Неделя Антипасхи

Еже есть осязание святаго славнаго апостола Фомы.

Ведати подобает, яко в сей святой день второй Недели Антипасхи не поются воскресная, но вся праздника.

клеплет параекклисиарх, и, собравшеся в притвор, благословившу иерею, глаголем: Христо́с воскре́се: трижды. Посем Трисвятое и обычный девятый час трипсалмный, якоже на всяк день. По трипсалмии, Слава: и глаголем тропарь воскресен, 8–го гласа:

С высоты́ снизше́л еси́, Благоутро́бне,/ погребе́ние прия́л еси́ тридне́вное,/ да нас свободи́ши страсте́й,// Животе́ и Воскресе́ние на́ше, Го́споди, сла́ва Тебе́.

По Трисвятом кондак Пасхи: А́ще и во гроб:

Благословившу иерею, глаголем: Христо́с воскре́се: трижды. Таже псалом: Благослови́, душе́ моя́, Го́спода:

На Го́споди, воззва́х: стихиры на 4, глас 1.

Подобен: Небе́сных чино́в:

Стих: От стра́жи у́тренния до но́щи, от стра́жи у́тренния,/ да упова́ет Изра́иль на Го́спода.

Терпи́т Христо́с человеколю́бно и осяза́ния,/ я́коже и Крест пре́жде сего́,/ и непра́ведное убие́ние,/ из гро́ба тридне́вно воскресы́й, печа́ти не разруши́,/ и, две́рем заключе́нным, ученико́м предста́в,// я́ко Всеси́лен.

Стих: Я́ко у Го́спода ми́лость, и мно́гое у Него́ избавле́ние,/ и Той изба́вит Изра́иля от всех беззако́ний его́.

Терпи́т Христо́с:

Стих: Хвали́те Го́спода, вси́ язы́цы,/ похвали́те Его́, вси́ лю́дие.

Фомино́ неве́рствие/ мироспаси́тельное Богочелове́ка Сло́ва,/ е́же из а́дских преиспо́дних, воста́ние уверя́ет,/ я́звы рук и ног де́рзостнее осяза́вшее/ ко увере́нию мирско́му// десни́цею любопы́тною.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Собра́нным стра́хом,/ и́же от Стра́сти Твоея́, апо́столом, Сло́ве,/ и две́рем заключе́нным,/ внеза́пу совше́л еси́ посреде́ их, мир да́руя/ и Фоме́ протяза́я осяза́ти// честны́я ребр Твои́х я́звы.

Слава, и ныне, глас 2:

По воста́нии Твое́м, Го́споди,/ собра́нным ученико́м Твои́м/ и две́рем заключе́нным,/ посреде́ стал еси́,/ мир подая́ им./ Уве́рився же и Фома́/ виде́нием руку́ и ребр Твои́х,/ Го́спода и Бо́га Тя испове́да,// спаса́ющаго упова́ющия на Тя, Человеколю́бче.

Таже: Све́те ти́хий: Прокимен: Госпо́дь воцари́ся:

На стиховне стихиры, глас 2.

Подобен: До́ме Евфра́фов:

Устна́ми чи́стыми/ по́йте со А́нгелы челове́цы/ Воскре́сшаго/ тридне́вно из гро́ба// и мир Совоздви́гшаго.

Стих: Похвали́, Иерусали́ме, Го́спода,/ хвали́ Бо́га твоего́, Сио́не.

Яви́лся еси́/ свяще́нным Твои́м, Спа́се, апо́столом,/ две́рем заключе́нным,/ те́ми обновля́я на́м// Боже́ственный Тво́й Ду́х.

Стих: Я́ко укрепи́ вереи́ врат твои́х/ и благослови́ сы́ны твоя́ в тебе́.

Ны́не Тя, Всецарю́,/ ви́девше не очи́ма,/ но серде́чною любо́вию,/ Бо́га ве́ровавше,// в пе́ниих велича́ем.

Слава, и ныне, глас и подобен тойже:

Дае́ши, о Изба́вителю,/ мир лю́дем Твои́м/ и долго́в разреше́ние/ моли́твами Всечи́стыя// и еди́ныя Богома́тере.

Таже: Ны́не отпуща́еши: Трисвятое. По О́тче наш: тропарь, глас 7:

Запеча́тану гро́бу,/ живо́т от гро́ба возсия́л еси́, Христе́ Бо́же,/ и, две́рем заключе́нным,/ ученико́м предста́л еси́,/ всех Воскресе́ние,/ Дух Пра́вый те́ми обновля́я нам// по вели́цей Твое́й ми́лости.

Повнегда благословити, поет иерей Христо́с воскре́се: трижды, во олтаре. Мы же допеваем: И су́щим во гробе́х: И абие поем предначинательный псалом: Благослови́, душе́ моя́, Го́спода: с пением, якоже есть обычай. Таже ектения великая, и по исполнении сего, стихословим: Блаже́н муж: кафисму 1–ю всю.

На Го́споди, воззва́х: поставим стихов 10. И поем стихиры самогласны, Новыя Недели.

Глас 1. Иоанна монаха.

Стих: Изведи́ из темни́цы ду́шу мою́/ испове́датися и́мени Твоему́.

Две́рем заключе́нным,/ ученико́м собра́нным,/ вшел еси́ внеза́пу, Всеси́льне Иису́се, Бо́же наш,/ и, став посреде́ их, мир дав,/ испо́лнил еси́ Свята́го Ду́ха;/ жда́ти же повеле́л еси́/ и ника́коже разлуча́тися от Иерусали́ма,/ до́ндеже облеку́тся е́же с высоты́ си́лою./ Те́мже вопие́м Ти:// Просвеще́ние и Воскресе́ние и Ми́ре наш, сла́ва Тебе́.

Стих: Мене́ ждут пра́ведницы,/ до́ндеже возда́си мне.

Две́рем заключе́нным:

Стих: Из глубины́ воззва́х к Тебе́, Го́споди,/ Го́споди, услы́ши глас мой.

По днех осми́х воста́ния Твоего́, Го́споди,/ яви́лся еси́ ученико́м Твои́м/ на ме́сте, иде́же бя́ху со́брани,/ и, возгласи́в им: мир вам,/ неве́рующему ученику́ ру́це показа́л еси́/ и пречи́стое ребро́./ Он же, ве́ровав, вопия́ше Тебе́:// Госпо́дь мой и Бог мой, сла́ва Тебе́.

Стих: Да бу́дут у́ши Твои́/ вне́млюще гла́су моле́ния моего́.

По днех осми́х:

Стих: А́ще беззако́ния на́зриши, Го́споди, Го́споди, кто постои́т?/ Я́ко у тебе́ очище́ние есть.

Фома́, глаго́лемый Близне́ц, не бе с ни́ми,/ егда́ вшел еси́, Христе́,/ заключе́нным две́рем:/ те́мже и не ве́роваше рече́нным ему́,/ от неве́рия в ве́ру известву́я./ Не несподо́бил же еси́, Бла́же,/ показа́ти ему́ пречи́стое ребро́ Твое́/ и руку́ и ногу́ я́звы./ Он же, осяза́в и ви́дев,/ испове́да Тебе́ бы́ти Бо́га не на́га/ и Челове́ка не про́ста/ и вопия́ше:// Госпо́дь мой и Бог мой, сла́ва Тебе́.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Фома́, глаго́лемый Близне́ц:

Стих: От стра́жи у́тренния до но́щи, от стра́жи у́тренния,/ да упова́ет Изра́иль на Го́спода.

Ученико́м сомня́щимся во осмы́й день предста́ Спас,/ иде́же бя́ху со́брани,/ и, мир дав, Фоме́ возопи́: / прииди́, апо́столе, осяжи́ дла́ни,/ в ни́хже гво́здия вонзо́ша./ О, до́брое неве́рие Фомино́/ ве́рных сердца́ в позна́ние приведе́/ и со стра́хом возопи́:// Госпо́дь мой и Бог мой, сла́ва Тебе́.

Стих: Я́ко у Го́спода ми́лость, и мно́гое у Него́ избавле́ние,/и Той изба́вит Изра́иля от всех беззако́ний его́.

Ученико́м сомня́щимся:

Глас 2.

Стих: Хвали́те Го́спода, вси́ язы́цы,/ похвали́те Его́, вси́ лю́дие.

По воста́нии Твое́м, Го́споди,/ собра́нным ученико́м Твои́м/ и две́рем заключе́нным,/ посреде́ стал еси́,/ мир подая́ им./ Ве́ровав же и Фома́/ зре́нием руку́ и ребр Твои́х,/ Го́спода и Бо́га Тя испове́да,// спаса́ющаго упова́ющия на Тя, Человеколю́бче.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Две́рем заключе́нным,/ предста́в Иису́с ученико́м,/ безстра́шие и мир дая́ше,/ та́же глаго́лет Фоме́:/ почто́ Мне не ве́руеши, я́ко воскресо́х из ме́ртвых?/ Принеси́ се́мо ру́ку твою́,/ и вложи́ в ре́бра Моя́, и ви́ждь./ Тебе́ бо неве́рующу,/ вси навыко́ша Стра́сти и Воскресе́ние Мое́ зва́ти с тобо́ю:// Госпо́дь мой и Бог мой, сла́ва Тебе́.

Слава, и ныне, глас 6. Иоанна монаха:

Две́рем заключе́нным,/ прише́л еси́, Христе́, ко ученико́м,/ тогда́ Фома́ смотри́тельно не обре́теся с ни́ми./ Глаго́лаше бо: не иму́ ве́ры,/ а́ще не уви́жду и аз Влады́ки./ Уви́жду ребро́, отону́дуже изы́де Кровь, вода́, креще́ние./ Уви́жду я́зву, от нея́же исцеле́ вели́кий струп челове́ческий./ Уви́жду, ка́ко не бе я́коже дух, но Плоть и ко́сти./ Смерть попра́вый и Фому́ уве́ривый// Го́споди, сла́ва Тебе́.

Вход. Све́те ти́хий: Прокимен дне: Госпо́дь воцари́ся:

Ектения сугубая: Рцем вси:

Таже: Сподо́би, Го́споди. И ектения просительная.

На литии стихиры, глас 4:

Го́споди, нестерпи́мым Твоего́ Божества́ блиста́нием,/ две́рем прише́л еси́ заключе́нным су́щим,/ и, став посреде́ ученико́в,/ ребро́ обнажи́л еси́,/ и язв Твое́ю руку́ и ногу́ стру́пы явля́я;/ печа́ль же и скорбь разреша́я,/ я́ве возгласи́л еси́:/ и́мже о́бразом во Мне ви́дите, о дру́зи,/ Пло́ти прия́тие,/ не ду́ха ношу́ естество́./ Сомня́щемуся же ученику́, повелева́л еси́ осяза́ти тре́петно,/ рек: испыта́в вся, гряди́, про́чее не сумни́ся./ Он же, ощуща́я руко́ю Твое́ сугу́бое существо́,/ со стра́хом вопия́ше ве́рно, ве́рою влеко́м:// Госпо́дь мой и Бог мой, сла́ва Тебе́.

Глас 8:

Прикосни́ся, Фомо́, ребру́ руко́ю, глаго́лет Христо́с,/ и о́бразы гвозде́й прииди́ осяжи́, ве́рою испыта́й,/ и бу́ди Ми ве́рен, и не бу́ди неве́рен./ Фома́ же: пе́рстом я́ко прикосну́ся Влады́це? вельми́ возопи́:/ Ты Бог мой и Госпо́дь,// Благоутро́бне, сла́ва Тебе́.

Слава, и ныне, глас 8. Анатолия:

Две́рем заключе́нным,/ ученико́м собра́нным, предста́ Спас,/ иде́же бя́ху со́брани,/ и, став посреде́ их, глаго́лет Фоме́:/ прииди́ осяжи́ и виждь о́бразы гвозде́й,/ простри́ ру́ку твою́ и косни́ся ребру́ Моему́, / и не бу́ди неве́рен,// но ве́рою пропове́ждь е́же из ме́ртвых Мое́ Воскресе́ние.

На стиховне стихиры самогласны, глас 4:

О, пресла́внаго чудесе́!/ Неве́рие ве́ру изве́стную роди́./ Рек бо Фома́: а́ще не ви́жду, не иму́ ве́ры./ Осяза́в же ре́бра, богосло́вит Воплоти́вшагося,/ Того́жде Сы́на Бо́жия позна́, я́ко пострада́вша Пло́тию,/ пропове́да воскре́сшаго Бо́га/ и возопи́ све́тлым гла́сом:// Госпо́дь мой и Бог мой, сла́ва Тебе́.

Стих: Похвали́, Иерусали́ме, Го́спода,/ хвали́ Бо́га твоего́, Сио́не.

О, пресла́внаго чудесе́! / Огню́ се́но косну́вшееся спасе́ся:/ вложи́в бо Фома́ ру́ку во о́гненная ре́бра Иису́са Христа́, Бо́га,/ не опали́ся осяза́нием./ Души́ бо злове́рство преложи́ на благове́рие,/ те́пле возопи́ от глубины́ душе́вныя:/ Влады́ка Ты еси́ и Бог мой,// из ме́ртвых воскресы́й, сла́ва Тебе́.

Стих: Я́ко укрепи́ вереи́ врат твои́х/ и благослови́ сы́ны твоя́ в тебе́.

О, пресла́внаго чудесе́! / Иоа́нн на пе́рси Сло́ва возлеже́, / Фома́ же ре́бра осяза́ти сподо́бися:/ но ов у́бо отону́ду/ стра́шно богосло́вия глубо́кое извлече́ смотре́ние,/ ов же сподо́бися тайнонаучи́ти нас./ Представля́ет бо показа́ния я́сно воста́ния Его́, вопия́:// Госпо́дь мо́й и Бо́г мо́й, сла́ва Тебе́.

Слава, и ныне, глас 5:

Человеколю́бче,/ ве́лие и безприкла́дное мно́жество щедро́т Твои́х:/ я́ко долготерпе́л еси́, от иуде́й зауша́емь,/ от апо́стола осяза́емь/ и от отмета́ющихся Тебе́ многоиспыту́емь,/ ка́ко воплоти́лся еси́?/ Ка́ко распя́лся еси́, Безгре́шне?/ Но вразуми́ ны́, я́ко Фому́, вопи́ти Тебе́:// Госпо́дь мо́й и Бо́г мо́й, сла́ва Тебе́.

Та́же: Ны́не отпуща́еши: Трисвято́е. И по О́тче наш: Тропа́рь, гла́с 7:

Запеча́тану гро́бу,/ живо́т от гро́ба возсия́л еси́, Христе́ Бо́же,/ и, две́рем заключе́нным,/ ученико́м предста́л еси́,/ всех Воскресе́ние,/ Дух Пра́вый те́ми обновля́я нам// по вели́цей Твое́й ми́лости. (Трижды.)

И благословение хлебов, и прочее обычно.

Аще несть бдения, по Ны́не отпуща́еши: и по О́тче наш: тропарь: Запеча́тану гро́бу: и отпуст.

Глаголем перед шестопсалмием: Христо́с воскре́се: трижды. Посем: Сла́ва в вы́шних Бо́гу: и прочая.

На Бог Госпо́дь: поем во глас 7 тропарь праздника трижды.

По 1–м стихословии седален, глас 1.

Подобен: Ка́мени запеча́тану:

Стра́ха ра́ди иуде́йска сокрове́нным ученико́м и в Сио́не собра́нным, вше́л еси́ к ни́м, Бла́же, и ста́л еси́ посреде́ и́х, две́рем заключе́нным, Радостотворя́й, и показа́л еси́ и́м ру́це и пречи́стых Твои́х ре́бр я́звы, глаго́ля неве́рующему ученику́: принеси́ ру́ку твою́ и испыта́й, я́ко Са́м А́з е́смь, тебе́ ра́ди Пострада́вый.

Слава, и ныне, тойже.

По 2–м стихословии седален, глас 1.

Подобен: Гроб Твой, Спа́се:

Предста́л еси́, Животе́, две́рем заключе́нным, Христе́, ученико́м, и ре́бра показа́в, и ру́це Твои́, и но́зе Твои́, е́же от гро́ба Твое́ воста́ние предуверя́я; но Фома́ не обре́теся, те́мже глаго́лаше: а́ще не узрю́ Его́, не ве́рую словесе́м ва́шим.

Слава, и ныне, тойже.

Таже полиелей, на немже величание:

Велича́ем Тя,/ Живода́вче Христе́,/ нас ра́ди во ад сше́дшаго// и с Собо́ю вся воскреси́вшаго.

Псалмы избраннии:

Госпо́дь воцари́ся, в ле́поту облече́ся,

Облече́ся Госпо́дь в си́лу и препоя́сася.

И́бо утверди́ вселе́нную, я́же не подви́жится.

По полиелее седален, глас 1.

Подобен: Гроб Твой, Спа́се:

Ви́дя Моя́ ре́бра и я́звы гвозде́й, Фомо́, что не ве́руеши Моему́ Воскресе́нию? Госпо́дь глаго́лаше, воскре́с от гро́ба, явля́яся апо́столом неизрече́нно. Близне́ц же, ве́ровав, вопия́ше Созда́телю: Бог мой еси́ и Госпо́дь.

Сла́ва, и ны́не, тойже.

Посем степенна, 1–й антифон 4–го гласа.

Прокимен, глас 4: Похвали́, Иерусали́ме, Го́спода,/ хвали́ Бо́га твоего́, Сио́не.

Стих: Я́ко укрепи́ вереи́ врат твои́х и благослови́ сы́ны твоя́ в тебе́.

Вся́кое дыха́ние:

Евангелие утреннее воскресно 1–е, от Матфея, зачало 116: Единиина́десять ученицы́:

Таже: Воскресе́ние Христо́во ви́девше: трижды. Псалом 50.

Слава: Моли́твами апо́столов: И ныне: Моли́твами Богоро́дицы: Поми́луй мя, Бо́же: Посем стихира:

Воскре́с Иису́с от гро́ба,/ я́коже прорече́,/ даде́ на́м живо́т ве́чный// и ве́лию ми́лость.

Таже молитва: Спаси́, Бо́же, лю́ди Твоя́:

Возглас: Ми́лостию и щедро́тами:

И абие канон праздника, творение Иоанна монаха. Ирмос по дважды, тропари же на 12. Глас 1.²

Песнь 1

Ирмос: Пои́м, вси лю́дие,/ от го́рькия рабо́ты фарао́ни Изра́иля Изме́ншему/ и во глубине́ морсте́й нога́ми немо́крыми Наста́вльшему// песнь побе́дную: я́ко просла́вися.

Днесь весна́ душа́м, зане́ Христо́с, от гро́ба я́коже со́лнце возсия́в тридне́вный, мра́чную бу́рю отгна́ греха́ на́шего. Того́ воспои́м, я́ко просла́вися.

Цари́ца време́н, светоно́сному дню, дней же царю́, я́вственнейши даронося́, кра́сит избра́нныя лю́ди церко́вныя, непреста́нно поя́ воскре́сшаго Христа́.

Врата́ сме́рти, Христе́, ниже́ гро́бныя печа́ти, ниже́ ключи́ две́рей Тебе́ проти́вишася: но воскре́с, предста́л еси́ друго́м Твои́м, Влады́ко, мир да́руяй, всяк ум преиму́щ.

Катавасия: Воскресе́ния день: оба лика вкупе.

Песнь 3

Ирмос: Утверди́ мене́, Христе́,/ на недви́жимом ка́мени за́поведей Твои́х/ и просвети́ мя све́том лица́ Твоего́:/ несть бо свят па́че Тебе́,// Человеколю́бче.

Но́выя вме́сто ве́тхих, вме́сто же тле́нных нетле́нная Кресто́м Твои́м, Христе́, соверши́в нас, во обновле́нии жи́зни жи́тельствовати досто́йно повеле́л еси́.

Во гро́бе заключе́н опи́санною Пло́тию Твое́ю, Неопи́санный Христе́, воскре́сл еси́: две́рем же заключе́нным, предста́л еси́ Твои́м ученико́м, Всеси́льне.

Я́звы Твоя́, Христе́, я́же во́лею претерпе́л еси́ за нас, ученико́м Твои́м, сохрани́в, свиде́тельство показа́л еси́ Твоего́ сла́внаго Воскресе́ния.

Ектения малая.

Посем ипакои, глас 6:

Я́ко посреде́ ученико́в Твои́х/ прише́л еси́, Спа́се, мир дая́ им:// прииди́ и к нам и спаси́ нас.

Песнь 4

Ирмос: Ве́лия та́йна Твоего́, Христе́, смотре́ния!/ Сию́ бо свы́ше прови́дя/ богозри́тельно Авваку́м:/ изше́л еси́, вопия́ше Тебе́,// во спасе́ние люде́й Твои́х, Человеколю́бче.

Же́лчи у́бо вкуси́, дре́внее вкуше́ние исцеля́я, ны́не же с со́том ме́да просвеще́ние подая́ Христо́с пра́отцу и Свое́ сла́дкое Прича́стие.

Ра́дуешися испыту́емь: те́мже, Человеколю́бче, на сие́ повелева́еши Фоме́, простира́я неве́рующему ре́бра, ми́рови уверя́я Твое́, Христе́, тридне́вное воста́ние.

Бога́тство поче́рп от сокро́вища некра́домаго Боже́ственнаго, Благоде́телю, копие́м прободе́ннаго Твоего́ ребра́, прему́дрости и ра́зума наполня́ет мир Близне́ц.

Твой всеблаже́нный хва́лится язы́к, о Бли́знче! Пе́рвый бо благоче́стно пропове́дует Жизнода́вца Иису́са Бо́га же и Го́спода, от осяза́ния испо́лнься благода́ти.

Песнь 5

Ирмос: От но́щи у́тренююще, пое́м Тя, Христе́,/ Отцу́

Собезнача́льна и Спа́са душ на́ших:// мир ми́рови пода́ждь, Человеколю́бче.

Предста́в друго́м скорбя́щим, Спас прише́ствием всю отъе́млет скорбь и игра́ти воздвиза́ет Свои́м Воскресе́нием.

О, вои́стину похваля́емаго Фомы́ стра́шнаго начина́ния! Де́рзостно бо осяза́ ре́бра, Боже́ственным огне́м блиста́ющая.

Неве́рие Фомино́ ве́ры роди́тельное нам показа́л еси́: Ты бо вся прему́дростию Твое́ю промышля́еши поле́зно, Христе́, я́ко Человеколю́бец.

Песнь 6.

Ирмос: Проро́ка спасл еси́ от ки́та, Человеколю́бче,/ и мене́ из глубины́ прегреше́ний// возведи́, молю́ся.

Фомы́ не оста́вил еси́, Влады́ко, погружа́ема глубино́ю неве́рия, дла́ни просте́р на испыта́ние.

Спа́с на́ш глаго́лаше: осяза́вше, Мя́ ви́дите ко́сти и Пло́ть нося́ща, А́з не премени́хся.

Ре́бра осяза́ и, ве́ровав, позна́ Фома́, не сый в пе́рвом вхо́де Твое́м, Спа́се наш.

Кондак, глас 8:

Любопы́тною десни́цею/ жизнопода́тельная Твоя́ ре́бра Фома́ испыта́, Христе́ Бо́же,/ созаключе́нным бо две́рем я́ко вше́л еси́, / с про́чими апо́столы вопия́ше Тебе́:// Госпо́дь еси́ и Бо́г мо́й.

Икос:

Кто сохрани́ учени́чу длань тогда́ неопали́му, егда́ ко о́гненным ре́бром приступи́ Госпо́дним? Кто даде́ ей де́рзость, и возмо́же осяза́ти пла́менную кость, вся́ко неосяжи́мую? А́ще бо не бы́ ребро́ си́лу по́дало бре́нней десни́це, ка́ко можа́ше осяза́ти страда́ньми поколеба́вшая я́же вы́ше и я́же ни́зу? Сия́ благода́ть Фоме́ даде́ся, е́же сия́ осяза́ти, Христо́ви же вопи́ти: Госпо́дь еси́ и Бог мой.

Песнь 7

Ирмос: О́бразу служи́ти,/ мусики́йскому согла́сию созыва́ющу лю́ди,/ от пе́сней Сио́нских пою́ще оте́чески, о́троцы Дави́довы/ мучи́телево разори́ша злочести́вое веле́ние/ и пла́мень в ро́су преложи́ша,/ пе́снь воспева́юще:// Превозноси́мый отце́в и на́ш Бо́же, благослове́н еси́.

Я́ко пе́рвый е́сть дне́й и госпо́дственный светоно́сный си́й, во́ньже ра́доватися досто́йно но́вым и боже́ственным лю́дем с тре́петом: прино́сит бо и ве́ка о́браз, я́ко осми́цу соверша́я, бу́дущаго. Превозноси́мый отце́в и на́ш Бо́же, благослове́н еси́.

Еди́н дерзну́вый, неве́рною же ве́рою облагоде́тельствовавый нас, Фома́ Близне́ц реши́т у́бо мра́чное неве́дение всех конце́в ве́рным неве́рствием, себе́ же вене́ц плете́т, я́ве глаго́ля: Ты еси́ Госпо́дь, Превозноси́мый отце́в и наш Бо́же, благослове́н еси́.

Не всу́е усумне́вся Фома́ о воста́нии Твое́м, не низложи́ся: но несумне́тельное тща́шеся показа́ти сие́, Христе́, всем язы́ком. Отону́дуже, неве́рием уве́рив, всех научи́ глаго́лати: Ты еси́ Госпо́дь, Превозноси́мый отце́в и наш Бо́же, благослове́н еси́.

Со стра́хом ру́ку Фома́ в ре́бра Твоя́ живоно́сная, Христе́, вложи́в, тре́петен, ощути́ де́йство, Спа́се, сугу́бое, двема́ естество́ма в Тебе́ соединя́емыма неслия́нно, и ве́рою взыва́ше, глаго́ля: Ты еси́ Госпо́дь, Превозноси́мый отце́в и наш Бо́же, благослове́н еси́.

Песнь 8

Ирмос: В пла́мени о́гненне горя́щия пещи́ сохра́ншаго де́ти/ и во зра́це А́нгела снизше́дшаго к ни́м,// по́йте Го́спода и превозноси́те Его́ во ве́ки.

Возжеле́вый Твое́ ра́достное виде́ние, пре́жде не ве́роваше Фома́: сподо́блься же того́, Бо́га и Го́спода Тя нарица́ше, Влады́ко, Его́же превозно́сим во вся ве́ки.

Претерпе́вшаго Фомино́ неве́рие, и показа́вшаго ре́бра, и того́ дла́нию осяза́нна бы́вша, по́йте Го́спода и превозноси́те Его́ во вся́ ве́ки.

Твое́ неудо́бное сокро́вище, утае́нное, нам отве́рзе Фома́, богосло́вив бо язы́ком богоно́сным: по́йте Го́спода, глаго́лаше, и превозноси́те Его́ во вся ве́ки.

На 9–й песни Честнейшую: не поем, но ирмос кийждо лик.

Песнь 9

Ирмос: Тебе́, све́тлую Свещу́ и Ма́терь Бо́жию,/ пречу́дную Сла́ву и вы́шшую всех тва́рей,// пе́сньми велича́ем.

Твой све́тлый день и пресве́тлый, Христе́, всесве́тлую благода́ть, во́ньже кра́сный добро́тою ученико́м Твои́м предста́л еси́, в пе́снех велича́ем.

Тебе́, бре́нною дла́нию осяза́ема в ре́бра и не опали́вша сию́ огне́м невеще́ственнаго Боже́ственнаго существа́, в пе́снех велича́ем.

Тя я́ко Бо́га, из гро́ба воскре́сша Христа́, не очи́ма ви́девше, но серде́чною любо́вию ве́ровавше, пе́сньми велича́ем.

Катавасия: Свети́ся, свети́ся: и поклон.

Таже: Свят Госпо́дь Бог наш: на глас 1, трижды.

Ексапостиларий, глас 1.

Подобен: Не́бо звезда́ми:

Мои́х удо́в руко́ю твое́ю испыта́вый я́звы, не неве́руй Ми, Фомо́, уя́звленному тебе́ ра́ди, со ученики́ единому́дрствуй и живу́щаго пропове́дуй Бо́га. (Дважды.)

Слава, и ныне:

Днесь весна́ благоуха́ет, и но́вая тварь лику́ет. Днесь взима́ются ключи́ двере́й и неве́рия Фомы́ дру́га, вопию́ща: Госпо́дь и Бог мой.

На хвалитех стихиры на 4, глас 1.

Подобен: Прехва́льнии му́ченицы:

Стих: Хвали́те Его́ на Си́лах Его́,/ хвали́те Его́ по мно́жеству вели́чествия Его́.

По е́же из гро́ба Твое́м стра́шном, Жизнода́вче, воста́нии,/ я́коже печа́тей не разруши́л еси́, Христе́, гро́бных,/ та́ко, заключе́нным две́рем, вше́л еси́/ к пресла́вным апо́столом Твои́м,/ радостотворя́ и́х и Пра́вый Тво́й Ду́х подая́ и́м// за безме́рную Твою́ ми́лость.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

По е́же из гро́ба:

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Фома́, и́же и Близне́ц, не бе прише́л,/ егда́ Ты ученико́м яви́лся еси́, Го́споди./ Те́мже не ве́рова Твоему́ Воскресе́нию/ и ви́девшим Тя вопия́ше:/ а́ще не вложу́ пе́рста в ре́бра Его́ и гвозде́й я́звы,// не ве́рую, я́ко воста́л есть.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Я́коже хо́щеши, осяжи́, Христо́с Фоме́ вопия́ше:/ вложи́ ру́ку и позна́й Мя, ко́сти иму́ща и земно́е Те́ло,/ и не бу́ди неве́рен,/ ра́вно же со ине́ми уве́рися./ Он же возопи́: Бог мой и Госпо́дь Ты еси́,// сла́ва воста́нию Твоему́.

Слава, глас 6:

По дне́х осми́х воста́ния Твоего́, Иису́се Царю́,/ Единоро́дный Сло́ве О́тчий,/ яви́лся еси́ ученико́м Твои́м,/ заключе́нным две́рем,/ ми́р Тво́й подая́,/ и неве́рующему ученику́ зна́мения показа́л еси́:/ прииди́ и осяжи́ ру́це, и но́зе,/ и нетле́нная Моя́ ре́бра./ О́н же, ве́ровав, вопия́ше Тебе́:// Госпо́дь мо́й и Бо́г мо́й, сла́ва Тебе́.

И ныне, глас 2: Преблагослове́нна еси́, Богоро́дице Де́во:

Славословие великое.

По славословии тропарь праздника:

Запеча́тану гро́бу,/ живо́т от гро́ба возсия́л еси́, Христе́ Бо́же,/ и, две́рем заключе́нным,/ ученико́м предста́л еси́,/ всех Воскресе́ние,/ Дух Пра́вый те́ми обновля́я нам// по вели́цей Твое́й ми́лости.

Ектении и отпуст.³

И поем стихиру евангельскую, глас 1:

На го́ру ученико́м иду́щим/ за земно́е вознесе́ние,/ предста́ Госпо́дь: и поклони́шася Ему́,/ и, да́нныя вла́сти везде́ научи́вшеся,/ в поднебе́сную посыла́хуся/ пропове́дати е́же из ме́ртвых Воскресе́ние/ и е́же на Небеса́ возше́ствие./ И́мже и во ве́ки спребыва́ти Нело́жный обеща́ся Христо́с Бог// и Спас душ на́ших.

Таже час 1–й: Христо́с воскре́се: трижды. И абие: Глаго́лы моя́: И до отдания Пасхи такожде. На часех тропарь и кондак праздника Антипасхи точию.

Начинаем же 3–й час сице:

По возгласе иерея, чтец: Ами́нь. Христо́с воскре́се: трижды. Трисвятое. По О́тче наш: и возгласе, чтец: Ами́нь. Го́споди, поми́луй (12). Сла́ва, и ны́не: Прииди́те, поклони́мся: трижды, и трипсалмие, и прочая.

По еже рещи диакону: Благослови́, влады́ко: и иерею: Благослове́нно Ца́рство: поет иерей: Христо́с воскре́се: трижды весь тропарь, без стихов: Да воскреснет Бог: Лик по обычаю третьим разом допевает:

...и су́щим во гробе́х живо́т дарова́в.

Таже ектения великая.

В Неделю Фомину на Литургии начинаем изобразительная и поем во блаженнах от канона праздника Антипасхи песнь 3–ю на 4 и песнь 6–ю на 4.

Блаже́ни ми́лостивии,/ я́ко ти́и поми́ловани бу́дут.

Но́выя вме́сто ве́тхих,/ вме́сто же тле́нных нетле́нная/ Кресто́м Твои́м, Христе́, соверши́в нас,/ во обновле́нии жи́зни жи́тельствовати досто́йно повеле́л еси́.

Блаже́ни чи́стии се́рдцем,/ я́ко ти́и Бо́га у́зрят.

Но́выя вме́сто ве́тхих:

Блаже́ни миротво́рцы,/ я́ко ти́и сы́нове Бо́жии нареку́тся.

Во гро́бе заключе́н опи́санною Пло́тию Твое́ю,/ Неопи́санный Христе́, воскре́сл еси́:/ две́рем же заключе́нным,/ предста́л еси́ Твои́м ученико́м, Всеси́льне.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Я́звы Твоя́, Христе́,/ я́же во́лею претерпе́л еси́ за нас,/ ученико́м Твои́м, сохрани́в, свиде́тельство показа́л еси́/ Твоего́ сла́внаго Воскресе́ния.

Блаже́ни есте́, егда́ поно́сят вам,/ и изжену́т, и реку́т всяк зол глаго́л на вы, лжу́ще, Мене́ ра́ди.

Фомы́ не оста́вил еси́, Влады́ко, погружа́ема глубино́ю неве́рия,/ дла́ни просте́р на испыта́ние.

Ра́дуйтеся и весели́теся,/ я́ко мзда ва́ша мно́га на Небесе́х.

Фомы́ не оста́вил еси́, Влады́ко:

Слава:

Спас наш глаго́лаше:/ осяза́вше, Мя ви́дите/ ко́сти и Плоть нося́ща,/ Аз не премени́хся.

И ныне:

Ре́бра осяза́ и, ве́ровав, позна́ Фома́,/ не сый в пе́рвом вхо́де Твое́м, Спа́се наш.

По входе тропарь, глас 7:

Запеча́тану гро́бу,/ живо́т от гро́ба возсия́л еси́, Христе́ Бо́же,/ и, две́рем заключе́нным,/ ученико́м предста́л еси́,/ всех Воскресе́ние,/ Дух Пра́вый те́ми обновля́я нам// по вели́цей Твое́й ми́лости.

Сла́ва, и ны́не, кондак, глас 8:

Любопы́тною десни́цею/ жизнопода́тельная Твоя́ ре́бра Фома́ испыта́, Христе́ Бо́же,/ созаключе́нным бо две́рем я́ко вшел еси́,/ с про́чими апо́столы вопия́ше Тебе́:// Госпо́дь еси́ и Бог мой.

Таже Трисвятое.

Прокимен, глас 3: Ве́лий Госпо́дь наш, и ве́лия кре́пость Его́,/ и ра́зума Его́ несть числа́.

Стих: Хвали́те Го́спода, я́ко благ псало́м: Бо́гови на́шему да услади́тся хвале́ние.

Апостол в Деяниих, зачало 14: Рука́ми апо́стол:

Аллилуия, глас 8: Прииди́те, возра́дуемся Го́сподеви, воскли́кнем Бо́гу, Спаси́телю на́шему.

Стих: Я́ко Бог ве́лий Госпо́дь и Царь ве́лий по всей земли́.

Евангелие от Иоанна, зачало 65: Су́щу по́зде в день той:

И по чину Божественная Литургия Иоанна Златоустаго.

Вместо же Достойно есть: поем: А́нгел вопия́ше Благода́тней: и абие ирмос: Свети́ся, свети́ся:

Причастный стих: Похвали́, Иерусали́ме, Го́спода, хвали́ Бо́га твоего́, Сио́не. Аллилу́ия (трижды).

Егда же речет иерей: Со стра́хом Бо́жиим: мы поем: Благослове́н Гряды́й во и́мя Госпо́дне, Бог Госпо́дь и яви́ся нам.

Иерей: Спаси́, Бо́же, лю́ди Твоя́: и мы вместо: Ви́дехом Све́т и́стинный: поем тропарь: Христо́с воскре́се: единожды. Возглас: Всегда́, ны́не и при́сно, и во ве́ки веко́в. Лик: Ами́нь. Да испо́лнятся уста́ на́ша: И прочее обычно.

По заамвонной молитве: Ами́нь. Бу́ди и́мя Госпо́дне: трижды, и псалом 33.

Во отпусте же, по возгласе: Сла́ва Тебе́, Христе́ Бо́же: лик поет тропарь: Христо́с воскре́се: трижды. Посем иерей: Воскресы́й из ме́ртвых, Христо́с, и́стинный Бог наш: Мы же отвещаем: Христо́с воскре́се: трижды, поскору.⁴

Посем многолетны: Вели́каго господи́на:

Зри: Ведомо буди, яко во всех Неделех Святыя Пятдесятницы служба совершается только по Триоди. Последование случившихся святых Минеи поем в повечериих.

Аще случится в Неделю Цветной Триоди бденный святой, соединяем ему службу по 3–й Марковой главе Типикона от 23 апреля: «О памяти святаго Георгия, аще случится в неделю Фомину».

Час девятый

По возгласе, чтец: Ами́нь. Христо́с воскре́се: трижды. Трисвятое. По О́тче наш: Го́споди, поми́луй (12). Сла́ва, и ны́не: Прииди́те, поклони́мся: И трипсалмие.

На часе тропарь и кондак праздника Антипасхи.

Вместо: Прииди́те, поклони́мся: глаголем: Христо́с воскре́се: трижды. По предначинательном псалме кафисмы несть.

На Го́споди, воззва́х: поставим стихов 6 и поем стихиры праздника 3. Глас 1.

Подобен: Прехва́льнии му́ченицы:

Стих: А́ще беззако́ния на́зриши, Го́споди, Го́споди, кто постои́т?/ Я́ко у тебе́ очище́ние е́сть.

По е́же из гро́ба Твое́м стра́шном, Жизнода́вче, воста́нии,/ я́коже печа́тей не разруши́л еси́, Христе́, гро́бных,/та́ко, заключе́нным две́рем, вше́л еси́/ к пресла́вным апо́столом Твои́м,/ радостотворя́ и́х и Пра́вый Тво́й Ду́х подая́ и́м// за безме́рную Твою́ ми́лость.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Фома́, и́же и Близне́ц, не бе прише́л,/ егда́ Ты ученико́м яви́лся еси́, Го́споди./ Те́мже не ве́рова Твоему́ Воскресе́нию/ и ви́девшим Тя вопия́ше:/ а́ще не вложу́ пе́рста в ре́бра Его́ и гвозде́й я́звы,// не ве́рую, я́ко воста́л есть.

Стих: От стра́жи у́тренния до но́щи, от стра́жи у́тренния,/ да упова́ет Изра́иль на Го́спода.

Я́коже хо́щеши, осяжи́, Христо́с Фоме́ вопия́ше:/ вложи́ ру́ку и позна́й Мя, ко́сти иму́ща и земно́е Те́ло,/ и не бу́ди неве́рен,/ ра́вно же со ине́ми уве́рися./ Он же возопи́: Бог мой и Госпо́дь Ты еси́,// сла́ва воста́нию Твоему́.

Стих: Я́ко у Го́спода ми́лость, и мно́гое у Него́ избавле́ние:/ и Той изба́вит Изра́иля от всех беззако́ний его́.

Стихира святаго Минеи.

Стих: Хвали́те Го́спода, вси́ язы́цы,/ похвали́те Его́, вси́ лю́дие.

Стихира святаго Минеи.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Стихира святаго Минеи.

Слава, святаго, аще есть. А́ще же ни, Сла́ва, и ны́не, праздника, глас 1:

Две́рем заключе́нным,/ ученико́м собра́нным,/ вшел еси́ внеза́пу, Всеси́льне Иису́се, Бо́же наш,/ и, став посреде́ их, мир дав,/ испо́лнил еси́ Свята́го Ду́ха;/ жда́ти же повеле́л еси́/ и ника́коже разлуча́тися от Иерусали́ма,/ до́ндеже облеку́тся е́же с высоты́ си́лою./ Те́мже вопие́м Ти:// Просвеще́ние и Воскресе́ние и Ми́ре наш, сла́ва Тебе́.

Вход. Све́те ти́хий: Прокимен великий, глас 7:

Кто бог ве́лий, я́ко Бог наш?/ Ты еси́ Бог, творя́й чудеса́.

Стих: Сказа́л еси́ в лю́дех си́лу Твою́.

Стих: И рех: ны́не нача́х, сия́ изме́на десни́цы Вы́шняго.

Стих: Помяну́х дела́ Госпо́дня.

И паки: Кто бог ве́лий:

Таже ектения: Рцем вси: И Сподо́би, Го́споди: Посем ектения: Испо́лним вече́рнюю моли́тву:

На стиховне стихиры, глас 1:

Вече́рния на́ша моли́твы/ приими́, Святы́й Го́споди,/ и пода́ждь нам оставле́ние грехо́в:/ я́ко Еди́н еси́// явле́й в ми́ре Воскресе́ние.

Стих: К Тебе́ возведо́х о́чи мои́, Живу́щему на Небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему,/ до́ндеже уще́дрит ны.

Я́ко пучи́на ве́лия/ прегреше́ний мои́х, Спа́се,/ и лю́те погружа́юся согреше́ньми мои́ми,/ да́ждь ми ру́ку, я́ко Петро́ви,// спаси́ мя, Бо́же, и поми́луй мя.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих/ и уничиже́ния го́рдых.

Моли́твами, Го́споди, всех святы́х и Богоро́дицы/ Тво́й мир даждь нам и поми́луй ны,// я́ко Еди́н Щедр.

Слава, и ныне, глас 1:

По днех осми́х воста́ния Твоего́, Го́споди,/ яви́лся еси́ ученико́м Твои́м/ на ме́сте, иде́же бя́ху со́брани,/ и, возгласи́в им: мир вам,/ неве́рующему ученику́ ру́це показа́л еси́/ и пречи́стое ребро́./ Он же, ве́ровав, вопия́ше Тебе́:// Госпо́дь мой и Бог мой, сла́ва Тебе́.

По Трисвятом тропарь святаго Минеи. Сла́ва, и ны́не, праздника: Запеча́тану гро́бу: И отпуст.