Мѣ́сѧца тогѡ́же въ з҃-й де́нь. Ст҃ы́хъ мꙋ́чєникъ, се́ргїа и҆ ва́кха.
На Гдⷭ҇и, воззва́хъ, стїхи̑ры на ѕ҃, гла́съ ѕ҃. Поⷣ: Всѐ ѿло́жше:
Всѐ презрѣ́вше ꙳ земно́е могꙋ́тство, ꙳ и҆ пло́ть возненави́дѣвше, ꙳ бг҃а ст҃а́го возлюби́сте: ꙳ и҆ ѡ҆дѣѧ́нїе безче́стное рꙋга́тельнѣ носѧ́ще, ꙳ съ нб҃сѐ прїѧ́сте свѣ́та ѻ҆де́ждꙋ, ꙳ и҆ ри́зꙋ нерастерза́емꙋю. ꙳ съ не́юже ликꙋ́юще, ꙳ вѣнцено́сцы пребога́тїи, ꙳ покро́въ на́мъ всѣ̑мъ бꙋ́дите и҆ ѡ҆дѣѧ́нїе, ꙳ жи́зни ѡ҆бнажє́ннымъ, ꙳ ѕмїи́нымъ прельще́нїемъ.
Се́ргїе пресла́вный, ꙳ и҆ прехва́льный ва́кхе, ꙳ сосꙋ́ди дх҃а, ꙳ пото́цы и҆сточа́юще всѣ̑мъ цѣлє́нїѧ, ꙳ на́ши храни́телїе, ꙳ и҆ крѣ́пцыи побо́рницы цр҃кве бы́вше, ꙳ самовѡ́льныѧ жє́ртвы, ꙳ и҆ заколє́нїѧ честна̑ѧ, свѣти́льницы ѡ҆зарѧ́юще свѣ́томъ благоче́стїѧ концы̀, ꙳ разрѣши́те тмꙋ̀ належа́щꙋю дꙋша́мъ на́шымъ, ꙳ и҆ мра́къ ѕло́бный ве́сь ѿжени́те.
Незаходи̑маѧ селє́нїѧ, ꙳ и҆ разꙋ́мное весе́лїе, ꙳ и҆ свѣ́тъ невече́рнїй, ꙳ и҆ жи́знь безпеча́льнꙋю и҆ неги́блемꙋю, ꙳ ѿ тлѣ́ннагѡ тѣлесѐ страда́льцы сла́внїи и҆зше́дше воспрїѧ́сте. ꙳ но моли́тесѧ си́хъ и҆ на́мъ ᲂу҆лꙋчи́ти, ꙳ стра̑сти ᲂу҆мертви́вшымъ, ꙳ и҆ грѣха̀ ᲂу҆кло́ншымсѧ, ꙳ се́ргїе и҆ ва́кхе, ꙳ предста́телє и҆ приста̑нища вѣ́рныхъ, ꙳ со дерзнове́нїемъ молѧ́щесѧ ꙳ ѡ҆ дꙋша́хъ на́шихъ.
Сла́ва, гла́съ д҃:
Се́ргїй и҆ ва́кхъ, свѣ́тлаѧ мч҃никѡвъ и҆ сꙋгꙋ́баѧ зарѧ̀, мꙋчи́телей бо свирѣ́пство низложи́сте, і҆́дѡльскꙋю же ле́сть ᲂу҆праздни́сте, и҆ бг҃оразꙋ́мїѧ соверше́ннꙋю та́йнꙋ, свѣ́тлымъ гла́сомъ высоковѣща́юще проповѣ́дасте: и҆́хже моли́твами, хрⷭ҇тѐ, си́хъ законода́вче, подвигополо́жниче же и҆ вѣнцеда́телю, и҆ на́съ сподо́би на неви̑димыѧ и҆ лꙋка̑выѧ си̑лы, держа́внѡ ᲂу҆вѧзти́сѧ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Ꙗ҆́кѡ до́блѧ:
Распина́ема хрⷭ҇та̀ чл҃вѣколю́бца ви́дѧщи пречⷭ҇таѧ, ꙳ и҆ ре́бра и҆скопова́ема копїе́мъ, ꙳ пла́чꙋщи вопїѧ́ше: ꙳ что̀ сїѐ, сн҃е мо́й; ꙳ что́ ти безблагода́тнїи лю́дїе возда́ша, ꙳ за ꙗ҆̀же сотвори́лъ є҆сѝ дѡ́браѧ и҆̀мъ, ꙳ и҆ тщи́шисѧ безча́дствовати мѧ̀, вселюбе́знѣйшїй; ᲂу҆дивлѧ́юсѧ, бл҃гоꙋтро́бне, ꙳ твоемꙋ̀ во́льномꙋ распѧ́тїю.
На стїхо́внѣ ѻ҆ктѡ́иха. Сла́ва, гла́съ и҃:
Оу҆крѣпи́сѧ хрⷭ҇то́выхъ мꙋ́чєникъ на врагѝ ѡ҆полче́нїе: въ ни́хже ꙗ҆́кѡ свѣти́льницы мїрсті́и свѣ́тѧтъ, бл҃госла́внїи и҆ и҆зрѧ́днѣйшїи страстоте́рпцы, се́ргїй и҆ ва́кхъ. си̑мъ ѡ҆братѝ плещѝ лꙋка́вое ѡ҆полче́нїе де́мѡнское. си̑мъ почꙋди́шасѧ мꙋчи́телїе, и҆ ᲂу҆диви́шасѧ а҆́гг҃ли, ви́дѧще безпло́тнаго ѿ пло́тныхъ попира́ема. вѣ́рныхъ же цр҃ковь всепра́зднственный пра́здникъ, и҆ мїрскꙋ́ю ра́дость соверша́ющи вопїе́тъ: и҆́же не́мощїю плотско́ю свѧза́вый крѣ́пкаго, моли́твами ст҃ы́хъ твои́хъ спасѝ дꙋ́шы на́шѧ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Ѽ пресла́внагѡ чꙋдесѐ!
Что̀ зри́мое видѣ́нїе, ꙳ є҆́же мои́ма ѻ҆чи́ма ви́дитсѧ, ѽ влⷣко. ꙳ содержа́й всю̀ тва́рь, ꙳ на дре́во воздви́женъ бы́въ, ꙳ и҆ ᲂу҆мира́еши всѣ̑мъ даѧ́й жи́знь, ꙳ бцⷣа пла́чꙋщи гл҃аше. ꙳ є҆гда̀ ᲂу҆зрѣ̀ на крⷭ҇тѣ̀ возноси́ма, ꙳ и҆зъ неѧ̀ неизрече́ннѡ возсїѧ́вшаго ꙳ бг҃а и҆ чл҃вѣ́ка.
Тропа́рь, гла́съ д҃:
Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ моли́твами спасѝ дꙋ́шы на́шѧ.
И҆лѝ се́й, гла́съ є҃:
Оу҆добре́нїе хрⷭ҇то́выхъ страстоте́рпєцъ, и҆ ѻ҆́чи хрⷭ҇то́вы цр҃кве, ѻ҆́чи просвѣти́те дꙋ́шъ на́шихъ, се́ргїе многострада́льне и҆ ва́кхе пресла́вне: моли́тесѧ ко гдⷭ҇ꙋ, ꙗ҆́кѡ да ᲂу҆бѣжи́мъ тмы̀ грѣхо́вныѧ, и҆ свѣ́та ꙗ҆ви́мсѧ ѻ҆́бщницы невече́рнѧгѡ моли́твами ва́шими, ст҃і́и.
На ᲂу҆́трени, канѡ́нъ ст҃ы́хъ на ѕ҃, є҆гѡ́же краегране́сїе:
Се́ргїа страстоте́рпца, и҆ ва́кха приснопа́мѧтнаго пою̀. Ѳеофа́ново:
Гла́съ а҃. Пѣ́снь а҃. І҆рмо́съ:
Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ: та́ бо, безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.
Се́ргїе ᲂу҆го́дниче хрⷭ҇то́въ, смоле́бника прїи́мъ и҆ спомо́щника ва́кха приснопа́мѧтнаго, съ ни́мже стра̑сти бг҃омꙋ́дреннѡ соверши́лъ є҆сѝ, сло́во мнѣ̀ мꙋ́дрости ва́съ пою́щꙋ да́рꙋйте.
На недви́жимѣмъ хрⷭ҇то́вы ка́мени вѣ́ры, ст҃і́и мч҃ницы, положи́вше ѡ҆снова́нїе, на тве́рдѣмъ степе́ни ᲂу҆твержде́ни, забра́ло и҆ столпѝ благоче́стїѧ ꙗ҆ви́стесѧ.
Глаго́лѡмъ вѣ́ровавше хрⷭ҇тѡ́вымъ, и҆ къ немꙋ̀ некло́ннѡ взира́юще, всѐ ѡ҆плева́сте преходѧ́щее благосла́вїе, ст҃і́и, сла́вы же присносꙋ́щныѧ ᲂу҆ѧ́звени бы́сте раче́нїемъ.
Ро́да, и҆ ѻ҆те́чества, и҆ че́сти хрⷭ҇та̀ ра́ди ѡ҆бнажи́вшесѧ, веселѧ́стесѧ: и҆ ѡ҆дѣ́ѧни въ женолѣ́пное ѡ҆дѣѧ́нїе, мꙋжемꙋ́дреннѡ нетлѣ́нїѧ ѻ҆де́ждею свѣ́тлѡ ѡ҆блеко́стесѧ.
Бг҃оро́диченъ:
Ми́лостива бы́ти вѣ̑рнымъ и҆ благоꙋвѣ́тлива, бг҃ома́ти, ᲂу҆молѝ сло́ва, є҆го́же родила̀ є҆сѝ тѣле́снѡ къ на́мъ прише́дшаго: тѧ́ бо предста́тельницꙋ и҆ спасе́нїе стѧжа́хомъ.
Пѣ́снь г҃. І҆рмо́съ:
Є҆ди́не вѣ́дый человѣ́ческагѡ сꙋщества̀ не́мощь, и҆ ми́лостивнѡ въ нѐ воѡбра́жсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀, ст҃ы́й: ѡ҆дꙋшевле́нный хра́ме, неизрече́нныѧ сла́вы твоеѧ̀, чл҃вѣколю́бче.
Є҆ди́нъ вѣ́дый ꙗ҆́кѡ бг҃ъ всѧ̑ пре́жде бытїѧ̀, къ немꙋ̀ ва̑ша ны́нѣ ви́дѣвъ предложє́нїѧ, мꙋ́дрости сло́вомъ, и҆ бжⷭ҇твеннагѡ зна́нїѧ, и҆ тве́рдагѡ смы́сла ѻ҆би́льнѡ и҆спо́лни, ꙗ҆́кѡ своѧ̑ во́ини, бл҃же́ннїи.
Зако́ннѡ ᲂу҆го́дницы хрⷭ҇тꙋ̀ пострада́ти и҆зво́ливше, тлѣ́ющꙋю сла́вꙋ и҆ текꙋ́щꙋю, и҆ мі́ра всегѡ̀ и҆ мїроде́ржца, по́мысломъ бг҃омꙋ́дрымъ, страстоте́рпцы мꙋ́чєницы, возненави́дѣсте, любо́вїю зижди́телѧ.
Пречи́стыми ᲂу҆ма̀ приложє́нїи гдⷭ҇ꙋ предстоѧ́ще, и҆ ѿ та́мѡ сꙋ́щїѧ зарѝ и҆сполнѧ́еми, и҆ неизрече́ннагѡ блаже́нства ꙗ҆́вѣ наслажда́ющесѧ, ва́съ чтꙋ́щыѧ ѿ напа́стей страстоте́рпцы и҆зба́вите.
Бг҃оро́диченъ:
Сме́ртїю держи́мь пе́рвѣе а҆да́мъ, ны́нѣ и҆зба́висѧ твои́мъ ржⷭ҇тво́мъ, є҆ди́на бг҃оневѣ́сто: жи́знь бо и҆́стиннѡ ѵ҆поста́снꙋю, соедине́нꙋ пло́ти, чⷭ҇таѧ, по ѵ҆поста́си па́че є҆стества̀ и҆ сло́ва родила̀ є҆сѝ.
Сѣда́ленъ, гла́съ и҃. Подо́бенъ: Премꙋ́дростїю:
Мꙋчениколю́бцы прїиди́те, разꙋ̑мныѧ би́серы гдⷭ҇ни и҆ страстоте́рпцы, се́ргїа почти́мъ и҆ ва́кха свѧты̑ѧ, ꙗ҆́кѡ вра́жїю ле́сть мꙋ́жески попра́вшыѧ, и҆ і҆́дѡльскꙋю всю̀ крѣ́пость разори́вшыѧ: тѣ́мже досто́йнѡ съ нб҃сѐ вѣнцы̀ побѣ́ды прїе́мше, со а҆́гг҃лы ликꙋ́ютъ. къ ни̑мже всѝ возопїе́мъ: моли́те хрⷭ҇та̀ бг҃а прегрѣше́нїй ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть ва́шꙋ.
Два́жды.
Сла́ва, и҆ ны́нѣ, бг҃оро́диченъ:
Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бла́гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти, воспѣва́ющымъ досто́йнѡ сла́вꙋ твою̀.
Крⷭ҇тобг҃оро́диченъ:
А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве, гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.
Пѣ́снь д҃. І҆рмо́съ:
Го́рꙋ тѧ̀, бл҃года́тїю бж҃їею приѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆зъ тебє̀ и҆зы́ти і҆и҃левꙋ провозглаша́ше ст҃о́мꙋ, во спасе́нїе на́ше и҆ ѡ҆бновле́нїе.
Свѣти̑ла два̀ ѿ за́пада возсїѧ́вша, проти́вно зе́млю тогда̀ держа́ща нечести́вомꙋ, творѧ́ща ше́ствїе, къ твоемꙋ́ же восто́кꙋ прїидо́ша свѣтоно́сномꙋ, хрⷭ҇тѐ, и҆ спаси́тельномꙋ.
Ни ѻ҆́гнь, ни ме́чь, ни гонє́нїѧ, нижѐ ра̑ны, благочести́вагѡ ра́зꙋма ѡ҆ бз҃ѣ разлꙋчѝ ва́съ: жи́знь бо преѡби́дѣсте конча́емꙋю, є҆гѡ̀ ра́ди, достосла́внїи, и҆ прїѧ́сте блаже́ннꙋю сла́дость и҆ неги́блющꙋю.
Свѣти́льницы и҆́стиннѡ неле́стнїи, тве́рдь цр҃кве хрⷭ҇то́вы ѡ҆зарѧ́ютъ, свѣ́томъ бжⷭ҇твеннагѡ сїѧ́нїѧ, и҆ дꙋ́шы благочести́выхъ возвеселѧ́ютъ, чꙋде́съ зари̑ и҆спꙋща́юще.
Ва́кхъ бжⷭ҇твенный, и҆ преизѧ́щный се́ргїй, лѣ́тнымъ премѣне́нїемъ, благоче́стїѧ рачи́тели и҆ мч҃николю́бцы, дꙋхо́внѡ на пи́ршество призыва́ютъ, до́блєсти своѧ̑ предлага́юще.
Бг҃оро́диченъ:
Ѻ҆рꙋ́жїе двє́ри є҆дє́мскїѧ хранѧ́щее ᲂу҆стꙋпа́етъ ны́нѣ вѣ̑рнымъ: и҆ прїе́млетъ свѣ́тлѡ честно́ю кро́вїю, и҆зъ твоегѡ̀ чре́ва ро́ждшагосѧ, всенепоро́чнаѧ, зна́мєнаныѧ ви́дѧщее и҆ бл҃года́тїю.
Пѣ́снь є҃. І҆рмо́съ:
Просвѣти́вый сїѧ́нїемъ прише́ствїѧ твоегѡ̀, хрⷭ҇тѐ и҆ ѡ҆свѣти́вый крⷭ҇то́мъ твои́мъ мі́ра концы̀, сердца̀ просвѣтѝ, свѣ́томъ твоегѡ̀ бг҃оразꙋ́мїѧ, правосла́внѡ пою́щихъ тѧ̀.
Прогна́вше ле́сть и҆́стины ѻ҆рꙋ́жїемъ, и҆ мꙋчи́телей ра̑ны крѣ́пкѡ претерпѣ́вше, и҆ побѣди́телє бы́сте, ѿ хрⷭ҇та̀ вѣнча́вшесѧ, и҆ ны́нѣ досто́йнѡ веселите́сѧ.
Оу҆крѣплѧ́еми непобѣди́мою си́лою и҆ благода́тїю трⷪ҇цы, дво́ица мꙋ́чєникъ низложѝ тмы̀ кнѧ́зѧ, и҆ томꙋ̀ порабощє́ныѧ: тѣ́мъ че́стнѡ ᲂу҆блажа́ютсѧ.
Терпѣ́нїемъ, и҆ дꙋше́внымъ мꙋ́жествомъ, и҆ крѣ́постїю по́мысла, дво́ица мꙋ́чєникъ сла́внаѧ, превзы́де всю̀ гони́телей го́рькꙋю ꙗ҆́рость, и҆ со а҆́гг҃лы водворѧ́етсѧ.
Бг҃оро́диченъ:
Возсїѧ́ла є҆сѝ, бг҃ома́ти, ꙗ҆́кѡ ᲂу҆́тро, сл҃нце незаходи́мое, соедине́нное пло́тїю по ѵ҆поста́си на рꙋкꙋ̀ носѧ́щи, и҆́стинныѧ пра́вды: тѣ́мъ тѧ̀ всѝ прославлѧ́емъ.
Пѣ́снь ѕ҃. І҆рмо́съ:
Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ ꙗ҆́кѡ ѻ҆́вцы заколе́нїѧ, спасѝ лю́ди твоѧ̑, бж҃е на́шъ: ты́ бо крѣ́пость немощствꙋ́ющихъ и҆ и҆справле́нїе.
И҆сцѣле́нїй и҆сто́чники, мч҃никъ мо́щи бога́тнѡ и҆сточа́ютъ: почерпе́мъ ᲂу҆се́рднѡ ᲂу҆̀бо, вѣ́рнїи, и҆ страстоте́рпцы ᲂу҆блажи́мъ, сла́внаго се́ргїа, и҆ ва́кха приснословꙋ́щаго.
Ненави́дѧще беззако́нныхъ совселе́нїѧ, и҆ пре́лесть ᲂу҆празднѧ́юще, нбⷭ҇ное ше́ствїе благостоѧ́ннѡ, се́ргїй и҆ ва́кхъ ше́ствовахꙋ, и҆ ко хрⷭ҇то́вꙋ достиго́ша приста́нищꙋ невла́емомꙋ.
Ѿверза́ютсѧ страстоно́сцємъ мꙋ́ченикѡмъ врата̀ небє́снаѧ, благоговѣ́юще стра́сти честнѣ́й, подо́бнѣй бг҃а на́шегѡ благода́тнѣй, и҆ прогонѧ́ющей де́мѡнскїѧ полкѝ.
Бг҃оро́диченъ:
И҆́стиннѡ тѧ̀ мт҃рь бж҃їю, пречⷭ҇таѧ, мꙋ́дрствꙋюще возвѣща́емъ: безнача́льнаго бо сн҃а є҆диноро́днаго, пре́жде вѣ̑къ возсїѧ́вшаго и҆зъ ѻ҆ц҃а̀, несказа́ннѡ, дв҃о, родила̀ є҆сѝ.
Конда́къ, гла́съ в҃. Подо́бенъ: Вы́шнихъ и҆щѧ̀:
Ра́зꙋмъ на врагѝ мꙋ́жески воѡрꙋжи́вше, всю̀ тѣ́хъ ле́сть разрꙋши́сте, и҆ побѣ́дꙋ свы́ше прїи́мше, мч҃ницы всехва́льнїи, є҆диномы́сленнѡ вопїю́ще: добро̀ и҆ красно̀ є҆́же бы́ти съ бг҃омъ.
І҆́косъ:
На нб҃сѣ́хъ, хрⷭ҇тѐ, живꙋ́ще, се́ргїй же и҆ ва́кхъ, и҆ бж҃е́ственнагѡ свѣ́та ѿ тебє̀ и҆сполнѧ́еми, менѐ во тмѣ̀ невѣ́дѣнїѧ ходѧ́щаго предварѝ ско́рѡ, и҆ страсте́й и҆схитѝ, є҆ди́не безсме́ртне, ѻ҆де́ждꙋ мнѣ̀ покаѧ́нїѧ низпосла́въ, ꙗ҆́кѡ да свѣ́тлымъ ᲂу҆мо́мъ свѣтоно́сный си́хъ пра́здникъ воспою̀, и҆ возопїю̀ веселѧ́сѧ: добро̀ и҆ красно̀ є҆́же бы́ти съ бг҃омъ.
Пѣ́снь з҃. І҆рмо́съ:
Тебѐ ᲂу҆́мнꙋю, бцⷣе, пе́щь, разсмотрѧ́емъ, вѣ́рнїи, ꙗ҆́коже бо ѻ҆́троки спасѐ трѝ превозноси́мый, мі́ръ ѡ҆бновѝ во чре́вѣ твое́мъ всецѣ́лъ, хва́льный ѻ҆тцє́въ бг҃ъ и҆ препросла́вленъ.
Ра́дꙋйсѧ, дво́ице страстоте́рпцєвъ сла́внаѧ: ра́дꙋйсѧ, побѣди́вшаѧ свѣ́тлѡ мꙋчи́тєльскаѧ прещє́нїѧ: ра́дꙋйсѧ, соверши́вшаѧ тече́нїе бл҃же́нное: ра́дꙋйсѧ, пи́ще, всегда̀ внꙋ́трь пребыва́ющаѧ: ра́дꙋйсѧ, ꙗ҆́снѣ предстоѧ́щаѧ бг҃ꙋ, бг҃облаже́ннаѧ.
Всесвѣ́тлїи на землѝ ходѧ́ще, де́мѡнскаѧ ѻ҆чеса̀ и҆ ли́ца гони́телей, мч҃ницы, ѡ҆мрачи́сте, свѣ́томъ благода́ти, и҆ зарѧ́ми страда́нїѧ, хва́льнаго воспѣва́юще бг҃а и҆ пресла́внаго.
Хра́ми бг҃а бы́вше ѡ҆дꙋшевле́ннїи живꙋ́щагѡ, и҆ живꙋ́ще страда́льцы, си́лою бж҃їею ᲂу҆крѣплѧ́еми и҆́стиннѡ, полкѝ побѣди́сте врагѡ́въ, всебл҃же́ннїи, крѣ́пкаго во бранѣ́хъ бг҃а пѣ́сньми восхвалѧ́юще.
Бг҃оро́диченъ:
Пречⷭ҇тый ты̀ хра́мъ была̀ є҆сѝ, и҆ прест҃ы́й кївѡ́тъ, прїе́мши творца̀ неѡпи́саннаго, и҆ непостижи́маго во ᲂу҆тро́бѣ твое́й вмѣсти́вши, є҆диноро́днаго бг҃а сло́ва, бл҃гослове́ннаѧ всечⷭ҇таѧ влⷣчце.
Пѣ́снь и҃. І҆рмо́съ:
Въ пещѝ ѻ҆́троцы і҆и҃левы, ꙗ҆́коже въ горни́лѣ, добро́тою бл҃гоче́стїѧ чистѣ́е зла́та блеща́хꙋсѧ, гл҃го́люще: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те во всѧ̑ вѣ́ки.
И҆́же росо́ю дре́вле ѻ҆трокѡ́мъ пла́мень прохлади́вый, стоѧ́щыѧ въ по́двизѣхъ ᲂу҆крѣпѝ твоѧ̑ мч҃ники, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.
Ꙗ҆дови̑таѧ и҆ дꙋшеврє́днаѧ ласка̑нїѧ мꙋчи́тєльскаѧ, ᲂу҆́мнѡ страстоте́рпцы ѿрази́ша, хрⷭ҇тꙋ̀ вопїю́ще и҆ глаго́люще: благослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.
Дѣйстви́тельны храни́тели на́мъ, се́ргїа и҆ ва́кха, и҆́стиннѡ вѣне́чники хрⷭ҇то́съ показа̀, хранѧ́щыѧ и҆ пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.
Напра́ви мою̀, влⷣко хрⷭ҇тѐ, моли́твами мꙋ́чєникъ, стезю̀ добродѣ́телей, и҆ ᲂу҆до́бнѡ тебѣ̀ взыва́ти сподо́би: благослови́те, всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.
Бг҃оро́диченъ:
Блажꙋ́ тѧ и҆́стиннꙋю бг҃а на́шегѡ мт҃рь, ра́дꙋйсѧ, со а҆́гг҃ломъ приносѧ̀ тѝ, чⷭ҇таѧ, всенепоро́чнаѧ влⷣчце: тѧ́ бо непреста́ннѡ всѧ̑ дѣла̀ гдⷭ҇нѧ пою́тъ, и҆ превозно́сѧтъ во всѧ̑ вѣ́ки.
Пѣ́снь ѳ҃. І҆рмо́съ:
Ѻ҆́бразъ чи́стагѡ рождества̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь, да тѧ̀, бцⷣе, непреста́ннѡ велича́емъ.
Всего̀ хрⷭ҇та̀ стѧжа́ли є҆стѐ, мі́ръ бо ве́сь тогѡ̀ ра́ди ѡ҆ста́вили є҆стѐ: и҆ ны́нѣ, мч҃ницы, въ нбⷭ҇ныхъ водворѧ́етесѧ, ли́ки вы́шнихъ си́лъ, и҆ мꙋже́й блаже́нныхъ ви́дѧще свѣ́тлѡсти.
Дае́ши сопрѧже́нїе всеизрѧ́днѣйшее, похвалє́нїѧ любо́вїю тебѣ̀ приносѧ́щымъ, бл҃года́ть свы́ше, и҆ прегрѣше́нїй ѡ҆ставле́нїе, молѧ́щи є҆ди́наго милосе́рдаго, къ немꙋ́же тща́щесѧ, низоре́вностныхъ небреглѝ є҆стѐ.
Заре́ю трисїѧ́ннагѡ бж҃ества̀ просвѣще́ни, непобѣди́мїи мꙋ́чєницы, многобо́жное преле́стное безбо́жїе, и҆ мꙋчи́телей стра́хъ ѿри́нꙋша: и҆ ны́нѣ нетлѣ́нныѧ наслажда́ютсѧ сла́дости ра́йскїѧ.
Тече́нїе до́брое соверши́вше, благочести́вꙋ же вѣ́рꙋ сохрани́ти потща́вшесѧ, недви́жимое прїѧ́ти сподо́бистесѧ црⷭ҇твїе, пресла́внїи мꙋ́чєницы, вѣнцє́мъ добро́ты и҆ благолѣ́пїѧ ᲂу҆вѧзе́ни.
Бг҃оро́диченъ:
Ѽ па́че ᲂу҆ма̀ чꙋде́съ твои́хъ! бж҃їе бо сло́во пло́ть бы́вшее, є҆ди́на родила̀ є҆сѝ преесте́ственнѡ, мт҃и дв҃о, всѧ́чєскаѧ бжⷭ҇твеннымъ хотѣ́нїемъ содержа́щаго мꙋ́дрѣ, и҆ ѡ҆кормлѧ́юща.
Свѣти́ленъ. Подо́бенъ: Оу҆ченикѡ́мъ:
Свѣтоза́рнꙋю дво́ицꙋ страстоте́рпєцъ, се́ргїа и҆ ва́кха похва́лимъ: ра́нъ бо стремлє́нїѧ претерпѣ́ша, и҆ горды́ню низложи́ша всеѕло́бнагѡ мꙋчи́телѧ, трⷪ҇ческою си́лою.
Бг҃оро́диченъ:
Херꙋві̑мъ ꙗ҆ви́сѧ сла́внѣйши, и҆ серафі̑мъ показа́сѧ вы́шши, ꙗ҆́кѡ бг҃а ро́ждши воплоще́нна, земны̑мъ же показа́вша стєзѝ пра̑выѧ настꙋпа́ти, ко спасе́нїю приводѧ́щыѧ.
На хвали́техъ стїхи̑ры на д҃, самогла́сны, гла́съ а҃. Ге́рманово:
Дв҃дски вопїѧ́хꙋ се́ргїй и҆ ва́кхъ мꙋ́чєницы: сѐ ны́нѣ что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ; не свѧзꙋ́еми є҆стества̀ любо́вїю, но вѣ́ры нра́вомъ: тѣ́мже ст҃і́и врага̀ попра́ша, и҆ крⷭ҇тъ взе́мше хрⷭ҇тꙋ̀ послѣ́доваша, и҆ мо́лѧтсѧ цр҃ю̀ и҆ бг҃ꙋ, дарова́ти дꙋша́мъ на́шымъ ве́лїю ми́лость.
Два́жды.
Гла́съ д҃:
Прⷪ҇ро́чески ст҃ы̑мъ соше́дшесѧ пѣ́снь возопїи́мъ: сѐ ны́нѣ что̀ добро̀, и҆лѝ что̀ красно̀, по є҆́же пребыва́ти бра́тїи вкꙋ́пѣ; не сро́дства послѣ́дствомъ, но вѣ́ры совокꙋпле́нїемъ ст҃а́гѡ дх҃а: тлѣ̑ннаѧ бо ѿверго́ша всѧ̑, взе́мше крⷭ҇тъ на ра́мена, и҆ послѣ́доваша хрⷭ҇тꙋ̀, се́ргїй и҆ ва́кхъ до́блїи мꙋ́чєницы. на небесѣ́хъ же дерзнове́нїе и҆мꙋ́ще, мо́лѧтсѧ всегда̀ ѡ҆ на́съ, дарова́ти на́мъ ве́лїю ми́лость.
Ѡ҆бꙋ́выйсѧ се́ргїй во ᲂу҆гото́ванїе є҆ѵⷢ҇льскагѡ ми́ра, гвозде́й ѡ҆бꙋвє́нїѧ, кро́вїю ѡ҆ но́гъ текꙋ́щею, ѕмі́ѧ наблюда́ющаго пѧ́тꙋ на́шꙋ ѡ҆слѣпѝ, и҆ свидѣ́тельства вѣне́цъ прїѧ̀. тѣ́мъ моли́твами и҆́хъ, хрⷭ҇тѐ бж҃е, пригвоздѝ стра́хꙋ твоемꙋ̀ плѡ́ти на́шѧ, и҆ поми́лꙋй на́съ.
Сла́ва, гла́съ г҃:
Ко́ль добро̀, и҆ ко́ль красно̀, самобра́тнаѧ мы́сль мꙋ́чєникъ твои́хъ, гдⷭ҇и; и҆́хже бо є҆стество̀ плотско́е бра́тїй не сотворѝ, сїѧ̑ вѣ́ра братолю́бнаѧ мꙋ́дрствовати до кро́ве сотворѝ. тѣ́хъ моли́твами, хрⷭ҇тѐ бж҃е, поми́лꙋй на́съ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Ве́лїѧ мч҃никъ:
Ѻ҆рꙋ́жїе се́рдце твоѐ про́йде, пречⷭ҇таѧ, є҆гда̀ сн҃а твоего̀ на крⷭ҇тѣ̀ ви́дѣла є҆сѝ, и҆ вопїѧ́ла є҆сѝ: не безча́днꙋ мѧ̀ покажѝ, сн҃е мо́й и҆ бж҃е мо́й, соблюды́й мѧ̀ по ржⷭ҇твѣ̀ дв҃ꙋ.
На стїхо́внѣ ѻ҆ктѡ́иха. Сла́ва, ст҃ы́хъ, гла́съ в҃. А҆нато́лїево:
Ви́дѧщи дре́вле цр҃ковь бж҃їѧ, ва́шѧ по́двиги, мч҃ницы всемі́рнїи, дне́сь свѣ́тлѡ ᲂу҆краша́етсѧ, и҆ вѣ́рнѡ пра́зднꙋетъ въ па́мѧти ва́шей, ꙗ҆́кѡ ᲂу҆́тварь ца́рскꙋю носѧ́щи срамотꙋ̀, на бжⷭ҇твєнныѧ ва́шѧ вы̑ѧ наложе́ннꙋю рꙋга́тельнѣ: є҆́юже сла́вы сподо́бистесѧ нбⷭ҇ныѧ, и҆ безконе́чнагѡ блаже́нства.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Є҆гда̀ нескве́рнаѧ а҆́гница ви́дѣ своего̀ а҆́гнца, на заколе́нїе ꙗ҆́кѡ чл҃вѣ́ка во́лею влеко́ма, пла́чꙋщи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀. что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бл҃гость, чл҃вѣколю́бче.
На лїтꙋргі́и, бл҃жє́нна ѻ҆ктѡ́иха, и҆ ст҃ы́хъ, пѣ́снь г҃, на д҃. Прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. Сті́хъ: Предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менє̀ є҆́сть, да не подви́жꙋсѧ. А҆пⷭ҇лъ къ є҆вре́ємъ, зача́ло т҃л. А҆ллилꙋ́їа, гла́съ в҃. Сѐ ны́нѣ что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ; Є҆ѵⷢ҇лїе лꙋкѝ, зача́ло р҃ѕ. Прича́стенъ: Ра́дꙋйтесѧ: