[глⷡ҇а к҃и] Мл҃тва над̾ сѣ́ѧнїемъ.

Гдⷭ҇и бж҃е на́шъ, ѿ пречⷭ҇тыѧ и҆ пребога́тыѧ дла́ни твоеѧ̀, предлежа́щее пред̾ ѻ҆чи́ма твои́ма сѣ́менъ подаѧ́нїе принесо́хомъ влⷣко, и҆ семꙋ̀ тебѣ̀ врꙋчи́тисѧ мо́лимсѧ: не бо̀ смѣ́ѧхомъ въ бездꙋ́шныхъ землѝ нѣ́дрѣхъ заключи́ти сїѧ̑, а҆́ще не воззри́мъ на повелѣ́нїе твоегѡ̀ вели́чества, повелѣва́ющее роди́ти, и҆ прозѧба́ти землѝ, и҆ да́ти сѣ́мена сѣ́ющемꙋ, и҆ хлѣ́бъ въ снѣ́дь. и҆ ны́нѣ мо́лимсѧ тебѣ̀ бж҃е на́шъ, ᲂу҆слы́ши ны̀ молѧ́щыѧсѧ тебѣ̀, и҆ ѿве́рзи на́мъ сокро́вище твоѐ вели́кое, и҆ бл҃го́е, и҆ нбⷭ҇ное, и҆ и҆зле́й бл҃гослове́нїе твоѐ, доне́лѣже ᲂу҆довли́мсѧ по нелѡ́жнымъ твои̑мъ ѡ҆бѣща́нїємъ: и҆ ѿженѝ ѿ на́съ всѧ̑ снѣда̑ющаѧ пло́дъ на́шъ земны́й, и҆ всѧ́кое наказа́нїе пра́веднѡ наводи́мое на ны̀, грѣ̑хъ ра́ди на́шихъ: и҆ бога̑тыѧ твоѧ̑ щедрѡ́ты низпослѝ на всѧ̑ лю́ди твоѧ̑, бл҃года́тїю и҆ чл҃вѣколю́бїемъ є҆диноро́днагѡ твоегѡ̀ сн҃а, съ ни́мже бл҃гослове́нъ є҆сѝ, и҆ съ прест҃ы́мъ и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.


Комментарии для сайта Cackle