Мѣ́сѧца тогѡ́же въ з҃і-й де́нь. Ст҃ы́ѧ мч҃ницы софі́и, и҆ тре́хъ є҆ѧ̀ дще́рей: вѣ́ры, наде́жды и҆ любвѐ.

На Гдⷭ҇и, воззва́хъ: стїхи̑ры пра́здника, г҃: гла́съ а҃: Подо́бенъ: Нбⷭ҇ныхъ чинѡ́въ:

Крⷭ҇тъ возно́ситсѧ, ꙳ и҆ де́мѡни прогонѧ́ютсѧ, ꙳ разбо́йникъ є҆де́ма ᲂу҆́бѡ врата̀ ѿверза́етъ, ꙳ сме́рть ᲂу҆мерщвлѧ́етсѧ, и҆ ны́нѣ пꙋста̀ ꙗ҆ви́сѧ, хрⷭ҇то́съ велича́етсѧ. ꙳ тѣ́мъ весели́тесѧ всѝ земноро́днїи, ꙳ клѧ́тва разрꙋши́сѧ.

Прїиди́те бг҃олюби́вїи всѝ,꙳ крⷭ҇тъ честны́й возноси́мый ви́дѧще, ꙳ возвели́чимъ кꙋ́пнѡ, и҆ сла́вꙋ дади́мъ ꙳ є҆ди́номꙋ и҆зба́вителю и҆ бг҃ꙋ, взыва́юще: ꙳ распны́йсѧ на дре́вѣ крⷭ҇тнѣмъ, ꙳ не пре́зри молѧ́щихсѧ на́съ.

Го́ресть дре́вле ѡ҆слажда́ѧ мѡѷсе́й, ꙳ и҆зба́ви і҆и҃лѧ, ꙳ ѻ҆́бразомъ крⷭ҇тъ прописꙋ́ѧ: ꙳ мы́ же сего̀ всѝ бжⷭ҇твеннѡ вѣ́рнїи, ꙳ та́инственнѡ воѡбража́юще въ сердца́хъ на́шихъ всегда̀, ꙳ спаса́емсѧ держа́вою є҆гѡ̀.

И҆́ны стїхи̑ры мч҃ницъ, гла́съ д҃. Подо́бенъ: Да́лъ є҆сѝ зна́менїе:

Дѣ̑вы ѻ҆трокови̑цы, ꙳ є҆стества̀ зако́номъ свѧзꙋ́емы, ꙳ и҆ ꙗ҆́вѣ ᲂу҆крѣплѧ́емы любо́вїю созда́телѧ, ꙳ ᲂу҆́зꙋ пре́лести ꙳ разрꙋши́ша вѣ́рою, ꙳ и҆ некрѣ́пкаго врага̀ ꙳ вмꙋжи́вшесѧ нога́ми сотро́ша, ꙳ и҆ побѣ̑ды вѣнце́мъ свѣтови́днѡ ᲂу҆краси́шасѧ, ꙳ и҆ въ невѣ́стникъ всели́шасѧ ᲂу҆́мный ра́дꙋющесѧ.

Вѣ́ра всехва́льнаѧ, ꙳ и҆ любо́вь сла́внаѧ, ꙳ и҆ наде́жда бг҃омꙋ́драѧ, ꙳ добродѣ́телей тезоимени̑тыѧ ꙳ свѣтлѣ́йшихъ показа́вшесѧ, ꙳ страда́льчески лꙋка́ваго низложи́ша, ꙳ прама́терь кова́рнѡ прельсти́вшаго, ꙳ раѧ̀ селе́нїе ѡ҆божи́вшесѧ прїѧ́ша, ꙳ ѡ҆ всѣ́хъ молѧ́щесѧ.

Ѡ҆ ѻ҆гнѝ неради́ша, ꙳ и҆ ѡ҆ многоѻбра́зныхъ мꙋ́кахъ, ꙳ и҆ ѡ҆ сме́рти всечестны̑ѧ: ꙳ жениха́ бо добро́тꙋ краснѣ́йшаго вѣ́рою и҆́щꙋще, ꙳ разли́чными ра́нами ᲂу҆краси́вшесѧ, ꙳ томꙋ̀ счета́шасѧ софі́ины ѻ҆́трасли, ꙳ вѣ́ра, наде́жда и҆ любо́вь же: и҆́хже ра́ди, гдⷭ҇и, ꙳ ѿ лю́тыхъ свободи́ ны.

Сла́ва, и҆ ны́нѣ, пра́здника, гла́съ а҃.

Самогла́сенъ:

Насажде́нное въ кра́нїевѣ мѣ́стѣ дре́во сꙋ́щагѡ живота̀, на не́мже содѣ́ла спасе́нїе превѣ́чный цр҃ь посредѣ̀ землѝ, возноси́мо дне́сь, ѡ҆свѧща́етъ мі́ра концы̀, и҆ ѡ҆бновлѧ́етсѧ воскресе́нїѧ до́мъ: ра́дꙋютсѧ а҆́гг҃ли на нб҃сѝ, и҆ веселѧ́тсѧ человѣ́цы на землѝ, дв҃дски вопїю́ще, и҆ глаго́люще: возноси́те гдⷭ҇а бг҃а на́шего, и҆ покланѧ́йтесѧ подно́жїю но́гъ є҆гѡ̀, ꙗ҆́кѡ свѧ́то є҆́сть, подаѧ́й мі́рꙋ ве́лїю ми́лость.

На стїхо́внѣ стїхи̑ры гла́съ в҃. Подо́бенъ: До́ме є҆ѵфра́ѳовъ:

Водо́ю бг҃отво́рною, ꙳ и҆ кро́вїю твое́ю, сло́ве, ꙳ свѣ́тлѡ цр҃ковь ᲂу҆краша́етсѧ, ꙳ ꙗ҆́кѡ невѣ́ста, ꙳ крⷭ҇та̀ сла́вꙋ пою́щи.

Сті́хъ: Возноси́те гдⷭ҇а бг҃а на́шегѡ, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ свѧ́то є҆́сть.

Копїѐ со крⷭ҇то́мъ, ꙳ гво́зди, и҆ и҆на̑ѧ, ꙳ и҆́миже живоно́сное ꙳ хрⷭ҇то́во пригвозди́сѧ тѣ́ло, ꙳ возносѧ́ще поклони́мсѧ.

Сті́хъ: Бг҃ъ же цр҃ь на́шъ пре́жде вѣ́ка, содѣ́ла спасе́нїе посредѣ̀ землѝ.

Є҆гда̀ а҆мали́ка ꙳ мѡѷсе́й побѣжда́ше, ꙳ на высотꙋ̀ рꙋ́цѣ и҆мѣ́ѧ ꙳ крⷭ҇тоѧвле́ннѡ, ꙳ ѡ҆бразова́ше хрⷭ҇то́вꙋ стрⷭ҇ть пречⷭ҇тꙋю.

Сла́ва, и҆ ны́нѣ, гла́съ а҃:

Проѻбразꙋ́ѧ крⷭ҇тъ тво́й, хрⷭ҇тѐ, патрїа́рхъ і҆а́кѡвъ, внꙋ́кѡмъ благослове́нїе да́рꙋѧ, на глава́хъ премѣнє́ны рꙋ́ки сотворѝ, є҆го́же, сп҃се, мы̀ дне́сь возносѧ́ще взыва́емъ: да́рꙋй хрⷭ҇толюби́вомꙋ во́инствꙋ побѣ̑ды, ꙗ҆́кѡ кѡнстанті́нꙋ ѡ҆долѣ́нїе.

Тропа́рь пра́здника: Спасѝ, гдⷭ҇и, лю́ди твоѧ̑:

На ᲂу҆́трени, по а҃-мъ стїхосло́вїи сѣда́ленъ, гла́съ в҃.

Подо́бенъ: Бл҃гоꙋтро́бїѧ сꙋ́щи:

Распе́ншꙋсѧ тебѣ̀, влⷣко хрⷭ҇тѐ, сме́рти держа́ва и҆ крѣ́пость разрꙋши́сѧ, и҆ мꙋчи́тельство попра́но бы́сть всѐ вра́жїе: и҆ ѡ҆живле́ни бы́хомъ, дре́вле ᲂу҆ме́ршїи дре́вомъ престꙋпле́нїѧ, дре́вомъ крⷭ҇тнымъ: тѣ́мъ пое́мъ стрⷭ҇ти твоѧ̑.

Сла́ва, и҆ ны́нѣ, то́йже.

По в҃-мъ стїхосло́вїи сѣда́ленъ, гла́съ д҃. Поⷣ: Ско́рѡ предварѝ:

Въ тебѣ̀ требл҃же́нне и҆ жизнода́вче крⷭ҇те, лю́дїе ᲂу҆чрежда́ющесѧ спра́зднꙋютъ, съ невеще́ственными ли̑ки, чи́ни (с. 331) а҆рхїере́йстїи благоговѣ́йнѡ воспѣва́ютъ: мно́жєства же мона́шествꙋющихъ и҆ по́стникѡвъ покланѧ́ютсѧ, хрⷭ҇та́ же распе́ншагосѧ всѝ прославлѧ́емъ.

Сла́ва, и҆ ны́нѣ, то́йже.

Канѡ́нъ пра́здника со і҆рмосо́мъ на и҃: и҆ ст҃ы́хъ на д҃.

Канѡ́нъ пра́здника.

Гла́съ и҃. Пѣ́снь а҃. І҆рмо́съ:

Крⷭ҇тъ начерта́въ мѡѷсе́й, впрѧ́мѡ жезло́мъ чермно́е пресѣчѐ, і҆и҃лю пѣшеходѧ́щꙋ, то́же ѡ҆бра́тнѡ фараѡ́нѡвымъ колесни́цамъ ᲂу҆да́ривъ совокꙋпѝ, вопрекѝ написа́въ непобѣди́мое ѻ҆рꙋ́жїе: тѣ́мъ хрⷭ҇тꙋ̀ пои́мъ, бг҃ꙋ на́шемꙋ, ꙗ҆́кѡ просла́висѧ.

Ѻ҆́бразъ дре́вле мѡѷсе́й пречⷭ҇тыѧ стрⷭ҇ти въ себѣ̀ само́мъ проѡбразѝ, свѧще́нныхъ средѣ̀ стоѧ̀: крⷭ҇тъ же воѡбрази́въ, просте́ртыми побѣ́дꙋ дла́ньми воздви́же, держа́вꙋ погꙋби́въ а҆мали́ка всегꙋби́телѧ. тѣ́мъ хрⷭ҇тꙋ̀ пои́мъ, бг҃ꙋ на́шемꙋ, ꙗ҆́кѡ просла́висѧ.

Возложѝ мѡѷсе́й на столпѣ̀ врачевство̀, тлетвори́вагѡ и҆збавле́нїе, и҆ ꙗ҆дови́тагѡ ᲂу҆грызе́нїѧ, и҆ дре́вꙋ, ѻ҆́бразомъ крⷭ҇та̀, по землѝ пресмыка́ющагосѧ ѕмі́ѧ привѧза̀, лꙋка́вный въ се́мъ ѡ҆бличи́въ вре́дъ. тѣ́мъ хрⷭ҇тꙋ̀ пои́мъ, бг҃ꙋ на́шемꙋ, ꙗ҆́кѡ просла́висѧ.

Показа̀ не́бо крⷭ҇та̀ побѣ́дꙋ, благоче́стїѧ держа́телю, и҆ царю̀ бг҃омꙋ́дрꙋ: врагѡ́въ въ не́мже ѕлосе́рдныхъ низложи́сѧ свирѣ́пство, ле́сть же преврати́сѧ, и҆ вѣ́ра распростре́сѧ земны̑мъ концє́мъ бжⷭ҇твеннаѧ. тѣ́мъ хрⷭ҇тꙋ̀ пои́мъ, бг҃ꙋ на́шемꙋ, ꙗ҆́кѡ просла́висѧ.

И҆́нъ канѡ́нъ мч҃ницъ, є҆гѡ́же краегране́сїе:

Софі́ина ѕѣлоѧвлє́ннаѧ и҆ свѣ̑тлаѧ ча̑да пою̀. Ѳеофа́ново.

Гла́съ а҃. Пѣ́снь а҃. І҆рмо́съ:

Твоѧ̀ побѣди́тельнаѧ десни́ца, бг҃олѣ́пнѡ въ крѣ́пости просла́висѧ: та́ бо, безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.

Премі́рныѧ твоеѧ̀, хрⷭ҇тѐ, и҆ несказа́нныѧ премꙋ́дрости ѡ҆сїѧ́нїе да́рꙋй мнѣ̀, влⷣко, благолѣ́пныѧ и҆ благосла́вныѧ твоеѧ̀ мч҃ницы, ꙗ҆́кѡ да воспою̀ софі̑ина прозѧбє́нїѧ.

Нарица́нїе твоѐ ꙗ҆́вѣ жи́тельствомъ, бг҃омꙋ́драѧ, ᲂу҆краси́сѧ: всю́ бо проводи́ла є҆сѝ жи́знь твою̀ премꙋ́дрости жела́нїемъ, сла́внаѧ софі́е, мꙋ́дрости ѡ҆сїѧ́вшисѧ бл҃года́тїю.

Тво́й всебл҃же́нный пло́дъ, пребжⷭ҇твенныѧ трⷪ҇цы коли́чествомъ ᲂу҆краша́емь, страда́льчески за ѻ҆́нꙋ подвиза́сѧ, всемꙋ́драѧ софі́е, премꙋ́дрости бжⷭ҇твенныѧ, тезоимени́таѧ.

Тѣ́ло и҆ дꙋ́шꙋ добродѣ́тельми ѡ҆чи́стивше дѣ̑вы ѻ҆трокови̑цы, трѝ тебѣ̀ приведо́шасѧ, мч҃нически ᲂу҆́мномꙋ женихꙋ̀ хрⷭ҇тꙋ̀, вѣ́ра съ наде́ждею, и҆ любо́вь сла́внаѧ.

Бг҃оро́диченъ:

Ве́сь зра́къ мо́й прїи́мъ, и҆́же во зра́цѣ бж҃їи пре́жде зри́мь, всего̀ ѡ҆бновѝ, въ твое́мъ чре́вѣ бг҃олѣ́пнѡ всели́всѧ, пречⷭ҇таѧ. тѣ́мже бцⷣꙋ вѣ́рнїи тѧ̀ всѝ сла́вимъ.

Пѣ́снь г҃. І҆рмо́съ:

Же́злъ во ѻ҆́бразъ та́йны прїе́млетсѧ, прозѧбе́нїемъ бо предразсꙋжда́етъ свѧще́нника, неплодѧ́щей же пре́жде цр҃кви, ны́нѣ процвѣтѐ дре́во крⷭ҇та̀, въ держа́вꙋ и҆ ᲂу҆твержде́нїе.

Ꙗ҆́кѡ и҆спꙋстѝ ᲂу҆дарѧ́емь во́дꙋ краесѣко́мый, непокори̑вымъ лю́демъ и҆ жестосє́рдымъ, бг҃озва́нныѧ проѧвлѧ́ше цр҃кве та́инство, є҆ѧ́же крⷭ҇тъ держа́ва и҆ ᲂу҆твержде́нїе.

Ре́брѡмъ пречⷭ҇тымъ, копїе́мъ прободє́ннымъ, вода̀ съ кро́вїю и҆стечѐ, ѡ҆бновлѧ́ющаѧ завѣ́тъ, и҆ ѡ҆мыва́тельнаѧ грѣха̀: вѣ́рныхъ бо крⷭ҇тъ похвала̀, и҆ царе́й держа́ва и҆ ᲂу҆твержде́нїе.

И҆́нъ. І҆рмо́съ:

Є҆ди́не вѣ́дый человѣ́ческагѡ сꙋщества̀ не́мощь, и҆ ми́лостивнѡ въ нѐ воѡбра́жсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀, ст҃ы́й: ѡ҆дꙋшевле́нный хра́ме, неизрече́нныѧ сла́вы твоеѧ̀, чл҃вѣколю́бче.

Гла́са послꙋ́шавше хрⷭ҇то́ва, зовꙋ́ща къ безсме́ртнѣй и҆ безстра́стнѣй жи́зни, послѣ́доваша вѣнценѡ́сицы дѣ̑вы и҆ мч҃ницы, є҆́же вопи́ти тебѣ̀ ст҃ы́й: хра́ме ѡ҆дꙋшевле́нный, пречⷭ҇тыѧ сла́вы твоеѧ̀, чл҃вѣколю́бче.

Крѣ́пость дарова̀ хрⷭ҇то́съ, стоѧ́щымъ предъ сꙋди́щемъ мꙋ́ченически ва́мъ ꙗ҆́кѡ ѡ҆бѣща́сѧ, и҆ бг҃одꙋхнове́нныѧ мꙋ́дрости и҆спо́лни, и҆ свѣ́тлы показа̀ побѣдонѡ́сныѧ мꙋ́чєницы, дѣ́вства сїѧ́ющѧ бл҃года́тїю.

Пристꙋпи́сте ᲂу҆́мъ вра́жїй дѣ̑вы великохва́льный, и҆ тогѡ̀ горды́ню низложи́сте, великомꙋ́дреннѡ подви́гшесѧ, и҆ пре́жде хва́лѧщагосѧ и҆стреби́ти мо́ре, тече́ньми крове́й потопи́сте.

Мꙋ́дрости вы́шнїѧ хрⷭ҇то́вы бога́тнѡ насы́тившесѧ, и҆збра́нныѧ мꙋ́дрости и҆ благоꙋ́мныѧ, дщє́ри трѝ посрами́ша мꙋ́чащихъ свирѣ̑пства, и҆ неи́стовство неде́ржное, виті́йствꙋюще бжⷭ҇твєннаѧ ᲂу҆чє́нїѧ.

Бг҃оро́диченъ:

Ст҃ы́хъ ст҃а́гѡ хрⷭ҇та̀ свѧ́тѡ породила̀ є҆сѝ, ст҃ы́ни ст҃о́е селе́нїе, во ст҃ы́хъ почива́ющаго є҆мꙋ́же вопїе́мъ: свѧ́тъ хра́мъ ѡ҆дꙋшевле́нный неизрече́нныѧ сла́вы твоеѧ̀, чл҃вѣколю́бче.

Конда́къ ст҃ы́хъ, гла́съ а҃. Подо́бенъ: Гро́бъ тво́й, сп҃се:

Софі́и честны́ѧ свѧще́ннѣйшыѧ вѣ̑тви, вѣ́ра, и҆ наде́жда, и҆ любо́вь, показа́вшесѧ, мꙋ́дрость ѡ҆бꙋи́ша є҆́ллинскꙋю бл҃года́тїю: и҆ пострада́вше, и҆ побѣдонѡ́сицы ꙗ҆ви́вшесѧ, вѣнце́мъ нетлѣ́ннымъ ѿ всѣ́хъ влⷣки хрⷭ҇та̀ ᲂу҆вѧзо́шасѧ.

Сѣда́ленъ, гла́съ а҃. Подо́бенъ: Ли́къ а҆́гг҃льскїй:

А҆́гницы словє́сныѧ а҆́гнца и҆ па́стырѧ, ѻ҆гню̀ и҆ лю̑тымъ мꙋ́камъ пре́дани бы́сте, и҆ ꙗ҆ви́стесѧ а҆́гг҃лѡмъ равноче́стни. тѣ́мъ всѝ свѧще́ннꙋю ва́шꙋ па́мѧть пра́зднꙋемъ въ весе́лїи се́рдца, дѣ̑вы бг҃омꙋ̑дрыѧ.

Сла́ва, и҆ ны́нѣ, пра́здника, подо́бенъ то́йже:

Ѻ҆рꙋ́жїе креста̀ во бране́хъ показа́сѧ нѣ́когда благочести́вомꙋ царю̀ кѡнстанті́нꙋ, непобѣди́маѧ побѣ́да на врагѝ вѣ́ры ра́ди: сегѡ̀ трепе́щꙋтъ проти̑вныѧ си̑лы, сїѐ бы́сть и҆ вѣ́рныхъ спасе́нїе, и҆ па́ѵлова хвала̀.

Пѣ́снь д҃. І҆рмо́съ:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Горькорѡ́дныѧ преложѝ дре́вомъ мѡѷсе́й и҆сто́чники въ пꙋсты́ни дре́вле, крⷭ҇то́мъ, ко благоче́стїю ꙗ҆зы́кѡвъ проѧвлѧ́ѧ преложе́нїе.

Глꙋбинѣ̀ внѣ́дривый сѣкꙋ́щꙋю, и҆здадѐ і҆ѻрда́нъ дре́вꙋ, крⷭ҇то́мъ и҆ креще́нїемъ сѣче́нїе ле́сти зна́менꙋѧ.

Свѧще́ннѡ ѡ҆полча́ютсѧ четвероча́стнїи лю́дїе, предходѧ́ще ѻ҆́бразомъ свидѣ́тельства ски́нїи, крⷭ҇тоѻбра́зными чи́нми прославлѧ́емїи.

Чꙋ́днѡ простира́емь, со́лнєчныѧ лꙋчѝ и҆спꙋща́ше крⷭ҇тъ, и҆ повѣ́даша нб҃са̀ сла́вꙋ бг҃а на́шегѡ.

И҆́нъ. І҆рмо́съ:

Го́рꙋ, тѧ̀, бл҃года́тїю бж҃їею приѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма и҆зъ тебє̀ и҆зы́ти і҆и҃левꙋ, провозглаша́ше, ст҃о́мꙋ, во спасе́нїе на́ше и҆ ѡ҆бновле́нїе.

Оу҆крѣ́пльшесѧ бжⷭ҇твенною бл҃года́тїю, добропобѣ̑дныѧ, вѣ́ра, любо́вь и҆ наде́жда, мꙋчи́телей прещє́нїѧ мꙋ́жественнѡ посрами́ша, ѻ҆гне́мъ всесожега́емы всемꙋ̑дрыѧ, и҆ женихꙋ̀ хрⷭ҇тꙋ̀ приводи́мы.

Возмого́ша, крⷭ҇та̀ всеѻрꙋ́жїемъ ѡ҆гради́вшесѧ, вѣ́ра, любо́вь и҆ наде́жда, мꙋче́нїй благомо́щнѡ ра̑ны стерпѣ́ти ст҃ы̑ѧ, да́же до кро́вей крѣпча́йше ко грѣхꙋ̀ проти́вльшесѧ.

Свѣщы̀ тричи́сленныѧ мꙋ́дрости сїѧ́ющыѧ, вѣ́ра, любо́вь и҆ наде́жда, трⷪ҇цы просвѣще́ньми ꙗ҆́вѣ блиста́ющыѧсѧ, пресвѣ́тлѡ цр҃кви просвѣща́ютъ, ко спасе́нїю на́шемꙋ и҆ защище́нїю.

Бг҃оро́диченъ:

Ст҃ы́хъ ст҃а́ѧ бцⷣе всепѣ́таѧ, ѡ҆жида́нїе ꙗ҆зы́кѡвъ, и҆ спасе́нїе вѣ́рныхъ, и҆зъ тебє̀ возсїѧ̀ и҆зба́витель, и҆ жизнода́вецъ и҆ гдⷭ҇ь, во спасе́нїе на́съ пою́щихъ тѧ̀.

Пѣ́снь є҃. І҆рмо́съ:

Ѽ треблаже́нное дре́во, на не́мже распѧ́сѧ хрⷭ҇то́съ, цр҃ь и҆ гдⷭ҇ь. и҆́мже падѐ дре́вомъ прельсти́вый, тобо́ю прельсти́всѧ, бг҃ꙋ пригвозди́вшꙋсѧ пло́тїю, подаю́щемꙋ ми́ръ дꙋша́мъ на́шымъ.

Тебѐ приснопѣ́тое дре́во, на не́мже простре́сѧ хрⷭ҇то́съ, є҆де́мъ хранѧ́щее ѡ҆браща́ющеесѧ ѻ҆рꙋ́жїе, крⷭ҇те, ᲂу҆стыдѣ́сѧ: стра́шный же херꙋві́мъ ᲂу҆стꙋпѝ, на тебѣ̀ пригвожде́нномꙋ хрⷭ҇тꙋ̀, подаю́щемꙋ ми́ръ дꙋша́мъ на́шымъ.

Подзе́мныхъ си̑лы проти̑вныѧ крⷭ҇та̀ страша́тсѧ, начерта́ема зна́менїѧ на воздꙋ́сѣ, по немꙋ́же хо́дѧтъ нбⷭ҇ныхъ и҆ земноро́дныхъ ро́ди, колѣ̑на преклонѧ́юще хрⷭ҇тꙋ̀, подаю́щемꙋ ми́ръ дꙋша́мъ на́шымъ.

Зарѧ́ми нетлѣ́нными ꙗ҆́вльсѧ бжⷭ҇твенный крⷭ҇тъ, ѡ҆мрачє́ннымъ ꙗ҆зы́кѡмъ, заблꙋждє́ннымъ въ пре́лести, бжⷭ҇твенный свѣ́тъ ѡ҆блиста́въ, ᲂу҆своѧ́етъ на не́мъ пригвожде́нномꙋ хрⷭ҇тꙋ̀, подаю́щемꙋ ми́ръ дꙋша́мъ на́шымъ.

И҆́нъ. І҆рмо́съ:

Просвѣти́вый сїѧ́нїемъ прише́ствїѧ твоегѡ̀, хрⷭ҇тѐ, и҆ ѡ҆свѣти́вый крⷭ҇то́мъ твои́мъ мі́ра концы̀, сердца̀ просвѣтѝ, свѣ́томъ твоегѡ̀ бг҃оразꙋ́мїѧ правосла́внѡ пою́щихъ тѧ̀.

Терпѣ́нїемъ мꙋдрова́нїй мꙋ̑ки под̾е́млѧхꙋ: и҆ мꙋ́дрости сꙋ́щїѧ въ бз҃ѣ глаго́люще та̑йны, держа́щаго посрами́ша трѝ дѣ̑вы бг҃онѡ́сныѧ, вѣ́рою и҆ є҆стество́мъ свѧзꙋ́еми.

Ра́дꙋетсѧ прама́ти, ви́дѧщи побѣжда́ема льсти́ваго, и҆зъ є҆де́ма дре́вле и҆згна́вшаго сїю̀, жена́ми бг҃омꙋ́дрыми, наде́ждою, вѣ́рою и҆ любо́вїю, софі́и рожде́ньми.

Ꙗ҆дови́тагѡ мꙋчи́телева ласка́нїѧ и҆збѣго́ша, и҆ мꙋче́нїй ꙗ҆́звы во́льнѡ претерпѣ́ша честны̑ѧ ѻ҆трокови̑цы, твое́ю любо́вїю ᲂу҆ѧ́звльшесѧ, хрⷭ҇тѐ, и҆ бжⷭ҇твеннымъ твои́мъ раче́нїемъ.

Бг҃оро́диченъ:

Веселѧ́тсѧ нбⷭ҇ныѧ си̑лы ви́дѧше тѧ̀, ра́дꙋютсѧ съ ни́ми человѣ́кѡвъ состоѧ̑нїѧ: ржⷭ҇тво́мъ бо соедини́шасѧ твои́мъ, дв҃о бцⷣе, є҆го́же досто́йнѡ сла́вимъ.

Пѣ́снь ѕ҃. І҆рмо́съ:

Во́днагѡ ѕвѣ́рѧ во ᲂу҆тро́бѣ, дла̑ни і҆ѡ́на крⷭ҇тови́днѡ распросте́ръ, спаси́тельнꙋю стрⷭ҇ть проѡбража́ше ꙗ҆́вѣ. тѣ́мъ тридне́венъ и҆зше́дъ, премі́рное воскрⷭ҇нїе прописа́ше, пло́тїю пригвожде́ннагѡ хрⷭ҇та̀ бг҃а, и҆ тридне́внымъ воскрⷭ҇нїемъ мі́ръ просвѣ́щшагѡ.

Ста́ростїю преклони́всѧ, и҆ недꙋ́гомъ ѡ҆тѧгче́нъ и҆спра́висѧ, і҆а́кѡвъ рꙋ́цѣ премѣни́въ, дѣ́йствїе ꙗ҆влѧ́ѧ жизноно́снагѡ крⷭ҇та̀: и҆́бо ве́тхость зако́ннагѡ сѣно́внагѡ писа́нїѧ, новописа̀ на се́мъ пло́тїю пригвозди́выйсѧ бг҃ъ, и҆ дꙋшегꙋби́тельный недꙋ́гъ ле́сти ѿгна̀.

На ю҆́ныѧ возложи́въ дла̑ни, бжⷭ҇твенный і҆и҃ль, крⷭ҇тови́днѡ главы̑ ꙗ҆влѧ́ше, ꙗ҆́кѡ старѣ́йшаѧ сла́ва, законослꙋжи́телє лю́дїе. тѣ́мже подмнѣ́всѧ та́кѡ и҆зпрельсти́тисѧ, не и҆змѣнѝ жизноно́снагѡ ѻ҆́браза: превзы́дꙋтъ бо лю́дїе хрⷭ҇то́вы бж҃їи новоꙋтвержде́ннїи, вопїѧ́хꙋ, крⷭ҇то́мъ ѡ҆гражда́еми.

И҆́нъ. І҆рмо́съ:

Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ ꙗ҆́кѡ ѻ҆́вцы заколе́нїѧ, спасѝ лю́ди твоѧ̑, бж҃е на́шъ: ты́ бо крѣ́пость немощствꙋ́ющихъ и҆ и҆справле́нїе.

Ра́дꙋющесѧ, во твоѝ, влⷣко, пречⷭ҇тыѧ дла̑ни возложи́ша надє́жды, ѻ҆трокови̑цы трѝ трⷪ҇цы коли́чествомъ и҆ число́мъ почтє́нныѧ и҆ похвалѧ́ємыѧ.

Свѣтѧ́щесѧ дѣ́вства добро́тами, мч҃ническими ᲂу҆вѧзе́ньми ᲂу҆краси́вшасѧ, и҆ вѣне́цъ сꙋгꙋ́бъ свы́ше досто́йнѣ прїѧ́ша, ѿ хрⷭ҇та̀ жизнода́вца и҆ всеще́драгѡ.

Приведо́шасѧ, влⷣко, въ хра́мъ тво́й всѣ́хъ црⷭ҇твꙋющагѡ дѣ́вствєннаѧ сокрѡ́вища честна̑ѧ, приѡбщи́тисѧ црⷭ҇твїю твоемꙋ̀: ты́ бо тѣ́хъ и҆ свѣ́тъ є҆сѝ и҆ весе́лїе.

Бг҃оро́диченъ:

Ра́дꙋютсѧ ѡ҆ тебѣ̀, дв҃о пречⷭ҇таѧ, ро́да на́шегѡ пра́ѻц҃ы, є҆де́мъ воспрїе́мше тобо́ю, є҆го́же престꙋпле́нїемъ погꙋби́ша. ты́ бо чиста̀ и҆ пре́жде ржⷭ҇тва̀ и҆ по ржⷭ҇твѣ̀ є҆сѝ.

Конда́къ пра́здника, гла́съ д҃. Подо́бенъ:

Вознесы́йсѧ на крⷭ҇тъ во́лею, тезоимени́томꙋ твоемꙋ̀ но́вомꙋ жи́тельствꙋ, щедрѡ́ты твоѧ̑ да́рꙋй, хрⷭ҇тѐ бж҃е. возвеселѝ си́лою твое́ю вѣ̑рныѧ лю́ди твоѧ̑, побѣ̑ды даѧ̀ на́мъ на сопоста́ты, посо́бїе и҆мꙋ́щымъ твоѐ ѻ҆рꙋ́жїе ми́ра, непобѣди́мꙋю побѣ́дꙋ.

І҆́косъ:

И҆́же до тре́тїѧгѡ нб҃сѐ восхище́нъ бы́сть въ ра́й, и҆ глаго́лы слы́шавъ неизречє́нныѧ и҆ бжⷭ҇твєнныѧ, и҆̀хже не лѣ́ть ѧ҆зы́ки (человѣ́ческими) глаго́лати, что̀ гала́тѡмъ пи́шетъ, ꙗ҆́кѡ рачи́телїе писа́нїй прочто́сте и҆ позна́сте: мнѣ̀, глаго́летъ, хвали́тисѧ да не бꙋ́детъ, то́кмѡ во є҆ди́номъ крⷭ҇тѣ̀ гдⷭ҇ни, на не́мже страда́въ ᲂу҆бѝ стра̑сти. того̀ ᲂу҆́бѡ и҆ мы̀ и҆звѣ́стнѡ держи́мъ, крⷭ҇тъ гдⷭ҇ень, хвалꙋ̀ всѝ: є҆́сть бо на́мъ спаси́тельное сїѐ дре́во, ѻ҆рꙋ́жїе ми́ра, непобѣди́маѧ побѣ́да.

Пѣ́снь з҃. І҆рмо́съ:

Безꙋ́мное велѣ́нїе мꙋчи́телѧ ѕлочести́вагѡ лю́ди поколеба̀, ды́шꙋщее преще́нїе и҆ ѕлохꙋле́нїе бг҃оме́рзское: ѻ҆ба́че трѝ ѻ҆́троки не ᲂу҆страшѝ ꙗ҆́рость ѕвѣ́рскаѧ, ни ѻ҆́гнь снѣда́ѧй, но противоды́шꙋщꙋ росоно́сномꙋ дх҃ꙋ, со ѻ҆гне́мъ сꙋ́ще поѧ́хꙋ: препѣ́тый ѻ҆тцє́въ и҆ на́съ бж҃е, бл҃гослове́нъ є҆сѝ.

Ѿ дре́ва вкꙋси́въ пе́рвый въ человѣ́цѣхъ, въ тлѣ́нїе всели́сѧ: ѿверже́нїемъ бо жи́зни безче́стнѣйшимъ ѡ҆сꙋди́всѧ, всемꙋ̀ ро́дꙋ тѣлотлѣ́ненъ нѣ́кїй, ꙗ҆́кѡ вре́дъ недꙋ́га преподадѐ: но ѡ҆брѣ́тше земноро́днїи воззва́нїе крⷭ҇тнымъ дре́вомъ, зове́мъ: препѣ́тый ѻ҆тцє́въ и҆ на́съ бж҃е, бл҃гослове́нъ є҆сѝ.

Разрꙋшѝ повелѣ́нїе бж҃їе преслꙋша́нїе, и҆ дре́во принесѐ сме́рть человѣ́кѡмъ, є҆́же неблаговре́меннѡ прича́стно бы́вшее: во ᲂу҆твержде́нїе же ѕѣлѡ̀ честна́гѡ, ѿтꙋ́дꙋ жи́зни дре́во возбранѧ́емо бѣ̀, є҆́же разбо́йникꙋ ѕлоꙋме́ршꙋ ѿве́рзе, благоразꙋ́мнѡ зовꙋ́щꙋ: препѣ́тый ѻ҆тцє́въ и҆ на́съ бж҃е, бл҃гослове́нъ є҆сѝ.

Жезла̀ ѡ҆б̾е́млетъ кра́й і҆ѡ́сифова, бꙋ̑дꙋщаѧ зрѧ̀ і҆и҃ль, ца́рствїѧ держа́вное, ꙗ҆́кѡ воз̾имꙋ́ществитъ пресла́вный крⷭ҇тъ, проѧвлѧ́ѧ: се́й бо побѣдоно́снаѧ похвала̀, и҆ свѣ́тъ вѣ́рою зовꙋ́щымъ: препѣ́тый ѻ҆тцє́въ и҆ на́съ бж҃е, бл҃гослове́нъ є҆сѝ.

И҆́нъ. І҆рмо́съ:

Тебѐ ᲂу҆́мнꙋю, бцⷣе, пе́щь разсмотрѧ́емъ вѣ́рнїи, ꙗ҆́коже бо ѻ҆́троки спасѐ трѝ превозноси́мый, мі́ръ ѡ҆бновѝ, во чре́вѣ твое́мъ всецѣ́лъ, хва́льный ѻ҆тцє́въ бг҃ъ и҆ препросла́вленъ.

Трисїѧ́нною є҆ди́нства бл҃года́тїю, ѡ҆зарѧ́еми ꙗ҆́вѣ дѣ̑вы, де́мѡнское разрꙋши́ша тмонеи́стовство, свѣ́тъ трїѷпоста́сный бг҃осло́вѧще и҆ пою́ще: хва́льный ѻ҆тцє́въ бг҃ъ и҆ препросла́вленъ.

На нб҃сѣ́хъ черто́ги и҆мꙋ́ще свѣщенѡ́сныѧ дꙋ́шы, со а҆́гг҃лы ве́селѡ ны́нѣ ликовствꙋ́ете, сла́вꙋ присносꙋ́щнꙋю зрѧ́ще, и҆ глаго́люще: хва́льный ѻ҆тцє́въ бг҃ъ и҆ препросла́вленъ.

Терпѣли́вѡ ꙗ҆́кѡ ѻ҆́троцы противле́нїе показа́вше, ѻ҆́гнь попра́ша мꙋ́жественнѡ: тѣ́хъ бо равночи́сленнїи ра́зꙋмъ равноста́тный бг҃онѡ́сныѧ стѧжа́ша, хва́льнаго ѻ҆тцє́въ при́снѡ бг҃а и҆ препросла́вленнаго.

Бг҃оро́диченъ:

Дае́ши, чⷭ҇таѧ, ѡ҆ставле́нїе прегрѣше́нїй воспѣва́ющымъ тѧ̀ вѣ́рнѡ, и҆збавлѧ́ющи напа́стей, и҆ всѧ́кагѡ ѡ҆бстоѧ́нїѧ тѧ́ бо ны́нѣ стѧжа́хомъ прибѣ́жище, бг҃оневѣ́стнаѧ, ꙗ҆́кѡ хва́льнаго ѻ҆тцє́въ бг҃а рꙋка́ми носи́вшаѧ.

Пѣ́снь и҃. І҆рмо́съ:

Благослови́те, ѻ҆́троцы, трⷪ҇цы равночи́сленнїи, содѣ́телѧ ѻ҆ц҃а̀ бг҃а, по́йте снизше́дшее сло́во, и҆ ѻ҆́гнь въ ро́сꙋ претво́ршее, и҆ превозноси́те всѣ̑мъ жи́знь подава́ющаго, дх҃а всест҃а́го, во вѣ́ки.

Воздвиза́емꙋ дре́вꙋ ѡ҆кропле́нꙋ кро́вїю, вопло́щшагосѧ сло́ва бг҃а, по́йте нбⷭ҇ныхъ си̑лы: земны́хъ воззва́нїе, пра́зднꙋюще лю́дїе, поклони́тесѧ хрⷭ҇то́вꙋ крⷭ҇тꙋ̀, и҆́мже мі́рꙋ воста́нїе во вѣ́ки.

Земноро́днїи, дла́ньми, строи́телїе бл҃года́ти, крⷭ҇тъ, на не́мже стоѧ́ше хрⷭ҇то́съ бг҃ъ, возноси́те свѧщеннолѣ́пнѡ и҆ копїѐ, бж҃їѧ сло́ва тѣ́ло пробо́дшее: да ви́дѧтъ ꙗ҆зы́цы всѝ спасе́нїе бж҃їе, сла́вѧще є҆го̀ во вѣ́ки.

Бжⷭ҇твеннымъ сꙋдо́мъ пред̾избра́ннїи весели́тесѧ, хрⷭ҇тїа́нстїи вѣ́рнїи хвали́тесѧ побѣдоно́снымъ ѻ҆рꙋ́жїемъ, прїе́мше ѿ бг҃а крⷭ҇тъ честны́й: въ се́мъ бо колѣ̑на бра́ней де́рзости и҆́щꙋще, разсыпа́ютсѧ во вѣ́ки.

И҆́нъ. І҆рмо́съ:

Въ пещѝ ѻ҆́троцы і҆и҃левы, ꙗ҆́коже въ горни́лѣ добро́тою благоче́стїѧ чистѣ́е зла́та блеща́хꙋсѧ, глаго́люще: благослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те во всѧ̑ вѣ́ки.

Дѣ̑вы бг҃освѣ̑тлыѧ, вѣ́ра, наде́жда, любо́вь, добро́тою благоче́стїѧ чистѣ́е зла́та блеща́хꙋсѧ, глаго́люще: благослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те во всѧ̑ вѣ́ки.

Сїѧ́ющыѧ, и҆ свѣтови̑дныѧ мꙋче́нїемъ проѧвле́ннѡ бы́вшыѧ дв҃ы, вѣ́рнїи воспои́мъ глаго́люще: благослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те во всѧ̑ вѣ́ки.

Враче́вствъ стрꙋю̀ ѻ҆би́льнѡ, дово́льнѡ, и҆ бога́тнѡ ра̑ки страстоте́рпицъ и҆сточа́ютъ при́снѡ, вѣ́рою зовꙋ́щымъ: благослови́те всѧ̑ дѣла̀ гдⷭ҇нѧ, гдⷭ҇а, по́йте и҆ превозноси́те во всѧ̑ вѣ́ки.

Бг҃оро́диченъ:

Землѧ̀ ст҃а́ѧ была̀ є҆сѝ, чⷭ҇таѧ, жизноно́сный кла́съ ро́ждшаѧ, присносꙋ́щныѧ жи́зни хода́таѧ хрⷭ҇та̀, є҆мꙋ́же всѝ зове́мъ: благослови́те всѧ̑ дѣла̀ гдⷭ҇а, по́йте и҆ превозноси́те во всѧ̑ вѣ́ки.

Пѣ́снь ѳ҃. І҆рмо́съ:

Та́инъ є҆сѝ, бцⷣе, ра́й, невоздѣ́ланнѡ возрасти́вшїй хрⷭ҇та̀ и҆́мже крⷭ҇тное живоно́сное на землѝ насади́сѧ дре́во. тѣ́мъ ны́нѣ возноси́мꙋ, покланѧ́ющесѧ є҆мꙋ̀, тѧ̀ велича́емъ.

Да возра́дꙋютсѧ древа̀ дꙋбра̑внаѧ всѧ̑, ѡ҆свѧти́вшꙋсѧ є҆стествꙋ̀ и҆́хъ, ѿ негѡ́же и҆знача́ла насади́шасѧ, хрⷭ҇тꙋ̀ распросте́ршꙋсѧ на дре́вѣ. тѣ́мъ ны́нѣ возноси́мꙋ, покланѧ́ющесѧ є҆мꙋ̀, тѧ̀ велича́емъ.

Свѧще́нный воста̀ ро́гъ, и҆ глава̀ всѣ̑мъ бг҃омꙋ̑дрымъ крⷭ҇тъ: и҆́мже грѣ́шныхъ мы́сленнѡ стира́ютсѧ ро́ги всѝ. тѣ́мъ ны́нѣ возноси́мꙋ, покланѧ́ющесѧ є҆мꙋ̀, тѧ̀ велича́емъ.

И҆́нъ. І҆рмо́съ:

Ѻ҆́бразъ чⷭ҇тагѡ ржⷭ҇тва̀ твоегѡ̀, ѻ҆гнепали́маѧ кꙋпина̀ показа̀ неѡпа́льнаѧ. и҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь: да тѧ̀, бцⷣе, непреста́ннѡ велича́емъ.

Свѣ́томъ трисїѧ́ннымъ и҆сполнѧ́еми, и҆ сїѧ́нїѧ бжⷭ҇твеннагѡ ны́нѣ насыща́ющесѧ, кꙋпноимє́нныѧ добродѣ́телей и҆ тождеимє́нныѧ, любвѐ, наде́жди и҆ вѣ́ры, наде́ждею и҆ любо́вїю ны̀ и҆ вѣ́рою ᲂу҆тверди́те.

Да вы́шнѧѧ крѣ́пость ны́нѣ ᲂу҆кроти́тъ, ѡ҆бдержа́щꙋю бꙋ́рю є҆́реси, ѽ страстотє́рпицы непобѣди́мїи! и҆ пода́стъ вѣ̑рнымъ є҆диноꙋ́мїе, проси́те мо́лимъ непреста́ннѡ добродѣ̑вы.

Но́щь житїѧ̀ всемꙋ́дрыѧ преше́дше, де́нь постиго́сте невече́рнїй, мч҃нически веселѧ́щесѧ, и҆ дѣ́вственнѡ хва́лѧщесѧ бл҃года́тїю, и҆ бжⷭ҇твеннагѡ црⷭ҇твїѧ нетлѣ́ннагѡ сподоблѧ́еми.

Бг҃оро́диченъ:

Ѽ ка́кѡ дв҃а родѝ присносꙋ́щее сло́во и҆ ѵ҆поста́сное, сїѧ́нїѧ ѻ҆́ч҃їѧ ѵ҆поста́си, на́шего бл҃годѣ́телѧ и҆ гдⷭ҇а, и҆зъ неѧ̀ вопло́щшасѧ, є҆го́же досто́йнѡ велича́емъ.

Свѣти́ленъ:

Крⷭ҇тъ, храни́тель всеѧ̀ вселе́нныѧ: крⷭ҇тъ, красота̀ це́ркве: крⷭ҇тъ, вѣ́рныхъ ᲂу҆твержде́нїе: крⷭ҇тъ, а҆́гг҃лѡвъ сла́ва, и҆ де́мѡнѡвъ ꙗ҆́зва.

Сла́ва, и҆ ны́нѣ, то́йже:

На стїхо́внѣ стїхи̑ры гла́съ ѕ҃. Подо́бенъ: Тридне́венъ:

И҆дѣ́же стоѧ́ша но́ги хрⷭ҇то́вы, ꙳ мѣ́стꙋ покланѧ́емсѧ, ꙳ возвыша́юще требл҃же́нный крⷭ҇тъ, ꙳ на не́мже и҆сточи́сѧ ꙳ кро́вь влⷣчнѧ, ꙳ и҆сточи́вшагѡ мі́рꙋ воскрⷭ҇нїе.

Сті́хъ: Возноси́те гдⷭ҇а бг҃а на́шегѡ, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ свѧ́то є҆́сть.

Оу҆мертви́вше стра̑сти пло́ти ꙳ и҆ дꙋ́ха, бг҃омꙋ́дрїи, ꙳ потщи́мсѧ возвы́ситисѧ ѿ земны́хъ ꙳ въ небе́сный поко́й, ꙳ крⷭ҇та̀ воздви́женїемъ, ꙳ сраспе́ншесѧ влⷣцѣ хрⷭ҇тꙋ̀.

Сті́хъ: Бг҃ъ же цр҃ь на́шъ пре́жде вѣ́ка, содѣ́ла спасе́нїе посредѣ̀ землѝ.

Животекꙋ́щїй и҆зъ бжⷭ҇твенныхъ рє́бръ ꙳ и҆сто́чникъ ꙗ҆́вѣ и҆скипѣ̀ сп҃совыхъ, ꙳ напаѧ́ющь дꙋ́шы ꙳ вѣ́рою покланѧ́ющихсѧ ꙳ бжⷭ҇твєннымъ є҆гѡ̀ стрⷭ҇те́мъ, ꙳ и҆ крⷭ҇тꙋ̀, и҆ воскрⷭ҇нїю.

Сла́ва, и҆ ны́нѣ, гла́съ в҃:

Прїиди́те всѝ ꙗ҆зы́цы, благослове́нномꙋ дре́вꙋ поклони́мсѧ, и҆́мже бы́сть вѣ́чнаѧ пра́вда: пра́ѻтца бо а҆да́ма прельсти́вый дре́вомъ, крⷭ҇то́мъ прельща́етсѧ, и҆ па́даетъ низве́рженъ паде́нїемъ стра́ннымъ, мꙋчи́тельствомъ ѡ҆держа́вый ца́рское зда́нїе: кро́вїю бж҃їею ꙗ҆́дъ ѕмїе́въ ѿмыва́етсѧ, и҆ клѧ́тва разрꙋши́сѧ ѡ҆сꙋжде́нїѧ пра́веднагѡ, непра́веднымъ сꙋдо́мъ пра́ведникꙋ ѡ҆сꙋжде́нꙋ бы́вшꙋ: дре́вомъ бо подоба́ше дре́во и҆сцѣли́ти, и҆ стрⷭ҇тїю безстра́стнагѡ, ꙗ҆̀же на дре́вѣ разрѣши́ти стра̑сти ѡ҆сꙋжде́ннагѡ. но сла́ва, хрⷭ҇тѐ цр҃ю̀, є҆́же ѡ҆ на́съ твоемꙋ̀ мꙋ́дромꙋ смотре́нїю, и҆́мже спа́слъ є҆сѝ всѣ́хъ, ꙗ҆́кѡ бл҃гъ и҆ чл҃вѣколю́бецъ.

На лїтꙋргі́и: Бл҃жє́нна пра́здника, пѣ́снь д҃, на ѕ҃.

Комментарии для сайта Cackle