[глⷡ҇а м҃ѕ] Бл҃гослове́нїе крⷭ҇та̀ къ ноше́нїю на пе́рсехъ.
Полага́емь быва́етъ сицевы́й крⷭ҇тъ на бж҃е́ственной трапе́зѣ, и҆ по соверше́нїи бж҃е́ственныѧ лїтꙋргі́и, и҆лѝ ᲂу҆́трени, и҆лѝ часѡ́въ, и҆лѝ вече́рни, пре́жде ѿпꙋ́ста чте́тъ і҆ере́й: Цр҃ю̀ нбⷭ҇ный: Трист҃о́е. Ѻ҆́ч҃е на́шъ: И҆ тропарѝ сїѧ̑: Сп҃сѝ гдⷭ҇и лю́ди твоѧ̑: Сла́ва: Вознесы́йсѧ на крⷭ҇тъ во́лею: И҆ ны́нѣ: Предста́тельство хрⷭ҇тїа́нъ:
И҆ по си́хъ ре́къ, Гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
І҆ере́й чте́тъ мл҃твꙋ сїю̀:
Гдⷭ҇и і҆и҃се хрⷭ҇тѐ бж҃е на́шъ, на дре́вѣ крⷭ҇тномъ во́лею сп҃се́нїѧ на́шегѡ ра́ди пригвозди́тисѧ восхотѣ́вый, и҆ пречⷭ҇тно́ю свое́ю кро́вїю сїѐ ѡ҆ст҃и́ти и҆зво́ливый, и҆ крⷭ҇то́мъ свои́мъ ѿ рабо́ты вра́жїѧ мі́ръ и҆скꙋпи́вый, и҆ дре́внее рꙋкописа́нїе врага̀ на́шегѡ дїа́вола крⷭ҇то́мъ растерза́вый, и҆ ро́дъ человѣ́ческїй ѿ мꙋчи́тельства є҆гѡ̀ тѣ́мъ свободи́вый, тебѐ смире́ннѡ мо́лимъ: при́зри млⷭ҇тивнѡ на зна́менїе сїѐ крⷭ҇тное, и҆ низпослѝ бж҃е́ственное твоѐ бл҃гослове́нїе и҆ бл҃года́ть, и҆ пода́ждь є҆мꙋ̀ си́лꙋ и҆ крѣ́пость, ꙗ҆́кѡ да всѧ́къ, и҆́же въ воспомина́нїе. сп҃си́тельныхъ твои́хъ стрⷭ҇те́й, и҆ животво́рныѧ твоеѧ̀ сме́рти, и҆ въ сохране́нїе и҆ въ защище́нїе дꙋшѝ и҆ тѣ́ла на себѣ̀ носи́ти бꙋ́детъ, нбⷭ҇ное бл҃гослове́нїе и҆ по́мощь въ не́мъ прїѧ́ти сподо́битсѧ. И҆ ꙗ҆́коже же́злъ а҆арѡ́новъ, къ ѿраже́нїю сопроти́вныхъ невѣ́рствїѧ, и҆ и҆спражне́нїю волше́бныхъ мечта́нїй бл҃гослови́лъ є҆сѝ: си́це и҆ сїѐ зна́менїе крⷭ҇тное бл҃гословѝ, и҆ сопроти́въ всѣ̑мъ ко́знемъ дїа̑вольскимъ твоегѡ̀ застꙋпле́нїѧ по́мощь въ нѐ вле́й, ꙗ҆́кѡ да всѧ́комꙋ на себѣ̀ носѧ́щемꙋ є҆̀, защище́нїе и҆ соблюде́нїе ѿ всѧ́кагѡ ѕла̀ дꙋшѝ и҆ тѣ́ла сп҃си́тельное, и҆ въ ᲂу҆множе́нїе въ не́мъ дх҃о́вныхъ твои́хъ дарова́нїй, и҆ хрⷭ҇тїа́нскихъ добродѣ́телей твое́ю бл҃года́тїю бꙋ́детъ. Ты́ бо є҆сѝ бл҃гословлѧ́ѧй и҆ ѡ҆сщ҃а́ѧй всѧ́чєскаѧ, хрⷭ҇тѐ бж҃е на́шъ, и҆ тебѣ̀ сла́вꙋ, бл҃годаре́нїе и҆ поклоне́нїе возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: а҆ми́нь.
І҆ере́й: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Дїа́конъ: Главы̑ ва́шѧ гдⷭ҇еви приклони́те.
Ли́къ: Тебѣ̀ гдⷭ҇и.
І҆ере́й же, прекло́нь главꙋ̀, чте́тъ та́йнѡ мл҃твꙋ сїю̀:
Гдⷭ҇и і҆и҃се хрⷭ҇тѐ бж҃е на́шъ, въ высо́кихъ живы́й, и҆ на смирє́нныѧ призира́ѧй, твоѝ рабѝ недосто́йнїи своѧ̑ тебѣ̀ приклони́хомъ вы̑ѧ се́рдца на́шегѡ и҆ тѣлесѐ, и҆ смире́ннѡ мо́лимъ тѧ̀, послѝ нбⷭ҇ное твоѐ бл҃гослове́нїе на зна́менїе сїѐ крⷭ҇тное, и҆ въ ѡ҆кропле́нїи сщ҃е́нныѧ воды̀ и҆спо́лни є҆̀ твоеѧ̀ си́лы и҆ крѣ́пости, къ прогна́нїю и҆ разоре́нїю всѧ́кїѧ дїа́вольскїѧ ко́зни: всѧ́комꙋ же носѧ́щемꙋ на себѣ̀ сїѐ, вѣ́рномꙋ рабꙋ̀ твоемꙋ̀, да́ждь бы́ти защище́нїе дꙋшѝ и҆ тѣ́ла, ѿ лица̀ вра̑гъ ви́димыхъ и҆ неви́димыхъ и҆ ѿ всѧ́кагѡ ѕла̀, и҆ въ ᲂу҆множе́нїе твоеѧ̀ бл҃года́ти. Ты́ бо є҆сѝ ѡ҆сщ҃е́нїе на́ше хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ, и҆ при́снѡ, и҆ во вѣ́ки вѣкѡ́въ.
Ли́къ: а҆ми́нь.
І҆ере́й же взе́мъ сщ҃е́ннꙋю во́дꙋ, кропи́тъ є҆́ю крⷭ҇тъ, глаго́лѧ:
Бл҃гословлѧ́етсѧ и҆ ѡ҆сщ҃а́етсѧ зна́менїе сїѐ крⷭ҇тное ѡ҆кропле́нїемъ воды̀ сеѧ̀ сщ҃е́нныѧ, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь. Три́жды.
И҆ а҆́бїе твори́тъ ѻ҆бы́чный ѿпꙋ́стъ, и҆ ѿдае́тъ крⷭ҇тъ томꙋ̀, є҆гѡ́же є҆́сть, въ сла́вꙋ бж҃їю.