[глⷡ҇а з҃]Мл҃тва на бл҃гослове́нїе а҆́ртоса во ст҃ꙋ́ю недѣ́лю па́схи.

Принесе́нъ быва́етъ а҆́ртосъ, сі́есть хлѣ́бъ на сїѐ прїꙋгото́вленный, и҆ на не́мъ крⷭ҇тъ напи́санный ѻ҆бы́чнѡ, къ і҆ере́ю въ ѻ҆лта́рь, по соверше́нїи бж҃е́ственныѧ лїтꙋргі́и и҆ по заамвѡ́нной мл҃твѣ, ре́кшꙋ дїа́конꙋ: Гдⷭ҇ꙋ помо́лимсѧ. И҆ кли́рꙋ: Гдⷭ҇и поми́лꙋй. Чте́тъ над̾ ни́мъ і҆ере́й мл҃твꙋ сїю̀:

Бж҃е всеси́льный и҆ гдⷭ҇и вседержи́телю, и҆́же рабо́мъ твои́мъ мѡѷсе́омъ во и҆схо́дѣ і҆и҃левѣ ѿ є҆гѵ́пта, и҆ въ ѡ҆свобожде́нїи люде́й твои́хъ ѿ го́рькїѧ рабо́ты фараѡ́новы, а҆́гнца закла́ти повелѣ́лъ є҆сѝ, проѡбразꙋ́ѧ на крⷭ҇тѣ̀ закла́ннаго во́лею на́съ дѣ́лѧ а҆́гнца, взе́млющаго всегѡ̀ мі́ра грѣхѝ, возлю́бленнаго сн҃а твоего̀, гдⷭ҇а на́шего і҆и҃са хрⷭ҇та̀: ты̀ и҆ ны́нѣ, смире́ннѡ мо́лимъ тѧ̀, при́зри на хлѣ́бъ се́й, и҆ бл҃гословѝ и҆ ѡ҆ст҃ѝ є҆го̀. и҆́бо и҆ мы̀ рабѝ твоѝ въ че́сть и҆ сла́вꙋ, и҆ въ воспомина́нїе сла́внагѡ воскрⷭ҇нїѧ тогѡ́жде сн҃а твоегѡ̀ гдⷭ҇а на́шегѡ і҆и҃са хрⷭ҇та̀, и҆́мже ѿ вѣ́чныѧ рабо́ты вра́жїѧ, и҆ ѿ а҆́довыхъ нерѣши́мыхъ ᲂу҆́зъ разрѣше́нїе, свобо́дꙋ и҆ преведе́нїе ᲂу҆лꙋчи́хомъ, пред̾ твои́мъ вели́чествомъ ны́нѣ во всесвѣ́тлый се́й, пресла́вный и҆ сп҃си́тельный де́нь па́схи, се́й прино́симъ: на́съ же сего̀ приносѧ́щихъ, и҆ того̀ лобза́ющихъ, и҆ ѿ негѡ̀ вкꙋша́ющихъ, твоемꙋ̀ нбⷭ҇номꙋ бл҃гослове́нїю прича́стники бы́ти сотворѝ, и҆ всѧ́кꙋю болѣ́знь и҆ недꙋ́гъ ѿ на́съ твое́ю си́лою ѿженѝ, здра́вїе всѣ̑мъ подава́ѧ. ты́ бо є҆сѝ и҆сто́чникъ бл҃гослове́нїѧ, и҆ цѣльба́мъ пода́тель, и҆ тебѣ̀ сла́вꙋ возсыла́емъ безнача́льномꙋ ѻ҆ц҃ꙋ̀, со є҆диноро́днымъ твои́мъ сн҃омъ, и҆ прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: а҆ми́нь.

А҆́бїе же кропи́тъ а҆́ртосъ сщ҃е́нною водо́ю, глаго́лѧ:

Бл҃гословлѧ́етсѧ и҆ ѡ҆сщ҃а́етсѧ а҆́ртосъ се́й, ѡ҆кропле́нїемъ воды̀ сеѧ̀ сщ҃е́нныѧ, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь. Три́жды.

И҆ посе́мъ и҆схо́дитъ, и҆ полага́етъ є҆го̀ на а҆нало́гїи, лю́дїе же, прїе́млюще а҆нті́дѡръ, лобза́ютъ а҆́ртосъ.