Мѣ́сѧца тогѡ́же въ к҃а-й де́нь. Слꙋ́жба и҆́же во ст҃ы́хъ ѻ҆тцꙋ̀ на́шемꙋ дими́трїю, митрополі́тꙋ росто́вскомꙋ, чꙋдотво́рцꙋ.

На ма́лѣй вече́рни,

на Гдⷭ҇и воззва́хъ, стїхи̑ры ст҃а́гѡ, гла́съ а҃.

Подо́бенъ: Нбⷭ҇ныхъ чинѡ́въ:

Вма́лѣ бы́лъ є҆сѝ вѣ́ренъ, дими́трїе, над̾ мно́гими тѧ̀ поста́ви гдⷭ҇ь, и҆ вше́лъ є҆сѝ въ ра́дость гдⷭ҇а твоегѡ̀, и҆дѣ́же предстоѧ̀ є҆мꙋ̀, мо́лишисѧ ѡ҆ дꙋша́хъ на́шихъ.

Ѻ҆́трочество твоѐ на ᲂу҆че́нїе, ю҆́ность на по́двиги мона́шєскїѧ, мꙋ́жескїй же во́зрастъ на по́льзꙋ всѣ̑мъ ѡ҆ст҃и́лъ є҆сѝ, и҆́хже ра́ди тѧ̀ ны́нѣ во ст҃ы́хъ почита́емъ.

Сла́ва, гла́съ то́йже:

Ꙗ҆́коже мі́ръ и҆ всѧ̑ кра̑снаѧ мі́ра, та́кѡ и҆ нача́льство над̾ бра́тїею ѡ҆ста́вивый, всели́лсѧ є҆сѝ въ кі́евъ па́ки близ̾ пеще́ръ, ѿѻнꙋ́дꙋже би́серъ житі́й ст҃ы́хъ трꙋды̑ твои́ми и҆скопа́лъ є҆сѝ на́мъ.

И҆ ны́нѣ, пра́здника, гла́съ ѕ҃. Самогла́сенъ:

Дне́сь са́дъ живо́тный ѿ земны́хъ незаходи́мыхъ нѣ́дръ происхо́дитъ, на не́мъ прегвожде́ннагѡ хрⷭ҇та̀ и҆звѣствꙋ́етъ воскрⷭ҇нїе: и҆ воздвиза́емый рꙋка́ми сщ҃е́нническими, тогѡ̀ на нб҃са̀ возвѣща́етъ возноше́нїе: и҆́мже на́ше смѣше́нїе, ѿ є҆́же на зе́млю паде́нїѧ, на нб҃сѣ́хъ жи́тельствꙋетъ. тѣ́мже бл҃года́рственнѣ возопїи́мъ: гдⷭ҇и, вознесы́йсѧ на не́мъ, и҆ тѣ́мъ совозне́съ на́съ, нбⷭ҇ныѧ твоеѧ̀ ра́дости сподо́би, ꙗ҆́кѡ чл҃вѣколю́бецъ.

На стїхо́внѣ стїхи̑ры ст҃а́гѡ, гла́съ и҃:

Прїиди́те, рѡссі́йскїѧ цр҃кве сы́нове, ᲂу҆бл҃жи́мъ ᲂу҆чи́телѧ на́шего, и҆́же въ жи́зни свое́й на́съ наставлѧ́ѧ, по сме́рти же назира́ѧ, пече́тсѧ ꙗ҆́кѡ па́стырь до́брый ѡ҆ дꙋша́хъ на́шихъ.

Сті́хъ: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ.

Бг҃одꙋхнове́нный ѻ҆рга́нъ всест҃а́гѡ дх҃а, ѡ҆бличи́тель сꙋемꙋ́дренныхъ раско́лѡвъ, вели́кїй ст҃и́тель дими́трїй, и҆сточа́ѧй стрꙋю̀ бл҃года́ти бж҃їѧ ѿ многоцѣле́бныхъ моще́й свои́хъ, хода́тайствꙋетъ непреста́ннѡ, и҆ мо́литсѧ бг҃ꙋ ѡ҆ дꙋша́хъ на́шихъ.

Сті́хъ: Првⷣникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.

Слꙋ́шаѧ гла́са гдⷭ҇нѧ, призыва́ющагѡ тѧ̀ къ себѣ̀, гото́въ бы́лъ є҆сѝ, дими́трїе, ко и҆схо́дꙋ твоемꙋ̀ ѿ сеѧ̀ жи́зни: въ ве́черъ и҆ въ полꙋ́нощи, въ пѣтлоглаше́нїе же и҆ ᲂу҆́тро не воздрема́лъ є҆сѝ, ѡ҆жида́ѧ къ себѣ̀ гдⷭ҇а, до́ндеже срѣ́тивъ вше́лъ є҆сѝ къ немꙋ̀ въ ра́дость вѣ́чнꙋю: и҆дѣ́же предстоѧ̀ є҆мꙋ̀ мо́лишисѧ, да пода́стъ и҆ на́мъ жи́знь ст҃ꙋ и҆ кончи́нꙋ хрⷭ҇тїа́нскꙋю.

Сла́ва, ст҃а́гѡ, гла́съ в҃:

Ра́дꙋйсѧ, дими́трїе, ст҃и́телей похвало̀, сщ҃е́нникѡвъ сла́во, пра́вило мона́хѡвъ, цр҃кве ᲂу҆твержде́нїе.

И҆ ны́нѣ, пра́здника, гла́съ ѕ҃:

Дне́сь дре́во ꙗ҆ви́сѧ, дне́сь ро́дъ є҆вре́йскїй поги́бе, дне́сь вѣ́рными цари̑ вѣ́ра ꙗ҆влѧ́етсѧ, и҆ а҆да́мъ дре́ва ра́ди и҆спадѐ, и҆ па́ки дре́вомъ де́мони вострепета́ша. всеси́льне гдⷭ҇и, сла́ва тебѣ̀.

По Ны́нѣ ѿпꙋща́еши: тропа́рь ст҃а́гѡ, гла́съ и҃:

Правосла́вїѧ ревни́телю, и҆ раско́ла и҆скорени́телю, рѡссі́йскїй цѣле́бниче, и҆ но́вый къ бг҃ꙋ мл҃твенниче, списа́ньми твои́ми бꙋ́ихъ ᲂу҆цѣломꙋ́дрилъ є҆сѝ. цѣвни́це дх҃о́внаѧ, дими́трїе бл҃же́нне, молѝ хрⷭ҇та̀ бг҃а сп҃сти́сѧ дꙋша́мъ на́шымъ.

Сла́ва, и҆ ны́нѣ, пра́здника: Сп҃сѝ, гдⷭ҇и, лю́ди твоѧ̑:

На вели́цѣй вече́рни,

стїхосло́вимъ Бл҃же́нъ мꙋ́жъ: а҃-й а҆нтїфѡ́нъ. (с. 734)

На Гдⷭ҇и воззва́хъ, стїхи̑ры пра́здника, гла́съ ѕ҃.

Подо́бенъ: Всю̀ ѿложи́вше:

Крⷭ҇тъ воздвиза́емь, на не́мъ вознесе́ннагѡ стрⷭ҇ть пречⷭ҇тꙋю, пѣ́ти повелѣва́етъ тва́ри все́й: на то́мъ бо ᲂу҆би́въ на́съ ᲂу҆би́вшаго, ᲂу҆мерщвлє́нныѧ ѡ҆живи́лъ є҆́сть, и҆ ᲂу҆добрѝ и҆ на нб҃сѣ́хъ жи́ти сподо́би ꙗ҆́кѡ милосе́рдъ, премно́жествомъ бл҃гости. тѣ́мъ ра́дꙋющесѧ, вознесе́мъ и҆́мѧ є҆гѡ̀, и҆ тогѡ̀ возвели́чимъ кра́йнее снизхожде́нїе.

Мѡѷсе́й пред̾ѡбрази́ тѧ, рꙋ́ки просте́ръ на высотꙋ̀, и҆ побѣжда́ше а҆мали́ка мꙋчи́телѧ, крⷭ҇те честны́й, вѣ́рныхъ похвало̀, страда́льцєвъ ᲂу҆твержде́нїе, а҆пⷭ҇лѡвъ ᲂу҆добре́нїе, првⷣныхъ побо́рниче, всѣ́хъ прпⷣбныхъ сп҃си́телю. тѣ́мъ тѧ̀ воздвиза́ема зрѧ́щи тва́рь весели́тсѧ, и҆ торжествꙋ́етъ сла́вѧщи хрⷭ҇та̀, тобо́ю разстоѧ̑щаѧ собра́вшаго, кра́йнею бл҃гостїю.

Крⷭ҇те пречестны́й є҆го́же ѡ҆бстоѧ́тъ чи́ни а҆́гг҃льстїи веселѧ́щесѧ, дне́сь воздвиза́емь, бж҃е́ственнымъ манове́нїемъ возно́сиши всѧ̑, ѡ҆краде́нїемъ снѣ́ди ѿгна̑нныѧ и҆ въ сме́рть попо́лзшыѧсѧ. тѣ́мже тѧ̀ сердцы̀ и҆ ᲂу҆стна́ми вѣ́рнїи лобыза́юще, сщ҃е́нїе почерпа́емъ, возноси́те, вопїю́ще, хрⷭ҇та̀ пребл҃га́го бг҃а, и҆ тогѡ̀ покланѧ́йтесѧ бж҃е́ственномꙋ подно́жїю.

И҆ ст҃а́гѡ, гла́съ то́йже:

Потща́лсѧ є҆сѝ на землѝ, ст҃е дими́трїе, хꙋ́ждшее покори́ти лꙋ́чшемꙋ и҆ пло́ть порабо́тити дх҃ꙋ: тѣ́мъ и҆ же́злъ а҆рхїпа́стырскїй воспрїѧ́лъ є҆сѝ, и҆́мже бл҃гопокори́выѧ до́брѣ ᲂу҆па́слъ є҆сѝ, непокори̑выѧ же дале́че прогна́лъ є҆сѝ. и҆ ны́нѣ на нб҃сѣ́хъ сщ҃еннолѣ́пнѡ предстои́ши, со а҆́гг҃лы ликовствꙋ́ѧ.

Въ житїѝ твое́мъ, ст҃и́телю дими́трїе, чре́сла любо́вїю препоѧ́салъ є҆сѝ, и҆ но́зѣ ѡ҆бꙋ́въ во ᲂу҆пова́нїе хрⷭ҇то́во, свѣти́льникъ вѣ́ры ᲂу҆краси́лъ є҆сѝ є҆ле́емъ дѣ́лъ бл҃ги́хъ: тѣ́мъ съ мꙋ́дрыми вше́лъ є҆сѝ въ нбⷭ҇ный черто́гъ, и҆дѣ́же предстоѧ̀ влⷣцѣ хрⷭ҇тꙋ̀, моли́сѧ, да прише́дшꙋ полꙋ́нощномꙋ во́плю, и҆зы́демъ въ срѣ́тенїе є҆мꙋ̀ и҆ мы̀ гото́ви.

Гла́съ и҃.

Подо́бенъ: Ѽ пресла́внагѡ чꙋдесѐ!

Оу҆краси́въ твою̀ дꙋ́шꙋ добродѣ́тельми, и҆ преше́дъ по́прище вре́менныѧ жи́зни во стра́сѣ бж҃їи, ѡ҆брѣ́лъ є҆сѝ бл҃года́ть пред̾ бг҃омъ, ст҃е дими́трїе: и҆ ны́нѣ предстоѧ́й прⷭ҇то́лꙋ гдⷭ҇а сла́вы, молѝ сп҃сти́сѧ дꙋша́мъ на́шымъ.

Па́стырю до́брый, ᲂу҆се́рдный подража́телю пастыренача́льника сн҃а бж҃їѧ, ᲂу҆слы́ши на́съ грѣ́шныхъ, призыва́ющихъ въ по́мощь твоѐ немо́лчное хода́тайство, и҆ молѝ ѡ҆ на́съ всемлⷭ҇тиваго бг҃а, да и҆збѣ́гнемъ всѧ́кихъ ѕѡ́лъ и҆ напа́стей, и҆ да ᲂу҆лꙋчи́мъ вѣ́чное бл҃же́нство, во є҆́же кꙋ́пнѡ съ тобо́ю, ст҃и́телю дими́трїе, сла́вити и҆ воспѣва́ти ст҃ꙋ́ю трⷪ҇цꙋ.

Сла́ва, гла́съ то́йже:

Похвала́ми ᲂу҆бл҃жи́мъ ст҃и́телѧ дими́трїа, і҆ера́рха вели́каго, златоꙋ́ста рѡссі́йскаго, и҆́же содѣ́лавсѧ сосꙋ́дъ и҆збра́нъ всест҃а́гѡ дх҃а, причте́нъ ꙗ҆ви́сѧ ли́кꙋ дрꙋгѡ́въ бж҃їихъ, и҆ мо́литсѧ дарова́ти ми́ръ и҆ бл҃годе́нствїе наро́дꙋ на́шемꙋ, на врагѝ побѣ́дꙋ и҆ ѡ҆доле́нїе, держа́вѣ на́шей бл҃готи́шїе и҆ мі́рови ве́лїю ми́лость.

И҆ ны́нѣ, пра́здника, гла́съ в҃:

Прїиди́те, всѝ ꙗ҆зы́цы, бл҃гослове́нномꙋ дре́вꙋ поклони́мсѧ, и҆́мже бы́сть вѣ́чнаѧ пра́вда: пра́ѻтца бо а҆да́ма прельсти́вый дре́вомъ, крⷭ҇то́мъ прельща́етсѧ, и҆ па́даетъ низве́рженъ паде́нїемъ стра́ннымъ, мꙋчи́тельствомъ ѡ҆держа́вый ца́рское зда́нїе: кро́вїю бж҃їею ꙗ҆́дъ ѕмі́евъ ѿмыва́етсѧ, и҆ клѧ́тва разрꙋши́сѧ ѡ҆сꙋжде́нїѧ пра́веднагѡ, непра́веднымъ сꙋдо́мъ првⷣникꙋ ѡ҆сꙋжде́нꙋ бы́вшꙋ: дре́вомъ бо подоба́ше дре́во и҆сцѣли́ти, и҆ стрⷭ҇тїю безстра́стнагѡ, ꙗ҆́же на дре́вѣ разрѣши́ти стра̑сти ѡ҆сꙋжде́ннагѡ. но сла́ва, хрⷭ҇тѐ цр҃ю̀, є҆́же ѡ҆ на́съ твоемꙋ̀ мꙋ́дромꙋ смотре́нїю, и҆́мже сп҃слъ є҆сѝ всѣ́хъ, ꙗ҆́кѡ бл҃гъ и҆ чл҃вѣколю́бецъ.

Вхо́дъ. Прокі́менъ днѐ, и҆ чтє́нїѧ трѝ.

При́тчей чте́нїе.

[Главы̑ і҃, г҃, и҃] Па́мѧть првⷣнагѡ съ похвала́ми, и҆ бл҃гослове́нїе гдⷭ҇не на главѣ̀ є҆гѡ̀. Бл҃же́нъ человѣ́къ, и҆́же ѡ҆брѣ́те премꙋ́дрость, и҆ сме́ртенъ, и҆́же ᲂу҆вѣ́дѣ ра́зꙋмъ. Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ: все́ же честно́е недосто́йно є҆ѧ̀ є҆́сть. Долгота́ бо дне́й и҆ лѣ̑та живота̀ въ десни́цѣ є҆ѧ̀, въ шꙋ́йцѣ же є҆ѧ̀ бога́тство и҆ сла́ва: ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ млⷭ҇ть на ѧ҆зы́цѣ но́ситъ. Послꙋ́шайте ᲂу҆̀бо менѐ, ѽ ча̑да, честна̑ѧ бо рекꙋ̀: и҆ бл҃же́нъ человѣ́къ, и҆́же пꙋтѝ моѧ̑ сохрани́тъ: и҆схо́ди бо моѝ и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ, премꙋ́дрость, ᲂу҆стро́ихъ совѣ́тъ, и҆ ра́зꙋмъ и҆ смы́слъ а҆́зъ призва́хъ. Мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менѐ ѡ҆брѧ́щꙋтъ бл҃года́ть. Разꙋмѣ́йте ᲂу҆̀бо неѕло́бивїи кова́рство, ненака́заннїи же прилага́йте сердца̀. Послꙋ́шайте менѐ и҆ па́ки, честна̑ѧ бо рекꙋ̀, и҆ ѿве́рзꙋ ѿ ᲂу҆сте́нъ пра̑ваѧ: ꙗ҆́кѡ и҆́стинѣ поꙋчи́тсѧ горта́нь мо́й, мє́рзки же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра́ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋчꙋ́ бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а.

Премꙋ́дрости соломѡ́новы чте́нїе.

[Главы̑ і҃, а҃і] Оу҆ста̀ првⷣнагѡ ка́плютъ премꙋ́дрость: ᲂу҆стнѣ́ же мꙋже́й мꙋ́дрыхъ вѣ́дѧтъ бл҃года́ть. Оу҆ста̀ мꙋ́дрыхъ поꙋча́тсѧ премꙋ́дрости, пра́вда же и҆збавлѧ́етъ и҆̀хъ ѿ сме́рти. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда. Сы́нъ бо пра́веденъ ражда́етсѧ въ живо́тъ, и҆ во бл҃ги́хъ свои́хъ пло́дъ пра́вды ѡ҆б̾и́метъ. Свѣ́тъ првⷣнымъ всегда̀, и҆ ѿ гдⷭ҇а ѡ҆брѧ́щꙋтъ бл҃года́ть и҆ сла́вꙋ. Ѧ҆зы́къ мꙋ́дрыхъ дѡ́браѧ свѣ́сть, и҆ въ се́рдцѣ и҆́хъ почі́етъ мꙋ́дрость. Лю́битъ гдⷭ҇ь преподѡ́бнаѧ сердца̀, прїѧ́тни же є҆мꙋ̀ всѝ непоро́чнїи въ пꙋтѝ. Мꙋ́дрость гдⷭ҇нѧ просвѣща́етъ лицѐ разꙋ́мнагѡ: постига́етъ бо жела́ющыѧ ю҆̀, пре́жде да́же разꙋмѣ́ти ю҆̀, и҆ ᲂу҆до́бь ᲂу҆́зритсѧ ѿ лю́бѧщихъ ю҆̀. Оу҆́треневавый къ не́й, не ᲂу҆трꙋди́тсѧ: и҆ бдѧ́й є҆ѧ̀ ра́ди, вско́рѣ без̾ печа́ли бꙋ́детъ. Ꙗ҆́кѡ досто́йныхъ є҆ѧ̀ сама̀ ѡ҆бхо́дитъ и҆́щꙋщи, и҆ во стезѧ́хъ є҆ѧ̀ ꙗ҆влѧ́етсѧ и҆̀мъ бл҃гопрїе́мнѣ. Мꙋ́дрости никогда́же ѡ҆долѣ́етъ ѕло́ба. Си́хъ ра́ди рачи́тель бы́хъ добро́ты є҆ѧ̀: и҆ возлюби́хъ ю҆̀, и҆ поиска́хъ ѿ ю҆́ности моеѧ̀: и҆ взыска́хъ невѣ́стꙋ привестѝ себѣ̀, ꙗ҆́кѡ всѣ́хъ влⷣка возлюбѝ ю҆̀. Таи́бница бо є҆́сть бж҃їѧ хи́трости и҆ ѡ҆брѣта́тельница дѣ́лъ є҆гѡ̀. Трꙋды̀ є҆ѧ̀ сꙋ́ть добродѣ́тєли: цѣломꙋ́дрїю же и҆ ра́зꙋмꙋ та̀ ᲂу҆чи́тъ, пра́вдѣ и҆ мꙋ́жествꙋ, и҆́хже потре́бнѣе ничто́же є҆́сть въ житїѝ человѣ́кѡмъ. А҆́ще же и҆ мно́гагѡ и҆скꙋ́сства жела́етъ кто̀, вѣ́сть дрє́внѧѧ и҆ бы́ти хотѧ̑щаѧ разсмо́тритъ: свѣ́сть и҆зви̑тїѧ слове́съ и҆ разрѣшє́нїѧ гада́нїй: зна́мєнїѧ и҆ чꙋдеса̀ проразꙋмѣ́етъ, и҆ сбытїѧ̑ време́нъ и҆ лѣ́тъ: и҆ всѣ̑мъ совѣ́тникъ є҆́сть бл҃гъ, ꙗ҆́кѡ безсме́ртїе є҆́сть въ не́й, и҆ бл҃госла́вїе во ѻ҆бще́нїи слове́съ є҆ѧ̀. Сегѡ̀ ра́ди бесѣ́довахъ ко гдⷭ҇ꙋ, и҆ помоли́хсѧ є҆мꙋ̀, и҆ рѣ́хъ ѡ҆ всегѡ̀ се́рдца моегѡ̀: бж҃е ѻ҆тцє́въ и҆ гдⷭ҇и млⷭ҇ти, сотвори́вый всѧ̑ сло́вомъ твои́мъ и҆ мꙋ́дростїю твое́ю ᲂу҆стро́ивый человѣ́ка, да владѣ́етъ бы́вшими ѿ тебє̀ тварьмѝ и҆ да ᲂу҆правлѧ́етъ мі́ръ въ преподо́бїи и҆ пра́вдѣ: да́ждь мѝ твои́хъ прⷭ҇то́лѡвъ присѣдѧ́щꙋю премꙋ́дрость: и҆ не ѿлꙋчѝ менѐ ѿ ѻ҆́трѡкъ твои́хъ, ꙗ҆́кѡ а҆́зъ ра́бъ тво́й и҆ сы́нъ рабы́ни твоеѧ̀. Послѝ ю҆̀ съ нб҃съ ѿ ст҃а́гѡ жили́ща твоегѡ̀ и҆ ѿ прⷭ҇то́ла сла́вы твоеѧ̀, да сꙋ́щи со мно́ю наꙋчи́тъ мѧ̀, что̀ бл҃гоꙋго́дно є҆́сть пред̾ тобо́ю: и҆ наста́витъ мѧ̀ въ ра́зꙋмъ, и҆ сохрани́тъ мѧ̀ во сла́вѣ свое́й. Помышлє́нїѧ бо сме́ртныхъ всѧ̑ боѧзли̑ва, и҆ погрѣши́тєльна ᲂу҆мышлє́нїѧ и҆́хъ.

Премꙋ́дрости соломѡ́новы чте́нїе.

[Главы̑ д҃, ѕ҃, з҃, в҃] Похвалѧ́емꙋ првⷣникꙋ, возвеселѧ́тсѧ лю́дїе: безсме́ртїе бо є҆́сть па́мѧть є҆гѡ̀, ꙗ҆́кѡ ѿ гдⷭ҇а познава́етсѧ и҆ ѿ человѣ̑къ: и҆ ᲂу҆го́дна гдⷭ҇еви дꙋша̀ є҆гѡ̀. Возлюби́те ᲂу҆̀бо, ѽ мꙋ́жїе, мꙋ́дрость, и҆ поживетѐ: восхощи́те є҆ѧ̀, и҆ нака́зани бꙋ́дете: нача́ло бо є҆ѧ̀ любы̀ и҆ соблюде́нїе зако́на. Почти́те премꙋ́дрость, да во вѣ́ки ца́рствꙋете. Возвѣщꙋ̀ ва́мъ и҆ не скры́ю ѿ ва́съ та̑инъ бж҃їихъ: ꙗ҆́кѡ то́й мꙋ́дрости наста́вникъ є҆́сть, и҆ мꙋ́дрыхъ и҆спра́витель, и҆ всѧ́комꙋ смы́слꙋ и҆ дѣ́лꙋ хитре́цъ. И҆ всѣ̑мъ смы́слѡмъ наꙋчи́тъ мꙋ́дрость: є҆́сть бо въ не́й дх҃ъ разꙋ́менъ и҆ ст҃ъ, и҆ сїѧ́нїе свѣ́та присносꙋ́щнагѡ, и҆ ѻ҆́бразъ бл҃гости бж҃їѧ. Та̀ дрꙋ́ги бж҃їѧ и҆ прⷪ҇ро́ки ᲂу҆строѧ́етъ: бл҃голѣ́пнѣйши же є҆́сть со́лнца и҆ па́че всѧ́кагѡ сотворе́нїѧ ѕвѣ́здъ: свѣ́тꙋ сосꙋжда́ема, ѡ҆брѣта́етсѧ пе́рвѣйши. Та̀ ᲂу҆гожда́ющыѧ є҆́й ѿ болѣ́зней и҆зба́ви, и҆ наста́ви на стєзѝ пра̑выѧ: дадѐ и҆̀мъ ра́зꙋмъ и҆мѣ́ти ст҃ъ, и҆ сохранѝ ѧ҆̀ ѿ ловѧ́щихъ, и҆ по́двигъ крѣ́покъ подадѐ и҆̀мъ, да разꙋмѣ́ютъ всѝ, ꙗ҆́кѡ си́льнѣе всегѡ̀ є҆́сть бл҃гоче́стїе: и҆ никогда́же премо́жетъ ѕло́ба мꙋ́дрости, нижѐ пре́йдетъ ѕлы̑ѧ ѡ҆блича́ѧ сꙋ́дъ. Реко́ша же въ себѣ̀, помы́сливше непра́веднѡ: наси́льствꙋемъ првⷣномꙋ, и҆ не пощади́мъ преподо́бства є҆гѡ̀, ни ᲂу҆срами́мсѧ сѣди́нъ ста́рости многолѣ́тны, бꙋ́детъ бо на́мъ крѣ́пость зако́нъ: и҆ ᲂу҆лови́мъ првⷣнаго, ꙗ҆́кѡ неꙋго́денъ на́мъ є҆́сть, и҆ проти́витсѧ дѣлѡ́мъ на́шымъ, и҆ поно́ситъ на́мъ ѿпаде́нїе зако́на, и҆ ѡ҆блича́етъ на́мъ согрѣшє́нїѧ наказа́нїѧ на́шегѡ: возвѣща́етъ на́мъ ра́зꙋмъ и҆мѣ́ти бж҃їй, и҆ ѻ҆́трока гдⷭ҇нѧ себѐ и҆менꙋ́етъ. Бы́сть на́мъ на ѡ҆бличе́нїе помышле́нїй на́шихъ, и҆ тѧ́жекъ на́мъ є҆́сть, и҆ ви́димъ, ꙗ҆́кѡ неподо́бно и҆ны̑мъ житїѐ є҆гѡ̀, и҆ и҆змѣнє́ны стєзѝ є҆гѡ̀. Въ порꙋга́нїе вмѣни́хомсѧ є҆мꙋ̀: и҆ ᲂу҆далѧ́етсѧ ѿ пꙋте́й на́шихъ, ꙗ҆́кѡ ѿ нечисто́тъ, и҆ бл҃жи́тъ послѣ̑днѧѧ првⷣныхъ. Оу҆ви́димъ ᲂу҆̀бо, а҆́ще словеса̀ є҆гѡ̀ и҆́стинна сꙋ́ть: и҆скꙋ́симъ, ꙗ҆̀же сбыва́ютсѧ є҆мꙋ̀. Рꙋга́нїемъ и҆ мꙋ́кою и҆стѧ́жемъ є҆го̀, да разꙋмѣ́емъ кро́тость є҆гѡ̀, и҆ и҆скꙋ́симъ безѕло́бство є҆гѡ̀: сме́ртїю без̾ѡбра́зною ѡ҆сꙋ́димъ є҆го̀: бꙋ́детъ бо посѣще́нїе ѿ слове́съ є҆гѡ̀. Сїѧ̑ помы́слиша, и҆ прельсти́шасѧ: ѡ҆слѣпи́ бо ѧ҆̀ ѕло́ба и҆́хъ, и҆ не разꙋмѣ́ша та̑инъ бж҃їихъ, и҆ не разсꙋди́ша, ꙗ҆́кѡ ты̀ є҆сѝ бг҃ъ є҆ди́нъ, живота̀ и҆мѣ́ѧй и҆ сме́рти вла́сть, и҆ сп҃са́ѧй во вре́мѧ ско́рби, и҆ и҆збавлѧ́ѧй ѿ всѧ́кагѡ ѕла̀: ще́дръ и҆ млⷭ҇тивъ, и҆ даѧ̀ прпⷣбнымъ свои̑мъ бл҃года́ть, и҆ свое́ю мы́шцею гѡ́рдымъ противлѧ́ѧсѧ.

На лїті́и стїхи̑ры ст҃а́гѡ, гла́съ є҃:

Прїиди́те, правосла́вныхъ собо́ри, воспои́мъ ст҃и́телѧ, ᲂу҆че́нїемъ къ бг҃оразꙋ́мїю на́съ наста́вльшаго, и҆сто́чника чꙋде́съ преди́внаго, цр҃кве свѣти́льника пресвѣ́тлаго, ᲂу҆чи́телѧ росто́вꙋ премꙋ́драго, и҆ все́й рѡссі́и прекра́сное ᲂу҆добре́нїе: то́й бо и҆збавлѧ́етъ на́съ ѿ всѧ́кихъ ѕлы́хъ и҆скꙋше́нїй и҆ бѣ́дъ, и҆ мо́литсѧ ѡ҆ дꙋша́хъ на́шихъ.

Хрⷭ҇то́во ста́до слове́сныхъ ѻ҆ве́цъ, на ѕла́цѣ бл҃гоче́стїѧ, до́брѣ ᲂу҆па́слъ є҆сѝ, і҆ера́рше. тѣ́мже и҆ по преставле́нїи цр҃ко́вныхъ твои́хъ ча̑дъ не ѡ҆ставлѧ́й, но посѣща́й, и҆ ст҃ѣ́й трⷪ҇цѣ со а҆рхїерє́и предстоѧ̀, молѝ сп҃стѝ всѧ̑, честны́хъ твои́хъ моще́й ѡ҆брѣ́тенїе любо́вїю почита́ющыѧ, дими́трїе прехва́льне.

Зна́мєнїи и҆ чꙋдесы̀ тебѐ гдⷭ҇ь просла́ви, ст҃и́телю дими́трїе: прого́ниши бо дꙋ́хи, и҆ врачꙋ́еши стра̑сти, дꙋ́шы просвѣща́еши вѣ́рныхъ, приходѧ́щихъ ко ст҃о́мꙋ твоемꙋ̀ гро́бꙋ, а҆́гг҃лѡвъ собесѣ́дниче, а҆пⷭ҇лѡвъ є҆динонра́вне, а҆рхїере́євъ сопресто́льне, бл҃говѣ́рїѧ побо́рниче.

Сла́ва, гла́съ ѕ҃:

Гра́дъ ѡ҆ст҃и́сѧ, наро́ди бл҃гослови́шасѧ, цр҃ковь перворо́дныхъ дꙋ́хомъ ликовствꙋ́етъ, во ѡ҆брѣ́тенїи честны́хъ моще́й твои́хъ, і҆ера́рше дими́трїе, и҆ лю́дїе взыва́ютъ: ты̀ на́ше ᲂу҆твержде́нїе, и҆ тобо́ю хва́лимсѧ. молѝ сп҃стѝ всѧ̑, любо́вїю ст҃ы́хъ твои́хъ моще́й ѡ҆брѣ́тенїе при́снѡ сла́вѧщыѧ.

И҆ ны́нѣ, пра́здника, гла́съ д҃:

Честна́гѡ крⷭ҇та̀, хрⷭ҇тѐ, дѣ́йство проѡбрази́въ мѡѷсе́й, побѣдѝ проти́внаго а҆мали́ка въ пꙋсты́ни сїна́йстѣй: є҆гда́ бо простира́ше рꙋ́цѣ, крⷭ҇та̀ ѻ҆́бразъ творѧ̀, ᲂу҆крѣплѧ́хꙋсѧ лю́дїе: ны́нѣ же веще́й сбытїѐ въ на́съ и҆спо́лнисѧ. дне́сь крⷭ҇тъ воздвиза́етсѧ, и҆ де́мони бѣ́гаютъ, дне́сь тва́рь всѧ̀ ѿ тлѝ свободи́сѧ: всѧ̑ бо крⷭ҇та̀ ра́ди возсїѧ́ша на́мъ дарова̑нїѧ. тѣ́мже ра́дꙋющесѧ всѝ, припа́даемъ тебѣ̀, глаго́люще: ꙗ҆́кѡ возвели́чишасѧ дѣла̀ твоѧ̑ гдⷭ҇и, сла́ва тебѣ̀.

На стїхо́внѣ стїхи̑ры пра́здника, гла́съ є҃. Самоподѡ́бны:

Ра́дꙋйсѧ, живоно́сный крⷭ҇те, бл҃гоче́стїѧ непобѣди́маѧ побѣ́до, две́рь ра́йскаѧ, вѣ́рныхъ ᲂу҆твержде́нїе, цр҃кве ѡ҆гражде́нїе, и҆́мже тлѧ̀ разори́сѧ и҆ ᲂу҆праздни́сѧ, и҆ попра́сѧ сме́ртнаѧ держа́ва, и҆ вознесо́хомсѧ ѿ землѝ къ нбⷭ҇нымъ: ѻ҆рꙋ́жїе непобѣди́мое, бѣсѡ́въ сопротивобо́рче, сла́во мч҃нкѡвъ, прпⷣбныхъ ꙗ҆́кѡ вои́стиннꙋ ᲂу҆добре́нїе, приста́нище сп҃се́нїѧ, да́рꙋѧй мі́рꙋ ве́лїю млⷭ҇ть.

Сті́хъ: Возноси́те гдⷭ҇а бг҃а на́шего, и҆ покланѧ́йтесѧ подно́жїю нѡ́гꙋ є҆гѡ̀, ꙗ҆́кѡ ст҃о є҆́сть.

Ра́дꙋйсѧ, гдⷭ҇ень крⷭ҇те, и҆́мже разрѣши́сѧ ѿ клѧ́твы человѣ́чество, сꙋ́щїѧ ра́дости зна́менїе, прогонѧ́ѧй врагѝ во твое́мъ воздви́женїи, всече́стне: на́мъ помо́щниче, крѣ́пость првⷣныхъ, сщ҃е́нникѡвъ бл҃голѣ́пїе, воѡбража́емый, и҆ лю́тыхъ и҆збавлѧ́ѧй: же́зле си́лы, и҆́мже пасе́мсѧ, ѻ҆рꙋ́жїе ми́ра, є҆го́же со стра́хомъ ѡ҆бстоѧ́тъ а҆́гг҃ли, хрⷭ҇та̀ бж҃е́ственнаѧ сла́во, подаю́щагѡ мі́рꙋ ве́лїю млⷭ҇ть.

Сті́хъ: Бг҃ъ же цр҃ь на́шъ пре́жде вѣ́ка, содѣ́ла сп҃се́нїе посредѣ̀ землѝ.

Ра́дꙋйсѧ, слѣпы́хъ наста́вниче, немощны́хъ врачꙋ̀, воскрⷭ҇нїе всѣ́хъ ᲂу҆ме́ршихъ, воздви́гнꙋвый ны̀ во тлю̀ па́дшыѧ, крⷭ҇те честны́й: и҆́мже разрꙋши́сѧ клѧ́тва, и҆ процвѣтѐ нетлѣ́нїе, и҆ земні́и ѡ҆божи́хомсѧ, и҆ дїа́волъ всеконе́чнѡ низве́ржесѧ. дне́сь воздвиза́ема тѧ̀ ви́дѧще рꙋка́ми а҆рхїере́йскими, возно́симъ вознесе́ннаго посредѣ̀ тебє̀, и҆ тебѣ̀ покланѧ́емсѧ, почерпа́юще бога́тнѡ ве́лїю млⷭ҇ть.

Сла́ва, ст҃а́гѡ, гла́съ д҃:

Возра́дꙋемсѧ, рѡссі́йстїи собо́ри, похвалꙋ̀ росто́вскꙋю ᲂу҆блажа́юще, чꙋдотво́рца дими́трїа: се́й бо мно́гѡ потрꙋди́сѧ въ списа́нїи дꙋшеполе́зныхъ на́мъ кни́гъ, и҆́миже развраще́ннїи ѿ пра́вагѡ бл҃гоче́стїѧ пꙋтїѐ ко и҆́стинѣ направлѧ́ютсѧ, правосла́вныхъ же сердца̀ въ правовѣ́рїи ᲂу҆твержда́ютсѧ. є҆мꙋ́же и҆ возопїи́мъ: ѽ премꙋ́дрый ᲂу҆чи́телю, моли́сѧ хрⷭ҇тꙋ̀, да твои́мъ ᲂу҆че́нїемъ наставлѧ́еми, полꙋ́чимъ живо́тъ вѣ́чный.

И҆ ны́нѣ, пра́здника, гла́съ и҃:

Є҆го́же дре́вле мѡѷсе́й проѡбразова́въ собо́ю, а҆мали́ка низложи́въ побѣдѝ, и҆ дв҃дъ пѣснопѣ́вецъ подно́жїю твоемꙋ̀, вопїѧ̀, кла́нѧтисѧ повелѣва́ше: честно́мꙋ крⷭ҇тꙋ̀ твоемꙋ̀, хрⷭ҇тѐ бж҃е, дне́сь грѣ́шнїи кла́нѧемсѧ, ᲂу҆стна́ми недосто́йными, тѧ̀ и҆зво́лившаго пригвозди́тисѧ на не́мъ, воспѣва́юще мо́лимсѧ: гдⷭ҇и, съ разбо́йникомъ црⷭ҇твїѧ твоегѡ̀ сподо́би на́съ.

На бл҃гослове́нїи хлѣ́бѡвъ тропа́рь ст҃а́гѡ, два́жды. И҆ пра́здника, є҆ди́ножды.

На ᲂу҆́трени,

на Бг҃ъ гдⷭ҇ь, тропа́рь пра́здника, два́жды.

Сла́ва, ст҃а́гѡ: И҆ ны́нѣ, пра́здника.

По а҃-мъ стїхосло́вїи сѣда́ленъ пра́здника, гла́съ ѕ҃:

То́кмѡ водрꙋзи́сѧ дре́во, хрⷭ҇тѐ, крⷭ҇та̀ твоегѡ̀, ѡ҆снова̑нїѧ поколеба́шасѧ сме́рти, гдⷭ҇и: є҆го́же бо пожрѐ жела́нїемъ а҆́дъ, ѿпꙋстѝ тре́петомъ. ꙗ҆ви́лъ є҆сѝ на́мъ сп҃се́нїе твоѐ, ст҃ы́й, и҆ славосло́вимъ тѧ̀, сн҃е бж҃їй, поми́лꙋй на́съ.

Сла́ва, и҆ ны́нѣ, гла́съ а҃. Подо́бенъ: Ка́мени запеча́танꙋ:

Крⷭ҇та̀ твоегѡ̀ дре́вꙋ покланѧ́емсѧ, чл҃вѣколю́бче, ꙗ҆́кѡ на не́мъ пригвозди́лсѧ є҆сѝ, животѐ всѣ́хъ. ра́й ѿве́рзлъ є҆сѝ, сп҃се, вѣ́рою прише́дшемꙋ тѝ разбо́йникꙋ, и҆ сла́дости сподо́бисѧ и҆сповѣ́даѧсѧ тебѣ̀: помѧни́ мѧ, гдⷭ҇и. прїимѝ ꙗ҆́коже ѻ҆́наго и҆ на́съ зовꙋ́щихъ: согрѣши́хомъ всѝ, бл҃гоꙋтро́бїемъ твои́мъ не пре́зри на́съ.

По в҃-мъ стїхосло́вїи сѣда́ленъ, гла́съ ѕ҃:

Дне́сь проро́ческое и҆спо́лнисѧ сло́во: се́ бо покланѧ́емсѧ на мѣ́сто, и҆дѣ́же стоѧ́ша но́зѣ твоѝ, гдⷭ҇и, и҆ дре́во сп҃се́нїѧ прїе́мше, грѣхо́вныхъ страсте́й свобо́дꙋ полꙋчи́хомъ, мл҃твами бцⷣы, є҆ди́не чл҃вѣколю́бче.

Сла́ва, и҆ ны́нѣ, гла́съ и҃.

Подо́бенъ: Повелѣ́нное та́йнѡ:

Проѡбража́ше та́инственнѡ дре́вле і҆исꙋ́съ наѵи́нъ крⷭ҇та̀ ѻ҆́бразъ, є҆гда̀ рꙋ́цѣ прострѐ крестови́днѡ, сп҃се мо́й, и҆ ста̀ со́лнце, до́ндеже врагѝ низложѝ противостоѧ́щыѧ тебѣ̀ бг҃ꙋ. ны́нѣ бо за́йде на крⷭ҇тѣ́ тѧ зрѧ̀, и҆ держа́вꙋ сме́ртнꙋю разрꙋши́въ, ве́сь мі́ръ совоздви́глъ є҆сѝ.

По полѷеле́и сѣда́ленъ ст҃а́гѡ, гла́съ з҃:

Ꙗ҆́кѡ фі́нїѯъ процвѣ́лъ є҆сѝ нетлѣ́нїемъ ѿ землѝ, и҆ ꙗ҆́кѡ ке́дръ, и҆́же въ лїва́нѣ, ᲂу҆мно́жилсѧ є҆сѝ чꙋдесы̀: превозне́слсѧ є҆сѝ ꙗ҆вле́нїемъ, ꙗ҆́кѡ гра́дъ верхꙋ̀ стоѧ́й, и҆ возсїѧ́лъ є҆сѝ па́мѧтїю твое́ю ꙗ҆́кѡ свѣти́льникъ и҆з̾ под̾ спꙋ́да на свѣ́тъ. ꙗ҆̀же всѧ̑ на тебѣ̀ ви́дѧще сбытїѧ̑, прославлѧ́емъ возвели́чившаго тѧ̀ та́кѡ во ст҃ы́хъ свои́хъ: ты́ же, ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀ гдⷭ҇ꙋ, моли́сѧ, ст҃оѧвле́нне дими́трїе, да сп҃се́тъ и҆ просвѣти́тъ дꙋ́шы на́шѧ.

Сла́ва:

Просїѧ́лъ є҆сѝ добродѣ́тельнымъ житїе́мъ твои́мъ, ст҃и́телю дими́трїе, ᲂу҆краша́ѧсѧ красото́ю нра́ва, воздержа́нїемъ и҆ милосе́рдїемъ, златослове́сными же твои́ми ᲂу҆чє́нїи ᲂу҆краша́ѧ хрⷭ҇то́вꙋ цр҃ковь: тѣ́мже, приснопа́мѧтне, предстоѧ̀ прⷭ҇то́лꙋ вседержи́телѧ, молѝ хрⷭ҇та̀ бг҃а, дарова́ти грѣхѡ́въ ѡ҆ставле́нїе пра́зднꙋющымъ любо́вїю всечестнꙋ́ю па́мѧть твою̀.

И҆ ны́нѣ, пра́здника, гла́съ и҃.

Подо́бенъ: Повелѣ́нное та́йнѡ:

Въ раи́ мѧ пре́жде дре́во ѡ҆бнажѝ, ѡ҆ вкꙋше́нїи вра̑гъ приносѧ̀ ᲂу҆мерщвле́нїе: крⷭ҇та́ же дре́во, живота̀ ѡ҆дѣѧ́нїе человѣ́кѡмъ носѧ̀, водрꙋзи́сѧ на землѝ, и҆ мі́ръ ве́сь и҆спо́лнисѧ всѧ́кїѧ ра́дости. є҆го́же зрѧ́ще возвыша́ема, бг҃ꙋ вѣ́рою лю́дїе согла́снѡ возопїи́мъ: и҆спо́лнь сла́вы до́мъ тво́й.

Степє́нна, а҃-й а҆нтїфѡ́нъ д҃-гѡ гла́са.

Прокі́менъ, гла́съ д҃: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ.

Сті́хъ: Оу҆слы́шите сїѧ̑ всѝ ꙗ҆зы́цы, внꙋши́те всѝ живꙋ́щїи по вселе́ннѣй.

Всѧ́кое дыха́нїе:

Є҆ѵⷢ҇лїе ѿ і҆ѡа́нна, зача́ло л҃є, ѿ полꙋ̀.

По н҃-мъ ѱалмѣ̀, стїхи́ра ст҃а́гѡ, гла́съ ѕ҃:

Бл҃гі́й ра́бъ и҆ вѣ́рный є҆сѝ, ᲂу҆мно́живый тала́нтъ врꙋче́нный тебѣ̀ ѿ влⷣки твоегѡ̀: и҆злїѧ́сѧ бо бл҃года́ть во ᲂу҆стна́хъ твои́хъ, ст҃и́телю дими́трїе, ꙗ҆́кѡ ᲂу҆че́ньми твои́ми цр҃ковь ᲂу҆краси́лъ є҆сѝ, и҆́стинꙋ правосла́вїѧ ᲂу҆ѧсни́лъ є҆сѝ, па́гꙋбное же раско́льническое мꙋдрова́нїе посрами́лъ є҆сѝ: тѣ́мъ ꙗ҆́коже въ житїѝ, та́кѡ по ѿше́ствїи твое́мъ потщи́сѧ, да понѐ чꙋдесы̀ твои́ми ᲂу҆вѣрѧ́еми, сꙋемꙋ́дрствꙋющїи прїи́дꙋтъ въ чꙋ́вство, и҆ просла́вѧтъ кꙋ́пнѡ съ на́ми трїѷпоста́снаго бг҃а.

Канѡ́нъ пра́здника со і҆рмосо́мъ на ѕ҃, и҆ ст҃а́гѡ на ѕ҃.

Канѡ́нъ пра́здника, гла́съ и҃.

Пѣ́снь а҃.

І҆рмо́съ: Крⷭ҇тъ начерта́въ мѡѷсе́й, впрѧ́мѡ жезло́мъ чермно́е пресѣчѐ, і҆и҃лю пѣшеходѧ́щꙋ: то́же ѡ҆бра́тнѡ фараѡ́нѡвымъ колесни́цамъ ᲂу҆да́ривъ совокꙋпѝ, вопрекѝ написа́въ непобѣди́мое ѻ҆рꙋ́жїе. тѣ́мъ хрⷭ҇тꙋ̀ пои́мъ бг҃ꙋ на́шемꙋ, ꙗ҆́кѡ просла́висѧ.

Ѻ҆́бразъ дре́вле мѡѷсе́й пречⷭ҇тыѧ стрⷭ҇ти въ себѣ̀ само́мъ проѡбразѝ, сщ҃е́нныхъ средѣ̀ стоѧ̀: крⷭ҇тъ же воѡбрази́въ, просте́ртыми побѣ́дꙋ дла́ньми воздви́же, держа́вꙋ погꙋби́въ а҆мали́ка всегꙋби́телѧ. тѣ́мъ хрⷭ҇тꙋ̀ пои́мъ бг҃ꙋ на́шемꙋ, ꙗ҆́кѡ просла́висѧ.

Возложѝ мѡѷсе́й на столпѣ̀ врачевство̀, тлетвори́вагѡ и҆збавле́нїе и҆ ꙗ҆дови́тагѡ ᲂу҆грызе́нїѧ: и҆ дре́вꙋ, ѻ҆́бразомъ крⷭ҇та̀, по землѝ пресмыка́ющагосѧ ѕмі́ѧ привѧза̀, лꙋка́вный въ се́мъ ѡ҆бличи́въ вре́дъ. тѣ́мъ хрⷭ҇тꙋ̀ пои́мъ бг҃ꙋ на́шемꙋ, ꙗ҆́кѡ просла́висѧ.

Показа̀ нб҃о крⷭ҇та̀ побѣ́дꙋ бл҃гоче́стїѧ держа́телю и҆ царю̀ бг҃омꙋ́дрꙋ, врагѡ́въ въ не́мже ѕлосе́рдныхъ низложи́сѧ свирѣ́пство, ле́сть же преврати́сѧ, и҆ вѣ́ра распростре́сѧ земны̑мъ концє́мъ бж҃е́ственнаѧ. тѣ́мъ хрⷭ҇тꙋ̀ пои́мъ бг҃ꙋ на́шемꙋ, ꙗ҆́кѡ просла́висѧ.

Канѡ́нъ ст҃а́гѡ, гла́съ ѕ҃.

Пѣ́снь а҃.

І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.

Со а҆́гг҃льскими чинонача̑лїи предстоѧ́й ст҃ѣ́й трⷪ҇цѣ, вели́кїй і҆ера́рше дими́трїе, молѝ ѡ҆ на́съ грѣ́шныхъ, да полꙋ́чимъ грѣхѡ́въ ѡ҆ставле́нїе.

По́стничествомъ и҆ воздержа́нїемъ всѧ́кимъ порабо́тивый тѣ́ло дꙋ́хꙋ, и҆ тѣ́ломъ содѣ́лавый нетлѣ́нїе и҆ цѣльбоно́снꙋю си́лꙋ бре́нномꙋ веществꙋ̀ твоемꙋ̀, наꙋчѝ и҆ на́съ, ѻ҆́тче ст҃ы́й, бг҃ꙋ, а҆ не мамѡ́нѣ рабо́тати.

Оу҆правлѧ́ѧ па́ствꙋ, ввѣ́реннꙋю тебѣ̀ ѿ началопа́стырѧ хрⷭ҇та̀, и҆ ѡ҆гонѧ́ѧ дꙋшевре́дныхъ волкѡ́въ ѿ хрⷭ҇то́вы ѡ҆гра́ды твои́ми бг҃одꙋхнове́нными ᲂу҆чє́нїи, назира́й и҆ ны́нѣ, ст҃и́телю дими́трїе, да не ка́кѡ сꙋемꙋ́дреннїи раско́лы возмꙋтѧ́тъ тишинꙋ̀ цр҃ко́внꙋю: но па́че молѝ чл҃вѣколю́бца бг҃а, да вско́рѣ всѝ є҆ди́ными ᲂу҆сты̀ и҆ є҆ди́нымъ се́рдцемъ восхва́лимъ є҆гѡ̀ бл҃гоꙋтро́бїе.

Бг҃оро́диченъ:

И҆збра́ннꙋ и҆ всечⷭ҇тꙋ разꙋмѣ́въ тѧ̀ сн҃ъ бж҃їй, всенепоро́чнаѧ, сн҃ъ тво́й бы́сть, сы́ны сотворѝ бл҃года́тїю, бцⷣꙋ тѧ̀ чтꙋ́щыѧ.

Катава́сїа: Крⷭ҇тъ начерта́въ:

Пѣ́снь г҃.

І҆рмо́съ: Же́злъ во ѻ҆́бразъ та́йны прїе́млетсѧ, прозѧбе́нїемъ бо предразсꙋжда́етъ сщ҃е́нника: неплодѧ́щей же пре́жде цр҃кви, ны́нѣ процвѣтѐ дре́во крⷭ҇та̀, въ держа́вꙋ и҆ ᲂу҆твержде́нїе.

Ꙗ҆́кѡ и҆спꙋстѝ ᲂу҆дарѧ́емь во́дꙋ краесѣко́мый непокори̑вымъ лю́демъ и҆ жестосє́рдымъ, бг҃озва́нныѧ проѧвлѧ́ше цр҃кве та́инство, є҆ѧ́же крⷭ҇тъ держа́ва и҆ ᲂу҆твержде́нїе.

Ре́брѡмъ пречⷭ҇тымъ, копїе́мъ прободє́ннымъ, вода̀ съ кро́вїю и҆стечѐ, ѡ҆бновлѧ́ющаѧ завѣ́тъ и҆ ѡ҆мыва́тельнаѧ грѣха̀: вѣ́рныхъ бо крⷭ҇тъ похвала̀, держа́ва и҆ ᲂу҆твержде́нїе.

И҆́нъ.

І҆рмо́съ: Нѣ́сть ст҃ъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Оу҆тверди́всѧ на ка́мени вѣ́ры хрⷭ҇то́вы, тве́рдъ пребы́лъ є҆сѝ во и҆сповѣ́данїи правосла́вїѧ, и҆ ѕлоче́ствꙋющихъ непреста́ннѡ ѡ҆блича́лъ є҆сѝ.

Ѡ҆блича́ѧ, молѧ̀, совѣ́тꙋѧ, не престава́лъ є҆сѝ призыва́ти заблꙋ́ждшихъ ѻ҆вє́цъ ѿ хрⷭ҇то́ва ста́да, а҆́ще и҆ не всѝ послꙋ́шаша гла́са твоегѡ̀.

Сынѡ́въ цр҃кве, непоколеби́мѡ пребы́вшихъ во ѡ҆б̾ѧ́тїихъ є҆ѧ̀, ѡ҆бодрѧ́лъ є҆сѝ. и҆ мы̀, со сла́достїю вне́млюще ᲂу҆че́нїю твоемꙋ̀, вопїе́мъ: нѣ́сть ст҃ъ па́че бг҃а на́шегѡ.

Бг҃оро́диченъ:

И҆збавлѧ́ющаго человѣ́ки преслꙋша́нїѧ, и҆ кро́вїю свое́ю ѡ҆мы́вшаго перворо́дный грѣ́хъ а҆да́мовъ, чⷭ҇таѧ и҆ всенепоро́чнаѧ, родила̀ є҆сѝ.

Конда́къ пра́здника, гла́съ д҃.

Подо́бенъ:

Вознесы́йсѧ на крⷭ҇тъ во́лею, тезоимени́томꙋ твоемꙋ̀ но́вомꙋ жи́тельствꙋ щедрѡ́ты твоѧ̑ да́рꙋй, хрⷭ҇тѐ бж҃е: возвеселѝ си́лою твое́ю вѣ̑рныѧ лю́ди твоѧ̑, побѣ̑ды даѧ̀ на́мъ на сопоста́ты, посо́бїе и҆мꙋ́щымъ твоѐ, ѻ҆рꙋ́жїе ми́ра, непобѣди́мꙋю побѣ́дꙋ.

І҆́косъ:

И҆́же до тре́тїѧгѡ нб҃сѐ восхище́нъ бы́сть въ ра́й и҆ глаго́лы слы́ша неизречє́нныѧ и҆ бж҃е́ствєнныѧ, и҆́хже не лѣ́ть ѧ҆зы̑ки человѣ́ческими глаго́лати, что̀ гала́тѡмъ пи́шетъ, ꙗ҆́кѡ рачи́телїе писа́нїй прочто́сте и҆ позна́сте: мнѣ̀, глаго́летъ, хвали́тисѧ да не бꙋ́детъ то́кмѡ во є҆ди́номъ крⷭ҇тѣ̀ гдⷭ҇ни, на не́мже страда́въ ᲂу҆бѝ стра̑сти. того̀ ᲂу҆̀бо и҆ мы̀ и҆звѣ́стнѡ держи́мъ, крⷭ҇тъ гдⷭ҇ень, хвалꙋ̀ всѝ: є҆́сть бо на́мъ сп҃си́тельное сїѐ дре́во, ѻ҆рꙋ́жїе ми́ра, непобѣди́маѧ побѣ́да.

Сѣда́ленъ ст҃а́гѡ, гла́съ и҃:

Дре́внихъ преподо́бїю подража́ѧ, ѡ҆ст҃и́лъ є҆сѝ житїѐ твоѐ на слꙋ́жбꙋ бг҃ови въ ѻ҆смоена́десѧть лѣ́то. ѿне́лѣже и҆ бы́лъ є҆сѝ вели́къ мона́хъ, сщ҃е́нникъ, ᲂу҆чи́тель, і҆ера́рхъ, ны́нѣ же чꙋдотво́рецъ, и҆ мл҃твенникъ ѡ҆ дꙋша́хъ на́шихъ. Два́жды.

Сла́ва, и҆ ны́нѣ, пра́здника, гла́съ д҃.

Подо́бенъ: Ско́рѡ предварѝ:

Въ тебѣ̀, требл҃же́нне и҆ жизнода́вче крⷭ҇те, лю́дїе ᲂу҆чрежда́ющесѧ, спра́зднꙋютъ съ невеще́ственными ли̑ки: чи́ни а҆рхїере́йстїи бл҃гоговѣ́йнѡ воспѣва́ютъ, мно́жество же мона́шествꙋющихъ и҆ по́стникѡвъ покланѧ́ютсѧ, хрⷭ҇та́ же распе́ншагосѧ всѝ сла́вимъ.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

Горькорѡ́дныѧ преложѝ дре́вомъ мѡѷсе́й и҆сто́чники въ пꙋсты́ни дре́вле, крⷭ҇то́мъ ко бл҃гоче́стїю ꙗ҆зы́кѡвъ проѧвлѧ́ѧ преложе́нїе.

Глꙋбинѣ̀ внѣ́дривый сѣкꙋ́щꙋю, и҆здадѐ і҆ѻрда́нъ дре́вꙋ, крⷭ҇то́мъ и҆ кр҃ще́нїемъ сѣче́нїе ле́сти зна́менꙋѧ.

Сщ҃е́ннѡ ѡ҆полча́ютсѧ четвероча́стнїи лю́дїе, предходѧ́ще ѻ҆́бразомъ свидѣ́тельства ски́нїи, крестоѡбра́зными чи́нми прославлѧ́еми.

Чꙋ́днѡ простира́емь, со́лнєчныѧ лꙋчы̀ и҆спꙋща́ше крⷭ҇тъ, и҆ повѣ́даша нб҃са̀ сла́вꙋ бг҃а на́шегѡ.

И҆́нъ.

І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.

И҆з̾ мла́да воспита́нъ въ до́бромъ наꙋче́нїи, ѻ҆стротꙋ̀ ᲂу҆ма̀ твоегѡ̀ не на сꙋемꙋ́дрєннаѧ ᲂу҆́мствѡванїѧ ѡ҆брати́лъ є҆сѝ, ст҃и́телю дими́трїе, но на созида́нїе и҆ ᲂу҆твержде́нїе правосла́вныхъ, на ѡ҆бличе́нїе же и҆ ѡ҆бꙋзда́нїе непокори́выхъ: тѣ́мже и҆ ꙗ҆ви́лсѧ є҆сѝ досто́йный а҆пⷭ҇льскагѡ прⷭ҇то́ла намѣ́стникъ.

Неистощи́мое врачевство̀ и҆сточа́етъ многоцѣле́бнаѧ ра́ка моще́й твои́хъ, и҆ и҆̀же вѣ́рою къ ни̑мъ притека́ющїи, ѡ҆брѣта́ютъ ѿ ѕлы́хъ и҆збавле́нїе.

За любо́вь, ю҆́же ко хрⷭ҇тꙋ̀ и҆ ст҃ы̑мъ и҆мѣ́лъ є҆сѝ, просла́вилсѧ є҆сѝ да́ромъ чꙋде́съ и҆ и҆сцѣле́нїй: сегѡ̀ ра́ди покланѧ́емсѧ тебѣ̀, и҆ мо́лимъ тѧ̀, ꙗ҆́кѡ ᲂу҆го́дника и҆ дрꙋ́га бж҃їѧ, да помѧне́ши на́съ во ст҃ы́хъ твои́хъ къ бг҃ꙋ мл҃твахъ.

Бг҃оро́диченъ:

Молѝ ѡ҆ на́съ чл҃вѣколю́бца бг҃а, прест҃а́ѧ влⷣчце, да не помѧне́тъ беззако́нїй на́шихъ, но да сотвори́тъ съ на́ми по млⷭ҇ти свое́й.

Пѣ́снь є҃.

І҆рмо́съ: Ѽ требл҃же́нное дре́во, на не́мже распѧ́сѧ хрⷭ҇то́съ, цр҃ь и҆ гдⷭ҇ь, и҆́мже падѐ, дре́вомъ прельсти́вый, тобо́ю прельсти́всѧ, бг҃ꙋ пригвозди́вшꙋсѧ пло́тїю, подаю́щемꙋ ми́ръ дꙋша́мъ на́шымъ.

Тебє̀, приснопѣ́тое дре́во, на не́мже простре́сѧ хрⷭ҇то́съ, є҆де́мъ хранѧ́ще ѡ҆браща́ющеесѧ ѻ҆рꙋ́жїе, крⷭ҇те, ᲂу҆стыдѣ́сѧ: стра́шный же херꙋві́мъ ᲂу҆стꙋпѝ на тебѣ̀ пригвожде́нномꙋ хрⷭ҇тꙋ̀, подаю́щемꙋ ми́ръ дꙋша́мъ на́шымъ.

Подзе́мныхъ си̑лы проти̑вныѧ крⷭ҇та̀ страша́тсѧ, начерта́ема зна́менїѧ на воздꙋ́сѣ, по немꙋ́же хо́дѧтъ нбⷭ҇ныхъ и҆ земноро́дныхъ ро́ди, колѣ̑на преклонѧ́юще хрⷭ҇тꙋ̀, подаю́щемꙋ ми́ръ дꙋша́мъ на́шымъ.

Зарѧ́ми нетлѣ́нными ꙗ҆́вльсѧ бж҃е́ственный крⷭ҇тъ ѡ҆мрачє́ннымъ ꙗ҆зы́кѡмъ, заблꙋждє́ннымъ въ пре́лести, бж҃е́ственный свѣ́тъ ѡ҆блиста́въ, ᲂу҆своѧ́етъ на не́мъ пригвожде́нномꙋ хрⷭ҇тꙋ̀, подаю́щемꙋ ми́ръ дꙋша́мъ на́шымъ.

И҆́нъ.

І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Сохранѝ, ст҃и́телю хрⷭ҇то́въ, ѻ҆те́чество твоѐ ненавѣ́тно ѿ врагѡ́въ, и҆ да́рꙋй на сопроти̑вныѧ побѣ́дꙋ и҆ ѡ҆долѣ́нїе хрⷭ҇тоно́сномꙋ наро́дꙋ на́шемꙋ.

Ѡ҆градѝ на́съ, ᲂу҆го́дниче бж҃їй дими́трїе, ѿ всѣ́хъ ко́зней лꙋка́вагѡ дїа́вола, да непреткнове́ннѡ возмо́жемъ прейтѝ пꙋ́ть житїѧ̀ сегѡ̀ во и҆сполне́нїе за́повѣдей бж҃їихъ.

Разженѝ, ѻ҆́тче дими́трїе, тьмꙋ̀ грѣхо́внꙋю ѿ дꙋше́вныхъ ѻ҆че́съ на́шихъ, и҆ просвѣтѝ на́съ позна́нїемъ во́ли бж҃їѧ, да во свѣ́тѣ за́повѣдей є҆гѡ̀ соверши́мъ до́брѣ тече́нїе на́ше.

Бг҃оро́диченъ:

Дв҃о непоро́чнаѧ, ро́ждшаѧ свѣ́тъ и҆́стинный, ѡ҆блиста́й на́мъ свѣ́тъ бг҃овѣ́дѣнїѧ во сп҃се́нїе на́ше.

Пѣ́снь ѕ҃.

І҆рмо́съ: Во́днагѡ ѕвѣ́рѧ во ᲂу҆тро́бѣ, дла̑ни і҆ѡ́на крестови́днѡ распросте́ръ, сп҃си́тельнꙋю стрⷭ҇ть проѡбража́ше ꙗ҆́вѣ. тѣ́мъ тридне́венъ и҆зше́дъ, премі́рное воскрⷭ҇нїе прописа́ше, пло́тїю пригвожде́ннагѡ хрⷭ҇та̀ бг҃а, и҆ тридне́внымъ воскрⷭ҇нїемъ мі́ръ просвѣ́щшагѡ.

Ста́ростїю преклони́всѧ и҆ недꙋ́гомъ ѡ҆тѧгче́нъ, и҆спра́висѧ і҆а́кѡвъ, рꙋ́цѣ премѣни́въ, дѣ́йствїе ꙗ҆влѧ́ѧ жизноно́снагѡ крⷭ҇та̀: и҆́бо ве́тхость зако́ннагѡ сѣно́внагѡ писа́нїѧ новописа̀, на се́мъ пло́тїю пригвозди́выйсѧ бг҃ъ, и҆ дꙋшегꙋби́тельный недꙋ́гъ ле́сти ѿгна̀.

На ю҆́ныѧ возложи́въ дла̑ни бж҃е́ственный і҆и҃ль крестови́днѡ главы̑, ꙗ҆влѧ́ше, ꙗ҆́кѡ старѣ́йшаѧ сла́ва законослꙋжи́тєли лю́дїе. тѣ́мже подмнѣ́всѧ та́кѡ и҆зпрельсти́тисѧ, не и҆змѣнѝ жизноно́снагѡ ѻ҆́браза: превзы́дꙋтъ бо лю́дїе хрⷭ҇тѡ́вы бж҃їи новоꙋтвержде́ннїи, вопїѧ́ше, крⷭ҇то́мъ ѡ҆гражда́еми.

И҆́нъ.

І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многомлⷭ҇тиве.

Воззрѝ милосе́рдымъ ѻ҆́комъ, ст҃и́телю хрⷭ҇то́въ, на волне́нїе грѣхо́вное на́съ ѡ҆бꙋрева́ющее, и҆ ᲂу҆пра́ви пла́ванїе на́ше въ ти́хое приста́нище милосе́рдїѧ бж҃їѧ.

Бꙋ́ди на́мъ до́брый ко́рмчїй, ѻ҆́тче дими́трїе, и҆ не ѡ҆ста́ви на́съ поги́бнꙋти во грѣсѣ́хъ на́шихъ: но въ ни́хже са́мъ ꙗ҆́кѡ человѣ́къ и҆скꙋша́емь бы́лъ є҆сѝ, помозѝ и҆ на́мъ и҆скꙋша́ємымъ, ст҃е дими́трїе, бꙋ́ди ѡ҆ на́съ застꙋ́пникъ и҆ хода́тай ко многомлⷭ҇тивомꙋ бг҃ꙋ, да возведе́тъ ѿ тлѝ живо́тъ на́шъ.

Бг҃оро́диченъ:

Оу҆стна́ми и҆ се́рдцемъ велича́емъ тѧ̀ мт҃рь бж҃їю: ты́ же, примири́вшаѧ бг҃ꙋ ве́сь ро́дъ человѣ́ческїй, не ѿри́ни на́съ ѿ твоегѡ̀ застꙋпле́нїѧ.

Конда́къ ст҃а́гѡ, гла́съ и҃:

Ѕвѣздꙋ̀ рѡссі́йскꙋю, ѿ кі́ева возсїѧ́вшꙋю и҆ чрез̾ но́вградъ сѣ́верскїй въ росто́въ дости́гшꙋю, всю́ же странꙋ̀ сїю̀ ᲂу҆че́ньми и҆ чꙋдесы̀ ѡ҆зари́вшꙋю, ᲂу҆бл҃жи́мъ златослове́снаго ᲂу҆чи́телѧ дими́трїа: то́й бо всѣ́мъ всѧ̑ написа̀, ꙗ҆̀же къ наставле́нїю, да всѣ́хъ прїѡбрѧ́щетъ, ꙗ҆́коже па́ѵелъ хрⷭ҇тꙋ̀, и҆ сп҃се́тъ правовѣ́рїемъ дꙋ́шы на́шѧ.

І҆́косъ:

Првⷣнымъ ѡ҆ ка́ющихсѧ на нб҃сѝ, на́мъ же грѣ̑шнымъ на землѝ, ѡ҆ тебѣ̀, првⷣниче дими́трїе, подоба́етъ возра́доватисѧ, ꙗ҆́кѡ но́ваго тѧ̀ къ бг҃ꙋ мл҃твенника ѡ҆ на́съ стѧжа́хомъ: є҆го́же досто́йными похвала́ми ᲂу҆блажа́юще, си́це ѿ ра́дости зове́мъ: ра́дꙋйсѧ, росто́вскаѧ похвало̀ и҆ всеѧ̀ рѡссі́и похвале́нїе.

Пѣ́снь з҃.

І҆рмо́съ: Безꙋ́мное велѣ́нїе мꙋчи́телѧ ѕлочести́вагѡ лю́ди поколеба̀, ды́шꙋщее преще́нїе и҆ ѕлохꙋле́нїе бг҃оме́рзкое: ѻ҆ба́че трѝ ѻ҆́троки не ᲂу҆страшѝ ꙗ҆́рость ѕвѣ́рскаѧ, ни ѻ҆́гнь снѣда́ѧй, но противоды́шꙋщꙋ росоно́сномꙋ дꙋ́хꙋ, со ѻ҆гне́мъ сꙋ́ще поѧ́хꙋ: препѣ́тый ѻ҆тцє́въ и҆ на́съ бж҃е, бл҃гослове́нъ є҆сѝ.

Ѿ дре́ва вкꙋси́въ пе́рвый въ человѣ́цѣхъ, въ тлѣ́нїе всели́сѧ: ѿверже́нїемъ бо жи́зни безче́стнѣйшимъ ѡ҆сꙋди́всѧ, всемꙋ̀ ро́дꙋ тѣлотлѣ́ненъ нѣ́кїй, ꙗ҆́кѡ вре́дъ недꙋ́га преподадѐ: но ѡ҆брѣ́тше земноро́днїи воззва́нїе крⷭ҇тнымъ дре́вомъ, зове́мъ: препѣ́тый ѻ҆тцє́въ и҆ на́съ бж҃е, бл҃гослове́нъ є҆сѝ.

Разрꙋшѝ повелѣ́нїе бж҃їе преслꙋша́нїе, и҆ дре́во принесѐ сме́рть человѣ́кѡмъ, є҆́же не бл҃говре́меннѡ (с. 755) прича́стно бы́вшее: во ᲂу҆твержде́нїе же ѕѣлѡ̀ честна́гѡ, ѿтꙋ́дꙋ жи́зни дре́во возбранѧ́емо бѣ̀, є҆́же разбо́йникꙋ ѕлоꙋме́ршꙋ ѿве́рзе, бл҃горазꙋ́мнѡ зовꙋ́щꙋ: препѣ́тый ѻ҆тцє́въ и҆ на́съ бж҃е, бл҃гослове́нъ є҆сѝ.

Жезла̀ ѡ҆б̾е́млетъ кра́й і҆ѡ́сифова, бꙋ̑дꙋщаѧ зрѧ̀ і҆и҃ль, црⷭ҇твїѧ держа́вное, ꙗ҆́кѡ воз̾имꙋ́ществитъ пресла́вный крⷭ҇тъ, проѧвлѧ́ѧ: се́й бо побѣдоно́снаѧ похвала̀, и҆ свѣ́тъ вѣ́рою зовꙋ́щымъ: препѣ́тый ѻ҆тцє́въ и҆ на́съ бж҃е, бл҃гослове́нъ є҆сѝ.

И҆́нъ.

І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Хрⷭ҇то́ва ра́ди смире́нїѧ, ѻ҆́бразъ смире́нїѧ ꙗ҆ви́лсѧ є҆сѝ, ст҃е дими́трїе. и҆ мнѣ̀ пода́ждь, не въ го́рдости, но во смире́нїи взыва́ти: бл҃гослове́нъ є҆сѝ, бж҃е ѻ҆тє́цъ на́шихъ.

Воздержа́нїемъ покори́лъ є҆сѝ тѣ́ло дꙋ́хꙋ твоемꙋ̀, ст҃и́телю дими́трїе. пода́ждь и҆ мнѣ̀ въ воздержа́нїи пожи́ти, да нескве́рными ᲂу҆стна́ми воззовꙋ̀: бл҃гослове́нъ є҆сѝ, бж҃е ѻ҆тє́цъ на́шихъ.

Оу҆чє́нїи твои́ми, ѻ҆́тче дими́трїе, ᲂу҆правлѧ́еши мы̑сли на́шѧ. и҆ мы̀, подража́юще тебѣ̀, воспѣва́емъ бг҃ꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ:

Безнача́льнаго бг҃а зачала̀ є҆сѝ во чре́вѣ твое́мъ, пречⷭ҇таѧ дв҃о, то́же пою́ще зове́мъ: бл҃гослове́нъ бг҃ъ ѻ҆тє́цъ на́шихъ.

Пѣ́снь и҃.

І҆рмо́съ: Бл҃гослови́те, ѻ҆́троцы, трⷪ҇цы равночи́сленнїи, содѣ́телѧ ѻ҆ц҃а̀ бг҃а, по́йте снизше́дшее сло́во и҆ ѻ҆́гнь въ ро́сꙋ претво́ршее, и҆ превозноси́те всѣ̑мъ жи́знь подава́ющаго, дх҃а всест҃а́го, во вѣ́ки.

Воздвиза́емꙋ дре́вꙋ, ѡ҆кропле́нꙋ кро́вїю вопло́щшагѡсѧ сло́ва бг҃а, по́йте, нбⷭ҇ныѧ си̑лы: земны́хъ воззва́нїе пра́зднꙋюще, лю́дїе, поклони́тесѧ хрⷭ҇то́вꙋ крⷭ҇тꙋ̀, и҆́мже мі́рꙋ воста́нїе во вѣ́ки.

Земноро́днїи, дла́ньми, строи́телїе бл҃года́ти, крⷭ҇тъ, на не́мже стоѧ́ше хрⷭ҇то́съ бг҃ъ, возноси́те сщ҃еннолѣ́пнѡ и҆ копїѐ, бж҃їѧ сло́ва тѣ́ло пробо́дшее, да ви́дѧтъ ꙗ҆зы́цы всѝ сп҃се́нїе бж҃їе, сла́вѧще є҆го̀ во вѣ́ки.

Бж҃е́ственнымъ сꙋдо́мъ пред̾избра́ннїи, весели́тесѧ, хрⷭ҇тїа́нстїи вѣ́рнїи лю́дїе: хвали́тесѧ побѣдоно́снымъ ѻ҆рꙋ́жїемъ, прїе́мше ѿ бг҃а крⷭ҇тъ честны́й: въ се́мъ бо колѣ̑на бра́ней де́рзости и҆́щꙋще, разсыпа́ютсѧ во вѣ́ки.

И҆́нъ.

І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, и҆ првⷣнагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти: тѧ̀ превозно́симъ во всѧ̑ вѣ́ки.

Ты̀ бы́лъ є҆сѝ до́брый ᲂу҆чи́тель на́шъ, ѻ҆́тче дими́трїе, вопїѧ̀ всѣ̑мъ послꙋ́шающымъ ᲂу҆че́нїѧ твоегѡ̀: превозноси́те хрⷭ҇та̀ во вѣ́ки.

Бг҃омꙋ́дрый і҆ера́рше, всебл҃же́нне дими́трїе, ми́лостивою и҆ человѣколю́бною къ на́мъ любо́вїю, молѝ ѡ҆ на́съ чл҃вѣколюби́ваго бг҃а, є҆го́же превозно́симъ во всѧ̑ вѣ́ки.

Ѕловре́дное мꙋдрова́нїе сꙋемꙋ́дрѡвъ и҆спрове́рглъ є҆сѝ, ст҃е дими́трїе: вѣ̑рныѧ же наста́вилъ є҆сѝ пребы́ти тве́рдыми во и҆́стиннѣй вѣ́рѣ, превозноси́те, вопїѧ̀, хрⷭ҇та̀ во вѣ́ки.

Бг҃оро́диченъ:

Преесте́ственное и҆ чꙋ́дное ржⷭ҇тво̀ твоѐ, дв҃о, воспѣва́емъ бл҃гоче́стнѡ, превозносѧ́ще хрⷭ҇та̀ во вѣ́ки.

На ѳ҃-й пѣ́сни Честнѣ́йшꙋю не пое́мъ, но пое́мъ припѣ́въ пра́здника:

Велича́й, дꙋшѐ моѧ̀, пречестны́й крⷭ҇тъ гдⷭ҇ень.

Та́же, і҆рмо́съ а҃-гѡ канѡ́на: Та́инъ є҆сѝ, бцⷣе:

И҆ дрꙋгі́й ли́къ подо́бнѣ, припѣ́въ и҆ і҆рмо́съ.

И҆ къ про́чымъ ѕ҃ стїхѡ́мъ то́йже припѣ́въ пое́мъ.

Пѣ́снь ѳ҃.

І҆рмо́съ: Та́инъ є҆сѝ, бцⷣе, ра́й, невоздѣ́ланнѡ возрасти́вши хрⷭ҇та̀, и҆́мже крⷭ҇тное живоно́сное на землѝ насади́сѧ дре́во. тѣ́мъ ны́нѣ возноси́мꙋ покланѧ́ющесѧ є҆мꙋ̀, тѧ̀ велича́емъ.

Да возра́дꙋютсѧ древа̀ дꙋбра̑внаѧ всѧ̑, ѡ҆ст҃и́вшꙋсѧ є҆стествꙋ̀ и҆́хъ, ѿ негѡ́же и҆знача́ла насади́шасѧ, хрⷭ҇тꙋ̀ распросте́ршꙋсѧ на дре́вѣ. тѣ́мъ ны́нѣ возноси́мꙋ покланѧ́ющесѧ є҆мꙋ̀, тѧ̀ велича́емъ.

Сщ҃е́нный воста̀ ро́гъ и҆ глава̀ всѣ̑мъ бг҃омꙋ̑дрымъ крⷭ҇тъ, и҆́мже грѣ́шныхъ мы́сленнѡ стира́ютсѧ ро́зи всѝ. тѣ́мъ ны́нѣ возноси́мꙋ покланѧ́ющесѧ є҆мꙋ̀, тѧ̀ велича́емъ.

Дрꙋгі́й припѣ́въ:

Велича́й, дꙋшѐ моѧ̀, животворѧ́щагѡ крⷭ҇та̀ гдⷭ҇нѧ воздви́женїе.

И҆ і҆рмо́съ: Снѣ́дїю дре́ва:

И҆ дрꙋгі́й ли́къ подо́бнѣ, припѣ́въ и҆ і҆рмо́съ: тропари̑ же ѕ҃ съ си́мъ же припѣ́вомъ.

И҆́нъ.

І҆рмо́съ: Снѣ́дїю дре́ва, ро́дꙋ прибы́вшаѧ сме́рть, крⷭ҇то́мъ ᲂу҆праздни́сѧ дне́сь: и҆́бо прама́тернѧѧ всеро́днаѧ клѧ́тва разрꙋши́сѧ, прозѧбе́нїемъ чⷭ҇тыѧ бг҃ома́тере, ю҆́же всѧ̑ си̑лы нбⷭ҇ныѧ велича́ютъ.

Го́рести ᲂу҆бі́йственныѧ, ꙗ҆́же ѿ дре́ва, не ѡ҆ста́вилъ є҆сѝ, гдⷭ҇и: крⷭ҇то́мъ бо сїю̀ соверше́ннѡ и҆стреби́лъ є҆сѝ. сегѡ̀ ра́ди и҆ дре́вомъ ᲂу҆сладѝ и҆ногда̀ го́ресть во́дъ ме́рры, проѡбразꙋ́ющее крⷭ҇та̀ дѣ́йство, є҆́же всѧ̑ си̑лы нбⷭ҇ныѧ велича́ютъ.

Непреста́ннѡ грꙋжа́ємыѧ мра́комъ пра́ѻтца, гдⷭ҇и, крⷭ҇то́мъ возвы́силъ є҆сѝ дне́сь: ꙗ҆́кѡ бо ле́стїю весьма̀ неꙋдержа́ннѡ є҆стество̀ преднизведе́сѧ, всеро́днѣ ны̀ па́ки и҆спра́ви свѣ́тъ крⷭ҇та̀ твоегѡ̀, є҆го́же вѣ́рнїи велича́емъ.

Да ѻ҆́бразъ пока́жеши мі́рꙋ покланѧ́емый, гдⷭ҇и, крⷭ҇та̀, во всѣ́хъ ꙗ҆́кѡ пресла́вный на нб҃сѣ́хъ и҆з̾ѡбрази́лъ є҆сѝ, свѣ́томъ безмѣ́рнымъ ѡ҆заре́нъ, цр҃кви ѻ҆рꙋ́жїе непобѣди́мое. тѣ́мъ тѧ̀ всѧ̑ си̑лы нбⷭ҇ныѧ велича́ютъ.

И҆́нъ.

І҆рмо́съ: Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же, всечⷭ҇таѧ, ꙗ҆ви́сѧ человѣ́кѡмъ сло́во воплоще́но. є҆го́же велича́юще, съ нбⷭ҇ными вѡ́и, тѧ̀ ᲂу҆бл҃жа́емъ.

Наслажда́ѧсѧ, ѻ҆́тче, вѣ́чныѧ жи́зни, ѡ҆ не́йже ᲂу҆се́рднѡ подвиза́лсѧ є҆сѝ, молѝ и҆ на́мъ сеѧ̀ дости́гнꙋти.

А҆́ще и҆ пресели́лсѧ є҆сѝ ѿ на́съ въ гѡ́рнѧѧ, ст҃и́телю дими́трїе, ѻ҆ба́че дꙋ́хомъ пребыва́еши съ призыва́ющими тѧ̀, наꙋча́ѧ и҆ ᲂу҆крѣплѧ́ѧ ходи́ти по стезѝ сп҃си́тельныхъ за́повѣдей бж҃їихъ.

Ꙗ҆ви́лсѧ є҆сѝ бл҃гоче́стїѧ свѣти́льникъ всесвѣ́тлый, ри́торъ и҆зѧ́щнѣйшїй и҆ правосла́вныхъ а҆рхїере́євъ ᲂу҆добре́нїе. тѣ́мъ тѧ̀ серде́чною любо́вїю досто́йнѡ велича́емъ.

Бг҃оро́диченъ:

Бцⷣе дв҃о, є҆го́же родила̀ є҆сѝ чл҃вѣколю́бца бг҃а, молѝ со ст҃и́телемъ дими́трїемъ, да сп҃се́тъ дꙋ́шы на́шѧ.

Катава́сїа: Та́инъ є҆сѝ, бцⷣе, ра́й:

Дрꙋгі́й: Снѣ́дїю дре́ва:

Съ припѣ́вы. И҆ покло́нъ.

Свѣти́ленъ пра́здника.

Подо́бенъ: Оу҆ч҃нкѡ́мъ:

Крⷭ҇тъ, храни́тель всеѧ̀ вселе́нныѧ: крⷭ҇тъ, красота̀ цр҃кве: крⷭ҇тъ, вѣ́рныхъ ᲂу҆твержде́нїе: крⷭ҇тъ, а҆́гг҃лѡвъ сла́ва и҆ де́монѡвъ ꙗ҆́зва.

Сла́ва, ст҃а́гѡ, гла́съ и҃:

Поставлѧ́ѧй предѣ́лы ꙗ҆зы́кѡвъ по числꙋ̀ а҆́гг҃лъ свои́хъ, и҆ собира́ѧй ѿ разсѣ́ѧнныхъ сынѡ́въ а҆да́млихъ цр҃ковь свою̀, ᲂу҆множа́еши въ не́й ст҃ы̑ѧ твоѧ̑, бж҃е на́шъ, ꙗ҆́кѡ ѕвѣ́зды на небесѝ, ѿ ни́хже просїѧ̀ и҆ па́мѧть ст҃и́телѧ твоегѡ̀ дими́трїа. є҆гѡ́же ра́ди просвѣтѝ дꙋ́шы помрачє́нныѧ раздо́рнымъ сꙋевѣ́рїемъ, да вкꙋ́пѣ зове́мъ тѝ пѣ́снь трегꙋ́бꙋю: а҆ллилꙋ́їа.

И҆ ны́нѣ, пра́здника.

Подо́бенъ: Жєны̀, ᲂу҆слы́шите:

Крⷭ҇тъ воздвиза́етсѧ дне́сь, и҆ мі́ръ ѡ҆сщ҃а́етсѧ: и҆́же бо со ѻ҆ц҃е́мъ сѣдѧ́й и҆ дх҃омъ ст҃ы́мъ, на се́мъ рꙋ́цѣ распрострѐ: мі́ръ ве́сь привлечѐ къ твоемꙋ̀, хрⷭ҇тѐ, позна́нїю. и҆̀же ᲂу҆̀бо на тѧ̀ надѣ́ющыѧсѧ, бж҃е́ственныѧ сподо́би сла́вы.

На хвали́техъ стїхи̑ры пра́здника, гла́съ и҃.

Самоподѡ́бны:

Ѽ пресла́внагѡ чꙋдесѐ, живоно́сный са́дъ, крⷭ҇тъ прест҃ы́й на высотꙋ̀ возноси́мь ꙗ҆влѧ́етсѧ дне́сь. славосло́вѧтъ всѝ концы̀ земні́и, ᲂу҆страша́ютсѧ де́монстїи полцы̀. ѽ каковы́й да́ръ земны̑мъ дарова́сѧ: и҆́мже, хрⷭ҇тѐ, сп҃сѝ дꙋ́шы на́шѧ, ꙗ҆́кѡ є҆ди́нъ бл҃гоꙋтро́бенъ.

Ѽ пресла́внагѡ чꙋдесѐ, ꙗ҆́кѡ гро́здъ и҆спо́лненъ живота̀, понесы́й вы́шнѧго, ѿ землѝ воздвиза́емъ крⷭ҇тъ ви́дитсѧ дне́сь, и҆́мже всѝ къ бг҃ꙋ привлеко́хомсѧ, и҆ поже́рта бы́сть до конца̀ сме́рть. ѽ дре́во пречестно́е, и҆́мже воспрїѧ́хомъ во є҆де́мѣ безсме́ртнꙋю пи́щꙋ, хрⷭ҇та̀ сла́вѧще.

Ѽ пресла́внагѡ чꙋдесѐ, широта̀ крⷭ҇та̀ и҆ долгота̀ нб҃сѝ равна̀ є҆́сть: ꙗ҆́кѡ бж҃е́ственною бл҃года́тїю ѡ҆сщ҃а́етъ всѧ́чєскаѧ. ѡ҆ се́мъ ꙗ҆зы́цы ва́рварстїи побѣжда́ютсѧ, ѡ҆ се́мъ вѣ́ра ᲂу҆твержда́етсѧ. ѽ бж҃е́ственныѧ лѣ́ствицы, є҆́юже восхо́димъ на нб҃са̀, возносѧ́ще въ пѣ́снехъ хрⷭ҇та̀ гдⷭ҇а.

И҆ ст҃а́гѡ, гла́съ ѕ҃.

Подо́бенъ: Всю̀ ѿложи́вше:

Ве́сь ѿ ю҆́ности твоеѧ̀ возложи́лсѧ є҆сѝ на взыска́нїе премꙋ́дрости и҆ стра́ха бж҃їѧ, ꙗ҆̀же ѡ҆брѣ́тъ, не въ землѝ а҆́ки лѣни́вый ра́бъ сокры́лъ є҆сѝ: но ᲂу҆чѧ̀ и҆ творѧ̀ по да́вшемꙋ тѝ тала́нтъ, во сто̀ трꙋдѡ́въ ᲂу҆мно́жилъ є҆сѝ є҆го̀, и҆ бы́лъ є҆сѝ вели́кїй кꙋпе́цъ, и҆зносѧ́й на свѣ́тъ вє́тхаѧ и҆ нѡ́ваѧ, и҆ ѿкрыва́ѧ глꙋбины̑ ра́зꙋма бг҃опи́санныхъ кни́гъ, кꙋ́плю до́брꙋ дѣ́ѧти наꙋчи́лъ є҆сѝ на́съ. тѣ́мъ, бл҃гі́й и҆ вѣ́рный ра́бе бж҃їй дими́трїе, за толи̑ка ꙗ҆влє́нна твоѧ̑ къ на́мъ сокрѡ́вища, вше́лъ є҆сѝ въ ра́дость гдⷭ҇а твоегѡ̀.

Ве́сь ᲂу҆́мъ плѣни́лъ є҆сѝ въ послꙋша́нїе вѣ́ры, да бл҃ги́ми дѣ́лы ᲂу҆краси́ши ю҆̀, ѿню́дꙋже и҆ дѣ́латель вїногра́да хрⷭ҇то́ва ꙗ҆ви́лсѧ є҆сѝ и҆скꙋ́сный. всѧ́кꙋ бо ро́згꙋ, не творѧ́щꙋ плода̀, стра́хомъ гдⷭ҇нимъ посѣ́клъ є҆сѝ, и҆ є҆ди́но бл҃гоче́стїе сохранѧ́лъ є҆сѝ въ не́мъ: ѿвнѣ̀ є҆го̀ ѡ҆гражда́лъ є҆сѝ догма̑ты цр҃ко́вными, внꙋтрьꙋ́дꙋ ᲂу҆крѣпи́лъ є҆сѝ столпо́мъ правосла́вїѧ, всю́дꙋ предточи̑лїѧ и҆скопава́ѧ ᲂу҆че́нїй твои́хъ. тѣ́мъ и҆ ны́нѣ, ст҃ы́й трꙋдолю́бче дими́трїе, присѣща́й вїногра́дъ тво́й, є҆го́же насадѝ десни́ца вы́шнѧгѡ, да плодоприно́ситъ гро́здїе сп҃се́нїѧ.

Сла́ва, гла́съ ѕ҃:

Воспо́й, рѡссі́е, гдⷭ҇еви пѣ́снь но́вꙋ, похвалѝ, гра́де, бг҃а твоего̀, росто́ве: ꙗ҆́кѡ бл҃говолѝ вы́шнїй дарова́ти на́мъ но́ваго чꙋдотво́рца дими́трїа, свидѣ́тельствована ѿ всѣ́хъ и҆ ѿ са́мыѧ и҆́стины. є҆гѡ́же па́мѧть во ст҃ы́хъ почита́юще, восхва́лимъ и҆ мы̀, ста́рцы съ ю҆́нотами, и҆ возвели́чимъ да́вшаго бг҃а на́шего толи́комꙋ ᲂу҆го́дникꙋ своемꙋ̀ въ на́съ просїѧ́ти, нетлѣ́нїемъ ст҃олѣ́пнымъ и҆ чꙋдодѣ́йствїемъ.

И҆ ны́нѣ, пра́здника, гла́съ то́йже:

Дне́сь происхо́дитъ крⷭ҇тъ гдⷭ҇ень, и҆ вѣ́рнїи прїе́млютъ того̀ жела́нїемъ, и҆ взе́млютъ и҆сцѣлє́нїѧ дꙋши́ же и҆ тѣ́ла, и҆ всѧ́кїѧ болѣ́зни. сего̀ цѣлꙋ́имъ ра́достїю и҆ стра́хомъ: стра́хомъ, грѣха̀ ра́ди, ꙗ҆́кѡ недосто́йни сꙋ́ще: ра́достїю же, сп҃се́нїѧ ра́ди, є҆́же подае́тъ мі́рꙋ на то́мъ пригвозди́выйсѧ хрⷭ҇то́съ бг҃ъ, и҆мѣ́ѧй ве́лїю млⷭ҇ть.

Славосло́вїе вели́кое. По трист҃о́мъ тропа́рь ст҃а́гѡ,

Сла́ва, и҆ ны́нѣ, пра́здника.

Та́же є҆ктєнїѝ, и҆ ѿпꙋ́стъ.

На часѣ́хъ тропа́рь пра́здника, Сла́ва, ст҃а́гѡ: конда́къ пра́здника и҆ ст҃а́гѡ премѣнѧ́юще.

На лїтꙋргі́и:

Бл҃жє́нна, ѿ канѡ́на пра́здника пѣ́снь ѳ҃-ѧ на д҃, и҆ ст҃а́гѡ пѣ́снь ѕ҃-ѧ на д҃. По вхо́дѣ тропа́рь пра́здника, и҆ ст҃а́гѡ: Сла́ва, конда́къ ст҃а́гѡ: И҆ ны́нѣ, конда́къ пра́здника. Прокі́менъ и҆ прича́стенъ пра́здника и҆ ст҃а́гѡ. А҆пⷭ҇лъ ко є҆вре́ємъ, зача́ло ти҃і. Є҆ѵⷢ҇лїе ѿ і҆ѡа́нна, зача́ло л҃ѕ.

Комментарии для сайта Cackle