Деяние собора 1654 года⁴⁴³

О имени Господа Бога и Спаса нашего Исуса Христа. Благочестиваго и Богом венчаннаго Великаго Государя царя и великаго Князя Алексия Михаиловича всея Русии. Советом Отца его и богомолца святеишаго никона Патриарха Московскаго и всея русии. Спреосвященными Митрополиты, Архиепископы и епископы. И счестными Архимандриты Иигумены, и совсем освященным Собором. По правилом святых апостол, по 37, и святых отец, Вселенскаго Седьмаго Собора пошестому правилу иже повелеша, о всяких вещех церковных Собором бывати;

Ничтож ино Богоугоднее есть, еже во святых присно и Божественных его заповедях обучатися, и натех крепко утвержатися. Сего ради и Спас ко учеником своим Глаголаше, Аз есмь свет миру. Ходяи по мне неимать ходити во тме, но имать свет животныи. И аще в словеси моем пребудете во истинну ученицы мои будете. И паки имеяи заповеди моя, и соблюдаяи их, то есть, любяи мя, а любяи мя возлюблен будет и Отцем моим. И паки аще пребудете вомне и глаголи мои пребудут в вас, и паки аще кто слово мое соблюдет неимать смерти во веки. И емуже аще просите будет вам. Сего ради великии во царех иустиниан кроткий, присно пребывали взаповедех Господних, искусом познав написа. Великая паче инех иже в человецех еста дара Божия, от вышняго дарована человеколюбия Божия, священничествож и царство, ово убо божественным служа, сеже человечеми владея и пекися от единагоже, и тогожде начала обоя происходят человеческое украшающе житие. Якоже ничтож тако бывает поспешнее царству сего ради. Якож святительская честь. О обоих самех тех присно вси Богови молятся. Аще бо они непорочнии будут во всем, и к Богу имут дерзновение, и праведно и подобно украшати начнут преданныя им грады сущая под ними, будет согласие некое благо все же добро человечестеи даруя жизни. Сему быти веруем, аще священных правил блюдение сохранится. Их же праведно похваляемии, и покланяемыи самовидцы Божию Слову предаша апостли, и святии отцы, сохраниша же и заповедаша;

Сего ради должно есть и нам от Спаса нашего и Господа Исуса Христа преданныя заповеди и святыми апостолы и святыми отцы возсиявшими, иже на Святем Соборе треми сты осмию надесятьми Богоносными Отцы, иже вникеи и впоследующих вселенских. 6. Соборех даже до седьмаго второе вникеи собравшагося. Такожде и между седми вселенскими вразличная времяна собравшихся поместных православных соборех; Понеже убо совершение приять православных церквь. Нетокмо по благоразумна и благочестиа догматом, Но и священному церковных вещеи и уставу; Праведно есть и нам всяку церковных ограждении новину потребляти, видящим новины всегда виновны бывати, церковнаго смятенияж и разлучения. Но уставом последовати святых отец, яже наученая невредима, без приложения же коего любо и отятия приемлющим по 1му Вселенскаго седьмаго собора правилу, святая правила облобызающе приемлем и держым. Святых апостол, и шестих вселенских собор, ксимже и поместных, еще же и святых отец наших, яко от единаго Святого Духа вдохновенны, ихже проклята проклинаем и мы. Их же извергоша, извергаем и мы, и ихже отлучиша, отлучаем и мы. И имже запретиша, запрещаем и мы. Симже последующе святых апостол, и святых отец правилом. И святыи священныи великии собор. Бодни благочестиваго царя и великаго князя феодора иоанновича всея русии утвержающе священная правила, возгласили и утвердили сице;

Святому и священному великому собору, воимя Господа Бога и Спаса нашего Иисуса Христа собравшуся во храме Пресвятыа владычицы нашеа Богородицы и всеблаженныя присно Девы Марии нареченныя ...⁴⁴⁴ в констянтинополи, во дни Благочестиваго и Богом венчаннаго великаго царя московскаго Феодора иоанновича, председательствующим святейшим православным патриархом: всесвятейшему иеремию архиепископу констянтинополскому новаго рима и вселенскому патриарху и блаженнейшему мелетию папе и патриарху великаго града александрии, и судии вселенскому, и наместнику всесвятейшаго иоакима божиа града великиа антиохии, и всего востока, и всесвятейшему софронию патриарху святого града иерусалима, и всея палестины: Пришедшу пресветлому Григорию афанасиеву посланнику предреченнаго благочестивейшаго царя, соседящим и всесвященнеишим архиереом (от всея области восточныя церкве) православным. Мелетии Блаженнейший александрийский рече: Весте братие яко знаменителне еже ко Спасу и Богу нашему любве пастырское есть тщание, Петре бо, рече, любиши ли мя паси овца моя, еяже ради вины и мы многия многажды, подвиги же и труды и беды претерпехом же и терпим, якоже весте. И ныне убо понеже присланы к нам Грамоты от всесвятейшаго вселенскаго брата и сослужителя нашего, и прочих архиереов, просящия принта нам в константин град церковных ради нужд: Аз же и грамоты, яже из православнейшия москвы от православнейшаго Феодора получив, и о обоих вещех пекийся нужде же церковной и царском достоинстве, молю ваше благоговение опасно глаголемая от нас разсмотряюще соизвествоватися нами о возглаголющихся, еже аще праведно быти бы явилося. Первое убо понеже Божиею благодатию церковь Христова совершенна сущи, и по благочестивым догматом совершенное приять и устроение во уставленных и изявленных от самаго Спаса апостолы и отцы святыми возсиявшими зде, на святомже соборе треми сты и осминадесятьми богоносными⁴⁴⁵ отцы иже вникеи, и впоследующих вселенских шестих соборех даже до седьмаго второе вникеи собравшагося, такожде и иже между седми вселенскими в различная времена собравшихся поместных православных соборех. Понеже убо совершение приять православных церковь, не токмо по благоразумна и благочестиа догматом, но и по священному церковных вещей уставу, праведно есть и нам всякую церковных ограждений новину потребляти, видящим новины всегда виновны бывати церковнаго смятения же и рузлучения. Но уставом последовати святых отец, и яже наученная невредима безприложениа же коего либо и отятиа приемлющим, по первому вселенскаго седьмаго собора правилу, сице имущу. Священнический получившим сан, свидетельства же и исправления правилных повелений суть изображения, яже приемлюще любезно, со богоявленным давидом поем ко владыце Богу глаголюще: На пути свидений твоих насладихся яко о всяком богатстве: и заповедал еси правду свидения твоя в век. И в век пророческий глас заповедает нам хранити свидения Божия, и жити в них, яко не подвижима и непоколебима пребывают, яко и боговидец моисии сице глаголет: к тем несть приложити, и от тех несть отяти. И божественный апостол в тех хваляся вопиет, вняже желают ангели приникнут: И аще ангел благовестит вам паче еже приясте анафема да будет. Сим убо сице сущим, засвидетельствующим нам радующимся о тех яко аще бы кто обрел корысти многи, любезне божественная правила облобызаем, и всецелу туюжде заповедь и недвижиму, утвержающе влагаемая от божественных труб духовных всехвалных апостол, и шести святых вселенских соборов, и поместных собравшихся о предании сицевых заповедей и святых отец наших: отединаго бо вси Духа озарившеся уставиша полезная. И яже убо анафеме предают, и мы проклинаем, и яже низложению, и мы низлагаем: и яже отлучению, и мы отлучаем, и яже запрещению предают, и мы такожде подлагаем (не сребролюбный нрав) удовляющеся настоящими, вшед во третие небо и слышав неизреченныя глаголы павел божественный апостол, яве вопиет, проповедая, святый символ православных отец, якоже сицевыми и толикими соборми соблюдеся, имать же сице.

Верую во единаго Бога Отца вседержителя, творца небу, и земли, видимым же, всем и невидимым. И во единаго Господа Исуса Христа, Сына Божиа единороднаго, иже от Отца рожденнаго прежде всех век, света от света, Бога истинна от Бога истинна, рожденна, не сотворенна единосущна Отцу, им же вся быша. Нас ради человек, и нашего ради спасения, сошедшаго с небес, и воплотившагося от Духа Свята, и Марии Девы, и вочеловечьшася. Распятаго же заны, припонтийстем пилате, и страдавша, и погребенна, и воскресшаго в третий день пописанием. И возшедшаго на небеса, и седяща одесную Отца. И паки грядущаго со славою судити живым и мертвым, егоже царствию не будет конец.

И в Духа Святаго Господа животворящаго иже от Отца исходящаго, иже со Отцем и Сыном спокланяема и сославима, глаголавшаго пророки. Во едину святую соборную и апостольскую церковь. Исповедую едино крещение во оставление грехов. Чаю воскресения мертвых. И жизни будущаго века аминь.

Сим сице рекшимся от блаженнейшаго александрийскаго иеремии. Всесвятейший вселеньский патриарх рече: сия убо вси исповедахом абие, степене священноначалства, наипаче же и самаго божественнаго крещения сподобльшеся, и исповедуем.

Святый собор рече: Вси исповедуем, и у всех сия хранима быти повелеваем, яко отцем нашим вси последующе, и яже целуют они, целуем и мы. И яже отметают, и яко отметают, тако и мы отметаем, якоже и первое правило святаго и вселенскаго собора иже в халкидоне прознаменова, и первое седьмаго изъясни.

Мелетий блаженнейший александрийский рече: Понеже патриаршеских престолов поставление, бе убо и древним неким обычаем соборныя церкве прежде начертавшеся, яснеже изъобразися по святому вселенскому первому собору яко сего шестое правило показует, имать же сице. Древнии обычай да держится иже во египте, и вливии, и пендаполи, якоже александрийскому епископу всех сих имети власть, понеже и вриме епископу сей обычай есть, подобие же и во антиохии, и воиных областех, начальства цела сохраняема от церквей. Соборне же произъявленно оно, яко аще кто был бы епископ без митрополичьи мысли, таковому великий собор устави не быти епископу. Аще убо общему всех совету благоразумну сушу, и по правилу церковному, два или три распря ради прекословят, да держит множайших совет. И седьмый на нем же иерусалимский почтоша престол, ради Спасителя нашего поплоти смотрениа, во оной стране бывшаго, подавше подобную честь, аще и последний иных патриаршеских престол, данебы мечтание некое подали (паче иных предпочитавше) Христово царство славити земное. Подобает же мне Благочестивейшим грамотам Богом венчанного царя отвещати: Молю и ваше благоговение, аще праведная глаголати явился бых, и отеческих уставов держащаяся, искусити, и сопричтати соборне. Сужду убо праведно быти, Божиим человеколюбием и благодатию украшенный царством град православнейший московский, и в церковных величатися вещех, по 28-му четвертаго собора правилу, 630, святых отец в халкидоне сошедшихся глаголющему сице: везде святых отец уставом последующе, и ныне прочтенное правило 150, боголюбезнейших епископов, собравшихся приблагочестивыа памяти великом Феодосии бывшем царе в царьствующем константинополи новем риме ведуще, таяжде и мы уставляем же и судим о старейшинствах святейшиа церкве тогожде константинополя новаго рима. Ибо престолу стараго рима (за еже царствовати граду оному) отцы влепоту даша старейшинство. И тоюжде мыслию движащеся, 150, боголюбезнейшии епископи, равная старейшинства воздаша новаго рима святейшему престолу, благоразумно разсудивше царством и синклитом почтенному граду, и равнополучившему достойнство старейшему царствующему риму, и во церковных, яко оному величатися вещех, второму по оном сущу, и яко понтийскиа, и асийския, и фрачийския страны митрополитом токмо, еще же и иже в варварских, епископом предреченных стран рукополагатися от предреченнаго святейшего престола константинополскиа святейшиа церкве рекше⁴⁴⁶ коемуждо митрополиту предреченных стран, со епископами области, поставляющу епископы, якоже божественными правилы повеленно есть: рукополагатижеся, якоже речеся, митрополитом предреченных стран от константинополскаго архиепископа, уставом согласным, по обычаю бываемым, возносимым к нему. Глаголетже и константинополское святых отцов правило, 73: константинополскому убо епископу имети старейшинство чести по римском епископе, за еже быти ему константинополю новому риму. Но ниже святый и великий собор, 318, Богоносных отец является иным неким словом разделивше чины же, и уставы, и власти патриаршеским престолом, ихже изъобрази. Токмо ко царским достоинством александрию председателствующу египта ливии и прочих. Антиохию же асирии и всего востока. Якоже европе рим, тако асии константинополь, иже и потом равных сподобися санов стараго рима, за еже перенесену быти оттуду семо царству, якоже пределяет и, 36, еже во трулле святаго собора правило имуще сице: обновляюще от, 150, святых отец в богохранимом сем и царствующем граде сошедшихся, и от, 630, в халкидоне собравшихся законоположенная, уставляем, яко константинопольскому престолу равная восприимати достоинства старого рима престола, и во церковных, якоже оному, величатися вещех, второму по оном сущу. Понемже александрии великаго града, и посем иерусалима града. Праведно убо сужду, и святый сей и великий собор судити молю, престолу благочестивейшаго и православнаго града москвы быти же и нарицатися патриархиею, за еже царства сподобитися от Бога стране сей, всей же россии, и серной⁴⁴⁷ стране повиноватися патриаршескому престолу московскому и всея россии, и северских стран, имети место свое по всесвятейшем иерусалимском патриарсе восвященных диптиках, и в церковных собраниях, да предреченная святых отец правила непоколебима соблюдаем. Преимуществоватижеся епископом митрополитом, архиепископом во всей соборной православной Христове церкви, епархии же оной московской и всеа россии, и северных стран Главе быти, и извествоватися по 34му святых и всехвальных апостол правилу, сице повелевающу: Епископом коегождо языка подобает ведати иже в тех перваго, и имети его яко главу, и ни чтоже творити излишнее безоного мысли, оная же токмо коемуждо творити, елика его епархии должная суть, и сущим под нею странам: Но ниже он без всех мысли что да творит. Тако бо единомыслие будет, и прославится Бог Господем во Святом Дусе, Отец и Сын и Святый Дух. Брату же быти и глаголатися православных патриархов, с сим имянованием единочинну и сопрестолну, равну же чином и достоинством. Написоватижеся и подписоватися по обычаю православных патриархов: Патриарх московский и всея россии, и северных стран. Порукоположении же хранитися чину церковному, первопрестолному архиереов возглашающу молитву. Аз убо сия тако сужду, Святыиже собор даизявит умышление.

Иеремии всесвятейшии вселенскии рече. Сие и мы первие и содеяхом, и написанно изявихом благочтивейшему царю.

Софроний иерусалимский всесвятейший патриарх рече: И сам непреложно сия объявляю. Святый собор единодушно рече: Сие понеже по святым законом уставися, вси приемлем, и сие о царстве оном уставляем да благочестивейший царь московский самодержец всея русии и северных стран⁴⁴⁸, якоже до днесь во священных службах восточныя церкве имать память свою, и восвятых предложениях, и восвященных помянниках, Такоже и вначале екса псалма, по совершении двою псалму, о царе глаголему возглашается повозгласию оному, по имени яко православнейший царь.

Вси реша и сие благоразумно есть.

Уставляемже и сие, яко подобает послану быти деянию сему, писании нашими утверженну ко благочтивейшему царю московскому и всесвятейшему иову патриарху всея россии и северных стран. Вси реша, угодно.

Сим сице разсужденным бывшим право же и законно, Митрофан боголюбезнейший афинский рече. В коемждо пределе наших областей иноком да уставит святый собор епископу области повиноватися Устави убо святый собор о сем 4е правило халкидонскаго святаго и вселенскаго четвертаго собора прочтенно быти, имуще сице: Истинно и чисто иноческое проходящии житие да сподобятся чести, понеже нецыи иноческому употребивше образу, церкви же и градския смущают вещи, ходяще смещение воградех, не токмо но и монастыри себе да воставят начинающе, явися ни единому нигдеже назидати, ниже возставляти монастырь, или молитвенни дом⁴⁴⁹ без совета градскаго епископа. В коемждо граде и пределех иночествующим повиноватися епископу, и безмолвие целовати, и внимати единому пощению, молитве, на нихже местех мира отрекошася терпяще, ниже церковным ниже житейским стужати вещем или приобщатися оставляющим своя монастыри, аще не некогда отпущени быша были⁴⁵⁰ потребы ради нужныя от градскаго епископа. Ниединаго же прияти во монастырех раба, о еже иночествовати без мысли своего епископа. Преступающему же сей наш устав, уставихом непричастнику быти, да не имя Божие хулится. Епископу убо градскому подобает приличныи промысл творити о монастырех. Святый собор рече: И сие праведно да держимо будет понеже отцы уставися.

Мелетии александрийский рече: Понеже от нашея немощи, и от сих дней неудобства многая отцами благо и добре законоположенная забвением покрываются, заеже нечтомым быти святым книгам, и святым правилом. Праведно есть по законом дважды в лето бывати собору, и прочитатися церковным винам, и разсуждатися, и исправлятися всем, поуставом святых отцов. Святый собор рече: Есть убо весма праведно понеже стропотства ради времен сих есть не удобно, но единощи в лето да будет, и да зрими будут церковныя вещи. Аще где случится что трубующее скорейшаго промысла, тогда обретающиися архиереи во царствующем граде сем, и иже во ближнем пределе да соберутся со всесвятейшим вселенским, и вещи да истяжут, разсудят позаконом.

Обновляем шестое святаго и вселенскаго, 4-го собора правило, о еже не быти безразрешения рукоположением: рукополагающимже на мзде нерукополагати, по уставом отеческим, и апостольским изображением, ниже преходити от града во град епископом и прочим клириком, ниже пременяти области.

Судимже праведну быти, во прегрешение впадшим, или прегрешением истязуемым, или прежде рукоположения, или порукоположении священство сквернящим, не быти иереем. Недостойно же рукоположенным праздное имети рукоположение, не священным пребывающим.

Житейския вещи, и достоинство мирское содержащии, от святых апостол уставленная да держат. Глаголет же в, 6 правиле: Епископ или презвитер, или диакон мирская попечения да не восприимет, аще же восприимет даизвержется. Такожде от 630, богоносных отец в халкидоне собравшихся повеленная 7м правиле, рече же сице: Единою во клирицех учиненным, и иночествующим, уставихом ниже воинствовати, ниже в сан мирский преходити, или дерзающим, и некающимся, якоже возвратится на сие, еже Бога ради, прежде изволять, да проклята будут.

Обновляем, 16, правило, 7го никейскаго собора, вторицею сошедшихся святых отец, яко освященным мужем не многоценных или мягких употребляти риз.

Устави святыи собор, коемуждо епископу во своей области попечение и изждивение возможное творити, яко божественным и священным писанием, могущим учитися, помоществовати же посиле хотящим научати, и учитися произволяющим, аще приличную потребу имут.

Неподвижное пребывати хощем святыми отцы уставленное о святей и спасителней пасце, имать же сице. Всем держащим разрешати уставы святаго и вселенскаго великаго собора, иже вникеи собравшагося, прибытии благочестиваго и боголюбезнеишаго царя константина, о святем празднице спасителныя пасхи неприобщенным и отверженным быти от церкве, аще пребудут любопреннее, востающе на добре ученная, и сия да рекутся о мирянех. Аще же кто от предстоятелей церковных, епископ или презвитер, или диакон, посем уставе дерзнул бы на развращение людей и смущение церквей разлучитися, и соиюдеи праздновати пасху. Сего святыи собор оттуду уже осуди чюжда быти церкви и прочая. Подобает бо последовати отец правилу еже даже и до днесь Божиею благодатию якоже и прочая Божия церковь сохраняет.

Лета 7110 го году, индикта 6 го, месяца февраля в, 2 день, на память иже во святых мелетия совершися сия книга. Иеремия милостию Божию архиепископ константинополя новаго рима, и вселенскии патриарх печать свою приложил.

Мелетии милостию Божиею папа и патриарх великаго града александрии, и судия вселенскии, и посовету пресвятейшаго антиохийскаго господина иоакима и всея восточныя страны, и печать свою приложил.

Софроний милостию Божиею патриарх святого града иерусалима, и всея палестины, и печать свою приложил:

Сего ради должен есть нововводныя чины церковныя к вам обьявити в служебниках московския печати написано. Молитвы архиерейския глаголются внегда иерею служити самому зася глаголати, имиже многия страсти человеческия от архиереи и от иерей решатся преложены ныне на лицо иерейско, яко иерею самому зася глаголати. А в греческих служебниках, и в наших старых, иже засто и задвесте и затриста лет и множае писано: тех молитв необретается. И вдействе многая различия, и предсвятою литоргиею отпуста на всю церковь неположено в греческих, и в наших старых переводах. И осем прошу решения, новым ли нашым печатным служебником последовати, или греческим, и нашым старым которые купно обои един чин и устав показуют. И ектеньи во святеи литоргии сугубыя положены молебныя за многия прошения. А в греческих и в наших служебниках малыя: и о сем како быти. И великий государь царь и великий князь алексей михайловичь всея русии самодержец. И преосвященныя митрополиты и архиепископы, и епископы. Макарий митрополит новгородский и Великолуцкий. Корнилии митрополит казанский и свияжский. Иона митрополит Ростовский и Яросславский. Селивестр митрополит сарский и подонский. Михайло митрополит сербский. Маркел архиепископ вологодский и великопермский. Софроний архиепископ суздальский и торуский. Мисаил архиепископ резанский и муромский. Макарий архиепископ псковский и изборский. Павел епископ коломенский и коширский. И священныя архимандриты и игумены. Живоначальныя Троицы сергиева монастыря архимандрит андреян. Чюдова монастыря архимандрит ферапонт. Спаса новаго монастыря архимандрит никои. Симонова монастыря архимандрит илия. Андронникова монастыря архимандрит ермоген. Лужецкаго монастыря архимандрит ....⁴⁵¹ Богоявленскаго монастыря иззаторгу архимандрит серапион. Соловецкого монастыря архимандрит илия. Знаменского монастыря игумен варлам. Испереславля Борисоглебского монастыря игумен антоний. Большаго собора пречистыя Богородицы протопоп иоанн. Благовещенскои протопоп стефан. Архангельскои протопоп никифор. Спаскои протопоп григореи. Сретенскои протопоп петр. Рождества Богородицы протопоп андреян. Вознесенской протопоп иоким. Никольскои протопоп Климент. Рождества Христова протопоп⁴⁵².... Спаса нерукотвореннаго протопоп александр. Попровскои (sic!) протопоп артемий. Александровскои протопоп феодор. Черниговскои протопоп михаило И весь освященныи собор, вси едино отвещали достоино и праведно исправити противостарых харатеиных и греческих.

Во уставех наших написано во святеи литоргии в которое время двери отверзати точию на малои выход и навеликии, у нас же и довеликого выхода незатворены. бывают. Вы убо святый собор осем что глаголете, поуставули деиствовати или почину нашему. А вгреческих обычаех по уставу нашему действуют. Точию на малыи выход съевангалием и навеликии отверзают двери. Осем и водни благочестиваго царя и великого князя Иоанна васильевича всея русии такоже на соборе положено.

И святыи собор рече. И мы також утвержаем быти якож греческия и наши старыя книги и уставы повелевают;

В наших же уставех написано. В неделю убо бывает вначале, Зго часа святая литоргия начинается. А почину нашему когда соборной молебен случается, в начале седьмаго или осмаго часа бывает начало литоргии, а совершится в девятом. А по правилом святых апостол, 64м, аще который причетник постится в неделю или в субботу, да извержется, мирскии же да отлучится. И вы убо осем. что глаголете. Поуставу ли святых отце началу литоргии быти вначале, Зго часа, или по обычаю нашему вначале седмаго и осмаго часа. И осем нигде ненаписано;

И сему святыи собор суди поуставу святых отец быти.

Вселенскаго седмаго собора, 7: правило

да полагаются мученик святыя мощи в церквах и иже без них священны быша по обычной молитве, аще же святить без мощей да извержется яко преступник церковных преданий.

Толкование

Елицы убо церкви, прежде сего собора без обычныя молитвы творимыя от епископа бесположения мощей святых мученик созданы быша, Повеле собор полагати в них мощи святы, и обычную молитву епископом творити. Елицы же от епископ по соборе сем обрящутся без святых мощей свещающе церкви, собором сим наизвержение осуждени суть, яко преступницы церковным преданием.

А унас в росии все церкви без мощей священы, точию во антимисе части вшивают, и под престол мощей не кладут, якоже старыя потребники наши сказуют. А в старых наших потребниках о том указ есть что класти под престолом три части святых мученик. И вы убо о том что глаголете.

И Весь святый собор повеле по правилом святых отец, и поуставу якоже древнии потребники пишут.

Поместнаго собора, иже в лаодикии, правило 15.

Без малых ризиц, никтоже на амбон да невзыдет.

Толкование.

Не подобает на амвон взыти никомуже, ни пети, или людем божественная словеса прочитати, аще священническаго пострижения на главе не имать, и благословения от своего пастыря по святым правилом не будет приял. Аще же и приял будет, обаче и таковому несть инако како пети или чести на амвоне, аще не облечется в малыя ризицы. Малыя же ризицы глаголются, диффера, или фелонь.

А у нас простцы без благословения и двоеженцы и троеженцы в церквах чтут и поют и вы о сем что глаголете.

Исе святый собор подобно рече быти.

Во уставех Греческих, и в наших старых написано о поклонех в великую четыредесятницу, а вновых непротив Греческих и старых положено и осем должно есть истинно испытати. И рече святый собор положити против древних уставов.

Внаших старых потребниках и в служебниках указано и вгреческих на антимисах служити. А ныне то не действуется, антимис полагают под покровом и осем святыи соборе судите. Святый же собор рече, добро есть исправити против старых и греческих книг. И сие соборное уложение благочестивый Государь царь и великий князь Алексей михаилович всея великия и малыя росии самодержец. И великии государь святеишии Никон архиепископ московскии, и всея великия и малыя России патриарх, написати повелеша ради совершеннаго укрепления. Что бы впредь быти исправлению в печатном тиснении Божественным книгам, против древних харатеиных и греческих книг уставов потребников, служебников и часослов. И сего ради великии государь святейший Никон архиепископ московскии и всея великия и малыя, росии патриарх, и иже о Святем Дусе С сыновы своими, с преосвященными митрополиты, архиепископы, и епископом, и со архимандриты и игумены, и спротопопы, и совсем освященным собором, своими отечельскими руками подписанием затвердили. Яко да имать впредидущиа лета непременно сему быти. Сие бысть соборное уложение, Его царьского величества в полатах влето 7162е;

Никон Божиею милостию архиепископ царствующаго Града москвы и всея великия и малыя и белыя росии патриарх;

Смиренныи макарии Божиею милостию митрополит великаго нова града и великих лук;

Смиренныи корнилии митрополит казанский исвижаский;

Смиренныи Иона митрополит, ростовскии иерославскии;

Смиренныи селивестр митрополит сарский и подонский.

Смиренныи михаил митрополит Каласиискыи, и Кратовскыи;

Смиренныи марекел архиепископ вологоцкии

Смиренныи софронии архиепископ суздалскии и тарускии

Смиренныи мисаил архиепископ резанскии и муромскии;

Смиренныи епископ Павел коломенский и коширский; а что говорил на святем соборе о поклонех и тот устав харотеинои во оправдание положил зде а другои писмянои

Чюдова монастыря архимандрит ферапонт

Спасского нового монастыря архимандрит никои

Андроньникова монастыря архимандрит ермоген

Богоявленскаго монастыря иззаторгу архимандрит серапион

Соловецкого монастыря архимандрит илия

Пречистые Богородицы симонова монастыря архимандрит Илья

Знаменскаго монастыря игумен варлам

Большаго Богородицкого собору протопоп иоан подписал

Архангелскои протопоп никифор подписал

Преображенскои протопоп григории подписал

Стретенскои протопоп петр подписал

Рожества Богородицы протопоп андреан подписал

Рожества Христова протопоп трофим подписал

Николскои Протопоп Климент подписал

Спаскои что у государя на сених протопоп александр подписал

Покровскои что нарву протопоп артемеи подписал

Князь александра невскаго чюдотворца протопоп федор потписал