Мѣ́сѧца тогѡ́же въ а҃і-й де́нь. Прпⷣбныѧ ма́тере на́шеѧ ѳеодѡ́ры, ꙗ҆́же во а҆леѯандрі́и:

И҆ пренесе́нїе моще́й прпⷣбныхъ ѻ҆тє́цъ, се́ргїа и҆ ге́рмана, валаа́мскихъ чꙋдотво́рцєвъ, и҆зъ нова́града ѡ҆бра́тнѡ на валаа́мъ въ ѻ҆би́тель и҆́хъ. Слꙋ́жбꙋ и҆́хъ зрѝ і҆ꙋ́нїа к҃и днѐ.

И҆ прпⷣбнагѡ сїлꙋа́на а҆ѳѡ́нскагѡ. Слꙋ́жба є҆гѡ̀ пи́сана въ приложе́нїи.

Здѣ́ же пое́тсѧ слꙋ́жба и҆ свѧщенномꙋ́ченика а҆ѵтоно́ма.

На Гдⷭ҇и, воззва́хъ: стїхи̑ры прпⷣбныѧ, г҃, гла́съ д҃. Поⷣ: Ꙗ҆́кѡ до́блѧ.

Въ же́нстѣмъ тѣлесѝ, ꙳ и҆ въ мꙋ́жестѣмъ ѻ҆́бразѣ, ꙳ мꙋ́жєскїѧ прошла̀ є҆сѝ по́двиги, ꙳ посредѣ̀ мꙋже́й все́льшисѧ, ꙳ и҆ стра̑сти ѡ҆хꙋ́ждши, ꙳ и҆ стремлє́нїѧ похоте́й всеконе́чнѡ ѡ҆бꙋзда́вши, ꙳ пощє́нїи, и҆ непреста́нными мольба́ми ѳеодѡ́ро, ꙳ и҆ бжⷭ҇твенными къ бг҃ꙋ, ꙳ и҆ неꙋкло́нными твои́ми воззрѣ̑нїи.

Подъ зе́млю тѧ̀ со́лнце заше́дъ, ꙳ не ви́дѧше погрѣша́ющꙋ: ꙳ позна́ же тѧ̀ незаходи́мое, ꙳ серцевѣ́децъ и҆ гдⷭ҇ь, ꙳ ви́дѧй сокровє́ннаѧ, ꙳ и҆ ѡ҆зарѝ свѣ́томъ покаѧ́нїѧ, ꙳ ѻ҆́чи се́рдца твоегѡ̀. ꙳ тѣ́мже потща́ласѧ є҆сѝ семꙋ̀ ᲂу҆годи́ти ꙳ болѣ́зненнымъ воздержа́нїемъ, ꙳ и҆ добродѣ́телей соверше́нїемъ.

Вра́жїихъ мꙋдрова́нїй ꙳ ника́коже разꙋмѣ́вши, ꙳ є҆го́же не родила̀ є҆сѝ, лю́биши ѻ҆троча̀, ꙳ и҆ ѻ҆те́ческимъ милосе́рдїемъ, ꙳ сла́внаѧ пита́еши, ꙳ терпѧ́щи бл҃гочести́вымъ по́мысломъ ꙳ человѣ́ческое поноше́нїе, ꙳ непови́нное запреще́нїе вои́стиннꙋ ѳеодѡ́ро. ꙳ сегѡ̀ ра́ди честно́е твоѐ соверша́емъ торжество̀.

И҆́ны стїхи̑ры а҆ѵтоно́ма, гла́съ и҆ подо́бенъ то́йже:

Добродѣ́тельми просвѣща́ѧсѧ, благоче́стїемъ ᲂу҆краша́емь, ꙳ і҆ера́рхъ бжⷭ҇твенный бы́лъ є҆сѝ, ꙳ и҆ ꙗ҆́кѡ многосвѣ́тлое со́лнце, мі́ръ проте́клъ є҆сѝ, ꙳ насѣва́ѧ всю́дꙋ вѣ́ры проповѣ́данїе, ꙳ пре́лесть же и҆скоренѧ́ѧ ꙳ серпо́мъ твоегѡ̀ ѧ҆зы́ка, ꙳ і҆ера́рше бг҃омꙋ́дре, ꙳ великопроповѣ́дателю а҆ѵтоно́ме.

Къ болѣ́знєннымъ страда́нїємъ, ꙳ къ мꙋ́жествєннымъ боре́нїємъ, ꙳ къ ꙗ҆́звамъ и҆ ра́намъ ᲂу҆стреми́лсѧ є҆сѝ: ꙳ мно́жествомъ бо ка́менїѧ ꙳ посыпа́емь а҆ѵтоно́ме, ꙳ сотвори́въ є҆̀, ꙗ҆́кѡ степє́ни и҆ лѣ́ствицꙋ, ꙳ возше́лъ є҆сѝ къ бг҃ꙋ вѣне́чникъ, ꙳ и҆ совокꙋпи́лсѧ є҆сѝ во́инствѡмъ безпло́тныхъ, ꙳ ѡ҆ мі́рѣ молѧ́сѧ.

Ѡ҆дѣѧ́нїе твое́ю кро́вїю, ꙳ мꙋче́нїѧ соверши́лъ є҆сѝ свѣтлѣ́йше, ꙳ бл҃года́тїю бжⷭ҇твеннагѡ дх҃а: ꙳ и҆ свѧще́ннѡ во ст҃а̑ѧ ꙳ вы̑шнѧѧ восте́клъ є҆сѝ, ꙳ а҆́може предте́ча на́шъ і҆и҃съ вни́де, ꙳ побѣ́ды вѣне́цъ ѿ бг҃а прїе́мъ, ꙳ со всѣ́ми, честно́ю кро́вїю, ꙳ сконча́вшимисѧ, а҆ѵтоно́ме.

Сла́ва, и҆ ны́нѣ, пра́здника, гла́съ то́йже.

Самогла́сенъ:

А҆́гг҃ловымъ прорече́нїемъ, пло́дъ пречи́стъ, ѿ і҆ѡакі́ма и҆ а҆́нны пра́ведникѡвъ, дне́сь произы́де дв҃о, не́бо и҆ престо́лъ бж҃їй, и҆ прїѧ́телище чистоты̀, ра́дость провозвѣща́ющи всемꙋ̀ мі́рꙋ, жи́зни на́шеѧ хода́таице, клѧ́твы ѿѧ́тїе, бл҃гослове́нїѧ пода́нїе. тѣ́мъ въ рождествѣ̀ твое́мъ, дв҃о бг҃озва́ннаѧ, мі́рꙋ ми́ръ и҆спросѝ, и҆ дꙋша́мъ на́шымъ ве́лїю ми́лость.

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

Пла́кала є҆сѝ ѿ дꙋшѝ, ꙳ ꙗ҆́кѡ безча́дна рыда́ющи, ꙳ ѻ҆троча́те жела́ющи: ꙳ но родила̀ є҆сѝ ѻ҆троча̀, ꙳ ро́да всегѡ̀ похвалꙋ̀.

Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ.

Рожде́нїе че́стно ꙳ дв҃ы всест҃ы́ѧ, ꙳ є҆ѧ́же ра́ди ꙳ ѡ҆бнови́сѧ мі́ръ, ꙳ пѣ́сненными гла́сы почти́мъ.

Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.

Ра́дꙋйтесѧ мꙋ́дрїи, ꙳ прⷪ҇ро́цы бг҃оглаго́ливїи, ꙳ ражда́етсѧ бо дв҃а, ꙳ и҆зъ неѧ́же спасе́нїе мі́ра ꙳ хо́щетъ роди́тисѧ.

Сла́ва, и҆ ны́нѣ, гла́съ д҃:

Непло́ды безча́днаѧ а҆́нна дне́сь рꙋка́ми да воспле́щетъ свѣ́тлѡ, да свѣтлоно́сѧтъ земна̑ѧ, ца́рїе да и҆гра́ютъ, ст҃и́телїе во благослове́нїи да веселѧ́тсѧ, да пра́зднꙋетъ ве́сь мі́ръ: се́ бо цр҃и́ца и҆ непоро́чнаѧ невѣ́ста ѻ҆́ч҃а, ѿ ко́рене і҆ессе́ева прозѧбѐ, ктомꙋ̀ жєны̀ въ печа́лехъ не родѧ́тъ ча̑дъ: ра́дость бо процвѣтѐ, и҆ живо́тъ всѣ̑мъ человѣ́кѡмъ въ мі́рѣ жи́тельствꙋетъ. и҆ ктомꙋ̀ да́ры і҆ѡакі́мовы не возвраща́ютсѧ, рыда́нїе бо а҆́нны въ ра́дость преложи́сѧ: сра́дꙋйтесѧ мнѣ̀, глаго́лющи, ве́сь и҆збра́нный і҆и҃ль: се́ бо даде́ ми гдⷭ҇ь ѡ҆дꙋшевле́ннꙋю пала́тꙋ бжⷭ҇твенныѧ сла́вы є҆гѡ̀, во ѻ҆́бщее весе́лїе и҆ ра́дость и҆ спасе́нїе дꙋ́шъ на́шихъ.

Тропа́рь прпⷣбныѧ, гла́съ и҃:

Въ тебѣ̀ ма́ти и҆звѣ́стнѡ спасе́сѧ, є҆́же по ѻ҆́бразꙋ: прїи́мши бо крⷭ҇тъ, послѣ́довала є҆сѝ хрⷭ҇тꙋ̀, и҆ дѣ́ющи ᲂу҆чи́ла є҆сѝ, презира́ти ᲂу҆́бѡ пло́ть, прехо́дитъ бо, прилѣжа́ти же ѡ҆ дꙋшѝ ве́щи безсме́ртнѣй: тѣ́мже и҆ со а҆́гг҃лы сра́дꙋетсѧ, прпⷣбнаѧ ѳеодѡ́ро, дꙋ́хъ тво́й.

Сла́ва, и҆ ны́нѣ, пра́здника.

На ᲂу҆́трени, на Бг҃ъ гдⷭ҇ь, тропа́рь пра́здника, два́жды.

Сла́ва, ст҃ы́ѧ: И҆ ны́нѣ, пра́здника. И҆ ѻ҆бы̑чныѧ каѳі̑смы.

По а҃-мъ стїхосло́вїи сѣда́ленъ, гла́съ а҃.

Подо́бенъ: Ка́мени запеча́танꙋ:

Ро́ждшисѧ пресла́внѡ ѿ непло́дныхъ ложе́снъ, ѿ дѣ́вственныхъ чре́слъ родила̀ є҆сѝ па́че є҆стества̀: красе́нъ бо ꙗ҆́вльшисѧ сте́бль, и҆зрасти́ла є҆сѝ мі́рꙋ жи́знь. сегѡ̀ ра́ди си̑лы нбⷭ҇ныѧ вопїю́тъ тебѣ̀ бцⷣе: сла́ва происхожде́нїю твоемꙋ̀, чⷭ҇таѧ: сла́ва ржⷭ҇твꙋ̀ твоемꙋ̀: сла́ва дѣ́вствꙋ твоемꙋ̀, мт҃и безневѣ́стнаѧ.

Сла́ва, и҆ ны́нѣ, то́йже.

По в҃-мъ стїхосло́вїи сѣда́ленъ, гла́съ д҃. Поⷣ: Ꙗ҆ви́лсѧ є҆сѝ:

Лꙋчѝ возсїѧ́ша всемі́рныѧ ра́дости ржⷭ҇тва̀ твоегѡ̀, дв҃о мт҃и марі́е, на землѝ, и҆ ѡ҆зари́ша мы̑сли любо́вїю пою́щихъ тѧ̀.

Сла́ва, и҆ ны́нѣ, то́йже.

Канѡ́нъ пра́здника, со і҆рмосо́мъ на ѕ҃: и҆ прпⷣбныѧ на д҃: и҆ а҆ѵтоно́ма на д҃. Канѡ́нъ пра́здника.

Гла́съ в҃. Пѣ́снь а҃. І҆рмо́съ:

Грѧди́те лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.

Грѧди́те вѣ́рнїи, дх҃омъ бжⷭ҇твеннымъ ра́дꙋющесѧ, ю҆́же ѿ непло́дове дне́сь прише́дшꙋю, человѣ́кѡвъ на спасе́нїе, приснодв҃ꙋ ѻ҆трокови́цꙋ пѣ́сньми почти́мъ.

Ра́дꙋйсѧ, чⷭ҇таѧ, мт҃и и҆ рабо̀ хрⷭ҇та̀ бг҃а, ꙗ҆́же пе́рвомꙋ хода́таице бл҃же́нствꙋ, человѣ́ческїй ро́дъ тѧ̀, всѝ досто́йнѡ пѣ́сньми сла́вимъ.

Жи́зни ражда́етсѧ дне́сь мо́стъ, и҆́мже человѣ́цы воззва́нїе паде́нїѧ є҆́же ѿ а҆́да ѡ҆брѣ́тшїи, хрⷭ҇та̀ жизнода́вца пѣ́сньми прославлѧ́ютъ.

Канѡ́нъ прпⷣбныѧ.

Гла́съ д҃. Пѣ́снь а҃. І҆рмо́съ:

Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Оу҆ста̀ моѧ̑ и҆спо́лни твоегѡ̀ хвале́нїѧ, гдⷭ҇и, пою́щꙋ сла́вꙋ твою̀ многопѣ́тꙋю, и҆ чествꙋ́ющꙋ болѣ̑зни ѳеодѡ́ры, ᲂу҆го́ждшїѧ тебѣ̀ житїѧ̀ свѣ́тлостїю.

Возсїѧ̀ дне́сь свѧще́нное твоѐ торжество̀, со́лнца свѣтлѣ́йше, сꙋ́щыѧ во тмѣ̀ дꙋ́шы ѡ҆зарѧ́ющее мра́къ де́мѡнскїй всегда̀ ѿгонѧ́ющее, досточꙋ́днаѧ.

Не позна̀ заходѧ́ тѧ погрѣша́ющꙋ со́лнце, незаходѧ́щее же позна̀ є҆ди́нъ ꙗ҆́кѡ всевѣ́дый, и҆ ѡ҆зарѝ лꙋча́ми покаѧ́нїѧ дꙋшѝ твоеѧ̀ ѻ҆́чи, бг҃облаже́ннаѧ.

Напи́санъ бы́сть грѣ́хъ тво́й, всечестна́ѧ, ꙗ҆́вѣ, ꙗ҆́кѡ сказа́ша є҆ѵⷢ҇лїа: но потща́вшисѧ, пѡ́ты воздержа́нїѧ, сле́зными же тѡ́ки се́й и҆згла́дила є҆сѝ.

Бг҃оро́диченъ:

Ꙗ҆́кѡ ѡ҆дꙋшевле́нъ черто́гъ, ꙗ҆́кѡ нетлѣ́ннꙋю ски́нїю, ꙗ҆́кѡ две́рь нбⷭ҇нꙋю, ꙗ҆́кѡ бжⷭ҇твеннꙋю трапе́зꙋ, ꙗ҆́кѡ пала́тꙋ и҆ престо́лъ влⷣчень, марі́ю чⷭ҇тꙋю пѣ́сньми почти́мъ.

И҆́нъ канѡ́нъ мꙋ́ченика, є҆гѡ́же краегране́сїе:

Зако́нное, бг҃омꙋ́дре, соверши́лъ є҆сѝ тече́нїе.

Гла́съ и҃. Пѣ́снь а҃. І҆рмо́съ:

Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Зако́ны и҆змла́да творца̀ своспита́всѧ, возра́слъ є҆сѝ въ зако́нѣ добродѣ́телей, и҆ благоче́стїѧ верстѣ̀: тѣ́мъ зако́ннѡ, ѻ҆́ч҃е, пострада́лъ є҆сѝ.

Воѻрꙋжи́лъ є҆сѝ по́мыслъ терпѣ́нїѧ и҆ мꙋ́жества ѻ҆рꙋ́жїемъ, мꙋ́дре, на прє́лести ра́ть ѡ҆полчи́всѧ, невозвра́тнѡ побѣди́въ тꙋ̀.

Зако́нѡвъ благоче́стїѧ наста́вникъ, и҆ догма́тѡвъ, ѻ҆́ч҃е, и҆́стины проповѣ́дникъ ꙗ҆́вльсѧ, во все́й тва́ри ѡ҆гласи́лсѧ є҆сѝ, ꙗ҆́кѡ а҆пⷭ҇ли, а҆ѵтоно́ме.

Бг҃оро́диченъ:

Позна́вше ꙗ҆́вльшагосѧ на землѝ бг҃а воплоще́нна, и҆ ѡ҆божи́вшесѧ ѿ негѡ̀ бл҃года́тїю, пое́мъ тѧ̀, дв҃о, дарова́нїй наслади́вшесѧ.

Пѣ́снь г҃. І҆рмо́съ:

Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщвле́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.

Непоро́чнѡ бг҃ꙋ пожи́вшїи, всѣ́хъ роди́сте спасе́нїе, бг҃омꙋ́дрїи роди́телє зижди́телѧ ро́ждшїѧ и҆ бг҃а на́шего.

Всѣ̑мъ жи́знь и҆сточа́ѧй гдⷭ҇ь ѿ непло́дове произведѐ дв҃ꙋ, въ ню́же всели́тисѧ и҆зво́ли, и҆ по ржⷭ҇твѣ̀ сохрани́въ нетлѣ́ннꙋ.

А҆́ннинъ пло́дъ, марі́ю дне́сь, гро́здъ ро́ждшꙋю живоно́сный, ꙗ҆́кѡ бг҃ꙋ воспои́мъ, предста́тельницꙋ же всѣ́хъ и҆ помо́щницꙋ.

И҆́нъ. І҆рмо́съ:

Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ, вѣнцє́въ сла́вы сподо́би.

Въ мꙋ́жескꙋю ѻ҆де́ждꙋ ѡ҆бле́кшисѧ, и҆ мꙋ́дрѣ потекла̀ є҆сѝ со тща́нїемъ, и҆ мона́шескомꙋ собо́рꙋ, честна́ѧ, себѐ примѣси́ла є҆сѝ, къ нача́лѡмъ бо́рствꙋющи лꙋка́вагѡ мїроде́ржца.

Сла́бость же́нскꙋю мꙋ́жески и҆змѣни́ла є҆сѝ, зва́нїемъ и҆́стиннѡ, и҆ но́вымъ ѻ҆́бразомъ, дѣ́лы да́ръ че́стенъ, и҆ бг҃ꙋ возжелѣ́ненъ, тебѐ самꙋ́ю, прпⷣбнаѧ, показꙋ́ющи.

Безпло́тно житїѐ показа́ла є҆сѝ въ тѣлесѝ, сла́внаѧ, ме́ртвеннѣ, несосꙋ́дное воздержа́нїе, и҆ бдѣ́нїе непреста́нное, и҆ моли́твꙋ вы́нꙋ, ѽ ѳеодѡ́ро! держа́вши.

Бг҃оро́диченъ:

Волнꙋ́етъ мѧ̀ бꙋ́рѧ грѣхо́внаѧ, и҆ возмꙋще́нїе безмѣ́стныхъ помышле́нїй, ᲂу҆милосе́рдисѧ, всенепоро́чнаѧ, и҆ рꙋ́кꙋ мѝ по́мощи ꙗ҆́кѡ ми́лостива прострѝ, ꙗ҆́кѡ да спа́ссѧ велича́ю тѧ̀.

И҆́нъ. І҆рмо́съ:

Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Тꙋ́чами слове́съ твои́хъ, безбо́жїѧ потопи́лъ є҆сѝ стра́стнꙋю ти́нꙋ, і҆ера́рше, и҆ вѣ̑рныѧ напои́лъ є҆сѝ.

Оу҆чи́тель бы́лъ є҆сѝ, и҆ слꙋжи́тель хрⷭ҇то́въ, прпⷣбне, и҆ тогѡ̀ бжⷭ҇твенныхъ стрⷭ҇те́й соѻ́бщникъ, и҆ прича́стникъ.

Ѻ҆рꙋ́жїемъ ᲂу҆тверди́лъ є҆сѝ проповѣ́данїѧ, прпⷣбне, благопослꙋшли̑выѧ, и҆ проти́вѧщыѧсѧ безпа́гꙋбны сохрани́лъ є҆сѝ.

Бг҃оро́диченъ:

Ꙗ҆ви́сѧ пречꙋ́дное на нб҃сѝ и҆ на землѝ слы́шанїе, творца́ бо всѣ́хъ сꙋ́щихъ, бцⷣе, неизрече́ннѡ родила̀ є҆сѝ.

По г҃-й пѣ́сни конда́къ ст҃ы́ѧ, гла́съ в҃. Поⷣ: Вы́шнихъ и҆щѧ̀:

Тѣ́ло твоѐ поста́ми и҆знꙋри́вши, бдѣ́нными моли́твами творца̀ ᲂу҆моли́ла є҆сѝ ѡ҆ грѣсѣ̀ твое́мъ, ꙗ҆́кѡ да прїи́меши соверше́нное проще́нїе: и҆ прїѧ́ла є҆сѝ ѡ҆ставле́нїе, пꙋ́ть покаѧ́нїѧ показа́вши.

И҆ ст҃а́гѡ конда́къ, гла́съ в҃. Подо́бенъ: Вы́шнихъ и҆щѧ̀:

Бжⷭ҇твєннаѧ, премꙋ́дре, непоро́чнѣ тайноводи́лъ є҆сѝ, же́ртва прїѧ́тнаѧ бы́лъ є҆сѝ, бг҃облаже́нне: хрⷭ҇то́вꙋ бо пи́лъ є҆сѝ ча́шꙋ, пресла́вне, свѣти́льниче всемі́рный, молѧ̀ непреста́ннѡ ѡ҆ всѣ́хъ на́съ.

Сѣда́ленъ, гла́съ є҃. Подо́бенъ: Собезнача́льное сло́во:

Мꙋ́жески по́двиги воздержа́нїѧ претерпѣ́вши, низложи́ла є҆сѝ многоко́зненнаго, съ мꙋ̑жи жи́знь пожи́вши, ѳеодѡ́ро, благоче́стнѡ, и҆ ны́нѣ прешла̀ є҆сѝ къ бг҃ꙋ, молѧ́щи ѡ҆ всѣ́хъ, свѧще́ннѡ ст҃о́е соверша́ющихъ твоѐ ᲂу҆спе́нїе.

Сла́ва, мꙋ́ченика, гла́съ д҃. Подо́бенъ: Ско́рѡ предварѝ:

Сꙋгꙋ́бъ тебѣ̀ вѣне́цъ нетлѣ́нїѧ, хрⷭ҇то́съ, всебл҃же́нне, дарова̀, ꙗ҆́кѡ страда́льцꙋ и҆ че́стнꙋ і҆ера́рхꙋ, а҆ѵтоно́ме: томꙋ́ бо безкрѡ́вныѧ прине́слъ є҆сѝ жє́ртвы, тогѡ̀ бжⷭ҇твеннꙋю стрⷭ҇ть неле́стнѡ подража́ѧ, тогѡ̀ и҆ нестарѣ́ющїѧсѧ сла́дости, бл҃же́нне, наслади́сѧ є҆сѝ.

И҆ ны́нѣ, пра́здника, гла́съ є҃. Подо́бенъ: Собезнача́льное сло́во:

І҆ѡакі́мъ и҆ а҆́нна торжествꙋ́ютъ, по бз҃ѣ бо досто́йнѡ бл҃года́ть ѡ҆брѣто́ша, и҆ роди́ша пло́дъ, бг҃опрїѧ́тенъ хра́мъ, дв҃ꙋ и҆ чⷭ҇тꙋю мт҃рь бж҃їю, є҆ди́нꙋ бл҃гослове́ннꙋю, молѧ́щꙋюсѧ непреста́ннѡ, спасти́сѧ дꙋша́мъ на́шымъ.

Пѣ́снь д҃. І҆рмо́съ:

Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не чл҃вѣколю́бче.

Воспѣва́емъ тѧ̀, гдⷭ҇и, вѣ̑рнымъ спаси́тельное приста́нище, пода́вшаго всѣ̑мъ, тебѐ ро́ждшꙋю.

Тѧ̀, бг҃оневѣ́сто, похвалꙋ̀ всѣ̑мъ хрⷭ҇то́съ ꙗ҆вѝ и҆ держа́вꙋ, пою́щымъ вѣ́рнѡ твоѐ та́инство.

Неискꙋсобра́чнаѧ влⷣчце, твои́ми моли́твами и҆збавлѧ́еми прегрѣше́нїй, благоразꙋ́мнѡ вси́ тѧ ᲂу҆блажа́емъ.

И҆́нъ. І҆рмо́съ:

Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебѐ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ зовѧ́ше: сла́ва си́лѣ твое́й, гдⷭ҇и.

Терпи́ши на мно́ги днѝ до́блественнѡ, сла́внаѧ, поще́нїе ꙗ҆́кѡ безпло́тна, не́мощь твою̀ ᲂу҆крѣплѧ́ющꙋ хрⷭ҇тꙋ̀ всеси́льною во́лею, и҆ бжⷭ҇твенною пита́ющꙋ тѧ̀ благода́тїю.

Ви́ждь смире́нїе и҆ пла́чь, ви́ждь мою̀ ско́рбь, и҆ ѡ҆блегчѝ грѣха̀ тѧжча́йшее бре́мѧ, ѳеодѡ́ра вопїѧ́ше къ є҆ди́номꙋ спастѝ могꙋ́щемꙋ.

Ловле́нїемъ запе́ншаго тѧ̀ ле́стнѡ, тꙋ́чами твои́хъ сле́зъ потопи́вши, ловле́нїемъ побѣди́ла є҆сѝ ловѧ́щаго дꙋ́шы, въ приста́нищи бл҃года́тїю бжⷭ҇твенною покрыва́ема, сла́внаѧ.

Бг҃оро́диченъ:

Всепречꙋ́днаѧ мт҃и бж҃їѧ, возсїѧ́й мѝ покаѧ́нїѧ лꙋчꙋ̀, разорѝ мра́къ безмѣ́рныхъ мои́хъ ѕѡ́лъ, лꙋка̑выѧ ѿженѝ, дв҃о, по́мыслы се́рдца моегѡ̀.

И҆́нъ. І҆рмо́съ:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Споспѣша́юща и҆мѣ́ѧ побо́рника, въ бжⷭ҇твеннѣй ра́ти гдⷭ҇а, врага̀ ста́раго земны́хъ побѣди́лъ є҆сѝ, ѻ҆́ч҃е, пѡ́двиги твои́ми.

Видѣ́нїемъ прекло́нсѧ ѻ҆́ч҃е, во глꙋбины̑ сокрове́нїй бж҃їихъ, и҆ ѿтꙋ́дꙋ та́йны навы́клъ є҆сѝ тогѡ̀ неизрече́нныѧ.

Возглаше́нїемъ слове́съ твои́хъ трє́бища і҆́дѡльскаѧ па́дахꙋ, мꙋ́дре, и҆ попали́шасѧ чти̑лища пре́лести, ѻ҆гне́мъ велѣ́нїй твои́хъ.

Пла́мень ᲂу҆че́нїй твои́хъ, на высо́кое взѧ́тсѧ житїѐ, мꙋ́дре, тебѐ концє́мъ ꙗ҆влѧ́ѧ наста́вника къ бг҃ꙋ непреле́стна.

Бг҃оро́диченъ:

Ѡ҆скве́рншыѧсѧ страстьмѝ, ѡ҆мы́й бцⷣе, моли́твами твои́ми, и҆ сподо́би ны̀ чи́стыми помышлє́нїи, пѣ́ти твоѐ ржⷭ҇тво̀.

Пѣ́снь є҃. І҆рмо́съ:

Сѣннопи́санный мра́къ гада́нїй разори́въ, и҆ вѣ́рныхъ прибы́тїемъ и҆́стины, бг҃оѻтрокови́цею ѡ҆зари́въ сердца̀, и҆ на́съ свѣ́томъ твои́мъ, хрⷭ҇тѐ, наста́ви.

Воспои́мъ, лю́дїе, всѣ́хъ винꙋ̀, сꙋ́щаго по на́мъ бы́ти вино́внаго: є҆ѧ́же ѻ҆́бразꙋ ра́довахꙋсѧ сподоблѧ́еми прⷪ҇ро́цы, ꙗ҆вле́нное спасе́нїе ѿ тоѧ̀ плодѧ́ще.

Ѿ сꙋ́ха прозѧбе́нїе жезла̀ і҆ере́ева, і҆и҃лю показа̀ проразсꙋжде́нїе: и҆ ны́нѣ свѣ́тлость прозѧ́бшихъ пресла́внѡ свѣ́титъ, ѿ непло́дове всесла́вное рожде́нїе.

И҆́нъ. І҆рмо́съ:

Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Оу҆диви́шасѧ чи́ни безтѣле́сныхъ, зрѧ́ще тѧ̀ въ тѣлесѝ бре́ннѣмъ, подо́бѧщꙋюсѧ тѣ́хъ житїю̀, и҆ честно́мꙋ пребыва́нїю, и҆ пребори́вшꙋю врага̀, дре́вле подпе́ншаго тѧ̀, ѳеодѡ́ро, ле́стїю.

Ѕвѣре́й стремлє́нїѧ бг҃ъ тебѣ̀ покорѝ, бл҃года́ть и҆сцѣле́нїй да́въ тебѣ̀, сїѐ проповѣ́даетъ, рꙋко́ю твое́ю и҆зба́вивый снѣде́нїѧ ди́вїѧгѡ ѕвѣ́рѧ, є҆го́же сокрꙋше́нна и҆сцѣли́ла є҆сѝ, сла́внаѧ.

Пита́еши младе́нца, соверше́ннымъ смы́сломъ, терпѧ́щи лю́тое ѡ҆клевета́нїе, благодарѧ́щи вседержи́телю да́вшемꙋ тебѣ̀ крѣ́пость, и҆ тѧ̀ ᲂу҆ди́вльшемꙋ, ѳеодѡ́ро всехва́льнаѧ.

Бг҃оро́диченъ:

Крѣ́пость и҆ ᲂу҆твержде́нїе немощна́гѡ моегѡ̀ се́рдца ты̀ є҆сѝ неискꙋсобра́чнаѧ дв҃о, неѡбори́маѧ стѣна̀ ѿ лица̀ вра́жїѧ, спаса́ющи мѧ̀ ѿ всѣ́хъ лю́тыхъ, побѣжда́ющи полкѝ лю́тагѡ борца̀.

И҆́нъ. І҆рмо́съ:

Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче.

Свѣ́тъ тѧ̀ ᲂу҆́мный ѡ҆зарѝ а҆ѵтоно́ме, и҆ жи́зни сло́во и҆мꙋ́щаго, свѣти́льника всѣ̑мъ концє́мъ ꙗ҆ви́ тѧ.

Глаго́лъ бж҃їй ꙗ҆́кѡ ме́чь и҆звле́къ, ѡ҆полче́нїе ссѣ́клъ є҆сѝ лжеиме́нныѧ мꙋ́дрости, ѻ҆́ч҃е а҆ѵтоно́ме.

Ве́сь вра́жїй тꙋ́лъ стрѣ́лъ и҆стощи́лъ є҆сѝ, и҆ всꙋ́е си́хъ показа́лъ є҆сѝ воѻрꙋжи́вшихсѧ на тѧ̀, бл҃же́нне а҆ѵтоно́ме.

Бг҃оро́диченъ:

Бы́ша нѡ́ваѧ и҆ пресла̑внаѧ, всечⷭ҇тна́ѧ, тобо́ю бо на землѝ бг҃ъ пло́тїю ꙗ҆ви́сѧ, и҆ земні́и ѡ҆божи́хомсѧ.

Пѣ́снь ѕ҃. І҆рмо́съ:

Ко гдⷭ҇ꙋ ѿ ки́та і҆ѡ́на возопѝ: ты́ мѧ возведѝ и҆зъ глꙋбины̀ а҆́да, молю́сѧ, да ꙗ҆́кѡ и҆зба́вителю, во гла́сѣ хвале́нїѧ, и҆́стины же дꙋ́хомъ пожрꙋ̀ тебѣ̀.

Ко гдⷭ҇ꙋ въ ско́рби непло́дства возопи́ша, бг҃ома́тере бг҃омꙋ́дрїи роди́тели: и҆ сїю̀ въ ро́ды родѡ́въ роди́ша, на ѻ҆́бщее спасе́нїе и҆ похвалꙋ̀.

Прїѧ́ша нбⷭ҇ный да́ръ ѿ бг҃а досто́инъ, бг҃ома́тере бг҃омꙋ́дрїи роди́тели, самѣ́хъ херꙋві́мѡвъ превы́шшее носи́ло, сло́ва и҆ зижди́телѧ роди́тельницꙋ.

И҆́нъ. І҆рмо́съ:

Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃ома́тере, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

И҆сто́чникъ сле́зъ приносѧ́щи непреста́ннѡ, дрꙋча́щисѧ и҆ стенѧ́щи, запреще́нїе мона́хѡвъ, и҆ ѿлꙋче́нїе, благодарѧ́щи терпи́ши, бг҃облаже́ннаѧ.

Питїѐ ѿ мо́рѧ и҆мꙋ́щи, ди́вїимъ же бы́лїемъ пита́ющисѧ, со ѕвѣрьми́ же въ пꙋсты́ни водворѧ́ющисѧ, ꙗ҆́кѡ на нб҃сѝ ѡ҆бита́ла є҆сѝ, досточꙋ́днаѧ.

Ѡ҆пале́нїе со́лнца понесла̀ є҆сѝ, нощнꙋ́ю стꙋ́день терпѣ́ла є҆сѝ, дх҃а бжⷭ҇твеннагѡ согрѣва́ема бл҃года́тїю: тѣ́мъ наслажда́ешисѧ го́рнѧгѡ бл҃же́нства.

Бг҃оро́диченъ:

Бжⷭ҇твеннꙋю ста́мнꙋ, и҆ трапе́зꙋ, хлѣ́бъ жи́зни поне́сшꙋю, недѣ́ланнꙋю ни́вꙋ, го́рꙋ ст҃ꙋ́ю бцⷣꙋ дв҃ꙋ пѣ́сньми сла́вимъ.

И҆́нъ. І҆рмо́съ:

Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Си́ла тѧ̀, мꙋ́дре, ᲂу҆тѣ́шителева ᲂу҆крѣпѝ, ꙗ҆́коже пре́жде ᲂу҆ч҃никѝ, и҆ ѧ҆зы́комъ воѻрꙋжѝ ѻ҆́гненнымъ, а҆ѵтоно́ме, земны̑ѧ просвѣща́ти, ѻ҆гнепопалѧ́ти же нече́стїе.

Младе́нствꙋющꙋ дꙋше́внымъ тѝ мꙋдрова́нїемъ, ѻ҆́ч҃е прпⷣбне, по́двиги па́че є҆стества̀ за проповѣ́данїе и҆ трꙋ́дъ неѡсла́бный благомо́щнѡ прїѧ́лъ є҆сѝ, не́мощїю є҆стества̀ тѣлесѐ.

Положи́лъ є҆сѝ подъ но́ги благочести́выхъ главꙋ̀ вра́жїю, на созда́телѧ вознесе́ннꙋю, вѣ́рою слове́съ воѻрꙋжи́въ на ню̀ сїѧ̑, бл҃года́тїю.

Бг҃оро́диченъ:

И҆сцѣли́ти тобо́ю є҆стества̀ сокрꙋшє́нїѧ, созда́тель и҆ творе́цъ восхотѣ́въ, бцⷣе, подаде́ тѧ врачевство̀ бжⷭ҇твенное, въ не́мощехъ прибѣга́ющымъ тебѣ̀.

Конда́къ пра́здника, гла́съ д҃:

І҆ѡакі́мъ и҆ а҆́нна, поноше́нїѧ безча́дства, и҆ а҆да́мъ и҆ є҆́ѵа, ѿ тлѝ сме́ртныѧ свободи́стасѧ, пречⷭ҇таѧ, во ст҃ѣ́мъ ржⷭ҇твѣ̀ твое́мъ: то̀ пра́зднꙋютъ и҆ лю́дїе твоѝ, вины̀ прегрѣше́нїй и҆зба́вльшесѧ, внегда̀ зва́ти тѝ: непло́ды ражда́етъ бцⷣꙋ, и҆ пита́тельницꙋ жи́зни на́шеѧ.

І҆́косъ:

Моли́твами кꙋ́пнѡ и҆ воздыха́нїе, непло́дства и҆ безча́дства, і҆ѡакі́ма же и҆ а҆́нны благопрїѧ́тное, и҆ во ᲂу҆́ши гдⷭ҇ни вни́де, и҆ прозѧбѐ пло́дъ живоно́сенъ мі́рꙋ: ѻ҆́въ бо моли́твꙋ на горѣ̀ творѧ́ше, ѻ҆́ва же въ садѣ̀ поноше́нїе ноша́ше: но съ ра́достїю непло́ды ражда́етъ бцⷣꙋ, и҆ пита́тельницꙋ жи́зни на́шеѧ.

Пѣ́снь з҃. І҆рмо́съ:

Кꙋпина̀ въ горѣ̀ ѻ҆гненеѡпа́льнаѧ, и҆ росоно́снаѧ пе́щь халде́йскаѧ, ꙗ҆́вѣ предписа̀ тѧ̀, бг҃оневѣ́сто: бжⷭ҇твенный бо невеще́ственный въ веще́ственнѣмъ чре́вѣ, ѻ҆́гнь неѡпа́льнѡ прїѧ́ла є҆сѝ. тѣ́мже и҆зъ тебє̀ ро́ждшемꙋсѧ пое́мъ: бл҃гослове́нъ є҆сѝ, бж҃е ѻ҆тє́цъ на́шихъ.

Твоѐ въ веще́ственныхъ ꙗ҆вле́нїихъ, законополо́жникъ возбрани́сѧ разꙋмѣ́ти, и҆ вели́кое, пречⷭ҇таѧ, та́инство, не мꙋ́дрствовати земнорє́вностнаѧ, ѻ҆бра́знѡ наказꙋ́емь и҆ногда̀. тѣ́мже ᲂу҆ди́вльсѧ чꙋдесѝ, глаго́лаше: бл҃гослове́нъ бг҃ъ ѻ҆тє́цъ на́шихъ.

Го́рꙋ и҆ две́рь небе́снꙋю, и҆ мы́сленнꙋю тѧ̀ лѣ́ствицꙋ бг҃олѣ́пнѡ, ли́къ бжⷭ҇твенный пронаречѐ: ѿ тебє́ бо ка́мень ѿсѣче́сѧ, не рꙋка́ми мꙋ́жескими, и҆ две́рь є҆́юже про́йде гдⷭ҇ь, и҆́же чꙋде́съ бг҃ъ ѻ҆тє́цъ на́шихъ.

И҆́нъ. І҆рмо́съ:

Не послꙋжи́ша тва́ри, бг҃омꙋ́дрїи, па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ благослове́нъ є҆сѝ.

Нестерпи́мыми тѧ̀ ра́нами многоко́зненный вра́гъ ᲂу҆дрꙋчѝ, въ привидѣ́нїихъ мечта́ѧсѧ: но тогѡ̀ низложи́ла є҆сѝ сꙋ́етное свирѣ́пство, воспѣва́ющи: ѻ҆тцє́въ на́шихъ бж҃е, бл҃гослове́нъ є҆сѝ.

Сꙋхі̑ѧ ро́вы напо́лнила є҆сѝ во́дъ, моли́твами твои́ми, сла́внаѧ, чꙋдодѣ́йствꙋющи ꙗ҆́вѣ, бг҃а велича́ющи, тѧ̀ просла́вльшаго, є҆мꙋ́же взыва́емъ: ѻ҆тцє́въ на́шихъ бж҃е, бл҃гослове́нъ є҆сѝ.

Соверша́ющихъ твою̀ па́мѧть, сла́внаѧ, при́снѡ помина́й со дерзнове́нїемъ мно́гимъ, бг҃а молѧ́щи всеще́драго, є҆мꙋ́же зове́мъ: ѻ҆тцє́въ на́шихъ бж҃е, бл҃гослове́нъ є҆сѝ.

Бг҃оро́диченъ:

Цр҃и́це дв҃о ро́ждшаѧ цр҃ѧ̀ хрⷭ҇та̀, ᲂу҆ще́дривши спаси́ мѧ, коле́блема страстьмѝ, вѣ́рою ᲂу҆твердѝ, и҆ наста́ви мѧ̀ ко спасе́ннѣй стезѝ, вѣ́рныхъ спасе́нїе.

И҆́нъ. І҆рмо́съ:

Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, благослове́нъ є҆сѝ.

Сочлени́въ во є҆ди́но благоче́стїѧ ликова̑нїѧ, ѻ҆́ч҃е а҆ѵтоно́ме, вѣ́рою просвѣщє́нныѧ словесы̀ твои́ми, непреста́ннѡ взыва́ти ᲂу҆чи́лъ є҆сѝ: ѻ҆тцє́въ на́шихъ бж҃е, бл҃гослове́нъ є҆сѝ.

Неѡсла́бнымъ мꙋ́жествомъ стрѧ́слъ є҆сѝ, мꙋ́чениче, безбо́жныхъ велѣ̑нїѧ, въ дꙋша́хъ ᲂу҆тверждє́ннаѧ невѣ́рныхъ, и҆ ѿ ѻ҆снова́нїй сїѧ̑, мꙋ́дре, и҆сто́рглъ є҆сѝ, въ сердца́хъ вѣ́рныхъ бл҃года́ть ᲂу҆твержда́ѧ.

Твоегѡ̀ свѧще́нства смѣ́шено пома́занїе, ѻ҆́ч҃е а҆ѵтоно́ме, страда́нїе бжⷭ҇твенно: кро́вь бо тѧ̀ свѣ́тла і҆ера́рха показа̀, вопїю́щымъ вѣ́рнѡ: хрⷭ҇тѐ, бл҃гослове́нъ є҆сѝ.

Бг҃оро́диченъ:

И҆́же ѿ землѝ созда́въ человѣ́ческое є҆стество̀, ꙗ҆́кѡ творе́цъ и҆ бг҃ъ, и҆стлѣ́вшее поновлѧ́етъ, ѿ тебє̀ бг҃ома́ти, сїѐ прїе́мъ, и҆ та́инственнагѡ сподоблѧ́етъ, чⷭ҇таѧ, сынотворе́нїѧ.

Пѣ́снь и҃. І҆рмо́съ:

Въ пещѝ ѻ҆́трочестѣй проѡбрази́лъ є҆сѝ и҆ногда̀ твою̀ мт҃рь, гдⷭ҇и, ѻ҆́бразъ же сїѧ̀ и҆зъ ѻ҆гнѧ̀ и҆з̾има́ше, неѡпа́льнѡ входѧ́щыѧ: ю҆́же пое́мъ ꙗ҆́вльшꙋюсѧ тобо́ю концє́мъ дне́сь, и҆ превозно́симъ во всѧ̑ вѣ́ки.

Ꙗ҆́же къ бг҃ꙋ на́шегѡ примире́нїѧ, пред̾ѡпредѣле́ннаѧ ски́нїѧ, є҆́же бы́ти ны́нѣ начина́етъ, и҆мꙋ́щи роди́ти сло́ва, на́мъ дебельство́мъ пло́ти ꙗ҆́вльшасѧ. є҆го́же пое́мъ, и҆зъ не сꙋ́щихъ во є҆́же бы́ти тѣ́мъ прїе́мшїи, и҆ превозно́симъ во всѧ̑ вѣ́ки.

Непло́дства преложе́нїе, мїрско́е благи́хъ разрѣшѝ непло́дство, и҆ ꙗ҆́сно чꙋ́до хрⷭ҇та̀ показа̀, къ земны̑мъ прише́дша. є҆го́же пое́мъ, и҆зъ не сꙋ́щихъ во є҆́же бы́ти тѣ́мъ прїе́мшїи, и҆ превозно́симъ во всѧ̑ вѣ́ки.

И҆́нъ. І҆рмо́съ:

Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Оу҆мо́мъ чи́стымъ просвѣще́нъ тво́й началово́ждь восхище́нъ бы́въ, ви́дѣ ꙗ҆̀же ᲂу҆гото́ва бл҃га̑ѧ тебѣ̀ гдⷭ҇ь, свѣтови́дный ра́й, и҆ неизрече́нный черто́гъ, ѳеодѡ́ро, въ не́мже тѧ̀ подвигополо́жникъ вселѝ жени́хъ.

А҆́гг҃лѡвъ, мч҃никѡвъ и҆ прпⷣбныхъ ли́цы, дꙋшѝ твое́й предначина́юще, сїю̀, къ нбⷭ҇нымъ несо́ша ѻ҆би́телемъ, къ та́мошнемꙋ поко́ю веселѧ́щихсѧ, въ не́мже є҆́сть жили́ще вопїю́щихъ, и҆ превозносѧ́щихъ хрⷭ҇та̀ во вѣ́ки.

Мно́жество мона́шествꙋющихъ собра́вшесѧ, бл҃же́нное погреба́ютъ вѣ́рою тѣ́ло твоѐ, ви́дѣвше бо пресла̑внаѧ, позна́ша и҆зрѧ̑днаѧ: ꙗ҆́кѡ жена̀ тѣ́ломъ, посредѣ̀ мꙋже́й жи́ти благоволи́ла є҆сѝ, рꙋко́ю покрыва́ема всеси́льнагѡ, бг҃омꙋ́драѧ ѳеодѡ́ро.

Моли́твами всено́щными терпѧ́щи, страсте́й ᲂу҆спи́ла є҆сѝ двиза̑нїѧ, ᲂу҆снꙋ́ла же є҆сѝ пра́веднымъ сно́мъ подо́бнымъ, и҆ къ зарѝ невече́рнѣй прешла̀ є҆сѝ пою́щи: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.

Бг҃оро́диченъ:

Въ слѣ́дъ тебѐ теко́ша жєны̀, мѵ́ра сладковѡ́ннаѧ чꙋ́вствꙋюще, пречⷭ҇таѧ бг҃оневѣ́сто, ѻ҆трокови́це неискꙋсобра́чнаѧ: и҆зъ ᲂу҆тро́бы твоеѧ̀ возсїѧ́вшаго, є҆диноро́днаго сн҃а, и҆ тебѣ̀ сцрⷭ҇твꙋютъ и҆́стиннѡ, воспѣва́юще хрⷭ҇та̀ во вѣ́ки.

И҆́нъ. І҆рмо́съ:

Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.

Оу҆крѣплѧ́ющꙋсѧ тебѣ̀ во хрⷭ҇тѣ̀, мꙋчи́телей крѣ́пость па́даше, бг҃омꙋ́дре: стра́шенъ бо є҆́й дꙋ́хомъ бы́лъ є҆сѝ.

До́блестїю ра́зꙋма пре́лести гнило́е ѡ҆бличи́лъ є҆сѝ, всебл҃же́нне, крѣ́пость въ дѣ́лѣхъ ꙗ҆ви́въ благоче́стїѧ.

Чꙋде́съ твои́хъ рѣ́ки и҆злїѧ́вшесѧ, и҆сцѣле́нїй бе́зднꙋ тѧ̀, ѻ҆́ч҃е, ꙗ҆ви́ша въ мі́рѣ, и҆сточа́ющꙋю бл҃года́ть.

Бг҃оро́диченъ:

Препросла́висѧ и҆́стиннѡ, въ зна́менїихъ на землѝ, бл҃года́ть твоѧ̀, дв҃о: стра́ннѡ бо чꙋ́до твоегѡ̀ рожде́нїѧ.

Пѣ́снь ѳ҃. І҆рмо́съ:

Ꙗ҆́же пре́жде со́лнца свѣти́льника бг҃а возсїѧ́вшаго, пло́тски къ на́мъ прише́дшаго, и҆зъ бокꙋ̀ дв҃и́чꙋ, неизрече́ннѡ воплоти́вшаѧ, бл҃гослове́ннаѧ, всечⷭ҇таѧ, тѧ̀, бцⷣꙋ, велича́емъ.

И҆́же непокори̑вымъ лю́демъ и҆зъ ка́мене и҆сточи́въ во́дꙋ, бл҃гопокори̑вымъ же ꙗ҆зы́кѡмъ да́рꙋетъ ѿ чре́слъ непло́дныхъ пло́дъ на весе́лїе на́мъ, тѧ̀ бг҃ома́ти пречⷭ҇таѧ: ю҆́же досто́йнѡ велича́емъ.

Напра́снагѡ дре́внѧгѡ ѿѧ́тельницꙋ ѡ҆сꙋжде́нїѧ, и҆ прама́тере и҆справле́нїе, ю҆́же ро́да къ бг҃ꙋ винꙋ̀ присвое́нїѧ, къ зижди́телю мо́стъ, тѧ̀ бцⷣе велича́емъ. (с. 243)

И҆́нъ. І҆рмо́съ:

Всѧ́къ земноро́дный да взыгра́етсѧ, дх҃омъ просвѣща́емъ, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Зашла̀ є҆сѝ ꙗ҆́кѡ ѕвѣзда̀ ѿ мі́ра прехва́льнаѧ, и҆ возсїѧ́ла є҆сѝ въ премі́рнѣй жи́зни, ѡ҆ста́вльши ꙗ҆́кѡ зари̑ на́мъ добродѣ́тєли житїѧ̀ твоегѡ̀, и҆ и҆справлє́нїѧ, сердца̀ всѣ́хъ ѡ҆зарѧ́ющи, вѣ́рнѡ соверша́ющихъ па́мѧть твою̀.

Двє́ри нбⷭ҇ныѧ свѣ́тлѡ ѿверзо́шасѧ, под̾е́млюще тѧ̀, и҆ перворо́дныхъ ны́нѣ цр҃ковь и҆мѣ́етъ, ликовствꙋ́ющꙋ со и҆збра́нными, приснопа́мѧтнаѧ, свѧще́ннꙋю твою̀ дꙋ́шꙋ, и҆дѣ́же є҆́сть шꙋ́мъ пра́зднꙋющихъ ѳеодѡ́ро, и҆ свѣ́тъ невече́рнїй.

Ѡ҆брѣла̀ є҆сѝ возме́здїе болѣ́зней, ꙗ҆́кѡ надѣ́ѧласѧ є҆сѝ, нбⷭ҇ныѧ че́сти: ᲂу҆ста́вила є҆сѝ жела́нїе, ѡ҆брѣ́тши и҆сто́чникъ, бл҃ги́хъ наслажда́ешисѧ, ꙗ҆снѣ́йши и҆ чистѣ́йши жениха̀ зрѧ́щи, ѳеодѡ́ро, ꙗ҆́коже а҆́гг҃ли зрѣ́ти сподо́бишасѧ.

Разрѣше́нїе неꙋдо́бныхъ, и҆збавле́нїе страсте́й, и҆ житїѧ̀ и҆справле́нїе, и҆спросѝ приснопа́мѧтнаѧ, низпосла́ти хва́лѧщымъ тѧ̀, и҆ чⷭ҇тнꙋ́ю па́мѧть соверша́ющымъ твою̀, дерзнове́нїе и҆мꙋ́щи ко гдⷭ҇ꙋ, ѳеодѡ́ро честна́ѧ и҆ достосла́внаѧ.

Бг҃оро́диченъ:

Спаси́ мѧ чⷭ҇таѧ, сп҃са ро́ждшаѧ и҆ всеще́драго, ᲂу҆ще́дри раба̀ твоего̀, къ покаѧ́нїѧ пꙋтѝ напра́ви: лꙋка́вагѡ собла́зны ѿ среды̀ ѿженѝ, тогѡ́ же и҆зба́ви мѧ̀ ловле́нїѧ, бцⷣе вѣ́рныхъ помо́щнице.

И҆́нъ. І҆рмо́съ:

Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чи́стаѧ, съ безпло́тными ли́ки тѧ̀ велича́юще.

Лета́ѧ на высотꙋ̀ благоче́стїѧ, добродѣ́тельми (с. 244) возноша́емь а҆ѵтоно́ме, и҆ хрⷭ҇тꙋ̀ страда́нїемъ, ѻ҆́ч҃е, восте́клъ є҆сѝ.

Болѣ̑зни твоѧ̑ со слеза́ми сѣ́ѧвшесѧ бг҃омꙋ́дре, неѿе́млемыѧ плоды̀ разплоди́ша, ра́дости и҆ сла́вы, сла́дости ꙗ҆́же во хрⷭ҇тѣ̀ і҆и҃сѣ.

Зако́ннѡ вѣнцє́въ, и҆ бжⷭ҇твенныхъ дарова́нїй сподо́бивсѧ, і҆ера́рше а҆ѵтоно́ме, зако́ны бжⷭ҇твенными ᲂу҆твержда́еши ны̀, моли́твами твои́ми.

Бг҃оро́диченъ:

Жи́знь и҆ нетлѣ́нїе родила̀ є҆сѝ, дв҃о, побѣди́тели сме́рти сотво́ршаго, бцⷣꙋ вои́стиннꙋ тѧ̀ велича́ющыѧ.

Свѣти́ленъ пра́здника. Подо́бенъ: Дх҃омъ во ст҃и́лищи:

Ѿ непло́дныѧ и҆ ста́рицы, престарѣ́лыѧ а҆́нны, жи́знь и҆ свѣ́тъ возсїѧ̀, всенепоро́чнаѧ ѻ҆трокови́ца, две́рь восто́ка, свѣ́тъ возсїѧ́вшаѧ концє́мъ неизрече́ннѡ: ли́къ соста́вльше ᲂу҆блажи́мъ ю҆̀, ꙗ҆́кѡ земны́хъ превы́шшꙋю.

Сла́ва, и҆ ны́нѣ, то́йже.

На стїхо́внѣ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:

Ѿ а҆́нны дне́сь цвѣ́тъ, ꙳ са́дъ бг҃ода́нный, бцⷣа прозѧбѐ. ꙳ спасе́нїе человѣ́кѡвъ, ꙳ и҆зъ неѧ́же всѣ́хъ зижди́тель ро́ждсѧ па́че ᲂу҆ма̀, ꙳ а҆да́мовꙋ ѡ҆чища́етъ, ꙗ҆́кѡ бл҃гъ, ꙳ всю̀ скве́рнꙋ бл҃гостїю.

Сті́хъ: Слы́ши дщѝ и҆ ви́ждь, и҆ приклонѝ ᲂу҆́хо твоѐ.

Кто̀ дово́льнѡ по досто́инствꙋ ꙳ пѣ́ти возмо́жетъ, ꙳ ѿ а҆́нны неизрече́ннѡ младе́нствꙋющꙋю дв҃ꙋ; ꙳ го́ры ᲂу҆́бѡ и҆ хо́лми сла́дость и҆ска́пайте дне́сь: ꙳ всѣ́хъ бо жи́знь и҆ ѡ҆чище́нїе ꙳ млеко́мъ пита́етсѧ, бцⷣа чⷭ҇таѧ.

Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.

Пре́жде безча́днаѧ непло́ды, ꙳ ражда́етъ всѣ́хъ жи́знь, є҆ди́нꙋ бцⷣꙋ. ꙳ весе́лїѧ и҆сполнѧ́етсѧ, ꙳ и҆ ра́дꙋетсѧ земно́е є҆стество̀ ны́нѣ человѣ́ческое, ꙳ сла́вѧще и҆́стиннꙋю роди́тельницꙋ, ꙳ и҆зба́вителѧ і҆и҃са є҆ди́наго гдⷭ҇а.

Сла́ва, и҆ ны́нѣ, гла́съ и҃:

Въ благознамени́тый де́нь пра́здника на́шегѡ вострꙋ́бимъ дꙋхо́вною цѣвни́цею: ꙗ҆́же бо ѿ сѣ́мене дв҃дова, дне́сь ражда́етсѧ мт҃и живота̀, тмꙋ̀ разрѣша́ющи, а҆да́мово ѡ҆бновле́нїе, и҆ є҆́ѵино воззва́нїе, и҆ нетлѣ́нїѧ и҆сто́чникъ, тлѝ премѣне́нїе: є҆ѧ́же ра́ди мы̀ ѡ҆божи́хомсѧ, и҆ ѿ сме́рти и҆зба́влени бы́хомъ, и҆ возопїи́мъ то́й съ гаврїи́ломъ вѣ́рнїи: ра́дꙋйсѧ, бл҃года́тнаѧ, гдⷭ҇ь съ тобо́ю, тебє̀ ра́ди да́рꙋѧ на́мъ ве́лїю ми́лость.

На лїтꙋргі́и: Бл҃жє́нна пра́здника, пѣ́снь з҃-ѧ, и҆ и҃-ѧ, на и҃. Прокі́менъ, гла́съ д҃: Ди́венъ бг҃ъ во ст҃ы́хъ свои́хъ, бг҃ъ і҆и҃левъ. Сті́хъ: Въ цр҃квахъ благослови́те бг҃а: А҆пⷭ҇лъ къ гала́тѡмъ, зача́ло с҃и: Пре́жде прише́ствїѧ вѣ́ры: А҆ллилꙋ́їа, гла́съ а҃: Терпѧ̀ потерпѣ́хъ гдⷭ҇а, и҆ внѧ́тъ мѝ. Є҆ѵⷢ҇лїе і҆ѡа́нна, зача́ло к҃и: Приведо́ша кни̑жницы: Прича́стенъ: Въ па́мѧть вѣ́чнꙋю бꙋ́детъ првⷣникъ:

Комментарии для сайта Cackle