[глⷡ҇а а҃і] Послѣ́дованїе над̾ пе́щїю.

Твори́тъ сщ҃е́нникъ ѡ҆сщ҃е́нїе воды̀ ма́лое.

По ѡ҆сщ҃е́нїи же глаго́летъ мл҃твы:

Гдⷭ҇ꙋ помо́лимсѧ.

Бж҃е вѣ́чный, и҆́же се́дмь седмери́цею разжже́ннꙋю пе́щь, и҆ пла́мень и҆́же въ вавѷлѡ́нѣ на ро́сꙋ преложи́лъ є҆сѝ, и҆ вве́ржєнныѧ въ ню̀ ѿ царѧ̀ навꙋходоно́сора, ст҃ы̑ѧ трѝ ѻ҆́троки, а҆на́нїю, а҆за́рїю и҆ мїсаи́ла, цѣ́лы сохрани́вый: са́мъ бл҃гословѝ и҆ пе́щь сїю̀ вели́кїѧ ра́ди твоеѧ̀ млⷭ҇ти, и҆ бл҃гословѝ въ не́й дѣла̀ рꙋ́къ рабѡ́въ твои́хъ, и҆ бл҃гопоспѣшѝ ѧ҆̀ бл҃годѣѧ́нїемъ твои́мъ, и҆ и҆спра́ви ѧ҆̀ по мно́жествꙋ щедро́тъ твои́хъ: мл҃твами пречⷭ҇тыѧ влⷣчцы на́шеѧ бцⷣы, и҆ приснодв҃ы мр҃і́и: си́лою чⷭ҇тна́гѡ и҆ животворѧ́щагѡ крⷭ҇та̀: предста́тельствомъ превели́кихъ чинонача̑льникъ мїхаи́ла и҆ гаврїи́ла, и҆ всѣ́хъ нбⷭ҇ныхъ си́лъ безпло́тныхъ: чⷭ҇тна́гѡ сла́внагѡ прⷪ҇ро́ка, прⷣте́чи и҆ крⷭ҇ти́телѧ і҆ѡа́нна: ст҃ы́хъ сла́вныхъ и҆ всехва́льныхъ а҆пⷭ҇лъ: ст҃а́гѡ сщ҃енномч҃нка кѷпрїа́на: и҆́же во ст҃ы́хъ ѻ҆тца̀ на́шегѡ нїкола́а, а҆рхїепі́скопа мѷрлѷкі́йскагѡ чꙋдотво́рца, и҆ всѣ́хъ ст҃ы́хъ.

Ꙗ҆́кѡ ты̀ є҆сѝ бл҃гословлѧ́ѧй, и҆ ѡ҆сщ҃а́ѧй всѧ́чєскаѧ бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ, и҆ при́снѡ, и҆ во вѣ́ки вѣкѡ́въ, а҆ми́нь.

Мл҃тва и҆на́ѧ:

Влⷣко гдⷭ҇и бж҃е на́шъ, и҆́же въ высо́кихъ живы́й, и҆ на смирє́нныѧ призира́ѧй: бл҃гослови́вый до́мъ лава́новъ вхо́домъ і҆а́кѡвлимъ, и҆ до́мъ пентефрі́инъ вхо́домъ і҆ѡ́сифовымъ: бл҃гослови́вый до́мъ а҆ви́довъ вхо́домъ ковче́га: и҆́же вочл҃вѣ́ченїемъ хрⷭ҇та̀ твоегѡ̀, сп҃се́нїе бы́въ до́мꙋ закхе́овꙋ: са́мъ бл҃гословѝ пе́щь сїю̀ и҆ дѣ́йствꙋющыѧ ю҆̀, твои́мъ стра́хомъ соблюдѝ, и҆ невреди́мы и҆̀хъ ѿ сопротиволежа́щихъ сохранѝ, и҆ твоѐ бл҃гослове́нїе съ высоты̀ жили́ща твоегѡ̀ низпослѝ и҆̀мъ, и҆ бл҃гословѝ, и҆ ᲂу҆мно́жи дѣла̀ рꙋ́къ и҆́хъ, да всегда̀ бл҃года́рнѡ сла́вимъ всест҃о́е и҆́мѧ твоѐ, ѻ҆ц҃а̀, и҆ сн҃а и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Та́же глаго́летъ проше́нїе:

Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.

Гдⷭ҇и поми́лꙋй, три́жды.

Є҆щѐ мо́лимсѧ ѡ҆ ми́лости, жи́зни, ми́рѣ, здра́вїи, сп҃се́нїи, посѣще́нїи, проще́нїи грѣхѡ́въ рабѡ́въ твои́хъ и҆́мⷬ҇къ, и҆ ѡ҆ є҆́же бл҃гослови́тисѧ и҆ ᲂу҆мно́житисѧ дѣлѡ́мъ рꙋ́къ трꙋжда́ющихсѧ ѡ҆ пе́щи се́й, мо́лимъ ти сѧ гдⷭ҇и, ᲂу҆слы́ши и҆ поми́лꙋй.

Гдⷭ҇и поми́лꙋй, три́жды.

Оу҆слы́ши ны̀ бж҃е сп҃си́телю на́шъ, ᲂу҆пова́нїе всѣ́хъ концє́въ землѝ, и҆ сꙋ́щихъ въ мо́ри дале́че, и҆ млⷭ҇тивъ, млⷭ҇тивъ бꙋ́ди влⷣко ѡ҆ грѣсѣ́хъ на́шихъ, и҆ поми́лꙋй ны̀: млⷭ҇тивъ бо и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

И҆ ѡ҆кроплѧ́етъ пе́щь и҆ сꙋ́щыѧ та́мѡ. Та́же твори́тъ ѿпꙋ́стъ.


Комментарии для сайта Cackle

Открыта запись на православный интернет-курс