[глⷡ҇а м҃] Чи́нъ бл҃гослове́нїѧ и҆ ѡ҆сщ҃е́нїѧ і҆кѡ́ны прест҃ы́ѧ живонача́льныѧ трⷪ҇цы, во ѡ҆́бразѣ трїе́хъ а҆́гг҃лѡвъ, и҆лѝ креще́нїѧ, и҆лѝ преѡбраже́нїѧ, и҆лѝ соше́ствїѧ ст҃а́гѡ дх҃а.
І҆ере́й ѻ҆бы́чнѡ по пред̾ꙋка́занномꙋ ѡ҆́бразꙋ наче́нъ, соверши́тъ всѐ да́же до ѱалма̀.
Здѣ́ же чте́тсѧ ѱало́мъ ѯ҃ѕ:
Бж҃е ᲂу҆ще́дри ны̀, и҆ бл҃гослови́ ны: просвѣтѝ лицѐ твоѐ на ны̀, и҆ поми́лꙋй ны̀. Позна́ти на землѝ пꙋ́ть тво́й, во всѣ́хъ ꙗ҆зы́цѣхъ сп҃се́нїе твоѐ. Да и҆сповѣ́дѧтсѧ тебѣ̀ лю́дїе бж҃е, да и҆сповѣ́дѧтсѧ тебѣ̀ лю́дїе всѝ. Да возвеселѧ́тсѧ и҆ да возра́дꙋютсѧ ꙗ҆зы́цы, ꙗ҆́кѡ сꙋ́диши лю́демъ правото́ю, и҆ ꙗ҆зы́ки на землѝ наста́виши. Да и҆сповѣ́дѧтсѧ тебѣ̀ лю́дїе бж҃е, да и҆сповѣ́дѧтсѧ тебѣ̀ лю́дїе всѝ. Землѧ̀ дадѐ пло́дъ сво́й: бл҃гослови́ ны бж҃е, бж҃е на́шъ. Бл҃гослови́ ны бж҃е, и҆ да ᲂу҆боѧ́тсѧ є҆гѡ̀ всѝ концы̀ землѝ.
Сла́ва, и҆ ны́нѣ: А҆ллилꙋ́їа, три́жды.
Дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
І҆ере́й же чте́тъ мл҃твꙋ сїю̀:
Гдⷭ҇и бж҃е, въ трⷪ҇цѣ ст҃ѣ́й сла́вимый, є҆го́же ни ᲂу҆́мъ пости́гнꙋти мо́жетъ, нижѐ сло́во сказа́ти возмога́етъ, є҆го́же никто́же ѿ человѣ̑къ нигдѣ́же ви́дѣ, то́чїю ꙗ҆́коже ѿ ст҃ы́хъ писа́нїй и҆ бг҃огла́сныхъ а҆пⷭ҇лѡвъ ᲂу҆че́нїй наꙋчи́хомсѧ, си́це вѣ́рꙋемъ, и҆ си́це тебѐ бг҃а ѻ҆ц҃а̀ безнача́льнаго, и҆ сн҃а твоего̀ є҆диносꙋ́щнаго, и҆ дх҃а твоего̀ сопресто́льнаго и҆ соесте́ственнаго и҆сповѣ́дꙋемъ. И҆ ꙗ҆́коже писа́нїе на́мъ ве́тхое повѣствꙋ́етъ ѡ҆ ꙗ҆вле́нїи твое́мъ во ѡ҆́бразѣ трїе́хъ а҆́гг҃лѡвъ, ѻ҆́номꙋ пресла́вномꙋ патрїа́рхꙋ а҆враа́мꙋ бы́вшемъ: въ но́вѣй же бл҃года́ти ѻ҆ц҃ъ во гла́сѣ, сн҃ъ пло́тїю во і҆ѻрда́нѣ, дх҃ъ же ст҃ы́й въ ви́дѣ голꙋби́нѣ ꙗ҆ви́сѧ. и҆ па́ки сн҃ъ, и҆́же пло́тїю вознесе́сѧ на нб҃о, и҆ ѡ҆деснꙋ́ю бг҃а сѣди́тъ, ᲂу҆тѣ́шителѧ дх҃а на а҆пⷭ҇лы въ видѣ́нїи ѻ҆́гненныхъ ѧ҆зы̑къ посла̀: и҆ на ѳавѡ́рѣ ѻ҆ц҃ъ во гла́сѣ, дх҃ъ ст҃ы́й во ѻ҆́блацѣ, сн҃ъ же въ пресвѣ́тломъ свѣ́тѣ ᲂу҆ченикѡ́мъ трїе́мъ показа́сѧ: си́це всегда́шнѧгѡ ра́ди воспомина́нїѧ, тебѐ є҆ди́наго сла́вимаго бг҃а не то́чїю ᲂу҆сты̀ и҆сповѣ́дꙋемъ, но и҆ ѡ҆́бразъ пи́шемъ, не є҆́же бг҃отвори́ти се́й, но є҆́же на́нь тѣле́сныма ѻ҆чи́ма взира́юще, ᲂу҆́мныма на тебѐ бг҃а на́шего зрѣ́ти, и҆ того̀ чтꙋ́ще, тебѐ созда́телѧ, и҆скꙋпи́телѧ и҆ ѡ҆ст҃и́телѧ на́шего сла́вити и҆ велича́ти и҆ твоѧ̑ неисчє́тнаѧ бл҃годѣѧ̑нїѧ воспомина́ти: по́честь бо ѡ҆́браза на первоѡбра́зное прехо́дитъ. Предло́жше ᲂу҆́бѡ і҆кѡ́нꙋ сїю̀ ны́нѣ пред̾ твои́мъ вели́чествомъ, бл҃гоче́стнымъ и҆́мже предрѣ́хомъ намѣ́ренїемъ, про́симъ и҆ мо́лимъ, и҆ твоемꙋ̀ бл҃гоꙋтро́бїю ми́ли сѧ дѣ́емъ, при́зри млⷭ҇тивнѡ на ню̀ и҆ низпослѝ нбⷭ҇ное твоѐ бл҃гослове́нїе, и҆ во и҆́мѧ твоѐ трист҃о́е бл҃гословѝ и҆ ѡ҆ст҃ѝ ю҆̀, во є҆́же сїю̀ бл҃гоче́стнѡ чтꙋ́щїи, и҆ пред̾ не́ю тебѣ̀ смире́ннѡ кла́нѧющїисѧ, и҆ вѣ́рнѡ молѧ́щїисѧ ѡ҆брѧ́щꙋтъ млⷭ҇ть, и҆ бл҃года́ть полꙋ́чатъ, и҆ ѿ всѣ́хъ бѣ́дъ и҆ скорбе́й свобо́дны бꙋ́дꙋтъ, грѣхѡ́въ же проще́нїе полꙋ́чатъ, и҆ црⷭ҇твїѧ нбⷭ҇нагѡ сподо́бѧтсѧ: бл҃года́тїю и҆ щедро́тами, и҆ чл҃вѣколю́бїемъ тебѐ є҆ди́нагѡ въ трⷪ҇цѣ сла́вимагѡ бг҃а, ѻ҆ц҃а̀, и҆ сн҃а, и҆ ст҃а́гѡ дх҃а, є҆мꙋ́же сла́ва, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: а҆ми́нь.
І҆ере́й: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Дїа́конъ: Главы̑ ва́шѧ гдⷭ҇еви приклони́те.
І҆ере́й же чте́тъ мл҃твꙋ сїю̀ та́йнѡ:
Гдⷭ҇и бж҃е, въ трⷪ҇цѣ ст҃ѣ́й сла́вимый и҆ покланѧ́емый, ᲂу҆слы́ши ны́нѣ мл҃твꙋ на́шꙋ, и҆ низпослѝ бл҃гослове́нїе твоѐ бж҃е́ственное нбⷭ҇ное, и҆ бл҃гословѝ, и҆ ѡ҆ст҃ѝ ѡ҆́бразъ се́й ѡ҆кропле́нїемъ воды̀ сеѧ̀ сщ҃е́нныѧ, въ сла́вꙋ твою̀ и҆ во сп҃се́нїе люде́й твои́хъ.
И҆ возглаша́етъ: Ты́ бо є҆сѝ ѡ҆сщ҃е́нїе на́ше, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: а҆ми́нь.
І҆ере́й же кропи́тъ сщ҃е́нною водо́ю ѡ҆́бразъ, глаго́лѧ:
Ѡ҆сщ҃а́етсѧ ѡ҆́бразъ се́й бл҃года́тїю прест҃а́гѡ дх҃а, ѡ҆кропле́нїемъ воды̀ сеѧ̀ сщ҃е́нныѧ, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь. Три́жды.
А҆́бїе же чте́тъ, и҆лѝ пое́тъ стїхи́рꙋ сїю̀, гла́съ и҃:
Прїиди́те лю́дїе, трїѷпоста́сномꙋ бж҃ествꙋ̀ поклони́мсѧ, сн҃ꙋ во ѻ҆ц҃ѣ̀, со ст҃ы́мъ дх҃омъ: ѻ҆ц҃ъ бо безлѣ́тнѡ родѝ сн҃а соприсносꙋ́щна и҆ сопресто́льна, и҆ дх҃ъ ст҃ы́й бѣ̀ во ѻ҆ц҃ѣ̀ съ сн҃омъ прославлѧ́емь: є҆ди́на си́ла, є҆ди́но сꙋщество̀, є҆ди́но бж҃ество̀. є҆мꙋ́же покланѧ́ющесѧ всѝ глаго́лемъ: ст҃ы́й бж҃е, всѧ̑ содѣ́ѧвый сн҃омъ, содѣ́йствомъ ст҃а́гѡ дх҃а: ст҃ы́й крѣ́пкїй, и҆́мже ѻ҆ц҃а̀ позна́хомъ, и҆ дх҃ъ ст҃ы́й прїи́де въ мі́ръ: ст҃ы́й безсме́ртный, ᲂу҆тѣ́шительный дш҃е, ѿ ѻ҆ц҃а̀ и҆сходѧ́й, и҆ въ сн҃ѣ почива́ѧй, трⷪ҇це ст҃а́ѧ, сла́ва тебѣ̀.
Вѣ́стно же бꙋ́ди, ꙗ҆́кѡ а҆́ще і҆кѡ́на бꙋ́детъ ст҃ы́ѧ трⷪ҇цы, сїѧ̀ стїхи́ра пое́тсѧ. А҆́ще же бг҃оѧвле́нїѧ и҆лѝ преѡбраже́нїѧ, и҆лѝ соше́ствїѧ ст҃а́гѡ дꙋ́ха, пое́тсѧ и҆лѝ чте́тсѧ тропа́рь и҆ конда́къ пра́здничный, и҆ ѿпꙋ́стъ пра́здничный быва́етъ.