В 10-й день

Святы́х апо́стол Ера́ста, Оли́мпа, Родио́на, Сосипа́тра, Куа́рта (Ква́рта) и Те́ртия

На Го́споди, воззва́х: стихи́ры, глас 1.

Подо́бен: Всехва́льнии му́ченицы:

Ми́ра исполне́ния, я́ко орли́ крила́тии,/ пресве́тло преходя́ще, священнопропове́дницы,/ уловле́ныя от злоде́я привлеко́сте к ве́ре непоро́чней./ Тем моли́теся дарова́ти душа́м на́шим/ мир и ве́лию ми́лость.

Те́ртия и Сосипа́тра гла́сы свяще́нными почти́м,/ и Оли́мпа, и Родио́на,/ и с си́ми Ера́ста священнотаи́нника,/ и Боже́ственнаго Куа́рта,/ сла́вящия Христа́ Бо́га на́шего/ и моля́щия Его́ дарова́ти душа́м на́шим/ мир и ве́лию милость.

Язы́ки приведо́сте Христу́ Бо́гу, блаже́ннии,/ изба́влены Кро́вию Благоволи́вшаго на земли́ роди́тися/ и Крест и смерть претерпе́вшаго во́лею, всему́дрии./ Его́же ны́не моли́те/ дарова́ти душа́м на́шим/ мир и ве́лию ми́лость.

Сла́ва, и ны́не, Богоро́дичен:

Всепе́тая Влады́чице,/ наде́жде ве́рных и утвержде́ние,/ прибе́жище и по́мощь,/ Тя мо́лим: от вся́кия беды́ рабы́ Твоя́ сохрани́,/ ве́рою покланя́ющияся Рождеству́ Твоему́./ Его́же моли́ дарова́ти душа́м на́шим/ мир и ве́лию ми́лость.

Крестобогоро́дичен:

Своего́ А́гнца А́гница и непоро́чная Влады́чица/ на Кресте́ я́ко ви́девши,/ ви́да не иму́ща, ниже́ добро́ты,/ увы́ Мне, рыда́ющи, глаго́лаше:/ где добро́та Твоя́ за́йде, Сладча́йший?/ Где благоле́пие?/ Где благода́ть блиста́ющая о́браза Твоего́,/ Сы́не Мой любе́знейший?

Тропа́рь, глас 3:

Апо́столи святи́и,/ моли́те ми́лостиваго Бо́га,/ да прегреше́ний оставле́ние/ пода́ст душа́м на́шим.

На У́трени

О́ба кано́на Окто́иха и святы́х на 4, его́же краегране́сие: Богоглаго́ливыя ученики́ пою́ спротяже́нно. Ио́сиф. Глас 1.

Песнь 1

Ирмо́с: Твоя́ победи́тельная десни́ца/ Боголе́пно в кре́пости просла́вися,/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая.

Боже́ственнии су́ще ученицы́ вопло́щшагося за милосе́рдие Бога на́шего,/ Того́ моли́те грехо́в дарова́ти проще́ние/ соверша́ющим ва́шу па́мять, блаже́ннии.

Зерца́ла Бо́жия светови́дная/ вмести́тельна Того́ подая́ний яви́стеся, блаже́ннии,/ всем ве́рным благода́тельно даю́ще спаси́тельныя зари́, Богови́дцы апо́столи.

Возсия́ша всем просвеще́ние, озаре́ний исто́чник поче́рпше,/ Ера́ст, и Те́ртий, и Оли́мп, и Родио́н,/ и Сосипа́тр ку́пно с Куа́ртом,/ я́же благоче́стно ублажи́м.

Богоро́дичен: Род челове́ческий Твои́м Рождество́м, Де́во, обнови́ла еси́,/ Сло́во бо родила́ еси́ О́тчее,/ в плоть ме́ртвенную оде́явшееся/ и безсме́ртия пути́ нам показа́вшее.

Песнь 3

Ирмо́с: Еди́не, ве́дыи́ челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́и́:/ одушевле́нный хра́ме неизрече́нныя сла́вы Твоея́, Человеколю́бче.

Сло́во, я́ко свети́льник мы́сленный, принося́ще, апо́столи,/ Богопоко́рно всю тварь проидо́сте,/ тоя́ мрак разгоня́юще и сы́ны явля́юще све́та благода́тию,/ но́щи неве́дения рабо́тающия.

Глаго́л ва́ших проро́чески во всю изы́де вселе́нную веща́ние спаси́тельное/ и дел све́тлое показа́ние всю зе́млю обтече́,/ ду́ши просвеща́ющее, Богоглаго́ливии Госпо́дни апо́столи.

Все́лься в душа́х ва́ших, му́дрии, Дух Всесвяты́й/ Богови́дны весьма́ соде́ла;/ всю́ду мир обходя́ще, хра́мы разори́сте и́дольския благода́тию/ и Бо́гу це́ркви воздвиго́сте.

Богоро́дичен: Сы́на О́тча единоро́днаго, безма́терня пе́рвее/ и из Тебе́ рожде́нна, уве́девше безо́тча,/ Бо́жию Ма́терь испове́даем Тя, безстра́стно ро́ждшую/ и Де́ву пребы́вшу па́че сло́ва, Мари́е Богоневе́сто.

Конда́к, глас 4.

Подо́бен: Яви́лся еси́:

Яви́ся днесь апо́стол честно́е торжество́,/ подаю́щее я́ве103 всем прегреше́ний оставле́ние,/ соверша́ющим их па́мять.

Та́же седа́лен, глас 1.

Подо́бен: Гроб Твой:

Ера́ста и Оли́мпа, Сосипа́тра и Те́ртия,/ Родио́на купно и Куа́рта память согла́сно почти́м, к ним воспева́юще:/ Боже́ственнии пропове́дателие и слуги́ Сло́ва,/ ду́ши на́ша ве́чнующия му́ки моли́твами ва́шими изба́вите.

Сла́ва, и ны́не, Богоро́дичен:

Безневе́стная, Чи́стая Богоро́дице Де́во,/ еди́на ве́рных Предста́тельнице и Покро́ве,/ бед, и скорбе́й, и лю́тых обстоя́ний вся изба́ви,/ на Тя упова́ние, Отрокови́це, иму́щия,/ и ду́ши на́ша спаси́ Боже́ственными моли́твами Твои́ми.

Крестобогоро́дичен:

Нескве́рная А́гница А́гнца и Па́стыря, пове́шена на Дре́ве, ме́ртва зря́щи,/ пла́чущи, веща́ше, ма́терски восклица́ющи:/ ка́ко претерплю́ Твое́, е́же па́че сло́ва, Сы́не Мой, сни́тие104/ и во́льныя стра́сти, Бо́же Преблаги́й?

Песнь 4

Ирмо́с: Го́ру, Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.

Утвержде́ния дре́вле неутвержде́ным бы́вше,/ раскопа́сте ва́шими Богода́нными уче́нии вра́жия тверды́ни всера́зныя/ и запусте́нию преда́сте, Богови́днии Спа́совы апо́столи.

Вельми́ Христо́ва вели́чия пропове́дающе, ума́лении всеконе́чно, великопропове́дницы,/ земны́я вельми́ просвети́сте све́тло,/ вели́чием благода́ти соверши́вше, Боже́ственнии апо́столи.

Да похва́лится Боже́ственный Оли́мп песнопе́ньми,/ и Родио́н с ним да возвели́чится благоче́стно,/ тече́ние соверши́вше муче́ния с Петро́м Богопропове́дником в Ри́ме,/ глава́ми отсека́еми.

Богоро́дичен: Чуде́с бо́льше всех, Всенепоро́чная,/ в Тебе́ новосоде́явшееся чу́до показа́ся я́вственно:/ Бо́га бо родила́ еси́ теле́сне,/ земны́м за милосе́рдие соедини́вшася в несли́тнем соедине́нии, Богоневе́сто.

Песнь 5

Ирмо́с: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.

Му́дрость О́тча, все осуществова́вшая, учи́тели в мир вас посла́,/ в му́дрости Ду́ха и и́стины/ явле́нием вся умудря́ющия, сла́внии.

Сло́ва вмета́юще, всему́дрии, у́дицу,/ возвлеко́сте из глубины́ неве́дения благода́тию рыб, су́щия безгла́сншия,/ и Го́споду ве́ровавшия приведо́сте.

Восхва́лим Оли́мпа, и вели́каго Родио́на,/ и Те́ртия, и Сосипа́тра,/ ку́пно и Ера́ста, и Боже́ственнаго Куа́рта,/ Христопропове́дники и всех благочести́вых защи́тники.

Богоро́дичен: Зачала́ еси́ сло́вом Сло́во, Всенепоро́чная,/ и родила́ еси́ па́че ума́ и сло́ва, Богоневе́стная, бы́вша, Богоро́дице, Челове́ка./ Тем Тя словесы́ Богодухнове́нными всегда́ ублажа́ем.

Песнь 6

Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш:/ Ты бо кре́пость немощству́ющих и исправле́ние.

Пречестни́и, я́ко ка́мение, валя́ющеся на земли́,/ привали́сте к благоче́стию, и́же нра́вом лука́вым ка́мению нечу́вственному служа́щия,/ Богови́днии Сло́ва таи́нницы блаже́ннейшии.

Еди́ницу в Тре́х Ли́цех неразлу́чну, несли́тну пропове́дающе,/ многобо́жную от земли́ разори́сте лесть, неле́стнии Христо́вы апо́столи,/ и лю́те прельще́ныя к све́ту Богозна́ния наста́висте.

Ра́зумы кра́сными несмы́сльство нему́дрых, прему́дрии апо́столи, разори́сте,/ и утверди́сте Бо́гу, Всецарю́ е́диному, ве́ровати,/ тварь всю Боже́ственными светоли́тии украша́ющему.

Бсгоро́дичен: Я́ко ино́е не́бо, пе́рваго, Влады́чице, я́вльшися вы́шшее, Тя сла́вим,/ Со́лнце нам Пра́вды возсия́вшее/ и глубо́кую неве́дения тьму́ отгна́вшее.

Конда́к, глас 2.

Подо́бен: Вы́шних ища́:

Боже́ственным све́том ум озари́вше,/ вити́йская плете́ния му́дре разори́сте,/ и язы́ки вся улови́вше, апо́столи сла́внии,/ Влады́це приведо́сте,/ Тро́ицу Боже́ственную сла́вити науча́юще.

И́кос:

Я́ко ученицы́ всех Влады́ки,/ мре́жею, Богови́дцы, ва́ших моли́тв/ из глубины́ прегреше́ний извлецы́те смире́нную ду́шу мою́,/ сетьми́ уловле́ную де́монских ко́зней,/ да до́бре преше́д про́чее вре́мя живота́ моего́,/ пою́ вас любо́вию/ и просла́влю житие́ ва́ше непоро́чное,/ е́же на земли́ соверши́сте,/ лю́те омраче́нныя просвети́вше,/ Тро́ицу Боже́ственную сла́вити науча́юще.

Песнь 7

Ирмо́с: Тебе́, у́мную, Богоро́дице, пещь/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́ во чре́ве Твое́м всеце́л,/ хва́льный отце́в Бог и препросла́влен.

Тя, свяще́нна иконо́ма, Ера́сте,/ Це́ркве Христо́вы су́щия во Иерусали́ме, пиша́ пропове́даше Па́вел апо́стол,/ с ни́миже тя почита́ем, пою́ще Христу́:/ хва́льный отце́в на́ших Бо́же, благослове́н еси́.

Терпе́нием искуше́ний, и скорбе́й, и гоне́ний искуси́вся/ и я́звами Христо́выми удобря́емь, Ера́сте пребога́те, велегла́сно взыва́л еси́:/ хва́льный отце́в Бо́же, благослове́н еси́.

Зако́на но́ваго яви́лся еси́, Куа́рте, возвести́тель,/ ве́тхаго беззако́ния отводя́ чуждему́дренныя/ и к возновле́нию жи́зни преводя́ зову́щия:/ хва́льный отце́в Бо́же, благослове́н еси́.

Богоро́дичен: О́тчее Сло́во Соприсносу́щное, я́вльшееся земны́м, воплоти́ла еси́/ и те́лом, Отрокови́це, породила́ еси́ Челове́ка бы́вша, да спасе́т челове́ка,/ хва́льный отце́в Бог и препросла́влен.

Песнь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чи́стее зла́та блеща́хуся, глаго́люще:/ благослови́те вся дела́ Госпо́дня Го́спода,/ по́йте и превозноси́те во вся ве́ки.

Нерасте́рзни столпи́ Христо́вы я́вльшеся Це́ркве,/ разори́сте злоче́стия сте́ны вся,/ ве́рныя же, я́ко ка́мение, назда́вше на Ка́мени ве́ры, вопию́щия:/ вся дела́ Госпо́да по́йте и превозноси́те Его во ве́ки.

Законополо́жницы яви́стеся вы,/ Ду́ха зако́н напису́юще в сердца́х ве́рных, всеблаже́ннии,/ и́мже просвеща́еми, вопия́ху:/ вся дела́ Го́спода по́йте и превозноси́те Его́ во ве́ки.

Украси́вся, блаже́нный Оли́мпе, в о́ньже день Петр вели́кий коне́ц прия́т,/ я́ве сконча́вся ку́пно с Родио́ном мече́м,/ повеле́нием Не́рона, беззако́ннаго царя́,/ и совокупи́стеся небе́сным лико́м.

Богоро́дичен: Ста́мна дре́вле, иму́щая ма́нну, Чи́стая, образова́ше Тя,/ Христа́ бо, сла́дость на́шу, носи́ла еси́ во чре́ве/ и пло́тию родила́ еси́, избавля́ющаго вся́кия го́рести безме́стных прегре́шений/ превознося́щия Того́ во ве́ки.

Песнь 9

Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́ли́мся, пещь,/ да Тя, Богоро́дице, непреста́нно велича́ем.

Ра́вно тече́ние соверши́вше, ра́вно от Влады́ки Сло́ва обога́щшеся,/ ра́вных Ду́ха даро́в сподо́бистеся и по́честей ра́вных получи́сте,/ апо́столи Госпо́дни, просвети́телие серде́ц на́ших.

Я́коже небе́сныя зве́зды, Богозна́меньми всю зе́млю просвети́сте,/ тьму́ глубо́кую неве́дения отгна́вше и сы́ны дне показа́вше,/ дре́вле порабоще́нныя козньми́ вражде́бника.

Полк злоу́мных погуби́сте,/ во глубину́ дре́вле ври́нувших язы́ки люде́й,/ мно́жество же Бо́гу приведо́сте спаса́емых,/ чино́м совокупля́еми невеще́ственных сил, всеизбра́ннии Христо́вы апо́столи.

Вше́дше к преми́рным, Оли́мп вели́кий и Сосипа́тр,/ Те́ртий ку́пно и Родио́н, и Куа́рт, и Ера́ст свяще́ннейший/ и ны́не о ми́ре Изба́вителя мо́лят.

Богоро́дичен: Пощади́ лю́ди Твоя́, Го́споди,/ нахожде́ния ва́рварскаго нас избавля́я, и грехо́в, и напа́стей, и му́ки ве́чныя/ моли́твами Ро́ждшия Тя Де́вы Пречи́стыя и сла́вных апо́стол Твои́х.

Свети́лен.

Подо́бен: Не́бо звезда́ми:

Све́тлая прия́телища Ду́ха Свята́го,/ пресве́тлыя зари́ невече́рняго дне,/ светода́тельная мо́лния, апо́столы, в пе́снех ве́рно просла́вим вси.

Богоро́дичен: Тя Засту́пницу вси и́мамы, гре́шнии, о Пресвята́я Де́во!/ Ты благоуве́тлива нам соде́лай Сы́на Твоего́/ ма́терними Твои́ми мольба́ми.

Святые апостолы от 70-ти: Ераст, Олимп, Родион, Сосипатр, Куарт (Кварт) и Тертий жили в I веке.

Святой Родион, или Иродион, родственник апостола Павла (Рим. 16:11), оставил епископскую кафедру в Патрах, чтобы идти в Рим со святым апостолом Петром. Святой апостол Олимп (или Олимпан), о котором вспоминает апостол Павел (Рим. 16:15), тоже был спутником апостола Петра. Оба апостола от 70-ти были обезглавлены в тот же день и час, когда распяли апостола Петра.

Святые апостолы Ераст, Сосипатр, Куарт и Тертий были учениками святого апостола Павла. О них апостол языков упоминает в Послании к Римлянам: «Приветствуют вас... Иасон и Сосипатр, сродники мои» (Рим. 16:21); «Приветствую вас в Господе и я, Тертий, писавший сие послание» (Рим. 16:22); «Приветствует вас Ераст, городской казнохранитель, и брат Кварт» (Рим. 16:23).

Апостол Сосипатр, родом из Ахаии, был епископом Иконии, где и скончался. Апостол Ераст был сначала диаконом и казнохранителем Иерусалимской Церкви, а потом епископом в Панеаде. Святой апостол Куарт перенес много страданий за свое благочестие, обратил ко Христу множество язычников и мирно скончался в сане епископа города Берита. Святой апостол Тертий, записавший послание апостола Павла к Римлянам, был вторым епископом Иконии, где и преставился. Память всех семидесяти святых апостолов совершается 4-го января, а их имена именуются в списке святого Дорофея, епископа Тирского, †361.

В то́йже день Свята́го му́ченика Оре́ста врача́

На Го́споди, воззва́х: стихи́ры, глас 1.

Подо́бен: Прехва́льнии му́ченицы:

Оре́сте пресла́вне, очервле́нием своея́ кро́ве/ себе́ прапру́ду105 очерви́,/ е́юже украси́ся, побе́дным венце́м венча́ся,/ Бо́гу Безсме́ртному предстои́ши,/ Его́же ны́не моли́/ дарова́ти душа́м на́шим ве́лию ми́лость.

Огне́м по́двиг твои́х, прему́дре,/ пре́лесть поже́гл еси́,/ ка́плями кро́вными вра́жия потопи́ полки́ вся/ и ве́рных напои́ сердца́,/ источа́юще конце́м благоче́стие,/ и ны́не помоли́ дарова́ти душа́м на́шим ве́лию ми́лость.

У́тренюя возсия́, возблиста́я всю вселе́нную/ страстьми́ свои́ми, Оре́сте сла́вне,/ страстоте́рпцем сла́ва,/ и су́етную тьму отгоня́ благода́тию./ Тем моли́ся дарова́ти душа́м на́шим ве́лию ми́лость.

Тропа́рь, глас 4.

Подо́бен: Вознесы́йся:

Удо́м усекнове́ние терпе́л еси́/ и о́гненную лю́тую му́ку, му́чениче,/ подви́гся, всесла́вне,/ венце́м я́ве увязе́ся нетле́нным, преблаже́нне,/ Престо́лу же предстои́ши Святы́я Тро́ицы,/ Ю́же помоли́, да спасе́т ны,/ му́чениче Оре́сте,/ ве́рою пою́щим тя.

Кано́н, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты Еги́петския,/ я́ко просла́вися.

Боже́ственными блиста́ем всегда́ светлостьми́, прехва́льне,/ светоно́сное твое́ пра́зднество чту́щая озари́/ и из тьмы лю́тыя изведи́.

Христо́ва Боже́ственная любы́ разжже́ и си́льна тя сотвори́,/ всю пожже́ную опаля́юща та́йну и́дольскаго гне́ва,/ му́чениче вседо́блий.

Тща́нием и терпе́нием обличи́ беззако́нствующая,/ чести́ ну́дяща106 тя, страстоте́рпче Оре́сте,/ дела́ рук челове́ческ – безду́шныя куми́ры.

Богоро́дичен: Тя, Бо́жий пречи́стый храм, молю́, Пречи́стая,/ оскве́рншееся мое се́рдце сластьми́ нечи́стыми очи́сти хода́тайством Свои́м.

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́бося дух мой внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Укрепля́ем си́лою Паракли́товою,/ предстоя́ше судя́щему беззако́нно,/ и сего́ слове́с свои́х си́лою, преблаже́нне, посрами́/ и, поя́, глаго́лаше:/ несть свя́та, я́коже Бо́га на́шего, и несть пра́ведна, па́че Тебе́, Го́споди.

Сло́во твое́, житие́м просвеще́но,/ житие́ твое́, Сло́вом разжже́но,/ мно́гия на свет благоче́стия приведе́, му́чениче многостра́стне,/ и с ни́ми пое́ши:/ несть свя́та, я́коже Бог наш, и несть пра́ведна, па́че Тебе́, Го́споди.

Возвы́сима беззако́нна безу́мием низве́рже му́жеством и терпе́нием,/ вознесе́ же ся к Бо́гу венцено́сец, Оре́сте сла́вне, поя́ше:/ несть свя́та, я́коже Бог наш, и несть пра́ведна, па́че Тебе́, Го́споди.

Богоро́дичен: Зачала́ еси́ во утро́бе Свое́й, Богома́ти, Зижди́теля и Бо́га всех/ и Сего́ родила́ еси́, па́че сло́ва плоть бы́вша,/ сего́ ра́ди Ти взыва́ем:/ несть свя́та, я́коже Бог наш, и несть пра́ведна, па́че Тебе́, Го́споди.

Седа́лен, глас 4, то́йже, что и тропа́рь ( зри день сей вы́ше )

Песнь 4

Ирмо́с: Прише́л еси́ от Де́вы, не хода́тяй, ни А́нгел,/ но Сам, Го́споди, вопло́щся,/ и спасл еси́ всего́ мя челове́ка./ Тем зову́ Ти: сла́ва си́ле Твое́й, Го́споди.

Не поколеба́ша столпа́ души́ твоея́, сте́кшеся, пото́ци му́ченичестии,/ му́чениче Оре́сте блаже́нне,/ на ка́мене бо утверже́н бысть Госпо́дня любве́, достосла́вне.

Глаго́л твои́х воззре́ти све́та томи́тель не возмо́же,/ в нощи́ ше́ствуя неразу́мия,/ тем, ра́нствуя, тя сы́на све́та дне сотвори́л есть.

Укрепи́ тя Иису́с Бог благода́тию,/ му́ками оскорбля́ема, и ра́нами разруша́ема,/ и пропина́ема неми́лостивно, страстоте́рпче преслову́щий.

Богоро́дичен: Тя, Пречи́стая, Авваку́м го́ру нарече́ осене́ну,/ из нея́же про́йде Еди́но Сло́во, вопло́щся,/ Челове́к быв премно́гим милосе́рдием и Человеколю́бец.

Песнь 5

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м:/ ино́го бо, ра́зве Тебе́, бо́га не зна́ю.

Жезло́м сокруша́емо блаже́нное все те́ло твое́,/ я́ко си́лен, терпе́л еси́, показу́я, Оре́сте, ве́ру,/ явля́яся, взыва́ше, Оре́сте, сла́вне:/ па́че Тебе́, ино́го бо́га не зна́ем.

Поги́бели бо́ги е́ллинския преда́л еси́/ святы́ми твои́ми моли́твами к Творцу́, Оре́сте,/ ра́ны претерпе́л еси́, зело́ разсека́ем,/ пло́ти твоея́ ко́же отдира́еме.

Еди́ну Зарю́ Триипоста́сну су́щу,/ Еди́но Существо́ и Еди́но Госпо́дство возвеща́я Пребоже́ственныя и Несозда́нныя Тро́ицы,/ лжеиме́нныя бо́ги сокруши́,/ и́дольская тре́бища низложи́л еси́.

Богоро́дичен: Восто́к Со́лнечныя сла́вы я́вльшися, Отрокови́це,/ на за́пад челове́ческаго отринове́на существа́ бы́вша,/ Сего́ ражда́еши, вся просвеща́ющаго,/ вся от но́щи злы изъе́млющаго.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Кропле́нием честны́я твоея́ кро́ве вода́ скве́рная преста́,/ бесо́м умовре́дно приноси́ма,/ страстоте́рпче Христо́в до́блий.

Душа́м и те́лом врача́ тя, му́чениче, обре́тше,/ от страсте́й избавля́емся, и от искуше́ния, и ско́рби/ благоприя́тными Боже́ственными моли́твами.

Свы́ше истка́ную благода́ть с оде́нием телесе́ оде́жду восприи́м,/ обнажи́л еси́ злочести́вых полки́, пребога́те.

Богоро́дичен: Ми́лости Твоея́ мя сподо́би, неми́лостиваго,/ и зло́бием одержи́ма, и страсте́м прилежа́ща,/ Пречи́стая Де́во Богоневе́стная.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Кро́вными ка́плями безбо́жный огнь угаси́л еси́,/ ту́чами ди́вными, достосла́вне, изсо́хшая страстьми́ всегда́ прохлажда́еши,/ вопию́щая ве́рно, взыва́юща:/ благослове́н еси́, Бо́же оте́ц на́ших.

Чу́дом глубина́, цельба́м река́,/ крин, излива́я всем здра́вие, всем оставле́ние от скве́рных,/ явля́ется, му́чениче страстоте́рпче Оре́сте, ра́ка твои́х моще́й,/ е́йже покланя́ющеся благочести́вно, тя блажи́м.

Разреши́вся от страсте́й теле́сных, прему́дре,/ му́ки ра́ди к скоти́не привя́зан бысть, и ведо́м, и суро́во влеко́м./ Те́м от те́ла разреши́ся/ и Бо́гови чи́стее и коне́чное себе́, му́чениче, приказа́л еси.

Богоро́дичен: Естество́м Бог и естество́ прия́т из Тебе́, Чи́стая, челове́ческо/ и плоть яви́ся па́че ума́ мно́гою благосты́нею,/ спасти́ восхоте́в челове́ки./ Его́ же пою́ще, взыва́ем:/ благослове́н еси́, Бо́же оте́ц на́ших.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте дела́ я́ко Го́спода/ и превозноси́те во вся ве́ки.

Па́че вре́менныя жи́зни ве́чную, прему́дре, возлюби́в,/ умира́ющая, Оре́сте, истле́ющая пло́ти ника́коже не пощаде́, блаже́нне,/ тем му́ки претерпе́л еси́ до́бле.

Тя, а́гнца Христо́ва, я́ко волк злый, растерза́я ра́нами, гони́тель/ же́ртву прия́тну святу́ю, Боже́ственное сотвори́ заколе́ние,/ досто́йно Вы́шний Влады́чни трапе́зе.

Колесни́ца Сло́ву бысть седя́щему, преблаже́нне./ Тем привя́зан ко́нем веде́нием лю́тым,/ тече́нием же ну́ждным издше́/ и к нестаре́ющемуся пути́ вари́ся107 с ра́достию.

Богоро́дичен: Святы́ми Тя гла́сы провозвести́ша Бо́жию честни́и проро́ци су́щу Ма́терь/ странноле́потным рождество́м всех тва́рей Владу́щему./ Тем же Тя пое́м, Пречи́стая Девома́ти.

Песнь 9

Ирмо́с: От Бо́га Бо́га Сло́ва/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми величае́м.

Победи́в томи́теля, по мно́гах му́ках прии́де к Бо́гу,/ с ра́достию побе́дный вене́ц прии́м,/ я́ко ору́жник до́блий, яко́ вели́кий хра́бор,/ избра́нный Христо́в во́иник, Оре́сте блаже́нне.

На Небесе́х лику́еши со А́нгелы, блаже́нне,/ и глаша́еши с ни́ми ра́достно:/ Свят, Свят, Свят Оте́ц Вседержи́тель,/ Сын, Единосу́щный Отцу́, и Святы́й Дух –/ Тро́ице Всеси́льна.

Сра́дуешися с ли́ками А́нгельскими, му́чениче,/ преподо́бных, проро́к и святи́тель, му́чениче,/ с ни́ми моли́ся чту́щим тя любе́зно дарова́ти очище́ние грехо́в/ и вся́ких бед, Оре́сте, изба́ви.

Богоро́дичен: Я́ко Бо́гу Тя Ма́терь, Херуви́м вы́шшу, Пречи́стая Де́во,/ молю́, окая́нное се́рдце мое́ боле́зненыя стра́сти изцели́,/ изба́ви мя от огня́ в День Су́дный, осужде́ния досто́йнаго.

Святой мученик Орест жил в конце III века в городе Тиане в Каппадокии во времена императора Диоклитиана (284–305). Он был искусным врачом и с детских лет добрым христианином.

По приказу императора, в Тиану для борьбы с христианством, широко распространившимся в Великой Каппадокии, направлен был военачальник Максимин. В числе первых на суд к Максимину был приведен Орест. Он мужественно и открыто исповедал свою веру в Распятого и Воскресшего Господа нашего Иисуса Христа. Гонитель предлагал святому богатства, почести и славу, если он отречется от Единого Истинного Бога, но святой Орест был непреклонен. По приказу Максимина. Ореста привели в богатый языческий храм и вновь предложили поклониться идолам. Когда он отказался, 40 воинов, сменяя друг друга, били святого мученика плетьми, палками, воловьими жилами, затем пытали огнем. Святой Орест воззвал ко Господу: «Боже, сотвори со мною знамение во благо, да видят ненавидящие меня и постыдятся». И Господь услышал верного раба Своего. Началось землетрясение, идолы попадали и разбились. Все бежали из храма; когда оттуда вышел святой Орест, храм рухнул.

Разъяренный Максимин приказал заключить святого мученика на семь дней в темницу и не давать ему ни еды, ни питья, а на восьмой день продолжить мучения. Святому вбили гвозди в пятки, затем привязали к дикому коню. Влачимый по камням, святой мученик отошел ко Господу в 304 году. Мощи его были брошены в море.

Прошло много веков, и в 1685 году в Киево-Печерской Лавре святой инок Димитрий (впоследствии митрополит Ростовский: память 28 октября) переписывал с древней рукописи житие святого Ореста и, утомленный, уснул; ему в сонном видении предстал святой мученик и, показав глубокую рану в груди, перерезанные у локтей жилы и перебитые голени, велел дополнить свое житие, так как в древней рукописи были описаны не все муки, которые претерпел святой. Смиренный инок выполнил желание святого мученика Ореста и восславил Бога, дивного во святых Его.

* * *

103

я́ве – истинно

104

сни́тие – сошествие

105

прапруду – багряницу, драгоценную ткань, царскую одежду

106

нудити – неволить, принуждать

107

вари́ся – шел навстречу


Комментарии для сайта Cackle

Ищем ведущего программиста. Требуется отличное знание php, mysql, фреймворка Symfony, Git и сопутствующих технологий. Работа удаленная. Адрес для резюме: admin@azbyka.ru

Открыта запись на православный интернет-курс