[глⷡ҇а к҃] Мл҃тва запреща́тельнаѧ ст҃а́гѡ васі́лїа, над̾ стра́ждꙋщими ѿ де́монѡвъ.

Трист҃о́е. По Ѻ҆́ч҃е на́шъ: Гдⷭ҇и поми́лꙋй, в҃і. Прїиди́те, поклони́мсѧ:

Та́же глаго́летъ мл҃твꙋ сїю̀:

Бг҃ъ богѡ́въ и҆ гдⷭ҇ь господе́й, ѻ҆́гненныхъ чинѡ́въ творе́цъ и҆ безпло́тныхъ си́лъ хитре́цъ, и҆ нбⷭ҇ныхъ и҆ наднебе́сныхъ хꙋдо́жникъ, є҆го́же не ви́дѣ ни є҆ди́нъ же ѿ человѣ̑къ, ни ви́дѣти мо́жетъ, є҆гѡ́же ᲂу҆боѧ́сѧ всѧ̀ тва́рь: разгордѣ́вшаго и҆ногда̀ а҆рхїстрати́га, и҆ съ свое́ю є҆гѡ̀ слꙋ́жбою ѡ҆слꙋша́нїемъ ѿве́ргшасѧ, све́ргїй на зе́млю, и҆ ѿстꙋ́пльшыѧ съ ни́мъ а҆́ггелы, бѣ́сы ѕло́бою бы́вшыѧ, во тьмꙋ̀ глꙋбины̀ преиспо́днїѧ преда́вый: да́ждь заклина́нїе моѐ, ѡ҆ стра́шномъ и҆́мени твое́мъ соверша́емо, гро́зно бы́ти є҆мꙋ̀ влады́цѣ лꙋка́вствїѧ, и҆ всѣ̑мъ споспѣ́шникѡмъ є҆гѡ̀, спа́дшымъ съ ни́мъ съ вы́шнїѧ свѣ́тлости, и҆ ѡ҆братѝ ѧ҆̀ на бѣжа́нїе, и҆ заповѣ́ждь є҆мꙋ̀ ѿитѝ ѿтꙋ́дꙋ, дабы̀ ктомꙋ̀ ничто́же вре́дно во ѡ҆́бразѣхъ знаменова́емыхъ содѣ́ѧлъ: но да прїи́мꙋтъ крѣ́пость себѣ̀ знаменова́емїи держа́внꙋю, настꙋпа́ти на ѕмїю̀, и҆ на скорпі́ю, и҆ на всю̀ си́лꙋ вра́жїю, и҆̀мже є҆сѝ повелѣ́лъ. Твое́ бо пое́тсѧ и҆ велича́етсѧ ѿ всѧ́кагѡ дыха́нїѧ и҆ сла́витсѧ со стра́хомъ прест҃о́е и҆́мѧ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.


Комментарии для сайта Cackle