В 27-й день

Пра́зднование Пресвяте́й Влады́чице на́шей Богоро́дице и Присноде́ве Мари́и ра́ди Зна́мения Ея́, бы́вшаго в Вели́ком Нове́гра́де

В то́йже день Свята́го великому́ченика Иа́кова Перся́нина, и преподо́бнаго отца́ на́шего Палла́дия

В то́йже день Святи́теля Иа́кова, епи́скопа Росто́вскаго, чудотво́рца

В то́йже день Обре́тение честны́х моще́й благове́рнаго вели́каго кня́зя Все́волода, нарече́ннаго во свято́м Креще́нии Гаврии́ла, Пско́вскаго чудотво́рца

В то́йже день Преподо́бнаго Феодо́сия Те́рновскаго, и́же на Кефала́рстей горе́ пости́вшегося

В то́йже день Преподобному́ченика Крони́да, архимандри́та Ра́донежскаго

 

 

Пра́зднование Пресвяте́й Влады́чице на́шей Богоро́дице и Присноде́ве Мари́и ра́ди Зна́мения Ея́, бы́вшаго в Вели́ком Нове́гра́де

На Ма́лой Вече́рни

На Го́споди, воззва́х: стихи́ры на 4, глас 1.

Подо́бен: Небе́сных чино́в:

Ны́не наста́ день ра́достен/ и весе́лия испо́лнен днесь,/ от скорбе́й бо премене́ние, Де́во Богороди́тельнице,/ зна́мение ико́ны Твоея́, Пречи́стая,/ пра́здник све́тел торжеству́юще, зове́м:/ Влады́чице, изба́ви от бед ду́ши на́ша.

Се ны́не вре́мя благоприя́тно,/ се ны́не день спасе́ния,/ се храм пресве́тел и ме́сто свяще́ния,/ зна́мения ико́ны Твоея́, Пречи́стая,/ пра́здник духо́вне соверша́юще, вопие́м:/ Влады́чице, Ма́ти Христа́ Бо́га,/ изба́ви от бед ду́ши на́ша.

Чу́дное одоле́ние,/ и зна́мение стра́шно, и вещь пресла́вную/ днесь пра́зднующе, лю́дие Твои́, Богоро́дице,/ похва́льную песнь с Гаврии́лом прино́сим Ти, глаго́люще:/ ра́дуйся, Обра́дованная.

Сла́ва, и ны́не, глас 1:

Ди́вна правосла́вных торжества́,/ днесь, сте́кшеся, псало́мская пе́ния принесе́м, глаго́люще:/ воскресни́, Го́споди, в поко́й Твой,/ Ты и киво́т святы́ни Твоея́,/ я́ко побе́ду дарова́л еси́/ о́браз Пречи́стыя Твоея́ Ма́тере, Сло́ве./ Ея́же моли́твами, Иису́се всеси́льне,/ спаси́ ду́ши на́ша.

На стихо́вне стихи́ры, глас 2.

Подо́бен: До́ме Евфра́фов:

До́му прему́дрости Бо́жия, чу́дному святи́телю,/ я́влься све́тлым о́бразом,/ дерза́ти повелева́ет и наде́жди не отпада́ти.

Стих: Воскресни́, Го́споди, в поко́й Твой,/ Ты и киво́т святы́ни Твоея́.

В храм Твой, Влады́чице, соше́дшеся, наро́ди,/ моля́щеся, глаго́лаху:/ виждь озлобле́ние на́ше и пода́ждь нам по́мощь, Пречи́стая.

Стих: Кля́тся Госпо́дь Дави́ду и́стиною/ и не отве́ржется ея́.

Виждь, Пречи́стая, беды́ раб Твои́х/ и не отри́ни нас в коне́ц,/ на Твою́ по́мощь наде́ющихся,/ да вси́ вопие́м Ти:/ ра́дуйся, Обра́дованная.

Сла́ва, и ны́не, глас 1:

Стрело́ю стрели́вших неразу́мне/ о́бразу Твоему́, Пречи́стая,/ Богора́нною стрело́ю тех уязви́/ не то́кмо сердца́, но и ду́ши,/ и исто́чник честны́я ико́ны Твоея́/ тем неуте́шимый плачь наведе́,/ нам же, лю́дем Твои́м,/ ра́дость ве́лию сотвори́/ ико́ною Твое́ю, Пречи́стая Ма́ти Сло́ва,/ ея́же ра́ди спаси́ ду́ши на́ша.

Тропа́рь, глас 4: Я́ко необори́мую сте́ну : ( зри день сей ни́же )

На Вели́цей Вече́рни

Стихологису́ем Блаже́н муж: первый антифо́н. На Го́споди, воззва́х: стихи́ры на 8, глас 8. Самогла́сны:

Го́рдостию за́висти распали́вшеся/ и неи́стовством одержи́ми,/ иногда́ ненака́заннии,/ наче́нше проти́вная на град Тво́й, Пречи́стая,/ но оба́че са́ми спя́ти бы́ша и падо́ша/ псало́мски при а́де, Богороди́тельнице.

Внегда́ убо му́жие вели́каго Нова́гра́да,/ ви́девше себе́ проти́вными обстои́мы,/ ни отку́ду же по́мощи наде́ющеся,/ то́кмо Тебе́, Пречи́стая, моля́щеся, глаго́лаху:/ виждь, Богоро́дице, беды́ раб Твои́х/ и не отри́ни моле́ния на́шего в коне́ц,/ да разуме́ют сопроти́внии,/ я́ко Ты еси́, Пречи́стая, заступле́ние душа́м на́шим.

Ди́вную гра́ду Твоему́ побе́ду дарова́ла еси́,/ Де́во Пречи́стая,/ Ты бо еси́ тому́ тве́рдое огражде́ние,/ на враги́ у́крепля́ющи/ и держа́вно непокори́выя покаря́ющи при́сно./ Те́мже чи́стою ве́рою сла́вим Тя/ и Сы́ну Твоему́ любе́зно вопие́м:/ Иису́се всеси́льне, спаси́ всех, я́ко милосе́рд.

Дал еси́ зна́мение живо́тное,/ о́браз пречи́стыя Твоея́ Ма́тере, Сло́ве,/ Ю́же зря́ще, любе́зно облобыза́ем,/ и, от сея́ ра́дости испо́лнившеся,/ стра́шни враго́м борю́щимся с на́ми явля́емся,/ и, та́инство прему́дрости Бо́жия ви́девше, хва́лим Тя,/ па́че сло́ва ро́ждшагося из Нея́,/ Иису́се, чу́дная добро́то,/ спаси́ всех, я́ко милосе́рд.

Сла́ва, и ны́не, глас 6:

Весели́теся, лю́дие/ и вси правосла́внии собо́ри вели́каго Нова́гра́да, днесь,/ и рука́ми восплещи́те, язы́цы, с весе́лием,/ се бо Цари́ца, Царя́ Христа́ ро́ждшая,/ святи́телю яви́ся чу́дным о́бразом,/ дерза́ти наро́дом повелева́я,/ я́коже не́кий воево́да,/ в печа́ли су́щим тогда́ ра́дость сотвори́,/ сопроти́вных победи́вши,/ и Тебе́, ра́дость ро́ждшей всем, любо́вию вопие́м:/ Де́во пречи́стая, моли́ спасти́ся душа́м на́шим.

Вход. Проки́мен дне. И чте́ния.

Бытия́ чте́ние (глава́ 28):

Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа́ та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до небе́с,/ и А́нгели Бо́жии восхожда́ху и нисхожда́ху по ней./ Госпо́дь же утвержда́шеся на ней, и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся,/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки./ И возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна́ своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но до́м Бо́жии,/ и сия́ врата́ небе́сная.

Проро́чества Иезеки́илева чте́ние (гла́вы 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего, и прииму́ вы,– глаго́лет Адонаи́ Госпо́дь./ И обрати́ мя на путь врат святы́х вне́шних, зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.

При́тчей чте́ние (глава 9):

Прему́дрость созда́ себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши свое́й вино́,/ и угото́ва свою́ трапе́зу./ Посла́ своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко мне,/ и тре́бующим ума́ рече́:/ прииди́те, яди́те мой хлеб и пи́йте вино́,/ е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ние бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет,/ сказу́й пра́ведному, и приложи́т приима́ти./ Нача́ло прему́дрости – страх Госпо́день, и сове́т святы́х – ра́зум./ Разуме́ти бо зако́н – по́мысла есть блага́го,/ сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На литии́ стихи́ры, глас 6:

Ро́ги гре́шных сотро́шася,/ и лу́цы их сокруши́шася,/ грехо́вною бо тьмо́ю о́чи помрачи́вше,/ и, друг дру́га я́ко сопроти́вна зря́ще,/ ору́жием неми́лостивно себе́ уязвля́ху,/ наро́ди же, ви́девше по́мощь Твою́, Влады́чице,/ на сопроти́вныя устреми́шася,/ Тебе́ на по́мощь призыва́юще.

Я́коже иногда́ кре́пкий Дави́д/ сопроти́вящагося го́рдаго Голиа́фа,/ си́лою Сы́на Твоего́ препоя́сався, низложи́,/ та́кожде и лю́дие Твои́, Пречи́стая,/ иму́ще о́браз Твой честны́й,/ пресла́вно одоле́ние показа́ша.

Чу́дная побе́да и ди́вное одоле́ние/ честны́я ико́ны Твоея́, пречи́стая Ма́ти Сло́ва,/ удивляе́т ум и ужаса́ет по́мысл,/ безору́жнии бо ору́жныя побежда́ху/ си́лою Твое́ю, Де́во всепе́тая,/ и посо́бием Боже́ственнаго зра́ка Твоего́/ во спасе́ние душа́м на́шим.

Сла́ва, и ны́не, глас то́йже:

Се день избавле́ния на́шего наста́/ и сме́рти премене́ние,/ ра́дуйтеся, собо́ри днесь вели́каго Нова́гра́да,/ и, веселя́щеся, торжеству́йте,/ и́же бо на нас подви́гшиися/ коне́чне Богора́нными я́звами уязви́шася./ Те́мже Пречи́стей и из Нея́ нетле́нно воплоще́нному Сло́ву вопие́м:/ Иису́се всеси́льне,/ моли́твами ро́ждшия Тя/ спаси́ всех нас, я́ко милосе́рд.

На стихо́вне стихи́ры, глас 1.

Самогла́сны:

Я́коже дре́вле во Иерусали́ме Зорова́велем/ держа́вная Твоя́ десни́ца чудоде́йствоваше, Го́споди,/ мно́жество безчи́сленное проти́вных победи́,/ та́кожде и сих низложи́,/ прише́дших разори́ти град,/ его́же искупи́л еси́ Кро́вию Твое́ю, Сло́ве,/ да разуме́ют от дел,/ я́ко Ты, Изба́витель, с на́ми еси́.

Стих: Воскресни́, Го́споди, в поко́й Твой,/ Ты и киво́т святы́ни Твоея́.

Ди́вна правосла́вных торжества́,/ днесь сте́кшеся, псало́мская пе́ния принесе́м, глаго́люще:/ воскресни́, Го́споди, в поко́й Твой,/ Ты и киво́т святы́ни Твоея́,/ я́ко побе́ду дарова́ о́браз/ Пречи́стыя Твоея́ Ма́тере, Сло́ве./ Ея́же моли́твами, Иису́се всеси́льне,/ спаси́ ду́ши на́ша.

Стих: Кля́тся Госпо́дь Дави́ду и́стиною/ и не отве́ржется ей.

Стрело́ю стрели́вших неразу́мне о́бразу Твоему́, Пречи́стая,/ Богора́нною стрело́ю тех уязви́/ не то́кмо сердца́, но и ду́ши,/ и исто́чник честны́я ико́ны Твоея́/ тем неуте́шимый плачь наведе́,/ нам же, лю́дем Твои́м, ра́дость ве́лию сотвори́/ ико́на Твоя́, пречи́стая Ма́ти Сло́ва,/ ея́же ра́ди спаси́ ду́ши на́ша.

Сла́ва, и ны́не, глас 8:

Мня́щеся непокори́вии/ от основа́ния разори́ти град Тво́й, Пречи́стая,/ не разуме́вше по́мощь Твою́, Влады́чице,/ но си́лою Твое́ю низложе́ни бы́ша,/ на бежа́ние устремля́хуся,/ и, я́коже ю́зами желе́зными, слепото́ю свя́зани бы́вше/ и мра́ком, я́коже дре́вле Еги́пет, объя́ти не разуме́вше,/ до́ндеже и коне́чне побежде́ни бы́вша./ Те́мже чи́стою ве́рою сла́вим Тя/ и Сы́ну Твоему́ любе́зно вопие́м:/ моли́твами ро́ждшия Тя,/ Иису́се всеси́льне, неизрече́нная ра́досте,/ сохраня́й град Твой невреди́м,/ я́ко милосе́рд и Человеколю́бец.

На благослове́нии хле́бов тропа́рь три́жды. А́ще несть бде́ния, глаго́лем тропа́рь еди́ножды.

Тропа́рь, глас 4:

Я́ко необори́мую сте́ну и исто́чник чуде́с/ стяжа́вше Тя раби́ Твои́,/ Богоро́дице пречи́стая,/ сопроти́вных ополче́ния низлага́ем./ Те́мже мо́лим Тя:/ мир гра́ду Твоему́ да́руй/ и душа́м на́шим ве́лию ми́лость.

На У́трени

На Бог Госпо́дь: тропа́рь: Я́ко необори́мую сте́ну: три́жды.

По 1-м стихосло́вии седа́лен, глас 4.

Подо́бен: Яви́лся еси́ днесь:

О́чи мы́сленныя очи́стивше, прииди́те, ли́цы вели́каго Нова́гра́да, днесь/ торжеству́им све́тло, чту́ще Богоотрокови́цу, добро́ту Иа́ковлю/ и Неве́сту всех Цари́, Хри́ста Бо́га на́шего,/ Сий бо показа́ся не́бо, и кра́сная пала́та, и храм одушевле́нный,/ и Сей си́лою проти́вныя побежда́ем.

Сла́ва, и ны́не, то́йже.

По 2-м стихосло́вии седа́лен, глас 1.

Подо́бен: Гроб Тво́й, Спа́се:

Пречи́стая Твоя́ ико́на, Богоро́дице Де́во,/ врачевство́ гра́ду Твоему́ дарова́ся духо́вное,/ к не́йже приходя́ще, покланя́емся, и честву́ем,/ и от жела́ния се́рдца целу́ем, исцеле́ний благода́ть почерпа́юще,/ и неду́г теле́сных, и душе́вных страсте́й Твои́ми моли́твами свобожда́емся.

Сла́ва, и ны́не, то́йже.

Велича́ния:

Досто́йно есть блажи́ти Тя,/ Богоро́дице Де́во,/ честне́йшую Херуви́м/ и сла́внейшую без сравне́ния Серафи́м. Или́: Песнь вся́ку духо́вную принесе́м Богоро́дице.

И́но велича́ние:

Велича́ем Тя́,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже ди́вную побе́ду на сопроти́вныя/ гра́ду Твоему́ дарова́ла еси́.

И́но велича́ние:

Велича́ем Тя,/ Пресвята́я Де́во,/ и чтим о́браз Твой честны́й,/ и́мже показа́ла еси́/ пресла́вное зна́мение.

И́но велича́ние, и́же в Вели́ком Нове́гра́де:

Велича́ем Тя, Пресвята́я Де́во,/ и чтим о́браз Твой честны́й,/ и́мже побе́ду на враги́ дарова́/ гра́ду на́шему.

По полиеле́и седа́лен, глас 8.

Подо́бен: Повеле́нное:

Я́же небе́с превы́шши су́щи,/ и Херуви́м вои́стинну сла́внейши,/ и всея́ тва́ри честне́йши, Де́во пречи́стая,/ днесь благода́рственная, раби́ Твои́, прино́сим о́бразу честна́го Твоего́ подо́бия,/ Ты бо стра́нную226 побе́ду и ди́вное одоле́ние гра́ду Твоему́ дарова́ла еси́./ Те́мже, согла́сно пою́ще, вопие́м Ти:/ Влады́чице Богоро́дице,/ моли́ Христа́ Бо́га грехо́в оставле́ние дарова́ти,/ Тебе́ бо наде́жду и́мамы, раби́ Твои́.

Сла́ва, и ны́не, то́йже:

Степе́нна, 1-й антифо́н 4-го гла́са. Проки́мен: Слы́ши, Дщи, и виждь, и приклони́ у́хо Твое́. Стих: Отры́гну се́рдце мое́ сло́во бла́го: Вся́кое дыха́ние: Ева́нгелие от Луки́, зача́ло 4: Во дни́ о́ны, воста́вши Мариа́м:

По 50-м псалме́ стихи́ра, глас 6: Весели́теся, лю́дие: Пи́сана на вели́цей вече́рни на Го́споди, воззва́х: сла́вник ( зри день сей вы́ше ) . Кано́на 2: ирмосы́ пе́рваго кано́на по два́жды, тропари́ во обою́ на 12.

Кано́н 1-й, творе́ние священномона́ха Пахо́мия Логофе́та, его́же краегране́сие: Даждь ми, Сло́ве Бо́жий, восхвали́ти Ро́ждшую Тя.

Глас 6.

Песнь 1

Ирмо́с: Волно́ю морско́ю/ Скры́вшаго дре́вле гони́теля, мучи́теля,/ под земле́ю скры́ша спасе́нных о́троцы,/ но мы, я́ко отрокови́цы,/ Го́сподеви пои́м,/ сла́вно бо просла́вися.

Да ра́дуется ра́достию Боже́ственною мно́жество Нова́гра́да днесь,/ зря́ще те́плую Засту́пницу, стра́нну побе́ду да́рующу на проти́вныя,/ и да пое́т Боже́ственными пе́сньми.

Я́коже ле́ствицу превысо́ку, зрим днесь ико́ну Твою́, Де́во всенепоро́чная,/ ю́же сопроти́внии зря́ще, коне́чней слепоте́ преда́шася,/ мы же, к ней ве́рне взира́юще, от бед избавля́емся.

В рождестве́ тли не прии́мши,/ тле́ния всех нас, Де́во, измени́,/ печа́ли уставля́ющи227 ма́терним премене́нием, Богора́дованная.

Други́й кано́н. Глас 8.

Ирмо́с: Посе́ченый несеко́маго пресече́,/ и ви́де со́лнце зе́млю, ю́же не ви́де,/ лю́таго врага́ вода́ потопи́,/ и непроходи́мое про́йде Изра́иль,/ песнь же воспева́шеся,/ Го́сподеви пои́м, сла́вно бо просла́вися.

Боже́ственныя си́лы жезл днесь приоблиста́я благода́тию/ и све́том безме́рным Бо́жие свя́то жили́ще,/ чу́до па́че естества́ о́браза Твоего́, Пречи́стая.

Ви́дехом пресла́вное днесь зна́мение бы́вшее Боже́ственнаго Твоего́ зра́ка, Ма́ти Бо́жия,/ па́че же и сопроти́внии о́ни, яко ви́дяще со о́бразом и си́лу отвраща́ющу,/ а́бие теле́сныма очи́ма ослепо́ша.

Наде́жду иму́ще на Тебе́, Богороди́тельнице,/ и несумне́нну ве́ру Нова́гра́да наро́ди,/ Тебе́ гра́ду забра́ла положи́ша, Де́во Неискусобра́чная.

Я́коже жи́ву Ма́терь Сло́ва ви́девше Тя суему́дренных многочи́сленное во́инство,/ я́коже бо́дреннаго блюсти́теля, на забра́лех обстои́му ве́рными,/ а́бие ру́це их с про́чими у́ды ослабе́ша.

Катава́сия: Христо́с ражда́ется:

Песнь 3

Ирмо́с: Тобо́ю, Христе́, Небеса́ утвержда́ема вся,/ Сло́во Бо́жие и си́ла,/ испове́дают сла́ву неизрече́нну/ и вседе́тельныя руки́ Твоея́ сотворе́ние,/ несть бо пресвя́т, ра́зве Тебе́, Го́споди.

Я́ко зве́ри, устреми́вшеся на ста́до Твое́, Пречи́стая,/ но Ты тех че́люсти сокруши́/ и сих не́мощны до конца́ показа́.

О́бщаго па́стыря, Влады́ку Христа́ ро́ждши, Де́во неискусобра́чная,/ Тому́ моли́ся настоя́щаго гне́ва изба́вити нас/ и проти́вных обстоя́ния, Влады́чице.

Ми́лостивая, Ми́лостиваго ро́ждши Спа́са,/ виждь озлобле́ние и воздыха́ние люде́й Твои́х,/ ускори́, Пречи́стая, и уще́дри ны.

Ин

Ирмо́с: Утвержде́и́ в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свя́т, па́че Тебе́, Еди́не Человеколю́бче.

Пе́рвее у́бо вседержи́тельная Твоя́ десни́ца, Го́споди,/ Моисе́ем чудоде́йствуя, помрача́ше Еги́пет,/ та́кожде и зде прише́дшия разори́ти град Тво́й/ о́бразом Ма́тере Твоея́ помрача́еши.

Я́коже услы́ша чу́дный архиепи́скоп обеща́ние Твое́, Богороди́тельнице,/ благовествова́ше наро́дом ра́дость, глаго́ля:/ дерза́йте, Ма́ти бо Бо́га на́шего с на́ми есть.

Пресла́вную побе́ду, испо́лнену у́жаса, ви́девше,/ и́же тогда́ наро́ди на сопроти́вныя ополчи́вшеся/ и а́бие до конца́ тех победи́ша.

Ны́не наста́ день весе́лия –/ Зна́мения ико́ны Твоея́, Де́во Богороди́тельнице,/ и пра́здник све́тел, его́же соверша́юще, вопие́м:/ несть пречи́стыя, па́че Тебе́, Богоневе́сто,

Седа́лен, глас 8.

Подо́бен: Прему́дрости:

Я́же дре́вле проро́ки пропове́дася, дверь небе́сная,/ неопали́мая купина́, све́щник многосве́тлый,/ злата́я кади́льница, ру́чка и же́зл/ пресла́вно днесь чу́дному святи́телю явля́ется,/ наро́дом дерза́ти повелева́ет и ди́вную побе́ду показу́ет./ Те́мже благода́рная Той возопии́м:/ Де́во Богороди́тельнице,/ моли́ Христа́ Бо́га грехо́в оставле́ние дарова́ти нам,/ Тебе́ бо и́мамы наде́жду, раби́ Твои́.

Сла́ва, и ны́не, то́йже.

Песнь 4

Ирмо́с: Удиви́ся Тво́й ра́зум от Мене́,/ услы́шавшу пресла́вная веле́ния смотре́ния Твоего́,/ укрепи́ся же возлюбле́нием Твоего́ схожде́ния,/ Ты бо моея́ нищеты́ не отве́рглся еси́.

Почита́ющий Тя град, Пречи́стая, и по до́лгу сла́вящий,/ огражда́й от безбо́жных, Чи́стая, иноплеме́нник,/ Ты бо тому́, Пречи́стая, бога́тство неотъе́млемо еси́, покро́в же и сла́ва.

Мня́щиися, я́коже дре́вле Иерихо́н,/ разори́ти град Твой, пречи́стая Ма́ти Сло́ва,/ са́ми коне́чней поги́бели преда́шася/ си́лою из Тебе́ Воплоще́ннаго, Влады́чице.

При́зри, Чи́стая,/ спаси́ пою́щия Тя, потреби́тися хотя́ща от сопроти́вных,/ те́мже наше́дшаго преще́ния изба́ви, Богороди́тельнице.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Егда́ услы́шаша наро́ди чу́дное обеща́ние побе́ды,/ ра́достию неизрече́нною испо́лнившеся,/ и, я́коже кре́пка не́коего храни́теля иму́ще, сопроти́вныя побежда́ху.

Многобога́тный дар и неистощи́мое сокро́вище/ дарова́л еси́ гра́ду Твоему́ – ико́ну Ма́тере Твоея́, Сло́ве,/ и Сея́ по́мощию проти́вныя низлага́ем.

В боже́ственнем хра́ме Твое́м, Богора́дованная,/ иде́же чудотво́рная Твоя́ ико́на положена́ бысть,/ исцеле́ния ве́рою приходя́щим подава́ет.

Собо́ри ве́рных и вся́ко состоя́ние челове́ческое весели́тся,/ совоку́пльшеся в честне́м хра́ме Твое́м,/ зря́ще в нем, я́коже пресве́тлое со́лнце, честны́й о́браз Тво́й, Влады́чице.

Песнь 5

Ирмо́с: Сою́зом любве́/ связу́еми апо́столи,/ влады́чествующему все́ми себе́ Христу́ возло́жше,/ кра́сны но́ги очища́ху,/ благовеству́юще всем мир.

Те́плая засту́пница к Тебе́ прибега́ющим/ и ненаде́ющимся наде́жда,/ виждь озлобле́ние люде́й Твои́х и пода́ждь по́мощь, Пречи́стая.

Я́же огнь ро́ждшая Боже́ственный, Де́во,/ проти́вных, Пречи́стая, моли́твою Твое́ю огне́м попали́,/ я́ко Ма́ти су́щи Зижди́теля, Всепе́тая.

Чи́стая Богоневе́сто,/ недоуме́нныя лю́ди уще́дри ма́терними Твои́ми мольба́ми/ и я́же на ны проти́вных обстоя́ния разори́ вско́ре моли́твами Твои́ми.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мыи́,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведеи́ Твои́х/ пути́ моя́ напра́ви, молю́ся.

Я́коже иногда́ в ца́рствующем гра́де/ неи́стовящаго и хули́теля, хотя́щаго о́браз Тво́й низложи́ти,/ того́ а́бие коне́чне уязви́,/ та́кожде и ны́не показа́ла еси́, Богороди́тельнице.

Я́ко щито́м, огражда́еми непобеди́мою Твое́ю си́лою, Де́во,/ проти́вных побежда́ют неизрече́нное мно́жество/ на Тя наде́жду иму́щии лю́дие Твои́, Всепе́тая.

Тя бога́тство неистощи́мое иму́ще и исцеле́ний исто́чник/ ве́рою прибега́ющий хра́му Твоему́,/ иде́же пребыва́ет честны́й о́браз Твой, Влады́чице.

Песнь 6

Ирмо́с: Ят бысть,/ но не удержа́н в пе́рсех ки́товых Ио́на,/ Твой бо о́браз нося́,/ страда́вшаго и погребе́нию да́вшагося,/ я́ко от черто́га, от зве́ря изы́де,/ приглаша́ше же кустоди́и 228,/ храня́щии су́етная и ло́жная,/ ми́лость сию́ оста́вили есте́.

Изба́ви ра́тных наше́ствия рабы́ Твоя́, Пречи́стая,/ и не преда́ждь до конца́ поги́бнути насле́дию Твоему́, Всепе́тая,/ но си́лою из Тебе́ Рожде́ннаго проти́вныя низложи́.

Многосогре́шших Тебе́ не пре́зри,/ но приими́ мольбу́ Ма́тере Твоея́ о нас, Ще́дре,/ да не похва́лятся сопроти́внии,– где́ есть Бог их?– глаго́люще,/ но да разуме́ют вси, я́ко Ты, Изба́витель, с на́ми еси́.

Ны́не по́мощи прии́де время,/ ны́не премене́ния потре́ба, Чи́стая./ Моли́ся Сы́ну Твоему́ и Бо́гу,/ я́ко да уще́дрит согреши́вшия и належа́щаго гне́ва изба́вит.

Ин

Ирмо́с: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Су́щему тогда́ чу́дному архиере́ю/ яви́лася еси́ стра́шным о́бразом, на де́рзость подвиза́ющи,/ наро́ди же, неизре́ченныя ра́дости испо́лнившеся,/ ору́жныя побежда́ху, Влады́чице.

Зна́мение стра́шно, и вещь пресла́вну,/ и чу́дное одоле́ние днесь пра́зднующе, лю́дие Твои́, Богоро́дице,/ похва́льная я́ко досто́йной похвалы́ прино́сим, глаго́люще:/ ра́дуйся, Обра́дованная.

Честну́ю ико́ну Твою́ ра́достным се́рдцем и душе́ю облобыза́ем, веселя́щеся,/ и, те́плою ве́рою прикаса́ющеся, исцеле́ние почерпа́ем.

Конда́к, глас 4.

Подо́бен: Яви́лся еси́ днесь:

Честна́го о́браза Твоего́ зна́мение/ пра́зднующе лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́./ Те́мже Тебе́ ве́рою взыва́ем:/ ра́дуйся, Де́во, христиа́н похвало́.

И́кос:

Разреши́ тьму́ мои́х согреше́ний,/ во уме́ мое́м лежа́щую,/ и Твои́м мя све́том просвети́, Де́во,/ я́ко да возмогу́ Тебе́ похвалу́ принести́,/ Ю́же Оте́ц восхвали́,/ и Дух Святы́й осени́,/ Сын же и Сло́во Бо́жие, всели́вся/ и нетле́нно от пречи́стою Твое́ю боку́ проше́д,/ с челове́ки поживе́./ Те́мже мы, гре́шнии и недосто́йнии раби́ Твои́,/ днесь соверша́юще свяще́нное торжество́ зна́мения,/ бы́вшаго честно́ю ико́ною Твое́ю,/ е́юже пресла́вную побе́ду на проти́вныя/ гра́ду Твоему́ дарова́ла еси́,/ и, от всех чуде́с испо́лнившеся,/ вме́сто благово́нных арома́т,/ ели́ко возмо́жно нам, земны́м, похва́льная Тебе́ прино́сим, глаго́люще:/ ра́дуйся, Богоро́дице, ра́досте А́нгелов и челове́ков;/ ра́дуйся, тве́рдая наде́жда и покро́ве гра́ду Твоему́;/ ра́дуйся, я́ко проти́вныя си́лою Твое́ю низлага́ем;/ ра́дуйся, у́мнаго Со́лнца Ма́ти,/ ве́рныя просвеща́ющаго, неве́рныя же помрача́ющаго;/ ра́дуйся, Де́во, христиа́н похвало́.

Песнь 7

Ирмо́с: Неизрече́нное чу́до!/ в пещи́ Изба́вивый преподо́бныя о́троки из пла́мене,/ во гро́бе мертв, бездыха́нен полага́ется/ во спасе́ние нас, пою́щих:/ Изба́вителю Бо́же, благослове́н еси́.

Вои́стинну сокро́вище че́стно гра́ду Твоему́, ико́на Твоя́, Пречи́стая, дарова́ся,/ ю́же и са́ми зря́ще, чудеси́ удивля́емся и Сы́ну Твоему́ вопие́м:/ Изба́вителю Бо́же, благослове́н еси́.

Я́коже иногда́ Ниневи́тяны/ покая́ния ра́ди пощади́л еси́, Сло́ве Бо́жий, про́поведию Ио́ны проро́ка,/ та́кожде и зде показа́л еси́ о́бразом Пречи́стыя Твоея́ Ма́тере, Христе́, вопию́щим:/ Изба́вителю Бо́же, благослове́н еси́.

Храм Тя Бо́жий, Влады́чице, ве́дуще,/ во святе́м хра́ме Твое́м ру́ки на́ша возно́сим на моли́тву:/ виждь озлобле́ние на́ше и пода́ждь нам по́мощь.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:/ благослове́н еси́, Бо́же оте́ц на́ших.

Виждь, Пречи́стая, озлобле́ние раб Твои́х и не отри́ни в коне́ц,/ Твое́ бо есмы́ достоя́ние и Твое́ю наде́ждею крепи́мся, да вси вопие́м Ти:/ ра́дуйся, обра́дованная.

Светоно́сная благода́ть и исцеле́ния дарова́ние/ даде́ся гра́ду Твоему́ о́браз Твой, Пречи́стая,/ его́же любе́зно облобыза́юще, весели́мся.

Песнь 8

Ирмо́с: Ужасни́ся боя́йся, Не́бо,/ и да подви́жатся основа́ния земли́:/ се бо в мертвеце́х вменя́ется в Вы́шних Живы́й/ и во гроб мал странноприе́млется./ Его́же, о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Собезнача́льное Сло́во О́тчее, Де́во пречи́стая, нетле́нно родила́ еси́/ и от сосцу́ пита́ла еси́./ Того́ моли́, Богороди́тельнице, от обстоя́ния вра́жия спасти́ пою́щия Тя/ и превознося́щия во ве́ки.

Его́же прови́де на Престо́ле превзя́тем Иса́ия,/ Сего́ в ложесна́х, Де́во, вмести́ла еси́ и нетле́нно родила́ еси́./ Его́же моли́ спасти́ся рабо́м Твои́м, пою́щим:/ де́ти, благослови́те, свяще́ннии, по́йте и превозноси́те Его́ во ве́ки.

Еди́на су́щи блага́я,/ преблаго́е Сло́во моли́ приле́жно настоя́щаго гне́ва рабо́м Твои́м изба́витися,/ несомне́нною ве́рою Сы́ну Твоему́ пою́щим:/ де́ти, благослови́те, свяще́ннии, по́йте и превозноси́те Его́ во ве́ки.

Ин

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

О всех наро́ди недоуме́вшеся, к Тебе́ прибега́ют, вопию́ще:/ не преда́ждь нас враго́м на́шим, Влады́чице Богоро́дице,/ но держа́вною Твое́ю руко́ю ты́я низложи́,/ да Тя непреста́нно пое́м и превозно́сим во ве́ки.

Я́ко неруши́мое забра́ло иму́ще раби́ Твои́ ико́ну Твою́, Пречи́стая,/ проти́вящияся низлага́ем и Сы́ну Твоему́ вопие́м:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки.

Чу́дному иера́рху яви́лася еси́, Пречи́стая,/ он же со мно́гим наро́дом, чудеси́ уди́влься,/ а́бие с ра́достию ко о́бразу Твоему́ прибега́ет, – пода́ждь по́мощь, Влады́чице, – глаго́лющим:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки.

Что́ Ти принести́, Пречи́стая,/ от всей тва́ри сла́вимей, недоуме́емся, Влады́чице,/ то́чию е́же Гаврии́л нас научи́:/ ра́дуйся, Обрадованная.

Песнь 9

Ирмо́с: Стра́нствия Влады́чня/ и безсме́ртныя трапе́зы/ на го́рнем ме́сте высо́кими умы́,/ ве́рнии, прииди́те, наслади́мся/ возше́дша Сло́ва,/ от Сло́ва научи́вшеся, Его́же велича́ем.

Милосе́рдым о́ком свы́ше при́зри на град и лю́ди Твоя́, Пречи́стая,/ ины́я бо по́мощи не и́мамы, то́кмо Тебе́, Всенепоро́чная,/ да Тя вси, Ма́терь Бо́жию, непреста́нно велича́ем.

Еди́на, ро́ждшая Сло́во воплоще́нное, Де́во всепе́тая,/ приснотеку́щий исто́чник исцеле́ний излива́еши/ ве́рою притека́ющим хра́му Твоему́, Пречи́стая.

Се, раби́ Твои́, вопие́м Ти, Ма́ти Бо́жия:/ обы́чныя ми́лости Твои́ на град и лю́ди Твои́ ми́лостивно показу́ющи,/ проти́вных обстоя́ний нас измени́, да Тя вси непреста́нно велича́ем.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Се вре́мя благоприя́тно и день спасе́ния,/ в не́мже зна́мение ико́ны Твоея́, Пречи́стая, показа́ся,/ е́же пра́зднующе све́тло, духо́вне торжество́ соверша́ем.

Я́ко Боже́ственною све́тлостию озаря́ему,/ зрим днесь, Пречи́стая, ико́ну Твою́ честну́ю,/ е́йже ве́рою покланя́ющеся, Тя велича́ем.

Мы́сли очи́стивше, празднолю́бнаго Нова́гра́да собо́ри/ со архиере́йским ли́ком, восхвали́те,/ па́че наде́жди по́мощь на сопроти́вныя дарова́вшую.

Де́вства Твоего́ зна́мения невреди́мо сохрани́в, Сло́во Бо́жие, из Тебе́ проше́д,/ сохрани́ град Твой невреди́м, Де́во всепе́тая,/ да Тя непреста́нно велича́ем.

Свети́лен.

Подобен: Посети́л ны есть:

Возжеле́в Твоея́ добро́ты Иису́с, Пречи́стая,/ в Тя всели́ся и Тебе́ засту́пницу гра́ду Твоему́ Сло́во Бо́жие дарова́,/ его́же сохраня́й заступле́нием Твои́м при́сно,/ я́ко да Тя ублажа́ем, пренепоро́чная Отрокови́це.

На хвали́тех стихи́ры, на 4, глас 6.

Самогла́сны:

Непоко́рством ра́зума и го́рдостию разже́гшеся ненака́заннии/ на ста́до Твое́, Пречи́стая,/ е́же искорени́ти град, в не́мже пречестны́й Твой о́браз водворя́ется,/ но у́бо показа́ла еси́,/ я́коже иногда́ Сын Твой евре́ем,/ досто́йно в пусты́ни телесы́ па́дшим.

Се храм пресве́тел и ме́сто свяще́ния,/ иде́же честна́я ико́на Ма́тере Твоея́, Сло́ве,/ приступи́те, челове́цы, и исцеле́ние почерпи́те,/ я́ко спасе́ние Тоя́ ра́ди нам дарова́ся/ и избавле́ние от проти́вных, потреби́ти нас хотя́щих,/ но ти́и, по проро́ку, потреби́шася.

Я́коже иногда́ кро́ткий Дави́д/ проти́вящагося го́рдаго Голиа́фа,/ си́лою Сы́на Твоего́ препоя́сався, низложи́,/ та́кожде и лю́дие Твои́, Пречи́стая,/ иму́ще о́браз Твой честны́й,/ пресла́вно одоле́ние показа́ша.

Чу́дная побе́да и ди́вное одоле́ние/ честны́я ико́ны Твоея́, пречи́стая Ма́ти Сло́ва,/ удивля́ет ум и ужаса́ет по́мысл,/ безору́жнии бо ору́жных побежда́ху/ си́лою Твое́ю, Де́во всепе́тая,/ и посо́бием Боже́ственнаго зра́ка Твоего́/ во спасе́ние душ на́ших.

Сла́ва, и ны́не.

Глас 8: Мня́щеся непокори́вии:

Пи́сан на вели́цей вече́рни на стихо́вне ( зри день сей вы́ше ).

Славосло́вие вели́кое. И отпу́ст.

На Литурги́и

Проки́мен, песнь Богоро́дицы, глас 3: Вели́чит души́ Моя Го́спода, и возра́довася дух Мой о Бо́зе Спа́се Мое́м. Стих: Я́ко призре́ на смире́ние рабы́ Своея́: Апо́стол ко Евре́ем, зача́ло 320. Аллилу́ия, глас 8: Слы́ши, Дщи, и ви́ждь,/ и приклони́ у́хо Твое́. Стих: Лицу́ Твоему́/ помо́лятся бога́тии лю́дстии. Ева́нгелие от Луки́, зача́ло 54. Прича́стен: Ча́шу спасе́ния прииму́ и И́мя Госпо́дне призову́.

А́ ще храм Пресвяты́я Богоро́дицы Зна́мения, пое́тся слу́жба Зна́мения еди́наго. Кроме́ же хра́ма пое́тся слу́жба Зна́мения со Иа́ковом Перся́нином си́це:

На Ма́лой Вече́рни

На Го́споди, воззва́х: стихи́ры на 4, глас 1. Подо́бен: Небе́сных чино́в: Сла́ва, и ны́не, глас то́йже. На стихо́вне стихи́ры, глас 2. Подо́бен: До́ме Евфра́фов: с припе́вы их. Сла́ва, и ны́не, глас 1, и про́чее обы́чное, и отпу́ст.

На Вели́цей Вече́рни

Блаже́н муж: 1-й антифо́н. На Го́споди, воззва́х: стихи́ры на 8: Богоро́дицы 4, глас 8, самогла́сны: Го́рдостию за́висти: И му́ченика 4, глас 2. Подо́бен: Егда́ от Дре́ва: Ми́ра кра́сная оста́вль: Сла́ва, му́ченика, глас 5: Ди́вен был еси́, Иа́кове: И ны́не, Богоро́дицы, глас 6: Весели́теся, лю́дие: Вход. Проки́мен дне. Чте́ния Богоро́дицы 3. На литии́ стихи́ры, глас 6: Ро́ги гре́шных сотро́шася: Сла́ва, и ны́не, глас то́йже: Се день избавле́ния на́шего наста́: На стихо́вне стихи́ры, глас 1, самогла́сны: я́коже дре́вле во Иерусали́ме: с припе́вы их. Стих 1: Воскресни́, Го́споди, в поко́й Твой: Стих 2: Кля́тся Госпо́дь Дави́ду и́стиною: Сла́ва, му́ченика, глас 8: Ве́рно соше́дшеся днесь: И ны́не, Богоро́дицы, глас то́йже: Мня́щеся непокори́вии: Тропа́рь му́ченика, глас 4. Сла́ва, и ны́не, глас то́йже: я́ко необори́мую сте́ну:

На У́трени

На Бог Госпо́дь: тропа́рь Богоро́дицы два́жды. Сла́ва, му́ченика. И ны́не, Богоро́дицы. По 1-й кафизме, и по 2-й, и по полиеле́и седа́льны Богоро́дицы и чте́ние. Степе́нна, 1-й антифо́н, 4-го гла́са. Проки́мен, глас 4: Слы́ши, Дщи, и виждь,/ и приклони́ у́хо Твое́. Стих: Отры́гну се́рдце мое́: Ева́нгелие от Луки́, зача́ло 4: Воста́вши Мариа́м: По 50-м псалме́ стихи́ра, глас 6: Весели́теся, лю́дие: пи́сана на Го́споди, воззва́х: вели́цей вече́рни, сла́вник. Кано́на два Богоро́дицы, на 8: еди́н, глас 6, други́й, глас 8. И му́ченика кано́н на 6, глас 2. Катава́сия: Христо́с ражда́ется: По 3-й пе́сни конда́к му́ченика и и́кос и седа́лен Богоро́дицы, глас 8. Сла́ва, свята́го седа́лен, глас то́йже. И ны́не, Богоро́дицы. По 6-й пе́сни конда́к Богоро́дицы, глас 4. Подо́бен: Яви́лся еси́ днесь: Честна́го о́браза Твоего́ зна́мение: и и́кос, и чтем про́лог. По 9-й пе́сни свети́лен Богоро́дицы. Сла́ва, му́ченика. И ны́не, Богоро́дицы. На хвали́тех стихи́ры на 4, глас 6, самогла́сны: Непоко́рством ра́зума: Сла́ва, му́ченика, глас 2: Терпе́в в страда́нии, му́чениче: И ны́не, Богоро́дицы, глас 8: Мни́щеся непокори́вии: Славосло́вие вели́кое, по Трисвято́м Тропа́рь свята́го. Сла́ва, и ны́не, Богоро́дицы. Ектении́, и отпу́ст, и час 1-й. На 1-м часе́ Тропа́рь Богоро́дицы. Сла́ва, свята́го. И ны́не, Богоро́дичен часо́в. По Трисвято́м на всех часе́х конда́к Богоро́дицы непреме́нно. И соверше́нный отпу́ст.

На Литурги́и

Блаже́нны Богоро́дицы, 1-го кано́на песнь 3-я, на 4; 2-го кано́на песнь 6-я, на 4. Проки́мен, песнь Богоро́дицы, глас 3: Вели́чит душа́ Моя́ Го́спода: Стих: Я́ко призре́ на смире́ние рабы́ Своея́: и му́ченика проки́мен, глас 4: Святы́м, и́же суть на земли́ Его́: Богоро́дицы Апо́стол к Евре́ем, зача́ло 320: Му́ченика Апо́стол к Ефесе́ем, зача́ло 233. Аллилу́ия, глас 8: Слы́ши, Дщи, и виждь: Стих: Лицу́ Твоему́/ помо́лятся бога́тии лю́дстии. И му́ченика стих: Мно́ги ско́рби пра́ведным: Богоро́дицы, Ева́нгелие от Луки́, зача́ло 54: Вни́де Иису́с в весь не́кую: Му́ченика, Ева́нгелие от Иоа́нна, зача́ло 50: Аз есмь лоза́ и́стинная: Прича́стен Богоро́дицы: Ча́шу спасе́ния: Му́ченика: В па́мять ве́чную:

Потре́бно есть ве́дати и се, я́ко а́ще случи́тся в неде́лю пра́здник Пресвяты́я Богоро́дицы, Честна́го Ея́ Зна́мения, и свята́го великому́ченика Иа́кова Пе́рсскаго:

Ве́чер, на Ма́лой Вече́рни

На Го́споди, воззва́х: стихи́ры воскре́сны гла́са, на 4. Сла́ва, и ны́не, Зна́мения. На стихо́вне стихи́ра воскре́сна еди́на и Зна́мения стихо́вна со стихи́ ея́. Сла́ва, и ны́не, Зна́мения. Та́же, Ны́не отпуща́еши: и по Трисвято́м тропа́рь воскре́сен. Сла́ва, и ны́не, Зна́мения. Ектения́ ма́лая: Поми́луй нас, Бо́же: и отпу́ст.

На Вели́цей Вече́рни

По обы́чном стихосло́вии, на Го́споди, воззва́х: стихи́ры воскре́сны 3, и восто́чен еди́н, Анато́лиев, и Зна́мения 3, и му́ченика Иа́кова 3. Сла́ва, Зна́мения. И ны́не, Богоро́дичен пе́рвый гла́са. Чте́ния Зна́мения. На литии́ стихи́ры Зна́мения. Сла́ва, му́ченика. И ны́не, Зна́мения. На стихо́вне стихи́ры воскре́сны. Сла́ва, Иа́кова. И ны́не, Зна́мения. На благослове́нии хле́бов тропа́рь Зна́мения три́жды. А́ще несть бде́ния, глаго́лем тропа́рь воскре́сен. Сла́ва, Иа́кова. И ны́не, Зна́мения.

На У́трени

На Бог Госпо́дь: тропа́рь воскре́сен два́жды. Сла́ва, Иа́кова. И ны́не, Зна́мения. По кафи́змах седа́льны воскре́сны с Богоро́дичны их. Та́же полиеле́й и велича́ние пое́м.

Псалом избра́нный: Помяни́, Го́споди, Дави́да и всю кро́тость его́: И тропари́: А́нгельский собо́р: И седа́льны Зна́мения ку́пно вся три. Степе́нна и проки́мен гла́са. Ева́нгелие воскре́сно. Та́же, Воскресе́ние Христо́во: псало́м 50. Стихи́ра воскре́сна. Кано́н воскре́сен со ирмосо́м на 4. Зна́мения еди́н кано́н на 6. Му́ченику Иа́кову на 4. Катава́сия: Христо́с ражда́ется: По 3-й пе́сни конда́к Зна́мения, и му́ченика, и седа́лен му́ченика. Сла́ва, и ны́не, Зна́мения. По 6-й пе́сни конда́к и и́кос воскре́сен. На 9-й пе́сни пое́м Честне́йшую: Свети́лен воскре́сен. Сла́ва му́ченика. И ны́не, Зна́мения. На хвали́тех стихи́ры воскре́сны 4 и Зна́мения со Сла́вным 4, самогла́сны, глас 6, со стихи́. Стихи́ же глаго́лем: Воскресни́, Го́споди, в поко́й Твой: Кля́тся Госпо́дь Дави́ду и́стиною и не отве́ржется ея́. Сла́ва, стихи́ра Ева́нгельская. И ны́не, Преблагослове́нна еси́: Славосло́вие вели́кое и по Трисвято́м тропа́рь воскре́сен то́чию. Ектении́ и отпу́ст. Та́же час 1-й. На 1-м часе́ тропа́рь воскре́сен. Сла́ва, Зна́мения. И ны́не, Богоро́дичен часо́в. По О́тче наш: конда́к Зна́мения, и про́чее после́дование пе́рваго часа́, и отпу́ст. На 3-м часе́ тропа́рь воскре́сен. Сла́ва, му́ченика. И ны́не, Богоро́дичен часо́в. Та́кожде и на 6-м часе́, и на 9-м глаго́лем тропа́рь Зна́мения и му́ченику, пременя́юще; тропа́рь же воскре́сен глаго́лется непреме́нно. По О́тче наш: кондаки́ воскре́сен и Зна́мения глаго́лем, пременя́юще.

На Литурги́и

Блаже́нны гла́са на 6 и Богоро́дицы, песнь 3-я, на 4. По вхо́де тропа́рь воскре́сен, и Зна́мения, и му́ченика. Конда́к воскре́сен. Сла́ва, конда́к му́ченика. И ны́не, Зна́мения. Проки́мен, Апо́стол, аллилу́ия, Ева́нгелие и прича́стен пре́жде воскре́сен, и пото́м Богоро́дицы.

Новгородская икона Божией Матери «Знамение». История свидетельствует о неисчислимых милостях Пресвятой Богородицы к русскому православному народу, явленных через Ее святые иконы.

Одна из наиболее почитаемых в нашем народе икон – Новгородская икона «Знамение». Иконы Божией Матери такого типа появились на Руси очень рано, а именоваться так стали после чудесного Знамения от Новгородской иконы.

В 1170 году, во времена тяжких междоусобиц, на Новгородскую землю двинулись объединенные полки русских удельных князей, чтобы покорить вольный Новгород. Все новгородцы денно и нощно молились об избавлении города. Святой архиепископ Иоанн, молившийся пред образом Господа нашего Иисуса Христа, услышал глас: «Иди в церковь Святого Спаса на Ильину улицу, и возьми икону Святыя Богородицы, и постави ю́ на острог противу ратных».

Совершив молебен в церкви Святого Спаса, архиепископ Иоанн в присутствии молящегося народа вознес икону на городскую стену. Когда полки́, окружившие Новгород, начали приступ и осыпа́ли защитников города градом стрел, то одна из стрел попала в святой лик иконы. И обратилась икона лицом к городу, и святые слезы потекли из глаз ее, оросив фелонь архипастыря. «О великое и преславное чудо! Не суть то слезы, но милостивое Знамение» – восклицает летописец. Этим чудотворным образом осажденным был дан знак (знамение), что Царица Небесная молится пред Сыном Своим об избавлении города.

В тот же миг непонятный страх овладел нападающими, и новгородцы преследовали обратившегося в бегство неприятеля.

С того времени за иконой закрепилось название «Знамение» и впоследствии было установлено празднование чудотворной иконе на 27 ноября.

В 1352 году по молитве пред этой иконой получали исцеление пораженные чумой.

В благодарность за многочисленные благодеяния, творимые Богородицей, новгородцы построили особый храм, и в 1356 году икона из храма Спаса Преображения была с торжеством перенесена в воздвигнутый в 1354 году новый храм «Знамения Пресвятой Богородицы», впоследствии ставший собором Знаменского монастыря.

В середине XV века в Новгороде была написана икона «Битва новгородцев с суздальцами», которая послужила образцом для других икон на эту тему. Знатоки русской иконописи сравнивают эту икону с «Похвалой Знамению», созданной иеромонахом Пахомием Сербом. В честь иконы Богоматери «Знамение» написаны два канона. Первый написан около 1440 года сербом иеромонахом Пахомием Логофетом, приехавшим на Русь с Афона.

Слава святой иконы «Знамение» велика. На протяжении последующих столетий чудесами были прославлены некоторые списки. К их числу относятся иконы Мирожская, Абалацкая, Царскосельская, Курская-Коренная и многие другие.

Взирая на святые иконы Пресвятой Девы, верующие люди возносятся духом в молитве, испрашивая милостей и щедрот, ходатайства о спасении и ниспослании мира стране нашей и всему миру.

В то́йже день Свята́го великому́ченика Иа́кова Перся́нина, и преподо́бнаго отца́ на́шего Палла́дия

На Го́споди, воззва́х: стихи́ры му́ченика Иа́кова, на 6, глас 2.

Подо́бен: Егда́ от Дре́ва

Ми́ра кра́сная оста́вив,/ ро́да све́тлость, бога́тство и красоту́,/ все же чу́вство отве́рг,/ и, те́лом раздробля́емь,/ страсте́й подража́нием, ра́дуяся, после́довал еси́ Христу́, Иа́кове,/ я́ко у́бо о́бщник стра́даньми сла́вы был еси́ вои́стинну/ и Ца́рствия ны́не соприча́стник.

У́ды пожина́емь пло́ти,/ и нестерпи́мыя боле́зни и ра́ны терпя́,/ му́чениче Христо́в, достосла́вне Иа́кове,/ и мучи́телей суровство́ попра́в му́жественно,/ побе́ды многоце́нный вене́ц прия́л еси́;/ и́мже ны́не украша́емь, блаже́нне,/ Боже́ственному Влады́ки твоего́ Престо́лу/ с пострада́вшими с тобо́ю предстои́ши.

Име́я дерзнове́ние ко Христу́,/ о всех, ве́рою соверша́ющих честны́й твой пра́здник,/ му́чениче приснопа́мятне, те́пле предстои́ши,/ от бед избавля́я и страсте́й свобожда́я,/ вся́каго обстоя́ния лю́тых изы́мая,/ подава́я душа́м спасе́ние/ Боже́ственными твои́ми моли́твами,/ я́ко да све́тлыя твоя́ по́двиги просла́вим.

Сла́ва, глас 5:

Удиви́л еси́, о Иа́кове,/ в му́ках всех долготерпе́в,/ пе́рстом бо и рука́м, и мы́шцам отсе́ченым твои́м бы́вшим,/ подо́бне и нога́м и лы́стом твои́м/ да́же до бедру́, претерпе́л еси́/ про́чее, моля́щуся тебе́,/ и честну́ю главу́ твою́ отсеко́ша./ Му́чениче многострада́льне,/ о нас не преста́й Христу́ моля́ся/ поми́ловатися душа́м на́шим.

И ны́не, Богоро́дичен или Крестобогоро́дичен.

Подо́бен: Ра́дуйся:

А́гнца Своего́ А́гница иногда́ зря́щи,/ к заколе́нию тща́щася,/ усе́рдно после́доваше, Сия́ вопию́щи Ему́:/ ка́мо и́деши, ча́до Мое́ сладча́йшее, Христе́?/ чесо́ ра́ди ско́рое тече́ние сие́,/ Долготерпели́ве, тече́ши неле́ностно?/ Иису́се возжеле́ннейший, безгре́шне,/ многоми́лостиве Го́споди,/ даждь Ми сло́во, Рабе́ Твое́й,/ Сы́не Мой вселюбе́знейший,/ не пре́зри, Ще́дре, молча́, Тя, стра́нно ро́ждшую,/ Бо́же всеще́дре, да́руй ми́ру ве́лию милость.

На стихо́вне Окто́иха. Сла́ва, му́ченика, глас 8. Гео́ргия Сике́лла:

Ве́рно соше́дшеся днесь, любозри́теле,/ ви́дите борьбу́ стра́нную и размене́нную/ Иа́кова, су́щаго от Перси́ды,/ нам облиста́вшаго, я́ко звезду́, волхво́м я́вльшуюся/ и ко и́стинному позна́нию наста́вльшую./ Той бо, до́блественный,/ внегда́ па́дати, ра́тователи отража́ше,/ и внегда́ соста́вом удо́в ре́заным бы́ти,/ му́чащия не́мощны творя́ше,/ вы́шним Про́мыслом укрепля́емь, вопия́:/ а́ще и у́ды моя́ чу́вственныя су́щия сече́те,/ но и́мам Христа́ разу́мно ми вся быва́юща./ Те́мже прови́дя бу́дущую жизнь,/ предлежа́щия ра́ди всех сме́рти,/ ко о́ной тща́шеся прейти́,/ в не́йже и водворя́яся, про́сит нам от венцеда́теля Бо́га/ очище́ние, просвеще́ние и ве́лию ми́лость,/ соверша́ющим па́мять его́.

И ны́не, Богоро́дичен или Крестобогоро́дичен.

Подобен: О, преславнаго чудесе!

Что зри́мое виде́ние,/ е́же Мои́ма очи́ма ви́дится, о Влады́ко?/ Содержа́й всю тварь, на Дре́во воздви́жен быв,/ и умира́еши, всем дая́й жизнь,/ Богоро́дица, пла́чущися, глаго́лаше,/ егда́ узре́ на Кресте́ возноси́ма/ из Нея́ неизрече́нно возсия́вшаго/ Бо́га и Челове́ка.

Тропа́рь му́ченика Иа́кова, глас 4:

Муче́нии странноужа́сными и до́блестию терпе́ния/ всех преудиви́л еси́, многострада́льне,/ над ко́имждо соста́вом удеси́ ре́зания,/ благода́рны мольбы́ преди́вне изре́кл еси́ Го́споду./ Тем, во стра́дании твое́м вене́ц прие́м,/ к Престо́лу возше́л еси́ Небе́снаго Царя́ Христа́ Бо́га, Иа́кове,/ Того́ моли́ спасти́ ду́ши на́ша.

Сла́ва, и ны́не, Богоро́дичен или Крестобогоро́дичен.

Слу́жба свята́го Палла́дия пое́тся на повече́рии. Кано́н, его́же краегране́сие: Твое́ почита́ю, всеблаже́нне о́тче, житие́. Ио́сиф. Глас 4.

Тропа́рь, глас 1.

Подо́бен: Ка́мени запеча́тану:

Мона́шествовав Богоуго́дно, Богоно́сне отче на́ш,/ моли́твою и посто́м Бо́га взыска́л еси́/ и был еси́ прия́телище чи́сто Ду́ха,/ блиста́я ве́рным доброде́тельныя зари́,/ и́миже просвеща́еши вся чту́щия тя./ Сла́ва просла́вльшему тя Христу́,/ сла́ва Укре́пльшему тя,/ сла́ва Де́йствующему тобо́ю все́м исцеле́ние.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Боже́ственными светлостьми́ озаря́емь, преподо́бне,/ о́блак разжени́ помы́шле́ния моего́,/ я́ко да узрю́ твое́ житие́ светоно́сное/ и исправле́ние жи́тельства твоего́.

У́треневав к Бо́гу, пра́вды Со́лнцу, от младе́нства, всебога́те,/ тьмы избе́гл еси́ теле́сных страсте́й воздержа́нием/ и да́ром чуде́с обогати́лся еси́, преподо́бне.

У́мную чистоту́ безстра́стием стяжа́в,/ Ду́ха был еси́ вмести́лище, досточу́дне Палла́дие всеблаже́нне,/ отце́в украше́ние, свети́льниче всеми́рный.

Богоро́дичен: Ты еди́на, Богоневе́сто,/ в вы́шних Седя́щаго рука́ми носи́ла еси́, плоть бы́вшаго,/ Ты бо еси́ прия́телище досто́йно всех веко́в Вседержи́теля.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Всено́щное, о́тче, моле́ние, бо́дренным приноси́ по́мыслом Бо́гу Вседержи́телю,/ стра́сти плотски́я успи́л еси́,/ те́мже предста́тель неусы́пный всех нас был еси́.

Умертви́в у́ды воздержа́нием,/ оживи́л еси́, о́тче, ду́шу Боже́ственными возраще́нии,/ доброде́тельми вжиля́емь вседе́тельными си́лами, отце́в о́тче Палла́дие.

Вкуси́в до́браго Бо́жия глаго́ла и ра́зума Боже́ственнаго прича́щся,/ молчали́во соверши́в твое́ житие́,/ прилепля́яся невозвра́тно, преподо́бне, светода́телю Бо́гу на́шему.

Богоро́дичен: Ми́лостивыми Твои́ми, Отрокови́це,/ ка́плями у́глие угаси́ страсте́й, Мари́е неискусобра́чная,/ и угаше́ный возжзи́ свети́льник се́рдца моего́,/ златы́й Свети́льниче, Всенепоро́чная.

Песнь 4

Ирмо́с: Неизсле́дный Бо́жий сове́т,/ е́же от Де́вы воплоще́ния,/ Тебе́, Вы́шняго,/ проро́к Авваку́м, усмотря́я, зовя́ше:/ сла́ва си́ле Твое́й, Го́споди.

Си́лою же и благода́тию вседе́тельною всех Царя́, Бо́га на́шего,/ лука́вствия безпло́тных враг отню́д избе́гл еси́,/ о́тче Палла́дие Богодухнове́нне.

Да возра́дуемся духо́вне, па́мять соверша́юще пра́зднственную/ знамено́сца и честна́го отца́ на́шего,/ свяще́нными того́ мольба́ми неудо́бных избавля́еми.

Целе́ние приснотеку́щее твоя́ ра́ка то́чит, о Палла́дие сла́вне!/ Приходя́щих очища́ет скве́рны плотски́я вку́пе и душе́вныя,/ о́тче отце́в Богоприя́тне.

Изба́ви ны, преподо́бне, твои́ми моли́твами всех собла́зн змии́ных сете́й/ и исцели́ на́ша лю́тыя неду́ги ко Влады́це мольба́ми твои́ми.

Богоро́дичен: Яви́ся Боговмести́мая вои́стинну Це́рковь всех Царя́, Пренепоро́чная Богороди́тельнице./ Те́мже благоче́стно Гаврии́лово, Е́же ра́дуйся, ве́рнии, несумне́нно прино́сим.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая.

Стра́сти пренебре́гл еси́ плотски́я, Богоблаже́нне, премно́гим воздержа́нием,/ тем тебе́ благода́ть Боже́ственная дарова́ся/ стра́сти исцеля́ти ве́рных, о́тче, приходя́щих ти, о Палла́дие пресла́вне!

Свя́то твое́ житие́, всеблаже́нне, соверши́в,/ те́мже и ко святы́м причта́лся еси́, от ве́ка Бо́гу рабо́тавшим,/ всех освяща́еши ду́ши, хва́лящих твоя́ честна́я чудодея́ния.

Блаже́н был еси́ и́стинно, достосла́вне,/ ты бо в путь оправда́ний всеви́дца Бо́га ходи́л еси́,/ незло́бив и кро́ток быв и восхожде́нии до́брыми украша́емь.

Богоро́дичен: Дале́че челове́чество Бо́га, Де́во, бысть,/ Тебе́ же, заче́ншей Спа́са несказа́нно, Богора́дованная,/ па́ки в рай вхо́дит, ве́рою ублажа́я Тя, Всепе́тая.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Чи́сто житие́ восприе́мь воздержа́ния, я́ко безпло́тен,/ испра́вил еси́ стоя́ние всено́щное,/ моли́тву, му́дре, неоску́дну, ве́ру и́стинную, Боже́ственное смире́ние.

До́брых виде́нии украша́емь,/ я́ко А́нгел ви́ден был еси́, в пло́ти жи́тельствуя,/ и, преше́д, всели́лся еси́ со А́нгелы, о́тче Богоблаже́нне Палла́дие.

А́нгелы име́я спомо́щники,/ де́монская отрази́л еси́ мечта́ния229 и вся лука́вствия,/ и без преткнове́ния проше́л еси́, о Богоблаже́нне, стезю́, к жи́зни вводя́щую.

Богоро́дичен: Глаго́лы, Отрокови́це всенепоро́чная,/ Боже́ственнаго Гаврии́ла я́ко услы́шала еси́,/ Сло́во зачала́ еси́ в безсе́меннем чре́ве Твое́м/ и па́че сло́ва Сего́ родила́ еси́.

Го́споди поми́луй, три́жды.

Сла́ва, и ны́не, седа́лен, глас 1, то́йже, что и тропа́рь (зри день сей вы́ше ).

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся пою́ще:/ препе́тый отце́в Госпо́дь и Бог, благослове́н еси́.

Пресла́вными указа́нии, всебога́те, чуде́с/ всех ду́ши, притека́ющих к тебе́, просвеща́еши благода́тию Вседержи́телевою,/ просвети́вшаго твою́ ду́шу и показа́вшаго ю, со́лнца светле́йшую.

Возлюби́в соверше́ннейше Го́спода ума́ пра́востию/ и от Него́, всему́дре, соверше́нне возлюби́ся,/ благода́ть прия́л еси́ лука́выя отгоня́ти ду́хи и исцеля́ти вся неду́ги.

Слез твои́х тече́ния прии́м, всеви́дец Бог/ утеше́ния А́нгельскаго прича́стна тя соде́ла,/ е́же получи́ша Бо́гу служи́вшии пра́востию се́рдца.

Богоро́дичен: Ми́лостиваго ро́ждши Го́спода, еди́на Богоблагода́тная,/ десни́цею Его́, Чи́стая, поми́ловати мой ум моли́ся,/ всегда́ лю́те совраща́емый жите́йскими печа́льми.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки.

Си́лою Боже́ственною ополче́ния де́монская па́губная потреби́л еси́,/ благода́ть же прия́л еси́ уста́вити не́мощи и отгони́ти ду́хи нечи́стыя, вопия́:/ Го́спода по́йте дела́ и превозноси́те Его́ во вся ве́ки.

Пожи́в, всеблаже́нне, Богоуго́дно,/ пра́ведным я́ве до́лжным сном ны́не усну́л еси́/ и к неконча́емому приве́лся еси́ наслажде́нию, преподо́бне, вопия́:/ Го́спода по́йте дела́ и превозноси́те Его́ во вся ве́ки.

Цельбы́ источа́ет пресла́вно ра́ка твоя́, о́тче,/ прири́щущим уставля́ющи неду́ги,/ стра́сти же изсуша́ющи,/ е́йже покланя́ющеся, пое́м житие́ твое́, боле́зни и Боже́ственныя по́двиги,/ Палла́дие блаже́нне, свети́льниче мона́шествующих.

Богоро́дичен: Вод мя испо́лни, Де́во, Боже́ственных,/ я́же исто́чник ро́ждшая,/ изба́ви мя зно́я грехо́внаго и к жи́зни путево́дстви,/ две́ре Боже́ственныя жи́зни, вопию́ща:/ Го́спода по́йте дела́ и превозноси́те Его́ во ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, всеблаже́нная Богоро́дице,/ чи́стая Присноде́во.

Возмо́г Бо́жиею си́лою и благода́тию, о́тче, победи́ти зми́я, хва́лящася безу́мием,/ и па́губную главу́ его́ сокруши́ти, и попра́в нога́ми твои́ми./ Те́мже, соше́дшеся, уми́льною душе́ю тебе́ ублажа́ем.

Яви́лся еси́ не́бо высото́ю жи́тельства Твоего́,/ чудесы́ удобря́емь, всебога́те, я́ко Боже́ственными звезда́ми,/ и просвеща́еши ду́ши благоче́стно всегда́ приходя́щих Тебе́/ и чту́щих ве́рою по́двиги твоя́, Богоно́сне,/ свети́ло светле́йшее.

Уста́вил еси́ страсте́й тече́ния, преподо́бне, ту́чами слез твои́х,/ струи́ притека́ющим чуде́с то́чиши, Богоблаже́нне./ Отрева́еши зной страсте́й всегда́, Палла́дие сла́вне,/ Це́ркве честно́е удобре́ние.

Процве́л еси́ я́ве, я́ко ши́пок благово́нный, во Це́ркви Христо́ве/ и облагоуха́л еси́ чуде́сными воня́ми ми́ра концы́./ Те́мже Боже́ственную твою́ па́мять торжеству́ем,/ в не́йже всем испроси́ оставле́ние, Богоно́сне, мно́гих согреше́ний.

Богоро́дичен: Свет, и́же из Све́та, возсия́ из чре́ва Твоего́, Ма́ти Присноде́во,/ и пре́лести тьму отгна́ и земны́я концы́ вся просвети́./ Те́мже ве́рою, ра́дуйся, зове́м Тебе́, Богоро́дице, преподо́бных похвало́.

Стихи́ры, глас 1.

Подо́бен: Всехва́льнии му́ченицы:

Припе́в: Преподо́бне о́тче Палла́дие, моли́ Бо́га о нас.

Ум тво́й, просвеща́емь све́том,/ всеблаже́нне Палла́дие,/ трисо́лнечнаго Божества́ храм был еси́ чи́стый,/ Боже́ственныя Свята́го Ду́ха зари́ разу́мно прие́мля./ Те́мже моли́ся/ дарова́ти душа́м на́шим мир и ве́лию ми́лость.

А́нгелы споспе́шники име́я, му́дре,/ укрепля́ющия тя,/ де́монская мечта́ния и лука́вая дея́ния отрази́л еси́, о́тче,/ и путь проше́л еси́,/ вводя́щий к Боже́ственному поко́ю./ Те́мже моли́ся/ дарова́ти душа́м на́шим мир и ве́лию ми́лость.

Сла́ва:

Душе́вною чистото́ю, му́дре,/ Богоно́сне сла́вне,/ чи́стому уподо́бився Бо́гу и Зижди́телю твоему́,/ же́ртва жива́ Тому́ прине́слся еси́,/ я́ко храни́тель Того́ повеле́ний./ Те́мже моли́ся/ дарова́ти душа́м на́шим мир и ве́лию ми́лость.

И ны́не, Богоро́дичен:

Пречи́стый храм Бо́жий,/ Небе́с ши́рший и Херуви́м святе́йший,/ Богоблагода́тная, всесвята́я Отрокови́це,/ ум мой облагодати́ и просвети́ серде́чныя о́чи,/ подаю́щи ми благоприя́тным Твои́м хода́тайством/ прегре́шений всех отпуще́ние.

Крестобогоро́дичен. Подо́бен то́йже:

Де́ва нескве́рная дре́вле,/ на Дре́ве зря́щи Бо́га,/ Его́же из безсе́менна чре́ва роди́,/ не терпя́щи утро́бнаго уязвле́ния, терза́ющися, глаго́лаше:/ ма́нием Содержа́й всю тварь,/ ка́ко, я́ко осужде́нник, на Кресте́ распя́лся еси́,/ хотя́й спасти́ все челове́чество?

На У́трени

О́ба кано́на Окто́ иха без му́ченичнов и свята́го на 6, его́же краегране́сие: Пе́рсина Иа́кова пе́сньми му́ченика пою́. Творе́ние Ио́сифово. Глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Христо́ву Престо́лу ны́не предстоя́, венцено́сец, сла́вне му́чениче Иа́кове,/ светоно́сную мне зарю́ и благода́ть с Небесе́ даждь моли́твами твои́ми.

Я́коже у́тро нам возсия́л еси́ многосве́тлое, от восто́ка исходя́,/ и просвети́л еси́ Христо́ву Це́рковь/ све́тлостию страда́ний, му́чениче Иа́кове.

Ю́ношеское сопротивле́ние показа́в,/ я́ко победи́тель сподо́бился еси́ по́чести,/ и соверше́ннаго натрижне́ния, и сла́вы ве́чныя, му́чениче Иа́кове.

Богоро́дичен: Проро́ческия Тя трубы́ провозвести́ша,/ е́же о Тебе́ та́инство пропове́дающе, Богоро́дице Де́во,/ издале́ча зря́ще Твоя́ чудеса́.

Песнь 3

Ирмо́с: Утверди́ нас в Тебе́, Го́споди,/ Дре́вом умерщве́й грех,/ и страх Твой всади́/ в сердца́ нас, пою́щих Тя.

Был еси́, я́ко избра́нна Христо́ва лоза́,/ серпо́м муче́ний очища́ема и мног плод нося́щая,/ в точи́лех Спа́совых приноси́мый.

Теку́щих тле́нное и удоборазре́шное презре́л еси́ смы́сленно, венцено́сче,/ я́ко остроу́мный же предъизбра́л еси́ приснопребыва́ющих незы́бленное.

Венцы́ тебе́ све́тлы, раздробля́емое те́ло,/ суровство́м мучи́телей исхода́тайствова, Иа́кове,/ и пи́щи ра́йския наслажде́ние.

Богоро́дичен: Поми́ловано бысть я́ве Рождество́м Твои́м Боже́ственным, Де́во, челове́чество,/ соедини́вшееся по ипоста́си Влады́це всех, Богоневе́сто.

Седа́лен, глас 8.

Подо́бен: Прему́дрости:

Из Перси́ды звезду́ новоявле́нную/ Христо́с возсия́ земны́м Боже́ственнаго Иа́кова и приснопа́мятнаго му́ченика,/ того́ ра́ди пре́лести мрак отгна́, и ве́рным благода́ть Ду́ха возсия́./ Те́мже па́мять его́ соверша́юще, ве́рно пра́зднуим и возопии́м, глаго́люще:/ страстоте́рпче многострада́льне,/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не,

Богоро́дичен:

В ти́ну впад грехо́в, и несть мне постоя́ния,/ лю́те потопи́ мя бу́ря прегре́шений,/ но я́ко ро́ждши Сло́во, еди́наго Человеколю́бца, на мя, раба́ Твоего́, при́зри/ и изба́ви мя вся́каго греха́, и страсте́й душетле́нных, и вся́каго озлобле́ния лука́ваго уби́йцы,/ Богоро́дице неискусому́жная, моли́ Христа́ Бо́га грехо́в оставле́ние да́ти ми,/ Тебе́ бо наде́жду и́мам, раб Тво́й.

Крестобогоро́дичен:

Де́ва и Ма́ти Изба́вителя, Кресту́ предстоя́щи,/ боле́зненно со слеза́ми рыда́ющи, ма́терски вопия́ше:/ что стра́нное сие́, и пресла́вное, Сы́не?/ источа́яй всем челове́ком безстра́стие,/ посреде́ осужде́ною на Кресте́ распя́лся еси́,/ в ре́бра пробода́емь и же́лчию напая́емь от рук,/ я́же созда́л еси́?/ Но воста́ни и да́руй прегреше́ний оставле́ние/ ве́рою пою́щим Боже́ственная Твоя́ страда́ния.

Песнь 4

Ирмо́с: Услы́шах, Го́споди,/ слух Твоего́ смотре́ния/ и просла́вих Тя,/ Еди́не Человеколю́бче.

Вжиля́емь, сла́вне, от Бо́га да́нным тебе́ всеору́жием,/ огнеслужи́телей лесть всю попали́л еси́.

Очище́ние нам испроси́, честну́ю твою́ па́мять соверша́ющим,/ дерзнове́ние име́я, му́чениче Иа́кове.

Теку́щия кро́ве то́ки от твои́х уде́с, треблаже́нне,/ пре́лести пла́мень весь погаси́ша.

Богоро́дичен: Упра́ви мои́ помышле́ния, Пречи́стая,/ к благоти́хому приста́нищу Твоего́ безстра́стия и чистоты́.

Песнь 5

Ирмо́с: Све́та Пода́телю/ и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Я́коже не́кая земли́ блага́я и добропло́дная, и́стинно был еси́,/ ра́лом го́рьких мук раздробля́емь, му́дре,/ многокла́сное Зижди́телю приноси́ земледе́лание.

Стре́лы, всеизя́щне, разжже́нныя вра́жия угаси́л еси́,/ кро́вию отсече́ных твои́х уде́с230 теле́сных, треблаже́нне,/ наде́ждею бо яви́лся еси́ и ве́рою огражда́емь.

Всепло́дно, я́ко овча́, Христу́, прему́дре, твои́м удесе́м, ре́жемым лю́те,/ побе́дную песнь и досто́йную хвалу́ на ки́йждо приноси́л еси́.

Дае́ши очище́ние душе́вных мои́х скверн, сла́вне му́чениче Христо́в, твоя́ боле́зни,/ избавле́ние подава́я крове́й твоя́ то́ки, всехва́льне.

Богоро́дичен: И́стинствующий честно́му стра́шному рождеству́ Твоему́ глас/ се́рдцем и язы́ком принося́ще я́сно,/ Тя ны́не Богоро́дицу чи́стую имену́ем.

Песнь 6

Ирмо́с: В бе́здне грехо́внеи́ валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Поуче́ние смы́сленно прие́м бли́жних твои́х,/ ра́дуяся, устреми́лся еси́ к подвиго́м, сла́вне,/ и венцы́ побе́ды прия́л еси́.

Я́коже в чужде́м телеси́ стражда́, терпе́л еси́, му́чениче Иа́кове,/ и, на у́ды раздробля́емь, Влады́це песнь возсыла́л еси́.

Спасе́ния в ри́зу я́вственно/ и весе́лия оде́жду, кро́вию твое́ю обагри́вшуюся, прему́дре,/ победоно́сец, я́ко му́ченик, обле́клся еси́.

Муче́ния преплы́тие соверши́в,/ те́мже священнопобе́дный вене́ц прия́л еси́/ и ны́не с му́ченическими чи́нми сликовству́еши досто́йно,/ Иа́кове сла́вне.

Богоро́дичен: Неискусому́жно, Де́во, родила́ еси́ и ве́чнуеши Де́ва,/ явля́ющи и́стиннаго Божества́, Сы́на и Бо́га Твоего́, зна́мения.

Конда́к, глас 2

Подо́бен: Вы́шних ища́:

Уве́рився до́брою сопру́жницею, терпеливоду́шне,/ и стра́шнаго Суди́ща убоя́вся,/ Пе́рсское повеле́ние и страх, Иа́кове, поплева́л еси́/ и яви́лся еси́ му́ченик честны́й,/ те́лом, я́ко розга́, ре́жемь.

И́кос:

От души́ возстене́м вси, сле́зы пролива́юще,/ зря́ще му́ченика, го́рько раздробля́ема,/ подо́бно псом рыка́ющим,/ соше́дшеся, у́ды растерза́ют чу́днаго и до́бляго в свиде́телех му́ченика,/ что у́бо есть да приреку́?/ а́ще хо́щете, ма́ло пожди́те,/ и реку́ вся со тща́нием:/ ка́ко во еди́н день бысть смерть/ те́лом Иа́ков, я́ко розга́, ре́жемь.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Кре́постию у́мною, терпе́нием же душе́вным,/ раздробля́ему, му́чениче, твоему́ те́лу,/ непрело́жен и непрекло́нен был еси́,/ ве́рою укрепля́емь Боже́ственною и зовы́й, Иа́кове:/ благослове́н еси́, Го́споди Бо́же оте́ц на́ших.

Испра́вив твоя́ помышле́ния к смотре́нию вы́шняго зва́ния/ и му́ками облива́емь, не потопи́лся еси́,/ но, терпя́ удо́бно я́звы беззако́нных и разсека́емь, пел еси́:/ благослове́н еси́, Го́споди Бо́же оте́ц на́ших.

Блаже́н еси́, и добро́ тебе́ есть ны́не, блаже́ннейше,/ победи́вшу ти неукроти́мое лука́ваго свире́пство/ и мучи́телеву я́рость, усе́рдно зову́щу ти:/ благослове́н еси́, Го́споди Бо́же оте́ц на́ших.

Богоро́дичен: Незаходи́маго Све́та и свещи́ Боже́ственнаго сия́ния/ яви́лася еси́ све́щник златосия́ющ/ и мир весь озаря́ющ заре́ю честна́го де́вства и пою́щия спаса́еши:/ Благослове́нная, Я́же Бо́га пло́тию ро́ждшая.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте дела́ я́ко Го́спода/ и превозноси́те во вся ве́ки.

Си́лою Бо́жиею укрепи́вся,/ лука́вых собо́рища и ополче́ния разори́л еси́, блаже́нне,/ и, держа́вно отгна́в, побе́ды вене́ц прия́л еси́, зовы́й:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки.

Отъя́тия уде́с, я́ко приложе́ния благи́х, му́чениче, зрел еси́,/ не ны́нешния ви́дя боле́зни,/ но бу́дуще́е смотря́я му́чеников кра́сное венча́ние,/ от пра́веднаго Судии́ угото́ванное.

Терпе́ние преесте́ственное стяжа́в тве́рдо,/ я́коже столп, пребы́л еси́, блаже́нне,/ вра́жия стремле́ния безстра́шно и стре́лы прие́мля, зовы́й:/ благослови́те Христа́ во ве́ки.

Устремле́нием мно́гим тебе́ приложи́вся началозло́бный враг и душетле́нный/ и мучи́тели подви́гнув низложи́ти души́ твоея́ крепость, и не возмо́же, сла́вне,/ во всеору́жие бо Христо́во оде́ял еси́ себе́.

Богоро́дичен: Безсме́ртия проза́рный ве́мы Тя исто́чник, Богоро́дице,/ я́ко ро́ждшую Сло́во безсме́ртнаго Отца́,/ вся сме́рти изба́вльшаго превознося́щия Его́ во ве́ки.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

С му́ченики я́ко му́ченик сликовству́я, треблаже́нне,/ и Престо́лу предстоя́ Христо́ву,/ соверша́ющия па́мять твою́ и тво́й светоно́сный с весе́лием днесь чту́щия пра́здник/ лю́тых бед твои́ми моли́твами изба́ви.

Иде́же му́чеников собо́ри,/ иде́же всех святы́х свято́е упоко́ися мно́жество,/ иде́же пра́ведных ду́си, иде́же Це́рковь перворожде́нных,/ ны́не на Небесе́х всели́лся еси́ вои́стинну я́ко му́ченик, о Иа́кове!

Свещено́сец предста́л еси́ Спа́су всех,/ за Него́же те́ла твоего́ уде́с отсече́ние претерпе́л еси́/ и огня́, и ран искуше́ния неради́л еси́ кре́пко./ Те́мже тя вси́ ве́рою и любо́вию ублажа́ем, Иа́кове.

Испещре́нною багряни́цею, кровьми́ твои́ми очервлене́вшеюся, ны́не оде́ян,/ со Христо́м ца́рствуеши, Иа́кове,/ страстьми́ бо безстра́стия обре́л еси́ исто́чник,/ его́же наслажда́тися ве́чно, всеблаже́нне, сподо́бился еси́.

Богоро́дичен: Я́ко Бо́га заче́ншую/ и Бо́жию Ма́терь бы́вшую и́стинно чи́стую, Тя, Богоро́дицу, сла́вим,/ веще́й естеству́, зва́ние прили́чествующе я́сно,/ и подо́бно Боже́ственный Тебе́ глас принося́ще.

Свети́лен.

Подо́бен: Ду́хом во святи́лищи:

Я́ко лозу́, обре́заему мно́гими му́ками, просла́ви Госпо́дь,/ я́ко виногра́д честны́й, вино́ источа́ющ/ от исто́чник крове́й твои́х, Иа́кове страстоте́рпче и покрови́телю,/ любо́вию всесвяще́нную твою́ па́мять досто́йно творя́щих.

Богоро́дичен: Несть отню́д во мне спасе́ния, Де́во,/ я́ко зле впадо́х во глубину́ грехо́вную/ и ожида́ю преще́ния,/ и стра́шнаго муче́ния, и ко́злищ ча́сти,/ уще́дри мя пре́жде Суда́, яко су́щи те́плое заступле́ние, Богоро́дице.

На стихо́вые Окто́иха. Сла́ва, свята́го,

глас 2. Студи́тово:

Терпя́ в страда́ниих, му́чениче Иа́кове,/ те́ло твое́ преда́л еси́ за Христа́ Бо́га/ и, раздробля́емь ру́це, и сте́гна,/ и мы́шцы, и лы́ста, и пе́рсты,/ и коне́чное главу́ твою́,/ возлете́л еси́ на Небеса́,/ сца́рствуя Царю́ всех./ Те́мже страда́льцем держа́внейше/ не оскудева́й моля́ся/ спасти́ся душа́м на́шим от вся́каго вре́да чужда́го.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Егда́ нескве́рная А́гница ви́де Своего́ А́гнца,/ на заколе́ние я́ко Челове́ка во́лею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе́, ро́ждшую Тя./ Что сие́ сотвори́л еси́, Изба́вителю вся́ческих?/ Оба́че воспева́ю и сла́влю Твою́,/ ю́же па́че ума́ и сло́ва,/ кра́йнюю бла́гость, Человеколю́бче.

На Литурги́и

Проки́мен, глас 4: Святы́м, и́же суть на земли́ Его́,/ удиви́ Го́сподь вся хоте́ния Своя́ в них. Апо́стол ко Ефесе́ем, зача́ло 233. Аллилу́ия: Мно́ги ско́рби пра́ведным: Ева́нгелие от Иоа́нна, зача́ло 50. Прича́стен: В па́мять ве́чную:

В то́йже день Святи́теля Иа́кова, епи́скопа Росто́вскаго, чудотво́рца

Ве́чер

Блаже́н муж: На Го́споди, воззва́х: стихи́ры, глас 6.

Подо́бен: Все отло́жше:

Весь освяще́н и Богоно́сец показа́лся еси́,/ пома́зание Бо́жие свято́е,/ Святы́м Ду́хом обложе́н,/ и све́тло входя́ вы́ну во свята́я святы́х,/ Богонача́льными светлостьми́ озаря́емь,/ и благода́ти причаща́яся спаси́тельным та́йнам,/ я́ко и́стинный иера́рх пресла́вен/ со дерзнове́нием моли́ся о душа́х на́ших.

Просвети́ся житие́ твое́ доброде́тельными светлостьми́,/ и ве́рныя просвети́л еси́,/ и льсти тьму разгна́л еси́,/ и́стинное бо яви́лся еси́ и светоза́рное со́лнце,/ иера́рше преблаже́нне Иа́кове,/ и ны́не всели́лся еси́, иде́же сия́ет Свет невече́рний,/ сын дне благода́тию Ду́ха Свята́го быв./ Те́мже, твою́ Боже́ственную па́мять и светоно́сную/ че́стно соверша́юще, приснопа́мятне,/ любо́вию почита́ем.

Ум твой манове́нием,/ е́же к Бо́гу, му́дре, ве́рою удобря́емь,/ све́тел яви́лся еси́, всесла́вне,/ в ме́ртвеннем те́ле и тле́ннем, прему́дре,/ нетле́нию поучи́вся,/ притяжа́л еси́ Безпло́тных све́тлости,/ и страсте́й вне быв,/ безстра́стием украша́яся,/ Иа́кове о́тче, иера́рше прему́дре,/ светле́йшее свети́ло/ и моли́твенниче о чту́щих ве́рою па́мять твою́.

И́ны стихи́ры, глас 8.

Подо́бен: О пресла́внаго чудесе́!

Преподо́бне о́тче Иа́кове,/ ты еще́ во утро́бе сый ма́терни,/ архиере́йства прозва́ние и́мя прии́м нарече́нное,/ измла́да Христа́ возлюби́л еси́,/ вручи́вся же па́стве слове́сных ове́ц,/ до́бре пасл еси́ Це́рковь Христо́ву./ Тем пра́зднуем твое́ успе́ние,/ ра́достию се́рдца Христа́ велича́ем,/ прославля́ющаго Своего́ уго́дника.

Преподо́бне о́тче Иа́кове,/ испроси́ я́же к Бо́гу моли́твами твои́ми Це́ркви утвержде́ние,/ иера́рха покры́й моли́твою твое́ю,/ благочести́вым же и христолюби́вым побе́ды да́руй на враги́ и одоле́ние,/ гра́ду же твоему́ кре́пкое и недви́жимое утвержде́ние,/ и ве́рным лю́дем грехо́в оставле́ние испроси́,/ и о всех нас, притека́ющих к моще́м твои́м/ и све́тло творя́щих пра́зднество успе́ния твоего́,/ свя́те, помоли́ся.

Преподо́бне о́тче и Богоно́се святи́телю Иа́кове,/ ты вои́стинну яви́лся еси́, просвеща́я всех омраче́нная сердца́,/ наставля́я на путь и́стинный./ Ты был еси́ убо́гим и сирота́м и вдова́м засту́пник,/ вельмо́жам тве́рдое наказа́ние и утвержде́ние,/ всем, ве́рою притека́ющим под кров пречи́стыя Бо́жия Ма́тере,/ испроси́, свя́те, грехо́в оставле́ние,/ моля́ся за ны ко Влады́це.

Сла́ва, глас 8.

Апо́столов ревни́теля Иа́кова,/ преблаже́ннаго отца́ и учи́теля,/ соше́дшеся днесь восхва́лим,/ и́мже Христа́ Бо́га позна́хом,/ и от тьмы к све́ту прибли́жившеся, о́чи и сердца́ да просвети́м,/ и в па́мять его́ ликовству́юще,/ ку́пно возвесели́мся,/ обре́тше вождя́, пра́во веду́ща в Ца́рствие Бо́жие.

И ны́не, Богоро́дичен: Кто Тебе́ не ублажи́т:

Вход. Проки́мен дне́ и чте́ния три святительская (зри Мине́ю ноября́ 23-й день).

На литии́ стихи́ры, глас 8:

Преподо́бне о́тче Иа́кове,/ ты возше́д на ле́ствицу Боже́ственнаго ра́зума/ и к Бо́гу приближа́яся,/ усыне́ния дар от Него́ прии́м,/ исцеля́я неду́ги неисце́льныя/ и отгоня́я ду́хи нечи́стыя./ Тем твое́ успе́ние пра́зднуем ра́достию се́рдца,/ Христа́ прославля́юще,/ велича́юща Своего́ уго́дника.

Глас 4:

Воззре́в неукло́нно на высоту́ ра́зума/ и усмотри́л еси́ безве́стно прему́дрости глубину́,/ уче́нии мир обогати́л еси́, о́тче,/ о нас при́сно моли́ Христа́, святи́телю Иа́кове.

Челове́че Бо́жий, ве́рный уго́дниче,/ строи́телю Того́ та́ин и муж жела́ний духо́вных,/ сто́лпе одушевле́нный, духо́вный о́браз,/ я́ко Боже́ственное сокро́вище Це́ркви обре́тше тя,/ моли́твенника о ду́шах на́ших.

Глас 8:

Святи́телю Иа́кове,/ высото́ю доброде́телей Бо́жие просвеще́ние,/ духо́вный орга́не231, правосла́вных сла́во,/ злове́рия обличи́телю,/ де́вственному ли́ку вели́кое, и спасе́нное,/ и ди́вное мудрова́ние показа́лся еси́.

Сла́ва, глас 6:

Правосла́вныя ве́ры/ душе́вныя ра́ди му́дрости учи́тель яви́лся еси́, Иа́кове блаже́нне,/ Христа́ обре́т наста́вника,/ сове́ты злосла́вныя ерети́ческия разгна́л еси́./ Тем мо́лим тя, свя́те:/ моли́ся Христу́ Бо́гу о нас всегда́,/ е́же о тебе́ изве́ствованную Правосла́вную ве́ру/ неподви́жну сохрани́ти нам/ и ве́лию ми́лость испроси́, о́тче Иа́кове.

И ны́не, Богоро́дичен.

На стихо́вне стихи́ры, глас 4.

Подо́бен: Я́ко до́бля:

3аря́ми духо́вными просвеще́нное/ светоза́рное со́лнце был еси́,/ я́коже лучи́ уче́ния во вся концы́ простира́я/ и ве́рных озаря́я исполне́ние, блаже́нне,/ и отгоня́я тьму́, Богоно́се, ересе́й/ си́лою от Де́вы Возсия́вшаго.

Стих: Честна́ пред Го́сподем/ смерть преподо́бных Его́.

Благосказа́нием слове́с твои́х, свяще́нный Иа́кове,/ Це́рковь вся украша́ется,/ ра́дующися уче́ньми кра́сными в доброде́телех,/ и почита́ет свяще́нное твое́ преставле́ние, пресла́вне,/ свяще́нных похвало́, отце́в верхо́вниче,/ Пресвяты́я Тро́ицы побо́рниче.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Огненными твои́ми уче́нии/ ересе́й вся́кая хвра́стная232 попаля́ется лесть, прему́дре,/ разу́мными глубина́ми погружа́ется/ во́инство не повину́ющихся злочести́вых,/ свяще́нне о́тче Иа́кове, уче́нии твои́ми,/ и украша́ется ве́рных всегда́ Це́рковь,/ велегла́сно чту́щих тя.

Сла́ва, глас 8:

И́же по о́бразу соблю́д невреди́мо, преподо́бне о́тче,/ о Христо́ве о́бразе проти́ву стал еси́ му́жески,/ не убоя́вся вра́жеского преще́ния,/ но духо́вным мече́м того́ уби́л еси́./ Те́мже, дерзнове́ние стяжа́в к Бо́гу,/ спаси́ ста́до твое́ от ересе́й всех,/ Иа́кове многострада́льне.

И ны́не, Богоро́дичен.

Тропа́рь, глас 4:

Избра́н от ю́ности Бо́гови быв,/ святи́телю Иа́кове,/ сего́ ра́ди архиере́йства са́ном почте́н,/ упа́сл еси́ лю́ди, я́же тебе́ Бо́гом вруче́нныя./ Те́мже и по преставле́нии/ чуде́с дарова́ния от Бо́га прия́л еси́/ исцеля́ти разли́чныя неду́ги./ Моли́ о нас, соверша́ющих честну́ю па́мять твою́,/ да тебе́ непреста́нно велича́ем.

Сла́ва, и ны́не, Богоро́дичен.

На У́трени

На Бог Госпо́дь: тропа́рь то́йже.

По 1-м стихосло́вии седа́лен, глас 1.

Подо́бен: Гроб Твой:

Служи́тель быв Христа́, вся́ческих Влады́ки,/ научи́л еси́ лю́ди и просвети́л еси́ Боже́ственным уче́нием,/ к разуме́нию сих наставля́я, святи́телю./ Те́мже тя пропове́дника и́стинна вси имену́ем,/ всечестна́го святи́теля и уго́дника Христо́ва.

Сла́ва, и ны́не, Богоро́дичен:

Безневе́стная чи́стая Богоро́дице Де́во,/ еди́на предста́тельница ве́рных и покро́в,/ бед, и скорбе́й, и лю́тых обстоя́ний вся изба́ви,/ и́же на Тя упова́ние иму́щия, Отрокови́це,/ и ду́ши на́ша спаси́ Боже́ственными мольба́ми Твои́ми.

По 2-м стихосло́вии седа́лен, глас 4.

От ю́ности взем кре́ст твой,/ благоче́стно после́довал еси́ и увяди́в плотско́е мудрова́ние воздержа́нием./ Тем, на архиере́йстем седа́лищи сед,/ возвели́чил еси́ Влады́ку и Того́ пречи́стую Ма́терь,/ зна́меньми разли́чными твою́ украси́вшия ра́ку, Иа́кове Богоблаже́нне.

Сла́ва, и ны́не, Богоро́дичен:

Де́во Всенепоро́чная, Пресу́щнаго Бо́га ро́ждшая,/ со иера́рхом Иа́ковом Того́ непреста́нно моли́/ оставле́ние согреше́ний и исправле́ние жития́ да́ти нам пре́жде конца́,/ ве́рою и любо́вию чту́щим Тя по до́лгу, еди́на Всепе́тая.

По полиеле́и седа́лен, глас 8.

Подо́бен: Прему́дрости:

Над страстьми́ ца́рствовал еси́ плотски́ми,/ иера́рх яви́вся Богоподо́бен,/ град твой Росто́в упа́сл еси́,/ уче́нием же просвети́л еси́ и наказа́л еси́ сла́вити Еди́наго Бо́га в Трех Ипоста́сех./ Те́мже источа́еши исцеле́ния и по кончи́не/ ве́рою притека́ющим ко пречи́стей Бо́жии Ма́тери и к моще́м твои́м, Иа́кове,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Небе́сную дверь и киво́т,/ пресвяту́ю го́ру, све́тлый о́блак воспои́м,/ неопали́мую купину́,/ слове́сный рай,/ Е́вы воззва́ние, вселе́нныя всея́ вели́кое сокро́вище,/ я́ко спасе́ние в Ней соде́лася ми́ру и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоме́стно покланя́ющимся всесвято́му Рождеству́ Твоему́.

Степе́нна, 1-й антифо́н 4-го гла́са. Проки́мен: Уста́ моя́ возглаго́лют прему́дрость, и поуче́ние се́рдца моего́ ра́зум. Стих: Уста́ пра́веднаго поуча́тся прему́дрости, и язы́к его́ возглаго́лет суд. Проки́мен: Вся́кое дыха́ние да хва́лит Го́спода. Стих: Хвали́те Бо́га во святы́х Его́: Ева́нгелие от Иоа́нна, зача́ло 35.

По 50-м псалме́ стихи́ра, глас 6.

Самогла́сна:

Насле́дниче Христо́в, слуго́ Госпо́день Иа́кове,/ по и́мени твоему́ та́ко и житие́ твое́,/ просия́в бо седи́нами ра́зум,/ свиде́тельствоваше све́тлость лица́ твоего́ душе́вное незло́бие,/ изве́ствоваше кро́тость сло́во молчали́вое,/ жизнь твоя́ сла́вная и успе́ние со святы́ми,/ моли́ о душа́х на́ших.

Кано́н Богоро́дицы на 6 и свята́го на 8. Глас 6.

Песнь 1

Ирмо́с: Я́ко по су́ху пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь/ пои́м, вопия́ше.

Боже́ственными заря́ми и свяще́нными светосия́нии/ при́сно мою́ ду́шу озари́,/ твой, иера́рше, пра́здник, о́тче, сла́вяща.

Всесве́тлую тя звезду́ мы́сленное показа́ Со́лнце,/ све́тлость твои́х доброде́телей просвети́ зе́млю,/ святи́телю Христо́в, му́дре Иа́кове.

Житие́ при́сно очище́но и чи́сто/ и скве́рне несме́шено яви́в, Христо́в свяще́н сосу́д, прему́дре,/ показа́лся еси́ на земли́, Иа́кове блаже́нне.

Богоро́дичен: Со Отце́м Сый Единоро́дный,/ земны́я обожи́в, Чи́стая,/ за мно́гия щедро́ты я́ко Бог преблаги́й.

Катава́сия: Христо́с ражда́ется:

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́выи́ нас на ка́мени/ испове́дания Твоего́.

Сын дне све́та, ты, святи́телю, труды́ твои́ми яви́лся еси́/ и я́сно во све́тлостех ны́не святы́х сия́еши благода́тию.

Пропове́дая ны́не благочести́вно Тро́ицы Еди́но Божество́,/ и́дольскую лесть искорени́л еси́ от земли́,/ я́ко честны́й святи́тель и я́ко Сло́ва и́стинный служи́тель.

Путь обличи́л еси́, му́дре, всем прельще́ным нечести́ваго искуше́ния/ и приве́л еси́ к Сло́ву Пастыренача́льнику,/ я́ко па́стырь слове́сный и спаси́тельный.

Богоро́дичен: Приста́нище бу́ди ми и окормле́ние,/ бе́дствующу страстьми́ неосла́бно и погиба́ющу,/ приста́нище су́щи в мо́ри жите́йстем, еди́на Чистая Присноде́во.

Седа́лен, глас 8:

Подо́бен: Прему́дрости:

Украша́яся прему́дростию ра́зума,/ горды́ню низложи́л еси́ плотски́я тя́гости/ и был еси́ оби́тель Ду́ха Пресвята́го,/ непреме́нно простира́яся ра́зумом к Лю́бящему тя./ Тем ре́вностию Боже́ственною разгара́яся, сла́вне,/ сирота́м и убо́гим утвержде́ние яви́лся еси́, А́нгелов собесе́дник Иа́кове,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, ин седа́лен, глас 4.

Подо́бен: Яви́лся еси́ днесь:

Правове́рно, преподо́бне, Це́рковь Христо́ву упа́сл еси́,/ ерети́ческия отгна́л еси́ пле́велы233/ и в Вы́шних се́лех водворя́ешися, преблаже́нне.

И ны́не, Богоро́дичен: Я́ко Всенепоро́чная: ( зри Мине́ю ноября́ 16-й день ) .

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ Боголе́пно пое́т взыва́ющи,/ от смы́сла чи́ста/ о Го́споде пра́зднующи.

Предве́дый Бог, блаже́нне, твоея́ души́ красоту́ и ра́зума чистоту́,/ священнопропове́дника му́дра и учи́теля показа́ тя.

Ду́хом просвеще́н сый,/ су́щия во тьме пре́лести просвеща́еши/ и Креще́нием сы́ны дне соверша́еши, святи́телю преслову́щий.

От тьмы звере́й изба́вил еси́ ста́до твое́, растерза́ти и́щущих/ и отступи́ти ве́ры непоро́чныя,/ святи́телем добро́то и па́стырем старе́йшинство.

Богоро́дичен: Разу́мно в купине́ Тя огнепа́льней Моисе́й ви́дев,/ я́вственно образу́ющей Бо́га,/ хотя́ща из Тебе́ роди́тися неизрече́нно, Богоро́дице Присноде́во.

Песнь 5

Ирмо́с: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Святи́тельскую твою́ оде́жду свяще́нную носи́в свяще́нно,/ нечести́выя просвети́л еси́, честны́й святи́телю,/ Еди́нство Несозда́нно в Трех Ли́цех, Иа́кове прему́дре, пропове́дал еси́.

От уст во́лка мы́сленнаго восхи́тил еси́ лю́ди уче́нием, Богогла́се,/ уста́ ерети́ческая велере́чивая твои́ми Богосло́вии загради́л еси́, о́тче.

Я́ко святи́теля вели́каго и апо́столом о́бщника/ Це́рковь сла́вит тя вся ве́рных, Иа́кове сла́вне, и гра́д Росто́в,/ его́же свои́ми моли́твами сохрани́ непрекло́нный и недви́жимый,/ Иа́кове свя́те, ра́вне апо́столом.

Богоро́дичен: Зако́ны естества́ Пресу́щный Бог обновля́ет, Непоро́чная,/ из Твоея́ утро́бы ражда́ется,/ еди́н усво́ив вся́ческая во́лею.

Песнь 6

Ирмо́с: Жите́йское мо́ре,/ воздвиза́емое зря напа́стеи́ бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Возвы́шено смире́ние чистото́ю ума́/ и любо́вь нелицеме́рну, ве́ру и наде́жду име́я и́стинну, Иа́кове всесла́вный,/ Тро́ицы яви́лся еси́ жили́ще.

Ны́не от созва́ния твоего́ Ду́хом, прему́дре,/ и́же по тебе́ благода́тию слове́сных ове́ц/ наста́вника приво́диши к же́ртвеннику, доброде́тели писа́нием облиста́ема.

Вельми́ украси́вшася Росто́вскаго свяще́ния,/ седа́лищу тя учи́т, прехва́льне, Дух Святы́й,/ и тебе́ па́стыря руко́ю святи́тельскою, Иа́кове, соверша́ет.

Богоро́дичен: Дверь Богоблагода́тная,/ отве́рзши две́ри Небе́сныя, две́ри све́та отве́рзи ми, Влады́чице,/ и от врат сме́ртных свободи́ мя, Чи́стая.

Конда́к, глас 8:

Я́ко архиере́ев сопресто́льник/ и святи́телем изря́дный побо́рник был еси́, святи́телю Иа́кове,/ непреста́нно сохраня́й оте́чество твое́, град же и лю́ди,/ тебе́ ве́рою почита́ющия и честны́м моще́м твои́м покланя́ющияся,/ да велегла́сно тебе́ вопие́м:/ ра́дуйся, Иа́кове Богому́дре.

И́кос:

Из чре́ва ма́терня освяще́ннаго святи́теля Госпо́дня/ хва́лит ны́не вся страна́ Росси́йская,/ преподо́бнаго Иа́кова, Росто́ву гра́ду утвержде́ние,/ благода́тныя да́ры прие́мшаго Боже́ственныя сла́вы,/ к нему́же притека́юще, вси ве́рою те́плою/ мо́щи его́ любе́зно целу́ем./ Тем и аз, недосто́йный и гре́шный, наде́яся на моли́твы твоя́, святи́телю,/ я́же ко Влады́це и Пречи́стей Его́ Ма́тери,/ жела́ю, а́ки пси от крупи́ц, па́дающих от трапе́зы госпо́дий свои́х, насыще́ние прия́ти,/ е́же в День Су́дный соде́янных мно́ю зол, моли́твами твои́ми, свя́те,/ проще́ние улучи́ти,/ да велегла́сно тебе́ вопию́:/ ра́дуйся, Иа́кове Богому́дре.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее веле́ние Бо́жие/ мучи́теля увеща́ вопи́ти:/ благослове́н еси́, Бо́же оте́ц на́ших.

Вразумля́л еси́ неразу́мныя, обраща́л еси́ прельще́нныя,/ совраща́ющияся же, о́тче, спасл еси́ и Бо́гу приве́л еси́ чи́сты,/ Тому́ пою́щия благоче́стно:/ благослове́н еси́, Го́споди Бо́же оте́ц на́ших.

Украси́шася Боже́ственнии твои́ по́двиги,/ воплоще́ние пропове́дающе неизрече́нным милосе́рдием возсия́вшаго нам,/ Ему́же вопие́м приле́жно:/ благослове́н Бог оте́ц на́ших.

Облада́в страстьми́ теле́сными,/ поще́нием, сла́вне, необлада́емь жите́йскими напа́стьми яви́лся еси́./ Ны́не пое́ши при́сно:/ благослове́н Бог оте́ц на́ших.

Богоро́дичен: Избавля́еши дре́вняго преступле́ния Рождество́м Твои́м, Пречи́стая,/ хва́лим Тя, спасе́ннии Тобо́ю, Де́во, и, пою́ще, вопие́м Ти:/ благослове́н Бог оте́ц на́ших.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Процве́л еси́, я́ко фи́никс, во дво́рех Бо́жиих/ и до́лжным сном преподо́бным усну́л еси́,/ при́сно же наслажде́ние пребоже́ственный гроб твой/ и чу́до ви́дящим, Иа́кове пропове́дниче, показу́еши.

Бо́жие бо Сло́во су́щественное,/ свяще́нно тя и святи́теля возставля́ет, пома́зающа лю́ди,/ священносвяти́телю и престо́льниче Росто́вский и свети́льниче вселе́нныя.

Вопло́щшагося Сло́ва Богосло́вил еси́,/ многобезслове́сия бо лю́ди изба́вив,/ Боже́ствен был еси́ учени́к возсия́вшаго, Иа́кове Богогла́се.

Богоро́дичен: Священнонаучи́вся Твои́м та́йнам,/ проро́чески Боже́ственный лик, Богоро́дице, издале́ча уви́дев/ и я́ко положи́в Богопропове́дно Боже́ственнаго пропове́дания Рождества́ Твоего́.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю бо, Всечи́стая, яви́ся челове́ком Сло́во воплоще́нно,/ Его́же велича́юще,/ с Небе́сными во́и/ Тя ублажа́ем.

Я́ко свет, я́ко све́щник, я́ко вели́кое со́лнце,/ я́ко мо́лния Христо́ве Це́ркви возсия́л еси́,/ и ве́рных ра́зумы просвети́л еси́,/ и в невече́рняя места́ всели́лся еси́,/ поя́ трисвяты́ми гла́сы Тро́ицу Несозда́нную.

Пло́тию ми́ра кроме́ быв, святи́телю, в прекра́сных чи́не обита́я,/ ро́да на́шего обогаща́еши творе́нием све́тлым./ Те́мже па́мять твою́ ве́рою соверша́ем на земли́, Иа́кове прему́дре.

Земля́ те́ло твое́ блаже́нное скрыва́ет, я́ко исцеле́ния точа́щи ве́рным,/ Не́бо же дух со избра́нными от ве́ка но́сит,/ Боже́ственными сия́нии озаре́н еси́ вои́стинну, я́ко всесла́вный.

Богоро́дичен: Глас Арха́нгела Гаврии́ла прие́мши, Вели́каго Сове́та, Чи́стая,/ Христа́ Емману́ила родила́ еси́, со А́нгелы земны́я вся сочета́вшаго,/ еди́на вино́вна на́шего, Де́во, блаже́нства.

Свети́лен.

Подо́бен: Ученико́м:

Чу́днаго и сла́внаго святи́теля Иа́кова вели́каго,/ прииди́те, пе́сньми Боже́ственными и свяще́нными похва́лим,/ я́ко Росто́ву председа́льника и А́нгельским чино́м сослуже́бника бы́вша.

Сла́ва, други́й свети́лен.

Подо́бен: Посети́л ны есть:

Сла́вно кра́сится днесь светоза́рное торжество́,/ и́же во све́те сла́вы Бо́жия предстоя́, святи́телю,/ помяни́ нас, хва́лящих твою́ па́мять.

И ны́не, Богоро́дичен:

С Бо́гом упова́ние на Тя возложи́хом, Пречи́стая,/ И́же из Тебе́ проше́дшему сраспина́емся Христу́,/ Твои́ми же к Нему́ моли́твами невреди́ми да́же до конца́ сохрани́.

На хвали́тех стихи́ры, глас 1.

Подо́бен: Небе́сных чино́в:

На Небеси́ сый почива́яй веселя́ся,/ моли́ за ны Пресвяту́ю Тро́ицу/ ми́лость пода́ти нам, святи́телю,/ и житие́ безгре́шно,/ я́ко в Ту́ю ве́рующих при́сно ско́рби отгоня́ет/ и неду́ги исцеля́ет.

Милосе́рдия твоего́ исто́чник нам да́руй и благода́ть,/ вско́ре ра́дости испо́лни,/ пода́й же цельбы́ в ско́рбех и печа́лех,/ моля́ Христа́, всесла́вне,/ спасти́ вся, пою́щия тя.

На весе́лие вшед нетле́емое,/ весе́лие да́ти моли́, е́же спасти́ рабы́ твоя́,/ мо́жеши бо, Иа́кове, в моли́твах беды́ вся разгони́ти,/ моля́ Христа́ исцели́ти боля́щия/ и спасти́ ду́ши на́ша.

От зако́ннаго ко́рене израсте́ ветвь всыне́ния,/ вода́ми напое́н я́сно, Иа́кове,/ и́бо Це́ркви Христо́ве, я́ко фи́никс высокове́рхий,/ процве́л еси́ нам, просвеща́я ве́рныя./ Тем ны́не со святи́тели предстоя́ Престо́лу Христо́ву,/ моли́ся о душа́х на́ших.

Сла́ва, глас 6:

Доброде́телей твои́х, о́тче преподо́бне, плод/ просвети́л есть ве́рных сердца́,/ кто бо, слы́ша безчи́сленное твое́ смире́ние,/ и терпе́нию не удиви́тся,/ е́же к ни́щим ти́хости, скорбя́щим утеше́ние/ вся Боголе́пно научи́л еси́,/ преподо́бне святи́телю Иа́кове./ И ны́не неувяда́емым венце́м увя́злся еси́,/ моли́ о душа́х на́ших.

И ны́не, Богоро́дичен: Влады́чице, приими́:

Славосло́вие вели́кое, и отпу́ст. И час 1-й.

На Литурги́и

Блаже́нны от кано́на, пе́сни 3-я и 6-я. Слу́жба вся святи́тельская.

Святитель Иаков, епископ Ростовский родился в простой крестьянской семье в деревне Яковлево Ростовской области. Сердцеведец Господь избирает Своих служителей не по знатности рода, а за простоту сердца. Возлюбив Господа, в молодые годы он принял монашеский постриг в небольшой Конырьской обители, расположенной в 48 верстах от Ростова, где впоследствии был избран игуменом. В 1386 году митрополит Пимен возвел его в сан епископа Ростовского. Однако недолго святитель Иаков возглавлял Ростовскую кафедру. Около 1389 года Ростовская княгиня Феодора, осужденная за преступление на смерть, обратилась за помощью к святителю, умоляя спасти ее от казни. Святитель Иаков, следуя примеру Спасителя, велел бросить в нее первый камень тому, кто считал себя безгрешным. Князь, бояре и горожане, недовольные таким судом, отменившим их приговор, изгнали архипастыря из города.

Смиренный святитель покинул Ростовский кремль и направился к озеру Неро, на берегу которого снял с себя мантию, положил на воду и благополучно переплыл на ней на противоположный берег. Там в двух верстах от Ростова он построил небольшую келлию для уединенных подвигов. Вскоре к нему за духовным советом стали приходить городские жители. Некоторые из них оставались со святителем. Для них угодник Божий построил келлии и деревянную церковь в честь Зачатия святой Анны (празднование 9 декабря), так было положено основание Иаковлевскому монастырю. Ростовцы, осознавшие свое заблуждение, раскаялись перед святителем и просили его возвратиться на архипастырскую кафедру, но праведник не пожелал оставить своей уединенной обители.

27 ноября 1392 года он мирно отошел к Богу и был погребен у северной стены основанного им Зачатьевского храма. Празднование памяти святителя Иакова, епископа Ростовского, установлено определением Собора Русской Церкви в 1549 году.

В то́йже день Обре́тение честны́х моще́й благове́рнаго вели́каго кня́зя Все́волода, нарече́ннаго во свято́м Креще́нии Гаврии́ла, Пско́вскаго чудотво́рца

Ве́чер

Блаже́н муж: 1-й антифо́н. На Го́споди, воззва́х: стихи́ры, глас 1.

Подо́бен: О, ди́вное чу́до:

О, ди́вное чу́до!/ Исто́чник чудесе́м, от мног лет сокрове́н,/ днесь пресла́вно всем явля́ется/ и свои́м явле́нием пресла́вно всех освяща́ет./ К нему́ же, ве́рнии, возопие́м, ра́дующеся:/ о блаже́нне Гаврии́ле,/ Христо́ви моли́ся дарова́ти моли́твами твои́ми/ всем пою́щим тя ве́лию ми́лость.

О, пресла́вное чу́до!/ И́же иногда́ на земли́ сокрове́н,/ днесь пресла́вно, я́ко со́лнце, облиста́/ и просвети́ нас, пра́зднующих че́стно/ моще́й его́ обре́тение,/ к нему́ же, вопию́ще, глаго́лем:/ о блаже́нне Гаврии́ле,/ Христо́ви моли́ся дарова́ти мир вселе́нней/ и душа́м на́шим ве́лию ми́лость.

Твое́ пра́зднуют обре́тение свяще́нных мно́жества/ и христолюби́вых люде́й со́нмы./ В пресла́внем ти обре́тении крася́щеся,/ пра́зднственная пе́ния тебе́ воспева́юще, глаго́лем:/ о преблаже́нне Гаврии́ле,/ моли́ся мир вселе́нней дарова́ти/ и душа́м на́шим ве́лию ми́лость.

Сла́ва, глас 6:

Егда́ обре́тение твои́х честны́х, блаже́нне, моще́й бысть,/ тогда́ благочести́вых мно́жества стека́ются,/ ви́дети жела́юще твоя́ мо́щи,/ благове́рный кня́же Гаврии́ле,/ и, узре́вше, ра́дости испо́лнившеся,/ со слеза́ми си́це глаго́лаху:/ сла́ва Тебе́, Влады́ко Христе́ Бо́же,/ я́ко сподо́бил еси́ нас ви́дети/ неисчерпа́емых даро́в сокро́вище,/ от мно́гих лет сокрове́но,/ ны́не нам, недосто́йным, явле́но./ Но, о блаже́нне и благочести́ве Гаврии́ле,/ в твое́ обре́тение мир испроси́,/ правосла́вным христиа́ном на супоста́ты побе́ды/ и душа́м на́шим ве́лию ми́лость.

И ныне, Богоро́дичен:Кто Тебе́ не ублажи́т:

Вход. Проки́мен дне. Чте́ния три святи́тельская (зри Мине́ю ноября́ 23-й день).

На стихо́вне стихи́ры, глас 6:

Прииди́те, сы́нове ру́сстии,/ возвесели́мся празднолюбе́зно/ и, духо́вный лик соста́вльше,/ душе́вныя свещи́ просвети́м,/ та́ко почти́м вели́каго кня́зя Все́волода,/ я́ко апо́стола, пе́сньми,/ той бо мо́лится Христу́ Бо́гу/ спасти́ся душа́м на́шим.

Стих: Возвесели́тся пра́ведник о Го́споде/ и упова́ет на Него́.

Я́ко свещу́ незаходи́мую,/ я́ко свети́льника всеми́рнаго, вели́каго кня́зя Все́волода/ почти́м всечестну́ю его́ па́мять/ и пресла́вное житие́ его́,/ той бо мо́лится Го́сподеви/ спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Я́ко со́лнце незаходи́мое,/ на земли́ луча́ распросте́р/ и озари́л еси́ ве́рных сердца́,/ соверша́ющих све́тлую па́мять твою́,/ всеблаже́нне кня́же Все́володе,/ и мо́лишися Христу́ Бо́гу/ спасти́ся душа́м на́шим.

Сла́ва, глас 2:

Всем благове́рным ру́сским князе́м похвала́ ты еси́,/ блаже́нне кня́же Гаврии́ле,/ от ю́ности бо дом Ду́ху Свято́му был еси́./ Его́ же моли́ спребыва́ти в лю́бящих тя/ и ве́рою пра́зднующих честно́е твое́ обре́тение,/ да вси тебе́ любо́вию зове́м:/ моли́ изба́витися нам от бед на́ших и скорбе́й.

И ны́не, Богоро́дичен: О, чудесе́ но́ваго:

Тропа́рь, глас 4:

Наста́ днесь всечестны́й но́вый пра́здник,/ обре́тение честны́х моще́й/ блаже́ннаго кня́зя Гаврии́ла,/ веселя́щи изря́дно всех благочести́вых мно́жества,/ те́мже, вси ве́рнии,/ соше́дшеся во святы́й храм Живонача́льныя Тро́ицы, возопие́м:/ блаже́нне кня́же Гаврии́ле,/ име́я дерзнове́ние ко Христу́ Бо́гу,/ моли́ спасти́ся пра́зднующим любо́вию па́мять твою́.

Сла́ва и ны́не, Богоро́дичен: Е́же от ве́ка утае́нное:

На У́трени

На Бог Госпо́дь: тропа́рь то́йже и Богоро́дичен.

По 1-м стихосло́вии седа́лен, глас 4:

Благоволи́в благи́ми дея́нии,/ искуси́ся, я́ко зла́то в пещи́, напа́стьми,/ Все́володе сла́вне,/ те́мже и по сме́рти источа́еши бога́тно чудеса́, я́ко во́ды,/ и неду́ги исцеля́еши./ О нас при́сно моли́ся,/ я́ко да согреше́нием проще́ние прии́мем.

Сла́ва и ны́не, Богоро́дичен:

Стена́ непобеди́мая нам, христиа́ном, еси́, Богоро́дице Де́во,/ к Тебе́ бо прибега́юще, невреди́ми пребыва́ем/ и, па́ки согреша́юще, и́мамы Тя Моли́твеницу./ Тем, благодаря́ще, вопие́м Ти:/ ра́дуйся, Обра́дованная,/ Госпо́дь с Тобо́ю.

По 2-м стихосло́вии седа́лен, глас 3.

Подо́бен: Красоте́ де́вства:

Благода́рно зове́м вси Христо́ву уго́днику,/ ми́лостивому, незло́бивому и кро́ткому,/ приле́жно моля́щеся:/ любо́вию разруши́ брань страсте́й на́ших/ и отжени́ бесо́вская мечта́ния, блаже́нне,/ и моли́ Христа́ Бо́га/ дарова́ти нам ве́лию ми́лость.

Сла́ва и ны́не, Богоро́дичен:

Красоте́ де́вства Твоего и пресве́тлой чистоте́ Твое́й/ Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возъимену́ю Тя?/ Недоумева́ю и ужаса́юся./ Те́мже я́ко повеле́н бых, вопию́ Ти:/ Ра́дуйся, Благода́тная.

Велича́ние:

Велича́ем тя,/ благове́рный кня́же Гаврии́ле,/ и чтим святую́ па́мять твою́,/ ты бо мо́лиши за нас/ Христа Бо́га на́шего.

И́но велича́ние:

Ублажа́ем тя,/ благове́рный кня́же Гаврии́ле,/ и чтим обре́тение честны́х моще́й твои́х,/ и ны́не мо́лиши за нас/ Христа́, Бо́га на́шего.

Псало́м избра́нный: Блаже́н муж, боя́йся Го́спода:

По полиеле́е седа́лен, глас 8.

Подо́бен: Повеле́нное:

Сконча́в до́брый по́двиг/ и ве́ру соблю́д в се́рдцы свое́м,/ и вене́ц нетле́нный от Бо́га прия́л еси́, блаже́нный кня́же Все́володе,/ и сла́вы Его́ сподо́бился еси́,/ и Престо́лу Его́ предста́л еси́./ Ему́же моли́ся спасти́ град Псков от наше́ствия пога́ных/ и твое́ честно́е обре́тение почита́ющим грехо́в оставле́ние дарова́ти/ и чту́щим любо́вию святу́ю па́мять твою́.

Сла́ва и ны́не, Богоро́дичен:

Повеле́нное та́йно прие́м в ра́зуме,/ в кро́ве Ио́сифове тща́нием предста́ Безпло́тный, глаго́ля Неискусобра́чней:/ Приклони́вый схожде́нием небеса́, вмеща́ется неизме́нно весь в Тя./ Его́ же и ви́дя в ложесна́х234 Твои́х, прие́мша ра́бий зрак,/ ужаса́юся зва́ти Тебе́:/ ра́дуйся, Неве́сто Неневе́стная.

Степе́нна, антифо́н 1, глас 4. Проки́мен: Пра́ведник, я́ко фи́никс, процвете́т: Стих: Насажде́ни в дому́ Госпо́дни,/ во дво́рех Бо́га на́шего процвету́т: Ева́нгелие от Луки́ зача́ло 35. Стихи́ра по 50-м псалме́, глас 6: Егда́ обре́тение твои́х честны́х, блаже́нне, моще́й бысть: пи́сана на Го́споди, воззвах: сла́ва ( зри день сей вы́ше ).

Кано́н Богоро́дице, с ирмосо́м на 6 и свято́му кано́н на 8, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла́ избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Мрак грехо́вный отжени́, Светода́вче Христе́,/ и свы́ше просвети́ окая́нную мою́ ду́шу/ пе́ти Твоего́ уго́дника обре́тение, блаже́ннаго кня́зя Гаврии́ла.

Храм Святы́я Тро́ицы па́че со́лнечных луч просвети́ся,/ явле́ны име́я в себе́ твоя́ мо́щи, блаже́нне,/ созыва́ет правосла́вных мно́жества пра́здновати но́вый пра́здник све́тел твоего́ обре́тения.

Вели́ких князе́й ру́сских ко́рене/ Бо́гом изра́стшую ветвь, блаже́ннаго Гаврии́ла,/ благочести́вых мно́жества, соше́дшеся, похва́лим/ и па́мять его́ све́тло пра́зднуем,/ да моли́твами его́ прии́мем грехо́в проще́ние.

Богоро́дичен: Засту́пница скорбя́щим/ и спасе́ние ненаде́ющимся Ты еси́, Богоро́дице всепе́тая,/ моли́ся приле́жно Сы́ну Своему́ от бед изба́витися нам.

Катава́сия Рождеству́ Христо́ву

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Лице́м к лицу́ зерца́лом разреше́нным зри́ши Святу́ю Тро́ицу,/ Ей же предстоя́ со святы́ми,/ и о нас ны́не моли́ся, Гаврии́ле блаже́нне,/ и́же ве́рою тя сла́вящих.

Испо́лнен ра́дости день обре́тением телесе́ твоего́, блаже́нне,/ всех к торжеству́ воздвиза́еши Христо́ви с весе́лием вопи́ти:/ несть свят, па́че Тебе́, Человеколю́бче.

Па́ки нас честны́м ти явле́нием,/ благове́рный кня́же Гаврии́ле, весели́ши/ и па́ки ко своему́ телеси́ прикоснове́нием всех освяща́еши/ и учи́ши Христо́ви вопи́ти:/ несть свят, па́че Тебе́, Человеколю́бче.

Богоро́дичен: Живота́ нетле́ннаго Бо́жия ски́ния бысть,/ еди́на от ве́ка я́вльшися Де́ва и Ма́ти Чистая,/ в се́ни мя су́ща сме́ртней к животу́ наста́ви моли́твами Твои́ми.

Седа́лен, глас 4:

Моли́твам и ми́лостыням при́сно прилежа́, блаже́нне Гаврии́ле,/ ми́лостив к тре́бующим был еси́ и незави́стный пода́тель,/ тем же тя почита́ющих от сопроти́вных зол изба́ви,/ да вси твое́ обре́тение любо́вию почита́ем.

Сла́ва и ны́не, Богоро́дичен:

Свет ро́ждшая пречи́стый,/ И́же от Отца́ пре́жде век воссия́вый,/ просвети́, Отрокови́це, ду́шу мою́ и ум,/ дале́че от Мене́ отгоня́щи тьму страсте́й,/ да Тя ублажа́ю, Присноблаже́нную,/ всех ве́рных упова́ние.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Благода́рная пе́ния принося́щая ти лю́ди не пре́зри, блаже́нне Гаврии́ле,/ но приими́ сия́ и доноша́й твоему́ Творцу́ и Бо́гу на́шему,/ да вси твое́ обре́тение любо́вию почита́ем.

Дарова́ся нам дар от Бо́га – твоя́ мо́щи, блаже́нне./ От них же незави́стныя да́ры исцеле́ния почерпа́юще,/ Христа́ во хвале́нии воспева́ем,/ И́же тебе́ нам дарова́вшаго.

Ру́це твои́ к Бо́гу воздежи́, кня́же Гаврии́ле,/ и помоли́ся о гра́де твое́м Пско́ве, изба́витися от вся́каго зла,/ я́ко да вси твое́ обре́тение че́стно почита́ем.

Богоро́дичен: С Бо́гом Тя Засту́пницу стяжа́хом,/ Ты бо Ма́ти Бо́жия бысть,/ Творца́ и Соде́теля на́шего во утро́бе прии́мши, Всенепоро́чная,/ всех от сме́рти и тли спасла́ еси́.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам, Человеколю́бче.

Рыда́ют попремно́гу го́рцыи бе́сове,/ моли́твами твои́ми от челове́к отгоня́еми/ и стра́сти неисце́льныя ви́дяще уврачу́еми./ Мы же, лю́дие твои ́ , ви́дяще мо́щи твоя́, ра́дующеся, пра́зднуем.

Боже́ственную благода́ть в честне́м ти обре́тении/ попремно́гу зря́ще лю́дие твои́,/ но я́ко чадолюби́вый оте́ц, моли́твами твои́ми ми́рно житие́ дарова́ти мо́лимся./ Укрепи́ благове́рныя лю́ди на супоста́ты,/ да тобо́ю от злых избавля́еми,/ почита́ем честно́е твое́ обре́тение.

Смире́ния нрав высо́к и по Бо́зе житие́ стяжа́в, блаже́нне Гаврии́ле,/ те́мже Всеви́дящее о́ко, ви́дев до́брое твое́ произволе́ние, сла́вна тя явля́ет всем,/ Христо́с и Спас душа́м на́шим.

Богоро́дичен: Еди́ну Тебе́, Всенепоро́чную, от родо́в избра́в Чи́стую,/ всели́ся в Тя Госпо́дь и челове́ки обожи́./ Те́мже, я́ко ма́терне дерзнове́ние к Нему́ иму́щи,/ моли́ о и́же Тя Богоро́дицу имену́ющих.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

А́ще и преста́вися от земны́х, блаже́нне,/ но в Вы́шних жив, со А́нгелы Бо́гу предстои́ши,/ помина́й нас, и́же честно́е твое́ обре́тение пра́зднующих.

Блаже́ни роди́телие, и́же тебе́ роди́вшии,/ блаже́но же и ме́сто, тебе́ воспита́вшее./ Свята́ же и пресвята́ це́рковь и град Псков,/ и́же тебе́, таково́е сокро́вище, стяжа́вши.

На смире́ние на́ше свы́ше при́зри/ и ми́лостивно назира́й,/ и́же ве́рно тебе́ при́сно сла́вящих,/ моли́ся от вся́кия ско́рби изба́витися,/ я́ко тебе́ те́пла предста́теля к Бо́гу, Гаврии́ле, стяжа́хом.

Богоро́дичен: Пое́м, Ма́ти Де́во, па́че естества́ Рождество́/ и Твою́ нетле́нную чистоту́,/ и́же в Тебе́ ди́вно сочта́ся де́вство и рождество́ нетле́нне, Богоневе́сто.

Конда́к, глас 8.

Подо́бен: Взбра́нной:

Возвесели́ся, Христо́ва це́рковь,/ иму́щи в себе́ исто́чника чудесе́м оби́льна./ Днесь, любо́вию соше́дшеся в тя, лю́дие твои́,/ во обре́тение честны́х моще́й блаже́ннаго кня́зя Гаврии́ла,/ воспое́м песнь еди́ному Бо́гу в Тро́ице, ра́дующеся,/ сподо́бльшаго нас ви́дети пречестно́е сокро́вище, мо́щи его́,/ от мног лет сокрове́нны, напосле́док же нам явле́ны./ Я́ко да моли́твами его́ к Бо́гу от всех находя́щих зол изба́вимся/ и ра́достною душе́ю и весе́лием се́рдца/ благода́рная воспое́м, глаго́люще:/ ра́дуйся, утвержде́ние гра́ду на́шему.

И́кос:

От ю́ности свое́ житие́ Спа́су испра́вль,/ внима́тельным о́ком всегда́ к Вы́шнему зря,/ отню́дуже вели́кия доброде́тели му́дрость стяжа́в,/ и вруче́ние держа́вы княже́ния от Бо́га при́ят,/ и до́бре жив в житии́ сем,/ мно́ги святы́я це́ркви созда́в/ и честны́ми би́серы украси́в, иере́я учреди́в,/ и ни́щия а́лчущия напита́в,/ печа́льныя и вдови́цы и сироты́ уте́шив./ Те́мже тече́ние благоче́стно соверши́в,/ к Бо́гу пресла́вно ду́хом преше́л еси́/ и нам в па́мять честны́я мо́щи твоя́ оста́вил еси́./ Их же ны́не честно́е обре́тение ра́достно пра́зднующе, мо́лим тя/ побе́ду на враги́ ве́рным дарова́ти,/ я́ко да и мы, в тишине́ благоуго́дно житие́ пожи́вше,/ ра́достною душе́ю тебе́ благода́рственно воспое́м:/ ра́дуйся, Все́володе, прозва́нный блаже́нный, именова́нный Гаврии́ле,/ ты бо еси́ утвержде́ние гра́ду на́шему.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

И́же обре́тение твое́ чту́щих, блаже́нне,/ свяще́нный собо́р и христолюби́вых наро́д мно́жества/ мо́лят изба́вити нас, Христо́ви вопию́щих:/ благослове́н Бог оте́ц на́ших.

Свы́ше от Бо́га дар тезоимени́т гра́ду и всей земли́ дан бысть, блаже́нне Гаврии́ле,/ удивля́я всех чудесы́, Христо́ви вопию́щих:/ благослове́н Бог оте́ц на́ших.

Во всем жити́и свое́м, блаже́нне, о́браз быв всем благове́рным кня́зем,/ ка́ко незло́биво и прекро́ткое е́же к челове́ком/ и ка́ко к ни́щим ми́лостивное,/ свети́льник многосве́тлый был еси́, Христо́ви поя́:/ благослове́н Бог оте́ц на́ших.

Богоро́дичен: Зачала́ еси́, Пречи́стая, над все́ми Бо́га,/ благоволи́вшаго спасти́ род челове́ческий от сме́рти и тли./ Его́ же, пою́ще, зове́м:/ благослове́н Бог оте́ц на́ших.

Песнь 8

Ирмо́с: Царя́ Небе́снаго,/ Его́ же пою́т во́и А́нгельстии,/ хвали́те и превозноси́те во вся ве́ки.

Влады́ку всех за ны моли́, блаже́нне Гаврии́ле,/ Ему́же в житии́ свое́м благоугоди́л еси́,/ ве́мы бо, я́ко и́маши к Нему́ дерзнове́ние,/ тебе́ бо и́мамы к Нему́ хода́тая и неусыпа́юща моли́твенника, прехва́льне.

Пресла́вным явле́нием твои́х моще́й, блаже́нне,/ вско́ре сумне́ние о тебе́ от душ на́ших и от серде́ц отжени́/ и несумне́нну ве́ру да́руй Го́споду вопи́ти:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки.

По Боже́ственнем ти преставле́нии/ взя́ти восхоте́ша лю́дие Вели́каго Нова́гра́да святы́я мо́щи твоя́ к себе́,/ а́бие ра́ка твоя́ ста неподви́жима,/ благоволи́л бо еси́ пребыва́ти, иде́же преста́вися./ Тогда́ же и весь Боголюби́вый наро́д вопия́ху Творцу́:/ де́ти, благослови́те, свяще́нницы, по́йте и превозноси́те Его́ во ве́ки.

Богоро́дичен: Сло́вом проро́ческим после́дующе, Де́во,/ Богоро́дицу Тя имену́ем,/ роди́ бо Отроча́, всех дре́внейше, Емману́ил нарица́емо./ Ему́ же ны́не зове́м:/ Го́спода по́йте и превозноси́те Его́ во ве́ки.

Песнь 9

Ирмо́с: Вои́стинну Богоро́дицу/ Тя испове́дуем/ спасе́нии Тобо́ю, Де́во Чи́стая,/ с Беспло́тными ли́ки Тя велича́юще.

Све́тлый и честны́й пра́здник преставле́ния твоего́, блаже́нне кня́же Гаврии́ле,/ светле́йши же и честне́йши ны́не обре́тение твое́,/ е́же сла́вяще, тебе́ велича́ем.

Исто́чник благоче́стия яви́лся еси́ и о́браз кро́тости,/ исцеле́нием незави́стный пода́тель,/ те́мже соше́дшеся благоче́стно,/ твоего́ обре́тения пра́здник любо́вию почита́ем.

Певце́м, и́же тебе́, блаже́нне Гаврии́ле, во хвале́нии пою́щим,/ свы́ше ниспосли́ по́мощь и грехо́м оставле́ние испроси́ от Влады́ки Христа́,/ да тебе́ всегда́ в пе́снех велича́ем.

Богоро́дичен: Ми́ро та́йно имену́ем Тя, Пречи́стая,/ я́ко ро́ждши Бо́га пло́тию,/ благоуха́ния источа́юща дарова́ния.

Свети́лен:

Ско́ро предвари́, благове́рный кня́же Гаврии́ле,/ ве́рным помо́щниче и Христо́в уго́дниче,/ и покори́ враги́ на́ша, иноплеме́нныя язы́ки,/ да навы́кнут сла́вити Святу́ю Тро́ицу./ Нас же, чту́щих твою́ па́мять, спаса́й от вся́каго гне́ва.

Сла́ва, и ны́не, Богоро́дичен:

С Бо́гом упова́ние на Тя, Богоро́дице, возло́жше,/ И́же из тебе́ проше́дшему сраспина́еми Христу́,/ к Нему́ же, Пречи́стая, моли́ся невреди́мы нас до конца́ сохрани́ти.

На хвали́тех стихи́ры, пи́саны на вече́рни, на Го́споди, воззва́х: (зри день сей вы́ше).

Сла́ва свято́му, глас 6:

Днесь празднолю́бных собо́ри,/ ра́достным лице́м и чи́стым се́рдцем/ духо́вный лик соста́вльше,/ не в кимва́лех иуде́йски,/ но в сокруше́нии душ и серде́ц на́ших,/ похваля́юще Христа́, и́стиннаго Бо́га на́шего,/ прославля́юща свята́го Своего́, до́бляго кня́зя Гаврии́ла,/ его́ же ны́не целе́бную ра́ку обстоя́ще,/ любе́зно облобыза́юще, глаго́лем:/ о блаже́нне кня́же Гаврии́ле,/ име́я дерзнове́ние ко Христу́ Бо́гу,/ мир ми́рови испроси́/ и душа́м на́шим ве́лию ми́лость.

И ны́не, Богоро́дичен: Богоро́дице, Ты еси́ лоза́ и́стинная:

Славосло́вие вели́кое и отпу́ст.

На Литурги́и

Блаже́нны: пе́сни 3-я и 6-я. Проки́мен: Возвесели́тся пра́ведник о Го́споде: Апо́стол, зача́ло 325. Аллилу́ия. Пра́ведник, я́ко фи́никс, процвете́т: Стих: Услы́ши, Бо́же, моли́тву мою́. Ева́нгелие от Луки́, зача́ло 67. Прича́стен: В па́мять ве́чную:

Святой благоверный князь Всеволод, во святом Крещении Гавриил, Псковский чудотворец мирно почил о Господе 11 февраля 1138 года, напутствованный Святыми Тайнами.

Славной и Богоугодной была его жизнь, но не все смогли оценить любящее сердце святого при земной жизни.

Внук Владимира Мономаха, он всей душой любил свой народ, что особенно проявилось во время его правления Новгородом. В Юрьевской обители заботами святого Всеволода был воздвигнут новый храм во имя великомученика Георгия Победоносца. Страдания родного народа были и его страданиями. Во время страшного голода в Новгородской земле святой князь все свои средства отдал на пропитание голодавших, а когда денег не осталось, то подкреплял людей словом.

Несмотря на то, что святой Всеволод исполнял свое служение с христианской самоотверженностью, ему пришлось пережить горечь несправедливых обвинений и «изгнания от своих».

Только год княжил он во Пскове, но своими Богоугодными делами оставил о себе непреходящую память в «Доме Живоначальной Троицы». Господь уготовал ему блаженную кончину среди всеобщей любви псковичей.

Новгородцы снарядили посольство в Псков, чтобы перевезти святые останки в Новгород. Псковичи не противились им, но Господу не угодно было отдать святыню тем, кто не сумел ценить любовь святого при жизни: новгородцы никак не могли сдвинуть с места раку с телом почившего.

Согласно завещанию, святой князь Всеволод был погребен в храме великомученика Димитрия Солунского. Прошло немного времени, и от его мощей стали являться знамения и исцеления приходившим с верою.

Через 55 лет святой Всеволод явился одному благочестивому псковичу и благословил перенести свои мощи в каменный собор Святой Живоначальной Троицы, воздвигнутый самим святым князем. Обретение и перенесение честны́х мощей было торжественно совершено 27 ноября 1192 года. (Служба на обретение святых мощей князя Всеволода была напечатана в Трефологионе 1637 года.) К середине XVI века у гроба святого князя было записано более двадцати исцелений.

В ночь на 30 июля 1363 года святой князь явился соборному пономарю и сказал: «Поспеши передать соборянам Пресвятой Троицы и посадникам, чтобы вынесли из соборной церкви иконы и сосуды, ибо Господу угодно явить чудо над мощами моими в следующую ночь». Наутро из церкви всё было вынесено, а в полночь обрушился церковный свод, пробивший раку с мощами святого князя и отделивший его главу (которая потом хранилась в особом ковчеге), но ни церковное имущество, ни люди не пострадали. Святые мощи были поставлены в Благовещенском приделе собора.

На Соборе 1549 года было установлено общецерковное празднование святому благоверному князю Всеволоду-Гавриилу Псковскому. Святой князь всегда неотступно ходатайствовал за Псков у Престола Живоначальной Троицы, сберегая его от врагов и умиротворяя внутренние раздоры. Молитвами блаженного Николая Псковского (память 28 февраля) и святого Всеволода Господь не допустил разорения города войсками Иоанна Грозного, пришедшего во Псков после разгрома Новгорода.

В 1581 году во время нашествия поляков псковичи в продолжение двух недель носили мощи святого князя Всеволода-Гавриила по городу к тем местам, где угрожала наибольшая опасность, и враг вынужден был снять осаду и отступить. Изнесение мощей святого Всеволода на место битвы было изображено на серебряной раме в 1834 году, когда святые мощи 22 апреля, в первый день Пасхи, были перенесены из Благовещенского придела в главную часть собора. Во время польского нашествия (1581 г.) было явление святого князя вместе с Пресвятой Богородицей и сонмом русских святых старцу Дорофею, что свидетельствовало о его покровительстве над городом. (Это видение изображено на Псково-Покровской иконе Божией Матери; празднование 1 октября.)

Псковичи свято хранят память о святом князе Всеволоде, который и ныне является «града Псковского утверждением».

В то́йже день Преподо́бнаго Феодо́сия Те́рновскаго, и́же на Кефала́рстей горе́ пости́вшегося

На Ма́лой Вече́рни

На Го́споди, воззва́х : поста́вим стихо́в 4 и пое́м стихи́ры, глас 1.

Подо́бен: Небе́сных чино́в

Житию́ А́нгельскому поревнова́в, преблаже́нне,/ и ми́ра сего́ су́етную красоту́ ни во что́же вмени́в,/ Небе́сное бога́тство усе́рдно взыска́л еси́/ и обогати́лся еси́ Боже́ственными доброде́тельми./ Те́мже мо́лим тя:/ обнища́вших ны Боже́ственнаго ра́зума обогати́ благода́тию,/ о́тче Феодо́сие.

В чистоте́ и целому́дрии пожи́ти изво́лив,/ плоть твою́ в посте́х и моли́твах истни́л еси́,/ всего́ же себе́ воздержа́нием очи́стив,/ ум и ду́шу просвети́л еси́./ Те́мже мо́лим тя:/ просвети́ очеса́ душ на́ших,/ я́ко да воспое́м по достоя́нию по́двиги и труды́ твоя́,/ о́тче Феодо́сие.

Пе́рвый насе́льник пусты́ни Кефала́рския быв,/ мно́жество и́ноков в ней собра́л еси́ к славосло́вию Бо́жию,/ наставля́я их презира́ти/ су́етнаго ми́ра красоту́/ и иска́ти Небе́снаго жи́тельства./ Те́мже А́нгелом единовсе́льники сотвори́л еси́ я,/ о́тче Фео́досие.

Го́рькое и му́тное ерети́ческое уче́ние/ из Це́ркве Христо́вы му́жественно отве́рг/ и Правосла́вия догма́ты ре́вностию в ней утверди́в,/ в благоче́стии соблю́л еси́ лю́ди твоя́./ Те́мже и мы, ча́да твоя́,/ благода́рственно почита́ем всечестну́ю па́мять твою́,/ о́тче Феодо́сие.

Сла́ва, глас 2:

Отве́ргся ми́ра и су́щих в ми́ре всех,/ Ева́нгельски неукло́нно Христу́ после́довал еси́,/ с Ним непреста́нно пребыва́ти изволя́я;/ по́стническим же житие́м плоть твою́ коне́чне изнури́л еси́/ и человекоуби́йцу зми́я удави́л еси́./ Ны́не же на Небесе́х со А́нгелы водворя́яся,/ преподо́бне о́тче Феодо́сие,/ моли́ о нас, почита́ющих честну́ю па́мять твою́.

И ны́не, Богоро́дичен: Все упова́ние мое́:

На стихо́вне стихи́ры глас 2.

Подо́бен: До́ме Евфра́фов:

Звезду́, из Те́рнова возсия́вшую/ и всех Болга́р просвети́вшую,/ пе́сньми восхва́лим,/ я́ко вся в нощи́ неве́дения наставля́ющую/ и к све́ту Богоразу́мия приводя́щую.

Стих: Честна́ пред Го́сподем/ смерть преподо́бных Его́.

Дом Ду́ха Свята́го был еси́, Феодо́сие,/ внутрь себе́ име́я сло́во прему́дрости,/ и́мже ерети́ческия победи́л еси́ полки́,/ утверди́л еси́ в ве́ре/ царя́ и лю́ди.

Стих: Блаже́н муж, боя́йся Го́спода,/ в за́поведех Его восхо́щет зело́.

Сый в дому́ Отца́ Небе́снаго/ и наслажда́яся зре́нием Неви́димаго,/ Феодо́сие блаже́нне,/ не преста́й моля́ся/ спасти́ся душа́м на́шим.

Сла́ва, и ны́не, Богоро́дичен,

глас и подо́бен то́йже:

Ра́дуйся, Мари́е Богоро́дице,/ хра́ме неразруши́мый,/ па́че же святы́й,/ я́коже вопие́т проро́к:/ свят храм Твой, ди́вный в пра́вде.

Тропа́рь, глас 3: В блаже́ннем безмо́лвии: ( зри день сей ни́же ).

Сла́ва, и ны́не, Богоро́дичен: Тя, хода́тайствовавшую спасе́ние ро́да на́шего:

На Вели́цей Вече́рни

Пое́м Блаже́н муж: 1-й антифо́н. На Го́споди, воззва́х: поста́вим стихо́в 8 и пое́м стихи́ры самогла́сны, глас 1:

Мир возненави́дев, Христа́ возлюби́л еси́/ и Сио́на мы́сленнаго жи́тель бы́ти поревнова́л еси́,/ блаже́нне Феодо́сие,/ наказа́нием же учи́теля твоего́/ послуша́ния соверше́ннаго дости́гл еси́/ и искуше́ний мно́жество побе́дне претерпе́л еси́./ Те́мже, Боже́ственным себе́ вооружи́в,/ к боре́нию льсти́ваго, ра́дуяся, изше́л еси́/ и сего́ победи́л еси́/ си́лою из Де́вы Возсия́вшаго.

От ю́ности целому́дренне/ плотска́я мудрова́ния покори́в ду́ху/ и в живоно́сную ме́ртвость оде́явся,/ свети́льник яви́лся еси́ пресве́тлый,/ блаже́нне Феодо́сие;/ благода́ти же испо́лнен Боже́ственнаго Ду́ха,/ и́стинный па́стырь показа́лся еси́,/ и слове́сною цевни́цею/ собра́нное о Христе́ ста́до до́бре упа́сл еси́,/ и на па́жить ра́йскую возве́л еси́.

Зре́ти жела́я мы́сленную све́тлость/ Боже́ственнаго светоли́тия/ и жития́ вожделе́в невеще́ственнаго,/ мирска́я вся презре́л еси́,/ пусты́ню душе́вную возде́лал еси́/ и сию́ слеза́ми напои́л еси́./ Жела́ние же улучи́в Влады́це твоему́ предстоя́ния,/ ны́не со А́нгелы на Небеси́/ священноле́пно ликовству́еши и мо́лиши/ спасти́ся душа́м на́шим.

И́ны стихи́ры, глас 4.

Подо́бен: Свы́ше зва́нный:

Усе́рдно к и́ноческому житию́ прите́к,/ наста́ви тя Бог к равноа́нгельному Григо́рию,/ я́ко да иску́с прии́м,/ дея́нию и виде́нию от него́ научи́шися/ и бу́деши избра́нный сосу́д благода́ти, о́тче Феодо́сие./ Те́мже, творя́ще честну́ю па́мять твою́, мо́лим:/ не забу́ди о нас сро́днаго промышле́ния,/ но моли́ спасти́ся душа́м на́шим.

Богоме́рзское хуле́ние иуде́йское не стерпе́в,/ дерзнове́нно царя́ и цари́цу,/ вку́пе же и патриа́рха к ре́вности возста́вил еси́/ и собо́ру бы́ти тех упроси́л еси́, о́тче Феодо́сие,/ иде́же му́жественно на богохули́телей стал еси́/ и злове́рие их обличи́л еси́./ Те́мже, почита́юще честну́ю па́мять твою́, мо́лим:/ моли́ся о душа́х на́ших.

Неукло́нно ца́рским путе́м ше́ствуя/ и вся ко́зни вра́жия я́сно зря,/ дея́нием те́ло очи́стил еси́/ и виде́нием ду́шу просвети́л еси́,/ безпрепя́тно во́лны ми́ра сего́ преплы́л еси́/ и к го́рнему235 приста́нищу дости́гл еси́, о́тче Феодо́сие,/ иде́же ны́не несы́тно зри́ши Христа́./ Те́мже, почита́юще честну́ю па́мять твою́, мо́лим:/ моли́ся о душа́х на́ших.

Сла́ва, глас 8:

Ца́рскаго лица́ и патриа́ршаго не устыде́вся,/ ниже́ хитросплете́нных слове́с ересе́й убоя́вся,/ дерзнове́нно на собо́ре пропове́дал еси́/ в Трие́х Ли́цех Еди́наго Бо́га/ и Еди́наго Христа́, Бо́га же и Челове́ка;/ иуде́йское у́бо единоли́чие, и Саве́лиево слия́ние,/ и про́чих всех злоче́стие посрами́в,/ ве́рныя просвети́л еси́/ и в благоче́стии утверди́л еси́./ Ны́не же я́ко побо́рника Це́ркве Правосла́вныя/ тя почита́юще, Феодо́сие, мо́лим:/ моли́ся о душа́х на́ших.

И ны́не, Богоро́дичен: Царь Небе́сный:

Вход, проки́мен дне и чте́ния три преподо́бническая (зри Мине́ю ноября́ 23-й день ).

На литии́ стихи́ры самогла́сны. Глас 2:

Уподо́бился еси́ пчеле́ трудолю́бней,/ обходя́ оби́тели и взыску́я духо́внаго ме́да,/ до́ндеже по се́рдцу обре́л еси́ духо́вный у́лей, Григо́рия,/ и́мже и наста́влен быв на по́двиги,/ многоле́тне потруди́лся еси́ в посте́ и безмо́лвии/ и просия́л еси́ благода́тию./ Ны́не же во све́тлостех Святы́я Тро́ицы водворя́яся,/ помина́й ны, творя́щия честну́ю па́мять твою́.

Глас 6:

Удиви́ся наста́вник твой,/ вели́кий Григо́рий,/ в тебе́ зря воздержа́ние чрезме́рное,/ и внима́ше мы́слию,/ хотя́щая ти напосле́док бы́ти, Феодо́сие;/ ви́дев бо твое́ по Бо́зе житие́,/ вра́жиими прило́ги ника́коже коле́блемое,/ свиде́тельствоваше оте́ц к бра́тии, вопия́:/ се ме́ньший в нас последи́ в пу́стыни/ вели́кий свети́льник и́мат бы́ши Бо́га на́шего.

Глас 8:

Житие́ по Бо́зе испра́вив/ наказа́нием отца́ твоего́,/ дея́нию и виде́нию от него́ научи́лся еси́,/ Богоявле́нне Феодо́сие;/ жела́нием бо Боже́ственным му́дрость возлюби́в,/ Ду́ха благода́тию обогати́лся еси́/ и, я́ко сот ме́да, сла́дость слове́с твои́х иска́пая,/ при́сно весели́ши ра́зумы Боже́ственными Це́рковь Бо́жию./ Те́мже на Небесе́х ны́не водворя́яся,/ о нас непреста́нно моли́,/ соверша́ющих честну́ю па́мять твою́.

Глас 4:

Бо́жиим изволе́нием/ в пусты́ни Кефала́рстей всели́лся еси́/ и исто́чник медото́чных слове́с яви́лся еси́,/ источа́яй Боже́ственныя догма́ты благоче́стия./ Те́мже по вселе́нней про́йде слух твой,/ Бо́гу прославля́ющу тя, о́тче,/ и стеко́шася к тебе́ мно́жества,/ я́коже еле́ни, жа́ждущии воды́ живо́тныя,/ и́щуще напое́ния благода́ти./ Но и ны́не не преста́й моли́ся о восхваля́ющих тя,/ проси́ нам оставле́ния грехо́в и спасе́ния душ на́ших.

Сла́ва, глас 5:

Де́ланием доброде́телей/ Це́ркви вели́кое возсия́л еси́ со́лнце/ и сия́нием слове́с твои́х просвети́л еси́/ ве́рных люде́й собо́ры;/ столп и утвержде́ние Це́ркве Христо́вы быв,/ сию́ непоколеби́му/ от искуше́ний лука́ваго соблю́л еси́,/ вся бо ересе́й разори́л еси́ злоде́йства,/ и лю́ди твои́ научи́л еси́/ Тро́ице покланя́тися Единосу́щней,/ и просвети́л еси́ Це́рковь Бо́лгарскую/ па́че со́лнечных луч сия́ти чистото́ю,/ и́же, моли́твами твои́ми неруши́ма,/ краси́тся да́же доны́не./ Те́мже, соше́дшеся и благодаря́ще Бо́га,/ да́вшаго ти благода́ть такову́ю,/ вку́пе и тя почита́ем,/ Феодо́сие, Богому́дре о́тче.

И ны́не, Богоро́дичен:

Ра́дуйся, две́ре Госпо́дня непроходи́мая;/ ра́дуйся, стено́ и покро́ве притека́ющих к Тебе́;/ ра́дуйся, необурева́емое приста́нище и Неискусобра́чная,/ ро́ждшая пло́тию Творца́ Твоего́ и Бо́га,/ моля́щи не оскудева́й/ о воспева́ющих и кла́няющихся Рождеству́ Твоему́.

На стихо́вне стихи́ры, глас 8.

Подо́бен: О, пресла́внаго чудесе́:

Преподо́бне Феодо́сие, о́тче наш,/ ты столп непоколеби́м Христо́вы Це́ркве был еси́,/ Боже́ственною бо ре́вностию разже́гся,/ ерети́ческия ба́сни дерзно́венно разори́л еси́,/ царя́ и лю́ди утвержда́я/ в догма́тех благоче́стия;/ те́мже я́ко па́стырь до́брый/ послужи́л еси́ лю́дем твои́м/ во сла́ву Христа́ Бо́га на́шего,/ Его́же моли́ спасти́/ любо́вию почита́ющих честну́ю па́мять твою́.

Стих: Честна́ пред Го́сподем/ смерть преподо́бных Его́.

Преподо́бне Феодо́сие, о́тче наш,/ ты свети́льник яви́лся еси́ слове́сный/ и язы́к Богоглаго́ливый,/ Боговеща́нным бо гла́сом весьма́ подвиза́вся/ во сла́ву Бо́жию, Богому́дре,/ апо́столов был еси́ подража́тель./ Те́мже ре́вностию всех посрами́в,/ насле́дник показа́лся еси́ Ца́рствия Христа́ Бо́га на́шего,/ Его́же моли́ спасти́/ любо́вию почита́ющих честну́ю па́мять твою́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Преподо́бне Феодо́сие, о́тче наш,/ се приидо́ша Бо́лгарская мно́жества/ днесь честно́е твое́ торжество́/ благоче́стно пе́сньми восхвали́ти,/ ты бо вои́стину воздержа́нием те́ло удручи́в/ и моли́твою ду́шу просвети́в,/ чистото́ю просия́л еси́,/ я́коже заря́ Све́та Трисо́лнечнаго,/ и ны́не на Небеси́, наслажда́яся ве́чнаго блаже́нства,/ непреста́нно мо́лиши Христа́ Бо́га на́шего/ спасти́ любо́вию почита́ющих честну́ю па́мять твою́.

Сла́ва, глас 6:

Звезда́ светоза́рная,/ во гра́де Те́рновстем возсия́л еси́/ уче́ньми слове́с твои́х,/ всеблаже́нне Феодо́сие приснопа́мятне./ Яви́л бо ся еси́ му́дрый пропове́датель/ и благоче́стия побо́рник,/ царя́ и лю́ди утвержда́я Правосла́вием./ Те́мже восхваля́ем тя, глаго́люще:/ ра́дуйся, от утро́бы ма́терни Бо́гом избра́нный/ оте́честву твоему́ в наста́вника;/ ра́дуйся, я́ко меч обоюдуо́стрый,/ посеца́яй ерети́ческая злоче́стия;/ ра́дуйся, мери́ло изве́стное,/ всех наставля́ющее ко стези́ спасе́ния./ Христа́ Бо́га на́шего моля́ не преста́й/ спасти́ род наш.

И ны́не, Богоро́дичен, глас то́йже: Творе́ц и Изба́витель мой:

На благослове́нии хле́бов Тропа́рь преподо́бнаго два́жды и Богоро́дице Де́во: еди́ножды.

Тропа́рь преподо́бнаго, глас 3.

Подо́бен: Боже́ственныя ве́ры:

В блаже́ннем безмо́лвии пусты́ннем/ и на собо́рех, любо́вию к Бо́гу горя́,/ посрами́л еси́ лука́вых бесо́в и ерети́к злочести́вых./ На моли́тве же стоя́, огня́ све́тлостию просия́л еси́/ и преставле́нием твои́м А́нгелов пою́щих обвесели́л еси́,/ Феодо́сие, о́тче наш,/ се́го ра́ди мо́лим тя:/ моли́ся о душа́х на́ших.

На У́трени

На Бог Госпо́дь: тропа́рь преподо́бнаго два́жды. Сла́ва, и ны́не, Богоро́дичен: Тя, хода́тайствовавшую:

По 1-м стихосло́вии седа́лен, глас 8.

Подо́бен: Прему́дрость и Сло́во:

К прему́дрости сло́ва доброде́тель приложи́в, Феодо́сие,/ Боговеща́нным твои́м гла́сом обвесели́л еси́ лю́ди твоя́ разу́мно,/ Тро́ицы Единобо́жное пропове́дуя и злочести́выя е́реси низлага́я,/ концы́ держа́вы Бо́лгарския в ве́ре Правосла́вней утверди́л еси́./ Те́мже ны́не Христу́ предстоя́ с невеще́ственными ли́ки,/ проси́ душа́м спасти́ся/ любо́вию почита́ющих честну́ю па́мять твою́.

Сла́ва, и ны́не, Богоро́дичен, глас и подо́бен то́йже:

Благода́рственное похвале́ние до́лжне, я́коже вдова́ о́ная две ле́пте,/ приношу́ Тебе́, Влады́чице, о всех Твои́х дарова́ниих./ Ты бо еси́ покро́в мой ку́пно и по́мощь,/ напа́стей мя и скорбе́й при́сно изъима́ющи./ Те́мже, я́ко от среды́ пещи́ горя́щия, изба́вився оскорбля́ющих,/ от се́рдца взыва́ю:/ Богоро́дице, помози́,/ моля́щи Сы́на Твоего́, Христа́ Бо́га на́шего,/ прегреше́ний оставле́ние мне дарова́ти,/ Тя бо име́ю наде́жду, раб Твой.

По 2-м стихосло́вии седа́лен, глас 3.

Подо́бен: Красоте́ де́вства Твоего́:

Ересе́й лесть обличи́л еси́/ и Правосла́вную ве́ру уясни́л еси́,/ я́ко благоче́стия побо́рник Богоглаго́ливый/ пропове́дал еси́ Еди́наго в Тро́ице Бо́га,/ Естество́м Единосу́щнаго и Ли́цы Неслия́ннаго –/ Оте́ц, и Сло́во, и Дух Святы́й./ Те́мже тя по до́лгу воспева́юще,/ почита́ем честну́ю па́мять твою́.

Сла́ва, и ны́не, Богоро́дичен, глас и подо́бен то́йже:

Недомы́сленно и непостижи́мо есть, Влады́чице Богора́дованная,/ соде́ланное о Тебе́ стра́шное та́инство./ Необыме́ннаго бо заче́нши, родила́ еси́,/ пло́тию обложе́нна от пречи́стых крове́й Твои́х,/ Его́же при́сно я́ко Сы́на Твоего́ моли́/ спасти́ся душа́м на́шим.

По полиеле́и седа́лен, глас 8.

Подо́бен: Прему́дрость и Сло́во:

Нищету́ Рожде́ннаго от Де́вы восприи́м,/ вмени́л еси́ траву́ привре́менная, блаже́нне;/ разу́мнаго же дре́ва вкуси́в,/ мона́шествующих мно́жества яви́лся еси́ наста́вник,/ и́хже к ре́вности А́нгельскаго жи́тельства воздвиза́я/ и к ра́зуму ве́ры, знамено́сне236 Феодо́сие,/ моли́ Христа́ Бо́га прегреше́ний оставле́ние дарова́ти/ пра́зднующим любо́вию честну́ю па́мять твою́.

Сла́ва, и ны́не, Богоро́дичен, глас и подо́бен то́йже:

Я́ко Де́ву Тя и Еди́ну в жена́х,/ безсе́менно ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́лся в Тя Божества́/ и я́ко Младе́нца мле́ком пита́ла еси́ Зижди́теля всех и Го́спода./ Те́мже досто́йно Тя прославля́юще, согла́сно Тебе́ вопие́м:/ моли́ Христа́ Бо́га прегреше́ний оставле́ние дарова́ти/ покланя́ющимся ве́рою всесвято́му Рождеству́ Твоему́.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х./ Тем на Небесе́х обре́л еси́ мзду́ трудо́в твои́х./ Де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

Кано́н преподо́бнаго, глас 8, его́же краегране́сие: Богода́нному (Феодо́сию) воспева́ет Де́вий (Парфе́ний) похвалу́.

Песнь 1

Ирмо́с: Посе́ченный несеко́маго пресече́,/ и ви́де со́лнце зе́млю, ю́же пре́жде не ви́де./ Лю́таго врага́ вода́ потопи́,/ и непроходи́мое про́йде Изра́иль,/ песнь же воспева́ше:/ Го́сподеви пои́м, сла́вно бо просла́вися.

Припе́в: Преподо́бне о́тче Феодо́сие,/ моли́ Бо́га о нас.

Бо́жий А́гнче и Сло́ве,/ светозаре́нием Свята́го Твоего́ Ду́ха/ помраче́нному уму́ моему́ светоно́сную лучу́ ниспосли́/ и сло́во ми вдохни́ восхвали́ти, его́же избра́л и прия́л еси́,/ верх преподо́бных – Феодо́сия.

Озари́ благода́тию Боже́ственною раба́ твоего́/ и разуме́ния ду́шу мою́ испо́лни, Феодо́сие о́тче,/ во е́же восхвали́ти житие́ твое́,/ и́мже вся удиви́л еси́, подвиза́яся и Го́сподеви поя́:/ сла́вно бо просла́вися.

Гра́ду вели́ких доброде́телей твои́х,/ верху́ горы́ стоя́щему, преподо́бне, удиви́шася лю́дие,/ его́же светозаре́нием наказу́я,/ всех ко спасе́нию путеводи́л еси́, Го́сподеви поя́:/ сла́вно бо просла́вися.

Богоро́дичен: Отроча́ Мла́до роди́вши ми́ра всего́ на спасе́ние,/ Ада́ма дре́вняго старе́йшее и Роди́телю Предве́чному Сопресто́льное,/ глаго́лы Богогла́сных проро́ков о Тебе́ испо́лнила еси́, Богоро́дице,/ и нас истле́ния измени́ла еси́.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных/ и пое́т Тя дух мой.

Доброде́телей на го́ру восте́к и во мрак виде́ния вшед,/ позна́л еси́, ели́ко вмести́тельно Непостижи́маго естество́;/ просвеще́ния же испо́лнен быв,/ восприя́л еси́ бога́тно благода́ть Боже́ственную.

Алка́я добро́ты Еди́наго Бо́га/ и жа́ждая сла́вы Его́, блаже́нне,/ сла́ву земна́го пребыва́ния преходя́щую оста́вил еси́/ и я́ко уго́дник Влады́ки всех Христа́ просия́л еси́.

Непреста́нным жела́нием ду́ха пло́ти жела́ние увяди́л еси́/ и себе́, блаже́нне, обручи́л еси́ сожи́тельницу чистоту́,/ от нея́же ча́да тебе́ роди́шася – доброде́тели,/ ча́до тя соде́лавшия Невеще́ственнаго Све́та.

Богоро́дичен: Неизрече́нно Бо́гу из Твои́х ложе́сн проше́дшу,/ нас от тле́ния свободи́, Де́во Чи́стая,/ и зми́я мы́сленнаго умертви́, умертви́вшаго Ада́ма в рай иногда́/ и Е́ве прама́тери печа́ль соде́лавшаго.

Седа́лен, глас 4.

Подо́бен: Ско́ро предвари́:

Пре́лесть попали́л еси́ злосла́вных/ и ве́ру до́бре уясни́л еси́ правосла́вных, му́дре Феодо́сие,/ и оте́чество твое́ просвети́л еси́,/ отону́дуже победоно́сный победи́тель показа́лся еси́,/ столп Це́ркве и па́стырь и́стинный./ Не преста́й у́бо моля́ся Христу́ спасти́ся нам.

Сла́ва, и ны́не, Богоро́дичен:

Ско́ро приими́, Влады́чице, моле́ния на́ша/ и сия́ принеси́ Сы́ну Твоему́ и Бо́гу, Госпоже́ Всенепоро́чная./ Побори́ обстоя́ния злосла́вных,/ разори́ ко́зни языковре́дных/ и низложи́ де́рзость нечести́вых,/ вооружа́ющихся на рабы́ Твоя́, Пречи́стая.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

О́браз се́ни237 зако́на, Моисе́ом да́ннаго,/ зако́н благода́ти показа́л еси́ бы́ти, му́дре Феодо́сие,/ и Ева́нгелие – та́инство и́стиннаго Богоявле́ния, Христу́ взыва́я:/ сла́ва си́ле Твое́й, Го́споди.

Многотру́дныя по́двиги испо́лнив, блаже́нне,/ досто́йно сподо́бился еси́ безсме́ртия,/ иде́же, ра́дуяся, вене́ц побе́ды прия́л еси́, вопия́:/ сла́ва си́ле Твое́й, Го́споди.

Удали́вся в пусты́ню, Крести́теля житию́ поревнова́л еси́/ и, чи́сте та́мо пожи́в,/ благода́ти Христо́вы причаща́лся еси́,/ непреста́нно взыва́я:/ сла́ва си́ле Твое́й, Го́споди.

Богоро́дичен: Враго́в кре́пость низложи́, Ма́ти Бо́жия,/ оскорбля́ющих воспева́ющия Тя,/ я́ко ро́ждшая Го́спода сла́вы,/ и невреди́мо ста́до Твое́ соблюда́й от злых прираже́ний238 ,/ я́ко да по до́лгу Тя ублажа́ем.

Песнь 5

Ирмо́с: У́тренююще, вопие́м Ти,/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Отпадо́х ле́ностию, окая́нный, и к сме́рти усну́х,/ но, я́ко па́стырь до́брый, воздви́гни мя, о́тче,/ и стра́сти моя́ мучи́тельныя успи́,/ я́ко да чи́сте воспою́ твое́ светоно́сное преставле́ние.

Сохраня́й оте́чества твоего́ христолюби́вых люде́й/ моли́твами твои́ми, Богоно́се о́тче,/ избавля́я враго́в наше́ствия и па́губы вся́кия,/ я́ко да вси усе́рдно засту́пника тя ко Христу́ Бо́гу на́шему почита́ем.

Подража́тель яви́лся еси́ Илии́ ре́вностию,/ не зна́меньми стра́шными ужаса́я,/ но Боже́ственных слове́с уче́ньми наставля́я/ и к Правосла́вию христоимени́таго Изра́иля от пре́лести врага́ мно́гажды изводя́.

Богоро́дичен: Еди́ну Тя о́блак разу́мный имену́ем,/ из Тебе́ бо Христо́с возсия́,/ неискусому́жно вопло́щся, Всенепоро́чная,/ и простра́ннейшую Тя Небе́с показа́ за милосе́рдие неисповеди́мое.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

К вере́ Правосла́вней еди́но бы́ти,/ при́сным твои́м о́бщее промышле́ние творя́ се́рдцем и душе́ю, сла́вне Феодо́сие,/ ерети́ческих отрева́л еси́ заблужде́ний/ и разделе́ний бежа́ти всех учи́л еси́.

А́нгелов оби́телище и рай и́стинный соде́лав пусты́ню,/ в не́йже преизя́ществовал еси́ во вся́кой доброде́тели,/ по преставле́нии же рая́ сла́дости сподо́бился еси́.

Единоро́днаго Сы́на Бо́жия, сла́дость весе́лия,–/ Христа́ Бо́га на́шего,/ мироно́сиц сле́зы в ра́дость обрати́вшаго,/ непреста́нными то́ки слез твои́х иска́пал еси́.

Богоро́дичен: Тя иногда́ написа́ скрижа́ль Богообра́зне во проро́цех вели́кий Моисе́й,/ све́щник же све́та и жезл процве́тший, Всенепоро́чная,/ и ле́ствицу, е́юже вознесо́хомся от земли́ на Не́бо.

Конда́к, глас 8.

Подо́бен: Взбра́нной воево́де:

Пропове́дник велегла́сный Боже́ственных догма́т/ на собо́рех святы́х был еси́, о́тче му́дре,/ цари́ умудря́я и в ве́ре утвержда́я;/ благода́тию же Боже́ственною осиява́ем,/ загради́л еси́ уста́ злосла́вных, Феодо́сие./ Сего́ ра́ди вопие́м ти:/ ра́дуйся, Бо́лгарская похвало́/ и Правосла́вия све́тлое ра́дование.

И́кос:

По́стническое обуче́ние усе́рдно проше́д, преподо́бне Феодо́сие,/ и страсте́й прило́ги тече́нием слез твои́х вся притупи́в/ и благоче́стие на земли́ Бо́лгарстей но́во утверди́в,/ ле́ствица Боже́ственная, на Не́бо возводя́щая,/ всем показа́ся Богоприя́тное житие́ твое́,/ е́юже сам, возше́д в Го́рния оби́тели,/ и нам, уны́лым, путесотвори́л еси́ вход,/ моли́твами твои́ми выспрь239 всегда́ нас вперя́я./ Сего́ ра́ди вопие́м ти:/ ра́дуйся, Бо́лгарская похвало́/ и Правосла́вия све́тлое ра́дование.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ оте́ц на́ших Бо́же, благослове́н еси́.

Ди́вным воздержа́нием умертви́в плотски́я стра́сти,/ сосу́д чист и Боговсе́льный был еси́;/ те́мже соверша́ющия светоно́сную твою́ па́мять при́сно помина́й, пою́щия:/ оте́ц на́ших Бо́же, благослове́н еси́.

Е́же на нас вра́жияго ополче́ния избе́г,/ легко́ преше́л еси́ к Го́рним оби́телем,/ иде́же ны́не водворя́яся и по́честь сла́вы восприе́мля,/ со все́ми святы́ми воспева́еши:/ оте́ц на́ших Бо́же, благослове́н еси́.

Возлюби́л еси́ ху́дость ри́зную, преподо́бне,/ и отве́рглся еси́ мя́гких, сла́вящих те́ло,/ весть бо душа́ сообразова́ти вну́тренняя вне́шнему устрое́нию,/ смиря́ющися и зову́щи:/ оте́ц на́ших Бо́же, благослове́н еси́.

Богоро́дичен: И́мя превожделе́нное, Влады́чице,/ пресве́тлаго со́лнца о́блаче и две́ре небе́сная,/ всех христиа́н мольбу́ приими́,/ Тя ублажа́ющих и Сы́ну Твоему́ зову́щих:/ оте́ц на́ших Бо́же, благослове́н еси́.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к и содержа́й вся,–/ Тя пое́т со́лнце, Тя сла́вит луна́,/ Тебе́ прино́сит песнь вся тварь/ я́ко Соде́телю всех во ве́ки.

И́стинное целому́дрие стяжа́в попремно́гу/ и чистоту́ теле́сную, я́коже подоба́ет святы́м,/ смире́ние и сокруше́ние се́рдца вельми́ преумно́жил еси́/ и ско́рбных нанесе́ние, ра́дуяся, приима́л еси́, Бо́гу воспева́я:/ благослови́те, вся дела́ Госпо́дня, Го́спода.

Пожи́л еси́ на земли́, я́ко беспло́тен;/ челове́к у́бо быв естество́м,/ яви́лся еси́ сограждани́н А́нгелом, о́тче му́дре,/ с ни́миже ны́не пое́ши, зовы́й:/ благослови́те, вся дела́ Госпо́дня, Го́спода.

Обличи́л еси́ ху́льных евре́й/ и свире́пеющия на ста́до Бо́жие во́лки ерети́ческия,/ па́лицею же моли́тв твои́х и уче́ний дале́че от Це́ркве Бо́лгарския отгна́л еси́,/ и́же доны́не ку́пно с тобо́ю воспева́ет, зову́щи:/ благослови́те, вся дела́ Го́сподня, Го́спода.

Богоро́дичен: Храм Твой святы́й щито́м ве́ры сохрани́, Богоро́дице Де́во,/ и в нем славосло́вящия Тя ку́пно сла́вы Твоея́ сподо́би,/ нахожде́ния ва́рварскаго избавля́ющи/ и ума́ на́шего во́лны свире́пыя укроща́ющи моли́твою Твое́ю, Всепе́тая.

Песнь 9

Ирмо́с: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́;/ в ни́хже посети́ нас Восто́к с высоты́/ и напра́вил ны есть на путь ми́ра.

Во Еди́но Естество́ Тро́ицы ве́ровав правосла́вно,/ су́етная поуча́ющих обличи́л еси́ дерзнове́нно/ и Боже́ственными наказа́нии твои́ми ве́рных, му́дре увеща́в, укрепи́л еси́,/ А́нгелов сослужи́телю, преподо́бне о́тче,/ па́мять твою́ пра́зднующих в ми́ре соблюди́.

А́ще у́бо и слеза́ми го́рькими/ ни́ву се́рдца твоего́ напои́ти до́лженствовал еси́, о́тче Богоно́се,/ но ны́не в ра́дости рукоя́тия240 собира́еши, подвиго́в твои́х по́чести;/ те́мже тя вси ублажа́ем.

Лука́вых духо́в кова́рства спасе́ся душа́ твоя́ свята́я, блаже́нне,/ и, де́монов стреля́ния избежа́вши, насле́дия Небе́снаго сподо́бися;/ помина́й у́бо пою́щия тя.

Богоро́дичен: Услы́ши моли́тву убо́гих нас, Богома́ти,/ всех тва́рей Творца́ поро́ждшая/ и всю тварь Боже́ственною сла́вою превозше́дшая,/ и изба́ви нас от вра́жиих всех нападе́ний, Тя велича́ющия.

Свети́лен глас 3.

Подо́бен: Посети́л ны есть:

И́ноков учи́телю и правосла́вных утвержде́ние,/ де́монов победи́телю и злочести́вых обличе́ние,/ Феодо́сие, о́тче наш,/ моли́твами твои́ми сро́дных твои́х при́сно огражда́й.

Сла́ва, и ны́не, Богоро́дичен:

Я́ко иму́щи ве́лие милосе́рдие,/ при́зри, Всепе́тая Богоро́дице, на мое́ немощно́е смире́ние/ и страсте́й молву́ разори́, Отрокови́це,/ и огня́ гее́нскаго изба́ви мя всеси́льными Твои́ми моли́твами.

На хвали́тех стихи́ры, глас 5.

Подо́бен: Преподо́бне о́тче:

Преподо́бне о́тче Феодо́сие,/ еще́ в ю́ности уязви́вся жа́лом любве́ Бо́жия,/ уподо́бился еси́ купцу́, и́щущему драга́го би́сера,/ и пчеле́ трудолю́бней,/ обходя́щей па́житей мно́жества/ пресла́дкаго ра́ди ме́да благоче́стия./ И Бо́гу, тя водя́щу,/ обре́л еси́ Григо́рия,/ вели́каго свети́льника и́ноческаго любому́дрия,/ и напо́лнил еси́ сосу́д души́ твоея́/ сла́дости неизглаго́ланныя/ безмо́лвия и Богозре́ния,/ Христа́ прии́м в се́рдце твое́ Единовсе́льника,/ Того́ моли́, Тому́ помоли́ся, преподо́бне,/ дарова́ти душа́м на́шим мир и ве́лию ми́лость.

Преподо́бне о́тче Феодо́сие,/ повнегда́ согре́лся еси́ огне́м Ду́ха Свята́го,/ я́коже ко́кош птенцы́ своя́ под криле́,/ собра́л еси́ духо́вных чад мно́жество/ на горе́ Кефала́рстей,/ и наказа́ньми Богодухнове́нными/ очи́стил еси́ ду́ши их от неприя́зни лука́ваго,/ и А́нгелом сожи́телей соде́лал еси́ я:/ Рома́на у́бо блаже́ннаго,/ и Евфи́мия многостра́дальнаго,/ и Диони́сия Богопросвеще́ннаго,/ и про́чих всех в рай сла́дости ввел еси́ Христа́ Бо́га на́шего./ Того́ моли́, Тому́ помо́лися, преподо́бне,/ дарова́ти душа́м на́шим мир и ве́лию ми́лость.

Преподо́бне о́тче Феодо́сие,/ по гора́м пусты́нным псало́мски превита́я/ и Бо́га всеусе́рдно любя́ па́че всех,/ но и херуви́мски всю́ду проника́я мно́гими очесы́,/ не небре́гл еси́ столпа́ и́стины и утвержде́ния –/ Це́ркве Бо́жия,/ е́реси бо открыва́я/ и на собо́рех дерзнове́нно облича́я,/ Правосла́вие чи́сто соблю́л еси́/ и в нем незы́блемо люде́й твои́х утверди́л еси́/ на основа́нии Еди́наго Христа́ Бо́га на́шего./ Того́ моли́, Тому́ помоли́ся, преподо́бне,/ дарова́ти душа́м на́шим мир и ве́лию ми́лость.

Преподо́бне о́тче Феодо́сие,/ тече́ние соверши́вшу ти земно́е/ и ве́ру Правосла́вну соблю́дшу,/ и венце́м угото́ванным тебе́, бы́вшим в Ца́рствии Небе́снем,/ попусти́ Госпо́дь до конца́ истле́ти пло́ти твое́й неду́гом,/ во е́же ду́ху твоему́ па́че обнови́тися./ Любо́вию же дру́га подвиза́емь/ и ми́ра свята́го жела́нием,/ отше́л еси́ в чужду́ю,/ я́ко да отту́ду во оте́чество Го́рнее возлети́ши/ и, А́нгелом пою́щим,/ ду́шу твою́ преда́си в ру́це Христа́ Бо́га на́шего./ Того́ моли́, Тому́ помоли́ся, преподо́бне,/ дарова́ти душа́м на́шим мир и ве́лию ми́лость.

Сла́ва, глас 6:

Вели́кий дре́вле Анто́ний,/ бе́гая ми́ра суеты́/ и в пусты́ню всели́вся,/ мона́шествующим бысть оте́ц/ и первоо́браз безмо́лвия,/ но изы́де па́ки в мир,/ на враги́ Це́ркве ополча́яся,/ мучи́телей е́ллинов и А́рия злочести́ваго./ Отцу́ сын после́дуя, Феодо́сий блаже́нный,/ а́ще и в пусты́ни безмо́лвствуя,/ но оба́че ре́вностию соблюде́/ Неве́сты Жениха́ Небе́снаго бе́лую чистоту́,/ Це́ркве Христа́ Бо́га на́шего/ свято́е Правосла́вие./ Те́мже и сугу́быя венцы́ при́ят/ от десни́цы Вы́шняго/ преподо́бия же и учи́тельства,/ моля́ся непреста́нно о душа́х на́ших.

И ны́не, Богоро́дичен: Богоро́дице, Ты еси́ лоза́ и́стинная:

Славосло́вие вели́кое и отпу́ст.

На Литурги́и

Блаже́нны от кано́на преподо́бнаго, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми? Апо́стол к Гала́том, зача́ло 213. Аллилу́ия, глас 8: Блаже́н муж, боя́йся Го́спода,/ в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 10. Прича́стен: В па́мять ве́чную бу́дет пра́ведник:

В то́йже день Преподобному́ченика Крони́да, архимандри́та Ра́донежскаго

Тропа́рь, глас 1:

Преподо́бному Се́ргию от ю́ности после́дуя,/ о́тче богому́дре Крони́де,/ ве́ру во Святу́ю Тро́ицу стяжа́л еси́/ и да́же в ста́рости масти́те до кро́ве сохрани́л еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти си́лу терпе́ния,/ сла́ва Увенча́вшему тя я́ко му́ченика,/ сла́ва Спаса́ющему тобо́ю ду́ши на́ша.

Конда́к, глас 2:

Я́ко ве́рный учени́к преподо́бнаго Се́ргия,/ послуша́нием, смире́нием и моли́твою/ ду́шу твою́ очи́стил еси́, Крони́де приснопа́мятне,/ и Бо́жиим промышле́нием во игу́мена оби́тели Тро́ицкия/ досто́йно поста́влен был еси́./ Во дни же гоне́ния лю́таго/ за Христа́ и вве́ренную ти бра́тию/ я́ко му́ченик пострада́л еси́./ Сего́ ра́ди ны́не, предстоя́ Святе́й Тро́ице,/ моли́, е́же Ла́вре Се́ргиевой утвержде́нней бы́ти/ и спасти́ся душа́м на́шим.

Преподобномученик Кронид, архимандрит Радонежский, в миру – Константин Петрович Любимов, родился 13 мая 1859 года в селе Левкиеве Волоколамского уезда Московской губернии в благочестивой семье пономаря Петра Любимова и его супруги Анны. Константин Любимов некоторое время обучался в Волоколамском духовном училище, но курса не окончил и в 1878 году поступил трудником в Свято-Троицкую Сергиеву Лавру.

В 1880 году Константина Петровича Любимова призвали к исполнению воинской службы, но он был чудесным образом освобожден от воинской повинности по молитвам преподобного Сергия Радонежского, который явился ему в ночном видении накануне призыва. В том же году Константин был принят в число лаврских послушников и назначен келейником наместника Свято-Троицкой Сергиевой Лавры архимандрита Леонида (Кавелина). В 1888 году в Гефсиманском скиту Лавры послушник Константин был пострижен в монашество с наречением имени Кронид. Через год монах Кронид был рукоположен в иеродиакона, а еще через три года – в иеромонаха. Отец Кронид исполнял послушание смотрителя епархиального училища иконописания, находящегося при Лавре, а затем – эконома Санкт-Петербургского Троицкого подворья.

В 1915 году архимандрит Кронид был назначен наместником Свято-Троицкой Сергиевой Лавры.

В 1917―1918 годах отец Кронид участвовал в работе Поместного Собора Русской Православной Церкви.

В 1919 году недовольство властей вызвала проникновенная речь наместника Лавры о недопустимости вскрытия мощей преподобного Сергия. Но, несмотря на протест всего верующего народа, вскрытие мощей было произведено.

После закрытия Лавры в 1919 году архимандрит Кронид жил сначала в Гефсиманском скиту, а затем в Параклитском. В 1929 году он поселился в Сергиевом Посаде у Кукуевского кладбища, где любил петь в храме на клиросе.

В 1937 году архимандрита Кронида арестовали и заключили в Таганскую тюрьму. В это время старец был уже слепым. На допросе он не отрицал, что, будучи наместником Лавры, пользовался покровительством Дома Романовых и принимал в монастыре Императора Николая II, Великую Княгиню Елизавету Феодоровну, вдовствующую Императрицу-мать Марию Феодоровну и придворных сановников. Отец Кронид опроверг обвинение в государственном заговоре и на вопрос об отношении к советской власти ответил: «Я по своим убеждениям являюсь монархистом, последователем Православной Церкви и существующую советскую власть признаю как верующий: она послана народу как испытание его веры в Промысел Божий». Назвать тех, кто посещал его квартиру в Сергиевом Посаде, отец Кронид отказался, просто объяснив: «Быстро забываю имена и фамилии».

27 ноября, в праздник иконы Божией Матери «Знамение», отец Кронид был расстрелян и похоронен в общей могиле в поселке Бутово под Москвой. Сейчас на этом месте построен храм в честь новомучеников и исповедников Российских.

Прославлен архимандрит Кронид в 2000 году на Юбилейном Архиерейском Соборе Русской Православной Церкви. Память его празднуется 27 ноября, а также 6 июля – в Соборе Радонежских святых, и в воскресенье 25 января или ближайшее после 25 января – в Соборе новомучеников и исповедников Российских.

* * *

226

стра́нную – удивительную, чудную, непостижимую

227

уставля́ющи – прекращающи, избавляющи

228

кустоди́и – стража

229

мечта́ния – призраки

230

уде́с – членов

231

орга́н – музыкальный инструмент, игрой на котором сопровождалось Богослужение в Ветхом Завете

232

хвра́стная, хвра́стие – хворост, кустарник

233

пле́велы – опьяняющий куколь, род ржаной травы с ядовитыми семенами, которая до созревания колосьев внешне похожа на пшеницу. Вызывает заболевание кишечника, часто приводящее к смерти

234

в ложесна́х – в утробе

235

го́рнему – высшему, верхнему, небесному

236

знамено́сне – производящий знамения, чудеса

237

се́ни – тени; мрака

238

прираже́ний – столкновений

239

выспрь – вверх

240

рукоя́тия – охапки, снопы


Комментарии для сайта Cackle