Н.К. Гаврюшин

Источник

Аноним. О человечестем естестве, о видимем и невидимем

В человечестем слозе коемуждо уду свой устав поведено есть хранити, и вси удове различни суть и державни. И видим: 1 мозг, 2 сердце, 3 ключа, 4 печень, 5 желчь, 6 селезень, 7 препона, 8 желудок, 9 чрева, 10 корень, 11 горло пищное, 12 горло гласное, 13 язык, 14 кровавицы, 15 жилы, 16 кровь, 17 зубы, 18 члены, 19 составы, 20 перси, 21 ребра, 22 чресла, 23 степень, 24 михирь, 25 корь и стиги. Та бо вся в человеце видима суть и осяжима, яже внеуду и внутрьюду человека.

Паки же ина невидима суть, в зачатии и в возращении: 1 душа, 2 ум, 3 мудрость, 4 мысль, 5 разум, 6 смысл, 7 сила, 8 мощь, 9 храбрость, 10 доблесть, 11 правда, 12 истина, 13 нелицемерство, 14 любовь, 15 радость, 16 веселие, 17 жалость. И сия человека навершают естество.

По оскудении же сих чрезестественная бывают: 18 лесть, 19 ненависть, 20 неправда, 21 вражда, 22 злоба, 23 зависть, 24 пронырство, 25 гордыня.

От невидимых состав человеческих невидимыя нравы ражаются, от болших болшая, и яко же во творении земном. Земля бо изведе повелением божиим лвы, слоны и прочии на род по роду их. А от моря киты и прочая, такоже и малеишия роды безчисленных гадов, овии воздухошествени, инии же водожитнии, овии же насушнии, друзии же двоежителнии. Таже от теплоты и мокрин мухи и комары и всяк овад. А от кала жук и всяк жупелный род. Тако же и в человеческом естестве. Темже в горнеи части человеку уподобися глава небеси, в ней же есть мозг. От мозгу видимаго ражается невидимый разум, а от невидимыя душа видимый живот. Очи же во главе сотворени, аки светила, солнце и месяц, на видение добру и злу. От сердца же видимаго невидимая мудрость. От горла глас уподоблен вышнему громогласию, от селезни гнев, от желчи вражда, от крови ярость. А о храбрости якоже пишет, мужество от вышняго даётся в душах и телесех человеку. Храбрость бо от духа и от крови и от тела бывает, другому же от духа и от крови. А ужасть телу от духа бывает, но тарассуждения велика суть. От степени сила, от чресл крепость, от ребр сохранение внутренних ятр, от жил немощь, от печени печаль, от желчи ненависть, от ключа же и пузыря плавание на воде леготу творят человеку, понеже суть легка. От ушей слышание, от ноздрей обоняние. Зубы на измеление, язык на чутие соком. Желудок на изварение брашен, чрево на пропущение утробы, михирь на разсуждение телесных и внутренних болезней. Смотрение же о сем велико есть: яко почюет михирь телесныя болезни утешение и мочию вся являет человеку.

И естество убо истекает от михиря являемая, но яже почюет в теле его, тако и пущает от себе знаменуяй михирь. От михирнаго же корени истекает сеяние, и начатия бывают по естественному совокуплению. Распаление бо приходит от помысла, и от видения разжизает плоть. Тем и от теплоты огня телеснаго есть жажда, того ради огненная жажда сушит составы телесныя. Алкания же измождают, а питания наполнивают. Играние разслабляет, юность взимает, старость смиряет.

Лжа, прелесть, ненависть, клевета, пронырство, злословие, несытьство, зависть и прочее зло бывает в человеце от неразумива сердца, и лукава ума безстудие исходит. Пишет убо, яко от срама мудрым стыдение бывает, а от печали исходят слезы, а от веселия смех. Смех бо тело разслабляет, а плачь лукавыя мысли прогоняет. Смех память смертную отгоняет, а плачь греховныя похоти отсекает. Смех в прелесть вводит, а плачь добродетели исправляет. Смех безобразие лица являет, а плачь доброумие вводит. Смех главу отягчает, и утробу растерзает, а плачь душу облегчает к высоте. Смех всякому греху начаток, а плачь греху искоренение. Смех греху рожение, а плачь души очищение – роса бо есть небесная и капля дождевная в душевныя плоды.

Сии убо нрави видимыя и невидимыя. От самого зачатия человеку всевается аки песок, кииждо уд своего. И растёт во удех его с телом, и вьётся в нем по животе его, и комуждо от них отдебеливши от сердца с мыслию своею приклонит, и любовь ко нраву тому подаваются нрави, и инии охудевают; осилившу же от них любимому, и благу или злу нраву его. Якоже бо и в ролии иному семени охудевающу возрастает непотребный плевел и подавляет потребныя семена. Тако и обычаи возраста человеческа, от юности его: аще приложит мысли любовныя от сердца своего в непотребныя нравы, и от тех подавляются благочестивии помыслы душевныя. Аще ли же возрастут потребныя семена, и подавляется от них плевел. Тако и в человеце возрастают душевныя помыслы, подавляются непотребнии нрави. Но всеми теми обладает ум. Яко же пишет: кождо свою меру имея, устав невидимому своему естеству, а душа безсмертна. Ум царствуя и обладая всеми составы человеческими, видимыми и невидимыми. Той убо плотьскими очимаглядати управляет, и зримая разсуждает, и языком глаголати научает, и руками взимает, и зубами смилает. И ногам ступание исправляет, и всеми безсловесными страстьми и скоты обладает, четвероногая укрощает, и птицу послушанию научает, и в глубинах скоровертящуюся рыбу, в чащах же быстрозрительную серну уловляет, и много неисчетныя хитрости в души и телеси являет. Вся сия ум присещает божиим неизреченным мановением. Без того бо немощен есть, понеже безпрестани требует божественнаго посещения, и утверждения, якоже и семена требуют дождя небеснаго от господа. И от того ума аки скоропосолицы невидимыя и безплотныя мысли текут. От самаго бо начатка младенцу яже во утробе всевается: в телеси телесное, а в души духовная. Есть же паки и ины многи видимыя части, свой каяждо имеет образ: видение на потребование, плоть на светлость, власи на лепоту, ногти на потребование, браднии власи знамение есть мужеское, да видом познан будет. А юным же одеяния разна суть от женских риз. Жёнам бо брадныя власы не даны суть, да долгую лепоту лица имеют, да любими будут и кормими кождо подружием своим, и огреваеми в надрех их. Но в брады место перси им даны суть. Да от тела своего любовию кормят младенца родившагося им и тем согнездну любовь имут.

Похоти же человеческия от естества имут сотворени суть. Хотение кормли и пития в естестве всаждено, в нем же и жажда да лежит, яже вкушати брашен или пития, смочити утробная своя от естества душевнаго, оживающу во утробе младенцу, и паки хотение и жажда от проходна естества вдана суть. А без тех человек не может быти жив, понеже та сродна ему от рождения. И паки похотное совокупление от зачатка его в нем. И тем же убо похоти жажди сродни суть и союзни. Аще бо человек восприемлет пост и понудит тело своеалканием и жаждою и всяким воздержанием, и тем отходят от него плотския похоти, аще ли же обучит тело своев блазеи пищи пребывати, и тогда ему одолевает похоть. И сего ради господь соблюдания повелевает глаголя: да не отягьчают сердца ваша объядением и пиянством и печальми житейскими. И сеи положи устав воздержания человеку самовластному на обуздание похоти. И плодородия ради плотскаго совокупления не возбрани. Но владети, а не пораблятися похотию повеле. И зри о сем разсуждения похоти в безсловесных устремление. И якоже узда коню во устех, тако и плотьская похоть воздержанием увядает. Похоть бо в человеце мысленне нападающи и чувственне действующи, и яко же молнии не уподобися скорости. И мычется по телу и по жилам, и составы человеческия проныряющи вскоре, и есть неосяжим образ лица ея. Аки вода тонка и бридостна и несоставнусилу имущи, и неуставне действующи, повинующих же ся ей томительне нудящи.

Кашлица же человеку от ключь бывает. Яко на воздушную часть сотворена суть легка, и от многия слабости отнюдь не терпят вреда, и от многих всаждается им вред: от запаления, и от возврения, и от студени, и от соку пищна, и от пития непотребна, и от трудов и от болезней телесных; и от огня внутренняго и от ветра воздушнаго сотворяется плющам пакость и гноение. Понеже суть легка, а не яко инии удове, терпят же ключь гноения, в себе движася и паря изметают охрак.


Источник: Гаврюшин Н.К. (Сост.) Русская религиозная антропология. Том 1. Антология. – М.: Московский философский фонд, Московская духовная академия, 1997. – 528 с.

Комментарии для сайта Cackle