Мѣ́сѧца тогѡ́же въ и҃-й де́нь. Ржⷭ҇тво̀ прест҃ы́ѧ влⷣчцы на́шеѧ бцⷣы, и҆ приснодв҃ы марі́и.

На ма́лѣй вече́рни, на Гдⷭ҇и, воззва́хъ: стїхи̑ры на д҃, гла́съ а҃.

Подо́бенъ: Нбⷭ҇ныхъ чинѡ́въ:

І҆ѡакі́мъ и҆ а҆́нна торжествꙋ́ютъ, ꙳ нача́токъ ро́ждше на́шегѡ спасе́нїѧ, ꙳ є҆ди́нꙋ бцⷣꙋ. ꙳ съ ни́миже и҆ мы̀ пра́зднꙋемъ дне́сь, ꙳ ѿ ко́рене ѻ҆́нагѡ і҆ессе́ева, ꙳ блажа́ще дв҃ꙋ чⷭ҇тꙋю.

Ѿ а҆́нны дне́сь цвѣ́тъ, ꙳ са́дъ бг҃ода́нный, ꙳ бцⷣа прозѧбѐ, спасе́нїе человѣ́кѡвъ: ꙳ и҆зъ неѧ́же всѣ́хъ зижди́тель ро́ждсѧ па́че ᲂу҆ма̀, ꙳ а҆да́мовꙋ ѡ҆чища́етъ ꙗ҆́кѡ бл҃гъ, ꙳ всю̀ скве́рнꙋ бл҃гостїю.

Кто̀ дово́льнѡ по досто́инствꙋ пѣ́ти возмо́жетъ, ѿ а҆́нны неизрече́ннѡ младе́нствꙋющꙋю дв҃ꙋ; ꙳ го́ры ᲂу҆́бѡ и҆ хо́лми сла́дость и҆ска́пайте дне́сь: ꙳ всѣ́хъ бо жи́знь и҆ ѡ҆чище́нїе ꙳ млеко́мъ пита́етсѧ, ꙳ бцⷣа чⷭ҇таѧ.

Ꙗ҆́же пре́жде непло́днаѧ страна̀, ꙳ зе́млю плодоно́снꙋ ражда́етъ: ꙳ и҆ ѿ непло́дныѧ ᲂу҆тро́бы пло́дъ свѧ́тъ да́вши, млеко́мъ пита́етсѧ. ꙳ чꙋ́до стра́шно. пита́тельница жи́зни на́шеѧ, ꙳ ꙗ҆́же нбⷭ҇ный хлѣ́бъ во чре́вѣ прїе́мши, ꙳ мле́комъ ѿ сѡсцꙋ̀ пита́етсѧ.

Сла́ва, и҆ ны́нѣ, гла́съ д҃:

Всечⷭ҇тно́е твоѐ ржⷭ҇тво̀, прест҃а́ѧ дв҃о чⷭ҇таѧ, а҆́гг҃лѡвъ мно́жество на небесѝ, и҆ человѣ́ческїй ро́дъ на землѝ ᲂу҆блажа́емъ: ꙗ҆́кѡ мт҃и была̀ є҆сѝ творца̀ всѣ́хъ хрⷭ҇та̀ бг҃а. того̀ молѧ́щи ѡ҆ на́съ не преста́й мо́лимсѧ, и҆̀же на тѧ̀ по бз҃ѣ ᲂу҆пова́нїе поло́жшихъ, бцⷣе всепѣ́таѧ и҆ неискꙋсобра́чнаѧ.

На стїхо́внѣ стїхи̑ры, гла́съ в҃. Поⷣ: До́ме є҆ѵфра́ѳовъ:

Ра́дꙋйтесѧ і҆ѡакі́ме и҆ а҆́нно: ꙳ ра́дꙋйтесѧ, ꙗ҆́кѡ ра́дости ꙳ и҆ спасе́нїѧ хода́таица, ꙳ ѿ непло́дове дв҃а, ꙳ на́мъ ражда́етсѧ.

Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.

Ты̀ є҆ди́на земны́хъ ꙳ показа́ласѧ є҆сѝ спасе́нїе, ꙳ ꙗ҆́кѡ ро́ждши сло́во, ꙳ па́че сло́ва и҆ є҆стества̀: ꙳ тѣ́мъ тѧ̀ ᲂу҆блажа́емъ.

Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.

Ѿложѝ а҆да́ме и҆ є҆́ѵо, ꙳ всѧ́кꙋ печа́ль: ꙳ мт҃и бо ра́дости ꙳ ѿ непло́дове ꙳ пресла́внѡ прозѧба́етъ дне́сь.

Сла́ва, и҆ ны́нѣ, Подо́бенъ: то́йже:

Хра́мъ бж҃їй, ꙳ є҆ди́на бцⷣа, ꙳ ѿ непло́дове ꙳ и҆ неражда́ющїѧ происхо́дитъ: ꙳ и҆ ра́дꙋетсѧ а҆да́мъ взыва́ѧ.

Тропа́рь, гла́съ д҃:

Ржⷭ҇тво̀ твоѐ бцⷣе дв҃о, ра́дость возвѣстѝ все́й вселе́ннѣй: и҆зъ тебє́ бо возсїѧ̀ сл҃нце пра́вды, хрⷭ҇то́съ бг҃ъ на́шъ, и҆ разрꙋши́въ клѧ́твꙋ, дадѐ благослове́нїе, и҆ ᲂу҆праздни́въ сме́рть, дарова̀ на́мъ живо́тъ вѣ́чный.

На вели́цѣй вече́рни стїхологисꙋ́емъ Блаже́нъ мꙋ́жъ: а҃ а҆нтїфѡ́нъ.

На Гдⷭ҇и, воззва́хъ: стїхи̑ры на и҃, гла́съ ѕ҃, самогла́сны. Се́ргїа патрїа́рха:

Дне́сь и҆́же на разꙋ́мныхъ престо́лѣхъ почива́ѧй бг҃ъ, престо́лъ свѧ́тъ на землѝ себѣ̀ пред̾ꙋгото́ва: ᲂу҆тверди́вый мꙋ́дростїю нб҃са̀, не́бо ѡ҆дꙋшевле́нное человѣколю́бїемъ содѣ́ла. ѿ непло́днагѡ бо ко́рене, са́дъ живоно́сенъ и҆зрастѝ на́мъ, мт҃рь свою̀, и҆́же чꙋде́съ бг҃ъ, и҆ ненадѣ́ющихсѧ наде́жда: гдⷭ҇и сла́ва тебѣ̀.

Є҆ди́ножды.

Се́й де́нь гдⷭ҇ень, ра́дꙋйтесѧ лю́дїе: се́ бо свѣ́та черто́гъ, и҆ кни́га сло́ва живо́тнагѡ, и҆зъ ᲂу҆тро́бы произы́де. и҆ ꙗ҆́же въ восто́кѡмъ две́рь ро́ждшисѧ, ѡ҆жида́етъ вхо́да ст҃и́телѧ вели́кагѡ, є҆ди́на и҆ є҆ди́наго вводѧ́щи хрⷭ҇та̀ во вселе́ннꙋю, во спасе́нїе дꙋ́шъ на́шихъ.

Є҆ди́ножды.

А҆́ще и҆ бжⷭ҇твеннымъ хотѣ́нїемъ, свѣ̑тлыѧ неплѡ́дны жє́ны прозѧбо́ша, но всѣ́хъ марі́а рожде́нныхъ бг҃олѣ́пнѡ превозсїѧ̀: ꙗ҆́кѡ ѿ непло́дныѧ пресла́внѡ ро́ждшисѧ ма́тере, породѝ пло́тїю всѣ́хъ бг҃а, па́че є҆стества̀ ѿ безсѣ́менныѧ ᲂу҆тро́бы: є҆ди́на две́рь, є҆диноро́днагѡ сн҃а бж҃їѧ, ю҆́же проше́дъ заключе́ннꙋ сохранѝ, и҆ всѧ̑ мꙋ́дрѣ ᲂу҆стро́ивъ, ꙗ҆́кѡ вѣ́сть са́мъ, всѣ̑мъ человѣ́кѡмъ спасе́нїе содѣ́ла.

Два́жды.

Стефа́на свѧтогра́дца:

Дне́сь неплѡ́днаѧ врата̀ ѿверза́ютсѧ, и҆ две́рь дв҃и́ческаѧ бжⷭ҇твеннаѧ предгрѧде́тъ: дне́сь пло́дъ ражда́ти бл҃года́ть начина́етъ, ꙗ҆влѧ́ющи мі́рꙋ бж҃їю мт҃рь, є҆́юже земна̑ѧ съ нбⷭ҇ными совокꙋплѧ́ютсѧ, во спасе́нїе дꙋ́шъ на́шихъ.

Два́жды.

Дне́сь всемі́рныѧ ра́дости провозвѣще́нїе, дне́сь возвѣ́ѧша вѣ́три, спасе́нїѧ провозвѣ́стницы, є҆стества̀ на́шегѡ разрѣша́етсѧ непло́дство: непло́ды бо ма́ти показꙋ́етсѧ, дѣ́вствꙋющїѧ и҆ по ржⷭ҇твѣ̀ зижди́телевѣ, и҆зъ неѧ́же чꙋ́ждее присвоѧ́етъ и҆́же є҆стество́мъ бг҃ъ, и҆ заблꙋ́ждшымъ пло́тїю спасе́нїе содѣва́етъ, хрⷭ҇то́съ чл҃вѣколю́бецъ, и҆ и҆зба́витель дꙋ́шъ на́шихъ.

Є҆ди́ножды.

Дне́сь непло́днаѧ а҆́нна ражда́етъ бг҃оѻтрокови́цꙋ, ѿ всѣ́хъ родѡ́въ произбра́ннꙋю, въ жили́ще всѣ́хъ цр҃ѧ̀, и҆ зижди́телѧ хрⷭ҇та̀ бг҃а, во и҆сполне́нїе бжⷭ҇твеннагѡ смотре́нїѧ: и҆́мже назда́хомсѧ земноро́днїи, и҆ ѡ҆бнови́хомсѧ ѿ тлѝ къ жи́зни неконе́чнѣй.

Є҆ди́ножды.

Сла́ва, и҆ ны́нѣ, пе́рвꙋю стїхи́рꙋ: Дне́сь и҆́же на разꙋ́мныхъ престо́лѣхъ:

Вхо́дъ. Прокі́менъ днѐ.

Бытїѧ̀ чте́нїе.

[Глава̀ к҃и] И҆зы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нь. И҆ ѡ҆брѣ́те мѣ́сто, и҆ спа̀ та́мѡ, за́йде бо со́лнце: и҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ: и҆ со́нъ ви́дѣ. И҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до нб҃съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. Гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ, ѻ҆тца̀ твоегѡ̀, и҆ бг҃ъ і҆саа́ковъ, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀. И҆ бꙋ́детъ сѣ́мѧ твоѐ, ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки. И҆ возблагословѧ́тсѧ ѡ҆ тебѣ̀ всѧ̑ колѣ̑на земна̑ѧ, и҆ ѡ҆ сѣ́мени твое́мъ. И҆ сѐ а҆́зъ съ тобо́ю сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀, ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. И҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. И҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ, нѣ́сть сїѐ, но до́мъ бж҃їй, и҆ сїѧ̑ врата̀ небє́снаѧ.

Прⷪ҇ро́чества і҆езекїи́лева чте́нїе.

[Глава̀ м҃г и҆ м҃д] Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее, сотворѧ́тъ і҆ере́и на ѻ҆лтарѝ всесожже́нїѧ ва́шегѡ, и҆ ꙗ҆̀же спасе́нїѧ ва́шегѡ, и҆ прїимꙋ̀ вы̀, глаго́летъ а҆дѡнаі̀ гдⷭ҇ь. И҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки, и҆ сїѧ̑ бѧ́хꙋ затворє́на. И҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆́хъ: ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ заключє́на. ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ: по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. И҆ введе́ мѧ по пꙋтѝ вра́тъ ст҃ы́хъ, сꙋ́щихъ къ сѣ́верꙋ, прѧ́мѡ хра́мꙋ, и҆ ви́дѣхъ, и҆ сѐ и҆спо́лнь сла́вы хра́мъ гдⷭ҇ень.

При́тчей чте́нїе.

[Глава̀ ѳ҃] Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь. Закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̑ (с. 150) созыва́ющи съ высо́кимъ проповѣ́данїемъ на ча́шꙋ, глаго́лющи: и҆́же є҆́сть безꙋ́менъ, да ᲂу҆клони́тсѧ ко мнѣ̀, и҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ, и҆ пі́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете: и҆ взыщи́те ра́зꙋма, да поживетѐ, и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ, прїи́метъ себѣ̀ безче́стїе: ѡ҆блича́ѧй же нечести́ваго, ѡ҆поро́читъ себѐ: ѡ҆бличе́нїе бо нечести́вомꙋ, ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дрѣйшїй бꙋ́детъ: сказꙋ́й пра́ведномꙋ, и҆ приложи́тъ прїима́ти. Нача́ло премꙋ́дрости, стра́хъ гдⷭ҇ень, и҆ совѣ́тъ ст҃ы́хъ, ра́зꙋмъ. Разꙋмѣ́ти бо зако́нъ, по́мысла є҆́сть блага́гѡ: си́мъ бо ѻ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀.

На лїті́и стїхи̑ры, гла́съ а҃, самогла́сны. Стефа́на свѧтогра́дца.

Нача́ло на́шегѡ спасе́нїѧ, лю́дїе, дне́сь бы́сть: се́ бо пронарече́ннаѧ ѿ родѡ́въ дре́внихъ, мт҃и и҆ дв҃а, и҆ прїѧ́телище бж҃їе, ѿ непло́дове роди́тисѧ происхо́дитъ, цвѣ́тъ ѿ і҆ессе́а, и҆ ѿ ко́рене є҆гѡ̀ же́злъ прозѧбѐ. да ра́дꙋетсѧ а҆да́мъ пра́ѻтецъ, и҆ є҆́ѵа да весели́тсѧ ра́достїю: се́ бо созда́ннаѧ ѿ ребра̀ а҆да́мова дще́рь и҆ внꙋ́кꙋ блажи́тъ ꙗ҆́вственнѣ, роди́сѧ бо мнѣ̀, речѐ, и҆збавле́нїе, є҆гѡ́же ра́ди ѿ ᲂу҆́зъ а҆́довыхъ свобождꙋ́сѧ. да ра́дꙋетсѧ дв҃дъ бїѧ̀ въ гꙋ́сли, и҆ да благослови́тъ бг҃а: се́ бо дв҃а происхо́дитъ ѿ ᲂу҆тро́бы непло́дныѧ, ко спасе́нїю дꙋ́шъ на́шихъ.

Гла́съ в҃:

Прїиди́те любодѣ́вственнїи всѝ, и҆ чистоты̀ рачи́телїе прїиди́те под̾ими́те любо́вїю дѣ́вства похвалꙋ̀, ѿ ка́мене тве́рдагѡ текꙋ́щїй и҆сто́чникъ жи́зни, и҆ ѿ безча́дствꙋющїѧ кꙋпинꙋ̀ невеще́ственнагѡ ѻ҆гнѧ̀, ѡ҆чища́ющагѡ и҆ просвѣща́ющагѡ дꙋ́шы на́шѧ.

А҆нато́лїа патрїа́рха:

Что̀ шꙋ́мъ пра́зднꙋющихъ быва́етъ; і҆ѡакі́мъ и҆ а҆́нна торжествꙋ́ютъ та́йнѡ, ра́дꙋйтесѧ съ на́ми, глаго́люще, а҆да́ме и҆ є҆́ѵо дне́сь: ꙗ҆́кѡ и҆́мже дре́вле престꙋпле́нїемъ затвори́ша ра́й, пло́дъ бл҃госла́венъ на́мъ даде́сѧ, бг҃оѻтрокови́ца марі́а, ѿверза́ющи є҆гѡ̀ всѣ̑мъ вхо́дъ.

Пронарече́ннаѧ всѣ́хъ цр҃и́ца, бж҃їе ѡ҆би́телище, ѿ непло́дныѧ дне́сь ᲂу҆тро́бы про́йде, а҆́нны сла́вныѧ, присносꙋ́щнагѡ сꙋщества̀, бжⷭ҇твенное пребыва́лище: є҆́юже безстꙋ́дный а҆́дъ попра́сѧ, и҆ всеро́днаѧ є҆́ѵа въ тве́рдꙋю жи́знь вво́дитсѧ. то́й досто́йнѡ возопїи́мъ: бл҃же́нна ты̀ въ жена́хъ, и҆ пло́дъ чре́ва твоегѡ̀ бл҃гослове́нъ.

Сла́ва, и҆ ны́нѣ, гла́съ и҃. Се́ргїа патрїа́рха:

Въ благознамени́тый де́нь пра́здника на́шегѡ, вострꙋ́бимъ дꙋхо́вною цѣвни́цею: ꙗ҆́же бо ѿ сѣ́мене дв҃дова, дне́сь ражда́етсѧ мт҃и живота̀, тмꙋ̀ разрѣша́ющи, а҆да́мово ѡ҆бновле́нїе, и҆ є҆́ѵино воззва́нїе, и҆ нетлѣ́нїѧ и҆сто́чникъ, тлѝ премѣне́нїе. є҆ѧ́же ра́ди мы̀ ѡ҆божи́хомсѧ, и҆ ѿ сме́рти и҆зба́влени бы́хомъ, и҆ возопїи́мъ то́й съ гаврїи́ломъ вѣ́рнїи: ра́дꙋйсѧ, бл҃года́тнаѧ, гдⷭ҇ь съ тобо́ю, тебє̀ ра́ди да́рꙋѧ на́мъ ве́лїю ми́лость.

На стїхо́внѣ стїхи̑ры, гла́съ д҃, самогла́сны. Ге́рмана патрїа́рха:

Всемі́рнаѧ ра́дость ѿ пра́ведныхъ возсїѧ̀ на́мъ, ѿ і҆ѡакі́ма и҆ а҆́нны, всепѣ́таѧ дв҃а: ꙗ҆́же премно́гїѧ ра́ди чистоты̀, хра́мъ бж҃їй ѡ҆дꙋшевле́нный быва́етъ, и҆ є҆ди́на вои́стиннꙋ бцⷣа познава́етсѧ. тоѧ̀ моли́твами, хрⷭ҇тѐ бж҃е, ми́ръ мі́рꙋ низпослѝ, и҆ дꙋша́мъ на́шымъ ве́лїю ми́лость.

Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.

А҆́гг҃ловымъ прорече́нїемъ, пло́дъ пречи́стъ ѿ і҆ѡакі́ма и҆ а҆́нны пра́ведникѡвъ, дне́сь произы́де, дв҃о, не́бо и҆ прⷭ҇то́лъ бж҃їй, и҆ прїѧ́телище чистоты̀, ра́дость провозвѣща́ющи всемꙋ̀ мі́рꙋ: живота̀ на́шегѡ хода́таице, клѧ́твы ѿѧ́тїе, бл҃гослове́нїѧ пода́нїе. тѣ́мъ въ ржⷭ҇твѣ̀ твое́мъ, дв҃о бг҃озва́ннаѧ, мі́рꙋ ми́ръ и҆спросѝ, и҆ дꙋша́мъ на́шымъ ве́лїю ми́лость.

Сті́хъ: Лицꙋ̀ твоемꙋ̀ помо́лѧтсѧ бога́тїи лю́дстїи.

Непло́ды безча́днаѧ а҆́нна, дне́сь рꙋка́ми да воспле́щетъ свѣ́тлѡ, да свѣтлоно́сѧтъ земна̑ѧ, ца́рїе да и҆гра́ютъ, ст҃и́телїе во благослове́нїихъ да веселѧ́тсѧ, да пра́зднꙋетъ ве́сь мі́ръ: се́ бо цр҃и́ца, и҆ непоро́чнаѧ невѣ́ста ѻ҆́ч҃а, ѿ ко́рене і҆ессе́ева прозѧбѐ, ктомꙋ̀ жєны̀ въ печа́лѣхъ не родѧ́тъ ча̑дъ: ра́дость бо процвѣтѐ, и҆ живо́тъ всѣ̑мъ человѣ́кѡмъ въ мі́рѣ жи́тельствꙋетъ, и҆ ктомꙋ̀ да́ры і҆ѡакі́мовы не возвраща́ютсѧ, рыда́нїе бо а҆́нны въ ра́дость преложи́сѧ: сра́дꙋйтесѧ мнѣ̀, глаго́лющи, ве́сь и҆збра́нный і҆и҃ль. се́ бо даде́ ми гдⷭ҇ь ѡ҆дꙋшевле́ннꙋю пала́тꙋ бжⷭ҇твенныѧ сла́вы є҆гѡ̀, во ѻ҆́бщее весе́лїе и҆ ра́дость, и҆ спасе́нїе дꙋ́шъ на́шихъ.

Сла́ва, и҆ ны́нѣ, гла́съ и҃. Се́ргїа патрїа́рха:

Прїиди́те, всѝ вѣ́рни къ дв҃ѣ теце́мъ: се́ бо ражда́етсѧ, ꙗ҆́же пре́жде чре́ва предви́дѣннаѧ, бг҃а на́шегѡ мт҃и, дѣ́вства сосꙋ́дъ. а҆арѡ́новъ прозѧ́бшїй же́злъ ѿ ко́рене і҆ессе́ева, прⷪ҇ро́ческое проповѣ́данїе, и҆ пра́ведныхъ і҆ѡакі́ма и҆ а҆́нны прозѧбе́нїе. ражда́етсѧ ᲂу҆́бѡ, и҆ мі́ръ съ не́ю ѡ҆бновлѧ́етсѧ. ражда́етсѧ, и҆ цр҃ковь во своѐ благолѣ́пїе ᲂу҆краша́етсѧ. хра́мъ ст҃ы́й, бжⷭ҇тва̀ прїѧ́телище, дѣ́вственный сосꙋ́дъ, црⷭ҇кїй черто́гъ, въ не́мже пресла́вное неизрече́ннагѡ соедине́нїѧ, соше́дшихсѧ во хрⷭ҇тѣ̀ є҆сте́ствъ, соверше́нное содѣ́ѧсѧ та́инство. є҆мꙋ́же покланѧ́ющесѧ, воспѣва́емъ дв҃ы всенепоро́чныѧ ржⷭ҇тво̀.

На благослове́нїи хлѣ́бѡвъ тропа́рь: Ржⷭ҇тво̀ твоѐ бцⷣе дв҃о: три́жды, пи́санъ на ма́лѣй вече́рни.

На ᲂу҆́трени, на Бг҃ъ Гдⷭ҇ь: тропа́рь пра́здника три́жды.

По а҃-й стїхоло́гїи сѣда́ленъ, гла́съ д҃.

Поⷣ: Оу҆диви́сѧ і҆ѡ́сифъ:

Возопі́й дв҃де, что̀ клѧ́тсѧ тебѣ̀ бг҃ъ: ꙗ҆̀же мнѣ̀ клѧ́тсѧ, речѐ, и҆ и҆спо́лни ᲂу҆жѐ: ѿ плода̀ чре́ва моегѡ̀ да́вый дв҃и́цꙋ, и҆зъ неѧ́же содѣ́тель хрⷭ҇то́съ, но́вый а҆да́мъ роди́сѧ, цр҃ь на прⷭ҇то́лѣ мое́мъ: и҆ црⷭ҇твꙋетъ дне́сь, и҆мѣ́ѧй црⷭ҇тво недви́жимо. непло́ды ражда́етъ бцⷣꙋ, и҆ пита́тельницꙋ жи́зни на́шеѧ.

Сла́ва, и҆ ны́нѣ, то́йже. И҆ чте́нїе пра́здника.

По в҃-й стїхоло́гїи сѣда́ленъ, гла́съ д҃. Поⷣ: Оу҆диви́сѧ і҆ѡ́сифъ:

Ѿ ко́рене і҆ессе́ева, и҆ ѿ чре́слъ дв҃довыхъ, бг҃оѻтрокови́ца марїа́мъ, ражда́етсѧ дне́сь на́мъ, ра́достїю бо ра́дꙋютсѧ всѧ́чєскаѧ и҆ ѡ҆бновлѧ́ютсѧ, сра́дꙋйтесѧ кꙋ́пнѡ нб҃о и҆ землѧ̀, восхвали́те ю҆̀ ѻ҆ч҃єствїѧ ꙗ҆зы̑къ: і҆ѡакі́мъ весели́тсѧ, и҆ а҆́нна торжествꙋ́етъ, зовꙋ́щи: непло́ды ражда́етъ бцⷣꙋ, и҆ пита́тельницꙋ жи́зни на́шеѧ.

Сла́ва, и҆ ны́нѣ, то́йже.

По полѷеле́и сѣда́ленъ, гла́съ и҃. Поⷣ: Повелѣ́нное та́йнѡ:

Да ра́дꙋетсѧ нб҃о, и҆ землѧ̀ да весели́тсѧ: бж҃їе бо не́бо на землѝ роди́сѧ, бг҃оневѣ́стнаѧ сїѧ̀, ѿ ѡ҆бѣтова́нїѧ, непло́ды младе́нца дои́тъ марі́ю, и҆ ра́дꙋетсѧ ѡ҆ ржⷭ҇твѣ̀ і҆ѡакі́мъ: же́злъ, глаго́лѧ, роди́сѧ мнѣ̀, и҆зъ негѡ́же цвѣ́тъ хрⷭ҇то́съ прозѧбѐ, и҆зъ ко́рене дв҃дова, вои́стиннꙋ чꙋ́до пресла́вно!

Сла́ва, и҆ ны́нѣ, гла́съ то́йже:

Ѡ҆бнови́сѧ а҆да́ме, ра́дꙋйсѧ є҆́ѵо, весели́сѧ дв҃де, благодꙋ́шствꙋй а҆́нно: и҆́бо мт҃и зижди́телѧ твоегѡ̀ ражда́етсѧ пресла́внѡ, ликꙋ́етъ ѡ҆бно́вльшисѧ всѧ̀ землѧ̀, и҆ ра́дꙋетсѧ ѡ҆дѣ́ѧна во ѻ҆де́ждꙋ. всѧ́къ ꙗ҆зы́къ ликꙋ́ѧ да вопїе́тъ марі́и: бл҃же́нъ до́мъ дв҃довъ, ꙗ҆́кѡ пита́етъ пита́тельницꙋ жи́зни на́шеѧ.

И҆ чте́мъ сло́во григо́рїа і҆еромона́ха. Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. Сті́хъ: Ѿры́гнꙋ се́рдце моѐ сло́во бла́го: Всѧ́кое дыха́нїе да хва́литъ гдⷭ҇а. Сті́хъ: Хвали́те бг҃а во ст҃ы́хъ є҆гѡ̀: Є҆ѵⷢ҇лїе лꙋкѝ, зача́ло д҃: Во дни̑ ѻ҆́ны, воста́вши марїа́мъ: По н҃-мъ ѱалмѣ̀, Сла́ва: Мл҃твами бцⷣы, ми́лостиве, ѡ҆чи́сти мно́жєства согрѣше́нїй на́шихъ. И҆ ны́нѣ, то́йже. И҆ посе́мъ: Поми́лꙋй мѧ̀, бж҃е: и҆ стїхи́ра пра́здника, гла́съ ѕ҃:

Се́й де́нь гдⷭ҇ень, ра́дꙋйтесѧ лю́дїе: се́ бо свѣ́та черто́гъ, и҆ кни́га сло́ва живо́тнагѡ, и҆зъ ᲂу҆тро́бы произы́де, и҆ ꙗ҆́же къ восто́кѡмъ две́рь ро́ждшисѧ, ѡ҆жида́етъ вхо́да ст҃и́телѧ вели́кагѡ, є҆ди́на, и҆ є҆ди́наго вводѧ́щи хрⷭ҇та̀ во вселе́ннꙋю, во спасе́нїе дꙋ́шъ на́шихъ.

Канѡ́на два̀: і҆рмосы̀ ѻ҆бои́хъ канѡ́нѡвъ по два́жды: тропари́ же и҆́хъ на в҃і:

Канѡ́нъ пе́рвый, творе́нїе кѵ́ръ і҆ѡа́нна.

Гла́съ в҃. Пѣ́снь а҃. І҆рмо́съ:

Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.

Грѧди́те вѣ́рнїи, дх҃омъ бжⷭ҇твеннымъ ра́дꙋющесѧ, ю҆́же ѿ непло́дове дне́сь прише́дшꙋю, человѣ́кѡвъ на спасе́нїе, приснодв҃ꙋ ѻ҆трокови́цꙋ пѣ́сньми почти́мъ.

Ра́дꙋйсѧ, чⷭ҇таѧ, мт҃и и҆ рабо̀ хрⷭ҇та̀ бг҃а, ꙗ҆́же пе́рвомꙋ хода́таица бл҃же́нствꙋ, человѣ́ческїй ро́дъ тѧ̀, всѝ досто́йнѡ пѣ́сньми сла́вимъ.

Жи́зни ражда́етсѧ дне́сь мо́стъ, и҆́мже человѣ́цы воззва́нїе паде́нїѧ, є҆́же ѿ а҆́да, ѡ҆брѣ́тшїи, хрⷭ҇та̀ жизнода́вца пѣ́сньми прославлѧ́ютъ.

И҆́нъ канѡ́нъ кѵ́ръ а҆ндре́а.

Гла́съ и҃. Пѣ́снь а҃. І҆рмо́съ:

Сокрꙋши́вшемꙋ бра̑ни мы́шцею свое́ю, и҆ прове́дшемꙋ і҆и҃лѧ сквозѣ̀ чермно́е мо́ре, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ: ꙗ҆́кѡ просла́висѧ.

Да ликовствꙋ́етъ всѧ̀ тва́рь, да весели́тсѧ же и҆ дв҃дъ, ꙗ҆́кѡ ѿ колѣ́на и҆ ѿ сѣ́мене є҆гѡ̀ произы́де же́злъ, цвѣ́тъ носѧ́щи гдⷭ҇а, творца̀ всѧ́ческихъ.

Ст҃а́ѧ ст҃ы́хъ, во ст҃ѣ́мъ ст҃и́лищи младе́нецъ возлага́етсѧ, воспита́тисѧ ѿ рꙋкѝ а҆́гг҃ловы: всѝ ᲂу҆́бѡ вѣ́рнѡ спра́зднꙋимъ въ ржⷭ҇твѣ̀ є҆ѧ̀.

Непло́ды неражда́ющаѧ а҆́нна, но не безча́дна бг҃ꙋ: се́ бо пронарече́сѧ ѿ родѡ́въ чⷭ҇таѧ дв҃а мт҃и. тѣ́мже є҆стества̀ и҆зрастѝ зижди́телѧ, въ ра́бїи ѻ҆́бразѣ.

Тѧ̀ неѕло́бивꙋю а҆́гницꙋ, а҆́гнца хрⷭ҇та̀, младе́нца ѿ чре́ва твоегѡ̀ приве́дшꙋю въ на́ше сꙋщество̀, всѝ ѿ а҆́нны рожде́ннꙋю тѧ̀, пѣ́сньми почита́емъ.

Трⷪ҇ченъ:

Трѝ безнача́льна сла́влю, трѝ свѧ́та пою̀, трѝ соприсносꙋ́щна въ сꙋществѣ̀ є҆ди́номъ проповѣ́дꙋю: є҆ди́нъ бо во ѻ҆ц҃ѣ̀, и҆ сн҃ѣ, и҆ дс҃ѣ, славосло́витсѧ бг҃ъ.

Бг҃оро́диченъ:

Кто̀ ви́дѣ ѻ҆троча̀, є҆го́же не всѣ́ѧ ѻ҆те́цъ, млеко́мъ пита́емое; и҆лѝ гдѣ̀ ви́дѣна бы́сть дѣ́ва ма́ти; и҆́стиннѡ па́че ᲂу҆ма̀ ѻ҆боѧ̑, бг҃ороди́тельнице чⷭ҇таѧ.

Катава́сїа:

Крⷭ҇тъ начерта́въ мѡѷсе́й, впрѧ́мѡ жезло́мъ чермно́е пресѣчѐ, і҆и҃лю пѣшеходѧ́щꙋ, то́же ѡ҆бра́тнѡ фараѡ́нѡвымъ колесни́цамъ ᲂу҆да́ривъ совокꙋпѝ, вопрекѝ написа́въ непобѣди́мое ѻ҆рꙋ́жїе: тѣ́мъ хрⷭ҇тꙋ̀ пои́мъ бг҃ꙋ на́шемꙋ, ꙗ҆́кѡ просла́висѧ.

Пѣ́снь г҃. І҆рмо́съ:

Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщвле́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀. (с. 156)

Непоро́чнѡ бг҃ꙋ пожи́вшїи, всѣ́хъ роди́сте спасе́нїе, бг҃омꙋ́дрїи роди́телє зижди́телѧ ро́ждшїѧ и҆ бг҃а на́шего.

Всѣ̑мъ жи́знь и҆сточа́ѧй гдⷭ҇ь, ѿ непло́дове произведѐ дв҃ꙋ, въ ню́же всели́тисѧ и҆зво́ли, и҆ по ржⷭ҇твѣ̀ сохрани́въ нетлѣ́ннꙋ.

А҆́ннинъ пло́дъ, марі́ю дне́сь, гро́здъ ро́ждшꙋю живоно́сный, ꙗ҆́кѡ бцⷣꙋ воспои́мъ, предста́тельницꙋ же всѣ́хъ и҆ помо́щницꙋ.

И҆́нъ. І҆рмо́съ:

Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ спасе́нїи твое́мъ.

Воспита́вшисѧ во ст҃а̑ѧ ст҃ы́хъ, дв҃о пречⷭ҇таѧ бцⷣе, вы́шши ꙗ҆ви́ласѧ є҆сѝ тва́ри, зижди́телѧ пло́тїю поро́ждши.

Бл҃гослове́нно чре́во твоѐ, цѣломꙋ́дреннаѧ а҆́нно, пло́дъ бо и҆зрасти́ла є҆сѝ дѣ́вства, ю҆́же безсѣ́меннѡ пита́телѧ тва́ри ро́ждшꙋю, и҆ и҆зба́вителѧ і҆и҃са.

Тѧ̀ блажи́тъ приснодв҃о всѧ̀ тва́рь, ѿ а҆́нны дне́сь ро́ждшꙋюсѧ, ѿ ко́рене і҆ессе́ева же́злъ пречⷭ҇тъ цвѣ́тъ, хрⷭ҇та̀ и҆зрасти́вшꙋю.

Тѧ̀ вы́шшꙋю всеѧ̀ тва́ри, бцⷣе, показꙋ́ѧ чⷭ҇таѧ, сн҃ъ тво́й, є҆́же ѿ а҆́нны вели́читъ твоѐ ржⷭ҇тво̀, и҆ всѣ́хъ весели́тъ дне́сь.

Трⷪ҇ченъ:

Тебѣ̀ покланѧ́емсѧ, ѻ҆́ч҃е безнача́льне сꙋщество́мъ, пое́мъ безлѣ́тнаго сн҃а твоего̀, и҆ чте́мъ соприсносꙋ́щнаго дх҃а твоего̀, ꙗ҆́кѡ є҆ди́наго тро́е є҆стество́мъ бг҃а.

Бг҃оро́диченъ:

Свѣтода́вца и҆ нача́льника жи́зни человѣ́ческїѧ, ро́ждшаѧ чⷭ҇таѧ бцⷣе, ꙗ҆ви́ласѧ є҆сѝ сокро́вище жи́зни на́шеѧ, и҆ две́рь непристꙋ́пнагѡ свѣ́та.

Катава́сїа: Же́злъ въ ѻ҆́бразъ та́йны прїе́млетсѧ, прозѧбе́нїемъ бо предразсꙋжда́етъ свѧще́нника: неплодѧ́щей же пре́жде цр҃кви, ны́нѣ процвѣтѐ дре́во крⷭ҇та̀, въ держа́вꙋ и҆ ᲂу҆твержде́нїе.

Сѣда́ленъ, гла́съ д҃. Подо́бенъ: Оу҆диви́сѧ і҆ѡ́сифъ:

Дв҃а марі́а и҆ бцⷣа и҆́стиннѡ, ꙗ҆́кѡ ѻ҆́блакъ свѣ́та дне́сь возсїѧ̀ на́мъ, и҆ ѿ пра́ведныхъ предгрѧде́тъ въ сла́вꙋ на́шꙋ. не ктомꙋ̀ а҆да́мъ ѡ҆сꙋжда́етсѧ, и҆ є҆́ѵа ѿ ᲂу҆́зъ свободи́сѧ, и҆ сегѡ̀ ра́ди зове́мъ, вопїю́ще со дерзнове́нїемъ є҆ди́нѣй чⷭ҇тѣй: ра́дость возвѣща́етъ ржⷭ҇тво̀ твоѐ все́й вселе́ннѣй.

Сла́ва, и҆ ны́нѣ, то́йже.

Пѣ́снь д҃. І҆рмо́съ:

Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀ є҆ди́не чл҃вѣколю́бче.

Воспѣва́емъ тѧ̀, гдⷭ҇и, вѣ̑рнымъ спаси́тельное приста́нище пода́вшаго всѣ̑мъ, тебѐ ро́ждшꙋю.

Тѧ̀, бг҃оневѣ́сто, похвалꙋ̀ всѣ̑мъ хрⷭ҇то́съ ꙗ҆вѝ и҆ держа́вꙋ, пою́щымъ вѣ́рнѡ твоѐ та́инство.

Неискꙋсобра́чнаѧ влⷣчце, твои́ми моли́твами и҆збавлѧ́еми прегрѣше́нїй, благоразꙋ́мнѡ вси́ тѧ ᲂу҆блажа́емъ.

И҆́нъ. І҆рмо́съ:

Прⷪ҇ро́къ а҆ввакꙋ́мъ ᲂу҆́мныма ѻ҆чи́ма, прови́дѣ, гдⷭ҇и, прише́ствїе твоѐ. тѣ́мъ и҆ вопїѧ́ше: ѿ ю҆́га прїи́детъ бг҃ъ. сла́ва си́лѣ твое́й, сла́ва снизхожде́нїю твоемꙋ̀.

Патрїа́рхъ і҆а́кѡвъ, прови́дѣвъ сп҃се, вели̑чїѧ ꙗ҆́снѡ строе́нїѧ твоегѡ̀, вопїѧ́ше дꙋ́хомъ, ко і҆ꙋ́дѣ глаго́лѧ та́йнѡ: ѿ лѣ́торасли возше́лъ є҆сѝ сы́не мо́й, возвѣща́ѧ тѧ̀ ѿ дв҃ы бг҃а.

Ны́нѣ же́злъ а҆арѡ́новъ ѿ ко́рене дв҃дова прозѧ́бшїй, ны́нѣ дв҃а чⷭ҇таѧ происхо́дитъ: и҆ сликовствꙋ́етъ нб҃о и҆ землѧ̀, и҆ всѧ̑ ѻ҆те́чєствїѧ ꙗ҆зы́кѡвъ, и҆ а҆́нна и҆ і҆ѡакі́мъ та́инственнѡ.

Ны́нѣ да весели́тсѧ нб҃о, да ра́дꙋетсѧ же землѧ̀, и҆ да ликꙋ́етъ і҆ѡакі́мъ и҆ дв҃дъ. ѻ҆́въ ᲂу҆́бѡ ꙗ҆́кѡ роди́тель (с. 158) тво́й, и҆́стиннѡ ро́ждшїѧ бг҃а: ѻ҆́въ же ꙗ҆́кѡ пра́ѻтецъ тво́й, проповѣ́даѧ твоѧ̑ вели́чєствїѧ, чⷭ҇таѧ.

Сра́дꙋетсѧ тебѣ̀ дне́сь бг҃омꙋ́дреннаѧ а҆́нно, вселе́ннаѧ: и҆зба́вителѧ бо тоѧ̀, мт҃рь процвѣла̀ є҆сѝ, ю҆́же ѿ ко́рене прозѧ́бшꙋю дв҃дова, же́злъ си́лы на́мъ носѧ́щꙋю цвѣ́тъ хрⷭ҇та̀.

Трⷪ҇ченъ:

Сла́влю безнача́льна бг҃а, ѻ҆ц҃а̀ и҆ сн҃а и҆ ст҃а́го дх҃а, є҆диносꙋ́щнꙋю трⷪ҇цꙋ несозда́ннꙋю, є҆́йже предстоѧ́тъ серафі́ми благоговѣ́йнѡ, зовꙋ́ще: ст҃ъ, ст҃ъ, ст҃ъ є҆сѝ бж҃е.

Бг҃оро́диченъ:

Пребезнача́льное нача́ло, нача́ло прїе́млетъ и҆зъ тебє̀ бг҃ороди́тельнице, плотски́мъ вре́менемъ, и҆ пребыва́етъ собезнача́льно, и҆ вопло́щсѧ сло́во ѻ҆́ч҃ее, и҆ дх҃ꙋ соприсносꙋ́щное, сохранѧ́ѧ бжⷭ҇твенное досто́инство.

Катава́сїа:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Пѣ́снь є҃. І҆рмо́съ:

Сѣннопи́санный мра́къ гада́нїй разори́въ, и҆ вѣ́рныхъ прибы́тїемъ и҆́стины, бг҃оѻтрокови́цею ѡ҆зари́въ сердца̀, и҆ на́съ свѣ́томъ твои́мъ, хрⷭ҇тѐ, наста́ви.

Воспои́мъ лю́дїе всѣ́хъ винꙋ̀, сꙋ́щаго по на́мъ бы́ти вино́внаго: є҆ѧ́же ѻ҆́бразꙋ ра́довахꙋсѧ сподоблѧ́еми прⷪ҇ро́цы, ꙗ҆вле́нное спасе́нїе ѿ тоѧ̀ плодѧ́ще.

Ѿ сꙋ́ха прозѧбе́нїе жезла̀ і҆ере́ева, і҆и҃лю показа̀ проразсꙋжде́нїе: и҆ ны́нѣ свѣ́тлость прозѧ́бшихъ пресла́внѡ свѣ́титъ, ѿ непло́дове всесла́вное рожде́нїе.

И҆́нъ. І҆рмо́съ:

Гдⷭ҇и бж҃е на́шъ, ми́ръ да́ждь на́мъ, гдⷭ҇и бж҃е на́шъ, стѧжи́ ны, гдⷭ҇и, ра́звѣ тебѐ и҆но́гѡ не вѣ́мы, и҆́мѧ твоѐ и҆менꙋ́емъ.

Пречⷭ҇тое твоѐ ржⷭ҇тво̀, дв҃о непоро́чнаѧ, несказа́нное (с. 159) и҆ зача́тїе, неизглаго́ланно и҆ рожде́нїе твоѐ, невѣ́сто неневѣ́стнаѧ: бг҃ъ бо бѣ̀ ве́сь въ мѧ̀ ѡ҆блекі́йсѧ.

Дне́сь да веселѧ́тсѧ а҆́гг҃льстїи чи́ни, пѣ́сньми да ликꙋ́ютъ сꙋ́щїи и҆зъ а҆да́ма: роди́сѧ бо же́злъ, цвѣ́тъ возрасти́вшїй хрⷭ҇та̀ є҆ди́наго, и҆зба́вителѧ на́шего.

Дне́сь є҆́ѵа разрѣша́етсѧ ѡ҆сꙋжде́нїѧ, разрѣша́етсѧ же и҆ непло́дство, и҆ а҆да́мъ дре́внїѧ клѧ́твы, ѡ҆ рождествѣ̀ твое́мъ: тобо́ю бо ѿ тлѝ и҆зба́вихомсѧ.

Сла́ва тебѣ̀, просла́вльшемꙋ непло́днꙋю дне́сь: роди́ бо же́злъ присноцвѣтꙋ́щїй ѿ ѡ҆бѣща́нїѧ, ѿ негѡ́же прозѧбѐ хрⷭ҇то́съ, цвѣ́тъ жи́зни на́шеѧ.

Трⷪ҇ченъ:

Сла́ва тебѣ̀, ѻ҆́ч҃е ст҃ы́й, бж҃е нерожде́нне: сла́ва тебѣ̀, сн҃е безлѣ́тне, є҆диноро́дне: сла́ва тебѣ̀, дш҃е бжⷭ҇твенный и҆ сопресто́льный, ѿ ѻ҆ц҃а̀ происходѧ́й, и҆ въ сн҃ѣ пребыва́ѧй.

Бг҃оро́диченъ:

Бы́сть чре́во твоѐ сл҃нца носи́ло: пребы́сть чистота̀ твоѧ̀ ꙗ҆́коже пре́жде невреди́ма, дв҃о: хрⷭ҇то́съ бо сл҃нце, ꙗ҆́кѡ ѿ черто́га жени́хъ, ꙗ҆ви́сѧ и҆зъ тебє̀.

Катава́сїа:

Ѽ треблаже́нное дре́во, на не́мже распѧ́сѧ хрⷭ҇то́съ, цр҃ь. и҆ гдⷭ҇ь, и҆́мже падѐ, дре́вомъ прельсти́вый, тобо́ю прельсти́всѧ, бг҃ꙋ пригвозди́вшꙋсѧ пло́тїю, подаю́щемꙋ ми́ръ дꙋша́мъ на́шымъ.

Пѣ́снь ѕ҃. І҆рмо́съ:

Ко гдⷭ҇ꙋ ѿ ки́та і҆ѡ́на возопѝ: ты́ мѧ возведѝ и҆зъ глꙋбины̀ а҆́да, молю́сѧ, да ꙗ҆́кѡ и҆зба́вителю, во гла́сѣ хвале́нїѧ, и҆́стины же дꙋ́хомъ пожрꙋ̀ тебѣ̀.

Ко гдⷭ҇ꙋ въ ско́рби непло́дства возопи́ша, бг҃омт҃ре бг҃омꙋ́дрїи роди́тели, и҆ сїю̀ въ ро́ды родѡ́въ роди́ша, на ѻ҆́бщее спасе́нїе и҆ похвалꙋ̀.

Прїѧ́ша нбⷭ҇ный да́ръ ѿ бг҃а досто́инъ, бг҃омт҃ре бг҃омꙋ́дрїи роди́тели, самѣ́хъ херꙋві́мѡвъ превы́шшее носи́ло, сло́ва и҆ зижди́телѧ роди́тельницꙋ.

И҆́нъ. І҆рмо́съ:

Ꙗ҆́кѡ во́ды мѡрскі́ѧ, чл҃вѣколю́бче, волна́ми жите́йскими ѡ҆бꙋрева́юсѧ. тѣ́мже ꙗ҆́кѡ і҆ѡ́на, та́кѡ вопїю́ ти: возведѝ ѿ тлѝ живо́тъ мо́й, бл҃гоꙋтро́бне гдⷭ҇и.

Ст҃ꙋ́ю ст҃ы́хъ сꙋ́щꙋ, цѣломꙋ́дреннїи роди́тели твоѝ, чⷭ҇таѧ, возложи́ша тѧ̀ въ хра́мѣ гдⷭ҇ни воспита́тисѧ че́стнѡ, и҆ ᲂу҆гото́ватисѧ въ мт҃рь є҆мꙋ̀.

Неплѡ́ды и҆ ма́тєри ликꙋ́йте, дерза́йте, и҆ и҆гра́йте безча̑дныѧ: безча́дна бо непло́ды бцⷣꙋ прозѧба́етъ, ꙗ҆́же и҆зба́витъ ѿ болѣ́зней є҆́ѵꙋ, и҆ клѧ́твы а҆да́ма.

Слы́шꙋ дв҃да пою́ща тебѣ̀: приведꙋ́тсѧ дѣ̑вы во слѣ́дъ тебє̀, приведꙋ́тсѧ въ хра́мъ цр҃е́въ, и҆ съ ни́мъ тѧ̀ и҆ а҆́зъ дще́рь цр҃е́вꙋ воспѣва́ю.

Пое́мъ ст҃о́е твоѐ ржⷭ҇тво̀, чти́мъ и҆ непоро́чное зача́тїе твоѐ, невѣ́сто бг҃озва́ннаѧ и҆ дв҃о, сла́вѧтъ же съ на́ми а҆́гг҃лѡвъ чи́ни, и҆ ст҃ы́хъ дꙋ́шы.

Трⷪ҇ченъ:

Въ тебѣ̀ трⷪ҇ческое та́инство пое́тсѧ, и҆ сла́витсѧ чⷭ҇таѧ: ѻ҆ц҃ъ бо благоволѝ, и҆ сло́во всели́сѧ въ тѧ̀, и҆ бжⷭ҇твенный дх҃ъ тебѐ ѡ҆сѣнѝ.

Бг҃оро́диченъ:

Злата́ѧ кади́льница была̀ є҆сѝ, ѻ҆́гнь бо во ᲂу҆тро́бѣ твое́й всели́сѧ, сло́во ѿ дх҃а ст҃а, и҆ человѣ́ческимъ зра́комъ въ тебѣ̀ ви́дѣсѧ, бг҃ороди́тельнице чⷭ҇таѧ.

Катава́сїа:

Во́днагѡ ѕвѣ́рѧ во ᲂу҆тро́бѣ, дла̑ни і҆ѡ́на крⷭ҇тови́днѡ распросте́ръ, спаси́тельнꙋю стрⷭ҇ть проѡбража́ше ꙗ҆́вѣ. тѣ́мъ тридне́венъ и҆зше́дъ, премі́рное воскрⷭ҇нїе прописа́ше, пло́тїю пригвожде́ннагѡ хрⷭ҇та̀ бг҃а, и҆ тридне́внымъ воскрⷭ҇нїемъ мі́ръ просвѣ́щшагѡ.

Конда́къ, гла́съ д҃:

І҆ѡакі́мъ и҆ а҆́нна поноше́нїѧ безча́дства, и҆ а҆да́мъ и҆ є҆́ѵа ѿ тлѝ сме́ртныѧ свободи́стасѧ пречⷭ҇таѧ, во ст҃ѣ́мъ ржⷭ҇твѣ̀ твое́мъ. то̀ пра́зднꙋютъ и҆ лю́дїе твоѝ, вины̀ прегрѣше́нїй и҆зба́вльшесѧ, внегда̀ зва́ти тѝ: непло́ды ражда́етъ бцⷣꙋ, и҆ пита́тельницꙋ жи́зни на́шеѧ.

І҆́косъ:

Моли́тва кꙋ́пнѡ и҆ воздыха́нїе, непло́дства и҆ безча́дства, і҆ѡакі́ма же и҆ а҆́нны бл҃гопрїѧ́тное, и҆ во ᲂу҆́ши гдⷭ҇ни вни́де, и҆ прозѧбѐ пло́дъ живоно́сенъ мі́рꙋ. ѻ҆́въ бо моли́твꙋ на горѣ̀ творѧ́ше: ѻ҆́ва же въ садѣ̀ поноше́нїе ноша́ше, но съ ра́достїю: непло́ды ражда́етъ бцⷣꙋ, и҆ пита́тельницꙋ жи́зни на́шеѧ.

Пѣ́снь з҃. І҆рмо́съ:

Кꙋпина̀ въ горѣ̀ ѻ҆гненеѡпа́льнаѧ, и҆ росоно́снаѧ пе́щь халде́йскаѧ, ꙗ҆́вѣ предписа́ тѧ, бг҃оневѣ́сто: бжⷭ҇твенный бо невеще́ственный въ веще́ственнѣмъ чре́вѣ, ѻ҆́гнь неѡпа́льнѡ прїѧ́ла є҆сѝ. тѣ́мже и҆зъ тебє̀ ро́ждшемꙋсѧ пое́мъ: бл҃гослове́нъ є҆сѝ, бж҃е ѻ҆тє́цъ на́шихъ.

Твоѐ въ веще́ственныхъ ꙗ҆вле́нїихъ законополо́жникъ возбрани́сѧ разꙋмѣ́ти, и҆ вели́кое пречⷭ҇таѧ та́инство, не мꙋ́дрствовати земноре́внѡстнаѧ ѻ҆бра́знѡ наказꙋ́емь и҆ногда̀. тѣ́мже ᲂу҆ди́вльсѧ чꙋдесѝ, глаго́лаше: бл҃гослове́нъ бг҃ъ ѻ҆тє́цъ на́шихъ.

Го́рꙋ и҆ две́рь нбⷭ҇нꙋю, и҆ мы́сленнꙋю тѧ̀ лѣ́ствицꙋ бг҃олѣ́пнѡ ли́къ бжⷭ҇твенный пронаречѐ: ѿ тебє́ бо ка́мень ѿсѣче́сѧ не рꙋка́ми мꙋ́жескими, и҆ две́рь є҆́юже про́йде гдⷭ҇ь, и҆́же чꙋде́съ бг҃ъ ѻ҆тє́цъ на́шихъ.

И҆́нъ. І҆рмо́съ:

Халде́йскаѧ пе́щь ѻ҆гне́мъ распалае́маѧ, ѡ҆роша́шесѧ дх҃омъ, бж҃їимъ предстоѧ́нїемъ, ѻ҆́троцы поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Пра́зднꙋемъ чⷭ҇таѧ, и҆ вѣ́рнѡ покланѧ́емсѧ ст҃о́мꙋ твоемꙋ̀ ржⷭ҇твꙋ̀, пою́ще сн҃а твоего̀, и҆́мже и҆зба́вихомсѧ дре́внѧгѡ а҆да́мова ны́нѣ ѡ҆сꙋжде́нїѧ.

Ны́нѣ а҆́нна весели́тсѧ, и҆ вопїе́тъ хва́лѧщисѧ: непло́ды сꙋ́щи, роди́хъ бж҃їю мт҃рь, є҆ѧ́же ра́ди ѡ҆сꙋжде́нїе є҆́ѵино разрѣши́сѧ, и҆ ꙗ҆́же въ печа́лѣхъ болѣ́знь.

А҆да́мъ свободи́сѧ, и҆ є҆́ѵа ликꙋ́етъ, и҆ вопїю́тъ дꙋ́хомъ къ тебѣ̀ бцⷣе: тобо́ю и҆зба́вихомсѧ перворо́дныѧ клѧ́твы, ꙗ҆́вльшꙋсѧ хрⷭ҇тꙋ̀.

Ѽ чре́во, вмѣсти́вшее бж҃їе селе́нїе. ѽ ᲂу҆тро́бо, носи́вшаѧ нб҃съ ши́ршꙋю. престо́лъ ст҃ы́й, мы́сленный кївѡ́тъ свѧще́нїѧ.

Трⷪ҇ченъ:

Ѻ҆ц҃а̀ просла́вимъ, сн҃а, и҆ дх҃а, во є҆ди́нствѣ бж҃ества̀, трⷪ҇цꙋ прест҃ꙋ́ю, нераздѣ́льнꙋю, несозда́ннꙋю, и҆ соприсносꙋ́щнꙋю, и҆ є҆диносꙋ́щнꙋю.

Бг҃оро́диченъ:

Ты̀ бг҃а є҆ди́на родила̀ дв҃о пресла́внѡ: ты̀ є҆стество̀ ѡ҆бнови́ла є҆сѝ ржⷭ҇тво́мъ твои́мъ, марі́е: ты̀ є҆́ѵꙋ разрѣши́ла є҆сѝ перворо́дныѧ клѧ́твы, бг҃ороди́тельнице чⷭ҇таѧ.

Катава́сїа:

Безꙋ́мное велѣ́нїе мꙋчи́телѧ ѕлочести́вагѡ лю́ди поколеба̀, ды́шꙋщее преще́нїе и҆ ѕлохꙋле́нїе бг҃оме́рзское: ѻ҆ба́че трѝ ѻ҆́троки не ᲂу҆страшѝ ꙗ҆́рость ѕвѣ́рскаѧ, ни ѻ҆́гнь снѣда́ѧй, но противоды́шꙋщꙋ росоно́сномꙋ дх҃ꙋ, со ѻ҆гне́мъ сꙋ́ще поѧ́хꙋ: препѣ́тый ѻ҆тцє́въ, и҆ на́съ, бж҃е, бл҃гослове́нъ є҆сѝ.

Пѣ́снь и҃. І҆рмо́съ:

Въ пещѝ ѻ҆́трочестѣй проѡбрази́лъ є҆сѝ и҆ногда̀ твою̀ мт҃рь, гдⷭ҇и, ѻ҆́бразъ же сїѧ̀ и҆зъ ѻ҆гнѧ̀ и҆з̾има́ше, неѡпа́льнѡ входѧ́щыѧ: ю҆́же пое́мъ ꙗ҆́вльшꙋюсѧ тобо́ю концє́мъ дне́сь, и҆ превозно́симъ во всѧ̑ вѣ́ки.

Ꙗ҆́же къ бг҃ꙋ на́шегѡ примире́нїѧ, пред̾ѡпредѣле́ннаѧ ски́нїѧ, є҆́же бы́ти ны́нѣ начина́етъ, и҆мꙋ́щи роди́ти сло́ва, на́мъ дебельство́мъ пло́ти ꙗ҆́вльшасѧ, є҆го́же пое́мъ, и҆зъ не сꙋ́щихъ во є҆́же бы́ти тѣ́мъ прїе́мшїи, и҆ превозно́симъ во всѧ̑ вѣ́ки.

Непло́дства преложе́нїе, мїрско́е благи́хъ разрѣшѝ непло́дство, и҆ ꙗ҆́сно чꙋ́до хрⷭ҇та̀ показа̀, къ земны̑мъ прише́дша. є҆го́же пое́мъ, и҆зъ не сꙋ́щихъ во є҆́же бы́ти тѣ́мъ прїе́мшїи, и҆ превозно́симъ во всѧ̑ вѣ́ки.

И҆́нъ. І҆рмо́съ:

Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.

Сотвори́вый пресла̑внаѧ непло́днѣй ᲂу҆тро́бѣ, ѿве́рзый а҆́нны неражда̑ющаѧ ложесна̀, и҆ пло́дъ є҆́й да́въ, ты̀ бж҃е ст҃ы́й, ты̀ сн҃е дв҃ы, ты̀ ѿ сеѧ̀ пло́ть прїѧ́лъ є҆сѝ присноцвѣтꙋ́щїѧ дв҃ы и҆ бцⷣы.

Затворѧ́ѧй бе́зднꙋ и҆ ѿверза́ѧй ю҆̀, возносѧ́й во́дꙋ во ѻ҆́блацѣхъ, и҆ даѧ́й до́ждь, ты̀ да́вый гдⷭ҇и, ѿ непло́днагѡ ко́рене прозѧ́бнꙋти а҆́нны ст҃ы́ѧ пречи́стъ пло́дъ, и҆ роди́ти бцⷣꙋ.

Дѣ́лателю мы́слей на́шихъ, и҆ насади́телю дꙋ́шъ на́шихъ, ты̀ непло́днꙋю зе́млю благопло́днꙋ показа́вый: ты̀ дре́вле сꙋхꙋ́ю, родови́тꙋ, благокла́снꙋ, браздꙋ̀ плодоно́снꙋ содѣ́лалъ є҆сѝ а҆́ннꙋ ст҃ꙋ́ю, пречи́стъ пло́дъ и҆зрасти́ти бцⷣꙋ.

Прїиди́те всѝ ᲂу҆́зримъ, ꙗ҆́кѡ ѿ черто́га ма́ла, бж҃їй гра́дъ ны́нѣ ражда́емый, и҆́же ѿ две́ри ᲂу҆тро́бныѧ и҆схо́дъ и҆мꙋ́щꙋю, вхо́дъ же не вѣ́дꙋщꙋ ѻ҆бще́нїѧ: є҆ди́нъ бг҃ъ зижди́тель се́ю про́йде стезе́ю стра́нною.

Трⷪ҇ченъ:

Ѽ трⷪ҇це пресꙋ́щнаѧ, є҆ди́нице собезнача́льнаѧ! тѧ̀ пое́тъ и҆ трепе́щетъ мно́жество а҆́гг҃лъ, не́бо и҆ землѧ̀, и҆ бє́здны ᲂу҆жаса́ютсѧ, человѣ́цы благословѧ́тъ, ѻ҆́гнь рабо́таетъ, всѧ̑ послꙋ́шаютъ тебѐ трⷪ҇це ст҃а́ѧ со стра́хомъ, ꙗ҆̀же въ тва́ри.

Бг҃оро́диченъ:

Ѽ новѣ́йшагѡ слы́шанїѧ: бг҃ъ, сы́нъ жены̀! ѽ безсѣ́меннагѡ ржⷭ҇тва̀: безмꙋ́жнаѧ мт҃и, и҆ рожде́нное бг҃ъ! ѽ ᲂу҆жа́снагѡ видѣ́нїѧ! ѽ зача́тїѧ стра́ннагѡ дв҃ы! ѽ несказа́ннагѡ ржⷭ҇тва̀! и҆́стиннѡ па́че ᲂу҆ма̀ всѧ̑, и҆ видѣ́нїѧ.

Катава́сїа:

Благослови́те ѻ҆́троцы, трⷪ҇цы равночи́сленнїи, содѣ́телѧ ѻ҆ц҃а̀ бг҃а, по́йте снизше́дшее сло́во, и҆ ѻ҆́гнь въ ро́сꙋ претво́ршее, и҆ превозноси́те всѣ̑мъ жи́знь подава́ющаго, дх҃а всест҃а́го, во вѣ́ки.

На ѳ҃-й пѣ́сни, честнѣ́йшꙋю не пое́мъ, пре́жде же і҆рмоса̀ и҆ тропаре́й, припѣ́въ се́й пое́мъ:

Велича́й дꙋшѐ моѧ̀, пресла́вное ржⷭ҇тво̀ бж҃їѧ мт҃ре.

Пѣ́снь ѳ҃. І҆рмо́съ:

Ꙗ҆́же пре́жде со́лнца свѣти́льника бг҃а возсїѧ́вшаго, пло́тски къ на́мъ прише́дшаго, и҆зъ бокꙋ̀ дв҃и́чꙋ, неизрече́ннѡ воплоти́вшаѧ, бл҃гослове́ннаѧ, всечⷭ҇таѧ, тѧ̀, бцⷣꙋ, велича́емъ.

И҆́же непокори̑вымъ лю́демъ и҆зъ ка́мене и҆сточи́въ во́дꙋ, благопокори̑вымъ же ꙗ҆зы́кѡмъ, да́рꙋетъ ѿ чре́слъ непло́дныхъ пло́дъ на весе́лїе на́мъ, тѧ̀ бг҃ома́ти пречⷭ҇таѧ, ю҆́же досто́йнѡ велича́емъ.

Напра́снагѡ дре́внѧгѡ ѿѧ́тельницꙋ ѡ҆сꙋжде́нїѧ, и҆ прама́тере и҆справле́нїе: ю҆́же ро́да къ бг҃ꙋ винꙋ̀ присвое́нїѧ, къ зижди́телю мо́стъ, тѧ̀ бцⷣе велича́емъ.

Дрꙋгі́й припѣ́въ:

Велича́й дꙋшѐ, моѧ̀, ѿ непло́дове ро́ждшꙋюсѧ дв҃ꙋ марі́ю.

И҆́нъ. І҆рмо́съ:

Чꙋ́жде мт҃ремъ дѣ́вство, и҆ стра́нно дв҃амъ дѣторожде́нїе, на тебѣ̀, бцⷣе, ѻ҆боѧ̑ ᲂу҆стро́ишасѧ: тѣ́мъ тѧ̀ всѧ̑ племена̀ земна̑ѧ, непреста́ннѡ велича́емъ.

Досто́йное бг҃ома́ти твоеѧ̀ чистоты̀ ржⷭ҇тво̀ наслѣ́довала є҆сѝ, чре́зъ ѡ҆бѣща́нїе: и҆ногда́ бо непло́днѣй, бг҃опрозѧбе́нъ пло́дъ вдала́сѧ є҆сѝ. тѣ́мъ тѧ̀ всѧ̑ племена̀ зємна́ѧ непреста́ннѡ велича́емъ.

И҆спо́лнисѧ вопїю́щагѡ прⷪ҇ро́чество, глаго́летъ бо: возста́влю ски́нїю па́дшꙋю свѧще́ннагѡ дв҃да, въ тебѣ̀ чⷭ҇таѧ проѡбрази́вшꙋюсѧ, є҆ѧ́же ра́ди всѣ́хъ человѣ́кѡвъ пе́рсть, въ тѣ́ло созда́сѧ бж҃їе.

Пелена́мъ покланѧ́емсѧ твои́мъ бцⷣе, сла́вимъ да́вшаго пло́дъ пре́жде непло́днѣй, и҆ ѿве́рзшаго ложесна̀ неражда́ющей пресла́внѡ: твори́тъ бо всѧ̑, є҆ли̑ка хо́щетъ, бг҃ъ сы́й самовла́стенъ.

Ꙗ҆́кѡ да́ръ тебѣ̀ бцⷣе, пѣснопѣ́нїе, ѿ а҆́нны ро́ждшейсѧ вѣ́рнѡ дароно́симъ: ма́тєри, мт҃рь: дѣ̑вы же, дв҃ꙋ є҆ди́нꙋ: славосло́вѧще покланѧ́емсѧ тебѣ̀, пое́мъ и҆ сла́вимъ.

Трⷪ҇ченъ:

Чꙋ́жде є҆́сть беззакѡ́ннымъ сла́вити безнача́льнꙋю трⷪ҇цꙋ, ѻ҆ц҃а̀, и҆ сн҃а же, и҆ ст҃а́го дх҃а, несозда́нное вседержа́вство: є҆́юже мі́ръ ве́сь содержи́тсѧ, ма́нїемъ держа́вы є҆ѧ̀.

Бг҃оро́диченъ:

Вмѣсти́ла є҆сѝ во ᲂу҆тро́бѣ твое́й дв҃ома́ти, є҆ди́наго ѿ трⷪ҇цы хрⷭ҇та̀ цр҃ѧ̀, є҆го́же пое́тъ всѧ̀ тва́рь, и҆ трепе́щꙋтъ вы́шнїи чи́ни: того̀ молѝ всечⷭ҇таѧ, спасти́сѧ дꙋша́мъ на́шымъ.

Катава́сїа съ припѣ́вы пра́здника:

Та́инъ є҆сѝ, бцⷣе, ра́й, невоздѣ́ланнѡ возрасти́вшїй хрⷭ҇та̀, и҆́мже кре́стное живоно́сное на землѝ насади́сѧ дре́во. тѣ́мъ ны́нѣ возноси́мꙋ, покланѧ́ющесѧ є҆мꙋ̀, тѧ̀ велича́емъ.

И҆ дрꙋгі́й:

Снѣ́дїю дре́ва, ро́дꙋ прибы́вшаѧ сме́рть, крⷭ҇то́мъ ᲂу҆праздни́сѧ дне́сь: и҆́бо прама́тернѧѧ всеро́днаѧ клѧ́тва разрꙋши́сѧ, прозѧбе́нїемъ чⷭ҇тыѧ бг҃ома́тере: ю҆́же всѧ̑ си̑лы нбⷭ҇ныѧ велича́ютъ.

Свѣти́ленъ:

Ѿ непло́дныѧ дне́сь а҆́нны цвѣ́тъ произы́де бцⷣа, всѧ̑ благово́нїѧ бжⷭ҇твеннаго и҆сполнѧ́ющи концы̀ мі́ра, и҆ ра́дости всю̀ наполнѧ́ющи тва́рь: ю҆́же пою́ще досто́йнѡ восхвалѧ́емъ, ꙗ҆́кѡ сꙋ́щꙋ земноро́дныхъ превы́шшꙋю.

Два́жды.

Сла́ва, и҆ ны́нѣ:

А҆да́ме ѡ҆бнови́сѧ, и҆ є҆́ѵа возвели́чисѧ, прⷪ҇ро́цы со а҆пⷭ҇лы ликꙋ́йте и҆ пра́ведными: ѻ҆́бщаѧ бо ра́дость возсїѧ̀, а҆́гг҃лѡвъ же и҆ человѣ́кѡвъ, ѿ пра́ведныхъ дне́сь і҆ѡакі́ма и҆ а҆́нны бцⷣа марі́а.

На хвали́техъ стїхи̑ры на д҃, гла́съ а҃. Поⷣ: Ѽ ди́внагѡ чꙋдесѐ!

Ѽ ди́внагѡ чꙋдесѐ! и҆сто́чникъ жи́зни ѿ непло́дныѧ ражда́етсѧ, и҆ бл҃года́ть плодороди́ти свѣ́тлѡ начина́етсѧ. весели́сѧ і҆ѡакі́ме, бцⷣы бы́въ роди́тель: нѣ́сть и҆́нъ ꙗ҆́коже ты̀, земноро́дныхъ роди́телей, бг҃опрїѧ́тне: бг҃овмѣсти́маѧ бо ѻ҆трокови́ца, бж҃їе селе́нїе, прест҃а́ѧ гора̀, тобо́ю на́мъ дарова́сѧ.

Два́жды.

Ѽ ди́внагѡ чꙋдесѐ! ѿ непло́дове пло́дъ возсїѧ̀ манове́нїемъ всѣ́хъ содѣ́телѧ, и҆ вседержи́телѧ, до́блественнѡ мїрско́е благи́хъ разрѣшѝ непло́дство: ма́тєри съ ма́терїю бг҃оро́дичною ликꙋ́йте, зовꙋ́ще: ѡ҆бра́дованнаѧ, ра́дꙋйсѧ, съ тобо́ю гдⷭ҇ь, подаѧ́й мі́рꙋ тобо́ю ве́лїю ми́лость.

Сто́лпъ цѣломꙋ́дрїѧ ѡ҆дꙋшевле́нъ, и҆ свѣ́тлое прїѧ́телище, блиста́ющеесѧ бл҃года́тїю: а҆́нна бл҃госла́внаѧ, ꙗ҆́вльшисѧ породѝ забра́ло вои́стиннꙋ дѣ́вства, бжⷭ҇твенное процвѣте́нїе: ꙗ҆́же всѣ̑мъ дѣ́вствєннымъ, и҆ дѣ́вства жела́ющымъ дарова́нїе, дѣ́вства добро́тꙋ, ꙗ҆́вѣ подаю́щꙋю, и҆ да́рꙋющꙋю всѣ̑мъ вѣ̑рнымъ ве́лїю ми́лость.

Сла́ва, и҆ ны́нѣ, гла́съ ѕ҃. Самогла́сенъ:

Се́й де́нь гдⷭ҇ень, ра́дꙋйтесѧ лю́дїе: се́ бо свѣ́та черто́гъ, и҆ кни́га сло́ва живо́тнагѡ, и҆зъ ᲂу҆тро́бы произы́де, и҆ ꙗ҆́же къ восто́кѡмъ две́рь ро́ждшисѧ, ѡ҆жида́етъ вхо́да ст҃и́телѧ вели́кагѡ, є҆ди́на, и҆ є҆ди́наго вводѧ́щи хрⷭ҇та̀ во вселе́ннꙋю, во спасе́нїе дꙋ́шъ на́шихъ.

Славосло́вїе вели́кое. По трист҃о́мъ тропа́рь пра́здника, є҆ди́ножды. Є҆ктєнїѝ. И҆ ѿпꙋ́стъ. Зна́менꙋютсѧ же бра́тїѧ ѿ і҆ере́а ст҃ы́мъ є҆ле́емъ. И҆ пое́мъ стїхи́рꙋ самогла́снꙋ пра́здника, ю҆́же хо́щетъ є҆кклисїа́рхъ. На лїтꙋргі́и: Бл҃жє́нна, ѿ канѡ́на в҃-гѡ гла́са, пѣ́снь г҃-ѧ, на д҃: и҆ и҃- гѡ, пѣ́снь ѕ҃-ѧ на д҃. По вхо́дѣ, тропа́рь пра́здника. Сла́ва, и҆ ны́нѣ, конда́къ. Прокі́менъ, пѣ́снь бцⷣы, гла́съ г҃: Вели́читъ дꙋша̀ моѧ̀ гдⷭ҇а: Сті́хъ: Ꙗ҆́кѡ призрѣ̀ на смире́нїе рабы̀ своеѧ̀: А҆пⷭ҇лъ къ фїлїпписі́ємъ, зача́ло с҃м. А҆ллилꙋ́їа, гла́съ и҃: Слы́ши, дщѝ, и҆ ви́ждь: Сті́хъ: Лицꙋ̀ твоемꙋ̀ помо́лѧтсѧ: Є҆ѵⷢ҇лїе лꙋкѝ, зача́ло н҃д. Вмѣ́стѡ Досто́йно: пое́мъ і҆рмо́съ: Чꙋ́жде ма́терємъ: И҆ до ѿда́нїѧ, съ припѣ́вомъ пра́здника. Прича́стенъ: Ча́шꙋ спасе́нїѧ прїимꙋ̀, и҆ и҆́мѧ гдⷭ҇не призовꙋ̀. Быва́етъ же на трапе́зѣ ᲂу҆тѣше́нїе бра́тїи, дово́льно же и҆ дꙋхо́вно.

🕅 Подоба́етъ вѣ́дати, а҆́ще слꙋчи́тсѧ ржⷭ҇тво̀ прест҃ы́ѧ бцⷣы въ недѣ́лю.

Въ сꙋббѡ́тꙋ ве́чера, на ма́лѣй вече́рни, на Гдⷭ҇и, воззва́хъ: стїхи̑ры воскрⷭ҇ны гла́са на д҃: Сла́ва, и҆ ны́нѣ пра́здника. На стїхо́внѣ стїхи́ра воскрⷭ҇на є҆ди́на: и҆ пра́здника, стїхо́вна вели́кїѧ вече́рни, съ припѣ́вы пра́здника. Сла́ва, и҆ ны́нѣ, пра́здника. Тропа́рь воскрⷭ҇нъ: Сла́ва, и҆ ны́нѣ, пра́здника. Є҆ктенїа̀ ма́лаѧ. И҆ ѿпꙋ́стъ.

На вели́цѣй вече́рни: По ѻ҆бы́чной каѳі́смѣ, на Гдⷭ҇и, воззва́хъ: стїхи̑ры воскрⷭ҇ны г҃, и҆ ꙾восто́ченъ꙾ 12 є҆ди́нъ, и҆ пра́здника ѕ҃. Сла́ва, и҆ ны́нѣ, пра́здника. Вхо́дъ. Прокі́менъ днѐ. И҆ чтє́нїѧ трѝ, пра́здника. На лїті́и стїхи̑ры, и҆ Сла́ва и҆ ны́нѣ, пра́здника. На стїхо́внѣ стїхи̑ры воскрⷭ҇ны. Сла́ва, и҆ ны́нѣ, пра́здника. На благослове́нїи хлѣ́бѡвъ тропа́рь пра́здника, три́жды. И҆ чте́нїе въ посла́нїихъ, и҆лѝ пра́здника.

На ᲂу҆́трени: На Бг҃ъ гдⷭ҇ь: тропа́рь воскрⷭ҇нъ, два́жды: Сла́ва, и҆ ны́нѣ, пра́здника. По ѻ҆бы́чныхъ каѳі́смахъ сѣда́льны воскрⷭ҇ны съ бг҃орѡ́дичны и҆́хъ. И҆ чте́нїе во є҆ѵⷢ҇лїи толково́мъ, недѣ́лѧ предъ воздви́женїемъ. Та́же полѷеле́й, и҆ тропарѝ: А҆́гг҃льскїй собо́ръ: и҆ ѵ҆пакоѝ гла́са, и҆ сѣда́льны пра́здника ѻ҆́ба по є҆ди́ножды. Сла́ва, сѣда́ленъ, и҆̀же по полѷеле́и. И҆ ны́нѣ, дрꙋгі́й. И҆ чте́нїе пра́здника. Степє́нна гла́са. Прокі́менъ и҆ є҆ѵⷢ҇лїе пра́здника. Та́же, Воскрⷭ҇нїе хрⷭ҇то́во: ѱало́мъ н҃. И҆ цѣлова́нїе є҆ѵⷢ҇лїа по ѻ҆бы́чаю. Посе́мъ, Сла́ва: Мл҃твами бцⷣы: И҆ ны́нѣ, то́йже. Стїхи́ра пра́здника. Канѡ́нъ воскрⷭ҇нъ со і҆рмосо́мъ на д҃, и҆ бцⷣы на два̀, и҆ пра́здника ѻ҆́ба канѡ́на на и҃. Катава́сїа: Крⷭ҇тъ начерта́въ: По г҃-й пѣ́сни, конда́къ воскрⷭ҇нъ, и҆ і҆́косъ, и҆ сѣда́ленъ пра́здника, два́жды. По ѕ҃-й пѣ́сни, конда́къ пра́здника, и҆ і҆́косъ. И҆ чте́мъ про́логъ. На ѳ҃-й пѣ́сни припѣ́вы не пое́мъ, но пое́мъ Честнѣ́йшꙋю: Свѣти́ленъ воскрⷭ҇нъ: Сла́ва, и҆ ны́нѣ, пра́здника. На хвали́техъ стїхи̑ры воскрⷭ҇ны д҃, и҆ пра́здника д҃, съ припѣ́вы пра́здника. Сла́ва, пра́здника. И҆ ны́нѣ, Пребл҃гослове́нна є҆сѝ: и҆ Славосло́вїе вели́кое. Трист҃о́е. И҆ тропа́рь воскрⷭ҇нъ то́чїю. Є҆ктєнїѝ, и҆ ѿпꙋ́стъ. Дае́тсѧ же и҆ є҆ле́й ѿ канди́ла пра́здника. Та́же, Сла́ва, и҆ ны́нѣ, стїхи́ра є҆ѵⷢ҇льскаѧ. И҆ ѡ҆глаше́нїе. И҆ ѻ҆бы́чное и҆схожде́нїе: и҆ ча́съ а҃-й въ притво́рѣ. На а҃-мъ часѣ̀ тропа́рь воскрⷭ҇нъ. Сла́ва, пра́здника: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ воскрⷭ҇нъ, и҆ ѿпꙋ́стъ. Та́кожде и҆ на про́чихъ часѣ́хъ тропа́рь воскрⷭ҇нъ. Сла́ва, пра́здника: И҆ ны́нѣ, бг҃оро́диченъ часѡ́въ. Конда́къ пра́здника, и҆ воскрⷭ҇нъ, глаго́лемъ премѣнѧ́юще.

На лїтꙋргі́и: Бл҃жє́нна воскрⷭ҇на гла́са, на ѕ҃: и҆ пра́здника пѣ́снь г҃-ѧ, на д҃. По вхо́дѣ тропа́рь воскрⷭ҇нъ, и҆ пра́здника: Сла́ва, конда́къ воскрⷭ҇нъ: И҆ ны́нѣ, пра́здника. Прокі́менъ, а҆пⷭ҇лъ, а҆ллилꙋ́їа, и҆ є҆ѵⷢ҇лїе, чте́мъ пре́жде недѣ́ли предъ воздви́женїемъ, та́же рѧ́дъ, посе́мъ бцⷣы. А҆ прокі́менъ гла́са ѡ҆ставлѧ́етсѧ. Прича́стенъ: Хвали́те гдⷭ҇а съ нб҃съ: и҆ пра́здника: Ча́шꙋ спасе́нїѧ прїимꙋ̀:

🕅 А҆́ще слꙋчи́тсѧ попра́зднство ржⷭ҇тва̀ прест҃ы́ѧ бцⷣы въ недѣ́лю:

Въ сꙋббѡ́тꙋ, на ма́лѣй вече́рни, стїхи̑ры воскрⷭ҇ны, и҆ бцⷣы, по ѻ҆бы́чаю. На вели́цѣй вече́рни. На Гдⷭ҇и, воззва́хъ, стїхи̑ры воскрⷭ҇ны трѝ, и҆ ꙾восто́ченъ꙾ 13 є҆ди́нъ: и҆ пра́здника тогѡ̀ днѐ на рѧдꙋ̀, трѝ: и҆ мине́и ст҃а́гѡ, г҃. Сла́ва, пра́здника, и҆лѝ ст҃а́гѡ: И҆ ны́нѣ, бг҃оро́диченъ пе́рвый гла́са. Вхо́дъ. Прокі́менъ днѐ: и҆ є҆ктєнїѝ. На лїті́и стїхи̑ры пра́здника, стїхо́вна вече́рнѧѧ тогѡ̀ днѐ. Сла́ва, и҆ ны́нѣ, пра́здника. На стїхо́внѣ стїхи̑ры воскрⷭ҇ны: Сла́ва ст҃а́гѡ: а҆́ще ли нѝ, Сла́ва, и҆ ны́нѣ, пра́здника. На благослове́нїи хлѣ́бѡвъ тропа́рь: Бцⷣе дв҃о ра́дꙋйсѧ: два́жды. и҆ пра́здника є҆ди́ножды. И҆ чте́нїе во а҆пⷭ҇льскихъ посла́нїихъ.

На ᲂу҆́трени: Тропа́рь воскрⷭ҇нъ два́жды: Сла́ва, ст҃а́гѡ: а҆́ще ли нѝ, Сла́ва, и҆ ны́нѣ, пра́здника. По ѻ҆бои́хъ каѳі́смахъ сѣда́льны воскрⷭ҇ны съ бг҃орѡ́дичны и҆́хъ. И҆ чте́нїе во є҆ѵⷢ҇лїи толково́мъ, недѣ́лѧ предъ воздви́женїемъ. Та́же непоро́чны, и҆ тропарѝ: А҆́гг҃льскїй собо́ръ: и҆ ѵ҆пакоѝ гла́са, и҆ чте́нїе во є҆ѵⷢ҇лїи толково́мъ, недѣ́лѧ рѧ́дъ. Степє́нна, и҆ прокі́менъ, гла́са. Є҆ѵⷢ҇лїе воскрⷭ҇ное: Воскрⷭ҇нїе хрⷭ҇то́во: и҆ ѱало́мъ н҃. и҆ прѡ́чаѧ воскрⷭ҇на. Канѡ́нъ воскрⷭ҇нъ со і҆рмосо́мъ на д҃: и҆ бцⷣы на два̀: и҆ пра́здника на д҃: и҆ ст҃а́гѡ на д҃: Катава́сїа: Крⷭ҇тъ начерта́въ: По г҃-й пѣ́сни, конда́къ и҆ і҆́косъ пра́здника: и҆ ст҃а́гѡ, а҆́ще и҆́мать, и҆ сѣда́ленъ. Сла́ва, и҆ ны́нѣ, пра́здника. По ѕ҃-й пѣ́сни, конда́къ воскрⷭ҇нъ, и҆ і҆́косъ. На ѳ҃-й пѣ́сни пое́мъ Честнѣ́йшꙋю: Свѣти́ленъ воскрⷭ҇нъ. Сла́ва, ст҃а́гѡ: А҆́ще ли нѝ, Сла́ва, и҆ ны́нѣ, пра́здника. На хвали́техъ стїхи̑ры воскрⷭ҇ны д҃: и҆ пра́здника д҃: стїхо́вна тогѡ̀ днѐ, со Сла́внымъ, съ припѣ̑вы пра́здника. Сла́ва, стїхи́ра є҆ѵⷢ҇льскаѧ. И҆ ны́нѣ, Пребл҃гослове́нна є҆сѝ: По Славосло́вїи тропа́рь воскрⷭ҇нъ то́чїю: є҆ктєнїѝ, и҆ ѿпꙋ́стъ, и҆ ѡ҆глаше́нїе, и҆ и҆схожде́нїе въ притво́ръ, и҆ ча́съ а҃-й. На а҃-мъ часѣ̀ тропа́рь воскрⷭ҇нъ: Сла́ва, пра́здника: И҆ ны́нѣ, бг҃оро́диченъ часѡ́въ: По Ѻ҆́ч҃е на́шъ: конда́къ пра́здника, и҆ коне́чный ѿпꙋ́стъ. На г҃-мъ часѣ̀ тропа́рь воскрⷭ҇нъ: Сла́ва, ст҃а́гѡ: А҆́ще ли нѝ, Сла́ва, пра́здника. По Трист҃о́мъ конда́къ пра́здника, и҆ воскрⷭ҇нъ, глаго́лемъ премѣнѧ́юще.

На лїтꙋргі́и: Бл҃жє́нна гла́са на ѕ҃: и҆ пра́здника ѿ канѡ́на пѣ́снь рѧдова́ѧ, на д҃. По вхо́дѣ тропа́рь воскрⷭ҇нъ, и҆ пра́здника: и҆ хра́ма ст҃а́гѡ, и҆лѝ ст҃ы́ѧ: и҆ ст҃а́гѡ, а҆́ще є҆́сть. Та́же конда́къ воскрⷭ҇нъ, и҆ хра́ма ст҃а́гѡ, и҆лѝ ст҃ы́ѧ. Сла́ва, ст҃а́гѡ, а҆́ще є҆́сть: А҆́ще ли нѝ, Сла́ва, хра́ма ст҃а́гѡ: И҆ ны́нѣ, пра́здника. Прокі́менъ, а҆пⷭ҇лъ, а҆ллилꙋ́їа, є҆ѵⷢ҇лїе, пре́жде недѣ́ли предъ воздви́женїемъ, пото́мъ рѧ́дъ подъ зача́ло: и҆ ст҃а́гѡ: Прича́стенъ: Хвали́те гдⷭ҇а съ нб҃съ: и҆ ст҃а́гѡ, а҆́ще є҆́сть. А҆́ще ли нѝ, пра́здника.

[зрѝ] Сꙋббѡ́та предъ воздви́женїемъ.

На лїтꙋргі́и: Прокі́менъ, гла́съ г҃. По́йте бг҃ꙋ на́шемꙋ, по́йте, по́йте цр҃е́ви на́шемꙋ, по́йте. Сті́хъ: Всѝ ꙗ҆зы́цы восплещи́те рꙋка́ми: А҆пⷭ҇лъ къ корі́нѳѧнѡмъ, зача́ло рк҃ѕ: Бра́тїе, премꙋ́дрость глаго́лемъ: А҆ллилꙋ́їа, гла́съ є҃: Ми́лѡсти твоѧ̑, гдⷭ҇и, во вѣ́къ воспою̀ въ ро́дъ и҆ ро́дъ. Є҆ѵⷢ҇лїе матѳе́а, зача́ло л҃ѳ: Речѐ гдⷭ҇ь: и҆́же лю́битъ ѻ҆тца̀, и҆лѝ ма́терь: А҆пⷭ҇лъ же и҆ є҆ѵⷢ҇лїе сꙋббѡ́ты рѧдовы́ѧ, подъ зача́ло: Та́же ст҃а́гѡ, а҆́ще и҆́мать. Прича́стенъ днѐ.

Подоба́етъ вѣ́дати:

А҆́ще слꙋчи́тсѧ ѿда́нїе ржⷭ҇тва̀ бцⷣы въ сꙋббѡ́тꙋ предъ воздви́женїемъ. Прокі́менъ, а҆ллилꙋ́їа, и҆ прича́стенъ пра́здника. А҆пⷭ҇лъ, и҆ є҆ѵⷢ҇лїе, пре́жде сꙋббѡ́ты предъ воздви́женїемъ, та́же пра́здника. А҆ прокі́менъ сꙋббѡ́ты предъ воздви́женїемъ ѡ҆ставлѧ́етсѧ.

Недѣ́лѧ предъ воздви́женїемъ.

На ᲂу҆́трени чте́мъ въ толкова́нїи є҆ѵⷢ҇лїе і҆ѡа́нна, и҆ днѐ рѧ́дъ.

На лїтꙋргі́и: Прокі́менъ, гла́съ ѕ҃: Спасѝ, гдⷭ҇и, лю́ди твоѧ̑: Сті́хъ: Къ тебѣ̀, гдⷭ҇и, воззовꙋ̀: А҆пⷭ҇лъ къ гала́тѡмъ, зача́ло сє҃і: Бра́тїе, ви́дите, коли́цѣми кни́гами: А҆ллилꙋ́їа, гла́съ а҃: Вознесо́хъ и҆збра́ннаго: Є҆ѵⷢ҇лїе і҆ѡа́нна, зача́ло ѳ҃: Речѐ гдⷭ҇ь: никто́же взы́де на не́бо: та́же рѧ́дъ. Прича́стенъ днѐ.

* * *

12

꙾А҆нато́лїевъ꙾

13

꙾А҆нато́лїевъ꙾

Комментарии для сайта Cackle