Как молится Святителю Иннокентию

Молитвы Святителю Иннокентию

Акафист Святителю Иннокентию Чудотворцу Иркутскому167

Кондак 1

Равноапостольный христианския веры благовестниче, языческаго зловерия искоренителю, скорый в бедах и скорбех заступниче, благоутробия неистощимое сокровище, святителю отче Иннокентие! Великаго тя пред Господем ходатая и чудес множеством свидетельствования помощника имуще, к тебе во обстоянии от всяких нужд и зол с верою, надеждею и любовию притекаем, и тако ти зовем:

Радуйся, Иннокентие, святый угодниче Спаса Христа.

Икос 1

Ангелом уподобился еси непорочным житием, святителю отче Иннокентие, и сего ради ангелов сопричастия сподобился еси в немолчнем славословии Господа Славы. Приими убо и от наших недостойных устен приносимое тебе хваление:

Радуйся, по имени твоему, непорочность знаменующему, явивый житие твое:

Радуйся, непорочности сохранением, ангелов житию подражатель бывый.

Радуйся, верный Христова Евангелиа служителю:

Радуйся, архиереев удобрение.

Радуйся, церкве, невесты Христовы, драгое украшение:

Радуйся, святости жития и непорочности нравов учителю.

Радуйся, Иннокентие, святый угодниче Спаса Христа.

Кондак 2

Видя Господь Бог благопотребен тя сосуд ко приятию даров благодати, обильно излия в твое сердце духа премудрости и разума, во еже просвещати языки, во тме и сени смертней сидящыя, духа совета и крепости, во еже превозмогати над враги спасения видимыми и невидимыми, духа ведения и благочестия, во еже Христово стадо пасти учением и житием. Мы же, тя на спасение людий тако приуготованна уразумевше, со умилением Подателю всех благ Богу зовем: Аллилуиа.

Икос 2

Разум благопотребен к деланию приятых от Бога талантов стяжати хотя, еще юн сый, водворился еси в вертограде духовныя мудрости преславнаго града Киева, совершен же в житии хотя быти, сожительство восприял еси в лике иноков святопечерския лавры, идеже достигл еси в мужа совершенна, в меру возраста исполнения Христова. Мы же, твое звание и избрание разсмотряюще, с любовию зовем ти:

Радуйся, розго винограда, плодов Духа исполненная, да их обилием страны Сибири обогатиши:

Радуйся, сладкоуханный крине Господень, на юге процветый, да тем страны Севера облагоухаеши и украсиши.

Радуйся, в земнем училищи небесней мудрости навыкший, да ею языки на путь спасения наставиши:

Радуйся, яко на высоту добродетелей, аки светильник на свещнице, поставлен был еси, да мглу неподобнаго жития во изгнании сущих разгониши.

Радуйся, верный учениче Спаса нашего, во апостола языков предизбранный:

Радуйся, чадо послушливое Церкве Православный, в первосвятителя иркутския паствы пронареченный.

Радуйся, Иннокентие, святый угодниче Спаса Христа.

Кондак 3

Силою свыше тя облеченна уразумевше благоверный царь и святый собор, избраша тя во апостольское служение, проповедати Евангелие Царства Христова в земли языков, неведущих пети ко Святей Троице единому Богу: Аллилуиа.

Икос 3

Имея ревность апостольскую о спасении душ человеческих, подвиглся еси на вся труды и беды шествия в дальныя страны царства хинов: но воспящен быв в пределы его внити, во граде Селенгинстем препокоение обрел еси, идеже тя малое стадо присных ти по вере приветствии срете сими:

Радуйся, новый апостоле языков, на просвещение языков многия страны претекший:

Радуйся, в шествиих путных, якоже и Павел, языков апостол, беды Христа ради и Евангелиа бодре сретивый.

Радуйся, лучезарное Церкве Христовы светило, на просвещение востока возшедшее:

Радуйся, Божественнаго огня носило, теплоту любве Христовы во страны мраза принесшее.

Радуйся, духом ревности апостольския движимый, ко языком монгольским поспешивый:

Радуйся, во изгнании страждущым покой душам во благом иге Христовем указавый.

Радуйся, Иннокентие, святый угодниче Спаса Христа.

Кондак 4

Бурю зависти древний человеческих душ прельститель воздвиже в сердцах хинов сопротив тебе, во страну их грядущаго, благовестника мира Христова, и возстави на тя лжебратию, во еже в пределы хинов твое возбраните вхождение, да не навыкнут хинове, вкупе с православными, изведшему люди из тмы во свет свой чудный Христу Богу пети: Аллилуиа.

Икос 4

Услышав ухищренныя хинов глаголы, яко не подобает ти, иерарху великому Господа, быти прияту в их царство, обратился еси паки со Евангелием ко языком инородным во стране Сибирстей, иже с велиею радостию тя приемше, возопиши ти таковая:

Радуйся, хинами во их царство не приятый, ко приятию же самеми ангелы в Небесное Царство достойный:

Радуйся, не роду чуждему хинов, но своего царства языком монгольским во апостола уготованный.

Радуйся, яко возбранением тебе благовестия языком царства чуждаго велие благо языком Российскаго царства устройся:

Радуйся, яко проповедию Евангелиа языком монгольским злоухищрение врага душ человеческих жестоко посрамися.

Радуйся, яко твоим посреде нас вселением неведущии Бога в познание истины приведошася, противляющиися же истине обличишася:

Радуйся, яко на житие твое взираюше, грешнии покаяшися, беззаконии же уцеломудришася.

Радуйся, Иннокентие, святый угодниче Спаса Христа.

Кондак 5

Боготочный премудрости источник от обилия присущия ти благодати проторжеся в пустыни монгольстей егда неразумнии хинове заградиша токи ея в пределы их омраченнаго царства: ревностию бо апостольскою движима и во служении пастырстем труждаяся, ово просвещал еси светом Евангелиа Христова неверующыя языки монгольски, ово утверждал еси верующыя в послушании равославныя Церкве уставом: и тако научил еси и сих и онех вкупе воспевати Единому всех человеков Спасителю Богу: Аллилуиа.

Икос 5

Видя Вседержитель, вся на пользу строяй, яко не приспе время, да просветятся светом Евангелиа людие царства хинскаго, дарова тя в первосвятителя иркутский церкве и учителя языков Сибири, еже мы ныне радостно воспоминающе, сице зовем ти:

Радуйся, первопрестольниче иркутския церкве, благовестием Сибирскую область Российскаго царства огласивый:

Радуйся, святое начало святителей иркутския паствы, прочым пременяемым, единый ея несменный блюстителю.

Радуйся, отче, святых отец в насаждении благочестия и искоренении нечестия подражателю:

Радуйся, пастырскому служению уготовляемых трудолюбивый учителю.

Радуйся, пастырю добрый, готовый душу твою положите за овцы твоя:

Радуйся, неусыпный страже, вверенный ти душы, бденным молением и путным обхождением, добре сохранивый.

Радуйся, Иннокентие, святый угодниче Спаса Христа.

Кондак 6

Богопроповедников Христовых апостолов труды на ся подъем, оных наследовал еси подвиги и лишения, скорби и озлобления: но вся ради Христа и Евангелиа доблественно понесл еси, и вся ны, не точию благодушетвующыя, но и скорбящыя, научил еси пети Богу. Аллилуиа.

Икос 6

Возсияла есть паче солнца, во огни искушений и скорбей очищенная, душа твоя, доблественный подвижниче Христов: аще бо в немощех и болезнех претруждено бяше тело твое, но духом присно сый бодр, выну побеждал еси враги Христовы Церкве. Сего ради и мы, тобою в скорбех утешаеми, победная ти сице вопием:

Радуйся, воине Христов, во всеоружии Божии противу начал и властей и миродержителей тмы века сего подвизавыйся:

Радуйся, истиною аки поясом препоясанный, языков шатания разрушивый.

Радуйся, правдою аки в броня оболченный, вся наветник клеветы недейственны сотворивый:

Радуйся нозе во благовествование мира обувенне имевый, главу древняго змия поправый.

Радуйся, верою аки щитом покровенный, вся разжженныя лукаваго стрелы угасивый:

Радуйся, шлем спасения и меч духовный восприявый, и вся враги, аки воевода возбранный, низложивый.

Радуйся, Иннокентие, святый угодниче Спаса Христа.

Кондак 7

Хотяй милосердый Господь не точию пастве иркутствей, но и всякому ближнему же и дальнему тя даровати в скорбех утешителя, в бедах скораго помощника и от болезней целителя, ускори тя разрешити от уз сея бренныя плоти, да по всем градом и весем чудесы и изцеленьми Бога прославиши и вся Ему воздвигнеши пети: Аллилуиа.

Икос 7

К новому и нестареющемуся на небесех жительству уготовляя твой восход, писанием со одра болезни всесмиренно просил еси иереи града Иркутска со христианы православными, да воспоют во храмех Богородице параклисис: мы же, зряще тя по преставлении прославлена Богом, к тебе самому сице взываем:

Радуйся, ратоборче Христов, подвигом добрым подвизавыйся:

Радуйся, быстротекущий орле, течение твое в превыспренних селениих скончавый.

Радуйся, воине Царя Небеснаго, вся обеты Христу Царю и Богу нашему верно соблюдый:

Радуйся, яко прочее уже венец правды тебе соблюдеся.

Радуйся, по преселении во обители Отца Небеснаго не оставляяй посещати наш град и обитель сию:

Радуйся, теплый о нас молитвенниче, не престающь о нас у престола Царя Небеснаго ходатайствовати.

Радуйся, Иннокентие, святый угодниче Спаса Христа.

Кондак 8

Странное всем чудо показася, егда древяная церковь, под еяже олтарем почивал еси от трудов сего временнаго жития, посреде всея обители запаления, яко древняя купина, огнем опаляема не сгараше. Чтущии же память твою, яве уразумевше, яко твоих ради мощей совершается сие чудо, со страхом и радостию, хранящему тя Богу, множицею взываху: Аллилуиа.

Икос 8

Вси людие, притекшии во обитель твою и церковь, в нейже почиваху мощи твоя, огнем опаляему видяще, приступивше ко архипастырю, тепле его моляху, да изнесут раку святых мощей твоих: он же, духом веры исполнь, надеждею сохранения от огня не точию мощей твоих, но и всея церкве, всех ободряше. Людие же, сбытие словес архипастыря абие узревше, благодарными ти гласы, чудотворче, воззваша:

Радуйся, светильниче церкве, из-под спуда паче блистания огненнаго возсиявый:

Радуйся, несгаранием хранилища мощей твоих, о нетлении их преславно провозвестивый.

Радуйся, таковым знамением о твоем с нами сопребывании удостоверивый:

Радуйся, церкве сохранением, в тебе от бед заступника нам открывый.

Радуйся, и града нашего, посреде запалений огненных, многажды удоборазумеваемый хранителю:

Радуйся, наипаче о избавлении нас от огня геенскаго присный наш пред Господем ходатаю.

Радуйся, Иннокентие, святый угодниче Спаса Христа.

Кондак 9

Вси лицы ангелов даша славу, честь и благодарение седящему на престоле, живущему во веки веков Богу и агнцу, егда убеленная светлостию непорочности, душа твоя, святителю Христов Иннокентие, вознесеся на небо, в сожительство ангелов. Мы же, прославлением на земли святых мощей твоих уверившиеся о твоей на небесех славе, с веселием прославльшему тя Богу присно взываем песнь: Аллилуиа.

Икос 9

Ветиям любомудрым на сердце не взыдоша, яже ти, Христов угодниче, уготова Господь во обителех небесных. Мы же, празднующе твое на небеси прославление, сице тя на земли ублажающе зовем:

Радуйся, многу на небесех, многообразнаго ради на земли служения, мзду восприемый:

Радуйся, девственниче, в первенцы Богу и агнцу вписаный.

Радуйся, страдальче, вкупе со пришедшими от скорби велия, в ризах белых пред престолом спасение и славу воспеваяй:

Радуйся, апостоле языков, престолом апостольским на небеси почтенный.

Радуйся, пастырю научивый и сотворивый, и сего ради велиим во Царствии Небеснем от Христа нареченный:

Радуйся, воеводо возбранный, соседения Победителю ада и смерти на престоле сподобивыйся.

Радуйся, Иннокентие, святым угодниче Спаса Христа.

Кондак 10

Спасение посреде земли соделавый, Человеколюбец Господь посети страну Сибирскую своею милостию и щедротами: в раце бо мощей твоих, великий угодниче Христов, открыл есть нам знамение твоего теплаго о нас на небеси ходатайства, егоже сподобляеми вси благовернии людие страны Сибирския, единеми усты и сердцем поют Богу: Аллилуиа.

Икос 10

Стена еси необоримая, заступниче наш, граду и стране сей от нахождений всяких зол и скорбей: явлением бо чудес твоих уверихомся, яко велие стяжал еси дерзновение у Господа. Сего ради сице зовем ти:

Радуйся, страны Сибирския богодарованный хранителю и заступнице, ходатаю и помощнице:

Радуйся, яко вкупе со ангелы послан еси во служение за хотящих наследовати спасение, и всем страждущым неоскудное подаеши утешение.

Радуйся, драгоценное нам в раце мощей твоих наследие оставивый:

Радуйся, яко во обители Вознесенстей всех притекающих к тебе сретаеши с любовию.

Радуйся, и на всяком месте тя с верою призывающым скорый помощник являйся:

Радуйся, и не ищущым тя, ниже ведущым, яко добрый наставник, врачъ же и покровитель многажды познаваемый.

Радуйся, Иннокентие, святый угодниче Спаса Христа.

Кондак 11

Пение всякое не довлеет к прославлению чудес твоих, чудотворце предивный, имиже не точию верныя, но и неверныя удивляеши, веруем же и надеемся, яко твоими молитвами и во мраце идолослужения сущии из тмы и сени смертныя изыдути с нами купно прославльшему тя Богу воззовут: Аллилуиа.

Икос 11

Светильник не поставляется под спудом, но на свещник возлагается, да входящии видят свет; сего ради и твоя святыя мощи изведе из-под спуда Господь, яко да входящии во обитель твою, от сего чуднаго света верою просвящаеми и исцеления от Тебе преемлюще, взывают к тебе сице:

Радуйся, наставниче премудрый, мысли благи и хотения свята на сердце полагаяй:

Радуйся, вождю благонадежный, на путь спасения направляяй.

Радуйся, пред Престолом Царя Небеснаго о спасении душ наших ходатайствуяй:

Радуйся, скорый помощниче, от нахождения зол и скорбей сохраняяй.

Радуйся, врачу сострадательный, от болезней душевных же и телесных свобождаяй:

Радуйся, оставленных врачми от одра смерти воздвизаяй.

Радуйся, Иннокентие, святый угодниче Спаса Христа.

Кондак 12

Бдагодатию Божиею исполнена тя познавше не точию близ сущии, но и во странах дальних обитающий, с верою притекают к раце мощей твоих: ты же, внемля их молением, не престани напутствовати всех дары изцелений и чудес твоих, да от восток солнца до запад вси воспоют чудодействующему Богу: Аллилуиа.

Икос 12

Поюще чудеса твоя, имиже по преставлении, паче же по обретении святых мощей твоих. Бога прославил еси, благодарно тебе сице зовем:

Радуйся, жилами разслабленный со одра болезни возставивый:

Радуйся, сокрушением ног и рук страждущыя, аки николиже страдавшыя устроивый.

Радуйся, струпами покрытый и ранами уязвенныя целы и здравы соделавый:

Радуйся, зрение слепым возвративый и изумленныя на здравый смысл наставивый.

Радуйся, во отчаянии живота к смерти уготовляемыя к жизни паки возвративый:

Радуйся, ни единей же болезни ко изцелению тебе быти неудобней, чудес множеством засвидетельствованый.

Радуйся, Иннокентие, святый угодниче Спаса Христа.

Кондак 13

О, великий Христов угодниче, милостивый наш наставниче, благоутробия сокровище, правоверия учителю, архиереев похвало, безпомощных заступниче, отче наш Иннокентие! Моли Христа Бога, да сподобит нас земное поприще без порока прейти и егда, яко праведный судия, со ангелы своими во славе приидет судити живых и мертвых, да не отлучит нас от сонма спасаемых, но да сотворит нас причастники Царства Небеснаго, во еже тамо вкупе с тобою, отцем нашим, выну славити Его и воспевати Ему со Отцем и Святым Духом во веки веков: Аллилуиа.

Сей кондак глаголи трижды. И паки чтется 1-й икос и кондак 1-й.

Молитва Святителю Иннокентию, Иркутскому Чудотворцу

О, великий Христов угодниче, святителю отче Иннокентие! Услыши нас, тебе молящихся, Ты веси наши скорби и недуги, слыши воздыхания множества к тебе притекающих: сего ради к тебе, яко отцу нашему, скорому помощнику и теплому молитвеннику, зовем: не остави нас твоим у Бога ходатайством. Мы присно заблуждаемся о пути спасения: руководи нас, милостивый наш наставниче. Мы немощни в вере: утверди нас, правоверия учителю. Мы зело убози сотворихомся добрых дел: обогати нас, благоутробия сокровище. Мы присно наветуеми есмы от враг видимых и невидимых и озлобляеми: помози нам, безпомощных заступниче. Гнев Божий, праведно движимый на ны за беззакония наша, отврати от нас твоим ходатайством у престола судии Бога, емуже ты предстоиши на небеси, отче иерарше, архиереев похвало. Услыши, молим тя, великий Христов угодниче, и зде с молением тебе предстоящыя, и вся, на всяком месте, тебе с верою призывающыя: и испроси молитвами твоими у Отца Небеснаго всем нам прощение грехов наших и от бед избавление. Ты бо еси свидетельствованный безчисленными чудесы помощник, заступник и молитвенник, и о тебе славу возсылаем Отцу и Сыну и Святому Духу, и ныне и присно, и во веки веков. Аминь.

Какую молитву читать Святителю Христову Иннокентию?168

Ответ на этот вопрос мы имеем от самого Угодника Божия с того времени, как только начала проявляться в Иркутске чудодейственная помощь от св. мощей Его, почивавших тогда еще под спудом. Но несмотря на то, что данная Святителем молитва существует на свете более 80 лет, едва ли она, и для многих жителей г. Иркутска, не есть сокровище, лежащее под спудом. А потому на день памяти открытия св. мощей Угодника Божия мы считаем прилично привести, чрез наше издание, во известие эту молитву.

Вот обстоятельство, которому мы одолжены этою, воистину не земного происхождения, молитвою Святителю Христову Иннокентию.

Жена регистратора Судейкина, служившего в Иркутске, по имени Пелагия сделалась больна сильною горячкою. В это время (с 1780 г.) чудодейственная помощь от мощей почивавшего в Вознесенском монастыре первосвятителя Иркутского сделалась уже довольно гласною и явственною. Не видя исхода от своей тяжкой болезни, страдалица постоянно обращалась с молитвою к благодатной помощи прославляемого Богом Угодника. И вот, привитавшая мыслию и желанием у мощей Угодника Божия, больная видит, – это было во сне, что она стоит в Тихвинской церкви, под алтарем которой почивали тогда мощи Угодника. Но сам Угодник Божий представился ей не под алтарем в гробнице, а в алтаре пред престолом, и совершающим утреннее богослужение. Обрадованная Пелагия устремилась к Святителю, чтобы испросить у него благословение во исцеление своей болезни; но как Святитель находился в алтаре, то больная, дошедши до царских врат, призывала к себе Святителя. Святитель вышел и преподал ей обеими руками святительское благословение, а потом, вошедши в алтарь, выслал оттуда больной с ангеловидным юношею кусок артоса. Больная вкусила от артоса и в то же время почувствовала себя здоровою.

Не зная, чем выразить чувство своей благодарности пред чудодейственным целителем, но как православная зная, что отношение наше к угодникам есть отношение молитвы, Пелагия обратилась и еще к Святителю с вопросом: какую ей читать Ему молитву? Святитель снова прервал свое служение, вышел из алтаря и развернул пред нею свиток, и Пелагия прочла в свитке следующую молитву: Милостивый мой наставниче, благоутробия сокровище, правоверия учителю, Архиереев похвала, безпомощных заступнице, отче наш Иерарше – моли Бога о нас. Имя Иерарха молитвенника не было начертано в свитке, но для той, которая сама видела Его в алтаре пред престолом Божиим молящегося, имя было известно.

Все это было во сне, но очевидно не сон: потому что пробудившаяся Пелагия почувствовала себя совершенно здоровою, и тотчас встала от одра болезни, с которого не вставала две недели. Исцеление свыше свидетельствовало и о свойстве происхождения молитвы Угоднику Божию Иннокентию.

Для одной ли Пелагии дана эта молитва от небесного молитвенника, стоящего пред престолом Божиим и молящегося о душах наших? Не думаем. А потому излишне ли будет, если мы посоветуем жителям нашего Иркутска, чтобы они и сами изучили эту очень краткую, но многознаменательную молитву Угоднику Божию Иннокентию и детей своих ей научили, и чтобы к числу молитв, которым учат в учебных заведениях, присовокупляли и эту, данную Святителем молитву; а те, которые бывают в обители Угодника, читали бы эту молитву, когда идут прикладываться к св. мощам Угодника.

Случится ли, что кто-нибудь, приступая к св. мощам Угодника, не припомнит слов молитвы? Пусть обратит тогда очи свои направо, к висящему на стене, шитому золотом на бархате, изображению Святителя; там он прочтет слова молитвы Угоднику, начертанные золотыми буквами. Думаем, что и это устроено не без особого промысла; потому что первоначальное назначение этого изображения было не то, которое теперь дано ему, и не для Иркутска.

Шитое золотом на бархате изображение во весь рост Святителя Иннокентия было делом труда жительницы г. Иркутска, дочери статского советника Екатерины Александровой Постниковой и вместе данью преданности царелюбивого сердца русского. Девица Постникова предназначала дело труда своего Царствующему Дому. Труд усердия милостиво был принят в Царствующем Доме. Постникова получила в подарок 300 р., но самое изображение прислано было из Петербурга в Иркутск и поставлено в Вознесенской обители как знак усердия новоявленному чудотворцу. Это-то изображение и висит теперь на стене, по правую сторону раки Угодника.

Из желания уяснить богатую содержанием, но сжатую в изложении молитву Святителя, предлагается благочестивым чтителям угодника Божия та же молитва в виде более пространном.

Молитва

О великий Христов Угодниче, Святителю Отче Иннокентие, к Тебе, яко ни от кого же затворяемому благоутробия сокровищу, мы, присно своего духовнаго сокровища окрадываемии, вседушно притекаем: помози нам от обилия в Тебе дарований Божиих.

Ты веси наши нужды, немощи, скорби и недуги: сам бо слышиши о них воздыхания множества многаго к Тебе притекающих; сего ради и мы к Тебе, яко Отцу нашему, скорому помощнику и теплому молитвеннику притекающе, зовем: не остави нас Твоим у Бога ходатайством.

Мы присно заблуждаемся от пути спасения: руководи нас милостивый наш наставниче.

Мы немощны в вере: утверди нас правоверия учителю.

Мы зело убоги сотворихомся добрых дел: обогати нас благоутробия сокровище.

Мы присно наветуеми от врагов видимых и невидимых и озлобляемы: помози нам безпомощных заступниче.

Гнев Божий, яко грозныя тучи, висит над главами нашими за наша беззакония. Отврати от нас праведное сие прещение своим ходатайством у престола Судии Бога, Ему же Ты предстоиши на небеси Отче наш Иерарше, архиереев похвало.

Услыши, молим Тя, великий Христов Угодниче, и зде с молением Тебе предстоящий, и вся, на всяком месте, Тебе с верою призывающия; и испроси молитвами Твоими у Отца небеснаго всем нам прощение грехов наших и от бед избавление. Ты бо еси, свидетельствованный безчисленными чудесы, помощник, заступник и молитвенник; и о Тебе славу возсылаем Отцу и Сыну и Святому Духу, и ныне, и присно и во веки веков. Аминь.

Поучения Св. Иннокентия, первого епископа Иркутского169

1) Поучение в неделю 2-ю по пасце170

Аще не вижу на руку Его язвы гвоздинныя и не вложу перста моего в язвы гвоздинныя, не иму веры. (Иоан. 20:25)

Сия словеса Апостола Фомы, у Евангелиста Иоанна в зачале 65 положенная.

Когда у земнаго царя сын родится, то велика бывает радость того царства людем; еще и посылаются по градом грамоты о возвещении том, что родился сын царю, над ними господствовати. Слушателие православнии! Таковым образом и Бог Отец изволил о рождении Сына Своего великой быть на небесех славе, яко же Ангели воспеша: слава в вышних Богу. Благоволил Бог и на землю послати Ангелов Своих благовестити на земли радость и мир, в человецех благоволение, якоже Лука возвещает: рече бо Ангел ко пастырем: благовествую вам радость велию. И потом, со Ангелом бысть множество и иных вой небесных, хвалящих Бога и глаголющих: Слава в вышних Богу и на земли мир, в человецех благоволение. Воистину велико к нам милосердие Божие, яко родился Сын Царя Небеснаго, Сын Царя царствующих и Господа господствующих, Сын Бога истиннаго, прежде всех век из Отца без матере рожденный, ныне из матере без отца нам родися, не дани собирати злата и сребра, как земнии цари собирают. Земнии бо цари дани собирают, оброки налагают, прибыли великия вымышляют, и тем множество злата и сребра собирают и множество народов на войну выбирают и многие грады и земли разоряют, и того ради раззорения у бедных сирот потоки из очей кровавых слез проливаются, а земля и море с кровию смешаны. Господь же наш прииде не погубити, но спасти мир от пленения адска и от смерти вечныя, даровати же свободу небесную и жизнь безконечную воскресением Своим. Разсудите себе православнии людие, какова есть к нам велия милость Божия. Кто обретеся на земли царь или князь, или един от вельмож, чтобы здравия ради подданных своих дал сына своего единороднаго на жестокое мучение? Аз не обретаю в сем мире никого, кто бы дал сына своего на смерть, точию един Царь царствующих и Господь господствующих, Бог Отец Вседержитель изволил то сотворити, чтобы Сыну Своему плоть восприяти и родитися от святыя Богородицы. И родивыйся плачет, ныне лежит в яслех, скоро рекут: бежи во Египет, Ирод бо ищет Отрочате, да погубит Е. Якоже Иоанн Богослов написав сице: тако возлюби Бог мир яко и Сына Своего единороднаго дал есть, да всяк веруяй в Него не погибнет, но иматъ живот вечный. За таковую к нам Божию милость, чим мы Богу должны? должны и мы друг друга любити, яко же Христос возлюбил есть нас; но мы все творим противное: друг друга не любим, друг друга ненавидим, завидуем, упиваемся, объедаемся, все Богу противно творим.

Возвеселися иногда Ной Патриарх, егда сотворил ковчег предивный, имже род наш спасся потопа, тако подобает и нам ныне везселитися, яко се человек бысть, нас ради и нашего ради спасения, сшедый с небес и воплотивыйся от Духа Свята и Марии Девы и вочеловечивыйся; распятый же за ны при Понтийстем Пилате, страдавший, и погребенный, и воскресший в третий день по писанием, и явися апостолом, яко воистинну воста от мертвых, и показа им руце и нозе и ребра Своя. Возрадовашася ученицы, яко видеша Господа, возставша от мертвых. Фома же един не верова воскресению, тако глаголя: Аще не вижу на руку Его язвы гвоздинныя и не вложу перста моего в язвы гвоздинныя, не иму веры. И по днех осьми паки бяху ученицы вкупе собрани, страха ради Иудейска.

Прииде Иисус дверем затворенным и ста посреде их и глаголя им: мир вам! По сем глагола Фоме: о не верне! Прииди семо и виждь руце мои и принеси руку твою и вложи в ребра моя и не буди не верен, но верен. И егда Фома осяза Господа, тогда верова и возопи тако: Господь мой! Тако и вы любимцы не будите не верни словом и житием; словом исповедуйте, яко воистину воскресе Господь, и житием будите верни в творении добрых дел, подаянием милостыни и хранением любви; и аще кто сотворит любовь, той нищия да одевает, а не суетне плоть свою украшает, яко же мы ныне творим: красимся ризами, что какова праздника ждем, Воскресения Господня, или иного коего праздника, то мы готовим себе кафтаны хорошие, рукавицы уборные, шапки изрядные, сапоги красные; а лучше бы нам готовитися к праздником з добрыми делами, в церковь бы на молитву приходити, канон и свещи приносити, и милостыни творити, и тем спасение получити. Аминь.

2) Поучение в неделю 3-ю по пасце

Поспа яко лев и яко скимен, кто возбудит Его? (Быт. 49:10)

Сия словеса прорече святый Иаков Патриарх, в Бытиях во главе 49 и о воплощении и воскресении Христа Бога нашего, глаголя сице: Сын Иуда скимен от леторасли сыне мой взыде, возлег поспа яко лев и яко скимен, кто возбудит Его? О скимне такое обносится слово, яко той скимен мертв рождается, но в третий день, егда приидет лев и закричит великим гласом над мертвым скимном и от того рыкания скимен возбуждается; тако и Христос возстав из мертвых, иже во гробе, яко в ложе, поспа мертв, но в третий день Отчим гласом возбудися, яко же Давид пророчествовавше о воскресении: яко не оставися душа Его во аде и плоть Его в недре нетления, яко же церковь поет: воскрес Иисус от гроба, яко же прорече. Сам Христос, еще жив сый, тако глагола: яко же бе Иона во чреве китове три дни и три нощи, тако будет и Сын Человеческий с сердце земли три дни и три нощи; и сие пророчество свое исполни делом, в третий день воскресе. Православнии! Послушайте: воскресе Господь на прошение нищих; егда бо Христос плотию вкуси смерть, вси о нем плакашася, подобием таковым: егда бы некоему земному царю прилучилося смерть прияти, а тому царю милостиву бывшу, страннолюбиву и кротку, кто бы о таком милостивом царе не плакал? И истину глаголю, все были бы рады, чтобы и от мертвых возстал таковый милостивый царь. Тако и Господу нашему Иисусу Христу, егда плотию вкусившу смерть, вси Его о воскресении просиша, чтобы от мертвых воскрес; а того ради просиша, егда плотию бывшу на земли Господу нашему, великую милость земному роду дарова: слепцы просвети, прокаженных очистил, хромыя исправил, гладныя питал, пятью хлебами пять тысяч народа прекормил, и того ради чудесе, людие хотеша Его царя сотворити, а книжницы и фарисеи по зависти на смерть Его осудиша и ко кресту Его пригвоздиша и во гробе Его положиша; но смерть Его не облада: во гробе бо плотски, во аде же с душею, яко Бог в рай же с разбойником и на престоле был Он Христе со Отцем и Духом, вся исполняя, неописанный; поспа яко лев и яко скимен, кто возбудит Его? Мысленному скимну, Господу нашему Иисусу Христу плотию уснувшу, сиречь смерть вкусившу, тогда приидоша на гроб Христов царие и князи, славнии и богатии и начата молити Господа о воскресении, сице глаголюще: воскресни Боже; суди земли, яко ты наследиши во всех языцех; услыши Боже моление наше! Се приидохом князи и цари, славни и богати молити Тя не остави нас сирых, Господи возстани в помощь нашу. Но тогда их прошения Господь неуслыша и невозста, поспа яко лев и яко скимен. По сем приидоша на гроб князи и боляре, яко начальнейшие, и молиша Господа о воскресении: воскресни Господи Боже наш, да вознесется рука твоя, яко Ты царствуеши во веки. И на сие их моление Христос не воскресе, понеже бо и в князех обретеся неправда и немилосердие, гордость и неустроение; и за то их неуправление Христос не воскрес. И после князей приидоша славнии и богатии молити Господа, еже бы от мертвых воскреснути, и возопища богатии: воскресни Господи, спаси нас Боже наш! Но Христос Господь на то их моление не воскрес: занеже богатии обидят сирот, а нищих Сам Господь братиею нарицает и царство небесное обещает. Блажени, рече, нищии духом, яко тех есть царство небесное. Поспа яко лев. По сем приидоша на гроб и нищии, после всех славных и богатых, и восплакаша убозии ко Господу и возопиша с Давидом блаженным, тако глаголюще: восстани; Вскую спиши Господи! Воскресни и не остави ны до конца; возопиша второе: воскресни Господи; помози нам и не забуди нищих Своих до конца; возопиша и в третие: воскресни Господи и избави нас от нищеты нашея имени Твоего ради. Православнии! Послушайте: Создатель наш Господь Иисус Христос слезы нищих и воздыхания убогих услыша и даде глас свой Вышний и из гроба, яко из чертога, тако отвеща: страсти ради нищих и воздыхания убогих ныне воскресну, Господь глаголет, положуся во спасение. Слово и делом бысть: Христос воскресе из мертвых. Благословеннии христиане! слышасте-ли, како Христос милосердова о нищих, на прошение их, воскресе из мертвых. Тако бы и вам должно быти милосердым к прошению нищих, егда к вам вопиют: Христа ради милостыни нищим; и вы будьте милостивы на прошение их. Не просят бо у вас коего великаго дара; но только просят единыя копейки или малого куска хлеба. Бога ради. Будьте милостивии; за ту бо милость сами от Бога помиловани будите. Яко же Тиверий Кесарь, егда роздал много имения своего и хождаше в палатах своих и узре на земли камень, на котором камени бе крест означен. И глагола Кесарь: Господи! крест Твой на челе и на перси имеем класти, а не топтати его. И велел скоро сняти той камень, под которым нашли другий камень с крестом же; и той повеле сняти, и под тем нашли третий камень с таким же крестом, и той повеле снятии, и под тем третиим каменем нашли множество злата. И от того времени еще больше нача милостыню творити; яко же бо тогда Тиверию Кесарю171 отдал Бог на сем свете имение, которое он роздал убогим, тако и мы, аще убогим будем давати милостыню; отдаст нам Бог оную на сем свете, – и кто больше дает, тому и Бог больше отдает, а кто меньше дает, меньше тому подает, по глаголу Апостолову: сеяй скудостию, скудостию и пожнет, сеяй о благословении, о благословении и пожнет. Сам Господь рече: Блажени милостивии, яко тии помиловани будут. Благословение Господне на Вас. Аминь.

3) Поучение в неделю 4-ю по пасце – о разслабленном

Се здрав еси, ктому не согрешай. (Иоан. 5:14)

Словеса суть Евангелиста Иоанна в зачале 14 положенная.

Много и велико зло наводит грех и несть ничтоже лютейше его и несть пагубнее роду человечу, яко же грех, се бо от начала преступления Адамова царствова в мире и многим злым ходатай бывает он бо и душу от Бога разлучает и ум тьмою покрывает, яко при Адаме и в чадех его бысть и различные недуги в теле приводит и отчаяние в душу влагает и разслабление телу творит, яко иногда Каину случися от греха и сему разслабленному, о нем же Христос рек: се здрав ecи, ктому не согрешай, да негорше ти что будет; сего разслабленнаго видев Иисус лежаща на одре своем, при овчей купели, и глагола ему: хощеши ли здрав быти? Отвеща ему недужный: Господи! человека не имам, да егда возмутится вода ввержет мя в купель; егда бо аз прихожду, ин прежде влазит. Глагола ему Иисус: возстани и возми одр твой и ходи. Он же возстав и взем одр свой и хождаше. Паки же сего разслабленнаго обрете Иисус в церкви и рече ему: се здрав ecu, ктому не согрешай, да не горше ти что будет. По сих же вниде Иисус в Капернаум, и ту обрете разслабленнаго от четырех носима и видев Иисус веру их, рече разслабленному: чадо! оставляются греси твои, а потом и тело его изцели, тако глаголя разслабленному: тебе глаголю – возстани и ходи и возми одр твой и иди в дом свой; и абие возста и взем одр свой и хождаше пред всеми. Но молю вас братие: престани от грехов и хранитеся их; да не таяжде постраждете, яко же разслабленнии сии; они бо за грехи свои болезни на теле приимали. Но в сем слове скажу вам о гресех, каковыми имяны называются грехи: комарами и велблудами; тако глагола Христос до жидов: вожди слепии, оцеждающии комары, велблуды же пожирающе (Мф. 23:24). Таковы были жиды: они бо малых грехов хранилися, который называются комарами, а творили грехи великие, которые велблудами называются; малый то был грех в старом законе, егда кто не дает зелия десятины архиереови или левитови. А жиды то за великий грех почитали и вельми о том стереглися. Великий грех был не праведно судити, милосердие людем не творити и во Христа Бога праведнаго не верити – то великий грех. А жиды то за малый грех имели и прощали то. О чем Бог Христос глагола к ним: горе вам книжницы и фарисее, лицемери, яко одесятствуете мятву, копр, и кимен, и оставитсе вящшая закона, суд и милость и веру остависте, а о малом деле печетеся; аще бо подобает левитом десятины творити, то уже и великаго дела суда праваго и милости не оставляйте. Называются грехи сучцем и бервном; тако молвил Христос: что же видиши сучец, иже во оце брата твоего, бервна же, иже во оце твоем, не чуеши (Мф. 7:3). Чрез сучец значится грех малый, который мы у иных людей видим и осуждаем их; чрез бервно значится грех великий, который мы у себе имеем и не видим, и себе добрыми и праведными чиним. Таковый был Александр царь Македонский. Егда привели к нему воини разбойника морскаго, именем Диомидеса, на мори поймана и егда его Александр спрашивал, молвячи к нему: ты разбиваешь (корабли) и шкоду (убыток) людем чинишь; отвеща Диомидес ко Александру: о царю! ты мене разбойником зовешь, что я сам один, в едином стружке, на море ездячи, разбиваю и граблю, а себе самого ты, Александре, не зовешь разбойником, ты бо землею и морем неисчетныя войска проводиши и так много людей побил еси, что уже весь свет кровию людскою облиял еси. Слышащи Александр те мудрыя словеса, ни чего злого не учинил Диомидесу, по сем же принял его до себе и великим господином учинил его. Называются грехи ранами, которыми бывает душа человеческая изранена; тако глаголет Псаломщик: возсмердеша и согниша раны моя от лица безумия моего (Псал. 37:7); аще кто рану имеет на теле своем то скоро печется о лекарстве ея и приходит до лекаря како бы мог ту рану целити; а если человек о той ране начнет нерадети, то разболится та рана и человека уморит. Тако и греховныя раны аще кто имеет на душе своей такожде скоро да приходит до лекаря – до исповедника своего и лекарством духовным – исповедию святою раны своя да исцеляет; а если будет грешный человек исповедь свою день за день откладывать, то грех его расширится, малый великим будет, от мысли приидет в дело и душу человечу уморит; для того Иисус Сирахов глаголет: не медли обратитися ко Господу и не отлагай день за день покаяния, внезапу бо изыдет гнев Господень и во время мести погибнеши (гл. 5, ст. 8, 9). Называются грехи болотом и блевотиною; тако глаголет Апостол Петр о людех грешных, котории, покаившеся, исповедавшеся грехов своих, снова до тех же грехов обращаются, тако глаголет апостол: случися бо им истинная причта – пес возвращая на своя блевотины и свиния омывшися, в кал тинный (2Петр. 2:22).

О, разумей безумный человече твои грешный дела! Ты бо скаредное болото греховное с души своей покаянием омыв, а потом снова до того же болота обращаешися и в нем ся валяешь; который скаредныя блевотины греховныя из сердца своего на исповеди святой вырыгавши и выкидавши, потом снова те ты блевотины пожираешь, и в сердце своем сохраняешь, для того, человече грешный, глаголет пророк Иезекииль: егда совратится праведный от правд своих и сотворит согрешение, и умрет в преступлении, еже сотвори, в том умрет (Иезек. 18:26)172;и Апостол Павел до тебе, человече грешный, такия же слова глаголет: аще бо яже разорих, сия паки созидаю, преступника себе представляю; сего ради братие, хранитеся от греха, грехи бо суть тяжки человеком. И не токмо человеком грехи тяжки, но не может его ни какое место удержати: не может греха небо сдержати: ангела бо гордаго кинуло с небес до ада, не может греха воздух сдержати: Симона чаровника летячаго с воздуха на низ кинуло; не может греха и море сдержати: Пророка Иону не послушливаго, с корабля егда вкинули в море, и то море для Ионы восколебася и на сушу извергло его; не может греха и земля сдержати: разступи бо ся под Дафаном и Авироном – противниками Божиими и живых пожерла и по глаголу Псаломникову: беззакония моя превзыдоша главу мою и, яко бремя тяжкое, отяготеша на мне; и сего ради, аще хощете грехов избыти, то творите добрыя дела, в начале имейте смирение, а ктому пост и молитву сими грехов избудите и милость Божию получите. Аминь.

4) Поучение в неделю 5-ю по пасце – о Самаряныне

(Иоан. 4:26). Аз есмь, глаголяй с тобою. Сия словеса глаголанная от Спасителя нашего Христа о Самаряныне у Евангелиста Иоанна в зачале 12 положенная.

Якоже книгу царскую, сиречь грамоту, церковною печатию запечатану, аще бы кто не имел на то власти, дерзнет печати сняти и ту грамоту прочтет, воистину пред царем согрешил бы и та дерзость будет не безбедна. Тако разумети подобает и о судьбах Божиих; – тайны бо Господи сокровенный – книга есть царя небеснаго; о той книге Иоанн Богослов в Апокалипсисе во главе 5-й сице глаголет: видех, рече, в деснице седящаго на престоле книгу написану и запечатану седьмию печатьми и никто же можете разогнути книгу, ниже зрети ю (Апок. 5:3); а ныне обретаются человецы, иже испытуют судьбы Господни и глаголют, яко ныне кончина мира. – А о кончине мира Апостол сице вещает: сами бо вы известно весте, яко день Господень, яко тать в нощи, тако приидет (1Сол. 5:2); аще бо кто о кончине мира помышляет лучше бы той человек помышлял о своей кончине, когда самому себе смерть будет. Царь и Пророк Давид моляшеся Господеви: скажи ми Господи кончину мою и число дней моих кое есть! (Псал. 38:5). Слышастели возлюбленнии! каков великий Пророк не знал дня кончины своея! А мы грешнии, како можем знати, когда будет кончина века сего? О человече! ты кто еси испытуеши судьбы Господни? Сам Христос Истина глаголет: о дни же том и часе никто же весть, ни Ангели небеснии (Мф. 24:36); а ты человече, выше Ангелов знати хощеши? Глаголют бо: яко ныне последнее время; но лучше бы послушати Евангелиста Матфея, глаголюща: егда рече, седящу Иисусу на горе Елеонстей приступиша к нему ученицы его особь глаголюще ему: о, Учителю! Рцы нам, что знамение твоего пришествия, когда будет и кончина века сего? Рцы нам всевидче, како научим вся языки преславному твоему пришествию? Господь же рече им: блюдите да не прельститеся: мнози приидут во имя Мое глаголюще, яко аз есмъ Христос; блюдите да никто же вас прельстит, глаголю бо вам: о дни же том и часе ни кто же весть, а в нынешнее плачевное время, не вем откуду, нынешний человецы научилися знати о скончании мира, вси то глаголют: ныне уже кончина мира есть, ныне последнее время; вси бо тако вещают: лета сия, в няже видехом злая, последняя быти глаголют; а Господь наш глаголет: несть ваше разумети времена и лета, иже Отец положи во своей власти (Деян. 1:7). Тако и нынешнее время: аще и люто видится, аще голоды и огни, аще войны и кровопролития, но от лютости нынешних времен несть можно знати кончины века. Всякия скорби и тесноты, яже ныне видим, голоды, войны, кровопролития, огни, наводнения, сухости земли, безплодствия, ненависти между братиею, гонения, междуусобныя брани, – вся сия скорби и прежде бяху; и паче сего лютейшия были времена, егда нечестивии цари гонили верующих во Христа. Тако и нынешняго времени бываемая скорбь и теснота не может быти знамением являющим кончину мира. О сем ясно Сам Христос глаголет: о дни же том и часе никто же весть. Но удивляюся нынешним народом, яко не веруют словесам Христовым. Блаженна в женах и верна оная Самаряныня! Понеже бо верова глаголом Христовым, егда Христос ей рек: Аз есмъ глаголяй с тобою, и егда жена, услышав сия словеса, остави водонос свой, тече во град и глагола человеком: приидите и видите человека, иже рече ми вся, елика сотворих, егда той есть Христос, тако глагола жена. Слышавше же народи сия глаголы, изыдоша из града того и грядяху к нему и мнози вероваша в Него. Но что глаголю о нынешних человецех, иже глаголются быти вернии, а не веруют, что Господь глаголет: о дни же том и часе никто же весть. И паки, егда услышите брани и нестроения, не убойтеся, подобает бо сим быти прежде, но не тогда есть кончина мира. Востанет бо язык на язык и царство на царство и труси велиции по местом, и глади и пагубы будут и беды мнози; князь князя предаст на смерть и царь царя преодолевати начнут, но не тогда есть кончина.

О горе! В тыя дни, последния будет беда велия на земли и гнев на людех сих и будут во острим меча и пленении будут во вся языки, и за грехи людские, глаголет Господь, наведу на землю рать сильну, дам вас иноплеменным поганым языком и не знающим Бога за умножение злоб ваших, и пленят погани дочери ваша и вдовиц ваших осквернят, и поработают поганым сынове и дщери ваша и прольется кровь ваша яко вода морская, и вельможи ваши все опустеют. Земля ваша будет пуста, грады ваша огнем будут позжены, страну вашу пред вами чуждии поедят, и от того страху побегнете в пустыя грады, но и ту Аз, глаголет Господь, послю вам змии, им же несть заклинания и изъедят вас и скота ваша и от того домы ваша и красныя палаты запустеют, яко же глаголет Осия пророк во главе 4-й: сего ради воскорбит земля, умалится со всеми всельшимися на ней, за грехи бо наша умалится со зверем польским и с гады земными и со птицами небесными, и рыбы морския оскудеют в водах; не будет и птиц летающих, ни зверей в лесах ваших, земля ваша будет пуста яко же вдова. И древа не сотворят плода и реки ваша изсохнут от солнца и болота ваша мокрая загорятся огнем, и облак с дождем не пройдет чрез землю вашу и нога ваша не омочится от росы небесныя; понеже вас милую, а вы согрешаете, и по грехом вашим, глаголет Господь, наведу на вас гнев, и тогда станется страшное блистание молнии, и громы и гласы крепки с небесе и водворится вопль страшный и рыдание по всей земли, восплачутся нечестивии человецы погибели своей, приидет бо тогда день отмщения всей вселенней, день вихря и страшнаго трепетания: тогда земля потрясется из дна своего таковым колебанием, как колеблет вихрь тростиною и от сего разсыплются вся горы и холми, тогда и море начнет кипети, яко котел и страшно горети, яко от страха его начнут умирати живущии на краях его. И море, Божиим повелением, преложится во огнь и поднесется от места своего и от бездн затопити потопом огненным небо и землю, яко мнози о сем от святых реша: како было во дни Ноевы, тако будет и тогда, – вся земля огнем поедена будет и обратятся дебри ея в смолу и горящий камень. А о пришествии Христове и о скончании мира сего кто похощет знати. Когда будет кончина века, сие от нас утаено. Господь рече ко Апостолом: о дни же том и часе никто же весть, ни Ангели Господни, токмо Отец един. Глаголет бо верховный Апостол Петр: приидет же день Господень, яко тать в нощи; в онь же небеса убо с шумом мимо идут, земля же и яже на ней сгорят (2 Петр, 3:10) и вся стихия мира сего видимаго огнем сгорят и разсыплются; и пременятся; от вида временнаго и тленнаго изменятся в иный вид, некаковый новый, неотменный, вечный и пресветлый; небеса и земля и вся стихии пречистившеся огнем оным чистительным, яко злато светлейши покажутся; тогда небо поколеблется и изменит доброту свою; в той час солнце затмится и луна не даст света своего, и звезды с небесе начнут пасти на землю, яко лист от древа во время ветра велика, и свиется небо, яко свиток и изменится тогда вся тварь. Все, яко имеет початок, тако и конец будет имети. Божество же токмо само есть без початку и без конца и без времени. И во время онаго страшнаго раззорения стихий, царие земнии, и князи, и сильнии и все начальницы, богатыри и мучители и всяк свободь и раб начнут от страха умирати и крытися в разселины земнии, кричати воплем крепким, яко жена рождающи в болезни. И начнут к горам припадаючи, с рыданием слез глаголати: горы, горы! падите на нас и покрыйте нас от лица седящаго на Престоле, – ибо пришел час гнева Его, и кто стерпит прещение ярости Его? Любимицы мои! Помыслите о жителех градских и сельских, каково люто время и дние будут тогда. В то время от восток на запад пойдут, а от запада на восток приидут и восплачутся вельми и возрыдают крепко и дни сияющу ожидают ночи, да почиют от своих трудов. Пришедшей же нощи, от частых трусов и от бурей воздушных, дни взыщут, чтобы узреть дневный свет. Восплачется тогда вся земля, аки некая девица красная, за погибель человеческую; восплачется море и воздух; восплачется солнце и луна; восплачут тогда дивия животная со птицами, восплачутся горы и холми и древа плодская – человеческаго рода – яко вси уклонишася от Бога. И восплачутся вся колена земная; восплачутся и Ангели Божии о согрешении человеческом, видя погибающий род человеческий. Молюся вам, братие, прежде даже не приидоша на нас сия злая, угодим Богу добрыми делами и покаянием и милостынею и плачемся зде грехов наших, да не восплачемся тамо вечно. Аминь.

5) Поучение в неделю 6-ю по пасце – о слепорожденном

Господи, кто согреши, сей ли, или родители его, яко слеп родися? (Иоан. 9:2)

Словеса суть Евангелиста Иоанна в зачале 34 положенная.

Якоже солнце просвещает сиянием своим всю поднебесную и на всех светлые лучи своя испущает, тако и Господь наш Иисус Христос, истинное солнце, незаходимаго света вечное сияние, просвещает всех к Себе приходящих, а просвещает сугубо на души и на теле, яко и сего слепорожденнаго просвети, о нем же повествует Евангелист Иоанн в Евангелии, в зачале 34. Во время, рече, оно мимо идый Иисус и видев человека слепа от рождения, и умилосердися о нем, плюну на землю и брение сотворь, помаза очи его; той же прозре и бысть здрав. И вопросиша Его ученицы Его глаголюще: Господи! Кто согреши, сей ли, или родители его, да слеп родися? Отвеща Иисус: ни сей согреши, ни родители его, но да явятся дела Божии на нем; Мне подобает делати дела пославшаго Мя, дóндеже день есть. Зде внемли любимче, аще бо Господь спешит делати, дóндеже день есть, чтоже, раб ленивый, к сим речешь? Господь бо пред очима твоима делает и дневи прилежит, почтоже ты, лениве, праздно стоишь и всуе день изнуряешь жития своего? Якоже бо в чувственном дни темнил и мрачнии облацы закрывают от очес наших солнечную светлость, тако и мир сей прелестию закрывает очи наша душевнии, еже не видети нам истиннаго солнца, Христа Бога нашего; и Его заповеди не можем творити, ослепиша бо нас злобы наша. И сего ради должно нам молити Господа Светодавца, дабы просветил очи наша душевнии и телеснии; а егда Христос, Свет истинный, услышит моление наше, просветит очи наша душевнии и телеснии, якоже исцели и просвети очи, иже по нем идоша два слепца вопиюще и глаголюще: помилуй нас сыне Давыдов! (Мф. 9:27, 28). Просвети очи наша! И глагола им Иисус: веруета ли, яко могу сие сотворити? Глаголаста ему: ей Господи! веруем. Тогда прикоснуся очию их и глагола им: по вере ваю буди вама. И отверзошася очи има. Такожде и во Иерихоне некий слепец, именем Вартимей, седяше при пути и просяше милостыни от мимоходящих, услышав от народа о Иисусе и возопи, глаголя: Иисусе сыне Давыдов, помилуй мя. Став же Иисус и вопроси его, глаголя: что хощеши да сотворю ти? Слепец же рече: Господи! да прозрю. Иисус же рече ему: прозри! вера твоя спасе тя; и абие прозре. Якоже слепцы сии ослеплены были телесными очима, недовидели пути, камо идти, тако мы, душевныма очима ослепленнии прелестию мира сего, не видим истиннаго пути, како прийти к истинному Солнцу Свету Христу, понеже бо мир сей прельщает, много нам живота обещает, обещает нам злато, да отымет от нас небесное благо; ни что же бо злато, разве блато, понеже бо в мире сем на земли есть. Обретаются черви в травах, иже в нощи видятся светлы, яко адаманты, аще же рукою прикоснешися, ничто же ино, точию прах. Тако и человек всяк: аще повысится за высоту рода, за красоту лица, за крепость силы, за множество богатства, но узрит себе прах и землю и червя, по словеси Давидову: аз есмь червь, а не человек; еще же, и древа существо применяется тлением: гнилое дерево, а видится в темне месте светло быти; аще разсмотриши и узриши точию тление и землю. Тако и всякому можно с Давидом глаголати: возсмердеша и согниша раны моя от лица безумия моего, сиречь от грехов, пострадах и слякохся до конца. Таковым образом, миряне, прилежащии земным вещем: аще приложит человек мысль на пищи и питии, что ему воздаст чрево, токмо мотылие и прах; аще же приложит человек тщание на купли и в торг мира сего, что себе приобрящет купец? Ничтоже, точию суету; а от сокровища и богатства своего ничтоже ино возмет, точию срачицу и саван. И аще человек оженится и дети приживет, сына оженит и дщери замуж выдаст и проживет сто лет и больше, потом что? Смерть; а по смерти приобрящет тление. Воистину льстит нас сей свет красотами и пестротами; ово красотою богатства, а ово пестротою мира сего и, люблением; все бо, рече Апостол, еже в мире – похоть плотская, и похоть очима и гордость житейская, несть от Бога, но от мира сего (Иоан. 2:16). А в мире сем все суетно и непостоянно; мир бо сей обещает нам много, но во гроб зашлет нас убого. А аще ли сего в веру не приемлеши, и ты прочитай слово премудраго Соломона, иже глаголет: кое добро сыном человеческим, еже творят под солнцем; возвеличих бо и аз творение мое, глаголет Соломон, создах себе дом и населих винограды и сотворих ограды и насадих сады, туже насадих и древес всякаго плода и сотворих купели водныя, еже напаятися от них прозябаниям древес и полеватися садом тоюж водою. Имех у себе раб и рабынь и домочадец много и стяжание скотом, стад много бысть овец, паче всех, бывших прежде мене во Иерусалиме; собрав же себе злато и сребро и имений царских и иностранных; приставих же себе поющих и поющия от мужеска пола и женска, чашников и виночерпцев много ми бысть, и наслаждение пищи сыном человеческим велие бысть; потиры и чаши златые к службе многи были сделаны, в коих вино было наливаемо, и превзыдох во всех богатствах. И возвеличихся и приложихже ся и мудрости, паче всех бывших прежде мене во Иерусалиме: и мудрость уставимися со мною (т.е. пребысть) и все, еже просиста очи мои, то мне Господь и даде. И призрех на вся творения моя и совершения всех, я же сотвориста руце мои, и в труде, в нем же всуе трудихся творити: и познах во всех вещех, и се вся суета суетства и изволение духа, и еже несть ничтоже вечно пребывающаго под солнцем173. О премудрый Соломоне! ты глаголеши: несть ничтоже вечно пребывающего (под солнцем), а человецы, живущие в мире сем суетном, льстяся нажитками сего света, говорят тако: добро нам зде быти. Не знают, что говорят: кое добро есть в мире сем не постоянном. В мире бо сем вся изменна: ибо кто ныне живет, тот утре во гробе гниет, ныне здрав есть, яко Моисей, а по утру в великом недузе, яко Иов; ныне в чести и славе, а по утру в темнице и заключении; днесь о богатствах печется, яко не может сочести, яко же богач он Евангельский тако глаголаше: раззорю житницы моя малыя, и большия созижду, а во утрий день единыя крупицы алчет, яко Лазарь, и не обретает; днесь на свободе, а утро в неволе, сего дни в радости, а утро в печали, днесь господствует и повелевает, утро-ж издыхает дух его и умирает. Несть убо добро нам зде быти, не имамы зде пребывающего града, но грядущаго да взыщем, – тленная есть храмина телес наших, волнуемо есть жития нашего море.

Послушайте любимицы! Да восхощем и мы вселитися во храмины небесныя, в обители вечныя, в них же есть всякое безбедство, беда же ни едина тамо; вся светла, ни что же мрачно тамо; вся весела, ничто же печально есть; несть ничего преходящаго, но вся тамо вечна. Братие! Сие получити потщимся, да и мы чада преложимся духовие из тьмы грехов во свет добродетелей. Како же нам преложитися? Послушайте: аще кто был хищник, отселе буди милостив; аще кто был бранлив, яко пес лайчив, отныне буди молчалив: псом бо дано есть лаяти, а не человеком матерно бранитися; чем бы матерно бранитися, чем бы лучше творити молитву Иисусову: Господи Иисусе Христе Боже наш, помилуй нас. О горе нашему христианству! Имя Божие во устах наших редко поминается, а матерная брань никогда не оставляется. То бы наше истинное христианство и духовное преложение: во устех бы Иисусова молитва, а в руках рукоделие, а к тому святое смирение с покаянием, а святым покаянием Бога милостива себе сотворим и царство небесное получим. Аминь.

6) Слово на Преславный день Вознесения Господа нашего Иисуса Христа

Благословеннии христиане!

Аще кто хощет познати силу дне сего великаго и преславнаго во днех сего века, в оньже бысть вознесение Господне, той да весть по истине, яко велик есть сей день и ходатайствовав спасению нашему, отъемлет бо от нас всякое неверие, еже о Христе. Аще бо Сын Божий и родился от Девы, и многи чудеса, сотворил, и умер за ны, и в третий день воскресе от мертвых, и с нами пожив на земли до скончания века, ане вознесся бы на небеса, то бы мнози пришли в неверие и рекли бы, яко не есть тот Бог, ниже Творец всех человек, понеже не на небеси живет, но с человеки на земли. Сего то ради вознесся Господь на небеса; Бог бо бе истинный, иже сшедый с небесе. Тем же и восшед превыше всех небес и вознесением Своим отъят всяко неверие от душ наших. Да радуется ныне земля, и да красуется днесь Елеонская гора, хотящи подъяти Господа своего, ибо Сей ныне грядет от брани ополчения своего с победою вечною славы, и вси святии с Ним сташа на горе Елеонстей, прямо Иерусалима, овы от ада изведени, яко патриарси и пророцы, инии же от земли собрани, яко Апостоли ученицы Его. Ныне небеса да веселятся и врата своя отверзают восприяти Творца Своего с плотию от земли восходяща. Днесь Ангельстии роды и Херувимский чини, многия радости исполнени и ужасом содержими, готовятся изыти к Небесному Царю на стретение таковым образом. Егда бывает земному царю пришествие с воины к царствию своему, а идущу ему от брани с победою многою и ведущу с собою неизсчетныя полки пленников, царства того гражданом не мала бывает радость: выходят царю своему на стретение с радостию великою, с честию приемлют, радуются о победе, яко царь их победил противников своих, и целование дают, и вси на колена пред ним покланяются, встречают его с тимпаны, гусльми и трубами, с радостию приемлюще его и хвалы ему воздают. Тако и небесной страны граждане, многоочитии Херувими и шестокрылатии Серафимы, зело радовахуся, видяще Господа и Царя своего от брани грядущаго с победою многою и с полки неизсчетными патриархов и пророков и царей земных, свободивша от адовы темницы и вслед себе ведуща. Такоже зело радовахуся, видяще Господа и Царя, Патриарси и Пророцы, яко свободил их Господь наш И. Христос от адовы тьмы, и вместе приближахуся к отечеству своему пресветлому граду небесному Иерусалиму, ему же художник и содетель Бог. И тогда со многою радостию во сретение Царю Небесному исходят, премирныя лики составляюще, победныя песни поюще, паче громов крепких, Херувимы же и Серафимы, со страхом предыдуще, Христу Своему служаху и ко Ангельским чином вопияху: возмитеся врата вечная небесная, да внидет Царь славы в покой Свой, идеже бе первее. Инии же чини Ангельстии ужасахуся, недоумевающе, что се хощет быти, зряще человека на небеса идуща невозбранно сквозь тех ликостояния и вопрощающе Херувимов: кто есть сей Царь славы, иже приходит и риза Его кровию скроплена, и хощет проити вечная врата их же никто же проходит, токмо Творец Сам, Бог наш? Отвещавше же Серафимы, к их глаголом рекоша: сей убо от брани ополчения Своего Царь наш грядет с победою многою. Сам бо ополчился на диавола и на вся силы вражия и во гневе Своем порази их крепостию Божества Своего, Сам Господь потопта их ногами Своими, сотворил с ними борьбу и порази их, и не бе тогда мужа от язык помогающего Ему. Сам той Господь победи лукаваго змия крестом силы своея и в той брани риза Его человечества вся есть кровию окропленна и се есть Господь силам небесным и подземным, Творец ваш. О князи и вратари небесных врат! Немедленно отверзите врата ваша; се бо Царь славы приближается к вам, Ему же мы со страхом предстоим, закрывающе лица своя, нетерпим зрети святаго лица Его! Егда же сия услышася от Серафимов, первии Ангели, начала и власти, господствия и силы тако сами к себе рекоша: не будем покорни, аще не услышим слова Божия, кто есть сей царь славы. Тогда возгласи к ним Сам Христос: Аз есмь Господь сил и Царь славы! Отверзите Мне врата правды и, вшед в ня, возвещу Отцу Моему, яже на земли содеях и пострадах спасения ради человеческаго. Тогда абие силы небесныя, услышавше Господа своего глас, падше со страхом, поклонишася Творцу своему и врата небесная отверзоша, тако глаголюще: слава Тебе всяческих Владыко! Тогда Господь вознесся властию Божества Своего, яко на облаце светле, подъяша бо его премирныя лицы, первоначальнии чини, именовании престоли. А вознесение Господне бысть пред многими верными; тогда бо при Апостолех бысть более пяти coт братии на горе Елеонстей и пред очима их премирныя силы Ангельстии подъяша Господа нашего И. Христа, Самаго Того повелением. Повинуются бо Ему Ангели, яко Творцу, и Влодыце своему со страхом служат. Тако бо и нам, братие, подобает со Христом возноситися на гору святую, сиречь на добродетели, оставити бы вся прелести мира сего суетнаго и творити добрая дела. И тако духовне да вознесемся из тьмы грехов во свет добродетелей. Какое же духовное вознесение? – Внемлите на гордость и вознеситеся смирением! Сам Господь глаголет: всяк возносяйся смирится, а смиряяйся вознесется. Тако и вы возноситеся на сребролюбие милостынею, на блуд – целомудрием, на зависть – братолюбием, на объядение – постом, на гнев возноситеся терпением, на ленотство – молитвою. Таковым бо вознесением от грехов на добродетели вознесется, а добродетельми царство небесное достигните и милость Божию получите. Аминь

7) Поучение в неделю 7-ю по пасце

Отче святый! Соблюди их во имя Твое! (Иоан. 17:11.)

Словеса суть Евангелиста Иоанна, в зачале 56 положенная.

Егда некий земный царь хощет изыти на брань с силою и славою многою, то первее той царь собирает сибе воины и дает воинам своим знамя некое, чтобы тем воинам по тому знамени можно познаваемым быти, чии суть слузи, и по коем царе поборают. Тако сотворит и Царь небесный Иисус Христос: во время страшнаго и втораго пришествия Своего даст Свое знамение крест пресвятый. О сем знамении Евангелист повествует: тогда, рече, явится знамение Сына человеческаго на небеси (Мф. 24:36). Кое то знамение? Крест Христов, а той святый крест явится тогда на облацах превысоко, яко знамение победы Христовы, якоже царствующий Пророк Давид изъявляет: смятутся язы́цы и убоятся живущии в концах от знамений твоих (Псал. 64:9). От коих знамений? На сие отвещает Евангелист: тогда, рече, солнце померкнет и луна не даст света своего и звезды с небесе спадут (Мф. 24:29). По сему известно увемы, яко приближися кончина. Якоже бо престарения человека знамение бывает помрачение очес, тако и преставляющагося и кончающагося мира знамение имать быти: померчение солнца и луны, яко очес мира прекрасных. И яко же в коем дому умирающу славну мужу и богату смятение бывает во всем дому его: вси домашний его плачутся и отвергши ризы светлы, черным облачением покрываются; тако и роду человеческому, его же ради вся создана суть, кончину восприемлющу, весь мир в смятении будет и светила небесная, отложше светлая сияния, во зраце темном, аки в черном одеянии, имут явитися174 и тогда восплачутся вся колена земная и узрят Сына человеческаго, грядущаго на облацех небесных с силою и славою многою (Мф. 24). Сия словеса Христовы, достовернаго Свидетеля паче всех. И посем внезапу наступит раззорение и скончание века сего видимаго; тогда бо Ангел в трубу вострубит, да уготовятся седмь иных Ангелов, иже избраны на час и лето раззорити стояние мира сего. И оное воинство страшнаго огненного видения разсыплется по всей земли, погубляюще нечистивых грешников. Тогда и седьмый Ангел вострубит и выльет чашу гнева Божия на воздух, той бо скончает тайну смотрения и покажет величество гнева Его; тогда станется страшное блистание молнии и громы – гласы крепки с небесе, и сотворится вопль страшный и рыдание по всей земли; восплачутся нечестивый человецы погибели своей; прииде бо тогда день отмщения всей вселенней, день вихоря и страшнаго трепетания; тогда земля потрясется из дна своего таковым колебанием, как колеблет вихорь тростиною, и от сего разсыплются вся горы и холми; тогда и море начнет кипети, яко котел; от страха Его начнут умирати живущие на краех его и море Божиим повелением преложится во огнь и подъимется от места своего и от бездн, затопит потопом огненным небо и землю, яко о сем мнози от святых реша. Како было во дни Ноевы, тако будет и тогда: вся земля огнем поедена будет и обратятся дебри ея в смолу и горящий камень. А о пришествии Христове и о скончании мира сего кто хощет знати, когда будет кончина века, сие от нас утаено. Господь рече ко Апостолом: о дни же том и часе никто же весть, ни Ангели небеснии, токмо Отец Един (Мф. 24:36). Глаголет верховный Апостол Петр: приидет же день Господень, яко тать в нощи, в он же небеса убо с шумом мимо идут, земля же и яже на ней дела сгорят, и вся стихия мира сего видимаго огнем сгорят (2Петр. 3:10) и разсыплются и пременятся, от вида временнаго и тленнаго изменятся в иный вид некаковый новый, нетленный, вечный и пресветлый; небеса и земля и вся стихии пречистившися огнем оным чистительным, яко злато, светлейши покажутся, и небо изменит доброту свою и поколеблется. В той час солнце затмится и луна не даст света своего и звезды с небесе начнут пасти на землю, яко лист от древа во время ветра велика. И свиется небо, яко свиток, и изменится тогда вся тварь, ибо яко им есть початок, тако и конец будут имети. Божество же токмо само есть без початку и без конца и без времени. И во время сего страшнаго раззорения стихий царие земстии, и князи, и сильнии и все начальницы, богатыри и мучители и всяк свободь и раб начнут от страха умирати и крытися в разселены земнии, кричати воплем крепким, яко жена, рождающая в болезни; и начнут к горам припадаючи с рыданием слез глаголати: горы, горы! падите на нас и покрыйте от лица Седящего на престоле, ибо пришел час гнева Его, и кто стерпит прещение ярости Его? Возлюбленнии! в то лютое время ни кто никому не поможет и заступы не учинит, ниже кто искупит, и не изручит ни кто никого, и вкупе рцем: не избавит тамо царь нища и не поможет нищий царю, и князь не поможет слузе своему, ниже слуга поможет князю своему, ни воевода, ни властилин не заступит рабов своих, не поможет господин рабу своему, и раб господину своему не поможет, ни отец избавит сына своего и сын отцу своему пользы не сотворит, и брат не избавит брата своего, ни племене родства своего не помилует; тогда не искупит муж жены своей и жена мужу своему не поможет, но кийждо их, от дел своих или осудится, или постыдится. Тогда иный Ангел станет на солнце и возопиет велиим гласом на птицы поднебесныя, тако глаголя; соберитеся на вечерю Божию великую, да снесте плоти царей земных и сильных века сего, коней и седящих на них да снесте. Зде Ангел созывает диаволов на погубление грешных, да погонят их в море огненное, на муки вечныя. По сих же всех страхованиях и пременах века сего, по мимошествии тленных, вся наступит нетленная и вечная, по словеси Господню, яко Сам Собою и усты всех святых обеща нам дати в наследие небо и землю новую, в них же правда живет175. Любимицы! Достоит же вам всякому помыслити, коликия красоты будут оныя новыя небеса и земля, никто о сем изречет; аще бо ныне удивляемся сему небеси, еже украшено солнцем и луною и звездами, такожде и земли удивляемся, яко украшена есть горами и полями и различными цветами, тому всему удивляемся, иже зело красно во очесех наших является. Ты же, возлюбленне, помысли коль красны будут новыя небеса и земля; уже бо ктому тамо не будет страха, ниже премены времен, ниже закрыются темными облаки, гром и молния страшная не явятся; тамо такожде земля просияет цветами благовонными и лютых зверей не будет на ней и змиев ядовитых и сил демонских, всех их бездна пожрет; но точию сама земля, яко рай Божий будет. И егда вся сия совершатся и век сей скончается, тогда явится радость святых, воскресения и безсмертнаго живота вечнаго начало. И по оном гонении и скорби праведных, по раззорении века сего и по создании (т. е. возсоздании из прежних) новых небес и земли новой, пошлет Бог Ангелов Своих воскресити род человеческий и собрати избранных Его из под четырех ветров небесных и егда затрубят Ангелове, тогда вси воскреснут и возстанут по своему чину, во оной мере, в ней же Христос воскрес из мертвых176 и таковым образом воскресит Господь весь род человеческий властию Божества Своего. Глаголет Евангелист: егда услышат глас Его сущие во гробех, тогда абие изыдут из гробов своих взяти воздаяния; творящии злая на суд, а праведницы в живот вечный177. По сем же подвижется праведный Судия на суд свой, с Ним же приидут дивнии родове178. Ангельстии и вси вои небеснии предъидуще и служаще Ему: многоочитии Херувими и шестокрылатии Серафимы, обстояще престол славы Его, тысяща тысящами и тьмы тьмами служаще Ему, повеление Его творяще, сами же суще грознаго видения, огнем дышуще, огненно и глаголюще, и пламенно оружие имуще на боязнь нечестивым человеком. Приидет же на суд Господь наш Иисус Христос в славе велицей и свете пламенна, престол Его пламень огненный и окрест Его буря зельна; призовет небо свыше и землю разсудити люди Своя; огнь пред Ним предъидет и попалит вся враги Его, а праведных просветит светом лица Своего. Тогда вся тварь страхом одержима будет о преславном видении славы Его. Егда Царь сядет на престоле славы Своея и вси святии Ангели с Ним станут окрест престола Его и начнет Господь суд творити комуждо по делом его, тогда соберутся пред Него вси язы́цы и народы, князи и цари земнии и мучители века сего, вси праведницы и грешницы, кождо в чину своем пред Ним станут, праведницы одесную славы Его, грешницы же ошуюю; разлучит бо их друг от друга, яко же пастырь разлучает овцы от козлищ, и поставит овцы одесную Себе; а козлища ошуюю. Тогда кождо сам понесет дело свое, написанно суще в совести нашей; тогда речет Царь сущим одесную Себе: приидите благословенный Отца моего, наследуйте уготованное вам царство от сложения мира, взалкахся бо, и даете Ми ясти; возжадах, и напоисте Мя; странен бех, и введосте Мя в дом свой; наг бех, и одеясте Мя; болен бех, и посетисте Мене; в темнице бех, и приидосте ко Мне; тогда отвещают Ему праведницы, глаголюще: Господи! когда Тя видехом алчуща, и напитахом, или жаждуща, и напоихом; когда же Тя видехом странна, и введохом, нага, и одеяхом, или в темнице, и приидохом к Тебе. И отвещав царь речет им: аминь глаголю вам, понеже милость сотвористе единому от малых сих братии Моей, Мне сотвористе179. О милостивый нищелюбче! Внемли и удивися милосердию Сына Божия, како о вас милостивых Сам Сын Божий во днех плоти Своея моление принес Богу Отцу Своему, тако рек: Отче Святый! Соблюди их во имя Твое; а хощу бо иже есмь Аз, да и тии будут со Мною. Не о всем мире Аз молю, иже Тебе не познаша; но о сих молю, их же дал Ми еси, слово Твое сохраниша и в Тебе, Бога Отца Моего вероваша, нищих миловаша, – о сих милостивых молю, да и тии помиловани будут180. По сих абие речет и сущим ошуюю Его: отъидите от Мене проклятии в огнь вечный, уготованный диаволу и аггелом его, и отъидите, рече, проклятии за немилосердие ваше: егда бо взалкахся, и недасте Ми ясти и жаждущаго не напоисте Мя, нагаго не одеясте, страннаго не введосте Мя в дом свой, больнаго и в темнице суща не посетисте Мя; сего ради суд изношу на вас без милости не сотворшим милости единому от малых сих братии Моей181. Ты же внемли себе, о немилостиве, иже нищих презираеши. Не слышишь ли, яко Господь обиду тех на Ся взимает и братиею Себе нарицает, тако глаголя: взалкахся и не дасте Ми ясти? И сего ради отсылает вас в муки. Видиши ли, аще кто не блудник и не разбойник, то за едино немилосердие отсылает Господь на муки? Ты же что к сим речеши, о грехотворче! иже без боязни вся грехи твориши: убивавши, крадеши и завидиши; чего себе за се ожидавши? Не что ино, точию еже услышиши, речет и вам Господь: отступите от Мене вси делающий беззаконие182. И егда сия грешницы услышат, зело душа устрашится и вся от боязни вострепещет, ибо не сия токмо узрит, но и паче сих ужаснейша увидит: над собою Судию грознаго, под собою ров глубокий, одесную святии гневаются нань, налевице люти мучители – диаволи, яко пси гладные ждут на душу; пред собою узрит множество грехов в страшных видех послушествующе нань. Тогда приидет на грешных жалость и страх нападет на души о сем, яко зде пространно жиша, а покаяния не твориша, тамо уже слезы не помогут; убежати несть камо, укрытися места не обрящеши; покаяния двери затворишася. О гордыни царей тамо не брегут, чести святителей не срамляются, юности не жалеют, философский уста презирают, и на всех праведный суд износится. Но ты зде постой мало, брате и сестро, и помысли себе, что то за суд будет и кто на нем судиею, и како нас пытати будет, и в чем судити и, осудивши, на каковую смерть предаст, и кои мучители тогда будут, ибо суд оный паче всякой боязни страшнейший будет. Судия на нем Сам Бог, Иже свидетелей не требует; Сам бо испытует сердца и утробы, и весть вся помышления наша, и вся тварь нага пред очима Его; той испытает нас о всех делех тайных и злых, и за словеса праздны вопросит, и за сия осудит праведным судом, и глагол зело страшный изречет: отступите от Мене непокоривии грехотворцы, и идите во огнь вечный. Почто милости не сотворите нищим, и всякому требующему? сего ради суд без милости на вы изношу, не сотворшим милости. Увы мне! О каковый страх тогда нападет на грешных! Тогда, аще станут пророцы Енох и Авраам и Давид, не избавят сынов своих, внегда речет Судия: отступите от Мене вси делающии беззаконие, и идите проклятии во огнь вечный. О горе мне! Егда сия помышляю, тогда весь от страха умираю, ибо тогда диаволи возмут грешных и погонят их в муки вечныя; тогда от проклятых горькаго рыдания и крику, и от бесовскаго страшнаго рыку небо засмутится и земля убоится и разсядшися под ними земля, внезапу всех пожрет, яко Дафана и Авирона, и впадут в море огненное, в муки вечныя. Таковый конец будет грешным. Осуждены будут в муки вечныя.

По сих же всех, обратит Бог лице Свое и возрит на тех, иже одесную Его стоят, и оныя слова пресладкия речет к ним: приидите ко Мне благословеннии сынове и дщери Отца Моего, наследуйте и приимите уготованное вам царство небесное. Приидите благословеннии, друзи мои любимии вы бо доселе бысте в бедах временнаго мира, во искушениях и озлоблениях, страсе и гонениях в плаче и воздыхании, ныне же приступите ко Мне и Аз упокою вы и свобожду от всякаго труда, и болезни облегчу, и никто же во веки ничтоже злаго не постраждет: вся бо ветхая и прелестная мимо идоша, и вся рыдательная и всяка болезнь под землю вступила, плачь и рыдание тамо водворися. Вас же радость небесная постиже. Приидите благословеннии, и приимите в почесть венцы, яже уготовах вам прежде бытия мира, приидите милостивии, да помиловани будете вечно; приидите в покой и приимите небо, яко вас ради создано, и царствуйте со Мною в пресветлом дому славы Моея; сядьте на престоле Моем крепции победители мира, якоже Аз победих мир и седох на престоле Отца Моего, приидите и взыдите от земли на небо в содружество премирных Ангелов. Таковыми словесы призваны будут праведницы в царство небесное от Христа Бога нашего, в радости вечной со Христом будут и на пресветлых облацех на небо взыдут, и тако тамо всегда с Господом будут во веки пребывати в небесном царствии. Аминь.

8) Поучение в неделю святыя пятидесятницы

Благословеннии христиане! Егда кто хощет земнаго царя образ написати, сиречь персону царскую, смеет ли худою краскою написати? Никакоже. Аще бо худою краскою напишет, то царя обезчестит, за то и наказан будет; но полагает писец вся краски чисты и светлы, достойны царева образа, а по иным местом и золотом золотит и тщится вся одежды царевы чинно написати, како бы мощно изобразити против царскаго лица, да и незнающий кто посмотрит на той царский образ, сиречь на персону, и видит истинно и чинно все царское начертание и мнит тако, яко отнюдь того самаго царя видит. Тако и Бог Творец всея твари хотяше образ Свой написати, сиречь человека создати, и зело красен образ Богом написася; понеже бо человек без злости и без скверны создася, но послежде от князя тьмы помрачися. Бог Отец тако рече к Богу Сыну: сотворим человека по образу Нашему и по подобию; советным образом глаголет: сотворим человека, а не рече тако, яко же кто своему рабу велит сотворити: сотвори тако. Но Бог Отец, равенство Свое показуя, к Единородному Сыну Своему тако глагола: сотворим человека; а того не рече – по образу Твоему большему, но рече – по образу Нашему, сим словом равенство Свое открывая, показуя Себе – Отца с Сыном единосущий образ; не рече же и того: сотворим человека по нашим образом, да не мниши многих Богов; но по образу Нашему единому. Яко же бо душа и тело не два человека, но един, тако и в Божестве Отец и Сын едино суть. Яко же человеку даде Бог ум, слово и дух; аще и разна суть именования, но един человек, тако и в Божестве аще и три Лица именуются: Отец, Сын и Святый Дух, но Един есть Бог. Каков Отец, таков Сын, таков и Святый Дух; три суть лица, существо же едино. Яко же бо зримое на небеси солнце от Бога во образ Святыя Троицы создано, три бо в нем суть вещи: круг солнца, луча светлая и теплота солнечная; тако и в Святой Троице – Отец и Сын и Святый Дух. Солнечный бо круг есть подобием Бога Отца; яко же бо круг солнечный не имать ни конца, ни начала; тако и Бог есть безначальный, яко же от круга солнечнаго происходит луча светлая и теплота, тако и Бога Отца родися Сын, происходит и Дух Святый; луча же, от солнца производимая и всю поднебесную просвещающая, есть подобием Бога Сына, от Отца рожденнаго и во всем мире явленнаго; теплота же солнечная от того ж круга вместе с лучею происходящая, подобием есть Бог Духа Святаго. Иже от того же Отца купно с Сыном производится предвечне. Яко же бо солнце тремя вещьми состоится: кругом солнечным, лучею светлою и теплотою, и не разделяется на три солнца, аще и всякая вещь свое собство имать – ино бо есть круг солнечный, ино лучи, а ино теплота, но не глаголются три солнца, но едино; тако и Пресвятая Троица, аще и три имать Лица: Отца и Сына и Святаго Духа, а Божеством не разделяется в три Бога, но един есть Бог. Егда Аврааму явися Бог у дуба мамврийскаго в трех Лицах, возвещает нам писание, возрев очима своими Авраам, и се три мужа стояху прямо ему и поклонися Авраам до земли и рече ко единому лицу: Господи, а не Господие аще обретох благодать пред Тобою, а не пред вами, не мини раба Своего (Быт. 18:3). Се смотрите: триех мужей зрит Авраам, беседует же аки ко единому глаголюще: Господи! аще обретох благость пред лицем Твоим. Позна бо той святый Праотец Единаго Бога в триех Лицах: тако и ты, человече, почитай Господа, втриех Лицах славимаго Бога, и яко же Авраам почти Господа трапезы учреждением, тако и ты почитай Бога верою и молитвою и странноприятием нищих, и благодарение воздавай Триипостастному Богу за сотворение твое честное. Понеже сотвори тебе Бог руками Своима по образу Своему и по подобию, и почти тя великими дарами, образом Своим и подобием и самовластием почтил тебе. Не сотвори бо тебе Бог древом или каменем, чтобы иный тобою владел, но ты сам собою владеешь. То тебе, человече, дар Божий, – понеже сотвори тя Бог на образ и на подобие славы Своея, пресвятаго, безгрешнаго, без скверны; дарова тебе душу пресветлую, разумную, невидиму, безсмертну, вечну, самовластну, многовидну, равну Ангелом, кроме тела, и постави тя царя и владыку в видимом сем мире. О человече! для тебя Бог сотворил таковый великий и дивный дом на житие твое, весь сей видимый мир для единаго тела видимаго и смертнаго. Такие дары Божии дивнии! Небо солнечное и прекрасно звездами украшенное покров тебе; солнце пресветлое светильник в дому твоем, а месяц часов меритель и показатель; ветры тя греют и прохлаждают, земля подножие ногама твоима и матерь добрая; тая носит тя на руках своих, тая от живота своего производит всякую сладость, яко мати млеко, все роскоши и сладости подает тебе, о человече, и не только хлеб, но и все сладкое и пожаданное души и телу твоему, всякия сладости света: сладость от древ всяких плодов, сладость меду и вина, сладость и цветов благовонных, а при том злато и сребро, камение драгое от земли; зверие кроткии и дивии родятся и служат животу; из тех зверей ризы богатому и нищему. О человече! И море тебе данник: от глубины своея дает тебе рыбы; а воздух птицы кроткия и дикия тебе посылает в подарок; яко царю земному, вся тварь тебе работает; овцы и волы вся, еще же и скоты польския, птицы небесныя и рыбы морския, вся покорена под нози твои, о человече суетный! За то ты благодари Творца своего и кланяйся Ему и разумною душею живи в дарех Божиих, чтобы в них не заблудил во тьму греха. Знай же то, яко огнь тебе служит, согревает и просвещает; а если без меры заживешь глупо, тогда тебе принесет шкоду (вред) и смерть. Также и вода напаяет, очищает и прохлаждает, а если ей дурно над мер заживешь (употребишь), то принесет тебе шкоду и смерть. Тож разумей и о иных родах земных, что над меру, то и грех. Невинно вино, проклято пиянство. Тоже разумей и о меду и о пияном напое: если употребишь без меры, то это смерть и слепота души и телу твоему. Знай же, человече, яко над всеми сими красотами и сладостьми поставил тебе Бог твой правителем, властителем и разумным строителем, чтобы ты ведал давать потребное потребному, чтобы вместо живота не подал смерти, вместо веселия плачь и вместо сладкаго горькое души твоей. Сладок в начале грех, но конец его горек в муках вечных. О человече! все в твоем самовластии лежит, но не все на пожиток души твоей; что над замер, то смерть. Красна, сладка жена добрая законная, початок добрый и конец радостный; от святых Отец и от церкви благословенно. Сладкий початок греха блудница, чужеложство, разбой, татьба, и иное грехопадение, но того початку сладкаго конец горький в муках вечных. О том сам себе, о человече, избирай самовластием своим; аще хощеши избыти муки, а желаешь быти наследник царства небеснаго, и ты твори добрыя дела: в начале имей смирение, а к тому пост и молитву; сими получишь царство небесное. А аще зле заживешь, то злое твое житие принесет тебе смерть, и ктому начнешь упиватися, объядатися и пространно жити, а пространное житие вводит в муку. Аще же обратишь самовластие свое на добрыя дела на пост и на молитву и на всяко воздержание, то сие самовластие введет тебе в царство небесное и в житие безконечное. Аминь.

9) Поучение в неделю 1-ю по всех святых

Всяк иже исповесть Мя пред человеки, исповем его и Аз пред Отцем Моим, Иже на небесех. Словеса суть Евангелиста Матфея, в зачале 38 положенная.

Яков сугуб есть человек, тако и добродетели сугубой него требует Бог. Человек бо от души и тела состоит, по образу и по подобию Божию сотворен и создан, словесен, разумен, смертен и безсмертен, живет и умирает, действен и недействен, самопроизволен, сугуб от души и тела, сугубы же имать и чувства душевнии и телеснии; душевных пять, еже есть: ум и смысл и мнение, мечтание и чувство; телесных такожде пять, еже есть: слышание, видение, вкушение, обоняние, осязание. Человек причастен естеству плотскому, душевному и духвному, и овогда убо человек живет плотски, о нем же речено есть: не пребывает Дух Мой в человецех сих, зане плоть суть; сущии бо во плоти Богу угодити не могут; овогда же человек живет душевне, о нем же речено есть: душевный человек живет душевне и не приемлет, яже духа; юродство бо ему есть (1Кор. 2:14). Овогда же живет духовне, той свободен сын от всяких пристрастии мирских и плотских, всегда же вышнее мудрование имать: елицы бо Духом Божиим водятся, сии суть сынове Божии. Аще же духом деяния плотская умерщвляются, жити будет (Римл. 8:13); аще же жити, то не себе, но Создавшему его. Жити же ни един сице благочинно возможет, аще не соблюдет, яже ко благоискуству ведут. Коего благоискуства сия суть степени, прежде всех подобает человеку веру содержати праву во Отца не рожденна, Сына от Отца рожденна, Духа Святаго от того же Отца исходяща, равночисленна, равномощна, соприсносущна превечна, спокланяема, сославима, собезначальна, верити во Отца, Творца суща видимым и невидимым. Сына, единородна Отцу, Им же вся быша, последи же плоть приимша от чистыя Девы Марии и пострадавшего человек ради, и воскресшаго и с плотию на небеса вознесшагося и паки грядущаго судити вселенную, – в Духа Святаго Господа животворящаго и глаголавшаго Пророки. И сия веруя и исповедуя, должен человек содержати канон жительства христианскаго. Что же есть жительство христианское? Сие есть, еже верити в Господа нашего Иисуса Христа и исповедати Его пред мучители, якоже Господь глаголет: всяк, иже исповесть Мя пред человеки, исповем его и Аз пред Отцем Моим. Иже на небесех, а иже отвержется Мене пред человеки, отвергуся его и Аз пред Отцем Моим, Иже на небесех (Матф. 10:32,33). И сих ради словес Евангельских, Нафанаил исповеда Христа Сына Божия быти, тако глагола о Нем: Равви, Ты еси Сын Божий, Ты еси Царь Израилев (Иоан. 1:49). И за сие Нафанаилово исповедание, Господь рече к нему: се воистину Израильтянин есть, в нем же льсти несть. О Нафанаиле! Аще веруеши о Мне, яко Сын Божий есмь, тогда болъша сих узриши; аминь бо глаголю вам, яко отселе узрите небо отверсто и Ангелов Божиих нисходящих и восходящих над Сына человеческаго (Иоан. 1:50,51). Тако и вы, любимицы мои, веруйте в Сына Божия и творите заповеди Его и сохраните вся таинства церковныя. Тайн убо церковных седьмь: 1) крещение, 2) миропомазание, 3) евхаристия, 4) покаяние, 5) священство, 6) супружество и 7) елеосвящение болящим. А аще кто вопросит, что есть таинство? Общий ответ: тайна есть служба или установление церковное, еже под некиим видом зримым приносит в душу вернаго незримую благость Божию, от Самаго Христа повеленное и чрез еже кийждо от верных благодать Божию приемлет, 1-я тайна – крещение. Что есть крещение? Ответ: крещение есть измытие и отъятие праотеческаго греха, чрез троекратное погружение в воду, глаголющу иерею словеса сия: крещается раб Божий во имя Отца и Сына и Святаго Духа. Аминь. 2-я тайна – миропомазание. Что есть миропомазание? Ответ: есть утверждение святаго крещения, еже крепка творит, вооружает крестившагося противу врагом душевным и телесным, наитием Святаго Духа. 3-я тайна – евхаристия. Что есть евхаристия? Отв. есть пребывание тела и крови Христовы под видом хлеба и вина в воспоминание страдания Христова и в вечное спасение наше. 4-я тайна – покаяние. Что есть покаяние. Покаяние есть сокрушение сердца о гресех, яже исповедает человек пред иереем, с намерением исправления. Но что реку о нынешних грехотворцех, понеже бо всегда грешат, а никогда не каются и покаяние свое отлагают время от времени, год от года и от юности до старости, а того не ведают, доживут ли до старости. Многажды бо на младых смерть приходит, а в чем смерть застанет, в том Бог и осудит; но лучше бы тебе, грешниче, ныне грехов своих каятися, а не отлагати покаяние свое. Мнози бо ныне так и творят: егда кого обидите, неправедно осудити, грех сотворити, то ныне творят, а егда же что доброе учинити – милостыню дати, Богу послужити, покаяние сотворити, то до утра отлагают, а заутра диавол приходит, яко тать хитрый и украдет от них обещанное: далеко год (время) покаяния отлагает, от утра до утра, за месяц, за год и на старость. О грешниче! лучше бы тебе ныне плакатися своих грехов, да не восплачешися тамо вечно. 5-я тайна – священство. Священство есть законное освящение простаго человека от епископа ко строению священных таин и к подаянию учения Христова спасительнаго. 6-я тайна – брак. Что есть брак? Есть законное сопряжение двух лиц общим изволением тех, иже входят в тую тайну, благословением же священническим. 7-я тайна, елеосвящение, есть помазание елеом, от священников освященным, в немощи, с молитвою здравия ради душевнаго и телеснаго.

И егда сия тайны сохранит человек, к сему да послушает и жития святых и да поревнует делом их. Како же ревновати делу их? Послушайте чада: они бо воздержахуся и постяхуся и мучахуся Бога ради, тако и нам подобает, братие, воздержатися от объядения и пиянства и от всякаго зла. Егда бо мучахуся святии, в то время были цари нечестивии и многобожнии, и имени христианскаго отнюдь слышати не хотяху; того ради идяху мученицы и страдаху за имя Христово. А в нынешнее время несть ни един, отвращаяй нас от веры нашей, и не имамы нужды мучитися. Токмо хощет от нас Бог, тако да живем, како есть чин христианский; и како угодно Христу, тако да ходим. Како же угодно Христу, Сам глаголет во Евангелии: аще любите Мя, заповеди Моя соблюдите и повеления Моя сотворите (Иоан. 14:15). Аще заповеди соблюдем, тогда будем достойни именоватися сынове Божии, глаголет Иоанн Богослов: елицы прияша Его даде им власть чадом Божиим быти, верующим во имя Его (Иоан. 1:12). Аще же преслушаем повеления Божия, тогда будем чада диаволя, яко же глаголет Иоанн Богослов: демон человекоубийца есть (Иоан. 9:44); сиречь диавол убийца есть человеков не токмо телесно, но и душевно. Благословеннии христиане! того бо ради именуемся христиане, да сотворим заповеди Христовы. Да имамы великое внимание и великий труд и терпение, зане Христос повелевает. Терпение в искушении спасает душу. Глаголет: в терпении вашем стяжите душа ваша (Лук. 21:19). Да воспоминаем жития святых, яже чтем на всякий день, како они угодиша Богу – смехом ли безобразным или празднословием угодили Богу? Ни како, но добрыми делами. Тако и нас учат молчанию и терпению и отстатися от злых дел. И святые отцы, мужие и жены, не с небес же снидоша, но такожде на земли родишася и имяху тело от земли, яко же и мы. Имеша и они искушения от демонов; но диавола побеждаху. Они бо не много ядяху, яко же мы; вином не упивахуся, яко же мы творим окаяннии; не предаяху они друг друга, яко же мы христиане предаем брат брата, не глаголю на смерть; а в нынешнее время, ей, брат брата не любит, друг друга не навидят, друг другу завидуют, биются, ратятся, о малых мерах земли тяжутся и головы свои полагают и тако умножилось не правды, что уже не стало правды; кой взаймы дал, той не может взять, а кой занял, не хочет платить. И елико творим мы христиане в яве и в тайне, святии отцы тако не твориша. – Что же творили? Они бо работали Богу всем сердцем, терпели мучения, искушения за Христово имя; а мы друг от друга не хочем мала слова потерпети, а подобает и нам друг от друга досады потерпети, по словеси Господню: претерпевый до конца, той спасется (Матф. 24:13). Аминь.

10) Поучение в неделю 2-ю по всех святых

Грядита по Мне и сотворю вы ловца человеков (Матф. 4:19).

Кто ныне от верных не удивится великому милосердию Христову, яко Сын Божий прииде, милости ради, от величества в смирение, сниде от небеси на землю и воплотися от Присно-девы Марии. А коея ради потребы родися, о сем молю Бога вочеловечшагося о помощи ко глаголанию, а вашу любовь о прилежное слушание.

Не от Ангел убо когда приемлет, но от семени Авраамова приемлет (Евр. 2:16), – словеса суть Апостола Павла. Две твари начальнейших Бог сотворил Ангельскую и человеческую; Ангела бо и человека учинил Бог на образ Свой и на подобие. О человеце тако глагола Сам Бог: сотворим человека по образу Своему и по подобию (Быт. 1:26). Человек бо есть образом Божиим, не для тела (т е не по телу), но для души; Бог бо тела не имать, но есть Дух. Тако глаголит Господь: Дух есть Бог (Иоан. 4:24). И Ангел такожде есть дух; тако молвит псаломник: творяй Ангелы Своя духи (Псал. 103:4). И душа человека есть дух; той же псаломник глаголет о людех: отъимеши дух их и изчезнут и в персть свою возвратятся (Псал. 103:29). Бог есть не видим. Ангел не видим, и душа человека не видима. Бог есть безсмертный, Ангел безсмертный, и душа человека безсмертна. Бог имеет разум и волю, и Ангел разум и волю имеет, и душа человека разум и волю имеет. Обе те две персоны отпали волею своею за гордость. Ангел бо хотел быти равен Богу, и тако о себе говорил: на небо взыду и выше звезд небесных поставлю престол свой и сяду на горе высоце, на горах высоких, яже к северу, взыду выше облак и буду равен Вышнему (Исаии 14:13,14); но за ту гордость ангела Бог сверже с неба до ада; тако молвит Исаия пророк: спаде с небесе денница, восходящая заутра; а далее молвил: ныне-же во ад снидеши (Исаии, 14:12,15). Такожде и человек хотел быти равен Богу. Егда диавол молвил человеку: будете яко бози, и на той час человек в раю съял овощь от древа законнаго, от коего не велено ясти, и Бог за то его выгнал, пишется бо: изгна его Бог из рая пищи делати землю, от нея же взят бысть (Быт. 3:32). А ныне милость Свою Бог оказал; падший бо образ человеческий на Себя взял Бог: Ангелу той милости Бог не показал, ангельскаго образа на Себя Бог не принял. Тако глаголет Апостол Павел: не от Ангел убо когда приемлет, но от семени Авраама приемлет (Евр. 2:16). Но в сем моем слове показати хощу вам причину, чего ради взял Бог на Себя образ человечь. Понеже бо не вси Ангели с небес спали, не вси погибли, еще их много на небе, а люди все упали за грех первородный; можем то разумети от причти Христовой: кий человек, имый от вас сто овец, и погубил бы едину от них, не оставит ли девяти-десяти и девяти в пустыне, и идет в след погибшия, дóндеже обрящет ю, и обрет возлагает на раме свои радуяся (Луки, 15:4,5). Кто есть той человек? человеком называется Христос. Тако псаломник глагола: изыде человек на дело свое и наделание свое до вечера (Псал. 103:23), и девять-десять овец значит девять чинов Ангельских, которых Христос оставил на небе, и пришел искати на землю одной овцы, заблудшей персоны человечей, которая за грех от Бога удалилась и блудила на свете. Тако молвил псаломник до Бога: заблудих яко овча погибшее, взыщи раба Твоего (Псал. 118:176). И нашел Христос тую овцу заблудшую и возложил на рамена, взял бо на Себе персону человека по глаголу Апостола Павла: Бог явися во плоти (Тим. 3:16). О любы превеликия, кто ныне не удивится милосердию Христову, яко Сын Божий прииде милости ради от величества во смирение, и сниде с небеси на землю, и зде пришел на земли не седит на едином месте, но преходит от града в град, и прииде на море галилейское, и виде два брата: Симона, называемаго Петром, и Андрея брата его, влагающа мрежи в море, беста бо рыбаря, и глагола има: грядита по Мне, и сотворю вы ловца человеков; она же, оставльша мрежи, идоша по Нем (Матф. 4:19,20), и паки рече Господь к Симону: не бойся отселе бо имаши человеки ловити (Луки. 5:10). О Петре! якоже прежде неразумныя рыбы ловил еси в мори, тако отселе человеки будеши ловити разумныя; да помянеши, коликия труды показал еси в море, и каковы беды претерпел еси от ветров морских в ловитве не разумных рыб; тако имаши подъяти беды многия в море сего мира, в ловитве человеков. Понеже бо мир сей подобен морю. О Спасителю мой, да не погрузит мене буря водная, да не пожрет мене глубина (Псал. 68:16)! Погружаемся и мы в водах многих; мир бо сей окаянный есть морем, тако его мнози переименоваша. Св. Амвросий говорит: кое море тако нагло и бедственно есть, якоже мир, толико не верен, толико мятежен, толико пропастей, толико нечестивых духов ветрами волняшеся! А св. Златоуст: различными грехами и многими искушении, якоже некиими волнами, бурится мир сей; о нем же чтем: сие море великое и пространное. По истине мир уподоблен морю, яко волнами бесовскими трясется, грехов ветрами смущается. И Дамаскин св. сетует: приидох во глубины морския, т. е. мирския страсти, и потопила мя есть буря многих прегрешений. Во истину, другое море мир; якоже бо в пучине морстей многия беды, тако в мире многия пагубы, погружения, нечаянный беды, как говорит Апостол: весь мир во зле лежит (Иоан. 5:16), в нем же житие есть смертно. Так описывает блаженный Августин: еда ли живот сей в мире видим? ни нарещи животом можем. Ветры бо его надымают, болезни изстощевают, огневицы изсушают, воздухи немощи исполняют, брашна отягчают, посты смиряют, глумления соблазняют, скорби изстаевают, нищета на земли бросает, младость возносит, старость клонят болезни, и злыя случаи мучат. По толиком же многом зле, смерть на конце стоит. Мы же, по среде толиких бед, скорбей и напастей мира сего, яко и мори суще, почто не ищем пристанища, почто еще суеты держимся, почто без сытости соленую пием воду пристрастия, почто пагубу нашу любим? Не слышим ли св. Назианзина проповедающа, что сей мир, его же любим, убегает, а смерть нас нищих прибирает; мир уже сам в себе засыхает, а в сердцах наших еще процветает; всюду смерть, всюду плачь, всюду погибель биет ны. Обаче мы, ослепленные похотию плоти, тыя самыя горести его любим, бегущаго гоним, и падающему помогаем, не могуще же помощи и сами с ним падаем. Сих словес послушающе и очима истину их в мире видяще, всякое ныне житейское отложим попечение, и ко пристанищу небесному Богу и Божией Матери скоро и усердно притецем. Она бо, Пречистая Богомати, всех нас спасает, кто к Ней прибегает, и яко же кто не вниде в корабль Ноев спастися не возможе, тако и под кров Пресвятыя Богородицы кто не прибегает, тот погибает. Но сице к Ней вси рцем: под кров Твой прибегаем Богородице Дево, моления наша не презри, и от всех бед избави нас едина чистая и благословенная. Аминь.

11) Поучение в неделю 3-ю по сошествии Св. Духа

Ищите прежде царствия Божия и правды его, и сия вся приложатся вам (Матф. 6 гл. ст. 33-й).

Душа человек земных тако прилне к земли, яко кийждо от своея похоти влеком и прельщаем в земле себе ищет утешения: инии копают себе в земле злато и сребро; а инии ту же землю орют до пота, яко да даст плод свой, а потом плод приносят в жертву богу-чреву объядением и пиянством; а инии человецы ищут земнаго червия, делающа шелки и мягкия ризы на украшение гордыни. Но не обретается в тех утешениях истинное утешение, яко земная обращаются в землю, прах и пепел. Повелевает бо Господь с небесе истиннаго утещения искати, а не земнаго. Тако глаголет: ищите прежде царства небеснаго и правды его, и сия вся приложатся вам; воззрите на птиц небесных, ибо ни сеют, ни жнут, ни в житницу собирают, а Отец ваш небесный питает и одевает их. Что печесся? Смотрите на кринов сельных, како растут, не трудятся, ни прядут, глаголю бо вам, яко ни Соломон во всей славе своей облечеся тако, яко един от сих (Матф. 6:26, 28, 29). Любимче! Аще бо траву тако Бог одевает, а тебе како не одеждит? И аще птиц так питает Бог и травы украшает, то како о человеке не промыслит сей промысл, аще кто на него истинною верою положит упование. Сам бо глаголет: возверзи на Господа печаль твою, и Той тя пропитает (Псал. 54:23). Ты же зачем даром печешися, что не имеешь где плодов твоих держати, и молвишь себе: что сотворю, яко не имам где собрати плодов моих? О, богачю! повинен ты то сборище давати убогим, а чрез убогих запроводишь до неба и в небе сохранишь сборище свое и сотворишь гумна свои. Но неразумно поступаешь, богачю, егда молвишь: раззорю житницы моя малыя и болышия созижду, и соберу ту вся жита моя, и благая моя, и реку душе моей: душе! имаши многа блага, лежаща намнога лета, почивай, яждь, пий и веселися. Что тебе отказал Бог на те твои слова? Отказал: безумие! в сию ночь душу твою истяжут от Тебе, а яже уготова, то кому будет (Лук. 12:17,20)? Любимче! Такожде и о теле достоит разумети, не яко украшати его пестротами и ризами мноценными и светлыми, целомудрием и добродетельным житием украшати. Ты же что о сем помышляеши? О человече! Егда видишь тело свое нагое сам на себя посмотри прилежно, и разумей, яко ничим же во плоти своей, ни красотою, ниже чистотою, ни чим же лучше убогаго и последняго человека; что же ризы успевают, ими же красишися? Глаголет Апостол: всяка бо слава человеку, яко цвет травный; изше трава и цвет ея отпадает (Иак. 1:10, 11) тако и человек без платья, яко трава без цвета. Возлюбленнии слушатели! каков человек? Святии отцы травою чеовека называют, а ты гордишися. О человече! почто о траве хвалишися; трава бо земная процветши посохнет, или острая коса подкосит, тако человека смерть косою подкосит. Траву скот зубами пояст или зверие вытопчут ногами, или лютая зима морозом поморозит, тако и смерть жестокая человека оружием своим посечет, и времени жатвы не дождет; ни мала, ниже стара не минет; человек бо яко трава, дни его яко цвет сельный, тако отцветет (Псал. 102:15), и изыдит дух его и возвратится в землю свою, в той день погибнут вся помышления его (Псал. 145:4). Кая помышления? т. е. здания, стяжания, купли, домостроительства и проч. Что же много суетится человек в жизни сей, а на сие не взирает, яко скоро грядет час и не замедлит смерть. О, черная сия жизнь! како ты вмале льстишь и до гроба льстишь? Мы бо надеемся зде вечно быти, а о смерти мы не помышляем. О человече, не надейся на сие житие; прииде бо смерть и тако молитися начнешь: о смерте, молю тя, потерпи мало, не видишь ли коней упряженых, exaти хочу с друга веселитися; не видишь ли и рабы у дому моего предстоят – друзья меня ждут? пощади младость мою, остави ми на малое время: дом еще не совершен, богатства не успел разделити, жена моя молодая, дети млады. О смерте, потерпи. Како мя не готова влечеши, что мя нага принуждавши к Судии предстати! Даждь повеселитися. О смерте немилостивая, не слышишь ты гласа молящаго тя, любви не имаши, дружбы не твориши. Друзья мои от жалости плачут, а недруги мои от радости скачут. Вчера приятели мои ордами за мною, а ныне при смерти ни единаго нет со мною. О смерте! ты смехотворцем отгноила не запертыя губы, токмо оставила у них голыя зубы; ныне плоть покры тело наше, а будет время, егда черви съедят тело наше, кости останутся, яко писано: земля еси и в землю отъидеши (Быт. 2:19). Всякое бо естество от коея вещи рождается, в тоже и обращается, отымеши дух и изчезнут и в персть свою возвратятся (Псал. 103:29). Егда умрет человек, то в прах претворится и червь тело его растлит, яко же молие ризу; оставляем зде отца и мать, братию и сестры, в их же место гной и смерть наследствуем, по глаголу Иова праведнаго: ад ми есть дом, и в сумраце лежание ми есть и постеля гной и смерть прозвах отца себе быти, матерь и сестру – гной (Иов. 17:13,14). О, колико есть скверный отец и какова есть мерзкая мать и коль гнусная сестра. Всякий человек зачат есть распадением плотскаго вожделения и от кровей нечистых, якоже глаголет Давид: в беззаконии зачат есмь и во гресех роди мя мати моя (Псал. 50:7). О, человече! егда ты жив сый, вши и глисты родишь, по смерти же паки родишь черви и мшицы. Жив сый измещешь кал и нечистоту, по смерти же растление и смрад. О человече! сего ради не хвалися природою твоею, и не гордися тленными богатствы. Посмотри на отца твоего и матерь, не вси ли гной, не вси ли персть? Истинно несть ничто же смраднейше мертваго человека, ни что же его страшнее. Аще бо кто живаго любляше и целоваше, а на мертваго едва кто посмотрети хощет, вси гнушаются. Не помогает богатство тамо и от смерти не освободит, от червей не возмет и от смрада не исторгнет. Помянем и того, иже прежде седяше на высоце месте в дому своем, и красоте своей; ныне же и той уничижен лежит и повержен, и в мал гроб затворен; иже бо в светлых храминах живяше и светлыми ризами облачашеся, ныне в гное и в прахе смердит; иже прежде плоть свою питаше различными брашны, а ныне тою же самою плотию червей питает. Се же слышавше, братие, убоимся червей, удержимся от объядения, возлюбим пост и тем вечный живот получим. Аминь.

12) Поучение в неделю 4-ю по всех святых

Господи! Отрок мой лежит в дому разслаблен люте стражда (Матф. 8:6). Словеса суть от сотника ко Спасителю реченная: у Евангелиста Матфея в зачале 25 положенная.

Сотвори Бог скотское естество, овых на пищу, а овых на работу. Якоже конь рождается на труд и на делание, или якоже птица рождается на летание, тако и человек на работу и на труд на сей свет происходит; вся дни живота его исполнены суть трудов и печалей различных, не может во дни, ни в нощи помышление его успокоитися. И что есть се? Ничто же ино, точию суета; несть ни единаго под небом, кроме (без) трудов и несть ни единаго под солнцем, кроме (без) скорбей, и несть ни единаго под луною кроме (без) печалей, и несть ни единаго под временем кроме (без) суеты времени. Что есть се? Ничто же ино, точию прекращение и протяжение временных вещей. Рече Еклесиаст: суета суетствий и вся суть суета (гл.1:2). Колико суть различны желания и похотения человеческая, толики суть различны дела и медление; но обаче едино есть скончание всем и едино совершение всем, сиречь труд и скорбь сердечная; а скорби и недуги попущает на нас Бог за грехи наша, да сими накажемся поминати Бога и прибегати к Нему. Яко же в Капернауме сотник прииде ко Иисусу и моляше Его, глаголя: Господи! Отрок мой лежит в дому разслаблен люте страждет; и глагола ему Иисус: Аз пришед исцелю его, и исцеле отрок его в той час. Так и ныне, аще бы не сия узда скорбна, беда от Бога бы не вложена (была) во уста роду человеческому грехолюбному, тогда б людие текли, яко кони свирепы на беззаконие всякое. Сего ради Бог вложи недуги в естество наше, да удержит сим течение наше от греха. О сих бо глаголаше Пророк: броздами и уздою челюсти их востягнеши не приближающихся к тебе (Псал. 31:9). Многажды бо велия нужды и многия беды понуждают человеков приходити к Богу и памятовати о Нем и прибегати к добродетели. Мнози бо в сластех мира сeго, в добре и в свободе забывают Бога, егда же приидут на них скорби и напасти, тогда они обращаются к Богу, яко и той князь, иже принужден приити до Христа смертию дщери своея; жену же кровоточивую многолетний недут привлече ко Христу. Сия жена сущи в течении крове лет дванадесятих, яже врачем издавши все имение, не возможе ни от единаго исцелитися, пришедши ко Христу, созади прикоснуся края риз Его, и абие ста течение крови ей и исцеле от недуга своего (Матф. 9:20, 22). И что глаголати много: все бо житие человеческое во искушениях, си есть, в различных бедах и скорбях, по писанному: беды в реках, беды от разбойников, беды от сродник, беды от язык, беды в градех, беды в пустыни, беды в мори, беды во лжебратии (2 Кор. гл. 11:26). Вне и внутрь беды, вне уду брани, внутрь уду страха (2Кор. 7:5). И яко же в мори возследствует волнение волнению, буря за бурею и ветр за ветром, тако и в житии человеческом возследствует беда за бедою, скорбь за скорбию, искушение за искушением; того ради глаголет Иов: не искушение ли есть житие человеку на земли (Иов. 7:1); аки бы рекл: в том то едином и стоит жительство градское и насельников земленных, еже быти в различных бедах и напастех, и несть человека на земли без печали, и несть человека без искушения и болезни. Обаче во всех тех Апостол повелевает благочестивому человеку не унывати, но радоватися советует: всяку, рече, радость имейте, егда во искушения впадаете (Иак. гл. 1, ст. 2). Искушения зде, Апостол Иаков глаголет быти: всякия скорби, печали, беды, гонения, озлобления, болезни и злоключения, обнищания, страдания бываема или от Божия попущения, или от злобы человеческия, или от естества, или от случая, или от вражияго навета; не глаголет же кое искушение едино, но искушения различна. И по Иову искушение есть житие человеку на земли. И мы убо видим, како людие искушаются в житии сем. Все человецы в суете трудятся: ходят бо в пути не проходим, преходит чрез горы, прескачут холми, превосходят камение, размеряют землю, в долины ступают и в глубины, прозирают рвы и разселины глубокий и глубину морскую и непостоянство рек, темности и чащи лесныя, пустынь беспутия и даются на ветры, и нападения и великия нужды терпят, голод и холод, и приемлют озлобления от громов и молний, дождя свыше и болота снизу и иная многая злострадания приемлют. Суетни сынове человечестии: инии бо куют, инии льют златыя орудия, гривны и мониста, перстни и сребрянныя орудия, чаши и бражины, стоны и потиры, древа тешут, каменье роют, секут и скоблют древеса всякия, прядут и ткут поставы различные, кроят и шьют ризы многоценныя, строят палаты каменныя и созидают домы многокровные, насаждают винограды и нивы орют и вертограды исправляют, пищи всякия приготовляют, мельницы хитростию составляют, рыб множество уловляют, а инии крадут и брани составляют и сами ся убивают, и сим подобных вещей множество: имения собирают и притяжания умножают и богатство во всем получают и славу от человек восприемлют и власть над всеми приемлют. Вся же сия ни что же прочно, точию труд и скорбь сердечная, якоже и псаломник глаголет: убо образом ходит человек, обаче всуе мятется; сокровиществует, не весть кому собирает (Пс. 38:8), а егда умрети ему, не возмет вся, ниже снидет с ним слава его, яко душа его в животе (Пс. 48:18). Мир сей аще обещает и много, но во гроб пошлет нас убого. А аще ли сего в веру не приемлеши, и ты послушай Апостола Павла глаголюща: видимая убо временна, невидимая вечна (2Кор. 4:18). Что же видимая временна? что же на сем свете нам видимо? строение каменное царския палаты или прекрасные дворы; сие кажется крепко и долговечно а постояв разсыплется; злато или сребро и камение драгое будет же тленно; то временная. Невидимая вечна. Что же не видимо вечно? Царство небесное не видимо вечно. Глаголет Апостол: яже око не виде и ухо не слыша и на сердце человека не взыде яже уготова Бог любящим Его (1Кор. 2:9). Такова красота царства небеснаго, яже ни на ум человеку не приидет. Молюся вам любимицы мои, еже бы нам получити царство небесное. Чим же получити? 1, даяти ясти алчущим, 2, даяти пити жаждущим, 3, приимати странныя, 4, одевати нагия, 5, посещати немощный, 6, в темницу ходити, 7, споследовати, во еже погребати мертвыя. Сими добродетельми получим царство небесное. Аще бо мы милость сотворим, то и нам сотворит Бог милость; еже буди всем нам получити. Аминь.

13) Поучение и неделю 11-ю по всех святых

Господи! потерпи на мне и вся ти воздам (Матф. 18:26). Словеса суть Евангелиста Матфея, в зачале 77 положенная.

Царствующий Пророк Давид тако вещает: уповающаго на Господа милость обыдет, а грешному многи раны, грозит псаломник (Псал. 31:10). Многи раны грешному не точию в нынешнем, но и в будущем веце. Безчисленным грешник подлежит ранам, не бывает бо грех без казни; от начала грехи казнены быша: Адамов изгнанием, Евин печальми, исполинов потопом, Содомлян огнем, Египтян многими скорбями, Израильтян грех работою казнен; а ныне мы видим, как грехотворцев мучат по гражданским законам: деревьем бьют, иных на виселицы вешают, иных секут, а других огнем жгут, иных каменьем бьют и клещами ребра ломают, батожьем стегают, иных цепями смиряют и в тюрьмах затворяют, голодом уморяют, иных потопляют, а с иных кожи с живых сдирают, прочих разсекают, а иных живых погребают. О немилостивый суд! О страшное мучение! А и сами согрешаем мы, коль много казни на ся влечем: междоусобный брани, смертноносныя раны, нашествия иноплеменник, и все то нам от грехов наших приходит. И что сотворим грешнии? како спасемся? Спасемся послушанием Исаии пророка добраго совета, тако глаголюща: укрыйтеся в мало елико, дóндеже мимо идет гнев Господень (Ис. 26:20); но где имамы укрытися от находящих на нас ран? Ни где инде, разве под кровом онем, под ним же крыяшеся Давид, иже тако глаголет: сокрый мя в крове своем, в день зла моего, покрый мя в тайне крова своего (Псал. 26:5). И где сей покров обрящем, разве у пречистыя и преблагословенныя Девы Марии. В сем то покрове Давид сокрыся, егда гоним от Авессалома восхождаше восходом на гору Елеонскую (Царств 2, гл. 15:30), а та гора прообразоваше премилосердую Госпожу нашу. Слышателие! Аще точию сень Мариина можаше в день зол сокрыти Давида, то кольми сама Она, аще к Ней прибегнем, сокрыет нас в крове Своем. Та глаголет о Себе, усты Духа Святаго, у Иисуса Сирахова: Аз яко мгла покрых землю (Прем. сына Сирах, гл. 24:3). Но, о дражайшая Госпоже! Почто тако худей вещи уподобляешися мгле? Несть ли Тебе солнца, луны и звезд во именование? Мгла ж кую имать похвалу и красоту, яко ею зватися не гнушаешися? Мгла егда над землею умножится и покрыет землю, тогда вся звери от ловцев целы суть; никто же может их ловити. Се бо тайна, почто Дева наречеся мглою; от ловящих бо крыет нас. Мы грешнии, ради нашего безчеловечия, есмы скоты или звери по Златоустову разсуждению; чреву угождаем, яко медведи; плоть утолстенаем, яко же меск; памятуем зло, яко верблюды; хватаем, яко волки; гневаемся, яко змии; угрызаем, яко скорпии; хитры, яко лисицы; злобы яд носим, аки ехидны, таковых-то нас зверей постигают различии ловцы: а) постигает нас праведный гнев Божий, мщая вся начинания наша злая, Бог отмщений, Господь Бог отмщений; б) постигают ны и беззакония наша, якоже глаголет: постигоша мя беззакония и не возмогох зрети (Псал. 39:13). Чим же избыти грехов и беззаконий? Святым покаянием, любве исполнением, милостыни творением и оставляти долги должником. Яко же бо царю некоему, восхотевшу стязатися о словеси с рабы своими, приведен был к тому царю един должник, а должен тмою талант; не имущу же ему отдати, поводе Господь продати жену его и чада и вся елика имеяше, и отдати. Пад убо раб той кланяшеся ему, глаголя: Господи! потерпи на мне и вся ти воздам, милосердовав же Господь раба того, прости его и весь долг отпусти ему (Матф. 18:23–27). Тако и вы отпущайте долги должником вашим, за то отпустит и вам прегрешения ваша Отец небесный; аще ли вы не отпустите кождо брату своему от сердец ваших прегрешения их, то не отпустит и вам Бог согрешений ваших. Аще бо мы не помилуем, сами не помиловани будем. И за та немилосердия наша казнит нас Бог бедами и скорбями, голодом и войнами, якоже глаголет чрез Моисея: Аз Господь ваш за беззаконие ваше сотворю вам сице: приставлю на вы не имение, сиречь нищету и раны, и коросты, вреждающи очи ваша и душу вашу сушаща, и всеете вотще семена ваша, изъядят бо я супостаты ваша, и простру лице Мое на вас и падете пред враги вашими и побегнете никим же гоними, – един погонит вас сто, а от ста погибнет вас тма, вложу страх в сердца ваша и падут трупие ваша на снедение птицам небесным и зверем земным; из града, из коего выходила тысяща, в том останется сто, а из коего выходило сто, в том останется десять; а се град цел, за утра пусть пребудет и соберутся жителие из пяти градов во един, построят домы да не удастся жити (Второзак. гл. 28 и 32)183. А сия вся злая попустит Бог за грехи наша. О горе вам, окаяннии человецы, понеже непрестанно согрешаете, учению не внимаете, тако бо учит Предтеча: покайтеся! А грехолюбец отвещает ноне я млад, еще успею покаятися в старости, Бога умолю и все доброе могу в старости исправити; а ноне я млад, покушаю сладко, напьюсь пьяно, поживу славно, платей изношу красно, и всего наслаждуся и довольно навеселюся; уже в старости однако (т. е. все равно) каятися и Богу молитися; в старости мене Бог помилует. О человече! не надейся на младость, как еще доживешь до старости; послушай Господа глаголюща: яко не весте дне и часа, когда приидет (Матф. 24:42) кончина, сиречь смерть, а смерть грешником люта. О грехотворче! убойся, аще яси и пиеши и без боязни грешиши, али ты без смерти будеши? Не прельщайся, от смерти бо не уйдеши. А когда уже смерти не миновати, ино лучше ради Бога смерть прияти и Богу работати. Что есть Божия работа? То есть: молитва, смирение, кротость, долготерпение, благоутробие, мир, безгневие, то есть Божия работа. А диавольская работа? Гордость, лихоимание, блуд, зависть, объядение, гнев, ленивство, то есть диавольская работа. И вы, братие, от грехов блюдитеся и Богу работайте – тем спасение получите. Аминь.

14) Поучение в неделю 12-ю по сошествии Св. Духа

Слышав же юноша слово, отъиде скорбя, бе бо имый стяжания многа. Словеса Апостола Матфея, зачало 79 (Матф. 19:22).

Живущий на сем свете кой человек много яст и много пиет, той человек не много будет на сем свете жити; желудок бо многими пищами наполненный, не может того изгноити и от тех пищей раздымается и болит, а потом болезнь от желудка и по всему телу расходится и душу из тела выгоняет; который же людие мало едят и не много пьют, те долго на свете живут; таковии людие убоги, которые мало земных бытностей имеют, долго живут на свете; а богатии людие, которые много богатства имеют, не могут долго на свете жити. Они бо часто пируют, ядят много и пьют довольно. Таковый был оный богач, который облачашеся в порфиру и виссон, веселяся на вся дни светло. Не могут и для того богатии на свете долго жити, они бо печалятся, чтобы животов своих не издержати. Такий был оный юноша, которому молвил Христос: иди продаждь имение твое и даждь нищим. Послышавши он те словеса, отъиде скорбя, бе бо имый стяжания многа. Еще и для того богатии не могут долго на свете жити, они бо печалятся, что не имеют где богатства своего держати. Такий был оный богач, которому уродися нива; тогда он печалился, что не имел где плодов собрати и молвил себе: что сотворю, яко не имам где собрати плодов моих (Лук. 12:16,17). На остаток, и для того не могут богатии долго на свете жити, они бо от Бога удаляются, а служат мамоне, то есть богатствам своим. Пророк о них глаголет: ибо удаляющиися от Тебе погибнут (IIсал. 72:27). Возлюбленнии! по сему пророчу слову уже богатии людие богатства свои вместо Бога имеют, которым богатствам служат, а Бога, сотворителя своего, покидают. Тако рече Христос: не можете Богу работати и мамоне (Матф. 6:24). И аще се тако, то уже богатии людие суть идолопоклонниками, понеже идолопоклонницы служили болванам золотым и серебренным по глаголу Псаломникову: идолы язык сребро и злато (Псал 113:12). Так людие богатии лакомы; егда служат злату и сребру своему, то болванам златым и сребря иным служат, и для того богатии не могут долго на свете жити. Яко же бо за идолопоклонство казнил Бог смертию Израильтянов, выкорепял их скоро из света, тако и теперь идолопоклонников людей богатых скорою смертию Бог наказует и скоро из света их выкореняет. Что же имеете чинити богатии с богатствами вашими? Богатство бо ваши до неба вас не допущают. Понеже вы богатства свои держите на непотребныя вещи, на объядение и пьянство, и на нечистыя блуды, того ради богатства ваши до неба вас не допущают; а те же богатства ваши и от муки вас свобождают, аще начнете милостыню творити. Того ради, о богатии, давайте от имений своих людем убогим, помогайте им милостынею святою. Послушайте Иоанна Крестителя, который и вам глаголет: имеяй две ризе, да подаст не имущему и имеяй брашна, такожде да творит (Луки. 3:11). А чтобы вы охотнее милостыни убогим давали, покажу в нынешнем слове, каковыя нам пожитки (польза) милостыня приносит. Пожиток нам чинит милостыня, которую егда даем убогим, грехи наша заглажает и все прощает. Тако молвил Пророк Даниил до Навуходоносора царя Вавилонскаго: царю, совет мой да ти угоден будет и грехи твоя милостынями разсыпли (в Библии: искупи) и неправды твоя щедротами убогих (Дан. 4:24). Отдаст нам Бог оную на страшном суде, егда вси людие возстанут из мертвых и станут пред престолом Христовым и начнут отвещати, как на свете жили, аще зле или добре. – О сем рече Христос: егда твориши обед или вечерю, не зови другов своих, ни братии своея, ни сродник твоих, ни сосед богатых, – егда и тии тя такожде воззовут и будет ти воздаяние. Но егда твориши пир, зови нищия, маломощныя, хромыя, слепыя и блажен будеши, яко не имут ти что воздати, воздастжетися в воскресении праведных (Лук. 14:12–14). Пожиток и то есть милостыни, которую егда даем убогим никогда сами неоскудеем. Дознала того едина вдовица в Сарепте Сидонстей, которая во время глада великаго кормила Пророка Илию, имеючи только горсть муки и фляжку масла; обаче тем не оскудела ни мука в сосуде, ни масло во фляжке не умалилося, но всегда пребывало, и до того времени, егда и глад мину (3 Царств. 17 гл.). Тако и теперь, кто людей убогих кормит и поит и одевает и дает им все, что они требуют, той никогда не оскудеет, всегда у него будут всякия богатства прибывати, прирастати и приумножатся. О сем бо глаголет Соломон: иже дает убогим, не оскудеет пожиток его и которыя богатства даем убогим, те богатства свои чрез убогих до неба отсылаем, и в небе сохраняем. Тако рече Христос: сокрывайте же сокровища свои на небеси, идеже ни червь, ни тля тлит, идеже татие не подкопывают и ни крадут (Матф. 6:20). И инде глаголет: иди, продаждь имения твоя и даждь нищим и имети имаши сокровище на небеси (Матф. 19:21). А егда скончаем житие наше временное, души наша до неба пойдут, где имения наша будут, яко же рече Христос: идеже будет сокровище ваше, ту будет и сердце ваше. За чим даром печалишися богачю, что не имевши где плодов своих держати и молвишь: что сотворю, яко не имам где собрати плодов моих. О богачю! Повинен ты то сборище давати убогим, а чрез убогих запровадишь до неба и в небе сохранишь сборище свое и построишь гумна свои. Но не разумно поступаешь богачю, егда молвишь: раззорю житницы моя малыя и большая созижду и соберу ту вся жита моя и благая моя и реку души моей: имаши многа блага лежаща на лета много – почивай, яждь, пий и веселися. – Что же тебе отказал Бог на те твои слова? Отказал: безумне, в сию нощь душу твою истяжут от Тебе; а яже уготова, то кому будет? (Луки. 12:17–20). Не разумно поступил и той богач, которому Христос молвил: иди, продай имения своя и роздай нищим. Послушавши он те слова, прискорбен был, – имел бо стяжания многа и от того Христос сказал: удобнее велблуду сквозе иглине уши пройти, нежели богатому в царство Божие внити (Лук. 18:25). Не разумно поступил и той богач, который одевашеся в порфиру и виссон, веселяся на вси дни светло, а Лазарю убогому крох, падающих сo стола своего, не приказал для пищи дати (Лук. 16:19–31). О богате, на твоем бо гробе такое написание: умре же богач и погребоша его; во аде возвел очи свои сый в муках. О немилосердый богачю! Теперь понимаешь себе и каешься, уже не в час, уже по смерти нашел, что, на свете живучи, не хотел милосердия убогим показати; сам жил в дому пресветлом, а Лазаря в гною пред вратами лежащаго не приказал в дом свой пустити; ты одевался в порфиру и виссон, а не хотел одеждою последнею Лазаря нагаго одети; сам кушал сладкия пищи, а не приказал крохами со стола твоего Лазаря голоднаго накормити; ты упивался разными напоями, а не велел водою жаждающего напоити Лазаря; сам слушал музыки веселой, на вся дни веселячись светло; а Лазаря нищаго не только добром, но и словом добрым не хотел потешити и увеселити; ты имел слуг довольно, а Лазарю убогому и хворому! не дал ни единаго на послушание, чтобы ему послужил в убожестве его и в болезни его. А се теперь, немилосердый богачю, в муках вечных прибываеши. Уже ты и сам милосердия потребуешь (требуешь) и молишь Авраама: Отче Аврааме! Помилуй мя и посли Лазаря, да омочит конец перста своего в воде и устудит язык мой, яко стражду в пламене сем. Но и тебе, яко немилосердому, никто не хочет милосердия показати. И Авраам тебе отказал: чадо, помяни, яко восприял еси благая твоя в животе твоем; и Лазарь такожде злая, ныне убо Лазарь утешается, ты же страждеши. Возлубленнии! блюдитеся, чтобы не поткало (т.е. непостигло) и нас тое, что поткало тых богачей немилосердых; будете милосерды на людей убогих, давайте им милостыню от имений своих, помогайте им в бедах их, посещайте в болезнях, свобождайте темничников; за то поможение сами от Бога помиловани будете в день страшнаго суда, по глаголу Псаломникову: блажен, разумеваяй нища и убога, в день лют избавит его Господь (Псал. 40:2). Аминь.

15) Поучение в неделю 13-ю по пятидесятнице

О пользе душевной и о кончине мира сего. Глава 24-я Ев. Матфея.

Евангелист Матфей тако глаголет: Седящу Иисусу на горе Елеонстей, приступиша к Нему ученицы Его особь, глаголюще: Учителю, рцы нам, что знамение Твоего пришествия, и когда кончина века сего; рцы нам Всевидче, како научим вся языки преславному твоему пришествию веровати. Господь же рече им: блюдите, да не прельститеся, мнози приидут во имя Мое глаголюще, яко аз есмь Христос: блюдите да никтоже вас прельстит, (говоря) яко (что) время близь есть, и ныне уже наста и все видим. Исполнения бо ради его беззакония изсякнут любы многих и проповестся Евангелие царствия по всей вселенней во свидетельство всем языком, и тогда будет кончина. И видим, яко уже несть места, в нем же не проповедася Евангелие. Прочее же ожидай конца и нечистоты запустения, сына погибели, сиречь антихриста (2Солун.2:3), его же ради будет велия скорбь и ненависть в человецех и в роде том, который при антихристе будет. Друг другу завидети начнут, и по зависти друг друга предавати. Предаст же и брат брата на смерть (Маргарит), якоже и Каин уби брата своего Авеля; возстанут и чада на родителей и убиют их, якоже сотвори Авессалом сын Давидов, возста на отца своего Давида со оружием, изгна из Сиона града, жены отчи посрами; подобно сему Ипполит, папа Римский, глаголет: родителие чад возненавидят, и чада на родителей возложат руки и брат брата придаст смерти, а ближний ближняго возненавидит; не только сие, но и дети начнут гнушатися родителей своих; глаголет Михей пророк во главе 7-й184: понеже сын не чтит отца, дочь матерь свою и во всех ненависть и друг другу непокорение. А мню сему сбыватися учителей ради неучения. Учители тех времен будут яко волки, лицемеры, пияницы, не пекущеся о божественных книгах, но о светлых ризах станут пещися о имени, о скоте, о конех, о селах, о поварах, о красных трапезах сластолюбия, ядением и питием исполнены (Маргарит). Таковы будут учители тех времен. Чернцы их (т. е. времен) будут злобницы и празднословцы и мирская возжелают; богатии не милосердием одеются, князи их не праведни; восплачутся сироты и вдовицы, не имущи помощника и заступника, занеже князи не милостивии и властие не жалостливии; убогому не станут помогати, сильнии щедроты отложат, судии праведное от правды возмут, мздою ослепятся, и что глаголю о человецех, – и самыя стихии своего чину отвергнутся; трусы во всяком граде, голод во всякой стране, громове со страшными молниями, домы и села пожигающе; темни ветры землю и земная всеплодия и море безмерно смущающия; морский шум и молва нестерпимая на душах человеческих будут, и знамения в солнце и луне и звездах. Кая знамения? О знамениях пророчества Исаия, тако глаголет: звезды бо небесныя и орион и все украшение небесное света не просияет и померкнет солнце возсиявающее и месяц не даст света. И заповем всей вселенней зло (Исаии 13:10, 11). Сего ради бдите и молитеся, да избавитеся от напастей сих. Тогда поколеблется небо и земля потрясется из дна своего ярости ради и гнева Господа Саваофа, в день егда приидет ярость Его (ст. 13). Аз Господь Бог ваш за беззаконие ваше сотворю вам сице; и аще сам не накажется, рече Господь, но пойдете ко Мне в неправде185, пойду и аз противу вам в ярости Моей и погублю вы Аз, грех ради ваших. И наведу на вы мечь, и вбегнете в грады ваша, и пущу на вы смерть (Лев. 26:13,16,23,24,23), и наложу на вас руку мою со гневом и лице отвращу, и очи свои возведу на вы с яростию, и отрину вас от сердца своего, и ктому не помилую вы, и возопиете ко Мне и не услышу моления вашего и восколеблетеся, яко пиянии и не почиет на вас Дух святый, глаголет Господь, и не отыму от вас гнева ярости Моея и не помилую; понеже ходите в неправде, и Аз пойду противу вас. Тако глаголет Господь: умножися лукавство ваше, всяку неправду возлюбили есте и за неправды ваши сотворю вам небо медяно, и землю железну, дам на землю вместо дождя песок и пепел с небесе снидет на тя, дóндеже сокрушит тя и погубит тя (Второз. 28:23,24). И не даст земля плода своего, а небо не даст росы своея и опустеет земля ваша, якоже рече пророк Аввакум: солжет дело маслинное и поля не сотворят яди (Аввак. 3:17). Семян много изнесеши на поля, а мало внесеши, яко поядят я прузи, и винограды насадиши и возделавши, а вина не пиеши и не возвеселишися от него, яко пояст я червь; аще кто посеет сто мер, едину меру соберет (Второз. 8:38,39), и будут голоды часты во странах их, и туги языком, и наведу на землю их птицы, прузи и гусенницы, и те поядят остаток плодов ваших, и еще ктому пошлю на них песия мухи, и те начнут ясти плоти ваши и пити кровь детей ваших, и растерзают зеницы младенцев ваших, и будет в них горько рыдание; единым будет мертвым и нерожденным легко. О, горе всем, слышащим сия. Побиет тя Господь не имением, сиречь нищетою, молниею, зимою и варом, убоем и ветры тленными и бедностию (Второз. 28:22), и от голоду почернеет плоть ваша, яко мертвеческая, и ризы ваши многоценный и златыя на путех имут лежати, и не будет кому имати. Красота девиц ни во что же будет. В то время девица взыщет себе жениха, а жених невесты своея не посягнет; жена мужа, а муж жену на суд поведет, якоже Господь глаголет: приидох разлучити человека на отца своего, дщери противу матери своея (Матф. 10:35). Такое беззаконие будет, мати дщерь свою отдаст на блуд, а мню сие и ныне творится186. Грехов ради наших будет туга велика и попечения. Тогда же людие насытятся человеческия плоти, дети снедят отцев и матерей своих, а отцы и матери снедят плоть сынов и дщерей своих, занеже исполнися земля беззакония, оставиша свет, а тьму возлюбиша и вся лета своя в пустоши изжиша, в объядении и пьянстве и в песнях бесовских, и смесех не подобных и не будет такова места, идеже не будет мертвеца и не будет кому погребсти плоти ваша (Второз. 28:26). Тогда не заступит князь людей и люди князя, и тогда не сжалится отец над сыном и сын отца не пожалеет, брат брата не избавит, и не помилует мать дочь и дочь матери своея. Слава и богатство ни во что будут; тогда жалостно восплачутся цари, князи и вельможи, умильно глаголюще, и горько рыдающе: О, горе нам! горе нам! Братие возлюбленнии! Тако глаголет Апостол: о летех и временех не требе есть вам писати, сами бо вы известно весте, яко день Господень, якоже тать в нощи, тако приидет (1Сол. 5:2); сего ради бдите, яко не весте дня и часа, когда будет кончина. Аминь.

16) Поучение в неделю 14-ю по пятидесятнице

Друже, како вшел еси семо, не имый одеяния брачна (Мф. 22:12).

Царствующий пророк Давид тако учит: удалися от зла и сотвори благо (Псал. 33:15), но человеческий род вельми уклонителен на зло, вси бо уклонишася вкупе, неключими быша (Псал. 13:3). Якоже конь тучно упитан свирепо бежит, тако и грехолюбец грехами не сыт. И якоже человеку повседневная пища – хлеб, тако грехолюбцу – грех, якоже поет Дамаскин: от юности моея мнози борют мя страсти, т. е. мнози преодолевают меня грехи.

Любезные слушатели, ежели тако свята мужа преодолевают страсти, то как мы спасемся от греха! Всегда нас преодолевает зло, и прелюбодеяние, нечистота, студодеяние, идолослужение187, вражды и убийства, якоже глаголет Апостол: не бо еже хощу благое сие творю, но еже ненавижу зло сие содеваю по злому моему обычаю; уже бо не аз сие творю, но живущий во мне грех (Римл. 7:19, 20) по глаголу апостола. Человек от юности прилежит на лукавая, якоже и сам Бог глаголет (Быт. 8:21). Человек некий имея два сына и рече юнейший отцу: отче, даждь ми достойную часть имения своего. Отец же раздели има имение; не по мнозех днех, собрав имение свое, меньший сын иде в страну далеку и тамо расточи имение свое, живя блудно (Лук. 15:11–13). А той злый обычай и ныне есть в мире. Егда человек приидет в возраст, то сперва приищет друга себе такого, каков сам: сначала подружатся, а потом начнут чинити советы, и все друг ко другу плотским люблением распаляются, а не духовным, и в той любви научатся пьянству, а инии скакать и плясать; а за тем гордитися, лихоимствовати и блуд творити, а блудником претит апостол: блудником и прелюбодейцем судит Бог (Евр. 13:14), и сам Господь запрещает: друже, како вшел еси семо, не имея одежды брачныя; какое одеяние брачное? Послушай Евангельских слов, яже рече Господь: уподобися царствие небесное человеку царю, иже сотвори брак сыну своему, и зва многи, и посла рабы своя призвати званныя на брак, тако глаголя: рцыте званным, се обед мой уготован, тельцы упитанныя закланы, вся готова, приидите на брак. И егда изготовися брак (брачный пир) возлежащим, вшед царь видети возлежащих, и виде ту человека, не имуща одеяния брачна, и глагола ему: друже, како вшел ecu семо, не имея одежды брачныя; он же умолча, понеже не имый чистаго жития. Такова царь повелел связати руце и нозе и ввергнути во тьму кромешную (Матф. 22:2–13). О, любители блуда и нечистоты! Нечто и вам речем. Егда кто возлюбит жену или девицу, тогда вы вечера прогуливаете и ночи не спите, мыслите только о той девице, како бы ея уловити, ово сводницами, ово обещанием даров, иные злохитрыми лестьми, иные красотою своею, а иные смехотворными беседами и прочими коварными лестьми прельщают, а напоследок злыми чародеяниями своими. О, не сытая мерзость! понеже бо всякая нечистота не точию сердце помрачает, но и видение лица погубляет... Слыши, что Апостол глаголет: бегайте блудодеяния, всяк бо грех его же аще сотворит человек кроме тела есть, а блудяй в свое тело согрешает (1Кор. 6:18). Что же потом последует за блудом? Болезнь и скорбь, за скорбию смерть и мука вечная. Но сего речения не мнози боятся, но более к блуду тщатся; всяка им скорбь безскорбна, беда безбедна, стрелы им не остры, огнь холоден, горесть им сладка и ни какия им препоны не помешают, только бы желаемое получить. Не зазрите моего слова, любимцы мои. Истинный свидетель Иаков патриарх, не робил ли седьмь лет за девицу Рахиль; а ныне едва не вси от Бога отступили, ови гордостию и лихоимством, ови прелюбодейством, завистию и злым пьянством. Сии вси диаволу служители и вси уклонишася вкупе и неключими быша. Вси уклонишася от смирения в гордость, от милостыни в лихоимство, от любви в ненависть, от воздержания в объядение, от трезвости к пьянству. Что нанесе праведному Ною пьянство? Наготу; от безумнаго сына Хама осмеян. Пиянство Лота в блуд введе: со дщерьми смесися; а ныне то и лучшее дело в старых и молодых, лишь бы напитися до пьяна. Что мерзостнее пьянаго человека? Хочет утаитися, будто не пьян, а лежит, яко мертв; ничтоже бо сквернее пьяницы, из уст бо его смрад зол исходит, разслабление тела и самаго себя не владение, из очей слезам истечение, рукам дрожание. Пьяный много обещает, тайн не соблюдает, разум и красоту погубляет, и что ино от пьянства бывает, точию брани и прекословия, еще же безстыдство и в словах не удержание. От пьянства и чревоугодия многая злая в мире сем быша. Адам за снедь с Евою веселый рай погубиста; люди израильстии в пустыни ядоша и насытишася зело, но еще брашну сущу во устех их, и гнев Божий взыде на ня и уби множайшая их (Псал. 77:29–31). Вопросите-ли мя, чесо ради уби? На сие Моисей Боговидец отвещает: седоша людие ясти и пити и восташа играти (Исх. 32:6), еже есть тельцу играти, честь Божию ему воздавати, а за то их играние гнев Божий уби. Пьянством мнози злая пострадаша, и числом сказати не возможно. Олоферн, страшный воевода пьяный, Иудифою обезглавися. Якоже глаголет приточник: не буди винопийца, ниже прилагайся купованию мяс: всяк бо пьяница и любодей обнищают (Притч. 23:20–21), имением обнищают, здравием, славою и разумом, напоследок и спасением обнищают. Вся бо сия отъемлется чревобесием, глаголет Иисус Сирахов, не пресыщайся во всей пище и не разливайся на различныя брашна (Сирах. 37:32), ибо во мнозе брашне недуг будет, а пресыщение до скорби дойдет, пресыщением бо мнози умроша (Сирах. 37:33–34). Послушайте Апостала глаголюща: не упивайтеся вином, в нем же есть блуд (Ефег. 5:18) ибо пьяницы царства Божия не наследят (1Кор. 6:10). Чем же избыти пиянства и нечистоты и объядения? Избудем воздержанием и постом и милостынею. Сими получим царство небесное; аще сохраним пост и милостыню, то не лишены будем милости Божией. Аминь.

17) Поучение в неделю 15-ю по всех святых

Возлюбиши Господа Бога твоего всем сердцем твоим, и всею душею твоею, и всею мыслию твоею. Словеса суть Евангелиста Матфея, в зачале 92 положенная (Глава 22. ст. 37).

Соломон царь, Божиею мудростию наполненный, написа тако: несть человек праведен на земли, иже сотворит благое и не согрешит (Еккл. 7:21) и паки той же Соломон в своей молитве к Богу тако глаголет: несть человека, иже не согрешит (3 Царств. 8:46). Виде бо умныма очима со отцем Давидом, Господь с небесе приниче на сыны человеческия видети, аще есть разумеваяй или взыскаяй Бога, – и се вси уклонишася вкупе и неключими быша, несть творяй благостыню, несть до единаго (Псал. 13:1–3). Вси уклонишася от Творца ко твари; от небесных ко земным, от благословения ко клятве, чего ради неключими быша. О, злопагубнаго уклонения! Сия измена есть шуицы преисподняго, сиречь диавола проклятаго учение на зло. Бог по своей благости изволил есть вся добра сотворити. Глаголет Писание: и виде Бог яко добро (Бытия гл. 1); человек же сый по образу Божию и по подобию Его созданный, не уподобися, ни сообразися Богу творением добраго; своею волею сотвори лукаво, преступи заповедь Божию, поддався греху и смерти. И тако единым человеком грех в мире вниде и грехом смерть, и тако смерть во вся человеки вниде Адамом, в нем же ecu согрешиша (Рим. 5:12). И оттоле несть человек, иже не согрешит, глаголет Давид: оттоле – кто есть человек, иже поживет и не узрит смерти (Псал. 88:49)? И что глаголю много: и вси поживши умрем. О, увы о сем земнородным! Горе падшему естеству нашему, и горе вечное! Горе же было бы и не скончаемо, аще бы Бог не воплотился спасения нашего ради; а егда воплотился Сын Божий, то оттоле вся веруяй в Него не погибнет, но имать живот вечный. Чим же получити живот вечный? Слыши законника онаго, иже вопроси Господа: учителю благий! что сотворю, да имам живот вечный? Учитель же отвеща: аще хощеши внити в живот вечный, соблюди заповеди. Законник вопроси: кия? Учитель отвеща: возлюбиши Господа Бога твоего всем сердцем твоим, и всею душею твоею и всею мыслию твоею (Мф. 22:37), и да не убиеши, не украдеши, не прелюбы сотвориши, не лжесвидетельствуеши, чти отца своего и матерь (Матф. 19:18–19) и возлюбиши искренняго своего, яко сам себе (Матф. 22:37). К сему же Богоотец Давид, собеседуя Богу, вопрошает Его: Господи! кто обитает в жилище Твоем, или кто вселится во святую гору Твою? И абие, яко добре искусный, сам себе отвещает: ходяй без порока и делаяй правду, глаголяй истину в сердце своем, – не льсти языком своим, не сотвори искреннему твоему зла и поношения не прият на ближняя своя (Псал. 14:1–3); и инде вопрос дает: кто взыдет на гору Господню, или кто станет на месте святем Его? И абие отвеща: той взыдет на гору Господню и станет на месте святем Его который неповинен руками и чист сердцем, сиречь не согрешает помыслом, и не прият всуе души своея, и неклятся лестию искреннему своему, сиречь не согрешает словом, – сей приимет благословение от Господа и милость от Бога Спаса своего (Псал. 23:3–5). Послушайте! Несть человек праведен на земли, иже сотворит добро и не согрешит. Како удобно есть человеку грешному взыти на гору небесную, яже есть истинное отечество наше? Како станет на месте святем Его, аще грешен, и жизнь вечную како наследит? Не бойся, слушателю православный, и не отчайся спасения твоего, аще и тмы грехов скаредных и тяжких сотворил еси, токмо слушай Пророка глаголюща: кто есть человек, хотяй живот, любяй дни видети благи? удержи язык твой от зла и устне, еже не глаголати льсти, уклонися от зла (Псал. 33:13–15), а Господь уклонит от тебя гнев Свой и ярость Свою. Ты сотвориши добро, и Господь добро тебе сотворит. Глаголет Исаия Пророк: научитеся добро творити, взыщите суда, избавите обидимаго, судите сиру, оправдайте вдовицу; и аще будут грехи ваши, яко червленое, то яко снег убелю я, и аще хощете, и послушаете Мене, благая земли снесте (Ис. 1:17–19). Слышиши ли, како Бог обещает творящим добро: благая земли снесте? А злым грехотворцем и не слушающим заповеди Его страшное прилагает прещение; аще-ли не хощете, сиречь не покаетеся и не послушаете Мене, – меч вы пояст. О горе преслушником заповедей Божиих! горе не кающимся грехов своих! се лютое хощет быти им казнение: яко овцы во аде положени суть, смерть упасет их (Псал. 48:15); и паки: грешник узрит и прогневается, зубы своими воскрежещет и растает, желание грешника погибнет (Псал. 111:10). И паки, се Господь яко огнь приидет, и яко буря оружие Его, воздаст яростию и запрещение во пламене огненне; огнем бо Господним осудится вся земля. И окончевая: червь их нескончается и огнь их не угаснет. И будут в позор всякой плоти, от страшнаго и непостояннаго прещения, от не скончаемыя казни. Человече! Аще хощеши избыти муки, то уклонися от зла и сотвори благо, и аще хошеши покаяние истинное имети, то яви е делом; аще гордости каешися, покажи смирение, аще сребролюбия каешися, покажи боголюбие; аще о блуде каешися, покажи целомудрие; аще объядения и пьянства каешися, покажи воздержание; аще гнева каешися, покажи любовь; аще зависти каешися, покажи доброхотение; аще ли лености каешися, покажи трудолюбие; а ненависти каешися, сотвори друголюбие; аще скупости каешися, давай милостыню. Братие! то бо наше истинное покаяние; аще кто что грешил, престани; пишетбося: исповем на мя беззакония моя Господеви и Ты оставил еси нечестие сердца моего. И тако православный людие, уклонитеся от зла и сотворите благо, да благо вам будет, во веки да восприимите живот и узрите к тому дни благи. Сохраните и та, яже Божественнии учители велят. Апостол Петр святый поучает: Бога бойтеся, царя чтите. И паки: повинитеся всякому человечю созданию Господа ради, аще царю, яко преобладающу, а аще ли князем, яко от него посланным, во отмщение злодеем, в похвалу же благотворцем (I Петра 2:13–14). И Павел святый учит: молю убо прежде всех творити молитвы, моления, прошения, благодарения за вся человеки; за царя и за вся, иже во власти суть (1. Тим. 2:1–2); учит чада и родители: чада, послушайте своих родителей о Господе, а вы отцы не раздражайте чад своих; и паки: раби, послушайте господей своих по плоти, а вы господие ослабляйте им прещения (Ефес. 6:1–9); учит мужие и жены: мужие, любите своя жены, яко же Христос возлюби Церковь и Себе предал есть за ню, а вы жены своим мужем повинуйтеся, яко Господу; увещавает послушники и наставники: вы братие повинуйтеся наставником вашим и покоряйтеся, тии бо бдят о душах ваших, яко слово хотяще воздати (Евр. 13:17), а вы учителие: аще впадет человек в прегрешение некое, вы духовнии исправляйте таковаго духом кротости (глав. 6:1); учит и всех: друг друга тяготы носите, и тако исполните закон Христов (Иоан. 6:2). Сия аще тако сотворите, то за исполнение закона Бог, везде сый и вся исполняяй, исполнит вас долготою дней, а сердца и души ваши Божественною благодатию исполнит во царствии небесном. Аминь.

18) Поучение в неделю 16-ю188

Овому убо даде пять талант, овому же два, овому един. Словеса суть Евангелиста Матфея, в зачале 105 положенная (25:15).

Егда кто хощет земного царя образ написати, сиречь персону царскую, смеет ли худою краскою написати? Никакоже. Аще бо худою краскою напишет, то царя обезчестит, за то наказан будет. Но полагает писец все краски чисты и светлы, достойны царева образа, а по иным местом и золотом золотит, тщится вся одежды царския чинно написати, да незнающий кто посмотрит на той царский образ, сиречь на персону, и видит истинно и чинно все царское начертание и мнит тако, яко отнюдь того самаго царя видит.

Тако и Бог Творец всея твари хотите образ свой написати, сиречь человека создати, и зело красен образ Богом написася, понеже бо человек без плоти и без скверны создася, но послежде от князя тьмы помрачися. Бог Отец тако рече к Богу Сыну: сотворим человека по образу Нашему и по подобию (Бытия 1:26), и тако сотвори Бог человека по образу Своему. О человече! За сие ты благодарение воздавай Триипостасному Богу за сотворение твое честное, понеже сотвори тебе Бог по образу Своему и по подобию и почти тя великими дарами, образом своим и подобием и самовластием почтил тебе. Не сотвори бо тебе Бог древом или камением, чтобы иный тобою владел, но ты сам собою владеешь. То тебе человече дар Божий, понеже сотвори тебе Бог на образ и подобие славы Своея, простаго, безгрешнаго, без злости и без скверны, дарова тебе душу пресветлую, разумную, не видиму, безсмертну, вечну, самовластну, многовидну, равну Ангелом, кроме тела, и поставил тя царя и владыку в видимом сем мире. О человече, для тебе Бог сотворил таковый великий и дивный дом на житие твое, весь сей видимый мир для единаго тела видимаго и смертнаго. Такие дары Божии дивнии: небо солнечное и прекрасное, звездами украшенное, то покров тебе; солнце пресветлое – светильник в дому твоем, а месяц – часов меритель и показатель; ветры тя греют и прохлаждают, а земля подножие ногама твоима и матерь добрая твоя. Тая носит тя на руках своих, тая от живота своего производит всякую сладость, яко мати млеко, все роскоши и сладости; выдает тебе, о, человече не токмо хлеб, но и все сладкое для души и тела твоего, всяки сладости сего света: сладость от древ всяких плодов, сладость меду и вина, сладость и цветов благовонных, и притом, злато и сребро и каменне драгое от земли; зверие кроткий и дивнии родятся и служат животу твоему; с тех же зверей ризы богатому и нищему. О человече! и море тебе данник: от глубины своей дает тебе рыбы, а воздух птицы кротким и диким тебе посылает в подарок; яко царю земному вся тварь тебе работает, овцы и волы вся, еще же и скоты польские, птицы небесным и рыбы морския, вся покорена под нозе твои. О человече суетный! За то ты благодари Творца своего и покланяйся Ему и разумною душею живи в дарех Божиих, чтоб ты в них не заблудил во тьму греха. Знай же то, яко огнь тебе служит, согревает и освящает, а если без меры заживешь, тогда тебе принесет шкоду (т. е. убыток) и смерть. Такожде и вода напояет, очищает и прохлаждает, а если ей дурно над меру заживешь, то принесет тебе шкоду и смерть. Тоже разумей и о иных родах земных, что над меру, то и грех. Невинно вино, проклято же пиянство; тоже разумей и о меду и о всяком напое, если без меры, то смерть и слепота души и телу твоему.

Знай же человече, яко над всеми сими красотами и сладостями поставил тебе Бог твой правителем и властителем и разумным строителем, чтобы ты ведал давать потребное потребному, чтобы вместо живота смерти не подал, вместо веселия плач и вместо сладкаго горькое души твоей. Сладок в начале грех, но конец его горек в муках вечных: а то, человече, все в твоем самовластии лежит, но не все на пожиток души твоей, что над замер, то смерть. Красна, сладка жена законная, початок добрый и конец радостный, от Святых Отец и от церкве благословенно. Сладкий початок греха блудница, чужеложство, разбой, татьба и иное грехотворение, но того початку сладкого конец горький в муках вечных. А то сам себе, о человече, избирай самовластием своим: аще хощеши избыти мужи, и желавши наследник быти царства небеснаго, и ты твори добрая дела: в начале имей смирение, а к тому пост и молитву, сими получишь царство небесное. Аще зле заживешь, то злое твое житие принесет тебе смерть, и ктому начнешь упиватися, объядатися, пространно жити, а пространное житие вводит в муку. А аще же обратишь самовластие твое на добрая дела, на пост и на молитву и на всякое воздержание, то сие самовластие введет тебя в царство небесное и в житие безконечное.

О Человече! Сотворен ты самовластен, и того ради самовластия не величайся. Аще бо тебе Бог и почтил славою и честию могуществом и богатством, то бо есть не твое, но Божие даяние. Послушай Апостола Павла глаголюща: о, человече, что имаши, его же неси приял (1Кор. 4:7). Тоже глаголет Евангелист Иоанн: от исполнения его мы вси прияхом (Иоан. 1:16), и для того, человече, в гордости не возносися и иными людьми не гордися, если имеешь у себе то, чего иные люди не имеют, то бо чужое – Божие, а не твое, не от себе то имеешь, но от Бога тебе дано: овому убо даде пять талант, овому же два, а овому един. Возлюбленне! если имеешь мудрость, то мудростию не хвались: от Бога то дано тебе. Тако глаголет Иисус Сирах: всяка премудрость от Господа (гл. 1, cm. 1). А если имеешь и богатство, то и сие тебе от Бога дано есть. Тако глаголет Соломон о человецех: дал есть ему Бог богатство и имение (Еккл. 5:18). А если имеешь силу, и та от Бога тебе дана; тако глаголет Псаломник: той даст силу и державу людем своим (Псал. 67:36). А если имаши какое властительство или боярство, и то от Бога тебе дано; тако глаголет Соломон о судиях: слышите держащий множество и гордящийся о народех язык: яко дана вам держава от Господа и сила от Вышняго (Прем. Сол. 6:2–3). Сего ради, о властителю, не возносися своею властию. Се разумей: не вечно тебе то отдано, но скоро смерть возмет от Тебе то. А если имеешь побеждение над неприятелями своими и одержал еси землю их, – и то от Бога тебе дано. Тако рече псаломник о израильтянах: не оружием бо своим наследиша землю и мышца их не спасе их; но десница Твоя и мышца Твоя и просвещение лица Твоего, яко благоволил ecu в них (Псал. 43:4). А если имаши какое имение и власть, – и то от Бога тебе дано. Тако глаголет Христос к Пилату Понтийскому: не имаши власти ни единыя на Мне, аще не бы ти дано свыше (Иоан. 19:11). За сим не возносися в гордости и иными людьми не гордися человече, аще ты имеешь у себе то, чего иные люди не имеют; то бо есть Божие, а не твое; может Бог от Тебе то взять и иному кому отдать. Тако глаголет Самуил пророк к Саулу царю Израильскому непослушавшему: отъя Господь царство Израилево от руку твоею днесь и отдаст е ближнему твоему (1 Царств 15:28). Так и у нынешних горделивцев отнимает Бог власть и смиряет их. Глаголет Псалмограф: Господь смиряет и высит, богатит и убожит, возставляет от земли нища и от гноища возвышает убога посадити его с князи людей своих (Псал. 112:6–8). А ныне и мы то слышим и видим, како велиции и славнии смиришася, а мали и не славнии вознесошася; истинно то Господь смиряет и высит, о сем же глаголет и Апостол: Господь гордым противится, смиренным же дает благодать (Иаков, 4:6). Благословеннии христиане! Молю вы, Бога ради, имейте смирение и взирайте на смиреннаго мытаря, яко же глаголет Евангелист: егда бо мытарь смири себя пред Богом и своих ради согрешений не хотяше ни очию возвести на небо, но бияше перси своя, глаголя: Боже, милостив буди мне грешному; и за сие смирение Бог его вознесе и согрешения его отпусти, яко сниде оправдан в дом свой. Но послушайте, о гордом фарисее что Господь глаголет: человека два внидоста в церковь помолитися, един фарисей, а другий мытарь. Фарисей же став на переднее место и сице в себе моляшеся, тако глаголя: Господи Боже, хвалу тебе воздаю, яко несмь аз таков грешник, якоже прочий человецы: хищницы, не праведницы, и прелюбодеи, или якоже сей мытарь (Лук. 18:10–11). О фарисее! Почто осуждаеши всех человек, ты бо грехи их видишь, а покаяния не видишь: никто же бо в человецех без греха, токмо един Бог. О фарисее! за сие твое осуждение, сам ты от Бога осужден будеши, яко же Господь глагола: всяк возносяйся смирится, а смиряяйся вознесется (Лук. 18:14). Тако и вы имейте смирение, любовь и послушание, за то вы милость Божию получите.

19) Поучение в неделю 17-ю по всех святых

О жено! велия вера твоя, буди тебе, якоже хощеши (Матф. 15:17). Словеса суть Евангелиста Матфея в зачале 62 положенная.

Всяк человек аще хощет построити себе дом или град, то первее место уготовляет и крепкое основание полагает, и на том основании вся созидает, елика хощет, и всякую тяготу полагает на основании том, не подвижтьбося. Тако и ты христианине, аще хощеши взыти на высоту добродетели и хощеши создати дом духовный без труда, да в том дому вечно жити можешь и сокровища своя полагати, да не покрадут его невидимые тати, того ради ты положи в души твоей основание крепкое; во первых трехвидную добродетель: веру крепкую, упование не сомненное, любовь совершенную. Сию бо добродетель любовь хощет Господь вкоренити в сердца наша, тако рече: аще отпущаете человеком согрешения их, отпустит Отец ваш небесный прегрешения ваша (Мф.6:14). Сими словесы кратко связа Господь, но не разрешно: аще не отпустишь ближнему твоему прегрешения его, и тебе отпустит Отец небесный множества грехов твоих (там же, ст. 15). Помысли злопомнителю аще еси не грешен? а мне мнится, яко зело грешен еси. Аще ты за гневом не зришь греха твоего, аз покажу тебе, яко всяк гневаяйся на брата своего повинен есть суду (Мф. 5:22). Коему суду? Оному страшному, еже рече Господь: не осуждайте, да не осуждени будете (Лук. 6:37); и сего ради Господь запрещает не глаголати сице, да пресечет жилу гнева. Возлюбленне! Аще хощеши злобу и гнев твой познати? Таков бо есть гнев зельнейший от всякаго пламене и лютейший от всякаго яда смертоносна; пламень бо грады пожигает, гнев же спасение человече погубляет; яд едино тело убивает, сей же душу погубляет; гнев губитель рода человеча от начала мира; гнев многия грады преврати, сотре народы. Сей святительскую и царскую кровь нещадно проливает и с прахом мешает, и незлобивых отрочат, яко серп, безгодно пожинает, старческую седину ни во что вменяет и цвет юности без милости губит. И не до сих стает, но и на Вышняго, яко лев, хулою рыкает. От уст его проливается море кровавое; от очей его исходит пламень поедающий всю вселенную. Се бо по истине действо гнева твоего. О памятозлобне! рцы ми еда ли несть в гневе твоем греха? О гневливе! престани от гнева и остави ярость и восприими любовь; а прежде всего бойся Бога, люби Его всею душею и сердцем и помышлением, а Пречистую Богоматерь и всех Святых почитайте, а в церкви Божии безленосно приходите к вечерни, и заутрени и обедни к началу, и слушайте Божественнаго пения со вниманием в молчании; а из церкве до отпуста не выходите. Аще далече от церкве или недосужно ти будет, то ты можешь дома правило свое исправляти, пение и поклоны по силе, а не ленися, да не безплоден будеши, аки древо сухое. И аще сотвориши правило без лености, то великую мзду от Бога получиши и грехом отпущение. Праздники празднуйте духовно, а не телесно, нищих милуйте, а в церкви свещи и просфоры и фимиам по силе давайте; рабом же своим в праздники от работы покой дайте; праздники празднуйте не объядением и не пиянством, но молитвою и чистотою; кротко живите и во Христе любовь не лицемерну имейте ко всякому христианину, любовь бо покрывает множество грехов; а гнева не держите никакого, а аще и служится, по диаволю навету, свар и вражда, или досадное слово где кому глаголал еси, то скоро прощения проси, ему же досадил еси. И не упивайся без памяти, и сам неупой без памяти никого, аще и друг ти будет. Многое бо питие умы помрачает и человеки ни во что обращает. К сему же послушайте Апостола глаголюща: Братие, повинуйтеся наставником вашим (Евр. 13:17). Кто суть наставники? Священницы, тии бо, рече, молятся Господу Богу о оставлении грехов ваших. За то и вы почитайте священников, яко Божии слути, и всем церковником честь воздавайте, имейте такову любовь; и неприятели своя люби и Бога за них моли и люби всех православных христиан, яко сам себе, другу не завиди, никого не обиди, сребра в росты не давай, чти отца и матерь, больныя посещай, нужным помогай, в темницах и во оковах потребная донеси, нищих по силе накорми, напой и одежи, вся бо та в руце Божии влагаеши, вдовиц не презри, наипаче всего от блуда бегай и с женами живите по закону. В среду и пяток и воскресение в чистоте будите. Праздники господския и Пречистыя Богородицы и всех Святых почитай честно, а дети своя и челядь учи страху Божию, храни от блуда и пиянства, татьбы и всякаго зла удаляйся, а в Церкви Божии детем своим вели ходити ко всякой службе во вся дни, а наипаче в праздники; такожде и ты збойства и всякаго лукавства и лихоимства блюдися, понеже за все то муки прияти имаше в будущем веце. Аще случится согрешити, по наущению диаволю, то вскоре исповеждь отцу духовному, да не вкоренится диавол в души твоей и смерть да не застанет тя без покаяния. А наипаче всего буди смирен, не высокоумен, не празднослови, скверных бесед бегай, друга не укори и не досади, тих и кроток во всем буди и приветен, а плясаний и песней бесовских, скоморохов и всяких игр отнюдь бегай, в церкви Божией стой на молитве со страхом, не говори ни с кем и не помышляй что зло в сердцы своем, но точию глаголи: Господи помилуй мя, дщи моя зле беснуется; тако бо Хананея вопияше и сим молением получи изцеленне дщери своея. Аще бо сие слово и мало, но милосердие Божие велико по словесем Евангелиста Матфея: егда прииде Иисус во страны Тирския и Сидонския и се жена Хананейска от предел тех изшедши, возопи ко Иисусу, глаголющи: Господи помилуй мя, дщи моя зле беснуется! Он же рече ей: о жено! велия вера твоя, буди тебе, якоже хощеши, и изцеле дщи ея от часа того (гл. 15, 21, 22,28). Тако и нам, аще что случится скорбнаго от мира сего много-мятежнаго, должны есмы претерпевати и глаголати тако: Господи, помилуй ми, от скорби, зол и болезней избави. Тако бо и прокаженнии о сем исцелении явишася не благодарнии. Десять бо исцелишася, един же от них возвратися славя Бога. И паде ниц при ногу Его и той Самаранин бяще. Иисус же глагола ему: не десять ли изцелишася, где же девять, почто не возвратишася дати славы Богу, токмо един сей иноплеменник (Луки 17:14–17)? Тако и ты, благочестивый христианине, во всем благодари Бога, и глаголи: Господи, помилуй мя. К тому же злых человек блюдися, якоже оных девяти не благодарных, а с добрыми всегда дружней и поревнуй оному прокаженному, иже прослави Господа Бога. Тако и ты возми себе страх Божий в сердце и молися Богу о оставлении грехов своих. И аще начнеши сице творити, то будеши чадо и света и дне, и теми путьми внидеши без труда в царство небесное. Всегда помышляй час смертный и разлучение души от тела и вечныя муки грешником. Рече Господь: будите готови, яко не весте дне и часа, когда приидет кончина (Матф. 24:44, 25:13). Не знаем доколе живот наш и когда смерть будет; а аще обрящет ны смерть во гресех, то почто и родимся. Потщитеся чада отложити бремя греховное, да на воскресение светли узрящем Бога, восхищаеми на облацех по воздуху, егда приидет на землю праведный судия Христос Бог, во славе Отца Своего судити живым и мертвым и воздати комуждо по делом его. Аминь.

20) Поучение в неделю 19-ю

Любите враги ваша, добро творите ненавидящим вас (Луки 6:27). Словеса судь Евангелиста Луки, в зачале 25 положенная.

Премудрость созда себе храм и утверди в нем столпов седмь (Притч. Сол. 9:1). Кто есть премудрость? Есть Христос Сын Божий. Сия то Премудрость – Сын Божий созда себе храм, сиречь плоть нашу, якоже Давид глаголет: руце Твои сотвористе мя и создасте мя (Псал. 118:73). О сем же и Богомудрый Павел вещает: или не весте, яко телеса ваша храм живущаго в вас Святаго Духа (Кор. 6:19). А той Святый Дух созидает в нас Своих седмь столпов, сиречь седмь даров Духа Пресвятаго, еже есть: мудрость, разум, совет, ведение, крепость, благочестие, страх Божий (Исаии 11:2–3). Но премудрость созда себе храм: премудрость есть Христос; созда себе храм, сие есть созда человека; и утверди в нем столпов седмь, еже есть седмь добродетелей, мудрость, правда, целомудрие, мужество, вера, надежда, любовь, – таковые бо столпы созидает в нас Господь. Тако и князь тьмы века сего диавол, си есть противник, созидает себе дом в злосливом сем мире, в грехолюбивом человеце и утверждает своих седмь столпов, си есть седмь смертных грехов, еже есть: гордость, лихоимание, блуд, зависть, объядение, гнев, ленивство. И аще кто сим грехом не хощет в себе пребывати, той да творит добрая дела. Аще кто до ныне гордился, тот бы отныне смирился; Господь бо гордым противится, смиренным же дает благодать (Иак. 4:6). Послушай, гордый, что о твоем брате, гордом, Пророк глаголет: видех нечестиваго превозносящася и высящася, яко кедры ливанския и мимо идох, и се не бе, и взысках его, и не обретеся места его (Псал. 36:35–36); такова бо есть гордость. Слышите и о смиренных глаголет Пророк: кто, яко Господь Бог наш, на высоких живый и на смиренныя призираяй на небеси и на земли, воздвизаяй от земли убога и от гноища возносяй нища, посадити со князи, со князи людей своих (Псал. 112:5–8). А по мирской пословице, возмет Бог с грязи, а посадит в князи. Второе, аще кто сребролюбив, отныне да будет податлив; лучше есть даяти, нежели приимати; корень бо злым есть сребролюбие, его же нецыи желающи, заблудиша от веры и себе пригвоздита болезней многим (Тим. 6:10). Ты же, о человече Божий, сих бегай. Чим же избыти сребролюбия? Сребролюбие милостынею победим; милостыня бо от всякаю греха и смерти избавит и не заставит души идти во тьму. Третее, блудник аще до сего времене, яко свинья в болоте, во гресех нечистых валялся, да возмется чистоты и возлюбит целомудрие, нечистота бо ненавистна и люте казнима бывает. За что Судия Праведный потопом вселенную изволил есть казнити? Ей, за нечистоту глаголет писание: и бысть, егда начаша человецы мнози бывати на земли и дщери родишася им, видевше же сынове Божии дщери человеческия, яко добры суть, и пояша себе жены от всех яже избраша. И рече Господь: не имать Дух Мой пребывати в человецех сих, зане суть плоть (Бытия 6:1–3), аки бы рекл, яко плотским похотем служат. Чего ради Содому и Гомору и иныя с ними три града огнем сожещи судил есть? Ей за скаредную их нечистоту и за срамные ея виды. И инии мнози блуда ради погибоша, их же не поминаю. Сего богатыря чим победити? Чистотою. Чистота к Богу человека приближает; близко Бога пречистая Дева Мария, внегда дева сущи, во чреве своем Бога зачала; близ Бога Иоанн девственник, понеже на персех Христовых возлегает, близки Богу и все чистые. Сам Господь поведает: блажени чистии сердцем, яко тии Бога узрят (Матф. 5:8). Четвертое, аще кто завистию томлящеся, да уклонится днесь от нея, да возмется за любовь. Завистию бо диаволею смерть вниде в мир; завистию диаволию что сотворил Каин? Смерть нанесе Авелю праведному; завистию Саул кроткаго гони Давида и на смерть искаще; завистию беззаконнии Иудеи Христа Господа убиша; завистницы не точию ближния умерщвляют, но первее сами себе снедают. Бегайте вси зависти и любовь святую да возлюбите, та бо покрывает множество грехов. И по Иоанну Богослову: Бог любы есть, пребываяй в любви, в Бозе пребывает и Бог о нем (Иоан. 4:16). И по глаголу Апостола Павла: ныне же пребывает вера, надежда, любовь, больше же сих любовь (Кор. 13:13); без любви бо вси добродетели, якоже тело без души, мертвы. Глаголет Апостол: аще языки человеческими глаголю и ангельскими, любве же не имам, бых яко медь звенящи или кинвал бряцающи; аще имам пророчество и вем вся тайны и весь разум, и аще имам всю веру, яко и горы преставляти, любве же не имам, ничтоже есмь; аще предам тело мое, еже сожещи е, любве же не имам, никая польза ми есть (Кор. 13:1–3), на любви бо весь закон и пророцы висят. Возлюбленнии! возлюбим друг друга яко любы от Бога есть, якоже и Сам Господь глаголет: любите враги ваша, добро творите ненавидящим вас, благословите клянущия вы (Матф. 5:44), аще бо тако сотворите, то милость Божию получите. Пятое – объедению аще кто доселе работаше, – тому чрево бог, да воздержится от чревоугодия. За чревоугодие Исав первенства лишися, за соковую кашу отдал большину; Содома и Гомора пресыщения ради на нечистоту разрешишася, – огнем погибоста; Лот пияный во кровосмешение с дочерьми падеся, и многая злая от чревоугодия людем быша. А воздержание и пост здравию мати, ума бодрость, чистоты хранилище и всякия злобы прогнание. Ибо пияницы царствия Божия не наследят. Шестое – гневом аще кто палим, да поучится терпению, Господь глаголет: всяк бо гневаяйся на брата своего всуе, повинен будет суду (Матф. 5:22), понеже бо велие зло человеку гнев: кротость истребляет, мудрость погубляет, ум смущает, свет разума помрачает, свары и прения родит, рати движет, любовь угашает, не доброе вещает и безумному всячески уподобляет. Полезно есть повинутися псаломнику: престани от гнева и остави ярость, не ревнуй, еже лукавновати, зане лукавнующии потребятся (Исая. 36:8–9). Терпение паки содевает спасение, чего Господь учит: в терпении вашем стяжите души ваша (Лук. 21:19). Тем же долготерпите и вы братие, утвердите серца ваша, яко пришествие Господне приближися, глаголет Святый Апостол Иаков: не воздыхайте друг на друга, да не осуждены будете, се судия пред дверьми стоит (Иак. 5:8–9). Седьмое – леностию кто отягощен, на служение Богу да воспрянет от лености тоя. Приточник глаголит: доколе, о лениве, возлежищи, когда же от сна возстанеши, да прилежит еже работати Господеви плоды славословия приносите, да яко древо неплодное посечено будет. Bcяко бо древо не плодное посекается и во огнь вметается, да слышите сие речение непоптребнаго раба ввержите во тьму кромешную, тамо будет плач и скрежет зубом (Матф. 25:30). Добро есть и мало потрудитися во временной жизни и вечное восприяти упокоение, – не ленивым бо уготовася покой, но трудолюбивым, по оному приглашению: Приидите вси ко Мне вси труждающии и обременении и аз упокои вы (Матф. 11:28). Человек, который хощет жити, тот бы сеял, а праздный да неяст, иаипаче же небеснаго; да исходит человек на дело свое и на делание свое до вечера (Псал. 103:23), изряднее же на дело духовное на пение и на молитву, на пост и иа воздыхание. Сими добрыми делы грехов избудем и милость Божию получим. Аминь.

21) Поучение в неделю 21-ю: о человеце и человеческих добродетелях189

Якоже сугуб есть человек, тако и добродетели сугубыя требует от него Бог. Человек бо от тела и души состоится, по образу и по подобию Божию сотворен и создан, – словесен, разумен, смертей и безсмертен, живет и умирает, действен и недействен, самопроизволен, сугуб от души и тела, сугубы же имать и чувства душевнии и телеснии. Душевных пять, еже есть: ум, смысл, мнение, мечтание и чувство; телесных такожде пять, еже есть: слышание, видение, вкушение, обоняние и осязание. Человек причастен естеству плотскому, душевному и духовному; и овогда убо человек живет плотски, о немже речено есть: не пребывает190 Дух Мой в человецех сих, зане плоть суть (Бытия 6:3); сущии бо во плоти Богу угодити не могут (Римл. 8:8); овогда же человек живет душевне, о немже речено: душевный человек не приемлет яже Духа Божия, юродство бо ему есть (1 Коринф. 1:14); овогда же живет духовне, той свободен от всяких пристрастий мирских и плотских, всегда же вышнее мудрование имать. Глаголет Апостол: елицы бо Духом Божиим водятся, сии суть сынове Божии, аще же духом деяния плотская умерщвляются, жити будет не себе, но создавшему его (Римл. 8:13–14). Жити же ни един сице благочестно возможет, аще не соблюдет, яже ко благоискуству ведут; благоискуства же сии суть степени: прежде всех подобает человеку веру содержати праву во Отца, и Сына и Св. Духа, Отца не рожденна, Сына от Отца рожденна и Духа Святаго оттого же Отца исходяща, – равночисленну, равномощну, соприсносущну, превечну, сославиму, собезначальну Троицу верити; – Отца, Творца суща видимым и не видимым; – Сына единородна Отцу, Имже вся быша, последи же плоть приимша от пречистыя Девы Марии и пострадавшаго человек ради и воскресшаго и с плотию на небеса вознесшагося и паки грядущаго судити вселенную; – Духа Святаго, Господа животворящаго и глаголавшаго пророки.

И сия веруя и исповедуя, должен человек содержати канон жительства христианскаго. Что есть христианское жительство? Христианское жительство есть, еже исполняти таинства церковный. Таин убо церковных есть седмь: l) Крещение, имже омывается первородный грех и во усынение Богу приводит, о нем же Сам Господь рече: аще кто не родится водою и духом, не может внити в царство Божие (Иоан. 3:5). 2) Миропомазание – есть утверждение святаго крещения, еже крепка творит крестившагося и вооружает его противу врагом душевным и телесным наитием Святаго Духа. 3) Евхаристия – есть пребывание тела и крови Христовы под видом хлеба и вина в воспоминание страдания Христова и в вечное спасение наше, о немже речено: аще кто не яст тела Моего и не пиет крови Моея, живота вечнаго не имать в себе (Иоан. 6:53). 4) Священство – есть власть от Бога Духом Святым данная, им же всякия вещи ко спасению строятся; речено: его же аще свяжете на земли, будет связан на небеси, а его же аще разрешите, будет разрешен191. 5) Покаяние – есть сокрушение сердца о гресех, яже исповедует человек пред иереем с намерением исправления, о немже речено: тако радость бывает на небеси о едином грешнице кающемся на земли (Лук. 15:7). 6) Брак – есть неразлучное сопряжение двою лиц по взаимному согласию с благословения священника; речено: еже Бог сочета, человек да не разлучает; и будета два в плоть едину (Матф. 19:56). 7) Елеосвящение – есть помазание елеом, от священников освященным, в немощи сущих, с молитвою здравия ради душевнаго и телеснаго; речено: помазавше его елеем, во имя Господне. И молитва веры спасет болящаго (Иакова 5:14–15). От сих убо тайн овы нужны, овы же потребовательны. Нужныя суть: священство, крещение, миропомазание, евхаристия и покаяние; потребовательны: брак и помазание елея. И в сих обретаяйся, должен человек добродетели исполняти плотския и душевныя; плотския добродетели сии суть: воздержание, пост, алчба, жажда, бдение, покаяние, сухоядение, нищета и прочая сим подобная, – алчнаго напитати, жаждущаго напоити, страннаго ввести, нагаго приодети, в темнице сущих и больных посещати. Душевныя же: вера, надежда, любовь, молитва, кротость, смирение, долготерпение, незлобие, благость, мир и безгневие. И аще сии добродетели исправите, за то милость Божию получите, а аще начнете грехи творити: прелюбодеяние, блуд, нечистоту, студодеяние, идолослужение, чародеяния, вражды, прения ярости, разжение, соблазны, ереси, зависти, убийства и прочая сим подобная, такожде и душевныя страсти: нечестие, ересь, хулу, гнев, ярость, горесть, человеконенавидение, памятозлобие, осуждение, рвение, тщеславие, лицемерство, уныние, роптание, за сии грехи томление и мучение воспримите. От сих же грехов седмь смертных, еже есть: гордость, лихоимание, блуд, зависть, объядение, гнев, ленивство; а против сих грехов восприимите: на гордость смирение, на лихоимание благоутробие, на блуд целомудрие, на зависть братолюбие, на объядение пост, на гнев терпение, на ленивство молитву; и аще тако сотворите, грехов избудите и милость Божию получите о Христе Иисусе Господе нашем. Аминь.

22) Поучение в неделю 28-ю

Грядите, яко уже готова суть вся (Лук. 14:17). Словеса суть Евангелиста Луки в зачале 76-м положенная.

Образ Бога невидимаго, превечное слово Отчее Бог Сын. А той Сын Божий сотвори пречистый образ по подобию человечества Своего; прият воду во пречистыя Свои руце, умы лице пречистое и приим убрус во Свои руце и приложи к Своему лицу; на том убрусе изобразися пречудный образ Христов и на той образ взирающе, благовернии люди, должны и вы тот образ Христов в сердцах своих духовне изображати; того бо ради Христос лице Свое изобрази, да взирающе мы на той пречистый образ, по образу Создавшаго нас поживем, яко же учит Апостол Павел: чада моя, ими же паки болезную, дóндеже вообразится в вас Христос. Како же воображается в нас Христос? Послушайте, таковым образом: егда блаженный Иаков пасе овцы у Лавана, тестя своего, Лаван же обеща ему наем дати за то пасение от овец своих пестрых, тако глаголя: кая овца родится белая и черная, та мне, а кая родится пестрая, та тебе за работу. Иаков же нача в воду жезлы пестрые класти, которую воду овцы пьют, и от того начата овцы пестрыя рождатися. Якоже овцы пасения Иаковля, внегда зрети им на жезлы, в воду полагаемый от Иакова, таковая овчата зачинаху, каковы жезлы зряху; аще когда единовидные жезлы бяху, тогда и овцы единоярныя овчата зачинаху и рождаху; аще же пестрые жезлы смотряху, пестрыя овчата зачинаху и рождаху: тако и мы овцы суще словеснаго стада Божия, да восхощем духовне в нас зачати и родити Агнца Божия, и да смотрим прилежно душевныма очима нашима, яко на пестрый жезл, на Самаго Христа, пестра суща, различием естеств Божества и человечества и различием всяких добродетелей; зряща на Него, да тако духовне в нас зачнем Его и рождаем. Тако бо в сердцах и душах наших вообразится Христос. О, блаженный Павле, скажи нам како воображается Христос в нас? И отвещает сице: Христос смирил Себе, послушлив быв даже до смерти (Фил. 2:8). Тако подобает и нам смиренным и послушливым быти. Христос биения по ланитом и лица заплевания претерпе; тако и нас терпению учит: аще тя кто ударит в десную твою ланиту, обрати ему и другую (Мф. 5:39). Еще учит и молчанию; Сам Христос не испусти ни единаго словесе суетна от уст Своих. Тако и нам не говорити бы о суетных; а ноне у нас не токмо старии, но и отроцы малии вси сквернословят и друг друга матерно бранят, а старые про блуд говорят. Али не слышите Господа глаголюща, яко за всяко праздно слово ответ Богу дати. Чадца моя, ими же паки болезную, дóндеже вообразится в вас Христос. Воображается же Христос в душах наших тако: егда ветхаго человека совлекаемся со страстьми и похотьми его и в новаго облекаемся по Апостолову учению: ныне же отложите и вы та вся: гнев, ярость, злобу, хуление; отложите и срамословие от уст ваших, не лжите друг на друга, совлекшеся ветхаго человека с деяньми его и облекшеся в новаго, обновляемаго в разум, по образу Создавшаго его (Колос. 3:9–10). Кто есть ветхий человек и кто новый? Сие той же Апостол изъявляет, ветхаго человека Адама первым и земным именуя, новаго человека Христа вторым и небесным нарицая, сице глаголя: первый человек от земли перстен, вторый человек Господь с небесе; и поведает обоего человека с чады их сообразне: яков перстний, таковы и перстнии, и яков небесный, таковии и небеснии; также учит Апостол: еже первым перстным погубихом, вторым небесным поищем и якоже облекохомся во образ перстнаго, да облечемся и во образ небеснаго (Кор. 15:47–49), сиречь, якоже работахом миру, да поработаем и Богу, якоже угождахом плоти, тако да угождаем духови. Уже бо творили дела алая и смертная, то отложим, да сотворим дела добрая и животная. Аще кто речет, яко уже вси вернии во образ небеснаго человека облекохомся во время святаго крещения, по словеси оному: елицы во Христа крестистеся, во Христа облекостеся, и отдуду наречени есмы христиане, – добре речеши; да и послушай от Мене: добре, истинно то есть, яко во время крещения облекохомся во Христа Господа, не погубляем той одежды и до кончины живота нашего, аще твердо в вере христианстей пребываем. Послушайте любимицы. Едина вера не довлеет ко спасению, Апостол глаголет: вера без дел мертва есть (Иак. 2:20). Яко же человеку на одной ноге нельзя идти, ниже птице об одном крыле летати, тако и человеку о единой вере, без добрых дел, не получить спасения, а мнози суть звони, мало же избранных (Мф. 22:14). Якоже рече Господь: человек некий сотвори вечерю велию, и зва многи. И посла раба своего во время вечери, рещи званным: грядите, яко уже готова суть вся. И начаша вкупе отрицатися вси, первый рече ему: село купих, и имам нужду изыти и видети е, молютися, имей мя отречена. И другий рече: супруг воловных купих пять, и гряду искусити их, молю тя, имей мя отречена. И третий рече: жену поях, и сего ради не могу приити (Лук. 14:16–20). Вси бо сии не быша достойни: аще и мнози звани, но мало избранных. Вси суть звани, но иже творят волю Божию, тии суть избрании. Несть добро христианами нарицатися, аще дел христианских не творим; аще чада Авраамля и дела да творим (Иоан. 8:39); христиане есмы именем, то и дела Христова да творим. Христос четыредесять дней постися, а мы не хочем и единаго дня пропустити не ядше; подобает и нам поститися, да не всуе христиане зовемся. Молит ны о сем Павел: молю убо вы аз узник о Господе, достойно ходити званию, в нем же звани бысте, со всяким смиренномудрием и кротостию, с долготерпением, терпяще друг друга любовию, тщашеся блюсти единение духа в союзе мира (Ефес. 4:13); и паки той же Апостол глаголет: отложим убо дела тьмы и облечемся во оружие света. Яко во дни благообразно ходим, не козлогласовании и пиянствы, не любодеянии и студодеянии, не рвением и завистию; облецытеся Господом нашим Иисус Христом, и плотоугодия не творите в похоти (Рим. 13:12–14). Како же облекатися Господем? Ничто ино есть, точию Божественныя заповеди исполняти, в добродетелях успевати, по Божией воле ходити, сие есть дело истиннаго христианина. Тако и вы братие творите: всех милуйте, а сами обиды терпите, немощным помогайте, земная презирайте, небесная желайте, тако бо в вас вообразится Христос Господь. Аминь.

23) Поучение в неделю сыропустную

Аще отпущаете человеком согрешения их, отпустит и вам Отец ваш небесный прегрешения ваша. Словеса суть Евангелиста Матфея, в зачале 17 положенная (Мф. 6:14, Марк, 11:25).

Всякий человек, аще хощет себе построити дом или град, то первое место уготовляет и крепкое основание полагает и на том основании вся созидает, елико хощет, и всякую тяготу полагает на основании том, не подвижитбося. Тако и ты христианине, аще хощеши изыти на высоту добродетелей и хощеши создати дом духовный без труда, а в том дому вечно жити и сокровища своя полагати. да не покрадут его невидимые татие, тогда ты положи в души твоей основание крепкое: во первых трехвидную добродетель: веру правую, упование нелицемерное и любовь совершенную; сию бо добродетель – любовь хощет Господь вкоренити в сердца наша, тако рек: аще отпущаете человеком согрешения их, отпустит и вам Отец ваш небесный прегрешения ваша; сими словесы кратко связа Господь, но неразрешно; аще не отпустиши ближнему твоему прегрешения его, и тебе не отпустит Отец твой небесный множество грехов твоих. Помысли, о злопомнителю, аще еси не грешен; мне же мнится, яко зело грешен еси, аще ты за гневом не зришь греха твоего, аз покажу тебе, яко всяк гневаяйся на брата своего, повинен есть суду (Мф. 5:22). Коему суду? Оному страшно, еже рече Господь: не осуждайте, да не осуждены будете (Лук. 6:37). И сего ради запрещает Господь не глаголати сице, да пресечет жилу гнева. Возлюбленне! Аще хощеши злобу и гнев твой познати, таков есть гнев: зельнейший от всякаго пламене и лютейший от всякаго яда смертоносна. Пламень бо грады пожигает, гнев же спасение человесе погубляет. Яд едино тело убивает, гнев же – и душу. Он губитель рода человеча от начала мира. Гнев многие грады преврати, сотре народы. Сей святительскую и царскую кровь нещадно проливает и с прахом мешает, и незлобивых отрочат, яко серп, безгодно пожинает, старческую седине ни во что вменяет и цвет юности без милости губит. И не до сих стает, но и на Вышняго, яко лев, хулою рыкает. От уст его проливается море кровавое, от очей его исходит пламень, поядающий всю вселенную. Се бо по истине действо гнева твоего. О памятозлобне! Рцы ми, еда ди несть в гневе твоем греха? О гневливе! Престани от гнева и остави ярость и восприими любовь, к тому же сохрани и сей святый пост; его же да познаете силу, со вниманием слышите, что то есть пост. Пост бо есть многоразличен: а) удержание от сладких брашен и от пиянства; а пиянством и сластолюбием многие угождают своему чреву и работают, аки Богу, имуще вседневное насыщение и сласть вместо Бога б) Пост есть удержание всех страстей в чувствах, не смотрети очима, где не прилично; не слушати ушима, где скаредно; не обоняти носом, где богомерзско; не щупати руками, где срамно; не ходити путь ногами, где пагубно и негодно. Аще бы и Адам, отец наш, сохранил пост, не изгнан бы был из рая. Коего поста Адам не сохранил? Послушайте. Егда Бог Адама ввел в рай, тогда заповеда Адаму поститися от древа, еже посреде рая, не ясти от него, он же от древа яде, преступи заповедь Божию. За то выгнан бысть из рая и о изгнании своем плакася, якоже Церковь поет: седе Адам прямо рая и свою наготу рыдая, плакаше: увы мне прелестию лукавою увещанну бывшу и окрадену и славы удалену! Увы мне, простотою нагу, ныне же недоуменну! Но, о раю, ктому твоея сладости не наслаждуся, ктому не узрю Бога моего и Содетеля, в землю бо пойду, от нея же взят бых! И того ради не воздержания церковь Божия указа святые посты, да и мы удержимся от брашен и пития, и постом смирившеся, в покаяние приидем и воспомянем грех. Вопрошу вы, что есть грех? Подобает любви вашей знати: грех есть преступление заповеди Божией. От Бога заповедано не убий, не укради, а ты человече убиеши и украдеши, то и грех. Но на первое возвратимся. Что есть пост? Удержание брашен глаголется пост, или удержание от злых дел, аще творим злая дела. Не велика есть польза в том, чтобы хлеба не ясти. Господь глаголет: не такого поста избрах Аз, еже не ясти вам или не пити, аще бо и ясте, аще пиете, вся в славу Божию творите (1Кор. 10:31), глаголет Апостол. Диавол, нарицаемый сатана, никогда хлеба не яст и вина не пиет, а всегда злое мыслит роду человеческому, чтобы кого ввести в брань и тяжбы, и яко лев рыкая, ходит, иский кого поглотити (1Петр. 5:8). А вы братие поститеся тако: разрешайте всякия неправды, уклоняйтеся от клеветы, от зависти, от свара, от разбоя, от неправедной мзды, от ограбления, от ростоимания, от корчемнаго прикупления; а ныне у нас то и лучшее дело, чтобы вина накупить, хотя бы и последнее пропить, лишь бы пьяну быть. О горе нам! Несть в нас воздержания от ядения и пития. Пием и ядим безвременно, яко скоты. А аще и от хлеба воздержуся, то несмь, человек, но аки зверь; зверь бо хлеба не яст, а тело человече ест, тако и мы во гневе ядим тело человече, якоже Давид глаголет: снедоша люди моя в снедь хлеба. Аще бо воздержимся от хлеба, подобает воздержатися и от гнева и ярости, от клеветы и от всякия злобы; тогда не буду подобен зверю, но подобен буду Ангелу; Ангел бо не имать гнева и гордости, ни клеветы, ни свара, ни инаго коего зла. Також, аще кто и вина не пьет, и мяса не яст, а всяку злобу держит, то не лучше скота; всякий скот и мяса не яст и вина не пьет. Аще кто и на голой земле спит, а злое мыслит на друга своего, и того не хвалю: всякий скот постели не имеет, все на голой земли спит. И аз вопию с Давидом: скотен бых у тебе и скотом несмысленым уподобихся своим не воздержанием. О сицевых бо писано: не будите, яко конь и меск, им же несть разума, яко таковии царствия Божия не наследят; не внидет бо пост и молитва в душу оскверненную от пиянства, и пияницы не приемлет Бог. Аще бо приидеши пьян к брату своему, смердя, каково от тебя смердящаго Богу? Да где тя учиню – в постниках или пьяницах? В церковь приходишь пьян, стоишь, аки истукан, устами позеваешь, а очима насилу прозираешь, с ноги на ноту переступаешь, хребтом стены подпираешь, слюну умножаешь, часто плюешь, а от пиянства лице твое изменяется, сила и крепость твоя ни во что обращаются. Аще кто пиянство любит тот богат и мудр не будет. Оставите злое пиянство; от пиянства бо и чревоугодия многая злая в мире сем быша: Адам за снедь и со Евою веселый рай погубиша; Лот пьяный во кровосмешение с дщерьми смесися; а того обычая злаго пиянства подобает и нам хранитися. В том же обычае пьянством и мы ныне пребываем, многие грехи и беззакония в пиянстве сотворяем. Где нечистыя блуды? в пиянстве. Где брани? у пьяниц. Где кровопролития? у пьяниц. И за та беззакония наша казнит нас Бог бедами и скорбями, гладом и войнами, якоже глаголет Господь чрез Моисея192: Аз Господь Бог ваш, за беззаконие ваше сотворю вам сице: приставлю на вы неимение, сиречь нищету и раны и коросты, вреждающия очи ваша и душу вашу сушащия, и всеете вотще семена ваша, изъядят бо я супостаты ваша и простру лице Мое на вас и падете пред враги вашими и побегнете, никим же гоними; един погонит вас сто, а от ста побегнет вас тьма; вложу страх в сердца ваша и падут трупия ваша на снедение птицам небесным и зверем земным; из града, из коего выходило тысяща, в том останется сто, а из коего выходило сто, в том останется десять; а се град цел, а за утра пусть пребудет, и соберутся жителие из пяти градов во един, построят домы, да не удастся жити (Лев. 26). А сия вся злая попустит Бог за грехи наша. О горе вам, окаяннии человецы, понеже не престанно согрешаете, учению не внимаете; сице бо учит Предтеча: покайтеся! А грехолюбец отвещает: ныне я млад, успею покаятися в старости, Бога умолю, и все доброе могу в старости исправити. А ныне я млад, покушаю сладко, напьюсь пьяно, поживу славно, и платье изношу красно, и всего наслаждуся, и довольно навеселюся. Уже в старости однако (все равно) каятися и Богу молитися, и в старости мене Бог помилует. О человече, не надейся на младость, как еще доживешь до старости? Послушай Господа глаголюща, яко не весте дне и часа, когда приидет кончина, сиречь смерть (Мф. 24:36), смерть бо грешником люта. О грехотворче, убойся, аще яси и пиеши и без боязни грешиши, али ты без смерти будеши? Не прельщайся, от смерти бо не уйдеши. Не знаем, доколе живот наш и когда смерть будет, а аще обрящет ны смерть во гресех, то почто и родились? Потщися чадо отложити бремя греховное, и очисти тело твое постом, украси чистотою, омый тело слезами, накади благоуханием молитвы, то со святыми причтешися и царство небесное получиши.

24) Поучение в неделю 3-ю святаго поста

Честно есть и благословенно всякому человеку то древо, которое сладко вкусом, красно видением, благовонно обонянию, мног плод приносит. Аще к тому того древа плод сильно полезен и на всякия болезни здрав бывает, то безценное может нарещися древо. Кто бы от ценителей премудрых, какову сотворил цену оному райскому древу, еже наречеся древо жизни? От Бога дано ему действо. То древо райское такову имеяше в себе силу, – аще бы изнемогший человек и состаревшийся телом вкусил бы от того древа плода, то бы первую силу и крепость восприял, и престарелое бы во младость преложилось. И таковые плоды коею бо ценою купили царие земнии и прочий богатии людие? Не усомневаюся аз глаголати, не токмо бо все имение, но и венцы своя отдали бы за таковый плод, и изволили бы лучше здраво и крепко во веки без той красоты жити и без богатства быти, нежели в красоте суще, а в немощи телесе и болезни страдати, к тому же и лютыя смерти на всяко время боятися. Воистину все злато вселенныя тому древу не равно, все камение честное и вси адаманты ему не достойны и вся богатства сего мира ему не подобна. Что и по тому есть явленно, яко Бог всемогущий всех драгих и красных мира сего, за согрешение Адамово не отъял от них, но им самим и чадам их вся та вручил, и рыбы в реках, и звери в лесах вся им покорил, единаго токмо древа райскаго не изволил вручити; и того ради древа райскаго изгна их из рая Бог, сице рече: да не когда Адам прострет руку и возмет от древа жизни и снесть и жив будет во веки (Быт. 3:22), и изгна Бог Адама из рая, и того ради единаго древа веселый рай заключи и стража пламеннооружнаго пристави, по свидетельству Боговидца, глаголюща: и пристави херувима и пламенное оружие обращающееся хранити путь древа жизни (Быт 3:24). О погибели, слез достойныя! Но не плачемжеся того древа неутешно. Аще бо того перваго древа первым Адамом лишихомся, то второе древо вторым небесным Адамом получихом, яко лучшим лучшее, его же плодом вечный смерти избавихомся. Кое бо второе древо? Есть бо то древо всечестный и животворящий крест Господень, ныне торжественно покланяемый и от всех верных почитаемый. То есть древо животное, крест Господень, на нем бо распятся Иисус Христос и аки плод на древе висяше, и от того плода аще достойно мы ядим, не умираем, но и во веки живы будем с Ним, от Него же и оправдание приемлим. Оправдание бо бысть нам на древе креста Господня кровию Его, яко же воспоминает Апостол Павел: оправдаеми туне благодатию Его избавлением, еже о Христе Иисусе. Его же предположи Бог очищение верою в крови Его, в явление правды Своея (Тим. 3:24–25); се есть плод предрагий древа креста Господня, егоже есть плод, яко древа жизни, плод животный. Сам Христос глагола о Себе: ядый Мою плоть и пияй Мою кровь, во Мне пребывает (Иоан. 6:56). Аз бо есмь воскресение и живот (Иоан. 11:25), от Негоже жизнь наша и временная дадеся и вечная устроися; о Нем и живем и движемся и есмы (Деян. 17:28). Благословенно наречеся древо Ноева ковчега, яко тем человецы и скоты спасошася от казни Божией всемирнаго потопа; наипаче же благословеннейшее есть древо крестное, яко тем чрез истиннейшаго небеснаго Ноя не осмь душ человеческих, но и вси по вселенней спасаются, не от потопа токмо, но от вечнаго мучения, не токмо праведницы, но и грешницы спасутся, аще от грехов престанут и ко Господу обратятся с истинным покаянием. А Бог наш милостив и щедр, удержит праведный свой гнев, не показнит нас потопом ярости своея, помня примирение с нами, чрез Христа Господа сотворенное, о немже Апостол Павел вещает: зане Бог бе во Христе, мир примиряя Себе, не вменяя им согрешений их и положив в нас слово примирения (2Кор. 5:19), еже бы к тому не потопити нас потопом. Яко же бо во всемирном потопе ковчег Ноев не ста во юдоле, ни на каких местах, но на высочайших горах арменских, тако и мысленный сей ковчег, крест животворящий, имже истиннейший Ное Христос Господь спасе род наш от греховнаго потопа, на высоких горах ныне ставает, егда ставает на главах церковных, на престолах Божественных, на царских диадимах, на митрах Архипастырьских, и в день страшнаго суда станет на облацех превысоко, яко знамение победы Христовы. Тогда, рече, явится знамение Сына Человеческаго на небеси, (Матф. 24:30), да будет то знамение добре подвизавшимся в радость и веселие, зле же в мире живущим в страх и мучение. Кое се знамение? То знамение крест Христов. Он бо есть христианская философия, всех святых богословие, архиерейская слава. Крест царем держава, воем победа, пленником освобождение. Крест иноком оружие, он земли красота, а небеси удивление. Сие древо пречистое зрящим нам, возносимое ныне во церкви, прилично то глаголати, что рече Боговидец о купине горящей и не сгараемей. Се тамо шед, вижду, что видение се великое. Занеже то се видение есть великое, еже егда узре солнце на голгофе водруженное и Бога во плоти на себе содержащие, абие устрашившеся и лице свое златозарное измени во кровавый зрак, луна во тьму преложися, завеса церковная без рук человеческих на двое растерзася, камения расподошася, земля потрясеся, и вся стихии изменишася. Наша точию сердца тверже камени являются. Такое видение великое видим, ни мало сердцем не умягчаемся, ни единыя капли слез за грехи наша не источаем. Видим древо крестное, кровию Христовою за грехи наша облиянное, а мы не токмо крови, но ни единыя капли пота Бога ради не хощем испустит Сам Христос моляшеся Богу Отцу Своему даже до пота, бысть же пот Еко яко капли крове, каплющи на землю. И тое крове Христовы, на кресте излиянное за нас грешных, мы многогрешнии слезами своими омыти не тщимся и живем тако, яко и грехов не видим. А кто на земли без греха? Токмо един Бог; а посему, когда мы уже не без греха, то нам должно грехов своих каятися, а Бог милостив и верен оставит нам прегрешения наша. Братие! Лучше бы нам зде плакатися грехов своих, да не восплачемся тамо вечно. Блаженни бо плачущие о грехах своих, яко тии утешатся утешением вечным во царствии небесном.

25) Поучение в неделю цветную

Не бойся, се Царь твой грядет к тебе кроток (Иоан. 12:15). Словеса суть Евангелиста Иоанна, в зачале 41 положенная.

Царских тайн праздник празднующе днесь, братие, приклоните ухо ваше во глаголы уст моих. Царю земному, егда ход бывает в кой град или на царство, то воинство ему управляют и дороги пред ним очищают; а егда той царь приходит в свой град, то от граждан встречи ему бывают. Тако и Царю небесному, Царю царствующих и Господу господствующих, егда входящу во Иерусалим, множайши народы Его сретают, ризы своя по пути Его постилают, друзии же резаху ветви от древ и постилаху по пути; народи же, предъидуще Ему и вследствующе (Матф. 21:8–9), воздаяху Ему честь, яко истинному Царю небесному. Тако и вы сей день почтите смирением и любовию, радостию и миром, и сице украсите праздник, и веселящеся в церковь Божию придите, возвеличим Христа с ваиями и ветвми, песньми зовуще: благословен грядый во имя Господа Спаса нашего. Но послушаем и Евангельских словес. Евангелист Матфей глаголет сице: рцыте дщери Сионове: се Царь твой грядет к тебе кроток (Матф. 21:5). О Евангелисте! Кто есть сей Царь? И отвечает церковь: сей есть Царь небесный Иисус Христос. Камо грядет? Идет во Иерусалим. Почто, – не царство ли земное прияти? Никако. Сам бо глаголет: царство Мое несть мира сего (Иоан. 18:36); но идет пророчество исполнити. Кое пророчество? Еже Захария пророчествова, тако глаголя: не бойся дщи Сионя, се Царь твой к тебе грядет кроток и спасаяй тя (Зах. 9:9); понеже бо прежние царие, кои во Иерусалиме царствоваша неправеднии бяху, мздоимцы и лихоимцы и гордии; а мною проповедуемый Царь не таков лихоимец или горд, но кроток и смиренномудр, ничего гордаго не пользует, прииде бо, на жребяти осли седя, а не на копех изрядных. Не имея с собою воинства, вниде Господь, но на жребяти осли седе, слуг не имея, ни оруженосцев, но многою кротостию и смирением входит, а то все нам пределы и чины поставляя, еже бы не искати нам преизлишних, но всегда бы смиренномудрие имети, не гордитися, не крамолитися, якоже чтется во Евангелии: тогда Иисус посла два ученика Своя, глагола има: идита в весь, яже прямо вама и обрящете осля привязано и жребя с ним, отрешите и приведите Мне; шедше же ученики приведоста осля и жребя и возложиша вверху ея ризы своя, Иисус же ceдe (Матф. 21:3–6) на не, со смирением, не име бо гордости. Тако и нас научает, чтобы и нам не гордитися. Сам Господь глаголет: научитеся от Мене, яко кроток семь и смирен сердцем (Матф. 11:29). Мы же творим не тако, но вся наша дела сотворяем с гордостию. Не токмо князи и бояре, но и духовнаго чина вси отложили смирение, а возлюбили гордость. Егда в кой путь поезжают, тогда они возники прибирают, коней изрядно убирают, и сами себе украшают, и тем все суетную славу себе сотворяют, а того они, славолюбцы, не помышляют, что о них Давид вещает: егда бо разбогатеет человек, или егда умножится слава дому его, а внегда умрети ему, не возмет вся, не снидет с ним слава его, яко душа его в живот его (Пс. 48:17–19). А Спаситель наш, Царь небесный, входит во Иерусалим не гордо, но зело кротко, якоже Пророк глаголет: не бойся дщи Сионя, се бо Царь твой грядет к тебе кроток; приходит бо не на престол царский сести, но за нас грешных на крест взыти и смерть претерпети. И егда вниде Иисус во Иерусалим, многа чудеса сотвори, хромыя исцели, слепыя просвети. И видевше архиереи и книжницы чудеса яже сотвори Иисус, негодоваша и завистию распаляхуся, а отроки в церкви ветви руками держаху и зваху, глаголюще: осанна Сыну Давидову (Матф. 21:14–15). Отроки Божество проповедуют, осанна сиречь Спаситель; дети хваляху гласом, а отцы распыхахуся сердцем и глаголаху Иисусови: слышиши ли, что сии вещают, Спасителя Тебе нарицают. Иисус же рече им: или сего не чли есте, яко из уст младенец и сущих совершил еси хвалу (Матф. 21:16). Возлюблении! Се Господь наш не запрети отроком хвалящим Себе, но и паче похвали их, яко Спасителя Его нарекоша. Тако и вы хвалите Бога, воспевайте Ему славу и честь. Якоже царю некоему, имевшему седмь дщерей и приидоша людие некотории к тому царю с дарами и поклонишася ему, такожде почтиша дарами и дщерей его царских, первую, вторую, третью, четвертую, пятую, шестую, а седьмую презреша, мневше ю ничтоже сущу, а у него царя все дщери равны, что большая то и меньшая; и за то на них царь прогневася, что не почли последнюю его дщерь. Тако и вы, благовернии людие, почитайте небеснаго Царя дарами, ов молитвою, а ов постом со слезами. Такожде и сей святый пост, все седмь недель, яко седмь дщерей Царя небеснаго почитайте, поститеся в первую неделю, во вторую, в третью, в четвертую, пятую и шестую, а седьмую неделю, яко последнюю, не презирайте, но почитайте постом и молитвами, яко богоугодными дары, таковыми бо жертвами благоугождается Бог (Евр. 13:16). Якоже бо сии отроцы Богу потрудишася, изыдоша Ему на сретение и принесоша Ему дары – ветви с плодами; тако и вы Богу себе потрудите и духовные плоды от себе приносите, яже Апостол поучает: плод духовный есть любы, радость, мир, долготерпение, благость, милосердие, вера, кротость, воздержание (Гал. 5:22); аще бо сицевые плоды принесем, то уподобимся древесем плодоносным и травам цветоносным; человек бо, яко трава, глаголет Давид. О человече! Посмотри на злаки травныя, понеже бо и травы испущают от себя цветы; воззри на древеса всякий, и древеса убо приносят различный леторосли и листвие и плоды, а ты ни чего не приносиши, наг, точию гниды и вши, блохи и черви. И паки, древеса подают от себе и масло и вино и миро, а ты человече ничего добраго не подаешь, точию слюну и блевотину и прочая нечистоты; травы бо изводят из себе благоуханные запахи, а древеса подают благовонныя сладости; а ты человече подаешь от себя смрад и мерзость и иныя нечистоты. О человече! Аще не хощеши быти смраден и мерзостен, а хощеши быти чист, и ты очисти тело свое постом, украси чистотою, омый тело свое слезами, насади благоухание молитвою, то со святыми причтешися и царство небесное получиши.

26) Поучение на освящение Церкви

Удивляетмися ум и радуется душа о сих, яко научает Господь человеков в толикой чести имети дом славы Своея. Пророк и царь славный, провидя Духом святым дивную славу и не изреченную тайну в церкве Христовой и радуяся духом, рек о ней: дивна и свята церковь Твоя Боже! (Псал. 64:6). По истинне убо свята, яко всякой скверне не причастна, очищенна бо огнем Духа Святаго, освященна кровию Сына Божия, сего ради свята во веки; а еже рек, дивна во веки есть в правду, понеже о ней дивное смотрение Божие исполнися и дивны дары Духа Святаго в ней сокровенны суть; дивна есть, яко двояко светится славою Божиею на земли низу и на небеси горе, в настоящем и в будущем веце; видима есть и невидима; видима есть в плоти естества человеческаго на земли, невидима же в душах верных на небеси, видима есть и в стенах каменных и древянных; и дивна, и в правду в ней славится имя Божие, молитвы и коленопреклонения в ней творят вернии человецы, и благодарение воздают Сотворщему небо и землю и яко в видимой плоти живет разумная душа, и дары Духа Святаго в ней, тако и в стенах видимой церкви живет невидимая слава Божия и разумная жертва, хваление, пение и Духа Святаго общение пребывает не отступно в пречистых тайнах тела и крови Господни. Нарицается же дом молитвенный церковию и приемлет имя от перваго имене разумной церкви. Тако же и видимая церковь, сущая в стенах каменных и древянных, и та собирает внутрь себя многих верных человеков на молитву и хваление Божие и нарицается собранием, ибо ту собираются человецы видимии. Ангели, невидимии духи, хвалити Бога и славити со священники. Ибо тамо Ангелы Божии невидимо с пресвитеры священная действуют и молитвы верных человеков к Богу относят; сего ради Господь рек: дом Мой, дом молитвы наречеся (Лук. 19:46). Подобает и нам имети дом Божий; аще и из бездушных камений создан, по благочестием и светом Триипостаснаго Божества окружен и в таком свете пребывает во веки. Подобает правоверным и сие ведати, яко Бог требует места избраннаго на честь и хвалу Свою, да не в безмолвии беседует человек к Богу и Бог к человеку. Вемы, яко везде есть Бог и всякое место наполняет величеством Своим, ибо везде сый; но аще и всюду Бог есть, но не всюду беседует к человеку. Бог был во Египте и в Мадиамской земле, но ту не яви славы Своея Моисею и не беседова с ним; Бог был посреде полка жидовскаго, но не подал ту закона и оправдания. Со Илиею беседова в горе Хоривской и ту показа ему славу Свою. Ездре среди поля, Иезекиилю при горе Ховар, вне града Вавилонска, Даниилу такожде вне града, Самуилу и Захарии не в простом и общем дому, но в дому избранном и Господнем. Зде показует ясно Писание, яко требует Бог избраннаго места, да в нем славится пречистое и страшное имя Его. Сего ради повеле Моисею, да сотворит Ему храм свидения, показа ему образ на горе Синайской, каковым подобием имать быти храм, на три пределы. И в день, в оньже сконча Моисей храм Господень, тогда собрася к нему весь Израиль. Пред очима всех людей прием Моисей кровь козлию и покропи ею весь храм, и книги, вся людие помаза елеем и посвяти храм и алтарь и Аарона брата своего на священство. Тогда от сынов израилевых дванадесять князей принесоша дары Господеви: дванадесятъ чаш златых и блюд серебренных (Числ. 7:84). Аще кровь телчия и козля требова места избраннаго, и в толикой чести бысть, то кольми паче кровь животворящая Сына Божия требует места удобнаго и посвященнаго, идеже приносится за живот всего мира. А в не простом и общем дому сию тайну совершати подобает, якоже еретицы обыкоша творити с собратией своей в простых домех, аки бы на хвалу Божию, но на большее поругание святынь. А то полно злоречия и хуления. Понеже бо избирает Себе Бог угодная места и благоволит жити во храмех, от рук человеческих созданных, яко бысть при Соломоне. Создав дом имени Господню, велий пред видимым домом и обогатив его златом, сребром и камением многоценным и всякою красотою украсив, и призвав священников и Левитов посвяти его по обычаю законному; и внегда бысть посвящение, тогда призре Господь на дом Свой, исполнибося дом весь славы Господней и вси людие радовахуся. Аще же оный храм, от Соломона созданный, удостойся славы Божией, то многой большей славы и благости Духа Святаго сподобляется церковь наша в день посвящения; ибо вместо облака светлаго, приходит невидимо днесь Дух Святый и вселяет олтарь славы Господней и покрывает и освещает и просвещает служащих Ему. Тако и в новом завете устрояли церкви царь Константин и царь Иустиниан, и обогащали церкви свои от сокровищ своих златом и камением многоценным. Не точию сосуды церковные, но и стены и алтарь от бисера сотворяли, и ризы святителем светлы от злата чистаго сотворяли, доброю верою и несумненным упованием творили дело Господне на получение вечнаго блаженства. И тако данное им богатство добре расточали на честь и хвалу Божию и никого ничем не отягощали и излишних даней на то с подданных не собирали. И ныне, аще кто пожелает святую церковь построити, то не стены едины созидайте, но и внутрь украшайте ризами, сосудами и книгами, а наипаче всех сих – людьми благоразумными, священники богобоязненными, а не таковыми, иже назирают корчемницы. А священницы должны суть усердно строити дом Божий, украшати его всякою красотою, наипаче же ученьми и проповеданием слова Божия, иже наибольшею красотою есть дому Божияго; и тако вси священницы сподобляются сугубой чести, наипаче же сии, иже труждаются в проповеди слова Божественнаго. Таковии спасают многих; они суть светом тьме, солию земли, звездами неба церковнаго, столпами дому Божия, трубами, размеряющими стены греховнаго града, и пастырями добрыми, отгоняющими мысленных волков от стада овец; они суть строители тайн Божиих, и сего ради достоит им познати свою честь и хранити ю, яко зеницу ока, да не обратится свет их во тьму и слава в безчестие, понеже они суть предводители в царство небесное, еже буди получити нам. Аминь.

27) Поучение в 8-й день месяца Септемврия на Рождество Пресвятыя Богородицы

Что тя наречем, о благодатная. Сия словеса во стисе церковь мати наша поет.

Якоже царь земный егда хощет в коем граде жити, то первее в том граде устрояет себе дом и созидает палату царскую и украшает ю всяким украшением царским и тогда в нее входит жити и почивати; тако и Царь небесный Иисус Христос, Царь над всеми царствующий и Господь господствующих, егда восхоте воплотится от Приснодевы Марии и приити в мир сей плотию, яко во град некий, и пожити в нем, то, во первых, производит Себе и устрояет прекрасную палату и дом славы – пречистую Деву Марию и украшает ю всяким украшением духовным, многими дарами небесными; производит от праведных Иоакима и Анны, от не плодных суще плод благоприятный, пречистую Деву Марию, родиста бо сию по обетованию. Слышатели православнии! Иоаким бо и Анна не имяху чад и о том печальны беста; и во едино время Иоаким и Анна приидоша в праздник и принесоша овча в дар Богу, чтобы Бог подал чадо. Архиерей же не прия их в церковь с приношением, тако глагола: отъидите вы с приношением от церкви, прогневавшии Бога Израилева, затвори бо Бог утробу вашу неплодством; вы бо не имате чад, за то и приношение ваше не приемлю. Тогда зело опечалишася Иоаким и Анна и начата со слезами просити у Господа, дабы дал чадо и начата молитися, тако глаголюще: Господи, приими моление и слезы наша, дай нам чадо и наследник дому нашему, да то отроча воспитанию, тебе в дар принесем, якоже Авраам своего сына. Господь же услыша моление их, посла им Архангела Гавриила благовестити о зачатии. И прииде Архангел к Иоакиму, тако рече: Иоакиме! услышана бысть молитва твоя, жена бо твоя Анна родит тебе дщерь и наречеши имя ей Мария, и тоя ради славен будеши в народех. По сих, зача Анна во утробе и роди отроча женска полу кроме клятвы первородной, еще в ложеснах матерних освящена Духом Святым; и егда Анна роди дщерь, тогда Иоаким сотвори пиршество велие соседям своим и призва священники, да нарекут имя ей и да благословят дщерь его. И пришедше священницы и благословиша отроча и нарекоша имя ей Мария, прежде от Ангела нареченное. К сему же и мы церковию вопием: что же тя наречем, о благодатная! И отвещаем: небо. Того ради называем ю небом: якоже бо чувственное небо всех нас покрывает, под солнцем сущих, тако и Она, небо наше мысленное, покрывает вся православныя христианы. Кто к Ней с теплыми молитвами прибегает, Она милосердием Своим покрывает, ходатайством Своим у Господа от гнева Божия нас защищает, от праведныя Его казни заступает, и соблюдает нас от всяких скорбей, бед и печалей. К сему небеси, православнии христиане, возводите очи ваша со слезами и сердечным воздыханием, умильно просите всяких ваших требований, к Ней проливайте теплыя ваши молитвы; люди печальнии, больнии, сироты, вдовицы, нищии и богатии, раби и господне, вкратце да реку вси православнии во всяких нуждах ваших дерзновенно и надежно к Ней прибегайте. Она бо всем нам готова помогати, яко милосердная мати, яко море щедрот и милости. И якоже в мори никогда не оскудевает вода, тако и Божия Мати всегда подает нам милость и благодать. Еще что тя наречем, о благодатная? Наречем ю рай. Якоже рай чувственный име в себе древо животное, егоже плодом можно бы человеку житие временное продолжати, дóндеже хотел бы; тако и пречистая Мария, рай наш мысленный, возрастила нам древо жизни – Христа Господа, плодом Котораго можно питатися во веки, якоже Сам Христос глагола: Аз семь хлеб животный, иже сшедше с небес, и аще кто снест от хлеба сего, жив будет во веки (Иоан. 6:41). Еще наречем ю Деву. Почему есть Дева? По превосхождению; Она бо превзыде вся девы, бывшия и будущия, всеми добротами Своими и чистотою; иныя бо девы не зачинают чад в девстве. Она же прежде рождества и в рождестве и по рождестве всецелая дева, никогда не желаше мужеска смешения познати, да присночистаго Сына чистая будет и Мати, нетленнаго Плода небеснаго не тленна пребудет родительница. Напоследок, что тя наречем, о, преблагословенная Дево Мария? Наречем Тя Матерь, – Матерь же величайшую, Великаго Бога родительницу, Матерь толь великую, Ей же равныя не виде солнце и видети не может, от Ея же большия не воста рожденных женами, занеже матерство Ея велико, по величеству Сына и Бога. И то величество Ея чтуще, Церковь мати наша сладко во вся дни воспевает сице: честнейшую херувим и славнейшую без сравнения серафим, без истления Бога Слова родшую, сущую Богородицу Тя величаем. Есть же Она Мати не токмо Сыну и Богу, но и всем нам православным. – Мати Сыну Своему, по естеству человечества, Мати нам же по милосердию и по ходатайству и по заступлению. Якоже бо мати родная всегда милосердная есть к чадом своим естественным: питает я, греет и одевает, подъемлет; аще дети и досадят, она все прощает и вся немощи их любезно терпит. Тако и Дева Мария питает нас брашном милосердия Своего, поит ны млеком щедрот, греет ны ризою покрова Своего, одевает нагость нашу одеянием брачным; падающия в ров грехов, подъемля рукою пособия Своего, утверждает жезлом утверждения Своего. А егда мы по согрешении каемся, Она скоро прощает и Бога ко прощению молитвами Своими преклоняет. Терпит же вся немощи наша, яко знающая поползновение наше. Тем же к Ней, яко милосердной Матери, с дерзновением и надеждою вси притекайте и теплыми молитвами, со усердными слезами молящеся Ей о прощении грехов наших и о исполнении требования нашего. Изряднее же вси единеми усты и единым сердцем да молим благоутробие Ея, да и Она умолит Сына си и Бога, еже подал бы нам оставление грехов, изобилие плодов, мир и тишину и благополучие, и вечных благ наслаждение получити да сподобимся о Христе Иисусе. Аминь.

28) Поучение на Воздвижение честнаго и животворящаго креста Господня193

Честно есть и благословенно всякому человеку то древо, которое сладко вкусом, красно видением, благовонно обонянию, мног плод приносит; аще же ктому древа того плод сильно полезен и на веяния болезни, то безценное может нарещися древо. Кто бо от ценителей премудрых, какову сотворил цену оному райскому древу, еже наречеся древо жизни? От богоданного ему действа то древо райское такову имяше в себе силу, аще бы изнемогший человек и состаривший телом, вкусил бы от того древа плода, то бы первую силу и крепость восприял, и престарелое бы тело во младость преложилось. И таковые плоды коею бы ценою купили царие земстии и прочие богатии людие? Не сомневаюся аз глаголати: не токмо бы все имение, но и венцы своя отдали бы за таковый плод и изволили бы лучше здраво и крепко во веки жити без тоя красоты и без богатства, нежели немощию телесе и болезнями страдати и лютыя смерти на всякое время боятися. Воистину все злато вселенныя тому древу не равно, все камение честное и вси адаманты ему не достойни и вся богатства сего мира ему не подобна. Что и по сему есть явлено, яко Бог всемогущий всех драгих и красных мира сего, за согрешение Адамово, не отъял от них, но им самим и чадам их вся та вручил; рыбы в реках и звери в лесах вся им покорил, единаго токмо древа райскаго не изволил державе их вручити, и того ради древа райскаго изгнал их из рая. Бог рече сице: ныне да не когда прострет Адам руку и возмет от древа жизни и снест и жив будет во веки. И изгна Бог Адама из рая (Быт. 3:22). И того ради единаго древа веселый рай заключи и стража пламеннооружнаго пристави, по свидетельству Боговидца, глаголюща: и пристави херувима и пламенно оружие обращаемое хранити путь древа жизни (Быт. 3:23). Оле убытка несмысленнаго, оле гибели, слез достойный! Но не плачемся благочестивии слышателие того древа не утешно. Аще бо праотцем нашим Адамом того древа лишихомся; но вторым небесным Адамом, яко лучшим, лучшее получихом, еже есть плодом того древа вечныя смерти избавихомся и безконечную жизнь восприимем. Есть же то древо, благословеннии христиане, всечестный и животворящий крест Господень, ныне торжественно воздвизаемый и от всех верных благочестно почитаемый, яко на нем распятся Господь наш Иисус Христос, иже искупил нас от адския погибели честною Своею кровию. Сей есть плод предрагий благословеннаго древа креста Господня, – плод животный. Сам Господь о Себе глагола: Аз есмъ воскресение и живот (Иоан. 11:25). Благословенно древо Ноева ковчега, им же человецы и скоты от потопа спасошася; но много паче благословенно есть древо креста Господня, яко чрез истиннаго небеснаго Ноя не осмь душ человеческих, но вси во вселенней спасаются, не от воднаго, но от огненнаго потопа, не от временнаго, но от безконечнаго, не токмо праведницы, но и скотоподобнии грешницы. Господи, оружие на диавола крест Твой дал еси нам, трепещет бо и трясется, не может взирати на силу его. Силою креста царь Константин победил Максентия. Силою креста от смерти свобождаемся; сила крестная есть лежащих воздвижение, стоящих укрепление, смиренных защищение, гордых низвержение, погибель демоном, ада раззорение, небес отверзение, смерть неверным, жизнь праведным. Крест – христианская надежда, крест мертвых воскресение, крест слепым вождь, хромым жезл, нищим утешение! Воистину честный крест и всего мира утешение! Крестом чела наша знаменующе, свобождаемся от диавола. На кресте Господь наш рукописание согрешений наших раздра. Какое же рукописание раздра, о том побеседуем. То рукописание раздрано, егда Господь наш в раю глагола Адаму: от древа сего в онь же день снесте, смертию умрете (Быт. 2:17). То рукописание, егда Господь наш от земли на крест вознесен, во первых привлече Бога Отца к Себе, привлече Бога Духа Святаго, привлече Ангели, привлече Апостолы и во первых Матерь Свою, Та бо, сердцем страждущи распятию; привлече мироносицы жены, послежде привлече многия тысящи мучеников и мучениц, привлече грешники, во первых на кресте разбойника и ины безчисленныя обрати к Себе; привлече небо, егда со светилы страдаше помрачением лучей; привлече землю, егда потрясеся, привлече вземлянныя, силою бо крестною многих телеса от гробов возсташа; привлече и ад преисподний – души святых изведе оттуду.

Побеседуем о кресте, что высота и глубина и долгота. Глубина знаменует веру, высота надежду, широта любовь, долгота претерпение. А также высота знаменует небесе отверзение, глубина ада раззорение, прямо положенное знаменует восток и запад, яко весь мир крестом искупил. А прежде рождества Христова прообразовали о кресте: Иаков, егда поклонися вверху жезла, крестообразно преложи руце на сыны Иосифовы благословя. Моисей, егда жезлом море крестообразно удари, Израиля спасе, Фараона же потопи. А егда Моисей утвердил на древе змия медяна, уязвленные от змиев людие, возглядающе на змия медяна, здравы бываху. Тако Господь наш от змия ветхаго, адскаго, смертие уязвленный род наш, совершенне исцеляет.

Благословеннии христиане! Иудеи от зависти то святое оружие, крест, закопали; бяше в земных недрах глубоко; благочестие же царя Константина и матери Елены ископа из глубины и воздвиже высоко. Воздвизается крест, а диавол низвергается. Воздвизается крест, идоли падают. Воздвигается крест, и сотрясается сень ветхозаветная. Воздвизается крест, и еллинское изчезает блядословие. Воздвизается крест на жертвенники святыя, яко на нем пожреся Агнец Божий. Воздвизается крест на главы церковныя. Воздвизается крест на венцы царские и на перси их. Воздвизается крест на митры и персии архиерейския. Воздвизается крест на чела и на перси всех православных христиан, яко знамя христианства нашего и яко печать Царя небеснаго. Воздвизается честнейший крест на всякая пречистая места, яко красота Божественная, еже вы, православнии слышателие, зряще ныне в церкви всечестно воздвизаемый, главы преклоните ваша, да приимете плоды духовные того древа благословеннаго; да приимете оправдание, благословение, освящение, спасение от руку на нем вознесшагося Господа. Купно же вознесите Господа Бога нашего и кланяйтеся сему подножию ногу Его, яко свято есть. Глаголите благоговейно: кресту Твоему покланяемся Владыко и святое воскресение Твое славим. А Христос Господь и зде прославит вы над всеми роды иноплеменными за благочестие ваше, и в будущей жизни вечныя славы причастники сотворит во царствии Своем. Аминь.

29) Поучение на введение Пресвятыя Богородицы194

Ангели введение Пречистыя зряще удивишася, како Дева входит во Святая Святых. Сия словеса церковь, мати наша воспевает.

Якоже царь некий егда хощет в коем граде жити, то первее в том граде устрояет себе дом и созидает палату царскую и украшает ю всяким украшением царским и тогда в нее входит жити и почивати. Тако и Царь небесный Иисус Христос, Царь всеми царствующий и Господь господсвующих, егда восхоте воплотитися из Приснодевы Марии и приити в мир сей плотию, яко во град некий, и пожити в нем человечески, яко человек в смирении велицем, то в первых производит себе и устрояет прекрасную палату и дом славы Пречистую Деву Марию и украшает ю всяким украшением духовным, многими дарами небесными; производит же сию от праведных Иоакима и Анны, от неплодных суще плод благоприятный, Пречистую Деву Марию, родиста бо сию по обещанию. Бога молю о помощи во глаголании, а вашу любовь о прилежное слушание. На первое да послушайте о рождении пресвятыя Девы. Слушателие православнии! Родися бо пречистая Дево от рода царска, от дома Давидова, от Иоакима и Анны по обетованию. Иоаким бо и Анна не имеяху чад и о том печальны беста; и во едино время приидоша на праздник и принесоша овча в дар Богу, чтобы Бог подал чадо. Архиерей же не прия их в церковь с приношением, тако глагола: отъидите вы с приношением от церкви, вы бо прогневаете Бога Израилева, затвори бо Бог утробу вашу неплодством; вы бо не и мате чад, за то и приношение ваше не приемлю. Тогда зело опечалишася Иоаким и Анна начата со слезами просити Господа, чтобы дал чадо, и начата молится, тако глаголя: Господи! Приими моление и слезы наша; дай нам чадо и наследие дому нашему, да то отроча воспитавше, тебе в дар принесем, яко же Авраам своего сына. Господь же, услышав моление их, посла к ним Архангела Гавриила благовестити о зачатии. И прииде Ангел к Иоакиму, тако рече: услышана бысть молитва твоя, жена бо твоя Анна родит тебе дщерь и наречеши имя ей Мария, и тоя ради славен будеши в народех. И по сих, зача Анна во утробе и роди отроча женска полу кроме клятвы первородной, еще в ложеснах матерних освященна Духом Святым. И егда Анна роди дщерь, тогда Иоаким сотвори пиршество велие близким и соседом своим, призвав и священники, да нарекут имя ей и да благословят дщерь его. Пришедше же священницы и благословиша ю и нарекоша имя ей Мария, прежде от Ангела нареченное. По сих отроковица преспеваша возрастом и благодать Божия бе на ней. И егда отроковица исполнися возраста в три лета, тогда Иоаким и Анна обет свой помянули, чтоб дщерь свою в дар Богу отдати. И собраша вся сродники и соседи своя в дом свой, да честно проводят дщерь их в дом Господень. И пришед в дом, сродники Иоакимовы с радостию сотвориша глаголанное и взяша в руце свои по свяще и поведоша ю в церковь Господню в дар Богу, и егда приведоша ю, тогда глагола Иоаким: не царю земному вдаем сию дщерь нашу, но к небесному Царю и Богу Израилеву возводим ю. И егда приведоша отроковицу в дом Господень и великому святителю Захарии, той, изшед в сретение их, благослови я и любезно прия отроковицу за руку, рече к ней: иди за мною Богоизбранная отроковице; и сия рекши, введе ю во Святая Святых. Радостно приемлет ю Захария, и представляет Богу, яко дар честнейший. И Ангельская воинства, зряще деву в церковь вводиму, зело удивляются: како не вместимаго Бога, во чреве вместити имущая, вмещается во Святая Святых. Тем же церковь поет: Ангели введение пречистыя зряще удивишася, како Дева входит во Святая Святых. И како Пречистая Дева входит в церковь, тако и мы, братие, да будем ходити в храм Божий. Она бо пречистая от рождения, трех лет суща, безгрешна и чиста, всегда в церкви пребывала, а мы грешнии, не чистии не токмо от трех лет рождения, но и до тридцати лет живем и в церковь не входим, а всегда грехи творим и не раскаиваемся, а надеемся на свою младость и говорим: ныне я млад, успею покаятися в старости, Бога умолю и все доброе могу исправити в старости; а ныне я млад, покушаю сладко, напьюсь пьяно, поживу славно, платье изношу красно и до полна навеселюся, а в старости буду каятися и Богу молитися, и в старости меня Бог помилует. О человече! Не надейся на младость, как еще доживешь до старости. Послушай, что глаголет Господь: яко не весте дне и часа, когда приидет кончина (Мф. 25:13), смерть; смерть бо грешников люта. О грехотворче! убойся, аще яси и пиеши и без боязни грешиши, или ты без смерти будеши? Не прельщайся сим, от смерти бо не убежиши; а когда уже смерти не миновати, то лучше ради Бога смерть прияти и Богу работати, а работа Божия есть следующая: молитва, смирение, кротость, долготерпение, благость, мир, безгневие, то Божия работа; а диавольская работа: гордость, лихоимание, гнев, объядение, ленивство, блуд. И так, братие, и вы блюдитеся от грехов и Богу работайте и тем спасение получите.

30) Слово на Рождество Господа и Бога нашего Иисуса Христа

Благовествую вам радость велию, яко родися вам днесь Спас (Лук. 2:10–11).

Егда у земнаго царя сын родится, то велия бывает радость во граде том людем; еще и послы посылаются по градом с грамотами о радости той, что родися царю сын над ними господствовати. Таковым образом и Бог Отец изволи о рождении Сына Своего великой на небеси быти славе, якоже Ангели воспеша: слава в вышних Богу! Благоволил Бог и на землю послати Ангелов Своих, благовестити на земли радость и мир в человецех благоволение (Лук. 2:14), якоже Лука возвещает. Рече бо Ангел к пастырем: благовествую вам радость велию. И потом со Ангелом бысть множество и иных вой небесных, хвалящих Бога и глаголющих: слава в вышних Богу и на земли мир в человецех благоволение! Слушатели благочестивые! Воистинну велика слава и радость нынешняго праздника Рождества Христова, понеже родися Сын Царя небеснаго, Сын Царя царствующих и Господа господствующих, Сын Бога истиннаго, прежде всех век из Отца без матере рожденный, ныне без отца из Матере нам родися не дани собирати злата и сребра, как земнии цари собирают. Земнии бо цари собирают дани и великии прибыли вымышляют, и оттого множество злата и сребра приобретают. К тому же многия грады и земли раззоряют, и того ради раззорения у бедных и сирот потоцы слез проливаются, а земля и море с кровию смешаны. Господь же наш родися не погубити, но спасти мир от плена адска и смерти вечный, даровати нам свободу и жизнь безконечную рождеством Своим. Разсудите себе людие, какова и нам милость Божия. Кто обретется на земле царь или князь который здравия ради подданных своих, дал сына своею единороднаго на жестокое мучение? Аз не обретаю ни одного который бы дал сына своего на смерть, токмо един Царь царствующих и Господь господствующих, Бог Отец Вседержитель изволил то сотворити – Сыну Своему плоть восприяти и родитися от Святыя Богородицы. Св. Иоанн Богослов сице глаголет: тако возлюби Бог мир, яко и Сына Своего единороднаго дал есть, да всяк веруяй в Него не погибнет, но имать живот вечный (Иоан. 3:16). За таковую Божию милость что воздадим? Должны и мы друг друга любити, яко и Христос возлюбил есть нас. Но мы все творим противно: друг друга не любим, ненавидим, завидуем, упиваемся, объядаемся и все творим богопротивно, а подобает нам друг друга любити; аще бо мы братию нашу возлюбим, то и нас Бог возлюбит. Возвеселися иногда Ной патриарх, егда сотворил он ковчег предивный, имже род наш спасеся от потопа. Тако подобает и нам ныне веселитися, яко сей ковчег мысленный, Божественная плоть Христа Бога нашею, зрится существом совершенна, ею же, яко кораблем, от потопа греховнаго род наш спасается, праведный и грешный, аще с покаянием прибегаем к сему кораблю Божественному и входим в оный с верою, исповедующе, яко малое сие отроча есть Бог велий, о Нем же пророк речи, кто Бог велий, яко Бог творяй чудеса, Ты еси Бог наш. О, любве неизреченныя! Виде бо Господь Бог падший род человеческий от прелести диавола; тогда Сын Божий преклонь небеса сниде на землю, и в плоть нашу облечеся, родися от Пречистыя Девы Марии, а в рождении Своем человеческом наготствует, а Божеством одевает небо облаки, покрываяй водами превыспренняя Своя, украшая землю цветы, древеса листвием и звери украшая шерстию. Алчет, да мы насытимся, внегда явитися нам славе Его, от источника вечнаго; хлад терпит, да мы вечнаго мраза и скрежета зубнаго избавимся. Сего ради Господь тако терпит, сия творит, желая спасения нашего, яко Спас, именем Иисус. Возлюбленнии! Понеже бо царь сый всяческим толико смирися, камение за него вопиет на имущих много коней, от неправеднаго богатства купленных, бедныя люди обидящих; той вертеп вопиет смирение Христово на гордыя; слышите ли, что Господь гордым противится, смиренным же дает благодать. Послушайте, что сказует пророк: яже глаголете в сердцах ваших и на ложах ваших умилитеся. Он бо Сам во образ нам умилися, тако глаголет: измыю на всяку нощь ложе мое, слезами моими постель мою омочу. Вопиет убожество Христово на богатыя. Что вопиет? Богатство аще течет, неприлагайте сердца. Вопиют пелены Христовы: друже, како вшел еси семо, не имея одеяния брачна, сиречь чистаго жития. Брачное одеяние есть любы, юже имеяй, той нищия одевает, а не суетно плоть свою украшает, яко же мы ныне творим: красимся ризами, когда ждем праздника какого-либо, то мы готовим себе кафтаны хорошие, рукавицы уборныя, шапки изрядныя, сапоги красные; а лучше бы нам готовитися к празднику с добрыми делами, в церковь бы на молитву приходити и свещи приносити. Вопиют Христовы пелены: аще кто имеет две ризы, да подаст не имущему; и вопиют вся воинства Христова на вся грехи наша, да уклонимся от зла и сотворим благо. О сем бо великом младенце Ангелы Его пастырем, а в них и всему миру радость возвещают, глаголюще: не бойтеся, се бо благовествую вам радость велию, яже будет всем людем, яко родися вам днесь Спас, Иже есть Христос Господь, во граде Давидове. Ту радость и аз благочестию вашему благовествую и всех на веселие призываю. Радуйтеся духовнии, яко родися днесь, о Нем же пророчеся: Ты еси иерей во веки по чину Мелхиседекову (Евр. 7:21); радуйтеся мирстии, яко се посла Бог Сына Своего в мир, не да судит мирови но да спасется Им мир (Иоан. 3:17). Радуйтеся вси обще, яко общий всей твари Господь прииде общаго врага демона отъяти и водворити нас во царствии небесном.

31) Слово на Богоявление Господа Бога нашего Иисуса Христа

Крестився Иисус взыде абие от воды (Мф. 3:16).

Превечная премудрость Иисус Христос сотвори вопрос архиереом и старцем: крещение Иоанново с небесе ли бе, или от человек? Отвещайте Ми. Премудро вопроси их. И мысляху в себе глаголюще: аще речем с небесе, речет: почто убо не веровасте ему; аще речам от человек: бояхуся людей, они бо имеяху Иоанна за пророка (Мр. 11:30–32). Тако книжницы глаголаху, Иисусу не отвещаша на сие. Мы ныне во время крещения Иоаннова отвещаем, яко крещение Иоанново есть с небесе. Егда бо крестися Иисус от Иоанна, и се отверзошася Ему небеса (Мф. 3:16), того ради крещение Иоанново есть с небесе; и виде Духа Божия сходяща. яко голубя и грядуща нань (Мф. 3:16), явно, яко крещение Иоанново не от человек, но от Духа Божия с небесе, егда во время крещения Его слышано бысть с небесе: сей есть Сын Мой возлюбленный о Немже благоволих (Мф. 3:17). Сего ради гласа Бога молю о помощи во глаголании, а вашу любовь к слушанию. Крестився Иисус, взыде абие от воды. Церковь мати наша воспевает, идеже бо царево пришествие, ту и чин приходит. Благословеннии христиане! Царь земный, егда велит в кой град или путь – шествие творити, то наверно посылает царь посланники, чтобы пред царем убрали все дороги, чтобы по тому пути не гнусно было царю идти. Тако и Бог Отец, небесный Царь, посла, яко посланника Своего, Иоанна Крестителя, да уготовит путь Сыну Божию. Глаголет у Малахин пророка: се Аз посылаю ангела Моего пред лицем Твоим, иже уготовит путь Твой пред Тобою (Мф. 11:10, Малах. 3:1). Како уготовит путь Господень предтеча Его? Послушайте: повелено бо бысть Иоанну вся древеса, не творящая плода добра, посещи. Тако бо утотовати путь Господень: видя не плодное древо, пророк тако глаголет: видех нечестивого, превозносящася и высящася, яко кедры ливанския (Пс. 36:35). Пощажено ли сие древо? Никак, но посечено, яко не плодящее плода добра, глаголющу пророку: и мимо идох и се не бе, ибо посещено бысть и во огнь ввержено. И не точию сам Иоанн сече древеса в пустыни и готова путь Господень, но призывал и иные на сие дело, яко глас вопиющаго в пустыни, глаголя: уготовайте путь Господень. Сия глаголющу Иоанну, исхождаще к нему иудейская страна, иерусалимляне и крещахуся вси во Иордане реке от него. Тогда приходит Иисус от Галилеи на Иордан к Иоанну креститися. Прииде Господь к рабу Своему; прииде учитель ко ученику Своему, прииде Бог к человеку. Сам Иоанн глаголет: аз убо крещаю вы водою в покаяние, грядый же по мне, крепкий мене есть, Той вы крестит Духом Святым. Не похищает славы Господней раб верный, но проповедует ю, не печалится о своем умалении, но о Господе веселится, тако глаголя: сия убо радость моя исполнися. оному подобает расти, а мне же малитися. За то Господь к нему, яко к верному рабу Своему приходит креститися; но смиренный раб не достойна себе творяше прикасатися Божественному телеси Его: како прикоснусь раб Владыце, како возложу руку мою на главу Твою. Несмь достоин разрешит ремень сапог Твоих; аз требую от Тебе креститися, а Ты грядеши ко мне, глаголет Иоанн к Иисусу; о Спасителю! мне от Тебе креститися есть праведно, да праведен сотворюся. Тебе же Иисусе, от Мене креститися кая вина есть? Та ли – да праведен сотворишися? Но Сам Ты праведен. Или на небо да взыдеши? Но Сам Ты Бог и всегда на небеси, волею бо с небесе снизшел еси на землю; Ты еси Дух, аз плоть; како плоть Духа освятити может? Всегда Дух освящает плоть; кто бо у нищаго богатства просит? – всегда нищий от богатаго богатства ищет; всяко добро с небесе на землю прииде, но не от земли взыде на небо; Ты убо небесный, аз земный, того ради не вознесу руки моея на главу Твою и не возложу на верх Твой пречистый скверной моей десницы. Мне праведно от Тебе креститися, глаголет Иоанн ко Иисусу. Сие смирение услышав Иисус, рече: и праведно то есть, да ты от Мене креститися, но остави ныне, глаголет Господь, Мне подобает от Тебе креститися, а потом ты от Мене креститися Духом Святым. Тогда позна Иоанн, яко подобает оставит всякое противление, и Его же сапог прикоснутся не достойна себе творяше, выше и главы Того руку вознесе, и тако возложи руку свою на главу Владыки. Тако бо крестися Иисус во Иордане от Иоанна не ради оставления грехов, но да освятит воды после креститися хотящим. Крестився же Иисус взыде абие от воды, и се отверзошася Ему небеса и виде Духа Божия, сходяща яко голубя и грядуща на Него (Мф. 3:16). Явльси же Святый Дух в виде голубя того ради, голубь не вреждает и маленьких, и Дух Святый в виде голубя явися, яко прииде кротостию собрата ны. И се глас с небесе глаголяй: сей есть Сын Мой возлюбленный, о Немже благоволих (Мф. 3:17). Глас сей значит Бога Отца: сей есть Сын Мой возлюбленный. Прилагает: о Немже благоволих. Кое благоволение? Тако Бог рек: в Нем воля Моя исполнится о спасения рода человеческаго. В крещении Христове вся Божественная Троица явися: Отец во гласе, Сын во плоти, Дух Святый в виде голубя. В сея же Святыя Троицы имя, – образ крещения святаго, внегда реши Ему с учеником Своим: шедше научите вся языки, крестяще я во имя Отца и Сына и Святаго Духа, учаще я блюсти вся, елика заповедах вам. Что заповеда? слышите юношу онаго иже вопроси Христа: учителю, что сотворю, да имам живот вечный? Господь же отвеща: не убий, не укради, не лжесвидетельствуй, чти отца твоего и матерь твою и возлюбиши ближняго твоего, яко сам себе (Мф. 19:16–19). И аще тако сотвориши, то грехов избудеши и милость Божию получиши. Аминь.

32) Слово на Сретение Господне195

Всяк мужеский пол ложесна

разверзаяй свят Богу (Лук. 2:23)

Не скверная, не блазная, не тленная, пречистая Дево в день нынешний очищатися приходит в дом Господень, по закону Моисеову. Тако глагола Господь к Моисею: освятиши всяк первенец перворожденный, отверзая бо утробу в сынех Израилевых от человека до скота да будет Мне (Исх. 34:19). Слушатели православнии! Чего ради повеле Господь перворожденныя Свое посвящати в службу? Того ради: егда исходящим сыновом Израилевым из работы Египетския, Израилевы первенцы не вредно сохрани: для того перворожденные Израилевы отдавахуся Богу на службу. Сему закону сам повинуется Господь, пришедый закон исполните, а не раззорити. И яко не имея нужды обрезания и крещения, обаче обрезася и крестися, и нас научает Божию закону повиноватися, и душевныя вреды святым покаянием целите. Тако пречистая Богомати хранит закон не нужду имея, но за великое свое смирение приходит очищатися. А все во образ нас грешных. Якоже бо солнце егда испущает лучи свои, тогда и без огня светло бывает. Тако и Дева Мария не имать нужды очищения, якоже солнце не имать от огня просветления. Тако о Ней написася отДуха свята: вся красна еси ближняя моя, и несть порока в Тебе (Песн. 4:7). Ибо полна есть чистотою душевною и телесною, паче солнца краснейши, по согласному святых отец разумению. Пречистая Богомати не име нужды очищения, тако и Господь изъемлется от тоя нужды. В законе бо писано есть: всяк мужеский пол ложесна разверзая свят Господеви наречется (2 Моис. 13:12), еже есть, Богу в жертву посвятися; а Христос родися, не разверзе ложесн пречистыя Своея Матери; якоже бо безсеменно зачася, тако без истления родися и пройде пречистыя ложесна Ея без всякаго вреда; якоже светлость солнца человеческая проходит и не вреждает, тако и Дева Христа роди, а девство не вреди. Якоже и в зачатии вниде дверьми затворенными во утробу Девы, и изыде заключенными дверми, якоже проречеся: та врата заключенна будут и не отверзутся, и никтоже пройдет има, яко Господь Бог Израилев внидет има и будут заключенна (Иезек. 44:2). И сего ради Христос не подлежаше сему закону, Сам бо законодавец. Тако и пресвятая Мати Его изъемлется от закона очищения. Сице бо в законе глаголется: жена, аще приимет семя и родит мужеск пол... Слышите ли? Сие семя женам глаголется, а не девам; – приемшим семя мужеское, а не от Духа Свята заченшей закон прописует. Пречистая Мария, Дева бе прежде рождения Первенца своего, тако в рождении и по рождении Дева; не прият бо мужеска семени, но действом Святаго Духа зачала есть и роди плод пребожественный. Того ради не подлежаше тому закону, обаче вниде в церковь, еже дати жертву, по реченному в законе Господни, два горличища, или два птенца голубица. Послушайте, возлюбленнии! Се бо Христос Господь и Мария Мати Его, Свята суща, изволиста со грешники вчинитися. Также и нам, братие, учитися, еже очищати души наша святым покаянием и ходити на молитву в дом Божий, и приносити потребная. Приносите ов свещи, а ин просфоры, а кто сего не имеет, тот приходи в церковь на молитву с сокрушенною жертвою сердца, со слезами покаяния. Подобает и нам грешным всегда очищению прилежати, но мы всегда грешим и Богу малаго добра не сотворим. Аще же хощем грехов избыт, то подобает добрая дела творити, утешати оскорбленная, советовати спасительная, учити терпети и милостыни давати. Аще сице сотворим, то грехов избудем и милость Божию получим. Аминь.

33) Слово на Благовещение Пресвятый Владычицы нашей Богородицы и Приснодевы Марии, месяца Марта в 25 день

Радуйся благодатная, Господь с тобою,

благословенна ты в женах (Лук. 1:28).

Царь земный егда хощет некую взяти за себя девицу в супружество, то первое посылает посланника к девице, и посланники царевы, пришедши к девице, возвещают славу и силу цареву ей, такожде любовь и наречение царево скажут ей, что царь хочет за себя пояти, и спросят так же и девицу, хочет ли она быти невестою царю. Тако и Христос Господь, Иже есть Царь царствующих и Господь господствующих, возлюбив от естества нашего девицу и возжелав ю имети невесту Себе, по словеси о премудрости реченному: сию возлюбих и взысках от юности моея, и взысках невесту, и любитель бых красоты тоя (Прем. Сол. 8:2). Пригласи к себе Господь Архангела: прииде Гаврииле, служитель буди страшнаго таинства и яви сокровенное божественное чудо; прошением бо Адама и прочих, во аде содержимых, со престола Моего снити хощу. Адама бо создах по образу Своему и дах ему заповедь, он же заповедь преступил, и по согрешении выгнан был из рая. Запусте райская держава. Милосердую бо о заблудшем, спасти бо прииду Адама первозданнаго, хощу бо утаитися от всех сил небесных, только тебе единому изъявляю тайну сию. И сия рек Господь ко Ангелу, посла его к благословенней Деве: гряди, Гаврииле, к Деве Марии, иди ко граду одушевленному, о немже пророк глаголаше: преславная глаголашася о тебе граде Божий (Псал. 83:3). Тецы к словесному Моему раю, пойди, Гаврииле, к восточной двери и возвести Ей о Моей крепости, восприими путь к невесте веры, воплощения Моего жилищу и чертогу рождества Моего. Глаголи во ушеса словесныя тайны, уготови Ми вход, и егда приидеши к Деве, да не смутиши и да не устрашиши Ея девическаго сердца, токмо рцы ей: радуйся! Ангел же слыша сие, удивляшеся в себе, глаголет: дивно есть чудо, и всякаго ведения устрашает разум; яко в херувимех страшен, в серафимех невидим и во всех ангельских силах необъемлем есть, хочет воплотитися в средине ложесн девичих, а чрево девиче – объяти Необъемлемаго! Сия Ангелу помышляющу, рече Господь ко Ангелу: что смущаешися, о Гаврииле? Егда ты и прежде послан был еси к Захарию иерею, рождество Иоанново благовестил еси, и благовестие твое не солгалось. Или не возможно сие у Мене, еже от Девы воплотитися, сотворшаго вся словом? Вскую сумнишися Гаврииле? На сие отвеща Ангел: Господи, дивлюся я сему, что деве родити сына; а родити не от мужа, – превосходит всяческое законов естество. И како извещу о Тебе девице? А Тебя небеса и земля не объемлют, како бо чрево девиче объимет, и како понесет Мария огнь любве Твоея? Господь к Ангелу отвеща: якоже огнь горяше и купины не опаляше, тако и Мое вшествие не повредит Марии. О сем бо и Дамаскин пишет: на Синайстей горе виде Тя в купине Моисей, неопально огнь Божества заченшую во чреве. Тогда Ангел сотвори повеленное, с высоты небесный слете, вшед к Деве, глаголя: Радуйся, благодатная, Господь с Тобою! Послан бысть некогда Ангел от Бога к жене Маноеве сказати о зачатии преславнаго Сампсона, по оной явися страшен зело, ибо пришедшу Маною, жена его глаголаше: сице человек Божий прииде ко мне, и образ его яко образ ангела Божия, страшен зело. Ныне не страшен, и Девы не ужасает, но Гавриил Марии с великою честию глаголет: Радуйся, благодатная, Господь с Тобою! Уже не змий к жене беседуяй, но Гавриил глаголет: не удивляйся странному моему зраку, Архангел бо есмь. Змий прельстил Еву иногда, ныне же Аз благовествую тебе радость: зачнеши и родиши Господа. Слете же с высоты небесный Гавриил во юдоль сию плачевную, яко добрый вестник от земли дальния. Слете, яко голубица в ковчег Ноев, нося яко ветвь масличную во устех слово Божие, милосердие творящее, прилете, яко ластовица красная весны благодати. Прилете небесный посланник к возлюбленной невесте Царя всея твари, сказати ей волю Царя и Господа. И егда вниде к ней Ангел, глаголя: Радуйся, благодатная, Господь с Тобою; рече Дева Ангелу: кто есть Господь твой? Отвеща Ангел: Господь мой есть Царь царствующих и Господь господствующих, Царь славы и Князь мира. Вопроси Дева у Ангела: красен ли Господь твой? Отвеща Ангел: красоте Его луна удивляется, Он бо есть красен добротою паче всех сынов человеческих. Таков есть Он, Его же лице Ангели видеть не могут. Вопроси Дева: крепок ли Он? Он же рече: крепость Его до моря, и от рек до конец вселенный. Еще Дева вопроси: кто у Него слуги? Отвеща: вся язы́цы работают Ему. Она же рече: как слава Его? Ангел отвеща: вся язы́цы возвеличают Его. И Давид глаголет: да восхвалят Его небеса и земля. И егда сия услышавши Дева, – рече к Ангелу: буди воля Его, да приидет Господь Сам и целует устами Своими, да приидет возлюбленный Moй во град Свой, да яст плоды яблок Своих; се раба Господня, буди Мне по глаголу твоему. Не хощу мужа знати, чистоту хранити изволяю. Дух же Святый да снидет на Мя и сила вышняго осенит Мя, и изволяю Мати Богу быти, яко он весть девство Мое не увядаемо сохранити. И егда Дева даде изволение, склонися волею Своею воле Вышняго, и абие словом Гаврииловым, во уши слышанным, восприяла есть Слово Божие в пресвятую Свою утробу; слухом бо вшел; и зача Его плотию и абие Слово плоть бысть, ибо плоть соединенная Божеству вообразися из пречистейших кровей преблагословенныя Девы, во утробе Девичей чрез девять месяцев соблюдашеея. Тогда облак небесный тихо зело на руно Девическое излился, егда Слово плоть бысть. Плоть бо Его – плод нам, кровь Его – покров нам. Христиане! Подобает преложити сердца и злобы своя на добро, свирепство на кротость, гордость на смирение, скупость на щедрость, да преложите зависть на братолюбие, и тако спасение получите от Пресвятый Богородицы. Аминь.

34) Поучение на Преображение Господне

Поят Иисус Петра и Иакова и Иоанна и возведе

их на гору высоку едины, и преобразися пред ними.

(Мф. 17:12).

Егда коего земнаго царя сын, советом отца своего, изволит царство свое оставите, и утаить себе, яко бы не царев сын, и жил бы в коем своем граде един, яко от простых, и людие, не ведая, яко то царев сын, в неведении своем презирают его, непочитающе, не зная его, яко то есть царский сын; тако и Христос, Сын Царя небесиаго, оставя престол Херувимский и свет не приступный, сошед с небес на землю, во юдоль сию плачевную и плоть восприяв от святыя Богородицы, покры Божество Свое плотию и живяше на земли, яко прост человек. Незнающе Его народы, яко Сын есть Царя небеснаго, презирающа Его и проста Его быти мняху, а не яко Сына Божия. Овии нарекоша Его Иоанна Крестителя, инии Илию, якоже о сем яснее глаголет Евангелист Матфей: прежде шести дней преображения Своего вопрошаше Господь ученики Своя, глаголя: кого Мя глаголют быти человецы? Они же реша: овии Иоанна Крестителя, инии Илию, или единого от Пророк. Тогда вопроси Господь Апостолов: вы же кого Мя глаголете быти? Ответив Петр рече: Ты ecu Христос Сын Бога живаго (Мф. 16:13–16). И сие Петрово исповедание являет Христос истинно быти. По шести днех сего вопрошения поят Иисус Петра, Иакова и Иоанна и возведе их на гору высоку едины, и преобразися пред ними. Слушатели! Чего ради изволил преобразитися и славу Свою явити учеником Своим? – Того ради, да егда Его узрят распинаема и умерщвляема, страдание убо уразумеют вольное (кондак праздн.), да не соблазнились бы о страстех Его. Како же преобразися? Послушайте. Не лицем изменися, но от Божественный души на лице просветися, не откуду прият толикое сияние, но нам из Себе испусти просвещение. Душа бо Его Божественная всегда безсмертною славою светяшеся и можаше тело в самом зачатии просветити, но плотию покры Божества Своего светлость таковым образом: егда видимое солнце от облаков помрачится, тогда свет его не явится, тако и Христос, мысленное солнце, плотию покрыся, якоже облаком. А иногда показа Себя Бога, тогда преобразися и просветися лицо Его, яко солнце. Такову показа светлость, какову имать ныне на небесех. Но не таковая же Христова светлость, колику яви Апостолам, но такову яви светлость, колико Апостоли могоша зрети, по оному воспеванию Церкве: «на горе преобразился еси Христе Боже и якоже вмещаху ученицы Твои славу Твою Христе видеша». Преобразившуся же Господу, се явистася Ему Моисей и Илия с ним глаголющи исход Его, сиречь вольную страсть Его, смерть и погребение. Возлюблении! Дивно дело, яко в толикой славе беседа о смерти! Тако бы и нам, братие, во всяком веселии нашем, не забывати бы о смерти. Егда же преобразися Господь, просветися лице Его, яко солнце, ризы же Его быша, яко снег, белы. Тогда рече Петр Иисусови: Господи, добро есть нам зде быти. О Петре! Малу каплю вкусив славы Божия, а вопиеши, яко довольно усладивыйся от обилия дому Господня: Господи, добро есть нам зде быти. Малу славу узрел царства Христова, а забываеши всех сущих на земли. Что глаголеши Петре святый: «добро есть нам зде быти?» Не веси, яже глаголеши. Аз бо хощу итти во Иерусалим и смерть вольную прияти, а ты глаголеши: добро нам зде быти. Тако и нынешние человецы, живущие в мире сем суетном льстятся нажитками сего света, глаголют тако: добро нам зде быти. Не знают, что говорят. Кое добро есть в мире сем непостоянном? В мире бо сем вся изменна. Ибо кто ныне живет, тот заутра во гробе гниет. Ныне здрав есть, яко Моисей, а поутру в недузе великом, яко Иов. Ныне в чести н славе, а по утру в темнице и заключении. Днесь о богатствах печется, и не может сочести, яко богач в Евангелии, тако глаголаше: раззорю житницы моя малыя и большия созижду, а в утрений день единыя крупицы алчет, яко Лазарь, и не обретает. Днесь на свободе, а поутру в неволе; сего дня в радости, а завтра в печали; сегодня господствует и повелевает, – завтра болит и умирает. Несть убо добро нам зде быти. Не имамы зде пребывающаго града, но грядущаго взыскуем (Евр. 13:14). Тленна есть храмина телес наших, волнуемо жития нашего море. Послушайте, молю вас, дабы и нам вселитися во храмины небесныя, во обители вечныя, в них же есть всякое безбедство, беда же ни едина; тамо вся светла, ничтоже мрачно, вся тамо весела; ничтоже преходящаго, вся вечна. Братие! Сие получити потщимся, да преобразимся духовые, из тьмы грехов во свет добродетелей. Како же нам преобразиться? Послушайте. Аще кто был хищник, отселе буди милостив, бранлив ли был, буди молчалив, псом бо дано лаяти, а не человеком матерно бранитися, вместо того лучше бы творить молитву. О, горе нашему окаянству! Имя Божие во устех наших редко поминается, а матерная брань никогда у нас не оставляется. То бы истинное наше христианство и духовное преображение было: молитва, еже есть: Господи Иисусе Христе Сыне Божий помилуй мя грешнаго, и к тому же языка воздержание, яко же Давид глаголет: удержи язык твой от зла и сотвори благо (Пс. 33:19). Ты уклонишися от зла, Господь утолит гнев Свой. Ты сотвориши добро и Господь сотворит тебе добро. Глаголет пророк Иосия: научитеся добро творити, взыщите суда, избавите обидимаго, и аще тако сотворите, то милость Божию получите, Царство небесное наследите, еже буди, буди. Аминь.

35) Слово на Успение Пресвятыя Владычицы иашея Богородицы и приснодевы Марии

Превечное слово Отчее Сын Божий, егда изволил воплотитися из пречистыя Девы Марии, тогда посла Архангела Гавриила, благовестити Деве Марии зачатие. И прииде Архангел к Деве Марии и рече: радуйся, Благодатная! А егда прииде время – Божией Матери успение, Той же Господь наш посла Архангела Своего к Матери Своей возвестити, еже хощет душу Ея прияти и на небеса преселити. Прииде Архангел к Божией Матери велиим светом блистая, ветвь в руках нося, и честно Божию Матерь целова, и рече к ней: радуйся, Благодатная, о Мати пресвятая! Се Сын твой Господь Иисус Христос Тебя ожидает в день бо третий с плотию взята будеши в небесныя обители. А прежде успения Своего Пресвятая Дева плотию тогда бяше во Иерусалиме и на той преславный день успения Божия Матере вси Апостолы в живых были во Иерусалим из различных стран Божиим чудодействием к пресвятей Богоматери, для чести и служения, облаки или Ангелами принесены, точию кроме двух Иакова Зеведеова, иже от Ирода убиен и разве Фомы, Божиим изволением на время то удержана, но и той послеждо принесен. А аще кто сему не верит, како Апостоли Ангелами перенесены на успение Богоматери, и той неверный да чтет святая писания, како Ангел Аввакуме пророка, несша к жителем пищу из дому на поле, в короткое время приносе из Палестины в Вавилон, взем за власы главы его, и постави у Даниила, в ров повержена, да напитает тем обедом голоднаго. Сицевым образом Ангел и Господни в малом времени Апостолов Христовых от конец земли во Иерусалим принесоша и всерадостно святии Апостоли лицу Богоматери предсташа; пресладкими словесы Ее утешая, последнее творяху целование Она же не болезнию плоти изнемогаше, но любовию Божественною горяше. Приближися же ко отшествию, якоже сын Ея, егда вися на древе к Отцу глаголаше: Отче, в руце Твои предаю дух Мой; тако и Мати Божия, возлегши всечестно на одре своем к Сыну своему вопияше: в руце Твои, Сыне Мой, предаю дух Мой. Не с печалию и сетованием Пречистая Богомати от жития сего отхождаше, якоже прочие людие, но с великим веселием смерти ожидаше, ведяше бо известно, яко временная смерть Ея начало есть вечныя жизни. Егда коего властелина народы изберут на царство и той властелин с великим радованием ожидает дне венчания своего, когда его помажут на царство, и возведут на престол, тако и пречистая Богомати радостно желаше дне преставления Своего. Царь Давид, аще и грешен, а егда умилостиви Бога своим покаянием уже не усладила ему временная сия жизнь, тако возопи: увы мне, яко пришествие мое удалися! (Псал. 119:5). И Бога тако молише: имже образом желает олень на источники водныя, сице желает душа моя к Тебе, боже (Псал. 41:2). То кольми паче Божия Матерь, желание име с плотию разлучится и с Сыном Своим в небесном царствии быти, всегда бо любовию желаше к Нему, и не согреши ни малым грехом к Богу и Творцу Своему. И егда наступи день отшествия Ея к Богу в вечныя кровы, Сам Царь небесный к Матери Своей прииде, еже пречистыми руками нескверную душу Ея восприяти, и приять Ю вселюбезне и несе во обители небесныя всеторжественне. Тогда толико бяше радование силам небесным, человеческий язык сказати не может. Вся силы небесныя Царицу свою всерадостно сретаху и тако до престола Господня душу пребожественную, руками Царя небеснаго держимую, всечестно провождаху. Тело же пребожественное руками Апостол всечестно провождашеся в Гефсиманию. Собрание бо святых честно предыдуще и за нею последующе, гласи преподобным песни святым поюще, и тако всеславно во гробе, аки в чертоге светле, положивше, не яко умершее, но яко усопшее о Господе; ибо сон есть честен пред Господом смерть преподобных Его, изряднее же всех преподобных – Преподобнейшей, Еяже преставление не смерть от Церкве именуется, но всечестное успение. Уснула Пречистая Мария сном честным и положиша в чертозе гробнем, но не долго тамо спаше, не даде бо преподобному своему видети нетления, не даде и матери Своей нетления. Яко Бог Отец тридневно воскреси от гроба Сына Своего, тако и Сын в третий день от чертога смертнаго возбудил есть Матерь Свою, от земнаго покоища в небеса преселил есть. Возлюбленнейшии! Аще бо тело Ея во гробе лежаше без рубища и безгласно, якоже и прочих человек трупп лежати обыкоша, обаче телу Ея святому не прикоснуся тление. Тогда бо благоволением Бога Отца, изволением Духа Святаго третьему дни свитающу прииде Господь со множеством сил небесных ко гробу Матере Своея и рече: возстани, прииди ближняя Моя, возстани добрая моя, голубице моя, возстани, яже иногда серцем спогребена Ми была еси, возстани в покой Мой, яже о Мне многи труды прияла еси. Сия же изрек Господь, яко имеяй державу живота и смерти, повеле далече смерти отступити и возврати Пречистую душу в пречистое тело. Вшедши же душа преблаженная и абие воста тело от земли, не ктому земно, но небесно. Воста Царица и ста одесную Царя небеснаго, по оному: предста Царица одесную Тебе, в ризах позлащенных, одеяна и преукрашенна (Псал. 44:10), возста Мати и ста одесную Сына Своего и с Ним шествова на высоту небесную, провождающим Ю всем силам небесным, и егда прииде Божия Мати в пренебесныя палаты Бога Сына Своего, воста Сын Ея от престола и восприим ю всечестно, посади одесную Себе, и великою честию почте Ю, паче всех. Тако бы и нам почтити праздник Ея всяким воздержанием и умерщвлением плоти, якоже Апостол глаголет: умертвите уды ваша, яже на земли: блуд, нечистоту, страсть плотскую, похоть злую и лихоимание (Кол. 3:5). Сих бо ради грехов приходит на нас гнев Божий. А аще хощем избыти гнева Божия, то сотворим добрая дела, возлюбим чистоту, пост и молитву, да подадим милости нищим; сим бо гнев Божий утолим, и милость Божию получим. Аминь.

Ограда Иркутска196

Молим тя Святителю Отче Иннокентие, ограждай

молитвами твоими град сей от всех бед и печалей.

Из тропаря Святителю197.

Иные города ограждаются трудами рук человеческих и искусством – каменными стенами, глубокими рвами и крепостями; иные ограждены самою природою – реками, морями, неприступными скалами; иные, для большей безопасности, уставляются кругом пушками, а внутри отрядами войск. А ты чем огражден, Богоспасаемый Иркутск? По-видимому ничем; но какая у тебя чудная Ограда! Не ограда каменная с пушками, не море глубокое с скалами неприступными; а что тверже и неодолимее всех крепостей и оград – тебе сам Господь Бог даровал в ограждение святые мощи Угодника Божия Иннокентия с его сильными у Бога молитвами! Ибо слышишь, как, в его Святой обители, о тебе день и нощь поют: «Молим тя Святителю Отче Иннокентие, ограждай молитвами твоими град сей от всех бед и печалей».

Вот более ста лет, как милосердый Господь оградил тебя, Богоспасаемый, этою незримою, но чудной крепости оградою, оградил, от чего нельзя оградить никакими стенами и крепостями – от всех бед и печалей. В продолжение этого времени сколько бед и скорбей потерпели другие города, даже по всем правилам науки огражденные: иной от пожаров разорительных, иной от язвы губительной, иной от наводнения и потопления, от нашествия иноплеменников! А близь тебя, Богоспасаемый, такая твердыня поставлена – Святая обитель Угодника с Его Святыми Мощами, которая не даст одолеть тебя никаким бедам и напастям, если ты сам не изменишь себя своим неверием в заступление Угодника.

В нынешний век, материальный по преимуществу, только и воображают видеть ограду безопасности городов и сел, – что в войсках и огнестрельных орудиях; только и надеются найти избавление от бед и скорбей, – что в деньгах и производительности труда, так что и самые науки ныне все сосредоточились в изыскании материальных средств к благосостоянию народному. И вследствие этого каких негодований не изрекается противу таких общин и заведений, в которых не встречают производительности в пользу этих материальных двигателей благосостояния народного! Сколько обвинений укоризненных, и прямо, и косвенно, высказывается противу святых обителей, где самоназванные попечители народного благоденствия не видят ни заводов, ни фабрик, ни торговли, ни земледелия, ни другой какой промышленности!

Нет ничего удивительного, когда противу Святых Обителей сыплют укоризны люди иноземные, давно разорившие у себя самих обители иноков: их заставляет говорить своя вера, людьми переиначенная и испорченная. Но чем извинить слепое подражание иноземным, когда укоризненные обвинения выслушиваются от тех, которых если не отцы, то деды и прадеды, крепкие верою в православие, обретали наилучшее утешение во святых обителях, и исходили из них с залогом небесной помощи в самых критических обстоятельствах своей жизни.

Два обвинения обыкновенно высказываются противу обителей иноков, – обвинение в непроизводительности для благоденствия общественного, и другое, – для самого произношения слово тяжелое, – в тунеядстве. Но спросим историю нашего отечества, потому что обители у нас современны началу отечества, подтвердит ли она обвинение?

Есть в нашем православном отечестве особый сонм мужей, к которым за наставлениями и помощию притекают и простой народ и вельможи, и ученые и воины, и богатые и нищие, все и даже самые цари; и, что замечательно, притекают нередко тогда, когда все испытанные средства к помощи остаются без всякого успеха. – Сонм мужей, свидетельствованных бесчисленными опытами помощи самой неожиданной: эти мужи есть и в Москве и в Киеве, и в Петербурге и в Новгороде, и во Владимире и в Казани, и в Ростове и в Воронеже, и в нашем отдаленном Богоспасаемом Иркутске; они известны под именем угодников Божиих; ими, – можем исповедать это пред лицем неба и земли, – ими держится благоденствие царства Русского тверже, нежели всеми производительными силами России. А где возросли и воспитались для неба, откуда подают нам помощь эти великие Угодники Божии? Где стяжали крепкую силу молитвенного ходатайства эти мощные наши защитники? Преимущественно в обителях, обвиняемых в непроизводительности.

Были в нашем отечестве полководцы великие, правители мудрые, политики искусные Государи-преобразователи, но на долго ли продолжалось их личное служение благу отечества? Много, если на сорок или на пятьдесят лет! А эти скрывавшиеся в лесах и в пещерах, убегавшие по-видимому служения отечеству, сколько лет рассыпают дары небесной помощи, и зримой и не зримой очами человеческими на все царство Русское? Иной сто, иной двести и триста иной едва не с основания царства Русского! И настолько продолжится и еще их личная помощь с неба земным своим братиям и соотечественникам! А да позволено будет вопросить: откуда восходили на небо эти благодетели человечества? Из университетов ли, или академий? Из коммерческих училищ или училищ правоведения? Нет, бр. м., из тех именно невидных обителей, которые укоряются как не производительные для блага отечества.

Конечно, это избранники обителей; но взглянем оком суда беспристрастного и на всех вообще отшельников от мира под кров св. обителей; есть ли хотя какое благовидное основание подозревать их в тунеядстве? Не беремся защищать, в той силе, обители, чтобы и в эти святые убежища не прокрадывались иногда хитрые, с целию тунеядства, не будем рассчитываться, где их больше, – там ли, где видимое господство праздности в речах и в обычаях, где отдых без труда, веселости до утомления, убийство времени и днем и ночью? Или там, где строгим уставом положено седмеричное в день славословие Господу? Мы просим доказать одно, – может ли осуждение в тунеядстве падать своею тяжестию на православные наши обители, судя по их уставам и чиноположению?

Начнем с словоупотребления: кто тунеядец? Тунеядец явно тот, кто есть хлеб туне – даром без труда, незаслуженно. Для государства нетерпимый тунеядец тот, кто, имея силы, не несет никакой должности, ни труда на пользу общественную. Поэтому в чем обвиняются живущие в обителях, когда укоряются в тунеядстве? Явно в отсутствии труда, в праздности. Но позвольте попросить обвинителей, с самою кипучею их деятельностию, хотя на один год в православные обители – на все их утрени, вечерни, обедни, молебны, келейные правила и поклоны; и тогда путь проповедуют, есть ли труд и занятия в православных обителях? Обвинителям воображается, что даровой стол в обителях может привлекать туда нелюбящих труда; но попросим опять самих обвинителей на трапезу иконов и их яствие несменно постное, и тогда пусть скажут по совести, этот ли даровой хлеб привлекает в св. обители людей иногда от пышных трапез и шумных удовольствий света?

Впрочем, сколько нам известно, обвинения в тунеядстве сыплются на святые обители не за отсутствие труда, а за непроизводительность труда на пользу общественную. Все, говорят обвинители, приносят дань труда на пользу общественную; все служат: иной пашет землю и добывает хлеб; иной ведет торговлю и умножает капиталы; иной учит детей и распространяет просвещение; иной несет службу военную и защищает государство; иной гражданскую и споспешествует благоустроению государства. А эти, присовокупляют обвинители, эти десятками и сотнями наполняющие монастыри, люди крепкие и сильные, что делают, запершись в четырех стенах? Какую несут службу?

Неужели же никакой? Странная новость! А мы доселе носили в себе полное убеждение, что иноки в обителях совершают каждодневное служение или богослужение! Неужели это не служба? А по-нашему, это служба самая первая, и для государства из всех благодетельнейшая!

Служба самая первая. Что такое служба? Исполнение обязанностей, возлагаемых на человека законом. А в законе Божием какая первая заповедь? Заповедь любви к Богу. Следовательно, по закону Божию, какая первая служба? Служба Богу. Ее-то и несут за всех по преимуществу иноки в обителях.

Но вам хочется, чтобы иноки несли непременно службу на пользу государственную? Несут, и едва ли не больше всех и не благодетельнейшую из всех.

Чем преимущественно занимаются иноки в своих обителях? Молитвою. А что такое молитва? Такое богодарованное средство, чрез которое можно всего достигнуть, все получить от самого Подателя всех благ земных и небесных; решительно все: в том уверяет нас сам Спаситель: О чем, говорит Он, не попросите во Имя мое, то сделаю. И если о чем попросите во имя Мое, Я то сделаю198.

Все; следовательно, во-первых, все то, что достигается обыкновенными земными средствами, и человеческими усилиями. И это действительно.

Земледелием совершается плодородие земли; и молитвою тоже. И в доказательство свидетельствуюсь молебнами и крестными ходами, бываемыми на полях. Вот вам служение иноков наравне с земледельцами.

Торговлею умножается богатство народное; и молитвою тоже. И в доказательство свидетельствуюсь едва ли не всеми торговцами, считающими необходимостию напутствовать себя молебнами при отправлении надела торговые. Вот вам служение иноков наравне с торговцами.

Оружием воинов защищается от врагов отечество; и молитвою тоже. И в доказательство свидетельствуюсь молебнами, отправляемыми противу супостат пред бранию и в продолжение всего времени браней с супостатами. Вот вам служение иноков наравне с военными.

Учением распространяется просвещение; и молитвою тоже. И в доказательство указываю не только на молебствие, положенное пред учением, но и на свидетельство одного из апостолов, который прямо внушает, что если у кого из вас не достает мудрости, да просит у Бога, дающего всем просто и без упреков, и дастся ему199. Вот вам служение иноков наравне с университетами и академиями. И если бы университеты и академии давали то, что получается молитвою от Первоисточника премудрости! И вот почему крепкий верою народ православный при всех важных случаях жизни издревле привык обращаться за молитвою во святые обители.

Во-вторых, молитвою получается то, чего не дает и дать не может никакая наука, никакое искусство, никакая служба, никакой труд. Что вы сделаете со всеми усовершенствованиями земледельческих орудий для плодородия земли, когда эту землю постигнет засуха? Какими, до самого кровавого пота, трудами вы низведете хотя единую каплю дождя из неба заключенного Богом? А молитва низводила проливные дожди на иссохшие от зноя и засухи поля. Какими открытиями геологии вы удержите удары землетрясения? А молитва веры спасала и грады и веси от пагубы землетрясения. Какою медициною вы возвратите душу в оледеневший труп умершего? А молитвами Угодников оживали умершие. Исчислять ли все, что совершала молитва во время браней, когда изнемогали воины, оказывались недейственны оружия? Указываю для примера на две критические эпохи нашего отечества в 1612 и в 1812 гг.: кто оказался сильнее во время бывших тогда браней? Столица ли России, защищаемая войском, или святая обитель преподобного Сергия, покровительствуемая его молитвами? Вспомните еще про недавнюю войну Крымскую: что стало с Севастополем – этою твердынею, считавшеюся несокрушимою? А что сделали сокрушители Севастополя с Соловецкою обителию? Да не оскорбятся же храбрые воины, что мы наравне с их службою поставили службу смиренных иноков.

Незнакомые с обителями воображают, что затворившиеся в стенах обителей отшельники прервали все узы любви и взаимной помощи с миром. А о ком же молитва иноков, как не о мире, о всяком граде и стране и о всех живущих в них? Прислушайтесь и к нашей молитве, воссылаемой ежедневно, по нескольку раз, из-под крова этой обители, на небо, к Угоднику Божию: – Ограждай молитвами твоими; кого ограждать просят иноки? Обитель ли свою! Нет; просят постоянно. Ограждай молитвами твоими град сей. А и в этом граде нет ли таких, которые не щадят для своих молитвенников острого слова?

Не в защищение от поношений сказал я вам, братия мои, слово в оправдание обителей. Те, которые удаляются под кров обителей, не боятся никаких стрел поношений и укоризн: потому что они всегда помнят слово Спасителя: блажени есте, егда рекут всяк зол глагол на вы лжуще, Мене ради200, а потому при самом восприятии иночества дают обет переносить все поношения и оскорбления. Но сказал слово оправдания с целию сблизить с обителями тех, которые, влиянием злых глаголов порицателей, поколебались верою в благодатную помощь от святых обителей, а наипаче чтобы тверже скрепить ваш, жители града сего, духовной союз с этой обителию, в которой Господь даровал вам такого Великого Угодника, Покровителя граду сему и Молитвенника о душах наших. Аминь.

* * *

167

Акафист святителю Иннокентию Иркутскому чудотворцу. Тиснение второе. Санкт-Петербург: Синодальная типография, 1900.

168

Печ. по: Прибавления к Иркутским епархиальным ведомостям. 1863. №7. Редактор – священник Прокопий Громов.

П. Громов, будучи редактором «Иркутских епархиальных ведомостей», не ставил своей подписи под материалами издания, но у нас есть все основать предполагать, что автором всех неподписанных статей является он (примеч. сост.).

169

Печ. по: «О проповедничестве св. Иннокентия перваго Иркутского епископа и чудотворца». Исследование ректора Иркутской Духовной семинарии архимандрита Модеста. Иркутск. Типография окружного штаба. 1873.

170

Начало этого поучения до слов: «возвеселися иногда Ной» сходно с поучением на Рождество Христово.

171

Тиверий Кесарь христианин, царствовал в Риме после Иустина младшего с 582 по 586 г. См.: Барония деяние церк. изд. 1719 г., стр. 676.

172

Текст приведен неточно.

173

Еккл. 2, ст. 1–11. Текст приведен небуквально.

174

В библиотеке Иркут. Дух. семинарии под № 34 есть рукописная книга «О вере христианстей времени св. Иннокентия». В ней есть рассуждение о страшных знамениях пред стр. судом, где приводится такой же пример и подобие, на обороте стр. 171.

176

Мнение сие о возрасте воскресших, равно и о том, что воскресение мертвых последует после разрушения всего огнем и обновления мира, но есть мнение частное, а не учение Слова Божия (Догм. Бог. Филарета, ч. II, стр. 496. Руководство к изуч. Богосл А. Макар, стр. 360). Но такой порядок последних событий мира обозначен в указ. книге «О вере», стр. 188.

178

Т. е. чины Ангельские.

182

Там же.

183

Приведены здесь слова из Второзак. не буквально, а как выражение главной мысли глав 28, 32.

184

В славянском тексте: понеже сын безчестит отца, дщерь возстанет на матерь свою, и невестка на свекровь свою, врази вси мужу домашние его (Мих. 6, 7, ст.).

185

В глав. тексте: пойдете ко мне страною, а в русск. переводе: пойдете против Меня.

186

В 17 и 18 стол. в Сибири отцы семейств продавали, закладывали своих жен, дочерей и других родственниц; была в обычае отдача своих жен в кортому. (Очерки русск. нравов в старинной Сибири. Отеч. зап. том 174, 1867 г. Сент. Окт., отд. 1-й стр. 684). Вообще все означенное поучение и сходные с ним в неделю 5-ю по Пасха о Самарянке и в нед. 7-ю по Пасхе направлены против разгульной жизни Сибири. Строгие поучения, и три поучения об одном и том же!

187

Хотя проповедник употребляет слова Алостола (Галат. 5:19), но можно думать, что он имел в виду новообращенных инородцев Сибири.

188

Поучение это во многом сходно с поучением в неделю пятидесятницы, но не сходится с ним в начале, где говорится о Троице, и в конце.

189

Поучение это во многом сходно с поучением в неделю 1-ю по всех святых.

190

В тексте: не имать пребывати.

191

В подлинном тексте так говорится: елика аще свяжете на земли, будут связана на небеси и проч. (Мф.18:18).

192

Конец этого поучении сходен с концом поучении в нед. 11 по всех святых.

193

Это поучение сходно с поучением в нед. 3-ю великого поста.

194

Начало этого поучения сходно с поучением на Рожд. Пресв. Богор.

195

Месяца Февруария во 2-й день.

196

Печ. по: Прибавления к Иркутским епархиальным ведомстям 1863 г. № 7. Материал дан без авторской подписи. Редактор П. Громов (примеч. сост.).

197

Произнесено на память Святителя и Чудотворца Иннокентия Иркутского.

198

Иоанн 14:13–14.

200

Матфей. 5:11.



Источник: Первосвятитель Иркутский, епископ Иннокентий I (Кульчицкий) / сост. В. В. Сидоренко; вступ. слово архиепископа Иркутского и Ангарского Вадима. — Иркутск: Иркутская епархия совместно с АНО Издательство «Иркутский писатель», 2006 г.

Комментарии для сайта Cackle