Минея общая новомученикам и исповедникам Российским

Служба поется в неделю 25 января или в неделю, ближайшую к 25 января.

НА МА́ЛЕЙ ВЕЧЕ́РНИ

На Го́споди, воззва́х: стихи́ры воскре́сны гла́са.

Сла́ва, новому́чеников, глас 1:

О вели́цыи страстоте́рпцы,/ новому́ченицы Росси́йстии,/ с любо́вию припа́даем к вам/ и, благогове́йно лобыза́юще ра́ны ва́ша,/ прославля́ем ва́ша по́двиги и мо́лимся:// моли́те о душа́х на́ших.

И ны́не, Богоро́дичен гла́са.

На стихо́вне стихи́ры новому́чеников, глас 6.

Подо́бен: Тридне́вен:

Помяни́, Го́споди, и́же о Тебе́ пострада́вшия,/ но́выя страстоте́рпцы,/ от родо́в на́ших прозя́бшия/ и му́ки многоразли́чныя претерпе́вшия,/ и приими́ их моле́ния// о спасе́нии на́шем.

Стих: Мне же зело́ че́стни бы́ша// дру́зи Твои́, Бо́же.

Дарова́л еси́, Судие́ пра́ведный,/ испове́дником Це́ркве Росси́йския/ Ца́рство Небе́сное/ и блаже́нство ве́чное./ Приими́ ны́не, Го́споди, моле́ние их// о спасе́нии душ на́ших.

Стих: Изочту́ их// и па́че песка́ умно́жатся.

Я́ко зве́зды пресве́тлыя,/ сия́ют на Небеси́ новому́ченицы Росси́йстии,/ кровь же их свята́я удобри́ зе́млю Ру́сскую/ во освяще́ние и благослове́ние./ Тех моли́твами, Христе́ Бо́же,// поми́луй и спаси́ ду́ши на́ша.

Сла́ва, глас и подо́бен то́йже:

О Тро́ице Пресвята́я,/ род наш от грехо́внаго плене́ния изба́ви/ и на путь пра́вый наста́ви/ предста́тельством новому́ченик Росси́йских,/ и́же мо́лят Тя, Триипоста́сный Бо́же,// о спасе́нии душ на́ших.

И ны́не, Богоро́дичен, глас то́йже:

О Благода́тная и Пречи́стая Де́во Мари́е,/ Хода́таице и Засту́пнице всех ве́рных,/ предста́тельством новому́чеников и испове́дников Росси́йских/ расточе́нныя собери́, малоду́шныя возста́ви,/ отпа́дшия же от святы́я ве́ры обрати́// и в церко́вное ло́но возврати́.

Тропа́рь воскре́сен.

Сла́ва, новому́чеников, пи́сан на вели́цей вече́рни.

И ны́не, Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н.

На Го́споди, воззва́х: стихи́ры воскре́сны гла́са три,

и анато́лиева 1, и новому́чеников 6.

Стихи́ры новому́чеников, глас 5.

Подо́бен: Ра́дуйся:

Ра́дуйтеся, новому́ченицы и испове́дницы Росси́йстии,/ правосла́вных удобре́ние,/ новозакла́ннии а́гнцы,/ ве́ры побо́рницы и храни́телие,/ хода́таи о нас к Бо́гу непосты́днии,/ в ле́та после́дняя/ страда́ньми подража́телие пе́рвым му́чеником яви́стеся,/ терпе́ния столпи́ непоколеби́мии,// душа́м на́шим испроси́те ве́лию ми́лость.

Ра́дуйтеся, страстоте́рпцы сла́внии,/ стопа́м после́дующе дре́вних му́ченик,/ ве́ры ра́ди подвиза́стеся тве́рдо/ в лю́тая времена́ земли́ на́шея/ и ны́не всех подвиза́ете к сла́ве и хвале́нию Бо́га,/ укре́пльшаго ва́ше немощно́е естество́/ и обогати́вшаго вас дарова́ньми Ду́ха,// во спасе́ние душ на́ших.

Творе́ние святи́теля Афана́сия Ковро́вскаго.

Глас и подо́бен то́йже:

Прииди́те, Небе́снии предста́телие на́ши, к нам,/ ва́шего ча́ющим ми́лостивнаго посеще́ния,/ и изба́вите озло́бленныя мучи́тельскими преще́нии/ лю́таго неи́стовства неве́рных,/ от ни́хже, я́ко пле́нницы и на́зи, гони́ми есмы́,/ от ме́ста на ме́сто ча́сто преходя́ще/ и заблужда́юще в верте́пех и гора́х./ Уще́дрите у́бо, прехва́льнии,/ и да́руйте нам осла́бу,/ утоли́те бу́рю/ и угаси́те е́же на ны негодова́ние,/ Бо́га моля́ще,// подаю́щаго ва́ми земли́ на́шей ве́лию ми́лость.

И́ны стихи́ры новому́чеников, глас 6.

Подо́бен: Все отло́жше:

Святи́телю о́тче Ти́хоне,/ архипа́стырю многострада́льне,/ ты в годи́ну лю́тых безбо́жных гоне́ний/ ве́рная ча́да Це́ркве Росси́йския,/ утеша́я, призыва́л еси́/ за Христа́ и ве́ру Правосла́вную му́жественне стоя́ти,/ сам же, по вся дни умира́я за па́ству твою́,/ испове́дник непоколеби́мый яви́лся еси́.// Сего́ ра́ди тя с любо́вию прославля́ем.

Па́стырю и́стинный,/ священному́чениче Влади́мире,/ егда́ беззако́ннии понужда́ху тя/ Це́ркве Росси́йския отступи́ти,/ ве́рен де́лом и сло́вом/ святи́телю Ти́хону пребы́л еси́/ и я́ко свяще́нная же́ртва от Ки́ева, ма́тере градо́в ру́сских,/ Бо́гу прине́слся еси́,/ моля́ся о убива́ющих тя.// Сего́ ра́ди тя усе́рдно прославля́ем.

Священному́чениче Вениами́не,/ Це́ркве Христо́вы и́стинный сы́не/ и благостоя́ния ея́ усе́рдный ревни́телю,/ проти́ву лжепа́стырей, тща́щихся расхи́тити ста́до твое́,/ му́жественне стал еси́/ и, не убоя́вся преще́ний и лжесвиде́тельств мучи́телей,/ обрати́л еси́ суд на главу́ суди́вших тя,/ та́же сме́ртию твое́ю/ Правосла́вие утверди́л еси́.// Сего́ ра́ди тя усе́рдно ублажа́ем.

Сла́ва, новому́чеников, глас 5:

Всевы́шний Влады́ко,/ в Тро́ице сла́вимый и покланя́емый,/ уще́дри ны благоприя́тными мольба́ми/ но́вых му́ченик Твои́х,/ пред мучи́тели дерзнове́нно испове́давших Тя/ Еди́наго и́стиннаго Бо́га/ и Твое́, Сы́не Бо́жий,/ неизрече́нное от Ма́тере Де́вы// спаси́тельное воплоще́ние.

И ны́не, Богоро́дичен.

Вход. Проки́мен дне. И чте́ния новому́чеников.

Дея́ний святы́х апо́стол чте́ние (глава́ 4):

В ты́я дни собра́шася во Иерусали́м кня́зи, ста́рцы, кни́жницы/ и ели́цы бе́ша от ро́да архиере́йска./ И, поста́вльше Петра́ и Иоа́нна посреде́, вопроша́ху:/ ко́ею си́лою, или́ ко́им и́менем исцели́ста хрома́го?/ Петр, испо́лнився Ду́ха Свя́та, рече́:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния./ Несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам./ Ви́дяще же Петро́во дерзнове́ние и Иоа́нново, и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста./ Ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся друг со дру́гом, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма, ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́дь не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га, суди́те? Не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем./ Лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния./ Отпуще́на же бы́вша, приидо́ста к свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре, и вся, я́же в них,/ И́же Ду́хом Святы́м усты́ отца́ на́шего Дави́да, о́трока Твоего́, рекл еси́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.

К Тимофе́ю посла́ния

свята́го апо́стола Па́вла чте́ние (глава́ 4):

Ча́до Тимофе́е,/ засвиде́тельствую у́бо аз пред Бо́гом и Го́сподем на́шим Иису́с Христо́м,/ хотя́щим суди́ти живы́м и ме́ртвым в явле́нии Его́ и ца́рствии Его́:/ пропове́дуй сло́во,/ насто́й благовре́менне и безвре́менне,/ обличи́, запрети́, умоли́ со вся́ким долготерпе́нием и уче́нием./ Бу́дет бо вре́мя, егда́ здра́ваго уче́ния не послу́шают,/ но по свои́х по́хотех изберу́т себе́ учи́тели, че́шеми слу́хом,/ и от и́стины слух отвратя́т, и к ба́снем уклоня́тся./ Ты же трезви́ся о всем, злопостражди́,/ де́ло сотвори́ благове́стника,/ служе́ние твое́ изве́стно сотвори́./ Аз бо уже́ жрен быва́ю,/ и вре́мя моего́ отше́ствия наста́./ По́двигом до́брым подвиза́хся,/ тече́ние сконча́х, ве́ру соблюдо́х./ Про́чее у́бо соблюда́ется мне вене́ц пра́вды,/ его́же возда́ст ми Госпо́дь в день он, пра́ведный Судия́,/ не то́кмо же мне, но и всем возлю́бльшим явле́ние Его́.

К Евре́ем посла́ния

свята́го апо́стола Па́вла чте́ние (глава́ 11):

Бра́тие,/ и́же ве́рою победи́ша ца́рствия,/ соде́яша пра́вду, получи́ша обетова́ния,/ загради́ша уста́ льво́в,/ угаси́ша си́лу о́гненную,/ избего́ша о́стрея меча́,/ возмого́ша от не́мощи,/ бы́ша кре́пцы во бране́х,/ обрати́ша в бе́гство полки́ чужди́х./ Прия́ша жены́ от воскресе́ния ме́ртвых свои́х./ Ини́и же избие́ни бы́ша, не прие́мше избавле́ния,/ да лу́чшее воскресе́ние улуча́т./ Друзи́и же руга́нием и ра́нами искуше́ние прия́ша,/ еще́ же и у́з и темни́ц./ Ка́мением побие́ни бы́ша,/ претре́ни бы́ша, искуше́ни бы́ша,/ уби́йством меча́ умро́ша,/ проидо́ша в ми́лотех и в ко́зиях ко́жах,/ лише́ни, скорбя́ще, озло́блени./ И́хже не бе досто́ин весь мир,/ в пусты́нях скита́ющеся, и в гора́х, и в верте́пах, и в про́пастех земны́х./ И си́и вси, послу́шествовани бы́вше ве́рою, не прия́ша обетова́ния,/ Бо́гу лу́чшее что о нас предзре́вшу,/ да не без нас соверше́нство прии́мут.

На лити́и стихи́ра хра́ма.

И новому́чеников, глас 6.

Творе́ние святи́теля Афана́сия Ковро́вскаго.

Подо́бен: Отча́янная:

Отча́янни есмы́/ жития́ ра́ди/ и не и́мамы нра́ва доброде́тельна,/ я́ко ми́ро, прино́сим Ти, Го́споди,/ моли́твы святы́х сро́дников на́ших./ Не отве́ржи Русь, издре́вле Святу́ю,/ ны́не же грехо́в на́ших ра́ди лю́те стра́ждущую./ Не пре́зри сле́зы ве́рных сыно́в,/ коле́н свои́х пред Ваа́лом не преклоня́вших,/ и и́хже не порази́л еси́, согреша́ющих./ Приими́ нас, ка́ющихся, Бо́же,// святы́х Твои́х мольба́ми.

Сла́ва, глас 8:

Прииди́те, мучениколю́бцы,/ прииди́те, соста́вим лик,/ торжеству́юще и Бо́га прославля́юще/ в ра́достный пра́здник новому́чеников и испове́дников Росси́йских,/ си́и бо не уклони́шася ско́рби,/ ни убоя́шася темни́цы,/ го́рькими рабо́тами, гла́дом и хла́дом изморе́ни/ и многови́дными му́ками умерщвля́еми,/ я́ко а́гнцы незло́бивии, смерть прия́ша./ И ны́не в ра́дости святы́х// мо́лят Триеди́наго Бо́га о земне́м оте́честве свое́м.

И ны́не, глас то́йже:

Влады́чице, приими́ моли́твы раб Твои́х/ и изба́ви нас// от вся́кия ну́жды и печа́ли.

На стихо́вне стихи́ры воскре́сны гла́са. Сла́ва, новому́чеников, глас 2: Но́вый до́ме: И ны́не, Богоро́дичен, глас 8: О, пресла́внаго чудесе́:

Стихи́ры новому́чеников, глас 2.

Творе́ние святи́теля Афана́сия Ковро́вскаго.

Подо́бен: До́ме Евфра́фов:

Земле́ Ру́сская,/ гра́де святы́й,/ украша́й твой дом,/ в не́мже Боже́ственный// ве́лий сонм святы́х просла́ви.

Стих: Го́споди, Госпо́дь наш,// я́ко чу́дно и́мя Твое́ по всей земли́.

Це́рковь Ру́сская,/ красу́йся и лику́й,/ се бо ча́да твоя́/ Престо́лу Влады́чню// во сла́ве предстоя́т, ра́дующеся.

Стих: Святы́м, и́же суть на земли́ Его́,// удиви́ Госпо́дь вся хоте́ния Своя́ в них.

Собо́ре святы́х ру́сских,/ по́лче Боже́ственный,/ моли́теся ко Го́споду/ о земно́м оте́честве ва́шем// и о почита́ющих вас любо́вию.

Слава́, глас и подо́бен то́йже:

Но́вый до́ме Евфра́фов,/ уде́ле избра́нный,/ Русь Свята́я,/ храни́ ве́ру Правосла́вную,// в не́йже тебе́ утвержде́ние.

И ны́не, Богоро́дичен, глас 8.

Подо́бен: О, пресла́внаго чудесе́:

О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О Влады́чице Держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.

На благослове́нии хле́бов

Богоро́дице Де́во: два́жды

и тропа́рь новому́чеников еди́ножды.

Тропа́рь новому́чеников, глас 4:

Днесь ра́достно лику́ет Це́рковь Ру́сская,/ прославля́ющи новому́ченики и испове́дники своя́:/ святи́тели и иере́и,/ ца́рственныя страстоте́рпцы,/ благове́рныя кня́зи и княги́ни,/ преподо́бныя му́жи и жены́/ и вся правосла́вныя христиа́ны,/ во дни гоне́ния безбо́жнаго/ жизнь свою́ за ве́ру во Христа́ положи́вшия/ и кровьми́ и́стину соблю́дшия./ Тех предста́тельством, долготерпели́ве Го́споди,/ страну́ на́шу в Правосла́вии сохрани́// до сконча́ния ве́ка.

НА У́ТРЕНИ

На Бог Госпо́дь: тропа́рь воскре́сен, два́жды. Сла́ва, новому́чеников. И ны́не, Богоро́дичен.

По 1-м и 2-м стихосло́вии седа́льны воскре́сны с Богоро́дичны их. По полиеле́и два седа́льна новому́чеников, глас 4 (пи́саны по 1-м и 2-м стихосло́вии). Сла́ва, полиеле́йный седа́лен новому́чеников, глас 6. И ны́не, Богоро́дичен, глас 8.

По 1-м стихосло́вии седа́лен, глас 4:

Новому́ченицы Росси́йстии,/ кро́вию свое́ю ве́ру запечатле́вшии,/ Влады́ку всех моли́те/ Це́рковь Ру́сскую в Правосла́вии утверди́ти,/ зе́млю на́шу от скверн очи́стити,/ лю́ди во благоче́стии сохрани́ти/ во о́бщее всех спасе́ние.

Сла́ва, И ны́не, Богоро́дичен, глас то́йже:

В кров Твой, Пречи́стая Де́во, прибега́ющих, мольбу́ прие́млеши от нас,/ не преста́й моля́щи Человеколю́бца,/ спасти́ рабы́ Твоя́.

По 2-м стихосло́вии седа́лен, глас 4:

И́же в земли́ Росси́йстей новому́ченик и испове́дник Твои́х,/ я́ко багряни́цею и ви́ссом,/ кровьми́ Це́рковь Ру́сская украси́вшися, Христе́ Бо́же, те́ми вопие́т Ти:/ лю́дем щедро́ты Твоя́ низпосли́,/ мир жи́тельству Твоему́ да́руй/ и душа́м на́шим ве́лию ми́лость.

Сла́ва, И ны́не, Богоро́дичен, глас то́йже:

И́же благода́рно воспева́ющии от се́рдца, и прося́щии приле́жно Твоя́ ми́лости, Богоро́дице Влады́чице,/ раби́ Твои́ зову́т и глаго́лют:/ Пресвята́я Де́во, предвари́ и изба́ви от враг ви́димых и неви́димых, и вся́каго преще́ния:/ Ты бо еси́ на́ше заступле́ние.

Велича́ние:

Велича́ем вас,/ святи́и новому́ченицы и испове́дницы Росси́йстии,/ и чтим честна́я страда́ния ва́ша,/ я́же за Христа́// претерпе́ли есте́.

Псало́м избра́нный: Бог нам прибе́жище и си́ла:

По полиеле́и седа́лен, глас 6.

Творе́ние святи́теля Афана́сия Ковро́вскаго:

Мужа́йся, Христо́ва Це́рковь,/ и держа́вствуй над всу́е борю́щими,/ Христо́ви бо дру́зи о тебе́ пеку́тся,/ и предстоя́ще, и обстоя́ще,/ и́хже о́бщий пра́здник/ ны́не соверша́еши све́тло.

Сла́ва, и ны́не, Богоро́дичен, глас 8:

Я́ко Де́ву и еди́ну в жена́х Тя без се́мени ро́ждшую Бо́га пло́тию,/ вси ублажа́ем, ро́ди челове́честии:/ огнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пречи́стое Рождество́ Твое́, и согла́сно вопие́м Ти:/ моли́ Христа́ Бо́га, согреше́ний оставле́ние дарова́ти,/ покланя́ющимся ве́рою пресвято́му Рождеству́ Твоему́.

А́ще храм новому́чеников, проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́.

Ева́нгелие от Матфе́я, зача́ло 36.

По 50-м псалме́ стихи́ра, глас 6:

Це́ркве Ру́сския столпи́ непоколеби́мии,/ собо́ре новому́чеников и испове́дников Росси́йских,/ се́рдцем ве́рующе в пра́вду,/ усты́ Го́спода Иису́са Христа́ испове́дали есте́ во спасе́ние/ и заточе́ния, изгна́ния, го́рькия рабо́ты и смерть/ Бо́га ра́ди сла́дце претерпе́ли есте́./ Те́мже те́пле моли́теся ко Го́споду,/ Русь Святу́ю в Правосла́вии утверди́ти// и спасти́ ду́ши на́ша.

Кано́н воскре́сен, со ирмосо́м на 4,

Богоро́дицы на 2 и новому́чеников на 8.

Кано́н новому́чеников, глас 6.

Песнь 1

Ирмо́с: Се́ченое сече́тся/ мо́ре Чермно́е,/ волнопита́емая же изсуша́ется глубина́,/ та́яжде ку́пно безору́жным бы́вши проходи́ма/ и всеору́жным гроб./ Песнь же богокра́сная воспева́шеся:// сла́вно просла́вися Христо́с Бог наш.

Припе́в: Святи́и новому́ченицы и испове́дницы Росси́йстии,/ моли́те Бо́га о нас.

Го́споди, Бо́же наш, при́сно прославля́яй вся святы́я,/ ны́не и нас, недосто́йных, сподо́би сыно́вне просла́вити святы́х сро́дников на́ших,/ новому́чеников и испове́дников Росси́йских.

Кровьми́ ва́шими, священному́ченицы, я́ко в Чермне́м мо́ри, потопи́ли есте́ безбо́жныя мучи́тели,/ Це́рковь же Ру́сская, ва́ми крася́щися,/ похвалы́ побе́дныя, я́ко земля́ обетова́нная мед и млеко́, вам источа́ет.

Егда́ даде́ся вам благода́ть не то́чию во Христа́ ве́ровати,/ но и по Нем страда́ти,/ немо́кренно пучи́ну кро́вных мук проидо́сте, святи́и му́ченицы,/ ве́рным сыново́м росси́йским о́браз я́вльше,/ и со дерзнове́нным испове́данием во врата́ Небе́сная внидо́сте.

Богоро́дичен: Приими́ песнь хвале́бную, от недосто́йных уст возноси́мую,/ препросла́вленная Ма́ти Бо́жия.

Песнь 3

Ирмо́с: Госпо́дь Сый всех и Зижди́тель Бог,/ созда́нное, Безстра́стный, обнища́в, Себе́ соедини́,/ и Па́сха, за я́же хотя́ше умре́ти,/ Сам, Сый, Себе́ предпожре́:/ яди́те, вопия́, Те́ло Мое́// и ве́рою утверди́теся.

Егда́ бу́ря нече́стия на Це́рковь Ру́сскую воздви́жеся,/ вы, святи́и новому́ченицы, страда́ньми ва́шими со тща́нием укроти́сте ю/ и по́двиги ва́шими Правосла́вие утверди́сте.

Му́ки ве́лия за Це́рковь Христо́ву претерпе́сте, святи́и новому́ченицы,/ моли́те утверди́тися ей незы́блемей и непоколеби́мей до сконча́ния ве́ка.

Страда́ньми и испове́данием Христа́, святи́и сро́дницы на́ши,/ вше́дше в Небе́сная селе́ния, я́ко дре́вле Изра́иль в зе́млю обетова́нную,/ оте́чество ва́ше земно́е, Русь Святу́ю, в любви́ сохраня́йте моли́твами ва́шими.

Богоро́дичен: Небе́сных круго́в вы́шшая/ и сла́вою Боже́ственною преукраше́нная, Де́во Ма́ти Бо́жия,/ спаси́ ду́ши на́ша.

Конда́к новому́чеников, глас 3.

Подо́бен: Де́ва днесь:

Днесь новому́ченицы Росси́йстии/ в ри́зах бе́лых предстоя́т А́гнцу Бо́жию/ и со А́нгелы песнь побе́дную воспева́ют Бо́гу:/ благослове́ние, и сла́ва, и прему́дрость,/ и хвала́, и честь,/ и си́ла, и кре́пость/ на́шему Бо́гу/ во ве́ки веко́в. Ами́нь.

И́кос:

Кра́сный ли́че, светоза́рнии и боже́ственнии свети́льницы,/ Све́ту вели́кому предстоя́ще при́сно, богоблаже́ннии му́ченицы,/ и отту́ду испуща́емыми невече́рняго Божества́ сия́нии, всегда́ просвеща́еми и обожа́еми,/ ве́рою па́мять ва́шу соверша́ющия боже́ственную просвети́те,/ и омраче́ния и страсте́й и бед и зло́бы изба́вите,/ моля́щеся непреста́нно о всех нас.

Седа́лен, глас 2:

Но́вии страстоте́рпцы Росси́йстии,/ му́ченически по́прище земно́е сконча́вшии и страда́ньми дерзнове́ние ко Го́споду приобре́тшии,/ моли́теся Ему́, вас укре́пльшему,/ да и мы, егда́ на́йдет на ны испыта́ния час,/ му́жества дар Бо́жий восприи́мем.

Сла́ва, и ны́не, Богоро́дичен, глас 4:

Не премолчи́м при́сно, Богоро́дице Де́во,/ благода́рственно воспева́ти от се́рдца Твоя́ ми́лости, Влады́чице, раби́ Твои́,/ вопию́ще и глаго́люще: Пресвята́я Де́во, предвари́, и изба́ви нас от враг ви́димых и неви́димых,/ и от ну́жды и вся́каго преще́ния,/ Ты бо еси́ на́ше заступле́ние.

Песнь 4

Ирмо́с: Прови́дев проро́к/ та́йну Твою́ неизрече́нную, Христе́, провозгласи́:/ положи́л еси́ тве́рдую любо́вь кре́пости, О́тче Ще́дрый,/ Единоро́днаго бо Сы́на, Благи́й,// очище́ние в мир посла́л еси́.

Всем конце́м земли́ яви́ся чу́до смотре́ния Твоего́, Влады́ко,/ кро́вию бо новому́ченик, я́ко водо́ю, угаси́л еси́ в Росси́йстей земли́ пла́мень нече́стия и развраще́ния/ и спасл еси́ лю́ди Твоя́.

Сла́ву Бо́жию унасле́довасте, новому́ченицы, просия́вшии в земли́ на́шей,/ отве́ргшеся бо себе́ и страх сме́ртный препобеди́вше,/ любо́вь к Бо́гу да́же до сме́рти му́жественне сохрани́ли есте́.

По́двигом до́брым подвиза́вшиися, святи́и новому́ченицы Росси́йстии,/ к покая́нию и доброде́тельному житию́ подви́гните на́с,/ да и мы ва́шими моли́твами сподо́бимся прославля́ти Го́спода во Ца́рствии Его́.

Богоро́дичен: На Твой наде́ющеся покро́в, Ма́ти Бо́жия,/ со святы́ми новому́ченики и испове́дники Росси́йскими прославля́ем милосе́рдие Твое́.

Песнь 5

Ирмо́с: Сою́зом любве́/ связу́еми, апо́столи,/ влады́чествующему все́ми себе́ Христу́ возло́жше,/ кра́сны но́ги очища́ху,// благовеству́юще всем мир.

Дерзнове́нно, святи́и, испове́дали есте́ Го́спода пред отсту́пники и гони́тели:/ с на́ми Бог, взыва́юще, разуме́йте и покаря́йтеся,/ стра́ха ва́шего не убои́мся, ниже́ смути́мся, я́ко с на́ми Бог.

Уврачу́йте моли́твами ва́шими, святи́и новому́ченицы Росси́йстии,/ лю́ди богобо́рныя, враждо́ю и уби́йствы ды́шущия,/ и мир стране́ на́шей и ве́рным лю́дем да́руйте.

Предстоя́ще Христу́, власть иму́щу суди́ти всему́ ми́ру,/ святи́и новому́ченицы и испове́дницы Росси́йстии,/ очи́стите нас от грехо́в на́ших моли́твами ва́шими,/ да не с ми́ром осужде́ни бу́дем.

Богоро́дичен: Водворя́ет ны змий во юдо́ль пла́ча и ча́яния злых,/ не мо́жем терпе́ти ско́рби своея́, взыва́ху новому́ченицы,/ Ты же, Богороди́тельнице, просте́рла еси́ им покро́в Свой/ и спасла́ еси́ от сете́й вра́жиих.

Песнь 6

Ирмо́с: Бе́здна после́дняя грехо́в обы́де мя,/ и, волне́ния не ктому́ терпя́,/ я́ко Ио́на, Влады́це, вопию́ Ти:// от тли мя возведи́.

Во́лны безбо́жнаго нече́стия тща́хуся потопи́ти кора́бль Це́ркве Ру́сския,/ Ты же, И́стинный Ко́рмчий, спасл еси́ ше́ствующия на нем моли́твами страстоте́рпцев Росси́йских, вопию́щих:/ Го́споди Сил, из смертоно́сныя глубины́ возведи́ ны.

Безбо́жнии Ка́иновы вну́цы святы́ни церко́вныя поруга́нию и огню́ преда́ша,/ оби́тели разори́ша, хра́мы я́ко ово́щная храни́лища соде́яша,/ христолюби́выя лю́ди в темни́цы заключи́ша и уму́чиша./ Вы же, страстоте́рпцы, с любо́вию учи́ли есте́:/ сие́ бысть по грехо́м на́шим, лю́дие, пока́йтеся.

Увы́ нам, увы́, вопия́ху испове́дницы Росси́йстии,/ ви́дяще, я́ко безу́мнии богобо́рцы святы́ни земли́ на́шея разори́ша,/ оби́тели я́ко узи́лища темни́чная соде́яша,/ хра́мы Бо́жии в скве́рная и позо́рищная места́ обрати́ша/ и кровь христиа́нскую в них пролия́ша./ Сего́ ра́ди опустоши́шася сердца́ нечести́вых/ и живо́т их а́ду прибли́жися.

Богоро́дичен: Изведи́ нас из ро́ва поги́бели/ и уврачу́й на́ша грехо́вныя я́звы, Пресвята́я Ма́ти Де́во,/ да неосужде́нно сподо́бимся при́сно прославля́ти новому́ченики Сы́на Твоего́ и Бо́га на́шего.

Конда́к и и́кос воскре́сны.

Песнь 7

Ирмо́с: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени,/ ороша́еми поя́ху:// благослове́н еси́, Го́споди, Бо́же оте́ц на́ших.

О́троцы в Вавило́не дре́вле, я́ко основа́ние,/ новому́ченицы же Росси́йстии ны́не, я́ко увенча́ние,/ с ли́ки страстоте́рпец при́сно взыва́ют:/ благослове́н еси́, Го́споди, Бо́же оте́ц на́ших.

О́троцы в Вавило́не пе́щнаго пла́мене не убоя́шася,/ новому́ченицы же Росси́йстии, тем подража́юще,/ гоне́ния безбо́жных в ничто́же вмени́ша,/ те́мже ны́не согла́сно с ни́ми воспева́ют:/ благослове́н еси́, Го́споди, Бо́же оте́ц на́ших.

Днесь торжеству́ет Це́рковь Ру́сская,/ святи́и бо новому́ченицы, сро́дницы на́ши,/ к ликостоя́нием святы́х, от ве́ка Бо́гу благоугоди́вших, присовокупи́вшеся,/ согла́сно с ни́ми воспева́ют хвале́бную песнь:/ благослове́н еси́, Бо́же оте́ц на́ших.

Богоро́дичен: Предстоя́щи Ти Кресту́ Сы́на Твоего́, Богома́ти,/ ору́жие про́йде ду́шу Твою́,/ те́мже и попече́ние сугу́бое о возлюби́вших Его́ прия́ла еси́,/ и́же Тя сыно́вне велича́ют:/ благослове́нна Ты в жена́х еси́, Всенепоро́чная Влады́чице.

Песнь 8

Ирмо́с: За зако́ны оте́ческия/ блаже́ннии в Вавило́не ю́ноши, предбе́дствующе,/ царю́ющаго оплева́ша повеле́ние безу́мное/ и, совоку́плени, и́мже не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,// и превозноси́те во вся ве́ки.

Зако́ны Христо́вы возлюби́ша новому́ченицы и испове́дницы Росси́йстии,/ безбо́жная же повеле́ния отри́нуша/ и, ре́вностию о Бо́зе связу́емии,/ Бо́гу побе́дную песнь воспева́ху:/ да благослови́т Го́спода Русь Свята́я и превозно́сит Его́ во ве́ки.

Егда́ земля́ Росси́йская тьмо́ю безбо́жия и Ка́иновым озлобле́нием объя́та бысть,/ тогда́ мно́зи христолюби́вии лю́дие на го́рькия рабо́ты изгна́ни бы́ша/ и глад, мраз, зной и смерть лю́тую му́жественне претерпе́ша,/ ве́рою же, наде́ждею и любо́вию совоку́плени,/ досто́йную воспева́ху песнь:/ да благослови́т Го́спода Русь Свята́я и превозно́сит Его́ во ве́ки.

А́нгелов хвалу́ и новому́чеников славосло́вие ми́лостивно прие́мляй,/ не отри́ни, Триипоста́сный Бо́же, от со́нма их и нас, недосто́йных,/ но сподо́би вку́пе с ни́ми воспева́ти:/ да благослови́т Го́спода Русь Свята́я и превозно́сит Его́ во ве́ки.

Богоро́дичен: Зря́щи поруга́ние свята́го уде́ла Своего́,/ скорбя́ше Пречи́стая Ма́ти и держа́вную по́мощь ве́рным лю́дем простира́ше,/ Сы́на же Своего́ усе́рдно моля́ше, взыва́ющи:/ да благослови́т Го́спода Русь Свята́я и превозно́сит Его́ во ве́ки.

Песнь 9

Ирмо́с: Стра́нствия Влады́чня/ и безсме́ртныя трапе́зы/ на Го́рнем ме́сте высо́кими умы́,/ ве́рнии, прииди́те, наслади́мся,/ возше́дша Сло́ва,/ от Сло́ва научи́вшеся,// Его́же велича́ем.

Безсме́ртныя трапе́зы и жи́зни ве́чныя во Ца́рствии Бо́жием/ наслажда́ются ны́не новому́ченицы и испове́дницы Росси́йстии,/ испо́лнися бо на них обетова́ние Госпо́дне:/ побежда́ющим дам се́сти со Мно́ю на Престо́ле Мое́м.

Да просла́вятся с ли́ки новому́чеников и испове́дников Росси́йских жены́ богому́дрыя земли́ на́шея,/ я́же, мироно́сиц восприе́мша чин и му́жески Христу́ после́довавша,/ страда́ния за и́мя Его́ претерпе́ша/ и ве́рно отце́м, муже́м и бра́тиям на́шим, Христа́ ра́ди му́чимым, послужи́ша./ Сего́ ра́ди ны́не в жи́зни ве́чней вку́пе с ни́ми/ трапе́зы безсме́ртныя наслажда́ются.

Жизнода́вче Го́споди,/ моли́твами новому́чеников и испове́дников Росси́йских/ упоко́й со все́ми пра́ведными ве́рныя рабы́ Твоя́, за и́мя Твое́ пострада́вшия:/ святи́тели и иере́и, мона́хи и мирски́я,/ ста́рыя, ю́ныя и всяк во́зраст, имену́емыя и неимену́емыя,/ я́ко и́стинныя сы́ны и дру́ги Бо́жия.

Богоро́дичен: Я́ко взбра́нная Воево́да во́инства новому́чеников и испове́дников Росси́йских,/ держа́вный покро́в и ми́лостивное заступле́ние яви́ла еси́, Пресвята́я Де́во, земли́ на́шей,/ опустоша́емей ско́рбными и безбо́жными наведе́нии./ Сего́ ра́ди ны́не мо́лим Тя:/ прости́ лю́ди согре́шшия и сохрани́ Святу́ю Русь.

Свети́лен воскре́сен.

Сла́ва, свети́лен новому́чеников:

Я́ко отре́бие ми́ру бы́ша, святи́и новому́ченицы и испове́дницы Росси́йстии,/ ка́мением побие́ни бы́ша, претре́ни бы́ша,/ искуше́ни бы́ша, уби́йством меча́ умро́ша,/ свиде́тельствующе о Све́те И́стиннем, Иису́се Христе́, Го́споде на́шем.

И ны́не, Богоро́дичен воскре́сен.

На хвали́тех стихи́ры воскре́сны 4, и новому́чеников 4, со сла́вником. Сла́ва, стихи́ра Ева́нгельская. И ны́не: Преблагослове́нна еси́:

Стихи́ры новому́чеников, глас 8.

Подо́бен: О, пресла́внаго чудесе́:

О, пресла́внаго чудесе́!/ В после́дняя времена́ возсиява́ют му́ченицы/ и пре́лести мрак отгоня́ют,/ ве́ра христиа́нская ны́не возвыша́ется/ и па́дает нече́стие,/ ра́дуются ве́рнии/ и пра́здник новоявле́нным составля́ют,/ вопию́ще Христу́ Бо́гу:// му́чеников похвала́ и побе́да Ты еси́, Всеси́льне.

Творе́ние святи́теля Афана́сия Ковро́вскаго:

Ве́ры броня́ми,/ и щито́м благода́ти,/ и креста́ копие́м вооружи́вшеся,/ сопроти́вным си́лам непобеди́ми бы́сте/ и, я́ко Боже́ственнии храбо́рницы,/ де́монская ополче́ния победи́вше,/ со А́нгелы лику́ете,/ ве́рныя же заступа́ете, и освяща́ете,// и спаса́ете, призыва́емии.

О, пресла́внаго чудесе́!/ Чуде́с светлостьми́/ со́лнца светле́йше/ при́сно святи́и сро́дницы на́ши/ све́тят конце́м Ру́сския земли́,/ от невече́рняго Све́та облиста́еми,/ и́хже сия́нии/ о́блацы от страны́ на́шея отгоня́ются ва́рварстии// и де́мони побежда́ются.

Сла́ва, глас 8:

Новоявле́нныя зве́зды днесь/ на церко́вней показа́шася тве́рди,/ во мно́зех ме́стех бы́вшии му́ченицы Христо́вы,/ и́хже ублажа́юще, мучениколю́бцы,/ по до́лгу им прирце́м, глаго́люще:/ ра́дуйтеся, благоче́стия утвержде́ние и нече́стия обузда́ние;/ ра́дуйтеся, Росси́йския Це́ркве сла́во и безбо́жных посрамле́ние;/ ра́дуйтеся, о́брази терпе́ния и за Христа́ страда́ния./ Ста́ните, непобеди́мии, посреде́ нас у́мне,/ от бед и искуше́ний избавля́юще,// и моли́теся о спасе́нии душ на́ших.

И ны́не, Богоро́дичен.

НА ЛИТУРГИ́И

Блаже́нна гла́са на 6, и от кано́на новому́чеников, песнь 3, на 4.

Проки́мен воскре́сен гла́са, и новому́чеников, глас 7: Бог нам Прибе́жище// и Си́ла. Стих: Помо́щник в ско́рбех, обре́тших ны зело́.

Апо́стол дне, и новому́чеников, к Ри́мляном, зача́ло 99.

Аллилуиа́рий воскре́сен гла́са, и новому́чеников, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь.

Ева́нгелие дне, и новому́чеников, от Луки́, зача́ло 105 и 106. Коне́ц: В терпе́нии ва́шем стяжи́те душа́ ва́ша.

Прича́стен воскресен, и новому́чеников: Ра́дуйтеся, пра́веднии, о Го́споде,/ пра́вым подоба́ет похвала́.

Моли́тва

О святи́и новому́ченицы и испове́дницы Росси́йстии:/ святи́телие и па́стырие Це́ркве Христо́вы,/ ца́рственнии страстоте́рпцы,/ благове́рнии кня́зие и княги́ни,/ до́блии во́ини, мона́си и мирсти́и,/ благочести́вии му́жие и жены́,/ во вся́цем во́зрасте и сосло́вии за Христа́ пострада́вшии,/ ве́рность Ему́ да́же до сме́рти свиде́тельствовавшии/ и вене́ц жи́зни от Него́ прия́вшии!/ Вы во дни гоне́ния лю́таго,/ зе́млю на́шу от безбо́жных пости́гшаго,/ на суди́щах, в заточе́ниих и про́пастех земны́х,/ в го́рьких рабо́тах и вся́ких ско́рбных обстоя́ниих/ о́браз терпе́ния и непосты́днаго упова́ния му́жественне яви́ли есте́./ Ны́не же, в раи́ сла́дости наслажда́ющеся,/ пред Престо́лом Бо́жиим во сла́ве предстои́те/ и при́сно хвалу́ и хода́тайство со А́нгелы и все́ми святы́ми Триеди́ному Бо́гу возно́сите./ Сего́ ра́ди мы, недосто́йнии,/ мо́лим вас, святи́и сро́дницы на́ши:/ не забу́дите земна́го оте́чества ва́шего,/ грехо́м Ка́инова братоуби́йства,/ поруга́нием святы́нь, безбо́жием и на́шими беззако́нии отягче́ннаго./ Умоли́те Го́спода Сил,/ да утверди́т Це́рковь Свою́ непоколеби́му в ми́ре сем многомяте́жнем и лука́вом;/ да возроди́т в земли́ на́шей дух братолю́бия и ми́ра;/ да па́ки бу́дем мы ца́рское свяще́ние,/ род Бо́жий, избра́нный и святы́й,/ при́сно с ва́ми сла́вящий Отца́ и Сы́на и Свята́го Ду́ха во ве́ки веко́в. Ами́нь.

Зри. А́ще Неде́ля мытаре́ва или́ блу́днаго.

На вели́цей вече́рни на Господи, воззвах: стихи́ры воскре́сны 3, и Трио́ди 3, и новому́чеников 4. Сла́ва: Трио́ди. И ны́не: Богоро́дичен 1-й гла́са. На лити́и стихи́ра хра́ма, та́же Трио́ди хвали́тны. Сла́ва: новому́чеников. И ны́не: Трио́ди. На стихо́вне стихи́ры воскре́сны. Сла́ва: новому́чеников. И ны́не: Трио́ди [зри сла́вник на стихо́вне ве́чера]. На благослове́нии хле́бов Богоро́дице Де́во: два́жды, и новому́чеников, еди́ножды.

На у́трени на Бог Госпо́дь: тропа́рь воскре́сен, два́жды. Сла́ва: новому́чеников. И ны́не: Богоро́дичен воскре́сен. По кафи́смах седа́льны воскре́сны с Богоро́дичны их. По полиеле́и два седа́льна новому́чеников, глас 4. Сла́ва: полиеле́йный седа́лен новому́чеников, глас 6. И ны́не: Богоро́дичен, глас 8. Кано́н воскре́сен со ирмосо́м на 4, и Богоро́дицы на 2, и Трио́ди на 4, и новому́чеников на 4. Катава́сия по уста́ву. По 3-й пе́сни конда́к, и́кос и седа́лен новому́чеников. И ны́не: Трио́ди. По 6-й пе́сни конда́к и и́кос Трио́ди. Свети́лен воскре́сен. Сла́ва: новому́чеников. И ны́не: Трио́ди. На хвали́тех стихи́ры воскре́сны 4, и новому́чеников со сла́вным 4, с припе́вы их. Сла́ва: Трио́ди. И ны́не: Преблагослове́нна еси́:

На Литурги́и блаже́нна гла́са на 4, и Трио́ди, песнь 3-я, на 4, и новому́чеников, песнь 6-я, на 4. Проки́мен, Апо́стол, Аллилу́ия, Ева́нгелие и прича́стен дне и новому́чеников.

А́ще Неде́ля мясопу́стная.

На вели́цей вече́рни на Го́споди, воззва́х: стихи́ры воскре́сны 3, и Трио́ди 4, и новому́чеников 3.

На у́трени кано́н воскре́сен со ирмосо́м на 4, и Трио́ди на 6, и новому́чеников на 4. На хвали́тех по стихи́рах новому́чеников пое́м стихи́ру Трио́ди: Предочи́стим себе́: с припе́вом ея́.

ВЕ́ЧЕР

На Го́споди, воззва́х: стихи́ры, глас 1.

Подо́бен: Прехва́льнии му́ченицы:

Прехва́льне священному́чениче и́мярек,/ тя ни темни́ца изнури́ла есть,/ ни глад умори́,/ ни озлобле́ния и ра́ны смято́ша,/ во е́же разлучи́ти тя от любве́ Бо́жия/ и богодарова́нныя па́ствы./ Те́мже Христу́, свя́те, моли́ся/ дарова́ти Це́ркви на́шей// мир и ве́лию ми́лость.

Всехва́льне священному́чениче и́мярек,/ от бра́тий по пло́ти страда́ния до кро́ве претерпева́я,/ в себе́ помышля́л еси́,/ я́ко Го́спода ра́ди умерщвля́еми есмы́/ и несть на́ша брань проти́ву пло́ти и кро́ви,/ но к миродержи́телю тьмы ве́ка сего́./ Те́мже Христу́, свя́те, моли́ся,/ дарова́ти земли́ на́шей// мир и ве́лию ми́лость.

Пресла́вне священному́чениче и́мярек,/ ты же́ртву безкро́вную/ пе́рвее благогове́йне соверша́я,/ по́слежде, я́ко всепло́дие,/ себе́ сама́го в же́ртву живу́ю прине́сл еси́,/ моля́, да прости́тся грех богобо́рчества наро́да на́шего./ И ны́не Христу́, свя́те, моли́ся/ дарова́ти лю́дем росси́йским// мир и ве́лию ми́лость.

Сла́ва, глас то́йже:

Це́ркве Росси́йския сла́во/ и Оте́чества на́шего украше́ние,/ священному́чениче и́мярек,/ вла́стию, от Бо́га тебе́ да́нною,/ руга́тели безбо́жныя облича́л еси́,/ и, я́ко во́лки лю́тыя, от ста́да твоего́ отгна́л еси́/ и диа́вола посрами́л еси́,/ кровь же твоя́, я́ко А́велева,/ от земли́ на́шея вопие́т немо́лчно./ Сего́ ра́ди хода́тай на Небеси́ о нас ве́рен бу́ди// и моли́ спасти́ся душа́м на́шим.

И ны́не, Богоро́дичен: Всеми́рную сла́ву:

Вход. Проки́мен дне. И чте́ния три.

Дея́ний святы́х апо́стол чте́ние (глава́ 4):

Во дни о́ны, глаго́лющим же апо́столом к лю́дем,/ наидо́ша на ни́х свяще́нницы и воево́да церко́вный, и саддуке́и,/ жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых;/ и возложи́ша на них ру́ки и положи́ша их в соблюде́ние до у́трия:/ бе бо ве́чер уже́./ Мно́зи же от слы́шавших сло́во ве́роваша:/ и бысть число́ муже́й я́ко ты́сящ пя́ть./ Бысть же нау́трие собра́тися князе́м их, и ста́рцем, и кни́жником во Иерусали́м:/ и А́нне архиере́ю, и Каиа́фе, и Иоа́нну, и Алекса́ндру,/ и ели́цы бе́ша от ро́да архиере́йска./ И, поста́вльше их посреде́, вопроша́ху:/ ко́ею си́лою, или́ ко́им и́менем сотвори́сте сие́ вы?/ Тогда́ Петр, испо́лнився Ду́ха Свя́та, рече́ к ним:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о чесо́м сей спасе́ся,/ разу́мно бу́ди всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́ном же ино́м спасе́ния;/ несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам.

Дея́ний святы́х апо́стол чте́ние (глава́ 4):

Во дни о́ны, ви́дяще иуде́и Петро́во дерзнове́ние и Иоа́нново и разуме́вше,/ я́ко челове́ка некни́жна еста́ и про́ста, дивля́хуся,/ зна́ху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся ко друг дру́гу, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́дь не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га?/ Суди́те: не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я,/ ничто́же обре́тше, ка́ко му́чити их, люде́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния.

Дея́ний святы́х апо́стол чте́ние (глава́ 4):

Во дни о́ны, отпуще́на бы́вша апо́стола приидо́ста ко свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же усты́ Дави́да, о́трока Твоего́, рече́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ изра́илевыми,/ сотвори́ти, ели́ка рука́ Твоя́ и сове́т Твой преднарече́ бы́ти./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.

На стихо́вне стихи́ры, глас 6.

Подо́бен: Тридне́вен:

Столп непоколеби́мый Ру́сския Це́ркве был еси́,/ гоне́ния лю́тая претерпева́я,/ день и нощь в моли́тве подвиза́лся еси́,/ священному́чениче и́мярек,/ огне́м ре́вности и ду́хом кро́тости/ па́ству твою́ ко Христу́ путеводя́,// тем тя любо́вию почита́ем.

Стих: Свяще́нницы Твоя́ облеку́тся в пра́вду// и преподо́бнии Твои́ возра́дуются.

Ве́рен Бо́гу и Це́ркви был еси́ да́же до сме́рти,/ священному́чениче и́мярек,/ ны́не же, с ли́ки новому́ченик и испове́дников Росси́йских/ предстоя́ Христу́ Царю́,/ моли́ся с ни́ми приле́жно/ дарова́ти нам мир// и ве́лию ми́лость.

Стих: Честна́ пред Го́сподем// смерть преподо́бных Его́.

Душе́вная и теле́сная страда́ния твоя́/ и смерть за Го́спода во́льная от безбо́жных/ отверзо́ша ти, свя́те и́мярек,/ врата́ жи́зни ве́чныя/ и укрепи́ша бра́тий твои́х испове́дати Христа́./ Те́мже Ему́ моли́ся при́сно,// да утверди́тся Правосла́вие на Руси́ во ве́ки.

Сла́ва, глас 8:

А́нгели страда́нием твои́м дивля́хуся,/ и Це́рковь Небе́сная ра́достно тя прия́т,/ достохва́льне и́мярек./ Ны́не же, свяще́ннеи ру́це твои́/ к Престо́лу Святы́я Тро́ицы простира́я,/ помина́й зе́млю Ру́сскую,/ ю́же возлюби́л еси́,// моля́ о спасе́нии сла́вящих тя благоче́стно.

И ны́не, Богоро́дичен, глас то́йже:

При́зри на моле́ния Твои́х раб, Всенепоро́чная,/ и вся́кия ско́рби изба́ви зе́млю Ру́сскую,/ до́м Твой нарече́нную/ и кровьми́ новому́ченик освяще́нную./ Да не постыди́мся, Влады́чице Держа́вная,/ Тя призыва́ющии,/ Ты бо еси́ правосла́вных по́мощь,/ ра́дость и покро́в// и спасе́ние душ на́ших.

Тропа́рь, глас 3:

Це́ркве Ру́сския сто́лпе непоколеби́мый,/ благоче́стия пра́вило,/ жития́ ева́нгельскаго о́бразе,/ священному́чениче и́мярек,/ Христа́ ра́ди пострада́вый да́же до кро́ве,/ Его́же моли́ усе́рдно,/ я́ко Нача́льника и Соверши́теля спасе́ния,/ Русь Святу́ю утверди́ти в Правосла́вии// до сконча́ния ве́ка.

НА У́ТРЕНИ

По 1-м стихосло́вии седа́лен, глас 6:

Сквозе́ огнь муче́ния, я́ко свиде́тель ве́рный, проше́л еси́,/ блаже́нне и́мярек,/ сего́ ра́ди с ли́ки святы́х земли́ Ру́сския/ в Небе́снем Оте́честве торжеству́еши./ Помози́ и нам бы́ти ве́рным Христу́ и спасти́ся душа́м на́шим.

Сла́ва, и ны́не, Богоро́дичен:

О Всепе́тая Де́во,/ Тя ве́мы Покро́в земли́ Ру́сския,/ Тебе́ бо, гре́шнии, и́мамы предста́тельство,/ Тебе́ стяжа́хом в напа́стех спасе́ние,/ Еди́ну Всенепоро́чную.

По 2-м стихосло́вии седа́лен, глас 2:

Боле́зньми и страда́нии твои́ми, священному́чениче и́мярек,/ Бо́га просла́вил еси́/ и хода́тай ве́рный о нас яви́лся еси́./ Сего́ ра́ди с любо́вию вопие́м ти:/ не преста́й моли́тися о чту́щих святу́ю па́мять твою́.

Сла́ва, и ны́не, Богоро́дичен:

Моли́твеннице те́плая, Засту́пнице ро́да христиа́нскаго,/ приими́ моле́ния раб Твои́х/ и осени́ Русь Правосла́вную покро́вом Твоея́ бла́гости.

Велича́ние:

Велича́ем тя,/ священному́чениче и́мярек,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия// претерпе́л еси́.

Псало́м избра́нный:

1-й лик: Бог нам Прибе́жище и Си́ла.

2-й лик: Го́споди, воздви́гни си́лу Твою́ и прииди́, во е́же спасти́ ны.

1-й лик: Глаго́лах о свиде́ниих Твои́х пред цари́ и не стыдя́хся.

2-й лик: Вси язы́цы обыдо́ша мя, и и́менем Госпо́дним противля́хся им.

1-й лик: Тебе́ ра́ди умерщвля́емся весь день, вмени́хомся я́ко о́вцы заколе́ния.

2-й лик: Кре́пость моя́ и пе́ние мое́ Госпо́дь и бысть мне во спасе́ние.

По полиеле́и седа́лен, глас 1:

До́блий страда́льче и служи́телю Та́ин Бо́жиих,/ священному́чениче и́мярек,/ Це́ркве Ру́сския похвало́ и утвержде́ние,/ ны́не, пра́зднующе твою́ па́мять,/ Бо́гу, просла́вльшему тя, благода́рственно вопие́м:/ сла́ва Да́вшему ти кре́пость во страда́ниих,/ сла́ва Венча́вшему тя,/ сла́ва Спаса́ющему нас твои́ми моли́твами.

Сла́ва, и ны́не, Богоро́дичен:

Предста́тельнице те́плая и Засту́пнице усе́рдная,/ в годи́ну безбо́жия от коне́чныя поги́бели/ зе́млю Ру́сскую изба́вльшая всемо́щным хода́тайством к Сы́ну Твоему́,/ и ны́не не оста́ви нас моли́твами Твои́ми, Влады́чице Богоро́дице.

Степе́нна, 1-й антифо́н 4-го гла́са. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 6:

Егда́ попусти́ Госпо́дь по грехо́м на́шим/ братоуби́йство, гоне́ния и ве́ры Христо́вы поруга́ние,/ ты, священному́чениче и́мярек,/ Це́ркве Росси́йския столп непоколеби́мый яви́лся еси́/ и, кровь свою́ за Христа́ пролия́в,/ па́ству во еди́нстве соблю́л еси́./ Ны́не же, на Небеси́ предстоя́ с ли́ки новому́чеников,// моли́ спасти́ся душа́м на́шим.

Кано́н, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Во́ли Бо́жией послушли́в быв,/ святи́тельства жезл [или́: свяще́нства дар] прия́л еси́, священному́чениче и́мярек,/ и, за Христа́ да́же до сме́рти пострада́в,/ ве́рный сын Це́ркве яви́лся еси́.

Изгна́ние и разлуче́ние с па́ствою твое́ю му́жественне претерпе́л еси́, священному́чениче и́мярек,/ но ничто́же возмо́же разлучи́ти тя от любве́ Бо́жия.

Безбоя́зненно пропове́довал еси́ лю́дем покая́ние, священному́чениче и́мярек,/ да обратя́т сердца́ своя́ к Бо́гу/ и то́кмо на Него́ в ско́рбех и лише́ниих упова́ние и́мут.

Богоро́дичен: Ма́ти Бо́жия,/ дом Твой, Свята́я Русь, мо́лит Тя:/ изба́ви лю́ди Твоя́ от вся́кия ну́жды и ве́чнаго осужде́ния.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

Егда́ прии́де испыта́ние ве́ры твоея́, священному́чениче и́мярек,/ страда́ние за Христа́, я́ко благода́тный дар, прия́л еси́/ и кро́вию твое́ю Ру́сскую зе́млю обагри́л еси́.

Егда́ прии́де гоне́ние от безбо́жных,/ столп непоколеби́м Ру́сския Це́ркве яви́лся еси́, священному́чениче и́мярек,/ святы́х, я́ко бли́жних сро́дник, в по́мощь призыва́я,/ с ни́миже ку́пно ны́не прославля́ешися.

А́ще и умерщвле́н был еси́ те́лом, священному́чениче и́мярек,/ оба́че ду́хом ко́зни диа́вольския посрами́л еси́,/ име́я Христа́ прибе́жище и утвержде́ние.

Богоро́дичен: Тя Предста́тельницу, Пречи́стая Де́во, мо́лим:/ преложи́ на́шу печа́ль на ра́дость и ско́рби належа́щия изба́ви, Засту́пнице на́ша.

Седа́лен, глас 3:

Заве́ты испове́дников и священному́чеников Христо́вых восприе́м,/ ду́шу твою́ за ве́ру Правосла́вную положи́л еси́, свя́те,/ е́юже утвержда́ется земля́ Ру́сская./ Сего́ ра́ди моли́ся, священному́чениче и́мярек,/ любо́вию чту́щим тя ве́рным Христу́ до конца́ бы́ти.

Сла́ва, и ны́не, Богоро́дичен:

Не и́мамы ина́го прибе́жища, ра́зве Тебе́, Богоро́дице,/ Оте́чества на́шего усе́рдная Засту́пнице:/ всяк бо, почита́яй Тя, наде́жду обрета́ет.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Да не дерза́ют язы́цы рещи́: где есть Бог ваш?/ Кровь бо новому́чеников от земли́ на́шея вопие́т:/ Го́споди, Госпо́дь наш, я́ко чу́дно и́мя Твое́ по всей Ру́сстей земли́.

И́мже о́бразом жела́ет еле́нь на исто́чники водны́я,/ си́це ты, страстоте́рпче и́мярек, к живоно́сным страда́нием за Христа́ прите́кл еси́,/ и́миже при́сно свяще́нно обновля́ется лице́ земли́ Ру́сския.

Вся земна́я ни во что вмени́в Христа́ ра́ди,/ сло́вом и житие́м, священному́чениче и́мярек, ве́рных поуча́л еси́:/ о Бо́зе сотвори́м си́лу,/ и Той уничижи́т стужа́ющия нам.

Богоро́дичен: Стена́ необори́мая и Покро́в всемо́щный Росси́йским новому́чеником яви́лася еси́, Пресвята́я Де́во,/ те́мже Тя велича́ем.

Песнь 5

Ирмо́с: Ты, Го́споди мой,/ Свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Я́ко луч Со́лнца Пра́вды яви́лся еси́, священному́чениче и́мярек,/ и страда́ньми твои́ми мглу безбо́жия над Оте́чеством на́шим разсе́ял еси́.

Егда́ безбо́жнии тща́хуся сокры́ти тя в темни́це, священному́чениче и́мярек,/ Госпо́дь яви́ тя испове́дника Своего́ всем конце́м земли́ Ру́сския.

Ру́сския Це́ркве свети́льниче свяще́нный и́мярек,/ кровьми́ му́ченическими неугаси́мо светя́й и у Престо́ла Бо́жия предстоя́й,/ моли́ся о чту́щих тя.

Богоро́дичен: И́же от Де́вы неизрече́нно рожде́йся, Го́споди,/ сохрани́ моли́твами Ея́ Це́рковь Твою́,/ Тебе́ сла́вящую правосла́вными гла́сы.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х// исте́кшею Кро́вию.

Восприи́м меч духо́вный, и́же есть глаго́л Бо́жий,/ безбо́жных ко́зни сокруши́л еси́, священному́чениче и́мярек,/ и вся разжже́нныя стре́лы лука́ваго угаси́л еси́ щито́м ве́ры Правосла́вныя.

Во святи́телех [или́: свяще́нницех] благоче́стно пожи́в и муче́ния путь терпели́во восприи́м,/ сугу́бую мзду на Небесе́х обре́л еси́, священному́чениче и́мярек,/ иде́же ева́нгельски при́сно ра́дуешися и весели́шися.

Ничто́же возмо́же разлучи́ти тя, богоприя́тне, от любве́ Христо́вы:/ ни скорбь, ни гоне́ние, ни смерть,/ вся бо сия́ си́лою Возлю́бльшаго тя Го́спода препобеди́л еси́, священному́чениче.

Богоро́дичен: Пое́м Тя, Предста́тельнице те́плая и Засту́пнице христиа́н, Богоро́дице Всепе́тая,/ я́ко со все́ми святы́ми земли́ Ру́сския мо́лиши Сы́на Твоего́ и Бо́га на́шего/ обрести́ нам ве́лию ми́лость.

Конда́к, глас 2:

Восхва́лим, ве́рнии,/ изря́днаго во святи́телех [или́: свяще́нницех]/ и сла́внаго в му́ченицех и́мярек,/ Правосла́вия побо́рника и благоче́стия ревни́теля,/ земли́ Ру́сския кра́сное прозябе́ние,/ и́же страда́нием Небесе́ дости́же/ и та́мо те́пле мо́лит Христа́ Бо́га// спасти́ся душа́м на́шим.

И́кос:

Красу́йся и лику́й, Це́рковь Ру́сская,/ я́ко благопло́дная лоза́ свяще́ннаго страда́льца израсти́вшая,/ добропобе́дным муче́нием сердца́ ве́рных укрепи́вшаго,/ за́поведи Госпо́дни испо́лнившаго и при́сно ева́нгельски учи́вшаго:/ прииди́те, ча́да, послу́шайте мене́,/ не убо́йтеся от убива́ющих те́ло, души́ же не могу́щих уби́ти,/ убо́йтеся же па́че могу́щаго ду́шу и те́ло погуби́ти в гее́нне./ Те́мже, священному́чениче и́мярек, моли́ Христа́ Бо́га спасти́ся душа́м на́шим.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди.

Я́ко трие́ о́троцы, в пещи́ вавило́нстей пла́менем объя́тии, моли́твою не сгара́ху,/ та́ко ты, священному́чениче и́мярек, во огни́ муче́ний благода́тию ве́ру сохрани́л еси́./ Сего́ ра́ди ны́не с новому́ченики Росси́йскими лику́еши:/ благослове́н еси́, Бо́же отце́в земли́ на́шея.

Я́коже дре́вле о́троцы, в пещи́ неопаля́емии, злато́му истука́ну не поклони́шася,/ та́ко же и ты, священному́чениче и́мярек, огне́м муче́ний неопаля́емь,/ безбо́жие небоя́зненно облича́л еси́, взыва́я с новому́ченики Росси́йскими:/ благослове́н еси́, Бо́же отце́в земли́ на́шея.

Же́ртву живу́ю и всесожже́ние Творцу́ себе́ сама́го принося́, священному́чениче и́мярек,/ с новому́ченики Росси́йскими воспева́л еси́:/ могу́щии, покаря́йтеся, я́ко с на́ми Бог отце́в земли́ на́шея.

Богоро́дичен: Я́же па́че ума́ и естества́ Бо́га ро́ждши, Неискусому́жная Мари́е,/ чту́щия Тя от враг ви́димых и неви́димых изба́ви,/ Ты бо еси́ земли́ отце́в на́ших Держа́ва необори́мая.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.

Зе́млю Ру́сскую, безбо́жными гоне́нии неща́дно жего́мую,/ слеза́ми и кровьми́ твои́ми напои́л еси́, священному́чениче и́мярек,/ сего́ ра́ди плоды́ ве́ры, ча́да церко́вная, возрасти́л еси́.

Зло́бы мучи́телей не убоя́лся еси́,/ огне́м любве́ Боже́ственныя ты́я препобеди́в,/ те́мже благода́ть моли́тися о нас стяжа́л еси́, священному́чениче и́мярек, достохва́льне.

Благословля́я гони́телей твои́х, блаже́нне и́мярек,/ усе́рдно моли́лся еси́ за них,/ да пока́ются и ку́пно с ве́рными бра́тиями благословя́т Го́спода.

Богоро́дичен: Христа́ зря́щи умерщвля́ема, Многопе́тая Влады́чица,/ и ви́дящи исполне́ние Си́меонова прорече́ния, слезя́щи взыва́ше:/ благослове́н еси́, Бо́же, во ве́ки.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́.// Тем, веселя́щеся, Тя, Богоро́дице, велича́ем.

Рука́ми беззако́нных убие́н,/ же́ртва благоприя́тная и во́льное заколе́ние Бо́гу прине́слся еси́, свя́тче Бо́жий и́мярек./ Тем благода́рне па́мять твою́ почита́ем.

Госпо́дь, исполня́я смотре́ние Свое́ о Це́ркви Ру́сстей,/ засту́пника тя, священному́чениче и́мярек, соде́ла./ Те́мже моли́ся Ему́, во благоче́стии нам пребыва́ти и спасти́ся душа́м на́шим.

О бе́здна бла́гости Бо́жия!/ Дарова́ бо Бог возлю́бленным Свои́м ве́ры ра́ди пострада́ти/ и тя, священному́чениче и́мярек,/ я́ко плод кра́сный спаси́тельнаго се́яния, избра́ от земли́ Ру́сския.

Богоро́дичен: Разори́ сове́ты вся, на ны вооруже́нныя, Ма́ти Бо́га Вы́шняго,/ и ра́дости испо́лни упова́ющия на Тя,/ да усе́рдно вси Твое́ пропове́дуем заступле́ние.

Свети́лен:

Па́ству хле́бом сло́ва Бо́жия насыща́я/ и вино́м прему́дрости свяще́нныя напоя́я,/ теплото́ю любве́ твоея́ да́ры сия́ раствори́л еси́, священному́чениче и́мярек./ И ны́не высо́ким пропове́данием веща́еши ча́дом Це́ркве Ру́сския:/ приступи́те ко Го́споду, и просвети́теся,/ и ли́ца ва́ша не постыдя́тся.

Сла́ва, и ны́не, Богоро́дичен:

О Тебе́ мы хва́лимся, Богороди́тельнице,/ и к Бо́гу Тя и́мамы Предста́тельство,/ простри́ ру́ку Твою́ необори́мую/ и сокруши́ враги́ Це́ркве Ру́сския.

На хвали́тех стихи́ры, глас 4.

Подо́бен: Дал еси́ зна́мение:

Дал еси́ зна́мение/ земли́ Ру́сстей, Го́споди,/ священному́ченика, уго́дника Твоего́, и́мярек,/ я́ко да тем умоле́н быва́я,/ отврати́ши пра́ведный Твой гнев,/ и не поги́бнет свята́я/ и боголюби́вая Русь// предста́тельством но́ваго страстоте́рпца.

Же́ртву хвале́ния/ при́сно Го́сподеви принося́,/ священному́чениче и́мярек,/ в коне́ц сама́го себе́/ в же́ртву жи́ву и свя́ту,/ благоуго́дну и соверше́нну предста́вил еси́,/ те́мже ти ве́рно вопие́м:/ благоприя́тны сотвори́ моли́твы на́ша// о благостоя́нии Це́ркве Ру́сския.

Предста́телю Це́ркве Ру́сския,/ священному́чениче и́мярек всехва́льне,/ вы́ну зряй Лице́ Го́спода на Небесе́х,/ не пре́зри ни еди́наго/ от ма́лых чад ея́,/ но ра́достно покая́ние на́ше приими́/ и моли́ при́сно// сыново́м Росси́йским спасти́ся.

Сла́ва, глас 8.

Подо́бен: О, пресла́внаго чудесе́:

О, пресла́внаго чудесе́!/ Я́ко крин посреде́ те́рния,/ в страда́ниих за Христа́ процве́л еси́, священному́чениче и́мярек,/ да не затми́тся в земли́ на́шей свет Правосла́вия/ во открове́ние язы́ком и сла́ву наро́да Ру́сскаго./ И ны́не, в селе́ниих ра́йских пребыва́я,/ неувяда́емо благоуха́еши// ве́ре твое́й подража́ющим.

И ны́не, глас и подо́бен то́йже:

О, пресла́внаго чудесе́! / Небесе́ и земли́ Цари́ца, / от святы́х сро́дников на́ших умоля́емая, / до ны́не зе́млю Ру́сскую покрыва́ет / и ли́ка Своего́ изображе́нии ми́лостивно обогаща́ет. / О Влады́чице Держа́вная! / Не преста́ни и на бу́дущее вре́мя / во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.

Славосло́вие вели́кое. И отпу́ст.

НА ЛИТУРГИ́И

Блаже́нна от кано́на, пе́снь 3-я и 6-я.

Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми?

Апо́стол к Ри́мляном, зача́ло 99.

Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам Прибе́жище и Си́ла, Помо́щник в ско́рбех, обре́тших ны зело́.

Ева́нгелие от Луки́, зача́ло 106. Коне́ц: В терпе́нии ва́шем стяжи́те душа́ ва́ша.

Прича́стен: В па́мять ве́чную бу́дет пра́ведник:

Моли́тва

О избра́нниче и уго́дниче Христо́в, священному́чениче и́мярек, Це́ркве Ру́сския сто́лпе непоколеби́мый, земли́ на́шея благо́е прозябе́ние и кра́сный плод, сро́дников твои́х предста́телю и наста́вниче! Ты во вре́мя гоне́ния безбо́жнаго от сокро́вищницы души́ твоея́ спаси́тельное испове́дание Правосла́вныя ве́ры изне́сл еси́, и лю́дем ве́рным па́стырь до́брый яви́лся еси́, ду́шу твою́ за Христа́ и Его́ о́вцы полага́я и лю́тыя во́лки дале́че отгоня́я. Ны́не у́бо при́зри на нас, недосто́йных чад твои́х, умиле́нною душе́ю и сокруше́нным се́рдцем тя призыва́ющих. Умоли́ Го́спода Бо́га, да прости́т согреше́ния на́ша и изба́вит от а́довых уз и ве́чнаго муче́ния. Утверди́ нас в ве́ре святе́й, научи́ нас всегда́ твори́ти во́лю Бо́жию и храни́ти за́поведи церко́вныя. Бу́ди па́стырем на́шим пра́вило ве́ры, во́ином вождь духо́вный, боля́щим врач изря́дный, печа́льным уте́шитель, гони́мым засту́пник, ю́ным наста́вник, всем же благосе́рдый оте́ц и те́плый моли́твенник, я́ко да моли́твами твои́ми соблюде́тся в Правосла́вии Свята́я Русь и непреста́нно сла́вится в ней и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.

ВЕ́ЧЕР

На Го́споди, воззва́х: стихи́ры, глас 1.

Подо́бен: Прехва́льнии му́ченицы:

Священноиспове́дниче о́тче и́мярек,/ ты во дни гоне́ний на Це́рковь Росси́йскую/ не убоя́лся еси́ мучи́телей безбо́жных/ и, ве́ру Христо́ву испове́дав,/ страда́ния претерпе́л еси́,/ па́ствы же ра́ди, лю́бящия тя, / благода́тию Бо́жиею храни́м был еси́/ и в ми́ре почи́л еси́./ Те́мже ны́не, наслажда́яся ра́дости Небе́сныя,// моли́ спасти́ся душа́м на́шим.

Священноиспове́дниче о́тче и́мярек,/ ты в годи́ну безбо́жия во оте́честве на́шем,/ я́ко и́стинный па́стырь Христо́в,/ любо́вию к Бо́гу распала́ем,/ ве́ру правосла́вную испове́дал еси́/ и, у́зы темни́чныя и рабо́ты го́рькия/ я́ко благо́е и́го Христо́во претерпе́в,/ во упова́нии тверд пребы́л еси́./ Те́мже ны́не, наслажда́яся ра́дости Небе́сныя,// моли́ спасти́ся душа́м на́шим.

Священноиспове́дниче о́тче и́мярек,/ ты, во дни отступле́ния от ве́ры сро́дников на́ших/ Христу́ ре́вностно после́дуя,/ страда́нием во́льным и испове́данием тве́рдым,/ я́ко и́стинный па́стырь показа́лся еси́/ и, сло́во Бо́жие пропове́дав,/ пра́вило ве́ры лю́дем правосла́вным/ и учи́тель благоче́стия яви́лся еси́./ Те́мже ны́не, наслажда́яся ра́дости Небе́сныя,// моли́ спасти́ся душа́м на́шим.

Сла́ва, глас 8:

Испове́дниче сла́вне о́тче и́мярек,/ ты на Бо́га все упова́ние возложи́л еси́/ и Той тя просла́ви во Ца́рствии Небе́снем,/ иде́же со сро́дники на́шими,/ новому́ченики и испове́дники Росси́йскими,/ ве́рою, наде́ждею и любо́вию Ему́ угоди́вшими,/ прославля́еши Отца́, и Сы́на, и Свята́го Ду́ха,// Тро́ицу Единосу́щную и Неразде́льную.

И ны́не, Богоро́дичен: Царь Небе́сный:

Вход. Проки́мен дне. Чте́ния три преподо́бническая.

На стихо́вне стихи́ры, глас 4.

Подо́бен: Я́ко до́бля:

Я́ко благи́й раб и ве́рный,/ вве́ренный ти тала́нт благоче́стия/ испове́данием Христа́ преумно́жил еси́,/ те́мже в ра́дость Го́спода вшел еси́/ и, ве́лие дерзнове́ние от Него́ восприе́м,/ мо́лишися о земли́ на́шей// и о ве́рою чту́щих па́мять твою́.

Стих: Бог мой еси́ Ты,// и испове́мся Тебе́.

Егда́ прии́де Госпо́дь испыта́ти лю́ди Своя́,/ блаже́нна тя раба́ и бдя́ща обре́те,/ священноиспове́дниче и́мярек всече́стне,/ не ктому́ раба́, но дру́га нарече́ тя,/ и, я́ко ве́рнаго стра́жа до́му Своего́,/ над мно́гими тя поста́ви// и дарова́ моли́твенника те́пла о душа́х на́ших.

Стих: Отве́рзите мне врата́ пра́вды,// вшед в ня, испове́мся Го́сподеви.

Помина́я сло́во Госпо́дне:/ несть раб бо́лий го́спода своего́,/ а́ще Мене́ изгна́ша и вас иждену́т,/ гоне́ния и страда́ния за Христа́ любве́ ра́ди претерпе́л еси́./ Те́мже, блаже́нства изгна́нных пра́вды ра́ди сподо́бився,/ любве́ соверше́нныя дости́гл еси́,// священноиспове́дниче о́тче и́мярек.

Сла́ва, глас 8:

Прииди́те, вси ве́рнии,/ досто́йно воспои́м па́стыря сла́внаго,/ сей бо, по́двиг страда́ния и испове́дничества соверши́в/ и последи́ благоче́стно пожи́в,/ Бо́гу в ми́ре ду́шу пре́дал еси́/ и от су́щих зде к ве́чным жили́щем преста́вился еси́,/ иде́же мо́лится о душа́х на́ших.

И ны́не, Богоро́дичен: Творе́ц и Изба́витель:

Тропа́рь, глас 2:

Священноиспове́дниче о́тче и́мярек,/ во дни гоне́ний безбо́жных на Це́рковь Ру́сскую/ поноше́ния, заточе́ние, изгна́ние и го́рькия рабо́ты/ Христа́ ра́ди претерпе́л еси́,/ и ничто́же разлучи́ тя от любве́ Бо́жия./ Та́же, благоче́стно в ми́ре пожи́в,/ свиде́тельствовал еси́ Го́спода Иису́са Христа́,// Его́же моли́ спасти́ся душа́м на́шим.

НА У́ТРЕНИ

На Бог Госпо́дь: тропа́рь то́йже.

По 1-м стихосло́вии седа́лен, глас 4:

К Бо́гу Вы́шнему воззва́л еси́,/ священноиспове́дниче досточу́дне и́мярек:/ поми́луй мя, Го́споди,/ я́ко врази́ нечести́вии попра́ша мя,/ и изба́ви ду́шу мою́ от сме́рти,/ о́чи от слез и но́зе от поползнове́ния,/ да благоугожду́ пред Тобо́ю во све́те живы́х.

Сла́ва, и ны́не, Богоро́дичен:

Стена́ непобеди́мая лю́дем правосла́вным еси́, Богоро́дице Де́во, / к Тебе́ бо притека́юще, невреди́ми пребыва́ем,/ и па́ки согреша́юще, и́мамы Тя Моли́твенницу./ Тем, благодаря́ще, вопие́м Ти:/ Ра́дуйся, Благода́тная, Госпо́дь с Тобо́ю.

По 2-м стихосло́вии седа́лен, глас 4:

Егда́ непра́веднии оболга́ша тя и кня́зи лю́дстии ра́нам жесто́ким преда́ша,/ ты, священноиспове́дниче и́мярек, на Бо́га упова́я, моли́лся еси́:/ Го́споди, Го́споди, кто подо́бен Тебе́,/ испове́мся Тебе́ в се́рдце мое́м,/ и язы́к мой поучи́тся пра́вде Твое́й, весь день хвале́ Твое́й.

Сла́ва, и ны́не, Богоро́дичен:

О, Всепе́тая Богоро́дице Влады́чице, му́чеников испове́дание и ве́нче, / А́нгелы сла́вимая и челове́ки воспева́емая,/ и всего́ ми́ра возжеле́нная Помо́щнице,/ изба́ви Це́рковь Ру́сскую вся́каго обстоя́ния,/ Еди́на Благослове́нная.

Велича́ние:

Велича́ем тя,/ священноиспове́дниче и́мярек,/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

Псало́м избра́нный:

1-й лик: Испове́мся Тебе́, Го́споди, всем се́рдцем мои́м о ми́лости Твое́й и и́стине Твое́й.

2-й лик: Госпо́дь Помо́щник мой, на Него́ упова́ се́рдце мое́, и испове́мся Ему́.

1-й лик: Глаго́лах о свиде́ниих Твои́х пред цари́ и не стыдя́хся.

2-й лик: Испове́мся и́мени Твоему́, Го́споди, я́ко бла́го, я́ко от вся́кия печа́ли изба́вил мя еси́.

1-й лик: На Бо́га упова́х, не убою́ся, что сотвори́т мне челове́к.

2-й лик: Изведи́ из темни́цы ду́шу мою́ испове́датися и́мени Твоему́.

1-й лик: Поноше́ния понося́щих Ти нападо́ша на мя.

2-й лик: От бездн земли́ па́ки возве́л мя еси́, и́бо аз испове́мся Тебе́ в лю́дех, Го́споди.

1-й лик: Весели́теся, пра́веднии, о Го́споде и испове́дайте па́мять святы́ни Его́.

2-й лик: Да испове́дятся Тебе́, Го́споди, вся дела́ Твоя́.

По полиеле́и седа́лен, глас 4:

Я́ко и́стинный служи́тель Це́ркве Бо́жия, сла́вне и́мярек,/ страда́ния и гоне́ния от безбо́жных в земли́ на́шей да́же до конца́ претерпе́л еси́/ и по сих, в ми́ре благоче́стно пожи́в,/ Христа́ небоя́зненне испове́дал еси́./ Ны́не же, во Ца́рствии Бо́жии наслажда́яся жи́зни ве́чныя,/ моли́ спасти́ся душа́м на́шим.

Сла́ва, и ны́не, Богоро́дичен:

Недви́жимое утвержде́ние ве́ры/ и спасе́ние душ на́ших,/ Богоро́дицу пе́сньми велича́им, ве́рнии:/ ра́дуйся, Правосла́вия Огражде́ние,/ ра́дуйся, земли́ Ру́сския Покро́ве,/ ра́дуйся, Неве́сто Неневе́стная.

Степе́нна, 1-й антифо́н 4-го гла́са. Проки́мен, глас 4: Свяще́нницы Твои́ облеку́тся в пра́вду// и преподо́бнии Твои́ возра́дуются. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Луки́, зача́ло 64.

По 50-м псалме́ стихи́ра, глас 6:

Егда́ в гоне́нии боле́зни сме́ртныя одержа́ша тя,/ священноиспове́дниче Христо́в и́мярек,/ ве́ры правосла́вныя не отступи́л еси́/ и Бо́га ре́вностне прославля́л еси́,/ И́же и воздаде́ ти вене́ц пра́вды,// я́ко побо́рнику необори́му.

Кано́н, его́же краегране́сие кроме́ Богоро́дичнов осми́ пе́сен:

Кре́пость моя́ и пе́ние мое́ Госпо́дь. Глас 5.

Песнь 1

Ирмо́с: Коня́ и вса́дника в мо́ре Чермно́е,/ сокруша́яй бра́ни, мы́шцею высо́кою/ Христо́с истрясе́, Изра́иля же спасе́,// побе́дную песнь пою́ща.

Кре́стною си́лою укрепля́ем,/ изгна́ния многоле́тняя претерпе́л еси́,/ глад и хлад нивочто́же вменя́я, любо́вию к Бо́гу пламене́л еси́./ Те́мже, и́мярек, священноиспове́дник сла́вный яви́лся еси́.

Ру́сския Це́ркве па́стырь до́брый быв,/ поруга́ния, насмея́ния и лжесвиде́тельства претерпе́л еси́/ и безбо́жники кро́тостию и смире́нием обличи́л еси́,/ страда́льче изря́дный, и́мярек.

Во испове́дание ве́ры, я́ко в броню́ кре́пкую, обле́клся еси́, и́мярек,/ и, во́ин Христо́в непобеди́мый я́влься,/ сло́вом Бо́жиим, я́ко мече́м обоюдоо́стрым, враги́ посрами́л еси́.

Богоро́дичен: Разреши́ся кля́тва, печа́ль преста́,/ Благослове́нная бо и Благода́тная Отрокови́ца ве́рным Ра́дость породи́,/ Христа́ Бо́га на́шего.

Песнь 3

Ирмо́с: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х// Це́рковь Твою́ утверди́, Еди́не Бла́же и Человеколю́бче.

Пра́ведных ду́ши в руце́ Бо́жией,/ и не прико́снется их му́ка,/ си́ми словесы́ укрепля́ем, и́мярек крепкоду́шне,/ теле́сная страда́ния му́жественне претерпе́л еси́/ и о́браз испове́дания ве́ры сыново́м ру́сским яви́л еси́.

Огради́вся си́лою кре́стною, и́мярек,/ страда́ния и изгна́ния от безбо́жных претерпе́л еси́/ и, ве́ру непоро́чно сохрани́в,/ в ми́ре благоче́стне пожи́л еси́./ Сего́ ра́ди и вене́ц пра́вды от Христа́ Подвигополо́жника прия́л еси́.

Смути́ся земля́ Ру́сская,/ я́ко опустоши́ ю́ беззако́ние ве́лие,/ ты же, и́мярек великоимени́те, по́двиги испове́дничества благоуха́я,/ я́ко крин се́льный посреде́ пусты́ни, процве́л еси́.

Богоро́дичен: И́же от Отца́ пре́жде всех век рожде́на,/ Ты, Ма́ти Бо́жия, неискусому́жно родила́ еси́./ Те́мже Тя вси, Богоро́дицу, правосла́вно испове́дуем.

Седа́лен, глас 3:

Ненави́дящия Го́спода посрами́л еси́,/ и́же хотя́ху тя, священноиспове́дниче и́мярек, Христа́ отлучи́ти и сме́рти преда́ти./ Ты же, к Бо́гу ум твой впери́в,/ я́ко пти́ца, се́ти ловя́щих изба́вился еси́/ и в кро́вы Небе́сныя возлете́л еси́,/ иде́же, в ли́це новому́чеников и испове́дников Росси́йских пребыва́я,/ мо́лишися о спасе́нии душ на́ших.

Сла́ва, и ны́не, Богоро́дичен:

Ки́йждо, иде́же подвиза́ется, усе́рдно к Тебе́ притека́ет, Богоро́дице,/ несть бо ино́го Прибе́жища, спаса́ющаго ду́ши на́ша, я́ко Ты, Всепе́тая.

Песнь 4

Ирмо́с: Боже́ственное Твое́ разуме́в истоща́ние/ прозорли́во Авваку́м, Христе́, со тре́петом вопия́ше Тебе́:/ во спасе́ние люде́й Твои́х// спасти́ пома́занныя Твоя́ прише́л еси́.

Терпе́нием вооружи́вся, поте́кл еси́ на предлежа́щий ти по́двиг, священноиспове́дниче и́мярек,/ и, преще́ния мучи́телей не убоя́вся,/ непоколеби́м пребы́л еси́, егда́ смути́ся Ру́сская земля́.

Мал бе в бра́тии твое́й, я́коже и Дави́д в ро́де свое́м, / оба́че избра́ тя Госпо́дь, священноиспове́дниче и́мярек,/ на па́стырское де́лание и свиде́тельство сло́ва Бо́жия.

Обле́клся еси́ в свяще́нныя оде́жды, о́тче и́мярек,/ я́же в по́двизе испове́дания невреди́мы сохрани́л еси́,/ те́мже, вшед в черто́г Небе́сный,/ зри́ши Лице́ Све́та Непристу́пнаго.

Богоро́дичен: Невмести́маго во чре́ве прие́мши,/ без боле́зни родила́ еси́, Всенепоро́чная Ма́ти,/ и по рождестве́ Де́ва Нетле́нна пребыла́ еси́.

Песнь 5

Ирмо́с: Одея́йся Све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,// я́ко Еди́н Благоутро́бен.

Я́ко сын дне, во све́те за́поведей Христо́вых па́ству ходи́ти учи́л еси́, о́тче и́мярек,/ и ду́шу твою́ по́двигом испове́дания освяти́л еси́,/ ны́не же по́чести по достоя́нию от земны́х прие́млеши.

Изведе́ тя на по́двиг Госпо́дь,/ егда́ лю́ди росси́йстии отступи́ша Це́ркве Христо́вы,/ и́мже я́ко свети́льник ве́ры яви́лся еси́,/ темни́цы смра́дныя и рабо́ты лю́тыя претерпева́я.

Пре́жде да́же не приити́ дню Госпо́дню вели́кому и стра́шному,/ нощь безбо́жия све́том за́поведей Христо́вых просвеща́л еси́,/ дни лука́выя испове́данием тве́рдым изоблича́я.

Богоро́дичен: Пра́вду и Избавле́ние нам ро́ждши, Христа́, без се́мене,/ естество́ пра́отца от кля́твы свободи́ла еси́, Богоро́дице.

Песнь 6

Ирмо́с: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́/ и от тли возведи́ мя,// я́ко Благоутро́бен.

Егда́ бу́ря гоне́ний Це́рковь Ру́сскую одержа́ше,/ ты, и́мярек блаже́нне о́тче, я́ко па́стырь и́стинный,/ утвержде́ние и по́мощь от Го́спода прие́м,/ во́лны многомяте́жныя невреди́мо преше́л еси́.

Не уразуме́ша безбо́жнии мучи́тели,/ ка́ко за Христа́ стра́ждеши, о́тче и́мярек,/ и в по́двизе твое́м Го́спода испове́дуеши./ Сего́ ра́ди и осуди́шася.

Испо́лнися на тебе́ глаго́л Христо́в, а́ще Мене́ изгна́ша и вас иждену́т./ Те́мже, угото́вав ду́шу твою́ во искуше́ние,/ мно́гая страда́ния, поноше́ния и ско́рби претерпе́л еси́.

Богоро́дичен: Испо́лнися на Тебе́ проро́чество Симео́ново/ и ору́жие про́йде ду́шу Твою́,/ те́мже му́чеником и испове́дником Стена́ Неруши́мая и По́мощь при́сно быва́еши, Богома́ти.

Конда́к, глас 2:

Я́ко звезда́ но́вая Це́ркве Ру́сския яви́лся еси́,/ терпеливоду́шне и́мярек священноиспове́дниче,/ Христа́ Бо́га прославля́я/ и в нощи́ безбо́жия путь ве́рным указу́я./ Те́мже мо́лим тя:/ моли́ нам, сро́дником твои́м,/ в ве́ре Правосла́вней утверди́тися// и спасти́ся душа́м на́шим.

И́кос:

Даждь ми сло́во, Сло́ве Бо́жий,/ по достоя́нию восхвали́ти по́двиги до́бляго и́мярек,/ но́ваго священноиспове́дника, в земли́ Росси́йстей возсия́вшаго,/ в страда́ниих терпели́ваго и в благоче́стии кро́ткаго,/ Небе́сным лико́м сопричте́ннаго,/ иде́же ны́не Триеди́наго Бо́га воспева́ет и мо́лит непреста́нно/ нам, сро́дником его́,/ в ве́ре Правосла́вней утверди́тися/ и спасти́ся душа́м на́шим.

Песнь 7

Ирмо́с: Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:// Бо́же, благослове́н еси́.

Егда́ посети́ Госпо́дь зе́млю Ру́сскую мно́гими испыта́нии грех ра́ди на́ших,/ тогда́ яви́л еси́ тве́рдость в по́двизе твое́м, о́тче сла́вне,/ испове́данием ве́ры Христо́вы пла́мень безбо́жия угаша́я.

Му́жеством и кре́постию ду́шу твою́ украси́в,/ ве́рность Христу́ в житии́ твое́м сохрани́л еси́/ и, мно́гия ско́рби претерпе́в, ве́чнаго поко́я дости́гл еси́,/ иде́же прославля́еши Бо́га оте́ц на́ших.

Отложи́в страх муче́ния, к по́двигу испове́дания му́жественне устреми́лся еси́, о́тче,/ Христа́ еди́наго возжеле́в,/ Ему́же ны́не пое́ши:/ благослове́н еси́, Бо́же оте́ц на́ших.

Богоро́дичен: Бо́га пло́тию родила́ еси́, Всенепоро́чная,/ Еди́наго от Тро́ицы,/ Ему́же вси пое́м:/ Бо́же, благослове́н еси́.

Песнь 8

Ирмо́с: Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте// и превозноси́те во вся ве́ки.

Его́же о́троцы в пещи́ испове́даша,/ Того́ и ты в пла́мени страда́ний пред мучи́тели просла́ви, науча́я ве́рных взыва́ти:/ да благослови́т земля́ Ру́сская Го́спода/ и превозно́сит во вся ве́ки.

Го́спода испове́дайте, я́ко Благ,/ – поуча́л еси́ псало́мски, о́тче и́мярек,/ и Той поспеши́т сыново́м ка́ющимся на спасе́ние,/ Благослове́нный во ве́ки.

Отца́, и Сы́на, и Ду́ха Свята́го житие́м твои́м испове́дал еси́, свя́те,/ помози́ и нам по́двигом до́брым подвиза́тися,/ тече́ние жи́зни соверши́ти и ве́ру непоро́чну сохрани́ти.

Богоро́дичен: Тя, Богоро́дицу Пречи́стую,/ па́че ума́ и словесе́ ро́ждшую Го́спода и при́сно де́вствующую,/ благослови́м и превозно́сим во вся ве́ки.

Песнь 9

Ирмо́с: Иса́ие, лику́й,/ Де́ва име́ во чре́ве и роди́ Сы́на Емману́ила,/ Бо́га же и Челове́ка,/ Восто́к и́мя Ему́,// Его́же велича́юще, Де́ву ублажа́ем.

Сла́ву во испыта́ниих еди́ному Бо́гу возда́л еси́,/ испове́дниче Христо́в приснопа́мятне,/ сего́ ра́ди и Той тя/ в ли́це новому́чеников и испове́дников Росси́йских просла́ви.

Процвете́ Це́рковь на́ша новому́ченики и испове́дники Росси́йскими,/ не отри́ну бо Госпо́дь лю́ди Своя́./ Ты же, священноиспове́дниче сла́вный, вку́пе с ни́ми пребыва́я,/ мо́лиши сохрани́тися ве́ре Правосла́вней в земли́ на́шей.

Ору́жием благоволе́ния венча́ тя Госпо́дь,/ священноиспове́дниче о́тче и́мярек,/ и́мже и нам на враги́ неви́димыя спобо́рствуй/ и моли́ Христа́ Бо́га сохрани́тися ве́ре Правосла́вней в земли́ на́шей.

Богоро́дичен: С новому́ченики и испове́дники Росси́йскими, Пречи́стая, и все́ми святы́ми/ умоли́ Еди́наго во святы́х Почива́ющаго/ сохрани́ти зе́млю на́шу, славосло́вящую Тя во вся ве́ки.

Свети́лен:

Светода́вец Христо́с Бог наш, исхо́ды у́тра и ве́чера украси́вый,/ Све́та Невече́рняго тя, священноиспове́дниче и́мярек, сподо́би./ Те́мже, во све́тлостех святы́х пребыва́я,/ и нас све́том незаходи́мым просвети́,/ да, в ра́дости лику́юще, просла́вим Свет нам Показа́вшаго.

Сла́ва, и ны́не, Богоро́дичен:

Ди́вно и неизрече́нно Рождество́ Твое́, Богоро́дице,/ И́мже спасла́ еси́ род челове́ческий,/ те́мже мо́лим Тя:/ све́том незаходи́мым нас просвети́,/ да, в ра́дости лику́юще, просла́вим Свет нам Показа́вшаго.

На хвали́тех стихи́ры, глас 6.

Подо́бен: Все отло́жше:

Благода́тию свы́ше облече́нный,/ священноиспове́дниче и́мярек,/ я́ко и́стинный па́стырь Христо́в,/ в ве́ре Правосла́вней непоколеби́м пребы́л еси́/ и, гони́телей благословля́я, глаго́лал еси́:/ а́ще и истя́жете те́ло мое́,/ ду́шу не возмо́жете разлучи́ти от любве́ Бо́жия,/ я́же о Христе́ Иису́се Го́споде на́шем,/ на Него́же еди́наго упова́ю// и Ему́ еди́ному возношу́ хвалу́.

Дре́вним испове́дником подо́бяся,/ священноиспове́дниче и́мярек,/ в годи́ну гоне́ний на Це́рковь Ру́сскую/ се́рдцем ве́ровал еси́ пра́во,/ усты́ же Христа́ испове́дал еси́ во спасе́ние/ и, ра́ны нивочто́же вмени́в,/ о срамоте́ поноше́ния небре́гл еси́./ Те́мже, безбо́жных посрами́в мучи́телей,/ блаже́нство в дому́ Госпо́дни улучи́л еси́,// иде́же во ве́ки веко́в Его восхваля́еши.

Воспои́м, боголюби́вии лю́дие,/ пе́сньми и пе́нии духо́вными/ святу́ю па́мять и́мярек достохва́льнаго,/ и́же Правосла́вие добропобе́дным гла́сом/ небоя́зненно пред мучи́тели испове́да/ и мно́гим путь спасе́ния показа́./ Те́мже ра́дуются ны́не А́нгельстии чи́ни/ и сликовству́ют святи́и земли́ на́шея,/ с ни́миже и священноиспове́дник сла́вный// прославля́ет Христа́ Бо́га на́шего.

Сла́ва, глас 8:

Сла́вою и че́стию нетле́нною,/ я́ко подви́жника добропобе́дна,/ венча́ тя Христо́с Подвигополо́жник,/ священноиспове́дниче Христо́в и́мярек,/ и Ца́рствие Небе́сное дарова́,/ иде́же, с собо́ром новому́чеников и испове́дников Росси́йских/ в непристу́пнем све́те пребыва́я,// прославля́еши Тро́ицу Живонача́льную и Неразде́льную.

И ны́не, Богоро́дичен:

Сра́дуются с на́ми у́мная вся Чинонача́лия,/ духо́вный совоку́пльше лик,/ ви́дяще Цари́цу и Влады́чицу всех,/ многоиме́нне ве́рными сла́виму,/ ра́дуются же и ду́си пра́ведных,/ су́щии зри́телие виде́ния,/ на возду́се моле́бно простира́ющу всечестне́и Свои́ ру́це,/ прося́щу умире́ния ми́ру/ и земли́ Ру́сской утвержде́ния,// и спасе́ния душ на́ших.

Славосло́вие вели́кое. И отпу́ст.

НА ЛИТУРГИ́И

Блаже́нна от кано́на, пе́снь 3-я и 6-я.

Проки́мен, глас 7: Испове́мся Тебе́, Го́споди,// всем се́рдцем мои́м. Стих: А́ще пойду́ посреде́ ско́рби, живи́ши мя.

Апо́стол к Ефесе́ем, зача́ло 233.

Аллилу́ия, глас 2: Пра́веднии испове́дятся и́мени Твоему́, и вселя́тся пра́вии с лице́м Твои́м. Стих: Го́споди, Го́споди, Си́ло спасе́ния моего́, осени́л еси́ над главо́ю мое́ю в день бра́ни.

Ева́нгелие от Луки́, зача́ло 64.

Прича́стен: В па́мять ве́чную бу́дет пра́ведник:

Моли́тва

О пресла́вный и добропобе́дный священноиспове́дниче Христо́в и́мярек, па́стырю до́брый, Це́ркве Ру́сския украше́ние, земли́ на́шея до́брое прозябе́ние, сро́дников твои́х похвало́ и о́бразе! Ты, не убоя́вся мучи́телева преще́ния, ве́ру правосла́вную небоя́зненно испове́дал еси́ и, боле́зни и страда́ния с любо́вию ко Христу́ претерпе́в, врата́ми пра́вды в Небе́сное Ца́рство вшел еси́. Те́мже мо́лим тя: вознеси́ ны́не те́плую моли́тву твою́ ко Го́споду о Оте́честве на́шем, да утверди́т его́ в ве́ре Правосла́вней до сконча́ния ве́ка, нас же, чту́щих па́мять твою́, да укрепи́т спаси́тельныя за́поведи Его́ соблюда́ти; да изба́вльшеся от греха́ и ве́чныя му́ки, вку́пе с тобо́ю сподо́бимся воспева́ти достопокланя́емое и́мя Отца́, и Сы́на, и Свята́го Ду́ха, во ве́ки веко́в. Ами́нь.

ВЕ́ЧЕР

На Го́споди, воззва́х: стихи́ры, глас 5:

Прииди́те, ве́рнии,/ восхва́лим преподобному́ченика и́мярек,/ и́же в годи́ну гоне́ний на Це́рковь Ру́сскую,/ ду́шу свою́ за Христа́ положи́в,/ житие́ свое́ венце́м страда́ния увенча́л есть./ Сего́ ра́ди с ли́ки новому́чеников и испове́дников Росси́йских/ Престо́лу Бо́жию предстои́т// и мо́лится о душа́х на́ших.

Прииди́те, мона́шествующих сосло́вие,/ досто́йно ублажи́м преподобному́ченика и́мярек,/ и́же, доброде́телей подви́жник и по́стников украше́ние яви́вся,/ Го́сподеви усе́рдно порабо́тал есть./ Сего́ ра́ди ны́не с ли́ки всех святы́х земли́ Росси́йския/ Престо́лу Бо́жию предстои́т// и мо́лится о душа́х на́ших.

Прииди́те, мучениколю́бцы,/ возвели́чим и́стиннаго преподобному́ченика и́мярек,/ и́же Христа́ ра́ди, у́зы темни́чныя,/ муче́ния тя́жкая и рабо́ты го́рькия претерпе́в,/ лю́тую смерть от безбо́жных прия́л есть./ Сего́ ра́ди с ли́ки ца́рственных страстоте́рпцев/ и всех новому́чеников Росси́йских/ Престо́лу Бо́жию предстои́т// и мо́лится о душа́х на́ших.

Сла́ва, глас 8:

Прииди́те, Росси́йстии собо́ри,/ просла́вим еди́наго от сро́дник на́ших,/ и́же за́поведьми блаже́нств, я́ко ле́ствицею небовосхо́дною,/ в Ца́рствие Бо́жие вни́де/ и, мзду обеща́нную прие́м,/ ра́дуется и весели́тся, Престо́лу Бо́жию предстоя́,/ прославля́я Отца́, и Сы́на, и Свята́го Ду́ха,// Тро́ицу Единосу́щную и Неразде́льную.

И ны́не, Богоро́дичен: Царь Небе́сный:

Вход. Проки́мен дне. Чте́ния 3 му́ченическая.

На стихо́вне стихи́ры, глас 2.

Подо́бен: Егда́ от Дре́ва:

Егда́ оскуде́ ве́ра в земли́ Росси́йстей/ и воста́ша лю́дие непра́веднии на Го́спода и на пома́занника Его́,/ враг же спасе́ния ро́да челове́ческаго/ воздви́же братоуби́йство и брань,/ тогда́ ты, преподобному́чениче и́мярек, ре́вностно моля́ся, взыва́л еси́:/ лю́дие беззако́ннии, преста́ните от грех ва́ших,// да не поги́бнет земля́ Росси́йская.

Стих: Честна́ пред Го́сподем// смерть преподо́бных Его́.

Егда́ гоне́ние бысть на Це́рковь Христо́ву в земли́ Росси́йстей/ и оби́тели мона́шеския от беззако́нных разори́шася,/ хра́ми же ово́щная храни́лища соде́лашася,/ грех ра́ди оте́ц на́ших,/ тогда́ ты, преподобному́чениче и́мярек,/ в покая́нии ко Го́споду моли́лся еси́:/ поми́луй нас, Бо́же, по вели́цей ми́лости Твое́й// моли́твами Богоро́дицы и всех святы́х Твои́х.

Стих: Блаже́н муж, боя́йся Го́спода,// в за́поведех Его́ восхо́щет зело́.

Егда́ обыдо́ша тя гони́телие непра́веднии/ и в темни́цу заточи́ша,/ ра́ны же, поруга́ние и зауше́ния зло́бне да́ша ти,/ тогда́ ты, преподобному́чениче и́мярек,/ те́пле моли́твы возноси́л еси́ ко Го́споду,/ И́же земна́я страда́ния твоя́// в сла́ву ве́чную преложи́л есть.

Сла́ва, глас 8:

Избра́нный Бо́гом от Це́ркве Росси́йския,/ преподобному́ченик яви́лся еси́, и́мярек,/ я́ко во́ин Христо́в добропобе́дный,/ меч духо́вный, моли́тву, во ору́жие изостри́в,/ с челове́ки, де́лающими беззако́ние,/ ника́коже сочта́лся еси́, богому́дре,/ а́ще и бра́тия ти по кро́ви бы́ша,/ но Христо́ву во́инству ве́рен пребы́л еси́./ Сего́ ра́ди ны́не во Ца́рствии Небе́снем лику́еши,/ прославля́я Отца́, и Сы́на, и Свята́го Ду́ха,// и моля́ся спасти́ся душа́м на́шим.

И ны́не, Богоро́дичен: Безневе́стная Де́во:

Тропа́рь, глас 1:

Ве́рный учени́к Христа́ да́же до сме́рти быв,/ преподобному́чениче и́мярек приснопа́мятне,/ по́двиги бо поста́ и кро́вию муче́ний/ зе́млю Ру́сскую освяти́л еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти кре́пость,/ сла́ва Венча́вшему тя,// сла́ва Просла́вльшему тя с новому́ченики Росси́йскими.

НА У́ТРЕНИ

По 1-м стихосло́вии седа́лен, глас 1:

Се́мя ева́нгельское душе́ю твое́ю восприи́м, преподобному́чениче и́мярек,/ поще́ние, я́ко цвет, муче́ние, я́ко плод, прине́сл еси́./ Те́мже, со святы́ми сро́дники на́шими в вертогра́де Небе́снем ликовству́я,/ моли́ спасти́ся душа́м на́шим.

Сла́ва, и ны́не, Богоро́дичен:

Наста́ви ны на путь покая́ния,/ укло́ньшияся при́сно к безпу́тием зол/ и Преблага́го прогне́вавшия Го́спода,/ неискусобра́чная благослове́нная Мари́е, Засту́пнице усе́рдная ро́да христиа́нскаго.

По 2-м стихосло́вии седа́лен, глас 7:

Кто досто́йную похвалу́ принесе́т подвиго́м твои́м, преподо́бне страда́льче и́мярек?/ Воздержа́нием бо и муче́нием сугу́бо Христу́ угоди́л еси́,/ оба́че ева́нгельски неключи́маго раба́ себе́ почита́я,/ у́чиши любо́вию велича́ти Христа́, Подвигополо́жника новому́ченик на́ших.

Сла́ва, и ны́не, Богоро́дичен:

Стена́ и покров еси́, Влады́чице,/ и приста́нище небу́рное всем, в беда́х су́щим/ и к Твоему́ заступле́нию с ве́рою притека́ющим./ Те́мже и мы усе́рдно вопие́м Ти:/ соблюди́ зе́млю Ру́сскую в Правосла́вии и единомы́слии, Де́во Пречи́стая.

Велича́ние:

Велича́ем тя,/ преподобному́чениче и́мярек,/ и чтим по́двиги и страда́ния твоя́,/ я́же за Христа́// претерпе́л еси́.

Псало́м избра́нный:

1-й лик: Весть Госпо́дь путь пра́ведных и путь нечести́вых поги́бнет.

2-й лик: Рабо́тайте Го́сподеви со стра́хом и ра́дуйтеся Ему́ с тре́петом.

1-й лик: Ты же, Го́споди, Засту́пник мой еси́, Сла́ва моя́ и вознося́й главу́ мою́.

2-й лик: Поми́луй мя, Го́споди, я́ко не́мощен есмь, исцели́ мя, Го́споди, я́ко смято́шася ко́сти моя́.

1-й лик: Отступи́те от мене́ вси де́лающии беззако́ние, я́ко услы́ша Госпо́дь глас пла́ча моего́.

2-й лик: Го́споди, Бо́же мой, на Тя упова́х, спаси́ мя от всех гоня́щих мя и изба́ви мя.

1-й лик: По́мощь моя́ от Бо́га, спаса́ющаго пра́выя се́рдцем.

2-й лик: Да упова́ют на Тя зна́ющии и́мя Твое́, я́ко не оста́вил еси́ взыска́ющих Тя, Го́споди.

1-й лик: Ты, Го́споди, сохрани́ши ны и соблюде́ши ны от ро́да сего́ и во век.

2-й лик: Возда́ст ми Госпо́дь по пра́вде мое́й и по чистоте́ руку́ мое́ю возда́ст ми.

1-й лик: С преподо́бным преподо́бен бу́деши и с му́жем непови́нным непови́нен бу́деши.

2-й лик: Зако́н Госпо́день непоро́чен, обраща́яй ду́ши, свиде́тельство Госпо́дне ве́рно, умудря́ющее младе́нцы.

По полиеле́и седа́лен, глас 1:

Преподобному́чениче и́мярек,/ ты, пе́рвее сле́зы и по́ты оби́льно пролива́я,/ ду́шу твою́ от страсте́й очи́стил еси́,/ та́же му́ченическими кровьми́ себе́ сама́го в же́ртву Го́споду прине́сл еси́./ Те́мже ны́не Ему́ дерзнове́нно предстои́ши и мо́лишися о душа́х на́ших.

Сла́ва, и ны́не, Богоро́дичен:

Еди́на кре́пкая Предста́тельница ро́да челове́ческаго, Богоро́дице Де́во,/ Христа́ непреста́нно моли́ с новому́ченики и испове́дники Росси́йскими,/ спасти́ зе́млю на́шу, в не́йже и́мя Твое́ сла́вится при́сно.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех,/ я́же воздаде́ ми? Вся́кое дыха́ние: Ева́нгелие от Ма́рка, зача́ло 37.

По 50-м псалме́ стихи́ра, глас 6:

Егда́ в же́ртву живу́ю/ Го́споду себе́ сама́го прине́сл еси́,/ преподобному́чениче и́мярек,/ отверзо́шася ти врата́ пра́вды,/ и ны́не, вшед в Ца́рство Небе́сное,/ Престо́лу Бо́га Жива́го предстои́ши,// хвалу́ Ему́ с ли́ки новому́ченик Росси́йских возсыла́я.

Кано́н, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,// Бо́гу побе́дную песнь пои́м, вопия́ше.

Христе́ Многоми́лостиве,/ даждь ми ра́зум просла́вити уго́дника Твоего́ преподобному́ченика и́мярек,/ по́двиги по́стническия подъе́мшаго и да́же до кро́ве Тебе́ ра́ди пострада́вшаго.

По́двизи и страда́ния твои́, преподобному́чениче и́мярек, украси́ша Це́рковь Ру́сскую,/ сего́ ра́ди вку́пе с новому́ченики тя велича́ем.

Освяти́ся земля́ Ру́сская по́ты по́стническими и кровьми́ твои́ми, преподо́бне,/ те́мже во оби́тели Небе́сныя всели́лся еси́,/ на си́лу кре́стную упова́ние возлага́я.

Не хотя́ Госпо́дь поги́бели наро́да Росси́йскаго,/ но е́же обрати́тися и жи́ву бы́ти ему́,/ яви́ избра́ннаго преподобному́ченика и́мярек Своего́/ безбо́жныя облича́ти и отпа́дшия от Це́ркве вразумля́ти.

Богоро́дичен: Смире́нно приношу́ Ти моле́ние, благоутро́бная Ма́ти,/ и к Твоему́ прибега́ю милосе́рдию:/ не отврати́ мя, неразу́мнаго, от лица́ Твоего́.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

На си́лу Бо́жию упова́ние возлага́я, преподобному́чениче и́мярек,/ по́двиги по́стническими и кровьми́ му́ченическими освяти́л еси́ зе́млю Ру́сскую,/ сего́ ра́ди во оби́тели Небе́сныя всели́лся еси́.

На ка́мени благоче́стия утверди́вся,/ му́жественне гоне́ния терпе́л еси́/ и ве́чнующаго утеше́ния сподо́бился еси́,/ его́же прича́стники сотвори́ пою́щия тя, и́мярек велему́дренне.

Честна́я и непоро́чная же́ртва был еси́/ во умилостивле́ние наро́да Ру́сскаго, преподобному́чениче и́мярек,/ ны́не и нас в Правосла́вней ве́ре утверди́.

Богоро́дичен: Пода́ждь отпуще́ние грехо́в нам, Богоро́дице,/ зако́на Влады́ку ро́ждшая,/ стра́сти нас ра́ди претерпе́вшаго и спасе́ние нам дарова́вшаго.

Седа́лен, глас 8:

А́ще и уби́ша врази́ тело твое́, преподобному́чениче и́мярек,/ оба́че души́ твоея́ не косну́шася./ Те́мже яви́лся еси́ столп одушевле́нный Це́ркве Росси́йския/ и хода́тай ве́рен о нас, прославля́ющих тя в ли́це новому́чеников.

Сла́ва, и ны́не, Богоро́дичен:

О Всепе́тая Богоро́дице Влады́чице,/ преподо́бных похвало́, му́чеников сла́во,/ А́нгелы восхваля́емая и челове́ки воспева́емая,/ и всего́ ми́ра кре́пкая Помо́щнице,/ изба́ви Це́рковь Ру́сскую вся́каго зла́го обстоя́ния, Еди́на Благослове́нная.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи// от смы́сла чи́ста, о Го́споде пра́зднующи.

Сло́во Бо́жие даде́ тебе́ си́лу непреобори́мую,/ те́мже у́зы тя́жкия Христа́ ра́ди претерпе́л еси́, свя́те и́мярек,/ и соу́з соверше́нства дости́гл еси́.

Ча́сти шу́ия изба́ви и десны́я страны́ о́бщники сотвори́ сро́дники твоя́, преподобному́чениче,/ я́ко му́жественне за Христа́ пострада́л еси́/ и благода́ть за ны моли́тися прия́л еси́.

Си́лою Бо́жиею, в ти де́йствующею, свя́те,/ препобеди́л еси́ наве́ты вражду́ющих проти́ву Це́ркве Ру́сския,/ тща́щихся ю разори́ти и тя сме́рти преда́ти.

Богоро́дичен: Плода́ вкуше́ние ме́ртва мя соде́ла,/ Жи́зни же Дре́во, из Тебе́ я́вльшееся, Пречи́стая, воскреси́/ и ра́йския сла́дости насле́дника сотвори́ мя.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.

О́тче преподо́бне и́мярек,/ по́двиги твои́ми пе́рвее ду́шу твою́ очи́стил еси́,/ последи́ же крове́й светозаре́ньми тьму безбо́жия разгна́л еси́,/ к све́ту И́стины ве́рныя лю́ди наставля́я.

Страда́нием во́льным грехи́ твоя́, преподобному́чениче, я́ко пле́велы, исто́ргл еси́,/ в юг же се́я слеза́ми боже́ственными,/ ра́достию ны́не пожина́еши ве́чныя жи́зни кла́сы.

Ра́нами помрачи́ся добро́та телесе́ твоего́,/ оба́че све́тлость душе́вная презе́льне возсия́ благода́тию Свята́го Ду́ха, преподо́бне страда́льче./ Моли́ приле́жно о хва́лящих тя.

Богоро́дичен: И́же из Тебе́, Влады́чице, ми́ру Рожде́йся,/ кре́пость, пе́ние и спасе́ние бысть погиба́ющим,/ от а́довых врат избавля́я ве́рою Тя блажа́щия.

Песнь 6

Ирмо́с: Жите́йское мо́ре/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:// возведи́ от тли живо́т мой, Многоми́лостиве.

Десни́цею Бо́жиею окормля́емь,/ на воде́ поко́йне воздержа́нием воспита́лся еси́, преподобному́чениче и́мярек,/ и бу́рю безбо́жия во Оте́честве на́шем си́лою моли́тв твои́х утиши́л еси́.

Во́лны нече́стия сокруши́шася о ка́мень ве́ры твоея́, свя́те,/ те́мже моли́ся Христу́ Бо́гу/ сыново́м Росси́йским во благоче́стии пребыва́ти.

Егда́ разлучи́ша безбо́жнии ду́шу твою́ от телесе́,/ па́че Бо́гу соедини́лся еси́, досточу́дне, и Христа́ приобре́л еси́./ Те́мже моли́ся о чту́щих тя.

Богоро́дичен: Ему́же предстоя́т с тре́петом Небе́снии чи́ни,/ Того́ родила́ еси́, Чи́стая, во́лею соедини́вшагося челове́ком за бла́гость./ Моли́ приле́жно, во еже уще́дрити рабы́ Твоя́.

Конда́к, глас 3:

Мирска́го мяте́жа удали́вся,/ до́бре Бо́гу послужи́л еси́,/ во дни же гоне́ний на Це́рковь Ру́сскую/ кровь твою́ за Христа́ пролия́л еси́/ и страда́ньми твои́ми зе́млю на́шу обагри́л еси́./ Те́мже моли́ся, преподобному́чениче и́мярек,/ сохрани́тися ей в Правосла́вии и благоче́стии// до сконча́ния ве́ка.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:// благослове́н еси́, Бо́же оте́ц на́ших.

Водо́ю и Ду́хом в Це́рковь Бо́жию вшед,/ слеза́ми и по́ты любо́вь Христо́ву стяжа́л еси́,/ Его́же ра́ди и смерть претерпе́л еси́, преподобному́чениче./ Моли́ о душа́х на́ших.

Преподо́бнии Твои́, Го́споди, да благословя́т Тя, псало́мски рече́м, ве́рнии./ С си́ми гла́сы приими́ похвалы́ раба́ Твоего́, страстоте́рпца и́мярек,/ его́же израсти́ земля́ Ру́сская.

Сы́нове Це́ркве Ру́сския, ви́дяще, я́ко уте́ши тя Госпо́дь, преподобному́чениче и́мярек,/ и возведе́ от бе́здны страда́ний к Ца́рствию Небе́сному,/ подвиза́ются пе́ти Бо́га оте́ц на́ших.

Даде́ ти Бог, свя́те, достоя́ние спасе́ния,/ я́ко стра́хом Госпо́дним от зла уклони́лся еси́./ Гони́телие же сыно́в Бо́жиих огнь ве́чный себе́ сокро́вищствуют.

Богоро́дичен: Еди́ней Богоблаже́нней, во объя́тиих нося́щей Сы́на Своего́,/ ли́цы новому́чеников Росси́йских вопию́т:/ благослове́на Ты в жена́х и благослове́н Плод чре́ва Твоего́.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.

Боже́ственным жела́нием распала́емь,/ дре́вним му́чеником уподо́бился еси́, преподо́бне и́мярек,/ и лю́тая страда́ния претерпе́л еси́./ Те́мже моли́, да Це́рковь Ру́сская во век не подви́жится.

Милосе́рдный Госпо́дь, ви́дя твоя́ страда́ния и боле́зни,/ десно́ю Свое́ю руко́ю покры́ тя, и́мярек,/ и по́мощь ти подаде́ во огни́ лю́тых испыта́ний.

На Го́спода возлага́яй наде́жду не устраши́тся,/ егда́ огне́м вся суди́тися и́мут./ Ты же, свя́те, сквозе́ огнь муче́ний проше́д,/ в день о́ный нас помяни́.

Богоро́дичен: Егда́ прии́деши во сла́ве суди́ти вся́ческая,/ десны́м овца́м сопричти́ мя, Влады́ко, гре́шнаго, Ма́тере Твоея́ мольба́ми,/ да Тя сла́влю во ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти:/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и Тя ублажа́ем.

Е́же по о́бразу и по подо́бию Бо́жию соблю́д невреди́мо/ и страда́ний Христо́вых о́бщник быв, и́мярек досточу́дне,/ сугу́бым богоплете́нным венце́м украси́лся еси́./ Ны́не же мо́лишися сыново́м Росси́йским спасти́ся.

Сосу́д благово́нен Сло́ву яви́лся еси́,/ а́ще и нището́ю во́льною и му́ками уничиже́н быв,/ те́мже Его́ моли́ земли́ Росси́йския сокруше́ние исцели́ти, преподобному́чениче и́мярек блаже́нне.

Ми́ра су́етнаго кроме́ пребыва́я,/ горе́ зре́ти навы́кл еси́, свя́те,/ отню́дуже ти по́мощь в день лют подаде́ Христо́с/ и очи́сти тя, пре́жде да́же не взят отсю́ду,/ Его́же ны́не при́сно прославля́еши.

Богоро́дичен: Вои́стину превы́шши всея́ тва́ри яви́лася еси́, Влады́чице,/ Бо́га бо всех пло́тию родила́ еси́./ Те́мже Тя Предста́тельницу и́мамы, и сте́ну тве́рду, и наде́жду изве́стну.

Свети́лен:

Со́лнцу ста́вшу, одоле́ враги́ Иису́с Нави́н,/ ты же, пред очи́ма твои́ма вы́ну име́я Со́лнце пра́вды, Христа́ Бо́га на́шего,/ враги́ ви́димыя и неви́димыя посрами́л еси́,/ воздержа́нием и во́льною сме́ртию плоть ду́ху повину́я,/ и Це́ркве на́шея свети́льник был еси́,/ преподобному́чениче и́мярек всехва́льне.

Сла́ва, и ны́не, Богоро́дичен:

Красе́н добро́тами па́че сыно́в челове́ческих Сын Твой, Де́во Чи́стая, яви́ся,/ Его́же умоли́ разреше́ние грехо́в нам да́ти,/ помраче́ние вся́кое в земли́ Росси́йстей потребля́ющи.

На хвали́тех стихи́ры, глас 1.

Подо́бен: Небе́сных чино́в:

Ве́тхую ри́зу пло́ти по́двиги обнови́л еси́,/ плат су́ров муче́ния к о́ной приста́вив,/ ме́хи но́вы доброде́тельми ду́шу соде́лал еси́,/ страда́ний по Христе́ вино́ весе́лием прии́м,/ преподобному́чениче и́мярек,// же́ртву хвале́ния Бо́гу возсыла́я.

Испове́данием ве́ры и́стинныя/ в земли́ Росси́йстей возсия́л еси́,/ и пра́вда с Небесе́ на ту́ю прини́че;/ Го́спода в по́двизех и муче́ниих, хваля́, призыва́л еси́, страда́льче,/ И́же от враг ви́димых и неви́димых спасе́ тя.// Те́мже ны́не тебе́ ра́ди Бо́га восхваля́ем.

Сло́во Бо́жие во усте́х и в се́рдце твое́м име́я,/ преподобному́чениче и́мярек,/ я́ко мече́м обоюдоо́стрым,/ терпе́нием и добропобе́дным страда́нием/ те́рние безбо́жия в земли́ на́шей посе́кл еси́,// словесы́ и де́лы Бо́га восхваля́я.

Младе́нческим незло́бием вооружи́вся,/ я́ко добр во́ин Христо́в пострада́л еси́, преподо́бне,/ Це́ркве Ру́сския ча́да немощна́я огражда́я,/ не преста́й и ны́не моли́ти Христа́ Бо́га,/ из уст младе́нец хвалу́ прие́мшаго,// спасти́ ду́ши на́ша.

Сла́ва, глас 8:

Жите́йское попече́ние отложи́в,/ Небе́снаго Оте́чества, преподо́бне и́мярек, возжеле́л еси́;/ сего́ ра́ди, в земне́м Оте́честве твое́м угожда́я Го́сподеви,/ ве́ры ра́ди да́же до кро́ве подвиза́лся еси́,/ в годи́ну лю́тую ча́дом Це́ркве Ру́сския о́браз быв,/ и ны́не со дерзнове́нием мо́лишися Христу́// о спасе́нии душ на́ших.

И ны́не, Богоро́дичен, глас то́йже:

Велича́ем Тя, Пренепоро́чная,/ Ма́ти Христа́ Бо́га на́шего,/ Ты бо еси́ ору́жие кре́пкое, и стена́ необори́мая,/ и Святы́я Руси́ Держа́вная Засту́пница./ К Тебе́ ны́не прибега́ем/ и Тя на по́мощь призыва́ем,// да изба́виши нас люты́х обстоя́ний.

Славосло́вие вели́кое и отпу́ст.

НА ЛИТУРГИ́И

Блаже́нна от кано́на, пе́снь 3-я и 6-я.

Проки́мен, глас 7: Восхва́лятся преподо́бнии во сла́ве// и возра́дуются на ло́жах свои́х. Стих: Воспо́йте Го́сподеви песнь но́ву, хвале́ние Его́ в це́ркви преподо́бных.

Апо́стол к Тимофе́ю, зача́ло 291.

Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́.

Ева́нгелие от Матфе́я, зача́ло 36.

Прича́стен: В па́мять ве́чную бу́дет пра́ведник:

Моли́тва

О свяще́нная и многострада́льная главо́, преподобному́чениче и́мярек приснопа́мятне, во́ине Христо́в добропобе́дный, Правосла́вныя Ру́сския Це́ркве сы́не ве́рный! Ты, пе́рвее труды́ по́стническими ду́шу твою́ очи́стив, де́монская ополче́ния посрами́л еси́, в годи́ну же безбо́жных гоне́ний терпе́нием му́жески обле́клся еси́ и я́ко же́ртва непоро́чная и благоприя́тная за грехи́ наро́да на́шего Бо́гу прине́слся еси́. Те́мже, я́ко благи́й раб и ве́рный, в ра́дость Го́спода твоего́ вшел еси́.

О преподо́бне и достохва́льне страда́льче, не оста́ви ны́не и нас, сро́дник твои́х, благода́рною любо́вию по́двиг твой почита́ющих и заступле́ния твоего́ прося́щих. Моли́ те́пле Всеблага́го Го́спода на́шего Иису́са Христа́, да утверди́т в Правосла́вии до сконча́ния ве́ка Це́рковь на́шу, Оте́чество и лю́ди, да сохрани́т оби́тели мона́шеския, ве́рныя обе́том и́ноческим, да да́рует нам покая́ние и проще́ние грехо́в и да помо́жет во вся́цем чи́не и зва́нии Ему́ угожда́ти и во всех обстоя́ниих на Него́ Еди́наго упова́ти. Ему́же подоба́ет вся́кая сла́ва, честь и поклоне́ние, со Отце́м и Святы́м Ду́хом, ны́не и при́сно, и во ве́ки веко́в. Ами́нь.

ВЕ́ЧЕР

На Го́споди, воззва́х: стихи́ры, глас 6.

Подо́бен: Тридне́вен:

По́стника доблему́драго,/ испове́дника Христо́ва,/ в годи́ну гоне́ний страда́ния прие́мшаго,/ восхва́лим по до́лгу, ве́рнии,/ преподо́бнаго отца́ и́мярек,// моли́твы его́ в по́мощь призыва́юще.

Ду́ха Свята́го плодо́в испо́лнен быв,/ благо́ю наде́ждою обогати́лся еси́/ и, о ве́чнем помышля́я,/ страда́ния вре́менная нивочто́же вмени́л еси́, и́мярек./ Те́мже со дерзнове́нием// пред мучи́тели Христа́ испове́дал еси́.

Даде́ся ти благода́ть, преподо́бне о́тче и́мярек,/ не то́кмо и́ноческия по́двиги подъя́ти,/ но и во испове́дании Христа́ ра́ди пострада́ти,/ Ему́же ны́не те́пле моли́ся/ Це́ркви на́шей дарова́ти мир// и душа́м на́шим ве́лию ми́лость.

Сла́ва, глас 8:

Преподо́бне о́тче, испове́дниче сла́вне и́мярек,/ ты все упова́ние на Бо́га возложи́л еси́,/ и Той тя просла́ви во Ца́рствии Небе́снем,/ иде́же со сро́дники на́шими,/ новому́ченики и испове́дники Росси́йскими,/ ве́рою, наде́ждею и любо́вию Ему́ угоди́вшими,/ прославля́еши Отца́, и Сы́на, и Свята́го Ду́ха,// Тро́ицу Единосу́щную и Неразде́льную.

И ны́не, Богоро́дичен: Царь Небе́сный:

Вход. Проки́мен дне. Чте́ния три преподо́бническая.

На стихо́вне стихи́ры, глас 2:

Егда́ ума́лися и́стина в земли́ на́шей/ и мно́жество неве́рных воста́ша на Це́рковь Христо́ву,/ в безу́мии свое́м глаго́лющих:/ что нам Госпо́дь есть?/ Тогда́ ты, преподо́бне о́тче и́мярек,/ безбо́жныя твои́м испове́данием посрами́л еси́,// и па́мять их поги́бе с шу́мом.

Стих: Испове́мся Тебе́ в пра́вости се́рдца,// внегда́ научи́ти ми ся судьба́м пра́вды Твоея́.

Егда́ прии́де Госпо́дь испыта́ти лю́ди Своя́,/ блаже́нна тя раба́ и бдя́ща обре́те,/ смире́нием и доброде́тельми укра́шена,/ преподобноиспове́дниче и́мярек всече́стне./ Те́мже мно́гими тя дарова́нии обогати́// и яви́ нам моли́твенника те́пла.

Стих: По́йте Го́сподеви, преподо́бнии Его́,// и испове́дайте па́мять святы́ни Его́.

Егда́ обыдо́ша тя гоня́щии непра́ведно,/ преподобноиспове́дниче о́тче и́мярек,/ тогда́ помина́л еси́ сло́во Госпо́дне:/ несть раб бо́лий го́спода своего́,/ а́ще Мене́ изгна́ша и вас иждену́т./ Те́мже блаже́нства изгна́нных пра́вды ра́ди сподо́бился еси́// и мо́лишися о спасе́нии душ на́ших.

Сла́ва, глас 8:

Прииди́те, вси ве́рнии,/ досто́йно воспои́м отца́ преподо́бнаго,/ сей бо, по́двиг страда́ния и испове́дничества соверши́в/ и последи́ благоче́стно пожи́в,/ Бо́гу в ми́ре ду́шу пре́дал еси́/ и от су́щих зде к ве́чным жили́щем преста́вился еси́,// иде́же мо́лится о душа́х на́ших.

И ны́не, Богоро́дичен: Творе́ц и Изба́витель:

Тропа́рь, глас 2:

Преподобноиспове́дниче о́тче и́мярек,/ во дни гоне́ний безбо́жных на Це́рковь Ру́сскую/ поноше́ния, заточе́ние, изгна́ние и го́рькия рабо́ты/ Христа́ ра́ди претерпе́л еси́,/ и ничто́же разлучи́ тя от любве́ Бо́жия./ Та́же, благоче́стно в ми́ре пожи́в,/ свиде́тельствовал еси́ Го́спода Иису́са Христа́,// Его́же моли́ спасти́ся душа́м на́шим.

НА У́ТРЕНИ

На Бог Госпо́дь: тропа́рь то́йже.

По 1-м стихосло́вии седа́лен, глас 4:

Мно́гая страда́ния му́жественне претерпева́я,/ сове́ты безбо́жных разори́л еси́/ и, от сла́вы по́стническия в сла́ву испове́дническую восходя́,/ сугу́бым венце́м от Подвигополо́жника увенча́лся еси́./ Те́мже моли́ о почита́ющих тя.

Сла́ва, и ны́не, Богоро́дичен:

Недви́жимое утвержде́ние ве́ры/ и упова́ние на́ше во обстоя́ниих,/ Богоро́дицу пе́сньми почти́м:/ ра́дуйся, Правосла́вия огражде́ние,/ ра́дуйся, земли́ на́шея покро́ве,/ ра́дуйся, Неве́сто Неневе́стная.

По 2-м стихосло́вии седа́лен, глас 7:

Кто досто́йную похвалу́ принесе́т подвиго́м твои́м, преподо́бне страда́льче и́мярек?/ Воздержа́нием бо себе́ укра́сив,/ испове́данием Христу́ угоди́л еси́,/ оба́че, неключи́маго раба́ ева́нгельски себе́ помышля́я,/ да́же до конца́ живота́ твоего́ в зако́не Госпо́дни со смире́нием поуча́лся еси́.

Сла́ва, и ны́не, Богоро́дичен:

Стена́ и покро́в еси́, Влады́чице,/ и приста́нище небу́рное всем в беда́х су́щим/ и к Твоему́ заступле́нию с ве́рою притека́ющим./ Те́мже и мы усе́рдно вопие́м Ти:/ соблюди́ нас в Правосла́вии и единомы́слии, Де́во Пречи́стая.

Велича́ние:

Ублажа́ем тя, преподобноиспове́дниче и́мярек,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Псало́м избра́нный:

1-й лик: Терпя́ потерпе́х Го́спода, и внят ми, и услы́ша моли́тву мою́.

2-й лик: Поста́ви на ка́мени но́зе мои́ и испра́ви стопы́ моя́.

1-й лик: Смиря́х посто́м ду́шу мою́.

2-й лик: Полу́нощи воста́х испове́датися Тебе́, седмери́цею днем хвали́х Тя.

1-й лик: Непра́вду возненави́дех и омерзи́х, зако́н же Твой возлюби́х.

2-й лик: Утруди́хся воздыха́нием мои́м, измы́ю на вся́ку нощь ло́же мое́, слеза́ми мои́ми посте́лю мою́ омочу́.

1-й лик: Испове́мся Тебе́ в пра́вости се́рдца, внегда́ научи́ти ми ся судьба́м пра́вды Твоея́.

2-й лик: Изба́ви мя от гоня́щих мя, я́ко укрепи́шася па́че мене́.

1-й лик: За словеса́ усте́н Твои́х аз сохрани́х пути́ же́стоки.

2-й лик: Искуси́л мя еси́, и не обре́теся во мне непра́вда.

1-й лик: Изведи́ из темни́цы ду́шу мою́, испове́датися и́мени Твоему́.

2-й лик: Бог мой еси́ Ты, и испове́мся Тебе́ всем се́рдцем мои́м.

1-й лик: Бла́го есть испове́датися Го́сподеви, и пе́ти и́мени Твоему́, Вы́шний.

2-й лик: Испове́мся Тебе́ в век, я́ко сотвори́л еси́, и терплю́ и́мя Твое́, я́ко бла́го пред преподо́бными Твои́ми.

По полиеле́и седа́лен, глас 1:

Я́ко и́стинный подви́жник, преподо́бне о́тче и́мярек,/ страда́ния и гоне́ния от безбо́жных претерпе́л еси́/ и Христа́ небоя́зненне испове́дал еси́./ По сих же, в ми́ре благоче́стно пожи́в,/ я́ко самови́дец новому́чеников Росси́йских, лю́ди в ве́ре утверди́л еси́./ Ны́не же, во Ца́рствии Бо́жии наслажда́яся жи́зни ве́чныя,/ моли́ спасти́ся душа́м на́шим.

Сла́ва, и ны́не, Богоро́дичен:

Еди́на кре́пкая Предста́тельница ро́ду челове́ческому, Богоро́дице Де́во,/ непреста́нно моли́ с новому́ченики и испове́дники Росси́йскими/ Его́же родила́ еси́ па́че естества́ Бо́га Сло́ва,/ спасти́ зе́млю на́шу, в не́йже и́мя Твое́ восхваля́ется при́сно.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Луки́, зача́ло 64.

По 50-м псалме́ стихи́ра, глас 6:

Преподо́бне о́тче и́мярек,/ ты, пе́рвее от страсте́й себе́ очи́стив,/ слеза́ми ча́стыми и воздыха́ньми мно́гими/ дух кро́ток и незло́бив стяжа́л еси́/ и, по́слежде страда́ния мно́гая претерпе́в,/ плод испове́дания прине́сл еси́./ Ны́не же, предстоя́ Святе́й Тро́ице,/ моли́ Ю́, да поми́лует нас// по вели́цей Свое́й ми́лости.

Кано́н, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на / ви́дя потопля́ема,// Бо́гу побе́дную песнь пои́м, вопия́ше.

Страда́ния и по́двиги твоя́, преподо́бне о́тче и́мярек,/ я́ко трапе́зу духо́вную днесь предлага́еши/ сыно́м ве́рным Це́ркве Ру́сския.

По́ты по́стническими и испове́данием Христа́/ зе́млю Ру́сскую удобри́в, испове́дниче и́мярек,/ к Небе́сным селе́нием возше́л еси́.

Укрепи́ Госпо́дь в страда́ниих преподо́бнаго Своего́ и́мярек,/ да коле́блемыя в ве́ре испове́данием вразуми́т,/ я́ко хоте́нием не хотя́й сме́рти гре́шных,/ но е́же обрати́тися и живы́м им бы́ти.

Богоро́дичен: Ра́бское приноша́ю Ти моле́ние, неразу́мный аз,/ и к Твоему́ прибега́ю благоутро́бному милосе́рдию:/ не отве́ржи мене́, Пречи́стая.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени // испове́дания Твоего́.

А́гнца Бо́жия пропове́дая,/ страда́ния за Христа́, я́ко а́гнец, кро́тко претерпе́л еси́, преподо́бне о́тче и́мярек,/ те́мже о ка́мень испове́дания твоего́ безбо́жнии преткну́шася.

На ка́мени благоче́стия утверди́вся и ве́чнующаго наслажде́ния взыска́в,/ непоколеби́м в гоне́ниих пребы́л еси́, и́мярек крепкоду́шне./ Сего́ ра́ди прича́стники Ца́рствия Небе́снаго и нас сотвори́, пою́щих тя.

Во испове́дание ве́ры, я́ко в броню́ кре́пкую, обле́клся еси́, и́мярек,/ и, во́ин Христо́в непобеди́мый я́влься,/ сло́вом Бо́жиим, я́ко мече́м обоюдоо́стрым, враги́ посрами́л еси́.

Богоро́дичен: Даде́ся нам ми́лость Тобо́ю, Богоро́дице,/ Царь бо и Влады́ка ми́ра из Тебе́ вопло́щься,/ стра́сти нас ра́ди претерпе́ и спасе́ние дарова́.

Седа́лен, глас 4:

Ненави́дящия Го́спода посрами́л еси́,/ и́же хотя́ху тя, преподобноиспове́дниче и́мярек, Христа́ отлучи́ти и сме́рти преда́ти./ Ты же, к Бо́гу ум твой впери́в,/ я́ко пти́ца, се́ти ловя́щих изба́вился еси́/ и в кро́вы Небе́сныя возлете́л еси́,/ иде́же, в ли́це новому́чеников и испове́дников Росси́йских пребыва́я,/ мо́лишися о спасе́нии душ на́ших.

Сла́ва, и ны́не, Богоро́дичен:

О Всепе́тая Богоро́дице Влады́чице,/ преподо́бных похвало́, испове́дников ве́нче,/ А́нгелы сла́вимая и челове́ки воспева́емая,/ и всего́ ми́ра ди́вная Помо́щнице,/ изба́ви Це́рковь Ру́сскую вся́каго обстоя́ния, Еди́на Благослове́нная.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я це́рковь/ Боголе́пно пое́т, взыва́ющи// от смы́сла чи́ста, о Го́споде пра́зднующи.

У́зы и страда́ния Христа́ ра́ди претерпе́л еси́, свя́те и́мярек,/ сло́во бо кре́стное бысть тебе́ кре́пость и си́ла./ Те́мже, мучи́тельства страсте́й избе́гнув,/ любве́ Бо́жия дости́гл еси́.

Шу́ия ча́сти моли́ изба́вити нас, чту́щих тя, и́мярек,/ я́ко до́бре за Еди́наго Пра́веднаго пострада́л еси́,/ и́же венце́м сла́вы украси́ тя и ча́сти святы́х сподо́би.

Терпе́нием вооружи́вся,/ поте́кл еси́ на предлежа́щий ти по́двиг, преподобноиспове́дниче и́мярек./ Егда́ же безбо́жнии воста́ша, преще́ний их не убоя́лся еси́/ и непоколеби́м пребы́л еси́.

Богоро́дичен: Дре́ва вкуше́ние ме́ртва мя соде́ла,/ жи́зни же Дре́во из Тебе́ я́вльшееся, Пречи́стая, воскреси́ мя/ и ра́йския сла́дости насле́дника сотвори́.

Песнь 5

Ирмо́с: Бо́жиим све́том Твои́м, Бла́же,/ у́треннюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.

Я́ко сын дне, во све́те за́поведей Христо́вых ходи́л еси́, о́тче и́мярек,/ и ду́шу твою́ по́двигом испове́дания освяти́л еси́,/ ны́не же по́чести по достоя́нию от земны́х прие́млеши.

Грехи́ ю́ности и неве́дения страда́нием твои́м, свя́те и́мярек, я́ко пле́велы, исто́ргл еси́,/ в юг же се́я слеза́ми боже́ственными,/ ве́чныя жи́зни кла́сы ра́достию ны́не пожина́еши.

Увяде́ в страда́ниих добро́та телесе́ твоего́, преподо́бне,/ оба́че све́тлость душе́вная благода́тию Свята́го Ду́ха возсия́./ Моли́ приле́жно о почита́ющих тя.

Богоро́дичен: Пра́вду и Избавле́ние, Христа́, нам ро́ждши, Пречи́стая Де́во,/ естество́ пра́отца от кля́твы свободи́ла еси́.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:// возведи́ от тли живо́т мой, Многоми́лостиве.

Про́мыслом Бо́жиим направля́ем,/ на воде́ поко́йне воздержа́ния и послуша́ния воспита́лся еси́, преподо́бне о́тче и́мярек,/ те́мже бу́рю безбо́жия во Оте́честве на́шем/ неврежде́нно преплы́л еси́.

Испо́лнися на тебе́ глаго́л Христо́в:/ а́ще Мене́ изгна́ша и вас иждену́т./ Те́мже, угото́вав ду́шу твою́ во искуше́ние,/ мно́гая страда́ния, поноше́ния и ско́рби претерпе́л еси́.

Поруга́ния мно́гая и ра́ны не разлучи́ша тя от любве́ Бо́жия, и́мярек досточу́дне,/ помози́ и нам в любви́ пребыва́ти/ и еди́ными усты́ и се́рдцем Бо́га сла́вити.

Богоро́дичен: Родила́ еси́, Пречи́стая Де́во, за бла́гость Соедини́вшагося с челове́ком,/ на Него́же не сме́ют чи́ни а́нгельстии взира́ти./ Того́ моли́ приле́жно спасти́ рабы́ Твоя́.

Конда́к, глас 2:

Я́ко звезда́ но́вая Це́ркве Ру́сския яви́лся еси́,/ терпеливоду́шне и́мярек преподобноиспове́дниче,/ Христа́ Бо́га прославля́я/ и в нощи́ безбо́жия путь ве́рным указу́я./ Те́мже мо́лим тя:/ моли́ нам, сро́дником твои́м,/ в ве́ре Правосла́вней утверди́тися// и спасти́ся душа́м на́шим.

И́кос:

По́двиги мона́шеския пе́рвее прие́м, о́тче и́мярек,/ та́же испове́данием сла́вным у́зы страстны́я в коне́ц расто́ргл еси́,/ и, я́ко пти́ца, изба́влься от се́ти ловя́щих,/ высоты́ духо́вныя дости́гл еси́ и мно́гим путь спасе́ния показа́л еси́./ Ны́не моли́ спасти́ся душа́м на́шим.

Песнь 7

Ирмо́с: Росода́тельну убо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:// благослове́н еси́, Бо́же оте́ц на́ших.

Вси новому́ченицы и испове́дницы Росси́йстии прославля́ют Тя, Го́споди,/ с ни́миже и преподобноиспове́дник сла́вный и́мярек Тебе́ предстои́т/ и мо́лится за зе́млю на́шу.

Уте́ши тя Госпо́дь в день печа́ли/ и от страда́ний жи́зни многотру́дныя к Ца́рствию Небе́сному возведе́./ Сего́ ра́ди ны́не в ра́дости прославля́еши Бо́га оте́ц на́ших.

Му́жеством и кре́постию ду́шу твою́ украси́в,/ ве́рность Христу́ в житии́ твое́м сохрани́л еси́/ и, мно́гия ско́рби претерпе́в, ве́чнаго поко́я дости́гл еси́,/ иде́же прославля́еши Бо́га оте́ц на́ших.

Богоро́дичен: Бо́га пло́тию родила́ еси́, Всенепоро́чная, Еди́наго от Тро́ицы,/ Ему́же вси пое́м:/ Бо́же, благослове́н еси́.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.

Его́же о́троцы в пещи́ испове́даша,/ Того́ и ты в пла́мени страда́ний пред мучи́тели просла́ви, усе́рдно взыва́я:/ да благослови́т земля́ Ру́сская Го́спода/ и превозно́сит во вся ве́ки.

Внегда́ скорбе́ти ти, услы́ша Госпо́дь твоя́ боле́зни/ и десно́ю Свое́ю руко́ю покры́,/ е́же не опали́тися ти огне́м искуше́ний/ и ве́рну до конца́ пребы́ти, взыва́я:/ Го́спода по́йте и превозноси́те Его́ во вся ве́ки.

Отца́, Сы́на, и Ду́ха Свята́го, Тро́ицу Единосу́щную и Неразде́льную,/ житие́м твои́м испове́дал еси́, свя́те и́мярек,/ помози́ и нам по́двигом до́брым подвиза́тися,/ тече́ние жи́зни соверши́ти и ве́ру непоро́чну сохрани́ти.

Богоро́дичен: Егда́ прии́деши во сла́ве суди́ти вся́ческим,/ десны́м мя овца́м сопричти́, Влады́ко, гре́шнаго,/ Ма́тере Твоея́ мольба́ми,/ да Тя сла́влю во ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и Тя ублажа́ем.

Сла́ву во испыта́ниих еди́ному Бо́гу возда́л еси́,/ преподобноиспове́дниче Христо́в приснопа́мятне,/ сего́ ра́ди и Той тя в ли́це новому́чеников и испове́дников Росси́йских просла́ви.

Нището́ю во́льною и страда́нием за Христа́ очи́стився,/ сосу́д благопотре́бен яви́лся еси́, преподо́бне о́тче и́мярек блаже́нне./ Те́мже за зе́млю Ру́сскую не преста́й моли́тися, приснопа́мятне.

Ми́ра су́етнаго удали́вся,/ горе́ се́рдце име́л еси́, о́тче и́мярек,/ сего́ ра́ди по́мощь подаде́ ти Христо́с/ и терпе́нием обогати́./ Ему́же ны́не в ра́дости со все́ми святы́ми предстои́ши.

Богоро́дичен: Вои́стину превы́шши всея́ тва́ри Ты еси́, Влады́чице,/ Бо́га бо, Творца́ всех, родила́ еси́ пло́тию./ Те́мже Тя Предста́тельницу и́мамы/ и Тобо́ю спасе́ние улучи́ти наде́емся.

Свети́лен:

Светода́вец Христо́с Бог наш, исхо́ды у́тра и ве́чера украси́вый,/ Све́та Невече́рняго тя, преподобноиспове́дниче и́мярек, сподо́би./ Те́мже, во све́тлостех святы́х пребыва́я,/ и нас све́том незаходи́мым просвети́,/ да, в ра́дости лику́юще, просла́вим Свет нам Показа́вшаго.

Сла́ва, и ны́не, Богоро́дичен:

Ди́вно и неизрече́нно Рождество́ Твое́, Богоро́дице,/ И́мже спасла́ еси́ род челове́ческий,/ те́мже мо́лим Тя:/ све́том незаходи́мым нас просвети́,/ да, в ра́дости лику́юще, просла́вим Свет нам Показа́вшаго.

На хвали́тех стихи́ры, глас 4:

Боже́ственным жела́нием распала́яся,/ ми́ра су́етнаго отре́клся еси́/ и, Бо́жиим Про́мыслом води́мь,/ пред мучи́тели предста́л еси́/ и Христа́ небоя́зненно испове́дал еси́./ Его́же ны́не моли́, преподобноиспове́дниче и́мярек,// спасти́ся душа́м на́шим.

Испове́данием ве́ры и́стинныя/ ду́шу твою́ украси́л еси́,/ страда́нием и по́двиги до́брыми/ пра́вило ве́ры и о́браз благоче́стия нам яви́л еси́./ Те́мже тебе́ ра́ди, свя́те и́мярек,/ Бо́га усе́рдно прославля́ем// и мо́лимся спасти́ся душа́м на́шим.

Христо́вым незло́бием вооружи́вся,/ я́ко добр во́ин подвиза́лся еси́/ и, о́браз ве́рным показу́я,/ за гони́телей моли́лся еси́./ Сего́ ра́ди ны́не Престо́лу Бо́жию предстои́ши/ и помина́еши любо́вию почита́ющих па́мять твою́,// преподобноиспове́дниче и́мярек.

Сла́ва, глас 8:

Все отложи́в жите́йское попече́ние,/ Небе́снаго Оте́чества возжеле́л еси́,/ сего́ ра́ди, угожда́я Го́сподеви,/ в преподо́бии и пра́вде подвиза́лся еси́,/ в годи́ну же лю́тую ча́да Це́ркве Ру́сския утвержда́я,/ венце́м испове́дничества украси́лся еси́./ И ны́не мо́лишися, преподо́бне и́мярек, Христу́ Бо́гу// о спасе́нии душ на́ших.

И ны́не, Богоро́дичен, глас то́йже: Богоро́дице, Ты еси́ Лоза́ и́стинная:

Славосло́вие вели́кое и отпу́ст.

НА ЛИТУРГИ́И

Блаже́нна от кано́на, пе́снь 3-я и 6-я.

Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми?

Апо́стол к Гала́том, зача́ло 213.

Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́.

Ева́нгелие от Луки́, зача́ло 24.

Прича́стен: В па́мять ве́чную бу́дет пра́ведник:

Моли́тва

Преподо́бне о́тче и́мярек приснопа́мятне, испове́дниче Христо́в добропобе́дный, Це́ркве Ру́сския ве́рный сы́не! Ты, мно́гими по́двиги ду́шу твою́ очистив, любо́вь Христо́ву стяжа́л еси́. Во дни же гоне́ний на Це́рковь Ру́сскую преще́ний безбо́жных не убоя́лся еси́ и тя́жкая страда́ния претерпе́л еси́. Та́же, Про́мыслом Бо́жиим сохране́н, я́ко самови́дец му́чеников, пра́вило ве́ры и о́браз благоче́стия лю́дем яви́л еси́. И ны́не, Престо́лу Бо́жию предстоя́, не оста́ви сро́дник твои́х, благода́рною любо́вию по́двиг твой почита́ющих и заступле́ния твоего́ прося́щих. Моли́ Всеблага́го Го́спода нашего́ Иису́са Христа́, да утверди́т в Правосла́вии Оте́чество на́ше, нам же да́рует покая́ние и́стинное, любо́вь и братолю́бие нелицеме́рное, да еди́ными усты́ и еди́нем се́рдцем сла́вим и воспева́ем всечестно́е и великоле́пое и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

ВЕ́ЧЕР

На Го́споди, воззва́х: стихи́ры, глас 2.

Подо́бен: Ки́ими похва́льными венцы́:

Ки́ими похва́льными венцы́/ увязе́м страда́льца Христо́ва и́мярек,/ Це́ркве Росси́йския ве́рнаго сы́на?/ И́же устраше́ний безбо́жных не убоя́вся,/ на беззако́нное суди́ще взы́де/ и, я́ко дре́вний му́ченик, о уби́йцех моля́шеся, вопия́:// Го́споди, прости́ им, не ве́дят бо, что творя́т.

Ки́ими досто́йными пе́сньми/ воспое́м новому́ченика Христо́ва и́мярек?/ И́же, за́поведи Госпо́дни испо́лнив,/ у́зы темни́чныя, труды́ го́рькия и изгна́ния претерпе́/ и да́же до сме́рти Христу́ ве́рным пребы́сть./ Ны́не же мо́лится дарова́ти нам// мир и ве́лию ми́лость.

Ки́ими пе́сненными добро́тами/ просла́вим но́ваго му́ченика Росси́йскаго и́мярек?/ И́же, во страда́нии кре́пость яви́в,/ си́лою Христо́вою безбо́жныя одоле́/ и сме́ртию свое́ю воскресе́ние Христо́во пропове́да./ Ны́не же у престо́ла Бо́жия с ли́ки новому́ченик предстои́т// и мо́лится спасти́ся душа́м на́шим.

Слава, глас 8:

А́ще и уби́ша те́ло твое́ многострада́льное, му́чениче и́мярек,/ и кровь твою́ непови́нную пролия́ша нечести́вии,/ оба́че душа́ твоя́, я́ко пти́ца, изба́вися от се́ти ловя́щих./ Сего́ ра́ди, свя́те, обре́л еси́ поко́й в черто́зех Небе́сных,/ иде́же прославля́еши Отца́, и Сы́на, и Свята́го Ду́ха,// Тро́ицу Единосу́щную и Неразде́льную.

И ны́не, Богоро́дичен: Царь Небе́сный:

Вход. Проки́мен дне. И чте́ния 3 му́ченическая.

На стихо́вне стихи́ры, глас 4.

Подо́бен: Я́ко до́бля:

Я́ко благи́й раб и ве́рный,/ собира́я сокро́вище не ги́блющее,/ но в живо́т ве́чный пребыва́ющее,/ тала́нт, вруче́нный ти Го́сподем,/ муче́нием преумно́жил еси́,/ страда́льче сла́вный и́мярек,/ и в ра́дость Го́спода твоего́ вшел еси́./ Те́мже моли́ усе́рдно// спасти́ся душа́м на́шим.

Стих: Пра́ведник, я́ко фи́никс, процвете́т,// я́ко кедр, и́же в Лива́не, умно́жится.

В нощи́ безбо́жных гоне́ний/ на Це́рковь Ру́сскую/ прии́де испыта́ти ду́шу твою́ Госпо́дь/ и блаже́ннаго тя раба́/ бдя́ща вои́стинну обре́те,/ всече́стне му́чениче и́мярек./ И ктому́ нарече́ тя дру́га и́скренняго,/ и сонасле́дника Ца́рствия Небе́снаго,// и моли́твенника те́пла о душа́х на́ших.

Стих: Насажде́ни в дому́ Госпо́дни,// во дво́рех Бо́га на́шего процвету́т.

Исполня́ются на му́ченицех словеса́ Христо́ва:/ несть раб бо́лий Го́спода своего́,/ Мене́ изгна́ша и вас иждену́т./ Ты у́бо, му́чениче до́блий и́мярек,/ любо́вь соверше́нну стяжа́в,/ ду́шу твою́ за Христа́ положи́л еси́/ и блаже́нство изгна́нных пра́вды ра́ди дости́гл еси́./ Те́мже, ны́не Престо́лу Бо́жию предстоя́,// моли́ спасти́ся душа́м на́шим.

Сла́ва, глас 8:

Прииди́те, мучениколю́бцы вси,/ благоче́стно воспои́м Христо́ва страстоте́рпца сла́внаго и́мярек,/ тече́ние до́бре соверши́вша/ и ве́ру правосла́вную сохра́ньша./ Сей бо, безбо́жных ко́зни сокруши́в/ и кро́вию свое́ю зе́млю Ру́сскую освяти́в,/ от ми́ра сего́ вре́меннаго преста́вися к ве́чному/ и от Вседержи́тельныя десни́цы прия́т вене́ц пра́вды./ Те́мже сла́дости ра́йскаго блаже́нства наслажда́ется/ и Престо́лу Бо́жию предстои́т,// прославля́я Тро́ицу Единосу́щную и Неразде́льную.

И ны́не, Богоро́дичен: Храм и Дверь еси́:

Тропа́рь, глас 4:

Му́ченик Твой, Го́споди, и́мярек,/ во страда́нии свое́м вене́ц прия́т нетле́нный от Тебе́, Бо́га на́шего,/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

НА У́ТРЕНИ

По 1-м стихосло́вии седа́лен, глас 4:

Непоколеби́мь во испове́дании ве́ры пребы́л еси́, страда́льче и́мярек,/ егда́ мучи́телие понужда́ху тя отрещи́ся Христа́./ Те́мже смерть Того́ ра́ди му́жественне претерпе́л еси́/ и моли́твенник те́плый о душа́х на́ших яви́лся еси́.

Сла́ва, и ны́не, Богоро́дичен:

О Всепе́тая Богоро́дице Влады́чице,/ му́чеников испове́дание и ве́нче,/ А́нгелы сла́вимая и челове́ки воспева́емая,/ и всего́ ми́ра возжеле́нная Помо́щнице,/ изба́ви Це́рковь Ру́сскую вся́каго обстоя́ния, Еди́на Благослове́нная.

По 2-м стихосло́вии седа́лен, глас 4:

Страда́ния лю́тая до́блественне претерпева́я, му́чениче и́мярек,/ ева́нгельския за́поведи соблю́л еси́/ и, я́ко до́брый и ве́рный раб, в ра́дость Го́спода твоего́ вшел еси́,/ И́же воздаде́ ти по пра́вде твое́й/ и яви́ лю́дем росси́йским спобо́рника необори́ма.

Сла́ва, и ны́не, Богоро́дичен:

Стена́ необори́мая ве́рным и му́чеником похвала́ Ты еси́, Богоро́дице Де́во,/ к Тебе́ бо прибега́юще, невреди́ми пребыва́ем и усе́рдную Моли́твенницу и́мамы./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.

Велича́ние:

Велича́ем тя,/ страстоте́рпче святы́й и́мярек,/ и чтим честна́я страда́ния твоя́,/ я́же за Христа́// претерпе́л еси́.

Псало́м избра́нный:

1-й лик: Бог нам Прибе́жище и Си́ла, Помо́щник в ско́рбех, обре́тших ны зело́.

2-й лик: Мене́ жда́ша гре́шницы погуби́ти мя, свиде́ния Твоя́ разуме́х.

1-й лик: Глаго́лах о свиде́ниих Твои́х пред цари́ и не стыдя́хся.

2-й лик: Вси язы́цы обыдо́ша мя, и и́менем Госпо́дним противля́хся им.

1-й лик: Аз на ра́ны гото́в: и бых я́звен весь день.

2-й лик: Тебе́ ра́ди умерщвля́емся: вмени́хомся я́ко о́вцы заколе́ния.

1-й лик: Госпо́дь утвержде́ние мое́: и Изба́витель мой: и упова́ю на Него́.

2-й лик: Кре́пость моя́ и пе́ние мое́ Госпо́дь, и бысть мне во спасе́ние.

1-й лик: Ты, Го́споди, сохрани́ши ны и соблюде́ши ны от ро́да сего́ и во век.

2-й лик: Искуси́л ны еси́, Бо́же, разже́гл ны еси́, я́коже разжиза́ется сребро́.

По полиеле́и седа́лен, глас 4:

Ско́рби, сле́зы и страда́ния за Христа́ от безбо́жных бра́тий претерпе́в на земли́, му́чениче и́мярек,/ ны́не жи́зни ве́чныя ра́достне у Престо́ла Бо́жия наслажда́ешися/ и мо́лишися непреста́нно о душа́х на́ших.

Сла́ва, и ны́не, Богоро́дичен:

Непоколеби́мое утвержде́ние ве́ры/ и при́сное прибе́жище душ на́ших,/ Богоро́дицу пе́сньми велича́ем, ве́рнии:/ ра́дуйся, Правосла́вия огражде́ние,/ ра́дуйся, земли́ Ру́сския покро́ве,/ ра́дуйся, Неве́сто неневе́стная.

Степе́нна, 1-й антифо́н 4-го гла́са. Проки́мен, глас 4: Го́споди, Тебе́ ра́ди// умерщвля́еми есмы́ весь день. Стих: Вмени́хомся я́ко о́вцы заколе́ния. Вся́кое дыха́ние: Ева́нгелие от Луки́, зача́ло 63 (12, 2–7).

По 50-м псалме́ стихи́ра, глас 6:

К Бо́гу Вы́шнему Живо́му/ воззва́л еси́, му́чениче добропобе́дне и́мярек:/ поми́луй мя, Го́споди,/ я́ко врази́ нечести́вии попира́ют мя./ Той же изба́ви ду́шу твою́ от сме́рти,/ о́чи от слез и но́зе от поползнове́ния,/ и со святы́ми земли́ Ру́сския// во све́те живы́х просла́ви тя.

Кано́н, глас 5:

Песнь 1

Ирмо́с: Коня́ и вса́дника в мо́ре Чермно́е,/ сокруша́яй бра́ни, мы́шцею высо́кою/ Христо́с истрясе́,/ Изра́иля же спасе́,// побе́дную песнь пою́ща.

Кро́вными муче́нии вшел еси́ в Небе́сная селе́ния, и́мярек сла́вне,/ я́коже дре́вле Изра́иль в зе́млю обетова́нную, фарао́ном гони́мь./ Ны́не же, Престо́лу Святы́я Тро́ицы предстоя́,/ моли́ о чту́щих святу́ю па́мять твою́.

Ру́сския Це́ркве сы́не ве́рный и́мярек, и страда́льче изря́дный,/ ты сквозе́ огнь и во́ду муче́ний побе́дно проше́л еси́./ Те́мже и Госпо́дь Мучениколю́бец угото́ва ти поко́й ве́чный.

Егда́ прии́де на зе́млю Ру́сскую годи́на безбо́жия,/ кре́пость во испове́дании ве́ры и кро́тость во страда́нии яви́л еси́, до́блий му́чениче,/ моля́ся о убива́ющих тя.

Богоро́дичен: Разреши́ся кля́тва, печа́ль преста́,/ Благослове́нная бо и Благода́тная Богоро́дица ве́рным Ра́дость породи́,/ Христа́, Спасе́ние ми́ра.

Песнь 3

Ирмо́с: Водрузи́вый на ничесо́мже зе́млю повеле́нием Твои́м,/ и пове́сивый неодержи́мо тяготе́ющую,/ на недви́жимем, Христе́, ка́мени за́поведей Твои́х,/ Це́рковь Твою́ утверди́,// еди́не Бла́же и Человеколю́бче.

Пра́ведных ду́ши в руце́ Бо́жией и не прико́снется их му́ка,/ се́ю наде́ждею укрепля́емь, и́мярек крепкоду́шне,/ теле́сная страда́ния му́жественне терпе́л еси́.

Оде́явся си́лою кре́стною,/ противоста́л еси́, и́мярек, пролива́ющим кровь непови́нную/ и не убоя́лся еси́ и́стину возвеща́ти враго́м Це́ркве Христо́вы.

Смяте́ся земля́ Ру́сская, поне́же беззако́нию предаде́ся,/ ты же, му́чениче и́мярек пресла́вне,/ зако́н Бо́жий небоя́зненно исполня́я,/ непоколеби́мь Ца́рствия ра́ди Бо́жия яви́лся еси́.

Богоро́дичен: Ты, Ма́ти Бо́жия, неизрече́нно родила́ еси́ Сы́на,/ от Отца́ пре́жде век рожде́нна./ Те́мже Тя Богоро́дицу правосла́вно велича́ем.

Седа́лен, глас 3:

Глад, гоне́ния ве́лия, лише́ния разли́чная,/ ско́рби мно́гия, тесноту́ и во у́зах го́рькия рабо́ты/ му́жественне претерпе́л еси́ от ненави́дящих Го́спода, страда́льче и́мярек,/ и ничто́же возмо́же разлучи́ти тя от любве́ Христо́вы,/ Его́же ра́ди и смерть му́ченическую прия́л еси́./ Мы же тя, я́ко те́плаго предста́теля к Нему́ стяжа́вше,/ достодо́лжно прославля́ем.

Сла́ва, и ны́не, Богоро́дичен:

Ки́йждо иде́же спаса́ется, та́мо пра́ведно и притека́ет:/ и ко́е ино́е прибе́жище, я́ко Ты, Богоро́дице,/ оте́чества на́шего Усе́рдная Засту́пница?

Песнь 4

Ирмо́с: Боже́ственное Твое́ разуме́в истоща́ние/ прозорли́во Авваку́м, Христе́, со тре́петом вопия́ше Тебе́:/ во спасе́ние люде́й Твои́х// спасти́ пома́занныя Твоя́ прише́л еси́.

Егда́ смяте́ся земля́ Ру́сская,/ ты, страда́льче и́мярек, я́ко добр во́ин Христо́в,/ терпе́нием поте́кл еси́ на предлежа́щий по́двиг/ и, багряни́цею крове́й оде́явся,/ му́ченически пострада́л еси́.

Поне́же в ма́лом ве́рен раб яви́лся еси́, сла́вне,/ Госпо́дь вя́щший дар ти вручи́,/ е́же испове́дати пред мучи́тели Бо́га и́стиннаго,/ Его́же ра́ди и пострада́л еси́.

Попуще́нием Бо́жиим бысть гоне́ние на Це́рковь Бо́жию в стране́ Росси́йстей,/ ты же, му́чениче, я́ко до́блий во́ин Христо́в,/ непоколеби́мь в за́поведех Госпо́дних пребы́л еси́.

Богоро́дичен: Зачала́ еси́ нетле́нно во чре́ве, Пречи́стая,/ и без боле́зни Бо́га пло́тию родила́ еси́,/ и по рождестве́ Де́ва пребыла́ еси́.

Песнь 5

Ирмо́с: Одея́йся све́том, я́ко ри́зою,/ к Тебе́ у́тренюю/ и Тебе́ зову́:/ ду́шу мою́ просвети́ омраче́нную, Христе́,// я́ко еди́н Благоутро́бен.

Я́ко сын дне, на Не́бо душе́ю твое́ю возше́л еси́, страда́льче и́мярек,/ и зе́млю Ру́сскую кро́вию твое́ю ороси́л еси́./ Сего́ ра́ди Не́бо и земля́ ны́не тя совоку́пно велича́ют.

Ни гоне́ние лю́тое, ни у́зы темни́чныя,/ ни рабо́ты го́рькия, ни скорбь, ни теснота́/ возмого́ша тя отлучи́ти от любве́ Бо́жия, му́чениче,/ оба́че, Христо́м укрепля́емь, вся препобеди́л еси́.

Ве́рен быв Це́ркви Бо́жией,/ и в чистоте́ соблюда́я еди́нство ея́,/ чужда́лся еси́ разделе́ний, блаже́нне,/ и при́сно моли́лся еси́ о первоиера́рсе Росси́йстем.

Богоро́дичен: Покро́в, заступле́ние и утеше́ние в напа́стех и злых обстоя́ниих Ты еси́, Богоро́дице./ Сего́ ра́ди благода́рственно Тя велича́ем.

Песнь 6

Ирмо́с: Неистовству́ющееся бу́рею душетле́нною,/ Влады́ко Христе́, страсте́й мо́ре укроти́,/ и от тли возведи́ мя,// я́ко Благоутро́бен.

Егда́ бу́ря гоне́ний одержа́ше кора́бль Це́ркве Ру́сския,/ ты, му́чениче, небоя́зненне и неисхо́дне в нем пребы́л еси́,/ име́я Ко́рмчаго Сама́го Христа́.

Егда́ лю́дие безбо́жнии воста́ша на Це́рковь Ру́сскую,/ ты, терпеливоду́шне, не убоя́вся лише́ний,/ ве́рен да́же до сме́рти Христу́ пребы́л еси́.

Егда́ оклевета́н бысть бли́жними твои́ми, свя́те,/ в се́рдце зла ника́коже на о́ныя име́я, моли́лся еси́:/ Го́споди, не вмени́ им греха́ сего́.

Богоро́дичен: Де́ва Пречи́стая, Христа́ Младе́нца ро́ждши,/ во Еги́пте изгна́ние И́родово претерпе́:/ те́мже, страда́ния испыта́вши,/ мо́жет и нам, бе́дствующим, помощи́.

Конда́к, глас 5:

Ве́рный сын земли́ Ру́сския яви́лся еси́,/ новому́чениче и́мярек,/ Христа́, Со́лнце Пра́вды, возвеща́я/ и безбо́жия тьму отгоня́я./ Ны́не же, сро́дники твоя́ в Правосла́вней ве́ре утвержда́я,// моли́ся о душа́х на́ших.

И́кос:

Что тя нарече́м, до́блий му́чениче и́мярек?/ Изгна́нника, я́ко до́ма и сро́дников лиши́лся еси́?/ У́зника, я́ко темни́чныя у́зы претерпе́л еси́?/ Дру́га Бо́жия, я́ко бли́жним во страда́ниих помога́л еси́?/ Испове́дника, я́ко ве́ру тве́рдую яви́л еси́?/ Страда́льца, я́ко му́ки испыта́л еси́?/ Ны́не же, престо́лу Бо́жию предстоя́,/ сро́дники твоя́ в Правосла́вней ве́ре утвержда́й/ и моли́ся о душа́х на́ших.

Песнь 7

Ирмо́с: Превозноси́мый отце́в Госпо́дь,/ пла́мень угаси́, о́троки ороси́,/ согла́сно пою́щия:// Бо́же, благослове́н еси́.

Егда́ земля́ Ру́сская поколеба́ся грех ра́ди на́ших,/ яви́л еси́ тве́рдое испове́дание ве́ры, и́мярек прему́дре,/ безбо́жия пла́мень угаша́я.

О́бщаго безу́мия и умо́в шата́ния чужд яви́лся еси́, му́чениче и́мярек,/ оба́че любо́вию ко Христу́ распала́емь,/ твои́м страда́нием обличи́л еси́ безбо́жие.

Зло́бу и руга́тельства мучи́телей претерпева́я, и́мярек,/ утверди́л еси́ стопы́ твоя́, я́ко на ка́мени,/ име́я в се́рдце глаго́л Христо́в:/ бу́ди ве́рен до сме́рти, и дам ти вене́ц живота́.

Богоро́дичен: Еди́ну у́бо Ипоста́сь во двою́ естеству́, Богома́ти, родила́ еси́, Бо́га и Челове́ка./ Те́мже, ве́рнии, с любо́вию возопии́м:/ благослове́на Ты в жена́х еси́, Всенепоро́чная Влады́чице.

Песнь 8

Ирмо́с: Тебе́, Вседе́телю,/ в пещи́ о́троцы всеми́рный лик спле́тше, поя́ху:/ дела́ вся́кая, Го́спода по́йте,// и превозноси́те во вся ве́ки.

Его́же о́троцы в пещи́ воспе́ша,/ Той и тя, страда́льче, в пла́мени гоне́ний сохрани́, взыва́юща:/ благослове́н еси́, Бо́же оте́ц на́ших.

Слага́я в се́рдце твое́м глаго́л Христо́в,/ е́же не боя́тися убива́ющих те́ло, души́ же не могу́щих уби́ти,/ му́жественне на по́двиг страда́ния поте́кл еси́, свя́те, взыва́я:/ благослове́н еси́, Бо́же оте́ц на́ших.

А́ще и преда́шася поруга́нию и оскверне́нию святы́ни земли́ Ру́сския,/ оба́че не изнемо́гл еси́ душе́ю/ и тверд в ве́ре пребы́л еси́, и́мярек, взыва́я:/ благослове́н еси́, Бо́же оте́ц на́ших.

Богоро́дичен: Зря́щи Сы́на Твоего́, Пречи́стая, в земли́ на́шей поруга́ема безбо́жники,/ Це́рковь Ру́сскую не оста́вила еси́ хода́тайством Твои́м, досто́йно взыва́ющу:/ ра́дуйся, Благода́тная, Госпо́дь с Тобо́ю.

Песнь 9

Ирмо́с: Иса́ие, лику́й,/ Де́ва име́ во чре́ве,/ и роди́ Сы́на Емману́ила,/ Бо́га же и Челове́ка,/ Восто́к И́мя Ему́:// Его́же велича́юще, Де́ву ублажа́ем.

Сла́ву еди́ному Бо́гу возда́л еси́,/ И́же сла́вящия Его́ прославля́ет,/ те́мже ро́ди ру́сстии тя ублажа́ют,/ му́чениче и́мярек приснопа́мятне.

Страда́ния твоя́ и смерть му́ченическая, блаже́нне,/ свиде́тельствоваху любо́вь твою́ ко Христу́, Сы́ну Бо́жию./ Те́мже, ны́не жи́зни ве́чныя наслажда́яся,/ моли́ся о нас, любо́вию тя прославля́ющих.

Побе́дным венце́м увенча́ тя Христо́с Бог,/ Его́же возлюби́л еси́ и Его́же ра́ди кровь твою́ пролия́л еси́./ Ему́же ны́не приле́жно моли́ся,/ Правосла́вию в земли́ на́шей утверди́тися/ и душа́м на́шим спасе́ние улучи́ти.

Ору́жием благоволе́ния венча́ тя Госпо́дь, му́чениче всече́стне и́мярек,/ и даде́ тебе́ си́лу на безбо́жныя гони́тели./ Те́мже и ны́не, я́ко добр во́ин,/ спобо́рствуй Це́ркви Ру́сстей на враги́ мно́гия.

Богоро́дичен: О Цари́це Многопе́тая!/ О Влады́чице Держа́вная!/ Не оста́ви нас ми́лостию Твое́ю,/ с новому́ченики Росси́йскими Тя велича́ющих.

Свети́лен:

Тьмы безбо́жия отврати́вся,/ страда́ния за Христа́ претерпе́л еси́, достохва́льне и́мярек,/ ны́не же во све́тлостех святы́х с новому́ченики ликовству́я,/ моли́ спасти́ и просвети́ти ча́да Це́ркве Ру́сския.

Сла́ва, и ны́не, Богоро́дичен:

Отжени́ тьму грехо́вную душ на́ших/ и к све́ту за́поведей Христо́вых напра́ви, Путеводи́тельнице и́стинная,/ да, покая́нием очи́стившеся, гла́сы благода́рственными Тя велича́ем.

На хвали́тех стихи́ры, глас 5.

Подо́бен: Ра́дуйся:

Ра́дуйся, новому́чениче прехва́льне, и́мярек,/ и́стинный сы́не Святы́я Це́ркве,/ во всеору́жие Христо́во облече́нный/ и ве́ры ра́ди до кро́ве подвиза́выйся./ Ты, гони́тели благословля́я, глаго́лал еси́:/ а́ще и те́ло мое́ убие́те,/ ду́шу же не возмо́жете разлучи́ти от любве́ Бо́жия,/ я́же о Христе́ Иису́се.// Его́же моли́ спасти́ и просвети́ти ду́ши на́ша.

Ра́дуйся, страда́льче изря́дный и́мярек,/ и́стинный Христо́в подо́бниче,/ Крест Госпо́день на ра́мо прие́мый,/ и в годи́ну гоне́ний лю́тых на Це́рковь Ру́сскую пострада́вый./ Ты бо, поноше́ний не убоя́вся,/ лише́ния, у́зы и рабо́ты го́рькия нивочто́же вмени́л еси́/ и смерть, я́ко приобре́тение жи́зни ве́чныя со Христо́м,/ досто́йно и ра́достно сре́тил еси́.// Его́же моли́ спасти́ и просвети́ти ду́ши на́ша.

Ра́дуйся, му́чениче достохва́льне и́мярек,/ кровьми́ страда́льческими обагре́нный,/ при́сный о нас предста́телю/ и те́плый к Бо́гу моли́твенниче./ Ты, ны́не престо́лу Бо́жию предстоя́,/ с ли́ки новому́ченик и испове́дник Росси́йских/ о земне́м Оте́честве твое́м хода́тайствуеши/ и Христу́ песнь благода́рственную прино́сиши.// Его́же моли́ спасти́ и просвети́ти ду́ши на́ша.

Сла́ва, глас 8:

Сла́вою и че́стию нетле́нною/ венча́ Госпо́дь многострада́льную твою́ главу́,/ я́ко посреде́ безбо́жных гоне́ний лю́тых/ дал еси́ сла́ву хвале́ Его́,/ му́чениче добропобе́дне и́мярек,// Це́ркве Ру́сския удобре́ние.

И ны́не, Богоро́дичен, глас то́йже.

Подо́бен: О, пресла́внаго чудесе́:

Сра́дуются с на́ми у́мная вся Чинонача́лия,/ лик духо́вный совоку́пльше,/ ви́дяще Цари́цу и Влады́чицу всех,/ многоиме́нне ве́рными сла́виму,/ ра́дуются же и ду́си пра́ведных,/ су́щии зри́телие виде́ния,/ на возду́се Свои́ ру́це моле́бно простира́ющу,/ прося́щу умире́ния миру// и спасе́ния душа́м на́шим.

Славосло́вие вели́кое и отпу́ст.

НА ЛИТУРГИ́И

Блаже́нна от кано́на, пе́снь 3-я и 6-я.

Проки́мен, глас 4: А́ще пойду́ посреде́ се́ни сме́ртныя, не убою́ся зла,// я́ко Ты со мно́ю еси́. Стих: Госпо́дь пасе́т мя и ничто́же мя лиши́т.

Апо́стол к Тимофе́ю, зача́ло 292 (2Тим. 2, 1–10).

Аллилу́ия, глас 6: Живы́й в по́мощи Вы́шняго, в кро́ве Бо́га Небе́снаго водвори́тся. Стих: Рече́т Го́сподеви: Засту́пник мой еси́ и Прибе́жище мое́, Бог мой и упова́ю на Него́.

Ева́нгелие от Иоа́нна, зача́ло 52 (Ин. 15, 17–27).

Прича́стен: В па́мять ве́чную бу́дет пра́ведник:

Моли́тва

О пресла́вный и добропобе́дный му́чениче Христо́в и́мярек, и́стинный во́ине святы́я Це́ркве, сро́дником твои́м земны́м похвало́ и украше́ние! Ты, не убоя́вся безбо́жнаго гоне́ния, ве́ру Правосла́вную да́же до кро́ве испове́дал еси́, страда́нии же твои́ми о́браз ве́рным подая́, врата́ми пра́вды в Ца́рство Небе́сное вше́л еси́. Те́мже мо́лим тя, я́коже не́когда моли́твою твое́ю ко Го́споду си́лу претерпе́ти страда́ния стяжа́л еси́, та́ко и ны́не моли́ся, да пода́ст нам Госпо́дь си́лу за́поведи Его́ животво́рныя соблюда́ти, и да изба́вит нас от уз греха́ и безбо́жия, Оте́чество же на́ше да сохрани́т в Правосла́вии до сконча́ния ве́ка. Ами́нь.

ВЕ́ЧЕР

На Го́споди, воззва́х: стихи́ры, глас 1.

Подо́бен: Прехва́льнии му́ченицы:

Прехва́льне испове́дниче и́мярек,/ ты во дни гоне́ний на Це́рковь Росси́йскую/ не убоя́лся еси́ мучи́телей безбо́жных/ и, ве́ру Христо́ву испове́дав,/ страда́ния претерпе́л еси́,/ свиде́тельства же ра́ди и́стины/ благода́тию Бо́жиею храни́м был еси́/ и в ми́ре почи́л еси́./ Те́мже ны́не, наслажда́яся ра́дости Небе́сныя,// моли́ спасти́ся душа́м на́шим.

Испове́дниче и́мярек до́блий,/ ты в годи́ну безбо́жия во оте́честве на́шем,/ я́ко и́стинный во́ин Христо́в,/ любо́вию к Бо́гу распала́ем,/ ве́ру правосла́вную испове́дал еси́/ и, у́зы темни́чныя и рабо́ты го́рькия/ в сла́дость духо́вную восприе́м,/ во упова́нии тверд пребы́л еси́./ Те́мже ны́не, наслажда́яся ра́дости Небе́сныя,// моли́ спасти́ся душа́м на́шим.

Испове́дниче му́дре и́мярек,/ ты, во дни испыта́ния ве́ры в земли́ на́шей/ Христу́ с любо́вию после́дуя,/ страда́нием во́льным и испове́данием тве́рдым/ о́браз ве́рным показа́лся еси́/ и, немощны́я в ве́ре укрепи́в,/ утеше́ние лю́дем правосла́вным/ и учи́тель благоче́стия яви́лся еси́./ Те́мже ны́не, наслажда́яся ра́дости Небе́сныя,// моли́ спасти́ся душа́м на́шим.

Сла́ва, глас 8:

Испове́дниче сла́вне и́мярек,/ ты на Бо́га все упова́ние возложи́л еси́/ и Той тя просла́ви во Ца́рствии Небе́снем,/ иде́же со сро́дники на́шими,/ новому́ченики и испове́дники Росси́йскими,/ ве́рою, наде́ждею и любо́вию Ему́ угоди́вшими,/ прославля́еши Отца́, и Сы́на, и Свята́го Ду́ха,// Тро́ицу Единосу́щную и Неразде́льную.

И ны́не, Богоро́дичен: Царь Небе́сный:

Вход. Проки́мен дне. Чте́ния три преподо́бническая.

На стихо́вне стихи́ры, глас 4.

Подо́бен: Я́ко до́бля:

Я́ко благи́й раб и ве́рный,/ вве́ренный ти тала́нт благоче́стия/ испове́данием Христа́ преумно́жил еси́,/ те́мже в ра́дость Го́спода вшел еси́/ и, ве́лие дерзнове́ние от Него́ восприем,/ мо́лишися о земли́ на́шей// и о ве́рою чту́щих па́мять твою́.

Стих: Бог мой еси́ Ты,// и испове́мся Тебе́.

Егда́ прииде Госпо́дь испытати лю́ди Своя́,/ блаже́нна тя раба́ и бдя́ща обре́те,/ испове́дниче и́мярек всече́стне,/ не ктому́ раба́, но дру́га нарече́ тя,/ и, я́ко ве́рнаго стра́жа до́му Своего́/ над мно́гими тя поста́ви// и дарова́ моли́твенника те́пла о душа́х на́ших.

Стих: Отве́рзите мне врата́ пра́вды,// вшед в ня, испове́мся Го́сподеви.

Помина́я сло́во Госпо́дне:/ несть раб бо́лий го́спода своего́,/ а́ще Мене́ изгна́ша и вас иждену́т,/ гоне́ния и страда́ния за Христа́ любве́ ра́ди претерпе́л еси́./ Те́мже, блаже́нства изгна́нных пра́вды ра́ди сподо́бився,/ любве́ соверше́нныя дости́гл еси́,// испове́дниче до́блий и́мярек.

Сла́ва, глас 8:

Прииди́те, вси ве́рнии,/ досто́йно воспои́м и́мярек сла́внаго,/ сей бо, по́двиг страда́ния и испове́дничества соверши́в/ и последи́ благоче́стно пожи́в,/ Бо́гу в ми́ре ду́шу пре́дал еси́/ и от су́щих зде к ве́чным жили́щем преста́вился еси́,// иде́же мо́лится о душа́х на́ших.

И ны́не, Богоро́дичен: Творе́ц и Изба́витель:

Тропа́рь, глас 4:

Страда́ния за Христа́ претерпе́в,/ ве́ру Правосла́вную сохрани́л еси́/ и, терпе́нием гони́тели Це́ркве Ру́сския посрами́в,/ благоче́стно в зако́не Госпо́дни пожи́л еси́,/ испове́дниче сла́вне и́мярек,/ престо́лу Бо́жию предстоя́,// моли́ спасти́ся душа́м на́шим.

НА У́ТРЕНИ

На Бог Госпо́дь: тропа́рь то́йже.

По 1-м стихосло́вии седа́лен, глас 4:

К Бо́гу Вы́шнему воззва́л еси́,/ испове́дниче досточу́дне и́мярек:/ поми́луй мя, Го́споди,/ я́ко врази́ нечести́вии попра́ша мя,/ и изба́ви ду́шу мою́ от сме́рти,/ о́чи от слез и но́зе от поползнове́ния,/ да благоугожду́ пред Тобо́ю во све́те живы́х.

Сла́ва, и ны́не, Богоро́дичен:

Стена́ непобеди́мая лю́дем правосла́вным еси́, Богоро́дице Де́во, / к Тебе́ бо притека́юще, невреди́ми пребыва́ем,/ и па́ки согреша́юще, и́мамы Тя Моли́твенницу./ Тем, благодаря́ще, вопие́м Ти:/ Ра́дуйся, Благода́тная, Госпо́дь с Тобо́ю.

По 2-м стихосло́вии седа́лен, глас 4:

Егда́ непра́веднии оболга́ша тя и кня́зи лю́дстии ра́нам жесто́ким преда́ша,/ ты, испове́дниче и́мярек, на Бо́га упова́я, моли́лся еси́:/ Го́споди, Го́споди, кто подо́бен Тебе́,/ испове́мся Тебе́ в се́рдце мое́м,/ и язы́к мой поучи́тся пра́вде Твое́й, весь день хвале́ Твое́й.

Сла́ва, и ны́не, Богоро́дичен:

О Всепе́тая Богоро́дице Влады́чице, му́чеников испове́дание и ве́нче, / А́нгелы сла́вимая и челове́ки воспева́емая,/ и всего́ ми́ра возжеле́нная Помо́щнице,/ изба́ви Це́рковь Ру́сскую вся́каго обстоя́ния,/ Еди́на Благослове́нная.

Велича́ние:

Велича́ем тя,/ испове́дниче святы́й и́мярек,/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

Псало́м избра́нный:

1-й лик: Испове́мся Тебе́, Го́споди, всем се́рдцем мои́м о ми́лости Твоей и и́стине Твое́й.

2-й лик: Госпо́дь Помо́щник мой, на Него́ упова́ се́рдце мое́, и испове́мся Ему́.

1-й лик: Глаго́лах о свиде́ниих Твои́х пред цари́ и не стыдя́хся.

2-й лик: Испове́мся и́мени Твоему́, Го́споди, я́ко бла́го, я́ко от вся́кия печа́ли изба́вил мя еси́.

1-й лик: На Бо́га упова́х, не убою́ся, что сотвори́т мне челове́к.

2-й лик: Изведи́ из темни́цы ду́шу мою испове́датися и́мени Твоему́.

1-й лик: Поноше́ния понося́щих Ти нападо́ша на мя.

2-й лик: От бездн земли́ па́ки возве́л мя еси́, и́бо аз испове́мся Тебе́ в лю́дех, Го́споди.

1-й лик: Весели́теся, пра́веднии, о Го́споде и испове́дайте па́мять святы́ни Его́.

2-й лик: Да испове́дятся Тебе́, Го́споди, вся дела́ Твоя́.

По полиеле́и седа́лен, глас 4:

Бо́га ре́вностне испове́дуя, сла́вне и́мярек,/ страда́ния от безбо́жных нивочто́же вмени́л еси́,/ те́мже дарова́ся ти благода́ть да́же до конца́ благоче́стне пожи́ти./ Ны́не же, во Ца́рствии Бо́жии наслажда́яся жи́зни ве́чныя,/ моли́ спасти́ся душа́м на́шим.

Сла́ва, и ны́не, Богоро́дичен:

Недви́жимое утвержде́ние ве́ры/ и спасе́ние душ на́ших,/ Богоро́дицу пе́сньми велича́им, ве́рнии:/ ра́дуйся, Правосла́вия Огражде́ние,/ ра́дуйся, земли́ Ру́сския Покро́ве,/ ра́дуйся, Неве́сто Неневе́стная.

Степе́нна, 1-й антифо́н 4-го гла́са. Проки́мен, глас 4: Бог мой еси́ Ты,// и испове́мся Тебе́. Стих: Испове́мся Тебе́, я́ко услы́шал мя еси́, и был еси́ мне во спасе́ние. Вся́кое дыха́ние: Ева́нгелие от Луки́, зача́ло 64.

По 50-м псалме́ стихи́ра, глас 6:

Егда́ в гоне́нии боле́зни сме́ртныя одержа́ша тя,/ испове́дниче Христо́в и́мярек,/ ве́ры правосла́вныя не отступи́л еси́/ и Бо́га ре́вностне прославля́л еси́,/ И́же и воздаде́ ти вене́ц пра́вды,// я́ко побо́рнику необори́му.

Кано́н, его́же краегране́сие кроме́ Богоро́дичнов осми́ пе́сен:

Кре́пость моя́ и пе́ние мое́ Госпо́дь. Глас 5.

Песнь 1

Ирмо́с: Коня́ и вса́дника в мо́ре Чермно́е,/ сокруша́яй бра́ни, мы́шцею высо́кою/ Христо́с истрясе́, Изра́иля же спасе́,// побе́дную песнь пою́ща.

Кре́стною си́лою укрепля́ем,/ изгна́ния многоле́тняя претерпе́л еси́,/ глад и хлад, я́ко дар Бо́жий восприе́м./ Те́мже, и́мярек, испове́дник сла́вный яви́лся еси́.

Ру́сския Це́ркве сын ве́рный быв,/ поруга́ния, насмея́ния и лжесвиде́тельства испыта́л еси́/ и безбо́жники сло́вом безмо́лвным обличи́л еси́,/ страда́льче изря́дный и́мярек.

Во испове́дание и́стины, я́ко в броню́ кре́пкую, обле́клся еси́, и́мярек,/ и, во́ин Христо́в непобеди́мый я́влься,/ сло́вом, я́ко мече́м обоюдоо́стрым, враги́ Бо́жия посрами́л еси́.

Богоро́дичен: Разреши́ся кля́тва, печа́ль преста́,/ Благослове́нная бо и Благода́тная Отрокови́ца ве́рным Ра́дость породи́,/ Христа́ Бо́га на́шего.

Песнь 3

Ирмо́с: Водрузи́вый на ничесо́мже зе́млю повеле́нием Твоим/ и пове́сивый неодержи́мо тяготе́ющую,/ на недви́жимем, Христе, ка́мени за́поведей Твои́х// Це́рковь Твою́ утверди́, Еди́не Бла́же и Человеколю́бче.

Пра́ведных ду́ши в руце́ Бо́жией,/ и не прико́снется их му́ка:/ си́ми словесы́ укрепля́емь, и́мярек крепкоду́шне,/ теле́сная страда́ния му́жественне претерпе́л еси́/ и о́браз испове́дания ве́ры сыново́м ру́сским яви́л еси́.

Огради́вся си́лою кре́стною, и́мярек,/ страда́ния и изгна́ния от безбо́жных претерпе́л еси́/ и, ве́ру непоро́чно сохрани́в,/ в ми́ре благоче́стне пожи́л еси́./ Сего ра́ди и вене́ц пра́вды от Христа́ Подвигополо́жника прия́л еси́.

Смути́ся земля́ Ру́сская,/ я́ко опустоши́ ю́ беззако́ние ве́лие,/ ты же, и́мярек великоимени́те, по́двиги испове́дничества благоуха́я,/ я́ко крин се́льный посреде́ пусты́ни, процве́л еси́.

Богоро́дичен: И́же от Отца́ пре́жде всех век рожде́на,/ Ты, Ма́ти Бо́жия, неискусому́жно родила́ еси́./ Те́мже Тя вси, Богоро́дицу правосла́вно испове́дуем.

Седа́лен, глас 3:

Ненави́дящия Го́спода посрами́л еси́,/ и́же хотя́ху тя, испове́дниче и́мярек, Христа́ отлучи́ти и сме́рти преда́ти./ Ты же, к Бо́гу ум твой впери́в,/ я́ко птица, се́ти ловя́щих изба́вился еси́/ и в кро́вы Небе́сныя возлете́л еси́,/ иде́же, в ли́це новому́чеников и испове́дников Росси́йских пребыва́я,/ мо́лишися о спа́сении душ на́ших.

Сла́ва, и ны́не, Богоро́дичен:

Ки́йждо иде́же подвиза́ется, усе́рдно к Тебе́ притека́ет, Богоро́дице,/ несть бо ино́го Прибе́жища, спаса́ющаго ду́ши на́ша, я́ко Ты, Всепе́тая.

Песнь 4

Ирмо́с: Боже́ственное Твое́ разуме́в истоща́ние/ прозорли́во Авваку́м, Христе, со тре́петом вопия́ше Тебе́:/ во спасе́ние люде́й Твои́х// спасти́ пома́занныя Твоя́ прише́л еси́.

Терпе́нием вооружи́вся, поте́кл еси́ на предлежа́щий ти по́двиг, испове́дниче и́мярек,/ и, преще́ния мучи́телей не убоя́вся,/ непоколеби́м пребы́л еси́, егда́ смути́ся Ру́сская земля́.

Мал бе в бра́тии твое́й, я́коже и Дави́д в ро́де свое́м, / оба́че избра́ тя Госпо́дь, испове́дниче и́мярек сла́вне, со все́ми му́ченики/ отъя́ти поноше́ние сыно́в Це́ркве Ру́сския.

Обле́клся еси́ пе́рвее в све́тлыя оде́жды Креще́ния,/ та́же в по́двизе испове́дания ты́я убели́л еси́, свя́те./ Те́мже, вшед в черто́г Небе́сный,/ зри́ши Лице́ Све́та Непристу́пнаго.

Богоро́дичен: Невмести́маго во чре́ве прие́мши,/ без боле́зни родила́ еси́, Всенепоро́чная Ма́ти,/ и по рождестве́ Де́ва Нетле́нна пребыла́ еси́.

Песнь 5

Ирмо́с: Одея́йся Све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,// я́ко Еди́н Благоутро́бен.

Я́ко сын дне, во све́те заповедей Христо́вых ходил еси́, святе и́мярек,/ и ду́шу твою́ по́двигом испове́дания освяти́л еси́,/ ны́не же по́чести по достоя́нию от земны́х прие́млеши.

Изведе́ тя на по́двиг Госпо́дь,/ егда́ лю́ди росси́йстии отступи́ша Це́ркве Христо́вы,/ и́мже я́ко свети́льник ве́ры яви́лся еси́,/ темни́цы смра́дныя и рабо́ты лю́тыя претерпева́я.

Пре́жде да́же не приити́ дню Госпо́дню вели́кому и стра́шному,/ нощь безбо́жия ду́хом бо́дренным просвеща́л еси́,/ дни лука́выя испове́данием Христо́вым изоблича́я.

Богоро́дичен: Пра́вду и Избавле́ние нам ро́ждши, Христа́, без се́мене,/ естество́ пра́отца от кля́твы свободи́ла еси́, Богоро́дице.

Песнь 6

Ирмо́с: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́/ и от тли возведи́ мя,// я́ко Благоутро́бен.

Егда́ бу́ря гоне́ний Це́рковь Ру́сскую одержа́ше,/ ты, и́мярек блаже́нне, утвержде́ние и по́мощь от Го́спода прие́м,/ во́лны многомяте́жныя му́жественне преше́л еси́.

Не уразуме́ша безбо́жнии мучи́тели,/ ка́ко за Христа́ стра́ждеши, и́мярек,/ и в по́двизе твое́м Го́спода испове́дуеши./ Сего́ ра́ди и осуди́шася.

Испо́лнися на тебе́ глаго́л Христо́в: а́ще Мене́ изгна́ша и вас иждену́т./ Те́мже, угото́вав ду́шу твою́ во искуше́ние,/ мно́гая страда́ния, поноше́ния и ско́рби претерпе́л еси́.

Богоро́дичен: Испо́лнися на Тебе́ проро́чество Симео́ново/ и ору́жие про́йде ду́шу Твою́,/ те́мже му́чеником и испове́дником Стена́ Неруши́мая и По́мощь при́сно быва́еши, Богома́ти.

Конда́к, глас 2:

Я́ко звезда́ но́вая Це́ркве Ру́сския яви́лся еси́,/ терпеливоду́шне и́мярек испове́дниче,/ Христа́ Бо́га прославля́я/ и в нощи́ безбо́жия путь ве́рным указу́я./ Те́мже мо́лим тя:/ моли́ нам, сро́дником твои́м,/ в ве́ре Правосла́вней утверди́тися// и спасти́ся душа́м на́шим.

И́кос:

Даждь ми сло́во, Сло́ве Бо́жий,/ по достоя́нию восхвали́ти по́двиги до́бляго и́мярек,/ но́ваго испове́дника, в земли́ Росси́йстей возсия́вшаго,/ в страда́ниих терпели́ваго и в благоче́стии кро́ткаго,/ Небе́сным лико́м сопричте́ннаго,/ иде́же ны́не Триеди́наго Бо́га воспева́ет и мо́лит непреста́нно/ нам, сро́дником его́,/ в ве́ре Правосла́вней утверди́тися/ и спасти́ся душа́м на́шим.

Песнь 7

Ирмо́с: Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:// Бо́же, благослове́н еси́.

Егда́ посети́ Госпо́дь зе́млю Ру́сскую мно́гими испыта́нии грех ра́ди на́ших,/ тогда́ яви́л еси́ тве́рдость в по́двизе твое́м, и́мярек сла́вне,/ испове́данием ве́ры Христо́вой пла́мень безбо́жия угаша́я.

Му́жеством и кре́постию ду́шу твою́ украси́в,/ ве́рность Христу́ в житии́ твое́м сохранил еси́/ и, мно́гия ско́рби претерпе́в, ве́чнаго поко́я дости́гл еси́,/ иде́же прославля́еши Бо́га оте́ц на́ших.

Отложи́в страх муче́ния, к по́двигу испове́дания му́жественне устреми́лся еси́, и́мярек, Христа́ еди́наго возжеле́в,/ Ему́же ны́не пое́ши:/ благослове́н еси́, Бо́же оте́ц на́ших.

Богоро́дичен: Бо́га пло́тию родила́ еси́, Всенепоро́чная,/ Еди́наго от Тро́ицы,/ Ему́же вси пое́м:/ Бо́же, благослове́н еси́.

Песнь 8

Ирмо́с: Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте// и превозноси́те во вся ве́ки.

Его́же о́троцы в пещи́ испове́даша,/ Того́ и ты в пла́мени страда́ний пред мучи́тели просла́ви, науча́я всех взыва́ти:/ да благослови́т земля́ Ру́сская Го́спода/ и превозно́сит во вся ве́ки.

Го́спода испове́дайте, я́ко Благ,/ поуча́л еси́ псало́мски, му́дре и́мярек,/ и Той поспеши́т сыново́м ру́сским на спасе́ние,/ Благослове́нный во ве́ки.

Отца́, Сы́на и Ду́ха Свята́го житие́м твои́м испове́дал еси́, страда́льче Христо́в,/ помози́ и нам по́двигом до́брым подвиза́тися,/ тече́ние жи́зни соверши́ти и ве́ру непоро́чну сохрани́ти.

Богоро́дичен: Тя, Богоро́дицу Пречи́стую,/ па́че ума́ и словесе́ ро́ждшую Го́спода и при́сно де́вствующую,/ благослови́м и превозно́сим во вся ве́ки.

Песнь 9

Ирмо́с: Иса́ие, лику́й,/ Де́ва име́ во чре́ве и роди́ Сы́на Емману́ила,/ Бо́га же и Челове́ка,/ Восто́к и́мя Ему́,// Его́же велича́юще, Де́ву ублажа́ем.

Сла́ву во испыта́ниих еди́ному Бо́гу возда́л еси́,/ испове́дниче Христо́в приснопа́мятне,/ сего ра́ди и Той тя/ в ли́це новому́чеников и испове́дников Росси́йских просла́ви.

Процвете́ Це́рковь на́ша новому́ченики и испове́дники Росси́йскими,/ не отри́ну бо Госпо́дь лю́ди Своя́./ Ты же, испове́дниче сла́вный и́мярек, вку́пе с ни́ми пребыва́я,/ мо́лиши сохрани́тися ве́ре Правосла́вней в земли́ на́шей.

Ору́жием благоволе́ния венча́ тя Госпо́дь,/ испове́дниче блаже́нне и́мярек,/ и́мже и нам на враги́ неви́димыя спобо́рствуй/ и моли́ Христа́ Бо́га сохрани́тися ве́ре Правосла́вней в земли́ на́шей.

Богоро́дичен: С новому́ченики и испове́дники Росси́йскими, Пречи́стая, и все́ми святы́ми/ умоли́ Еди́наго во святы́х Почива́ющаго/ сохрани́ти зе́млю на́шу, славосло́вящую Тя во вся ве́ки.

Свети́лен:

Светода́вец Христо́с Бог наш, исхо́ды у́тра и ве́чера украси́вый,/ Све́та Невече́рняго тя, испове́дниче и́мярек, сподо́би./ Те́мже, во све́тлостех святы́х пребыва́я,/ и нас све́том незаходи́мым просвети́,/ да, в ра́дости лику́юще, просла́вим Свет нам Показа́вшаго.

Сла́ва, и ны́не, Богоро́дичен:

Ди́вно и неизрече́но Рождество́ Твое́, Богоро́дице,/ И́мже спасла́ еси́ род челове́ческий,/ те́мже мо́лим Тя:/ све́том незаходи́мым нас просвети́,/ да, в ра́дости лику́юще, просла́вим Свет нам Показа́вшаго.

На хвали́тех стихи́ры, глас 6.

Подо́бен: Все отло́жше:

Благода́тию свы́ше облече́нный,/ испове́дниче всече́стне, и́мярек,/ я́ко и́стинный раб Христо́в,/ в ве́ре Правосла́вней непоколеби́м пребы́л еси́/ и, гони́телей благословля́я, глаго́лал еси́:/ а́ще и истя́жете те́ло мое́,/ ду́шу не возмо́жете разлучи́ти от любве́ Бо́жия,/ я́же о Христе́ Иису́се Го́споде на́шем,/ на Него́же еди́наго упова́ю// и Ему́ еди́ному возношу́ хвалу́.

Дре́вним испове́дником подо́бяся,/ испове́дниче му́жественный и́мярек,/ в годи́ну гоне́ний на Це́рковь Ру́сскую/ се́рдцем ве́ровал еси́ пра́во,/ усты́ же Христа́ испове́дал еси́ во спасе́ние/ и, ра́ны нивочто́же вмени́в,/ о срамоте́ поноше́ния небре́гл еси́./ Те́мже, безбо́жных посрами́в мучи́телей,/ блаже́нство в дому́ Госпо́дни улучи́л еси́,// иде́же во ве́ки веко́в Его восхваля́еши.

Воспои́м, боголюби́вии лю́дие,/ пе́сньми и пе́нии духо́вными/ святу́ю па́мять и́мярек достохва́льнаго,/ и́же Правосла́вие добропобе́дным гла́сом/ небоя́зненно пред мучи́тели испове́да/ и мно́гим путь спасе́ния показа́./ Те́мже ра́дуются ны́не А́нгельстии чи́ни/ и сликовству́ют святи́и земли на́шея,/ с ни́миже и испове́дник сла́вный// прославля́ет Христа́ Бо́га на́шего.

Сла́ва, глас 8:

Сла́вою и че́стию нетле́нною,/ я́ко подви́жника добропобе́дна,/ венча́ тя Христо́с Подвигополо́жник,/ испове́дниче Христо́в и́мярек,/ и Ца́рствие Небе́сное дарова́,/ иде́же, с собо́ром новому́чеников и испове́дников Росси́йских/ в непристу́пнем све́те пребыва́я,// прославля́еши Тро́ицу Живонача́льную и Неразде́льную.

И ны́не, Богоро́дичен:

Сра́дуются с на́ми у́мная вся Чинонача́лия,/ духо́вный совоку́пльше лик,/ ви́дяще Цари́цу и Влады́чицу всех,/ многоиме́нне ве́рными сла́виму,/ ра́дуются же и ду́си пра́ведных,/ су́щии зри́телие виде́ния,/ на возду́се моле́бно простира́ющу всечестне́и Свои́ ру́це,/ прося́щу умире́ния ми́ру/ и земли́ Ру́сской утвержде́ния,// и спасе́ния душ на́ших.

Славосло́вие вели́кое и отпу́ст.

НА ЛИТУРГИ́И

Блаже́нна от кано́на, пе́снь 3-я и 6-я.

Проки́мен, глас 7: Испове́мся Тебе́, Го́споди,// всем се́рдцем мои́м. Стих: А́ще пойду́ посреде́ ско́рби, живи́ши мя.

Апо́стол к Ефесе́ем, зача́ло 233.

Аллилу́ия, глас 2: Пра́веднии испове́дятся и́мени Твоему́, и вселя́тся пра́вии с лице́м Твои́м. Стих: Го́споди, Го́споди, Си́ло спасе́ния моего́, осени́л еси́ над главо́ю мое́ю в день бра́ни.

Ева́нгелие от Матфе́я, зача́ло 38.

Прича́стен: В па́мять ве́чную бу́дет пра́ведник:

Моли́тва

О пресла́вный и добропобе́дный испове́дниче Христо́в и́мярек, Це́ркве Ру́сския украше́ние, земли́ на́шея кра́сный пло́де, сро́дников твои́х похвало́ и о́бразе!

Ты, не убоя́вся мучи́телева преще́ния, ве́ру правосла́вную небоя́зненно испове́дал еси́ и, боле́зни и страда́ния му́жественне с любо́вию ко Христу́ претерпе́в, врата́ми пра́вды в Небе́сное Ца́рство вшел еси́. Те́мже мо́лим тя: вознеси́ ны́не те́плую моли́тву твою́ ко Го́споду о Оте́честве на́шем, да утверди́т его́ в ве́ре Правосла́вней до сконча́ния ве́ка, нас же, чту́щих па́мять твою́, да укрепи́т спаси́тельныя за́поведи Его́ соблюда́ти; да изба́вльшеся от греха́ и ве́чныя му́ки, вку́пе с тобо́ю сподо́бимся воспева́ти достопокланя́емое и́мя Отца́, и Сы́на, и Свята́го Ду́ха, во ве́ки веко́в. А́минь.

ВЕ́ЧЕР

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ Е́вина дщи избежа́ пре́лести зми́евы,/ преподобному́ченица и́мярек честна́я,/ ея́же ле́пота душе́вная/ Це́ркве Ру́сския бысть украше́ние,/ та бо, страда́ния Христа́ ра́ди нивочто́же вменя́ющи,/ претерпе́ суди́ще беззако́нное./ Сего́ ра́ди на Стра́шнем Суде́ Христо́вом// ми́лостивая засту́пница нам бу́дет.

О, блаже́ннаго изволе́ния!/ Сомани́тида дре́вле проро́ка Бо́жия Елиссе́я почти́/ во дни отступле́ния Изра́иля от Бо́га,/ ты же, преподобному́ченице и́мярек,/ во дни гоне́ния безбо́жнаго в земли́ на́шей/ Тро́ицу Святу́ю небоя́зненно испове́дала еси́/ и кончи́ну му́ченическую прия́ла еси́./ Сего́ ра́ди ны́не Престо́лу Бо́жию предстои́ши// и мо́лишися спасти́ся душа́м на́шим.

О, ве́лия благоче́стия си́ло!/ Па́вел хва́лит благочести́вую жену́, лю́бящую му́жа своего́,/ и наипа́че ублажа́ет де́вство Христа́ ра́ди,/ ты же, преподобному́ченице и́мярек,/ Христа́ я́ко Небе́снаго Жениха́ возлюби́вши,/ вся кра́сная ми́ра оста́вила еси́/ и смерть му́ченическую прия́ла еси́./ Ны́не же с ли́ки му́дрых дев предстои́ши одесну́ю Христа́,// моля́щи спасти́ся душа́м на́шим.

Сла́ва, глас 8:

Раче́ние боже́ственное стяжа́вши,/ изгна́ние и лю́тая страда́ния му́жественне претерпе́ла еси́,/ преподобному́ченице и́мярек достосла́вная,/ сего́ ра́ди от тьмы ве́ка сего́/ к Незаходи́мому Све́ту и жи́зни ве́чней возшла́ еси́,/ иде́же вку́пе с новому́ченики и испове́дники Росси́йскими мо́лишися,/ о е́же сохрани́тися земно́му Оте́честву на́шему в Правосла́вии// и спасти́ся душа́м на́шим.

И ны́не, Богоро́дичен: Ка́ко не диви́мся:

Вход. Проки́мен дне. И чте́ния 3 му́ченическая.

На стихо́вне стихи́ры, глас 4.

Подо́бен: Дал еси́ зна́мение:

Дал еси́ кре́пость и си́лу/ боя́щейся Тебе́, Го́споди,/ преподобному́ченице и́мярек,/ победи́ти ви́димых и неви́димых враг,/ я́коже дре́вле святы́м му́ченицам жена́м./ Те́мже ны́не воспева́ют ю́ свяще́нницы/ и велича́ют вси лю́дие земли́ Ру́сския,/ я́ко не пощаде́ души́ своея́// вели́кия ра́ди сла́вы Твоея́.

Стих: Ди́вен Бог во святы́х Свои́х,// Бог Изра́илев.

Я́ко виногра́д прекра́сный,/ в земли́ на́шей/ насади́ тя Госпо́дь,/ ма́ти богоблаже́нная и́мярек,/ те́мже вино́ крове́й твои́х/ теплото́ю сле́зных ток раствори́вши,/ еди́ну от обою́ ча́шу страда́ния испила́ еси́/ и, я́ко ши́пок благоуха́нен,// злосмра́дие безбо́жия потреби́ла еси́.

Стих: Приведу́тся Царю́ де́вы// в весе́лии и ра́довании.

А́ще мучи́телие я́ростнии/ ласка́нии и угро́зами/ тща́хуся разори́ти/ тече́ние твое́ ко спасе́нию,/ оба́че, преподо́бнеи ру́це к Бо́гу воздева́ющи,/ Амали́ка мы́сленнаго победи́ла еси́/ и, целому́дрия свещу́ еле́ем крове́й твои́х воспо́лнивши,/ с му́дрыми де́вами в неве́стник Христо́в возшла́ еси́,// страстоте́рпице и́мярек сла́вная.

Сла́ва, глас 8:

Благода́ть Бо́жию невреди́му/ житие́м сохра́ньши,/ в ме́ру во́зраста исполне́ния Христо́ва дости́гла еси́,/ богому́драя ма́ти и́мярек,/ и, я́ко пшени́ца, на ни́ве Росси́йстей возраще́нная,/ серпо́м муче́ния в Небе́сныя жи́тницы собрана́ бысть./ Те́мже, Бо́гу ны́не предстоя́щи,// моли́ о ве́рою и любо́вию чту́щих тя.

И ны́не, Богоро́дичен: Творе́ц и Изба́витель:

Тропа́рь, глас 5:

Христа́ Го́спода Иису́са ве́рная учени́це,/ Це́ркве Росси́йския избра́нная а́гнице,/ преподо́бная страстоте́рпице и́мярек,/ ле́гкое и́го и я́звы Госпо́дни любо́вию нося́щи,/ ле́ствицею муче́ний/ к Нему́ я́ко Небе́сному Жениху́ востекла́ еси́,/ Его́же моли́ сохрани́ти в благоче́стии лю́ди Росси́йския// и спасти́ ду́ши на́ша.

НА У́ТРЕНИ

По 1-м стихосло́вии седа́лен, глас 3:

Кто не подиви́тся богоразу́мию твоему́, досточу́дная ма́ти и́мярек,/ я́ко Го́споду неотсту́пно после́дующи и о спасе́нии души́ твоея́ умоля́ющи,/ кре́пость на гони́тели Це́ркве Ру́сския обрела́ еси́./ Сего́ ра́ди мы ева́нгельски вопие́м ти:/ о же́но, ве́ра твоя́ спасе́ тя.

Сла́ва, и ны́не, Богоро́дичен:

Тя, хода́тайствовавшую спасе́ние ро́да на́шего,/ воспева́ем, Богоро́дице Де́во,/ пло́тию бо, от Тебе́ восприя́тою, Сын Твой и Бог наш,/ Кресто́м восприи́м Страсть,/ изба́ви нас от тли, я́ко Человеколю́бец.

По 2-м стихосло́вии седа́лен, глас 4:

В нощи́ гоне́ний на Це́рковь Ру́сскую/ тве́рдым испове́данием ве́ры свеща́ негаси́мая яви́лася еси́, преподо́бная страстоте́рпице и́мярек,/ и день гряду́щаго спасе́ния Оте́честву на́шему возвести́ла еси́./ Те́мже тя похвала́ми сла́вными велича́ем.

Сла́ва, и ны́не, Богоро́дичен:

Пресвята́я Де́во, упова́ние христиа́н,/ Бо́га, Его́же родила́ еси́ па́че ума́ и сло́ва,/ непреста́нно моли́ сохрани́ти в Правосла́вии Оте́чество на́ше,/ ве́рою и любо́вию при́сно Тя велича́ющее.

Велича́ние:

Велича́ем тя,/ страстоте́рпице преподо́бная ма́ти и́мярек,/ и чтим честна́я страда́ния твоя́,/ я́же за Христа́/ во утвержде́ние на Руси́ Правосла́вия// претерпе́ла еси́.

Псало́м избра́нный:

1-й лик: Бог нам Прибе́жище и Си́ла, Помо́щник в ско́рбех, обре́тших ны зело́.

2-й лик: Приведу́тся Царю́ де́вы, в весе́лии и ра́довании.

1-й лик: Испове́мся Тебе́ в лю́дех, Го́споди, пою́ Тебе́ во язы́цех.

2-й лик: Мене́ жда́ша гре́шницы погуби́ти мя, свиде́ния Твоя́ разуме́х.

1-й лик: Глаго́лах о свиде́ниих Твои́х пред цари́, и не стыдя́хся.

2-й лик: Обыдо́ша мя пси мно́зи, сонм лука́вых одержа́ша мя.

1-й лик: Обыдо́ша мя, я́ко пче́лы сот, и разгоре́шася, я́ко огнь в те́рнии.

2-й лик: Искуси́л ны еси́, Бо́же, разже́гл ны еси́, я́коже разжиза́ется сребро́.

1-й лик: Аз на ра́ны гото́в: и бых я́звен весь день.

2-й лик: Тебе́ ра́ди умерщвля́емся, вмени́хомся я́ко о́вцы заколе́ния.

По полиеле́и седа́лен, глас 1:

Я́ко жена́ ева́нгельская заква́ску в три ме́ры муки́ вложи́,/ та́ко ты, достохва́льная, ве́рою Правосла́вною и страда́нием/ трича́стное души́ твоея́ освяти́ла еси́:/ ра́зум и́стиною Христо́вою,/ жела́ния во́лею Бо́жиею,/ чу́вствия же любо́вию ко Го́споду,/ и сим на Це́рковь Ру́сскую ополчи́вшияся/ посрами́ла еси́, преподобному́ченице и́мярек.

Сла́ва, и ны́не, Богоро́дичен:

О Держа́вная Всецари́це,/ преподо́бных наде́ждо, му́чеников кре́посте,/ А́нгелов сла́во, челове́ков покро́ве/ и всего́ ми́ра всемо́щная Засту́пнице,/ изба́ви Це́рковь Ру́сскую вся́каго зла́го обстоя́ния,/ еди́на Чи́стая и Благослове́нная.

Степе́нна, 1-й антифо́н 4-го гла́са. Проки́мен, глас 4: Вся сла́ва дще́ре Царе́вы// внутрь ея́. Стих: Ря́сны златы́ми оде́яна и преиспещре́на. Вся́кое дыха́ние: Ева́нгелие от Матфе́я, зача́ло 104.

По 50-м псалме́ стихи́ра, глас 6:

Днесь неве́ста Христо́ва,/ страстоте́рпица и́мярек сла́вная,/ кровьми́ му́ченическими украше́нная,/ я́ко голуби́ца кро́ткая,/ криле́ поста́ и моли́твы иму́щая,/ в черто́г Небе́снаго Жениха́ возлете́вши,/ с ли́ки святы́х новому́чеников Росси́йских/ Престо́лу Бо́жию предстои́т// и сла́вит Преве́чнаго Бо́га.

Кано́н, его́же краегране́сие кроме́ Богоро́дичнов:

Приведу́тся Царю́ де́вы в след Ея́. Глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,// я́ко Еди́н сла́вно просла́вися.

Приими́ пе́ние, и́мярек благосла́вная,/ цве́те благоуха́нный Це́ркве Ру́сския,/ от почита́ющих любо́вию по́стническия и му́ченическия по́двиги твоя́.

Ре́вностию по Бо́зе/ стремле́ния богоху́льная в Ру́сстей земли́ посрами́ла еси́/ и фараони́ты мы́сленныя в мо́ри крове́й твои́х потопи́ла еси́, сла́вная.

Изсуши́вши посто́м мо́ре стра́стное,/ муче́ния стезю́ безбе́дно прошла́ еси́/ и в Небе́сных селе́ниих водвори́лася еси́, и́мярек богоблаже́нная.

Богоро́дичен: Тебе́ Предста́тельницу иму́щия, Пречи́стая,/ сла́вныя жены́, посто́м и страда́нием зми́еву держа́ву сокруши́вшия,/ сла́ву Небе́сную обрето́ша.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой.

Ве́ры Правосла́вныя щит восприе́мши/ и оде́ждею целому́дрия обле́кшися, ма́ти и́мярек,/ ко́зни диа́вола, на тя устремле́нныя,/ му́жественно отрази́ла еси́.

Ева́нгелия испове́дница и Правосла́вия ревни́тельница,/ неве́ста чи́стая Христу́ Бо́гу и украше́ние земли́ на́шея яви́лася еси́,/ страстоте́рпице и́мярек, до́блестная ма́ти.

До́блественне Бо́гу рабо́тавши,/ плоть распя́ла еси́ со страстьми́ и похотьми́/ и души́ твоея́, ма́ти и́мярек,/ любве́ ра́ди Христо́вы не пощади́ла еси́.

Богоро́дичен: Тебе́, Богороди́тельнице, предстоя́т честны́я жены́,/ поще́нием кре́пко подвиза́вшияся/ и му́жественне врага́ низложи́вшия.

Седа́лен, глас 4:

Украси́вши ду́шу твою́ красото́ю кро́ткаго и молчали́ваго ду́ха,/ те́ло же я́звами муче́ния удобри́вши,/ Красне́йшему добро́тою, па́че сыно́в челове́ческих, предста́ла еси́,/ за Русь многострада́льную моля́щися,/ преподобному́ченице и́мярек честна́я.

Сла́ва, и ны́не, Богоро́дичен:

От А́нны пра́ведныя процве́тши, Де́во,/ родила́ еси́ Царя́ Христа́ и ра́дость ро́ду челове́ческому дарова́ла еси́./ Сего́ ра́ди рождеству́ Твоему́ сра́дуются благочести́вых жен сосло́вие земли́ на́шея,/ ко́зни гони́телей сла́вно препобеди́вшия.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Ум впери́вши к Бо́гу,/ Амали́ка зломы́сленнаго победи́ла еси́ моли́твою, ма́ти и́мярек,/ и, я́ко му́ченица сла́вная, страда́ния за Христа́ претерпе́ла еси́.

Тве́рдость ве́ры Правосла́вныя показа́вши, преподобному́ченице и́мярек,/ до́блественныя по́двиги поста́ яви́ла еси́/ и муче́ния претерпе́ла еси́,/ си́лою Креста́ Христо́ва укрепля́ема.

Страсте́й безобра́зия совле́кшися, сла́вная,/ а́нгельский о́браз восприя́ла еси́/ и страда́нием Христу́ Бо́гу сочета́лася еси́.

Богоро́дичен: Богома́ти Пречи́стая,/ Госпо́дь от Тебе́ неизрече́нно плоть прия́т,/ сего́ ра́ди жен естество́, иногда́ под кля́твою бы́вшее, ны́не возвели́чися.

Песнь 5

Ирмо́с: У́тренююще вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́ ино́го не ве́мы.

Я́ко сокро́вище многоце́нное, спасе́ния усе́рдно взыску́ющи, преподо́бная ма́ти,/ Христу́ усе́рдно после́довала еси́/ и крест муче́ния му́жественне подъя́ла еси́.

Ца́рства Небе́снаго возжеле́ла еси́, досточу́дная и́мярек,/ те́мже, ду́шу твою́ покая́нием очи́стивши,/ по́двиги страда́ния терпели́вно подъя́ла еси́.

А́нгели светоно́снии дивя́щеся терпе́нию твоему́, ма́ти сла́вная,/ ду́шу твою́, благода́тию освяще́нную,/ Престо́лу Го́спода вы́шних Сил приведо́ша.

Богоро́дичен: Покро́в и Засту́пницу Тя иму́ща, Всечи́стая,/ жены́ благочести́выя земли́ на́шея во дни безбо́жия не отверго́шася Го́спода,/ оба́че, изгна́ния и бе́дствия му́жественне претерпева́юща,/ непобежде́ны пребы́ша.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,// Многоми́лостиве, Христе́ Бо́же наш.

Ри́зу пло́ти твоея́ совле́кши воздержа́нием и муче́нием, боголюбе́зная и́мярек,/ ри́зу спасе́ния от Христа́ Бо́га невестоле́пно восприя́ла еси́/ и тем во тьме безбо́жия досточу́дно в стране́ на́шей просия́ла еси́.

Ю́зы темни́чныя, глад и гоне́ния/ претерпе́ла еси́ му́жественне, преподобному́ченице и́мярек,/ и тем о́браз ве́ры и благоче́стия Росси́йским жена́м яви́ла еси́.

День и нощь простира́ла еси́, страстоно́сице, преподо́бнеи ру́це твои́ к Бо́гу,/ Еди́ному могу́щему сохрани́ти Русь в Правосла́вии,/ тем тя ублажа́ем.

Богоро́дичен: Жены́, посто́м и страда́нием Го́споду угоди́вшия,/ егда́ благоче́стие поноше́нию предаде́ся в стране́ на́шей,/ ны́не непреста́нно мо́лятся Сы́ну Твоему́, Пречи́стая,/ да утверди́тся Це́рковь Ру́сская.

Конда́к, глас 4:

Я́ко крин багрянови́дный,/ посреде́ те́рний безбо́жия/ в земне́м Оте́честве твое́м процвела́ еси́,/ преподобному́ченице и́мярек честна́я,/ по́двиги воздержа́ния страда́нием украси́вши,/ востекла́ еси́ к Небе́сному Жениху́ Христу́,// И́же увенча́ тя красото́ю сла́вы нетле́нныя.

И́кос:

Ка́ко воспои́м тя, Це́ркве Ру́сския похвалу́, достоблаже́нная преподобному́ченице и́мярек,/ от ю́ности жите́йская попече́ния отри́нувшую/ и благу́ю часть и еди́ное на потре́бу избра́вшую,/ преподо́бие зако́нным муче́нием запечатле́вшую/ и сего́ ра́ди сподо́бльшуюся храни́ти и испо́лнити сло́во Христа́ Бо́га на́шего,/ И́же увенча́ тя красото́ю сла́вы нетле́нныя.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:// благослове́н еси́, Го́споди Бо́же, во ве́ки.

Еле́ем благода́ти огнь любве́ ко Христу́ распала́ющи/ и гоне́ния мучи́телей нивочто́же вменя́ющи,/ бо́дренне огня́ ве́чнаго избе́гла еси́/ и к Небе́сному Жениху́ твоему́ возшла́ еси́, преподобному́ченице сла́вная.

Вавило́ни дще́ре окая́нныя ме́рзкое порожде́ние,/ безбо́жию хотя́щее преда́ти зе́млю Ру́сскую,/ о ка́мень страда́ния твоего́ псало́мски разби́ла еси́, преподобному́ченице и́мярек.

Воздержа́ния росо́ю пла́мень страсте́й погаси́ла еси́, многострада́льная,/ и то́ки крове́й твои́х напа́сти богоху́льныя потопи́ла еси́,/ о́браз ве́рным лю́дем явля́ющи.

Богоро́дичен: Я́ко Бо́га ро́ждшую пло́тию, Пречи́стая,/ нра́вом благоче́стным чтим Тя непреста́нно,/ вку́пе с честны́ми жена́ми,/ посто́м просия́вшими и страда́ньми врага́ низложи́вшими.

Песнь 8

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Спасе́тся жена́ чадоро́дием, веща́ет апо́стол./ Ты же, преподобному́ченице и́мярек, мно́гия доброде́тели породи́вши,/ я́ко лоза́ плодови́та, в вертогра́де Це́ркве Ру́сския яви́лася еси́/ и страда́ньми твои́ми вино́ спаси́тельное источи́ла еси́/ сла́вящим о тебе́ Христа́ во ве́ки.

Любо́вию Христо́вою уязви́вшися,/ к страда́нию востекла́ еси́,/ распе́нши плоть со страстьми́ и похотьми́, и́мярек,/ и, свещу́ душе́вную неугаси́му дея́нием храня́щи,/ муче́ние я́ко ве́но Невестокраси́телю душ принесла́ еси́,/ превознося́щи Его́ во ве́ки.

Е́вино преслуша́ние, породи́вшее смерть, при́сно помышля́ющи, достосла́вная и́мярек,/ пе́рвее возжела́ла еси́ умре́ти ми́ру в послуша́нии за́поведем Христо́вым,/ последи́ же муче́нием по́хоти пло́ти совлещи́ся./ Тем, на Не́бо возше́дши,/ Тро́ицу Святу́ю благослови́ши во ве́ки.

Богоро́дичен: С новому́ченики и испове́дники Росси́йскими, Пречи́стая,/ и все́ми святы́ми жена́ми/ умоли́ Еди́наго во святы́х почива́ющаго/ сохрани́ти зе́млю на́шу, славосло́вящую Тя во вся ве́ки.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.

Да́ры Христу́ любо́вию принесла́ еси́, преподобному́ченице и́мярек,/ моли́тву я́ко зла́то, поще́ние я́ко лива́н и страда́ние я́ко сми́рну./ Тем тя благоче́стно велича́ем.

Еле́ем целому́дрия и кро́вию страда́ния преукраше́на,/ вся добра́ яви́лася еси́/ и Еди́ному де́вственному Жениху́ обручи́лася еси́./ Его́же моли́ спасти́ся почита́ющим па́мять твою́, преподобному́ченице сла́вная.

Я́ко го́рлица пустыннолю́бная, превита́ющи в Го́рний Сио́н,/ ве́рою Правосла́вною от се́ти ловя́щих изба́вилася еси́, страда́лице честна́я,/ ви́димых и неви́димых враг посрами́вши./ Те́мже тя ку́пно с а́нгельскими ли́ки почита́ем.

Богоро́дичен: Тебе́, Всепе́тую Влады́чицу,/ я́ко Всецари́цу, Христу́ Царю́ предстоя́щую,/ вку́пе с преподобному́ченицею и́мярек досто́йно велича́ем.

Свети́лен:

Ду́хом просвеща́ема, преподобному́ченице и́мярек,/ испове́данием Христа́ возсия́ла еси́ в Це́ркви Ру́сстей./ Сего́ ра́ди све́том Небе́сным чту́щия тя озари́, ма́ти всехва́льная.

Сла́ва, и ны́не, Богоро́дичен:

Вои́стину, Богоро́дице, Тя благода́рственне велича́ем,/ Ты бо еси́ Ма́ти ро́да христиа́нскаго и Храни́тельница уде́ла Твоего́, Це́ркве Росси́йския,/ и возгла́вие ли́ка преподобному́чениц.

На хвали́тех стихи́ры, глас 8.

Подо́бен: О, пресла́внаго чудесе́:

О страстоте́рпице и́мярек,/ ты все житие́ твое́ вве́ргла еси́/ в сокро́вищницу Це́ркве Ру́сския,/ я́ко вдови́ца две ле́пте,/ воздержа́нием и страда́нием,/ моли́твою и чистото́ю,/ помышля́ющи, я́ко лу́чши пра́веднику ма́лая,/ па́че бога́тства мно́га гре́шному,// и ны́не, я́ко му́драя де́ва, восхваля́еши Го́спода.

О, пресла́внаго чудесе́!/ Ве́рою иногда́ кровоточи́вая жена́/ воскри́лию ри́зы Христо́вы прикосну́ся,/ и а́бие ста́ша то́цы кро́ве ея́,/ ты же, честна́я, криле́ кре́стнеи восприе́мши,/ кровьми́ твои́ми, за Христа́ излива́емыми,/ тече́ние безбо́жия в земли́ Ру́сстей посрами́ла еси́,/ и я́ко жена́, лю́бящая Го́спода,// досто́йно похваля́ешися.

Ми́ру уме́ршую изволе́нием/ и пло́ти за Христа́ не пощаде́вшую,/ Человеколю́бец Госпо́дь воздви́же тя,/ я́ко дщерь Иаи́рову,/ к Небе́сней жи́зни и безсме́ртней трапе́зе,/ сла́вная преподобному́ченице и́мярек,/ и ны́не в Це́ркви Ру́сстей,/ я́ко во врате́х Иерусали́ма дще́ри Сио́ни,// о тебе́ хвалы́ Ему́ возсыла́ем.

Сла́ва, глас 8:

Сле́зы по́стническия и ми́ро крове́й/ мно́гою ве́рою и любо́вию Христу́ принесла́ еси́,/ преподобному́ченице всечестна́я,/ и ны́не дерзнове́ние и́маши/ моли́ти о проще́нии грехо́в наро́да Ру́сскаго,/ прося́щи Правосла́вней Це́ркви утвержде́ния,/ Оте́честву на́шему благостоя́ния// и всем лю́дем ве́лия ми́лости.

И ны́не, Богоро́дичен, глас то́йже:

При́зри на моле́ния Твои́х раб, Всенепоро́чная,/ вся́кия ско́рби избавля́ющи зе́млю Ру́сскую,/ дом Твой нарече́нную/ и кровьми́ новому́ченик и испове́дник освяще́нную./ Да не постыди́мся, Влады́чице Держа́вная, Тя призыва́ющии,/ всех правосла́вных по́моще,/ ра́досте и покро́ве// и спасе́ние душ на́ших.

Славосло́вие вели́кое. И отпу́ст.

НА ЛИТУРГИ́И

Блаже́нна от кано́на, пе́снь 3-я и 6-я.

Проки́мен, глас 4: Бо́же, дще́ри царе́й// в че́сти Твое́й. Стих: Приведу́тся Царю́ де́вы в след Ея́.

Апо́стол к Кори́нфяном, зача́ло 181.

Аллилу́ия, глас 1: И́скренния Ея́ приведу́тся Тебе́. Стих: Приведу́тся в весе́лии и ра́довании, введу́тся в храм Царе́в.

Ева́нгелие от Луки́, зача́ло 33.

Прича́стен: В па́мять ве́чную бу́дет пра́ведник:

Моли́тва

О всехва́льная преподобному́ченице и́мярек, кро́ткая Христо́ва а́гнице, земли́ Росси́йския цве́те благоуха́нный, избра́нная, непоро́чная и до́брая в жена́х! Ты любо́вию после́довала еси́ Христу́, благо́е и́го за́поведей Его́ терпели́во подъе́мши и я́звы Его́ преподо́бием нося́щи; во дни же гоне́ний на Це́рковь Ру́сскую му́жественне во испове́дании Правосла́вныя ве́ры пребыла́ еси́ и, житие́ мона́шеское по́двигом муче́ния увенча́вши, в черто́г Небе́снаго Жениха́ возшла́ еси́. Те́мже мо́лим тя, сла́вная в жена́х му́ченице: моли́ Це́ркви на́шей в ми́ре и благоде́нствии пребыва́ти, держа́ве же Росси́йстей непоколеби́мей в Правосла́вии и ми́ре сохрани́тися и всех враго́в сокруши́ти; жена́м, по́двиг и́ночества воприи́мшим, во благоче́стии и послуша́ниих мона́шеских укрепи́тися, в ре́вности по Бо́зе не оскудева́ти и неро́потным, бо́дренным и благода́рным всегда́ бы́ти; нам же, любо́вию тя почита́ющим, испроси́ вре́мя на покая́ние, тве́рдость во испове́дании ве́ры и́стинныя, заступле́ние от ко́зней вра́жиих и на Стра́шнем Суде́ предстоя́ние одесну́ю Го́спода на́шего Иису́са Христа́, Ему́же со Отце́м и Святы́м Ду́хом подоба́ет вся́кая сла́ва, честь и поклоне́ние, ны́не и при́сно, и во ве́ки веко́в. Ами́нь.

ВЕ́ЧЕР

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ Е́вина дщи избежа́ пре́лести зми́евы,/ испове́дница и́мярек преподо́бная,/ ея́же ле́пота душе́вная/ Це́ркве Ру́сския бысть украше́ние,/ та бо, страда́ния нивочто́же вменя́ющи,/ претерпе́ суди́ще беззако́нное./ Сего́ ра́ди на Стра́шнем Суде́ Христо́вом// ми́лостивая засту́пница нам бу́дет.

О, блаже́ннаго изволе́ния!/ Сомани́тида дре́вле проро́ка Бо́жия Елиссе́я почти́/ во дни отступле́ния Изра́иля от Бо́га,/ ты же, преподобноиспове́днице и́мярек,/ во дни гоне́ния безбо́жнаго в земли́ на́шей,/ Христа́ небоя́зненно испове́дала еси́/ и, по́слежде благоче́стно пожи́вши,/ по́двиг твой в ми́ре сконча́ла еси́.// Сего́ ра́ди мо́лим тя спасти́ся душа́м на́шим.

О, прему́дрости ра́зума!/ Восхваля́ет Соломо́н жену́ мужелюби́вую,/ мы же вельми́ воспева́ем боголюби́вую,/ преподо́бную страда́лицу и́мярек,/ сия́ бо, науче́на от Свята́го Ду́ха,/ Христа́ на суди́щи испове́даше/ и, ве́ру правосла́вную нело́жно храня́щи,/ врата́ми пра́вды в Ца́рство Небе́сное вни́де,// иде́же мо́лится спасти́ся душа́м на́шим.

О ве́лия благоче́стия си́ло!/ Па́вел хва́лит благочести́вую жену́,/ наипа́че ублажа́ет де́вство Христа́ ра́ди,/ ты же, преподо́бная ма́ти и́мярек,/ Небе́снаго Жениха́ возлюби́вши,/ вся кра́сная ми́ра оста́вила еси́/ и, я́ко ве́но, страда́ние и житие́ пра́ведное от Него́ прия́ла еси́./ Ны́не же с ли́ки му́дрых дев Христу́ предстои́ши// и мо́лишися спасти́ся душа́м на́шим.

Сла́ва, глас 8:

Боже́ственным раче́нием укрепля́ема,/ пучи́ну гоне́ний до́бле прешла́ еси́,/ преподо́бная и́мярек достосла́вная,/ и к Све́ту Незаходи́мому, я́ко испове́дница Христо́ва, возшла́ еси́,/ иде́же вку́пе с новому́ченики и испове́дники Росси́йскими мо́лишися,/ о е́же сохрани́тися земно́му Оте́честву на́шему в Правосла́вии// и спасти́ся душа́м на́шим.

И ны́не, Богоро́дичен: Ка́ко не диви́мся:

Вход. Проки́мен дне. Чте́ния 3 му́ченическая.

На стихо́вне стихи́ры, глас 4.

Подо́бен: Дал еси́ зна́мение:

Дал еси́ кре́пость и си́лу/ боя́щейся Тебе́, Го́споди,/ преподобноиспове́днице и́мярек,/ я́коже дре́вле святы́м жена́м,/ победи́ти ви́димыя и неви́димыя враги́./ Те́мже ны́не воспева́ют ю свяще́нницы Госпо́дни,/ и велича́ют вси лю́дие земли́ Ру́сския,/ я́ко претерпе́ гоне́ния и заточе́ния// вели́кия ра́ди сла́вы Твоея́.

Стих: Приведу́тся Царю́ де́вы// в весе́лии и ра́довании.

А́ще безу́мнии тща́хуся/ угро́зами и ле́стию притво́рною/ тече́ние твое́ ко спасе́нию разори́ти,/ оба́че преподо́бнеи ру́це к Бо́гу воздева́ющи,/ Амали́ка мы́сленнаго победи́ла еси́/ и, целому́дрия свещу́ еле́ем испове́дания уясни́вши,/ с му́дрыми де́вами в неве́стник неизрече́нныя сла́вы возшла́ еси́,// страстоте́рпице и́мярек преподо́бная.

Стих: Испове́мся Тебе́ в век, я́ко сотвори́л еси́,// и терплю́ и́мя Твое́.

Я́ко ла́стовица доброгла́сная,/ Це́ркви на́шей ве́сну обновле́ния/ страда́нием за Христа́ возвести́ла еси́,/ богоблаже́нная ма́ти и́мярек./ Ны́не же со гла́сом преподо́бных и всех новому́чеников Росси́йских/ Го́спода при́сно прославля́еши/ и мо́лишися Ему́ усе́рдно,/ мир и благоде́нствие Оте́честву на́шему дарова́ти// и душа́м на́шим ве́лию ми́лость.

Сла́ва, глас 8:

Благода́ть Бо́жию невреди́му сохра́ньши/ страда́нием и испове́данием,/ в ме́ру во́зраста исполне́ния Христо́ва дости́гла еси́,/ богому́драя ма́ти и́мярек,/ и, я́ко пшени́ца до́брая на ни́ве Росси́йстей взраще́нная,/ от жития́ претру́днаго в Небе́сныя жи́тницы собрана́ бысть./ Те́мже, Бо́гу ны́не предстоя́щи,// моли́ о ве́рою и любо́вию чту́щих тя.

И ны́не, Богоро́дичен: Творе́ц и Изба́витель:

Тропа́рь, глас 5:

Христа́ Го́спода Иису́са ве́рная учени́це,/ Це́ркве Росси́йския избра́нная а́гнице,/ преподо́бная ма́ти и́мярек,/ ле́гкое и́го и я́звы Госпо́дни любо́вию нося́щи,/ ле́ствицею доброде́телей и испове́данием ве́ры/ к Нему́ я́ко Небе́сному Жениху́ востекла́ еси́,/ Его́же моли́ сохрани́ти в благоче́стии лю́ди Росси́йския// и спасти́ ду́ши на́ша.

НА У́ТРЕНИ

По 1-м стихосло́вии седа́лен, глас 3:

Кто не подиви́тся благоразу́мию твоему́, досточу́дная ма́ти и́мярек,/ я́ко Го́споду неотсту́пно после́довала еси́ и, о спасе́нии души́ твоея́ Того́ усе́рдно умоля́ющи,/ кре́пость на гони́тели Це́ркве Ру́сския обрела́ еси́./ Сего́ ра́ди ева́нгельски вопие́м ти:/ о же́но, ве́ра твоя́ спасе́ тя.

Сла́ва, и ны́не, Богоро́дичен:

Тя, хода́тайствовавшую спасе́ние ро́да на́шего,/ воспева́ем, Богоро́дице Де́во,/ пло́тию бо, от Тебе́ восприя́тою, Сын Твой и Бог наш,/ Кресто́м восприи́м Страсть,/ изба́ви нас от тли, я́ко Человеколю́бец.

По 2-м стихосло́вии седа́лен, глас 4:

В безмо́лвии и посте́ зако́ну Госпо́дню поуча́ющися,/ в нощи́ гоне́ний на Це́рковь Ру́сскую/ тве́рдым испове́данием ве́ры свеща́ негаси́мая яви́лася еси́, преподо́бная ма́ти и́мярек,/ и день гряду́щаго спасе́ния Оте́честву на́шему возвести́ла еси́./ Те́мже тя похвала́ми сла́вными велича́ем.

Сла́ва, и ны́не, Богоро́дичен:

Пресвята́я Де́во, упова́ние христиа́н,/ Бо́га, Его́же родила́ еси́ па́че ума́ и сло́ва,/ непреста́нно моли́ сохрани́ти в Правосла́вии/ ве́рою и любо́вию при́сно Тя велича́ющия.

Велича́ние:

Велича́ем тя,/ преподобноиспове́днице и́мярек,/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

Псало́м избра́нный:

1-й лик: Терпя́ потерпе́х Го́спода, и внят ми, и услы́ша мо́литву мою́.

2-й лик: Поста́ви на ка́мени но́зе мои́ и испра́ви стопы́ моя́.

1-й лик: Смиря́х посто́м ду́шу мою́.

2-й лик: Полу́нощи воста́х испове́датися Тебе́, седмери́цею днем хвали́х Тя.

1-й лик: Непра́вду возненави́дех и омерзи́х, зако́н же Твой возлюби́х.

2-й лик: Утруди́хся воздыха́нием мои́м, измы́ю на вся́ку нощь ло́же мое́, слеза́ми мои́ми посте́лю мою́ омочу́.

1-й лик: Испове́мся Тебе́ в пра́вости се́рдца, внегда́ научи́ти ми ся судьба́м пра́вды Твоея́.

2-й лик: Изба́ви мя от гоня́щих мя, я́ко укрепи́шася па́че мене́.

1-й лик: За словеса́ усте́н Твои́х аз сохрани́х пути́ же́стоки.

2-й лик: Искуси́л мя еси́, и не обре́теся во мне непра́вда.

1-й лик: Изведи́ из темни́цы ду́шу мою́, испове́датися и́мени Твоему́.

2-й лик: Бог мой еси́ Ты, и испове́мся Тебе́ всем се́рдцем мои́м.

1-й лик: Бла́го есть испове́датися Го́сподеви, и пе́ти и́мени Твоему́, Вы́шний.

2-й лик: Испове́мся Тебе́ в век, я́ко сотвори́л еси́, и терплю́ и́мя Твое́, я́ко благо пред преподо́бными Твои́ми.

По полиеле́и седа́лен, глас 1:

Я́ко жена́ ева́нгельская заква́ску в три ме́ры муки́ вложи́,/ та́ко ты, достохва́льная, испове́данием ве́ры Правосла́вныя/ трича́стное души́ твоея́ освяти́ла еси́:/ ра́зум и́стиною Христо́вою,/ жела́ния во́лею Бо́жиею,/ чу́вствия же любо́вию ко Го́споду,/ и си́ми и́же на Це́рковь Ру́сскую ополчи́вшияся/ посрами́ла еси́, преподобноиспове́днице и́мярек.

Сла́ва, и ны́не, Богоро́дичен:

О Держа́вная Всецари́це,/ преподо́бных наде́ждо, му́чеников кре́посте,/ А́нгелов сла́во, челове́ков покро́ве/ и всего́ ми́ра всемо́щная Засту́пнице,/ изба́ви Це́рковь Ру́сскую вся́каго зла́го обстоя́ния,/ еди́на Чи́стая и Благослове́нная.

Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зача́ло 104.

По 50-м псалме́ стихи́ра, глас 6:

Днесь неве́ста Христо́ва,/ страстоте́рпица и́мярек сла́вная,/ кровьми́ му́ченическими украше́нная,/ я́ко голуби́ца кро́ткая,/ криле́ поста́ и моли́твы иму́щая,/ в черто́г Небе́снаго Жениха́ возлете́вши,/ с ли́ки святы́х новому́чеников Росси́йских/ Престо́лу Бо́жию предстои́т// и сла́вит Преве́чнаго Бо́га.

Кано́н, его́же краегране́сие кроме́ Богоро́дичнов:

Приведу́тся Царю́ де́вы в след Ея́. Глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,// я́ко Еди́н сла́вно просла́вися.

Приими́ пе́ние, и́мярек благосла́вная,/ цве́те благоуха́нный Це́ркве Ру́сския,/ от почита́ющих любо́вию по́стническия и испове́дническия по́двиги твоя́.

Ре́вностию по Бо́зе/ стремле́ния богоху́льная в Ру́сстей земли́ посрами́ла еси́/ и гони́тели безбо́жныя испове́данием ве́ры обличи́ла еси́, сла́вная и́мярек.

Изсуши́вши посто́м страсте́й мо́ре,/ тве́рдою ве́рою стезю́ испове́дничества безбе́дно прешла́ еси́/ и в Небе́сных селе́ниих водвори́лася еси́, и́мярек богоблаже́нная.

Богоро́дичен: Тебе́ Предста́тельницу иму́щия, Пречи́стая,/ сла́вныя жены́, посто́м и терпе́нием зми́еву держа́ву сокруши́вшия,/ сла́ву Небе́сную обрето́ша.

Песнь 3

Ирмо́с: Ты еси́ Утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой.

Ве́ры Правосла́вныя щит восприе́мши,/ и оде́ждею целому́дрия обле́кшися, ма́ти и́мярек,/ ко́зни диа́вола, на тя устремле́нныя,/ му́жественно отрази́ла еси́.

Ева́нгельских за́поведей исполни́тельница и Правосла́вия ревни́тельница,/ неве́ста чи́стая Христу́ Бо́гу и украше́ние земли́ на́шея яви́лася еси́,/ испове́днице и́мярек, до́блестная ма́ти.

До́блественне Бо́гу рабо́тавши,/ плоть распя́ла еси́ со страстьми́ и похотьми́/ и души́ твоея́, ма́ти и́мярек,/ любве́ ра́ди Христо́вы не пощади́ла еси́.

Богоро́дичен: Тебе́, Богороди́тельнице, честны́я жены́ предстоя́ща, сла́ву воздаю́т,/ поще́нием кре́пко подвиза́вшияся/ и му́жественне врага́ низложи́вшия.

Седа́лен, глас 4:

Украси́вши ду́шу твою́ красото́ю кро́ткаго и молчали́ваго ду́ха,/ уста́ же испове́данием ве́ры освяти́вши,/ Красне́йшему добро́тою, па́че сыно́в челове́ческих, предста́ла еси́,/ за Русь многострада́льную моля́щися,/ преподобноиспове́днице и́мярек честна́я.

Сла́ва, и ны́не, Богоро́дичен:

От А́нны пра́ведныя процве́тши, Де́во,/ родила́ еси́ Царя́ Христа́ и ра́дость ро́ду челове́ческому дарова́ла еси́./ Сего́ ра́ди рождеству́ Твоему́ сра́дуются благочести́вых жен сосло́вие земли́ на́шея,/ ко́зни гони́телей сла́вно препобеди́вшия.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Ум впери́вши к Бо́гу,/ Амали́ка зломы́сленнаго моли́твою победи́ла еси́, ма́ти и́мярек,/ и, я́ко испове́дница сла́вная, страда́ния за Христа́ претерпе́ла еси́.

Тве́рдость ве́ры Правосла́вныя показа́вши, преподо́бная ма́ти и́мярек,/ гоне́ния, у́зы темни́чныя и го́рькия рабо́ты претерпе́ла еси́,/ си́лою Креста́ Христо́ва укрепля́ема.

Страсте́й безобра́зия совле́кшися, сла́вная,/ по́двиг чистоты́ и целому́дрия яви́ла еси́/ и, а́нгельский о́браз восприи́мши,/ страда́нием Христу́ Бо́гу сочета́лася еси́.

Богоро́дичен: Богома́ти Пречи́стая,/ Госпо́дь от Тебе́ неизрече́нно плоть прия́т,/ сего́ ра́ди жен естество́, иногда́ под кля́твою бы́вшее, ны́не возвели́чися.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́ ино́го не ве́мы.

Я́ко сокро́вище многоце́нное, спасе́ния усе́рдно взыску́ющи, преподо́бная ма́ти,/ Христу́ усе́рдно после́довала еси́/ и крест страда́ния му́жественне подъя́ла еси́.

Ца́рства Небе́снаго возжеле́вши, досточу́дная и́мярек,/ ду́шу твою́ покая́нием очи́стила еси́/ и по́двиги страда́ния терпели́вно подъя́ла еси́.

А́нгели светоно́снии дивя́щеся терпе́нию твоему́, ма́ти сла́вная,/ ду́шу твою́, благода́тию освяще́нную,/ Престо́лу Го́спода вы́шних Сил приведо́ша.

Богоро́дичен: Покро́в и Засту́пницу Тя иму́щия, Всечи́стая,/ жены́ благочести́выя земли́ на́шея во дни безбо́жия не отверго́шася Го́спода,/ оба́че, изгна́ния и страда́ния му́жественне претерпева́ющия,/ непобежде́ны пребы́ша.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,// Многоми́лостиве Христе́ Бо́же наш.

Ри́зу плотска́го мудрова́ния совле́кши воздержа́нием и муче́нием, боголюбе́зная и́мярек,/ ри́зу спасе́ния от Христа́ Бо́га невестоле́пно восприя́ла еси́,/ те́мже во тьме безбо́жия досточу́дно в стране́ на́шей просия́ла еси́.

Ю́зы темни́чныя, глад и гоне́ния/ претерпе́ла еси́ му́жественне, преподобноиспове́днице и́мярек,/ те́мже о́браз ве́ры и благоче́стия Росси́йским жена́м яви́ла еси́.

День и нощь простира́ла еси́, испове́днице, преподо́бнеи ру́це твои́ к Бо́гу,/ Еди́ному могу́щему сохрани́ти тя в напа́стех,/ те́мже тя ублажа́ем.

Богоро́дичен: Жены́ и де́вы, благоче́стию поноша́ему в стране́ на́шей, посто́м и страда́нием Го́споду угоди́ша./ Ны́не же непреста́нно мо́лятся Сы́ну Твоему́, Пречи́стая,/ да утверди́тся в Правосла́вии Це́рковь Ру́сская.

Конда́к, глас 4:

Я́ко крин благоуха́нный,/ посреде́ пусты́ни безбо́жия/ в земне́м Оте́честве твое́м процвела́ еси́,/ преподо́бная ма́ти и́мярек,/ и, по́двиги воздержа́ния испове́данием ве́ры украси́вши,/ востекла́ еси́ к Небе́сному Жениху́ Христу́,// И́же увенча́ тя красото́ю сла́вы нетле́нныя.

И́кос:

Ка́ко воспои́м тя, Це́ркве Ру́сския похвалу́, достоблаже́нная испове́днице преподо́бная и́мярек,/ от ю́ности жите́йская попече́ния отри́нувшую/ и благу́ю часть и еди́ное на потре́бу избра́вшую,/ преподо́бие по́двигом зако́нным запечатле́вшую/ и страда́нием сло́во Христа́ Бо́га на́шего испо́лньшую,/ И́же увенча́ тя красото́ю сла́вы нетле́нныя.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.

Еле́ем благода́ти огнь любве́ ко Христу́ распала́ющи,/ огня́ ве́чнаго избе́гла еси́/ и, гоне́ния мучи́телей нивочто́же вменя́ющи,/ в черто́г к Жениху́ Небе́сному возшла́ еси́,/ преподобноиспове́днице и́мярек сла́вная.

Вавило́ни дще́ре окая́нныя ме́рзкое порожде́ние,/ безбо́жию хотя́щее преда́ти зе́млю Ру́сскую,/ о ка́мень испове́дания твоего́ псало́мски разби́ла еси́, преподо́бная ма́ти и́мярек.

Воздержа́ния росо́ю пла́мень страсте́й угаси́вши,/ испове́данием ве́ры воста́ния богоху́льная сокруши́ла еси́, достоблаже́нная ма́ти,/ и о́браз ве́рным лю́дем яви́ла еси́.

Богоро́дичен: Я́ко Бо́га ро́ждшую пло́тию, Пречи́стая,/ нра́вом благоче́стным чтим Тя непреста́нно/ вку́пе с честны́ми жена́ми,/ посто́м просия́вшими и страда́ньми врага́ низложи́вшими.

Песнь 8

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Спасе́тся жена́ чадоро́дием, веща́ет апо́стол./ Ты же, преподобноиспове́днице и́мярек, мно́гия доброде́тели породи́вши,/ я́ко лоза́ плодови́та, в вертогра́де Це́ркве Ру́сския яви́лася еси́/ и страда́ньми твои́ми вино́ спаси́тельное источи́ла еси́/ сла́вящим о тебе́ Христа́ во ве́ки.

Любо́вию Христо́вою уязви́вшися,/ к испове́данию ве́ры устреми́лася еси́, и́мярек,/ и, чистоту́ душе́вную храня́щи,/ страда́ние, я́ко дар, Невестокраси́телю душ принесла́ еси́,/ превознося́щи Его́ во ве́ки.

Е́вино преслуша́ние, породи́вшее смерть, при́сно помышля́ющи, достосла́вная и́мярек,/ послуша́нием Христу́ ми́ру у́мре,/ последи́ же и испове́данием ве́ры просла́ви Его́./ Те́мже, на Не́бо возше́дши,/ Тро́ицу Свя́тую благослови́ши во ве́ки.

Богоро́дичен: С новому́ченики и испове́дники Росси́йскими, Пречи́стая,/ и все́ми святы́ми жена́ми/ умоли́ Еди́наго во святы́х почива́ющаго/ сохрани́ти зе́млю на́шу, славосло́вящую Тя во вся ве́ки.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя Богоро́дицу// А́нгелов и челове́к чинонача́лия велича́ют.

Да́ры Христу́ любо́вию принесла́ еси́, преподобноиспове́днице и́мярек,/ моли́тву я́ко зла́то, поще́ние я́ко лива́н и страда́ние я́ко сми́рну./ Тем тя благоче́стно велича́ем.

Еле́ем целому́дрия и испове́данием ве́ры преукра́шена,/ вся добра́ яви́лася еси́/ и Еди́ному Жениху́ обручи́лася еси́./ Его́же моли́ спасти́ся почита́ющим па́мять твою́, и́мярек сла́вная.

Я́ко го́рлица пустыннолю́бная, превита́ющи в Го́рний Сио́н,/ от се́ти ловя́щих изба́вилася еси́ Правосла́вною ве́рою, страда́лице честна́я,/ ви́димых и неви́димых враг посрами́вши./ Те́мже тя ку́пно с а́нгельскими ли́ки почита́ем.

Богоро́дичен: Тебе́, Всепе́тую Влады́чицу,/ я́ко Всецари́цу, Христу́ Царю́ предстоя́щую,/ вку́пе с преподобноиспове́дницею и́мярек досто́йно велича́ем.

Свети́лен:

Ду́хом просвеща́ема, и́мярек преподо́бная,/ испове́данием Христа́ возсия́ла еси́ в Це́ркви Ру́сстей./ Сего́ ра́ди све́том Небе́сным чту́щия тя озари́, ма́ти всехва́льная.

Сла́ва, и ны́не, Богоро́дичен:

Вои́стинну, Богоро́дице, Тя благода́рственне велича́ем,/ Ты бо еси́ Ма́ти ро́да христиа́нскаго и Храни́тельница достоя́ния Твоего́, Це́ркве Росси́йския,/ и возгла́вие ли́ка святы́х жен.

На хвали́тех стихи́ры, глас 8.

Подо́бен: О, пресла́внаго чудесе́:

О испове́днице и́мярек преподо́бная,/ ты все житие́ твое́ вве́ргла еси́/ в сокро́вищницу Це́ркве Ру́сския,/ я́ко вдови́ца две ле́пте,/ воздержа́нием и страда́нием,/ моли́твою и чистото́ю,/ помышля́ющи, я́ко лу́чши пра́веднику ма́лая,/ па́че бога́тства мно́га гре́шному,// и ны́не, я́ко му́драя де́ва, восхваля́еши Го́спода.

О, пресла́внаго чудесе́!/ Кровоточи́вая жена́ ве́рою иногда́ исцели́ся,/ ты же, честна́я и́мярек,/ у́зы темни́чныя и страда́ния восприе́мши,/ тве́рдым испове́данием ве́ры Христо́вы/ гони́телей посрами́ла еси́/ и, я́ко жена́, лю́бящая Го́спода,/ досто́йно и пра́ведно пожила́ еси́,// те́мже тя прославля́ем.

Тя, уме́ршую ми́ру изволе́нием/ и ду́шу за Христа́ не пощаде́вшую,/ воздви́же Человеколю́бец Госпо́дь,/ я́ко дщерь Иаи́рову,/ к Небе́сней жи́зни и безсме́ртней трапе́зе,/ сла́вная преподобноиспове́днице и́мярек./ Те́мже в Це́ркви Ру́сстей,/ я́ко дще́ри Сио́ни во врате́х Иерусали́ма,// о тебе́ хвалы́ Бо́гу возсыла́ем.

Сла́ва, глас 8:

Сле́зы по́стническия и страда́ния/ мно́гою ве́рою и любо́вию Христу́ принесла́ еси́,/ преподобноиспове́днице всечестна́я,/ и ны́не дерзнове́ние и́маши/ моли́ти о проще́нии грехо́в на́ших,/ прося́щи Правосла́вней Це́ркви утвержде́ния,/ Оте́честву на́шему благостоя́ния// и всем лю́дем ве́лия ми́лости.

И ны́не, Богоро́дичен, глас то́йже:

При́зри на моле́ния Твои́х раб, Всенепоро́чная,/ вся́кия ско́рби избавля́ющи зе́млю Ру́сскую,/ дом Твой нарече́нную/ и кровьми́ новому́ченик и испове́дник освяще́нную./ Да не постыди́мся, Влады́чице Держа́вная, Тя призыва́ющии,/ всех правосла́вных по́моще,/ ра́досте и покро́ве// и спасе́ние душ на́ших.

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я.

Проки́мен, глас 4: Бо́же, дще́ри царе́й// в че́сти Твое́й. Стих: Приведу́тся Царю́ де́вы вслед Ея́.

Апо́стол: посла́ние Петро́во 1, зача́ло 59.

Аллилу́ия, глас 1: И́скренния Ея́ приведу́тся Тебе́. Стих: Приведу́тся в весе́лии и ра́довании, введу́тся в храм Царе́в.

Ева́нгелие от Луки́, зача́ло 33.

Прича́стен: В па́мять ве́чную бу́дет пра́ведник:

Моли́тва

О всехва́льная преподобноиспове́днице и́мярек, кро́ткая Христо́ва а́гнице, земли́ Росси́йския цве́те благоуха́нный, избра́нная, непоро́чная и до́брая в жена́х! Ты, благо́е и́го за́поведей Госпо́дних терпели́во подъе́мши и я́звы Его́ преподо́бием нося́щи, любо́вию после́довала еси́ Христу́; во дни же гоне́ний на Це́рковь Ру́сскую му́жественне во испове́дании Правосла́вныя ве́ры пребыла́ еси́ и, житие́ мона́шеское по́двигом страда́ния увенча́вши, в черто́г Небе́снаго Жениха́ возшла́ еси́. Те́мже мо́лим тя, сла́вная в жена́х испове́днице: моли́ Це́ркви на́шей в ми́ре и благоде́нствии пребыва́ти, стране́ же Росси́йстей непоколеби́мей в Правосла́вии и ми́ре сохрани́тися и всех враго́в сокруши́ти; ве́рным, по́двиг и́ночества воприи́мшим, во благоче́стии и послуша́нии укрепи́тися, в ре́вности по Бо́зе не оскудева́ти и неро́потным, бо́дренным и благода́рным всегда́ бы́ти; нам же, любо́вию тя почита́ющим, испроси́ вре́мя на покая́ние, тве́рдость во испове́дании ве́ры и́стинныя, заступле́ние от ко́зней вра́жиих и на Стра́шнем Суде́ предстоя́ние одесну́ю Го́спода на́шего Иису́са Христа́, Ему́же со Отце́м и Святы́м Ду́хом подоба́ет вся́кая сла́ва, честь и поклоне́ние, ны́не и при́сно, и во ве́ки веко́в. Ами́нь.

ВЕ́ЧЕР

На Го́споди, воззва́х: стихи́ры, глас 4.

Подо́бен: Я́ко до́бля:

Я́ко дре́вле Мариа́м проро́чица,/ сквозе́ Чермно́е мо́ре проше́дши,/ с ли́ки и тимпа́ны/ Бо́га прославля́ше,/ ны́не страда́лица и́мярек сла́вная,/ пучи́ну безбо́жных гоне́ний преплы́вши/ и зе́млю Ру́сскую кровьми́ украси́вши,/ Го́споду побе́дную песнь воспева́ет:// сла́вно бо просла́вися.

Я́ко проро́чица А́нна безпло́дная,/ моля́шеся о дарова́нии ча́да/ и бысть Бо́гом услы́шана,/ та́ко твое́ воздыха́ние,/ му́ченице и́мярек богоблаже́нная,/ Небе́с дости́гло есть,/ и дарова́ Госпо́дь Це́ркви Ру́сстей сы́ны и дще́ри,/ и́же посреде́ гоне́ний Христа́ испове́даша:// сла́вно бо просла́вися.

Я́ко саре́птская вдови́ца,/ во дни отступле́ния Изра́иля/ проро́ка Бо́жия Илию́ небоя́зненно прия́т,/ та́ко и ты, му́ченице и́мярек,/ в годи́ну гоне́ний лю́тых на Це́рковь Ру́сскую/ стра́ждущим лю́дем послужи́/ и гла́дныя напита́,/ не убоя́вшися преще́ний лука́вых.// Те́мже тя ны́не досто́йно почита́ем.

Я́ко дре́вле Соломони́я/ во утвержде́ние ве́ры во Изра́или/ ча́да своя́ на смерть му́ченическую благослови́,/ по́слежде и себе́ на страда́ния предаде́,/ та́ко и ты, му́ченице и́мярек,/ ве́рныя лю́ди во дни безбо́жия/ в ве́ре и терпе́нии укрепля́ющи,/ смерть за Христа́ прия́ла еси́.// Те́мже тя велича́ем.

Сла́ва, глас 8:

Сра́дуются с на́ми му́ченичестии ли́цы,/ де́вы, ма́тери и преподо́бныя жены́,/ се бо врата́ Ца́рствия Небе́снаго отверза́ются/ и му́ченица и́мярек к престо́лу Бо́жию восхо́дит,/ прославля́ющи Отца́, и Сы́на, и Свята́го Ду́ха,// Тро́ицу Единосу́щную и Неразде́льную.

И ны́не, Богоро́дичен: Царь Небе́сный:

Вход. Проки́мен дне. Чте́ния 3 му́ченическая.

На стихо́вне стихи́ры, глас 2.

Подо́бен: Егда́ от Дре́ва:

Егда́ на Це́рковь Ру́сскую/ воста́ша безбо́жнии лю́дие,/ тогда́ ве́ры правосла́вныя не отступи́ла еси́/ и, я́коже дре́вле мироно́сицы,/ мужему́дренная и́мярек,/ не убоя́вшися стра́ха и преще́ния,/ Христу́ после́довала еси́/ и ве́рность Ему́ соблюла́ еси́.// Сего́ ра́ди ны́не в селе́ниих ра́йских лику́еши.

Стих: Зане́ Тебе́ ра́ди умерщвля́емся весь день,// вмени́хомся, я́ко о́вцы заколе́ния.

Егда́ сро́дницы на́ши от Бо́га отступи́ша/ и святы́я за́поведи Его́ попра́ша,/ тогда́ гнев пра́ведный прии́де на зе́млю на́шу,/ ты же, му́ченице и́мярек,/ со слеза́ми Христу́ вопия́ла еси́:/ прости́, Го́споди, неразу́мныя и ожесточе́нныя се́рдцем,/ аз же на ра́ны за Тя гото́ва есмь,/ приими́ мя я́ко же́ртву, поже́ршуюся Тебе́.// Сего́ ра́ди ны́не в Небе́сных оби́телех прославля́ешися.

Стих: Ди́вен Бог во святы́х Свои́х,// Бог Изра́илев.

Егда́ безбо́жнии лю́дие/ воста́ша на Го́спода и на рабы́ Его́,/ тогда́ Це́рковь Ру́сская/ кро́вию му́ченическою, я́ко багряни́цею, украси́ся,/ ты же, всехва́льная и́мярек,/ благоче́стием и любо́вию утвержда́ема,/ страда́ний за Христа́ не убоя́ся/ и сме́ртию твое́ю воскресе́ние Его́ пропове́да.// Сего́ ра́ди в ли́це новому́чеников Росси́йских прославля́ешися.

Сла́ва, глас 8:

Ве́ру, наде́жду и любо́вь стяжа́вши,/ му́ченице и́мярек,/ прему́драя учени́ца Христо́ва яви́лася еси́/ и в годи́ну гоне́ний на Це́рковь Ру́сскую/ смерть му́ченическую восприя́ла еси́./ Сего́ ра́ди ны́не во Ца́рствии Бо́жии лику́еши/ и учи́ши нас треми́ доброде́тельми// прославля́ти Триеди́наго Бо́га.

И ны́не, Богоро́дичен, глас то́йже: Храм и Дверь еси́:

Тропа́рь, глас 4:

Благоче́стно в зако́не Госпо́дни пожи́вши,/ ве́ру Правосла́вную сохрани́ла еси́/ и, терпе́нием гони́тели Це́ркве Ру́сския посрами́вши,/ смерть за Христа́ прия́ла еси́,/ му́ченице сла́вная и́мярек,/ престо́лу Бо́жию предстоя́щи,// моли́ спасти́ся душа́м на́шим.

НА У́ТРЕНИ

По 1-м стихосло́вии седа́лен, глас 7:

Суету́ мирску́ю презре́вши,/ украси́лася еси́ нетле́нием кро́ткаго и молчали́ваго ду́ха/ и яви́ла еси́ ве́ру несумне́нную, упова́ние непосра́мленное,/ любо́вь и́стинную, чи́стый страх Госпо́день,/ па́мять сме́ртную и о Стра́шном Суде́ помышле́ние./ Те́мже в годи́ну гоне́ний на Це́рковь Ру́сскую не поколеба́ся душа́ твоя́,/ му́ченице Христо́ва и́мярек.

Сла́ва, и ны́не, Богоро́дичен:

Стена́ и покро́в еси́, Влады́чице,/ и ти́хое приста́нище всем в беда́х су́щим,/ к Твоему́ заступле́нию ве́рою притека́ющим./ Те́мже и мы усе́рдно вопие́м Ти:/ соблюди́ Це́рковь Ру́сскую в Правосла́вии и единомы́слии, Де́во Пречи́стая.

По 2-м стихосло́вии седа́лен, глас 4:

Бога́тство ми́ра сего́ презре́вши,/ спасе́ния усе́рдно взыска́ла еси́/ и Христа́, я́ко би́сер многоце́нный,/ во страда́ниих твои́х обрела́ еси́, му́ченице достохва́льная./ Сего́ ра́ди ны́не Це́рковь Ру́сская созыва́ет ве́рныя на торжество́,/ просла́вити дщерь свою́, му́ченицу и́мярек сла́вную.

Сла́ва, и ны́не, Богоро́дичен:

Ве́ры непоколеби́мое утвержде́ние/ и упова́ние непосты́дное душ на́ших,/ Тя, Богоро́дице, пе́сньми велича́ем:/ ра́дуйся, Правосла́вия огражде́ние,/ ра́дуйся, земли́ Ру́сския покро́ве,/ ра́дуйся, Неве́сто неневе́стная.

Велича́ние:

Велича́ем тя,/ свята́я му́ченице и́мярек,/ и чтим честна́я страда́ния твоя́,/ я́же за Христа́// претерпе́ла еси́.

Псало́м избра́нный.

1-й лик: Бог нам Прибе́жище и Си́ла, Помо́щник в ско́рбех, обре́тших ны зело́.

2-й лик: Приведу́тся Царю́ де́вы, в весе́лии и ра́довании.

1-й лик: Испове́мся Тебе́ в лю́дех, Го́споди, пою́ Тебе́ во язы́цех.

2-й лик: Мене́ жда́ша гре́шницы погуби́ти мя, свиде́ния Твоя́ разуме́х.

1-й лик: Глаго́лах о свиде́ниих Твои́х пред цари́, и не стыдя́хся.

2-й лик: Обыдо́ша мя пси мно́зи, сонм лука́вых одержа́ша мя.

1-й лик: Обыдо́ша мя, я́ко пче́лы сот, и разгоре́шася, я́ко огнь в те́рнии.

2-й лик: Искуси́л ны еси́, Бо́же, разже́гл ны еси́, я́коже разжиза́ется сребро́.

1-й лик: Аз на ра́ны гото́в: и бых я́звен весь день.

2-й лик: Тебе́ ра́ди умерщвля́емся, вмени́хомся я́ко о́вцы заколе́ния.

По полиеле́и седа́лен, глас 8:

Богозва́нная му́ченице и́мярек,/ стра́ха муче́ния не убоя́вшися,/ к по́двигу за Христа́ му́жественне устреми́лася еси́/ и ду́шу твою́, я́ко же́ртву, Жениху́ возлю́бленному в страда́ниих предаю́щи,/ за мучи́телей, по за́поведи Его́, усе́рдно моли́лася еси́:/ прости́ им, Го́споди,/ не ве́дят бо, что творя́т.

Сла́ва, и ны́не, Богоро́дичен:

Я́ко Де́ву и Еди́ну в жена́х,/ Тя безсе́менно ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и, я́ко Младе́нца, пита́еши Зижди́теля и Го́спода./ Тем, а́нгельский собо́р и челове́ческий род,/ досто́йно сла́вим пресвято́е Рождество́ Твое́/ и согла́сно вопие́м Ти:/ моли́ Христа́ Бо́га прегреше́ний оставле́ние дарова́ти/ досто́йно пою́щим сла́ву Твою́.

Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зача́ло 104.

По 50-м псалме́ стихи́ра, глас 6:

Я́ко му́драя де́ва,/ свети́льник души́ твоея́ еле́ем доброде́телей украси́вши,/ в сре́тение Жениху́ твоему́, и́мярек сла́вная,/ ра́достне изшла́ еси́/ и бра́чнаго черто́га дости́гла еси́,/ воспева́ющи с му́дрыми де́вами:// сла́ва, Го́споди, неизрече́нному милосе́рдию Твоему́.

Кано́н, его́же краегране́сие, кроме́ Богоро́дичнов:

Же́но, ве́лия ве́ра твоя́ спасе́ тя. Глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,// я́ко еди́н сла́вно просла́вися.

Жену́ до́блю обрето́хом в земли́ на́шей,/ пра́ведным жи-тие́м и страда́ньми Бо́гу угоди́вшую,/ ю́же по достоя́нию воспева́ем.

Еле́ем благоче́стия се́рдце твое́ испо́лнивши, му́ченице и́мярек,/ бу́рю безбо́жия во оте́честве на́шем во дни гоне́ний прешла́ еси́,/ Христу́ Подвигополо́жнику сла́ву возсыла́ющи.

Не убоя́лася еси́ враго́в Це́ркве Ру́сския, му́ченице и́мярек,/ и о покая́нии тех приле́жне моли́лася еси́,/ ве́ру в Бо́га тве́рдо испове́дающи.

Богоро́дичен: Богоро́дицу Тя вои́стину испове́дуя,/ лик му́чениц во след Тебе́, Де́во,/ со сла́вою Христу́ приведе́ся.

Песнь 3

Ирмо́с: Ты еси́ Утвержде́ние/ притека́ющих к Тебе́, Го́споди,/ Ты еси́ Свет омраче́нных// и пое́т Тя дух мой.

Ору́жием пра́вды кре́пость диа́волю низложи́ла еси́/ и Це́ркве Ру́сския гони́тели безбо́жныя победи́ла еси́,/ му́ченице Христо́ва и́мярек.

Ви́дяще тя А́нгелы на суди́щи беззако́ннем, Христа́ испове́дающу,/ укрепля́ху во страда́ниих/ и я́ко до́блюю му́ченицу прославля́ху.

Егда́ нечести́вии клевета́ху и реко́ша на тя всяк зол глаго́л,/ ты, му́ченице всехва́льная, смире́нием Христо́вым вооружи́вшися,/ блаже́нства ева́нгельскаго испо́лнилася еси́.

Богоро́дичен: Богоро́дице и Ма́ти Све́та,/ лик святы́х новому́чениц, Тя возлюби́вый,/ воспева́ет в Ца́рстве Сы́на Твоего́/ я́ко Честне́йшую Херуви́м и сла́внейшую без сравне́ния Серафи́м.

Седа́лен, глас 4:

Я́ко и́стинная дщерь Це́ркве Христо́вы,/ Царю́ и Бо́гу кре́стным путе́м после́довала еси́,/ И́же, благослови́в тя на страда́ния,/ кре́пость и дерзнове́ние дарова́/ и венце́м побе́дным увенча́,/ му́ченице и́мярек добросла́вная.

Сла́ва, и ны́не, Богоро́дичен:

Тя, Де́во, я́ко Ма́терь Бо́жию,/ ли́цы му́ченичестии велегла́сно прославля́ют,/ те́мже и му́ченица и́мярек, во след Сы́на Твоего́ после́довавши,/ согла́сно ублажа́ет Тя, Пречи́стая.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Любо́вию Христо́вою укрепля́ема, му́ченице и́мярек,/ не́мощь естества́ же́нскаго превозмогла́ еси́/ и му́жественне на по́двиги устреми́лася еси́.

Испове́дующи Бо́га небоя́зненно,/ о́браз терпе́ния ве́рным показа́ла еси́/ и мучи́телей посрами́ла еси́./ Те́мже тя вси, сла́вная, велича́ем.

Я́ко ла́стовица доброгла́сная ве́сну предваря́ет,/ та́ко и ты, му́ченице и́мярек,/ возрожде́ние Оте́чества и Це́ркве на́шея/ посреде́ гоне́ний ве́рным лю́дем возвести́ла еси́,/ терпели́вно муче́ния терпя́щи.

Богоро́дичен: Я́ко до́брую и кра́сную в жена́х/ ве́дят Тя, Де́во, му́ченицы святы́я/ и мо́лятся о спасе́нии душ на́ших.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́ ино́го не ве́мы.

Ве́ры свети́льник не угаси́вши,/ нощь безбо́жия в земли́ на́шей претекла́ еси́/ и нача́льников тьмы посрами́ла еси́, му́ченице прехва́льная.

Еле́ем благоче́стия ду́шу твою́ напита́ла еси́ бога́тно, свята́я и́мярек,/ и ны́не пребыва́еши в со́нме святы́х Це́ркве Ру́сския.

Ра́довалася еси́ в темни́це, я́ко в черто́зе све́тлем,/ му́ченице и́мярек благосла́вная, Христо́м просвеща́ема,/ И́же есть Свет ми́ру, Живо́т и Воскресе́ние.

Богоро́дичен: Влады́чицу Де́ву, Христа́ неизрече́нно ро́ждшую,/ христолюби́выя жены́ ра́достно обстоя́ща, непреста́нно велича́ют.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,// Многоми́лостиве Христе́ Бо́же наш.

А́нгели святи́и удивля́хуся,/ ка́ко ча́шу страда́ний, от руки́ Христо́вой прие́мши, му́ченице и́мярек честна́я,/ му́жески испила́ еси́.

Терпе́нием смире́нно укрепи́вшися,/ страда́ньми Христа́ ра́ди нечести́выя победи́ла еси́, му́ченице сла́вная,/ и Це́рковь Ру́сскую возвесели́ла еси́.

Возвесели́ Госпо́дь ду́шу твою́, му́ченице и́мярек,/ и в ри́зу спасе́ния облече́,/ истка́нную от му́ченических крове́й твои́х.

Богоро́дичен: Хвалу́ Бо́гу принесе́м и Пречи́стую Богома́терь восхва́лим,/ Ю́же ны́не новому́ченицы и испове́дницы с ли́ки а́нгельскими/ достодо́лжно ублажа́ют.

Конда́к, глас 5:

Я́ко а́гница кро́ткая,/ воспита́нная на па́житех Це́ркве Ру́сския,/ страстоте́рпице Христо́ва и́мярек,/ посреде́ лю́тых мучи́телей/ те́пле моли́лася еси́:/ Го́споди, прости́ им,// не ве́дят бо, что творя́т.

И́кос:

Му́ченице и́мярек благосла́вная,/ за́поведи Госпо́дни храня́щи,/ я́ко ма́слина плодови́та,/ в дому́ Це́ркве Ру́сския яви́ся/ и, многопло́дие доброде́телей страда́нием во́льным венча́вши,/ А́нгелы возвесели́, де́моны же посрами́./ Те́мже посреде́ лю́тых мучи́телей/ те́пле моли́лася еси́:/ Го́споди, прости́ им,/ не ве́дят бо, что творя́т.

Песнь 7

Ирмо́с: От Иуде́и доше́дше о́троцы,/ в Вавило́не иногда́,/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Обо́лкшися в броню́ пра́вды и шлем упова́ния спасе́ния восприе́мши, му́ченице достохва́льная,/ щито́м ве́ры правосла́вныя разжже́нныя стре́лы лука́ваго угаси́ла еси́.

Я́ко огне́м Боже́ственным, му́ченическими кровьми́ твои́ми, му́ченице и́мярек,/ те́рния богоху́льная и пле́велы неве́рия в земли́ на́шей попали́ла еси́.

Согре́яся се́рдце твое́ огне́м Боже́ственныя любве́,/ егда́ мучи́телие ведо́ша тя на смерть,/ ю́же му́жественне претерпева́ющи,/ благодаре́ние Бо́гу возсыла́ла еси́, му́ченице сла́вная.

Богоро́дичен: Тя благослове́нную в жена́х,/ Арха́нгельским гла́сом велича́ем:/ ра́дуйся, Благода́тная, Госпо́дь с Тобо́ю.

Песнь 8

Ирмо́с: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся ве́ки.

Пещь о́гненная не опали́ три о́троки в Вавило́не иногда́,/ та́ко и тебе́, му́ченице и́мярек,/ горни́ло испыта́ний не возмо́же поколеба́ти, в терпе́нии пою́щую:/ превозноси́те Го́спода во ве́ки.

А́гница нескве́рная, му́ченица и́мярек,/ я́ко же́ртва непоро́чная в дар Бо́гу принесе́ся./ Тоя́ моли́твами, Долготерпели́ве,/ сподо́би нас превозноси́ти Тя во ве́ки.

Страсте́й душевре́дных зной утоли́ моли́твами твои́ми, му́ченице и́мярек,/ и сердца́ на́ша благопло́дна соде́лай,/ да с тобо́ю сподо́бимся прославля́ти Го́спода во ве́ки.

Богоро́дичен: Многопе́тая Де́во,/ страда́льцев ра́досте и жен святы́х благоле́пие,/ Тя пое́м, Ми́лостивая, во ве́ки.

Песнь 9

Ирмо́с: Тя Неискусобра́чную Ма́терь Бо́га Вы́шняго,/ Тя па́че ума́ ро́ждшую сло́вом вои́стинну Бо́га,/ Вы́шшую Пречи́стых сил// немо́лчными славословле́нии велича́ем.

Есте́ство немощно́е си́лою Бо́жиею укрепи́вши,/ к соверше́нным подвиго́м устреми́лася еси́/ и мужему́дренне вене́ц му́ченический кровьми́ твои́ми стяжа́ла еси́, и́мярек всечестна́я.

Ты, добропобе́дная му́ченице и́мярек, Крест Христо́в, я́ко всеору́жие, восприе́мши,/ до́блественне страда́ния претерпе́ла еси́/ и ко́знем диа́вольским противоста́ти возмогла́ еси́./ Те́мже тя вси по достоя́нию велича́ем.

Я́ко мироно́сица, Христу́ после́довала еси́/ и страда́нием вене́ц побе́дный от Того́ прия́ла еси́./ Те́мже, дерзнове́ние ве́лие иму́щи,/ моли́ при́сно о почита́ющих тя.

Богоро́дичен: Христо́вою любо́вию уязвля́емыя жены́ му́ченицы/ и от Бо́га венча́вшияся/ Тя, Всенепоро́чную и до́брую в жена́х,/ почита́ют я́ко Цари́цу Всечестну́ю.

Свети́лен:

Му́ченица Твоя́, Го́споди, и́мярек,/ я́ко му́драя де́ва, свети́льник души́ своея́ еле́ем украси́вши,/ во след Тебе́ устреми́ся/ и, Черто́га Небе́снаго дости́гши,/ Све́та Невече́рняго лицезре́ти сподо́бися./ Ея́же моли́твами, Светода́вче, и нас све́том Твои́м озари́/ и на путь и́стинный напра́ви.

Сла́ва, и ны́не, Богоро́дичен:

Всесвята́я Богоро́дице,/ святы́я жены́, иму́ща Тя я́ко Сокро́вище Пребога́тое,/ лику́ют со А́нгелы ра́достно/ и Бо́га Сло́ва, из Тебе́ Ро́ждшагося пло́тию за милосе́рдие мно́гое,/ сла́вят непреста́нно.

На хвали́тех стихи́ры, глас 1.

Подо́бен: Небе́сных чино́в:

Небе́сных чино́в соприча́стница/ и земли́ Ру́сския кре́пкое предста́тельство,/ му́ченица Христо́ва и́мярек/ лику́ет ны́не в со́нме новому́чеников,/ воздая́ние ве́чное прие́мши,// и мо́лится о душа́х на́ших.

Небе́снаго Иерусали́ма избра́нница/ и Це́ркве Ру́сския до́брое украше́ние,/ кро́ткая страстоте́рпица и́мярек/ прославля́ет Бо́га во ве́ки,/ хвалу́ Тому́ при́сно возсыла́ющи,// и мо́лится о душа́х на́ших.

Небе́сныя сла́вы насле́дница/ и земли́ на́шея ди́вная похвала́,/ многострада́льная и́мярек,/ я́ко пра́ведница и му́ченица,/ мо́лит Человеколю́бца Бо́га// о спасе́нии душ на́ших.

Сла́ва, глас 8:

Му́ченице Христо́ва и́мярек,/ непоро́чным житие́м и во́льным страда́нием/ Бо́гу угоди́вши,/ зе́млю на́шу во Правосла́вии утверди́ла еси́/ и, я́ко со́лнце, просвети́вшися/ во Ца́рствии Отца́ Небе́снаго,/ Це́рковь Ру́сскую возвесели́ла еси́,/ ны́не же со дерзнове́нием// мо́лишися о душа́х на́ших.

И ны́не, Богоро́дичен, глас то́йже:

Возвели́чим вси Пренепоро́чную,/ Ма́терь Бо́га на́шего,/ Ю́же освяти́ Дух Святы́й,/ я́ко предста́тельство на́ше и спасе́ние/ и Святы́я Руси́ заступле́ние,/ к Не́йже ны́не прибега́ем/ и моли́тву возсыла́ем:// Пресвята́я Богоро́дице, спаси́ нас.

Славосло́вие вели́кое. И отпу́ст.

НА ЛИТУРГИ́И

Блаже́нна от кано́на, пе́снь 3-я и 6-я.

Проки́мен, глас 6: Тебе́ ра́ди умерщвля́емся весь день,// вмени́хомся я́ко о́вцы заколе́ния. Стих: О Бо́зе похва́лимся весь день и о и́мени Твое́м испове́мыся во век.

Апо́стол к Кори́нфяном, зача́ло 181.

Аллилу́ия, глас 1: Терпя́ потерпе́х Го́спода, и внят ми. Стих: И услы́ша моли́тву мою́.

Ева́нгелие от Ма́рка, зача́ло 21.

Прича́стен: Весели́теся, пра́веднии, о Го́споде, и испове́дайте па́мять Святы́ни Его́.

Моли́тва

О до́блественная страстоте́рпице Христо́ва и́мярек, земли́ на́шея до́брое прозябе́ние, Це́ркве Ру́сския избра́нная дщи! Кто не удиви́тся си́ле Бо́жией, в не́мощи твое́й соверши́вшейся? Ты бо, му́жески враги́ ви́димыя и неви́димыя низложи́вши, заточе́ния и мно́гия му́ки Христа́ ра́ди претерпе́ла еси́ и Ца́рствие Небе́сное насле́довала еси́. Те́мже тя, я́ко благу́ю и ве́рную рабу́ Госпо́дню, досто́йно почита́юще, приле́жно мо́лим: моли́ о нас Всеще́драго Бо́га, да да́рует Це́ркви Росси́йстей благостоя́ние, Оте́честву на́шему мир, лю́дем во благоче́стии преспе́яние, в ско́рбех утеше́ние, в обстоя́ниих по́мощь и заступле́ние, да благода́тию Бо́жиею и твои́м те́плым предста́тельством земно́е жи́тельство про́йдем и Ца́рствия Небе́снаго дости́гнем, иде́же вку́пе с тобо́ю сподо́бимся прославля́ти ди́внаго во святы́х Свои́х Бо́га на́шего, Отца́, и Сы́на, и Свята́го Ду́ха, во ве́ки веко́в. Ами́нь.

ВЕ́ЧЕР

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ Е́вина дщи избежа́ пре́лести зми́евы,/ испове́дница и́мярек сла́вная,/ ея́же ле́пота душе́вная/ Це́ркве Ру́сския бысть украше́ние,/ та бо, страда́ния своя́ нивочто́же вменя́ющи,/ претерпе́ суди́ще беззако́нное./ Сего́ ра́ди на Стра́шнем Суде́ Христо́вом// ми́лостивая засту́пница нам бу́дет.

О, блаже́ннаго изволе́ния!/ Сомани́тида дре́вле проро́ка Бо́жия Елиссе́я почти́/ во дни отступле́ния Изра́иля от Бо́га,/ ты же, страда́лице и́мярек честна́я,/ во дни гоне́ния безбо́жнаго в земли́ на́шей,/ Христа́ небоя́зненно испове́дала еси́/ и, по́слежде благоче́стно пожи́вши,/ по́двиг твой в ми́ре сконча́ла еси́.// Сего́ ра́ди мо́лим тя спасти́ся душа́м на́шим.

О, прему́дрости ра́зума!/ Восхваля́ет Соломо́н жену́ мужелюби́вую,/ мы же вельми́ воспева́ем боголюби́вую,/ святу́ю страда́лицу и́мярек,/ сия́ бо, науче́на от Свята́го Ду́ха,/ Христа́ на суди́щи испове́даше/ и, ве́ру правосла́вную нело́жно храня́щи,/ врата́ми пра́вды в Ца́рство Небе́сное вни́де,// иде́же мо́лится спасти́ся душа́м на́шим.

О, пресла́внаго чудесе́!/ Дре́вле Мариа́м проро́чица,/ сквозе́ Чермно́е мо́ре проше́дши,/ с ли́ки и тимпа́ны Бо́га прославля́ше,/ ны́не же страда́лица и́мярек сла́вная,/ пучи́ну безбо́жных гоне́ний преплы́вши/ и зе́млю Ру́сскую кровьми́ украси́вши,/ Го́споду побе́дную песнь воспева́ет:// сла́вно бо просла́вися.

Сла́ва, глас 8:

Боже́ственным раче́нием укрепля́ема,/ пучи́ну гоне́ний до́бле прешла́ еси́,/ и́мярек достосла́вная,/ и к Све́ту Незаходи́мому, я́ко испове́дница Христо́ва, возшла́ еси́,/ иде́же вку́пе с новому́ченики и испове́дники Росси́йскими мо́лишися,/ о е́же сохрани́тися земно́му Оте́честву на́шему в Правосла́вии// и спасти́ся душа́м на́шим.

И ны́не, Богоро́дичен: Ка́ко не диви́мся:

Вход. Проки́мен дне. Чте́ния 3 му́ченическая.

На стихо́вне стихи́ры, глас 4.

Подо́бен: Дал еси́ зна́мение:

Дал еси́ кре́пость и си́лу/ боя́щейся Тебе́, Го́споди,/ испове́днице честне́й и́мярек,/ я́коже дре́вле святы́м жена́м,/ победи́ти ви́димыя и неви́димыя враги́./ Те́мже ны́не воспева́ют ю свяще́нницы Госпо́дни,/ и велича́ют вси лю́дие земли́ на́шея,/ я́ко претерпе́ гоне́ния и заточе́ния// вели́кия ра́ди сла́вы Твоея́.

Стих: Приведу́тся Царю́ де́вы// в весе́лии и ра́довании.

А́ще безу́мнии тща́хуся/ угро́зами и ле́стию притво́рною/ тече́ние твое́ ко спасе́нию разори́ти,/ оба́че преподо́бнеи ру́це к Бо́гу воздева́ющи,/ Амали́ка мы́сленнаго победи́ла еси́/ и, целому́дрия свещу́ еле́ем испове́дания уясни́вши,/ с му́дрыми де́вами в неве́стник неизрече́нныя сла́вы возшла́ еси́,// страстоте́рпице и́мярек достосла́вная.

Стих: Испове́мся Тебе́ в век, я́ко сотвори́л еси́,// и терплю́ и́мя Твое́.

Я́ко ла́стовица доброгла́сная,/ Це́ркви на́шей ве́сну обновле́ния/ страда́нием за Христа́ возвести́ла еси́,/ богоблаже́нная ма́ти и́мярек./ Ны́не же со гла́сом новому́чеников и испове́дников Росси́йских/ Го́спода при́сно прославля́еши/ и мо́лишися Ему́ усе́рдно,/ мир и благоде́нствие Оте́честву на́шему дарова́ти// и душа́м на́шим ве́лию ми́лость.

Сла́ва, глас 8:

Благода́ть Бо́жию невреди́му сохра́ньши/ страда́нием и испове́данием,/ в ме́ру во́зраста исполне́ния Христо́ва дости́гла еси́,/ богому́драя ма́ти и́мярек,/ и, я́ко пшени́ца до́брая, на ни́ве Росси́йстей взраще́нная,/ от жития́ претру́днаго в Небе́сныя жи́тницы со́брана бысть./ Те́мже, Бо́гу ны́не предстоя́щи,// моли́ о ве́рою и любо́вию чту́щих тя.

И ны́не, Богоро́дичен: Творе́ц и Изба́витель:

Тропа́рь, глас 4:

Благоче́стно в зако́не Госпо́дни пожи́вши,/ ве́ру Правосла́вную сохрани́ла еси́/ и, терпе́нием гони́тели Це́ркве Ру́сския посрами́вши,/ страда́ния за Христа́ претерпе́ла еси́,/ испове́днице сла́вная и́мярек,/ престо́лу Бо́жию предстоя́щи,// моли́ спасти́ся душа́м на́шим.

НА У́ТРЕНИ

По 1-м стихосло́вии седа́лен, глас 3:

Кто не подиви́тся благоразу́мию твоему́, досточу́дная ма́ти и́мярек,/ я́ко Го́споду неотсту́пно после́довавши,/ о спасе́нии души́ твоея́ умоля́ла еси́/ и кре́пость на гони́тели Це́ркве Ру́сския обрела́ еси́./ Сего́ ра́ди ева́нгельски вопие́м ти:/ о же́но, ве́ра твоя́ спасе́ тя.

Сла́ва, и ны́не, Богоро́дичен:

Тя, хода́тайствовавшую спасе́ние ро́да на́шего,/ воспева́ем, Богоро́дице Де́во,/ пло́тию бо, от Тебе́ восприя́тою, Сын Твой и Бог наш,/ Кресто́м восприи́м Страсть,/ изба́ви нас от тли, я́ко Человеколю́бец.

По 2-м стихосло́вии седа́лен, глас 4:

Зако́ну Госпо́дню усе́рдно поуча́ющися,/ в нощи́ гоне́ний на Це́рковь Ру́сскую/ тве́рдым испове́данием ве́ры свеща́ негаси́мая яви́лася еси́, богоблаже́нная ма́ти и́мярек,/ и день гряду́щаго спасе́ния Оте́честву на́шему возвести́ла еси́./ Те́мже тя похвала́ми сла́вными велича́ем.

Сла́ва, и ны́не, Богоро́дичен:

Пресвята́я Де́во, упова́ние христиа́н,/ Бо́га, Его́же родила́ еси́ па́че ума́ и сло́ва,/ непреста́нно моли́ сохрани́ти в Правосла́вии/ ве́рою и любо́вию при́сно Тя велича́ющия.

Велича́ние:

Велича́ем тя,/ испове́днице Христо́ва и́мярек,/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

Псало́м избра́нный:

1-й лик: Испове́мся Тебе́, Го́споди, всем се́рдцем мои́м о ми́лости Твоей и и́стине Твое́й.

2-й лик: Госпо́дь Помо́щник мой, на Него́ упова́ се́рдце мое́, и испове́мся Ему́.

1-й лик: Глаго́лах о свиде́ниих Твои́х пред цари́ и не стыдя́хся.

2-й лик: Испове́мся и́мени Твоему́, Го́споди, я́ко бла́го, я́ко от вся́кия печа́ли изба́вил мя еси́.

1-й лик: На Бо́га упова́х, не убою́ся, что сотвори́т мне челове́к.

2-й лик: Изведи́ из темни́цы ду́шу мою испове́датися и́мени Твоему́.

1-й лик: Поноше́ния понося́щих Ти нападо́ша на мя.

2-й лик: От бездн земли́ па́ки возве́л мя еси́, и́бо аз испове́мся Тебе́ в лю́дех, Го́споди.

1-й лик: Весели́теся, пра́веднии, о Го́споде и испове́дайте па́мять святы́ни Его́.

2-й лик: Да испове́дятся Тебе́, Го́споди, вся дела́ Твоя́.

По полиеле́и седа́лен, глас 1:

Я́ко жена́ ева́нгельская заква́ску в три ме́ры муки́ вложи́,/ та́ко ты, достохва́льная, испове́данием ве́ры Правосла́вныя/ трича́стное души́ твоея́ освяти́ла еси́:/ ра́зум и́стиною Христо́вою,/ жела́ния во́лею Бо́жиею,/ чу́вствия же любо́вию ко Го́споду,/ и си́ми и́же на Це́рковь Ру́сскую ополчи́вшияся/ посрами́ла еси́, испове́днице и́мярек.

Сла́ва, и ны́не, Богоро́дичен:

О Держа́вная Всецари́це,/ преподо́бных наде́ждо, му́чеников кре́посте,/ А́нгелов сла́во, челове́ков покро́ве/ и всего́ ми́ра всемо́щная Засту́пнице,/ изба́ви Це́рковь Ру́сскую вся́каго зла́го обстоя́ния,/ еди́на Чи́стая и Благослове́нная.

Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,// Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зача́ло 104.

По 50-м псалме́ стихи́ра, глас 6:

Днесь испове́дница Христо́ва,/ достосла́вная и́мярек,/ страда́нии и скорбьми́ украше́нная,/ я́ко голуби́ца кро́ткая,/ криле́ поста́ и моли́твы иму́щая,/ в черто́г Небе́снаго Жениха́ возлете́вши,/ с ли́ки святы́х испове́дников Росси́йских/ Престо́лу Бо́жию предстои́т// и сла́вит Преве́чнаго Бо́га.

Кано́н, его́же краегране́сие кроме́ Богоро́дичнов:

Приведу́тся Царю́ де́вы в след Ея́. Глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,// я́ко Еди́н сла́вно просла́вися.

Приими́ пе́ние, и́мярек благосла́вная,/ цве́те благоуха́нный Це́ркве Ру́сския,/ от почита́ющих любо́вию испове́дническия по́двиги твоя́.

Ре́вностию по Бо́зе стремле́ния богобо́рческая в Ру́сстей земли́ посрами́ла еси́/ и гони́тели безбо́жныя испове́данием ве́ры обличи́ла еси́, сла́вная и́мярек.

Изсуши́вши тве́рдою ве́рою ума́ душевре́дное,/ стезю́ испове́дничества безбе́дно прешла́ еси́/ и в Небе́сных селе́ниих водвори́лася еси́, и́мярек богоблаже́нная.

Богоро́дичен: Тебе́ Предста́тельницу иму́щия, Пречи́стая,/ сла́вныя жены́, посто́м и терпе́нием зми́еву держа́ву сокруши́вшия,/ сла́ву Небе́сную обрето́ша.

Песнь 3

Ирмо́с: Ты еси́ Утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой.

Ве́ры Правосла́вныя щит восприе́мши,/ и оде́ждею доброде́телей обле́кшися, ма́ти и́мярек,/ ко́зни диа́вола, на тя устремле́нныя,/ му́жественно отрази́ла еси́.

Ева́нгельских за́поведей исполни́тельница и Правосла́вия ревни́тельница,/ испове́дница Христа́ Бо́га и украше́ние земли́ на́шея яви́лася еси́,/ до́блестная ма́ти и́мярек.

До́блественне Бо́гу рабо́тавши,/ плоть распя́ла еси́ со страстьми́ и похотьми́/ и души́ твоея́, ма́ти и́мярек,/ любве́ ра́ди Христо́вы не пощади́ла еси́.

Богоро́дичен: Тебе́, Богороди́тельнице, честны́я жены́ предстоя́щия, сла́ву воздаю́т,/ поще́нием кре́пко подвиза́вшияся/ и му́жественне врага́ низложи́вшия.

Седа́лен, глас 4:

Украси́вши ду́шу твою́ красото́ю кро́ткаго и молчали́ваго ду́ха,/ уста́ же испове́данием ве́ры освяти́вши,/ Красне́йшему добро́тою, па́че сыно́в челове́ческих, предста́ла еси́,/ за Русь многострада́льную моля́щися,/ испове́днице и́мярек честна́я.

Сла́ва, и ны́не, Богоро́дичен:

От А́нны пра́ведныя процве́тши, Де́во,/ родила́ еси́ Царя́ Христа́ и ра́дость ро́ду челове́ческому дарова́ла еси́./ Сего́ ра́ди рождеству́ Твоему́ сра́дуются благочести́вых жен сосло́вие земли́ на́шея,/ ко́зни гони́телей сла́вно препобеди́вшия.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Ум впери́вши к Бо́гу,/ Амали́ка зломы́сленнаго моли́твою победи́ла еси́, ма́ти и́мярек,/ и, я́ко испове́дница сла́вная, страда́ния за Христа́ претерпе́ла еси́.

Тве́рдость ве́ры Правосла́вныя показа́вши, мужему́дренная ма́ти и́мярек,/ гоне́ния, у́зы темни́чныя и го́рькия рабо́ты претерпе́ла еси́,/ си́лою Креста́ Христо́ва укрепля́ема.

Сло́вом ева́нгельским пита́ема, сла́вная,/ к по́двигу испове́дническому устреми́лася еси́/ и страда́нием Христу́ Бо́гу сочета́лася еси́.

Богоро́дичен: Богома́ти Пречи́стая,/ Госпо́дь от Тебе́ неизрече́нно плоть прия́т,/ сего́ ра́ди жен естество́, иногда́ под кля́твою бы́вшее, ны́не возвели́чися.

Песнь 5

Ирмо́с: У́тренююще вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́ ино́го не ве́мы.

Я́ко сокро́вище многоце́нное, спасе́ния усе́рдно взыску́ющи, сла́вная ма́ти,/ Христу́ усе́рдно после́довала еси́/ и крест страда́ния му́жественне подъя́ла еси́.

Ца́рства Небе́снаго возжеле́вши, досточу́дная и́мярек,/ ду́шу твою́ покая́нием очи́стила еси́/ и по́двиги страда́ния терпели́вно подъя́ла еси́.

А́нгели светоно́снии дивя́щеся терпе́нию твоему́, ма́ти сла́вная,/ ду́шу твою́, благода́тию освяще́нную,/ Престо́лу Го́спода вы́шних Сил приведо́ша.

Богоро́дичен: Покро́в и Засту́пницу Тя име́ющия, Всечи́стая,/ жены́ благочести́выя земли́ на́шея во дни безбо́жия не отверго́шася Го́спода,/ оба́че, изгна́ния и страда́ния му́жественне претерпева́ющия,/ непобежде́ны пребы́ша.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,// Многоми́лостиве, Христе́ Бо́же наш.

Ри́зу плотска́го мудрова́ния терпе́нием совле́кши, боголюби́вая ма́ти и́мярек,/ ри́зу спасе́ния от Христа́ Бо́га досто́йно восприя́ла еси́,/ те́мже во тьме безбо́жия досточу́дно в стране́ на́шей просия́ла еси́.

Ю́зы темни́чныя, глад и гоне́ния/ претерпе́ла еси́ му́жественне, испове́днице и́мярек,/ те́мже о́браз ве́ры и благоче́стия Росси́йским жена́м яви́ла еси́.

День и нощь простира́ла еси́, испове́днице, преподо́бнеи ру́це твои́ к Бо́гу,/ Еди́ному могу́щему сохрани́ти тя в напа́стех,/ те́мже тя ублажа́ем.

Богоро́дичен: Жены́ и де́вы, благоче́стию поноша́ему в стране́ на́шей,/ посто́м и страда́нием Го́споду угоди́ша./ Ны́не же непреста́нно мо́лятся Сы́ну Твоему́, Пречи́стая,/ да утверди́тся в Правосла́вии Це́рковь Ру́сская.

Конда́к, глас 4:

Я́ко крин благоуха́нный,/ посреде́ пусты́ни безбо́жия/ в земне́м Оте́честве твое́м процвела́ еси́,/ блаже́нная ма́ти и́мярек,/ и, житие́ доброде́тельное испове́данием ве́ры украси́вши,/ востекла́ еси́ к Небе́сному Жениху́ Христу́,// И́же увенча́ тя красото́ю сла́вы нетле́нныя.

И́кос:

Ка́ко воспои́м тя, Це́ркве Ру́сския похвалу́, достоблаже́нная испове́днице и́мярек,/ вся́кая жите́йская попече́ния отри́нувшую/ и благу́ю часть и еди́ное на потре́бу избра́вшую,/ тече́ние по́двигом зако́нным запечатле́вшую/ и страда́нием сло́во Христа́ Бо́га на́шего испо́лньшую,/ И́же увенча́ тя красото́ю сла́вы нетле́нныя.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.

Еле́ем благода́ти огнь любве́ ко Христу́ распала́ющи,/ огня́ ве́чнаго избе́гла еси́/ и, гоне́ния мучи́телей нивочто́же вменя́ющи,/ в черто́г к Жениху́ Небе́сному возшла́ еси́,/ испове́днице и́мярек сла́вная.

Вавило́ни дще́ре окая́нныя ме́рзкое порожде́ние,/ безбо́жию хотя́щее преда́ти зе́млю Ру́сскую,/ о ка́мень испове́дания твоего́ псало́мски разби́ла еси́, добропобе́дная ма́ти и́мярек.

Воздержа́ния росо́ю пла́мень страсте́й угаси́вши,/ испове́данием ве́ры воста́ния богоху́льная сокруши́ла еси́, достоблаже́нная ма́ти,/ и о́браз ве́рным лю́дем яви́ла еси́.

Богоро́дичен: Я́ко Бо́га ро́ждшую пло́тию, Пречи́стая,/ нра́вом благоче́стным чтим Тя непреста́нно/ вку́пе с честны́ми жена́ми,/ посто́м просия́вшими и страда́ньми врага́ низложи́вшими.

Песнь 8

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Спасе́тся жена́ чадоро́дием, веща́ет апо́стол,/ ты же, испове́днице сла́вная, мно́гия доброде́тели породи́вши,/ я́ко лоза́ плодови́та, в вертогра́де Це́ркве Ру́сския яви́лася еси́/ и страда́ньми твои́ми вино́ спаси́тельное источи́ла еси́/ сла́вящим о тебе́ Христа́ во ве́ки.

Любо́вию Христо́вою уязви́вшися,/ к испове́данию ве́ры устреми́лася еси́, и́мярек,/ и, чистоту́ душе́вную храня́щи,/ страда́ние я́ко дар Невестокраси́телю душ принесла́ еси́,/ превознося́щи Его́ во ве́ки.

Е́вино преслуша́ние, породи́вшее смерть, при́сно помышля́ющи, достосла́вная и́мярек,/ послуша́нием Христу́ ми́ру у́мре,/ последи́ же и испове́данием ве́ры просла́ви Его́./ Те́мже, на Не́бо возше́дши,/ Тро́ицу Святу́ю благослови́ши во ве́ки.

Богоро́дичен: С новому́ченики и испове́дники Росси́йскими, Пречи́стая,/ и все́ми святы́ми жена́ми/ умоли́ Еди́наго во святы́х почива́ющаго/ сохрани́ти зе́млю на́шу, славосло́вящую Тя во вся ве́ки.

Песнь 9

Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.

Да́ры Христу́ любо́вию принесла́ еси́, испове́днице и́мярек,/ моли́тву я́ко зла́то, поще́ние я́ко лива́н и страда́ние я́ко сми́рну./ Тем тя благоче́стно велича́ем.

Еле́ем целому́дрия и испове́данием ве́ры преукраше́на,/ вся добра́ яви́лася еси́/ и Еди́наго Бо́га просла́вила еси́./ Его́же моли́ спасти́ся почита́ющим па́мять твою́, и́мярек сла́вная.

Я́ко го́рлица пустыннолю́бная, превита́ющи в Го́рний Сио́н,/ от се́ти ловя́щих изба́вилася еси́ Правосла́вною ве́рою, страда́лице честна́я,/ ви́димых и неви́димых враг посрами́вши./ Те́мже тя ку́пно с а́нгельскими ли́ки почита́ем.

Богоро́дичен: Тебе́, Всепе́тую Влады́чицу,/ я́ко Всецари́цу, Христу́ Царю́ предстоя́щую,/ вку́пе с испове́дницею свято́ю и́мярек досто́йно велича́ем.

Свети́лен:

Ду́хом просвеща́ема, и́мярек достоблаже́нная,/ испове́данием Христа́ возсия́ла еси́ в Це́ркви Ру́сстей./ Сего́ ра́ди све́том Небе́сным чту́щия тя озари́, ма́ти всехва́льная.

Сла́ва, и ны́не, Богоро́дичен:

Вои́стинну, Богоро́дице, Тя благода́рственне велича́ем,/ Ты бо еси́ Ма́ти ро́да христиа́нскаго и Храни́тельница достоя́ния Твоего́, Це́ркве Росси́йския,/ и возгла́вие ли́ка святы́х жен.

На хвали́тех стихи́ры, глас 8.

Подо́бен: О, пресла́внаго чудесе́:

О испове́днице и́мярек сла́вная,/ ты все житие́ твое́ вве́ргла еси́/ в сокро́вищницу Це́ркве Ру́сския,/ я́ко вдови́ца две́ ле́пте,/ воздержа́нием и страда́нием,/ моли́твою и чистото́ю,/ помышля́ющи, я́ко лу́чши пра́веднику ма́лая,/ па́че бога́тства мно́га гре́шному,// и ны́не, я́ко му́драя де́ва, восхваля́еши Го́спода.

О, пресла́внаго чудесе́!/ Кровоточи́вая жена́ ве́рою иногда́ исцели́ся,/ ты же, честна́я, и́мярек,/ у́зы темни́чныя и страда́ния восприе́мши,/ тве́рдым испове́данием ве́ры Христо́вы/ гони́телей посрами́ла еси́/ и, я́ко жена́, лю́бящая Го́спода,/ досто́йно и пра́ведно пожила́ еси́,// те́мже тя прославля́ем.

Тя, сла́сти грехо́вныя отве́ргшую/ и ду́шу за Христа́ не пощаде́вшую,/ воздви́же Человеколю́бец Госпо́дь,/ я́ко дщерь Иаи́рову,/ к Небе́сней жи́зни и безсме́ртней трапе́зе,/ сла́вная испове́днице и́мярек./ Те́мже в Це́ркви Ру́сстей,/ я́ко дще́ри Сио́ни во врате́х Иерусали́ма,// о тебе́ хвалы́ Бо́гу возсыла́ем.

Сла́ва, глас 8:

Сле́зы скорбе́й и страда́ния/ мно́гою ве́рою и любо́вию Христу́ принесла́ еси́,/ испове́днице всечестна́я,/ и ны́не дерзнове́ние и́маши/ моли́ти о проще́нии грехо́в на́ших,/ прося́щи Правосла́вней Це́ркви утвержде́ния,/ Оте́честву на́шему благостоя́ния// и всем лю́дем ве́лия ми́лости.

И ны́не, Богоро́дичен, глас то́йже:

При́зри на моле́ния Твои́х раб, Всенепоро́чная,/ вся́кия ско́рби избавля́ющи зе́млю Ру́сскую,/ дом Твой нарече́нную/ и кровьми́ новому́ченик и испове́дник освяще́нную./ Да не постыди́мся, Влады́чице Держа́вная, Тя призыва́ющии,/ всех правосла́вных по́моще,/ ра́досте и покро́ве// и спасе́ние душ на́ших.

Славосло́вие вели́кое и отпу́ст.

НА ЛИТУРГИ́И

Блаже́нна от кано́на, пе́снь 3-я и 6-я.

Проки́мен, глас 4: Бо́же, дще́ри царе́й// в че́сти Твое́й. Стих: Приведу́тся Царю́ де́вы в след Ея́.

Апо́стол: посла́ние Петро́во 1, зача́ло 59.

Аллилу́ия, глас 1: И́скренния Ея́ приведу́тся Тебе́. Стих: Приведу́тся в весе́лии и ра́довании, введу́тся в храм Царе́в.

Ева́нгелие от Луки́, зача́ло 33.

Прича́стен: В па́мять ве́чную бу́дет пра́ведник:

Моли́тва

О до́блественная испове́днице Христо́ва и́мярек, земли́ на́шея до́брое прозябе́ние, Це́ркве Ру́сския избра́нная дщи! Кто не удиви́тся си́ле Бо́жией, в не́мощи твое́й соверши́вшейся? Ты бо, му́жески враги́ ви́димыя и неви́димыя низложи́вши, заточе́ния и мно́гия му́ки Христа́ ра́ди претерпе́ла еси́ и Ца́рствие Небе́сное насле́довала еси́. Те́мже тя, я́ко благу́ю и ве́рную рабу́ Госпо́дню, досто́йно почита́юще, приле́жно мо́лим: моли́ о нас Всеще́драго Бо́га, да да́рует Це́ркви Росси́йстей благостоя́ние, Оте́честву на́шему мир, лю́дем во благоче́стии преспе́яние, в ско́рби утеше́ние, в обстоя́ниих по́мощь и заступле́ние, да благода́тию Бо́жиею и твои́м те́плым предста́тельством земно́е жи́тельство про́йдем и Ца́рствия Небе́снаго дости́гнем, иде́же вку́пе с тобо́ю сподо́бимся прославля́ти ди́внаго во святы́х Свои́х Бо́га на́шего, Отца́, и Сы́на, и Свята́го Ду́ха, во ве́ки веко́в. Ами́нь.

Ме́сяца септе́мвриа в 26-й де́нь

На вели́цей вече́рни

Блаже́н муж: 1-й антифо́н.

На Го́споди, воззва́х: стихи́ры, глас 6:

Земля́ Пско́вская просла́вися, / я́ко в ма́лем селе́нии Кли́не / от благочести́ваго ко́рене плод благокра́сен прозябе́, / Васи́лий, отроча́ благонра́вное, / святи́телю Вели́кому тезоимени́тое. / В сем же и́мени ве́лий, я́ко ца́рственный, // путь ему́ преднарече́ся.

Благочести́вый иере́й Иоа́нн, / оте́ц твой, святи́телю, / открове́ния ди́внаго сподо́бися, / егда́ ма́ти его́ почи́вшая / во сне ему́ яви́ся / и тя, еще́ ти о́троку су́щу, / еди́наго от трие́х бра́тий // вели́ка преднарече́.

Измла́да це́рковь Бо́жию возлюби́в / и благоче́стия вожделе́в, свя́те, / в духо́внем вертогра́де / во сло́ве Бо́жии, / оте́ческих и благочести́вых писа́ниих // нача́т поуча́тися.

Что у́бо сотворю́, / ки́им о́бразом жития́ моего́ / Тебе́, Влады́це и Бо́гу, до́бре послужу́, / ки́ими по́двиги, Тебе́ соде́йствующу, / ду́шу мою́ от грех очи́щу? / в ме́ру во́зраста прише́д, // сле́зно взыва́л еси́ ко Го́споду, блаже́нне Ти́хоне.

Сла́ва, глас 8:

Путь де́вства, нищеты́, / свое́й во́ли отсече́ния / избра́л еси́, блаже́нне, / и́ноческое постриже́ние прии́м, / в не́мже и́менем Ти́хон нарече́н бе, // да путе́м благоче́стия святи́теля Задо́нскаго ше́ствуеши.

И ны́не, Богоро́дичен, глас то́йже: Царь Небе́сный:

Вход. Проки́мен дне. И чте́ния три.

При́тчей чте́ние (главы́ 10, 3 и 8):

Па́мять пра́веднаго с похвала́ми, и благослове́ние Госпо́дне на главе́ его́. / Блаже́н челове́к, и́же обре́те Прему́дрость, и сме́ртен, и́же уве́де ра́зум. / Лу́чше бо Сию́ купова́ти, не́жели зла́та и сребра́ сокро́вища. / Честне́йшая же есть ка́мений многоце́нных, все же честно́е недосто́йно Ея́ есть. / Долгота́ бо дней и ле́та живота́ в десни́це Ея́, в шу́йце же Ея́ бога́тство и сла́ва. / От уст Ея́ исхо́дит пра́вда, зако́н же и ми́лость на язы́це но́сит. / Послу́шайте у́бо Мене́, о ча́да, честна́я бо реку́: и блаже́н челове́к, и́же пути́ Моя́ сохраня́т; / исхо́ди бо Мои́, исхо́ди живота́, и уготовля́ется хоте́ние от Го́спода. / Сего́ ра́ди молю́ вас и предлага́ю Мой глас сыново́м челове́ческим: / я́ко Аз прему́дрость устро́их, сове́т и ра́зум, и смысл Аз призва́х. / Мой сове́т и утвержде́ние, Мой ра́зум, Моя́ же кре́пость. / Аз Мене́ лю́бящия люблю́, и́щущии же Мене́ обря́щут благода́ть. / Разуме́йте у́бо, незло́бивии, кова́рство, ненака́зании же, прилага́йте сердца́. / Послу́шайте Мене́ и па́ки, честна́я бо реку́: и отве́рзу от усте́н пра́вая, / я́ко и́стине поучи́тся горта́нь Мой, ме́рзки же предо Мно́ю устны́ лжи́выя. / С пра́вдою вси глаго́лы уст Мои́х: ничто́же в них стро́потно, ниже́ развраще́нно. / Вся пра́ва суть разумева́ющим и про́ста обрета́ющим ра́зум. / Науча́ю бо вас и́стине, да бу́дет о Го́споде наде́жда ва́ша и испо́лнитеся Ду́ха.

При́тчей чте́ние (главы́ 10 и 11):

Уста́ пра́веднаго ка́плют прему́дрость, язы́к же непра́веднаго поги́бнет. / Устне́ муже́й пра́ведных ка́плют благода́ти, уста́ же нечести́вых развраща́ются. / Ме́рила льсти́вая ме́рзость пред Го́сподем, вес же пра́ведный прия́тен Ему́. / Иде́же а́ще вни́дет досажде́ние, та́мо и безче́стие: уста́ же смире́нных поуча́ются прему́дрости. / Соверше́ние пра́вых наста́вит их, и поползнове́ние отрица́ющихся упасе́т их. / Не по́льзуют име́ния в день я́рости, пра́вда же изба́вит от сме́рти. / У́мер пра́ведный, оста́ви раска́яние, нару́чна же быва́ет и посмея́тельна нечести́вых па́губа. / Пра́вда непорочнаго исправля́ет пути́, в нече́стие же па́дает непра́вда. / Пра́вда муже́й пра́вых изба́вит их: безсове́тием же пленя́ются беззако́ннии. / Сконча́вшуся му́жу пра́ведну, не поги́бнет наде́жда, похвала́ же нечести́вых поги́бнет. / Пра́ведник от ло́ва убе́гнет, вме́сто же его́ предае́тся нечести́вый. / Во усте́х нечести́вых сеть гра́жданом, чу́вство же пра́ведных благоспе́шное. / Во благи́х пра́ведных испра́вится град, и в поги́бели нечести́вых ра́дование. / Во благослове́нии пра́вых возвы́сится град, усты́ же нечести́вых раскопа́ется. / Руга́ется гра́жданом лише́нный ра́зума, муж же му́дрый безмо́лвие во́дит.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет. / Ста́рость бо честна́ не многоле́тна, ниже́ в числе́ лет исчита́ется. / Седи́на же есть му́дрость челове́ком, и во́зраст ста́рости житие́ нескве́рное. / Благоуго́ден Бо́гови быв, возлю́блен бысть, и живы́й посреде́ гре́шник преста́влен бысть. / Восхище́н бысть, да не зло́ба измени́т ра́зума его́, или́ лесть прельсти́т ду́шу его́. / Раче́ние бо зло́бы помрача́ет до́брая, и паре́ние по́хоти пременя́ет ум незло́бив. / Сконча́вся вма́ле, испо́лни ле́та до́лга. Уго́дна бо бе Го́сподеви душа́ его́, сего́ ра́ди потща́ся от среды́ лука́вствия. / Лю́дие же ви́девше и не разуме́вше, ниже́ поло́жше в помышле́нии таково́е. / я́ко благода́ть и ми́лость в преподо́бных Его́, и посеще́ние во избра́нных Его́.

На лити́и стихи́ры, глас 3:

Во гра́де Торопце́, во хра́ме Бо́жии, / иде́же роди́тель твой служа́ше, / благоче́стию в ю́ных ле́тех // поуча́лся еси́, святи́телю.

Тих нра́вом, / кро́ток и смире́н се́рдцем / вои́стину пред Бо́гом и людьми́ яви́лся еси́, / и́го Христо́во чрез все житие́ до́бре пронесы́й, / во оби́телех Небе́сных упоко́ился еси́, блаже́нне, / моли́ся ны́не и о нас, / да и мы, на земли́ до́бре пожи́вше, // Ца́рствия Бо́жия насле́дницы бы́ти сподо́бимся.

Сла́ва, глас 8:

Бог тя возвели́чи, святи́телю о́тче Ти́хоне, / первоиера́рха Це́ркве Своей поста́вив, / ты же, жре́бий служе́ния сего́ / я́ко во́лю благу́ю Его́ восприи́м, / в первосвяти́тельстем по́двизе твое́м / при́сно ревнова́л еси́ о сла́ве / Отца́ и Сы́на и Свята́го Ду́ха, // Тро́ицы Единосу́щныя и Неразде́льныя.

И ны́не, Богоро́дичен, глас то́йже:

К Тебе́, о Богома́ти, / вси ны́не сле́зно взыва́ем: / вонми́ предста́тельству святи́теля Ти́хона о нас / и Сы́ну Твоему́ моли́твы вознеси́ // о спасе́нии душ на́ших.

На стихо́вне стихи́ры, глас 2:

Я́коже свеща́ на све́щнице све́тит всем, / та́ко ты, благоче́стием сия́я, блаже́нне, / поста́влен бысть Го́сподем во епи́скопа земли́ Хо́лмския, / да све́том Христо́ва уче́ния // осиява́еши лю́ди, в ней живу́щия.

Стих: Уста́ моя́ возглаго́лют прему́дрость, // и поуче́ние се́рдца моего́ ра́зум.

Бог благослови́ и освяти́ тя, земле́ Америка́нская, / правосла́вным бо лю́дем твои́м, во огра́де Росси́йския Це́ркве су́щим, / блаже́ннаго Ти́хона епи́скопа даде́, / той мно́гими хра́мы лице́ твое́ укра́си / и я́ко богому́дрый священнонача́льник // па́ству свою́ ко Христу́ приведе́.

Стих: Благовести́х пра́вду // в це́ркви вели́цей.

Святи́и вси земли́ Яросла́вския, / срета́йте иера́рха до́бра, / Ти́хона блаже́ннаго, / той бо, я́коже и вы, мно́гая труды́ зде понесе́ / и ны́не тщи́тся вку́пе с ва́ми моли́тися Христу́ Бо́гу // спасти́ся душа́м на́шим.

Сла́ва, глас 8:

Земля́ Лито́вская просла́вися / прише́ствием твои́м, блаже́нне, / лю́дие же правосла́внии, в ней су́щии, / я́ко свети́льника ве́ры и благоче́стия тя прия́ша / и в поклоне́нии Триеди́ному Бо́гу / тобо́ю утверди́шася, / святи́тельский же омофо́р твой наде́жный покро́в // и защи́та от злых обстоя́ний тем яви́ся.

И ны́не, Богоро́дичен, глас то́йже: При́зри на моле́ния:

Тропа́рь, глас 1:

Апо́стольских преда́ний ревни́теля / и Христо́вы Це́ркве па́стыря до́браго, / ду́шу свою́ за о́вцы положи́вшаго, / жре́бием Бо́жиим избра́ннаго / Всеросси́йскаго Патриа́рха Ти́хона восхва́лим / и к нему́ с ве́рою и упова́нием возопии́м: / предста́тельством святи́тельским ко Го́споду / Це́рковь Ру́сскую в тишине́ соблюди́, / расточе́нная ча́да ея́ во еди́но ста́до собери́, / отступи́вшия от пра́выя ве́ры к покая́нию обрати́, / страну́ на́шу от междоусо́бныя бра́ни сохрани́ // и мир Бо́жий лю́дем испроси́.

На у́трени

На Бог Госпо́дь: тропа́рь святи́теля, два́жды. Сла́ва, И ны́не, Богоро́дичен.

По 1-м стихосло́вии седа́лен, глас 2:

Жезл первосвяти́тельский дерзнове́нно прия́л еси́, свя́те, / да я́ко до́брый па́стырь, небоя́зненно в по́двизе твое́м ше́ствуя, / заблу́ждшая горохи́щная овча́та обря́щеши, / та́тьми похи́щенная во двор о́вчий па́ки возврати́ши, / многоразли́чными боле́зньми и неду́ги обдержи́мыя до́бре уврачу́еши / и все Христо́во ста́до слове́сных ове́ц / в и́стине и пра́вде упасе́ши.

Сла́ва, И ны́не, Богоро́дичен, глас то́йже:

Покры́й нас всемо́щным покро́вом Твои́м, / Всеми́лостивая Влады́чице Богоро́дице, / защити́ нас от вся́ких сете́й вра́жиих, / даде́ся бо Ти благода́тная си́ла, / я́ко ро́ждшей Влады́ку Христа́ и Спа́са душ на́ших.

По 2-м стихосло́вии седа́лен, глас 5:

Благодаре́ние Бо́гу / воздади́те, лю́дие росси́йстии, / Той бо проба́вил есть ми́лость Свою́ вам, / Ти́хона блаже́ннаго / первоиера́рха Це́ркве Своея́ поста́ви, / да во дни испыта́ний / обря́щете в нем о́браз ве́ры, / от наве́тов вра́жиих неколе́блемый, / нело́жнаго упова́ния на по́мощь Бо́жию / и любо́вию Христо́вою испо́лненный.

Сла́ва, И ны́не, Богоро́дичен, глас то́йже:

Утоли́, Влады́чице, / боле́зни душ на́ших, / ра́достию благода́тною о Тебе́ испо́лни сердца́ на́ша, / на Тя бо наде́ющии́ся, / прича́стницы жи́зни ве́чныя бу́дем.

По полиеле́и седа́лен, глас 8:

Прииди́те, ве́рнии, / согла́сно вси восхва́лим святи́теля преди́внаго, / священнонача́льника Це́ркве Росси́йския богому́драго, / Ти́хона блаже́ннаго, / и́же досто́йно и́го Христо́во / чрез все житие́ свое́ понесе́ / и ны́не, во оби́телех Отца́ Небе́снаго водвори́вся, / мо́лится о спасе́нии душ на́ших.

Сла́ва, И ны́не, Богоро́дичен, глас то́йже:

Бу́ди благослове́н день и час, / во́ньже благоволи́ Госпо́дь / Тобо́ю, Пречи́стая Богоро́дице, / яви́ти Спа́са ми́ру, / сим же нам име́ти Тя / я́ко дерзнове́нную Предста́тельницу / и Хода́таицу пред Сы́ном Твои́м / о спасе́нии душ на́ших.

Степе́нна, 1-й антифо́н 4-го гла́са. Проки́мен, глас 4: Вознесо́х избра́ннаго // от люде́й Мои́х. Стих: Еле́ем Мои́м пома́зах его́. Вся́кое дыха́ние: Ева́нгелие от Иоа́нна, зача́ло 36.

По 50-м псалме́ стихи́ра, глас 6:

Це́рковь Бо́жию и чад ея́ преи́скренне любя́й / и к по́льзе тех дея́ния своя́ всеме́рно направля́я, / же́ртвенно и дерзнове́нно, / я́коже дре́вле Моисе́й, / Го́споду взыва́л еси́, святи́телю: / у́не мне, Влады́ко, / да забве́нию преда́стся и́мя мое́ в челове́цех, / но спасе́на бу́дет Це́рковь Твоя́ во оте́чествии мое́м / и изся́кнут пото́цы кро́ве му́ченик, // зе́млю Росси́йскую оби́льно обагри́вшии.

Кано́н, глас 6.

Песнь 1

Ирмо́с: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, // Бо́гу побе́дную песнь пои́м, вопия́ше.

Я́коже плод кра́сный спаси́тельнаго се́яния Бо́жия / яви́лся еси́ в Це́ркви, святи́телю Христо́в, / роди́телей благочести́вых, иере́я Иоа́нна и Анны, быв о́трасль преди́вная.

Предрече́ние ди́вное во сне отцу́ твоему́ / о гряду́щем вели́чии твое́м, еще́ ти о́троку су́щу, по мно́зех ле́тех сбы́стся, / зане́ вои́стину вели́кий господи́н Росси́йския Це́ркве яви́лся еси́, блаже́нне.

О́браз кро́тости, смире́ния и любве́ о Го́споде явля́я, / до́брый помо́щник ю́ным друго́м твои́м был еси́, блаже́нне, / сего́ ра́ди и ти́и, еще́ ти о́троку су́шу, архиере́я Бо́жия прореко́ша тя.

Богоро́дичен: Спаси́ нас от вся́ких бед, Всеми́лостивая Влады́чице Богоро́дице, / и Твои́ми моли́твами к Сы́ну Твоему́ и Бо́гу на́шему / исцели́ от грехо́вныя боле́зни стра́ждущия ду́ши на́ша.

Песнь 3

Ирмо́с: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени // испове́дания Твоего́.

В вертогра́дех духо́вных / правосла́вно богосло́вити и сло́во Бо́жие ины́ми язы́ки глаго́лати / поуча́лся еси́ приле́жно, блаже́нне, / и сие́ в церко́внем служе́нии твое́м до́брый плод принесе́.

Егда́ Влады́ка Госпо́дь объя́тия о́тча отве́рзе ти / и я́ко возлю́бленна сы́на во и́ночестве Ти́хона прия́т тя, / тогда́ нача́льника в вертогра́дех духо́вных Пско́ва и Каза́ни поста́вити тя благоволи́, / да правосла́вныя о́троки богому́дрию и христиа́нскому благоче́стию научи́ши, блаже́нне.

Хо́лмскую па́ству до́бре упра́вити призва́ тя Влады́ка Христо́с, / те́мже и нача́ло положи́ святи́тельским подвиго́м твои́м, / да в них укрепля́яся, изря́ден архиере́й Всеросси́йския Це́ркве яви́шися, блаже́нне.

Богоро́дичен: Мно́жества грехо́в лю́те обдержа́т ду́ши на́ша, / Ты же, Пречи́стая Богома́ти, моли́твами Твои́ми ко И́же от Тебе́ Ро́ждшемуся / плене́ния сего́ грехо́внаго изба́ви и на стезю́ спасе́ния наста́ви нас.

Седа́лен, глас 1:

До́брому ева́нгельскому па́стырю подража́я, / дерзнове́нно во двор о́вчий вшел еси́, святи́телю, / и, своя́ о́вцы глаша́я по и́мени, / во огра́де Церко́вней ты́я невреди́мо соблю́л еси́.

Сла́ва, И ны́не, Богоро́дичен, глас то́йже:

К Тебе́, о Богома́ти, / моли́твенно мы ны́не прибега́ем / и предста́тельства Твоего́ пред Сы́ном Твои́м / усе́рдно про́сим: / от грехо́внаго лови́тельства сохрани́ нас / и на путь спасе́ния наста́ви.

Песнь 4

Ирмо́с: Христо́с моя́ си́ла, // Бог и Госпо́дь, / честна́я Це́рковь / боголе́пно пое́т, взыва́ющи, // от смы́сла чи́ста о Го́споде пра́зднующи.

Смотре́нию Бо́жию сле́дуя, веле́нию ма́тере Це́ркве повину́яся, / земли́ да́льния Америка́нския дости́гл еси́ / и та́мо но́вую па́ству, люде́й алеу́тских, крео́льских, кена́рских, / во огра́де Христо́вы Це́ркве я́ко до́брый па́стырь соблю́л еси́, / Ти́хоне блаже́нне.

Ра́дуйтеся и весели́теся, ве́рная ча́да Це́ркве Росси́йския, / и́же в Пенсильва́нии, Калифо́рнии, Флори́де и ины́х зе́млях Америка́нских су́щая, / святи́тель бо Ти́хон ны́не Престо́лу Бо́жию предстои́т / и мо́лится о спасе́нии душ на́ших.

Кроншта́дтскаго па́стыря собесе́дник бы́ти сподо́бился еси́, блаже́нне, / еще́ сый епи́скоп гра́да Яросла́вля, / и той ти всеросси́йское па́стырство предуказа́. / Те́мже и ны́не с ним, Престо́лу Бо́жию предстоя́, / моли́ спасти́ся душа́м на́шим.

Богоро́дичен: Досто́йно есть прославля́ти Тя, Влады́чице, / при́сно спаса́ющую зе́млю Росси́йскую. / Се бо и святи́тель Ти́хон в Яросла́встем хра́ме Успе́ния Твоего́ / госуда́ря Никола́я я́ко и́стиннаго Пома́занника Бо́жия сре́те / и благода́рственныя моли́твы вку́пе с ним о заступле́нии оте́чества на́шего / Тебе́ и Сы́ну Твоему́ принесе́.

Песнь 5

Ирмо́с: Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, / И́стиннаго Бо́га, // от мра́ка грехо́внаго взыва́юща.

Егда́ по грехо́м на́шим наше́ствие иноплеме́нных Госпо́дь попусти́ / и земля́ Росси́йская кро́вию обагри́ся, / ты, святи́телю, покая́ние пропове́дуя / и врачевству́ душе́вному и теле́сному стра́ждущих до́бре соде́йствуя, / кре́пце стоя́ти за ве́ру Правосла́вную, царя́ благове́рнаго и оте́чество свято́е призыва́л еси́.

Ополче́нию вра́жеску у стен гра́да Ви́льно стоя́щу, / цельбоно́сныя мо́щи святы́х му́ченик Анто́ния, Иоа́нна и Евста́фия / из оби́тели Свята́го Ду́ха благогове́йно изне́сл еси́, святи́телю, / и во гра́де Москве́ от поруга́ния инозе́мных невреди́мы сохрани́л еси́.

Благоволе́нием Бо́жиим и наро́да Бо́жия избра́нием / Моско́вский архипа́стырь поста́влен был еси́, свя́те, / те́мже и досто́йный прее́мник Моско́вских святи́телей яви́лся еси́.

Богоро́дичен: А́нгельский собо́р и челове́ческий род о Тебе́ ра́дуется, / Благода́тная Мари́е, Ма́ти Неискусому́жная, / Невмести́маго бо во чре́ве вмести́ла еси́ / и родила́ еси́ Спа́са ми́ру.

Песнь 6

Ирмо́с: Жите́йское мо́ре / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, // Мпогоми́лостиве.

Пустынножи́тель ста́рец, пред о́бразом Влады́чицы усе́рдно моля́ся, / жре́бий со тре́петом из ковче́жца извлече́, / на не́мже и́мя твое́ я́ко Бо́гом избра́ннаго первосвяти́теля начерта́но бе. / Сего́ ра́ди и мы ны́не, я́коже тогда́ иера́рси собо́ра, / немо́лчно а́ксиос тебе́, архипа́стырю наш, вопие́м, / сотвори́ и нас я́ко слове́сныя о́вцы досто́йны бы́ти па́жити твоея́.

О глубины́ бога́тства и прему́дрости Бо́жия! / Изво́лися Ду́ху Свято́му со иера́рхи / поста́вити тя, блаже́нне, Патриа́рха Це́ркве Росси́йския, / да во дни испыта́ния ве́ры свиде́тельствуеши кре́пкое в ней стоя́ние / и па́ству твою́ неврежде́нну от наве́тов вра́жиих до́бре соблюде́ши.

О неизрече́нныя любве́ и милосе́рдия Бо́жия! / Святи́тель Ти́хон во главу́ Росси́йския Це́ркве поставля́ется, / и мно́зи лю́дие добраго па́стыря обрета́ют / и во огра́де церко́вней соблюда́ются.

Богоро́дичен: Ра́дуются и лику́ют лю́дие росси́йстии, Присноде́во, / Введе́ние Твое́ во храм пра́зднующе, / и, возведе́ние святи́теля Ти́хона в Патриа́рха Росси́йскаго / в сей же день благода́рив воспомина́юще, усе́рдно взыва́ют Ти: / о Влады́чице Держа́вная! / Моли́твами святи́теля Ти́хона / Це́рковь и зе́млю Росси́йскую от всех наве́тов вра́жиих спаси́ / и вся ве́рныя в черто́ги Небе́сныя введи́.

Конда́к, глас 2:

Ти́хостию нра́ва укра́шен, / кро́тость и милосе́рдие ка́ющимся явля́яй, / во испове́дании Правосла́вныя ве́ры и любве́ ко Го́споду / тверд и непрекло́нен пребы́л еси́, / святи́телю Христо́в Ти́хоне. / Моли́ся о нас, да не разлучи́мся от любве́ Бо́жия, // я́же о Христе́ Иису́се, Го́споде на́шем.

И́кос:

А́нгелов Творе́ц и Госпо́дь в бурено́сныя дни мяте́жа и нестрое́ния ве́лия, восхоте́в лю́дем стра́ждущим утеше́ние дарова́ти, яви́ тя, Патриа́рше прети́хий и предо́брый, я́ко свети́ло светоза́рное, све́том Трисия́ннаго Божества́ озаря́ющее ду́ши ве́рных, да и ны́не гряду́т по тебе́ вси жела́ющия со Христо́м бы́ти, сего́ ра́ди во умиле́нии вопие́м ти: ра́дуйся, от жре́бия патриа́ршества а́ки от мона́шескаго послуша́ния не уклони́выйся; ра́дуйся, ре́вностному исполне́нию Боже́ственных хоте́ний научи́выйся; ра́дуйся, на престо́л патриа́рший, две́сте лет пустова́вый, в день Введе́ния во храм Пресвяты́я Богоро́дицы возше́дый; ра́дуйся, в день Благове́щения со престо́ла первосвяти́тельскаго ко Престо́лу Пресвяты́я Тро́ицы преше́дый; ра́дуйся, первосвяти́тельством и испове́дничеством украше́нный; ра́дуйся, Бо́га ра́ди поживы́й и Бо́гом просветле́нный; ра́дуйся, по́двигом свои́м патриа́ршество непрело́жно утверди́вый; ра́дуйся, о́браз па́стыря до́браго собо́ю яви́вый; ра́дуйся, Донски́я оби́тели сугу́бое прославле́ние; ра́дуйся, Правосла́вныя Це́ркве во Аме́рице утвержде́ние; ра́дуйся, росси́йския па́ствы богови́дное насле́дие; ра́дуйся, богоначерта́нный сви́тче правыя ве́ры; ра́дуйся, святи́телю Ти́хоне, Це́ркве Правосла́вныя похвало́ и утвержде́ние.

Песнь 7

Ирмо́с: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие мучи́теля увеща́ вопи́ти: // благослове́н еси́, Бо́же оте́ц на́ших.

Плач, стена́ние и го́ре вели́кое, гряду́щия на Це́рковь Росси́йскую, / предзре́л еси́, первосвяти́телю, / оба́че, Христо́вою любо́вию укрепля́емь, му́жественно взыва́л еси́: / благослове́н еси́, Бо́же оте́ц на́ших.

В лю́тую годи́ну первосвяти́тельский жезл со стра́хом и тре́петом прии́м, блаже́нне, / Це́рковь Росси́йскую, я́ко кора́бль нерукотво́рный, до́бре упра́вил еси́, / ве́рныя же научи́л еси́ взыва́ти: / благослове́н еси́, Бо́же оте́ц на́ших.

Проро́ку дре́внему Илии́, взыску́ющу не прекло́ньших коле́на пред Ваа́лом, / подража́л еси́, первосвяти́телю, / да взы́щеши лю́ди, и́же не преклони́ша вы́ю лови́тельству безбо́жных, / та́же и па́дших из глубины́ грехо́вныя воздви́гнеши, / и ве́рныя научи́ши в ско́рбных обстоя́ниих взыва́ти Го́споду: / благослове́н еси́, Бо́же оте́ц на́ших.

Богоро́дичен: Помо́щницу наде́жную и́мамы Тя, Богоро́дице, / мно́гажды бо в ско́рбных обстоя́ниих / предста́тельство о лю́дех росси́йских пред Сы́ном Твои́м явля́ла еси́.

Песнь 8

Ирмо́с: Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́, / вся бо твори́ши, Христе́, то́кмо е́же хоте́ти, // Тя превозно́сим во вся ве́ки.

Во о́браз твоего́ усе́рднаго подража́ния служе́нию первосвяти́телей Моско́вских / в свяще́нныя оде́жды тех досто́йно облаче́н был еси́, блаже́нне, / те́мже с ни́ми о нас моли́ся, да и мы досто́йни бу́дем / превозноси́ти Го́спода во вся ве́ки.

Жезл первосвяти́теля Петра́ со дерзнове́нием прия́л еси́, блаже́нне, / да о́браз вла́сти предстоя́теля в Це́ркви Росси́йстей возста́виши. / Мы же, ве́дяще сицеву́ю ми́лость Бо́жию к нам, / Го́спода превозно́сим во вся ве́ки.

Грехо́м на́шим умно́жившимся, / попусти́ Госпо́дь братоуби́йству и междоусо́бным бра́нем в земли́ Росси́йстей бы́ти. / Ты же, святи́телю, люде́й вражду́ющих к покая́нию и примире́нию призыва́л еси́, / науча́я превозноси́ти Христа́ во ве́ки.

Богоро́дичен: В дому́ Твое́м, Пречи́стая Де́во, хра́ме Успе́ния Твоего́, / поставле́ние блаже́ннаго Ти́хона в первосвяти́теля Росси́йскаго соверши́ся, / те́мже моли́твы того́, я́ко ве́рнаго служи́теля Твоего́ / к Бо́гу вознеси́ и спаси́ ду́ши на́ша.

Песнь 9

Ирмо́с: Бо́га / челове́ком невозмо́жно ви́дети, / на Него́же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во Воплоще́нно, / Его́же велича́юще, / с Небе́сными во́й // Тя ублажа́ем.

Пла́чем и рыда́нием земля́ Росси́йская огласи́ся, / кровь святы́х му́ченик и испове́дник Христо́вых пото́ки по ней излия́ся, / хра́мы Бо́жии оскверни́шася и попра́нию преда́шася. / Увы́ мне, земле́ моя́! взыва́л еси́, святи́телю. / Ко́е врачева́ние прилежи́т ти, да всех сих изба́вишися?

Увы́ мне, лю́дие росси́йстии! взыва́л еси́, блаже́нне. / Го́спода забы́хом, в де́лех на́ших осуети́хомся, / попече́ния же о души́ николи́же име́хом. / Ей, глаго́лю вам, благоволе́ния Бо́жия не обря́щем, / а́ще ду́ши на́ша слеза́ми покая́ния пред Го́сподем не потщи́мся очи́стити.

В темни́це томя́щуся ти, святи́телю, о Це́ркви премно́го боле́зновал еси́, / иера́рси бо и свяще́нницы не́цыи, / на стезю́ Иу́ды преда́теля ступи́вше и непра́ведно власть в Це́ркви восхи́тивше, / злохудо́жная дея́ния своя́ я́ко обновле́ния блага́я нареко́ша, / и сим па́ству Росси́йскую в смяте́ние приведо́ша, / и в нестрое́ниих церко́вных тя́жце пови́нни бы́ша.

Ни скорбь, ни теснота́, ни гоне́ние, ни глад, ни нагота́, ниже́ беда́, ни меч / не возмо́гут разлучи́ти ве́рных чад Христо́вых от любве́ Его́, / апо́стольски рекл еси́, святи́телю.

Богоро́дичен: Ки́я похвалы́ возгласи́м Ти, Пречи́стая? / Ки́ими словесы́ вели́чие Твое́ возсла́вим, / я́ко Спа́са родила́ еси́ душ на́ших?

Свети́лен, глас 1:

Первосвяти́теля Росси́йскаго Ти́хона днесь просла́вим, / па́мять его́ благоче́стно почита́юще, / той бо, я́ко свети́льник пресве́тлый, просия́л есть / и о́бразом пресве́тлаго жития́ своего́ / ре́вностному служе́нию Бо́гу лю́ди науча́ет.

Сла́ва, и ны́не, Богоро́дичен:

Ра́дуйся, Богоро́дице Де́во, / Влады́чице Держа́вная, / Светода́вца Христа́ ми́ру ро́ждшая; / ра́дуйся, похвале́ всея́ вселе́нныя; / ра́дуйся, Пречи́стая Ма́ти Бо́жия Благослове́нная.

На хвали́тех стихи́ры, глас 4:

Ве́ре в лю́дех оскуде́вшей, / любви́ истощи́вшейся, / наде́жди изся́кнувшей, / попусти́ Госпо́дь / мор же́сток, боле́знь и глад на лю́ди оте́чества на́шего. / Ты же, святи́телю, / святы́ни Бо́жия от поруга́ния неве́рных защища́я, / о стра́ждущих боле́зновал еси́ / и к милосе́рдию и же́ртве поси́льней от щедро́т свои́х // всеросси́йскую па́ству призыва́л еси́.

Словеса́ прему́дра, / о е́же не ле́ты, но дея́ньми благи́ми / полнота́ жития́ челове́ческаго пред Бо́гом измеря́ется, / на тебе́ испо́лнишася, святи́телю. / Те́мже, ду́шу доброде́тельми обогаще́нну име́я, / в Небе́сныя оби́тели всели́лся еси́, // иде́же мо́лишися о нас при́сно.

Внима́йте у́бо себе́, / лю́дие росси́йстии! / Проба́ви бо Госпо́дь ны́не ми́лость Свою́ нам: / пото́цы кро́ве му́ченик изсяко́ша, / плене́ния от вла́сти безбо́жных свободи́хомся, / попра́ннии хра́мы Бо́жии возставля́ются. / Бежи́м всеме́рно прираже́ния грехо́внаго, / да не па́ки гнев Бо́жий наведе́м на ся // и не бу́дут нам после́дняя го́рша пе́рвых.

Сла́ва, глас 8:

Кровьми́ святы́х му́ченик / Це́рковь Христо́ва дре́вле утверди́ся, / та́кожде и во дни твоя́, святи́телю Ти́хоне, / во оте́честве на́шем, я́ко пото́цы водни́и, / кровь святы́х му́ченик пролия́ся, / оба́че смотре́нием Бо́жиим / сия́ се́мя яви́ся, / из него́же прозябе́ благосенноли́ственное дре́во // Руси́ Правосла́вныя.

И ны́не, Богоро́дичен:

Пречи́стая Де́во Ма́ти, / благоволи́ла еси́ святи́телю Ти́хону / в день благове́стил Ти Арха́нгела Гаврии́ла / по́прище земна́го пути́ его́ сконча́ти / и я́ко избра́нника Твоего́ / в Небе́сных черто́зех всели́ти. / Те́мже, о Богома́ти, / моли́твы святи́теля Ти́хона / о стра́ждущей стране́ Росси́йстей и лю́дех ея́ / к Сы́ну Твоему́ и Бо́гу вознеси́ // и спаси́ ду́ши на́ша.

Славосло́вие вели́кое и отпу́ст.

Моли́тва

О па́стырю наш до́брый, святы́й вели́кий Патриа́рше Ти́хоне! я́ко град го́рний ты яви́лся еси́: до́брая дела́ твоя́ и доны́не све́тятся пред челове́ки. Ве́мы, я́ко ты, предстоя́ Престо́лу Святы́я Тро́ицы, ве́лие и́маши дерзнове́ние в моли́твах пред Го́сподем. Воззри́ и ны́не на нас, гре́шных и недосто́йных чад твои́х, к тебе́ бо, я́ко иму́щему ве́лие дерзнове́ние пред Творце́м вся́ческих, ны́не припа́даем и усе́рдно мо́лимся: умоли́ Го́спода, да пода́ст нам решимость стяжа́ти благоче́стие отце́в на́ших, его́же ты стяжа́л еси́ от ю́ности твоея́. Ты в житии́ свое́м ре́вностный защи́титель и храни́тель и́стинныя ве́ры был еси́, помози́ и нам незы́блему соблюсти́ ве́ру правосла́вную. Ти́хая бо душа́ твоя́ зело́ преуспе́ла есть в боже́ственнем смиренному́дрии, научи́ и нас ра́зум наш пита́ти не многомяте́жною му́дростию челове́ческою, но смире́нным позна́нием во́ли Бо́жия. Ты пред лице́м лю́тых враго́в Христо́вых И́стиннаго Бо́га дерзнове́нно испове́дал еси́, моли́твою свое́ю укрепи́ нас, малоду́шных, да и мы всегда́ и всю́ду противоста́нем ду́ху безбо́жия и льсти. Ей, уго́дниче Бо́жий, не пре́зри нас, моля́щихся тебе́, и́бо не то́кмо от бед и скорбе́й избавле́ния про́сим, но си́лы и тве́рдости, великоду́шия и любве́ про́сим, дабы́ претерпева́ти о́ныя напа́сти, востаю́щия на ны. Испроси́ нам неосла́бное терпе́ние да́же до конца́ жития́ на́шего, мир с Го́сподем и грехо́в отпуще́ние. Отче святы́й! Укроти́ в стране́ на́шей ве́тры неве́рия и сму́ты, да водвори́т Госпо́дь на земли́ Росси́йстей тишину́ и благоче́стие и любо́вь нелицеме́рную; моли́твами твои́ми да сохрани́т ю от междоусо́бныя бра́ни, да укрепи́т святу́ю Це́рковь на́шу правосла́вную, да не оскуде́ет она́ и́стинными па́стырьми, до́брыми де́лательми, пра́во пра́вщими сло́во ева́нгельския и́стины; упаси́ и заблу́ждшия о́вцы ста́да Христо́ва. Наипа́че же моли́ Го́спода Сил, да возроди́тся ру́сская земля́ святы́м покая́нием и еди́ным се́рдцем и еди́ными усты́ просла́вит ди́внаго во святы́х Свои́х Бо́га, в Тро́ице сла́вимаго Отца́ и Сы́на и Свята́го Ду́ха во ве́ки веко́в. Ами́нь.

Ме́сяца иу́лия в 4-й де́нь

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н.

На Го́споди, воззва́х: стихи́ры на 8, глас 2.

Подо́бен: Егда́ от Дре́ва:

Егда́ на ца́рство Росси́йское венча́шеся, пома́занниче Нико́лае,/ тогда́ усе́рдно моли́лся еси́:/ Влады́ко и Го́споди мой,/ наста́ви мя в де́ле, на не́же посла́л мя еси́,/ да бу́дет со мно́ю прему́дрость Твоя́,/ да разуме́ю, что есть уго́дно пред очи́ма Твои́ма,/ и в день Суда́ Твоего́ непосты́дно возда́м Тебе́ сло́во./ Те́мже не о сла́ве земно́й попече́ние име́л еси́,// но па́че о сла́ве Небе́сней.

Егда́ на святе́й Руси́/ тя́жкаго испыта́ния вре́мя наста́,/ тогда́ ты, страстоте́рпче святы́й Нико́лае,/ моли́лся еси́ о спасе́нии ея́,/ и се, яви́ся ико́на Засту́пницы держа́вныя,/ я́ко зна́мение прия́тия вла́сти/ на пречи́стеи ру́це Цари́цы и Влады́чицы./ Те́мже Росси́я,/ а́ще и вла́стию безбо́жных угнете́на бысть,/ предста́тельством Де́вы Богоро́дицы// и моли́твами твои́ми сохрани́ся.

Егда́ мно́зи беззако́нницы и вожди́ лю́дстии/ восхоте́ша воста́ти на ве́ру, царя́ и оте́чество,/ тогда́ ты, богому́дре страстоте́рпче Нико́лае,/ боле́зновал еси́ о наро́де твое́м/ и, Ка́инова братоуби́йства в держа́ве свое́й избе́гнути хотя́,/ власть земну́ю, сла́ву и по́честь оста́вил еси́,/ все упова́ние возлага́я на Бо́га./ Те́мже ны́не, предстоя́ Престо́лу Царя́ ца́рствующих,/ моли́ся о держа́ве Росси́йстей// и спасе́нии душ на́ших.

Егда́ наста́ гоне́ние,/ заточе́ние и поноше́ние,/ тогда́ тве́рдую ве́ру,/ наде́жду на Бо́га и чисте́йшую любо́вь,/ терпе́ние же и всепроще́ние показа́сте,/ святи́и ца́рственнии страстоте́рпцы,/ творя́ще кро́тко моли́твы за враги́./ Ве́лие на земли́ благоче́стие ва́ше,// ве́лия на Небесе́х сла́ва ва́ша.

И́ны стихи́ры, глас 6.

Подо́бен: Все отло́жше:

Все упова́ние на Бо́га возложи́вше,/ святи́и ца́рственнии страстоте́рпцы,/ о́браз терпе́ния и страда́ния/ всей земли́ Росси́йстей яви́стеся./ Вы бо, моля́щеся о мучи́телех,/ клевету́, у́зы и изгна́ние,/ глумле́ние, насмея́ние и оболга́ние,/ убие́ние и теле́с поруга́ние/ му́жественне претерпе́ли есте́.// Сего́ ра́ди вас при́сно прославля́ем.

Все благоче́стие твое́ во Христе́ бысть,/ свята́я му́ченице цари́це Алекса́ндро Росси́йская,/ прешла́ бо еси́ от Лю́теровы ве́ры к Правосла́вию,/ его́же восприя́ла еси́ всем се́рдцем твои́м,/ возлюби́вши моли́тву,/ храм Бо́жий и святы́х оте́ц уче́ния,/ и, я́ко ма́ти добронра́вная,/ во благоче́стии возрасти́ла еси́ ча́да твоя́,/ и та́я угото́вала еси́ в непоро́чную же́ртву за Христа́.// Сего́ ра́ди тя при́сно прославля́ем.

Плод благосла́вен/ моли́тв Саро́вскаго чудотво́рца/ и ча́емый насле́дник ца́рственных роди́телей быв,/ наде́жда, сла́ва и упова́ние Росси́и,/ в ра́дость лю́дем правосла́вным яви́лся еси́,/ святы́й царе́вичу Алекси́е./ Бо́жиим же промышле́нием/ мно́гия ско́рби и неду́ги/ измла́да безро́потно терпе́л еси́/ и, я́ко а́гнец непоро́чный,/ убие́ние от злочести́вых прия́л еси́,/ ны́не же лику́еши, я́ко насле́дник Ца́рствия Небе́снаго.// Сего́ ра́ди тя при́сно ублажа́ем.

Дще́ри царе́вы,/ святы́я му́ченицы де́вы,/ и́стинныя неве́сты Христо́вы/ О́льго, Татиа́но, Мари́е и Анастаси́е,/ вы, я́ко му́дрыя ева́нгельския де́вы,/ еле́й милосе́рдия/ в душа́х при́сно храня́щия,/ стра́ждущим, ни́щим и боля́щим/ усе́рдно послужи́ли есте́/ и, за гоня́щих вас/ да́же до сме́рти Го́спода моля́щия,/ в черто́зех Жениха́ Небе́снаго всели́лися есте́.// Сего́ ра́ди вас при́сно ублажа́ем.

Сла́ва, глас 8:

Сою́зом любве́ Христо́вы связу́еми,/ седмочи́сленнии ца́рственнии страстоте́рпцы,/ поноше́ния и убие́ния не убоя́вшеся,/ пе́рвии, я́ко новому́ченицы,/ за Русь святу́ю от безбо́жных пострада́сте/ и о́браз испове́дничества и ре́вности по Бо́зе/ ве́рным лю́дем показа́сте./ Те́мже, Земли́ Ру́сския/ покрови́телие неусыпа́емии я́вльшеся,/ Триеди́наго Бо́га непреста́нно моли́те/ о спасе́нии оте́чества на́шего// и всех с любо́вию вас почита́ющих.

И ны́не, Богоро́дичен, глас то́йже: Кто Тебе́ не ублажи́т:

Вход. Проки́мен дне. И чте́ния.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я́, и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину,/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Царств тре́тиих чте́ние (главы́ 8 и 9):

Ста Соломо́н пред лице́м олтаря́ Госпо́дня,/ пред всем собо́ром Изра́илевым, и воздви́же ру́це свои́ на не́бо, и рече́:/ Го́споди, Бо́же Изра́илев, несть я́коже Ты Бог на Небеси́ горе́ и на земли́ ни́зу,/ храня́й заве́т и ми́лость рабу́ Твоему́,/ ходя́щему пред Тобо́ю всем се́рдцем свои́м,/ я́же сохрани́л еси́ рабу́ Твоему́ Дави́ду, отцу́ моему́:/ и́бо глаго́лал еси́ усты́ Твои́ми и рука́ма Твои́ма соверши́л еси́, я́коже день сей./ И ны́не, Го́споди, Бо́же Изра́илев,/ сохрани́ рабу́ Твоему́ Дави́ду, отцу́ моему́, я́же рекл еси́ ему́, глаго́ля:/ не оскуде́ет муж от лица́ Моего́, седя́й на престо́ле Изра́илеве,/ то́кмо а́ще сохраня́т ча́да твоя́ пути́ своя́, е́же ходи́ти предо Мно́ю,/ я́коже ходи́л еси́ предо Мно́ю./ И услы́шиши моли́тву раба́ Твоего́ и люди́й Твои́х Изра́иля,/ о ни́хже помо́лятся на ме́сте сем:/ и Ты услы́шиши на ме́сте обита́лища Твоего́ на Небеси́,/ и сотвори́ши и поми́луеши./ Ели́ка а́ще согреши́т ки́йждо ко и́скреннему своему́,/ и а́ще прии́мет на него́ кля́тву, е́же кля́ти его́,/ и прии́дет, и испове́сть пред лице́м олтаря́ Твоего́ в хра́ме сем./ И Ты услы́шиши от Небесе́, и сотвори́ши суд лю́дем Твои́м Изра́илю,/ осуди́ти беззако́ннаго, да́ти путь его́ на главу́ его́,/ и оправди́ти пра́веднаго, да́ти ему́ по пра́вде его́,/ егда́ паду́т лю́дие Твои́ Изра́иль пред враги́, я́ко согреша́т Ти,/ и обратя́тся к Тебе́, и испове́дятся и́мени Твоему́,/ и помо́лятся, и возглаго́лют моли́тву к Тебе́ в хра́ме сем./ И Ты услы́шиши с Небесе́, и ми́лостив бу́деши о согреше́ниих люди́й Свои́х Изра́иля,/ и возврати́ши я́ в зе́млю, ю́же дал еси́ отце́м их, я́ко согреша́т Ти,/ я́ко несть челове́к, и́же не согреши́т,/ и разгне́ваешися на ня́, и преда́си я́ пред враги́,/ и попленя́т их пленя́щии в зе́млю дале́че или́ близ,/ и обратя́т сердца́ своя́ в земли́, а́може пресели́шася,/ и обратя́тся, и помо́лятся Тебе́ в земли́ преселе́ния своего́, глаго́люще:/ согреши́хом, беззако́нновахом, непра́вдовахом./ И обратя́тся к Тебе́ всем се́рдцем свои́м и все́ю душе́ю свое́ю в земли́ враг свои́х,/ а́може преве́л еси́ их,/ и помо́лятся к Тебе́ по пути́ земли́ своея́, ю́же дал еси́ отце́м их,/ и ко гра́ду, его́же избра́л еси́,/ и ко хра́му, его́же созда́х и́мени Твоему́./ И услы́шиши от Небесе́, от гото́ваго жили́ща Твоего́, моли́тву их и моле́ние их,/ и сотвори́ши оправда́ние им,/ да бу́дет Госпо́дь Бог наш с на́ми, я́коже бе со отцы́ на́шими,/ да не оста́вит нас, ниже́ да отврати́т нас, преклони́ти сердца́ на́ша к Нему́,/ е́же ходи́ти во всех путе́х Его́/ и храни́ти вся за́поведи Его́ и повеле́ния Его́ и оправда́ния Его́,/ я́же запове́да отце́м на́шим./ И рече́ к нему́ Госпо́дь:/ услы́шах глас моли́твы твоея́ и моле́ния твоего́/ и́мже моли́лся еси́ предо Мно́ю;/ сотвори́х ти по всей моли́тве твое́й,/ и освяти́х храм сей, его́же созда́л еси́,/ е́же положи́ти и́мя Мое́ та́мо во ве́ки,/ и бу́дут о́чи Мои́ ту́ и се́рдце Мое́ во вся дни./ И ты, а́ще по́йдеши предо Мно́ю,/ я́коже ходи́ Дави́д, оте́ц твой, в преподо́бии се́рдца и в правоте́,/ и е́же твори́ти по всем, я́же запове́дах ему́,/ и повеле́ния Моя́ и за́поведи Моя́ сохрани́ши,/ и возста́влю престо́л ца́рствия твоего́ во Изра́или во ве́ки,/ я́коже глаго́лах к Дави́ду, отцу́ твоему́, глаго́ля:/ не оскуде́ет ти муж властели́н во Изра́или.

Проро́чества Иса́иина чте́ние (главы́ 61 и 62):

Дух Госпо́день на мне, Его́же ра́ди пома́за мя,/ благовести́ти ни́щим посла́ мя,/ исцели́ти сокруше́нныя се́рдцем, пропове́дати пле́нником отпуще́ние и слепы́м прозре́ние,/ нарещи́ ле́то Госпо́дне прия́тно и день воздая́ния,/ уте́шити вся пла́чущия,/ да́ти пла́чущим Сио́на сла́ву вме́сто пе́пела,/ пома́зание весе́лия пла́чущим, украше́ние сла́вы вме́сто ду́ха уны́ния,/ и нареку́тся ро́дове пра́вды, насажде́ние Госпо́дне во сла́ву./ Да возра́дуется душа́ моя́ о Го́споде,/ облече́ бо мя в ри́зу спасе́ния и оде́ждею весе́лия оде́я мя,/ я́ко на жениха́, возложи́ на мя вене́ц и, я́ко неве́сту, украси́ мя красото́ю./ И я́ко земля́, растя́щая цвет свой, и я́ко вертогра́д се́мена своя́ прозяба́ет,/ та́ко возрасти́т Госпо́дь, Госпо́дь пра́вду и весе́лие пред все́ми язы́ки./ Сио́на ра́ди не умолчу́ и Иерусали́ма ра́ди не попущу́,/ до́ндеже изы́дет, я́ко свет, пра́вда моя́/ и спасе́ние мое́, я́ко свети́ло, разжже́тся./ И у́зрят язы́цы пра́вду Твою́, и ца́рие сла́ву Твою́,/ и прозову́т Тя и́менем но́вым, и́мже Госпо́дь наимену́ет е́./ И бу́деши вене́ц добро́ты в руце́ Госпо́дни/ и диади́ма ца́рствия в руце́ Бо́га твоего́./ И не прозове́шися ктому́ оста́влен, и земля́ твоя́ ктому́ не нарече́тся пуста́,/ тебе́ бо прозове́тся во́ля моя́, и земля́ твоя́ вселе́нная,/ я́ко благоволи́ Госпо́дь в тебе́, и земля́ твоя́ вку́пе насели́тся./ И я́коже живя́й ю́ноша с де́вою, та́ко поживу́т сы́нове твои́ с тобо́ю,/ и бу́дет я́коже ра́дуется жени́х о неве́сте,/ та́ко возра́дуется Госпо́дь о тебе́.

На лити́и стихи́ры, глас 4:

Не прикаса́йтеся пома́занным Мои́м,/ глаго́лет Госпо́дь Вседержи́тель./ Богопроти́вницы же боговенча́ннаго царя́ уби́ша/ и не насле́доваша зе́млю благи́х,/ но улучи́ша смерть безконе́чную./ Ты же, святы́й му́чениче Нико́лае,/ пома́занниче Бо́жий,/ моли́ приле́жно о нас,// да насле́дуем с тобо́ю Ца́рство Небе́сное.

Сове́ти Бо́жии/ не суть я́ко сове́ти челове́честии,/ глаго́лет Госпо́дь Вседержи́тель,/ о́ваго бо смиря́ет, о́ваго же возно́сит,/ о́ваго же мертви́т и о́ваго живи́т,/ возставля́ет от земли́ убо́га/ и престо́л сла́вы дае́т ему́./ Сего́ ра́ди призре́ Госпо́дь/ на смире́ние возлю́бленнаго пома́занника Своего́ Никола́я/ и жи́ва в Небе́сных оби́телех соде́ла Его́,// я́ко да мо́лится о спасе́нии люде́й свои́х.

Сла́ва, глас 8:

Егда́ прии́де годи́на лю́тая/ и о́бласть те́мная объя́т зе́млю Росси́йскую,/ тогда́ яви́шася избие́ннии за сло́во Бо́жие./ Ты же, царю́ му́чениче,/ я́ко нача́ток страстоте́рпцев но́вых,/ с боголюби́вою цари́цею,/ ца́рственными ча́ды и ве́рными слуга́ми твои́ми/ любо́вию взыва́л еси́:/ прииди́те, принесе́м себе́ Бо́гу в же́ртву живу́ю/ и та́ко ве́ру Правосла́вную свиде́тельствуим,// да Ца́рствия Небе́снаго сподо́бимся.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся,/ моли́ся, Влады́чице,/ с новому́ченики и ца́рственными страстоте́рпцы,// поми́ловати ду́ши на́ша.

На стихо́вне стихи́ры, глас 5.

Подо́бен: Ра́дуйся:

Ра́дуйся, царю́ Нико́лае,/ пома́занниче Бо́жий,/ Росси́йския держа́вы храни́телю/ и ве́ры Правосла́вныя благочести́вый ревни́телю,/ о ми́ре всего́ ми́ра попечи́телю,/ заблу́ждших и́стинный вразуми́телю,/ скорбя́щих, а́лчущих и стра́ждущих уте́шителю,/ моли́твенниче о всех тепле́йший,/ ны́не к тебе́ прибега́ем,/ Бо́жий уго́дниче и же́ртво всеусе́рдная,// моли́ спасти́ся душа́м на́шим.

Стих: Вознесо́х избра́ннаго// от люде́й Мои́х.

Ра́дуйся, царю́ Нико́лае,/ Бо́гом от рождества́ на муче́ние во́льное посвяще́нный/ и, я́коже И́ов Многострада́льный,/ пра́ведность во страда́нии яви́вый,/ ны́не же с Небе́сным Царе́м ца́рствуяй,/ моли́ся о держа́ве Росси́йстей// и спасе́нии душ на́ших.

Стих: Еле́ем святы́м Мои́м// пома́зах его́.

Ра́дуйся, страстоте́рпче Нико́лае,/ сла́во и красото́ Росси́йских царе́й и князе́й,/ я́коже святи́и страстоте́рпцы и му́ченицы/ Бори́с, Глеб и Андре́й,/ от бли́жних твои́х пре́дан быв,/ убие́ние от клятвопресту́пников безбо́жных прия́л еси́,/ ны́не же мо́лишися о проще́нии враго́в твои́х// и спасе́нии душ на́ших.

Сла́ва, глас 8.

Подо́бен: О, пресла́внаго чудесе́:

Му́чениче царю́ Нико́лае,/ от ю́ности Царя́ Сла́вы возлюби́л еси́,/ да Ему́ до сме́рти после́дуеши,/ я́коже Це́рковь пропове́дует:/ сла́ва Христа́ Бо́га – / Крест и Воскресе́ние./ Ны́не же сла́ву Небе́сную от Христа́ прие́мый,/ приими́ и земно́е прославле́ние// и моли́ спасти́ся душа́м на́шим.

И ны́не, глас и подо́бен то́йже:

О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О Влады́чице держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.

Тропа́рь, глас 4:

Днесь, благове́рнии лю́дие, све́тло почти́м/ седмери́цу честну́ю ца́рственных страстоте́рпец,/ Христо́ву еди́ну дома́шнюю Це́рковь:/ Никола́я и Алекса́ндру,/ Алекси́я, О́льгу, Татиа́ну, Мари́ю и Анастаси́ю./ Ти́и бо, уз и страда́ний многоразли́чных не убоя́вшеся,/ от богобо́рных смерть и поруга́ние теле́с прия́ша/ и дерзнове́ние ко Го́споду в моли́тве улучи́ша./ Сего́ ра́ди к ним с любо́вию возопии́м:/ о святи́и страстоте́рпцы,/ гла́су покая́ния и стена́нию наро́да на́шего вонми́те,/ зе́млю Росси́йскую в любви́ к Правосла́вию утверди́те,/ от междоусо́бныя бра́ни сохрани́те,/ мир ми́рови у Бо́га испроси́те// и душа́м на́шим ве́лию ми́лость.

НА У́ТРЕНИ

На Бог Госпо́дь: тропа́рь страстоте́рпцем, два́жды. Сла́ва, и ны́не, Богоро́дичен: Е́же от ве́ка утае́нное:

По 1-м стихосло́вии седа́лен, глас 8.

Подо́бен: Повеле́нное та́йно:

Попече́ние име́л еси́ о ве́ре Правосла́вней, боговенча́нный царю́ Нико́лае,/ от апо́стол Це́ркви на́шей преда́нней,/ разуме́я ей бы́ти Росси́йстей земли́ утвержде́нием.

Сла́ва, и ны́не, Богоро́дичен:

В поноше́нии и обдержа́нии язы́ков есмы́,/ вси бо преогорчи́хом Сы́на Твоего́, и Той посети́ ны преще́нием Свои́м,/ но умоли́, Де́во Пречи́стая, от Тебе́ Ро́ждшагося,/ а́ще не до конца́ прогне́вался есть,/ да прости́т и поми́лует страну́ Росси́йскую.

По 2-м стихосло́вии седа́лен, глас 8.

Подо́бен: Прему́дрости:

Егда́ богобо́рцы мучи́телие заточи́ша тя с цари́цею, ча́ды и ве́рными слуга́ми твои́ми,/ тогда́ взыва́л еси́ псало́мски:/ помяни́, Го́споди, Дави́да и всю кро́тость его́./ И по́слан бысть тебе́, царю́ Нико́лае, кро́ткому и смире́нному се́рдцем, вене́ц му́ченический,/ я́коже святы́м Бори́су, Гле́бу и Андре́ю./ Моли́ спасти́ся душа́м на́шим.

Сла́ва, и ны́не, Богоро́дичен:

Воста́ни, Влады́чице Держа́вная, и облече́тся Русь свята́я в кре́пость свою́,/ и вода́ же́лчная от полы́ни бу́дет нам я́ко мед,/ да напита́емся теснота́ми, я́же от Зижди́теля суть, и восхва́лим держа́ву Твою́.

Велича́ние:

Велича́ем вас,/ святи́и ца́рственнии страстоте́рпцы,/ и чтим честна́я страда́ния ва́ша,/ я́же за Христа́// претерпе́ли есте́.

Псало́м избра́нный: Бог нам прибе́жище и си́ла:

По полиеле́и седа́лен, глас 3:

Днесь ца́рственнии страстоте́рпцы Росси́йстии/ предстоя́т Царю́ ца́рствующих и Го́споду госпо́дствующих/ и с Держа́вною Влады́чицею непреста́нно мо́лят Бо́га:/ спаси́, Го́споди, лю́ди Твоя́/ и благослови́ достоя́ние Твое́,/ страну́ на́шу Росси́йскую поми́луй,/ Ми́лостиве Вседержи́телю,/ во ве́ки веко́в. Ами́нь.

Сла́ва, И ны́не, Богоро́дичен, глас то́йже:

Востру́бим трубо́ю пе́сней, воспои́м согла́сно Цари́це Богоро́дице:/ ра́дуйся, Засту́пнице усе́рдная,/ благоволе́нием Твои́м оте́чество на́ше от лет дре́вних покрыва́ющая/ и благода́ть тому́ источа́ющая./ Те́мже, Тобо́ю хва́лящеся, глаго́лем:/ Твои́ бо есмы́ раби́, да не постыди́мся.

Степе́нна, 1-й антифо́н 4-го гла́са.

Проки́мен, глас 4: Пролия́ша кровь их,// я́ко во́ду. Стих: Вмени́хомся я́ко о́вцы заколе́ния. Вся́кое дыха́ние: Ева́нгелие от Матфе́я, зача́ло 36.

Сла́ва: Моли́твами ца́рственных страстоте́рпец,/ Ми́лостиве, очи́сти: И ны́не: Моли́твами Богоро́дицы:

По 50-м псалме́ стихи́ра, глас 6:

Страстоте́рпче Христо́в,/ царю́ Нико́лае,/ по и́мени твоему́ житие́ твое́./ Сего́ ра́ди врази́ твои́/ не возмого́ша сокры́ти сла́ву твою́./ Кро́ток бысть и молчали́в во страда́ниих твои́х,/ прося́ не мсти́ти за себе́./ Житие́ твое́ оклеве́тано бысть,/ кончи́на же твоя́ с му́ченики святы́ми сла́вна.// Моли́ о душа́х на́ших.

Кано́н ца́рственных страстоте́рпец, глас 6.

Песнь 1

Ирмо́с: Волно́ю морско́ю/ Скры́вшаго дре́вле/ гони́теля мучи́теля/ под земле́ю скры́ша спасе́нных о́троцы;/ но мы, я́ко отрокови́цы,/ Го́сподеви пои́м,// сла́вно бо просла́вися.

Припе́в: Святи́и ца́рственнии страстоте́рпцы, моли́те Бо́га о нас.

Венцено́сче Нико́лае, вку́пе с му́ченическими ли́ки, цари́цею, ча́ды и слуга́ми,/ предстоя́ще у Престо́ла Христо́ва,/ просвеще́ние нам да́руйте, озаря́ющее душ на́ших омраче́ние и нечу́вствие,/ я́ко да восхва́лим ра́достно ва́шу блаже́нную па́мять.

Ны́не прорече́ние Саро́вскаго ста́рца, я́ко просла́вльшаго мя просла́вит Бог, испо́лнися,/ просла́ви бо Це́рковь Ру́сская ца́рственнаго страстоте́рпца./ Те́мже вку́пе с преподо́бным мо́лится, во е́же стяжа́ти нам благода́ть Свята́го Ду́ха.

Се́рдце царе́во в руце́ Бо́жией, глаго́лет Госпо́дь./ Ты же, и́стинный пома́занниче и слуго́ Госпо́день, благогове́йне рекл еси́:/ не то́кмо жизнь моя́, но и путие́ страны́ Росси́йския в руце́ Госпо́дней суть.

Богоро́дичен: Ты еси́ кре́пость на́ша,/ Ты еси́ похвала́ и ра́дование,/ Предста́тельница Непобеди́мая и Покро́в держа́вный страны́ Росси́йския, Пресвята́я Богоро́дице,/ с ца́рственными страстоте́рпцы и новому́ченики моли́ спасти́ рабы́ Твоя́.

Песнь 3

Ирмо́с: Тебе́, на вода́х/ Пове́сившаго всю зе́млю неодержи́мо,/ тварь ви́девши на Ло́бнем ви́сима,/ у́жасом мно́гим содрога́шеся,/ несть Свят,// ра́зве Тебе́, Го́споди, взыва́ющи.

Поруга́ние и разоре́ние земли́ своея́ от безбо́жных ви́дя, благочести́вый царю́,/ пла́кася из глубины́ серде́чныя, я́ко проро́к Иереми́я, го́рце стеня́ и моля́ся за лю́ди согреши́вшия:/ Ми́лостиве Го́споди, не оста́ви их, оста́вльших мя.

На земли́ алка́л и жа́ждал еси́ пра́вды Бо́жия,/ за ню́же ду́шу кро́тце положи́л еси́, пра́ведне Нико́лае,/ оба́че в Го́рнем Ца́рствии насы́тился еси́,/ иде́же пребыва́еши во ве́ки.

Врачева́ния и чудеса́ то́чите, святи́и страстоте́рпцы,/ лю́дем, ве́рою к вам притека́ющим,/ те́мже печа́ль на́шу на ра́дость преложи́те моли́твами ва́шими.

Богоро́дичен: Прибе́жище, Вы́шший Покро́в Тя и́мамы,/ Благослове́нная Ма́ти Бо́жия,/ Твое́ю по́мощию сохрани́ и заступи́ нас, Всепе́тая.

Седа́лен, глас 4:

Егда́ мно́зи от сро́дник на́ших отступи́ша от Бо́га,/ отврати́шася Бо́жиих за́поведей и воста́ша на Го́спода и пома́занника Его́,/ тогда́ гнев Бо́жий на зе́млю Ру́сскую прии́де,/ изся́че любы́ мно́гих, пролия́ся кровь бра́тий на́ших,/ расточи́шася лю́дие Росси́йстии по всему́ лицу́ земли́,/ хра́ми на́ши поруга́нию преда́шася,/ гла́ди, наше́ствия иноплеме́нник постиго́ша ны, и бы́хом в посмея́ние язы́ков./ Мы же, разуме́юще сие́, с сокруше́нием се́рдца в покая́нии зове́м:/ прости́ и поми́луй нас, Го́споди, по вели́цей ми́лости Твое́й,/ очи́сти беззако́ния на́ша/ и пода́ждь стра́ждущей стране́ Росси́йстей/ предста́тельством ца́рственных страстоте́рпец/ проще́ние грехо́в, мир и ве́лию ми́лость.

Сла́ва, и ны́не, Богоро́дичен:

Умоли́, Милосе́рдая Ма́ти Све́та, Сы́на Твоего́ и Бо́га на́шего/ о е́же возста́вити держа́ву на́шу правосла́вную,/ сохрани́ти ю́ в ми́ре и благоде́нствии,/ изба́вити ны от междоусо́бныя бра́ни,/ укрепи́ти Святу́ю Це́рковь и огради́ти ю́ от неве́рия, раско́ла и ересе́й.

Песнь 4

Ирмо́с: На Кресте́ Твое́ Боже́ственное истоща́ние/ прови́дя, Авваку́м, ужа́сся, вопия́ше:/ Ты си́льных пресе́кл еси́ держа́ву, Бла́же,/ приобща́яся су́щим во а́де,// я́ко Всеси́лен.

Нището́ю духо́вною обогати́лся еси́, свя́те Нико́лае,/ и сотвори́ тя Госпо́дь досто́йна не то́кмо земна́го, но и Небе́снаго Ца́рствия.

Ско́рбию обдержи́мь бысть, венцено́сче Нико́лае,/ зря ослепле́ние наро́да твоего́,/ отре́кшагося от Царя́ Небе́снаго, та́кожде и земна́го.

Му́жественне возложи́в упова́ние на Бо́га в многострада́льнем земне́м служе́нии твое́м, я́коже И́ов иногда́,/ стори́цею воздая́ние прия́л еси́ на Небесе́х,/ иде́же ны́не наслажда́ешися, ца́рственный му́чениче.

Богоро́дичен: Милосе́рдия две́ри, Благослове́нная Богоро́дице, отве́рзи нам,/ да изба́вимся от бед и озлобле́ния на́шего,/ во е́же пе́ти Тебе́ непреста́нно:/ Ты еси́ спасе́ние ро́да христиа́нскаго.

Песнь 5

Ирмо́с: Богоявле́ния Твоего́, Христе́,/ к нам ми́лостивно бы́вшаго,/ Иса́ия, Свет ви́дев Невече́рний,/ из но́щи у́треневав, взыва́ше:/ воскре́снут ме́ртвии,/ и воста́нут су́щии во гробе́х,// и вси земноро́днии возра́дуются.

Миротво́рец яви́лся еси́, царю́ Нико́лае святы́й, неся́ мир ми́ру,/ спаса́я и защища́я ты́сящи во оте́честве твое́м и в ины́х страна́х,/ сего́ ра́ди сын Бо́жий, по сло́ву Госпо́дню, наре́клся еси́.

Изгна́ние, поноше́ние, гоне́ние и всяк глаго́л ло́жный, на вы рече́нный,/ претерпе́сте, святи́и ца́рственнии му́ченицы./ Ра́дуйтеся у́бо и весели́теся, я́ко мзду ва́шу на Небеси́ прия́сте.

Служи́телие беззако́ния та́йнаго,/ вене́ц терно́вный спле́тше, возложи́ша на тя, ца́рственная главо́,/ оба́че де́рзостная дела́ их погибо́ша я́ве.

Богоро́дичен: В ти́ну грехо́в впа́ли есмы́,/ и лю́те потопи́ ны бу́ря прегреше́ний./ Но, я́ко ро́ждшая Спа́са, Влады́чице, при́зри на ны, рабы́ Твоя́,/ и изба́ви от страсте́й душетле́нных.

Песнь 6

Ирмо́с: Ят бысть,/ но не удержа́н в пе́рсех ки́товых Ио́на:/ Твой бо о́браз нося́,/ страда́вшаго и погребе́нию да́вшагося,/ я́ко от черто́га, от зве́ря изы́де;/ приглаша́ше же кустоди́и:/ храня́щии су́етная и ло́жная,// ми́лость сию́ оста́вили есте́.

Всем правосла́вным засту́пник был еси́, богоизбра́нный Нико́лае,/ наро́дом Слове́нским защи́ту благу́ю явля́яй/ и, я́ко брат бра́ту, помога́яй.

О сы́не ве́рный Святы́я Це́ркве!/ Ты ревни́тель прославле́ния святы́х яви́лся еси́,/ хра́мов созида́тель, святы́х оби́телей благоукраси́тель,/ Святы́я Земли́ и Горы́ Афо́нския благотвори́тель,/ просвеще́ния правосла́внаго попечи́тель и мона́шества покрови́тель.

В житии́ ва́шем и в де́лех любве́ о́браз христиа́ном бы́сте,/ боговенча́ннии ца́рие Нико́лае и Алекса́ндро,/ полага́сте бо во главу́ у́гла Ка́мень, Христа́ Бо́га на́шего.

Богоро́дичен: К Тебе́ прибега́ем, Цари́це держа́вней, ве́рных покро́ве,/ на Тя наде́жду возлага́ем спасе́ния на́шего,/ Пресвята́я Влады́чице Богоро́дице, не пре́зри нас.

Конда́к, глас 8:

Избра́ннии Царе́м ца́рствующих и Го́сподем госпо́дствующих/ от ро́да царе́й Росси́йских,/ благове́рнии му́ченицы,/ му́ки душе́вныя и смерть теле́сную за Христа́ прии́мшии/ и венцы́ Небе́сными увенча́вшиися,/ к вам, я́ко покрови́телем на́шим ми́лостивым,/ с любо́вию благода́рне вопие́м:/ ра́дуйтеся, ца́рственнии страстоте́рпцы,// за Русь Святу́ю пред Бо́гом усе́рднии моли́твенницы.

И́кос:

Сла́вою и бога́тством благоче́стия сия́ющии,/ багряни́цею многоце́нною и венце́м украше́ннии,/ ми́лостию и пра́вдою в житии́ просия́вшии,/ ве́ру, наде́жду и любо́вь к Бо́гу до конца́ яви́ли есте́./ К вам, я́ко покрови́телем на́шим ми́лостивым,/ с любо́вию благода́рне вопие́м:/ ра́дуйтеся, ца́рственнии страстоте́рпцы,/ за Русь Святу́ю пред Бо́гом усе́рднии моли́твенницы.

Песнь 7

Ирмо́с: Неизрече́нное чу́до,/ в пещи́ Изба́вивый преподо́бныя о́троки из пла́мене/ во Гро́бе мертв, бездыха́нен полага́ется/ во спасе́ние нас, пою́щих:/ Изба́вителю, Бо́же,// благослове́н еси́.

Я́ко при́сных ва́ших, неду́жных во́инов чадолю́бне посеща́сте, ца́рственнии му́ченицы,/ и с любо́вию их утеша́сте,/ места́ же их упокое́ния слеза́ми ва́шими ороша́сте.

Вы есте́ о́браз супру́жества доброде́тельнаго и дете́й воспита́ния благочести́ваго,/ святи́и ца́рие Нико́лае и Алекса́ндро./ Дом ваш я́ко цветни́к духо́вный соде́лавше,/ на Небесе́х ны́не вку́пе со ча́ды лику́ете.

На высоте́ сла́вы челове́ческия пребыва́я,/ о Небе́сных при́сно помышля́л еси́, царю́ Нико́лае,/ а́може устреми́ся душа́ твоя́ свята́я.

Богоро́дичен: Всесвята́я Влады́чице,/ оживи́ ум наш, умерщвле́нный страстьми́ мно́гими,/ и укрепи́ ны богоуго́дная твори́ти,/ да велича́ем Тя, я́ко Засту́пницу ро́да христиа́нскаго.

Песнь 8

Ирмо́с: Ужасни́ся, боя́йся, Не́бо,/ и да подви́жатся основа́ния земли́:/ се бо в мертвеце́х вменя́ется в Вы́шних Живы́й/ и во Гроб мал странноприе́млется./ Его́же, о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Егда́ уго́дницы Бо́жии предреко́ша вам путь му́ченический, я́коже Па́влу проро́к Ага́в,/ вы, ца́рственнии страстоте́рпцы, не уклони́стеся ни одесну́ю, ни ошу́юю,/ но му́жественне проидо́сте его́,/ взира́юще на Соверши́теля ве́ры Иису́са Христа́.

Во страда́ниих ва́ших, страстоте́рпцы святи́и,/ не отверго́стеся Пути́, И́стины и Живота́, Христа́ Бо́га на́шего,/ не устраши́стеся богобо́рцев,/ но в терпе́нии ше́ствовасте ца́рским путе́м в жизнь ве́чную.

Увы́ нам, оте́ческия заве́ты попра́вшим,/ от обе́та ве́рности ца́рскому ро́ду, Це́рковию Свято́ю благослове́нному, отсту́пльшим/ и та́ко от пути́ Бо́жия отлучи́вшимся./ Прости́ нас, Го́споди, за вся сия́ соде́янная/ и поми́луй моли́твами святы́х страстоте́рпец.

Богоро́дичен: Засту́пницу на́шу Тя ве́мы, Богоро́дице,/ непреста́нно бо о нас мо́лишися,/ во е́же пока́ятися и испра́витися нам, упова́ние и прибе́жище душ на́ших.

Песнь 9

Ирмо́с: Не рыда́й Мене́, Ма́ти,/ зря́щи во Гро́бе,/ Его́же во чре́ве без се́мене зачала́ еси́ Сы́на:/ воста́ну бо, и просла́влюся,/ и вознесу́ со сла́вою непреста́нно, я́ко Бог,// ве́рою и любо́вию Тя велича́ющия.

Да воскре́снет Русь Свята́я моли́твами ца́рственных страстоте́рпец и новому́ченик Твои́х, Го́споди,/ и да расточа́тся вси врази́ ея́ вско́ре,/ и от лица́ ея́ да бежа́т вси ненави́дящии ю́ от ны́не и до ве́ка.

Все упова́ние на Го́спода возложи́ держа́вный царь наш./ Та́кожде и мы со упова́нием Го́споду помо́лимся,/ да укрепи́т Он моли́твами Богоро́дицы и ца́рственнаго страстоте́рпца страну́ на́шу в Правосла́вии/ и спасе́т ду́ши на́ша.

Я́ко досто́йное пе́ние приими́те, святи́и страстоте́рпцы, ма́лое моле́ние сие́/ и, я́коже Христо́с прия́т вдови́цы две ле́пте,/ не возгнуша́йтеся нас, окая́нных,/ страстьми́ обурева́емых, убо́гих чти́телей и служи́телей ва́ших.

Богоро́дичен: Держа́вным Твои́м покро́вом, Чи́стая,/ рабы́ Твоя́ сохрани́ вся невреди́мы:/ Тя бо еди́ну и́мамы прибе́жище в ну́ждах, утеше́ние в ско́рбех и побе́ду во бране́х на́ших.

Свети́лен:

Невече́рнему Све́ту предстоя́ще,/ страстоте́рпцы святи́и ца́рственнии, с му́ченическими ли́ки,/ во испыта́ниих не оставля́йте ны моли́твами ва́шими.

Сла́ва, и ны́не, Богоро́дичен:

Ро́ждшая Свет Незаходи́мый,/ просвеща́ющий седя́щих во тьме неве́дения и пре́лести,/ озари́ и нас, гре́шных, све́том Сы́на Твоего́.

На хвали́тех стихи́ры на 4, глас 8.

Подо́бен: О, пресла́внаго чудесе́:

О, пресла́внаго чудесе́!/ Святи́и ца́рственнии страстоте́рпцы седмочи́сленнии/ в годи́ну страда́ний за Христа́/ сохрани́ша любо́вь и ве́рность Ему́,/ друг дру́га тяготы́ нося́ще/ и та́ко исполня́юще зако́н Его́,/ сего́ ра́ди ны́не на Небеси́ ца́рствуют/ и дерзнове́нно мо́лятся// о спасе́нии душ на́ших.

О боговенча́нный царю́ Нико́лае,/ сла́вный слуго́ Святы́я Це́ркве,/ храни́телю ея́ и защи́тителю,/ избра́нный Бо́гом ея́ покрови́телю,/ вели́каго Иустиниа́на подо́бниче,/ вонми́ гла́су моле́ния на́шего,/ прости́, защити́ и укрепи́/ заблу́ждших чад твои́х,// да ве́рою и любо́вию просла́вим Просла́вльшаго тя.

О, пресла́внаго чудесе́!/ Свята́я му́ченица Алекса́ндра,/ в го́рцем заточе́нии от богобо́рцев бы́вши/ и ча́ющи сме́рти за Христа́,/ вку́пе с четвери́цею дев му́дрых, дще́рей свои́х,/ се, Жени́х гряде́т, глаго́ла./ Угото́вим свети́льники своя́,/ да вни́дем в черто́г Его́// и облеце́мся вси оде́ждею сла́вы Его́.

О благове́рный царе́вичу Алекси́е,/ во смире́нии се́рдца ты глаго́лал еси́:/ внегда́ мне ца́рствовати,/ да не обря́щутся ни́щии и убо́зии./ Кре́стным же путе́м жития́ твоего́/ и му́ченическою твое́ю кончи́ною/ в Ца́рство Небе́сное возше́д,/ име́я дерзнове́ние ве́лие,// мо́лишися о всех, тре́бующих твоея́ по́мощи.

Сла́ва, глас то́йже:

О свята́я седмери́це ца́рственных страстоте́рпец,/ Христо́ва похвало́ и сла́во!/ Соизволе́нием Отца́ Безнача́льнаго,/ соверше́нием Сы́на Единоро́днаго/ и соде́йствием Свята́го Ду́ха/ му́ченицы за ве́ру показа́стеся/ и Ца́рствия Бо́жия прича́стницы соде́ластеся./ Моли́те Триеди́наго Бо́га,/ да прии́мет покая́ние на́ше,/ сохрани́т страну́ на́шу Росси́йскую/ в Правосла́вии и единомы́слии неколе́блему// и спасе́т ду́ши на́ша.

И ны́не, глас то́йже.

Подо́бен: О, пресла́внаго чудесе́:

О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О Влады́чице держа́вная!/ Не преста́ни и на бу́дущее вре́мя/ во утвержде́ние на Руси́ Правосла́вия// ми́лости и чудеса́ излива́ти до ве́ка. Ами́нь.

НА ЛИТУРГИ́И

Блаже́нна от кано́на на 8, пе́сни 3-я и 6-я.

Проки́мен, глас 7: Го́споди, си́лою Твое́ю возвесели́тся царь// и о спасе́нии Твое́м возра́дуется зело́. Стих: Жела́ние се́рдца его́ дал еси́ ему́ и хоте́ния устну́ его́ не́си лиши́л его́.

Апо́стол к Ри́мляном, зача́ло 99.

Аллилу́ия, глас 1. Стих: Я́ко царь упова́ет на Го́спода и ми́лостию Вы́шняго не подви́жится. Стих: Вознеси́ся, Го́споди, си́лою Твое́ю, воспое́м и пое́м си́лы Твоя́.

Ева́нгелие от Иоа́нна, зача́ло 52.

Прича́стен: Го́споди, спаси́ царя́ и услы́ши ны,/ во́ньже а́ще день призове́м Тя.

Моли́тва

О святы́й страстоте́рпче, царю́ му́чениче Нико́лае! Госпо́дь тя избра́ пома́занника Своего́, во е́же ми́лостивно и пра́во суди́ти лю́дем твои́м и храни́телем Це́ркве Правосла́вныя бы́ти. Сего́ ра́ди со стра́хом Бо́жиим ца́рское служе́ние и о душа́х попече́ние соверша́л еси́. Госпо́дь же, испыту́я тя, я́ко И́ова Многострада́льнаго, попусти́ ти поноше́ния, ско́рби го́рькия, изме́ну, преда́тельство, бли́жних отчужде́ние и в душе́вных му́ках земна́го ца́рства оставле́ние. Вся сия́ ра́ди бла́га Росси́и, я́ко ве́рный сын ея́, претерпе́в и, я́ко и́стинный раб Христо́в, му́ченическую кончи́ну прие́м, Небе́снаго Ца́рства дости́гл еси́, иде́же наслажда́ешися Вы́шния сла́вы у Престо́ла всех Царя́, ку́пно со свято́ю супру́жницею твое́ю, цари́цею Алекса́ндрою, и ца́рственными ча́ды Алекси́ем, О́льгою, Татиа́ною, Мари́ею и Анастаси́ею.

Ны́не, име́я дерзнове́ние ве́лие у Христа́ Царя́, моли́, да пода́ст нам Госпо́дь грехо́в проще́ние, и на вся́кую доброде́тель наста́вит нас, да стяжи́м смире́ние, кро́тость и любо́вь, и сподо́бимся Небе́снаго Ца́рствия, иде́же ку́пно с тобо́ю и все́ми святы́ми новому́ченики и испове́дники Росси́йскими просла́вим Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

Конда́к 1

Избра́ннии новому́ченицы и испове́дницы Росси́йстии,/ свиде́телие Христо́вы, а́гнцы новозакла́ннии,/ кро́вию свое́ю ри́зы Це́ркве на́шея украси́вшии./ Вы, преще́ний мучи́телей не убоя́вшеся,/ любо́вь к Бо́гу да́же до сме́рти яви́ли есте́/ и в жи́зни ве́чней к Нему́ дерзнове́ние стяжа́ли есте́./ Те́мже, предстоя́ще Престо́лу Вседержи́теля,/ помина́йте нас, любо́вию вас почита́ющих и вопию́щих:// Ра́дуйтеся, новому́ченицы и испове́дницы Росси́йстии, Це́ркве на́шея похвало́ и украше́ние.

И́кос 1

А́нгелов Творе́ц и ми́ра Зижди́тель от ве́ка предызбра́ вас, я́ко ве́рныя свиде́тели Своя́ в земли́ Росси́йстей, и в годи́ну тя́жких испыта́ний благода́ть и си́лу вам дарова́. Вы же, ве́ру правосла́вную ми́ру безбо́жному яви́вше, тве́рдым испове́данием, изгна́нием и терпе́нием страда́ний, Христа́ просла́вили есте́. Сего́ ра́ди и мы прославля́ем вас си́це:

Ра́дуйтеся, измла́да Христа́ возлюби́вшии; ра́дуйтеся, глас Па́стыря до́браго послу́шавшии.

Ра́дуйтеся, Ца́рства Бо́жия внутрь себе́ при́сно иска́вшии; ра́дуйтеся, крест на ра́мо свое́ взе́мшии.

Ра́дуйтеся, сла́ву ми́ра сего́ отри́нувшии; ра́дуйтеся, за Христа́ страда́ния претерпе́вшии.

Ра́дуйтеся, любве́ ра́ди Бо́жия смерть прие́мшии; ра́дуйтеся, Небе́снаго Ца́рствия дости́гшии.

Ра́дуйтеся, новому́ченицы и испове́дницы Росси́йстии, Це́ркве на́шея похвало́ и украше́ние.

Конда́к 2

Ви́дя оте́чество на́ше в беда́х и ско́рбех су́щее, святи́телю о́тче Ти́хоне, богоизбра́нный патриа́рше земли́ на́шея, призыва́л еси́ ве́рная ча́да Це́ркве Росси́йския за Христа́ и ве́ру правосла́вную му́жественне стоя́ти. Сам же, по вся дни умира́я за па́ству свою́, испове́дник непоколеби́мый яви́лся еси́, воспева́я Бо́гу: Аллилу́ия.

И́кос 2

Ра́зумом Боже́ственным просвеща́емь, святи́телю о́тче Ти́хоне, Це́рковь Ру́сскую му́дре упра́вил еси́ и, безбо́жныя гони́тели облича́я, па́ству свою́ по́двиги новому́чеников почита́ти призыва́л еси́. Сего́ ра́ди вопие́м тебе́ си́це:

Ра́дуйся, первосвяти́телей Моско́вских благода́тный прее́мниче; ра́дуйся, земли́ Ру́сския вели́кий печа́льниче.

Ра́дуйся, апо́стольских преда́ний усе́рдный храни́телю; ра́дуйся, сокро́вищ правосла́вныя ве́ры благогове́йный блюсти́телю.

Ра́дуйся, благода́ть Ду́ха Свята́го в се́рдце при́сно име́вый; ра́дуйся, разделе́ния церко́вная любо́вию врачева́вый.

Ра́дуйся, заточе́ние и поруга́ния му́жественне претерпе́вый; ра́дуйся, кре́стный путь с па́ствою твое́ю проше́дый.

Ра́дуйтеся, новому́ченицы и испове́дницы Росси́йстии, Це́ркве на́шея похвало́ и украше́ние.

Конда́к 3

Си́лою, да́нною вам свы́ше, страстоте́рпцы сла́внии, царю́ Нико́лае и цари́це Алекса́ндро, царе́вичу Алекси́е и царе́вны О́льго, Татиа́но, Мари́е и Анастаси́е, лише́ние ца́рства и сла́вы земны́я со смире́нием восприя́ли есте́. Страда́нием же во́льным да́же до сме́рти Христу́ после́довали есте́ и за убива́ющия вы моли́лися есте́, вопию́ще Бо́гу: Аллилу́ия.

И́кос 3

Иму́ще ве́ру несумне́нну, я́ко вся от Бо́га суть, изгна́ние, поруга́ние и темни́чное заточе́ние му́жественне претерпе́ли есте́, ца́рственнии страстоте́рпцы, и му́ченических венце́в сподо́билися есте́. Сего́ ра́ди вопие́м вам си́це:

Ра́дуйтеся, вене́ц и похвало́ ро́да ца́рскаго и богоизбра́ннаго; ра́дуйтеся, пресла́вныя о́трасли ко́рене благочести́ваго.

Ра́дуйтеся, ца́рствия земна́го лише́ние со смире́нием прие́мшии; ра́дуйтеся, страда́нии ва́шими Ца́рствия Небе́снаго сподо́бльшиися.

Ра́дуйтеся, за враги́ своя́ усе́рдно моли́вшиися; ра́дуйтеся, всем се́рдцем Бо́га взыска́вшии.

Ра́дуйтеся, о́браз испове́дничества ве́рным лю́дем показа́вшии; ра́дуйтеся, седмочи́сленнии страстоте́рпцы, во еди́ном ду́се Бо́гу предста́вшии.

Ра́дуйтеся, новому́ченицы и испове́дницы Росси́йстии, Це́ркве на́шея похвало́ и украше́ние.

Конда́к 4

Бу́рею гоне́ний на Це́рковь Ру́сскую обдержи́ми, святи́телие Бо́жии, ве́рою и страда́ньми му́ченическими благода́ть Христо́ву стяжа́ли есте́ и, кора́бль церко́вный неврежде́нно сохрани́вше, подража́тели пе́рвым му́чеником яви́лися есте́. С ни́миже на Небесе́х взыва́ете Бо́гу побе́дную песнь: Аллилу́ия.

И́кос 4

Ве́дуще глас ева́нгельский, я́ко па́стырь до́брый ду́шу свою́ полага́ет за о́вцы, священному́ченицы до́блии, любве́ ра́ди Христо́вы и па́ствы своея́ изгна́ния, глад, хлад, зной со́лнечный и рабо́ты го́рькия претерпе́ли есте́, сме́ртию му́ченическою житие́ свое́ увенча́вше. Сего́ ра́ди и мы с любо́вию прославля́ем вас си́це:

Ра́дуйтеся, зало́г Христо́в до́бре сохрани́вшии; ра́дуйтеся, житие́м и сме́ртию о́браз ве́рным показа́вшии.

Ра́дуйтеся, же́ртву безкро́вную благогове́йне соверша́вшии; ра́дуйтеся, саме́х себе́ в же́ртву живу́ю прине́сшии.

Ра́дуйтеся, Це́ркве Росси́йския сла́во; ра́дуйтеся, оте́чества на́шего украше́ние.

Ра́дуйтеся, па́ствы ва́шея ко Христу́ путеводи́телие; ра́дуйтеся, догма́тов церко́вных ре́вностнии блюсти́телие.

Ра́дуйтеся, новому́ченицы и испове́дницы Росси́йстии, Це́ркве на́шея похвало́ и украше́ние.

Конда́к 5

Богосве́тлыя зве́зды на не́бе церко́внем яви́лися есте́, священноиспове́дницы Росси́йстии и, поноше́ния, заточе́ния, изгна́ния и го́рькия рабо́ты претерпе́вше, Го́спода Иису́са Христа́ му́жественне испове́дали есте́. Та́же, благоче́стно в ми́ре пожи́вше, путь ко спасе́нию во тьме безбо́жия яви́ли есте́, науча́юще ве́рныя при́сно благода́рственно пе́ти Бо́гу: Аллилу́ия.

И́кос 5

Ви́девше разоре́ние земли́ Ру́сския и беззако́ние ве́лие, опустоши́вшее ю́, вы, священноиспове́дницы сла́внии, стра́ха и сме́рти не убоя́лися есте́ и, по́двиги испове́дничества благоуха́юще, я́ко кри́ни се́льнии посреде́ пусты́ни, процвели́ есте́. Сего́ ра́ди прославля́ем вас си́це:

Ра́дуйтеся, моли́твою те́плою сердца́ ва́ша в по́двизе утвержда́вшии; ра́дуйтеся, тве́рдым испове́данием ве́ры просия́вшии.

Ра́дуйтеся, во страда́ниих терпе́ние и кро́тость яви́вшии; ра́дуйтеся, я́ко а́гнцы незло́бивии посреде́ волко́в ходи́вшии.

Ра́дуйтеся, слу́жбу Бо́жию во у́зах соверша́вшии; ра́дуйтеся, соу́зники в терпе́нии укрепля́вшии.

Ра́дуйтеся, ду́ши ва́ша за па́ству полага́вшии; ра́дуйтеся, посреде́ гоне́ний благода́тию Бо́жиею храни́мии.

Ра́дуйтеся, новому́ченицы и испове́дницы Росси́йстии, Це́ркве на́шея похвало́ и украше́ние.

Конда́к 6

Пропове́дует Це́рковь Росси́йская по́двиги ва́ша, преподобному́ченицы достосла́внии, по́ты трудо́в и кро́вию муче́ний зе́млю на́шу освяти́вшии. Вы бо, слеза́ми покая́ния ду́ши ва́ша омы́вше, в же́ртву живу́ю, благоприя́тную Го́сподеви, себе́ предугото́вили есте́. Ны́не же Ему́ дерзнове́нно предстоите́ и взыва́ете побе́дную песнь: Аллилу́ия.

И́кос 6

Возсия́ свет Христо́в в сердца́х ва́ших, преподобному́ченицы, вы бо, я́ко во́ини добропобе́днии, моли́тву во всеору́жие прие́мше, ве́ры пра́выя ника́коже отпа́ли есте́ и, у́зы темни́чныя, муче́ния тя́жкая и рабо́ты го́рькия претерпе́вше, лю́тую смерть от безбо́жных прия́ли есте́. Сего́ ра́ди прославля́ем вас си́це:

Ра́дуйтеся, путь и́стиннаго богопозна́ния нам показа́вшии; ра́дуйтеся, ду́ши ва́ша за Христа́ положи́вшии.

Ра́дуйтеся, я́звы Го́спода Иису́са Христа́ на телесе́х ва́ших носи́вшии; ра́дуйтеся, вся тле́нная ми́ра сего́ презре́вшии.

Ра́дуйтеся, любо́вь Христо́ву к мучи́телем яви́вшии; ра́дуйтеся, моли́тву за ненави́дящих вас пролия́вшии.

Ра́дуйтеся, ве́лие дерзнове́ние ко Го́споду стяжа́вшии; ра́дуйтеся, по́двиги по́стническими и кро́вию ва́шею зе́млю Ру́сскую освяти́вшии.

Ра́дуйтеся, новому́ченицы и испове́дницы Росси́йстии, Це́ркве на́шея похвало́ и украше́ние.

Конда́к 7

Хотя́ще во дни гоне́ний безбо́жных на Це́рковь Ру́сскую ве́ру тве́рдую и любо́вь ко Го́споду сохрани́ти, преподобноиспове́дницы честни́и, поноше́ния, заточе́ния, изгна́ния и го́рькия рабо́ты Христа́ ра́ди претерпе́ли есте́. Та́же, благоче́стно в ми́ре пожи́вше, мно́гим путь ко спасе́нию показа́ли есте́, науча́юще пе́ти Бо́гу побе́дную песнь: Аллилу́ия.

И́кос 7

Но́выя испове́дники показа́ вас Госпо́дь, преподо́бнии отцы́ на́ши, егда́ прии́де испыта́ти лю́ди Своя́, вас же, блаже́ннии, обре́те рабы́ бдя́щия, смире́нием и доброде́тельми украше́нныя. Сего́ ра́ди прославля́ем вас си́це:

Ра́дуйтеся, и́го благо́е на ра́мена своя́ взе́мшии; ра́дуйтеся, по́двиги поста́ и моли́твы просия́вшии.

Ра́дуйтеся, му́жество и кре́пость в страда́ниих яви́вшии; ра́дуйтеся, испове́данием ва́шим ве́ру запечатле́вшии.

Ра́дуйтеся, ве́рность Христу́ в житии́ ва́шем сохрани́вшии; ра́дуйтеся, мно́гия лю́ди в ве́ре пра́вей наста́вившии.

Ра́дуйтеся, за́поведей Христо́вых ве́рнии исполни́телие; ра́дуйтеся, по́двигов новому́чеников и́стиннии свиде́телие.

Ра́дуйтеся, новому́ченицы и испове́дницы Росси́йстии, Це́ркве на́шея похвало́ и украше́ние.

Конда́к 8

Стра́нное чу́до ми́ру яви́сте, новому́ченицы Росси́йстии, вы бо, во страда́нии кре́пость показа́вше, си́лою Христо́вою безбо́жныя одоле́сте и сме́ртию ва́шею Воскресе́ние Христо́во пропове́дасте. Ны́не же у Престо́ла Бо́жия предстоите́ и воспева́ете побе́дную песнь: Аллилу́ия.

И́кос 8

Вся кра́сная ми́ра сего́ презре́вше, святи́и новому́ченицы Росси́йстии, во след Го́споду кре́стным путе́м после́довали есте́ и по за́поведи ева́нгельстей мзду мно́гу на Небесе́х обрели́ есте́. Сего́ ра́ди приими́те от нас похвалы́ сицевы́я:

Ра́дуйтеся, ве́рнии сы́ны Це́ркве Росси́йския, безбо́жных гони́телей не убоя́вшиися; ра́дуйтеся, у́зы темни́чныя, труды́ го́рькия и изгна́ния претерпе́вшии.

Ра́дуйтеся, дре́вним му́чеником в страда́ниих уподо́бившиися; ра́дуйтеся, тала́нт, вруче́нный вам Го́сподем, терпе́нием преумно́жившии.

Ра́дуйтеся, блаже́нство изгна́нных пра́вды ра́ди ве́рою дости́гшии; ра́дуйтеся, кро́вию ва́шею зе́млю Ру́сскую освяти́вшии.

Ра́дуйтеся, страда́нии ва́шими о́браз ве́рным подаю́щии; ра́дуйтеся, венцы́ нетле́нныя от Христа́ Бо́га прие́мшии.

Ра́дуйтеся, новому́ченицы и испове́дницы Росси́йстии, Це́ркве на́шея похвало́ и украше́ние.

Конда́к 9

Вся́ческая страда́ния за Христа́ претерпе́вше, испове́дницы пресла́внии, ве́ру правосла́вную сохрани́ли есте́ и, терпе́нием гони́тели Це́ркве Ру́сския посрами́вше, благоче́стием в ми́ре возсия́ли есте́. Ны́не же Престо́лу Бо́жию предстоите́ и воспева́ете хвале́бную песнь: Аллилу́ия.

И́кос 9

Вети́и церко́внии недоумева́ют, ка́ко воспе́ти вас по достоя́нию, но́вии испове́дницы Це́ркве Ру́сския, вы бо в ско́рбех, изгна́ниих и заточе́ниих Христа́ и́стиннаго Бо́га просла́вили есте́ и ве́рным путь ко спасе́нию указа́ли есте́. Мы же, прибега́юще к моли́твенному предста́тельству ва́шему, дерза́ем ублажа́ти вас си́це:

Ра́дуйтеся, все упова́ние на Бо́га возложи́вшии; ра́дуйтеся, по́двиг испове́дничества в терпе́нии соверши́вшии.

Ра́дуйтеся, мучи́телей безбо́жных не убоя́вшиися; ра́дуйтеся, немощны́я в ве́ре укрепи́вшии.

Ра́дуйтеся, рабо́ты го́рькия в сла́дость духо́вную восприе́мшии; ра́дуйтеся, сердца́ ва́ша Бо́гу в же́ртву прине́сшии.

Ра́дуйтеся, страда́нием ду́ши ва́ша очи́стившии; ра́дуйтеся, житие́м святы́м о́браз ве́рным показа́вшии.

Ра́дуйтеся, новому́ченицы и испове́дницы Росси́йстии, Це́ркве на́шея похвало́ и украше́ние.

Конда́к 10

Спасти́ хотя́ Госпо́дь мно́жество жен и дев, во оби́тели и́ноческия ты́я призва́. Во дни же гоне́ний безбо́жных му́жескую кре́пость им дарова́, е́же за и́мя Свое́ пострада́ти и терпе́нием мно́гим Ца́рствия Небе́снаго дости́гнути, да, я́ко му́дрыя де́вы, в черто́зе бра́чнем Христу́ Жениху́ воспева́ют песнь: Аллилу́ия.

И́кос 10

Стена́ и по́мощь благонаде́жная бысть Богоро́дица вам, святы́я преподо́бныя жены́, му́ченицы и испове́дницы, в ско́рбех, изгна́ниих и у́зах пребыва́ющим. Вы бо любо́вию и труды́ лю́дем стра́ждущим, я́ко Самому́ Сы́ну Ея́, послужи́сте. Те́мже с благодаре́нием вас ублажа́ем:

Ра́дуйтеся, преподобному́ченицы, я́ко а́гницы непоро́чныя, за Христа́ закла́нныя; ра́дуйтеся, преподобноиспове́дницы, я́ко голуби́цы чи́стыя, се́тей врага́ изба́вльшияся.

Ра́дуйтеся, жите́йская попече́ния во и́ночестве отри́нувшия; ра́дуйтеся, во страда́ниих Христу́, я́ко мироно́сицы, после́довавшия.

Ра́дуйтеся, гоне́ний жесто́ких и сме́рти лю́тыя не убоя́вшияся; ра́дуйтеся, в муче́ниих благода́тию Бо́жиею укрепля́емыя.

Ра́дуйтеся, ева́нгельски, я́ко Мари́я, благу́ю часть избра́вшия; ра́дуйтеся, я́ко Ма́рфа Христу́, бли́жним послужи́вшия.

Ра́дуйтеся, новому́ченицы и испове́дницы Росси́йстии, Це́ркве на́шея похвало́ и украше́ние.

Конда́к 11

Пе́ние всеумиле́нное прино́сим вам, новому́ченицы и испове́дницы Росси́йския, вы бо, благоче́стно в зако́не Госпо́дни пожи́вша, ве́ру правосла́вную сохрани́ли есте́, и сме́ртию му́ченическою и терпе́нием страда́ний за Христа́ гони́тели Це́ркве Ру́сския посрами́ли есте́. Ны́не же, во Ца́рствии Небе́снем лику́юща, воспева́ете Бо́гу побе́дную песнь: Аллилу́ия.

И́кос 11

Све́том ева́нгельским просвеще́нныя и за́поведи Госпо́дни сохра́ньшия, святы́я жены́ и де́вы, доброде́тельное житие́ во дни гоне́ний лю́тых страда́нием во́льным увенча́ли есте́ и вои́стину но́выя му́ченицы и испове́дницы яви́лися есте́. Сего́ ра́ди воспева́ем вас си́це:

Ра́дуйтеся, му́ченицы, любо́вию ко Христу́ страх сме́рти превозмо́гшия; ра́дуйтеся, испове́дницы, в страда́ниих за Христа́ ве́ру и наде́жду соблю́дшия.

Ра́дуйтеся, по́двиги ва́шими А́нгелы возвесели́вшия; ра́дуйтеся, не́мощь естества́ же́нскаго сло́вом Бо́жиим препобеди́вшия.

Ра́дуйтеся, Христо́вы за́поведи житие́м и сме́ртию испо́лнившия; ра́дуйтеся, му́дрости ева́нгельских дев подража́вшия.

Ра́дуйтеся, муже́м свои́м в гоне́ниих после́довавшия; ра́дуйтеся, ны́не ку́пно с ни́ми венцы́ Небе́сными увенча́нныя.

Ра́дуйтеся, новому́ченицы и испове́дницы Росси́йстии, Це́ркве на́шея похвало́ и украше́ние.

Конда́к 12

Благода́тное утвержде́ние Це́ркве на́шея и́мамы вас, новому́ченицы и испове́дницы Росси́йстии. Вы бо, се́рдцем ве́рующе в пра́вду, усты́ же Го́спода Иису́са Христа́ во спасе́ние испове́давше, заточе́ния, изгна́ния, го́рькия рабо́ты и смерть претерпе́ли есте́. Ны́не же моли́теся ко Го́споду о нас, земны́х сро́дницех ва́ших, да при́сно с ва́ми пое́м Бо́гу: Аллилу́ия.

И́кос 12

Пою́ще ва́шу Небе́сную сла́ву, страстоте́рпцы Христо́вы, лобыза́ем я́звы ва́ша, вы бо, стопа́м дре́вних му́ченик после́дующе, не уклони́стеся ско́рби, ни убоя́стеся темни́цы, го́рькими рабо́тами, гла́дом и хла́дом изморе́ни бы́сте и, многови́дными му́ками умерщвля́еми, я́ко а́гнцы незло́бивии, ве́ры ра́ди пострада́сте и смерть прия́сте. Те́мже приими́те от нас похвалы́ сицевы́я:

Ра́дуйтеся, святи́телие Христо́вы, до́бре Це́рковь упра́вившии; ра́дуйтеся, иере́и Бо́жии, ду́ши за па́ству полага́вшии.

Ра́дуйтеся, ца́рственнии страстоте́рпцы, от богобо́рных власте́й смерть и поруга́ние прие́мшии; ра́дуйтеся, благове́рнии кня́зие и княги́ни, благоче́стие да́же до сме́рти соблю́дшии.

Ра́дуйтеся, преподо́бнии му́жие, пра́ведное житие́ венце́м страда́ния увенча́вшии; ра́дуйтеся, преподо́бныя жены́, кре́пость и му́жество в страда́ниих яви́вшия.

Ра́дуйтеся, вси правосла́внии христиа́не, за преде́лами оте́чества многоразли́чне пострада́вшии; ра́дуйтеся, вси ве́домии и неве́домии, Бо́гом увенча́ннии лю́дие.

Ра́дуйтеся, новому́ченицы и испове́дницы Росси́йстии, Це́ркве на́шея похвало́ и украше́ние.

Конда́к 13

О пресла́внии новому́ченицы и испове́дницы Росси́йстии! Приими́те ма́лое сие́ моле́ние на́ше, в похвалу́ вам ны́не приноси́мое, и моли́теся ко Христу́ Бо́гу, да укрепи́т в лю́дех дух братолю́бия и благоче́стия, да утверди́т во оте́честве на́шем ве́ру правосла́вную и сподо́бит нас ку́пно с ва́ми воспева́ти Ему́: Аллилу́ия.

Сей конда́к глаго́лется три́жды.

И па́ки чте́тся и́кос 1-й, и конда́к 1-й.

Моли́тва

О святи́и новому́ченицы и испове́дницы Росси́йстии:/ святи́телие и па́стырие Це́ркве Христо́вы,/ ца́рственнии страстоте́рпцы,/ благове́рнии кня́зие и княги́ни,/ до́блии во́ини, мона́си и мирсти́и,/ благочести́вии му́жие и жены́,/ во вся́цем во́зрасте и сосло́вии за Христа́ пострада́вшии,/ ве́рность Ему́ да́же до сме́рти свиде́тельствовавшии/ и вене́ц жи́зни от Него́ прие́мшии!

Вы во дни гоне́ния лю́таго,/ зе́млю на́шу от безбо́жных пости́гшаго,/ на суди́щах, в заточе́ниих и про́пастех земны́х,/ в го́рьких рабо́тах и вся́ких ско́рбных обстоя́ниих/ о́браз терпе́ния и непосты́днаго упова́ния му́жественне яви́ли есте́./ Ны́не же, в раи́ сла́дости наслажда́ющеся,/ пред Престо́лом Бо́жиим во сла́ве предстоите́/ и при́сно хвалу́ и хода́тайство со А́нгелы и все́ми святы́ми Триеди́ному Бо́гу возно́сите.

Сего́ ра́ди мы недосто́йнии/ мо́лим вас, святи́и сро́дницы на́ши:/ не забу́дите земна́го оте́чества ва́шего,/ грехо́м Ка́инова братоуби́йства,/ поруга́нием святы́нь, безбо́жием и на́шими беззако́нии отягче́ннаго./ Умоли́те Го́спода Сил,/ да утверди́т Це́рковь Свою́ непоколеби́му в ми́ре сем многомяте́жнем и лука́вом,/ да возроди́т в земли́ на́шей дух братолю́бия и ми́ра;/ да па́ки бу́дем мы ца́рское свяще́ние,/ род Бо́жий, избра́нный и святы́й,/ при́сно с ва́ми сла́вящий Отца́, и Сы́на, и Свята́го Ду́ха во ве́ки веко́в. Ами́нь.

Конда́к 1

Избра́ннии ца́рственнии страстоте́рпцы,/ еди́на дома́шняя це́рковь Христо́ва,/ Нико́лае, Алекса́ндро, Алекси́е,/ О́льго, Татиа́но, Мари́е и Анастаси́е,/ вы, сою́зом любве́ связу́еми,/ я́ко а́гнцы, Христу́ Бо́гу ве́рою после́довали есте́/ и, в страда́ниих смерть претерпе́вше,/ Ца́рствия Небе́снаго насле́дницы яви́лися есте́./ Ны́не же, дерзнове́ние ко Го́споду иму́ще,/ моли́теся о земне́м оте́честве ва́шем, да прославля́ем вас си́це:// Ра́дуйтеся, ца́рственнии страстоте́рпцы,/ земли́ Росси́йския храни́телие и моли́твенницы.

И́кос 1

А́нгельскими Си́лами укрепля́еми во и́стиннем пути́, седмочи́сленнии страстоте́рпцы, о житии́ пра́веднем и богоуго́днем ревнова́ли есте́, да я́вите наро́ду ру́сскому о́браз благочести́вых царе́й. Сего́ ра́ди прославля́ем вас си́це:

Ра́дуйтеся, страх Бо́жий в се́рдце, я́ко основа́ние, положи́вшии; ра́дуйтеся, прему́дрость Бо́жию и́стинне возлюби́вшии.

Ра́дуйтеся, все упова́ние на Бо́га возложи́вшии; ра́дуйтеся, оте́честву ва́шему ве́рно послужи́вшии.

Ра́дуйтеся, христиа́нскаго благоче́стия тве́рдое пра́вило; ра́дуйтеся, ца́рственнаго ро́да Росси́йскаго похвало́.

Ра́дуйтеся, правосла́вныя ве́ры кре́пкое испове́дание; ра́дуйтеся, стра́ждущаго наро́да на́шего утеше́ние.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 2

Ви́дя Госпо́дь покая́ние наро́да на́шего, егда́ сму́тная времена́ наста́ша, умилосе́рдися и яви́ ми́лость Свою́ во избра́нии Михаи́ла царя́, его́же ико́ною Пречи́стыя Богоро́дицы, Фео́доровская имену́емою, чрез роди́тельницу благослови́, да бу́дет ико́на сия́ покро́в и защище́ние ему́ и всему́ новоизбра́нному ца́рскому ро́ду и во утвержде́ние держа́вы Росси́йския. Сего́ ра́ди благода́рне вопие́м Бо́гу: Аллилу́ия.

И́кос 2

Разуме́ша лю́дие росси́йстии, я́ко, избра́нием на ца́рство но́ваго ро́да благочести́ваго, утиши́ Госпо́дь нестрое́ния и сму́ты в земли́ на́шей, принесо́ша обе́т ве́рнаго служе́ния ро́ду сему́. Мы же, любви́ и ре́вности тех подража́юще, к вам, ца́рственнии страстоте́рпцы, я́ко насле́дником сего́ избра́ния со умиле́нием вопие́м:

Ра́дуйтеся, вене́ц и похвало́ ро́да ца́рскаго и свяще́ннаго; ра́дуйтеся, ко́рене благочести́ваго пресла́вныя о́трасли.

Ра́дуйтеся, патриа́рха Росси́йскаго Филаре́та свято́е прозябе́ние; ра́дуйтеся, попече́нию его́ о Це́ркви и оте́честве подража́вшии.

Ра́дуйтеся, вели́кия ста́рицы и́нокини Ма́рфы благослове́нное насле́дие; ра́дуйтеся, поко́рность во́ли Бо́жией от нея́ восприи́мшии.

Ра́дуйтеся, пред ико́ною Бо́жия Ма́тере Фео́доровския моли́твы при́сно возноси́вшии; ра́дуйтеся, все упова́ние на по́мощь Богоро́дицы с ве́рою возлага́вшии.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 3

Сила Бо́жия и промышле́ние Всевы́шняго яви́ся в рожде́нии твое́м, ца́рственный страстоте́рпче Нико́лае, вели́каго бо святи́теля и́мя восприе́м, засту́пник Росси́йския земли́ показа́лся еси́. Мно́гия же ско́рби и боле́зни, подо́бне И́ову пра́ведному, в житии́ претерпе́в, ны́не с ли́ки страстоте́рпцев наслажда́ешися ра́йскаго блаже́нства, воспева́я Бо́гу: Аллилу́ия.

И́кос 3

Име́я сугу́быя засту́пники и покрови́тели в рожде́нии твое́м, И́ова многострада́льнаго и Никола́я чудотво́рца, держа́вный страстоте́рпче, доброде́телем тех после́довал еси́. Мы же, дивя́щеся промышле́нию Творца́, во святы́х сих о́браз благоче́стия указа́вшаго ти, благогове́йне воспева́ем си́це:

Ра́дуйся, в моли́твах святи́теля Мир Лики́йских при́сно призыва́яй; ра́дуйся, по́мощию того́ Росси́йскую держа́ву пра́ведно окормля́яй.

Ра́дуйся, о́бразом кро́тости тому́ уподо́бивыйся; ра́дуйся, милосе́рдие мно́гое, я́коже о́ный, яви́вый.

Ра́дуйся, терпе́ние И́овле в се́рдце твое́м име́вый; ра́дуйся, ве́рность Бо́гу в житии́ твое́м до конца́ сохрани́вый.

Ра́дуйся, в тя́жких беда́х, я́коже о́ный, благодаре́ние Бо́гу приноси́вый; ра́дуйся, вся находя́щая на тя со смире́нием прие́мый.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 4

Бу́рю смуще́ния, воздвиза́емую от челове́к безбо́жных в стране́ на́шей, ви́дя, страстоте́рпче Нико́лае, не смути́лся еси́ в се́рдце твое́м и, все упова́ние на Бо́га возложи́в, не возропта́л еси́, егда́ отверго́ша тя лю́ди твоя́, оба́че с ве́рою воспе́л еси́ Бо́гу: Аллилу́ия.

И́кос 4

Слы́ша о мяте́жех, боле́знех и междоусо́бных бра́нех, наше́дших на зе́млю Ру́сскую, во у́зах сый, страстоте́рпче царю́ Нико́лае, моле́ние о лю́дех ея́ непреста́нне приноси́л еси́, милосе́рдие Бо́жие к ним призыва́я. Сего́ ра́ди мы воспева́ем тебе́ та́ко:

Ра́дуйся, от ю́ности оте́чество и наро́д твой возлюби́вый; ра́дуйся, я́ко и во отверже́нии любо́вь сию́ сохрани́вый.

Ра́дуйся, пома́зание на ца́рство с благогове́нием прие́мый; ра́дуйся, о́браз благочести́ваго царя́ ми́ру яви́вый.

Ра́дуйся, ца́рский вене́ц со смире́нием на ся возложи́вый; ра́дуйся, венца́ страда́ний от Го́спода удосто́енный.

Ра́дуйся, ца́рское служе́ние я́ко послуша́ние Бо́гу разуме́вый; ра́дуйся, поноше́ния, я́ко крест, взе́мый и с терпе́нием понесы́й.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 5

Богосве́тлый свети́льник во мра́це скорбе́й благове́рней супру́жнице твое́й яви́лся еси́, ца́рственный страстоте́рпче Нико́лае, указу́я и возглавля́я путь ея́, я́коже повеле́ Госпо́дь. Мы же, прославля́юще ваш благослове́нный сою́з во Христе́, хвалу́ Бо́гу воздае́м, пою́ще: Аллилу́ия.

И́кос 5

Ви́дя ца́рственный страстоте́рпец ю́ницу Алекса́ндру, я́ко голуби́цу чи́сту, избра́ ю́ себе́ в благове́рную супру́жницу, правосла́вную цари́цу и ма́терь наро́да росси́йскаго. Мы же, ве́дуще усе́рдное служе́ние ея́, воспева́ем си́це:

Ра́дуйся, имени́таго ро́да благочести́вое прозябе́ние; ра́дуйся, от лю́терския ве́ры к Правосла́вию о́бразе спаси́тельнаго прехожде́ния.

Ра́дуйся, всем се́рдцем моли́тву возлюби́вшая; ра́дуйся, о слу́жбе Бо́жией серде́чно ревнова́вшая.

Ра́дуйся, сло́вом Бо́жиим и писа́нием святы́х оте́ц себе́ назда́вшая; ра́дуйся, уста́вы церко́вныя благогове́йно соблюда́вшая.

Ра́дуйся, ру́сское благоче́стие досто́йне восприе́мшая; ра́дуйся, и́стинныя жи́зни во Христе́ приобщи́вшаяся.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 6

Пропове́дует житие́ ва́ше бра́ка свята́го чистоту́, благове́рнии Нико́лае и Алекса́ндро. Вы бо, благода́ть сего́ вели́каго та́инства досто́йно восприе́мше, да́же до му́ченическия кончи́ны ве́рность Христу́ и любо́вь друг ко дру́гу сохрани́ли есте́, при́сно воспева́юще Бо́гу: Аллилу́ия.

И́кос 6

Возсия́ в стране́ Росси́йстей, я́ко прекра́сная свети́ла, благове́рная ца́рственная чета́ Никола́й и Алекса́ндра, супру́зи, сою́зом любве́ Христо́вы связу́емии. Мы же, прославля́юще о́браз их целому́дреннаго и добронра́внаго жития́ в ми́ре сем, со благогове́нием воспева́ем си́це:

Ра́дуйтеся, всем се́рдцем Бо́га взыска́вшии; ра́дуйтеся, в путе́х Госпо́дних непоро́чно ходи́вшии.

Ра́дуйтеся, дво́ице честна́я, свы́ше избра́нная; ра́дуйтеся, дво́ице свята́я, сла́вою и че́стию от Бо́га венча́нная.

Ра́дуйтеся, целому́дрие супру́жеское многоча́дием просла́вившии; ра́дуйтеся, ча́да ва́ша, я́ко новосажде́ния ма́сличная, о́крест трапе́зы Небе́сныя собра́вшии.

Ра́дуйтеся, супру́ги во благоче́стии и любви́ жи́ти науча́ющии; ра́дуйтеся, мир Христо́в о́ным ми́лостивно низпосыла́ющии.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 7

Хотя́ще ваш дом благоче́стно устро́ити, любо́вь я́ко основа́ние положили есте́ и брак че́стен до́бре соблюли́ есте́, благове́рнии супру́зи Нико́лае и Алекса́ндро. Те́мже и дще́ри ва́ша, я́ко му́дрыя ева́нгельския де́вы, воспита́вше, в неве́сты Христу́ угото́вали есте́. С ни́миже ны́не вку́пе воспева́ете Бо́гу: Аллилу́ия.

И́кос 7

Но́вую ми́лость дарова́ Госпо́дь наро́ду ру́сскому, целому́дренныя дще́ри ца́рственныя четы́, О́льгу, Татиа́ну, Мари́ю и Анастаси́ю. Ты́я бо, жена́м мироно́сицам подража́ющия, еле́ем милосе́рдия боля́щим и стра́ждущим послужи́ша и, сме́рть за Христа́ прие́мша, ны́не Престо́лу Бо́жию предстоя́т. Сего́ ра́ди прославля́ем их си́це:

Ра́дуйтеся, дще́ри царе́вы, обетова́ний Бо́жиих сподо́бльшияся; ра́дуйтеся, за́поведь Бо́жию о почита́нии роди́телей соблю́дшия.

Ра́дуйтеся, досто́инство ца́рственное свя́то сохра́ньшия; ра́дуйтеся, стихи́ями ми́ра сего не порабоще́нныя.

Ра́дуйтеся, лю́дем, су́щим в беда́х и ско́рбех, я́ко Христу́, послужи́вшия; ра́дуйтеся, за враго́в свои́х усе́рдно моли́вшияся.

Ра́дуйтеся, а́гницы непоро́чныя, в же́ртву Бо́гу себе́ прине́сшия; ра́дуйтеся, неве́сты Христо́вы, в черто́зех Жениха́ Небе́снаго пребыва́ющия.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 8

Стра́нно и чу́дно бысть рожде́ние твое́, святы́й царе́вичу Алекси́е. Плод бо благосла́вен моли́тв Саро́вскаго чудотво́рца и ча́емый насле́дник ца́рственных роди́телей быв, сла́ва, наде́жда и упова́ние яви́лся еси́ всем конце́м земли́ на́шея. Сего́ ра́ди лю́дие росси́йстии с ра́достию благода́рственно воспе́ша Бо́гу: Аллилу́ия.

И́кос 8

К вы́шним душе́ю чи́стою устремля́яся, святы́й царе́вичу Алекси́е, измла́да боле́знь я́ко крест, от Го́спода да́нный, безро́потно поне́сл еси́, последи́ же, я́ко а́гнец незло́бивый, рука́ми злочести́вых убие́н, моли́твенник пред Бо́гом яви́лся еси́. Сего́ ра́ди воспева́ем ти си́це:

Ра́дуйся, отроча́, от утро́бы ма́тере Бо́гом предызбра́нное; ра́дуйся, ча́до, моли́твами Саро́вскаго чудотво́рца Росси́и дарова́нное.

Ра́дуйся, страда́льче, измла́да ско́рби и неду́ги безро́потно понесы́й; ра́дуйся, царе́вичу, в боле́знех сострада́ние к лю́дем обреты́й.

Ра́дуйся, насле́дниче, лише́ние ца́рства земна́го со смире́нием прие́мый; ра́дуйся, страстоте́рпче, Ца́рствия Небе́снаго от Бо́га удосто́енный.

Ра́дуйся, а́гнче незло́биве, от безбо́жных закла́нный; ра́дуйся, ца́рственный о́троче, венце́м нетле́нным от Царя́ ца́рствующих увенча́нный.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 9

Всяк ум челове́ческий смути́ся, егда́ в земли́ на́шей беззако́ние умно́жися, и́стина помрачи́ся и ме́рзость запусте́ния на ме́сте святе́м ста. Ты же, царю́ Нико́лае, изгна́ние, поруга́ние и темни́чное заточе́ние му́жественне претерпе́в, сын ве́рный Святы́я Це́ркве и страстоте́рпец Христо́в яви́лся еси́. Сего́ ра́ди Це́рковь Ру́сская, прославля́ющи тя, Бо́гу вопие́т: Аллилу́ия.

И́кос 9

Вети́и злому́дреннии тща́шася оболга́ти тя клевето́ю, пома́занниче Бо́жий Нико́лае, ты же, ева́нгельски вся терпя́, о благоче́стии наро́да правосла́внаго попече́ние сугу́бое прилага́л еси́. Сего́ ра́ди, па́мять твою́ све́тло пра́зднующе, воспева́ем ти си́це:

Ра́дуйся, прославле́ния уго́дников Бо́жиих до́брый рачи́телю; ра́дуйся, па́стыря Кроншта́дтскаго благогове́йный почита́телю.

Ра́дуйся, Саро́вских торже́ств держа́вный возглави́телю; ра́дуйся, и́ноческих оби́телей благочести́вый покрови́телю.

Ра́дуйся, духо́вных вертогра́дов усе́рдный попечи́телю; ра́дуйся, правосла́вных хра́мов боголюби́вый зда́телю.

Ра́дуйся, Святы́я Земли́ и Афо́нския Горы́ ще́дрый благотвори́телю; ра́дуйся, устрое́ния Це́ркве Ру́сския му́дрый ревни́телю.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 10

Спасти́ хотя́ лю́ди росси́йския от ро́зни братоуби́йственныя, царю́ Нико́лае, престо́л земны́й оста́вил еси́, оба́че, на ми́лость Бо́жию упова́я, непоколеби́мь в ве́ре и благоче́стии пребы́л еси́, воспева́я: Аллилу́ия.

И́кос 10

Стена́ и огражде́ние бысть Госпо́дь тебе́, царю́ Нико́лае, Ему́же те́пле моли́лся еси́, да сохрани́т держа́ву Росси́йскую от наше́ствия иноплеме́нник и братоуби́йственныя бра́ни, наипа́че же лю́ди правосла́вныя во благоче́стии да укрепи́т. Сего́ ра́ди благода́рне воспева́ем ти си́це:

Ра́дуйся, полко́в росси́йских му́дрый предводи́телю; ра́дуйся, ра́тных люде́й христолюби́вый попечи́телю.

Ра́дуйся, оте́чества на́шего держа́вный храни́телю; ра́дуйся, слове́нских наро́дов ре́вностный защи́тителю.

Ра́дуйся, мечи́ на ора́ла прекова́ти наро́ды призва́вый; ра́дуйся, мир име́ти со все́ми язы́ки преи́скренне жела́вый.

Ра́дуйся, благове́рным князе́м в благоче́стии подража́вый; ра́дуйся, о́браз царя́ правосла́внаго во смире́нии ми́ру яви́вый.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 11

Пе́ния вся́каго досто́йна па́мять ва́ша, святи́и ца́рственнии страстоте́рпцы. Вы бо, о́браз испове́дничества и ре́вности по Бо́зе ве́рным лю́дем показа́вше, запове́дасте не мсти́ти злоде́ющим, па́че же проща́ти гоня́щим и моли́тву твори́ти за них, пою́ще Бо́гу: Аллилу́ия.

И́кос 11

Светоно́сный свети́льник седмочи́сленный ве́мы вас, святи́и ца́рственнии страстоте́рпцы, ца́рским бо путе́м ше́ствующе, угото́васте себе́ за Христа́ пострада́ти. Те́мже просвети́те омраче́нная сердца́ на́ша и ева́нгельским путе́м ше́ствовати научи́те нас, прославля́ющих вас си́це:

Ра́дуйтеся, а́гнцы незло́бивии, А́гнцу Бо́жию в кро́тости подража́вшии; ра́дуйтеся, о́браз терпе́ния в злострада́ниих ве́рным показа́вшии.

Ра́дуйтеся, во всем житии́ со́весть чи́сту храни́вшии; ра́дуйтеся, убие́ние беззако́нное смире́нно восприе́мшии.

Ра́дуйтеся, седмочи́сленнии страстоте́рпцы, во еди́ном ду́се Бо́гу предста́вшии; ра́дуйтеся, кро́вию му́ченическою зе́млю на́шу обагри́вшии.

Ра́дуйтеся, лик благове́рных царе́й и князе́й воспо́лнившии; ра́дуйтеся, собо́р святы́х земли́ Росси́йския украси́вшии.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 12

Благода́ть изря́дну Бог дарова́ Це́ркви Росси́йстей, просла́вив вас на Небеси́, ца́рственнии страстоте́рпцы, храни́телие и покрови́телие страны́ на́шея. Сего́ ра́ди и мы на земли́ почита́ем вас, Бо́гу вопию́ще: Аллилу́ия.

И́кос 12

Воспева́юще по́двиги ва́ша, ца́рственнии страстоте́рпцы, прославля́ем Триеди́наго Бо́га. Вы бо, соизволе́нием Отца́ Безнача́льнаго, соверше́нием Сы́на Единоро́днаго и соде́йствием Свята́го Ду́ха Бо́жия, прича́стницы Ца́рствия Небе́снаго соде́ластеся и засту́пницы оте́чества на́шего яви́стеся. Сего́ ра́ди дерза́ем взыва́ти вам си́це:

Ра́дуйтеся, я́ко прославле́нию ва́шему Це́рковь ра́дуется; ра́дуйтеся, я́ко чудесы́ ва́шими ве́ра укрепля́ется.

Ра́дуйтеся, я́ко о́бразы ва́ши мироточе́нием прославля́ются; ра́дуйтеся, я́ко в честь ва́шу хра́мы созида́ются.

Ра́дуйтеся, я́ко житие́м ва́шим лю́ди благоче́стию науча́ются; ра́дуйтеся, я́ко терпе́нием ва́шим во страда́ниих ве́рнии назида́ются;

Ра́дуйтеся, я́ко ева́нгельския заве́ты исполня́ти нас наставля́ете; ра́дуйтеся, я́ко беды́ и ско́рби му́жественне нести́ нам помога́ете.

Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.

Конда́к 13

О святи́и ца́рственнии страстоте́рпцы! Приими́те от нас похва́льное сие́ пе́ние и ми́лостивым ва́шим хода́тайством умоли́те Царя́ сла́вы мир стране́ на́шей дароват1и, Це́рковь в Правосла́вии и еди́нстве сохрани́ти, нас же во благоче́стии утверди́ти, да вопие́м Бо́гу: Аллилу́ия.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Моли́тва

О свята́я седмери́це, ца́рственнии страстоте́рпцы, Нико́лае, Алекса́ндро, Алекси́е, Мари́е, О́льго, Татиа́но и Анастаси́е!

Вы, сою́зом любве́ Христо́вы связу́еми, дом ваш, я́ко ма́лую Це́рковь, благоче́стно устро́или есте́ и смире́нием себе́ посреде́ земна́го вели́чия украси́ли есте́. В годи́ну же братоуби́йственныя бра́ни и гоне́ний безбо́жных во оте́честве на́шем, все упова́ние на Бо́га возложи́вше, о́браз терпе́ния и страда́ния всей земли́ Росси́йстей яви́ли есте́ и, моля́щеся о мучи́телех, клевету́, у́зы и изгна́ние, глумле́ние, насмея́ние и оболга́ние, убие́ние и теле́с поруга́ние му́жественне претерпе́ли есте́. Сего́ ра́ди от земна́го ца́рствия к Небе́сному прешли́ есте́ и те́плии хода́таи о нас яви́лися есте́.

О святи́и уго́дницы Бо́жии! Моли́теся о нас Бо́гу, да Це́рковь в единомы́слии и тве́рдей ве́ре соблюде́т, страну́ на́шу ми́ром и благоде́нствием огради́т и от междоусо́бныя бра́ни и разделе́ния изба́вит, власть предержа́щую умудри́т, во́инство му́жеством украси́т, супру́ги в ве́рности и любви́ укрепи́т, ча́да в благоче́стии и послуша́нии возрасти́т, и вся ны ку́пно с ва́ми сподо́бит воспева́ти пречестно́е и великоле́пое и́мя Живонача́льныя Тро́ицы, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

И́на моли́тва, страстоте́рпцу царю́ Никола́ю

О святы́й страстоте́рпче, царю́ му́чениче Нико́лае! Госпо́дь тя избра́ пома́занника Своего́, во е́же ми́лостивно и пра́во суди́ти лю́дем твои́м и храни́телем Це́ркве Правосла́вныя бы́ти. Сего́ ра́ди со стра́хом Бо́жиим ца́рское служе́ние и о душа́х попече́ние соверша́л еси́. Госпо́дь же, испыту́я тя, я́ко И́ова Многострада́льнаго, попусти́ тебе́ поноше́ния, ско́рби го́рькия, изме́ну, преда́тельство, бли́жних отчужде́ние и в душе́вных му́ках земна́го ца́рства оставле́ние. Вся сия́ ра́ди бла́га Росси́и я́ко ве́рный сын ея́ претерпе́в и я́ко и́стинный раб Христо́в му́ченическую кончи́ну прие́м, Небе́снаго Ца́рства дости́гл еси́, иде́же наслажда́ешися вы́шния сла́вы у Престо́ла всех Царя́, ку́пно со свято́ю супру́жницею твое́ю, цари́цею Алекса́ндрою, и ца́рственными ча́ды, Алекси́ем, О́льгою, Татиа́ною, Мари́ею и Анастаси́ею. Ны́не, име́я дерзнове́ние ве́лие у Христа́ Царя́, моли, да пода́ст нам Госпо́дь грехо́в проще́ние и на вся́кую доброде́тель наста́вит нас, да стяжи́м смире́ние, кро́тость и любо́вь и сподо́бимся Небе́снаго Ца́рствия, иде́же ку́пно с тобо́ю и все́ми святы́ми новому́ченики и испове́дники Росси́йскими просла́вим Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

Продолжение следует