Мѣ́сѧца тогѡ́же въ г҃і-й де́нь. Па́мѧть ѡ҆бновле́нїй хра́ма ст҃а́гѡ, хрⷭ҇та̀ и҆ бг҃а на́шегѡ воскрⷭ҇нїѧ:

И҆ предпра́зднство воздви́женїѧ честна́гѡ и҆ животворѧ́щагѡ крⷭ҇та̀. И҆ ст҃а́гѡ свѧщенномꙋ́ченика корни́лїа со́тника.

Ве́черъ, ѻ҆бы́чнаѧ каѳі́сма. На Гдⷭ҇и, воззва́хъ: стїхи̑ры на ѕ҃: ѡ҆бновле́нїѧ г҃. Гла́съ ѕ҃. Самогла́сны:

Ѡ҆бновлє́нїѧ почита́ти, ве́тхїй зако́нъ и҆ до́брѣ и҆мѣ́ющсѧ, па́че же нѡ́ваѧ почита́ти ѡ҆бновле́ньми, ѡ҆бновлѧ́ютсѧ бо ѻ҆́строви къ бг҃ꙋ, ꙗ҆́кѡ глаго́летъ и҆са́їа: ꙗ҆̀же разꙋмѣ́ти подоба́етъ ѿ ꙗ҆зы̑къ цр҃кви ны́нѣ ᲂу҆строѧ́ємыѧ, и҆ водрꙋже́нїе прїе́млющыѧ тве́рдое бг҃омъ. тѣ́мже и҆ мы̀ настоѧ́щаѧ ѡ҆бновлє́нїѧ дꙋхо́внѡ да торжествꙋ́имъ.

Ѡ҆бновлѧ́йтесѧ бра́тїе, и҆ ве́тхаго человѣ́ка ѿложи́вше, въ но́вости жи́зни жи́тельствꙋйте, всѣ̑мъ ᲂу҆здꙋ̀ наложи́вше, ѿ ни́хже сме́рть: всѧ̀ ᲂу҆́ды нака́жемъ, всѧ́кꙋю лꙋка́вꙋю дре́ва снѣ́дь возненави́дѣвше: и҆ сегѡ̀ ра́ди то́чїю помина́юще, дре́внихъ да бѣжи́мъ. та́кѡ да ѡ҆бновлѧ́етсѧ человѣ́къ: си́це чти́тсѧ ѡ҆бновле́нїй де́нь.

А҆нато́лїево:

Положи́лъ є҆сѝ сто́лпъ крѣ́пости цр҃ковь твою̀, хрⷭ҇тѐ, превѣ́чный сло́ве, ѡ҆снова́лъ є҆си́ бо сїю̀ на ка́мени вѣ́ры. тѣ́мже недви́жна пребыва́етъ во вѣ́къ, и҆мꙋ́щи тѧ̀ тоѧ̀ ра́ди въ послѣ̑днѧѧ, невра́щнѡ бы́вша чл҃вѣ́ка. бл҃годарѧ́ще ᲂу҆́бѡ воспѣва́емъ тѧ̀ глаго́люще: ты̀ є҆сѝ пре́жде вѣкѡ́въ, и҆ на вѣ́къ, и҆ є҆щѐ, цр҃ь на́шъ, сла́ва тебѣ̀.

И҆́ны стїхи̑ры ст҃а́гѡ, гла́съ д҃. Подо́бенъ: Да́лъ є҆сѝ зна́менїе:

Хрⷭ҇то́съ призрѣ́въ ꙳ на твоѧ̑ благотворє́нїѧ, корни́лїе, ꙳ и҆ бжⷭ҇твєнныѧ моли̑твы, ꙳ а҆́гг҃ла тебѣ̀ ст҃а́го посыла́етъ, ꙳ всего́ тѧ просвѣща́юща, ꙳ и҆ а҆пⷭ҇лѡвъ свѧще́нныхъ верхо́внаго, ꙳ ѡ҆бновлѧ́юща водо́ю и҆ дх҃омъ, ꙳ тѧ̀ вседомо́внѡ достосла́вне, ꙳ и҆ наꙋча́юща лꙋ́чшымъ дх҃а бл҃года́тїю.

Ма́стїю пома́занъ свѧще́нства, ꙳ поте́клъ є҆сѝ спаси́тельное проповѣ́данїе ꙳ возвѣсти́ти страна́мъ, ꙳ и҆скоренѧ́ѧ пре́лести те́рнїе бг҃омꙋ́дре, ꙳ и҆ насажда́ѧ неле́стное ᲂу҆че́нїе въ дꙋша́хъ дх҃омъ. ꙳ тѣ́мже тѧ̀ блажи́мъ, ꙳ ꙗ҆́кѡ і҆ера́рха бг҃опрїѧ́тна, ꙳ и҆ непобѣди́ма мч҃ника, ꙳ веселѧ́щесѧ корни́лїе.

Нра́вѡмъ твоеѧ̀ бл҃гости ꙳ послѣ́дствꙋюще немꙋ́дрїи, ꙳ ꙗ҆ви́шасѧ разꙋ́мнїи: ꙳ ᲂу҆́меръ же, и҆ є҆стества̀ зако́номъ всели́всѧ, бл҃же́нне, во гро́бъ, ꙳ сего̀ и҆сто́чникъ соверша́еши ꙳ мно́гихъ чꙋде́съ, мꙋ́дре корни́лїе, ꙳ и҆сцѣлѧ́ѧ болѧ́щыѧ, ꙳ и҆ ѿгонѧ́ѧ дꙋ́хи лꙋка́вствїѧ, ꙳ дх҃омъ ст҃ы́мъ, бг҃одохнове́нне.

Сла́ва, ѡ҆бновле́нїѧ, гла́съ ѕ҃. Самогла́сенъ. І҆ѡа́нна мона́ха:

Па́мѧть ѡ҆бновле́нїй соверша́юще, гдⷭ҇и, тѧ̀ ст҃ы́ни да́телѧ сла́вѧще мо́лимъ, ѡ҆свѧти́тисѧ на́шымъ чꙋ́вствѡмъ дꙋ́шъ, моли́твами сла́вныхъ страстоте́рпєцъ, бл҃же всеси́льне.

И҆ ны́нѣ, предпра́зднства, гла́съ то́йже:

Дне́сь дре́во ꙗ҆ви́сѧ, дне́сь ро́дъ є҆вре́йскїй поги́бе, дне́сь вѣ́рными цари̑ вѣ́ра ꙗ҆влѧ́етсѧ, и҆ а҆да́мъ дре́ва ра́ди и҆спадѐ, и҆ па́ки дре́вомъ де́мѡни вострепета́ша: всеси́льне гдⷭ҇и, сла́ва тебѣ̀.

А҆́ще ли въ пѧто́къ ве́чера: И҆ ны́нѣ, бг҃оро́диченъ пе́рвый настоѧ́щагѡ гла́са. Вхо́дъ. Прокі́менъ днѐ, и҆ чтє́нїѧ трѝ.

Ца́рствъ тре́тїихъ чте́нїе.

[Глава̀ и҃] Ста̀ соломѡ́нъ предъ лице́мъ же́ртвенника гдⷭ҇нѧ, предъ всѣ́мъ собо́ромъ і҆и҃левымъ: и҆ воздѣ́въ рꙋ́цѣ своѝ на нб҃о, и҆ речѐ: гдⷭ҇и бж҃е і҆и҃левъ, нѣ́сть бо́гъ, ꙗ҆́коже ты̀ на нб҃сѝ горѣ̀, и҆ на землѝ до́лѣ. А҆́ще бо не́бо, и҆ не́бо нб҃сѐ не довлѣ́ютъ тебѣ̀, ка́кѡ до́мъ се́й, є҆го́же созда́хъ и҆́мени твоемꙋ̀; Ѻ҆ба́че и҆ при́зриши на моли́твꙋ мою̀, гдⷭ҇и бж҃е і҆и҃левъ, ᲂу҆слы́шати моле́нїе и҆ моли́твꙋ, є҆́юже ра́бъ тво́й мо́литсѧ предъ тобо́ю къ тебѣ̀ дне́сь. Да бꙋ́дꙋтъ ѻ҆́чи твоѝ ѿвє́рсты на до́мъ се́й де́нь и҆ но́щь, на мѣ́сто сїѐ, ѡ҆ не́мже гл҃го́лалъ є҆сѝ: бꙋ́детъ и҆́мѧ моѐ та́мѡ, є҆́же ᲂу҆слы́шати моли́твꙋ, є҆́юже мо́литсѧ ра́бъ тво́й на мѣ́стѣ се́мъ, во днѝ и҆ но́щи: И҆ послꙋ́шати мольбꙋ̀ раба̀ твоегѡ̀, и҆ люде́й твои́хъ і҆и҃лѧ. Є҆ли̑ка а҆́ще помо́лѧтсѧ къ тебѣ̀ на мѣ́стѣ се́мъ, и҆ ты̀ ᲂу҆слы́шиши на мѣ́стѣ жили́ща твоегѡ̀ на нб҃сѝ и҆ сотвори́ши, и҆ ми́лостивъ бꙋ́деши и҆̀мъ.

При́тчей чте́нїе.

[Глава̀ г҃] Бг҃ъ премꙋ́дростїю ѡ҆снова̀ зе́млю, ᲂу҆гото́ва же нб҃са̀ ра́зꙋмомъ: въ чꙋ́вствѣ є҆гѡ̀ бє́здны разверго́шасѧ, ѻ҆́блацы же и҆сточи́ша ро́сꙋ. Сы́не, да не премине́ши, соблюди́ же мо́й совѣ́тъ и҆ мы́сль, да живе́тъ дꙋша̀ твоѧ̀, и҆ бл҃года́ть бꙋ́детъ на твое́й вы́и: бꙋ́детъ же и҆сцѣле́нїе пло́темъ твои̑мъ, и҆ попече́нїе косте́мъ твои̑мъ. Да хо́диши надѣ́ѧсѧ въ ми́рѣ во всѣ́хъ пꙋте́хъ твои́хъ, нога́ же твоѧ̀ не по́ткнетсѧ. А҆́ще бо сѧ́деши, безбоѧ́зненъ бꙋ́деши: а҆́ще же поспи́ши, сла́достнѡ поспи́ши. И҆ не ᲂу҆бои́шисѧ боѧ́зни наше́дшїѧ, нижѐ стремле́нїй нечести́выхъ находѧ́щихъ. Гдⷭ҇ь бо бꙋ́детъ на всѣ́хъ пꙋте́хъ твои́хъ, и҆ ᲂу҆тверди́тъ твою̀ но́гꙋ, да не позы́блешисѧ. Не ѿрецы́сѧ благотвори́ти тре́бꙋющемꙋ, внегда̀ а҆́ще и҆́мать рꙋка̀ твоѧ̀ помога́ти. Не рцы̀: ѿше́дъ возврати́сѧ, и҆ ᲂу҆́трѡ да́мъ, си́льнꙋ тѝ сꙋ́щꙋ бла́го твори́ти: не вѣ́си бо, что̀ породи́тъ находѧ́й. Не дѣ́лай на дрꙋ́га твоегѡ̀ ѕла̀, прише́льствꙋюща и҆ ᲂу҆пова́юща на тѧ̀. Не любовра́жствꙋй (с. 251) на человѣ́ка всꙋ́е, да не что̀ на тѧ̀ содѣ́лаетъ ѕло́е. Не стѧжѝ ѕлы́хъ мꙋже́й поноше́нїѧ, нижѐ ревнꙋ́й пꙋтє́мъ и҆́хъ. Нечи́стъ бо предъ гдⷭ҇емъ всѧ́кїй законопрестꙋ́пникъ, съ пра́ведными же не сочетава́етсѧ. Клѧ́тва гдⷭ҇нѧ въ домѣ́хъ нечести́выхъ, дворы́ же пра́ведныхъ благословлѧ́ютсѧ. Гдⷭ҇ь гѡ́рдымъ проти́витсѧ, смирє́ннымъ же дае́тъ благода́ть.

При́тчей чте́нїе.

[Глава̀ ѳ҃] Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь. Закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̑ созыва́ющи съ высо́кимъ проповѣ́данїемъ на ча́шꙋ, глаго́лющи: и҆́же є҆́сть безꙋ́менъ, да ᲂу҆клони́тсѧ ко мнѣ̀, и҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ, и҆ пі́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете: и҆ взыщи́те ра́зꙋма, да поживетѐ, и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ, прїи́метъ себѣ̀ безче́стїе: ѡ҆блича́ѧй же нечести́ваго, ѡ҆поро́читъ себѐ: ѡ҆бличе́нїе бо нечести́вомꙋ, ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дршїй бꙋ́детъ: сказꙋ́й пра́ведномꙋ, и҆ приложи́тъ прїима́ти. Нача́ло премꙋ́дрости, стра́хъ гдⷭ҇ень, и҆ совѣ́тъ ст҃ы́хъ, ра́зꙋмъ. Разꙋмѣ́ти бо зако́нъ, по́мысла є҆́сть блага́гѡ: си́мъ бо ѻ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀.

На стїхо́внѣ стїхи̑ры предпра́зднства, гла́съ є҃. Подо́бенъ:

Ра́дꙋйсѧ, живоно́сный крⷭ҇те, благоче́стїѧ непобѣди́маѧ побѣ́да, две́рь ра́йскаѧ, вѣ́рныхъ ᲂу҆твержде́нїе, цр҃кве ѡ҆гражде́нїе: и҆́мже тлѧ̀ разори́сѧ и҆ ᲂу҆праздни́сѧ, и҆ попра́сѧ сме́ртнаѧ си́ла, и҆ вознесо́хомсѧ ѿ землѝ къ нбⷭ҇нымъ. ѻ҆рꙋ́жїе непобѣди́мое, бѣсѡ́въ сопротивобо́рче, сла́ва мꙋ́ченикѡвъ, (с. 252) прпⷣбныхъ ꙗ҆́кѡ вои́стиннꙋ ᲂу҆добре́нїе, приста́нище спасе́нїѧ, да́рꙋѧй мі́рꙋ ве́лїю ми́лость.

Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ свѧ́то є҆́сть.

Ра́дꙋйсѧ, гдⷭ҇ень крⷭ҇те, и҆́мже разрѣши́сѧ ѿ клѧ́твы человѣ́чество, сꙋ́щїѧ ра́дости зна́менїе, прогонѧ́ѧй врагѝ во твое́мъ воздви́женїи, всече́стне, на́мъ помо́щниче, крѣ́пость првⷣныхъ, свѧще́нникѡвъ благолѣ́пїе, воѡбража́емый, и҆ лю́тыхъ и҆збавлѧ́ѧй: же́злъ си́лы, и҆́мже пасе́мсѧ: ѻ҆рꙋ́жїе ми́ра, є҆го́же со стра́хомъ ѡ҆бстоѧ́тъ а҆́гг҃ли: хрⷭ҇та̀ бжⷭ҇твеннаѧ сла́ва, подаю́щагѡ мі́рꙋ ве́лїю ми́лость.

Сті́хъ: Бг҃ъ же цр҃ь на́шъ пре́жде вѣ́ка, содѣ́ла спасе́нїе посредѣ̀ землѝ.

Ра́дꙋйсѧ, слѣпы́хъ наста́вниче, немощны́хъ врачꙋ̀, воскресе́нїе всѣ́хъ ᲂу҆ме́ршихъ, воздви́гнꙋвый ны̀ во тлю̀ па́дшыѧ, крⷭ҇те честны́й: и҆́мже разрꙋши́сѧ клѧ́тва, и҆ процвѣтѐ нетлѣ́нїе: и҆ земні́и ѡ҆божи́хомсѧ, и҆ дїа́волъ всеконе́чнѡ низве́ржесѧ. дне́сь воздвиза́ема тѧ̀ ви́дѧще, рꙋка́ми а҆рхїере́йскими, возно́симъ вознесе́ннаго посредѣ̀ тебѐ, и҆ тебѣ̀ покланѧ́емсѧ, почерпа́юще бога́тнѡ ве́лїю ми́лость.

Сла́ва, ѡ҆бновле́нїѧ, гла́съ в҃. А҆нато́лїево:

Ѡ҆бновле́нїе соверша́юще всесвѧще́ннагѡ хра́ма твоегѡ̀ воскрⷭ҇нїѧ, тебѐ сла́вимъ, гдⷭ҇и, ѡ҆свѧти́вшаго сего̀, и҆ соверши́вша самосоверше́нною твое́ю бл҃года́тїю, и҆ красѧ́щаго въ не́мъ свѧще́нствꙋемыми ѿ вѣ́рныхъ та́инственными и҆ свѧще́нными же́ртвами, и҆ прїе́млюща ѿ рꙋ́къ ра̑бъ твои́хъ безкрѡ́вныѧ и҆ пречⷭ҇тыѧ жє́ртвы, воздава́юща же пра́вѡ приносѧ́щымъ грѣхѡ́въ ѡ҆чище́нїе, и҆ ве́лїю ми́лость.

И҆ ны́нѣ, предпра́зднства, гла́съ то́йже:

Бжⷭ҇твенное сокро́вище въ землѝ кры́емое, жизнода́вца (с. 253) крⷭ҇тъ, на небесѣ́хъ показа́сѧ царю̀ благочести́вомꙋ, и҆ побѣ́ды на врагѝ подписа́нїе ꙗ҆влѧ́етъ разꙋ́мнѡ: є҆го́же, ра́достнѡ вѣ́рою и҆ любо́вїю бжⷭ҇твеннѡ восте́къ къ высотѣ̀ зрѣ́нїѧ, тща́нїемъ же того̀ ѿ земны́хъ нѣ́дръ и҆знесѐ во и҆збавле́нїе мі́ра, и҆ спасе́нїе дꙋ́шъ на́шихъ.

Тропа́рь ѡ҆бновле́нїѧ, гла́съ д҃:

Ꙗ҆́коже вы́шнїѧ тве́рди благолѣ́пїе, и҆ ни́жнюю споказа́лъ є҆сѝ красотꙋ̀ ст҃а́гѡ селе́нїѧ сла́вы твоеѧ̀, гдⷭ҇и, ᲂу҆твердѝ сїѐ во вѣ́къ вѣ́ка, и҆ прїимѝ на̑ша въ не́мъ непреста́ннѡ приноси̑маѧ тебѣ̀ молє́нїѧ, бцⷣею, всѣ́хъ животѐ и҆ воскресе́нїе.

Сла́ва, мꙋ́ченика, гла́съ то́йже:

И҆ нра́вѡмъ прича́стникъ, и҆ престо́лѡмъ намѣ́стникъ а҆пⷭ҇лѡмъ бы́въ, дѣѧ́нїе ѡ҆брѣ́лъ є҆сѝ, бг҃одохнове́нне, въ видѣ́нїѧ восхо́дъ: сегѡ̀ ра́ди сло́во и҆́стины и҆справлѧ́ѧ, и҆ вѣ́ры ра́ди пострада́лъ є҆сѝ да́же до кро́ве, свѧщенномꙋ́чениче корни́лїе, молѝ хрⷭ҇та̀ бг҃а, спасти́сѧ дꙋша́мъ на́шымъ.

И҆ ны́нѣ, предпра́зднства, гла́съ то́йже:

Животворѧ́щїй крⷭ҇тъ твоеѧ̀ бл҃гости, є҆го́же дарова́лъ є҆сѝ на́мъ недостѡ́йнымъ, гдⷭ҇и, тебѣ̀ прино́симъ въ моли́твꙋ, спасѝ лю́ди, и҆ гра́дъ тво́й молѧ́щїйсѧ, бцⷣею, є҆ди́не чл҃вѣколю́бче.

На ᲂу҆́трени, по а҃-й каѳі́смѣ, сѣда́ленъ, гла́съ д҃.

Подо́бенъ: Ско́рѡ предварѝ:

Всѧ̑ просвѣтѝ прише́ствїемъ хрⷭ҇то́съ, мі́ръ ѡ҆бновѝ дх҃омъ бжⷭ҇твеннымъ свои́мъ, дꙋ́шы ѡ҆бновлѧ́ютсѧ: до́мъ бо возложи́сѧ ны́нѣ въ сла́вꙋ гдⷭ҇ню, и҆дѣ́же и҆ ѡ҆бновлѧ́етъ вѣ́рныхъ сердца̀ хрⷭ҇то́съ бг҃ъ на́шъ, во спасе́нїе человѣ́кѡвъ.

Сла́ва, и҆ ны́нѣ, то́йже.

По в҃-й каѳі́смѣ сѣда́ленъ, гла́съ д҃. Поⷣ: Ско́рѡ предварѝ:

Пра́зднственный дне́сь ѡ҆бновле́нїй, вѣ́рнїи, де́нь дости́же на́съ, повелѣва́ющїй и҆збра́нїю хрⷭ҇то́вꙋ, всѣ̑мъ ѡ҆бнови́тисѧ, и҆ свѣ́тлымъ лице́мъ, пѣ̑сни влⷣцѣ и҆зъ глꙋбины̀ се́рдца воспѣ́ти вѣ́рнѡ, ꙗ҆́кѡ и҆зба́вителю, и҆ на́съ ѡ҆бновлѧ́ющемꙋ.

Сла́ва, и҆ ны́нѣ, то́йже.

Канѡ́ны трѝ: ѡ҆бновле́нїѧ, со і҆рмосо́мъ на ѕ҃: предпра́зднства на д҃: и҆ ст҃а́гѡ на д҃.

Канѡ́нъ ѡ҆бновле́нїѧ, творе́нїе і҆ѡа́нна мона́ха.

Гла́съ д҃. Пѣ́снь а҃. І҆рмо́съ:

Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.

Столпо́мъ пꙋтеводѧ́й дре́вле и҆збра́ннаго і҆и҃лѧ, ба́нею креще́нїѧ, хрⷭ҇тѐ, въ сїѡ́нѣ насади́лъ є҆сѝ цр҃ковь, зовꙋ́щꙋ: воспои́мъ пѣ́снь бг҃ꙋ на́шемꙋ.

Дне́сь непристꙋ́пныѧ твоеѧ̀ сла́вы прише́ствїе, и҆́же на землѝ водрꙋже́нный тебѣ̀ хра́мъ, не́бо ᲂу҆стро́и: въ не́мже согла́снѡ воспои́мъ пѣ́снь бг҃ꙋ на́шемꙋ.

Не зако́номъ цр҃ковь, гдⷭ҇и, ᲂу҆краша́етсѧ, ни ра́бскихъ просте́ртїемъ рꙋ́къ, но крⷭ҇та̀ бл҃года́тїю хва́лѧщисѧ, пое́тъ тебѣ̀: воспои́мъ пѣ́снь бг҃ꙋ на́шемꙋ.

Бг҃оро́диченъ:

Безсѣ́меннѡ ѻ҆́ч҃ею во́лею, ѿ бжⷭ҇твеннагѡ дх҃а бж҃їѧ зачала̀ є҆сѝ сн҃а, и҆ пло́тїю породила̀ є҆сѝ, и҆зъ ѻ҆ц҃а̀ безма́тернѧ, и҆ на́съ ра́ди и҆зъ тебє̀ без̾ѻ́тча.

И҆́нъ канѡ́нъ предпра́зднства по а҆лфави́тꙋ, безъ бг҃оро́дичнѡвъ. І҆ѡ́сифъ.

Гла́съ то́йже. Пѣ́снь а҃. І҆рмо́съ:

Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ, молю́сѧ, да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.

Весели́сѧ нб҃о, и҆ землѐ ра́дꙋйсѧ: прест҃ы́й бо крⷭ҇тъ происхо́дитъ, ѡ҆свѧща́ѧ ны̀ бл҃года́тїю. сего̀ цѣлꙋ́ющыѧ, ꙗ҆́кѡ и҆сто́чника ст҃ы́ни, и҆ всѣ́хъ ѡ҆боже́нїѧ винꙋ̀.

Ше́ствовати благоче́стнѡ нбⷭ҇нꙋю стезю̀, ᲂу҆крѣпѝ на́съ прест҃ы́й крⷭ҇те, вѣ́рнѡ покланѧ́ющыѧсѧ тебѣ̀: ꙗ҆́кѡ да проти́вныхъ ᲂу҆кло́ншесѧ про́пастей, ѻ҆́бщницы бжⷭ҇твенныѧ сла́вы бꙋ́демъ.

Зна́нны творцꙋ̀ тобо́ю бы́вше, всечⷭ҇тны́й крⷭ҇те, се́рдцемъ и҆ дꙋше́ю ѡ҆б̾е́млемъ всегда́ тѧ предлежа́ща зрѧ́ще, и҆ ᲂу҆мо́мъ просвѣща́емсѧ, всевино́вное сло́во сла́вѧще.

Бг҃оро́диченъ:

Гра́дъ бг҃а всецр҃ѧ̀, бг҃опрїѧ́тное сокро́вище честно́е, бцⷣе всенепоро́чнаѧ, сохранѝ тво́й жре́бїй всегда̀ благохва́лѧщїй тѧ̀, и҆ почита́ющїй вѣ́рою ржⷭ҇тво̀ твоѐ.

И҆́нъ канѡ́нъ ст҃а́гѡ, є҆гѡ́же краегране́сїе: Чꙋде́съ твои́хъ сла́вꙋ пою̀, блаже́нне: І҆ѡ́сифъ.

Гла́съ є҃. Пѣ́снь а҃. І҆рмо́съ:

Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ, і҆и҃лѧ же спасѐ, побѣ́днꙋю пѣ́снь пою́ща.

Сїѐ твоѐ свѣтоно́сное, и҆ бжⷭ҇твенное ᲂу҆спе́нїе, и҆ пресвѣ́тлꙋю па́мѧть, и҆ свѧще́нное торжество̀ торжествꙋ́ющыѧ, моли́твами твои́ми просвѣтѝ, і҆ера́рше бг҃облаже́нне.

Ꙗ҆ви́лсѧ є҆сѝ и҆ пре́жде соверше́ннагѡ мꙋ́дре, та́инствъ навыче́нїѧ ми́лостынѧми и҆ моли́твами корни́лїе, ᲂу҆пражднѧ́ѧсѧ всебл҃же́нне, и҆ всѣ́хъ гдⷭ҇а мы́сли и҆щѧ̀ пра́востїю.

Зако́нѡвъ спаси́тельныхъ ꙗ҆́вѣ наꙋчи́лсѧ є҆сѝ, пло́ти соедини́вшагѡсѧ кра́йнїѧ ра́ди бл҃гости, а҆пⷭ҇лѡвъ верхо́вномꙋ ма́нїемъ влⷣчнимъ, бл҃же́нне наꙋчи́вшꙋ тѧ̀.

Бг҃оро́диченъ:

Распалѧ́еши вѣ́рныхъ сердца̀, при́снѡ сла́вити тѧ̀, несы́тною любо́вїю, бг҃ороди́тельнице влⷣчце: сла́ва бо є҆сѝ человѣ́кѡвъ, ро́ждшаѧ сла́вы гдⷭ҇а, чⷭ҇таѧ.

Катава́сїа: Крⷭ҇тъ начерта́въ:

Пѣ́снь г҃. І҆рмо́съ:

Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Ѡ҆свѧти́лъ є҆сѝ на землѝ цр҃ковь твою̀ хрⷭ҇тѐ, дх҃омъ, пома́завъ сїю̀ дне́сь твоегѡ̀ ра́дованїѧ є҆ле́емъ.

Ꙗ҆ви́лъ є҆сѝ, бл҃же, рꙋкотворе́ннꙋю ски́нїю дне́сь па́че ᲂу҆ма̀, сла́вы твоеѧ̀, строи́тельнѡ бы́вшее жили́ще.

Ѡ҆снова́нїе тѧ̀, хрⷭ҇тѐ, цр҃ковь нерꙋши́мо и҆мꙋ́щи, твои́мъ крⷭ҇то́мъ вѣнча́етсѧ, ꙗ҆́коже ца́рскою дїади́мою.

Бг҃оро́диченъ:

Ты̀ є҆ди́на на землѝ, па́че є҆стества̀ благи́хъ хода́таица мт҃и бж҃їѧ была̀ є҆сѝ: тѣ́мже тебѣ̀, є҆́же ра́дꙋйсѧ, прино́симъ.

И҆́нъ. І҆рмо́съ:

Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀, чл҃вѣколю́бче.

Сла́вꙋ хрⷭ҇то́вꙋ тѧ̀ быва́ющꙋ вѣ́рою сла́вимъ, прославлѧ́еми твои́мъ пресла́вне гдⷭ҇ень крⷭ҇те, честны́мъ ѡ҆б̾ѧ́тїемъ, и҆ просвѣща́еми.

Въ весе́лїи прише́дше, вѣ́рнїи, почерпе́мъ ꙗ҆́кѡ ѿ и҆сто́чника чи́ста, крⷭ҇та̀, присноживꙋ́щыѧ во́ды, и҆ спаса́еми бг҃а восхва́лимъ.

Жи́знь сы́й і҆и҃съ, повѣ́шенъ ᲂу҆мертви́сѧ на дре́вѣ крⷭ҇тнѣмъ, є҆го́же ны́нѣ вѣ́рнѡ ѡ҆б̾е́млюще, стра̑сти ѿгонѧ́емъ, сме́рти хода́тай.

Бг҃оро́диченъ:

Ꙗ҆ви́вшисѧ дꙋшѝ моеѧ̀ тмꙋ̀ ѿженѝ, грѣхѡ́вныѧ ᲂу҆́зы, чⷭ҇таѧ дв҃о, расто́ргни, и҆ спаси́ мѧ, ро́ждшаѧ всеще́драго.

И҆́нъ. І҆рмо́съ:

Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ, цр҃ковь твою̀ ᲂу҆твердѝ, є҆ди́не бла́же и҆ чл҃вѣколю́бче.

Ст҃а́гѡ просвѣще́нїе прїѧ́лъ є҆сѝ дх҃а, и҆ бжⷭ҇твеннꙋю бл҃года́ть ѿ бжⷭ҇твенныхъ ᲂу҆́стъ, всю̀ прїе́мъ вседомо́внѡ бжⷭ҇твеннагѡ верхо́внагѡ а҆пⷭ҇ла прише́ствїемъ, возвѣща́ющагѡ спаси́тєльнаѧ ᲂу҆чє́нїѧ.

Возвы́сивсѧ добродѣ́тельми ꙗ҆́кѡ ке́дръ высокора́стный, и҆ плоды̀ благово́нны на́мъ и҆зрасти́въ ᲂу҆че́нїй пода́нїе, бл҃года́ть чꙋде́съ и҆ и҆сцѣле́нїй дѣ́йство, бл҃же́нне і҆ера́рше корни́лїе.

Велича́йшагѡ сподо́бивсѧ благосла́вїѧ корни́лїе, съ верхо́внымъ, и҆ и҆ны́ми мно́гими, поте́клъ є҆сѝ проповѣ́дꙋѧ всю́дꙋ проповѣ́данїе бжⷭ҇твенное: и҆́мже мы̀ просвѣща́еми, тмы̀ невѣ́дѣнїѧ и҆зба́вихомсѧ:

Бг҃оро́диченъ:

Чистоты̀ свѣтови́дное была̀ є҆сѝ селе́нїе, свѣтода́телѧ носи́вши воплоща́ема, человѣ́ка ꙗ҆ви́вшасѧ по на́мъ за чл҃вѣколю́бїе, и҆ тлю̀ разори́вша, пречⷭ҇таѧ дв҃о бг҃оневѣ́сто, нетлѣ́нное человѣ́кѡвъ воззва́нїе.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ:

Не́бо многосвѣ́тлое цр҃ковь показа́сѧ, всѧ̑ просвѣща́ющаѧ вѣ̑рныѧ, въ не́йже стоѧ́ще зове́мъ: се́й до́мъ ᲂу҆твердѝ, гдⷭ҇и.

Та́же сѣда́ленъ, гла́съ и҃. Подо́бенъ: Повелѣ́нное:

Свидѣ́тельства ски́нїю хрⷭ҇то́съ показа̀, и҆ бжⷭ҇твенный мѡѷсе́й на землѝ водрꙋжѝ, и҆ хра́мъ ѡ҆бновлѧ́етъ соломѡ́нъ въ же́ртвахъ: мы́ же къ но́вомꙋ і҆ерⷭ҇ли́мꙋ вѣ́рою прибѣга́юще, дв҃дски дади́мъ бжⷭ҇твенное воспѣва́нїе распе́ншемꙋсѧ на́съ ра́ди, просѧ́ще проще́нїѧ всѣ́хъ, и҆́миже согрѣши́хомъ.

Сла́ва, ст҃а́гѡ, гла́съ д҃. Подо́бенъ: Ꙗ҆ви́лсѧ є҆сѝ:

Нача́токъ ст҃ы́й тѧ̀ цр҃ковь ѿ ꙗ҆зы̑къ прїѧ́тъ, просвѣща́ющаго сїю̀ добродѣ́тельными твои́ми дѣѧ́ньми, свѧщеннотаи́нниче бг҃омꙋ́дре корни́лїе.

И҆ ны́нѣ, предпра́зднства, гла́съ то́йже. Поⷣ: Оу҆диви́сѧ і҆ѡ́сифъ.

Просте́ръ мѡѷсе́й рꙋ́ки къ высотѣ̀ нбⷭ҇нѣй, проѡбразова́ше крⷭ҇тъ, бжⷭ҇твенное ѻ҆рꙋ́жїе вѣ́рныхъ, на не́мже хрⷭ҇то́съ грѣхѝ пригвоздѝ. тѣ́мъ вра́гъ пла́каше стражда̀ болѣ́зненнѡ чꙋ́вствы, глаго́лаше, древѧно́е мѧ̀ копїѐ прободѐ посредѣ̀ се́рдца моегѡ̀. хрⷭ҇то́съ всѧ̑ ѿ а҆́дскихъ ᲂу҆́зъ рѣши́тъ.

Пѣ́снь д҃. І҆рмо́съ:

Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

Не же́ртвами безслове́сныхъ цр҃ковь, но твое́ю честно́ю и҆зъ ре́бръ живоно́сною кро́вїю ѡ҆кроплѧ́етсѧ, лѣ́потнѡ взыва́ющи: сла́ва си́лѣ твое́й, гдⷭ҇и.

Селє́нїѧ гдⷭ҇нѧ возлю́блєннаѧ, жела́ющымъ ви́дѣти ѿкрове́ннѡ сла́вꙋ лица̀ є҆гѡ̀, согла́снѡ зовꙋ́тъ: сла́ва си́лѣ твое́й, гдⷭ҇и.

Ѡ҆бразꙋ́ющи пома́занїе цр҃ковь и҆збра́нныхъ люде́й твои́хъ, многоцѣ́ннымъ мѵ́ромъ дне́сь помазꙋ́етсѧ, бжⷭ҇твеннꙋю дх҃а бл҃года́ть неви́димѡ прїе́млющи.

Бг҃оро́диченъ:

Неискꙋсобра́чнѡ родила̀ є҆сѝ, ѽ дв҃о! и҆ по ржⷭ҇твѣ̀ ꙗ҆ви́ласѧ є҆сѝ дѣ́вствꙋющи па́ки: тѣ́мже немо́лчными гла́сы, є҆́же ра́дꙋйсѧ, тебѣ̀ влⷣчце вѣ́рою несꙋмнѣ́нною зове́мъ.

И҆́нъ. І҆рмо́съ:

Любвѐ ра́ди, ще́дре, твоегѡ̀ ѻ҆́браза, на крестѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе.

Солнцезра́ченъ ви́дитсѧ, покланѧ́емый ѿ вѣ́рныхъ человѣ́кѡвъ крⷭ҇тъ гдⷭ҇ень, є҆го́же цѣлꙋ́юще, дꙋша́ми просвѣща́емсѧ.

Бг҃ъ гдⷭ҇ь воплоща́емь ꙗ҆ви́сѧ, и҆ возвы́сивсѧ на дре́вѣ: томꙋ̀ покланѧ́ющыѧсѧ просвѣща́етъ, при́снѡ ѿ лю́тыхъ и҆збавлѧ́ѧй.

Ѡ҆чище́нїе на́мъ и҆ ѡ҆ставле́нїе согрѣше́нїй, сло́ве бж҃їй пода́ждь, вѣ́рнѡ покланѧ́ющымсѧ дне́сь, предлежа́щемꙋ крⷭ҇тꙋ̀ твоемꙋ̀ честно́мꙋ.

Бг҃оро́диченъ:

Не и҆стощи́въ ѻ҆ч҃ескихъ нѣ́дръ сло́во, въ твои́хъ нѣ́дрѣхъ, ѻ҆трокови́це, восклони́сѧ ꙗ҆́кѡ млⷣнецъ, хотѧ̀ ѡ҆бнови́ти мѧ̀ тлѝ подлежа́щаго.

И҆́нъ. І҆рмо́съ:

Бжⷭ҇твенное твоѐ разꙋмѣ́въ и҆стоща́нїе прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во спасе́нїе люде́й твои́хъ спастѝ пома̑занныѧ твоѧ̑ прише́лъ є҆сѝ.

Дх҃а бл҃года́ть прїи́мъ, ꙗ҆́коже со́лнце свѣтоза́рное, зе́млю проше́лъ є҆сѝ, корни́лїе, ѿгонѧ́ѧ тмꙋ̀ і҆дѡлонеи́стовства, прехва́льне.

Ꙗ҆́кѡ вели́ка рѣка̀ и҆сходѧ̀, всѐ лицѐ землѝ напаѧ́еши бжⷭ҇твенными ᲂу҆чє́нїи, и҆ пле́велы подавлѧ́ѧ многобо́жїѧ, корни́лїе.

Ме́ртвъ всемꙋ̀ мі́рꙋ бы́въ, ᲂу҆мерщвле́ннагѡ на́съ ра́ди, бжⷭ҇твенное воста́нїе всѣ̑мъ страстьмѝ ᲂу҆ме́ршымъ возвѣсти́лъ є҆сѝ, корни́лїе всебл҃же́нне.

Бг҃оро́диченъ:

Мꙋ́дрости чⷭ҇тое ѻ҆би́телище ѻ҆́ч҃їѧ, преесте́ственнѡ чⷭ҇таѧ дв҃о была̀ є҆сѝ, є҆́юже мы̀ ѕло́бы ны́нѣ хитреца̀ и҆зба́вихомсѧ.

Пѣ́снь є҃. І҆рмо́съ:

Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.

Ты̀ дре́вле на сїна́и ски́нїю нерꙋкотворе́ннꙋю показа́лъ є҆сѝ бг҃ови́дцꙋ мѡѷсе́ю, прописꙋ́ѧ, хрⷭ҇тѐ, цр҃ковь твою̀.

Ты̀, гдⷭ҇и, ски́нїю на землѝ ᲂу҆стро́илъ є҆сѝ: ты̀ чинѡ́мъ нбⷭ҇нымъ, чл҃вѣ́кѡмъ ликостоѧ̑нїѧ сочетава́еши си́лою твое́ю.

Тѧ̀, гдⷭ҇и, и҆сто́чникъ жи́зни вѣ́мы: ты̀, ст҃е, ми́ръ прише́дъ бл҃говѣсти́лъ є҆сѝ хрⷭ҇тѐ, цр҃кви твое́й.

Бг҃оро́диченъ:

Тѧ̀ ѻ҆рꙋ́жїе тве́рдое на врагѝ предлага́емъ: тѧ̀ держа́вꙋ и҆ наде́ждꙋ на́шегѡ спасе́нїѧ, бг҃оневѣ́сто, стѧжа́хомъ.

И҆́нъ. І҆рмо́съ:

Просвѣще́нїе твоѐ, гдⷭ҇и, низпослѝ на́мъ, и҆ ѿ мглы̀ прегрѣше́нїй разрѣшѝ ны̀, бл҃же, тво́й ми́ръ да́рꙋѧй.

На стра̑сти ᲂу҆крѣпѝ на́съ тлетвѡ́рныѧ, тѧ̀ почита́ющихъ, и҆ цѣлꙋ́ющихъ, честны́й крⷭ҇те, ст҃ы́ѧ стрⷭ҇ти, ст҃ѣ́йшее зна́менїе.

Просвѣще́ннїи дне́сь сердцы̀ и҆ дꙋша́ми, до́брыми ви́ды пристꙋ́пимъ, вѣ́рнїи, и҆ свѧще́нномꙋ, и҆ бжⷭ҇твенномꙋ дре́вꙋ крⷭ҇та̀ поклони́мсѧ.

Мє́ррскїѧ ѡ҆слажда́ѧ пре́жде во́ды мѡѷсе́й, зна́менꙋѧ дре́вомъ тебѐ, честны́й крⷭ҇те, и҆́мже сла́дость спаси́тельнꙋю человѣ́кѡмъ и҆ска́палъ є҆сѝ.

Бг҃оро́диченъ:

За ны̀ помоли́сѧ хрⷭ҇тꙋ̀, ѿ твои́хъ чⷭ҇тыхъ крове́й, пречⷭ҇таѧ ѻ҆трокови́це, пло́тїю веще́ственною ѡ҆дѣ́ѧннꙋ, и҆ земны̑ѧ ѡ҆бно́вльшꙋ.

И҆́нъ. І҆рмо́съ:

Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю, хрⷭ҇тѐ, ꙗ҆́кѡ є҆ди́нъ благоꙋтро́бенъ.

Ве́сь возложи́всѧ вседержи́телю, глꙋхи̑мъ кꙋмі́рѡмъ че́сти не прине́слъ є҆сѝ свѧщеннотаи́нниче, ѿ скверноꙋбі́йственныхъ человѣ̑къ понꙋжда́емь.

Высоча́йшаго неви́димаго бг҃а, корни́лїе, въ моли́твахъ призва́лъ є҆сѝ, и҆ хра́мъ низложи́лъ є҆сѝ ме́рзскихъ кꙋмі́рѡвъ, вельмѝ ᲂу҆дивлѧ́емь.

Вседержи́телѧ хранѧ̀ повелѣ̑нїѧ, въ темни́цѣ ᲂу҆́зы (с. 261) претерпѣ́лъ є҆сѝ, и҆ ᲂу҆́зъ ѿрѣша́лъ є҆сѝ ѕловѣ́рїѧ безꙋ̑мныѧ, бг҃омꙋ́дре.

Бг҃оро́диченъ:

Ѡ҆дожди́ ми, пречⷭ҇таѧ, грѣхѡ́въ ѡ҆ставле́нїе, посѣти́ мѧ немощствꙋ́юща, и҆ вла́ема напа́стьми жите́йскими, и҆ страстьмѝ тѣле́сными.

Пѣ́снь ѕ҃. І҆рмо́съ:

Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Добро́ты цр҃ь хрⷭ҇то́съ возжела̀, ны́нѣ и҆збра́нныѧ цр҃кве, и҆ ꙗ҆зы́кѡвъ ма́терь показа̀, ѿ рабо́ты сынотвори́мыхъ дх҃омъ.

Трепе́щꙋтъ вражде́бныхъ де́мѡнѡвъ полкѝ, хрⷭ҇то́вѣ цр҃кви крⷭ҇та̀ ѻ҆́бразомъ знаменꙋ́емѣй, и҆ ѡ҆сѣнѧ́емѣй свѧща́тельнымъ дх҃а ѡ҆сїѧ́нїемъ.

Не песо́къ, но хрⷭ҇та̀ ѡ҆снова́нїе и҆мꙋ́щи, ꙗ҆́же ѿ ꙗ҆зы̑къ цр҃ковь вѣнча́етсѧ добро́тою непристꙋ́пною, и҆ дїади́мою ца́рскою ᲂу҆краша́етсѧ.

Бг҃оро́диченъ:

Ѽ чꙋ́до всѣ́хъ чꙋде́съ новѣ́е! ꙗ҆́кѡ дв҃а во ᲂу҆тро́бѣ всѧ̑ содержа́щаго, неискꙋсомꙋ́жнѡ заче́нши, не тѣсновмѣстѝ.

И҆́нъ. І҆рмо́съ:

Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зъ глꙋбины̀ возведѝ живо́тъ мо́й, многоми́лостиве.

Прободе́нъ на тебѣ̀ въ рє́бра зижди́тель, крⷭ҇те, во́льнѡ повѣ́шенъ, кро́вь и҆ во́дꙋ и҆сточа́етъ, и҆́миже назда́хомсѧ вѣ́рнѡ тѧ̀ цѣлꙋ́ющїи.

Дре́во гдⷭ҇не жизнода́рное, и҆сто́чникъ безсме́ртїѧ, и҆збавле́нїе всегѡ̀ мі́ра: спаси́ ны цѣлꙋ́ющыѧ тѧ̀, ꙗ҆́кѡ храни́телѧ на́шего спаси́тельнаго.

Ѻ҆рꙋ́жїе на́мъ крѣ́пкое показа́лсѧ є҆сѝ, и҆́мже побѣжда́емъ всѧ̑ навѣ́ты проти́вныхъ, бжⷭ҇твенный крⷭ҇те, пра́востїю дꙋше́вною свѧще́ннѡ тѧ̀ цѣлꙋ́ющїи.

Бг҃оро́диченъ:

Ст҃ы́й хра́мъ во ст҃ы́хъ почива́ющагѡ, была̀ є҆сѝ бг҃ороди́тельнице: тѣ́мже ны̀ вѣ́рнѡ пою́щыѧ тѧ̀, ѡ҆свѧща́еши дв҃о мт҃и.

И҆́нъ. І҆рмо́съ:

Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ бл҃гоꙋтро́бенъ.

Чи́стѡ творѧ̀ моли̑твы твоѧ̑, а҆́гг҃ла бж҃їѧ ꙗ҆́вственнѡ ви́дѣлъ є҆сѝ, наꙋча́юща тѧ̀, лꙋ́чшаѧ и҆ спасє́наѧ и҆мꙋ́щымъ.

Просвѣти́всѧ дх҃омъ, свѣтода́тельнаѧ показа́лсѧ є҆сѝ ѕвѣзда̀, свѣтоза́рными сїѧ̑нїи концы̀ просвѣща́ѧ, свѧщеннотаи́нниче корни́лїе.

Позна́въ гдⷭ҇а сла́вы, и҆́же ле́стїю пре́жде помраче́нъ, прозира́еши, бл҃же́нне, моли́твою твое́ю, и҆ вседомо́внѡ прїе́млеши бжⷭ҇твенное ѡ҆чище́нїе.

Бг҃оро́диченъ:

Сла́вы гдⷭ҇и ѿ крове́й твои́хъ дѣ́вственныхъ воплоти́сѧ, є҆ди́нъ ꙗ҆́кѡ вѣ́сть всепѣ́таѧ, спаса́ѧ ны̀ бл҃гостїю.

Конда́къ, гла́съ в҃. Подо́бенъ: Твє́рдыѧ:

Ѡ҆бновлє́нїѧ дх҃а въ сердца́хъ, и҆ просвѣще́нїемъ внꙋ́трєннимъ да́рꙋй, вѣ́рою соверша́ющымъ свѧщє́ннаѧ ѡ҆бновлє́нїѧ хра́ма до́мꙋ твоегѡ̀, є҆мꙋ́же благоволи́лъ є҆сѝ созда́тисѧ, въ твоѐ бжⷭ҇твенное и҆́мѧ, є҆ди́не во ст҃ы́хъ прославлѧ́емый.

І҆́косъ:

Па́мѧть соверша́ѧ ѡ҆бновле́нїй, мꙋдрѣ́йшїй дре́вле соломѡ́нъ бг҃ꙋ, живо́тныхъ безслове́сныхъ приноша́ше всесожжє́нїѧ и҆ жє́ртвы: є҆гда́ же ны́нѣ и҆́стина и҆ бл҃года́ть прїи́де на зе́млю: жє́ртвы а҆́бїе преложѝ, же́ртвовавъ же́ртвꙋ на спасе́нїе на́ше въ себѣ̀, ꙗ҆́кѡ чл҃вѣколю́бецъ. цр҃ковь ѡ҆свѧтѝ и҆ непоколеби́мꙋ сїю̀ покажѝ, є҆ди́нъ во ст҃ы́хъ прославлѧ́емый. (с. 263)

Пѣ́снь з҃. І҆рмо́съ:

Въ пещѝ а҆враа́мстїи ѻ҆́троцы персі́дстѣ й, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Росода́тельный ᲂу҆́бѡ пе́щный пла́мень показа́сѧ дре́вле: ны́нѣ же ѿ є҆ле́а пома́занїе дꙋхо́вное ѡ҆свѧща́етъ зовꙋ́щыѧ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Ꙗ҆́кѡ въ пещѝ бг҃опрїѧ́тнѣй, но́вѣй се́й ски́нїи, всѝ, и҆̀же ѿ і҆и҃лѧ дꙋхо́внагѡ, ѡ҆роша́еми взыва́емъ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Оу҆ѧ́звленїи сладча́йшимъ бжⷭ҇твеннымъ жела́нїемъ, прїиди́те, въ черто́зѣ се́мъ ца́рскомъ счета́емсѧ женихꙋ̀ хрⷭ҇тꙋ̀: бл҃гослове́нъ є҆сѝ въ хра́мѣ, зовꙋ́ще, сла́вы твоеѧ̀, гдⷭ҇и.

Бг҃оро́диченъ:

Вы́шнѧгѡ ѡ҆свѧще́нное бжⷭ҇твенное селе́нїе, ра́дꙋйсѧ. тобо́ю бо даде́сѧ ра́дость, бцⷣе, зовꙋ́щымъ: бл҃гослове́на ты̀ въ жена́хъ є҆сѝ, всенепоро́чнаѧ влⷣчце.

И҆́нъ. І҆рмо́съ:

Ю҆́ношы трѝ въ вавѷлѡ́нѣ, велѣ́нїе мꙋчи́телево на бꙋ́йство прело́жше, посредѣ̀ пла́мене вопїѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Дре́вле въ благослове́нїихъ дѣте́й і҆а́кѡвъ тѧ̀ проначерта̀, честны́й крⷭ҇те: но мы́ тѧ ны́нѣ покланѧ́ющесѧ чти́мъ, просвѣще́нїе почерпа́юще.

Глаго́лы прїѧ́ша коне́цъ ны́нѣ бжⷭ҇твенныхъ прⷪ҇ро́кѡвъ крⷭ҇те свѧще́ннѣйше: всѣ́хъ бо гдⷭ҇и на тебѣ̀ возвы́сисѧ всѧ̑ ѿ тлѝ и҆збавлѧ́ѧ.

Оу҆сты́ тѧ и҆ се́рдцемъ всечестны́й крⷭ҇те, ны́нѣ ѡ҆б̾е́млюще, ѡ҆свѧще́нїе, здра́вїе и҆ спасе́нїе всегда̀ почерпа́емъ дꙋши́ же и҆ тѣлесѐ.

Бг҃оро́диченъ:

Дв҃о бл҃гослове́ннаѧ, моли́сѧ ѡ҆ на́съ молѧ́щихсѧ тебѣ̀ (с. 264) на тѧ́ бо надѣ́емсѧ всѝ, и҆ тебѣ̀ вопїе́мъ: влⷣчце, не пре́зри па́ствы твоеѧ̀.

И҆́нъ. І҆рмо́съ:

Превозноси́мый ѻ҆тцє́въ гдⷭ҇ь пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.

Ты̀ ꙗ҆зы́кѡвъ нача́токъ бы́лъ є҆сѝ, корни́лїе: пе́рвый бо креще́нїе прїѧ́лъ є҆сѝ ст҃о́е, и҆ дх҃а бл҃года́ть, пре́жде бг҃оглаго́ливїи.

Велича̑йшаѧ чꙋдеса̀ соверша́ѧ бжⷭ҇твенною бл҃года́тїю, къ вѣ́рѣ ᲂу҆лови́лъ є҆сѝ дре́вле ѕломꙋ́дрствꙋющыѧ, наꙋча́ѧ воспѣва́ти: бж҃е, бл҃гослове́нъ є҆сѝ.

Въ землѝ кры́емь, и҆ кꙋпино́ю покрове́нъ, бжⷭ҇твенными сказа́ньми, мꙋ́дре, ꙗ҆ви́лсѧ є҆сѝ чꙋде́съ точѧ̀ бл҃года́ть, и҆ недꙋ́ги ѿгонѧ́ѧ.

Цѣвни́це сладковоспѣ́вшаѧ ᲂу҆чє́нїѧ спаси́тєльнаѧ, и҆ всѣ́хъ, корни́лїе, дꙋ́шы ᲂу҆слажда́ющаѧ, показа́лсѧ є҆сѝ воспѣва́ѧ: бж҃е, бл҃гослове́нъ є҆сѝ.

Трⷪ҇ченъ:

Всѝ трїѷпоста́снꙋю є҆ди́ницꙋ да просла́вимъ: ѻ҆ц҃а̀ пребезнача́льнаго, сн҃а є҆диносꙋ́щнаго, и҆ дх҃а ст҃а́го, поснопою́ще: бж҃е, бл҃гослове́нъ є҆сѝ.

Бг҃оро́диченъ:

Ꙗ҆ви́ласѧ є҆сѝ, человѣ́ческое смѣше́нїе ѡ҆божи́вши бжⷭ҇твеннымъ твои́мъ ржⷭ҇тво́мъ, дв҃о всенепоро́чнаѧ: тѣ́мъ тѧ̀ по до́лгꙋ вѣ́рнїи славосло́вимъ.

Пѣ́снь и҃. І҆рмо́съ:

Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.

Дне́сь ри́зою ᲂу҆́мною, свы́ше и҆стка́нною ѿ бжⷭ҇твенныѧ бл҃года́ти, цр҃ковь твоѧ̀, гдⷭ҇и, ꙗ҆́коже невѣ́ста ᲂу҆краси́сѧ, и҆ своѧ̑ созыва́етъ къ весе́лїю лю́ди, во є҆́же пѣ́ти: благослови́те, всѧ̑ дѣла̀ гдⷭ҇нѧ, гдⷭ҇а.

Дне́сь вторы́й а҆да́мъ хрⷭ҇то́съ показа̀ ра́й мы́сленный, но́вꙋю сїю̀ ски́нїю, приносѧ́щꙋю вмѣ́стѡ дре́ва зна́нїѧ, живоно́сное крⷭ҇та̀ ѻ҆рꙋ́жїе, пою́щымъ: благослови́те, всѧ̑ дѣла̀ гдⷭ҇нѧ, гдⷭ҇а.

Трⷪ҇ченъ:

Ѻ҆ц҃а̀ безнача́льнаго тѧ̀, сн҃а, и҆ дх҃а ст҃а́го, є҆ди́но бжⷭ҇тво̀, соверше́нно, безнача́льно, несѣко́мо, є҆диносꙋ́щно, несли́тно, во ѵ҆поста́сѣхъ тре́хъ чтꙋ́ще пое́мъ: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ:

Ты̀ є҆ди́на во всѣ́хъ ро́дѣхъ, дв҃о пречⷭ҇таѧ, мт҃и бж҃їѧ показа́ласѧ є҆сѝ: ты̀ бжⷭ҇тва̀ была̀ є҆сѝ ѻ҆бита́лище, всенепоро́чнаѧ, неѡпали́вшисѧ ѻ҆гне́мъ непристꙋ́пнагѡ свѣ́та. тѣ́мъ вси́ тѧ бл҃гослови́мъ, марі́е бг҃оневѣ́сто.

И҆́нъ. І҆рмо́съ:

И҆зба́вителю всѣ́хъ всеси́льне, посредѣ̀ пла́мене благоче́ствовавшыѧ, снизше́дъ, ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ благослови́те, по́йте гдⷭ҇а.

Спаси́тельномꙋ ѻ҆рꙋ́жїю, и҆ нерасте́рзномꙋ, вѣ́рныхъ гото́вой по́мощи, крѣ́пкомꙋ защище́нїе, крⷭ҇тꙋ̀ гдⷭ҇ню ны́нѣ поклони́мсѧ, предъ всѣ́ми предлежа́щꙋ.

Высо́цѣ на дре́вѣ возвѣ́си впрекѝ ѕмі́ѧ, ꙗ҆́кѡ писа́сѧ, мѡѷсе́й прописꙋ́ѧ тѧ̀ всечестно́е дре́во, и҆́мже пре́лести мы́сленныхъ ѕмїє́въ и҆збавлѧ́емсѧ.

Свѣще́нїе дꙋ́шъ на́шихъ є҆сѝ, свѣтода́вче крⷭ҇те всече́стне: тѧ́ бо ѡ҆б̾е́млюще, нача̑ла тмы̑ же и҆ вла̑сти ѿража́емъ бжⷭ҇твенною твое́ю си́лою.

Бг҃оро́диченъ:

Чтⷭ҇ꙋю и҆ дв҃ꙋ почти́мъ, безнача́льное сло́во, и҆ несозда́нное, преесте́ственнѡ ро́ждшꙋю въ на́ше спасе́нїе, пѣ́сненнѡ вопїю́ще: бл҃гослови́мъ дв҃о ржⷭ҇тво̀ твоѐ.

И҆́нъ. І҆рмо́съ:

Тебѣ̀, вседѣ́телю, въ пещѝ ѻ҆́троцы всемі́рный ли́къ спле́тше, поѧ́хꙋ: дѣла̀ всѧ́каѧ гдⷭ҇а по́йте, и҆ превозноси́те во всѧ̑ вѣ́ки.

Є҆ди́наго ѿ дꙋшѝ на землѝ ꙗ҆́вльшагосѧ бг҃а взыска́лъ є҆сѝ, ᲂу҆ма̀ пра́востїю: тѣ́мъ бы́лъ є҆сѝ нача́токъ бг҃оно́сне, ꙗ҆зы́кѡвъ честны́й, и҆ дх҃а прїѧ́телище.

Оу҆́глїемъ твои́хъ, бл҃же́нне, ѻ҆́гненныхъ слове́съ, вещество̀ поже́глъ є҆сѝ сꙋ́етства: тѣ́мъ къ свѣ́тꙋ невече́рнемꙋ преше́лъ є҆сѝ, всѧ̑ ѡ҆зарѧ́ѧ любо́вїю тѧ̀ поѧ́щыѧ.

Жре́бїй, и҆ ча́сть, и҆ по́мощь, и҆ и҆зба́витель, крѣ́пость же и҆ хвала̀, и҆ свѣ́тъ тебѣ̀ бы́сть сло́во, всѧ̑ призыва́ющее и҆зъ несꙋ́щагѡ, и҆ рꙋковожде́нїе, корни́лїе бг҃омꙋ́дре.

Трⷪ҇ченъ:

Ст҃ы́й ѻ҆́ч҃е, ст҃ы́й сло́ве, всест҃ы́й дш҃е несозда́нне, трⷪ҇це нераздѣ́льнаѧ, спасѝ любо́вїю пою́щыѧ твою̀ держа́вꙋ, и҆ црⷭ҇тво, и҆ вели́чество.

Бг҃оро́диченъ.

И҆зле́й на ны̀ твоѧ̑ ми́лѡсти ѡ҆бы́чнѡ, ѻ҆трокови́це, и҆ и҆спросѝ на́мъ, чⷭ҇таѧ, проще́нїе всѣ́хъ прегрѣше́нїй, въ вѣ́дѣнїи же и҆ невѣ́дѣнїи, и҆ ѿ невнима́нїѧ на́мъ прилꙋ́чшихсѧ.

Пѣ́снь ѳ҃. І҆рмо́съ:

Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.

Прїиди́те чи́стымъ се́рдцемъ, и҆ тре́звенными ᲂу҆́мными ѻ҆чесы̀, цр҃е́вы дще́ре, цр҃кве красотꙋ̀, па́че зла́та свѣтѧ́щꙋюсѧ зрѧ́ще, велича́емъ.

Ра́дꙋйсѧ, и҆ весели́сѧ, невѣ́сто цр҃ѧ̀ вели́кагѡ, зрѧ́щи свѣ́тлѡ твоегѡ̀ жениха̀ красотꙋ̀, съ людьмѝ твои́ми зовꙋ́щи: тѧ̀ жизнода́вче, велича́емъ.

Є҆́же съ высоты̀ и҆зѧ́щество, сп҃се, цр҃кви твое́й пода́ждь: и҆но́гѡ бо не вѣ́сть ра́звѣ тебє̀, за ню́же твою̀ дре́вле дꙋ́шꙋ поло́жшаго, въ позна́нїи велича́ющꙋю.

Бг҃оро́диченъ:

Ра́дꙋйсѧ, ѡ҆бра́дованнаѧ невѣ́сто цр҃ѧ̀ вели́кагѡ, ꙗ҆́кѡ тобо́ю ѿ клѧ́твы є҆́ѵины всѝ, чⷭ҇таѧ, и҆зба́вихомсѧ, и҆ жи́знь ѡ҆брѣто́хомъ въ ржⷭ҇твѣ̀ твое́мъ, неневѣ́стнаѧ.

И҆́нъ. І҆рмо́съ:

Ржⷭ҇тво̀ твоѐ нетлѣ́нно ꙗ҆ви́сѧ: бг҃ъ и҆зъ бокꙋ̀ твоє́ю про́йде, ꙗ҆́кѡ плотоно́сецъ ꙗ҆ви́сѧ на землѝ, и҆ съ человѣ́ки поживѐ: тѧ̀, бцⷣе, тѣ́мъ всѝ велича́емъ.

Хрⷭ҇то́съ на тебѣ̀ повѣ́шенъ, мі́ръ возвы́си па́дшїй поги́бели во глꙋбинꙋ̀, и҆́стиннѡ крⷭ҇те гдⷭ҇ень: тѣ́мже тебѣ̀ любо́вїю ны́нѣ покланѧ́емсѧ, и҆ чти́мъ и҆ сла́вимъ.

Дꙋ́шы да ѡ҆чи́стимъ и҆ сердца̀, до́брыми є҆ди́нѣми дѣѧ̑нїи, и҆ предлежа́щее посредѣ̀, спаси́тельное зрѧ́ще дре́во крⷭ҇та̀, вѣ́рою и҆ любо́вїю бг҃омꙋ́дреннѡ поклони́мсѧ.

Ꙗ҆́кѡ со́лнце вели́кое, блиста́ньми твои́ми ѡ҆зарѧ́еши сꙋ́щыѧ во тмѣ̀, и҆ де́мѡны попалѧ́еши, краснѣ́йшїй крⷭ҇те. тѣ́мже вопїе́мъ: просвѣтѝ всѧ̑ вѣ́рою покланѧ́ющыѧсѧ тебѣ̀.

Бг҃оро́диченъ:

Свѣ́томъ мѧ̀ ѡ҆зарѝ бжⷭ҇твеннымъ, свѣ́та прїѧ́телище, дв҃о, страсте́й мои́хъ тмꙋ̀, и҆ сласте́й глꙋбоча́йшꙋю и҆́стиннѡ но́щь, бг҃ороди́тельнице всест҃а́ѧ, ѿгонѧ́щи.

И҆́нъ. І҆рмо́съ:

И҆са́їе, ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆блажа́емъ.

Ко свѧще́нномꙋ торжествꙋ̀ цр҃ковь всѧ̑ собира́етъ въ па́мѧть твою̀ честнꙋ́ю, проповѣ́дниче хрⷭ҇то́въ: ты́ бо равностоѧ́тель ст҃ы́хъ ꙗ҆ви́лсѧ є҆сѝ ᲂу҆ченикѡ́въ, дх҃а ст҃а́гѡ, ꙗ҆́кѡ ѻ҆нѝ, наслѣ́довавъ.

Оу҆краси́лсѧ є҆сѝ догма́ты благоче́стїѧ, ꙗ҆́кѡ свѧщеннодѣ́латель, ᲂу҆подо́билсѧ є҆сѝ бж҃їимъ бжⷭ҇твєннымъ слꙋжи́телємъ, то́чиши же враче́вствъ всегда̀, бл҃же́нне: рѣ́ки, ѿгонѧ́ѧ недꙋ́ги человѣ́кѡвъ, корни́лїе свѧще́ннѣйшїй.

Оу҆краси́всѧ ри́зою спаси́тельною, ю҆́же хрⷭ҇то́съ и҆стка̀ воплоти́всѧ, ны́нѣ прера́достнѡ вы̑шнѧѧ црⷭ҇тва ѡ҆бхо́диши, зрѧ̀ чи́стѡ добро́тꙋ недомы́сленнꙋю женихо́вꙋ, достосла́вне.

Честна́ѧ ра́ка твоѧ̀, ꙗ҆́кѡ и҆сто́чникъ то́читъ вѣ̑рнымъ врачєвства̀ ѻ҆би́льнѡ, и҆ ѿгонѧ́етъ, корни́лїе, дꙋ́хи лꙋка̑выѧ, и҆ просвѣща́етъ всѣ́хъ ѻ҆чеса̀, вѣ́рою благохва́лѧщихъ тѧ̀.

Бг҃оро́диченъ:

Просвѣще́нїе мѝ и҆спросѝ, ро́ждшаѧ свѣ́тъ, ѿ свѣ́та возсїѧ́вшїй, ѡ҆мраче́нїе дале́че ѿ менє̀ ѿгонѧ́щи и҆ сласте́й и҆ и҆скꙋше́нїй, пречⷭ҇таѧ влⷣчце, предста́тельнице непосты́днаѧ.

Свѣти́ленъ ѡ҆бновле́нїѧ. Подо́бенъ: Дх҃омъ во ст҃и́лищи:

Ю҆́же пречⷭ҇тою кро́вїю и҆скꙋпи́лъ є҆сѝ, сло́ве, всечꙋ́днꙋю и҆ всечестнꙋ́ю, и҆ ст҃ꙋ́ю цр҃ковь ѡ҆бновѝ дх҃омъ, бл҃же, и҆ ᲂу҆добрѝ зарѧ́ми бжⷭ҇твеннѣйшими, сла́вою прославлѧ́ѧ, досто́йнѡ твоегѡ̀ хра́ма ѡ҆бновле́нїе соверша́ющихъ.

Сла́ва, и҆ ны́нѣ, предпра́зднства. Подо́бенъ то́йже.

Свѣтода́тельными сїѧ́ньми крⷭ҇тъ гдⷭ҇ень въ тогѡ̀ вознесе́нїе, всѧ̑ любо́вїю бжⷭ҇твенною предлежа̀ призыва́етъ: прїиди́те сего̀ всѝ ра́достїю, и҆ любо́вїю, и҆ стра́хомъ цѣлꙋ́емъ вѣ́рнѡ, и҆ просла́вимъ є҆ди́наго творца̀, и҆ влⷣкꙋ.

На хвали́техъ стїхи̑ры ѡ҆бновле́нїѧ на ѕ҃, гла́съ д҃:

Подо́бенъ: Да́лъ є҆сѝ зна́менїе:

Дне́сь бжⷭ҇твенный, ꙳ и҆ свѧще́нный, и҆ честны́й хрⷭ҇то́ва воскрⷭ҇нїѧ, ꙳ свѣ́тлѡ ѡ҆бновлѧ́етсѧ свѣтоно́сный до́мъ: ꙳ и҆ дае́тъ мі́рꙋ гро́бъ, ꙳ бжⷭ҇твенный живо́тъ: ꙳ и҆ врꙋча́етъ и҆сто́чникъ безсме́ртный, ꙳ то́читъ стрꙋи̑ благода́ти чꙋде́съ, ѡ҆би́лꙋетъ во́ды, ꙳ и҆ да́рꙋетъ и҆сцѣлє́нїѧ, ꙳ того̀ вѣ́рою пою́щымъ.

Возсїѧ̀ свы́ше свѣтови́днаѧ зарѧ̀ сїѧ́ющи, ꙳ и҆ всѧ̑ просвѣща́ющи: ꙳ вѣ́рнѡ ᲂу҆́бѡ почти́мъ хрⷭ҇та̀ содѣ́телѧ ꙳ воскрⷭ҇нїе всѝ, ꙳ и҆ ѡ҆бновле́нїй свѧще́нныхъ живоно́сное ꙳ (с. 269) бжⷭ҇твенное торжество̀ ꙳ въ пѣ́снехъ возпра́зднꙋимъ, и҆ во ѱалмѣ́хъ воскли́кнемъ, ꙳ ꙗ҆́кѡ да ми́лостива ѡ҆брѧ́щемъ ꙳ сп҃са и҆ гдⷭ҇а.

Посредѣ̀ землѝ возноси́ма, ꙳ пред̾ꙋви́дѣти жела́юще, ꙳ крⷭ҇та̀ ски́птръ ст҃ы́й, ꙳ дꙋ́шы пред̾ѡчи́стимъ, и҆ ѡ҆зари́мъ ра́зꙋмы, ꙳ свѣ́томъ просвѣща́ющесѧ: ꙳ и҆ си́лою бжⷭ҇твенною ѡ҆блиста́еми, хрⷭ҇та̀ воспои́мъ, ꙳ дре́вомъ честны́мъ є҆гѡ̀ свѧще́нїе подаю́щаго, ꙳ вѣ́рою взыва́ющымъ, ꙳ и҆ те́плѣ того̀ пою́щымъ.

И҆́ны стїхи̑ры, гла́съ а҃. Самогла́сны. І҆ѡа́нна мона́ха:

Ѡ҆бновлѧ́йсѧ, ѡ҆бновлѧ́йсѧ, но́вый і҆ерⷭ҇ли́ме: прїи́де бо тво́й свѣ́тъ, и҆ сла́ва гдⷭ҇нѧ на тебѣ̀ возсїѧ̀. се́й до́мъ ѻ҆ц҃ъ созда̀: се́й до́мъ сн҃ъ ᲂу҆твердѝ: се́й до́мъ дх҃ъ ст҃ы́й ѡ҆бновѝ, просвѣща́ѧй, и҆ ᲂу҆твержда́ѧй, и҆ ѡ҆сщ҃а́ѧй дꙋ́шы на́шѧ.

А҆нато́лїа:

Дре́вле ᲂу҆́бѡ ѡ҆бновлѧ́ѧ хра́мъ соломѡ́нъ, безслове́сныхъ живо́тныхъ жє́ртвы, и҆ всесожжє́нїѧ принесѐ, гдⷭ҇и. є҆гда́ же благоволи́лъ є҆сѝ, сп҃се, ѻ҆бразѡ́мъ ᲂу҆́бѡ ᲂу҆праздни́тисѧ, позна́тисѧ же и҆́стинѣ, безкрѡ́вныѧ жє́ртвы ро́ди человѣ́честїи прино́сѧтъ сла́вѣ твое́й, всѣ́ми бо влады́чествꙋѧй всѧ́чєскаѧ ѡ҆свѧща́еши ст҃ы́мъ дх҃омъ.

Гла́съ д҃. І҆ѡа́нна мона́ха:

Ѡ҆бновлѧ́етсѧ дне́сь, ꙗ҆́же ѿ ꙗ҆зы̑къ, цр҃ковь честно́ю и҆ живото́чною кро́вїю, ѿ пречи́стыхъ и҆ нетлѣ́нныхъ ре́бръ вопло́щшагѡсѧ ѿ ст҃ы́ѧ дв҃ы, хрⷭ҇та̀ бг҃а на́шегѡ. тѣ́мже собра́вшесѧ вѣ́рныхъ ли́цы, просла́вимъ ѻ҆ц҃а̀, и҆ сн҃а, и҆ ст҃а́гѡ дх҃а, є҆ди́но бж҃ество̀, содержа́щее всѧ́чєскаѧ.

Сла́ва, гла́съ г҃. Самогла́сенъ:

Къ себѣ̀ восходѝ, человѣ́че, бꙋ́ди но́въ вмѣ́стѡ ве́тхагѡ: и҆ дꙋшѝ пра́зднꙋй ѡ҆бновлє́нїѧ до́ндеже вре́мѧ ꙾ житїѧ̀: да ѡ҆бновлѧ́етсѧ тебѣ̀ всѧ́кагѡ ꙾ ¹⁵ житїѧ̀ пꙋ́ть. дрє́внѧѧ бо преидо́ша, сѐ бы́ша всѧ̑ нова̑. сїѐ пра́здникꙋ плодопринесѝ, до́брымъ и҆змѣне́нїемъ и҆змѣнѧ́емь: си́це ѡ҆бновлѧ́етсѧ человѣ́къ, та́кѡ чти́тсѧ ѡ҆бновле́нїй де́нь.

И҆ ны́нѣ, предпра́зднства, гла́съ то́йже. І҆ѡа́нна мона́ха:

Хрⷭ҇тѐ бж҃е на́шъ, во́льное твоѐ распѧ́тїе, во ѻ҆́бщее воскресе́нїе ро́да человѣ́ческагѡ воспрїе́мый, и҆ тро́стїю крⷭ҇та̀, ѡ҆багре́нїемъ червле́нымъ твоѧ̑ пє́рсты ѡ҆кровави́вый, ѡ҆ста́витєльнаѧ на́мъ ца́рски подписа́ти чл҃вѣколю́бствовавъ, не пре́зри на́съ бѣ́дствꙋющихъ, и҆ па́ки є҆́же ѿ тебє̀ разстоѧ́нїѧ. но ᲂу҆ще́дри, є҆ди́не долготерпѣли́ве, сꙋ́щыѧ во ѡ҆бстоѧ́нїи лю́ди твоѧ̑, и҆ воста́ни, поборѝ борю́щыѧ ны̀, ꙗ҆́кѡ всеси́ленъ.

Славосло́вїе вели́кое, и҆ ѿпꙋ́стъ.

На лїтꙋргі́и: Бл҃жє́нна ѿ канѡ́на ѡ҆бновле́нїѧ, пѣ́снь г҃-ѧ, и҆ ѕ҃-ѧ. Прокі́менъ, гла́съ д҃: До́мꙋ твоемꙋ̀ подоба́етъ ст҃ы́нѧ, гдⷭ҇и, въ долготꙋ̀ дні́й. Сті́хъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ. А҆пⷭ҇лъ во є҆вре́ємъ, зача́ло т҃з. А҆ллилꙋ́їа, гла́съ в҃: Ѡ҆снова̑нїѧ є҆гѡ̀ на гора́хъ ст҃ы́хъ. Сті́хъ: Пресла̑внаѧ глаго́лашасѧ ѡ҆ тебѣ̀ гра́де бж҃їй. Є҆ѵⷢ҇лїе матѳе́а, зача́ло ѯ҃з. Прича́стенъ: Гдⷭ҇и, возлюби́хъ благолѣ́пїе до́мꙋ твоегѡ̀, и҆ мѣ́сто селе́нїѧ сла́вы твоеѧ̀. А҆ллилꙋ́їа, три́жды.

Вѣ́домо же бꙋ́ди и҆ сїѐ:

[Зрѝ] А҆́ще прилꙋчи́тсѧ воздви́женїе честна́гѡ креста̀ въ недѣ́лю. Въ сꙋббѡ́тꙋ же предъ воздви́женїемъ, на лїтꙋргі́и: Прокі́менъ, и҆ а҆ллилꙋ́їа, ѡ҆бновле́нїѧ є҆ди́нъ, а҆ сꙋббѡ́ты прокі́менъ предъ Воздви́женїемъ ѡ҆ставлѧ́етсѧ: а҆пⷭ҇лъ же, и҆ є҆ѵⷢ҇лїе чте́тсѧ пре́жде ѡ҆бновле́нїѧ, и҆ пото́мъ сꙋббѡ́ты предъ воздви́женїемъ. Прича́стенъ ѡ҆бновле́нїѧ. Рѧдовы́й же а҆пⷭ҇лъ и҆ є҆ѵⷢ҇лїе, вычита́емъ напредѝ, а҆ недѣ́ли предъ воздви́женїемъ, чте́тсѧ а҆пⷭ҇лъ и҆ є҆ѵⷢ҇лїе въ мимоше́дшꙋю недѣ́лю.

Подоба́етъ вѣ́дати:

🕅 Ꙗ҆́кѡ а҆́ще слꙋчи́тсѧ ѡ҆бновле́нїѧ, въ г҃і-й де́нь, въ недѣ́лю, ѡ҆ставлѧ́етсѧ слꙋ́жба ст҃а́гѡ корни́лїа, и҆ пое́тсѧ, є҆гда̀ разсꙋ́дитъ є҆кклисїа́рхъ: пое́тсѧ же воскрⷭ҇наѧ слꙋ́жба со ѡ҆бновле́нїемъ, и҆ съ предпра́зднствомъ честна́гѡ крⷭ҇та̀.

На ма́лѣй вече́рни: стїхи̑ры воскрⷭ҇ны и҆ бцⷣы, по ѻ҆бы́чаю. Тропа́рь воскрⷭ҇нъ. Сла́ва, и҆ ны́нѣ, бг҃оро́диченъ.

На вели́цѣй вече́рни: Блаже́нъ мꙋ́жъ: каѳі́сма всѧ̀. На Гдⷭ҇и, воззва́хъ: стїхи̑ры воскрⷭ҇ны г҃: и҆ ꙾восто́ченъ꙾ ¹⁶ є҆ди́нъ: и҆ ѡ҆бновле́нїѧ г҃: и҆ крⷭ҇та̀ г҃, гла́съ є҃. Подо́бенъ: Ра́дꙋйсѧ: пи́саны на стїхо́внѣ. Сла́ва, ѡ҆бновле́нїѧ: И҆ ны́нѣ, бг҃оро́диченъ а҃-й гла́са. Вхо́дъ. И҆ чтє́нїѧ г҃, ѡ҆бновле́нїѧ. На лїті́и стїхи́ра хра́ма: и҆ ѡ҆бновле́нїѧ хвали̑тныѧ, гла́съ а҃: Ѡ҆бновлѧ́йсѧ, ѡ҆бновлѧ́йсѧ: и҆ гла́са д҃-гѡ: Ѡ҆бновлѧ́етсѧ дне́сь: гла́съ то́йже: Посредѣ̀ землѝ возноси́ма:

Сла́ва, гла́съ є҃:

И҆́же въ нѣ́дрѣхъ ѻ҆ч҃ескихъ препочива́ѧй, сло́ве, дх҃омъ твои́мъ ст҃ы́мъ ѡ҆бновѝ хра́мъ, и҆́же во и҆́мѧ твоѐ воздви́женный.

И҆ ны́нѣ, гла́съ ѕ҃: Дне́сь дре́во ꙗ҆ви́сѧ: На стїхо́внѣ стїхи̑ры воскрⷭ҇ны гла́са. Сла́ва, гла́съ в҃: Ѡ҆бновле́нїе соверша́юще: И҆ ны́нѣ, крⷭ҇та̀, гла́съ то́йже: Бжⷭ҇твенное сокро́вище: На благослове́нїи хлѣ́бѡвъ: тропа́рь, Бцⷣе дв҃о: два́жды: и҆ ѡ҆бновле́нїѧ, є҆ди́ножды. и҆ чте́нїе въ посла́нїихъ а҆пⷭ҇льскихъ.

На ᲂу҆́трени: На Бг҃ъ гдⷭ҇ь: тропа́рь воскрⷭ҇нъ, два́жды: Сла́ва, ѡ҆бновле́нїѧ: И҆ ны́нѣ, крⷭ҇та̀. По каѳі́смахъ, сѣда́льны воскрⷭ҇ны. Сла́ва, и҆ ны́нѣ, ѡ҆бновле́нїѧ: Бг҃оро́дичны же ѡ҆ставлѧ́ютсѧ. И҆ чте́нїе во є҆ѵⷢ҇лїи, недѣ́лѧ предъ воздви́женїемъ. По непоро́чнахъ, ѵ҆пакоѝ. И҆ чте́мъ во є҆ѵⷢ҇лїи недѣ́лю рѧдовꙋ́ю. Степє́нны, и҆ прокі́менъ гла́са: Всѧ́кое дыха́нїе: Є҆ѵⷢ҇лїе воскрⷭ҇ное. Воскрⷭ҇нїе хрⷭ҇то́во: и҆ ѱало́мъ н҃. Стїхи́ра воскрⷭ҇на. Канѡ́нъ воскрⷭ҇нъ со і҆рмосо́мъ на д҃: и҆ бцⷣы на в҃: и҆ ѡ҆бновле́нїѧ на д҃: и҆ крⷭ҇та̀ на д҃. Катава́сїа: Крⷭ҇тъ начерта́въ: По г҃-й пѣ́сни, конда́къ и҆ і҆́косъ ѡ҆бновле́нїѧ, и҆ сѣда́ленъ: Сла́ва, и҆ ны́нѣ, крⷭ҇та̀, и҆ чте́нїе. По ѕ҃-й пѣ́сни конда́къ воскрⷭ҇нъ, и҆ і҆́косъ. И҆ про́логъ. На ѳ҃-й пѣ́сни пое́мъ Честнѣ́йшꙋю: Свѣти́ленъ воскрⷭ҇нъ: Сла́ва, ѡ҆бновле́нїѧ: И҆ ны́нѣ, крⷭ҇та̀. На хвали́техъ стїхи̑ры воскрⷭ҇ны д҃: и҆ ѡ҆бновле́нїѧ, гла́съ д҃. Подо́бенъ: Да́лъ є҆сѝ зна́менїе: двѣ̀, и҆ самогла́сны двѣ̀, гла́съ г҃: Къ себѣ̀ восходѝ, чл҃вѣ́че: Дрꙋгі́й: Хрⷭ҇тѐ бж҃е на́шъ: Пе́рвый припѣ́въ: До́мꙋ твоемꙋ̀ подоба́етъ ст҃ы́нѧ, гдⷭ҇и, въ долготꙋ̀ дні́й. Дрꙋгі́й: Гдⷭ҇ь воцр҃и́сѧ, въ лѣ́потꙋ ѻ҆блече́сѧ. Сла́ва, стїхи́ра є҆ѵⷢ҇льскаѧ. И҆ ны́нѣ, Пребл҃гослове́нна є҆сѝ, бцⷣе дв҃о: Славосло́вїе вели́кое. Тропа́рь воскрⷭ҇нъ, и҆ є҆ктєнїѝ, и҆ ѿпꙋ́стъ, и҆ ѡ҆глаше́нїе, и҆ ѻ҆бы́чное и҆схожде́нїе въ притво́ръ, и҆ ча́съ а҃-й. На часѣ́хъ тропа́рь воскрⷭ҇нъ: Сла́ва, ѡ҆бновле́нїѧ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ воскрⷭ҇нъ, и҆ ѡ҆бновле́нїѧ, глаго́лемъ премѣнѧ́юще.

На лїтꙋргі́и: Бл҃жє́нна воскрⷭ҇на гла́са на ѕ҃ и҆ ѡ҆бновле́нїѧ пѣ́снь г҃-ѧ, на д҃. По вхо́дѣ тропа́рь воскрⷭ҇нъ, и҆ ѡ҆бновле́нїѧ, и҆ крⷭ҇та̀. Конда́къ воскрⷭ҇нъ. Сла́ва, и҆ ны́нѣ, ѡ҆бновле́нїѧ. Прокі́менъ, а҆пⷭ҇лъ, а҆ллилꙋ́їа, и҆ є҆ѵⷢ҇лїе, пре́жде недѣ́ли предъ воздви́женїемъ, и҆ рѧ́дъ подъ зача́ло, та́же ѡ҆бновле́нїѧ. Прича́стенъ: Хвали́те гдⷭ҇а съ нб҃съ: И҆ ѡ҆бновле́нїѧ.