Неделя Святыя Пятдесятницы

На Го́споди, воззва́х: поставим стихи 4. И поем стихиры, глас 1:

Пятдеся́тницу пра́зднуим: Язы́ками иноро́дных: Вся подае́т Дух Святы́й:

(Зри сия на велицей вечерни.)

Слава, и ныне, глас 8:

Егда́ Ду́ха Твоего́ посла́л еси́, Го́споди,/ седя́щим апо́столом,/ тогда́ евре́йския де́ти, зря́ще, ужаса́хуся у́жасом:/ слы́шаху бо я́ веща́юща ины́ми стра́нными язы́ки,/ я́коже Ду́х подава́ше и́м./ Неве́жди бо су́ще умудри́шася/ и язы́ки в ве́ру улови́вше,/ боже́ственная вети́йствоваху./ Те́мже и мы́ вопие́м Ти́:/ И́же на земли́ явле́йся/ и от пре́лести спасы́й на́с,// Го́споди, сла́ва Тебе́.

Прокимен: Госпо́дь воцари́ся:

На стиховне самогласны, глас 2:

Ви́дехом Свет и́стинный:

Стих: Се́рдце чи́сто сози́жди во мне, Бо́же:

Во проро́цех возвести́л еси́:

Стих: Не отве́ржи мене́ от лица́ Твоего́:

Во дво́рех Твои́х воспою́:

Слава, и ныне, глас тойже: Тро́ицу Единосу́щную песносло́вим:

Ны́не отпуща́еши:

Трисвятое. По О́тче наш: отпустительный тропарь, глас 8: Благослове́н еси́, Христе́ Бо́же наш: И прочее обычно.

И отпуст.

По предначинательном псалме: Блаже́н муж: кафисма вся.

На Го́споди, воззва́х: поставим стихов 10. И поем стихиры самогласны 3, глас 1, повторяюще первую. Таже 5, втораго гласа, повторяюще первую.

Глас 1.

Стих: Изведи́ из темни́цы ду́шу мою́/ испове́датися и́мени Твоему́.

Пятдеся́тницу пра́зднуим,/ и Ду́ха прише́ствие,/ и предложе́ние обеща́ния,/ и наде́жди исполне́ние,/ и та́инство ели́ко,/ я́ко вели́ко же и че́стно./ Те́мже вопие́м Ти́:// Соде́телю все́х, Го́споди, сла́ва Тебе́.

Стих: Мене́ ждут пра́ведницы,/ до́ндеже возда́си мне.

Пятдеся́тницу пра́зднуим:

Стих: Из глубины́ воззва́х к Тебе́, Го́споди,/ Го́споди, услы́ши глас мой.

Язы́ками иноро́дных/ обнови́л еси́, Христе́, Твоя́ ученики́,/ да те́ми Тя́ пропове́дят/ Безсме́ртнаго Сло́ва и Бо́га,// подаю́щаго душа́м на́шим ве́лию ми́лость.

Стих: Да бу́дут у́ши Твои́/ вне́млюще гла́су моле́ния моего́.

Вся́ подае́т Ду́х Святы́й,/ то́чит проро́чествия,/ свяще́нники соверша́ет,/ некни́жныя му́дрости научи́,/ ры́бари богосло́вцы показа́,/ ве́сь собира́ет собо́р церко́вный:/ Единосу́щне и Сопресто́льне Отцу́ и Сы́ну,// Уте́шителю, сла́ва Тебе́.

Глас 2.

Стих: А́ще беззако́ния на́зриши, Го́споди, Го́споди, кто́ постои́т?/ Я́ко у тебе́ очище́ние есть.

Ви́дехом Свет и́стинный,/ прия́хом Ду́ха Небе́снаго,/ обрето́хом ве́ру и́стинную,/ Неразде́льней Тро́ице покланя́емся:// Та бо нас спасла́ есть.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Ви́дехом Свет и́стинный:

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Во проро́цех возвести́л еси́ на́м пу́ть спасе́ния,/ и во апо́столех возсия́, Спа́се на́ш,/ благода́ть Ду́ха Твоего́:/ Ты́ еси́ Бо́г пе́рвый, Ты́ и по си́х,// и во ве́ки Ты́ еси́ Бо́г на́ш.

Стих: Я́ко у Го́спода ми́лость, и мно́гое у Него́ избавле́ние,/ и Той изба́вит Изра́иля от всех беззако́ний его́.

Во дво́рех Твои́х воспою́ Тя Спа́са ми́ра/ и, прекло́нь коле́на,/ поклоню́ся Твое́й непобеди́мей си́ле,/ ве́чер, и у́тро, и полу́дне,// и на вся́кое вре́мя благословлю́ Тя, Го́споди.

Стих: Хвали́те Го́спода вси́ язы́цы,/ похвали́те Его́, вси́ лю́дие.

Во дво́рех Твои́х, Го́споди,/ ве́рнии, коле́на душ и теле́с прекло́нше,/ воспева́ем Тя Безнача́льнаго Отца́/ и Собезнача́льнаго Сы́на/ и Соприсносу́щнаго и Пресвята́го Ду́ха,// просвеща́ющаго и освяща́ющаго ду́ши на́ша.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Тро́ицу Единосу́щную песносло́вим,/ Отца́ и Сы́на со Святы́м Ду́хом:/ та́ко бо пропове́даша вси проро́цы// и апо́столи с му́ченики.

Слава, и ныне, глас 8. Творение Льва владыки:

Прииди́те, лю́дие,/ Триипоста́сному Божеству́ поклони́мся,/ Сы́ну во Отце́, со Святы́м Ду́хом:/ Оте́ц бо безле́тно роди́ Сы́на,/ соприсносу́щна и сопресто́льна,/ и Ду́х Святы́й бе́ во Отце́,/ с Сы́ном прославля́емь:/ Еди́на Си́ла, Еди́но Существо́, Еди́но Божество́./ Ему́же покланя́ющеся вси́ глаго́лем:/ Святы́й Бо́же,/ вся́ соде́явый Сы́ном,/ соде́йством Свята́го Ду́ха;/ Святы́й Кре́пкий,/ И́мже Отца́ позна́хом/ и Ду́х Святы́й прии́де в ми́р;/ Святы́й Безсме́ртный,/ Уте́шительный Душе́,/ от Отца́ исходя́й, и в Сы́не почива́яй:// Тро́ице Свята́я, сла́ва Тебе́.

Вход. Све́те ти́хий: Прокимен дне и чтения.

Числ чтение (глава 11):

Рече́ Госпо́дь к Моисе́ю: собери́ Ми́ се́дмьдесят муже́й от ста́рец Изра́илевых, и́хже ты́ са́м ве́си, я́ко си́и су́ть ста́рцы люде́й и кни́жники и́х, и приведе́ши и́х в се́нь свиде́ния, и ста́нут ту́ с тобо́ю. И сни́ду, и возглаго́лю та́мо с тобо́ю, и отыму́ от Ду́ха, су́щаго в тебе́, и возложу́ на ни́х, и посо́бствуют с тобо́ю стремле́ния люде́й, и не пово́диши и́х ты́ еди́н. И собра́ Моисе́й се́дмьдесят муже́й от ста́рец люде́й, и поста́ви и́х о́крест се́ни. И сни́де Госпо́дь во о́блаце, и глаго́ла Моисе́ю, и взя́т от Ду́ха, И́же в не́м, и положи́ на седми́десяти муже́й ста́рец: а я́коже почи́ Ду́х на ни́х, и прореко́ша в ста́ну, и ктому́ не приложи́ша. И оста́ша два́ му́жа в ста́ну, и́мя еди́ному Елда́д, и и́мя второ́му Мода́д, и почи́ на ни́х Ду́х: и си́и бе́ша от напи́санных, и не приидо́ша в се́нь, и проро́чествоваста в ста́ну. И прите́к ю́ноша возвести́ Моисе́ю, и рече́ ему́, глаго́ля: Елда́д и Мода́д проро́чествуета в стану́. И отвеща́в Иису́с сы́н Нави́н, предстоя́й Моисе́ю, избра́нный его́, рече́: го́споди Моисе́е, возбрани́ и́ма. И рече́ ему́ Моисе́й: не ревну́еши ли ты́ мне́? И кто́ да́ст все́м лю́дем Госпо́дним бы́ти проро́ки, егда́ да́ст Госпо́дь Ду́ха Своего́ на ни́х?

Пророчества Иоилева чтение (глава 2):

Та́ко глаго́лет Госпо́дь: ча́да Сио́нова, ра́дуйтеся и весели́теся о Го́споде Бо́зе ва́шем, я́ко даде́ ва́м бра́шна в пра́вду, и одожди́т ва́м до́ждь ра́нный и по́здный, я́коже пре́жде. И напо́лнятся гу́мна пшени́цы, и излию́тся точи́лия вина́ и еле́я. И вда́м ва́м вме́сто ле́т, и́хже поядо́ша пру́зи, и гу́сеницы, и ржа́, и хру́стове, си́ла Моя́ вели́кая, ю́же посла́х на вы́. И сне́сте яду́ще, и насы́титеся, и похвали́те и́мя Господа́ Бо́га ва́шего, И́же сотвори́ свы́ше чудеса́: и не постыдя́тся лю́дие Мои́ в ве́к. И разуме́ете, я́ко посреде́ Изра́иля А́з е́смь, и А́з Госпо́дь Бо́г ва́ш, и не́сть ино́го, ра́зве Мене́: и не постыдя́тся ктому́ лю́дие Мои́ в ве́к. И бу́дет по си́х: излию́ от Ду́ха Моего́ на вся́кую пло́ть, и прореку́т сы́нове ва́ши и дще́ри ва́ша, и ста́рцы ва́ши со́ния ви́дят, и ю́ноши ва́ши виде́ния у́зрят. И́бо на рабы́ Моя́ и на рабы́ни Моя́ во дни́ о́ны излию́ от Ду́ха Моего́, и прореку́т. И да́м чудеса́ на небеси́ горе́ и зна́мения на земли́ ни́зу, кро́вь, и о́гнь, и куре́ние ды́ма. Со́лнце преложи́тся во тьму́, и луна́ в кро́вь, пре́жде прише́ствия Дне́ Госпо́дня вели́каго и стра́шнаго; и бу́дет: вся́к, и́же а́ще призове́т и́мя Госпо́дне, спасе́тся.

Пророчества Иезекиилева чтение (глава 36):

Та́ко глаго́лет Госпо́дь: прииму́ ва́с от язы́к, и соберу́ вы́ от все́х язы́к стра́нных, и введу́ вы́ в зе́млю ва́шу, и окроплю́ на вы́ чи́стую во́ду, и очи́ститеся от все́х нечисто́т ва́ших и от все́х и́дол ва́ших, и очи́щу вы́. И да́м ва́м се́рдце но́вое, и ду́х но́вый да́м ва́м, и отыму́ се́рдце ка́менное от пло́ти ва́шея, и да́м ва́м се́рдце плотяно́е, и Ду́х Мо́й да́м в ва́с; и сотворю́, да во оправда́ниих Мои́х ходи́те и судьбы́ Моя́ сохраните́ и сотворите́. И вселите́ся в зе́млю, ю́же да́х отце́м ва́шим, и бу́дете Ми́ в лю́ди, и А́з бу́ду ва́м в Бо́га.

Ектения сугубая. Посем: Сподо́би: и прочая.

На литии стихиры самогласны 3, глас 2:

Во проро́цех возвести́л еси́ на́м пу́ть спасе́ния,/ и во апо́столех возсия́, Спа́се на́ш,/ благода́ть Ду́ха Твоего́:/ Ты́ еси́ Бо́г пе́рвый, Ты́ и по си́х,// и во ве́ки Ты́ еси́ Бо́г на́ш.

Во дво́рех Твои́х воспою́ Тя Спа́са ми́ра/ и, прекло́нь коле́на,/ поклоню́ся Твое́й непобеди́мей си́ле,/ ве́чер, и у́тро, и полу́дне,// и на вся́кое вре́мя благословлю́ Тя, Го́споди.

Во дво́рех Твои́х, Го́споди,/ ве́рнии, коле́на душ и теле́с прекло́нше,/ воспева́ем Тя Безнача́льнаго Отца́/ и Собезнача́льнаго Сы́на,/ и Соприсносу́щнаго и Пресвята́го Ду́ха,// просвеща́ющаго и освяща́ющаго ду́ши на́ша.

Слава, и ныне, глас 8:

Егда́ Ду́ха Твоего́ посла́л еси́, Го́споди,/ седя́щим апо́столом,/ тогда́ евре́йския де́ти, зря́ще, ужаса́хуся у́жасом:/ слы́шаху бо я́ веща́юща ины́ми стра́нными язы́ки,/ я́коже Ду́х подава́ше и́м./ Неве́жди бо су́ще умудри́шася/ и, язы́ки в ве́ру улови́вше,/ боже́ственная вети́йствоваху./ Те́мже и мы́ вопие́м Ти́:/ И́же на земли́ явле́йся/ и от пре́лести спасы́й на́с,// Го́споди, сла́ва Тебе́.

На стиховне стихиры самогласны, глас 6:

Не разуме́юще язы́цы, Го́споди,/ Пресвята́го Ду́ха на апо́столы Твоя́ бы́вшия си́лы,/ измене́ние язы́к пия́нство бы́ти мня́ху./ Мы́ же, утверди́вшеся от ни́х,/ непреста́нно си́це глаго́лем:/ Ду́ха Твоего́ Свята́го не отыми́ от на́с,// мо́лим Ти́ ся́, Человеколю́бче.

Стих: Се́рдце чи́сто сози́жди во мне́, Бо́же,/ и дух прав обнови́ во утро́бе мое́й.

Го́споди, Свята́го Ду́ха наше́ствие,/ апо́столы Твоя́ испо́лнившее,/ ины́ми язы́ки глаго́лати устро́и./ Те́мже пресла́вное неве́рным у́бо пия́нство мня́шеся,/ ве́рным же хода́тайственно спасе́ния:/ его́же сия́ния и на́с сподо́би,// мо́лим Ти́ ся́, Человеколю́бче.

Стих: Не отве́ржи мене́ от лица́ Твоего́/ и Ду́ха Твоего́ Свята́го не отыми́ от Мене́.

Царю́ Небе́сный,/ Уте́шителю, Душе́ и́стины,/ И́же везде́ сы́й/ и вся́ исполня́яй,/ Сокро́вище благи́х/ и жи́зни Пода́телю,/ прииди́, и всели́ся в ны́,/ и очи́сти ны́ от вся́кия скве́рны,// и спаси́, Бла́же, ду́ши на́ша.

Слава, и ныне, глас 8:

Язы́цы иногда́ размеси́шася,/ де́рзости ра́ди столпотворе́ния:/ язы́цы же ны́не умудри́шася,/ сла́вы ра́ди богове́дения./ Та́мо осуди́ нечести́выя погреше́нием:/ зде́ просвети́л е́сть Христо́с ры́бари Ду́хом./ Тогда́ упраздни́ся безгла́сие к муче́нию:/ ны́не обновля́ется согла́сие// ко спасе́нию ду́ш на́ших.

Ны́не отпуща́еши: Трисвятое. По О́тче наш:

Тропарь, глас 8:

Благослове́н еси́, Христе́ Бо́же на́ш,/ И́же прему́дры ловцы́ явле́й,/ низпосла́в и́м Ду́ха Свята́го,/ и те́ми уловле́й вселе́нную,// Человеколю́бче, сла́ва Тебе́. (Трижды.)

Таже благословение хлебов. И псалом 33, до половины.

Зри: Аще ли не будет бдения: по Ны́не отпуща́еши: тропарь праздника единожды. На повечерии, по Досто́йно: и по Трисвятом кондак праздника. Полунощницу поем по обычаю. Канон глаголем Троичен во Октоихе, гласа.

На Бог Госпо́дь: тропарь праздника трижды.

По 1–м стихословии седален, глас 4.

Подобен: Удиви́ся Ио́сиф:

Попра́зднственный, ве́рнии, и коне́чный пра́здник пра́зднуим све́тло, се́й е́сть Пятдеся́тница, обеща́ния исполне́ние и предложе́ния: в се́й бо о́гнь Уте́шителев сни́де на зе́млю, я́ко в ви́де язы́к, и ученики́ просвети́, и сия́ неботаи́нники показа́. Све́т прии́де Уте́шителя и ми́р просвети́. (Дважды.)

По 2–м стихословии седален, глас и подобен тойже:

Ду́ха Исто́чник, прише́д на зе́млю, во о́гненныя ре́ки разделя́яся мы́сленно, апо́столы ороша́ше просвеща́я: и бысть им о́блак ороша́яй огнь, просвеща́яй тех, и одождя́яй пла́мень, и́миже мы прия́хом благода́ть, огне́м же и водо́ю. Свет прии́де Уте́шителя и мир просвети́. (Дважды.)

И полиелей.

Величание:

Велича́ем Тя,/ Живода́вче Христе́,/ и чти́м Всесвята́го Ду́ха Твоего́,/ Его́же от Отца́ посла́л еси́// боже́ственным ученико́м Твои́м.

Псалом избранный:

Небеса́ пове́дают сла́ву Бо́жию, творе́ние же руку́ Его́ возвеща́ет твердь. Ду́хом уст Его́ вся Си́ла их. С Небесе́ призре́ Госпо́дь, ви́де вся сы́ны челове́ческия. Огнь пред Ним преды́дет, и о́крест Его́ бу́ря зе́льна. (И прочая во Ирмологионе.)

Слава, и ныне: Аллилу́ия. (Трижды.)

По полиелеи седален, глас 8.

Подобен: Повеле́нное та́йно:

По воста́нии, Христе́, е́же от гро́ба, и е́же к высоте́ Небе́сной Боже́ственном Вознесе́нии, богови́дцем сла́ву Твою́ низпосла́л еси́, Ще́дре, Ду́ха Пра́ваго обнови́вый ученико́м. Те́мже, я́ко гусль мусики́йская, всем уясни́ся боже́ственным бряца́лом та́йно, Спа́се, глаше́ния, и смотре́ние Твое́. (Дважды.)

Степенна, 1–й антифон 4–го гласа.

Прокимен, глас 4: Ду́х Тво́й Благи́й/ наста́вит мя́ на зе́млю пра́ву.

Стих: Го́споди, услы́ши моли́тву мою́, внуши́ моле́ние мое́.

Вся́кое дыха́ние: Евангелие от Иоанна, зачало 65: Су́щу по́зде: Конец: И́мже держите́, держа́тся.

Воскресе́ние Христо́во: не глаголем, но абие псалом 50.

Таже Слава: Моли́твами апо́столов:

И ныне: Моли́твами Богоро́дицы:

Таже стих: Поми́луй мя, Бо́же:

Стихира, глас 6: Царю́ Небе́сный:

Канона праздника два. Ирмосы обою канонов по дважды, тропари на 12. Последи же един лик первый ирмос и другий лик другий ирмос.

Канон, глас 7. ⁵

Егоже краестрочие: Пятдесятницу празднуим. Творение Космы монаха.

Песнь 1

Ирмос: По́нтом покры́ фарао́на с колесни́цами/ Сокруша́яй бра́ни мы́шцею высо́кою,// пои́м Ему́, я́ко просла́вися.

Де́лом, я́коже дре́вле ученико́м обеща́л еси́, Уте́шителя Ду́ха посла́вый, Христе́, возсия́л еси́ ми́ру свет, Человеколю́бче.

Зако́ном дре́вле пропове́данное и проро́ки испо́лнися: Боже́ственнаго бо Ду́ха днесь всем ве́рным благода́ть излия́ся.

Ин канон, иамвический, творение кир Иоанна Арклийскаго.

Глас 4.

Ирмос: Боже́ственным покрове́н/ медленоязы́чный мра́ком,/ извити́йствова Богопи́санный зако́н:/ ти́ну бо оттря́с очесе́ у́мнаго,/ ви́дит Су́щаго/ и науча́ется Ду́ха ра́зуму,// хваля́ боже́ственными пе́сньми.

Реко́ша чи́стая и честна́я уста́: разлуче́ния вам не бу́дет, о дру́зи! Аз бо, на О́тчем вы́шнем престо́ле соседя́, излию́ Ду́ха, возсия́ти жела́ющим благода́ть незави́стную.

Преде́л преше́дшее и́стиннейшее Сло́во, тихообра́зно соверша́ет се́рдце: де́ло бо сконча́в, возвесели́ дру́ги, дыха́нием ну́жным и о́гненными язы́ки пода́в Ду́ха Христо́с, я́коже обеща́ся.

Катавасия: По́нтом покры́: Боже́ственным покрове́н:

Песнь 3

Ирмос: С высоты́ си́лою, ученико́м, Христе́,/ до́ндеже облеце́теся, рекл еси́,/ седи́те во Иерусали́ме:/ Аз же я́ко Мене́, Уте́шителя ино́го,/ Ду́ха Моего́ же и О́тча послю́,// в Не́мже утвердите́ся.

Боже́ственнаго Ду́ха наше́дшая си́ла разде́льшийся дре́вле глас зле согласи́вшихся, во еди́но прили́чие Боже́ственне совокупи́, ве́дением Тро́ицы вразумля́ющи ве́рныя, в Не́йже утверди́хомся.

Ин канон.

Ирмос: Разве́рзе утро́бы неча́дствовавшия у́зы,/ доса́ду же неудоботерпи́му благоча́дствующия,/ еди́на моли́тва проро́чицы дре́вле А́нны,/ нося́щия дух сокруше́н,// к Си́льному и Бо́гу ра́зумов.

Непостижи́ма есть Богонача́льнейшая: вети́я бо изъяви́ безкни́жныя, ры́бари прему́дрыя, зауща́ющия сло́вом и от глубо́кия но́щи изыма́ющия лю́ди безчи́сленны, блиста́нием Ду́ха.

Бя́ше исхо́ден от нерожде́нна Све́та всеси́льный сия́ющий Свет, Его́же Сы́ном Оте́ческия вла́сти ны́не явля́ет сра́сленное Озаре́ние, о́гненный Глас в Сио́не язы́ком.

Таже седален, глас 8.

Подобен: Повеле́нное та́йно:

Спа́совы рачи́телие ра́дости испо́лнишася, и дерзнове́ние прия́ша пре́жде боя́щиися: я́ко Дух Святы́й днесь свы́ше сни́де на дом учени́ческий, и ин ина́я глаго́лаше к лю́дем. Язы́цы бо разсе́яшася, ви́дими я́ко огнь: и сих не опали́, но па́че ороси́.

Слава, и ныне, тойже.

Песнь 4

Ирмос: Смотря́яй проро́к в после́дняя,/ Твое́, Христе́, прише́ствие, вопия́ше:/ Твою́ услы́шах, Го́споди, си́лу,// я́ко вся спасти́ пома́занныя Твоя́ прише́л еси́.

Во проро́цех глаго́лавый и зако́ном пропове́данный пе́рвее несоверше́нным, Бог и́стинный, Уте́шитель, Сло́ва служи́телем и свиде́телем познава́ется днесь.

Зна́мение Божества́ нося́й, апо́столом во огни́ Дух раздели́ся и стра́нными язы́ки явля́шеся, я́ко Оте́ческая Боже́ственная Си́ла гряду́щая есть, самоповели́тельная.

Ин канон.

Ирмос: Царю́ Царе́й, Яковы́й от Якова́го/ Еди́н, Сло́ве, произше́дый/ от Отца́ Безвино́внаго,/ Равномо́щнаго Твоего́ Ду́ха/ апо́столом и́стинно посла́л еси́,/ я́ко Благоде́теля, пою́щим:// сла́ва держа́ве Твое́й, Го́споди.

Ба́ню боже́ственную пакибытия́ сло́вом раствори́в, Ссложе́нное Естество́, дождоточи́ши ми струю́ от нетленнопрободе́ннаго Твоего́ ребра́, о Бо́жий Сло́ве, запечатле́я теплото́ю Ду́ха.

Преклоня́ют вся Уте́шителю коле́на, Сы́ну же О́тчу, Отцу́ Сра́сленному, в Ли́цех бо ви́деша трегу́бых Существо́ И́стинное, Неприкоснове́нное, Безле́тное, Еди́ное: возсия́ бо свет, благода́ть Ду́ха.

Да испо́лнятся вси Богонача́льнейшим, ели́цы служи́телие Трисве́тлаго Существа́: па́че естества́ бо соверша́ет, я́ко Благоде́тель, и огнесве́тит Христо́с во спасе́ние, всю дая́ благода́ть Ду́ха.

Песнь 5

Ирмос: Стра́ха ра́ди Твоего́ зача́тый, Го́споди,/ во чре́ве проро́ков/ и рожде́нный на земли́ Дух спасе́ния/ апо́стольская сердца́ созида́ет чи́ста/ и в ве́рных Пра́вый обновля́ется:// свет бо и мир зане́ Твоя́ повеле́ния.

Наше́дшая Си́ла дне́сь сия, Дух Благи́й, Дух Прему́дрости Бо́жией, Дух, от Отца́ исходя́й и Сы́ном ве́рным нам явле́йся подава́телен, в ни́хже вселя́ется естество́м святы́ни, в не́йже зри́тся.

Ин канон.

Ирмос: Реши́тельное очище́ние грехо́в,/ огнедохнове́нную приими́те Ду́ха ро́су,/ о ча́да светообра́зная церко́вная:/ ны́не от Сио́на бо изы́де зако́н,// языкоогнеобра́зная Ду́ха благода́ть.

Я́коже благоволи́ самовла́стно, необлада́нный исхо́дит Дух от Отца́, умудря́я в язы́цех апо́столы, печатле́я живоно́сное сло́во, отчеси́льное, сообра́зное, его́же Спас рече́.

Да исцели́т у́бо смы́слы от греха́, и се устроя́ше апо́столов Бог Сло́во Всенача́льное пречи́стый дом, в не́мже Единомо́щнаго же и Ссу́щественнаго ны́не вселя́ется Ду́ха свет.

Песнь 6

Ирмос: Пла́вающаго в молве́ жите́йских попече́ний,/ с корабле́м потопля́ема грехи́/ и душетле́нному зве́рю примета́ема,/ я́ко Ио́на, Христе́, вопию́ Ти:// из смертоно́сныя глубины́ возведи́ мя.

От Ду́ха Твоего́ на пло́ть вся́кую, я́коже ре́кл еси́, бога́тно излия́л еси́, и испо́лнишася вся́ческая Твоего́ ве́дения, Го́споди, я́ко из Отца́ Сы́н нетле́нно роди́лся еси́ и Ду́х Неразде́льный изы́де.

Ин канон.

Ирмос: Очище́ние нам, Христе́,/ и Спасе́ние, Влады́ко,/ возсия́л еси́ от Де́вы,/ да, я́ко проро́ка от зве́ря морска́го пе́рсей Ио́ну,// от тли исхити́ши всего́ Ада́ма, всеро́дна па́дшаго.

И́стинный нам Пра́вый во утро́бах, ве́чно прии́мшим, Дух да обнови́ши Отчеисхо́дный, и всесовокупле́нно, вещества́ ненави́стнаго Пали́тельный скверн, ка́ла же смы́слов Чисти́тельный, Вседержи́телю.

Жела́тельное достоя́ние апо́столом, сио́няном, ча́ющим Твоего́ прише́ствия, позна́ние Дух Отчерожде́нна Сло́ва, речь жесто́кую язы́ческих ласка́тельств ско́ро показа́в, огнедохнове́нно утвержда́еши.

Ектения малая.

Кондак, глас 8:

Егда́ снизше́д язы́ки слия́,/ разделя́ше язы́ки Вы́шний:/ егда́ же о́гненныя язы́ки раздая́ше,/ в соедине́ние вся призва́,// и согла́сно сла́вим Всесвята́го Ду́ха.

Икос:

Ско́рое и изве́стное даждь утеше́ние рабо́м Твои́м, Иису́се, внегда́ уныва́ти духо́м на́шим, не разлуча́йся от душ на́ших в ско́рбех, не удаля́йся от мы́слей на́ших во обстоя́ниих, но при́сно нас предвари́. Прибли́жися нам, прибли́жися, везде́ Сый, я́коже со апо́столы Твои́ми всегда́ еси́, си́це и Тебе́ жела́ющим соедини́ Себе́, Ще́дре: да, совоку́плени, Тебе́ пое́м, и славосло́вим Всесвята́го Ду́ха Твоего́.

Песнь 7

Ирмос: В пе́щь о́гненную вве́ржени, преподо́бнии о́троцы/ огнь в ро́су преложи́ша,/ воспева́нием си́це вопию́ще:// благослове́н еси́, Го́споди Бо́же оте́ц на́ших.

Вету́ющим боже́ственная вели́чия апо́столом, Ду́ха де́йство непщева́шеся пия́нство неве́рствующим, И́мже Тро́ица познава́ется, Еди́н Бог оте́ц на́ших.

Неразде́льное естество́ правосла́вно богосло́вим Бо́га, Отца́ Безнача́льнаго, тоя́жде вла́сти Сло́ва и Ду́ха: благослове́н еси́, зову́ще, Бо́же оте́ц на́ших.

Ин канон.

Ирмос: Согла́сная возшуме́ орга́нская песнь/ почита́ти златосотворе́нный безду́шный истука́н:/ Уте́шителева же светоно́сная благода́ть почеству́ет,/ е́же вопи́ти:// Тро́ице Еди́ная, Равноси́льная, Безнача́льная, благослове́нна еси́.

Гла́са пророковеща́тельнаго не разуме́вше, глаго́лаху безу́мнии виносотворе́нное пия́нство, ре́чи я́ко стра́нны слы́шаша апо́столов; благочести́вии же Тебе́ вопие́м боже́ственно: Богоде́телю всех, благослове́н еси́.

Боже́ственное уче́ние возгреме́ ви́дяй виде́ния боже́ственный Ио́иль: Богонача́льнейшаго и́мже излию́, рек, я́коже Сло́ва, Ду́ха Моего́, свозопию́щим: Естество́ Тривеща́нное Све́тлое, благослове́н еси́.

Тро́ичную у́бо раздели́ зря благода́ть, я́ко да яви́т Три Ипоста́си, почита́ти в простоте́ вла́сти, но во еди́ном ны́не дни Госпо́дском, Сын, Оте́ц и Дух Благослове́н.

Песнь 8

Ирмос: Неопа́льная огню́ в Сина́и/ прича́щшаяся купина́ Бо́га яви́/ медленоязы́чному и гугни́вому Моисе́ови,/ и о́троки ре́вность Бо́жия три непребори́мыя во огни́ певцы́ показа́:/ вся де́ла Госпо́дня, Го́спода по́йте// и превозноси́те во вся ве́ки.

Живо́тну свы́ше бу́рну носи́му гласо́вне, Ду́ха Всесвята́го дыха́нию рыбаре́м, о́гненных ви́дом язы́к вели́чия Бо́жия вети́йствоваху: вся дела́, Го́спода по́йте и превозноси́те во вся ве́ки.

Я́ко на некаса́емую превосходя́ще го́ру, не боя́щеся огня́ страша́ща, прииди́те и ста́нем на горе́ Сио́нской, во гра́де Жива́го Бо́га, духоно́сным ученико́м ны́не слику́юще: вся дела́, Го́спода по́йте и превозноси́те во вся ве́ки.

Ин канон.

Ирмос: Разреша́ет у́зы и ороша́ет пла́мень/ трисве́тлый Богонача́лия о́браз, пою́т о́троцы,/ благослови́т же Еди́наго Спа́са и Вседе́теля,/ я́ко Благоде́теля,// сотворе́нная вся́ческая тварь.

Па́мять человекоспаси́тельных слове́с, я́же, от Отца́ слы́шав, Христо́с апо́столом рече́, Дух устроя́ет языкоо́гненным виде́нием, посажда́я благослове́нно усвое́нную, учуже́нная же пое́т Тя тварь.

Спаси́тельно Самовлады́чный Еди́н, Свет Самосия́тельный, и Пода́тельный све́та сый, прише́л еси́, исполня́я апо́столы, честны́й я́ко верх Твои́м рабо́м, Насыти́тельный же Дух подава́еши.

Поя́ху проро́к духонасыще́нная уста́ Твое́ теле́сное, о Царю́, прише́ствие, и Дух, от недр О́тчих произше́дший, Несозда́нный, Зданноде́телен, Сопресто́лен Тебе́, еди́наго вочелове́чения ве́рным честь.

Честнейшую: не поем.

И абие диакон или иерей выходит пред праздничною иконою пред аналогием и возглашает высшим гласом:⁶

Апо́столи, соше́ствие Уте́шителя зря́ще, удиви́шася,/ ка́ко в ви́де о́гненных язы́к яви́ся Ду́х Святы́й.

Песнь 9

Ирмос: Не тле́ния искуше́нием ро́ждшая/ и Всехитрецу́ Сло́ву Плоть взаимода́вшая,/ Ма́ти Неискусому́жная, Де́во Богоро́дице,/ Прия́телище Нестерпи́маго,/ Село́ невмести́маго Зижди́теля Твоего́,// Тя велича́ем.

Припеваем же к тропарем припевы сицевая:

Велича́й, душе́ моя́,/ И́же от Отца́ исходя́щаго Свята́го Ду́ха.

На паля́щей дре́вле о́гненной колесни́це ревни́тель и огнедохнове́нный ра́дуяся носи́мь, е́же ны́не возсия́вшее дохнове́ние свы́ше апо́столом явля́ше; от него́же освяти́вшеся, Тро́ицу всем сказа́ша.

Зако́на есте́ств кроме́, стра́нное слы́шашеся ученико́в: еди́ному бо гла́су глася́щу Ду́ха благода́тию, разли́чне оглаша́хуся лю́дие, племена́ и язы́ки, Боже́ственная вели́чия, Тро́ицы ве́дению науча́юще.

Ин канон.

Ко второму канону припев:

Велича́й, душе́ моя́,/ в Трие́х Ли́цех су́щее Еди́но Божество́.

Ирмос: Ра́дуйся, Цари́це,/ Матероде́вственная Сла́во:/ вся́ка бо удобообраща́тельная благоглаго́ливая уста́/ вити́йствовати не мо́гут,/ Тебе́ пе́ти досто́йно,/ низумева́ет же ум всяк Твое́ Рождество́ разуме́ти.// Те́мже Тя согла́сно сла́вим.

Пе́ти подоба́ше естественножи́зненную Отрокови́цу: еди́на бо во чре́ве скры Сло́во, тая́щееся неду́гующаго челове́ческаго естества́, И́же в десны́х страна́х ны́не седя́й О́тчих, посла́ благода́ть Ду́ха.

Ели́цем дхну богото́чная благода́ть, светя́щеся, блиста́юще, изменя́еми стра́нным измене́нием благоле́пнейшим, Равноси́льствующую Несеко́мую уве́девше Прему́дрость, Трисве́тлое Существо́ сла́вим.

Таже катавасия, оба ирмоса вкупе.

Ектения малая, посем ексапостиларий.

Подобен: Не́бо звезда́ми:

Всесвяты́й Душе́, исходя́й из Отца́ и Сыно́м прише́дый к безкни́жным ученико́м, Тебе́ Бо́га позна́вших спаси́ и поми́луй все́х. (Дважды.)

Слава, и ныне, другий подобен:

Свет Оте́ц, Свет Сло́во, Свет и Святы́й Дух, И́же во язы́цех о́гненных апо́столом посла́ся, и Тем весь мир просвеща́ется Тро́ицу почита́ти Святу́ю.

На хвалитех: Вся́кое дыха́ние: во глас 4, поставим стихов 6 и поем настоящия самогласны, повторяюще я.

Стих: Сотвори́те в них суд напи́сан,/ сла́ва сия́ бу́дет всем преподо́бным Его́.

Пресла́вная днесь ви́деша вси язы́цы во гра́де Дави́дове,/ егда́ Дух сни́де Святы́й во о́гненных язы́цех,/ я́коже богоглаго́ливый Лука́ повеству́ет, глаго́лет бо:/ со́бранным ученико́м Христо́вым, бысть шум,/ я́коже носи́му дыха́нию бу́рну,/ и испо́лни дом, иде́же бя́ху седя́ще,/ и вси нача́ша глаго́лати стра́нными глаго́лы,/ стра́нными уче́нии,// стра́нными повеле́нии Святы́я Тро́ицы.

Стих: Хвали́те Бо́га во святы́х Его́,/ хвали́те Его́ во утверже́нии си́лы Его́.

Пресла́вная днесь ви́деша:

Стих: Хвали́те Его́ на Си́лах Его́,/ хвали́те Его́ по мно́жеству вели́чествия Его́.

Ду́х Святы́й бе́ у́бо при́сно, и е́сть, и бу́дет;/ ниже́ начина́емь, ниже́ престая́й,/ но при́сно Отцу́ и Сы́ну счине́н и счисля́емь;/ Живо́т, и Животворя́й;/ Све́т, и све́та Пода́тель;/ Самоблаги́й, и Исто́чник благосты́ни;/ И́мже Оте́ц познава́ется и Сы́н прославля́ется,/ и от все́х познава́ется,/ Еди́на си́ла, Еди́но счета́ние,// Еди́но поклоне́ние Святы́я Тро́ицы.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Дух Святы́й бе у́бо при́сно:

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Дух Святы́й Свет, и Живо́т,/ и живы́й Исто́чник у́мный;/ Дух прему́дрости, Дух ра́зума,/ Благи́й, Пра́вый, У́мный;/ Облада́яй, Очища́яй прегреше́ния;/ Бог и Боготворя́й,/ О́гнь, от Огня́ происходя́й,/ глаго́ляй, де́яй, разделя́яй дарова́ния,/ И́мже проро́цы вси/ и боже́ственнии апо́столи с му́ченики венча́шася:/ стра́нное слы́шание, стра́нное виде́ние:// О́гнь, разделя́яйся в подая́ние дарова́ний.

Стих: Хвали́те Его́ в кимва́лех доброгла́сных, хвали́те Его́в кимва́лех восклица́ния./ Вся́кое дыха́ние да хва́лит Го́спода.

Дух Святы́й Свет, и Живо́т:

Слава, и ныне, глас 6:

Царю́ Небе́сный,/ Уте́шителю, Душе́ и́стины,/ И́же везде́ сый/ и вся исполня́яй,/ Сокро́вище благи́х/ и жи́зни Пода́телю,/ прииди́, и всели́ся в ны,/ и очи́сти ны от вся́кия скве́рны,// и спаси́, Бла́же, ду́ши на́ша.

Славословие великое. Отпустительный тропарь праздника:

Благослове́н еси́, Христе́ Бо́же на́ш,/ И́же прему́дры ловцы́ явле́й,/ низпосла́в и́м Ду́ха Свята́го,/ и те́ми уловле́й вселе́нную,// Человеколю́бче, сла́ва Тебе́.

Таже ектении. И творит священник отпуст сице:

И́же в ви́де о́гненных язы́к с Небесе́ низпосла́вый Пресвята́го Ду́ха на святы́я Своя́ ученики́ и апо́столы, Христо́с, и́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных апо́стол и всех святы́х, поми́лует и спасе́т нас, я́ко Благи́й и Человеколю́бец.

И час 1–й.

На часех тропарь и кондак праздника.

По ектение мирной поем праздничные антифоны.

Антифон 1–й, псалом 18, глас 2.

Стих 1: Небеса́ пове́дают сла́ву Бо́жию.

Припев: Моли́твами Богоро́дицы, Спа́се, спаси́ нас.

И другий лик тойже стих:

Небеса́ пове́дают сла́ву Бо́жию,/ творе́ние же руку́ Его́ возвеща́ет твердь.

Припев: Моли́твами Богоро́дицы, Спа́се, спаси́ нас.

Стих 2: День дни отрыга́ет глаго́л,/ и нощь но́щи возвеща́ет ра́зум.

Припев: Моли́твами Богоро́дицы, Спа́се, спаси́ нас.

Стих 3: Во всю зе́млю изы́де веща́ние их,/ и в концы́ вселе́нныя глаго́лы их.

Припев: Моли́твами Богоро́дицы, Спа́се, спаси́ нас.

Слава, и ныне: Моли́твами Богоро́дицы, Спа́се, спаси́ нас.

Ектения малая.

Антифон 2–й, псалом 19, глас тойже.

Стих 1: Услы́шит тя Госпо́дь в день печа́ли.

Припев: Спаси́ ны, Уте́шителю Благи́й, пою́щия Ти: аллилу́ия.

Другая страна тойже стих:

Услы́шит тя Госпо́дь в день печа́ли,/ защи́тит тя и́мя Бо́га Иа́ковля.

Припев: Спаси́ ны, Уте́шителю Благи́й, пою́щия Ти: аллилу́ия.

Стих 2: По́слет ти по́мощь от Свята́го,/ и от Сио́на засту́пит тя.

Припев: Спаси́ ны, Уте́шителю Благи́й, пою́щия Ти: аллилу́ия.

Стих 3: Даст ти Госпо́дь по се́рдцу твоему́,/ и весь сове́т твой испо́лнит.

Припев: Спаси́ ны, Уте́шителю Благи́й, пою́щия Ти: аллилу́ия.

Слава, и ныне: Единоро́дный Сы́не:

Ектения малая.

Антифон 3–й, псалом 20, глас 8

Стих 1: Го́споди, си́лою Твое́ю возвесели́тся царь.

Тропарь: Благослове́н еси́, Христе́ Бо́же наш:

Другий лик тойже стих:

Го́споди, си́лою Твое́ю возвесели́тся царь,/ и о спасе́нии Твое́м возра́дуется зело́.

Тропарь: Благослове́н еси́, Христе́ Бо́же наш:

Стих 2: Жела́ние се́рдца его́ дал еси́ ему́,/ и хоте́ния устну́ его́ не́си лиши́л его́.

Тропарь: Благослове́н еси́, Христе́ Бо́же наш:

Стих 3: Я́ко предвари́л еси́ его́ благослове́нием благосты́нным,/ положи́л еси́ на главе́ его́ вене́ц от ка́мене че́стна.

Тропарь: Благослове́н еси́, Христе́ Бо́же наш:

Входное, от иерея глаголемое: Вознеси́ся, Го́споди, си́лою Твое́ю, воспое́м и пое́м си́лы Твоя́.

Тропарь, глас 8:

Благослове́н еси́, Христе́ Бо́же на́ш,/ И́же прему́дры ловцы́ явле́й,/ низпосла́в и́м Ду́ха Свята́го,/ и те́ми уловле́й вселе́нную,// Человеколю́бче, сла́ва Тебе́.

Слава, и ныне, кондак, глас 8:

Егда́ снизше́д язы́ки слия́,/ разделя́ше язы́ки Вы́шний:/ егда́ же о́гненныя язы́ки раздая́ше,/ в соедине́ние вся призва́,// и согла́сно сла́вим Всесвята́го Ду́ха.

Вместо же Трисвятаго поем:

Ели́цы во Христа́ крести́стеся,/ во Христа́ облеко́стеся. Аллилу́ия.

Прокимен, глас 8: Во всю зе́млю изы́де веща́ние их,/ и в концы́ вселе́нныя глаго́лы их. (И до отдания.)

Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.

Апостол в Деяниих, зачало 3: Егда́ скончава́шася дни́е Пятдеся́тницы:

Аллилуия, глас 1: Сло́вом Госпо́дним Небеса́ утверди́шася, и Ду́хом уст Его́ вся Си́ла их.

Стих: С Небесе́ призре́ Госпо́дь, ви́де вся сы́ны челове́ческия.

Евангелие от Иоанна, зачало 27: В после́дний день вели́кий пра́здника:

И по чину Божественная Литургия Иоанна Златоустаго.

За Достойно: поем и до отдания припев, един от сих:

Апо́столи, соше́ствие Уте́шителя зря́ще, удиви́шася,/ ка́ко в ви́де о́гненных язы́к яви́ся Дух Святы́й.

Велича́й, душе́ моя́,/ в Трие́х Ли́цех су́щее Еди́но Божество́.

Велича́й, душе́ моя́,/ И́же от Отца́ исходя́щаго Свята́го Ду́ха.

Посем ирмос:

Ра́дуйся, Цари́це,/ Матероде́вственная Сла́во:/ вся́ка бо удобообраща́тельная благоглаго́ливая уста́/ вити́йствовати не мо́гут,/ Тебе́ пе́ти досто́йно,/ низумева́ет же ум всяк Твое́ Рождество́ разуме́ти.// Те́мже Тя согла́сно сла́вим.

Причастный стих: Дух Твой Благи́й наста́вит мя на зе́млю пра́ву. Аллилу́ия (трижды).

И по отпусте на Литургии глаголется 9–й час по обычаю.