Чи́нъ бл҃гослове́нїѧ но́вагѡ до́мꙋ, въ не́мже хо́щетъ кто̀ пе́рвѣе всели́тисѧ.

Прише́дъ і҆ере́й въ до́мъ, є҆го́же бл҃гослови́ти и҆́мать, соверша́етъ ма́лое ѡ҆свѧще́нїе воды̀. Мо́жетъ же и҆ и҆мѣ́ти съ собо́ю свѧще́ннꙋю во́дꙋ въ сосꙋ́дѣ (а҆́ще по чемꙋ́либо не и҆́мать бы́ти ѡ҆свѧще́нїѧ воды̀ въ до́мѣ) и҆ є҆ле́й въ дрꙋго́мъ сосꙋ́дѣ, и҆мѣ́ющемꙋ же бы́ти нача́лꙋ бл҃гослове́нїѧ, на ко́ейждо ѿ четы́рехъ стѣ́нъ да бꙋ́детъ кре́стъ напи́санъ: Посе́мъ начина́етъ ѻ҆бы́чнѡ: Бл҃гослове́нъ бг҃ъ на́шъ: и҆ а҆́бїе пое́тъ съ кли́рїки: Цр҃ю̀ небе́сный: По сконча́нїи же пѣ́нїѧ, чте́мъ: Трист҃о́е. Ѻ҆́ч҃е на́шъ: Гдⷭ҇и поми́лꙋй, в҃і. Сла́ва, и҆ ны́нѣ: Прїиди́те, поклони́мсѧ: три́жды, и҆ ѱало́мъ ч҃: Живы́й въ по́мощи вы́шнѧгѡ: По ѱалмѣ́ же чте́тъ, и҆лѝ пое́тъ тропа́рь се́й, гла́съ и҃:

Ꙗ҆́коже закхе́евꙋ до́мꙋ твои́мъ, хрⷭ҇тѐ, вхо́домъ спасе́нїе бы́сть, си́це и҆ ны́нѣ вхо́домъ свѧще́нныхъ слꙋжи́телей твои́хъ, и҆ съ ни́ми ст҃ы́хъ твои́хъ а҆́гг҃лъ, ми́ръ тво́й пода́ждь до́мꙋ семꙋ̀, и҆ ми́лостивнѡ бл҃гословѝ є҆го̀, спаса́ѧ и҆ просвѣща́ѧ всѣ́хъ жи́ти хотѧ́щихъ въ не́мъ.

Сꙋ́щей же трапе́зѣ ᲂу҆брꙋ́сомъ покры́той, є҆ѵⷢ҇лїю и҆ крⷭ҇тꙋ̀ на не́й, и҆ свѣща́мъ горѧ́щымъ, и҆ водѣ̀ свѧще́ннѣй и҆ є҆ле́ю сꙋ́щымъ, ста́въ і҆ере́й къ восто́кꙋ лице́мъ и҆ ре́къ: Гдⷭ҇ꙋ помо́лимсѧ, Гдⷭ҇и поми́лꙋй.

Чте́тъ моли́твꙋ сїю̀ во ᲂу҆слыша́нїе всѣ̑мъ:

Гдⷭ҇и і҆и҃се хрⷭ҇тѐ бж҃е на́шъ, и҆зво́ливый под̾ сѣ́нь закхе́а мытарѧ̀ вни́ти, и҆ спасе́нїе томꙋ̀ и҆ всемꙋ̀ до́мꙋ є҆гѡ̀ бы́вый: са́мъ и҆ ны́нѣ здѣ̀ жи́ти хотѧ́щихъ, и҆ на́ми недосто́йными молбы̑ тебѣ̀ и҆ молє́нїѧ приносѧ́щихъ, ѿ всѧ́кагѡ ѕла̀ неврежде́нныхъ соблюдѝ, бл҃гословлѧ́ѧ и҆̀хъ и҆ ѻ҆бита́лище сїѐ, и҆ ненавѣ́тенъ тѣ́хъ живо́тъ вы́нꙋ сохранѧ́ѧ, и҆з̾ѻби́лнѡ всѧ̑ блага̑ѧ твоѧ̑ и҆̀мъ твои́мъ бл҃гослове́нїемъ на по́лзꙋ подава́ѧй. Ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь. І҆ере́й: Ми́ръ всѣ̑мъ. Ли́къ: И҆ дꙋ́хови твоемꙋ̀. І҆ере́й: Главы̑ ва́шѧ Гдⷭ҇еви приклони́те. Ли́къ: Тебѣ̀ гдⷭ҇и. И҆ чте́тъ і҆ере́й та́йнѡ моли́твꙋ сїю̀:

Влады́ко го́споди бж҃е на́шъ, на высо́кихъ живы́й и҆ на смирє́нныѧ призира́ѧй, бл҃гослови́вый до́мъ лава́новъ при вхо́дѣ і҆а́кѡва, и҆ до́мъ пенте́фрїевъ при вхо́дѣ і҆ѡ́сифовѣмъ: бл҃гослови́вый до́мъ а҆веда́рїинъ внесе́нїемъ кївѡ́та, и҆ во дни̑ прише́ствїѧ во пло́ти хрⷭ҇та̀ бг҃а на́шегѡ, спасе́нїе до́мꙋ закхе́евꙋ дарова́вый. Са́мъ бл҃гословѝ и҆ до́мъ се́й, и҆ въ не́мъ жи́ти хотѧ́щихъ стра́хомъ твои́мъ ѡ҆градѝ, и҆ невреди́мыхъ ѿ сопроти́вныхъ сохранѝ, и҆ бл҃гослове́нїе твоѐ съ высоты̀ жили́ща твоегѡ̀ низпослѝ и҆̀мъ, и҆ бл҃гословѝ и҆ ᲂу҆мно́жи всѧ̑ блага̑ѧ въ до́мѣ се́мъ.

Возгла́съ: Твое́ бо є҆́сть, є҆́же ми́ловати и҆ спаса́ти ны̀, бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

А҆́бїе же посе́мъ зна́менавъ три́жды є҆ле́й, глаго́летъ:

Во и҆́мѧ ѻ҆ц҃а̀, и҆ сн҃а, и҆ ст҃а́гѡ дꙋ́ха, а҆ми́нь. И҆ чте́тъ над̾ ни́мъ моли́твꙋ сїю̀: Гдⷭ҇и бж҃е на́шъ, при́зри ны́нѣ ми́лостивнѡ на моли́твꙋ менѐ смире́ннагѡ и҆ недосто́йнагѡ раба̀ твоегѡ̀, и҆ низпослѝ бл҃года́ть прест҃а́гѡ твоегѡ̀ дх҃а на є҆ле́й се́й, и҆ ѡ҆ст҃ѝ є҆го̀, ꙗ҆́кѡ да бꙋ́детъ во ѡ҆свѧще́нїе мѣ́стꙋ семꙋ̀ и҆ на не́мъ соѡрꙋже́ннꙋ до́мꙋ, и҆ на прогна́нїе всѧ́кїѧ сопроти́вныѧ си́лы и҆ сатани́нскихъ навѣ́тѡвъ. Ты́ бо є҆сѝ бл҃гословлѧ́ѧй и҆ ѡ҆свѧща́ѧй всѧ́чєскаѧ, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь. По моли́твѣ же взе́млетъ свѧще́ннꙋю во́дꙋ, и҆ кропи́тъ є҆́ю всѧ̑ стѣ̑ны до́мꙋ ѻ҆́крестъ и҆ всѧ̑ клѣ̑ти є҆гѡ̀, глаго́лѧ:

Во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, ѡ҆кропле́нїемъ воды̀ сеѧ̀ свѧще́нныѧ, въ бѣ́гство да претвори́тсѧ всѐ лꙋка́вое бѣсо́вское дѣ́йство, а҆ми́нь.

Ѡ҆кропи́въ же всѐ, взе́мъ є҆ле́й, помазꙋ́етъ и҆́мъ стѣ́ны до́ма, и҆дѣ́же є҆́сть кре́стъ напи́санъ въ среди́нѣ є҆гѡ̀, наче́нъ ѿ восто́чныѧ стѣны̀ до́ма, посе́мъ и҆ за́паднꙋю, и҆ по си́хъ сѣ́вернꙋю, въ коне́цъ же ю҆́жнꙋю стѣ́нꙋ, надъ ко́ейждо глаго́летъ:

Бл҃гословлѧ́етсѧ до́мъ се́й пома́занїемъ свѧта́гѡ є҆ле́а сегѡ̀, во и҆́мѧ ѻ҆ц҃а̀, и҆ сн҃а, и҆ ст҃а́гѡ дꙋ́ха, а҆ми́нь.

По соверше́нїи пома́занїѧ є҆ле́емъ, сожига́етъ пома́занїе свѣщы̀ горѧ́щими, на ко́ейждо стѣнѣ̀. Семꙋ́ же быва́ющꙋ, пѣвцы̀ пою́тъ стїхи́рꙋ сїю̀ гла́съ є҃:

Бл҃гословѝ, гдⷭ҇и, до́мъ се́й, и҆ и҆спо́лни є҆го̀ земны́хъ твои́хъ бла̑гъ, и҆ въ не́мъ бл҃гоче́стнѡ жи́ти хотѧ́щихъ ѿ всѧ́кагѡ ѕла́гѡ ѡ҆бстоѧ́нїѧ неврежде́нныхъ сохранѝ, и҆ всѧ́кое и҆з̾ѻби́лїе небе́снагѡ и҆ земна́гѡ твоегѡ̀ бл҃гослове́нїѧ тѣ̑мъ да́рꙋй, и҆ ꙗ҆́кѡ ще́дръ поми́лꙋй, по вели́цѣй твое́й ми́лости.

По ѡ҆конча́нїи пома́занїѧ, станови́тсѧ і҆ере́й лице́мъ къ восто́кꙋ, и҆ а҆́ще и҆зво́литъ, чте́тъ и҆ є҆ѵⷢ҇лїе, ре́къ:

Премꙋ́дрость про́сти, ᲂу҆слы́шимъ ст҃а́гѡ є҆ѵⷢ҇лїа, и҆ прѡ́чаѧ. Ѿ лꙋкѝ ст҃а́гѡ є҆ѵⷢ҇лїа чте́нїе. Ли́къ: Сла́ва тебѣ̀ гдⷭ҇и: И҆ чте́тъ ѿ лꙋкѝ зача́ло ч҃д.

Во вре́мѧ ѻ҆́но, прїи́де і҆и҃съ во і҆ерїхѡ́нъ. И҆ сѐ мꙋ́жъ нарица́емый закхе́й, и҆ се́й бѣ̀ ста́рѣй мытарє́мъ, и҆ то́й бѣ̀ бога́тъ: и҆ и҆ска́ше ви́дѣти і҆и҃са, кто́ є҆сть, и҆ не можа́ше ѿ наро́да, ꙗ҆́кѡ во́зрастомъ ма́лъ бѣ̀: и҆ предите́къ, возлѣ́зе на ꙗ҆́годичинꙋ, да ви́дитъ, ꙗ҆́кѡ хотѧ́ше ми́мѡ є҆ѧ̀ проитѝ. И҆ ꙗ҆́кѡ прїи́де на мѣ́сто, воззрѣ́въ і҆и҃съ ви́дѣ є҆го̀, и҆ речѐ къ немꙋ̀: закхе́е, потща́всѧ слѣ́зи: дне́сь бо въ домꙋ̀ твое́мъ подоба́етъ мѝ бы́ти. И҆ потща́всѧ слѣ́зе, и҆ прїѧ́тъ є҆го̀ ра́дꙋѧсѧ. И҆ ви́дѣвше всѝ ропта́хꙋ, глаго́люще, ꙗ҆́кѡ ко грѣ́шнꙋ мꙋ́жꙋ вни́де вита́ти. Ста́въ же закхе́й речѐ ко гдⷭ҇ꙋ: сѐ по́лъ и҆мѣ́нїѧ моегѡ̀, гдⷭ҇и, да́мъ ни́щымъ: и҆ а҆́ще кого̀ чи́мъ ѡ҆би́дѣхъ, возвращꙋ̀ четвери́цею. Рече́ же къ немꙋ̀ і҆и҃съ: ꙗ҆́кѡ дне́сь спⷭ҇нїе до́мꙋ семꙋ̀ бы́сть, занѐ и҆ се́й сы́нъ а҆враа́мль є҆́сть: прїи́де бо сн҃ъ чл҃вѣ́чь взыска́ти и҆ спⷭ҇тѝ поги́бшаго.

Ли́къ: Сла́ва тебѣ̀ гдⷭ҇и:

И҆ а҆́бїе чтꙋ́тъ ѱало́мъ р҃: Млⷭ҇ть и҆ сꙋ́дъ воспою̀ тебѣ̀, гдⷭ҇и:

І҆ере́й кади́тъ ве́сь до́мъ. По се́мъ же глаго́летъ є҆ктенїю̀ сїю̀:

Поми́лꙋй на́съ, бж҃е, по вели́цѣй ми́лости твое́й, мо́лимтисѧ, ᲂу҆слы́ши и҆ поми́лꙋй.

Ли́къ: Гдⷭ҇и поми́лꙋй. Три́жды.

Є҆щѐ мо́лимсѧ ѡ҆ є҆́же низпосла́ти бл҃гослове́нїе своѐ на до́мъ се́й и҆ на раба̀ своего̀ (и҆лѝ рабꙋ̀ свою̀) и҆́мⷬ҇къ, и҆ на всѣ́хъ въ не́мъ бл҃гоче́стнѡ жи́ти хотѧ́щихъ, и҆ посла́ти и҆̀мъ а҆́гг҃ла своего̀ ми́лостива, соблюда́юща и҆ сохранѧ́ща и҆̀хъ ѿ всѧ́кагѡ ѕла̀, и҆ наставлѧ́юща къ дѣ́ланїю всѣ́хъ добродѣ́телей, и҆ ко и҆сполне́нїю ст҃ы́хъ хрⷭ҇то́выхъ за́повѣдей: и҆ ѡ҆ є҆́же сохрани́ти и҆̀хъ ѿ гла́да, гꙋби́тельства, трꙋ́са, пото́па, ѻ҆гнѧ̀. меча̀ и҆ наше́ствїѧ и҆ноплемє́нникъ. и҆ всѧ́кїѧ смертоно́сныѧ ра́ны, и҆ дарова́ти и҆̀мъ здра́вїе, и҆ долгоде́нствїемъ ѡ҆гради́ти и҆̀хъ. и҆ во все́мъ ᲂу҆гобзи́ти, рце́мъ всѝ, гдⷭ҇и, ᲂу҆слы́ши и҆ поми́лꙋй.

Є҆щѐ мо́лимсѧ за всю̀ бра́тїю и҆ за всѧ̀ хрⷭ҇тїа́ны.

Возгла́съ: Оу҆слы́ши ны̀, бж҃е сп҃си́телю на́шъ, ᲂу҆пова́нїе всѣ́хъ конце́въ землѝ, и҆ сꙋ́щихъ въ мо́ри дале́че, и҆ ми́лостивъ, ми́лостивъ бꙋ́ди, влⷣко, ѡ҆ грѣсѣ́хъ на́шихъ, и҆ поми́лꙋй ны̀: ми́лостивъ бо и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: А҆ми́нь.

И҆ твори́тъ дне́вный ѻ҆бы́чный ѿпꙋ́стъ, и҆ многолѣ́тствовавъ до́мꙋ влады́цѣ, ѿхо́дитъ во своѧ̑си, бл҃годарѧ̀ бг҃а.


Комментарии для сайта Cackle