В понедельник Святого Духа

На полунощнице по 1–м Трисвятом глаголем тропарь праздника. По 2–м Трисвятом глаголем кондак праздника. Го́споди, поми́луй, 12. И отпуст. Молитвы же за упокой не глаголем.

На Бог Госпо́дь: тропарь праздника трижды.

По 1–м стихословии седален, глас 4.

Подобен: Удиви́ся Ио́сиф:

Попра́зднственный, ве́рнии, и коне́чный пра́здник пра́зднуим све́тло, сей есть Пятдеся́тница, обеща́ния исполне́ние и предложе́ния: в сей бо Огнь Уте́шителев сни́де на зе́млю, я́ко в ви́де язы́к, и ученики́ просвети́, и сия́ неботаи́нники показа́. Све́т прии́де Уте́шителя и мир просвети́. (Дважды.)

По 2–м стихословии седален, глас и подобен тойже:

Ду́ха Исто́чник, прише́д на зе́млю, во о́гненныя ре́ки разделя́яся мы́сленно, апо́столы ороша́ше просвеща́я: и бысть им о́блак ороша́яй огнь, просвеща́яй тех и одождя́яй пла́мень, и́миже мы прия́хом благода́ть, огне́м же и водо́ю. Свет прии́де Уте́шителя и ми́р просвети́. (Дважды.)

Таже оба канона праздника: 7–го гласа со ирмосом на 8, и 4–го гласа со ирмосом на 6. Катавасия: Боже́ственным покрове́н: оба лика вкупе.

По 3–й песни седален, глас 8.

Подобен: Прему́дрости Сло́ва:

Всесвяты́й Ду́х ны́не, соше́д на апо́столы ви́дом о́гненным, у́жасом испо́лни язы́ков собра́ния: язы́ки бо глаго́лющих о́гненными, Человеколю́бче, свою́ ки́йждо бесе́ду слы́шаше. Те́мже и чу́до неве́рным, я́ко пия́нство, ве́рным же спаси́тельное вои́стину познава́шеся. Сего́ ра́ди сла́вим держа́ву Твою́, Христе́ Бо́же, прегреше́ний оставле́ния прося́ще низпосла́ти бога́тно рабо́м Твои́м. (Дважды.)

По 6–й песни кондак и икос праздника.

Честнейшую: не поем:

По 9–й песни ексапостиларий праздника дважды, другий единожды.

На хвалитех: Вся́кое дыха́ние: поставим стихи 4. И поем стихиры самогласны, глас 2.

Стих: Хвали́те Его́ на Си́лах Его́,/ хвали́те Его́ по мно́жеству вели́чествия Его́.

Во проро́цех возвести́л еси́ нам путь спасе́ния,/ и во апо́столех возсия́, Спа́се наш,/ благода́ть Ду́ха Твоего́:/ Ты еси́ Бог пе́рвый, Ты и по сих,// и во ве́ки Ты еси́ Бог наш.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Во проро́цех возвести́л еси́:

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Во дво́рех Твои́х воспою́ Тя Спа́са ми́ра/ и, прекло́нь коле́на,/ поклоню́ся Твое́й непобеди́мей си́ле,/ ве́чер, и у́тро, и полу́дне,// и на вся́кое вре́мя благословлю́ Тя, Го́споди.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Во дво́рех Твои́х, Го́споди,/ ве́рнии, коле́на душ и теле́с прекло́нше,/ воспева́ем Тя Безнача́льнаго Отца́/ и Собезнача́льнаго Сы́на/ и Соприсносу́щнаго и Пресвята́го Ду́ха,// просвеща́ющаго и освяща́ющаго ду́ши на́ша.

Слава, и ныне, глас 8:

Язы́цы иногда́ размеси́шася,/ де́рзости ра́ди столпотворе́ния:/ язы́цы же ны́не умудри́шася,/ сла́вы ра́ди богове́дения./ Та́мо осуди́ нечести́выя погреше́нием:/ зде́ просвети́л е́сть Христо́с ры́бари Ду́хом./ Тогда́ упраздни́ся безгла́сие к муче́нию:/ ны́не обновля́ется согла́сие// ко спасе́нию ду́ш на́ших.

Славословие великое.

Тропарь праздника, ектении.

Отпуст глаголем праздника: И́же в ви́де о́гненных язы́к: и час 1–й.

Глаголем изобразительная.

Блаженны от канона праздника, песнь 3–я и 6–я.

Блаже́ни ми́лостивии,/ я́ко ти́и поми́ловани бу́дут.

Боже́ственнаго Ду́ха наше́дшая си́ла/ разде́льшийся дре́вле глас/ зле согласи́вшихся/ во еди́но прили́чие Боже́ственне совокупи́,/ ве́дением Тро́ицы вразумля́ющи ве́рныя,/ в Не́йже утверди́хомся.

Блаже́ни чи́стии се́рдцем,/ я́ко ти́и Бо́га у́зрят.

Боже́ственнаго Ду́ха наше́дшая си́ла:

Блаже́ни миротво́рцы,/ я́ко ти́и сы́нове Бо́жии нареку́тся.

Непостижи́ма есть Богонача́льнейшая:/ вети́я бо изъяви́ безкни́жныя, ры́бари прему́дрыя,/ зауща́ющия сло́вом и от глубо́кия но́щи изыма́ющия лю́ди безчи́сленны/ блиста́нием Ду́ха.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Бя́ше исхо́ден от нерожде́нна Све́та всеси́льный сия́ющий Свет,/ Его́же Сы́ном Оте́ческия вла́сти/ ны́не явля́ет сра́сленное Озаре́ние,/ о́гненный Глас в Сио́не язы́ком.

Блаже́ни есте́, егда́ поно́сят вам,/ и изжену́т, и реку́т всяк зол глаго́л на вы, лжу́ще, Мене́ ра́ди.

От Ду́ха Твоего́ на плоть вся́кую,/ я́коже рекл еси́, бога́тно излия́л еси́,/ и испо́лнишася вся́ческая Твоего́ ве́дения, Го́споди,/ я́ко из Отца́ Сын нетле́нно роди́лся еси́ и Дух Неразде́льный изы́де.

Ра́дуйтеся и весели́теся,/ я́ко мзда ва́ша мно́га на Небесе́х.

От Ду́ха Твоего́:

Слава:

И́стинный нам Пра́вый во утро́бах, ве́чно прии́мшим, Дух/ да обнови́ши Отчеисхо́дный, и всесовокупле́нно,/ вещества́ ненави́стнаго Пали́тельный скверн,/ ка́ла же смы́слов Чисти́тельный, Вседержи́телю.

И ныне:

Жела́тельное достоя́ние апо́столом,/ сио́няном, ча́ющим Твоего́ прише́ствия,/ позна́ние Дух Отчерожде́нна Сло́ва,/ речь жесто́кую язы́ческих ласка́тельств ско́ро показа́в, огнедохнове́нно утвержда́еши.

Таже иерей или диакон: Прему́дрость, про́сти.

И входное: Вознеси́ся, Го́споди, си́лою Твое́ю, воспое́м и пое́м си́лы Твоя́.

Тропарь, глас 8:

Благослове́н еси́, Христе́ Бо́же на́ш,/ И́же прему́дры ловцы́ явле́й,/ низпосла́в и́м Ду́ха Свята́го,/ и те́ми уловле́й вселе́нную,// Человеколю́бче, сла́ва Тебе́.

Слава, и ныне, кондак, глас 8:

Егда́ снизше́д язы́ки слия́,/ разделя́ше язы́ки Вы́шний:/ егда́ же о́гненныя язы́ки раздая́ше,/ в соедине́ние вся призва́,// и согла́сно сла́вим Всесвята́го Ду́ха.

Трисвятое.

Прокимен Апостола, глас 6: Спаси́, Го́споди, лю́ди Твоя́/ и благослови́ достоя́ние Твое́.

Стих: К Тебе́, Го́споди, воззову́, Бо́же мой, да не премолчи́ши от Мене́.

Апостол ко Ефесеем, зачало 229: Я́ко ча́да све́та ходи́те:

Аллилуия, глас 2: Поми́луй мя, Бо́же, по вели́цей ми́лости Твое́й.

Стих: Не отве́ржи мене́ от лица́ Твоего́ и Ду́ха Твоего́ Свята́го не отыми́ от Мене́.

Евангелие от Матфея, зачало 75: Блюди́те, да не пре́зрите еди́наго от ма́лых:

Причастный стих: Дух Твой Благи́й наста́вит мя на зе́млю пра́ву. Аллилу́ия (трижды).

Зри: Ведомо же буди, яко седмица сия святыя Пентикостии разрешаема есть на сыр, рыбы, вино и елей.

Оставляются же и междочасия часов, и иже в повечериих певаемый канон Пресвятыя Богородицы.