоꙋмѣ́етъ тѧ̀, па́че бо го́рнихъ ᲂу҆мѡ́въ превозвы́силасѧ є҆сѝ, ро́ждши непристꙋ́пнаго и҆ стра́шнаго всецр҃ѧ̀ и҆ бг҃а: но ꙗ҆́кѡ ми́лостива и҆ ско́раѧ человѣ́кѡмъ помо́щница, вонмѝ моле́нїю ра̑бъ твои́хъ, и҆ да́рꙋй твою̀ по́мощь.

И҆дѣ́же ѡ҆сѣни́тъ бл҃года́ть твоѧ̀, бцⷣе, стра́хомъ и҆счеза́ютъ де́мѡни, и҆ разрꙋша́етсѧ ѕлоко́зненное тѣ́хъ мечта́нїе, бѣ́гаютъ дꙋ́си те́мнїи, ра́дꙋетсѧ же вѣ́рныхъ всѐ мно́жество, тебѣ̀ пѣ́снь хва́льнꙋ ѿ се́рдца вопїю́ще: ра́дꙋйсѧ, бжⷭ҇твенный покро́ве дꙋ́шъ на́шихъ.

Без̾ѻчє́снымъ сла́дкое зрѣ́нїе дае́тсѧ, глꙋхи̑мъ слы́шанїе, нѣмы̑мъ благоглаго́ланїе, хромы̑мъ хожде́нїе, прокажє́ннымъ ѡ҆чище́нїе, де́мѡнствꙋємымъ цѣломꙋ́дрїе, и҆ въ болѣ́знехъ сꙋ́щымъ разли́чныхъ и҆сцѣле́нїе, ѡ҆сѣне́нїемъ пречⷭ҇тыѧ твоеѧ̀, бцⷣе, і҆кѡ́ны.

Не ᲂу҆молчи́мъ никогда́же, бцⷣе, ѱалмы̑ и҆ пѣ́сньми воспѣва́ти вели̑чїѧ твоѧ̑, ѡ҆бра́дованнаѧ: бг҃а бо вои́стиннꙋ воплоти́вшагосѧ родила̀ є҆сѝ, во спасе́нїе на́ше всемі́рное, и҆ и҆збавле́нїе.

Пѣ́снь ѕ҃. І҆рмо́съ:

Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Хрⷭ҇та̀, чⷭ҇таѧ, прїе́млющи, гла́съ є҆́же ра́дꙋйсѧ, ѻ҆дїги́трїе дв҃и́це, слы́шала є҆сѝ: є҆го́же неизрече́ннѡ ро́ждши, и҆ ра́дꙋйсѧ, ѿ всѣ́хъ слы́шиши всегда̀.

Ра́дости всѧ̑ и҆спо́лнила є҆сѝ, вы̑шнѧѧ и҆ ни̑жнѧѧ ты̀ совокꙋпи́ла є҆сѝ, ѻ҆дїги́трїе: тѣ́мже ра́достнѡ и҆ согла́снѡ ны́нѣ, нб҃о и҆ всѧ̀ землѧ̀ зове́тъ тѝ.

Вдова́мъ, ѽ ра́дꙋйсѧ всепѣ́таѧ, и҆ всѣ̑мъ си̑рымъ ѻ҆дїги́трїе, ᲂу҆тѣше́нїе! ра́дꙋйсѧ, всѣ̑мъ и҆сточа́ющи ни́щымъ бога́тство неистощи́мое!

Зла́та всѧ́кагѡ блиста́ема, и҆ ᲂу҆́тра со́лнечнагѡ свѣтлѣ́йши, жили́ще хрⷭ҇то́во, ра́дꙋйсѧ ѻ҆дїги́трїе, ра́дꙋйсѧ дв҃и́це: ра́дꙋйсѧ невѣ́сто неневѣ́стнаѧ.

И҆́нъ. І҆рмо́съ: то́йже.

Бжⷭ҇твеннагѡ твоегѡ̀ ржⷭ҇тва̀, дв҃о гпⷭ҇жѐ, пребога́таѧ бл҃года́ть, ю҆́же дре́вле и҆зглаше́нїемъ предала̀ є҆сѝ пречⷭ҇томꙋ твоемꙋ̀ ѻ҆́бразꙋ, неѡскꙋ́днѣ дѣ́йствовати вели̑каѧ же и҆ пресла̑внаѧ, во спасе́нїе на тѧ̀ надѣ́ющымсѧ.

И҆дѣ́же прославлѧ́етсѧ ст҃о́е и҆́мѧ ѡ҆бра́дованныѧ бцⷣы, та́мѡ всѧ́ческихъ благи́хъ и҆сто́чницы пролива́ютсѧ, прїиди́те въ чистотѣ̀, человѣ́цы, се́ бо ꙗ҆вле́нїемъ бжⷭ҇твенныѧ дв҃ы і҆кѡ́ны, сказꙋ́етъ цр҃и́цы прише́ствїе, во спасе́нїе всѣ́хъ вѣ́рныхъ.

Цѣлє́нїѧ болѣ́зней, ѿгна́нїе же страсте́й и҆ дꙋшепита́тельное спасе́нїе, грѣхѡ́въ проще́нїе, и҆ вѣ́чное и҆збавле́нїе, ѿ пречⷭ҇тыѧ твоеѧ̀ і҆кѡ́ны, влⷣчце, вѣ́рнѡ приходѧ́ще прїе́млемъ, бг҃ома́ти всенепоро́чнаѧ.

Къ тебѣ̀, гпⷭ҇жѐ, прибѣга́ютъ ро́ди правовѣ́рныхъ, про́сѧтъ вели́кїѧ ми́лости, и҆ прїе́млютъ неѡскꙋ́днѡ сꙋ́щїи въ недꙋ́зѣхъ и҆сцѣле́нїе, въ страсте́хъ премѣне́нїе, въ печа́лѣхъ ᲂу҆тѣше́нїе. и҆сточѝ и҆ мнѣ̀, влⷣчце, ка́плю дꙋшеспаси́тельнꙋю, да со всѣ́ми и҆ а҆́зъ пою̀ твоѐ вели́чїе.

Конда́къ, гла́съ и҃. Подо́бенъ: Взбра́нной:

Притеце́мъ, лю́дїе, къ ти́хомꙋ семꙋ̀ и҆ до́бромꙋ приста́нищꙋ, ско́рой помо́щницѣ, гото́вомꙋ и҆ те́пломꙋ (с. 391) спасе́нїю, покро́вꙋ дв҃ы: ᲂу҆скори́мъ на моли́твꙋ, и҆ потщи́мсѧ на покаѧ́нїе: и҆сточа́етъ бо на́мъ неѡскꙋ̑дныѧ ми́лѡсти пречⷭ҇таѧ бцⷣа, предварѧ́етъ на по́мощь, и҆ и҆збавлѧ́етъ ѿ вели́кихъ бѣ́дъ и҆ ѕѡ́лъ, благонра̑вныѧ и҆ бг҃обоѧ́щыѧсѧ рабы̑ своѧ̑.

І҆́косъ:

Смы́слъ ѡ҆чи́стивше и҆ ᲂу҆́мъ, притеце́мъ къ бцⷣѣ, свѣ́тлѡ пѣ́сньми ᲂу҆блажа́юще ю҆̀, и҆ пречⷭ҇тꙋю і҆кѡ́нꙋ є҆ѧ̀ прославлѧ́емъ и҆ чти́мъ, и҆ припа́дающе покланѧ́емсѧ ꙗ҆́кѡ само́й сꙋ́щей ѻ҆́ной: че́сть бо і҆кѡ́ны на первоѻбра́зное восхо́дитъ, и҆ почита́ѧй и҆ покланѧ́ѧйсѧ є҆́й, почита́етъ са́мое первоѻбра́зное, ꙗ҆́коже бжⷭ҇твеннїи ѻ҆тцы̀ реко́ша. и҆ а҆́ще кто̀ не чти́тъ прест҃ы́ѧ бцⷣы, и҆ не покланѧ́етсѧ і҆кѡ́нѣ є҆ѧ̀, а҆на́ѳема да бꙋ́детъ: посрамлѧ́етъ бо и҆ погꙋблѧ́етъ не чтꙋ́щыѧ ю҆̀: и҆збавлѧ́етъ же ѿ вели́кихъ бѣ́дъ и҆ ѕѡ́лъ, благонра̑вныѧ и҆ бг҃обоѧ́щыѧсѧ рабы̑ своѧ̑.

Пѣ́снь з҃. І҆рмо́съ:

Не послꙋжи́ша тва́ри бг҃омꙋ́дрїи, па́че созда́вшагѡ: но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Ра́дꙋйсѧ, ра́дꙋйсѧ, бцⷣе ѻ҆дїги́трїе, всѣ́хъ и҆ всегда̀ наставлѧ́ющи вѣ́рныхъ, ше́ствовати ко всѧ́комꙋ пꙋтѝ спаси́тельномꙋ, ра́дꙋйсѧ влⷣчце, тобо́ю бо при́снѡ и҆збавлѧ́емсѧ настоѧ́щїѧ ва́рварскїѧ бѣды̀.

Ра́дꙋйсѧ, ра́дꙋйсѧ ѻ҆дїги́трїе, бдѧ́щи и҆ молѧ́щисѧ ѡ҆ на́съ къ бг҃ꙋ, и҆ всѧ́кїѧ ѕло́бы хода́тайствомъ твои́мъ, всѧ́ческихъ скорбе́й, бг҃ороди́тельнице, всѣ́хъ люде́й и҆збавлѧ́ющи.

Ра́дꙋйсѧ, ра́дꙋйсѧ прест҃а́ѧ ѻ҆дїги́трїе, прошє́нїѧ на̑ша къ по́льзѣ на́мъ и҆сполнѧ́ющи, и҆ хотѧ́щи всѣ̑мъ при́снѡ всегда̀ любодрꙋ́жное благо́е є҆ди́нство, спѣ́шное же во и҆зѧ́щныхъ.

Ра́дꙋйсѧ, ра́дꙋйсѧ кораблє́мъ, ѻ҆дїги́трїе, нꙋ́жднѡ пла́вающымъ, и҆збавлѧ́ющи вѣ́рныхъ, и҆ всѣ̑мъ и҆збавле́нїе ѿ всѧ́кїѧ ско́рби, и҆ недꙋ́ги пестрѡ́тныѧ, и҆ ме́длєнныѧ разрѣша́ющи вско́рѣ.

И҆́нъ. І҆рмо́съ то́йже.

Прїиди́те, почерпе́мъ ѿпꙋще́нїе ѿ неистощи́магѡ и҆сто́чника, точа́щагѡ ст҃ы́ню пречⷭ҇тыѧ дв҃ы, и҆ тоѧ̀ пречи́стагѡ млⷣнца бж҃їѧ сло́ва, на́съ ра́ди вочл҃вѣ́чшагѡсѧ: къ немꙋ́же возопїи́мъ: тво́рче и҆зба́вителю, препросла́вленный со ѻ҆ц҃е́мъ и҆ дх҃омъ, бж҃е бл҃гослове́нъ є҆сѝ.

Неꙋсы́пнꙋю, чⷭ҇таѧ, и҆ бг҃опрїѧ́тнꙋю и҆мꙋ́щи моли́твꙋ, и҆ непреѡдолѣ́емꙋю держа́вꙋ крѣ́пости, врагѡ́въ на́шихъ де́рзость, ꙗ҆́же на ны̀ разорѝ, и҆ вы̑ѧ и҆́хъ подъ но́зѣ вѣ́рномꙋ наро́дꙋ на́шемꙋ низложѝ, да возвесели́мсѧ ѡ҆ тебѣ̀ рабѝ, сн҃ꙋ твоемꙋ̀ вопїю́ще: ѻ҆тє́цъ на́шихъ бж҃е, бл҃гослове́нъ є҆сѝ.

Ра́дꙋемсѧ и҆ весели́мсѧ вѣ́рнїи лю́дїе, чꙋ́дномꙋ ꙗ҆вле́нїю і҆кѡ́ны пречⷭ҇тыѧ влⷣчцы бцⷣы: рѣка́ бо ꙗ҆ви́сѧ неисчерпа́ема, цѣле́бнꙋю во́дꙋ точа́щи, слѣпы̑мъ бо ви́дѣти дае́тъ, и҆ глꙋхи̑мъ слы́шанїе, хромы̑мъ хожде́нїе, и҆ всѣ̑мъ сꙋ́щымъ въ недꙋ́зѣхъ безме́здно и҆сцѣле́нїе.

Неиспы́тана глꙋбина̀, недовѣ́домо та́инство, непостижи́мъ ѻ҆́бразъ, дв҃о, зача́тїѧ твоегѡ̀, зача́тїе безъ сѣ́мене, безъ мꙋ́жа ржⷭ҇тво̀. безпло́тный воплоти́сѧ, превѣ́чный младе́нствꙋетъ, сн҃ъ бж҃їй, сн҃ъ тебє̀, дв҃ы, быва́етъ, є҆мꙋ́же вопїе́мъ: бж҃е, бл҃гослове́нъ є҆сѝ.

Пѣ́снь и҃. І҆рмо́съ:

Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Ра́дꙋйсѧ, всебл҃гослове́ннаѧ марі́е, и҆зъ тебє́ бо всебл҃гослове́нный бг҃ъ ѡ҆дѣ́ѧвсѧ во всего́ мѧ человѣ́ка. и҆ ѡ҆дѣ́ѧвсѧ соединѝ своемꙋ̀ бжⷭ҇твꙋ̀, неизрече́ннымъ соедине́нїемъ, дв҃о ѻ҆дїги́трїе. ра́дꙋйсѧ, ѡ҆бра́дованнаѧ, ра́досте всегѡ̀ мі́ра.

Ра́дꙋйсѧ, лꙋка́выхъ дꙋхѡ́въ прогони́тельнице. ра́дꙋйсѧ бцⷣе ѻ҆дїги́трїе. ра́дꙋйсѧ, ю҆́же нбⷭ҇наѧ неви̑димаѧ вѡ́инства славосло́вѧтъ всегда̀, и҆ велича́ютъ, ꙗ҆́кѡ мт҃рь бж҃їю бы́вшꙋю. ра́дꙋйсѧ, ꙗ҆́же ни̑жнѧѧ сочета́вши съ вы́шними.

Ра́дꙋйсѧ, всѣ́хъ нбⷭ҇ныхъ си́лъ безъ разсꙋжде́нїѧ превосходѧ́щаѧ. ра́дꙋйсѧ, ѻ҆дїги́трїе, ра́дꙋйсѧ, всѧ́кїѧ тва́ри, ꙗ҆́кѡ бг҃а ро́ждшаѧ госпо́дствꙋющи, є҆́й, влⷣчце всепѣ́таѧ. ра́дꙋйсѧ, пребыва́еши дв҃а чⷭ҇таѧ и҆ по ржⷭ҇твѣ̀.

Ра́дꙋйсѧ, жена́мъ всѣ̑мъ сла́во, хра́ме преѡсвѧще́нный бг҃а на́шегѡ. ра́дꙋйсѧ, ѻ҆дїги́трїе. ра́дꙋйсѧ, дꙋшеспаси́тельнаѧ все́й вселе́ннѣй. ра́дꙋйсѧ, покрыва́ющїй ѻ҆́блаче, нб҃съ ши́ршаѧ. ра́дꙋйсѧ, мѷрополо́жнице, бжⷭ҇твеннагѡ мѵ́ра полна̀.

И҆́нъ. І҆рмо́съ то́йже.

Оу҆́мъ а҆́гг҃льскїй и҆ человѣ́ческїй ᲂу҆жаса́етсѧ, бцⷣе, ка́кѡ бг҃а нбⷭ҇наго ложесна́ми ѡ҆б̾е́мши воплоти́ла є҆сѝ; ка́кѡ млⷣнца ро́ждши, ꙗ҆́кѡ сн҃а на рꙋкꙋ̀ но́сиши; є҆го́же ᲂу҆жаса́етсѧ тва́рь, и҆ трепе́щꙋтъ го́рнїи престо́ли, вопїю́ще непреста́ннѡ: ст҃ъ, ст҃ъ, ст҃ъ є҆сѝ, бж҃е, препѣ́тый и҆ превозноси́мый во вѣ́ки.

Ра́дꙋйсѧ, сꙋ́щаѧ ра́досте всегѡ̀ мі́ра, со а҆рха́гг҃ломъ гаврїи́ломъ вопїе́мъ тѝ, бцⷣе: ра́дꙋйсѧ, вмѣсти́лище невмѣсти́магѡ. ра́дꙋйсѧ, бл҃года́тнаѧ, носи́ло бж҃ества̀ всегѡ̀. ра́дꙋйсѧ, а҆да́мово воззва́нїе, съ тобо́ю гдⷭ҇ь, и҆ тебє̀ ра́ди съ на́ми спаса́ѧ на́съ. є҆го́же пое́мъ и҆ превозно́симъ во вѣ́ки.

Ко́рень і҆ессе́евъ ѡ҆свѧще́нный, ко́рень грѣха̀ на́шегѡ и҆сто́ргнꙋла є҆сѝ. же́злъ а҆арѡ́новъ процвѣ́тшїй, жизнода́телѧ цвѣ́та и҆зрасти́вши хрⷭ҇та̀, ста́мно маннопрїе́мнаѧ, сме́рти всю̀ си́лꙋ сокрꙋши́ла є҆сѝ, и҆ въ поро́дꙋ жи́зни возвела̀ є҆сѝ ро́дъ человѣ́ческїй: тѣ́мже тѧ̀ пое́мъ до́брыхъ вино́внꙋю.

Ты̀ похвала̀ хрⷭ҇тїа́нѡмъ є҆сѝ, влⷣчце, ты̀ ѻ҆рꙋ́жїе на врагѝ, и҆ стѣна̀ къ тебѣ̀ прибѣга́ющымъ. тѧ̀ и҆ ны́нѣ на по́мощь призыва́емъ, гпⷭ҇жѐ, не да́ждь врагѡ́мъ вознести́сѧ на лю́ди твоѧ̑, и҆̀же тебѐ не хва́лѧтъ, ни сн҃а твоегѡ̀, бцⷣе, и҆ твое́й і҆кѡ́нѣ не кла́нѧютсѧ: си́хъ побѣдѝ, и҆ дꙋ́шы на́шѧ спасѝ.

Пѣ́снь ѳ҃. І҆рмо́съ:

Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Ра́дꙋйсѧ, свѣщѐ, свѣ́тъ невече́рнїй поне́сшаѧ, и҆ въ ржⷭ҇твѣ̀ твое́мъ многобо́жїѧ тмꙋ̀ разрꙋши́вшаѧ, и҆ а҆́довы про́пасти и҆зба́вльшаѧ лю́ди. ра́дꙋйсѧ, ѻ҆дїги́трїе бцⷣе, добро́тъ всѣ́хъ предхода́таице.

Ра́дꙋйсѧ, землѐ, и҆зъ неѧ́же кла́съ прозѧ́бши нбⷭ҇ный вѣ̑рнымъ, и҆ мі́ра всегѡ̀ дꙋшегꙋ́бнагѡ гла́да и҆зба́ви, разꙋ́мнаѧ и҆ ѡ҆дꙋшевле́ннаѧ. ѽ ра́дꙋйсѧ, вїногра́де, и҆́же гро́здъ живо́тный ро́ждшаѧ, бцⷣе чⷭ҇таѧ ѻ҆дїги́трїе!

Ра́дꙋйсѧ, та́йныхъ цвѣтѡ́въ прекра́сный сꙋ́щїй раю̀. ра́дꙋйсѧ, мт҃и дв҃о, неви́димыхъ ра́зꙋмъ чистото́ю страннолѣ́пнѡ побѣ́ждши, бг҃ороди́тельнице. ра́дꙋйсѧ, ѻ҆трокови́це. ра́дꙋйсѧ, ѻ҆дїги́трїе, всемі́рное чꙋ́до и҆ слы́шанїе.

Лѣ́то живота̀ на́шегѡ про́чее сохранѝ неврежде́нно, поможе́нїемъ твои́мъ, дв҃о ѻ҆трокови́це, и҆ сподо́би коне́цъ благі́й полꙋчи́ти на́мъ воспѣва́ющымъ тѧ̀, и҆ взыва́ющымъ: ра́дꙋйсѧ, всебл҃же́ннаѧ, бцⷣе чⷭ҇таѧ ѻ҆дїги́трїе.

И҆́нъ. І҆рмо́съ то́йже.

Тебѐ тве́рдꙋю помо́щницꙋ ро́дꙋ человѣ́ческомꙋ, бцⷣе марі́е, ли́къ проро́ческїй многоѻбра́знѡ провозвѣстѝ, сѣ́нь ст҃ꙋ́ю, нб҃съ простра́ннѣйшꙋю, скрижа́ль бг҃опи́саннꙋю, и҆ кꙋпинꙋ̀ неѡпали́мꙋю, две́рь бг҃опрохо́днꙋю, го́рꙋ же и҆ лѣ́ствицꙋ, и҆ мо́стъ, и҆ же́злъ процвѣ́тшїй: мы́ же вои́стиннꙋ бцⷣꙋ тѧ̀ велича́емъ.

Та́йна глꙋбины̀ ржⷭ҇тва̀ твоегѡ̀ ᲂу҆́мъ а҆́гг҃льскїй ᲂу҆жаса́етъ, дв҃о, и҆ пречⷭ҇таѧ і҆кѡ́на де́мѡны прого́нитъ, и҆ ли́ца нечести́выхъ ѡ҆мрача́етъ, и҆ въ стꙋ́дъ порѣва́етъ: не терпѧ́тъ бо взира́ти на си́лꙋ є҆ѧ̀, бѣ́гаютъ же и҆ и҆счеза́ютъ. мы́ же любе́знѡ покланѧ́емсѧ и҆ лобыза́емъ, и҆ тѧ̀ бцⷣꙋ велича́емъ.

Предста́тельница сꙋ́щи неѿстꙋ́пна къ вы́шнемꙋ цр҃ю̀, ꙗ҆́кѡ и҆мꙋ́щи мт҃рне дерзнове́нїе непосты́дно, въ ми́рѣ глꙋбо́цѣ правосла́вныхъ житїѐ ᲂу҆твердѝ, и҆ ѻ҆те́чество на́ше возвы́си, и҆ всѧ̑ полє́знаѧ да́рꙋй всегда̀ рабѡ́мъ твои̑мъ, да тѧ̀, бцⷣе, велича́емъ.

Ѽ всеми́лостиваѧ хрⷭ҇тїа́нѡмъ помо́щнице! не мо́жетъ тѧ̀ воспѣ́ти досто́йнѡ ᲂу҆́мъ человѣ́ческїй и҆ а҆́гг҃льскїй, ꙗ҆́кѡ всеѧ̀ тва́ри честнѣ́йши, нбⷭ҇ныхъ и҆ земны́хъ сла́внѣйши. всѣ́хъ бо родила̀ є҆сѝ творца̀ и҆ бг҃а. но, ѽ влⷣчце! прїимѝ ми́лостивнѡ, ю҆́же тебѣ̀ ѿ се́рдца возложи́хомъ пѣ́снь, спаса́й на́съ всегда̀, на тѧ́ бо надѣ́емсѧ.

Свѣти́ленъ:

Да почти́тсѧ всепѣ́таѧ мт҃и бж҃їѧ, жи́знь сꙋ́щꙋю ро́ждши хрⷭ҇та̀ бг҃а на́шего, ра́йскихъ двере́й ѿверзе́нїе, и҆ всегѡ̀ мі́ра ѡ҆чище́нїе, къ животꙋ̀ возведе́нїе, се́й є҆́сть прⷪ҇ро́кѡмъ глаго́лавый, томꙋ̀ поклони́мсѧ, бг҃ꙋ и҆ сп҃сꙋ дꙋ́шъ на́шихъ.

Два́жды.

Сла́ва, и҆ ны́нѣ:

Прїиди́те, вѣ́рнїи съ чистото́ю, возвели́чимъ пречⷭ҇тыѧ мт҃ре бг҃а на́шегѡ чꙋ́днꙋю і҆кѡ́нꙋ, и҆ бжⷭ҇твеннагѡ млⷣнца сп҃са хрⷭ҇та̀: є҆го́же ꙗ҆́кѡ ро́ждшаѧ на рꙋкꙋ̀ носи́вши, и҆ мт҃рне дерзнове́нїе къ немꙋ̀ и҆мꙋ́щи, непреста́ннѡ мо́литъ за ны̀, и҆ подае́тъ рабѡ́мъ свои̑мъ бога̑тыѧ ми́лѡсти.

На хвали́техъ стїхи̑ры на д҃, гла́съ д҃.

Просла́вимъ, вѣ́рнїи, ѡ҆бра́дованнꙋю бцⷣꙋ, па́че же во ᲂу҆стѣ́хъ на́шихъ и҆́мамы всегда̀ ст҃о́е и҆ бл҃гослове́нное и҆́мѧ є҆ѧ̀, непреста́ннѡ прибѣга́юще къ пречⷭ҇тѣй є҆ѧ̀ и҆ цѣльбоно́снѣй і҆кѡ́нѣ. то́ю бо ѡ҆брѣта́емъ ꙗ҆̀же на землѝ всѧ̑ блага̑ѧ и҆ полє́знаѧ, и҆ сꙋ́щихъ на воздꙋ́сѣ ѿ де́мѡнѡвъ запина́нїй и҆збавлѧ́емсѧ, ꙗ҆́кѡ мт҃и ро́ждшаѧ всѣ́хъ творца̀, спаса́етъ ѿ бѣ́дъ дꙋ́шы на́шѧ.

Два́жды.

Да рыда́етъ вѣ́чнѡ со́нмъ ѕлочести́выхъ, не и҆сповѣ́дающихъ тѧ̀ въ ржⷭ҇твѣ̀ чⷭ҇тꙋю бг҃ороди́тельницꙋ, и҆ не покланѧ́ющихсѧ пречⷭ҇тѣй твое́й і҆кѡ́нѣ: вѣ́рнїи же лю́дїе ра́дꙋющесѧ, и҆сповѣ́даемъ тѧ̀ и҆́стиннꙋю дв҃ꙋ бцⷣꙋ, ꙗ҆́кѡ вои́стиннꙋ родила̀ є҆сѝ пло́тїю хрⷭ҇та̀ бг҃а на́шего. тлѣ́нїе а҆да́мово попра́ла є҆сѝ, и҆ ѿ грѣха̀ ве́сь мі́ръ ѡ҆чи́стила є҆сѝ, жи́знь безконе́чнꙋю дарова́ла є҆сѝ, ра́йскїй вхо́дъ вѣ̑рнымъ ѿве́рзла є҆сѝ бжⷭ҇твеннымъ твои́мъ ржⷭ҇тво́мъ. є҆го́же молѝ, спасти́сѧ на́мъ пою́щымъ вѣ́рнѡ твоѐ та́инство.

Ра́дꙋетсѧ ᲂу҆́бѡ и҆ весели́тсѧ неизрече́нною ра́достїю всѐ мно́жество благочести́выхъ: припа́дающе же покланѧ́ютсѧ, всѝ благоговѣ́ютъ бж҃їи мт҃ри съ боѧ́знїю, благодарѧ́ще сїю̀ по бз҃ѣ ꙗ҆́кѡ бг҃а, толи́кихъ превели́кихъ бла̑гъ хода́таицꙋ, въ нѧ́же жела́ютъ а҆́гг҃ли прини́кнꙋти, дарова̀ бцⷣею вѣ̑рнымъ хрⷭ҇то́съ бг҃ъ на́шъ, и҆мѣ́ѧй премно́жество щедро́тъ, и҆ вели́кꙋю пребога́тꙋю ми́лость.

Сла́ва, и҆ ны́нѣ, гла́съ и҃:

Ст҃а́ѧ твоѧ̀ и҆ соѻбра́знаѧ і҆кѡ́на, бцⷣе дв҃о, бл҃года́тїю твое́ю пребога́тый сꙋ́щїй и҆сто́чникъ, кипѧ́щїй все́й подсо́лнечнѣй, и҆ свѣтѧ́щїй всемꙋ̀ мі́рꙋ свѣтолꙋ́чными ст҃а́гѡ дх҃а сїѧ́ньми, и҆ и҆сцѣле́нїй свѣтлостьмѝ. ты́ бо бг҃а сло́ва пло́тїю несказа́ннѡ родила̀ є҆сѝ, ѿ а҆рха́гг҃ла гаврїи́ла сицева̑ѧ слы́шавши: ра́дꙋйсѧ ѡ҆бра́дованнаѧ, гдⷭ҇ь съ тобо́ю, и҆ дх҃ъ ст҃ы́й ѡ҆сѣни́тъ тѧ̀ къ зача́тїю. та́кожде рекла̀ є҆сѝ къ первопи́санной твое́й і҆кѡ́нѣ, на тꙋ̀ зрѧ́щи: съ то́ю моѧ̀ бл҃года́ть, и҆ сло́во твоѐ со вла́стїю і҆кѡ́нѣ бы́сть. и҆ ѻ҆́бразъ и҆ гла́съ, и҆ си́ла и҆ дѣ́ло, и҆ всѧ́къ ᲂу҆́мъ превосходѧ́щаѧ бжⷭ҇твеннаѧ бл҃года́ть, спребыва́ющи вѣ́чнѡ, зна́мєнїѧ и҆ чꙋдеса̀ непреста́ннѡ содѣва́етъ, и҆ дꙋшеполе́зное и҆сцѣле́нїе всѣ̑мъ вѣ́рнѡ приходѧ́щымъ подае́тъ, твои́ми бг҃ома́терними непреста́нными къ бг҃ꙋ моли́твами.

Славосло́вїи вели́кое. И҆ ѿпꙋ́стъ. На лїтꙋргі́и, слꙋ́жба бцⷣы.

Комментарии для сайта Cackle