[глⷡ҇а л҃] Мл҃тва, ѡ҆ є҆́же бл҃гослови́ти мрє́жи.

Гдⷭ҇и і҆и҃се хрⷭ҇тѐ бж҃е на́шъ, ѿ пѧтѝ хлѣ́бѡвъ и҆ двою̀ ры̑бꙋ, пѧ́ть ты́сѧщь насы́тивый, и҆ ѿ и҆збы́тѡкъ мно́жество ᲂу҆крꙋ́хѡвъ собра́ти ᲂу҆стро́ивый: са́мъ влⷣко всеси́льный, и҆ предлежа́щыѧ мрє́жи бл҃гословѝ, мл҃твами пребл҃гослове́нныѧ, сла́вныѧ влⷣчцы на́шеѧ бцⷣы, и҆ приснодв҃ы мр҃і́и: ст҃а́гѡ сла́внагѡ и҆ всехва́льнагѡ а҆пⷭ҇ла, и҆ первоверхо́внагѡ а҆пⷭ҇лѡвъ петра̀: и҆ и҆̀же ѿ ни́хъ причаща́ющыѧсѧ ры́бъ, въ ми́рѣ и҆ здра́вїи дꙋше́вномъ и҆ тѣле́сномъ сохранѝ. Ꙗ҆́кѡ ты̀ є҆сѝ пода́тель всѣ́хъ бл҃ги́хъ, и҆ тебѣ̀ сла́вꙋ возсыла́емъ со безнача́льнымъ твои́мъ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.


Комментарии для сайта Cackle