Неделя четвертая по Пасхе o расслабленном

На Го́споди, воззва́х: стихиры воскресны 4, глас 3:

Твои́м Кресто́м, Христе́ Спа́се: Просвети́шася вся́ческая: Сла́влю Отца́ и Сы́на си́лу: Кресту́ Твоему́ честно́му:

Слава, глас 5: Взы́де Иису́с во Иерусали́м: (Вся сия стихиры ищи на велицей вечерни.)

И ныне, Богородичен догматик, глас 3:

Преве́лие чу́до:/ Де́ва ро́ждшая, и рожде́нное Бо́г,/ пре́жде ве́к предъявле́нное рожде́ние/ и соверше́нное па́че естества́./ О, та́инства стра́шнаго,/ е́же и мы́слимое неизрече́нно пребыва́ет,/ и зри́мое не пое́млется!/ Блаже́нна Ты́ еси́, Пречи́стая Отрокови́це,/ Ада́ма земноро́днаго Дщи́,/ и Бо́га вы́шняго я́вльшаяся Ма́ти:// Того́ моли́ спасти́ся душа́м на́шим.

На стиховне стихира воскресна: Стра́стию Твое́ю:

Таже стихиры Богородицы, глас 3.

Подобен: Ве́лия Креста́:

Стих: Слы́ши, Дщи, и виждь,/ и приклони́ у́хо Твое́.

Вели́кое Тобо́ю благодея́ние, Пречи́стая, получи́вше,/ со А́нгелы Рожде́ние Твое́ сла́вим,/ сподо́бльшееся из утро́бы Твоея́ роди́тися,/ кра́йняго ра́ди благоутро́бия,// и возсозда́вшаго челове́ческий род.

Стих: Помяну́ и́мя Твое́/ во вся́ком ро́де и ро́де.

Тя́ вси́ прибе́жище и Боже́ственный покро́в, Чи́стая,/ гре́шнии в житии́ стяжа́хом, Де́во:/ мо́лим у́бо вси́ Твое́ благоутро́бие,/ не отступи́ от на́с, мо́лимся,// но поми́луй и спаси́.

Стих: Лицу́ Твоему́ помо́лятся/ бога́тии лю́дстии.

Еже ра́дуйся, Богоро́дице, Ма́ти Присноде́во,/ пе́рстнии Твои́ раби́ прино́сим досто́йно/ с Гаврии́лом, боже́ственным чинонача́льником:/ и́бо ра́дости Хода́таица// и ра́дование Ты была́ еси́ ми́рови.

Слава, и ныне, глас 8: В притво́ре Соломо́нове: (Ищи на велицей вечерни, на стиховне славник)

Тропарь, глас 3:

Да веселя́тся Небе́сная,/ да ра́дуются земна́я,/ я́ко сотвори́ держа́ву/ мы́шцею Свое́ю Госпо́дь:/ попра́ сме́ртию сме́рть,/ Пе́рвенец ме́ртвых бы́сть,/ из чре́ва а́дова изба́ви на́с// и подаде́ ми́рови ве́лию ми́лость.

И отпуст.

На Го́споди, воззва́х: поставим стихов 10. И поем стихиры воскресны 3, и восточны 4; и о разслабленном самогласны 2, повторяюще первую.

Глас 3.

Стих: Изведи́ из темни́цы ду́шу мою́/ испове́датися и́мени Твоему́.

Твои́м Кресто́м, Христе́ Спа́се,/ сме́рти держа́ва разруши́ся/ и диа́воля пре́лесть упраздни́ся:/ род же челове́ческий, ве́рою спаса́емый,// песнь Тебе́ всегда́ прино́сит.

Стих: Мене́ ждут пра́ведницы,/ до́ндеже возда́си мне.

Просвети́шася вся́ческая/ Воскресе́нием Твои́м, Го́споди,/ и ра́й па́ки отве́рзеся,/ вся́ же тва́рь, восхваля́ющи Тя́,// пе́снь Тебе́ всегда́ прино́сит.

Стих: Из глубины́ воззва́х к Тебе́, Го́споди,/ Го́споди, услы́ши глас мой.

Сла́влю Отца́ и Сы́на си́лу,/ и Ду́ха Свята́го пою́ власть,/ Неразде́льное, Несозда́нное Божество́,/ Тро́ицу Единосу́щную,// ца́рствующую в век ве́ка.

Стих: Да бу́дут у́ши Твои́/ вне́млюще гла́су моле́ния моего́.

Кресту́ Твоему́ честно́му покланя́емся, Христе́,/ и Воскресе́ние Твое́ пое́м и сла́вим:// ра́ною бо Твое́ю мы́ вси́ исцеле́хом.

Стих: А́ще беззако́ния на́зриши, Го́споди, Го́споди, кто́ постои́т?/ Я́ко у тебе́ очище́ние есть.

Пое́м Спа́са, от Де́вы вопло́щшагося,/ нас бо ра́ди распя́тся/ и в тре́тий день воскре́се// Да́руяй нам ве́лию ми́лость.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Су́щим во а́де, соше́д, Христо́с благовести́:/ дерза́йте, глаго́ля, ны́не победи́х,/ Аз есмь Воскресе́ние, Аз вы возведу́,// разруши́в сме́ртная врата́.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Недосто́йно стоя́ще в пречи́стом дому́ Твое́м,/ вече́рнюю песнь возсыла́ем,/ из глубины́ взыва́юще, Христе́ Бо́же:/ Просвети́вый мир тридне́вным Воскресе́нием Твои́м,/ изми́ лю́ди Твоя́ от руки́ враго́в Твои́х,// Человеколю́бче.

Ины стихиры, самогласны, о разслабленном. Глас 1.

Стих: Я́ко у Го́спода ми́лость, и мно́гое у Него́ избавле́ние,/ и Той изба́вит Изра́иля от всех беззако́ний его́.

Дла́нию пречи́стою созда́вый челове́ка,/ прише́л еси́, Благоутро́бне, неду́гующия исцели́ти, Христе́:/ разсла́бленнаго во О́вчей купе́ли/ сло́вом Твои́м возста́вил еси́,/ кровоточи́вой же боле́знь исцели́л еси́,/ ханане́и отрокови́цу стужа́емую поми́ловал еси́/ и проше́ния со́тника не презре́л еси́./ Сего́ ра́ди зове́м:// Всеси́льне Го́споди, сла́ва Тебе́.

Стих: Хвали́те Го́спода, вси язы́цы,/ похвали́те Его́, вси лю́дие.

Дла́нию пречи́стою:

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Непогребе́н мертве́ц сый,/ разсла́бленный, ви́дев Тя, возопи́:/ поми́луй мя, Го́споди,/ я́ко одр мой гроб мне бысть./Что ми приобре́тение живота́?/ Не тре́бую О́вчия купе́ли,/ не и́мам бо никого́же влага́юща мя, возмуща́ющимся вода́м:/ но к Тебе́, Исто́чнику прихожду́ исцеле́ний,/ да и аз со все́ми зову́:// Всеси́льне Го́споди, сла́ва Тебе́.

Слава, глас 5:

Взы́де Иису́с во Иерусали́м на О́вчую купе́ль,/ глаго́лемую иуде́йски Вифесда́,/ пя́ть притво́ров иму́щую:/ в те́х бо слежа́ше мно́жество немощству́ющих./ А́нгел бо Бо́жий, по вся́ ле́та сходя́, возмуща́ше ю́/ и здра́вие подава́ше приступа́ющим ве́рою./ И ви́дев Госпо́дь многовре́менна челове́ка, глаго́лет к нему́:/ хо́щеши ли здра́в бы́ти?/ Немощству́яй отвещава́ше:/ Го́споди, челове́ка не и́мам,/ да егда́ возмути́тся вода́, вве́ржет мя́ в купе́ль;/ враче́м изда́х все́ име́ние мое́/ и ми́лости улучи́ти не сподо́бихся./ Но Вра́ч ду́ш и теле́с глаго́лет к нему́:/ возьми́ тво́й о́др и ходи́,/ пропове́дуя Мою́ си́лу// и ве́лию ми́лость в конце́х.

И ныне, Богородичен, глас 3:

Ка́ко не диви́мся/ богому́жному Рождеству́ Твоему́, Пречестна́я?/ Искуше́ния бо му́жескаго не прии́мши, Всенепоро́чная,/ родила́ еси́ без Отца́ Сы́на пло́тию,/ пре́жде ве́к от Отца́ рожде́ннаго без ма́тере,/ ника́коже претерпе́вшаго измене́ния,/ или́ смеше́ния, или́ разделе́ния:/ но обою́ существу́ сво́йство це́ло сохра́ньшаго./ Те́мже, Ма́ти Де́во, Влады́чице,/ Того́ моли́ спасти́ся душа́м// правосла́вно Богоро́дицу испове́дающих Тя́.

Вход. Све́те ти́хий:

Прокимен: Госпо́дь воцари́ся: со стихи его.

На литии стихира храма.

Слава, глас 5:

При О́вчей купе́ли/ челове́к лежа́ше в не́мощи/ и, ви́дев Тя́, Го́споди, вопия́ше:/ челове́ка не и́мам,/ да егда́ возмути́тся вода́, вве́ржет мя́ в ню́./ Егда́ же прихожду́, и́н предваря́ет мя́/ и прие́млет исцеле́ние:/ а́з же немощству́яй лежу́./ И а́бие умилосе́рдився, Спа́с глаго́лет к нему́:/ тебе́ ра́ди Челове́к бы́х,/ тебе́ ра́ди в Пло́ть облеко́хся,/ и глаго́леши: челове́ка не и́мам;/ возьми́ о́др тво́й и ходи́./ Вся́ Тебе́ возмо́жна,/ вся́ послу́шают, вся́ повину́ются:/ все́х на́с помяни́ и поми́луй, Святы́й,// я́ко Человеколю́бец.

И ныне, Богородичен, глас тойже:

Храм и дверь еси́,/ пала́та и престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме спя́щим яви́ся,/ Со́лнце сый пра́вды, просвети́ти хотя́,/ я́же созда́ по о́бразу Своему́ руко́ю Свое́ю./ Те́мже, Всепе́тая,/ я́ко Ма́терне дерзнове́ние к Нему́ стяжа́вшая,// непреста́нно моли́ спасти́ся душа́м на́шим.

На стиховне стихира воскресна, глас 3:

Стра́стию Твое́ю, Христе́,/ омрачи́вый со́лнце/ и све́том Твоего́ Воскресе́ния/ просвети́вый вся́ческая,// приими́ на́шу вече́рнюю песнь, Человеколю́бче.

И стихиры Пасхи с припевы их.

Слава, глас 8:

В притво́ре Соломо́нове,/ та́мо слежа́ше мно́жество немощству́ющих,/ и, преполови́вшуся пра́зднику,/ обре́те Христо́с три́десять о́смь ле́т разсла́блена лежа́ща,/ Влады́чним гла́сом глаго́лет к нему́:/ хо́щеши ли здра́в бы́ти?/ Немощству́яй отвещава́ше:/ Го́споди, челове́ка не и́мам,/ да егда́ возмути́тся вода́, вве́ржет мя́ в купе́ль./ О́н же глаго́лет к нему́:/ возьми́ о́др тво́й и ходи́:/ се́ здра́в бы́л еси́, ктому́ не согреша́й./ Богоро́дицы моли́твами// низпосли́ на́м ве́лию ми́лость.

И ныне: Воскресе́ния день: Христо́с воскре́се: единожды.

И прочее, яко предписася в мимошедшую Неделю.

На благословении хлебов: Богоро́дице Де́во: трижды.

Аще же не будет бдения, на полунощнице поем канон Троичен во Октоихе, гласа 3–го. И Досто́йно есть: и прочее, яко обычно. И отпуст.

На Бог Госпо́дь: тропарь воскресен.

Глас 3:

Да веселя́тся Небе́сная,/ да ра́дуются земна́я,/ я́ко сотвори́ держа́ву/ мы́шцею Свое́ю Госпо́дь:/ попра́ сме́ртию сме́рть,/ Пе́рвенец ме́ртвых бы́сть,/ из чре́ва а́дова изба́ви на́с// и подаде́ ми́рови ве́лию ми́лость. (Дважды.)

Слава, и ныне, Богородичен:

Тя́, хода́тайствовавшую спасе́ние ро́да на́шего,/ воспева́ем, Богоро́дице Де́во:/ Пло́тию бо, от Тебе́ восприя́тою, Сы́н Тво́й и Бо́г на́ш/ Кресто́м восприи́м Стра́сть,// изба́ви на́с от тли́, я́ко Человеколю́бец.

По 1–м стихословии седален, глас 3:

Христо́с от ме́ртвых воста́, Нача́ток усо́пших, Перворожде́н тва́ри и Соде́тель все́х бы́вших, истле́вшее естество́ ро́да на́шего в Себе́ Само́м обнови́. Не ктому́, сме́рте, облада́еши: и́бо все́х Влады́ка держа́ву твою́ разруши́.

Стих: Воскресни́, Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́.

Пло́тию сме́рти вкуси́вый Го́споди, го́ресть сме́рти пресе́кл еси́ воста́нием Твои́м, и челове́ка на ню укрепи́вый, пе́рвыя кля́твы одоле́ние призыва́я: Защи́тниче жи́зни на́шея, Го́споди, сла́ва Тебе́.

Слава, и ныне:

Красоте́ де́вства Твоего́ и пресве́тлой чистоте́ Твое́й Гаврии́л удиви́вся, вопия́ше Ти, Богоро́дице: ку́ю Ти похвалу́ принесу́ досто́йную? Что же возымену́ю Тя? Недоумева́ю и ужаса́юся. Те́мже, я́коже повеле́н бых, вопию́ Ти: ра́дуйся, Благода́тная.

По 2–м стихословии седален, глас 3:

Подобен: Красоте́ де́вства:

Вся челове́ческая восприи́м, вся на́ша присво́ив, на Кресте́ пригвозди́тися благоволи́л еси́, Тво́рче мой, смерть прии́м претерпе́ти, я́ко Челове́к, да челове́ческое от сме́рти изба́виши, я́ко Бог. Те́мже, я́ко Жизнода́вцу, вопие́м Ти: сла́ва, Христе́, благоутро́бию Твоему́.

Стих: Испове́мся Тебе́, Го́споди, всем се́рдцем мои́м, пове́м вся чудеса́ Твоя́.

Непостижи́мое распя́тия и несказа́нное воста́ния богосло́вствуем ве́рнии та́инство неизрече́нное: днесь бо смерть и ад плени́ся, род же челове́ческий в нетле́ние облече́ся. Тем, благодаря́ще, вопие́м Ти: сла́ва, Христе́, воста́нию Твоему́.

Слава, и ныне, Богородичен:

Небе́сная любо́вию веселя́хуся, и земна́я тре́петом ужаса́хуся, егда́ пречи́стый глас на́йде на Тя, Богоро́дице: еди́но бо торжество́ обои́м возсия́, егда́ первозда́ннаго от сме́рти изба́ви. Тем со А́нгелом вопие́м Ти: ра́дуйся, Чи́стая Де́во Ма́ти.

По непорочнах тропари: Благослове́н еси́, Го́споди:

Таже ипакои, глас 3:

Удивля́я виде́нием, ороша́я глаго́лании, блиста́яйся, А́нгел мироно́сицам глаго́лаше: что Жива́го и́щете во гро́бе? Воста́ Истощи́вый гро́бы: тли Премени́теля разуме́йте Непреме́ннаго. Рцы́те Бо́гу: коль стра́шна дела́ Твоя́, я́ко род спасл еси́ челове́ческий.

Степенна, глас 3.

Антифон 1:

Плен Сио́нь Ты изъя́л еси́ от Вавило́на,/ и мене́ от страсте́й к животу́/ привлецы́, Сло́ве.

В юг се́ющии слеза́ми боже́ственными/ жнут кла́сы/ ра́достию присноживо́тия.

Слава: Свято́му Ду́ху вся́кое благода́рие,/ я́коже Отцу́ и Сы́ну сооблиста́ет,// в Не́мже вся живу́т и дви́жутся.

И ныне, тойже.

Антифон 2:

А́ще не Госпо́дь сози́ждет дом доброде́телей,/ всу́е тружда́емся:/ ду́шу же покрыва́ющу,/ никто́же наш разори́т град.

Плода́ чре́вна Ду́хом/ сынотворе́нное Тебе́, Христу́,/ я́коже и Отцу́, / святи́и всегда́ суть.

Слава: Святы́м Ду́хом прозри́тся вся́кая святы́ня,/ прему́дрость, осуществу́ет бо вся́кую тварь:/ Тому́ послу́жим, Бог бо,// я́ко Отцу́ же и Сло́ву.

И ныне, тойже.

Антифон 3:

Боя́щиися Го́спода блаже́ни,/ в пути́ ходя́ще за́поведей,/ сне́дят бо живо́тное всепло́дие.

О́крест трапе́зы Твоея́ возвесели́ся,/ зря Твоя́, Пастыренача́льниче, исча́дия,/ нося́ща ве́тви благоде́лания.

Слава: Святы́м Ду́хом вся́кое бога́тство сла́вы,/ от Него́же благода́ть и живо́т вся́кой тва́ри:// со Отце́м бо воспева́емь е́сть и с Сло́вом.

И ныне, тойже.

Прокимен, глас 3: Рцы́те во язы́цех, я́ко Госпо́дь воцари́ся,/ и́бо испра́ви вселе́нную, я́же не подви́жится.

Стих: Воспо́йте Го́сподеви песнь но́ву, воспо́йте Го́сподеви вся земля́.

Вся́кое дыха́ние:

Евангелие утреннее воскресно 4–е, от Луки, зачало 112: Во еди́ну от суббо́т, зело́ ра́но: Таже: Воскресе́ние Христо́во: трижды.

По 50–м псалме, Слава: Моли́твами апо́столов: И ныне: Моли́твами Богоро́дицы: Поми́луй мя, Бо́же: Воскре́с Иису́с от гро́ба:

Канон Пасхи

Песнь 1

Ирмос: Воскресе́ния день:

Очи́стим чу́вствия: Небеса́ у́бо досто́йно:

Богородичны: Умерщвле́ния преде́л: Воскре́сшаго ви́девши Сы́на:

Ин канон, о расслабленном, на 6.

Глас 3.

Ирмос: Ди́вно, сла́вно творя́й чудеса́,/ Ты еси́, Бо́же,/ бе́здну оземлени́вый,/ и колесни́цы потопи́вый,/ и лю́ди спасы́й, пою́щия Тебе́,// я́ко Царю́ на́шему и Бо́гу.

Де́йствуяй зна́мения, творя́й чудеса́, Еди́не Царю́, распя́тие во́лею претерпе́л еси́, я́ко Ще́др, и, сме́рть сме́ртию умертви́в, оживотвори́л еси́ на́с.

Во Христо́ве воста́нии, лю́дие, днесь лику́им ве́рно: плене́н бысть ад, ю́зники, я́же содержа́ше, отдаде́ со тща́нием, пою́щия вели́чия Бо́жия.

Си́лою Боже́ственною иногда́ разсла́бленнаго сло́вом Твои́м, Христе́, стягну́вый и повеле́вый ему́ одр взя́ти, мно́гим вре́менем немощству́ющую лю́те ду́шу мою́ исцели́.

В купе́ль иногда́ О́вчую А́нгел схожда́ше и еди́наго исцелева́ше на вся́кое ле́то: креще́нием же боже́ственным ны́не очища́ет безчи́сленная мно́жества Христо́с.

Архангелу Михаилу: Нача́льниче А́нгелов, Архистрати́же вы́шних служи́телей, собра́вшияся в честне́м хра́ме твое́м и Бо́га воспева́ющия покрыва́й и сохраня́й от вся́ких искуше́ний.

Слава, Троичен: В трие́х Ли́цех, Еди́ном же естестве́ Безнача́льнаго Бо́га пои́м непреста́нно со безпло́тными, Отца́, Сло́ва и Ду́ха, ца́рство и держа́ву иму́ща неразде́льную.

И ныне, Богородичен: Чту́щий се́й, Чи́стая, гра́д Тво́й всегда́ ве́рно, спаса́й от бе́д, плене́ния ва́рварскаго, междоусо́бныя бра́ни, и меча́, и вся́каго ино́го преще́ния.

Катавасия: Воскресе́ния день: оба лика вкупе.

Песнь 3

Ирмос: Прииди́те, пи́во пие́м но́вое:

Ны́не вся испо́лнишася све́та: Вчера́ спогребо́хся Тебе́, Христе́:

Богородичны: На нетле́нную жизнь: Бо́га, Его́же родила́:

Ин канон.

Ирмос: Непло́дная душе́ и безча́дная,/ стяжи́ плод благосла́вный,/ веселя́щися возопи́й: утверди́хся Тобо́ю, Бо́же,/ несть свят, несть пра́веден,// па́че Тебе́, Го́споди.

Зря Тебе́ иногда́ со́лнце на Дре́ве ви́сяща, Сло́ве, свет скры, и тряса́шеся земля́ вся, ме́ртвии воста́ша, ме́ртву бы́вшу Тебе́, Всеси́льне.

С душе́ю прише́дшу Тебе́ во утро́бу земли́, ду́ши, я́же стяжа́, ад издава́ше со тща́нием, вопию́щия держа́ве Твое́й песнь благода́рную, Еди́не Го́споди.

В ле́тех мно́гих немощству́ющую лю́те ду́шу мою́ Преблаги́й исцели́, я́коже разсла́бленнаго пре́жде, я́ко да после́дую Твои́м стезя́м, я́же показа́л еси́ лю́бящим Тя.

Архангелу Михаилу: С вы́шними чи́нми, Бо́жий Арха́нгеле, мольбу́ сотвори́ о ве́рою пою́щих тя, соблюда́я и храня́ нас, жите́йскими страстьми́ напада́емых.

Слава, Троичен: Сла́ва Отцу́, возопии́м, Сы́ну и Ду́ху, Еди́н бо есть естество́м Бог, Его́же Си́лы вся Небе́сныя со стра́хом сла́вят, Свят, Свят, Свят еси́, зову́ще.

И ныне, Богородичен: Безсе́менное име́ла еси́ зача́тие и па́че ума́ Рождество́, Де́во Ма́ти Чи́стая: де́ло стра́шное, чу́до преве́лие, А́нгелы почита́емое и челове́ки сла́вимое, Отрокови́це Влады́чице.

Катавасия: Прииди́те, пи́во пие́м:

Ектения малая. Кондак Пасхи и икос.

И седален, глас 3:

Глаго́л разсла́бленнаго то́кмо стягну́, я́ко всеми́рное Сло́во Еди́но, на́с ра́ди на земли́ Я́вльшагося за благоутро́бие. Те́мже и, о́др нося́, мимохожда́ше, а́ще и кни́жницы зре́ти соде́янное не терпя́ху, зло́бы содержи́ми за́вистию, ду́ши разслабля́ющею.

Слава, и ныне, Богородичен:

Красоте́ де́вства Твоего́ и пресве́тлой чистоте́ Твое́й Гаврии́л удиви́вся, вопия́ше Ти, Богоро́дице: ку́ю Ти похвалу́ принесу́ досто́йную? Что же возымену́ю Тя? Недоумева́ю и ужаса́юся. Те́мже, я́коже повеле́н бых, вопию́ Ти: ра́дуйся, Благода́тная.

Песнь 4

Ирмос: На боже́ственней стра́жи:

Му́жеский у́бо пол: Я́ко единоле́тный А́гнец: Богооте́ц у́бо Дави́д:

Богородичны: Созда́вый Ада́ма: Его́же родила́ еси́:

Ин канон.

Ирмос: Приосене́нную го́ру/ Авваку́м прозря́ше пречи́стую Твою́ утро́бу, Чи́стая./ Тем взыва́ше: от ю́га прии́дет Бог,// и Святы́й от горы́, приосене́нныя ча́щи.

Евре́йский собо́р, за́вистию растаява́емь, на Дре́ве распя́т Тя, Го́споди: и, разори́в осужде́ние сме́рти, я́ко Си́лен, воста́л еси́, мир с Собо́ю совоздви́гнув.

С ми́ры жены́, что неистощи́мое Ми́ро и́щете? Воста́л есть, мироно́сицам рече́ седя́й в бе́лых ри́зах, поднебе́сную испо́лнив мы́сленнаго благоуха́ния.

Ра́бий нося́ о́браз, за мно́гое благоутро́бие ходя́й прише́л еси́ и здра́ва показа́л еси́ во мно́гих ле́тех лежа́щаго, Сло́ве, повеле́в и одр взя́ти.

А́нгел у́бо Госпо́день, на вся́кое ле́то схожда́я, во́ду в купе́ли возмуща́ше, соверша́я здра́ва еди́наго то́чию: Христо́с же мно́жество безчи́сленное боже́ственным креще́нием спаса́ет.

Архангелу Михаилу: Нача́льниче А́нгелов и наста́вниче заблужда́ющих, Госпо́день нача́льный воево́до, в час сей посреде́ нас прииди́ и моли́твы всех принеси́ Еди́ному Творцу́ и Влады́це.

Слава, Троичен: Соединя́емая естество́м и разделя́емая Ли́цы есть Свята́я Тро́ица, Оте́ц Пресу́щный, Соприсносу́щный же Сын, и Святы́й и Еди́ный Всеси́льный Дух.

И ныне, Богородичен: Чи́стая, ка́ко дои́ши? Ка́ко же родила́ еси́ Младе́нца, Ада́ма дре́внейшаго? Ка́ко на руку́ но́сиши Сы́на, Су́щаго на ра́му херуви́мску, я́ко зна́ет, я́коже весть, вся Осуществова́вый.

Катавасия: На боже́ственней стра́жи:

Песнь 5

Ирмос: Утренюем у́треннюю глубоку́:

Безме́рное Твое́ благоутро́бие: Присту́пим, свещено́снии:

Богородичны: Просвеща́ется боже́ственными: Не разве́рзл еси́ врата́:

Ин канон.

Ирмос: Све́том Твои́м невече́рним, Христе́,/ озари́, Бо́же, смире́нную мою́ ду́шу/ и наста́ви на страх Твой,// зане́ свет повеле́ния Твоя́.

Вознесы́йся на Дре́ве Кре́стнем, и совознесы́й мир весь, и быв в ме́ртвых, Бо́же, от ве́ка ме́ртвыя воздвиза́еши.

Воскре́се, я́коже рече́, Христо́с, истощи́вый вся а́дова ца́рствия, и явля́ется апо́столом, ра́дость подава́я ве́чнующую.

Белообра́зен ви́ден бысть жена́м блиста́яйся А́нгел: не ктому́ пла́чите, Жизнь ва́ша воста́, су́щия во гробе́х ме́ртвыя оживи́вшая.

Разсла́бленнаго я́ко воздви́гл еси́, Христе́, разсла́бленную мою́ ду́шу преступле́ньми оздра́ви и ше́ствовати мне Твоя́ пра́выя стези́ споспешеству́й.

Архангелу Михаилу: А́нгелов наста́вниче Михаи́ле, собира́ющияся в хра́ме твое́м лю́ди днесь и пропове́дающия Бо́жия вели́чия спаса́й.

Слава, Троичен: Равноче́стная тричи́сленная Еди́нице, разделя́емая у́бо ве́рно Ипоста́сьми, соединя́емая же естество́м есть, Оте́ц, Сын и Боже́ственный Дух.

И ныне, Богородичен: Безсе́менное Рождество́ Твое́, Чи́стая, непостижи́мое пое́м Рожде́ние, блажа́ще Тя я́ко Ма́терь Творца́ всех и Влады́ки.

Катавасия: Утренюем у́треннюю глубоку́:

Песнь 6

Ирмос: Снизше́л еси́ в преиспо́дняя земли́:

Сохрани́в це́ла зна́мения, Христе́: Спа́се мой, живо́е же и неже́ртвенное:

Богородичны: Возведе́ся дре́вле: Сни́де в преиспо́дняя земли́:

Ин канон.

Ирмос: Глубина́ страсте́й воста́ на мя/ и бу́ря проти́вных ве́тров,/ но предвари́в мя Ты спаси́, Спа́се,/ и изба́ви от тли,// я́ко спасл еси́ от зве́ря проро́ка.

Вознесы́йся во́лею на Дре́во, положи́лся еси́, я́ко ме́ртв, во гро́бе, и су́щия во а́де ме́ртвыя вся вку́пе оживи́в, Христе́, воскреси́л еси́ Боже́ственною си́лою.

Ад, срет Тя, Ще́дре, до́ле, огорчи́ся, свя́занныя отдава́я со тща́нием, Твое́ стра́шное пою́щия, Спа́се, Воскресе́ние во гла́сех немо́лчных.

Боже́ственнии ученицы́, ви́девше Жизнь всех из гро́ба воста́вша, Христа́, любо́вию мно́гою, и нра́вом пра́вым, и весе́лием душе́вным покланя́хуся.

Дре́вле на одре́ боле́зненном в ле́тех мно́зех слежа́й, Твои́м, Христе́, повеле́нием исцеле́в, сла́вит, воспева́я благоутро́бие Твое́, Жизнода́телю.

Архангелу Михаилу: А́нгелов наста́вниче Михаи́ле, предстоя́й престо́лу Влады́чню, прииди́ посреде́ нас, наставля́я к стезя́м жи́зни тебе́ предста́теля те́пла стяжа́вших.

Слава, Троичен: Тро́ицу Ли́цы Тя чту, Еди́ницу же Существо́м пропове́даю, Безнача́льне О́тче, Сы́не, Ду́ше Пра́вый: Бо́же всех, с вы́шними стра́шными во́инствы.

И ныне, Богородичен: Вся Боже́ственным манове́нием нося́й держи́мь есть, Богоро́дице Де́во, во объя́тиих Твои́х, всех нас восхища́я от руки́ рабо́ты лука́ваго, я́ко Щедр.

Катавасия: Снизше́л еси́ в преиспо́дняя земли́:

Ектения малая.

Кондак, глас 3.

Подобен: Де́ва днесь:

Ду́шу мою́, Го́споди, во гресе́х вся́ческих,/ и безме́стными дея́ньми лю́те разсла́блену,/ воздви́гни Боже́ственным Твои́м предста́тельством,/ я́коже и разсла́бленнаго воздви́гл еси́ дре́вле,/ да зову́ Ти́ спаса́емь:// Ще́дрый, сла́ва, Христе́, держа́ве Твое́й.

Икос:

Руки́ Твоея́ го́рстию содержа́й концы́, Иису́се Бо́же, Отцу́ Собезнача́льный и Ду́ху Свято́му совлады́чествуяй все́ми, Пло́тию яви́лся еси́, неду́ги исцеля́я, и стра́сти отгна́л еси́, слепцы́ просвети́л еси́ и разсла́бленнаго сло́вом Боже́ственным Ты́ возста́вил еси́, сему́ напра́сно ходи́ти повеле́в и сего́ носи́вший о́др на ра́му взя́ти. Те́мже вси́ с ни́м воспева́ем и возопии́м:// Ще́дрый, сла́ва, Христе́, держа́ве Твое́й.

Песнь 7

Ирмос: О́троки от пе́щи Изба́вивый:

Жены́ с ми́ры богому́дрыя: Сме́рти пра́зднуем умерщвле́ние: Я́ко вои́стину свяще́нная:

Богородичны: Умертви́в Сын Твой смерть: Всем ца́рствуяй созда́нием:

Ин канон:

Ирмос: Пла́мень ороси́вый пе́щный/ и о́троки неопали́мы спасы́й,/ благослове́н еси́ во ве́ки,// Го́споди, Бо́же оте́ц на́ших.

Просте́рта Тя на Дре́ве я́ко зря́ше, свет скры со́лнце, не могу́щее ми́рови свети́ти, Тебе́ во́лею заше́дшу, Всецарю́, на просвеще́ние всех язы́ков.

Воскре́сл еси́, Истощи́вый гро́бы и Плени́вый ад си́лою всеси́льною: те́мже пое́м честно́е Твое́, Христе́, и боже́ственное воста́ние.

Я́ко ме́ртва, что Жива́го и́щете? Воста́, несть во гро́бе, мироно́сицам вопия́ше дре́вле блиста́яйся зра́ком боже́ственный А́нгел.

Слежа́ща в ле́тех мно́зех разсла́бленнаго сло́вом Исцели́вый, вопия́л еси́: возьми́ одр твой и ходи́, поя́ вели́чия Бо́жия.

Архангелу Михаилу: Михаи́ле, нача́льный воево́до Госпо́день, ве́рно в боже́ственнем твое́м хра́ме собира́ющихся, во хвале́ние Бо́жие наставля́й, покрыва́й от вся́ческих зол хода́тайством твои́м.

Слава, Троичен: О Тро́ице, ве́рою пою́щия Тя я́ко Бо́га всех и Влады́ку от вся́ких бед спаса́й и Твои́х благ прича́стники сотвори́.

И ныне, Богородичен: Де́вствуеши, ро́ждши па́че сло́ва пре́жде всех век Роди́вшагося от Безнача́льна Отца́ нетле́нно: сего́ ра́ди, Чи́стая, Тебе́ ублажа́ем.

Катавасия: О́троки от пе́щи Изба́вивый:

Песнь 8

Ирмос: Сей нарече́нный и святы́й день:

Прииди́те, но́ваго виногра́да: Возведи́ о́крест о́чи твои́, Сио́не, и виждь: О́тче Вседержи́телю и Сло́ве и Ду́ше:

Богородичны: Прии́де Тобо́ю в мир Госпо́дь: Всю низложи́в сме́рти держа́ву:

Ин канон.

Ирмос: А́нгельми немо́лчно в вы́шних сла́вимаго Бо́га,/ Небеса́ небе́с, земля́, и го́ры, и хо́лми, и глубина́,/ и весь род челове́ческий,/ пе́сньми Того́ я́ко Созда́теля и Изба́вителя// благослови́те и превозноси́те во вся ве́ки.

Заве́са раздра́ся, распе́ншуся Тебе́, Спа́се наш; и отдава́ше ме́ртвыя, я́же пожре́, смерть; и ад обнажи́ся, Тебе́ зря, в преиспо́дних земли́ бы́вша.

Где твое́ жа́ло есть, сме́рте? Где твоя́, а́де, ны́не побе́да? Воскре́сшу Царю́, умертви́лся еси́ и поги́бл, не ктому́ ца́рствуеши: Кре́пкий бо взят я́же име́л еси́ свя́занныя.

Тецы́те ско́ро, возвести́те апо́столом Воскресе́ние, мироно́сицам явле́йся ю́ноша веща́ше: воскре́се Влады́ка и с Ним и́же от ве́ка ме́ртвии пресла́вно.

Ле́ты мно́гими слежа́й разсла́бленный взыва́ше: поми́луй мя, Изба́вителю, недоуме́нием содержи́ма. Сей же повелева́ет ему́ взя́ти тща́тельно одр и пра́во ступа́ти.

Архангелу Михаилу: Я́ко невеще́ственных предводи́тель, Архистрати́же Сил, с на́ми проси́ нам прегреше́ний избавле́ние, исправле́ние же жития́ и та́мошних наслажде́ние благ ве́чных.

Благослови́м Отца́ и Сы́на и Свята́го Ду́ха, Го́спода.

Троичен: Несозда́нное, непресеко́мое Существо́, Триипоста́сное Божество́, Отца́ Безнача́льна Бо́га и Сы́на и Ду́ха Свята́го воспои́м согла́сно, серафи́мскую зову́ще стра́шную песнь.

И ныне, Богородичен: Сви́ток Тя зря́ше Иса́ия, Присноде́во, в не́мже пе́рстом О́тчим, Сло́во Безле́тное написа́ся, от вся́каго безслове́сия спаса́ющее нас, словесы́ Тя свяще́нными воспева́ющих.

Хва́лим, благослови́м:

И катавасия: Сей нарече́нный и святы́й день:

Честнейшую: не поем до отдания Пасхи во вся Недели.

Песнь 9

Ирмос: Свети́ся, свети́ся:

О, Боже́ственнаго, о, любе́знаго: О Па́сха ве́лия и свяще́ннейшая, Христе́!

Богородичны: Согла́сно, Де́во, Тебе́ блажи́м: Весели́ся и ра́дуйся:

Ин канон.

Ирмос: На Сина́йстей горе́ ви́де Тя в купине́ Моисе́й,/ неопа́льно О́гнь Божества́ заче́ншую во чре́ве;/ Дании́л же Тя ви́де го́ру несеко́мую;/ жезл прозя́бший Иса́ия взыва́ше// от ко́рене Дави́дова.

Иису́се, на Дре́ве возвыша́емь, совозне́сл еси́ нас и, положи́вся во́лею во гро́бе, из гробо́в ме́ртвыя воскреси́л еси́ вся, пою́щия держа́ву Твою́ непостижи́мую и си́лу Твою́ непобеди́мую.

Красне́йший от гро́ба возсия́л еси́, я́ко жени́х от черто́га, Красне́йший Сло́ве, и разруши́л еси́ а́да мра́чное, и ю́зники изве́л еси́, согла́сно зову́щия: сла́ва сла́ве Твое́й, сла́ва, Иису́се Бо́же, воста́нию Твоему́.

Воздыха́ния же и сле́зы нося́ща, с ми́ры во тща́нии всесвяты́й гроб достиго́ша жены́ и Христо́ву учи́ми бя́ху ве́рою сла́вному воста́нию, е́же пра́зднуем, в ра́дости душе́вней веселя́щеся.

После́доваше здра́вие те́ла, повеле́нию Твоему́, Христе́, и ви́димь бя́ше пре́жде разсла́бленный, теки́й со тща́нием и одр нося́й, на не́мже возлежа́ше ле́ты мно́гими, песносло́вя мно́гую Твою́ си́лу.

Архангелу Михаилу: Просвеще́ние нам испроси́, вели́кий Архистрати́же, при́сно Све́ту вели́кому предстоя́й, и умири́ на́шу жизнь, напа́стьми всегда́ змие́выми и обстоя́ньми жития́ зы́блемую при́сно, достохва́льне.

Слава, Троичен: Свет и Све́тове, Жизнь же и Жи́зни, сла́влю Тя всеблагоче́стно, О́тче, Сло́ве и Ду́ше Святы́й, Триипоста́сная Еди́нице, нераздели́мая Держа́во, Божество́ Несли́тное, Свят, Свят, Свят, вопия́ с вы́шними Си́лами.

И ныне, Богородичен: От светоно́сных про́йде ложе́сн Твои́х вели́кое Со́лнце, Христо́с, и мир просвети́, Пречи́стая, осия́ньми све́тлыми, и тьму отъя́т преступле́ния: те́мже пое́м Тя я́ко вину́ всех до́брых, Богоневе́сто.

Катавасия: Свети́ся, свети́ся: Ектения малая.

Таже: Свят Госпо́дь Бог наш: трижды, на глас 3.

Ексапостиларий: Пло́тию усну́в: единожды.

Слава, ин.

Подобен: Жены́ услы́шите:

Предста́ Человеколю́бец и Всеще́дрый Госпо́дь О́вчей купе́ли, е́же исцели́ти неду́ги, обре́те же челове́ка, слежа́ща мно́гими ле́ты, и к нему́ возопи́: возьми́ одр и иди́ на пути́ пра́выя.

И ныне, тойже.

На хвалитех поставим стихов 8. И поем стихиры воскресны, глас 3.

Стих: Сотвори́ти в них суд напи́сан,/ сла́ва сия́ бу́дет всем преподо́бным Его́.

Прииди́те, вси язы́цы,/ уразуме́йте стра́шныя та́йны си́лу:/ Христо́с бо Спас наш,/ е́же в нача́ле Сло́во,/ распя́тся нас ра́ди, и во́лею погребе́ся,/ и воскре́се из ме́ртвых,/ е́же спасти́ вся́ческая:// Тому́ поклони́мся.

Стих: Хвали́те Бо́га во святы́х Его́,/ хвали́те Его́ во утверже́нии си́лы Его́.

Пове́даша вся чудеса́ стра́жие Твои́, Го́споди,/ но собо́р суеты́ испо́лни мздо́ю десни́цу их,/ скры́ти мня́ше Воскресе́ние Твое́,// е́же мир сла́вит: поми́луй нас.

Стих: Хвали́те Его́ на Си́лах Его́,/ хвали́те Его́ по мно́жеству вели́чествия Его́.

Ра́дости вся испо́лнишася,/ Воскресе́ния иску́с прии́мша:/ Мари́я бо Магдали́на ко гро́бу прии́де,/ обре́те А́нгела, на ка́мени седя́ща,/ ри́зами блиста́ющася и глаго́люща:/ что и́щете Жива́го с ме́ртвыми?/ Несть зде, но воста́, я́коже рече́,// предваря́я в Галиле́и.

И восточны, глас тойже.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Во све́те Твое́м, Влады́ко,/ у́зрим свет, Человеколю́бче,/ воскре́сл бо еси́ из ме́ртвых,/ спасе́ние ро́ду челове́ческому да́руяй,/ да Тя вся тварь славосло́вит,// Еди́наго Безгре́шнаго: поми́луй нас.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Песнь у́треннюю мироно́сицы жены́/ со слеза́ми приноша́ху Тебе́, Го́споди:/ благоуха́ния бо арома́ты иму́ща,/ гро́ба Твоего́ достиго́ша,/ пречи́стое Те́ло Твое́ пома́зати тща́щася./ А́нгел, седя́й на ка́мени, тем благовести́:/ что и́щете Жива́го с ме́ртвыми?/ Смерть бо Попра́вый воскре́се, я́ко Бог,// подая́й всем ве́лию ми́лость.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Блиста́яйся А́нгел на гро́бе Твое́м животво́рном,/ мироно́сицам глаго́лаше:/ истощи́вый гро́бы Изба́витель плени́ а́да/ и воскре́се тридне́вен,// я́ко Еди́н Бог и Всеси́лен.

Стих: Воскресни́, Го́споди Бо́же мой, да вознесе́тся рука́ Твоя́,/ не забу́ди убо́гих Твои́х до конца́.

Во гро́бе Тя́ иска́ше,/ прише́дши во еди́ну от суббо́т, Мари́я Магдали́на,/ не обре́тши же, рыда́ше, с пла́чем вопию́щи:/ увы́ мне́, Спа́се мо́й, укра́ден бы́л еси́, все́х Царю́!/ Супру́г же живоно́сных А́нгел вну́трь гро́ба вопия́ше:/ что́ пла́чеши, о же́но?/ Пла́чу, глаго́лет, я́ко взя́ша Го́спода моего́ от гро́ба,/и не ве́м, где́ положи́ша Его́./ Сия́ же обрати́вшися вспя́ть,/ я́ко ви́де Тя́, а́бие возопи́:// Госпо́дь мо́й и Бо́г мо́й, сла́ва Тебе́.

Стих: Испове́мся Тебе́, Го́споди, всем се́рдцем мои́м,/ пове́м вся чудеса́ Твоя́.

Евре́и затвори́ша во гро́бе Живо́т,/ разбо́йник же отве́рзе язы́ком наслажде́ние,/ зовы́й и глаго́ля:/ со мно́ю мене́ ра́ди Распны́йся,/ сообе́сися ми на Дре́ве,/ и яви́ся мне́, на Престо́ле со Отце́м седя́:/ Той бо есть Христо́с Бог наш,// име́яй ве́лию ми́лость.

Слава, глас 8:

Го́споди, разсла́бленнаго не купе́ль исцели́,/ но Твое́ сло́во обнови́,/ и ниже́ многоле́тный запя́т ему́ неду́г:/ я́ко гла́са Твоего́ скоре́йшее де́йство показа́ся,/ и неудобоноси́мую тя́жесть отве́рже,/ и бре́мя одра́ понесе́,// во свиде́тельство мно́жества щедро́т Твои́х, сла́ва Тебе́.

И ныне: Преблагослове́нна еси́:

Славословие великое. Тропарь воскресен: Днесь спасе́ние: Ектении и отпуст.

Таже стихира евангельская, глас 3:

Магдали́не Мари́и,/ Спа́сово благовеству́ющей из ме́ртвых Воскресе́ние и явле́ние,/ не ве́рующе же, ученицы́/ поноси́ми бы́ша о жестосе́рдии:/ но зна́меньми вооружи́вшеся и чудесы́,/ ко пропове́данию посыла́хуся./ И Ты у́бо, Го́споди,/ к Нача́льному Све́ту возне́слся еси́, Отцу́:/ они́ же пропове́даша всю́ду сло́во,/ чудесы́ уверя́юще./ Те́мже, просвети́вшеся те́ми,/ сла́вим Твое́ е́же из ме́ртвых Воскресе́ние,// Человеколю́бче Го́споди.

Час первый. На часех тропарь воскресен. По Трисвятом кондак Триоди: Ду́шу мою́, Го́споди:

Блаженна гласа, глас 3, на 4.

Блаже́ни ми́лостивии,/ я́ко ти́и поми́ловани бу́дут.

Отве́ргшаго, Христе́, за́поведь Твою́/ пра́отца Ада́ма из рая́ изгна́л еси́:/ разбо́йника же, Ще́дре, испове́давша Тя на Кресте́,/ в онь всели́л еси́, зову́ща:/ помяни́ мя, Спа́се,/ во Ца́рствии Твое́м.

Блаже́ни чи́стии се́рдцем,/ я́ко ти́и Бо́га у́зрят.

Воскре́с из ме́ртвых,/ совоскреси́л еси́ нас от страсте́й/ Воскресе́нием Твои́м, Го́споди:/ сме́ртную же всю си́лу погуби́л еси́, Спа́се./ Сего́ ра́ди ве́рою Ти зове́м:/ помяни́ и нас во Ца́рствии Твое́м.

Блаже́ни миротво́рцы,/ я́ко ти́и сы́нове Бо́жии нареку́тся.

Тридне́вным Твои́м погребе́нием,/ я́же во а́де, умерщвле́нныя,/ я́ко Бог, оживотвори́вый совоздви́гл еси́/ и нетле́ние всем, я́ко Благ, источи́л еси́ нам,/ ве́рою зову́щим всегда́:/ помяни́ и нас во Ца́рствии Твое́м.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Согре́шших нас сме́ртною осуди́л еси́ кля́твою,/ Жизнода́вче и Го́споди:/ Те́лом же Твои́м, Безгре́шне Влады́ко, пострада́в,/ сме́ртныя оживи́л еси́, зову́щия:/ помяни́ и нас/ во Ца́рствии Твое́м.

И от канона песнь 6–я на 4.

Блаже́ни есте́, егда́ поно́сят вам,/ и изжену́т, и реку́т всяк зол глаго́л на вы, лжу́ще, Мене́ ра́ди.

Дре́вле на одре́ боле́зненном/ в ле́тех мно́зех слежа́й,/ Твои́м, Христе́, повеле́нием исцеле́в,/ сла́вит, воспева́я благоутро́бие Твое́, Жизнода́телю.

Ра́дуйтеся и весели́теся,/ я́ко мзда ва́ша мно́га на Небесе́х.

А́нгелов наста́вниче Михаи́ле,/ предстоя́й престо́лу Влады́чню,/ прииди́ посреде́ нас, наставля́я к стезя́м жи́зни/ тебе́ предста́теля те́пла стяжа́вших.

Слава:

Тро́ицу Ли́цы Тя чту,/ Еди́ницу же Существо́м пропове́даю,/ Безнача́льне О́тче, Сы́не, Ду́ше Пра́вый:/ Бо́же всех, с вы́шними стра́шными во́инствы.

И ныне:

Вся́ Боже́ственным манове́нием нося́й/ держи́мь е́сть, Богоро́дице Де́во,/ во объя́тиих Твои́х, все́х на́с восхища́я/ от руки́ рабо́ты лука́ваго, я́ко Ще́др.

По входе тропарь воскресен, глас 3:

Да веселя́тся Небе́сная,/ да ра́дуются земна́я,/ я́ко сотвори́ держа́ву/ мы́шцею Свое́ю Госпо́дь:/ попра́ сме́ртию сме́рть,/ Пе́рвенец ме́ртвых бы́сть,/ из чре́ва а́дова изба́ви на́с// и подаде́ ми́рови ве́лию ми́лость.

Слава, кондак Триоди, глас 3:

Ду́шу мою́, Го́споди, во гресе́х вся́ческих,/ и безме́стными дея́ньми лю́те разсла́блену,/ воздви́гни Боже́ственным Твои́м предста́тельством,/ я́коже и разсла́бленнаго воздви́гл еси́ дре́вле,/ да зову́ Ти́ спаса́емь:// Ще́дрый, сла́ва, Христе́, держа́ве Твое́й.

И ныне, Пасхи:

А́ще и во гро́б снизше́л еси́, Безсме́ртне,/ но а́дову разруши́л еси́ си́лу/ и воскре́сл еси́, я́ко Победи́тель, Христе́ Бо́же,/ жена́м мироно́сицам веща́вый: ра́дуйтеся!/ и Твои́м апо́столом ми́р да́руяй,// па́дшим подая́й воскресе́ние.

Храма же тропаря и кондака не глаголем.

Прокимен, глас 1: Бу́ди, Го́споди, ми́лость Твоя́ на нас,/ я́коже упова́хом на Тя.

Стих: Ра́дуйтеся, пра́веднии, о Го́споде: пра́вым подоба́ет похвала́.

Апостол Деяний, зачало 23: Бысть Петру́ посеща́ющу всех:

Аллилуия, глас 5: Ми́лости Твоя́, Го́споди, во век воспою́.

Стих: Зане́ рекл еси́: в век ми́лость сози́ждется.

Евангелие от Иоанна, зачало 14: Взы́де Иису́с во Иерусали́м:

За Достойно: А́нгел вопия́ше: Свети́ся, свети́ся:

Причастный: Те́ло Христо́во: Другий: Хвали́те Го́спода с Небе́с:

Зри: Подобает ведати, яко воследование разслабленнаго поется в Неделю и в понедельник: во вторник же отдается.