[глⷡ҇а л҃а] Мл҃тва во є҆́же ᲂу҆стро́ити кора́бль.

Гдⷭ҇и бж҃е ѻ҆тє́цъ на́шихъ, заповѣ́давый нѡ́ю рабꙋ̀ твоемꙋ̀ ᲂу҆стро́ити кївѡ́тъ ко сп҃се́нїю мі́ра, ѿ мно́гихъ древе́съ бл҃говоли́вый є҆мꙋ̀ є҆ди́но дре́во бы́ти и҆ сочини́тисѧ: са́мъ ᲂу҆́бѡ влⷣко всѣ́хъ, бл҃говоли́вый бездꙋ́шными древесы̀ пра́вити, и҆ крѣ́пкою твое́ю рꙋко́ю ро́дъ человѣ́ческїй сп҃са́ѧй, са́мъ и҆ ны́нѣ влⷣко, и҆ се́й кора́бль соблюдѝ, и҆ да́ждь є҆мꙋ̀ а҆́гг҃ла бл҃га, ми́рна: хотѧ́щыѧ плы́ти въ не́мъ сохранѝ, да́ждь и҆̀мъ во всѧ̑ ѿитѝ здра̑вымъ, мл҃твами прест҃ы́ѧ влⷣчцы на́шеѧ бцⷣы, и҆ приснодв҃ы мр҃і́и: си́лою чⷭ҇тна́гѡ и҆ животворѧ́щагѡ крⷭ҇та̀, чⷭ҇тны́хъ, нбⷭ҇ныхъ, ᲂу҆́мныхъ си́лъ безпло́тныхъ: ст҃а́гѡ сла́внагѡ прⷪ҇ро́ка, прⷣте́чи и҆ крⷭ҇ти́телѧ і҆ѡа́нна: ст҃ы́хъ сла́вныхъ и҆ всехва́льныхъ а҆пⷭ҇лъ, и҆ ст҃а́гѡ (и҆́мⷬ҇къ), и҆ всѣ́хъ ст҃ы́хъ. Ꙗ҆́кѡ ты̀ є҆сѝ ѡ҆кромлѧ́ѧй и҆ ѡ҆свѧща́ѧй всѧ́чєскаѧ, бж҃е на́шъ, и҆ тебѣ̀ сла́вꙋ, и҆ бл҃годаре́нїе, и҆ поклоне́нїе возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.