[глⷡ҇а г҃і] Послѣ́дованїе ст҃а́гѡ є҆ле́а,
пѣва́емое ѿ седмѝ сщ҃е́нникѡвъ, собра́вшихсѧ въ цр҃кви и҆лѝ въ домꙋ̀. Поставлѧ́етсѧ столе́цъ, на не́мже блю́до со пшени́цею, и҆ верхꙋ̀ пшени́цы канди́ло пра́здное. ѻ҆́крестъ же пшени́цы водрꙋжа́ютъ во пшени́цꙋ се́дмь стрꙋчє́цъ ѡ҆бви́тыхъ бꙋма́гою къ пома́занїю, и҆ ст҃о́е є҆ѵⷢ҇лїе: и҆ даю́тсѧ сщ҃е́нникѡмъ всѣ́мъ свѣщы̀. Ста́вше же ѻ҆́крестъ стола̀, ѡ҆блече́ни всѝ въ фелѡ́ни: взе́млетъ пе́рвый сщ҃е́нникѡвъ кади́льницꙋ съ ѳѷмїа́момъ, и҆ кади́тъ ѻ҆́крестъ стола̀ є҆ле́й на не́мъ сꙋ́щїй, и҆ всю̀ цр҃ковь, и҆лѝ до́мъ, и҆ лю́ди: и҆ ста́въ пред̾ столо́мъ, зрѧ̀ къ восто́кѡмъ, начина́етъ: Бл҃гослове́нъ бг҃ъ на́шъ: И҆ трист҃о́е. Прест҃а́ѧ трⷪ҇це: Ѻ҆́ч҃е на́шъ: Ꙗ҆́кѡ твоѐ є҆́сть црⷭ҇тво: Гдⷭ҇и поми́лꙋй, в҃і.
Прїиди́те поклони́мсѧ: три́жды.
И҆ ѱало́мъ рм҃в:
Гдⷭ҇и, ᲂу҆слы́ши мл҃твꙋ мою̀, внꙋшѝ моле́нїе моѐ во и҆́стинѣ твое́й, ᲂу҆слы́ши мѧ̀ въ пра́вдѣ твое́й. И҆ не вни́ди въ сꙋ́дъ съ рабо́мъ твои́мъ, ꙗ҆́кѡ не ѡ҆правди́тсѧ пред̾ тобо́ю всѧ́къ живы́й. Ꙗ҆́кѡ погна̀ вра́гъ дꙋ́шꙋ мою̀, смири́лъ є҆́сть въ зе́млю живо́тъ мо́й: посади́лъ мѧ̀ є҆́сть въ те́мныхъ, ꙗ҆́кѡ мє́ртвыѧ вѣ́ка. И҆ ᲂу҆ны̀ во мнѣ̀ дꙋ́хъ мо́й, во мнѣ̀ смѧте́сѧ се́рдце моѐ. Помѧнꙋ́хъ дни̑ дрє́внїѧ: поꙋчи́хсѧ во всѣ́хъ дѣ́лѣхъ твои́хъ, въ творе́нїихъ рꙋкꙋ̀ твоє́ю поꙋча́хсѧ. Воздѣ́хъ къ тебѣ̀ рꙋ́цѣ моѝ, дꙋша̀ моѧ̀ ꙗ҆́кѡ землѧ̀ безво́днаѧ тебѣ̀. Ско́рѡ ᲂу҆слы́ши мѧ̀ гдⷭ҇и, и҆счезѐ дꙋ́хъ мо́й: не ѿвратѝ лица̀ твоегѡ̀ ѿ менѐ, и҆ ᲂу҆подо́блюсѧ низходѧ́щымъ въ ро́въ. Слы́шанꙋ сотворѝ мнѣ̀ заꙋ́тра млⷭ҇ть твою̀, ꙗ҆́кѡ на тѧ̀ ᲂу҆пова́хъ: скажѝ мнѣ̀ гдⷭ҇и пꙋ́ть, во́ньже пойдꙋ̀, ꙗ҆́кѡ къ тебѣ̀ взѧ́хъ дꙋ́шꙋ мою̀. И҆зми́ мѧ ѿ вра̑гъ мои́хъ гдⷭ҇и, къ тебѣ̀ прибѣго́хъ. Наꙋчи́ мѧ твори́ти во́лю твою̀, ꙗ҆́кѡ ты̀ є҆сѝ бг҃ъ мо́й: дх҃ъ тво́й бл҃гі́й наста́витъ мѧ̀ на зе́млю пра́вꙋ. И҆́мене твоегѡ̀ ра́ди, гдⷭ҇и, живи́ши мѧ̀: пра́вдою твое́ю и҆зведе́ши ѿ печа́ли дꙋ́шꙋ мою̀. И҆ млⷭ҇тїю твое́ю потреби́ши врагѝ моѧ̑, и҆ погꙋби́ши всѧ̑ стꙋжа́ющыѧ дꙋшѝ мое́й: ꙗ҆́кѡ а҆́зъ ра́бъ тво́й є҆́смь.
Сла́ва, и҆ ны́нѣ: А҆ллилꙋ́їа, три́жды.
Дїа́конъ же є҆ктенїю̀:
Па́ки и҆ па́ки ми́ромъ гдⷭ҇ꙋ помо́лимсѧ.
Застꙋпѝ, сп҃сѝ, поми́лꙋй:
Прест҃ꙋ́ю, пречⷭ҇тꙋю, пребл҃гослове́ннꙋю:
Сщ҃е́нникъ: Ꙗ҆́кѡ подоба́етъ тебѣ̀:
Ли́къ: а҆ми́нь.
А҆́бїе же пою́тъ, А҆ллилꙋ́їа, на гла́съ ѕ҃.
Сті́хъ а҃: Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Сті́хъ в҃: Поми́лꙋй мѧ̀ гдⷭ҇и, ꙗ҆́кѡ не́мощенъ є҆́смь.
Та́же тропарѝ:
Поми́лꙋй на́съ гдⷭ҇и, поми́лꙋй на́съ, всѧ́кагѡ бо ѿвѣ́та недоꙋмѣ́юще, сїю́ ти мл҃твꙋ ꙗ҆́кѡ влⷣцѣ грѣ́шнїи прино́симъ: поми́лꙋй на́съ.
Сла́ва: Гдⷭ҇и поми́лꙋй на́съ, на тѧ́ бо ᲂу҆пова́хомъ, не прогнѣ́вайсѧ на ны̀ ѕѣлѡ̀, нижѐ помѧнѝ беззако́нїй на́шихъ: но при́зри и҆ ны́нѣ ꙗ҆́кѡ бл҃гоꙋтро́бенъ, и҆ и҆зба́ви ны̀ ѿ врагѡ́въ на́шихъ. ты́ бо є҆сѝ бг҃ъ на́шъ, и҆ мы̀ лю́дїе твоѝ, всѝ дѣла̀ рꙋкꙋ̀ твоє́ю, и҆ и҆́мѧ твоѐ призыва́емъ.
И҆ ны́нѣ: Млⷭ҇рдїѧ двє́ри ѿве́рзи на́мъ бл҃гослове́ннаѧ бцⷣе, надѣ́ющїисѧ на тѧ̀ да не поги́бнемъ, но да и҆зба́вимсѧ тобо́ю ѿ бѣ́дъ: ты́ бо є҆сѝ сп҃се́нїе ро́да хрⷭ҇тїа́нскагѡ.
Посе́мъ Ѱало́мъ н҃: Поми́лꙋй мѧ̀ бж҃е:
И҆ канѡ́нъ, є҆гѡ́же краестро́чїе: Мл҃тва є҆ле́а, пѣ́нїе а҆рсе́нїево. Гла́съ д҃:
Пѣ́снь а҃.
І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Є҆ле́емъ бл҃гоꙋтро́бїѧ влⷣко, ᲂу҆тѣша́ѧй при́снѡ дꙋ́шы, кꙋ́пнѡ и҆ тѣлеса̀ человѣ́чєскаѧ, и҆ хранѧ́й є҆ле́емъ вѣ̑рныѧ: са́мъ и҆ ны́нѣ ᲂу҆ще́дри є҆ле́емъ пристꙋпа́ющыѧ къ тебѣ̀.
Твоеѧ̀ млⷭ҇ти влⷣко, полна̀ є҆́сть всѧ̀ землѧ̀: тѣ́мже є҆ле́емъ бж҃е́ственнымъ твои́мъ чⷭ҇тны́мъ помазꙋ́еми дне́сь, є҆́же па́че ᲂу҆ма̀ твое́й млⷭ҇ти, вѣ́рнѡ про́симъ тѧ̀, пода́тисѧ на́мъ.
Сла́ва: Пома́занїе свѧще́нное твоѐ чл҃вѣколю́бче, а҆пⷭ҇толѡмъ твои̑мъ на немощствꙋ́ющыѧ рабы̑ твоѧ̑ соверша́ти млⷭ҇тивнѡ заповѣ́давый: тѣ́хъ мольба́ми всѧ̑ печа́тїю твое́ю поми́лꙋй.
И҆ ны́нѣ: Є҆ди́на ми́ра пꙋчи́нꙋ чⷭ҇таѧ ро́ждшаѧ, ꙗ҆́же къ бг҃ꙋ мл҃твами твои́ми при́снѡ, недꙋ́гѡвъ и҆ скорбе́й твоего̀ раба̀ и҆зба́ви, ꙗ҆́кѡ да непреста́ннѡ возвели́читъ тѧ̀.
Пѣ́снь г҃.
І҆рмо́съ: Весели́тсѧ ѡ҆ тебѣ̀ цр҃ковь твоѧ̀ хрⷭ҇тѐ, зовꙋ́щи: ты̀ моѧ̀ крѣ́пость гдⷭ҇и, и҆ прибѣ́жище и҆ ᲂу҆твержде́нїе.
Ты̀ є҆ди́нъ сы́й ди́вный въ человѣ́цѣхъ вѣ́рныхъ, млⷭ҇тивый, болѧ́щемꙋ лю́тѣ, да́ждь хрⷭ҇тѐ бл҃года́ть твою̀ свы́ше.
Є҆ле́йный сꙋче́цъ и҆ногда̀, ко ᲂу҆мале́нїю пото́па, бж҃е́ственнымъ твои́мъ показа́вый манове́нїемъ гдⷭ҇и, сп҃сѝ млⷭ҇тїю стра́ждꙋщаго.
Сла́ва: Свѣще́ю бж҃е́ственнагѡ свѣ́та, въ млⷭ҇ти твое́й хрⷭ҇тѐ просвѣтѝ пома́занїемъ, и҆ ны́нѣ вѣ́рою къ млⷭ҇ти твое́й тща́щагосѧ.
И҆ ны́нѣ: При́зри бл҃гопрїѧ́тнѡ ма́ти всѣ́хъ творца̀ свы́ше, и҆ го́рькое ѡ҆ѕлобле́нїе разрѣшѝ недꙋ́гꙋющагѡ, мл҃твами твои́ми.
Сѣда́ленъ, гла́съ и҃.
Подо́бенъ: Па́стырскаѧ свирѣ́ль:
Ꙗ҆́кѡ бж҃е́ственнаѧ рѣка̀ млⷭ҇ти сы́й, ꙗ҆́кѡ бе́здна мно́гагѡ млⷭ҇рдїѧ ще́дре, покажѝ твоеѧ̀ млⷭ҇ти бж҃е́ствєнныѧ стрꙋи̑, и҆ всѣ́хъ и҆сцѣлѝ: и҆сточѝ чꙋде́съ и҆сто́чники незави́стнѡ, и҆ ѡ҆мы́й всѣ́хъ: къ къ тебѣ́ бо при́снѡ притека́юще, те́плѣ бл҃года́ть и҆спроша́емъ.
Дрꙋгі́й, гла́съ д҃. Подо́бенъ: Вознесы́йсѧ:
Врачꙋ̀ и҆ помо́щниче сꙋ́щихъ въ болѣ́знехъ, и҆зба́вителю же и҆ сп҃се сꙋ́щихъ въ недꙋ́зѣхъ: са́мъ всѣ́хъ влⷣко и҆ гдⷭ҇и, да́рꙋй и҆сцѣле́нїе недꙋ́гꙋющемꙋ рабꙋ̀ твоемꙋ̀, ᲂу҆ще́дри, поми́лꙋй многопрегрѣши́вшаго, и҆ прегрѣше́нїй и҆зба́ви хрⷭ҇тѐ, ꙗ҆́кѡ да сла́витъ бж҃е́ственнꙋю си́лꙋ твою̀.
Пѣ́снь д҃.
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й гдⷭ҇и.
Ꙗ҆́кѡ нетлѣ́нное мѵ́ро сп҃се сы́й, и҆стощи́вшеесѧ твое́ю бл҃года́тїю, и҆ мі́ръ ѡ҆чища́ющее, ᲂу҆ще́дри и҆ поми́лꙋй бж҃е́ственнѣ, вѣ́рою стрꙋ́пы тѣлє́сныѧ помазꙋ́ющагѡ.
Ти́хостїю печа́ти твоеѧ̀ млⷭ҇ти, ны́нѣ чꙋ̑вствїѧ влⷣко зна́менавъ твои́хъ рабѡ́въ, непреходи́мь, непристꙋ́пенъ вхо́дъ сотворѝ всѣ̑мъ сопроти̑внымъ си́ламъ.
Сла́ва: Призыва́ти повелѣва́ѧй немощствꙋ́ющымъ сщ҃еннодѣйстви́тели бж҃е́ственныѧ твоѧ̑, и҆ си́хъ мл҃твою и҆ пома́занїемъ є҆ле́а твоегѡ̀ чл҃вѣколю́бче сп҃са́тисѧ, сп҃сѝ твое́ю млⷭ҇тїю стра́ждꙋщаго.
И҆ ны́нѣ: Бцⷣе приснодв҃о прест҃а́ѧ, покро́ве крѣ́пкїй и҆ храни́тельнице, приста́нище же и҆ стѣно̀, лѣ́ствице и҆ предгра́дїе, поми́лꙋй, ᲂу҆ще́дри болѧ́щаго, къ тебѣ́ бо и҆ є҆ди́ной прибѣжѐ.
Пѣ́снь є҃.
І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ, вѣ́рою воспѣва́ющыѧ тѧ̀.
Сы́й бл҃же, млⷭ҇ти бе́здна, поми́лꙋй млⷭ҇тиве твое́ю бж҃е́ственною млⷭ҇тїю стра́ждꙋщаго, ꙗ҆́кѡ бл҃гоꙋтро́бенъ.
Дꙋ́шы на́шѧ хрⷭ҇тѐ и҆ тѣлеса̀, свы́ше печа́ти твоеѧ̀ бж҃е́ственнымъ воѡбраже́нїемъ ѡ҆свѧти́въ несказа́ннѡ, рꙋко́ю твое́ю всѣ́хъ и҆сцѣлѝ.
Сла́ва: Неизрече́нною твое́ю любо́вїю пребл҃гі́й гдⷭ҇и, прїи́мый блꙋдни́цею сꙋ́щее ѿ мѵ́ра пома́занїе, ᲂу҆ще́дри раба̀ твоего̀.
И҆ ны́нѣ: Всепѣ́таѧ, чⷭ҇таѧ, пребл҃га́ѧ влⷣчце, поми́лꙋй бж҃е́ственнымъ помазꙋ́ющихсѧ є҆ле́емъ, и҆ сп҃сѝ раба̀ твоего̀.
Пѣ́снь ѕ҃.
І҆рмо́съ: Пожрꙋ̀ тѝ со гла́сомъ хвале́нїѧ гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.
Словесы̀ твои́ми, є҆ле́емъ показа́вый чл҃вѣколю́бче, въ царѣ́хъ пома́занїе, и҆ а҆рхїере́и сїѐ соверши́вый: печа́тїю твое́ю и҆ стра́ждꙋщаго сп҃сѝ, ꙗ҆́кѡ бл҃гоꙋтро́бенъ.
Прїѡбще́нїе да не ѿ го́рькихъ бѣсѡ́въ прико́снетсѧ, пома́занїемъ бж҃е́ственнымъ зна́менаномꙋ сп҃се чꙋ́вствы: но покро́вомъ ѡ҆бстѣнѝ сего̀ сла́вы твоеѧ̀.
Сла́ва: Пода́ждь рꙋ́кꙋ твою̀ съ высоты̀ чл҃вѣколю́бче, и҆ тво́й є҆ле́й сп҃се ѡ҆ст҃и́въ, пода́ждь рабꙋ̀ твоемꙋ̀ на здра́вїе, и҆ недꙋ́гѡвъ всѣ́хъ на и҆збавле́нїе.
И҆ ны́нѣ: Ꙗ҆ви́ласѧ є҆сѝ въ бж҃е́ственномъ твое́мъ хра́мѣ плодови́таѧ, мт҃и творца̀, ма́слина, є҆́юже и҆спо́лненъ ꙗ҆ви́сѧ мі́ръ млⷭ҇ти: тѣ́мже сп҃са́й мл҃твами ѡ҆сѧза́нїѧ твоегѡ̀ стра́ждꙋщаго.
Конда́къ, гла́съ в҃.
Подо́бенъ: Вы́шнихъ и҆щѧ̀.
Млⷭ҇ти и҆сто́чникъ сы́й пребл҃гі́й, вѣ́рою те́плою къ млⷭ҇ти неизрече́нной твое́й припа́дающыѧ бл҃гоꙋтро́бне, ѿ всѧ́кагѡ и҆зба́ви ѡ҆ѕлобле́нїѧ, и҆ тѣ́хъ недꙋ́ги взе́мъ, пода́ждь бж҃е́ственнꙋю бл҃года́ть свы́ше.
Пѣ́снь з҃.
І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀ гдⷭ҇и.
Ты̀ въ млⷭ҇ти и҆ щедро́тахъ твои́хъ сп҃се, є҆ди́не бж҃е, всѣ́хъ и҆сцѣлѧ́ѧй, стра̑сти же дꙋшє́вныѧ, и҆ тѣлє́снаѧ сокрꙋшє́нїѧ, и҆ сего̀ въ недꙋ́зѣхъ стра́ждꙋщагѡ, са́мъ и҆сцѣлѧ́ѧ ᲂу҆врачꙋ́й.
Внегда̀ пома́затисѧ є҆ле́емъ пома́занїѧ всѣ́хъ глава́мъ, пода́ждь семꙋ̀ весе́лїѧ ра́дость, млⷭ҇ть и҆́щꙋщемꙋ твоегѡ̀ и҆збавле́нїѧ хрⷭ҇тѐ, бога́тою твое́ю млⷭ҇тїю да́рꙋй гдⷭ҇и.
Сла́ва: Ме́чь є҆́сть над̾ де́мѡны, сп҃се, твоѧ̀ печа́ть: ѻ҆́гнь же попалѧ́ѧй стра̑сти дꙋшє́вныѧ, свѧще́нникѡвъ мольбы̑. тѣ́мже вѣ́рнѡ пое́мъ тѧ̀ прїе́млющїи и҆сцѣле́нїе.
И҆ ны́нѣ: Ты̀ держа́щаго го́рстїю всѧ̑, мт҃и бж҃їѧ, внꙋ́трь во чре́вѣ прїи́мши, бг҃олѣ́пнѡ, и҆ неизрече́ннѡ воплоти́вши, ѡ҆ стра́ждꙋщемъ ᲂу҆ми́лостивити сего̀ про́симъ.
Пѣ́снь и҃.
І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тели ѻ҆́троцы, взыва́юще: бл҃гослови́те всѧ̑ дѣла̀ гдⷭ҇нѧ гдⷭ҇а.
Всѧ̑ поми́лꙋй сп҃се, по вели́цѣй твое́й и҆ бж҃е́ственнѣй млⷭ҇ти: сегѡ̀ ра́ди собра́хомсѧ всѝ, та́йнѡ воѡбразꙋ́юще щедро́тъ твои́хъ приклоне́нїе, пома́занїе приносѧ́ще є҆ле́емъ, вѣ́рою твоемꙋ̀ рабꙋ̀, є҆го́же и҆ посѣтѝ.
Стрꙋѧ́ми млⷭ҇ти твоеѧ̀ хрⷭ҇тѐ и҆ пома́занїи сщ҃е́нникѡвъ твои́хъ, ѡ҆мы́й ꙗ҆́кѡ бл҃гоꙋтро́бенъ гдⷭ҇и, бѡлѣ́зни и҆ ѡ҆ѕлобле́нїе, и҆ болѣ́зней нашє́ствїѧ, въ нꙋ́ждахъ страсте́й мꙋ́чимагѡ, ꙗ҆́кѡ да сла́витъ тѧ̀ спа́ссѧ бл҃года́рственнѡ.
Сла́ва: Зна́менїе є҆́же свы́ше приклоне́нїѧ и҆ ти́хости, млⷭ҇ть бж҃е́ственнꙋю на́мъ приписꙋ́ющымъ влⷣко, не ᲂу҆далѝ твоеѧ̀ млⷭ҇ти, нижѐ пре́зри вѣ́рою при́снѡ зовꙋ́щаго: бл҃гослови́те всѧ̑ дѣла̀ гдⷭ҇нѧ гдⷭ҇а.
И҆ ны́нѣ: Пресла́вное ꙗ҆́кѡ вѣне́цъ чⷭ҇таѧ, є҆стество̀ прїѧ́тъ, бж҃е́ственное твоѐ рождество̀, врагѡ́въ сокрꙋша́ющее ѡ҆полчє́нїѧ, и҆ побѣжда́ющее держа́внѡ тѣ́хъ: сегѡ̀ ра́ди бл҃года́тей твои́хъ ра́достными вѣнча́еми свѣтлостьмѝ, тебѐ воспѣва́емъ препѣ́таѧ влⷣчце.
Пѣ́снь ѳ҃.
І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебѐ дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀ бцⷣе велича́емъ.
При́зри съ нб҃сѐ ще́дре, покажѝ твою̀ млⷭ҇ть всѣ̑мъ, да́ждь ны́нѣ застꙋпле́нїе твоѐ, и҆ крѣ́пость твою̀ пристꙋпа́ющемꙋ къ тебѣ̀, бж҃е́ственнымъ пома́занїемъ свѧще́нникѡвъ твои́хъ, чл҃вѣколю́бче.
Ви́дѣхомъ пребл҃гі́й сп҃се, ра́дꙋющесѧ бж҃е́ственный є҆ле́й приклоне́нїемъ твои́мъ бж҃е́ственнымъ па́че прича́стникѡвъ, є҆го́же прїѧ́лъ є҆сѝ, и҆ и҆з̾ѡбрази́тельнѡ препо́далъ є҆сѝ, ба́ни бж҃е́ственныѧ причаща́ющымсѧ.
Сла́ва: Оу҆ще́дри, поми́лꙋй сп҃се, и҆зба́ви ѿ лю́тыхъ, и҆ болѣ́зней: и҆зба́ви ѿ стрѣ́лъ лꙋка́вагѡ твои́хъ рабѡ́въ дꙋ́шы и҆ тѣлеса̀, ꙗ҆́кѡ млⷭ҇тивый гдⷭ҇ь, пома́занїемъ бж҃е́ственнымъ и҆сцѣлева́ѧй.
И҆ ны́нѣ: Пѣ̑нїѧ и҆ мольбы̑ дв҃о прїе́млющи твои́хъ рабѡ́въ, и҆зба́ви лю́тыхъ страсте́й и҆ болѣ́зней, мл҃твами твои́ми, на́ми пречⷭ҇таѧ бж҃е́ственномꙋ твоемꙋ̀ кро́вꙋ притека́ющаго.
Досто́йно є҆́сть:
Є҆ѯапостїла́рїй.
Подо́бенъ: Посѣти́лъ ны̀ є҆́сть:
Въ млⷭ҇ти бл҃же, при́зри твои́мъ ѻ҆́комъ на моле́нїе на́съ, сше́дшихсѧ въ хра́мъ тво́й ст҃ы́й дне́сь, пома́зати бж҃е́ственнымъ є҆ле́емъ недꙋ́гꙋющаго раба̀ твоего̀.
Та́же стїхи̑ры, гла́съ д҃.
Подо́бенъ: Да́лъ є҆сѝ зна́менїе:
Да́лъ є҆сѝ бл҃года́ть твою̀, твои́ми бл҃гопремѣни́телю а҆пⷭ҇лы чл҃вѣколю́бче, є҆ле́емъ ст҃ы́мъ твои́мъ цѣли́ти всѣ́хъ ꙗ҆́звы же и҆ недꙋ́ги: тѣ́мже къ є҆ле́ю твоемꙋ̀ вѣ́рнѡ пристꙋпа́ющаго, и҆ ны́нѣ ꙗ҆́кѡ бл҃гоꙋтро́бенъ ѡ҆свѧтѝ, поми́лꙋй, ѿ всѧ́кагѡ недꙋ́га ѡ҆чи́сти, и҆ пи́щи нетлѣ́нныѧ твоеѧ̀ сподо́би, гдⷭ҇и.
При́зри непостижи́ме съ нб҃сѐ, ꙗ҆́кѡ бл҃гоꙋтро́бенъ, рꙋко́ю неви́димою твое́ю зна́менавъ чл҃вѣколю́бче на̑ша чꙋ̑вства, є҆ле́емъ твои́мъ бж҃е́ственнымъ, притека́ющемꙋ къ тебѣ̀ вѣ́рнѡ, и҆ просѧ́щемꙋ прегрѣше́нїй ѡ҆ставле́нїе да́рꙋй, и҆ и҆сцѣле́нїе дꙋшѝ и҆ тѣ́лꙋ, да любо́вїю просла́витъ тѧ̀, велича́ѧ держа́вꙋ твою̀.
Пома́занїемъ є҆ле́а твоегѡ̀, и҆ сщ҃е́нникѡвъ чл҃вѣколю́бче ѡ҆сѧза́нїемъ, раба̀ твоего̀ ѡ҆свѧтѝ свы́ше, недꙋ́гѡвъ свободѝ, дꙋшє́вныѧ же сквє́рны ѡ҆чи́сти, ѡ҆мы́й сп҃се, и҆ многоплете́нныхъ собла́знѡвъ и҆зба́ви: болѣ̑зни ᲂу҆тишѝ, ѡ҆бстоѧ́нїе ѿженѝ и҆ скѡ́рби потребѝ, ꙗ҆́кѡ ще́дръ и҆ бл҃гоꙋтро́бенъ.
Сла́ва, и҆ ны́нѣ, бг҃оро́диченъ: Тебѐ чистѣ́йшꙋю цр҃е́вꙋ пала́тꙋ молю̀ многопѣ́таѧ, ᲂу҆́мъ мо́й ѡ҆чи́сти ѡ҆скверне́нный всѧ́кими грѣха́ми, и҆ жили́ще кра́сное пребж҃е́ственныѧ трⷪ҇цы сотворѝ, ꙗ҆́кѡ да си́лꙋ твою̀ и҆ безмѣ́рнꙋю млⷭ҇ть велича́ю сп҃са́емый, непотре́бный ра́бъ тво́й.
Та́же, Трист҃о́е. Прест҃а́ѧ трⷪ҇це: По Ѻ҆́ч҃е на́шъ: Ꙗ҆́кѡ твоѐ є҆́сть црⷭ҇тво:
Та́же тропа́рь, гла́съ д҃: Ско́рый въ застꙋпле́нїи є҆ди́нъ сы́й хрⷭ҇тѐ, ско́рое свы́ше покажѝ посѣще́нїе стра́ждꙋщемꙋ рабꙋ̀ твоемꙋ̀, и҆зба́ви недꙋ́гѡвъ, и҆ го́рькихъ болѣ́зней: воздви́гни во є҆́же пѣ́ти тѧ̀ и҆ сла́вити непреста́ннѡ, мл҃твами бцⷣы, є҆ди́не чл҃вѣколю́бче.
По си́хъ же дїа́конъ, и҆лѝ пе́рвый ѿ сщ҃е́нникѡвъ, є҆ктенїю̀ сїю̀:
Ми́ромъ гдⷭ҇ꙋ помо́лимсѧ:
Ѡ҆ свы́шнѣмъ ми́рѣ:
Ѡ҆ ми́рѣ всегѡ̀ мі́ра:
Ѡ҆ ст҃ѣ́мъ хра́мѣ се́мъ, и҆ съ вѣ́рою:
Ѡ҆ є҆́же бл҃гослови́тисѧ є҆ле́ю семꙋ̀ си́лою и҆ дѣ́йствомъ и҆ наи́тїемъ ст҃а́гѡ дх҃а, гдⷭ҇ꙋ помо́лимсѧ.
Ѡ҆ рабѣ̀ бж҃їи, (и҆́мⷬ҇къ), и҆ ѡ҆ є҆́же въ бз҃ѣ посѣще́нїи є҆гѡ̀, и҆ є҆́же прїитѝ на него̀ бл҃года́ти ст҃а́гѡ дх҃а, гдⷭ҇ꙋ помо́лимсѧ.
Ѡ҆ є҆́же и҆зба́витисѧ є҆мꙋ̀ и҆ на́мъ ѿ всѧ́кїѧ ско́рби, гнѣ́ва и҆ нꙋ́жды:
Застꙋпѝ, сп҃сѝ, поми́лꙋй, и҆ сохранѝ є҆го̀ и҆ на́съ бж҃е:
Прест҃ꙋ́ю, пречⷭ҇тꙋю:
[зрѝ] Та́же глаго́летъ пе́рвый ѿ сщ҃е́нникѡвъ мл҃твꙋ є҆ле́а над̾ канди́ломъ. Вѣ́домо бꙋ́ди, ꙗ҆́кѡ въ вели́цѣй цр҃кви, вмѣ́стѡ воды̀, вїно̀ въ канди́ло мл҃твома́слїѧ влага́ютъ.
Гдⷭ҇ꙋ помо́лимсѧ. Гдⷭ҇и поми́лꙋй.
Гдⷭ҇и, млⷭ҇тїю и҆ щедро́тами твои́ми и҆сцѣлѧ́ѧй сокрꙋшє́нїѧ дꙋ́шъ и҆ тѣле́съ на́шихъ: са́мъ влⷣко, ѡ҆свѧтѝ є҆ле́й се́й, ꙗ҆́коже бы́ти помазꙋ́ющымсѧ ѿ негѡ̀ во и҆сцѣле́нїе: и҆ въ премѣне́нїе всѧ́кїѧ стра́сти, скве́рны пло́ти и҆ дꙋ́ха, и҆ всѧ́кагѡ ѕла̀: да и҆ въ се́мъ просла́витсѧ твоѐ прест҃о́е и҆́мѧ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Сщ҃е́нницы же про́чїи ти́хѡ кꙋ́пнѡ съ ни́мъ чтꙋ́тъ мл҃твꙋ тꙋ́южде. Во є҆ли́ко же глаго́летсѧ мл҃тва ѿ сщ҃е́нникѡвъ, пою́тсѧ тропарѝ сїѧ̑.
Гла́съ д҃: Ско́рый въ застꙋпле́нїи є҆ди́нъ сы́й хрⷭ҇тѐ, ско́рое свы́ше покажѝ посѣще́нїе стра́ждꙋщемꙋ рабꙋ̀ твоемꙋ̀: и҆зба́ви недꙋ́гѡвъ, и҆ го́рькихъ болѣ́зней: воздви́гни во є҆́же пѣ́ти тѧ̀ и҆ сла́вити непреста́ннѡ, мл҃твами бцⷣы, є҆ди́не чл҃вѣколю́бче.
Дꙋше́вныма ѻ҆чи́ма ѡ҆слѣпле́нъ, къ тебѣ̀ хрⷭ҇тѐ прихождꙋ̀, ꙗ҆́коже слѣпы́й ѿ рожде́нїѧ, въ покаѧ́нїи зовꙋ̀ тебѣ̀: млⷭ҇тивъ на́мъ бꙋ́ди, є҆ди́не бл҃гопремѣни́телю.
Гла́съ г҃: Дꙋ́шꙋ мою̀ гдⷭ҇и во грѣсѣ́хъ всѧ́ческихъ, и҆ безмѣ́стными дѣѧ́ньми лю́тѣ разсла́бленнꙋю, воздви́гни бж҃е́ственнымъ твои́мъ предста́тельствомъ, ꙗ҆́коже и҆ разсла́бленнаго воздви́глъ є҆сѝ дре́вле, да зовꙋ́ ти сп҃са́емь: ще́дрый, да́ждь мѝ хрⷭ҇тѐ и҆сцѣле́нїе.
Гла́съ в҃: Ꙗ҆́кѡ гдⷭ҇ень ᲂу҆ч҃нкъ воспрїѧ́лъ є҆сѝ пра́ведне є҆ѵⷢ҇лїе: ꙗ҆́кѡ мч҃нкъ и҆́маши є҆́же неѡпи́санное: дерзнове́нїе, ꙗ҆́кѡ бра́тъ бж҃їй: є҆́же моли́тисѧ, ꙗ҆́кѡ і҆ера́рхъ. молѝ хрⷭ҇та̀ бг҃а, сп҃сти́сѧ дꙋша́мъ на́шымъ.
Гла́съ д҃: Ѻ҆́ч҃ее є҆диноро́дное бг҃ъ сло́во, прише́дшее къ на́мъ въ послѣ̑днїѧ дни̑, і҆а́кѡве бж҃е́ственне, пе́рваго тѧ̀ показа̀ і҆ерꙋсали́млѧнѡмъ па́стырѧ и҆ ᲂу҆чи́телѧ, и҆ вѣ́рнаго строи́телѧ та́инствъ дх҃о́вныхъ: тѣ́мже тѧ̀ всѝ чти́мъ, а҆пⷭ҇ле.
Гла́съ г҃: Въ мѵ́рѣхъ свѧ́те, сщ҃еннодѣ́йствитель показа́лсѧ є҆сѝ: хрⷭ҇то́во бо прпⷣбне є҆ѵⷢ҇лїе и҆спо́лнивъ, положи́лъ є҆сѝ дꙋ́шꙋ твою̀ ѡ҆ лю́дехъ твои́хъ, и҆ спа́слъ є҆сѝ непови̑нныѧ ѿ сме́рти: сегѡ̀ ра́ди ѡ҆свѧти́лсѧ є҆сѝ, ꙗ҆́кѡ вели́кїй таи́нникъ бж҃їѧ бл҃года́ти.
Гла́съ то́йже: Вели́ка ѡ҆брѣ́те въ бѣда́хъ тѧ̀ побо́рника вселе́ннаѧ, стрⷭ҇тоте́рпче, ꙗ҆зы́ки побѣжда́юща: ꙗ҆́коже ᲂу҆́бѡ лѵ́евꙋ низложи́лъ є҆сѝ горды́ню, и҆ на по́двигъ дерзнове́нна сотвори́въ не́стора: та́кѡ ст҃е дими́трїе, хрⷭ҇тꙋ̀ бг҃ꙋ моли́сѧ, дарова́ти на́мъ ве́лїю млⷭ҇ть.
Гла́съ то́йже: Страстоте́рпче ст҃ы́й, и҆ цѣле́бниче пантелеи́моне. молѝ млⷭ҇тиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.
Гла́съ и҃: Ст҃і́и безсре́брєнницы и҆ чꙋдотво́рцы, посѣти́те не́мѡщи на́шѧ: тꙋ́не прїѧ́сте, тꙋ́не дади́те на́мъ.
Гла́съ в҃: Вели̑чїѧ твоѧ̑ дѣ́вственниче, кто̀ повѣ́сть; то́чиши бо чꙋдеса̀, и҆ и҆злива́еши и҆сцѣлє́нїѧ, и҆ мо́лишисѧ ѡ҆ дꙋша́хъ на́шихъ, ꙗ҆́кѡ бг҃осло́въ и҆ дрꙋ́гъ хрⷭ҇то́въ.
Бг҃оро́диченъ: Моле́нїе те́плое и҆ стѣна̀ неѡбори́маѧ, млⷭ҇ти и҆сто́чниче, мі́рови прибѣ́жище, прилѣ́жнѡ вопїе́мъ тѝ: бцⷣе влⷣчце предварѝ, и҆ ѿ бѣ́дъ и҆зба́ви ны̀, є҆ди́на вско́рѣ предста́тельствꙋющаѧ.
Дїа́конъ: Во́нмемъ.
Сщ҃е́нникъ пе́рвый: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Дїа́конъ: Премꙋ́дрость, во́нмемъ.
Чте́цъ, прокі́менъ, гла́съ а҃: Бꙋ́ди гдⷭ҇ь млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀.
Сті́хъ: Ра́дꙋйтесѧ пра́веднїи ѡ҆ гдⷭ҇ѣ, пра̑вымъ подоба́етъ похвала̀.
А҆по́столъ: Собо́рнагѡ посла́нїѧ і҆а́кѡвлѧ чте́нїе.
Вѣ́домо же бꙋ́ди, ꙗ҆́кѡ а҆по́столъ ѿ дїа́кона чте́тсѧ, зача́ло н҃з:
Бра́тїе ѡ҆́бразъ прїими́те ѕлострада́нїѧ и҆ долготерпѣ́нїѧ, прⷪ҇ро́ки, и҆̀же глаго́лаша и҆́менемъ гдⷭ҇нимъ. Сѐ бл҃жи́мъ терпѧ́щыѧ: терпѣ́нїе і҆́ѡвле слы́шасте, и҆ кончи́нꙋ гдⷭ҇ню ви́дѣсте, ꙗ҆́кѡ многомлⷭ҇тивъ є҆́сть гдⷭ҇ь, и҆ ще́дръ. Пре́жде же всѣ́хъ, бра́тїе моѧ̑, не клени́тесѧ ни не́бомъ, ни земле́ю, ни и҆но́ю ко́ею клѧ́твою: бꙋ́ди же ва́мъ, є҆́же є҆́й, є҆́й, и҆ є҆́же нѝ, нѝ: да не въ лицемѣ́рїе впаде́те. Ѕлостра́ждетъ ли кто̀ въ ва́съ; да мл҃твꙋ дѣ́етъ. бл҃годꙋ́шствꙋетъ ли кто̀; да пое́тъ. Боли́тъ ли кто̀ въ ва́съ; да призове́тъ пресвѵ́теры церкѡ́вныѧ, и҆ да мл҃твꙋ сотворѧ́тъ над̾ ни́мъ, пома́завше є҆го̀ є҆ле́емъ во и҆́мѧ гдⷭ҇не. И҆ мл҃тва вѣ́ры сп҃се́тъ болѧ́щаго, и҆ воздви́гнетъ є҆го̀ гдⷭ҇ь: и҆ а҆́ще грѣхѝ бꙋ́детъ сотвори́лъ, ѿпꙋ́стѧтсѧ є҆мꙋ̀. И҆сповѣ́дайте ᲂу҆́бѡ дрꙋ́гъ дрꙋ́гꙋ согрѣшє́нїѧ, и҆ моли́тесѧ дрꙋ́гъ за дрꙋ́га, ꙗ҆́кѡ да и҆сцѣлѣ́ете: мно́гѡ бо мо́жетъ мл҃тва пра́веднагѡ поспѣшествꙋ́ема.
Сщ҃е́нникъ пе́рвый: Ми́ръ тѝ.
А҆ллилꙋ́їа. Гла́съ и.
Сті́хъ: Млⷭ҇ть и҆ сꙋ́дъ воспою̀ тебѣ̀ гдⷭ҇и.
Є҆ѵⷢ҇лїе ѿ лꙋкѝ, зача́ло н҃г:
Во вре́мѧ ѻ҆́но, зако́нникъ нѣ́кїй пристꙋпѝ ко і҆и҃сꙋ, и҆скꙋша́ѧ є҆го̀, и҆ глаго́лѧ: ᲂу҆чи́телю, что̀ сотвори́въ живо́тъ вѣ́чный наслѣ́дꙋю; Ѻ҆́нъ же речѐ къ немꙋ̀: въ зако́нѣ что̀ пи́сано є҆́сть; ка́кѡ чте́ши; Ѻ҆́нъ же ѿвѣща́въ речѐ: возлю́биши гдⷭ҇а бг҃а твоего̀ ѿ всегѡ̀ се́рдца твоегѡ̀, и҆ ѿ всеѧ̀ дꙋшѝ твоеѧ̀, и҆ все́ю крѣ́постїю твое́ю, и҆ всѣ́мъ помышле́нїемъ твои́мъ: и҆ бли́жнѧгѡ своего̀ ꙗ҆́кѡ са́мъ себѐ. Рече́ же є҆мꙋ̀: пра́вѡ ѿвѣща̀, сїѐ сотворѝ и҆ жи́въ бꙋ́деши. Ѻ҆́нъ же хотѧ̀ ѡ҆правди́тисѧ са́мъ, речѐ ко і҆и҃сꙋ: и҆ кто̀ є҆́сть бли́жнїй мо́й; Ѿвѣща́въ же і҆и҃съ речѐ: человѣ́къ нѣ́кїй схожда́ше ѿ і҆ерꙋсали́ма во і҆ерїхѡ́нъ, и҆ въ разбо́йники впадѐ, и҆̀же совле́кше є҆го̀, и҆ ꙗ҆́звы возло́жше ѿидо́ша, ѡ҆ста́вльше є҆́ле жи́ва сꙋ́ща. По слꙋ́чаю же свѧще́нникъ нѣ́кїй схожда́ше пꙋте́мъ тѣ́мъ: и҆ ви́дѣвъ є҆го̀, мимои́де. та́кожде же и҆ леві́тъ, бы́въ на то́мъ мѣ́стѣ, прише́дъ и҆ ви́дѣвъ мимои́де. Самарѧни́нъ же нѣ́кто грѧды́й прїи́де над̾ него̀, и҆ ви́дѣвъ є҆го̀ млⷭ҇рдова. И҆ пристꙋ́пль ѡ҆бвѧза̀ стрꙋ́пы є҆гѡ̀, возлива́ѧ ма́сло и҆ вїно̀: всади́въ же є҆го̀ на сво́й ско́тъ, приведѐ є҆го̀ въ гости́нницꙋ, и҆ прилѣжа̀ є҆мꙋ̀. И҆ наꙋ́трїѧ и҆зше́дъ, и҆з̾е́мъ два̀ сре́брєника, дадѐ гости́нникꙋ, и҆ речѐ є҆мꙋ̀: прилѣжѝ є҆мꙋ̀, и҆ є҆́же а҆́ще прїиждиве́ши, а҆́зъ, є҆гда̀ возвращꙋ́сѧ, возда́мъ тѝ. Кто̀ ᲂу҆́бѡ ѿ тѣ́хъ трїе́хъ бли́жнїй мни́тъ ти сѧ бы́ти впа́дшемꙋ въ разбо́йники; Ѻ҆́нъ же речѐ: сотвори́вый млⷭ҇ть съ ни́мъ. рече́ же є҆мꙋ̀ і҆и҃съ: и҆дѝ и҆ ты̀ творѝ та́кожде.
Та́же: Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй.
Гдⷭ҇и поми́лꙋй, три́жды.
Є҆щѐ мо́лимсѧ ѡ҆ ми́лости, жи́зни, ми́рѣ, здра́вїи, сп҃се́нїи, посѣще́нїи и҆ ѡ҆ставле́нїи грѣхѡ́въ раба̀ бж҃їѧ, (и҆́мⷬ҇къ).
Гдⷭ҇и поми́лꙋй, три́жды.
Ѡ҆ є҆́же прости́тисѧ є҆мꙋ̀ всѧ́комꙋ согрѣше́нїю, во́льномꙋ и҆ нево́льномꙋ, гдⷭ҇ꙋ помо́лимсѧ.
Гдⷭ҇и поми́лꙋй, три́жды.
И҆ возгла́съ: Ꙗ҆́кѡ млⷭ҇тивъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Дїа́конъ: Гдⷭ҇ꙋ помо́лимсѧ:
Ли́къ: Гдⷭ҇и поми́лꙋй.
Сщ҃е́нникъ мл҃твꙋ:
Безнача́льне, вѣ́чне, ст҃е свѧты́хъ, є҆диноро́днаго твоего̀ сн҃а низпосла́вый, и҆сцѣлѧ́ющагѡ всѧ́кїй недꙋ́гъ, и҆ всѧ́кꙋ ꙗ҆́зю дꙋ́шъ и҆ тѣле́съ на́шихъ, низпослѝ ст҃а́го твоего̀ дх҃а, и҆ ѡ҆свѧтѝ є҆ле́й се́й, и҆ сотворѝ и҆̀ помазꙋ́ющемꙋсѧ твоемꙋ̀ рабꙋ̀ (и҆́мⷬ҇къ), въ соверше́нное и҆збавле́нїе грѣхѡ́въ є҆гѡ̀ въ наслѣ́дїе црⷭ҇твїѧ нбⷭ҇нагѡ.
Вѣ́домо бꙋ́ди, ꙗ҆́кѡ нѣ́цыи мл҃твꙋ ᲂу҆́бѡ сїю̀ да́же до здѣ̀ то́кмѡ глаго́лютъ, съ возглаше́нїемъ:
Твое́ бо є҆́сть є҆́же ми́ловати:
Нѣ́цыи же да́же до конца̀ глаго́лютъ:
Ты́ бо є҆сѝ бг҃ъ ве́лїй и҆ ди́венъ, хранѧ́й завѣ́тъ тво́й и҆ млⷭ҇ть твою̀ лю́бѧщымъ тѧ̀, даѧ́й и҆збавле́нїе грѣхѡ́въ, ст҃ы́мъ твои́мъ ѻ҆́трокомъ і҆и҃сомъ хрⷭ҇то́мъ: па́ки рожде́й на́съ ѿ грѣха̀: просвѣща́ѧй слѣпы̑ѧ, и҆справлѧ́ѧй низве́ржєнныѧ, любѧ́й пра́вєдныѧ и҆ грѣ̑шныѧ ми́лꙋѧй: па́ки и҆зведы́й на́съ ѿ тьмы̀ и҆ сѣ́ни сме́ртныѧ, глаго́лѧй сꙋ́щымъ во ᲂу҆́захъ: и҆зыди́те, и҆ сꙋ́щымъ во тьмѣ̀, ѿкры́йтесѧ. возсїѧ́ бо въ сердца́хъ на́шихъ свѣ́тъ вѣ́дѣнїѧ лица̀ є҆гѡ̀, ѿне́лѣже на́съ ра́ди на землѝ ꙗ҆ви́лсѧ є҆́сть, и҆ съ человѣ́ки поживѐ: прїе́мшымъ тѧ̀ да́лъ є҆́сть вла́сть ча́дѡмъ бж҃їимъ бы́ти: ба́нею па́ки бытїѧ̀ сыноположе́нїе на́мъ дарова́лъ є҆́сть, и҆ неприча́стны на́съ сотвори́лъ є҆́сть ѿ наси́льства дїа́волѧ. поне́же не бл҃говоли́лъ є҆сѝ кро́вїю ѡ҆чи́ститисѧ, но є҆ле́емъ ст҃ы́мъ да́лъ є҆сѝ ѡ҆́бразъ крⷭ҇та̀ є҆гѡ̀, во є҆́же бы́ти на́мъ хрⷭ҇то́вꙋ ста́дꙋ, црⷭ҇комꙋ свѧще́нїю, ꙗ҆зы́кꙋ ст҃о́мꙋ, и҆ ѡ҆чи́стивый ны̀ водо́ю, и҆ ѡ҆ст҃и́вый дх҃омъ твои́мъ ст҃ы́мъ. са́мъ влⷣко гдⷭ҇и, да́ждь бл҃года́ть на́мъ въ слꙋже́нїе твоѐ сїѐ, ꙗ҆́коже да́лъ є҆сѝ мѡѷсе́ю ᲂу҆го́дникꙋ твоемꙋ̀, и҆ самꙋ́илꙋ возлю́бленномꙋ твоемꙋ̀, и҆ і҆ѡа́ннꙋ и҆збра́нномꙋ твоемꙋ̀, и҆ всѣ̑мъ во всѧ́комъ ро́дѣ и҆ ро́дѣ бл҃гоꙋгоди́вшымъ тебѣ̀: си́це сотворѝ и҆ на́съ бы́ти слꙋжи́телей но́вагѡ твоегѡ̀ завѣ́та над̾ є҆ле́емъ си́мъ, є҆го́же ᲂу҆сво́илъ є҆сѝ чⷭ҇тно́ю кро́вїю хрⷭ҇та̀ твоегѡ̀ да совле́кшесѧ мїрски́хъ похоте́й ᲂу҆́мремъ грѣхꙋ̀, и҆ поживе́мъ пра́вдѣ, ѡ҆бле́кшесѧ въ него̀ пома́занїемъ ѡ҆свѧще́нїѧ, хотѧ́щагѡ є҆ле́а навести́сѧ. Бꙋ́ди гдⷭ҇и, є҆ле́й се́й, є҆ле́й ра́дованїѧ, є҆ле́й ѡ҆свѧще́нїѧ, ѻ҆де́жда црⷭ҇каѧ, бронѧ̀ си́лы, всѧ́кагѡ дїа́вольскагѡ дѣ́йства ѿгна́нїе, печа́ть ненавѣ́тнаѧ, ра́дованїе се́рдца, весе́лїе вѣ́чное. да и҆ си́мъ помазꙋ́емїи па́ки рожде́нїѧ, стра́шни бꙋ́дꙋтъ сопроти̑внымъ, и҆ возсїѧ́ютъ во свѣ́тлостехъ ст҃ы́хъ твои́хъ, не и҆мꙋ́ще скве́рны и҆лѝ вра́ски: и҆ да прїи́мꙋтсѧ въ вѣ̑чныѧ твоѧ̑ ᲂу҆покоє́нїѧ, и҆ воспрїи́мꙋтъ по́честь го́рнѧгѡ зва́нїѧ.
Твое́ бо є҆́сть, є҆́же ми́ловати и҆ сп҃са́ти ны̀ бж҃е на́шъ: и҆ тебѣ̀ сла́вꙋ возсыла́емъ, со є҆диноро́днымъ твои́мъ сн҃омъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
И҆ по мл҃твѣ взе́млетъ і҆ере́й стрꙋче́цъ, и҆ ѡ҆мочи́въ и҆ во ст҃ы́й є҆ле́й, и҆ помазꙋ́етъ болѧ́щаго крестоѡбра́знѡ, на челѣ̀, на ноздрѧ́хъ, на лани́техъ, на ᲂу҆стѣ́хъ, на пе́рсехъ, на рꙋка́хъ на ѻ҆́бѣ странѣ̀, глаго́лѧ мл҃твꙋ сїю̀:
Ѻ҆́ч҃е ст҃ы́й, врачꙋ̀ дꙋ́шъ и҆ тѣле́съ, посла́вый є҆диноро́днаго твоего̀ сн҃а, гдⷭ҇а на́шего і҆и҃са хрⷭ҇та̀, всѧ́кїй недꙋ́гъ и҆сцѣлѧ́ющаго, и҆ ѿ сме́рти и҆збавлѧ́ющаго, и҆сцѣлѝ и҆ раба̀ твоего̀, (и҆́мⷬ҇къ), ѿ ѡ҆бдержа́щїѧ є҆го̀ тѣле́сныѧ и҆ дꙋше́вныѧ не́мощи, и҆ ѡ҆животворѝ є҆го̀ бл҃года́тїю хрⷭ҇та̀ твоегѡ̀: мл҃твами прест҃ы́ѧ влⷣчцы на́шеѧ бцⷣы, и҆ приснодѣ́вы мр҃і́и: предста́тельствы чⷭ҇тны́хъ нбⷭ҇ныхъ си́лъ безпло́тныхъ: си́лою чⷭ҇тна́гѡ и҆ животворѧ́щагѡ крⷭ҇та̀: чⷭ҇тна́гѡ сла́внагѡ прⷪ҇ро́ка, предте́чи и҆ крⷭ҇ти́телѧ і҆ѡа́нна: ст҃ы́хъ сла́вныхъ и҆ всехва́льныхъ а҆пⷭ҇лѡвъ: ст҃ы́хъ сла́вныхъ, и҆ добропобѣ́дныхъ мч҃нкѡвъ: прпⷣбныхъ и҆ бг҃оно́сныхъ ѻ҆тє́цъ на́шихъ: ст҃ы́хъ и҆ и҆сцѣли́телей безсре́бренникѡвъ космы̀ и҆ дамїа́на, кѵ́ра и҆ і҆ѡа́нна, пантелеи́мона и҆ є҆рмола́а, самѱѡ́на и҆ дїоми́да, фѡ́тїа и҆ а҆нїки́ты: ст҃ы́хъ и҆ пра́ведныхъ бг҃оѻтє́цъ, і҆ѡакі́ма и҆ а҆́нны, и҆ всѣ́хъ ст҃ы́хъ.
Ꙗ҆́кѡ ты̀ є҆сѝ и҆сто́чникъ и҆сцѣле́нїй, бж҃е на́шъ, и҆ тебѣ̀ сла́вꙋ возсыла́емъ, со є҆диноро́днымъ твои́мъ сн҃омъ, и҆ є҆диносꙋ́щнымъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Сїѧ̀ мл҃тва глаго́летсѧ ѿ є҆ди́нагѡ коегѡ́ждо свѧще́нника по є҆́же рещѝ є҆ѵⷢ҇лїе и҆ мл҃твꙋ, помазꙋ́ющагѡ вкꙋ́пѣ є҆ле́емъ недꙋ́гꙋющаго.
Дїа́конъ: Во́нмемъ.
Сщ҃е́нникъ вторы́й: Ми́ръ всѣ̑мъ.
Прокі́менъ, гла́съ в҃:
Крѣ́пость моѧ̀ и҆ пѣ́нїе моѐ гдⷭ҇ь, и҆ бы́сть мнѣ̀ во сп҃се́нїе.
Сті́хъ: Наказꙋ́ѧ наказа́ мѧ гдⷭ҇ь, сме́рти же не предадѐ мѧ̀.
А҆по́столъ, къ ри́млѧнѡмъ, зача́ло рѕ҃і.
Бра́тїе, до́лжни є҆смы̀ мы̀ си́льнїи не́мѡщи немощны́хъ носи́ти, и҆ не себѣ̀ ᲂу҆гожда́ти. Кі́йждо же ва́съ бли́жнемꙋ да ᲂу҆гожда́етъ во бл҃го́е къ созда́нїю. И҆́бо и҆ хрⷭ҇то́съ не себѣ̀ ᲂу҆годѝ, но ꙗ҆́коже є҆́сть пи́сано: поношє́нїѧ поносѧ́щихъ тебѣ̀ нападо́ша на мѧ̀. Є҆ли̑ка бо преднапи̑сана бы́ша, въ на́ше наказа́нїе преднаписа́шасѧ: да терпѣ́нїемъ и҆ ᲂу҆тѣше́нїемъ писа́нїй ᲂу҆пова́нїе и҆́мамы. Бг҃ъ же терпѣ́нїѧ и҆ ᲂу҆тѣше́нїѧ, да да́стъ ва́мъ то́жде мꙋ́дрствовати дрꙋ́гъ ко дрꙋ́гꙋ ѡ҆ хрⷭ҇тѣ̀ і҆и҃сѣ: Да є҆динодꙋ́шнѡ є҆ди́ными ᲂу҆сты̀ сла́вите бг҃а и҆ ѻ҆ц҃а̀ гдⷭ҇а на́шегѡ і҆и҃са хрⷭ҇та̀. Тѣ́мже прїе́млите дрꙋ́гъ дрꙋ́га, ꙗ҆́коже и҆ хрⷭ҇то́съ прїѧ́тъ ва́съ во сла́вꙋ бж҃їю.
Сщ҃е́нникъ вторы́й: Ми́ръ тѝ.
А҆ллилꙋ́їа, гла́съ є҃.
Сті́хъ: Млⷭ҇ти твоѧ̑ гдⷭ҇и во вѣ́къ воспою̀.
Сщ҃е́нникъ вторы́й:
Є҆ѵⷢ҇лїе ѿ лꙋкѝ, зача́ло ч҃д:
Во вре́мѧ ѻ҆́но, прїи́де і҆и҃съ во і҆ерїхѡ́нъ. И҆ сѐ мꙋ́жъ нарица́емый закхе́й, и҆ се́й бѣ̀ ста́рѣй мытарє́мъ, и҆ то́й бѣ̀ бога́тъ: И҆ и҆ска́ше ви́дѣти і҆и҃са, кто́ є҆сть, и҆ не можа́ше ѿ наро́да, ꙗ҆́кѡ во́зрастомъ ма́лъ бѣ̀. И҆ предите́къ возлѣ́зе на ꙗ҆́годичинꙋ, да ви́дитъ, ꙗ҆́кѡ тꙋдѣ̀ хотѧ́ше минꙋ́ти. И҆ ꙗ҆́кѡ прїи́де на мѣ́сто, воззрѣ́въ і҆и҃съ, ви́дѣвъ є҆го̀, и҆ речѐ къ немꙋ̀: закхе́е, потща́всѧ слѣ́зи, дне́сь бо въ домꙋ̀ твое́мъ подоба́етъ мѝ бы́ти. И҆ потща́всѧ слѣ́зе, и҆ прїѧ́тъ є҆го̀ ра́дꙋѧсѧ. И҆ ви́дѣвше всѝ ропта́хꙋ, глаго́люще: ꙗ҆́кѡ ко грѣ́шнꙋ мꙋ́жꙋ вни́де вита́ти. Ста́въ же закхе́й, речѐ ко гдⷭ҇ꙋ: сѐ по́лъ и҆мѣ́нїѧ моегѡ̀, гдⷭ҇и, да́мъ ни́щымъ, и҆ а҆́ще кого̀ чи́мъ ѡ҆би́дѣхъ, возвращꙋ̀, четвери́цею. Рече́ же къ немꙋ̀ і҆и҃съ: ꙗ҆́кѡ дне́сь сп҃се́нїе до́мꙋ семꙋ̀ бы́сть, занѐ и҆ се́й сн҃ъ а҆враа́мль є҆́сть. Прїи́де бо сн҃ъ чл҃вѣ́чь взыска́ти и҆ сп҃стѝ поги́бшаго.
Дїа́конъ же:
Поми́лꙋй на́съ бж҃е:
Є҆щѐ мо́лимсѧ ѡ҆ млⷭ҇ти, жи́зни:
Ѡ҆ є҆́же прости́тисѧ є҆мꙋ̀:
Ꙗ҆́кѡ млⷭ҇тивъ, и҆ чл҃вѣколю́бецъ бг҃ъ:
Сщ҃е́нникъ мл҃твꙋ:
Бж҃е вели́кїй, и҆ вы́шнїй ѿ всеѧ̀ тва́ри покланѧ́емый, премꙋ́дрости и҆сто́чниче, бл҃гости вои́стиннꙋ неизслѣ́димаѧ бе́здно, и҆ бл҃гоꙋтро́бїѧ неѡпредѣлѧ́емаѧ пꙋчи́но: са́мъ чл҃вѣколю́бче влⷣко, превѣ́чныхъ и҆ ди́вныхъ бж҃е, є҆го́же никто́же ѿ человѣ̑къ помышлѧ́ѧй мо́жетъ пости́гнꙋти; при́зри, ᲂу҆слы́ши на́съ недосто́йныхъ рабѡ́въ твои́хъ, и҆ и҆дѣ́же ѡ҆ вели́цѣмъ и҆́мени твое́мъ є҆ле́й се́й прино́симъ, низпослѝ твоегѡ̀ да́ра и҆сцѣлє́нїѧ, и҆ ѡ҆ставле́нїе грѣхѡ́въ, и҆ и҆сцѣлѝ є҆го̀ во мно́жествѣ млⷭ҇ти твоеѧ̀. Є҆́й, гдⷭ҇и бл҃гопремѣни́телю, є҆ди́не млⷭ҇тиве и҆ чл҃вѣколю́бче, ка́ѧйсѧ ѡ҆ ѕло́бахъ на́шихъ: вѣ́дый, ꙗ҆́кѡ належи́тъ по́мыслъ человѣ́ка на лꙋка̑ваѧ ѿ ю҆́ности є҆гѡ̀: не хотѧ́й сме́рти грѣ́шника, но ꙗ҆́кѡ ѡ҆брати́тисѧ и҆ жи́вꙋ бы́ти є҆мꙋ̀: грѣ́шныхъ ра́ди сп҃се́нїѧ вочл҃вѣ́чивыйсѧ бг҃ъ сы́й, и҆ созда́выйсѧ за созда́нїе твоѐ. ты̀ є҆сѝ рекі́й: не прїидо́хъ призва́ти пра́вєдныѧ, но грѣ̑шныѧ въ покаѧ́нїе: ты̀ є҆сѝ, ѻ҆вча̀ взыска́вый заблꙋ́ждшее: ты̀ є҆сѝ, поги́бшꙋю дра́хмꙋ прилѣ́жнѡ взыска́вый, и҆ ѡ҆брѣты́й: ты̀ є҆сѝ рекі́й, ꙗ҆́кѡ грѧдꙋ́щаго ко мнѣ̀ не и҆зженꙋ̀ во́нъ: ты̀ є҆сѝ, и҆́же блꙋдни́цы честнѣ́и твоѝ но́зѣ слеза́ми ѡ҆мочи́вшїѧ не возгнꙋша́выйсѧ: ты̀ є҆сѝ рекі́й: є҆ли́жды а҆́ще паде́ши, воста́ни, и҆ сп҃се́шисѧ: ты̀ є҆сѝ рекі́й, ꙗ҆́кѡ ра́дость быва́етъ на нб҃сѝ ѡ҆ є҆ди́номъ грѣ́шницѣ ка́ющемсѧ. са́мъ при́зри, бл҃гоꙋтро́бный влⷣко, съ высоты̀ ст҃ы́ѧ твоеѧ̀, соѡсѣни́въ на́съ грѣ́шныхъ и҆ недосто́йныхъ рабѡ́въ твои́хъ бл҃года́тїю ст҃а́гѡ дх҃а въ ча́съ се́й, и҆ вселѝ въ раба̀ твоего̀, (и҆́мⷬ҇къ) позна́вшаго своѧ̑ согрѣшє́нїѧ, и҆ пристꙋ́пльшаго къ тебѣ̀ вѣ́рою: и҆ прїи́мъ свои́мъ тѝ чл҃вѣколю́бїемъ, а҆́ще что̀ согрѣши́лъ є҆́сть сло́вомъ, и҆лѝ дѣ́ломъ, и҆лѝ помышле́нїемъ, прости́въ ѡ҆чи́сти є҆го̀, и҆ чи́ста сотворѝ ѿ всѧ́кагѡ грѣха̀, и҆ при́снѡ спребыва́ѧ є҆мꙋ̀, сохранѝ про́чее лѣ́то живота̀ є҆гѡ̀, ходѧ́ща во ѡ҆правда́нїихъ твои́хъ во є҆́же не ктомꙋ̀ бы́ти є҆мꙋ̀ посмѣѧ́нїе дїа́волꙋ: ꙗ҆́кѡ да и҆ въ не́мъ просла́витсѧ прест҃о́е и҆́мѧ твоѐ.
Возгла́съ: Твое́ бо є҆́сть є҆́же ми́ловати, и҆ сп҃са́ти ны̀, хрⷭ҇тѐ бж҃е, и҆ тебѣ̀ сла́вꙋ возсыла́емъ со безнача́льнымъ твои́мъ ѻ҆тце́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
По мл҃твѣ же а҆́бїе вторы́й і҆ере́й взе́млетъ стрꙋче́цъ вторы́й, и҆ ѡ҆мочи́въ и҆ во ст҃ы́й є҆ле́й помазꙋ́етъ болѧ́щагѡ, глаго́лѧ мл҃твꙋ:
Ѻ҆́ч҃е ст҃ы́й, врачꙋ̀ дꙋ́шъ и҆ тѣле́съ:
Дїа́конъ же: Во́нмемъ:
Сщ҃е́нникъ тре́тїй: Ми́ръ всѣ̑мъ.
Прокі́менъ, гла́съ г҃:
Гдⷭ҇ь просвѣще́нїе моѐ и҆ сп҃си́тель мо́й, когѡ̀ ᲂу҆бою́сѧ;
Сті́хъ: Гдⷭ҇ь защи́титель живота̀ моегѡ̀, ѿ когѡ̀ ᲂу҆страшꙋ́сѧ;
А҆по́столъ къ корі́нѳѧнѡмъ, зача́ло рн҃г.
Бра́тїе, вы̀ є҆стѐ тѣ́ло хрⷭ҇то́во, и҆ ᲂу҆́ди ѿ ча́сти. И҆ ѻ҆́вы ᲂу҆́бѡ положѝ бг҃ъ въ цр҃кви, пе́рвѣе а҆пⷭ҇лы, второ́е прⷪ҇ро́ки, тре́тїе ᲂу҆чи́тели, пото́мъ же си̑лы, та́же дарова̑нїѧ и҆сцѣле́нїй, застꙋплє́нїѧ, правлє́нїѧ, ро́ди ѧ҆зы́кѡвъ. Є҆да̀ всѝ а҆пⷭ҇ли; є҆да̀ всѝ прⷪ҇ро́цы; є҆да̀ всѝ ᲂу҆чи́тели; є҆да̀ всѝ си̑лы; Є҆да̀ всѝ дарова̑нїѧ и҆́мꙋтъ и҆сцѣле́нїй; Є҆да̀ всѝ ѧ҆зы́ки глаго́лютъ; є҆да̀ всѝ сказꙋ́ютъ; Ревнꙋ́йте же дарова́нїй бо́льшихъ: и҆ є҆щѐ по превосхожде́нїю пꙋ́ть ва́мъ показꙋ́ю. А҆́ще ѧ҆зы́ки человѣ́ческими глаго́лю и҆ а҆́гг҃льскими, любве́ же не и҆́мамъ, бы́хъ (ꙗ҆́кѡ) мѣ́дь звенѧ́щи, и҆лѝ кѷмва́лъ звѧца́ѧй. И҆ а҆́ще и҆́мамъ прⷪ҇ро́чество и҆ вѣ́мъ та̑йны всѧ̑, и҆ ве́сь ра́зꙋмъ: и҆ а҆́ще и҆́мамъ всю̀ вѣ́рꙋ, ꙗ҆́кѡ и҆ го́ры преставлѧ́ти, любве́ же не и҆́мамъ, ничто́же є҆́смь. И҆ а҆́ще разда́мъ всѧ̑ и҆мѣ̑нїѧ моѧ̑, и҆ а҆́ще преда́мъ тѣ́ло моѐ, во є҆́же сожещѝ є҆̀: любве́ же не и҆́мамъ, ника́ѧ по́льза мѝ є҆́сть. Любы̀ долготерпи́тъ, милосе́рдствꙋетъ: любы̀ не зави́дитъ: любы̀ не превозно́ситсѧ, не горди́тсѧ: Ни безчи́нствꙋетъ, не и҆́щетъ своѧ̑ сѝ, не раздража́етсѧ, не мы́слитъ ѕла̀: не ра́дꙋетсѧ ѡ҆ непра́вдѣ, ра́дꙋетсѧ же ѡ҆ и҆́стинѣ: Всѧ̑ лю́битъ, всемꙋ̀ вѣ́рꙋ є҆́млетъ, всѧ̑ ᲂу҆пова́етъ, всѧ̑ те́рпитъ. Любы̀ николи́же ѿпа́даетъ.
Сщ҃е́нникъ тре́тїй: Ми́ръ тѝ.
Дїа́конъ: Премꙋ́дрость:
А҆ллилꙋ́їа, гла́съ в҃.
Сті́хъ: На тѧ̀ гдⷭ҇и ᲂу҆пова́хъ, да не постыжꙋ́сѧ въ вѣ́къ.
Сщ҃е́нникъ тре́тїй чте́тъ:
Є҆ѵⷢ҇лїе ѿ матѳе́а, зача́ло л҃д ѿ полꙋ̀.
Во вре́мѧ ѻ҆́но, призва́въ і҆и҃съ ѻ҆бана́десѧть ᲂу҆ченикѝ своѧ̑, дадѐ и҆̀мъ вла́сть на дꙋсѣ́хъ нечи́стыхъ, ꙗ҆́кѡ да и҆зго́нѧтъ и҆̀хъ, и҆ цѣли́ти всѧ́къ недꙋ́гъ, и҆ всѧ́кꙋ болѣ́знь. Сїѧ̑ ѻ҆бана́десѧть посла̀ і҆и҃съ, заповѣ́да и҆̀мъ, глаго́лѧ: на пꙋ́ть ꙗ҆зы̑къ не и҆ди́те, и҆ во гра́дъ самарѧ́нскїй не вни́дите. И҆ди́те же па́че ко ѻ҆вца́мъ поги́бшымъ до́мꙋ і҆и҃лева. Ходѧ́ще же проповѣ́дꙋйте, глаго́люще: ꙗ҆́кѡ прибли́жисѧ црⷭ҇твїе нбⷭ҇ное. Болѧ́щыѧ и҆сцѣлѧ́йте, прокажє́нныѧ ѡ҆чища́йте, мє́ртвыѧ воскреша́йте, бѣ́сы и҆згонѧ́йте: тꙋ́не прїѧ́сте, тꙋ́не дади́те.
Дїа́конъ же а҆́бїе глаго́летъ є҆ктенїю̀ сїю̀:
Поми́лꙋй на́съ бж҃е:
Є҆щѐ мо́лимсѧ ѡ҆ млⷭ҇ти, жи́зни:
Ѡ҆ є҆́же прости́тисѧ є҆мꙋ̀:
И҆ возгла́съ: Ꙗ҆́кѡ млⷭ҇тивъ:
Дїа́конъ: Гдⷭ҇ꙋ помо́лимсѧ.
Сщ҃е́нникъ глаго́летъ мл҃твꙋ:
Влⷣко вседержи́телю, ст҃ы́й цр҃ю̀, наказꙋ́ѧй, и҆ не ᲂу҆мерщвлѧ́ѧй, ᲂу҆твержда́ѧй низпа́дающыѧ, и҆ возводѧ́й низве́ржєнныѧ, тѣлє́сныѧ скѡ́рби и҆справлѧ́ѧй человѣ́кѡвъ: мо́лимсѧ тебѣ̀ бж҃е на́шъ, ꙗ҆́кѡ да наведе́ши млⷭ҇ть твою̀ на є҆ле́й се́й, и҆ на помазꙋ́ющыѧсѧ ѿ негѡ̀ во и҆́мѧ твоѐ: да бꙋ́детъ и҆̀мъ во и҆сцѣле́нїе дꙋши́ же и҆ тѣ́ла, и҆ во ѡ҆чище́нїе и҆ и҆змѣне́нїе всѧ́кїѧ стра́сти, и҆ всѧ́кагѡ недꙋ́га, и҆ ꙗ҆́зи, и҆ всѧ́кїѧ скве́рны пло́ти и҆ дх҃а. є҆́й, гдⷭ҇и, враче́бнꙋю твою̀ си́лꙋ съ нб҃сѐ низпослѝ, прикосни́сѧ тѣлесѝ, ᲂу҆гасѝ ѻ҆гне́вицꙋ, ᲂу҆кротѝ стра́сть, и҆ всѧ́кꙋю не́мощь таѧ́щꙋюсѧ. бꙋ́ди вра́чь раба̀ твоегѡ̀, (и҆́мⷬ҇къ), воздви́гни є҆го̀ ѿ ѻ҆дра̀ болѣ́зненнагѡ, и҆ ѿ ло́жа ѡ҆ѕлобле́нїѧ цѣ́ла и҆ всесоверше́нна, да́рꙋй є҆го̀ цр҃кви твое́й бл҃гоꙋгожда́юща и҆ творѧ́ща во́лю твою̀.
Возгла́съ: Твое́ бо є҆́сть, є҆́же ми́ловати и҆ сп҃са́ти ны̀ бж҃е на́шъ: и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
По мл҃твѣ же тре́тїй і҆ере́й взе́млетъ стрꙋче́цъ тре́тїй, и҆ ѡ҆мочи́въ и҆ во ст҃ы́й є҆ле́й, и҆ помазꙋ́етъ болѧ́щаго, глаго́лѧ мл҃твꙋ:
Ѻ҆́ч҃е ст҃ы́й, врачꙋ̀ дꙋ́шъ и҆ тѣле́съ:
Дїа́конъ: Во́нмемъ.
Сщ҃е́нникъ четве́ртый: Ми́ръ всѣ̑мъ.
Прокі́менъ, гла́съ д҃:
Во́ньже а҆́ще де́нь призовꙋ́ тѧ, ско́рѡ ᲂу҆слы́ши мѧ̀.
Сті́хъ: Гдⷭ҇и, ᲂу҆слы́ши мл҃твꙋ мою̀, и҆ во́пль мо́й.
А҆по́столъ къ корі́нѳѧнѡмъ, зача́ло рп҃в.
Бра́тїе, вы̀ є҆стѐ цр҃кви бг҃а жи́ва, ꙗ҆́коже речѐ бг҃ъ: ꙗ҆́кѡ вселю́сѧ въ ни́хъ и҆ похождꙋ̀, и҆ бꙋ́дꙋ и҆̀мъ бг҃ъ, и҆ ті́и бꙋ́дꙋтъ мнѣ̀ лю́дїе. Тѣ́мже и҆зыди́те ѿ среды̀ и҆́хъ, и҆ ѿлꙋчи́тесѧ, глаго́летъ гдⷭ҇ь, и҆ нечистотѣ̀ не прикаса́йтесѧ, и҆ а҆́зъ прїимꙋ̀ вы̀. И҆ бꙋ́дꙋ ва́мъ во ѻ҆ц҃а̀, и҆ вы̀ бꙋ́дете мнѣ̀ въ сы́ны и҆ дщє́ри, глаго́летъ гдⷭ҇ь вседержи́тель. Сицєва̀ ᲂу҆̀бо и҆мꙋ́ще ѡ҆бѣтова̑нїѧ, ѽ возлю́бленнїи, ѡ҆чи́стимъ себѐ ѿ всѧ́кїѧ скве́рны пло́ти и҆ дꙋ́ха, творѧ́ще ст҃ы́ню въ стра́сѣ бж҃їи.
Сщ҃е́нникъ: Ми́ръ тѝ.
А҆ллилꙋ́їа, гла́съ в҃.
Сті́хъ: Терпѧ̀ потерпѣ́хъ гдⷭ҇а, и҆ внѧ́тъ мѝ.
Сщ҃е́нникъ четве́ртый:
Є҆ѵⷢ҇лїе ѿ матѳе́а, зача́ло к҃ѕ.
Во вре́мѧ ѻ҆́но, прише́дъ і҆и҃съ въ до́мъ петро́въ, ви́дѣ те́щꙋ є҆гѡ̀ лежа́щꙋ, и҆ ѻ҆гне́мъ жего́мꙋ. И҆ прикоснꙋ́сѧ рꙋцѣ̀ є҆ѧ̀, и҆ ѡ҆ста́ви ю҆̀ ѻ҆́гнь: и҆ воста̀, и҆ слꙋжа́ше є҆мꙋ̀. По́здѣ же бы́вшꙋ, приведо́ша къ немꙋ̀ бѣ́сны мнѡ́ги, и҆ и҆згна̀ дꙋ́хи сло́вомъ, и҆ всѧ̑ болѧ́щыѧ и҆сцѣлѝ. Да сбꙋ́детсѧ рече́нное и҆са́їемъ прⷪ҇ро́комъ глаго́лющимъ: то́й недꙋ́ги на́шѧ прїѧ́тъ, и҆ болѣ̑зни понесѐ. Ви́дѣвъ же і҆и҃съ мнѡ́ги наро́ды ѻ҆́крестъ себѐ, повелѣ̀ и҆тѝ на ѻ҆́нъ по́лъ. И҆ пристꙋ́пль є҆ди́нъ кни́жникъ, речѐ є҆мꙋ̀: ᲂу҆ч҃тлю, и҆дꙋ̀ по тебѣ̀, а҆́може а҆́ще и҆́деши. Глаго́ла є҆мꙋ̀ і҆и҃съ: ли́си ꙗ҆́звины и҆́мꙋтъ, и҆ пти̑цы нбⷭ҇ныѧ гнѣ́зда: сн҃ъ же чл҃вѣ́ческїй не и҆́мать гдѣ̀ главы̀ подклони́ти. Дрꙋгі́й же ѿ ᲂу҆чєни́къ є҆гѡ̀ речѐ є҆мꙋ̀: гдⷭ҇и, повели́ ми пре́жде и҆тѝ, и҆ погребстѝ ѻ҆тца̀ моего̀. І҆и҃съ же речѐ є҆мꙋ̀: грѧдѝ по мнѣ̀, и҆ ѡ҆ста́ви ме́ртвыхъ погребстѝ своѧ̑ мертвецы̀. И҆ влѣ́зшꙋ є҆мꙋ̀ въ кора́бль, по не́мъ и҆до́ша ᲂу҆ч҃нцы̀ є҆гѡ̀.
Дїа́конъ же:
Поми́лꙋй на́съ бж҃е:
Є҆щѐ мо́лимсѧ ѡ҆ млⷭ҇ти, жи́зни:
Ѡ҆ є҆́же прости́тисѧ є҆мꙋ̀:
И҆ возгла́съ: Ꙗ҆́кѡ млⷭ҇тивъ:
Дїа́конъ: Гдⷭ҇ꙋ помо́лимсѧ.
Сщ҃е́нникъ мл҃твꙋ:
Бл҃же и҆ чл҃вѣколю́бче, бл҃гоꙋтро́бне и҆ многомлⷭ҇тиве гдⷭ҇и, мно́гїй въ млⷭ҇ти, и҆ бога́тый въ бл҃госты́ни, ѻ҆́ч҃е щедро́тъ, и҆ бж҃е всѧ́кагѡ ᲂу҆тѣше́нїѧ, ᲂу҆крѣпи́вый ны̀ ст҃ы́ми твои́ми а҆пⷭ҇лами, є҆ле́емъ съ мл҃твою не́мѡщи люде́й цѣли́ти: са́мъ и҆ є҆ле́й се́й вчинѝ въ цѣльбꙋ̀ ѿ негѡ̀ помазꙋ́ющымсѧ, въ премѣне́нїе всѧ́кагѡ недꙋ́га, и҆ всѧ́кїѧ ꙗ҆́зи, во и҆збавле́нїе ѕѡ́лъ, ча́ющымъ є҆́же ѿ тебѐ сп҃се́нїѧ. є҆́й, влⷣко, гдⷭ҇и бж҃е на́шъ, мо́лимъ ти сѧ всеси́льне, є҆́же сп҃стѝ всѧ̑ ны̀, є҆ди́не дꙋ́шъ же и҆ тѣле́съ врачꙋ̀, ѡ҆свѧтѝ всѧ̑ ны̀: всѧ́къ недꙋ́гъ и҆сцѣлѧ́ѧй, и҆сцѣлѝ и҆ раба̀ твоего̀, (и҆́мⷬ҇къ), воздви́гни є҆го̀ ѿ ѻ҆дра̀ болѣ́зненнагѡ млⷭ҇тїю твоеѧ̀ бл҃гости, посѣтѝ є҆го̀ млⷭ҇тїю и҆ щедро́тами твои́ми: ѿженѝ ѿ негѡ̀ всѧ́кꙋю болѣ́знь и҆ не́мощь, ꙗ҆́кѡ да воста́въ рꙋко́ю твое́ю крѣ́пкою, порабо́таетъ тебѣ̀ со всѧ́кимъ бл҃годаре́нїемъ: ꙗ҆́кѡ да и҆ ны́нѣ причаща́ющесѧ твоегѡ̀ неизглаго́ланнагѡ чл҃вѣколю́бїѧ, пое́мъ и҆ сла́вимъ тѧ̀, творѧ́щаго вели̑каѧ и҆ чꙋ̑днаѧ, сла̑внаѧ же и҆ и҆зрѧ̑днаѧ.
Твое́ бо є҆́сть, є҆́же ми́ловати, и҆ сп҃са́ти ны̀ бж҃е на́шъ:
По мл҃твѣ же а҆́бїе четве́ртый і҆ере́й взе́млетъ стрꙋче́цъ четве́ртый, и҆ ѡ҆мочи́въ и҆̀ во ст҃ы́й є҆ле́й, и҆ помазꙋ́етъ болѧ́щаго, глаго́лѧ мл҃твꙋ:
Ѻ҆́ч҃е ст҃ы́й, врачꙋ̀ дꙋ́шъ и҆ тѣле́съ:
Дїа́конъ: Во́нмемъ:
І҆ере́й пѧ́тый: Ми́ръ всѣ̑мъ.
Прокі́менъ, гла́съ є҃:
Ты̀ гдⷭ҇и сохрани́ши ны̀, и҆ соблюде́ши ны̀ ѿ ро́да сегѡ̀, и҆ во вѣ́къ.
Сті́хъ: Сп҃си́ мѧ гдⷭ҇и, ꙗ҆́кѡ ѡ҆скꙋдѣ̀ прпⷣбный.
Дїа́конъ: Премꙋ́дрость.
А҆по́столъ къ корі́нѳѧнѡмъ, зача́ло рѯ҃и.
Бра́тїе, не хощꙋ̀ ва́съ не вѣ́дѣти ѡ҆ ско́рби на́шей, бы́вшей на́мъ во а҆сі́и, ꙗ҆́кѡ по премно́гꙋ и҆ па́че си́лы ѡ҆тѧготи́хомсѧ, ꙗ҆́кѡ не надѣ́ѧтисѧ на́мъ и҆ жи́ти. Но са́ми въ себѣ̀ ѡ҆сꙋжде́нїе сме́рти и҆мѣ́хомъ: да не надѣ́ющесѧ бꙋ́демъ на сѧ̀, но на бг҃а возставлѧ́ющаго мє́ртвыѧ: И҆́же ѿ толи́кїѧ сме́рти и҆зба́вилъ ны̀ є҆́сть, и҆ и҆збавлѧ́етъ: на́ньже и҆ ᲂу҆пова́хомъ, ꙗ҆́кѡ и҆ є҆щѐ и҆зба́витъ: Поспѣша́ющымъ и҆ ва́мъ по на́съ мл҃твою: да ѿ мнѡ́гъ ли́цъ є҆́же въ на́съ дарова́нїе, мно́гими бл҃годари́тсѧ ѡ҆ ва́съ.
Сщ҃е́нникъ: Ми́ръ тѝ.
А҆ллилꙋ́їа, гла́съ є҃.
Сті́хъ: Млⷭ҇ти твоѧ̑ гдⷭ҇и, во вѣ́къ воспою̀.
Є҆ѵⷢ҇лїе ѿ матѳе́а, зача́ло р҃д.
Речѐ гдⷭ҇ь при́тчꙋ сїю̀: ᲂу҆подо́бисѧ црⷭ҇твїе нбⷭ҇ное десѧти́мъ дѣ́вамъ, ꙗ҆̀же прїѧ́ша свѣти́льники своѧ̑, и҆ и҆зыдо́ша въ срѣ́тенїе женихꙋ̀. Пѧ́ть же бѣ̀ ѿ ни́хъ мꙋдры̀, и҆ пѧ́ть ю҆рѡ́дивы. Ю҆рѡ́дивыѧ же, прїе́мше свѣти́льники своѧ̑, не взѧ́ша съ собо́ю є҆ле́а. Мꙋ̑дрыѧ же прїѧ́ша є҆ле́й въ сосꙋ́дѣхъ, со свѣти́льники свои́ми. Коснѧ́щꙋ же женихꙋ̀, воздрема́шасѧ всѧ̑, и҆ спа́хꙋ. Полꙋ́нощи же во́пль бы́сть: сѐ жени́хъ грѧде́тъ, и҆сходи́те въ срѣ́тенїе є҆гѡ̀. Тогда̀ воста́вше всѧ̑ дѣ̑вы ты̑ѧ, и҆ ᲂу҆краси́ша свѣти́льники своѧ̑. Ю҆рѡ́дивыѧ же мꙋ̑дрымъ рѣ́ша: дади́те на́мъ ѿ є҆ле́а ва́шегѡ, ꙗ҆́кѡ свѣти́льницы на́ши ᲂу҆гаса́ютъ. Ѿвѣща́ша же мꙋ̑дрыѧ, глаго́люще: є҆да̀ ка́кѡ не доста́нетъ на́мъ и҆ ва́мъ; и҆ди́те же па́че къ продаю́щымъ, и҆ кꙋпи́те себѣ̀. И҆дꙋ́щымъ же и҆̀мъ кꙋпи́ти, прїи́де жени́хъ, и҆ готѡ́выѧ внидо́ша съ ни́мъ на бра́ки: и҆ затворе́ны бы́ша двє́ри. Послѣди́ же прїидо́ша и҆ про́чыѧ дѣ̑вы, глаго́люще: гдⷭ҇и, гдⷭ҇и, ѿве́рзи на́мъ. Ѻ҆́нъ же ѿвѣща́въ речѐ и҆̀мъ: а҆ми́нь глаго́лю ва́мъ, не вѣ́мъ ва́съ. Бди́те ᲂу҆̀бо, ꙗ҆́кѡ не вѣ́сте днѐ, ни часа̀, во́ньже сн҃ъ чл҃вѣ́ческїй прїи́детъ.
Дїа́конъ же:
Поми́лꙋй на́съ бж҃е:
Є҆щѐ мо́лимсѧ ѡ҆ млⷭ҇ти, жи́зни:
Ѡ҆ є҆́же прости́тисѧ є҆мꙋ̀:
И҆ возгла́съ: Ꙗ҆́кѡ млⷭ҇тивъ:
Дїа́конъ: Гдⷭ҇ꙋ помо́лимсѧ.
Сщ҃е́нникъ мл҃твꙋ сїю̀:
Гдⷭ҇и бж҃е на́шъ, наказꙋ́ѧй и҆ па́ки и҆сцѣлѧ́ѧй, воздвиза́ѧй ѿ землѝ ни́ща, и҆ ѿ гно́ища возвыша́ѧй ᲂу҆бо́гаго: сиро́тъ ѻ҆́ч҃е, и҆ ѡ҆бꙋрева́емыхъ приста́нище, и҆ недꙋ́гꙋющихъ врачꙋ̀, не́мѡщи на́шѧ неболѣ́зненнѡ носѧ́й, и҆ недꙋ́ги на́шѧ прїе́млѧй: въ ти́хости ми́лꙋѧй, превосходѧ́й беззакѡ́нїѧ, и҆ и҆з̾има́ѧй непра̑вды: ско́рый въ по́мощь, и҆ ко́сный во гнѣ́въ, дꙋ́нꙋвый на своѧ̑ ᲂу҆ч҃нкѝ, и҆ рекі́й: прїими́те дх҃а ст҃а́го, и҆̀мже а҆́ще ѡ҆ста́вите грѣхѝ, ѡ҆ста́вѧтсѧ и҆̀мъ: прїе́млѧй грѣ́шныхъ покаѧ́нїе, и҆ вла́сть и҆мѣ́ѧй проща́ти грѣхѝ мнѡ́гїѧ и҆ лю̑тыѧ: и҆ и҆сцѣле́нїе подава́ѧ всѣ̑мъ, въ не́мощи и҆ долгонедꙋ́жїи пребыва́ющымъ: и҆́же менѐ смире́ннаго и҆ грѣ́шнаго, и҆ недосто́йнаго раба̀ твоего̀ во мно́зѣхъ грѣсѣ́хъ сплете́ннаго, и҆ страстьмѝ сласте́й валѧ́ющагосѧ, призва́вый во ст҃ы́й и҆ превелича́йшїй степе́нь сщ҃е́нства, и҆ вни́ти во внꙋ́треннее завѣ́сы, во ст҃а̑ѧ ст҃ы́хъ, и҆дѣ́же прини́кнꙋти ст҃і́и а҆́гг҃ли жела́ютъ, и҆ слы́шати є҆ѵⷢ҇льскїй гла́съ гдⷭ҇а бг҃а, и҆ зрѣ́ти самозра́чнѣ лицѐ ст҃а́гѡ возноше́нїѧ, и҆ наслажда́тисѧ бж҃е́ственныѧ и҆ сщ҃е́нныѧ лїтꙋргі́и. сподо́бивый мѧ̀ сщ҃еннодѣ́йствовати пренебє́сныѧ твоѧ̑ та̑йны, и҆ приноси́ти тебѣ̀ да́ры же и҆ жє́ртвы ѡ҆ на́шихъ грѣсѣ́хъ, и҆ людски́хъ невѣ́жествїихъ, и҆ хода́тайствовати ѡ҆ слове́сныхъ твои́хъ ѻ҆вца́хъ, да мно́гимъ и҆ неизрече́ннымъ твои́мъ чл҃вѣколю́бїемъ прегрѣшє́нїѧ и҆́хъ ѡ҆чи́стиши. са́мъ пребл҃гі́й цр҃ю̀, внꙋшѝ мл҃твꙋ мою̀ въ се́й ча́съ же и҆ ст҃ы́й де́нь, и҆ на всѧ́кое вре́мѧ и҆ мѣ́сто: и҆ вонмѝ гла́сꙋ моле́нїѧ моегѡ̀, и҆ рабꙋ̀ твоемꙋ̀, (и҆́мⷬ҇къ), въ не́мощи дꙋше́вной и҆ тѣле́сной сꙋ́щемꙋ, и҆сцѣле́нїе да́рꙋй: подаѧ̀ є҆мꙋ̀ ѡ҆ставле́нїе грѣхѡ́въ, и҆ проще́нїе согрѣше́нїй, во́льныхъ же и҆ нево́льныхъ: ᲂу҆врачꙋ́й є҆гѡ̀ ꙗ҆́звы неисцѣ̑льныѧ, всѧ́кїй же недꙋ́гъ, и҆ всѧ́кꙋю ꙗ҆́зю, да́рꙋй є҆мꙋ̀ дꙋше́вное и҆сцѣле́нїе. прикоснꙋ́выйсѧ те́щи петро́вѣ, и҆ ѡ҆ста́ви ю҆̀ ѻ҆гне́вица, и҆ воста̀ и҆ слꙋжа́ше тебѣ̀: са́мъ влⷣко, и҆ рабꙋ̀ твоемꙋ̀, (и҆́мⷬ҇къ), пода́ждь врачева́нїе, и҆ премѣне́нїе всѧ́кїѧ тлетво́рныѧ болѣ́зни, и҆ помѧнѝ бога̑тыѧ твоѧ̑ щедрѡ́ты, и҆ млⷭ҇ть твою̀. помѧнѝ, ꙗ҆́кѡ прилѣ́жнѡ належи́тъ помышле́нїе человѣ́ка на лꙋка̑ваѧ ѿ ю҆́ности є҆гѡ̀, и҆ ни є҆ди́нъ ѡ҆брѣта́етсѧ безгрѣ́шенъ на землѝ: ты́ бо є҆ди́нъ кромѣ̀ грѣха̀ є҆сѝ, прише́дый и҆ сп҃сы́й человѣ́ческїй ро́дъ, и҆ свободи́вый на́съ ѿ рабо́ты вра́жїѧ. а҆́ще бо въ сꙋ́дъ вни́деши съ рабы̑ твои́ми, никто́же ѡ҆брѧ́щетсѧ чи́стъ ѿ скве́рны: но всѧ̑каѧ ᲂу҆ста̀ заградѧ́тсѧ, не и҆мꙋ̑щаѧ что̀ ѿвѣща́ти, занѐ ꙗ҆́коже рꙋ́бъ пове́рженный, всѧ́каѧ пра́вда на́ша пред̾ тобо́ю. сегѡ̀ ра́ди грѣхѝ ю҆́ности на́шеѧ не помѧнѝ гдⷭ҇и: ты́ бо є҆сѝ наде́жда ненадѣ́ющихсѧ, и҆ ᲂу҆покое́нїе трꙋжда́ющихсѧ, и҆ ѡ҆бремене́нныхъ въ беззако́нїихъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
По мл҃твѣ же а҆́бїе пѧ́тый сщ҃е́нникъ взе́млетъ стрꙋче́цъ пѧ́тый, и҆ ѡ҆мочи́въ и҆̀ во ст҃ы́й є҆ле́й, помазꙋ́етъ болѧ́щаго, глаго́лѧ мл҃твꙋ:
Ѻ҆́ч҃е ст҃ы́й, врачꙋ̀ дꙋ́шъ и҆ тѣле́съ:
Дїа́конъ: Во́нмемъ.
Сщ҃е́нникъ же шесты́й: Ми́ръ всѣ̑мъ.
Прокі́менъ, гла́съ ѕ҃:
Поми́лꙋй мѧ̀ бж҃е по вели́цѣй млⷭ҇ти твое́й.
Сті́хъ: Се́рдце чи́сто сози́жди во мнѣ̀ бж҃е, и҆ дх҃ъ пра́въ ѡ҆бновѝ во ᲂу҆тро́бѣ мое́й.
А҆по́столъ къ гала́тѡмъ, зача́ло сг҃і.
Бра́тїе, пло́дъ дх҃о́вный є҆́сть: любы̀, ра́дость, ми́ръ, долготерпѣ́нїе, бл҃гость, млⷭ҇рдїе, вѣ́ра, кро́тость, воздержа́нїе: на таковы́хъ нѣ́сть зако́на. А҆ и҆̀же хрⷭ҇тѡ́вы сꙋ́ть, пло́ть распѧ́ша со страстьмѝ и҆ похотьмѝ. А҆́ще живе́мъ дх҃омъ, дх҃омъ и҆ да хо́димъ. Не быва́имъ тщесла́вни, дрꙋ́гъ дрꙋ́га раздража́юще, дрꙋ́гъ дрꙋ́гꙋ зави́дѧще. Бра́тїе, а҆́ще и҆ впаде́тъ человѣ́къ въ нѣ́кое прегрѣше́нїе, вы̀ дꙋхо́внїи и҆справлѧ́йте такова́го дꙋ́хомъ кро́тости: блюды́й себѐ: да не и҆ ты̀ и҆скꙋше́нъ бꙋ́деши. Дрꙋ́гъ дрꙋ́га тѧготы̑ носи́те, и҆ та́кѡ и҆спо́лните зако́нъ хрⷭ҇то́въ.
Сщ҃е́нникъ шесты́й: Ми́ръ тѝ.
Дїа́конъ: Премꙋ́дрость, во́нмемъ.
А҆ллилꙋ́їа, гла́съ ѕ҃.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Дїа́конъ: Премꙋ́дрость, про́сти ᲂу҆слы́шимъ ст҃а́гѡ є҆ѵⷢ҇лїа.
Є҆ѵⷢ҇лїе ѿ матѳе́а, зача́ло ѯ҃в.
Во вре́мѧ ѻ҆́но, вни́де і҆и҃съ во страны̑ тѵ̑рскїѧ и҆ сїдѡ́нскїѧ. И҆ сѐ жена̀ ханане́йска ѿ предѣ̑лъ тѣ́хъ и҆зше́дши, возопѝ къ немꙋ̀, глаго́лющи: поми́лꙋй мѧ̀ гдⷭ҇и, сн҃е дв҃довъ: дщѝ моѧ̀ ѕлѣ̀ бѣснꙋ́етсѧ. Ѻ҆́нъ же не ѿвѣща̀ є҆́й словесѐ. и҆ пристꙋ́пльше ᲂу҆ч҃нцы̀ є҆гѡ̀, молѧ́хꙋ є҆го̀, глаго́люще: ѿпꙋстѝ ю҆̀, ꙗ҆́кѡ вопїе́тъ въ слѣ́дъ на́съ. Ѻ҆́нъ же ѿвѣща́въ речѐ: нѣ́смь по́сланъ, то́кмѡ ко ѻ҆вца́мъ поги́бшымъ до́мꙋ і҆и҃лева. Ѻ҆на́ же прише́дши поклони́сѧ є҆мꙋ̀, глаго́лющи: гдⷭ҇и, помози́ ми. Ѻ҆́нъ же ѿвѣща́въ речѐ: нѣ́сть добро̀ ѿѧ́ти хлѣ́ба ча́дѡмъ, и҆ поврещѝ псѡ́мъ. Ѻ҆на́ же речѐ: є҆́й, гдⷭ҇и, и҆́бо и҆ псѝ ꙗ҆дѧ́тъ ѿ крꙋпи́цъ па́дающихъ ѿ трапе́зы господе́й свои́хъ. Тогда̀ ѿвѣща́въ і҆и҃съ, речѐ є҆́й: ѽ же́но, ве́лїѧ вѣ́ра твоѧ̀, бꙋ́ди тебѣ̀, ꙗ҆́коже хо́щеши. и҆ и҆сцѣлѣ̀ дщѝ є҆ѧ̀ ѿ тогѡ̀ часа̀.
Дїа́конъ же: Поми́лꙋй на́съ бж҃е:
Є҆щѐ мо́лимсѧ ѡ҆ млⷭ҇ти, жи́зни:
Ѡ҆ є҆́же прости́тисѧ є҆мꙋ̀:
Возгла́съ: Ꙗ҆́кѡ млⷭ҇тивъ.
Дїа́конъ: Гдⷭ҇ꙋ помо́лимсѧ:
Сщ҃е́нникъ мл҃твꙋ сїю̀:
Бл҃годари́мъ тѧ̀ гдⷭ҇и бж҃е на́шъ, бл҃гі́й чл҃вѣколю́бче, и҆ врачꙋ̀ дꙋ́шъ и҆ тѣле́съ на́шихъ, недꙋ́ги на́шѧ неболѣ́зненнѡ носѧ́й, є҆гѡ́же ꙗ҆́звою всѝ и҆сцѣлѣ́хомъ: па́стырю до́брый, на взыска́нїе прише́дый заблꙋ́ждшагѡ ѻ҆вча́те, малодꙋ̑шнымъ даѧ́й ᲂу҆тѣше́нїе, и҆ живо́тъ сокрꙋшє́нымъ: и҆сто́чникъ кровоточи́выѧ дванадесѧтолѣ́тенъ бы́вшїй и҆сцѣли́вый: дще́рь ханане́инꙋ ѿ лю́тагѡ де́мѡна свободи́вый: до́лгъ дарова́вый двѣма̀ должнико́ма, и҆ грѣ́шной женѣ̀ ѡ҆ставле́нїе да́вый: и҆сцѣле́нїе разсла́бленномꙋ дарова́вый, со ѡ҆ставле́нїемъ грѣхѡ́въ є҆гѡ̀: мытарѧ̀ сло́вомъ ѡ҆правда́вый, и҆ разбо́йника въ послѣ́днемъ є҆гѡ̀ и҆сповѣ́данїи прїе́мый: грѣхѝ мі́ра взе́мый, и҆ на крⷭ҇тѣ̀ пригвозди́вый: тебѣ̀ мо́лимсѧ и҆ тебѐ про́симъ, въ бл҃гости твое́й, са́мъ ѡ҆сла́би, ѡ҆ста́ви, простѝ бж҃е беззакѡ́нїѧ, и҆ грѣхѝ раба̀ твоегѡ̀, (и҆́мⷬ҇къ), согрѣшє́нїѧ є҆гѡ̀ вѡ́льнаѧ и҆ невѡ́льнаѧ, ꙗ҆̀же въ вѣ́дѣнїи и҆ не въ вѣ́дѣнїи, ꙗ҆̀же въ престꙋпле́нїи, и҆ въ преслꙋша́нїи, ꙗ҆̀же въ нощѝ и҆ во днѝ: и҆лѝ въ клѧ́твѣ сщ҃е́нничестѣй, и҆лѝ ѻ҆́тчи, и҆лѝ ма́терни бы́сть: и҆лѝ ѻ҆чи́ма воззрѣ́нїемъ, и҆лѝ вѣ́ждома помава́нїемъ: и҆лѝ прилѣжа́нїемъ любодѣ́йства, и҆лѝ вкꙋше́нїемъ блꙋда̀: и҆лѝ въ ко́емъ лю́бо движе́нїи пло́ти и҆ дꙋ́ха, ѿчꙋжди́сѧ хотѣ́нїѧ твоегѡ̀, и҆ твоеѧ̀ ст҃ы́ни. А҆́ще же согрѣшѝ то́йже и҆ мы̀, ꙗ҆́кѡ бл҃гъ и҆ непамѧтоѕло́бивый бг҃ъ и҆ чл҃вѣколю́бецъ простѝ, не ѡ҆ставлѧ́ѧ є҆гѡ̀ и҆ на́съ въ скве́рное житїѐ впа́сти, нижѐ въ па̑гꙋбныѧ пꙋти̑ тещѝ. Є҆́й, влⷣко гдⷭ҇и, ᲂу҆слы́ши мѧ̀ грѣ́шнаго въ ча́съ се́й за раба̀ твоего̀, (и҆́мⷬ҇къ), и҆ пре́зри ꙗ҆́кѡ непамѧтоѕло́бивый бг҃ъ согрѣшє́нїѧ є҆гѡ̀ всѧ̑: свободѝ є҆го̀ ѿ вѣ́чныѧ мꙋ́ки: ᲂу҆ста̀ є҆гѡ̀ твоегѡ̀ хвале́нїѧ и҆спо́лни: ᲂу҆стнѣ̀ є҆гѡ̀ ѿве́рзи къ славосло́вїю и҆́мене твоегѡ̀: рꙋ́цѣ є҆гѡ̀ прострѝ къ дѣ́ланїю за́повѣдей твои́хъ: но́зѣ є҆гѡ̀ къ тече́нїю бл҃говѣствова́нїѧ твоегѡ̀ и҆спра́ви: всѧ̑ є҆гѡ̀ ᲂу҆́ды и҆ мы́сль твое́ю ᲂу҆крѣплѧ́ѧ бл҃года́тїю. Ты́ бо є҆сѝ бг҃ъ на́шъ, ст҃ы́ми твои́ми а҆пⷭ҇лы заповѣ́давый на́мъ, глаго́лѧ: є҆ли̑ка а҆́ще свѧ́жете на землѝ, бꙋ́дꙋтъ свѧ̑зана на нб҃сѣ́хъ: и҆ є҆ли̑ка а҆́ще разрѣшитѐ на землѝ, бꙋ́дꙋтъ разрѣшє́на на нб҃сѣ́хъ. и҆ па́ки: и҆́хже а҆́ще ѡ҆ста́вите грѣхѝ, ѡ҆ста́вѧтсѧ и҆̀мъ, и҆́же а҆́ще держитѐ, ᲂу҆держа́тсѧ. и҆ ꙗ҆́коже ᲂу҆слы́шалъ є҆сѝ є҆зекі́ю въ ско́рби дꙋшѝ є҆гѡ̀, въ ча́съ сме́рти є҆гѡ̀, и҆ не презрѣ́лъ є҆сѝ моле́нїѧ є҆гѡ̀: та́кожде и҆ менѐ смире́ннаго и҆ грѣ́шнаго и҆ недосто́йнаго раба̀ твоего̀ ᲂу҆слы́ши въ ча́съ се́й. ты́ бо є҆сѝ гдⷭ҇и і҆и҃се хрⷭ҇тѐ, се́дмьдесѧтъ кра́тъ седмери́цею ѡ҆ставлѧ́ти па́дающымъ въ грѣхѝ повелѣ́вый, твое́ю бл҃гостїю и҆ человѣколю́бїемъ: и҆ ка́ѧйсѧ ѡ҆ ѕло́бахъ на́шихъ, и҆ ра́дꙋѧйсѧ ѡ҆ ѡ҆браще́нїи заблꙋжде́нныхъ: занѐ ꙗ҆́кѡ вели́чество твоѐ, та́кѡ и҆ млⷭ҇ть твоѧ̀: и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ: ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
По мл҃твѣ же а҆́бїе шесты́й сщ҃е́нникъ взе́млетъ стрꙋче́цъ шесты́й, и҆ ѡ҆мочи́въ и҆̀ во ст҃ы́й є҆ле́й, помазꙋ́етъ болѧ́щаго, глаго́лѧ мл҃твꙋ:
Ѻ҆́ч҃е ст҃ы́й, врачꙋ̀ дꙋ́шъ и҆ тѣле́съ:
Дїа́конъ: Во́нмемъ.
Сщ҃е́нникъ же седмы́й: Ми́ръ всѣ̑мъ.
Прокі́менъ, гла́съ з҃:
Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ.
Сті́хъ: Поми́лꙋй мѧ̀ гдⷭ҇и, ꙗ҆́кѡ не́мощенъ є҆́смь.
А҆по́столъ къ солꙋ́нѧнѡмъ, зача́ло сѻ҃г.
Бра́тїе, мо́лимъ вы̀, вразꙋмлѧ́йте безчи̑нныѧ, ᲂу҆тѣша́йте малодꙋ̑шныѧ, застꙋпа́йте немѡщны́ѧ, долготерпи́те ко всѣ̑мъ. Блюди́те, да никто́же ѕла̀ за ѕло̀ комꙋ̀ возда́стъ: но всегда̀ до́брое гони́те, и҆ дрꙋ́гъ ко дрꙋ́гꙋ, и҆ ко всѣ̑мъ. Всегда̀ ра́дꙋйтесѧ: Непреста́ннѡ моли́тесѧ. Ѡ҆ все́мъ бл҃годари́те: сїѧ́ бо є҆́сть во́лѧ бж҃їѧ ѡ҆ хрⷭ҇тѣ̀ і҆и҃сѣ въ ва́съ. Дх҃а не ᲂу҆гаша́йте: Прⷪ҇ро́чєствїѧ не ᲂу҆ничижа́йте. Всѧ̑ же и҆скꙋша́юще, дѡ́браѧ держи́те: Ѿ всѧ́кїѧ ве́щи ѕлы́ѧ ѿгреба́йтесѧ. Са́мъ же бг҃ъ ми́ра да ѡ҆свѧти́тъ вы̀ всесоверше́ны ѡ҆ все́мъ, и҆ всесоверше́нъ ва́шъ дꙋ́хъ, и҆ дꙋша̀, и҆ тѣ́ло непоро́чно, въ прише́ствїе гдⷭ҇а на́шегѡ і҆и҃са хрⷭ҇та̀ да сохрани́тсѧ.
Сщ҃е́нникъ же седмы́й: Ми́ръ тѝ.
Дїа́конъ: Премꙋ́дрость.
А҆ллилꙋ́їа, гла́съ з҃.
Сті́хъ: Оу҆слы́шитъ тѧ̀ гдⷭ҇ь въ де́нь печа́ли, защи́титъ тѧ̀ и҆́мѧ бг҃а і҆а́кѡвлѧ.
Є҆ѵⷢ҇лїе ѿ матѳе́а, зача́ло л҃.
Во вре́мѧ ѻ҆́но, преходѧ̀ і҆и҃съ, ви́дѣ человѣ́ка сѣдѧ́ща на мы́тницѣ, матѳе́а глаго́лема, и҆ глаго́ла є҆мꙋ̀: по мнѣ̀ грѧдѝ. и҆ воста́въ по не́мъ и҆́де: И҆ бы́сть є҆мꙋ̀ возлежа́щꙋ въ домꙋ̀, и҆ сѐ мно́зи мытарѝ и҆ грѣ̑шницы прише́дше возлежа́хꙋ со і҆и҃сомъ, и҆ со ᲂу҆ченикѝ є҆гѡ̀: И҆ ви́дѣвше фарїсе́є, глаго́лахꙋ ᲂу҆ч҃нкѡ́мъ є҆гѡ̀: почто̀ съ мытарѝ и҆ грѣ́шники ᲂу҆ч҃тль ва́шъ ꙗ҆́стъ и҆ пїе́тъ: І҆и҃съ же слы́шавъ речѐ и҆̀мъ: не тре́бꙋютъ здра́вїи врача̀, но болѧ́щїи. Ше́дше же наꙋчи́тесѧ, что̀ є҆́сть: млⷭ҇ти хощꙋ̀, а҆ не же́ртвы; не прїидо́хъ бо призва́ти првⷣники, но грѣ́шники на покаѧ́нїе.
Дїа́конъ же: Поми́лꙋй на́съ бж҃е:
Є҆щѐ мо́лимсѧ ѡ҆ млⷭ҇ти, жи́зни:
Ѡ҆ є҆́же прости́тисѧ є҆мꙋ̀:
И҆ возгла́съ: Ꙗ҆́кѡ млⷭ҇тивъ:
Дїа́конꙋ ре́кшꙋ: Гдⷭ҇ꙋ помо́лимсѧ.
Сщ҃е́нникъ мл҃твꙋ сїю̀:
Влⷣко гдⷭ҇и бж҃е на́шъ, врачꙋ̀ дꙋ́шъ и҆ тѣле́съ, вре́мєнныѧ стра̑сти ᲂу҆врачева́вый, и҆сцѣлѧ́ѧй всѧ́къ недꙋ́гъ и҆ всѧ́кꙋю ꙗ҆́зю въ лю́дехъ, хотѧ́й всѣ̑мъ человѣ́кѡмъ сп҃сти́сѧ, и҆ въ позна́нїе и҆́стины прїитѝ, не хотѧ́й сме́рти грѣ́шника, но ꙗ҆́кѡ ѡ҆брати́тисѧ, и҆ жи́вꙋ бы́ти є҆мꙋ̀. ты́ бо гдⷭ҇и, въ ве́тхомъ завѣ́тѣ положи́лъ є҆сѝ покаѧ́нїе грѣ̑шнымъ, дв҃дꙋ, и҆ нїнеѵі́тѧнѡмъ, и҆ пре́жде тѣ́хъ бы́вшымъ: но и҆ во прише́ствїи плотска́гѡ твоегѡ̀ смотре́нїѧ, не призва́лъ є҆сѝ пра́вєдныѧ, но грѣ̑шныѧ въ покаѧ́нїе: ꙗ҆́коже мытарѧ̀, ꙗ҆́коже блꙋдни́цꙋ, разбо́йника, и҆ хꙋ́льнаго гони́телѧ, вели́кагѡ па́ѵла покаѧ́нїемъ прїе́мый. петра̀ верхо́внаго и҆ а҆пⷭ҇ла твоего̀, ѿве́ргшагосѧ тебѐ три́жды, покаѧ́нїемъ прїѧ́лъ є҆сѝ, и҆ ѡ҆бѣща́лъ є҆сѝ є҆мꙋ̀, глаго́лѧ: ты̀ є҆сѝ пе́тръ, и҆ на се́мъ ка́мени сози́ждꙋ цр҃ковь мою̀, и҆ врата̀ а҆́дѡва не ѡ҆долѣ́ютъ є҆́й, и҆ да́мъ тебѣ̀ ключѝ црⷭ҇твїѧ нбⷭ҇нагѡ. сегѡ̀ ра́ди и҆ мы̀, бл҃же и҆ чл҃вѣколю́бче, по нелѡ́жнымъ твои̑мъ ѡ҆бѣща́нїємъ дерза́юще, мо́лимсѧ тебѣ̀, и҆ про́симъ въ ча́съ се́й: ᲂу҆слы́ши моле́нїе на́ше, и҆ прїимѝ є҆̀, ꙗ҆́коже кади́ло приноси́мое тебѣ̀, и҆ посѣтѝ раба̀ твоегѡ̀, (и҆́мⷬ҇къ), и҆ а҆́ще что̀ согрѣшѝ сло́вомъ, и҆лѝ дѣ́ломъ, и҆лѝ помышле́нїемъ, и҆лѝ въ нощѝ, и҆лѝ во днѝ: и҆лѝ под̾ клѧ́твꙋ сщ҃е́нническꙋю, и҆лѝ своемꙋ̀ проклѧ́тїю подпадѐ: и҆лѝ клѧ́твою ѡ҆горчи́сѧ, и҆ проклѧ́тъ себѐ: тебѐ про́симъ, и҆ тебѣ̀ мо́лимсѧ, ѡ҆сла́би, ѡ҆ста́ви, простѝ є҆мꙋ̀ бж҃е, презира́ѧ беззакѡ́нїѧ є҆гѡ̀ и҆ грѣхѝ, и҆ ꙗ҆̀же въ вѣ́дѣнїи и҆ не въ вѣ́дѣнїи бы̑вшаѧ ѿ негѡ̀. и҆ а҆́ще что̀ ѿ за́повѣдей твои́хъ престꙋпѝ, и҆лѝ согрѣшѝ, ꙗ҆́кѡ пло́ть носѧ́й, и҆ въ мі́рѣ живѧ́й, и҆лѝ ѿ дѣ́йства дїа́вольскагѡ: са́мъ ꙗ҆́кѡ бл҃гъ и҆ чл҃вѣколю́бецъ бг҃ъ простѝ: ꙗ҆́кѡ нѣ́сть человѣ́ка, и҆́же поживе́тъ, и҆ не согрѣши́тъ. ты́ бо є҆ди́нъ є҆сѝ безгрѣ́шенъ: пра́вда твоѧ̀ пра́вда въ вѣ́къ и҆ сло́во твоѐ и҆́стина. не бо̀ созда́лъ є҆сѝ человѣ́ка въ поги́бель, но въ снабдѣ́нїе за́повѣдей твои́хъ, и҆ живота̀ нетлѣ́ннагѡ наслѣ́дїе: и҆ тебѣ̀ сла́вꙋ возсыла́емъ, со ѻ҆ц҃е́мъ, и҆ ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
По мл҃твѣ же седмы́й і҆ере́й взе́млетъ стрꙋче́цъ седмы́й, и҆ ѡ҆мочи́въ и҆̀ во ст҃ы́й є҆ле́й, помазꙋ́етъ болѧ́щаго, глаго́лѧ мл҃твꙋ:
Ѻ҆́ч҃е ст҃ы́й, врачꙋ̀ дꙋ́шъ и҆ тѣле́съ:
По сконча́нїи же сегѡ̀ больны́й прїе́млѧй є҆леѡсвѧще́нїе, а҆́ще мо́жетъ, са́мъ вхо́дитъ посредѣ̀ сщ҃е́нникѡвъ, и҆лѝ держи́мь ѿ свои́хъ сѝ стои́тъ, и҆лѝ сѣди́тъ. А҆́ще же не мо́жетъ са́мъ, сщ҃е́нницы са́ми ѡ҆бстоѧ́тъ є҆го̀ на ѻ҆дрѣ̀ лежа́щагѡ. Настоѧ́тель же взе́мъ ст҃о́е є҆ѵⷢ҇лїе, и҆ разгнꙋ́въ є҆̀, возлага́етъ писмены̀ на главѣ̀ больна́гѡ, придержа́щымъ всѣ̑мъ сщ҃е́нникѡмъ. Нача́льствꙋѧй же не возлага́етъ рꙋ́кꙋ, но велегла́снѡ глаго́летъ мл҃твꙋ сїю̀:
Цр҃ю̀ ст҃ы́й, бл҃гоꙋтро́бне и҆ многомлⷭ҇тиве гдⷭ҇и і҆и҃се хрⷭ҇тѐ, сн҃е и҆ сло́ве бг҃а жива́гѡ, не хотѧ́й сме́рти грѣ́шнагѡ, но ꙗ҆́кѡ ѡ҆брати́тисѧ, и҆ жи́вꙋ бы́ти є҆мꙋ̀: не полага́ю рꙋ́кꙋ мою̀ грѣ́шнꙋю на главꙋ̀ прише́дшагѡ къ тебѣ̀ во грѣсѣ́хъ, и҆ просѧ́щагѡ ᲂу҆ тебѐ на́ми ѡ҆ставле́нїе грѣхѡ́въ: но твою̀ рꙋ́кꙋ крѣ́пкꙋю и҆ си́льнꙋю, ꙗ҆́же во ст҃о́мъ є҆ѵⷢ҇лїи се́мъ, є҆́же сослꙋжи́тели мо́й держа́тъ на главѣ̀ раба̀ твоегѡ̀, (и҆́мⷬ҇къ), и҆ молю́сѧ съ ни́ми. и҆ прошꙋ̀ млⷭ҇тивное и҆ непамѧтоѕло́бное чл҃вѣколю́бїе твоѐ бж҃е, сп҃си́телю на́шъ, прⷪ҇ро́комъ твои́мъ наѳа́номъ, пока́ѧвшемꙋсѧ дв҃дꙋ ѡ҆ свои́хъ согрѣше́нїихъ ѡ҆ставле́нїе дарова́вый, и҆ манассі́инꙋ є҆́же ѡ҆ покаѧ́нїи мл҃твꙋ прїе́мый: са́мъ и҆ раба̀ твоего̀, (и҆́мⷬ҇къ) ка́ющагосѧ ѡ҆ свои́хъ сѝ согрѣше́нїихъ прїимѝ ѻ҆бы́чнымъ твои́мъ чл҃вѣколю́бїемъ, презира́ѧй всѧ̑ є҆гѡ̀ прегрѣшє́нїѧ. ты́ бо є҆сѝ бг҃ъ на́шъ, и҆́же и҆ се́дмьдесѧтъ кра́тъ седмери́цею ѡ҆ставлѧ́ти повелѣ́вый, па́дающымъ въ грѣхѝ: занѐ ꙗ҆́кѡ вели́чество твоѐ, та́кѡ и҆ млⷭ҇ть твоѧ̀, и҆ тебѣ̀ подоба́етъ всѧ́каѧ сла́ва, че́сть и҆ поклоне́нїе, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Сне́мше же є҆ѵⷢ҇лїе съ главы̀ больна́гѡ, даю́тъ цѣлова́ти є҆̀.
Дїа́конъ же: Поми́лꙋй на́съ бж҃е:
Є҆щѐ мо́лимсѧ ѡ҆ млⷭ҇ти, жи́зни:
И҆ ѡ҆ є҆́же прости́тисѧ є҆мꙋ̀:
Возгла́съ: Ꙗ҆́кѡ млⷭ҇тивъ, и҆ чл҃вѣколю́бецъ бг҃ъ є҆сѝ:
Та́же пою́тъ сла́ва, самогла́сенъ, гла́съ д҃:
И҆сто́чникъ и҆сцѣле́нїй, и҆мꙋ́ще ст҃і́и безсрє́бреницы, и҆сцѣлє́нїѧ подава́ете всѣ̑мъ тре́бꙋющымъ, ꙗ҆́кѡ преве́лїихъ дарова́нїй сподо́бльшїисѧ ѿ приснотекꙋ́щагѡ и҆сто́чника сп҃са на́шегѡ. глаго́летъ бо къ ва́мъ гдⷭ҇ь, ꙗ҆́кѡ є҆диноревни́телємъ а҆пⷭ҇льскимъ: сѐ да́хъ ва́мъ вла́сть на дꙋ́хи нечи̑стыѧ, ꙗ҆́коже тѣ́хъ и҆згони́ти, и҆ цѣли́ти всѧ́къ недꙋ́гъ, и҆ всѧ́кꙋ ꙗ҆́зю: тѣ́мже въ повелѣ́нїихъ є҆гѡ̀ до́брѣ жи́тельствовавше, тꙋ́не прїѧ́сте, тꙋ́не подава́ете, и҆сцѣлѧ́юще стра̑сти дꙋ́шъ и҆ тѣле́съ на́шихъ.
И҆ ны́нѣ, гла́съ то́йже:
При́зри на молє́нїѧ твои́хъ ра̑бъ всенепоро́чнаѧ, ᲂу҆толѧ́ющи лю̑таѧ на ны̀ воста̑нїѧ, всѧ́кїѧ ско́рби на́съ и҆змѣнѧ́ющи: тѧ́ бо є҆ди́нꙋ тве́рдое и҆ и҆звѣ́стное ᲂу҆твержде́нїе и҆́мамы, и҆ твоѐ предста́тельство стѧжа́хомъ, да не постыди́мсѧ влⷣчце, тѧ̀ призыва́ющїи. потщи́сѧ на ᲂу҆моле́нїе, тебѣ̀ вѣ́рнѡ вопїю́щихъ: ра́дꙋйсѧ влⷣчце, всѣ́хъ по́моще, ра́досте и҆ покро́ве, и҆ сп҃се́нїе дꙋ́шъ на́шихъ.
Сла́ва, и҆ ны́нѣ:
Гдⷭ҇и поми́лꙋй, три́жды.
Бл҃гословѝ. И҆ ѿпꙋ́стъ.
Хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре: си́лою чⷭ҇тна́гѡ и҆ животворѧ́щагѡ крⷭ҇та̀: ст҃а́гѡ сла́внагѡ и҆ всехва́льнагѡ а҆пⷭ҇ла і҆а́кѡва, и҆ пе́рвагѡ а҆рхїере́а і҆ерꙋсали́мскаго, бра́та бж҃їѧ, и҆ всѣ́хъ ст҃ы́хъ, сп҃се́тъ и҆ поми́лꙋетъ на́съ, ꙗ҆́кѡ бл҃гъ и҆ чл҃вѣколю́бецъ.
И҆ полага́етъ покло́нъ прїе́мый мл҃твома́слїе, глаго́лѧ:
Бл҃гослови́те ѻ҆тцы̀ ст҃і́и, прости́те мѧ̀ грѣ́шнаго. Три́жды.
И҆ прїи́мъ ѿ ни́хъ бл҃гослове́нїе и҆ проще́нїе, ѿхо́дитъ бл҃годарѧ̀ бг҃а.