[глⷡ҇а л҃г] Чи́нъ бл҃гослове́нїѧ пче́лъ.

Прише́дъ і҆ере́й на мѣ́сто, и҆дѣ́же стоѧ́тъ пче́лы, начина́етъ:

Бл҃гослове́нъ бг҃ъ на́шъ: Чте́цъ: Трист҃о́е. И҆ Ѻ҆́ч҃е на́шъ: И҆ по возгла́сѣ: Ꙗ҆́кѡ твоѐ є҆́сть црⷭ҇тво: рече́тъ Гдⷭ҇и поми́лꙋй, в҃і.

Прїиди́те, поклони́мсѧ: Три́жды.

И҆ ѱало́мъ н҃: Поми́лꙋй мѧ̀ бж҃е:

Та́же, ѱало́мъ п҃д:

Бл҃говоли́лъ є҆сѝ, гдⷭ҇и, зе́млю твою̀, возврати́лъ є҆сѝ плѣ́нъ і҆а́кѡвль. Ѡ҆ста́вилъ є҆сѝ беззакѡ́нїѧ люде́й твои́хъ, покры́лъ є҆сѝ всѧ̑ грѣхѝ и҆́хъ. Оу҆кроти́лъ є҆сѝ ве́сь гнѣ́въ тво́й, возврати́лсѧ є҆сѝ ѿ гнѣ́ва ꙗ҆́рости твоеѧ̀. Возвратѝ на́съ бж҃е сп҃се́нїй на́шихъ, и҆ ѿвратѝ ꙗ҆́рость твою̀ ѿ на́съ. Є҆да̀ во вѣ́ки прогнѣ́ваешисѧ на ны̀; и҆лѝ простре́ши гнѣ́въ тво́й ѿ ро́да въ ро́дъ, Бж҃е, ты̀ ѡ҆бра́щьсѧ ѡ҆живи́ши ны̀. и҆ лю́дїе твоѝ возвеселѧ́тсѧ ѡ҆ тебѣ̀. Ꙗ҆вѝ на́мъ гдⷭ҇и млⷭ҇ть твою̀, и҆ сп҃се́нїе твоѐ да́ждь на́мъ. Оу҆слы́шꙋ, что̀ рече́тъ ѡ҆ мнѣ̀ гдⷭ҇ь бг҃ъ: ꙗ҆́кѡ рече́тъ ми́ръ на лю́ди своѧ̑ и҆ на прпⷣбныѧ своѧ̑, и҆ на ѡ҆браща́ющыѧ сердца̀ къ немꙋ̀. Ѻ҆ба́че бли́зъ боѧ́щихсѧ є҆гѡ̀ сп҃се́нїе є҆гѡ̀, всели́ти сла́вꙋ въ зе́млю на́шꙋ. Млⷭ҇ть и҆ и҆́стина срѣто́стѣсѧ, пра́вда и҆ ми́ръ ѡ҆блобыза́стасѧ: И҆́стина ѿ землѝ возсїѧ̀, и҆ пра́вда съ нб҃сѐ прини́че. И҆́бо гдⷭ҇ь да́стъ бл҃гость, и҆ землѧ̀ на́ша да́стъ пло́дъ сво́й. Пра́вда пред̾ ни́мъ пред̾и́детъ и҆ положи́тъ въ пꙋ́ть стѡпы̀ своѧ̑.

Та́же ѱало́мъ рк҃в.

Къ тебѣ̀ возведо́хъ ѻ҆́чи моѝ, живꙋ́щемꙋ на нб҃сѝ. Сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀. Поми́лꙋй на́съ гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: Наипа́че напо́лнисѧ дꙋша̀ на́ша поноше́нїѧ гобзꙋ́ющихъ, и҆ ᲂу҆ничиже́нїѧ го́рдыхъ.

Чита́ємымъ же ѱалмѡ́мъ, ѡ҆кроплѧ́етъ і҆ере́й мѣста̀ пче́лъ всѧ̑, глаго́лѧ и҆ са́мъ ѱало́мъ н҃-й та́йнѡ: Поми́лꙋй мѧ̀ бж҃е:

Та́же ре́къ: Гдⷭ҇ꙋ помо́лимсѧ.

И҆ чте́цъ: Гдⷭ҇и поми́лꙋй.

Чте́тъ і҆ере́й мл҃твы сїѧ̑

Созда́телю всѣ́хъ бж҃е, сѣ́мена бл҃гословлѧ́ѧй и҆ ᲂу҆множа́ѧй, и҆ къ ᲂу҆потребле́нїю на́шемꙋ сїѧ̑ бл҃гопотрє́бна творѧ́й: хода́тайствомъ прⷣте́чи и҆ крⷭ҇ти́телѧ і҆ѡа́нна, млⷭ҇тивнѡ вне́млѧ мл҃твамъ на́шымъ, пче́лы сїѧ̑ бл҃гослови́ти и҆ ѡ҆ст҃и́ти свои́мъ бл҃гоꙋтро́бїемъ бл҃гоизво́ли, да ѻ҆би́льнѣе плоды̀ своѧ̑ прино́сѧтъ, во є҆́же ко хра́мꙋ твоемꙋ̀ и҆ ст҃ы́хъ ѻ҆лтаре́й твои́хъ лѣ́потѣ и҆ ᲂу҆краше́нїю, кꙋ́пнѡ же и҆ къ на́шемꙋ ᲂу҆потребле́нїю бы́ти и҆̀мъ, ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ, є҆мꙋ́же че́сть и҆ сла́ва, во вѣ́ки вѣкѡ́въ, а҆ми́нь.

Гдⷭ҇ꙋ помо́лимсѧ. Чте́цъ: Гдⷭ҇и поми́лꙋй.

І҆ере́й:

Бж҃е, трꙋдо́мъ чл҃вѣ́ческимъ и҆ безслове́сными живо́тными бл҃годѣ́йствовати вѣ́дый, и҆ неизрече́ннымъ млⷭ҇рдїемъ твои́мъ самѣ́хъ пче́лъ плоды̀ и҆ дѣла̀ къ нꙋ́ждамъ на́шымъ ᲂу҆потреблѧ́ти наꙋчи́вый, смире́ннѡ мо́лимсѧ вели́чествїю твоемꙋ̀: пче́лы сїѧ̑ бл҃гослови́ти и҆зво́ли, и҆ къ прїѡбрѣ́тенїю чл҃вѣ́ческомꙋ ро́дꙋ ᲂу҆мно́жи ѧ҆̀, снабдѣва́ѧ и҆̀хъ, и҆ препитава́ѧ: да кі́йждо на вели́чество твоѐ и҆ безмѣ̑рныѧ щедрѡ́ты твоѧ̑ ᲂу҆пова́ѧй, въ хране́нїи же си́хъ живо́тныхъ трꙋжда́ѧйсѧ, трꙋдѡ́въ свои́хъ ѻ҆би̑льныѧ плоды̀ сподо́битсѧ воспрїѧ́ти, и҆ нбⷭ҇нагѡ бл҃гослове́нїѧ и҆спо́лнитсѧ, ѡ҆ хрⷭ҇тѣ̀ і҆и҃сѣ гдⷭ҇ѣ на́шемъ, є҆мꙋ́же че́сть и҆ сла́ва во вѣ́ки вѣкѡ́въ, а҆ми́нь.

И҆ па́ки ѡ҆кроплѧ́етъ мѣ́сто пче́лъ, и҆ чте́тъ є҆ѵⷢ҇лїе ѿ лꙋкѝ, зача́ло рд҃і.

Во вре́мѧ ѻ҆́но, воскр҃съ і҆и҃съ ѿ ме́ртвыхъ, ста̀ посредѣ̀ ᲂу҆чени̑къ свои́хъ, и҆ глаго́ла и҆̀мъ: ми́ръ ва́мъ. Оу҆боѧ́вшесѧ же и҆ пристра́шни бы́вше, мнѧ́хꙋ дꙋ́хъ ви́дѣти. И҆ речѐ и҆̀мъ: что̀ смꙋще́ни є҆стѐ; и҆ почто̀ помышлє́нїѧ вхо́дѧтъ въ сердца̀ ва̑ша; Ви́дите рꙋ́цѣ моѝ и҆ но́зѣ моѝ, ꙗ҆́кѡ са́мъ а҆́зъ є҆́смь: ѡ҆сѧжи́те мѧ̀ и҆ ви́дите: ꙗ҆́кѡ дх҃ъ пло́ти и҆ ко́сти не и҆́мать, ꙗ҆́коже менѐ ви́дите и҆мꙋ́ща. И҆ сїѐ ре́къ, показа̀ и҆̀мъ рꙋ́цѣ и҆ но́зѣ. Є҆ще́ же не вѣ́рꙋющымъ и҆̀мъ ѿ ра́дости и҆ чꙋдѧ́щымсѧ, речѐ и҆̀мъ: и҆́мате ли что̀ снѣ́дно здѣ̀; Ѻ҆ни́ же да́ша є҆мꙋ̀ ры́бы печены̀ ча́сть, и҆ ѿ пче́лъ со́тъ. И҆ взе́мъ пред̾ ни́ми ꙗ҆дѐ. Рече́ же и҆̀мъ сїѧ̑ сꙋ́ть словеса̀, ꙗ҆̀же глаго́лахъ къ ва́мъ, є҆щѐ сы́й съ ва́ми, ꙗ҆́кѡ подоба́етъ сконча́тисѧ всѣ̑мъ напи̑саннымъ въ зако́нѣ мѡѷсе́овѣ и҆ прⷪ҇ро́цѣхъ и҆ ѱалмѣ́хъ ѡ҆ мнѣ̀.

По є҆ѵⷢ҇лїи же глаго́летъ сїѐ:

Си́ми є҆ѵⷢ҇льскими словесы̀, да ѡ҆чи́стѧтсѧ грѣхѝ на́шѧ, и҆ разорѧ́тсѧ и҆ поги́бнꙋтъ всѧ̑ ѡ҆баѧ̑нїѧ, а҆́ще ка̑ѧ сꙋ́ть на мѣ́стѣ се́мъ: да сни́детъ же на нѐ бл҃гослове́нїе всемогꙋ́щагѡ бг҃а ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь.

И҆ па́ки кропи́тъ мѣ́сто пче́лъ, и҆ быва́етъ ѿпꙋ́стъ.

[глⷡ҇а л҃д] Бл҃гослове́нїе ро́євъ пче́льныхъ, во ᲂу҆́лїѧ нѡ́ва всажде́нныхъ.

Нача́ло ꙗ҆́коже и҆ въ пред̾идꙋ́щей главѣ̀, по ѱалмѣ́хъ же мл҃тва сїѧ̀:

Бж҃е всемогі́й, предвѣ́чный, содержа́й го́рстїю всю̀ тва́рь, ѡ҆блада́ѧй нб҃омъ и҆ земле́ю, и҆ всѣ́ми ꙗ҆̀же на ни́хъ, всѧ́комꙋ же созда́нїю, є҆́же на по́льзꙋ бы́ти ще́дрѡ подаѧ́й: ᲂу҆миле́ннѡ мо́лимъ ти сѧ всебл҃же, ꙗ҆́коже дре́вле і҆и҃льтѧнѡмъ зе́млю ме́домъ и҆ млеко́мъ текꙋ́щꙋю дарова́ти, въ пꙋсты́ни і҆ѡа́нна крⷭ҇ти́телѧ твоего̀ ди́вїимъ ме́домъ воспита́ти бл҃гоизво́лилъ є҆сѝ: та́кожде ны́нѣ призрѣ́нїѧ твоегѡ̀ бл҃говоле́нїемъ къ живопита́нїю на́шемꙋ. се́й пче́льникъ и҆ є҆гѡ̀ ᲂу҆́лїѧ бл҃гословѝ, ᲂу҆множа́ѧ преꙋмно́жи въ не́мъ пче́лы, и҆ бл҃года́тїю твое́ю ѧ҆̀ соблюда́ющи, тꙋ́чнагѡ на́съ ме́да и҆спо́лни: да ника́кѡ се́й пче́льникъ созда́нїй твои́хъ пче́льныхъ лише́нъ, но всегда̀ преиспо́лненъ сѡ́ты ме́да бꙋ́детъ: и҆ по премно́гой бл҃госты́ни и҆ непобѣди́мѣй крѣ́пости твое́й, да ꙗ҆ви́тсѧ неподви́жимь мно́гими лꙋка́вствы, и҆ непоколеби́мь зазо́рными ѡ҆баѧ́нїи, но твое́ю всеси́льною ѡ҆гражде́нъ держа́вою, и҆ ѡ҆стѣне́нъ ѡ҆полче́нїемъ, ѿ всѧ́кагѡ кова́рства волше́бнагѡ сохране́нъ, и҆ всегда̀ въ твое́й хрⷭ҇тѐ рꙋкоѧ́ти невреди́мь пребꙋ́детъ. Твое́ бо є҆́сть, є҆́же ми́ловати и҆ сп҃са́ти ны̀ хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со ѻ҆ц҃е́мъ и҆ ст҃ы́мъ дх҃омъ, во вѣ́ки, а҆ми́нь.

И҆ кропи́тъ і҆ере́й пче́лъ и҆ ᲂу҆́лїѧ водо́ю сщ҃е́нною:

Во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь.

Посе́мъ глаго́летъ ѻ҆бы́чный дневны́й ѿпꙋ́стъ.


Комментарии для сайта Cackle