Деяние собора 1655 года⁴⁶⁵

Якоже убо многоводную пучину моря, в малую чашицу вместити не удобно: сице и великая дела, всех добрых виновнаго Бога, и дивное того милосердие навсех, пачеже начад христианския восточныя церкве изливаемое, словом по тонку изъявити невозможно. Благоволи убо той православную свою сущую в велицей и малей россии церковь, и с нею всех православия питомцов, всюду повселенней обитающих возвеселити, восхоте ю правоверных догмат целостию утешити. И что устрояет? Два великая дара яко некую диадиму царскую, священство глаголю и царство на ню возлагает. И первое убо яко моисея⁴⁶⁷ и давида дарова ей, благочестиваго и христолюбиваго великаго государя царя, и великаго княза Алексиа михайловича, всея великия и малыя россии самодержца: оцелости чистыя веры присно пекущася. Посемже избра мужа по сердцу своему яко втораго аарона и илию, великаго государя святейшаго Никона патриарха московскаго и всея великия и малыя россии, и вручи ему оную святую церковь пасти и соблюдати со благоволениемже Божиим, благочестивый Царь, со всем освященным собором, едва с велиими моленми сего государя святейшаго Никона, патриаршеский престол приятии и умолиша. Егдаже убо богоизбранный и христолюбивый и премудрый сей великий государь святейший Никон патриарх московский и всея великия и малыя россии, воли Божии, и царскому, и всего священнаго собора прошению повинуся, и на престол великия и святыя церкве возшед, не иных мирских богатых касается разсмотрети, но яже належать пастыреви, якоже глаголет божественный апостол⁴⁶⁸: подобает епископу безпорока быти яко Божию строителю, пособствующу по вернем словеси учения, да силен будет утешити в здравем учении, и противящыяся обличати. И сия внушив упразднися от всех, и вложися в труд, еже бы Святое писание разсмотрити. И входя в книгохранилницу со многим трудом многи дни в разсмотрении положи, и обрете ту грамоту, в нейже написано греческими писмены, како и коим образом в царствующем граде Москве начата патриархи поставлятися, и како равночестнием совселенскими патриархи якоже пятое чювство почтошася: написанаже сия грамота влето 7097-го, в царство благовернаго царя царя и великаго князя Феодора Иоанновича всея русии. Подписашажеся той грамоте, Иеремиа архиепископ константинополский и патриарх вселенский, Иов патриарх российский, и сними 5 митрополитов, 1 епископ, 21 архимандрит, 18 игуменов, всехже 52. И паки, всесвятейший государь патриарх Никон прилежа о иных, и обрете еще книгу писанную с собору вселенских патриархов, греческимиже писмены, бе же собор той святый в новом риме в константинополи в лето 7101. Нанемже беша, и книзе той содеянной нанем подписашася, Иеремий патриарх вселенский, Иоаким патриарх александрийский, Софроний патриарх иерусалимский, и сними 63 митрополиты, И архиепископов, 3 епископа, всехже 80. Писаноже в той книзе, яко святейший архиепископ московский, и патриарх всея россии брат есть православных вселенских патриархов: и с сим именованием единочинен им и сопрестолен, и чином и достоинством равен, яко пятое чювство вселенския восточныя церкве. Ксимже в той книзе соборныя глаголы сицевы: яко понеже убо совершение

прият православных церковь, не токмо по богоразумия и благочестия догматом, но и по священному церковных вещей уставу, праведно есть и нам всякую церковных ограждении новину потребляти видящим новины всегда виновны бывати церковнаго смятенияже и разлучения: но уставом последовати святых отец, имже наученная невредима безприложенияже коего любо и отъятая приемлющим: от единаго бо Духа вси святии озарившеся, уставиша полезная. И яже убо анафеме предают, и мы проклинаем: и яже низложению, и мы низлагаем: и яже отлучению, и мы отлучаем: и яже запрещению предают, и мы такожде подлагаем, и прочая. И яко да во всем великая россия православная со вселенскими патриархи согласна будет, прочётже сию книгу государь святейший патриарх Никон в страх велик впаде, не есть ли что погрешено от их православнаго греческаго закона, и нача в нуждных разсмотряти, еже есть символ правосланыя веры: верую во единаго Бога, и прочая. И узре на саке святительском, егоже от грек в царствующий град москву прежде 250 лет принесе фотий российский митрополит, символ православныя веры воображен греческими шитыми писмены, вовсем согласующеся святей восточней церкви. Потом узре той же символ в московских в новых впечатных книгах: и много обрете несогласия: таже и святую литургию разсмотрив, обрете вней ово прибавлено, овоже отъято и превращенно. Посем и во иных книгах узре многая несходства. И совет сотвори, к сыну своему, великому государю царю, и великому князу Алексию михайловичю, всея великия и малыя россии самодержцу, дабы по 37 правилу Святых Апостол, и по 8 правилу вселенскаго шестаго собора: и по 6му правилу вселенскаго седмаго собора, о церковных вещех, и о Божественых повелениих истязании, и о разрешении недоуменных и недоразумных вин, собор повеле составити, вся ему сказав коея ради вины. Онже великий Государь, яко послушнии Святыя и великия церкве насе Духом Святым научен, и премудраго Государя Святейшаго Никона патриарха советом поощрен, соизволи. И убо собору во царских его полатах в лето 7162-е сошедшуся, нанемже председателствоваста Благоверный и христолюбивый государь царь и великий князь Алексий Михайлович всея великия и малыя россии самодержец, и премудрый великий государь святейший Никон патриарх московский и всея великия и малыя россии, и сним сынове его и сослужебницы, Макарий митрополит новгородский, Корнилий митрополит казанский, Иона митрополит ростовский, Силивестр митрополит крутицкий, Михаил митрополит сербский, Маркел архиепископ вологодский, Софроний архиепископ суздалский, Мисаил архиепископ рязанский, Макарий архиепископ псковский, Павел епископ коломенский, к сим 11 архимандритов и игуменов, 13 протопопов, всехже 34. Туже и его царскому синклиту предстоящу. Всесвятейшийже государь патриарх Никон яко илия боговидец ревнуя по Господе Бозе вседержителе, возгласи коблагочестивому царю, и ковсему священному собору, и ксинклиту, и рече: Ничтоже ино богоугоднее есть якоже во святых присно и Божественных Божиих заповедех поучатися, и на тех крепко утвержатися. Сего ради и Спас ко учеником глаголаше, аз есмь свет миру, ходяй по мне не имать ходити во тме, но имать свет животный. И аще в словеси моем пребудете, воистинну ученицы мои будете: и паки, имеяй заповеди моя и соблюдаяй я, той есть любяй мя, а любяй мя возлюблен будет отцем моим. И паки, аще кто слово мое соблюдет, смерти не имать видети во веки, и емуже аще просите, будет вам. Сего ради великий во царех Иустиниан кроткий присно пребыв в заповедех Господних искусом познав написа сице. Великая паче инех еста в человецех дара Божия от вышняго дарована человеколюбия Божия священствоже и царство: ово убо божественным служа, сеже человеческими владея и пекиися, от единаго и тогожде начала обоя происходят человеческое украшающе житие. Яко ничтоже тако бывает поспешнее царству: сего ради якоже святительская честь, о обоих самех тех присно вси Богу молятся. Аще бо они непорочни будут вовсем, и к Богу имут дерзновение, и праведно и подобно украшати начнут преданыя им грады, и сущыя под ними, будет согласие некое благо, все еже добро человечестей дарует жизни. Сему быти веруем, аще священных правил блюдение сохранится: ихже праведно похваляемии и поклоняемии самовидцы Божию слову предаша апостоли, и святии отцы сохраниша же и заповедаша. Сего ради должно есть и нам от Спаса нашего и Господа Иисуса Христа преданныя заповеди, святыми апостолы и святыми отцы, возсиявшими на святем никейстем вселенстем соборе тримисты, и осмиюнадесятми богоносными отцы, и впоследующих вселенских 6 соборех, даже доседмаго, второе в никеи собравшагося. Такожде и между седми вселенскими, в различная времена собрашихся поместных православных соборех хранити. Понеже убо совершение прият православных церковь, нетокмо по богоразумиа и благочестиа догматом, но и священному церковных вещей уставу. Праведно есть и нам всяку церковных ограждений новину потребляти, видящим новины всегда виновны бывати церковнаго смятенияже и разлучения: но уставом последовати святых отец, яже наученая невредима, без приложенияже ко его любо и отъятия приемлющих, по 1-му вселенскаго седмаго собора правилу, сице глаголющу: святая правила облобызающе приемлем и держим, святых апостол, и шестих вселенских соборов, ксимже и поместных, ещеже и святых отец наших, яко от единаго святаго духа вдохновенны: и ихже они проклята, проклинаем и мы; и ихже извергоша, извергаем и мы; и ихже отлучиша, отлучаем и мы; и имже запретиша, запрещаем и мы. И сим святых апостол и святых отец правилом последующий, и святый священный собор, бывший в константинополи, во дни благочестиваго царя феодора иоанновича всея русии, приемлем и лобызаем. Сего ради должно есть нововводныя чины церковныя, с древними греческими и славенскими книгами разглашающыяся, исправити якоже лепо: и о сем прошю ршения, новым ли московским печатным книгам последовати, внихже многая обретошася нами от преведших, и преписующих я не искусне, с древними греческими же и славенскими несходства, и не согласия, явнееже рещи погрешения, или древним греческим и славенским, иже обои един купно чин и устав показуют. Внихже святии Божии человецы и велицыи сих творцы восточнии богословцы и учители, афанасий великий, василий великий, григорий богослов, иоанн златоустый, иоанн дамаскинский, и петр, алексий, иона, и филипп московстии чюдотворцы, и прочии святии поучающеся Богови угодиша, и нам вползу нашю незазорныя оставиша, и невредны блюсти повелеша. Сия великому государю святейшему Никону патриарху богодохновенно изглаголавшу: благочестивый царь, и весь освященный собор вси едино отвещали: достойно и праведно исправити противо старых харатейных и греческих. И еще святый той собор рече сице: и мы такожде утвержаем быти, якоже греческия и наши старыя книги, и уставы повелевают. И тако благочестивый государь царь и великий князь Алексий михайлович всея великия и малыя россии самодержец, и великий христолюбивый государь святейший Никон патриарх московский и всея великия и малыя россии, богоизбранная сия и богомудрая двоица святый оный собор совершивше, и Духа Святаго исполнишеся, исполнения ради на том святом соборе уставленных, повелеша древния святыя книги от греческа языка на славенский прежде многих лет, яко 500 лет и вящше преведенныя, и нахартии писанныя, во царствующий свой град москву собрати. И абие премудрым их повелением отвсюду из древних российских книгохранителниц, и их великаго нова града, и живоначалныя Троицы из сергиева монастыря, и из юрьева монастыря, и из хутыня монастыря ижи в великом нове граде, и из иосифова монастыря волоцкого, и из прочих градов, и честных монастырей. Святыя оныя древния предмногими леты писанныя книги собрашася. Таже благочестивый царь и христолюбивый патриарх, богоизбранная сугубица, оными собранными книгами единеми не удовлившеся, умыслиша здраво, да не едина их воля, но да и совет вселенских патриархов оных книг о исправлении будет вкупе, и усвоивше богобоязнива мужа, именем мануила грека, и с ним грамоты своя, внихже и опогрешенных в книгах вопрошения написавше, ко вселенским патриархом послаша, втоже 7163 лето. Всесвятейшийже вселенский патриарх Паисий, и сним священнии мужие, благовернаго царя, и благочестиваго патриарха писания приемше, собор о сих скоро сотвориша, и главизнами нанем содеянными о всех писанных кним, благочестивому Царю, и христолюбивому Патриарху ответ давше, и деяние соборное прислаша, в лето 7163-е. Вовсем повелевающе последовати древних великих православных восточныя церкве учителей, писанием сущим вветхих книгах, греческих же и славенских, возписаже всесвятейший Паисий патриарх вселенский ко всесвятейшему великому государю Никону патриарху московскому, и всея великия и малыя россии, и в грамоте своей сице. Преблаженнейший и святейший патриарше высочайшия москвы, и всея земли российския, господине Никоне, во Святом Дусе возлюбленный брате, и сослужебниче нашего смирения, о нем же писате нам, даем ответ о всех преблаженнейший брате, да исправятся якоже лепо: понеже Бог Просвети тя во времена ваша, да очистятся вся неудобная и да исправятся, онем же радуюся, жив Господь Бог, и имам тя писана в души моей, за достоинство и разум, егоже дарова тебе Бог, и о благом твоем здравии зело возрадовахомся, и прославихом Бога. Ещеже разумехом и вину церковных прошений, ихже толкование просит от апостольския соборныя понам великия церкве, и воистинну зело похвалихом преблаженство твое, еже непрестает испытати и искати о душеполезных и спасителных вещех церковных, яко истиней пастырь, и верный строитель Божий, пекийся устроити и питати духовне, словесное свое стадо, чистою и нелестною и твердою пищею. И тако по блаженному павлу, труж дается и бдит о душах православных, яко имать вздати к Богу слово оних. ихже ради преблаженнейший брате с великою радостию, и добрым сердцем потщахомся вскоре истолковати, и ответ дати. И собрахом священный собор, и узрехом я, и писахом на едином коемжде чистое, и православное толкование, и се связахом я в книзе, и посылаем я с помощию Божиею в руце ваша. Да разумеет всяк толкование и смыслы, яже имут чинове церковных таинств. Да предадите их всем священным лицам, да совершат последование, и всякое священнодеяние почину великия церкве: да ни едино разнство имамы, яко чада истинная единыя и тояжде матере, восточныя апостольския соборныя великия церкве Христовы: и да ни едину вину обретают скверная еретическая уста оглаголати нас онекоем разнстве, но да стоим во истинном согласии тверди и непоступни, и прочая.

Написаже всесвятейший вселенский патриарх паисий в тойже своей грамоте и сие, зело дивяся и глаголя тако: обаче преблаженнейший брате, сопрошением зде речеся слово, яко бывают в церковных чинех некая, яже зрятся не стояти добре, зане не имут подобие чином великия церкве, и удивляися како невопросишася и сия. И первое, яко во святом символе святых отец никейскаго собора имате некая приложения, и некая словеса, яже мы не имамы. Посем, и иная некая несогласия в церковных вещех. Сего ради мы от многия любве, и еже по Богу желания, еже имамы быти во всех со единении, и подобии тако едино тело церковное, желаем да исправятся, да не пребудет некое слово у еретиков осудити нас, яко имамы разньства между нами: и прочая. К сим тойже всесвятейший Паисий патриарх вселенский, и символ православныя веры, еже есть верую во единаго Бога, и прочая: греческим языком на писанный, и вовсем трехсот осминадесяти богоносных отец на никийстем соборе, и 150 святых отец, в константине граде сошедшихся Духом Святым составленому сложению согласующийся, в царствующий град москву ко благоверному царю, и ко благочестивому патриарху присла. И тако благочестивый царь, и христолюбивый патриарх от вселенскаго паисия патриарха, о всех писанных ответ приемше, и соборное оно деяние прочетше, и сим к болшему благих желании воздвигшеся, и сущыя в россии ветхиа греческияже и славенския книги, наисправление не доволно мняще, изволиша со многою своею милостынею старца арсения суханова послати во афонскую гору, и во иныя святыя старожитныя места, к держащим и еще греческаго закона уставы непреложно, яко да и оттуду своея ради богатыя милостыни старописанныя книги притяжут. И сему сбывшуся, святыя горы афона, боголюбивии началницы, святых и честных монастырей лавры, ватопеда, хиландара, иверскаго, Дионисиа, пантократора, ксиропотама, котулмуси, дохериа, симона петра, рускаго, филофеа, святаго павла, и прочих, изыскавше во своих книгохранителницах книги изрядны, и право писаны греческим языком, числом 500. В нихже тако суть книги древния, яко оттого времене в неже они писани, прейде лет Евангелию 1050, Евангелию же 650, Псалтыри, яже писана при греческом царе алексии комнине, 600, евангелиеже, еже отгрек епископ Иоаким принесе в великий нов град, внегда благоволением Божиим первое крести его. Григориа богослова 737, служебнику 600, служебнику же 455, и прочия, евангелия, апостолы, псалтыри, пророческия, апокалипсисы, святыми отцы восточными изрядно истолкованныя, коим святых, Дионисиа ареопагита, Василиа великаго, Иоанна златоустаго, Иоанна дамаскийскаго, и многих святых. Ксимже уставы, октаи, триоди, минеи, часословы, и прочия святыя книги. Овым убо отних от того времене егда писаны, преидоша 700 лет, овымже 500, овым 400. И сия вся со оным арсением Сухановым, в царствующий град москву прислаша. Ещеже и от иеросалима патриарх святейший, евангелие прежде шестисот лет писаное присла. К сим святейший александрийский и антиохийский патриархи, и архиепископ пекскии и патриарх сербский, и халкидонский и ахридонский, и никейский митрополити, и иныя мнози от православных стран, писанием из царствующаго града москвы прошени. Немнее двою сот книг различных древних и святых внего прислаша. И тако благочестивая сия и богомудрая двойца, великий государь царь и великий князь Алексий михайлович всея великия и малыя россии самодержец, и великий государь святейший Никон патриарх московский и всея великия и малыя россии, оныя священныя книги совокупивше вся во едино, и доволно лежащая в них разсмотривше: и Божиим вседержителным манием со единившем их в любовь движими, целости ради непорочных догмат, и еще к вящшему утверждению о томже паки в царствующем граде москве в патриархии собор сотвориша: и беша натом священном соборе: Никон Божиею милостию государь и святейший патриарх московский и всея великия и малыя россии, Макарий патриарх антиохийский, Гавриил патриарх сербский, с митрополиты, и соархиепископы, со архимандриты, и игумены, совсем освященным собором. Почетшеже святое евангелие, богодохновенная апостольская, и седми вселенских соборов правила, коим и бывшее в лето 7163-е, придержаве благочестиваго и христолюбиваго государя царя и великаго княза Алексиа михаиловича всея великия и малыя россии самодержца, в царских его полатах соборное утвержение, и оное от всесвятейшаго вселенскаго паисия патриарха, присланное соборное деяние предся принесше, со усердием почтоша, и судиша е право, и от Духа Святаго составлено быти. Принесеже макарий патриарх антиохийский на собор, и своя православныя книги, служебник, и проча. И тако вся старописанныя греческия и славенския книги разсмотривше, обретоша древния греческия светхими славенскими книгами во всем согласующася: в новыхже московских печатных книгах, с греческимиже и славенскими древними, многая несогласия и погрешения. Прочтенымже сим всем и разсужденым, судиша тако быти, якоже апостолская и седми вселенских соборов, святая правила повелевают: и якоже на святых соборех, первое в царствующем граде москве, в царских полатах, потомже в константинополи, увсесвятейшаго паисиа вселенскаго патриарха, и сним священных мужей уставлено бысть. Посем от греческих и славенских древних книг, истинное избравше, и вию святую книгу служебник вовсем справя, и согласну сотворя древним греческим, и славенским, повлеша в царстующем своем граде москве напечатати, в лето 7163-е. И неточию едину сию книгу исправити восхотеша, но и прочил святыя книги, внихже, неким от преписующих невниманием, погрешения обретаются, вовсем с древними греческими и славенскими священными книгами, в них же ни едино погрешение обретается, согласити и исправити узакониша, даже всяк православный, неведения, и сопротивных благочестию погрешении, и еже оттуду находящия казни убегнув, во истинном разумении, и внезазорном с греческими православными законы согласии поживет зде во многолетном благополучении, вбудущемже веце в безконечной радости и наслаждении в славу и хвалу вседержителя в Троице поемаго Бога, и в честь Пресвятей Деве Богородице Марии, и всем святым.

Должноже убо всем и повсюду обитающим православным народом, восхвалитиже и прославити всех добрых вину Бога, яко великаго ради и естественнаго своего милосердия, избра в началство и снабдение людем своим, сию премудрую в заповедех его присно пребывающую двойцу, великаго государя царя, и великаго князя Алексия михаиловича, всея великия и малыя россии самодержца, и великаго государя святейшаго Никона патриарха московскаго, и всея великия и малыя россии, иже воистинну богом избрани, и того всебе исполнением заповедей его носяще, законно и премудро, данную им от Бога власть строити потщашася, и непорочнаго ради своего жителства, к Богу имуще дерзновение, праведно и подобно преданыя им грады украшают: к сим суд праведен, правду нелицеприятну, любовь истинну, благочестие неповредно храняще, всем всюду сущым подними тоежде творити повелеша. ихже ради чистаго благочестиа воздвигнувый их Бог все еже полезно человечестей жизни дарует, егоже они велицыи государи любовию своею, иже устроения ради вселенскаго между себе имеют зело увеселяют: не ко иным бо вещем прежде тщание свое государское приложиша, но точию да церковь Христова сиречь православный христианский народ в мире, и благоденствии здравствуя исполнением непорочных догмат богатея зде многолетное: онамо же безконечное, во благих гобзование себе уготовит, яко исполнитися наних государех премудраго гласу: егда рече царь праведен напрестоле сядет, ничтоже предним станет лукаво. Воистинну бо их благочестным повелением лукавство исчезе, неправда отгнана бысть, лжа потребися, вместоже сих истинна ликует, правда цветет, любовь владычествует. Темже благословен Бог в Троице Святей поемый, таковых великих государей в началство людей своих избравый, да даст же им государем по пророку желание сердец их, и хотения устну их да нелишит их, и весь совет их, и прошения их да исполнит. И да даст им долготу дний в век века, и славу, и велелепие, и благословение, да возложит наних. И веселием и радостию, да препояшет их. Да обрящется рука его всем врагом их на потребление, и да положатся ненавидящии их, яко пещь огненая. Да возрадуютжеся вси живущии под державою их, и давозвеселятся вси желающии нелестно сугубаго их здравия и благополучениа яко да под единем их государским повелением вси повсюду православнии народи живуще, утешителными песньми славити имут воздвигшаго их единаго Отца и Сына и Святаго Духа, единосущную Троицу истиннаго Бога нашего, вовеки вечныя, аминь.

В царствующем великом граде москве, в царство благочестивыя державы, государя царя и великаго княза Алексиа Михаиловича, всея великия и малыя россии самодержца, впервоенадесять лето царства его. И при сыне его благоверном царевиче, князе Алексии Алексиевиче, вовторое лето от рожества его.

Благоволением и повелением великаго государя, святейшаго Никона, архиепископа московскаго, всея великия и малыя россии патриарха: напечатана бысть сия божественная книга, глаголемая служебник, лета от создания мира 7163-е, от рожества же Господа нашего Иисуса Христа 1655-е, индикта 50, месяца августа в 31 день.

Богу единому в неразделней и неизреченней Троице славимому, Отцу, и Сыну, и Святому Духу, давшему сию книгу, служебник, от литургии Василиа великаго, Иоанна златоустаго, и прежде освященных восвятей четыредесятнице, и от службы церковныя, праздничныя и повседневныя, вечернияже, полунощныя, и утренния в ней содержимыя, нареченный, начатиже, делати и совершити, дабудет и отнас трудившихся во исправлении, и делании ея, и отвас притяжающих и ксвоему и ближняго спасению употребляющих ю, честь, слава, поклонение, и вечное благодарение всегда, ныне и присно и вовеки веков, аминь.

Се что добро, и что красно, но еже жити братии вкупе, слышахом (иногда) пророка во псалмех о соузе мира и любве глаголюща: и ничтоже посему нужнейши и краснейши есть человеком сего (ино мнети) пословеси божественаго павла пишуща к римляном⁴⁷⁰: Аще возможно еже от вас, совсеми человеки мир имейте, и наипаче егда церковь соединена есть сим: студно же есть и нечестиво сопротивное страдати, еже кроме мира быти, наипачеже церкви его лишитися, яже стязание паче творит, а не Божие строение еже в вере⁴⁷¹. От сих убо гневатися Духу кротости, и обращатися во вражду на непокаряющыяся и пребывающыя в сих [всем] бывает, елма и ныне ведый сие яко добро мир, сопротивноеже нектому. Невемы како рещи, аще и вмале видев разстоящю церковь чином церковным от восточныя церкве, насевере (глаголюже) в велицей россии, правяй ю. Во дни благочестиваго царя и великого князя АЛЕКСИЯ михайловича всея великия и малыя россии самодержца, пастырь сый а не наемник. Истинных догмат изобретатель, и всякаго дела благаго рачитель, наипачеже церковнаго законоположения и предания святыми апостолы и святыми отцы. Великий государь святейший НИКОН патриарх, московский и всея великия и малыя россии, подвигся соединити [ю] якоже иногда афанасий западныя с восточными разстоящыяся гласов ради ипостасных Святыя Троицы. Не отсебе же на сие мыслию превзятся, яко да небудет вещь в зазоре, и да не постраждет что аароне⁴⁷², наведшаго грех на исраиля, и разделившаго врадость сопостатом его, безсоветия ради; но от Духа премудрости и кротости подвигся (яко брат сего, иже нетокмо от Бога наставляем, но и иноплеменнича совета употребляя) сице и сей)⁴⁷³ ово писании писаше к восточным святыя церкве патриархом, овоже самоличне беседованием беседоваше к коемуждо их, внегда бывати им потреб своих ради у него, и тако от сего уведев истину, и совещав со иже под областию его святители, изврати от божественаго писания, на яже в велицей россии мнагая не соединеная восточней церкви, прежде соединеная бывша, и исправити, иже и исправи. Отнихже едино есть и сие, еже девятим частем святых приношаемых от третия просфоры, в предложении Божественаго хлеба во время проскомидии быти подобает, по образу святых небесных девяти чинов, а не единей, якоже прежде бысть в литургиарех славенских. И убо всесвятаго хлеба о агнце вина явлена есть, и во своем месте истолковася⁴⁷⁴. Ныне же должно есть рещи первее о богородичне частице от вторыя просфоры изимаемей, и о девяти частицах от оретия просфоры изимаемых. Отнихже каяждо коея ради вины приносится в предложении Божественаго хлеба во время проскомидии. О нихже изображение и толкование сице имать. Богородична убо частица приносится в приношении божественаго хлеба сея ради вины: понеже хлеб Божественый вовремя проскомидии местообразный еще тела Христова, и частица Богородична вместо оныя Девы Богородицы, яже роди его⁴⁷⁵ телесно. Посему образу хранится и образ истины, якоже глаголет псаломни⁴⁷⁶, предста Царица одесную сына царя Христа, сиречь близ десницы Царя стоит Царица, и приемлет первыя чести, яко Мати его, сего ради и полагается одесную святаго хлеба, яко вышши нетокмо всех святых, но и самех превышних и премирных святых небесных девяти чинов. Изряднееже и посему, яко служителница великаго смотрения, и дивнаго его соединения к нам, и яко виною ея мы соединихомся Богу и смесихомся. Святых же частицы от третия просфоры приносятся, пообразу святых небесных девяти чинов, иже нимножае, ниже менше полагаем, по многому в богословии дионисию ареопагитскому, ихже полагати обыкохом по богородичней частице, о левую страну святаго хлеба, яко ею приемлюще святыню, благомудрене сие творяще. Суть же почину святых частицы, сия суть:

Первая, святаго пророка и предтечи иоанна.

Вторая, святых пророков.

Третия, святых апостол.

Четвертая, святых иерархов.

Пятая, святых мучеников.

Шестая, преподобных отец.

Седмая, святых безсребреников.

Осмая, святых богоотец Иоакима и анны.

Девятая, святаго иоанна златоуста.

Или, Василиа великаго. Аще прилучится литургиа его в кий день.

И первая убо частица, приносится в честь и память, честнаго,

славнаго, пророка, предтечи, и крестителя иоанна, сея ради вины: понеже первый сей проповеда глаголя, се агнец Божий есть вземляй грехи мира, и первый сей служитель смотрения Христова бе, непосредствене, внегда крестити его во иордане реце. Никтоже бо бе прежде его служай. Первый же и евангелия проповедник бысть, внегда проповедати ему глаголющу, покайтеся, приближибося Царство Небесное. Сего бо ради и свидетелствовася от Христа, болий всех быти. Глаголаше бо о нем народом: аминь глаголю вам, не воста в рожденых женами болий иоанна крестителя⁴⁷⁷.

Втораяже частица приносится в честь и память святых всех пророк [и праведных] занеже и тии о всем смотрении Христове, предвозвещением послужиша, прорекше о рождении, о крещении, и како проповедь и чюдеса творяше, о страданииже и о воскресении из мертвых, и о вознесении на небеса с плотию, и о сошествии Святаго Духа. И о рождении убо его и о крещении давид во псалмех предрече, сице глаголя, мати сион⁴⁷⁸ речет человек, и человек родися внем, и той основа и вышний. О крещении же, глас Господень на водах⁴⁷⁹, Бог славы возгреме, Господь наводах многих. И паки инде: видеша тя воды Боже, видешатя воды, и убояшася. О проповеди же и о чюдесех, богогласный исайа провозгласи, сице глаголя, Дух Господень на мне⁴⁸⁰, егоже ради помаза мя, благовестити нищим посла мя, исцелите сокрушенныя сердцем, проповедати плененым прощение, и слепым прозрение. О чюдесехже, сице глаголаше, тогда отверзутся очи слепых⁴⁸¹, и уши глухих услышат. Тогда скочит хромый яко елень, и ясен будет язык гугнивых.

О страдании же, тойже исайа глаголет⁴⁸², сей убо язвен бысть грехов ради наших, и мучен бысть беззаконий ради наших. И паки: яко овча на заколение ведеся, и яко агнец пред стригущим его безгласен. И паки: о беззаконии людей моих прииде на смерть. О воскресении же, ин паки глаголаше⁴⁸³, идем, и обратися ко Господу богу нашему: яко той поби ны, и исцелит ны по двою дню, в день третей воскреснем, и живи будем пред ним. О вознесении же на небеса, паки давид глаголет, взыде Бог в воскликновении Господь во гласе трубнем. И ин паки: и станета нозе его в день он нагоре елеонствей. О сошествии же Святаго Духа, иоильсице глаголаше, и будет посем, излию от Духа моего на всяку плоть, ипрорекут сынове ваши, и дщери ваши.

Третияже частица приносится в честь и память святых апостол, понеже⁴⁸⁴ слуги и самовидци бывшии словесе, яко же иоанн в соборных посланиих пишет: еже бе и сперва, еже слышахом, еже видехом очима нашима, еже узрехом, и руки нашя осязаша о словеси животнем. И яко первии приимници Святаго Духа, посовершении смотрения Христова бывше⁴⁸⁵. Отнюдуже яко кони имуще всадника слово Христа обтекше вселенную, многим учением плениша в послушание Христово. И елма первое сие тройческое удобрени, по образу святых триех вышних чинов, непосредствине послужи смотрению Христову, сего ради первее⁴⁸⁶ и обыкоша полагатися святых сих частицы, рекше в первых ошую страну святаго хлеба.

От вторагоже чина, рекше от втораго тройческаго удобрения:

Четвертая частица приносится, в честь и память святых иерархов, иже⁴⁸⁷ трудишася по апостолех за благочестие, и яко приемници апостольскаго наследия бывше, рекше учения их, отнюдуже многая веры сокровенная изъясниша и предаша нам, во еже ведети о тайне смотрения Христова.

Пятая частица сего втораго удобрения или чина, приносится в честь и память святых мученик, сея ради вины: яко⁴⁸⁸ нетокмо правою верою от сердца послужиша тайне смотрения Христова, но и исповеданием словесе пред нечестивыми, даже и до излияния крове, ради излиявшаго заны свою кровь. И искуплшаго ею нас отклятвы законныя, и от работы вражия.

Шестая частица совершителная втораго удобрения или чина, приносится в честь и память преподобных и богоносных отец, сея ради вины. Занеже и тии во время свое послужиша, и угодиша Христу равноангельным житием. Сошествия бо ради его волею с небес, и страдания плотию еже по нам, издаша и тии плоти своя на волная мучения, рекше зелныя труды, на алчбу, на жажду, на бдение, на дололегание, и на прочая таковая. И тако совершается вторый чин или удобрение, святых сих триех частиц, пообразу средняго удобрения, святых небесных сил. Но убо первое удобрение, рекше первый чин святых непосредствене послужи смотрению Христову: сийже средний посредством перваго смотрения навыче тайну, якоже пишет божественный павел: наздани на основании апостол и пророк, сущу краеуголну самому Иисусу Христу: назнаменуя сим, поних бывших сего ради и частицы их в проскомидии в средних полагати обыкохом.

От третиагоже чина, рекше от третиаго последняго троическаго удобрения святых.

Седмая частица приносится в честь и память святых чюдотворцев, и безсребреник, сея ради вины: занеже тии ово посредствене вышними чины святых навыкоша смотрения тайне, не от себе бо вину вземше вере научишася, токмо от прежде бывших их, рекше, от апостол, и пророк, и поних от пастырей и учителей. Овоже непосредствене кнам бывших благодетелством: понеже бо от веры и блага жития яко сосуди чистии уготовашася навмещение божия осияния, рекше чюдесы от Бога прославишася, имже и кнам тех чудес исцеление непосредствене посылаемо бывает. Сего ради паче иных святых болше и именование притяжаша себе, еже чюдотворцами именоватися, яко приближне и скорее благодеяния подавающе нам. Тем паче за сие и церковь не остави сих святых частицы в проскомидии не полагаеме быти в последнем сем чину, благомудрене сие тврящи, яко да приближением и помощию их кнам скорою, жертвоюже их от нас возможем Бога милостива себе сотворити.

Осмая частица, сего третиаго удобрения или чина, приносится в честь и память святых и праведных богоотец иоакима и анны. И святаго, егоже есть день, и всех святых, сея ради вины. Занеже от тою богоотцу издадися нам плод и вина спасения, сиречь Пресвятая Богородица: и яко же Сын сея Христос Бог наш почте свою Матерь вышшею честию, над вся мирная и премирная существа, яко близ его присно быти непосредственне. И умиляему быти от нея паче, нежели от другия твари: нелепоже бы было, яко родителем сея лишеным быти веры, и жития блага, но подобаше да и тии спасутся: сего ради и родители ея, веры и дел ради спасе, и со святыми причте: ащеже убо глаголю яко и со святыми я причте, обаче не тоюжде честию почте, яко Матерь свою, да небудут сравнени оной. Сего ради церковь разлучающи я от оноя, вчини жертву приносити в честь и память их, в последнем чину, со всеми святыми обретающымся в последняя лета, яже блаженнейше нам времене ради богоотцу особная имена возложи, знаменующи сим, яко имут участие богорождения, ради и кпервым чином. Святаго же егоже есть день церковь в проскомидии поминает по богоотцех, в тойже частице⁴⁸⁹, сея ради вины: понеже летния его ради памяти, мнети его тогда нам бывает, чести его ради от нас, яже бывает в пении, и хвалословии кнему дне того, снами быти Духом, и сего ради почитающи его яко любезнаго странника⁴⁹⁰, первее сретающи, потом чествующи и упокояющи, конечнеже и провождающи, еже есть приношением и жертвою онем воспасение наше, молящи его⁴⁹¹ ходатая быти к Богу о гресех наших.

Девятая же частица совершителная третияго удобрения или чина, приносится в честь и память, иже во святых отца нашего иоанна архиепископа константинополскаго, златоустаго.

Или великаго василиа, аще в кий день прилунится литургии его быти, сея ради вины, яко возоглалыпе в кратце изложиша и предаша нам чин сея святыя литургии, внейже замыается всего смотрения таинство: еюже по достоинсвту правовернии спасаются, и Христа в себе вселяют общением святых таин, по писанному: ядый мою плоть, ипияй мою кровь, вомне пребывает, и аз внем, и сего ради от грех свобождаются: в последнем же совершителном третиаго удобрениа или чина, положися о сих святых приношению быти, зане яко последний чин, святых ангел, кнам приближне и не средствене в служение посылаемъ, захотящих от нас наследовати спасение: сице и сии святии преданием святыя литургии, паче прочих святых приближне нам помогают, и непосредствене спасают, аще по достоинству приемлем святыя тайны, и с намерением ума нашего приношение приносим оних.

Сего ради всяк чтый да разумеет сия, яко не просто ниже всуе восточная церковь прияла есть, из единыя просфоры, святых частицы, не множае ниже менше девяти полагати, но поподобию яко же преже рехом небесных девяти чинов благочиние расположи. Якоже бо тамо от единаго существа всем силам небесным быти, повеликому в богословии дионисию ареопагитскому, в девять чинов всему воинству сих разделитися: сице и зде, от единыя просфоры, рекше от единаго существа всем святым быти, в различныя же чины разделитися, якоже божественный Павел глаголет, и той да есть, овы убо апостолы, овыже пророки, овыже благовестники, овыже пастыри и учители, к совершению святых, в дело служения, в воздание тела Христова⁴⁹².

Ведоможе да будет тебе и осем, о иерею, яко егда совершаеши чин священныя литургии, даникакоже отнюдь дерзнеши многими просфорами просфоромисати, но якоже святая восточная церковь содержит, и древния харатейныя книги, нашего славенскаго диалекта свидетельствуют: сице и ты посему должен еси творити еже вящше над пяти да неимаши просфоромисати яже суть сия.

Первая просфора, отнеяже святый агнец взимается, яже антидор или анафора именуется: юже в конец литургии всегда должен еси раздавати всем христианом слушающым божественнаго пения святыя литургии. Якоже в конец литургии изобразися налисте 374-м.

Вторая просфора Пресвятыя Богородицы.

Третия святаго иоанна предтечи и прочих святых.

Четвертая, за живыя, от неяже взимаются частицы, первое завсякое епископство православных, за патриарха нашего имярек и завесь причет церковный. Потом за благовернаго царя нашего имярек. И заблаговерную царицу нашу имярек. И заблаговерныя чада их. Таже ктому яже и иныя аще имаши живыя да поминавши я почину, якоже зде изообразися в чине священныя литургии, накоеждо имя взимая частицу глаголи, помяни Господи имярек.

Пятаяже, за отшедшыя усопшых душы о памяти и о оставлении грехов их. Такоже яко и заживыя твори взимая частицу накоеждо имя усопшаго, глаголи, помяни Господи, имярек. И прочее якоже изообразися зде влитургиаре да твориши. Сего бо ради не просто зде изообразися сие, ниже яко прилучися: но якоже от третия просфоры, святаго иоанна предтечи, и прочих святых, 9 частиц взимается по образу святых небесных девяти чинов, отнихже выше рехом, яко от единыя просфоры, яже знаменует от единаго существа быти многим святым, друг друга и чином и числом разньствующим. Сице подобие и вчетвертой просфоре от единыя просфоры заживыя многия частицы да изимаеши, яко от единаго существа быти всему человечеству одушевленому, равне и заотшедшыя душы, яже от вторыя просфоры поживых приносимыя да твориши, яко быти всем душам всех человек отшедших мира сего, от единого существа.