[глⷡ҇а є҃і] Мл҃тва ѡ҆ копа́нїи кла́дѧзѧ.

Гдⷭ҇и бж҃е на́шъ вседержи́телю, и҆ всеси́льне, творѧ́й всѧ̑ и҆ претворѧ́ѧй, то́чїю є҆́же хотѣ́ти: и҆́же въ непрохо́дныхъ прохо́дъ ѡ҆брѣта́ѧй неизрече́нною и҆ непостижи́мою мꙋ́дростїю: и҆́же ѿ сꙋха́гѡ ка́мене вѡ́днымъ пода́вый тещѝ пото́кѡмъ, и҆ жа́ждꙋщыѧ лю́ди твоѧ̑ насы́тивый: са́мъ и҆ ны́нѣ влⷣко всѣ́хъ, ᲂу҆слы́ши моле́нїе на́съ недосто́йныхъ рабѡ́въ твои́хъ, и҆ да́рꙋй на́мъ во́дꙋ на се́мъ мѣ́стѣ, сла́дкꙋю же и҆ вкꙋ́снꙋ, дово́льнꙋ ᲂу҆́бѡ къ потре́бѣ невреди́тельнꙋю же ко прїѧ́тїю: ꙗ҆́кѡ да и҆ въ се́мъ сла́вимъ прест҃о́е и҆ великолѣ́пое и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

[глⷡ҇а ѕ҃і] Мл҃тва над̾ кла́дѧземъ но́вымъ.

Зижди́телю во́дъ, и҆ содѣ́телю всѣ́хъ, гдⷭ҇и бж҃е вседержи́телю, всѧ̑ сотвори́вый и҆ претворѧ́ѧй, ты̀ са́мъ ѡ҆ст҃ѝ во́дꙋ сїю̀: послѝ на ню̀ ст҃ꙋ́ю твою̀ си́лꙋ, на всѧ́кꙋ сопроти́внꙋ дѣ́тель, и҆ да́ждь всѣ̑мъ прїе́млющымъ ѿ неѧ̀, питїѧ̀ ра́ди, и҆лѝ ᲂу҆мове́нїѧ ра́ди, здра́вїе дꙋшѝ и҆ тѣ́лꙋ, на и҆змѣне́нїе всѧ́кїѧ стра́сти, и҆ всѧ́кагѡ недꙋ́га: ꙗ҆́кѡ да бꙋ́детъ и҆сцѣле́нїѧ вода̀ и҆ поко́ѧ, всѣ̑мъ прикаса́ющымсѧ къ не́й, и҆ прїе́млющымъ ю҆̀.

Ꙗ҆́кѡ тебѣ̀ подоба́етъ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

[глⷡ҇а з҃і] Чи́нъ быва́емый, а҆́ще слꙋчи́тсѧ чесомꙋ̀ скве́рномꙋ ꙗ҆ковꙋ́любо впа́сти въ кла́дѧзь водны́й.

Подоба́етъ пе́рвѣе вы́черпати и҆з̾ кла́дѧзѧ ка́дей м҃, и҆ и҆злїѧ́ти во́нъ. Та́же возже́гъ сщ҃е́нникъ свѣщы̀, и҆ взе́мъ кади́льницꙋ, кади́тъ ѻ҆́крестъ кла́дѧзѧ. Та́же влага́етъ во́дꙋ ст҃ы́хъ бг҃оѧвле́нїй крⷭ҇тови́днѡ, три́жды.

И҆ та́кѡ ста́въ къ восто́кꙋ, мо́литсѧ глаго́лѧ:

Гдⷭ҇ꙋ помо́лимсѧ.

Гдⷭ҇и бж҃е си́лъ, всѧ̑ добра̑ ѕѣлѡ̀ сотвори́вый, ѡ҆чища́ѧй и҆́менемъ твои́мъ всѧ́кꙋю скве́рнꙋ и҆ нечистотꙋ̀, и҆ претвори́вый ѡ҆сщ҃а́ѧй всѧ̑: са́мъ и҆ ны́нѣ влⷣко, прїидѝ въ настоѧ́щїй ча́съ ѡ҆́бразомъ крⷭ҇та̀ твоегѡ̀, и҆ ѡ҆чи́сти кла́дѧзь се́й ѿ ѡ҆брѣ́тшїѧсѧ є҆мꙋ̀ нечистоты̀, и҆ ѿ впа́дшагѡ во́нь скве́рнагѡ, и҆лѝ га́да, снизходѧ̀ несоверше́ннѣй мы́сли на́шей, и҆ не́мощи помышле́нїй, и҆ да не ѡ҆сꙋ́диши на́съ до́брыхъ ѕѣлѡ̀ не вмѣща́ющыѧ: но ѡ҆чи́сти на́съ ѿ всѧ́кїѧ скве́рны пло́ти и҆ дꙋ́ха: и҆ ѡ҆ст҃ѝ во́дꙋ сїю̀ дх҃омъ твои́мъ ст҃ы́мъ.

Ꙗ҆́кѡ ты̀ є҆сѝ ѡ҆сщ҃е́нїе на́ше, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Гдⷭ҇ꙋ помо́лимсѧ. Гдⷭ҇и поми́лꙋй.

Бж҃е вели́кїй и҆ ди́вный, неисповѣди́мою твое́ю бл҃гостїю, и҆ бога́тымъ про́мысломъ стро́ѧй человѣ́ческїй живо́тъ, и҆ мїрска̑ѧ на́мъ дарова́вый бл҃га̑ѧ твоѧ̑: и҆́же го́рькꙋю во́дꙋ при мѡѷсе́и лю́демъ въ сла́дость претвори́вый, и҆ врє́дныѧ во́ды при є҆лїссе́и со́лїю и҆сцѣли́вый: и҆́же а҆пⷭ҇лꙋ твоемꙋ̀ петрꙋ̀ видѣ́нїемъ законоположи́вый, ничто́же мнѣ́ти скве́рно, и҆лѝ нечи́сто: са́мъ чл҃вѣколю́бче, ѡ҆чи́сти во́дꙋ сїю̀ знаменова́нїемъ ѡ҆́браза крⷭ҇та̀ твоегѡ̀ ѿ всѧ́кїѧ скве́рны, и҆ ѡ҆ст҃ѝ ю҆̀ дх҃омъ твои́мъ ст҃ы́мъ, во є҆́же бы́ти є҆́й чи́стѣй причаща́ющымсѧ и҆з̾ неѧ̀.

Ꙗ҆́кѡ ты̀ є҆сѝ бг҃ъ на́шъ, бл҃гословлѧ́ѧй и҆ ѡ҆сщ҃а́ѧй всѧ́чєскаѧ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

И҆ ѿпꙋ́стъ.


Комментарии для сайта Cackle