Деяние собора 1656 года⁴⁹³

Понеже убо избра нас Святый Дух и освяти его благодать, в служение и строение таин его, и устрои пасти словесное стадо свое⁴⁹⁴, его же убо всяцем образом должни есмы соблюдати, елико и собе от навет смертных, поподобию стража, якоже глаголет пророк⁴⁹⁵: Аще бо мечю грядущу, не вострубит страж людем, ниже возвестит, и пришед мечь возмет душю, она убо забеззаконие свое взята будет, кровеже ея изруки стража взыщу. Василийже великий в постнических глаголет⁴⁹⁶, учиненый настроителство слова аще нерадит известити, яко убиица судится. Сего ради известившеся о сих тяжких запрещениих, да непостражем искусом в сих: Молит и вопрошает смирение наше, вашю святыню, и премудрый разум, к вящшему, и твердому содержанию нам пастырем стада овец, вкупе и вам, и еже бы налучшее пастыремже и пасомым происходити, ктомуже и яко да ни в малом чесом разстоятелни будем от себе мыже и стадо, и отлучимся главы нашея Христа. Ведуще вас истинных подражателей, рекшаго пророком⁴⁹⁷, непославе судит, ни по глаголанию обличит, (чтоже) воздвизают убо неции в нас прю, како персты имети десници, и воображати на лице знамение креста. Ови убо искуснии ихудожнии, три великия персты совокупивше, глаголю, великий палец, и указателный, и великий средний, во образ святыя тройцы, начертавают налице своем образ креста, ихже и мним добре творящих: овиже совокупивше указателный и средний великий перст, начертавают налице своем знамение креста, глаголюще изображати два естества Богочеловека, тремиже, первым великим палцем, и двема малыма глаголют образовати Святую Троицу. И се указующе како разумеют тема трема персты, о Святей Троице образ неприличен имущ, занеже неравенство имут персты к себе, великий с малыми, якоже слышим в писании равенство трех ипостасей к себе. И како разумети прочими двема, указателным и средним смотрения таинство, яко даневозмнится кому четвертое лице в совтавех имети. Кии убо отсих истиннии: тии ли иже первыми треми персты, или втории, иже двема персты, указателным и средним знамение креста творящии, и три персты великий, и два малыя, глаголющии во образ Святыя Троицы, молимся о сем возвестите нам, кое есть истина.

Предание прияхом с начала веры от святых апостолов, и святых отец, и святых седми соборов, творити знамение честнаго креста, с треми первыми персты десныя руки, и кто от християн православных нетворит крест тако, попреданию восточныя церкве, еже держа с начала веры даже доднесь, есть еретик, и подражатель арменов. И сего ради имамы его отлучена от Отца, Сына, и Святаго Духа, и проклята: и заизвещение истинны подписах своею рукою.

Макарий милостию Божиею, патриарх великаго Божия града антиохии и всего востока.

Гавриил Божиею милостию архиепископ пеккский, и патриарх сербский.

Выше реченная тако исповедаю, и тако свидетельствую, и тако держу. И аще кто неверует, и выше реченная недержит, да будет проклят, того ради руку приложих.

Смиренный митрополит никейский григорий пречестный, и екзарх всея вифинии, выше писанная тако исповедаю, тако проповедаю и тако держю, и кто недержит тако, да имать клятвы святых трехсот, и осми надесять богоносных отец вникей собравшихся, и прочих святых соборов, и да будет и проклят, и заизвещение истинны, подписах своею рукою.

Гедеон Божиею милостию архиепископ и митрополит сучавский, и всея земли молдавския, выше реченная тако исповедаю, и тако свидетелствую, и тако держю. И аще кто неверует, и выше реченная недержит, дабудет проклят, того ради руку приложих.

Уподобляется днешний святый день, благословении христиане, яко же егда един Царь идет набрань, и победит враги своя, таже возвращаяися приити в палату свою, посылает пред собою повеления во грады царствия своего. Да возрадуются и возвеселятся о победе царстей, и да разумеют яко грядет и царь победитель и победоносец. Тожде есть и днешнее торжество. Понеже Господь наш Иисус Христос великий Царь, имать в малых днех показати победу, юже сотвори на диавола, погребением и воскресением своим: сего ради предпосла честный и святый крест днесь, да уготовимся мы в сретение его. Убо днесь есть поклонителный день честнаго креста. Сего ради и мы, о христолюбивии, со страхом и трепетом да поклонимся ему, с душевною радостию, и веселием духовным, да целуем и⁴⁹⁹, зане днесь бывает радость на небеси и на земли. Днесь радуются ангели, и торжествуют человецы, яко пресветлейший крест Христов, является в мире: имже крестом демони изгоняются, и немощи бегают, грешницы исцеляются, и вси концы земли просвещаются. Днесь и церковь Христова, яко ин рай является. Зане якоже рай имать посреде древо разума, еже умертви адама запреслушание его: тако и церковь наша святая имать честный крест, древо жизни, еже возстави адама смерти ради Христовы, сего ради и являет и⁵⁰⁰ днесь нам человеком, да насладимся его, яко виновнаго, воскресения всего человеческаго естества. Днесь исполнися пророка давида пророчество, еже глаголет, поклонимся наместо, идеже стоясте нозе его. Убо да веселится и церковь Христова, и да радуется духовною радостию и веселием, яко се мы чада ея, собрахомся праздновати духовный праздник и торжество. Аще и злострадахом прешедше течение поста даже до днесь, но прииде день да торжествуем, и якоже егда един путетрудник ходит долгий путь, и жжет его солнце, и стужает ему зной, таже среди пути обрящет древо благозрачное и многолиственное, и седит подним в стени⁵⁰¹ его, и упокоится. Подобие и мы днешний день, понеже потрудихомся трудом постным, обретаем честный и святый крест посреде святыя четыредесятницы, и торжествуем еже по Богу торжество, малаго ради упокоения, да паки обновимся и добросердствуем, и укрепимся к прочему течению поста. Зане сей святый крест, есть оружие силное всякому христианину, царей есть победа, церквей есть честь, демонов гонитель, и благочестивых хранитель. Сего ради блажени суть они, иже обрящутся достойни поклонения его. Блажени суть они, иже поклонятся ему днесь с чистым сердцем. Блажени они, иже суть от оных, ихже определяет днесь Господь во святом евангелии, яко есть достойно последовати ему, ибо глаголет⁵⁰²: аще кто хощет последовати мне, да отвержется себе, и да возмет крест свой, и да последует мне. Се виждь како потонку определяет Господь слово свое. Не рече, аще хощете, аще нехощете, последуйте мне: но како, аще кто хощет последовати мне, сиречь не понуждаю, не насилствую. Кийждо есть господь себе, кийждо есть царь главы своея. Кийждо есть обладатель разума своего, и души своея, аще хощет спасти ю, аще любит погубити ю. Сего ради глаголю: аще кто хощет приити ко мне. Во благо вас зову. В покой вас призываю. Сего ради приидите волею, аще муж, аще жена, аще началник, аще нищ хощет спастися, да отвержется себе, и да последует мне. Три некая обдержит сия заповедь Господня. Едино убо, отврещися кому себе: второе, взяти крест свой: и третие последовати ему. Но да видим, что хощет быти, еже отврещися кому себе. И первее убо да речем, что есть отвержение иного. И тогда речем и за отвержение самого себе. Един иже отвергается иного, или брата, или друга, или соседа, или иного коего любо человека, аще и видит его наказуема, аще и видит его убиваема, или ино злое страждуща, ничтоже полагает во уме своем, непомогает ему, не печалует о нем, понеже единою разлучися отнего. Убо тако хощет Бог, да непечалуем и мы о теле нашем, аще и биют нас имене ради его, аще и мучат нас любве ради его, аще и ино что скорбное творят нам веры ради нашея, да в ничтоже вменим умом нашим. Сие есть, еже отврещися кому самого себе. И паки нерече, да вержется: но рече, да отвержется, сиречь всячески и совершенно да отвержется себе. Таже повелевает ниже, и да возмет крест свой, сиречь да возмет насебе крест свой. Зришили, киим оружием укрепляет великий Царь и Бог воина своего? Не дает ему броня⁵⁰³, ниже лук, ниже мечь, ниже щит, ниже ино что от оружий земных воинов. Но что? Честный и святый крест. Той есть и мечь, той есть и щит, той есть лук, той есть, и аще кое оружие востребовал бы благочестивый христианин. И яко же егда един царь купит оружия добрая, и дает воином своим: подобие и Господь, крест сей даде нам оружие, и повелевает нам, зрите крест мой колика возможе. Зрите како победи смерть, како попра силу диаволю. Убо и вы творите сицевое оружие, аще хощете творити и вы ныне, елика сотворих и аз, наипачеже вящши. Зане веруяй вмя, и болша сих сотворит. Кий бо есть разум, еже глаголет, да возмет насебе крест свой? Не повелевает яко да сотворит кийждокрест от древа, носити и⁵⁰⁴ на раме своем, зане сие кую ползу имать. Или кия добродетель есть носити кому крест на раме своем? Но что хощет рещи? Тако да имате пред собою смерть вашю, якоже и он, иже имать распинатися занекое погрешение, носит крест на раме своем, и ходит трепеща, и ожидая смерти. Тако и вы да чаете смерть вашю, толико яко да ненадеетеся, яко имате пренощевати, и паки нощию да не надеетеся, яко имате предневати. От всех грехов мира да будете умерщвлени. Якоже повелевает и павл апостол, мир мне распяся, и аз миру. Тако да умираете на всяк день, якоже глаголаше и паки тойжде апостол на всяк день умираю. И не да умираете естественою смертию, но произволителною. Кая есть произволителная смерть? Егда умертвиши страсти, егда презриши похоти телесныя⁵⁰⁵: егда умертвиши нелепая твоя хотения, тогда глаголешися, яко умерл еси произолителною смертию. Тогда тело убо твое умерщвляется, душаже твоя оживляется. Сие хощет рещи еже да возмет крест свой. И паки ниже повелевает, и да последует мне. Понеже суть инии человецы, иже непщуют навсяк день смерть свою, якоже татие, якоже убийцы, яко елицы иже творят тайно безместная деяния, яже суть достойная смерти, сего ради повелевает, да последует мне, сиречь нехощу мужественаго человека, не боящася токмо смерти сея временныя, но ищу человека, иже есть достоин последовати мне, творити елика сотворих и аз. Сицевый бе апостол и верховный петр, иже распятся стремглав любве ради Христовы, сицевый бе апостол павл, иже глаголаше⁵⁰⁶, кто нас разлучит от любве Христовы, скорбь ли, и ли стеснение, и ли гонение, и ли глад, и ли нагота, и ли беда, и ли мечь. Сицевый бе и пророк давид, иже глаголаше⁵⁰⁷, тебе ради умерщвляемся весь день, вменихомся яко овцы заколения. Сицевии бяху и мученицы, иже пролияша кровь свою любве ради Христовы. Сицевии бяху и постницы, иже постничествоваша, и умертвиша тело свое воздержанием, Царствия ради небеснаго. Сицевым повелевает Христос и нам быти.

Сего ради благословении христиане, да укрепимся и мы тем честным и святым крестом, и да будем усердии к прочему святыя четыредесятницы. Да не любим добрострастия тела нашего, но красоту души нашея да желаем. И да презираем добрострастия мира сего. Добра убо есть и радость мира сего добро видится нам и добрострастие тела. Добр есть и временный сей живот, понеже дар Божии есть: но егда помыслим будущий живот и радость, удобь презираем радости мира сего, егда оградим себе силою честнаго креста, удобь постимся и воздержимся. Зане сей крест есть сила и утвержение всех благих. Тем совершаются вся таинства веры нашея. Тем венчаемся, тем освящаемся. И аще хотят священници служити, и аще хотят архиерее рукоположити, тем честным крестом исполняют вся. Сего ради и мы аще и путешествуем, того да имамы спутника: аще и в дому есмы, того да имамы хранителя: аще и спим, того да имамы наблюдателя. Несть от нас далече, кийждо христианин близ себе имать крест: обаче да несотворит безумно и несмотреливо, якоже творят вяшщии неведуще. Но имать творити и⁵⁰⁸, якоже есть лепо благочестивому христианину. Суть неции, иже овогда на челе своем, овогда на раме своем, овогда начреве своем полагают руку свою, и творят крест свой безумно. Егда полагаеши руку твою первее начеле, таже на десном раме, или налевом, и тогда положиши ю на чреве. Кий крест сотворил еси тогда, понеже той несть крест, но наипаче поругание есть. Но како должен есть творити кийждо благочестивый христианин крест свой. Первее убо да совокупит три своя персты, за Святую Троицу: великий перст, и другия два сущая близ его. Таже первее убо да положит ю начеле своем, второе на чреве своем, третие на правем раме, и четвертое налевом Деяние Собора 1656 года раме. Егда творит тако, тогда знаменует истинный крест. И слышите кий есть разум креста. Егда полагаем руку нашю на челе, таже низводим ю начрево, хощем рещи, яко, Господь наш Иисус Христос Сын Божий бе, и есть Бог. Убо нашего ради спасения, и да веруем мы в него, сниде с небес долу на землю, и паки иде долнеише от земли, сиречь в муку. И свободи тамошния мучимыя душы. Егда же паки посих положим ю на десном раме, таже на левом, хощем рещи, яко от нёлиже свободи душы праведных от муки, вознесеся на небеса, и седе одесную Бога и отца, и паки имать принта судия всего мира, поставити праведныя убо от десныя своея страны, грешныя же от левыя. Сего ради молим его, да не поставит нас в левой своей стране, но да сподобит нас стати в десной своей стране со святыми. Сие знаменует крест, егда творим и⁵⁰⁹ налице нашем, сего ради должны есмы яко есть лепо творити и, да действует и сила его. Яко сей крест услади отравы, сила сего креста ослади горкая зелия, якоже мученицы, иже творяху крест свой, и пияху отравы. И что дивно есть и сие, аще при моисеи древо услади горкую воду мерры, колико наипаче сила крестная да не действует болшее. И слышите како услади древо воду мерры да познаете яко древо оно, честный крест пообразоваше, моисей от нёлеже проведе иудеи от чермнаго моря, приведе я на пусто место, еже именовашеся сур, тамо хождаху три дни, и необретаху воду пити. Идоша на место, еже именовашеся мерра. Тамо обретоша воду. Но бе горка зело толико яко невозмогаше человек вложити воуста своя. Сего ради именовася и имя места оного, горести. Евреи же роптаху на моисея и глаголаху, что нас извел еси от египта, и не оставил еси нас умрети тамо наместе нашем? Ныне даждь нам воду, да пием, и мы, и жены наша и дети наши. Тогда моли моисей Бога, да усладит воду ону: и Бог показа ему едину часть древа, и вложи е во езеро оно, и абие усладися вода.

Сего ради егда противится тебе еврей, и глаголет, како крест творит толика действия? Рцы ему и ты. Подобаше Христу, о безумие иудее, распятися, зане вси пророцы, и сам моисей тако предпроповедаша, и реша. Первый моисей глаголет, узрите живот ваш висящь пред очима вашима. Ниже глаголет. И неуверуете животу вашему. Живот, сам Христос есть. Зане прежде воскресения своего, воскреси мертвыя: и паки по воскресении своем воскреси сущыя отвека мертвыя. И паки пророк исайа глаголет о Христе. Яко овча на заколение ведеся, и яко агнец прямо стригущаго его безгласен, тако не отверзает уст своих. Сице и Христос идяше смиренно ко кресту, и не отверзаше уст своих гневатися на евреи. Ащеже речет ти, яко о ином глаголет пророк слово сие, рцы ему ты, о Христе сие глаголет: зане паки посих глаголет, род же его кто повесть. Сиречь кто может поведати род его. И паки глаголет пророк иеремиа, аки от уст евреов: приидите и вложим древо в хлеб его, и сотрем его от земли живых. Хлеб Христов, тело его глаголется, зане в нощь, внюже хотяше Христос предатися, прият хлеб, и рече апостолом, сие есть тело мое. Древо убо, еже вложиша еврее в хлеб Христов, сам крест есть, на немже распята Христа. Яко Бог истинен бе Христос, иже распяся свидетельствует книга ездры, яже глаголет, благословен Господь Бог, прострый руце свои, и спасый иерусалима пред очима нашима. И паки глаголет пророк давид, аки отлица Христова. Ископаша руце мои и нозе мои. Всячески о христе глаголет. Зане ниже давид, иже глаголет, ниже ин кто от пророк сие пострда. И пакаи премудрый соломон глаголет аки отлица евреев, в книзе яже именуется премудрость. Смертию безобразною осудим его, зане рече, яко Божии Сын есть. Яко есть достойно и лепо поклонитися кресту, и пророцы научают нас. Пророк Давид глаголет, поклонимся наместо идеже стоясте нозе его. И паки, возносите Господа Бога нашего, и поклоняйтеся подножию ногу его. И паки, дал еси боящимся тебе знамение, еже бежати от лица лука. Знамение убо есть крест, егоже знаменуем налице нашем, лукже есть сам враг, и убийца души нашея диавол. И паки: сотвори сомною знамение во благо, да видят ненавидящии мя, и постыдятся. Ненавидящий суть демони. И паки глаголет пророк иезекииль, даст знамение на челах их. И премудрый соломон глаголет. Благословите древо имже бывает спасение. И пророк исайа показует откотораго древа бе крест. И глаголет, в кипарисе и пеике и кедре, вкупе еже прославити место святое. Но и чюдеса, яже бываху древле от жезла моисеова, вся действо креста прообразоваху. Зане жезл моисеов, честный крест предзнаменоваше. Жезл моисеов бысть змий, и пояде жезлы волхвов, яже имяше фараон. Подобие и честный крест сокруши силу демонов. Но и даже до днесь сокрушает. Жезл моисеов раздели чермное море, и преидоша еврее невредимы из рук фараоновых. Подобие и честный крест раздра злый грех, и преведе душы человеческия невредимы от действ диаволских. Но и даже доднесь им памогаемся, и творим добродетели. Жезл моисеов расторже камень, и изыдоша дванадесять источники, и пиша жаждущии еврее. Подобие и крест, расторже мир твердый и непокаянный. И изведе дванадесять апостолы, и научиша прелщенный мир. Но и праведный иаков жезлом своим пройде иордан реку, якоже и сам глаголет. Жезлом бо моим сим, проидох иордан. Обачеже вся сия быша да веруем мы, яко и болшая может сила крестная творити, именем Христа, иже распятся нанем. Сия есть вера нас христиан. И аще кто убо держит ю, пойдет в жизнь: аще же кто презрит ю, мучим будет. Сего ради покланяемся кресту, чтим гвозди, и Христу иже распятся, веруем, и исповедуем его Бога истиннаго, еретиков проклинаем, евреем ругаемся. Агаряном смеемся, иже уничижают нас, яко покланяемся древу, или сребру, или злату, или железу. Ибо мы веществу не покланямся, но образ креста почитаем, имуще ум наш к распятому Христу, зане аще обрящем древо простое, или железо, или сребро, быти воином начертании, непокланяемся ему. Но понеже торжество имамы, и о кресте беседуем, да речем малая некая к виновному праздника нашего. Радуйся кресте, вселенныя слава и радование, зане тобою человецы побеждающе силу врагов своих, радуются и веселятся. Радуйся кресте, благочестивых царей непобедимое оружие, зане твоею силою царие укрепляются, и побеждают силу супостатов своих. Радуйся кресте, безсилных сило, хуждьших усиление, благочестивых людей победо и укрепление. Радуйся кресте, благочестивых воин дерзновение, зане тобою дерзающе воини, входят в брани. Радуйся кресте, путешественников спутниче, обуреваемых победо, бедствуемых избавление. Радуйся кресте, трижелаемый и пречестный, плавающих наставление, обуреваемых тишино, монахов сило, мирских хранило, мучеников похвало, постников радование. Радуйся кресте, апостолов проповедание, пророков пророчество, учителей помоще, всех святых святое и честное украшение. Радуйся кресте, хранителю благочестивых христиан. Тебе имамы оружие и хранилище, тебе имамы помощь: твоим действом посрамляем враги нашя, побеждаем демоны, низлагаем гордость диаволю.

Тому мы благословеннии христиане да поклонимся, того да облобызаим, того вседушно да целуим сострахом и радостию. Сострахом убо, занедостоинство наше, с радостиюже, за благодать, юже нам дарует. Того силою да укрепимся, и да будем усердии к прочему святыя четыредесятницы, да прейдем ю достойно, и яко Бог хощет, да зде убо сподобимся чювственныя пасхи, и светлоноснаго воскресения Господа нашего Иисуса Христа: таможе достигнем во умную пасху, в радость ангелов, в стояние святых, и царство небесное: егоже буди всем нам получити, во Христе истинном Бозе нашем. Емуже подобает слава, честь, и великолепие во веки веков, амин.

Елика убо вещь велицей чести припрягается, сия о себе требует сугубаго прославления: первое, глаголю, от естества своего, второе по оном от словес, яже о ней. И елико первым и зообилует, толико и вторым изяществует. И несть иному чесому мню непщеватися величайшею честию от иже сущих на земли вещех, якоже честному и животворящему кресту. егоже бо похвалы и силы аще кто точию и ли сень и ли образ открыет, абие наполнит вонею, обоневающих обоняния. Кто убо невесть моисеова жезла силы, еюже реки вкровь преложишася, и лжеименитыя змии волхвов поядошася. И овогда ударением впрям чермное море пресечеся, овогдаже паки тожде море, преким ударением поражаемо, воду совокупи. И враги убо погуби, верныяже спасе. И паки тойже моисей рукопростертием крестнаго образа, амалика победи. Ктому же последи <неразб.> влаганием древа в воду, (еже образоваше креста), железо от глубины возвлече, да аще тамо в предвоображаемых, толика сила бяше креста, колико паче в самом том распятаго кресте сила, яве вкупе и в последствуемых действуема будет, аще истинно от нас вообразится, от вещи или вида. От вещи убо, якоже послучаю от древа, или <неразб.> яковыя вещи: отвидяже, якоже, осенением кому десници своея налице своем, или на ином чесом, четвеространно, якоже мнится глаголати афанасию великому, глаголющу⁵¹⁰, крестному убо образу от двою древу слагаему покланяемся, иже на четыре страны разделяется, якоже и впоучении евангелия воскреснаго в слове о кресте, навоздвижение, сице глаголет⁵¹¹: крестный убо образ на четыри страны разделяется. И вышняя убо его, праваго древа, вышним рогом содержима суть: нижняяже, нижним: посредняяже его, двоими странами прёчнаго древа содержима суть.

Подобие сему и преподобный никои бывый монах черныя горы, пишет в слове осмом. Крестный образ написуется от прекаго начертания и от праваго. Сим убо честным крестом, онемже ми и слово есть. Непрестану сладостию его наслаждался глаголати о нем врата райская затворенная, паки отверзаются. Смерти держава разрушися, ад сокрушися. Умершии живота содобишася. Небесная со земными совокупишася. Оставление грехов наших даровася: сынове Божии и наследници Царства небеснаго сподобихомся. Крестом совершаются вся таинства веры нашея. Тем венчаемся, тем освящаемся. И который убо язык изглаголати может, елика и какова крестом Христос Бог дарова роду человеческому. Сей крест и мы аще истинно якоже предрех воображаем, приличноюже честию его восхощем почтити вещию, или осенением десници⁵¹² на лице нашем, треми первыми персты, соединивше я, во образ Святыя Троицы: великий глаголю перст, иже именуется палец, и другая два сущая близ его, иже глаголются, указателный, и вскрай его великосредний имиже яве возвещающе тоя Святыя Троици равенство же и соединение, в купе и несмешение. Равенством убо: зане яко во Святей Троице, несть первое и последнее, ниже более и мнее, но целы три ипостаси, соприсносущны суть себе и равны,⁵¹³ сице и в тех трех перстах первых, несть болшаго. Нименшаго, но вси равенство имут к себе же и друг к другу, якоже и в самех их видети есть. Соединениемже тех перстов вкупе, не якоже неции местом разсекающе, с малыми последними, великий палец мимо средних двух протягше соединяем, но ариевы пропасти, злобожнаго разделения бегающе, единосуществие исповедуем оныя Святыя Троици. Несмешениемже, разньство лиц, проповедающе, савеллиеву скудость отреваем. Не глаголем бо ниже сливаем⁵¹⁴ вся три персты воедин перст: но коегождо их вемы почину глаголати: палец, глаголю, и указателный и средний. И полагаем я первое на челе нашем, егоже касается вышний рог креста. Второе на чреве нашем, егоже достизает нижний рог креста. Третие, на правом раме: четвертоеже налевом, яже знаменуюта содержати посредним разстоящыя концы. Нанемже и распятый о нас, руце распрострый, вся языки расточеныя в концах воедино собра: яве воистинну тогда знаменующе и, на себе, подостоиньству его почитаем, и спасаемся им от всяких наветов врага. И тако сим и зоображение, первых трех равных перстов, яко же предварив рех, истинно почитается и прославляется от нас, не исповедимый силою честный крест. Суть же нецыи сопротивныя сему творящии, иже не по предуставленному нам изоображению крест употребляют, но ови от них первое начеле своем, второе на раме своем на десном или на левом: таже последи на чреве своем руку свою полагают, и творят крест свой безумно, иже нетокмо зазираеми всем, но и отлучаеми и проклинаеми суть. Овиже невем откакова случая, иже и от наших суть, близствующии кним в сих страждут. Чином убо изоображения добре приличествуют истинне, содержаниемже в соединении перстов зело разнствуют. Великий бо палец соединяют с последними малыми двема, заключающе вних тайну Святыя Троицы: прочимаже двема указателным, и вскрай его, средним, таинство смотрения Бога Слова проповедуют: приводяще насия свидетелства, блаженнаго мелетиа антиохийскаго, феодорита же и максима, инока святыя горы, обители ватопедския. Кним же кообоим да прострется от нас слово вопросителное, вкупе и увещатлное употреблении их крестнаго изоображения. Еда истинствуют? рцы ми противниче, егда полагаеши руку свою первее на челе, таже на десном раме: или на левом, последиже сего на чреве кий крест твориши тогда, не поругание ли сим твориши паче, неже крест. Понеже како исповеси по сошествии Бога Слова на землю, вознесение его на небеса. Не творя его прежде снития на землю. Рцитеже и вы соединяющии великий перст, снесть палец, содвема малыми последними, велие неравенство и разстояние местное между себе имущими, како можете исповедати таинство Святыя Троици, соприсносущныя и равнославныя, неприличными воистину всячески, изоображением первообразнаго, идеже несть ни первьства, ниже последства, якоже выше рехом, и ниже болшества, ниже меншества во оного естестве. Якоже в толковании на григориа богослова никиту ираклийскаго слышим, яко о сем свидетелствует и глаголюща сице⁵¹⁵, Хощу Отца болша рещи по отеческой вине Сына и Духа, Отца бо вину имуть Сын и Дух, еже суть от того быти, и просто быти, сие бо отвсех исповедуется, яко Сын рожден, Дух же исходен: но боюся, да несотворю болша Отца начало, вину меншему, болий бо к меншему глаголется болий. Аще ли умалю оттого суща посуществу и несозданнаго, укорю и того: слава бо есть Отцу, отнегоже Сын и Дух. Нечтый бо рече Сына, нечтет Отца: и прочая. От онудуже всякому весма известно есть, яко равными и подобными персты к себеже и друг к другу, Святая соприсносущная, сопрестолнаяже и равнославная Троица почитается, а не неравными и неподобными к себеже и друг к другу: зане како бы образ был первообразнаго, неспасаяй пообразное. Рцитеже еще прочее и о двух перстах, указателном глаголю и среднем, имиже глаголете, исповедати таинство смотрения, Бога Слова, и глаголюще вних заключати Божество и человечество, како исповедуете? Зрите убо, еда не впадаете, (аще и нехотящим вам) во еже мудрствовати две ипостаси во едином Христе, и разделяти по несторию глаголющему, иного убо быти Сына Бога слова, иже от Отца рожденнаго прежде век. Другагоже, Иисуса, иже от назарета, человека проста непщевавшему, и по любви соединена, а не Бога истинна воплощьшася, якоже и вы ныне разделяете? Первее в трех перстех и зообразующих Святую Троицу указуете быти Сыновню ипостась: таже особь отделивше ину поведаете быти, воуказателном, глаголю, и великосреднем: или еда сего блюдущеся, яко да не причастится Отец и Дух вочеловечению Сыновню? Но дане убо мнится кто в вас сицевая мысля, и бояся отложити нововводое, и необдержное сие изоображжение. Покормжеся паче вси вкупе древнему преданию, от святых апостол, и святых отец преданному, еже треми персты первыми воображати на лице нашем честный крест. И сим исповедати Святыя Троици тайну, вкупе и смотрения и ненепщу им вины причастия быти Отца и Духа, вочеловечению Сына, и сего ради отразим и обдержное предание. Всякому бо негли явлено есть, яко не пробщишася существене, советомже иизволение никтоже от имущих ум возлюбопрится неприобщившихся. И сего ради посему да не отлагаим оба таинства первыми великими персты исповедати Святыя Троици, глаголю, и смотрения Бога слова. И сия суть дозде: остает же вам от себе известити и свидетели на предание ваше вам преданное, кто суть быша. Еда мелетий антиохийский патриарх? Но сего вемы таковаго предания никогда же кому предавша, разве аще его от сего вы приводите внегда ему насоборе бывшу с верными, и соарианы стязующуся о вере, и немогущу чем препрети я? Тогда якоже повествуется в житии его сице, востав показа им три персты, и не бысть знамения. Потомже два совокупль, и един пригнув, благослови люди. И изыде от него огнь яко молния. И вся верныя удиви, противныяже устраши, и посрами. Рцыте убо противнии. Которыя в начале три персты мелетий показа разлучены. Два ли последния с великим палцем, якоже вы мните, или первыя три великия, глаголю, палец указатеныйже и великосредний? Несице бо ему тогда действующу изображением, якоже непщуете, два ему малыя последния соединити, и един великий перст, снесть палец, кним пригнути, но повсему известно его свидетелство, первому и обдержному, и повсюду содержащемуся преданию помогающее. А не вашему нововводному и второму: якожеи повесть тамо сама свидетелствует, якоже рехом. Не малыя бо два перста с великим палцем разлучены друг от друга показа. Разсудите убо паче како бы мощно ему показати, внегда первее несложны показа и явствено сотворити, яко два малыя с палцем указоваше, тогда всем пятим просто стоящим, и неведомо кой нарещи, первыя ли три, или два малыя с палцем. Всяко бо не возможно дву средних глаголю, кому, ниже отделити от трех, ниже паки преклонити я, аще и покусится кто, ноневозможет. Ниже паки таяжде малыя два совокупль, и един к ним пригнув: но первыя три персты десници своея показа разлучены друг от друга: сиесть палец, указателныйже и великосредний, отних же тогда и знамения не бысть, зане не сложны и несоединены друг со другом показа. Потомже паки егда от техже перстов два совокупль, сиесть указателный и средний, великийже перст сиесть палец к ним пригнув, благослови люди: и тогда изыде от него огнь, яко молния. Егда и достохвалный он тогда испусти глас, сице глаголя, три убо ипотаси в Божестве разумевваем, о единомже Божестве глаголем. И якоже: аще паки хощете свое утвердити, во вселенскомже и обдержном сумняетеся, вникните в писанная от оного мелета и разсмотрите, опасно, известноли тамо указует, яко малыя совокупль с великим, на все Божество указа: в прочихже двух, сиесть воуказателном и великосреднем таинство смотрения заключи? Но никакоже имате тамо показати сего. Но ли феодорит кий преда о сем, егоже нипрозвания известно вемы, кий той феодорит бяше, и коего града, аще антиохийский, аще кирска града, и ли ин кий. Но аще кира града, то сего писания славенским диалектом не имамы зде, аще же где и суть, не вся приемлются от церкве, понеже много вних клевет бяше, на поборника веры кирилла александрийскаго, и на святый третий собор, иже воефесе, и на правую нашю веру: злочестивому несторию помогая, яже сего ради и отриновенна, и проклятию предана от святых отец пятаго собора: иныхже феодоритов писания ниже где слышима суть, и нижё имена их в реестрах сочисляема: и сего ради насия писания несть тверду надежю кому имети. Но ли паки, максим святыя горы. Максима убо вемыже, яко муж благ, и разума и премудрости исполнен бе. Якоже и писание его свидетелствует о нем. Еликоже что писа, осем не вемы откуду писа и ли яко человек, снизходя пострадав предприятию и обычаю нашему подобием естества утвердившемуся последова, вкупеже и наветов бояся от ненаказанных: мнитсяже яко елико писа, от себе писа: понеже никогоже воспомяну, ни апостола, ни от святых коего древних предавшаго о сем. Ниже яко обдержное сие возвести и всевселенское. Якоже истинное предание древнее свидетелствованное дамаскином иподиаконом, потом бывшим митрополитом солунским, и прочими святыми древними, ктомуже и яко содержащееся повсюду, идеже христианство именуемо свидетелствует темже, аще и благ муж максим, и разума и премудрости исполнен бе, и писания его многая согласна Божественным писанием, и приемлема суть, обаче не всячески нужда есть веровати ему, идеже что от себе писа. Темже вся сия разсмотривше, и уведевше предложенная вам свидетелства от Божественнаго писания о честнем и животворящем кресте, вкупе и о еже киими его персты на лице нашем изображати. Имуще к сему свидетели повсюду в православии жителствующыя, иже вси попредопределенному⁵¹⁶ определению содержат. Еже первыми треми персты десници своея налице своем воображати крест, внихже заключают тайну Святыя Троици, вкупе и смотрения престанемже уже исполу благочествовати: несть бо то благочестие еже ово убо содержати с восточною церковию, овоже нектому, злочестие бо паче, неже благочестие от имущих ум вменится, якоже глаголет божественый великий евлогий папа александрийский сице, аще кто от произволивших богоносным отцем покусится что поколебати, нектому сие смотрение нарицати, но преступление и отметание веления, и к Богу нечестие: прославимже его паче истинными всеми догматы, от негоже нам и от угождьших его преданными. Такобо сих хранением, почтется от нас и честный крест, имже спасение восприяхом, и надеемся в будущем еще: благодатию и человеколюбием Господа нашего Иисуса Христа: емуже подобает всяка слава, собезначалным его Отцем, и сопресвятым и благим, и животворящим Духом, ныне и присно, и вовеки веков. Аминь.

Правость указателнаго перста, и косвенство средняго, иже исфакела глаголемаго, Иисус имя яве начертаваюта⁵¹⁷: правому, I, представляющу, косвенномуже, С: тем же и близ друг друга два сия перста такожде изобразуема, яве сие являюта. Косвенное же соединение к друг другу, вместо ручнаго, и близосредняго, иже епивата нарицаемаго, и паки близ сею косвение малаго, Христово имя знаменуита оба. Косвенство бо вместо ручнаго и епивата, (сиречь близосредняго) X стихион являет. Малыйже горбатый посем, С: имиже ХС имя, якоже речеся, являет. Но да яснее сие к разумению имать хотяй, (внезапу) начертавает руку благословящую, и яве сие познает. Подобает бо благословению начертании сему глаголемому, ничтоже ино являти, токмо благословеннаго Иисуса Христа имя, в немже благословляются вси язы́цы. Якоже и блаженному патриарху аврааму обещание бысть. Благословятся бо глаголет в семени твоем вся колена земная. Не речеже, глаголет божественный апостол, в семенех, но в семени, иже есть Христос. Подобаше убо и начертаванию благословящия руки, благословляемыя во Христе Иисусе, ничтоже ино знаменовати, токмо самое имя того, внемже благословляемся. Сего бо ради, мню, и божественным промыслом тако изначала от него всех зиждителя, персты человеческия длани устройшася, а невящше, ниже менше, но елицы. Ниже лишше, ни оскудне, но доволне к сицевому знаменованию имуще.

Другу возлюбленному, максим монах радоватися во Господе.

О немже спросился еси со мною, сицевая отвещаю тебе, и тобою всякому православному.

Священный символ, еже есть исповедание православныя веры христианския, изложен бысть первым собором 318 святых отец в никейском граде, привеликом царе константине, изложен бысть ими досего точию, веруем и во Святаго Духа. И вторый вселенский собор 108 святых отец собравшихся на духоборца македония, хуляща на Святаго Духа, и глаголюща его создана, а несоздателя. Приложили святии отцы богословие, еже о Святем Дусе. Третий же вселенский собор святых отец 200, собравшихся воефесе, на христоборца несториа, хуляща и глаголюща иного быти Сына и слова Божия: и иного егоже родила присно Дева Мариа: егоже ради и не хотяше глаголати Богородицу присно Деву Марию, но христородителницу: разделяя окаянный водва лица, единаго Богочеловека Иисуса Христа. Сего ради святый третий собор сей заключи, и крепце заповеда страшными клятвами, святый символ, изложенный прежними двема соборома, дабы никтоже прочее дерзнул помалоумней своей дерзости, ниприложити что отнюд к нему, ниуложити из него, ни едину черту нийоту, еже есть и нипременити ниедино речение, ни писмени, от яже в нем: иже и рекоша тако. Аще кто последи дерзнет таково что восвятем символе православныя веры, да будет проклят, и чюждь всякого благословения и собства христианскаго. Страшна заповедь и запрещение сие, и великаго соблюдения достойно всем нам. Аще убо истинною желаем получити спасение, и сообщение соизложившими святыми отцы, священный символ православныя веры нашея. Неглаголи убо яко мала разнь есть дерзаемое ныне новое аки мудрословие. Страшная заповедь их, равне подлагает анафеме, и прилагающаго, и от емлющаго, и пременяющаго наименшее писмя. Недобра убо такова наша похвала, да неглаголю дерзость. Подтуюже бо анафему и вас подлагает претворяющих богодухновенная словеса, глаголющих, из Марии, а не Марии: и чаем, а не чаю: и жизнь будущая веки, а не будущаго века. Доволно вам ратная дела умети строити: а яже Святаго Духа, оставите имже дано есть, неможете Богу и мамоне работати⁵¹⁸, глаголет Божие слово⁵¹⁹. Колико молися святому пятому собору великий царь иустиниан, да быша изволили ему приложити во священном символе, едину малу речь сию, еже есть присно. Да идеже глаголем, и Марии Девы: да глаголем, и Марии Приснодевы⁵²⁰. И они треблаженнии отцы соблюдающе заповедь первых четырех соборов, неизволиша ему приложити речь оную во святом символе, аще и ничтоже вредит, пачеже приращает славу и похвалу Пресвятей Богородице: а воиных похвалах ея велели и глаголати и писати. егоже ради и царь неполучив от собора прошения своего, любовиюже ко Пречистей Богородице нудим, сам сложил стих сей: Единородный Сыне и слове Божий безсмертен сый, и изволивый нашего ради спасения воплотитися от Святыя Богородицы, и присно Девы Марии, и прочее. Блюдитеся да не отмалых сих ваших преступлений бывших, и болше паднете: пределы и уставы отеческия преставляти несть на ползу, глаголет Божия премудрость, Божия словеса претворяете и премудросте. Аще бо неложен есть глаголяи учеником своим, невыбо будете глаголющии, но Дух Отца вашего Небеснаго. Немудрствуйте паче, еже подобает мудрствовати, гаголет премудрый павел Христов апостол. Держитеже и проповедайте исповедание веры христианския непретворно, якоже предали православным вси святыя соборы, и четыре патриархи, и ваши отцы, и святии чюдотворцы держаша. Да будете во всех подобники им, и сопричастники Царствию небесному, и жизни вечныя будущаго века, рекше грядущаго и хотящаго явитися во втором пришествии страшнаго судии. Сию жизнь безконечную Иисуса Христа, жду, погречестей пословице, а не чаю: жду, рекше твердою и несуменною верою уповаю получити. А яко несть леть ни спасително прилежити что ко святому символу, ни уложити из него, или пременити речение каково, слышите внятно что глаголет премудрый иоанн златоустый. Якоже бо о царских златых денгах, иже аще и малейше что от образа изсечет, всю цату непотребну содела. Такоже и иже что от здравыя веры, аще и малейше что претворит, всю преиспортил. Согласноже сему учит и блаженный исидор пилусийский глаголя. Отъемлющии, или приложити что смеющии от богодухновенных словес, единем от двою недугуют, или бо неверуют яко Духом Святым писана бышя святая писания, и сего ради праведне нарекутся и суть безверники: или себе самех мнят мудрейших Святаго Духа: и что ино, разве неистовствуют. Подобие тем святым и аз грешный богомолец ваш молю вы Иисус Христом, престаните оттаковаго новоявленнаго мудрования⁵²¹. Брань бо и соблазн двизаете точию православным, а не наползу. Се аз послушал царя и пророка, глаголющаго, и глаголах овосвидении твоих пред цари, и нестыдяхся: сказах вам всю истину апостольскую и отцы преданую. И аще убо послушаете краткаго сего воспоминания моего, и престанете прочее смущати люди Божия, слава Богу давшему грешному мне сицеву силу словесную. Ащели непослушаете, блюдитеся глаголющаго Господа: горе тому человеку имже соблазн приходит, и прочая. Мир Христов с вами.

И о сем убо доволно есть в научение наше слово сие, премудраго максима, еже восвятем символе ничесоже приложити, ниже отъяти, или измнити ни едино речение. Или писмя, еже в нем.

А яко в греческом символе писано древле и ныне, и в славенском древнем сице, и в Духа Святаго, Господа, животворящаго, а истиннаго, небяше писано, свидетель достоверен монах зиновии бывый житель пустыни именуемыя отни, сущия близ великаго нова града, егоже и писание зде положим.

Вопроси мя Захария клирик, глаголя: в символе ови глаголют, и в Духа Святаго, Господа: овиже глаголют, и в Духа Святаго истиннаго: аще есть разньство некое воглаголех сих?

Рекох же ему, иже право веруяй кто нелицемерне, мню немного разньство зде, аще и мнится не единоименно: обаче есть страх в селице. Еже неглаголати, и в Духа Святаго, Господа. Видех бо в правилех древняго превода книга, преписаныже быша при ярославе князе сыне владимирове, и приепископе иоакиме, в начале крещения нашея земли: воизображении православныя веры писано, и в Духа Святаго, Господа: а не написано, и в Духа Святаго истиннаго: но написано, Господа. Нестьже просто, или мудростию человеческою писана правая вера она, еже есть, верую во единаго Бога: но побогодухновенному писанию, по пророчестей и апостольстей проповеди, малыми глаголы, великоюже мудростию, все Божественое писание ветхое и новое сказаша, о единосущней Троице, во изображении веры. Тако изложишя святый символ святии отцы, и в Духа Святаго Господа. И по первом вселенском соборе все святии отцы: во вселенских шести соборах от втораго до седмаго, крепко закляша, ни приложити ни отъяти, иже восвятем изображении православныя веры: но соблюдати непоколебимо всем православным везде.

Святый седмый вселенский собор, заклял неспроста всяку книгу неписати, но святыя веры изображения иныя неписати, но всем христианом крепко держати изображение веры, юже писаша 318 отцы перваго вселенскаго собора, и той ни приложити что, ни отъяти от нея: еже есть в верую воединаго Бога Отца вседержителя. Неседмыйже точию собор сия закля, но и прежде его святый вторый вселенский собор сие закля пишущих ново что в веру, паче изложеннаго изображения от святых отец, перваго вселенскаго собора, иже в никеи бывшаго, 318. бысть же заклятие таковое вины ради сея⁵²². Царь константий сын великаго константина развращен от евсевия митрополита, и во арианство впад, покусися превратити святыя веры изображение, егоже святии отцы, 318, изложиша. Написа же константий со евсевием изображение веры по ариеве ереси, отъят единосущие отнего, и некая внем приложив. Собравже собор велик, хотя утвердити изложенное по ариеве ереси, еже написа со евсевиевою чадию изображение. Предложи сие собору иже в средце. егоже всятии отцы видевше отринута, утвердишаже правоверие. Потомже вторыи вселенский собор святый, таковое нечестие изтребив проклятию предаде, и заклят в прочая ниприложити ни отъяти что восвятем изображении правыя веры, от 318, в никеи собора написанием: ни писати иного символа, паче писанного в никеи в первом соборе, якоже дерзнул писати Константин со евсевием. Оттоле даниктоже дерзнет сотворити таковое писание, но твердо хранима будет православная вера, еюже апостоли научишя, юже мученицы исповедашя, и отцы святии утвердишя, от пророк проповеданная искони, безвсякого приложения и отъятия. Сице святый вторый вселенский собор утверди святую веру, а не после седмаго собора. Проклят же и македония, яко похуливша на Духа Святаго. Такожде святый вселенский третий собор, по первому и второму собору, несториа проклят, преступивша святую веру. Такожде святый вселенский четвертый собор, попервому собору, веру утверди. Такожде и святый вселенский пятый собор, попрежебывшим собором утверди. Иустиниан царь благочестивый зело теплейшею любовию ко Пречистей Богородице, сей восхоте приложити во святем символе, присно, едино токмо: еже, сошедшаго с небес, и воплотившагося от Духа Свята, и Марии Девы. Иустинианже много моляше святыя сия отцы, пятого собора, приложити, присно: и глаголати, сшедшаго с небес, и воплотившагося от Духа Свята, и Марии присно Девы. Святииже отцы, твердо храняще преданный символ первым вселенским собором, царево повеление отринушя, и символ невредим соблюдошя: не приложишя в него, присно: но цело, якоже и прежде утвердишя, воплотившагося от Духа Свята, и Марии Девы. Судивше праве, яко непредвигати предел, яже отцы положишя. И закляша, яко никомуже смети приложити, или отъяти что во святом символе: но тако соблюдати цело и не поколебимо, якоже в первом соборе написаша отцы святии. Такоже и святый вселенский шестый собор, и вселенский святый седмый собор, утвердиста и закляста ниприложити ни отъяти что от святаго символа, но невредно соблюдати изображение святыя веры.

К семуже должнствуется употребити, восвидетелство известное и самых соборов, и яже между соборы, и пособорех бывших святых отец многая свидетелства. Великий бо новый богослов кир нил кавасила, бывый митрополит фессалоникии, в разрешении четыредесят втором латинскаго силлогизма, о изложении символа, воспоминая деяния соборная, в нихже како кийждо собор заключи неподвижно соблюдати на никейском соборе изложенную веру, о трех сот и осминадесяти святых отец, глаголет сице, другое убо вторый собор не исписует изображение: но еже отникейских отец изложенное прочетше. И понеже видеша о Дусе слово сокращено суще, паче же рещи неизъявлено, к явленнейшему то приложением возведоша сице: И в Духа Святаго, Господа, животворящаго, от Отца исходящаго, Отцу и Сыну с покланяема, и сславима, глаголавшаго пророки, и прочая, яже тамо наоном соборе тверде же и известие заключи божественыя веры образ непоколебим соблюдати. Верховный священнаго оного лика отец, великий богослов григорий, внегда епистолию клидонию писа сице, глаголя, мы веры никейских святых отец сшедшихся наразорение арианския ереси, ниже что паче предпочтохом никогдаже, ниже убо предпочести можем, но оныя есмы веры с Богом, и будем, по изъясняюще недостаточне реченное онеми о Святем Дусе. Се како той премудрый муж нил, изложенный приклад к первому изображению от втораго собора, явствено утвержает, еже, и в Духа Святаго, Господа, истиннагоже невоспоминает. Ненаедином бо месте воспоминая сие изображение, но нигде же истиннаго воспомяну, зане небезбедно непщева, еже что приложити, или отъяти. Сице и третиаго собора деяние воспоминая, егоже судилище ефес имея, воньже снидошася от всея вселенныя божии священницы, сице глаголет. Повеле святый сей собор, иную веру нелеть быти кому произносити, или списывати. Чрез уставленую от святых отец, иже в никеи собравшихся 318. смеющихже другую веру слагати, или убо произносити, или исповедати хотящым обращатися в разум истинный, или от еллинства, или от иудейства, или убо от ереси которыя: сих аще убо будут епископи, или причетницы, чюжим быти еископом епископства, и причетником причта. Аще ли людстии будут, анафеме да предадутся. Подобие и 4-й вселенский таже излагает в пределе своем, глаголя, ни поединомуже образу поколебати что отнеких воуставленной вере, еже есть в символе, от святых отец в никеи изложенном, ниже убо повелеваем себе, или иным, или речь пременити отлежащих тамо, или едину преступити сроку, поминающе глаголющаго, непрелага пределы вечныя, яже пожиша отцы твои, небо бяху тии глаголюще, но Дух Бога Отца, иже исходит убо от него, естьже нечюжд Сына посуществу словесе, и прочая. Равне, и пятый, и шестый, и седмый последуще третиему, и четвертому, запрещает на прилагающих и отъемлющих.

Но убо и агафон папа римский, посылая к греческим царем с собором иже в риме, таяжде пиша, яко и прежнии собори, сице глаголет⁵²³: Сие есть совершенное наше ведение, да пределы соборныя и апостольския нашея веры ихже даже досего апостольский престол вкупе снами удержа, и предает, всем смысла хранением да сохраним, еже есть. Верую воединаго Бога, Отца вседержителя, и прочая, якоже изображение имать. Таже, и в Духа Святаго, рече, Господа, животворящаго, от Отца исходящаго, Отцу и Сыну спокланяема, и прочая. Се, Господа рече, а не приложи истиннаго, небо умолчал бы, аще бы воизображении тако было.

Свидетелствуетже о сем и святый иоанн иже от дамаска, егоже писание зрится в послании мелетиа патриарха александрскаго, сице глаголюще,

Воединаго Духа Святаго веруем, Господа, животворящаго: от Отца исходящаго, и в Сыне почивающаго, со Отцем и Сыном купно покланяемаго, и славимаго.

Верую воединаго Бога, Отца вседержителя. И воединаго Господа Иисуса Христа Сына Божия единороднаго, от Отца рожденнаго прежде всех век. И в Пресвятаго Духа, Господа, животворящаго, от Отца исходящаго, со Отцем и Сыном покланяемаго и славимаго.

Блюди, о православие, яко древле христианославенская церковь неимяше во священном символе прилога, еже, истиннаго, но токмо сице исповедаше, и в Духа Святаго Господа, животворящаго. Но писцы начата писати, ови, и в Духа Святаго, Господа, животворящаго; овиже, и в Духа Святаго, истиннаго, и животворящаго, якоже зрится в начале списания зиновиева. И потом начата обое вкупе писати, сице, и вдуха святаго, Господа, истиннаго, и животворящаго. И с тех растленных от преписующих книг, с прилогом, истиннаго, не испытав известно греческаго превода, и своих славенских древних добрых писм, начаша тако и печатати, и глаголати, и о том прилозе, еже истиннаго, бяше и древле воспоминание, в лето 7054-е во дни государя царя иоанна василиевича, егда бяше собор в царствующем граде москве⁵²⁶. И тогда макарий митрополит к вопросившим рече, едино глаголати, или Господа, или истиннаго, и сие рече, прием вину от различно писанных книг.

Убо оттоликих истинных свидетелей, хотяй может известитися, яко в греческом символе древле и ныне, и в славенском древле, небяше писано, истиннаго, но токмо, и в Духа Святаго Господа, животворящаго.

Прочее и о еже како опасно хранити подобает образ веры, вкратце положим свидетелства.

Сложение веры, иже всех изряднии богоноснии отцы онии сложиша, сиречь, верую воединаго Бога. Святыйже вселенский собор, Духа Святаго изъяснив главизну намакедониа духоборца, и всякое показав Духа богословие, предел положи еже приложити и отъяти что смеющим, быти анафема.

И потом блаженный Кирилл, иже во священном третием соборе, священное веры сложение запечатле заповедми и клятвами прегрознейшими: после которых приводит: аще кто подвизает нечто от догмат святых и божественных отец, сие ктому неподобает звати смотрение, но преступление, и предание догмат, и на Бога нечестие.

При василииже царе македонянине, и фотии пресвятейшем патриарсе, собор вселенский собран бысть в константинополи, повелением царевым, и святых патриархов, коутвержению святаго седмаго собора. Сей убо священный собор поутвержении седмаго собора, таковое повеление изнесе на тех, иже смеша приложити нечто во исповедании веры. Аще бо глаголет кто кроме сего священнаго исповедания веры смеет иное писати, или приложити, или отъяти, да будет осужден, и от всякого христианскаго сожития отвержен.

Но ныне неции прекословцы, или завистливым духом томими, или сущим неведением помрачени толиким светилам, святым великим богословным отцем непокоряются, и неприемлют святаго символа безприлога, еже истиннаго: но шепчут, яко подобает глаголати в символе, и в Духа Святаго, Господа, истиннаго, и животворящаго. Занеже Дух есть истинный, и о сем отписания избравше. (яко мыши огрызующе писания глаголют). Царю Небесный, утешителю, Душе истинный. И иная подобная сим. Рцем убо к таковым, яко исповедуем, Духа Святаго, Господа, истиннаго. Но еже во святом символе святии отцы нерекоша, мы неприлагаем, многа убо имена Святаго и поклоняемаго Духа⁵²⁷. Глаголется, Дух Святый, Дух истинный, Дух Божий, Дух Господень, Дух Отца, Дух Сына, Дух Христа, Дух иже от Бога, Дух жизни. Сия имена честныя силы Святаго и поклоняемаго Духа суть. Сутьже и иная имена, и не естеству пристоящая, но действу и силе его. Дух святыни, веры, обетования, премудрости, любве, силы, кротости, всыновления, откровения, совета, крепости, разума, ведения благочестия, и страха Божия. И аще убо понеких суемудреному мнению оскудевает символ без прилога, еже истиннаго. Но нужно глаголати в символе, истиннаго: еже вси святии отцы бывшии наседми святых вселенских соборех, не глаголаша и прилагати не повелеша. То уже и сия имена вся Святаго Духа, яже выше прочтошася, по онех мнению невредно глаголати во священном символе. И коликое будет сего безместие, еже далече буди нас праве верующих. Но паче да послушаем еже поведает премудрый монах максим грек. Яко преблаженнейший лев папа узрев прилог в символе, сотвори ко истреблению сего еретическаго недуга, посланми соборными, области и страны яже подним протещи, повелевая нектому латинскою речию, но еллинским гласом святыя веры исповедание гласити. Два некая сим сотворяя, яко греческою речию пригоднейшею сущею воизвещение речений, певаему священному символу, ереси ямы без беды да избежат верныя, яже подним: и да союз любве к восточней церкви обновит.

Тойже лев, и две дщицы обрете сохраненныя от древних времен, иже писан имяху священный символ: сия изнесе, показанным быти повеле, и пред всеми множеством прочитатися. Поведает пресвятейший фотий.

Подобие сему и ныне, святейший победы тезоименитый, архиепископ московский, патриарх российский, обрете, отвремен фотиа митрополита российскаго лежащая два сакка в ризнице архиерейстей, на нихже воображен златошвейным художеством, и насаждением чистаго и безсеменно рожденнаго маргарита, чистый и непорочный символ греческими писмены и глаголы, без всякого прилога и отъятия. И якоже другий боговидец моисей, яко написанныя скрижали от Бога она два сакка приим, и прочет возрадовася о словесех онех, по богодохновенному пророку и царю, яко обретаяй корысть многу. И со всяким тщанием преложи и наславенское речение, и показа типографским художеством новому исраилю, всему множеству верных, и повеле прочитатися всеми незазорно. Ведая известно, яко отнюдь неподобает в символе веры, или мало что, или велико, ни гласа, ни склада тамо положеннаго предвизати, или пременити: но цело подобает хранити то всею силою и вниманием, аки зеницу ока: да не под анафему толиких и толь великих святых отец себе подложим. Согласуяже и с мелетием, папою и патриархом александрским, и судиею вселенским, глаголет. Яко аще бы издравствующий рекли прилог, благословне отмещем, отцем восточным и западным, вся прилоги и отъятия под анафемою верных церкви предавшим⁵²⁸. И со святым кириллом александрским к противным отвещевает сице. Ни покоему чину подвигнутися подъемлем преданную от отец наших веру⁵²⁹, сиречь символ. Ниже попущаем себе, или иным, ниже глаголание пременити, от нихже лежат тамо, или един преступити склад, поминающе глаголющаго, да непрелагаеши предел вечных, яже положиша отцы твои. Небяху бо тии глаголющии, но Дух иже от Отца исходит.

Слышители дмящиися от ума плоти своея, и недержащиися главы своея, аще есте здрави уди ея, главуже глаголю, архиерея: свойствено бо есть архиепископу нарицатися главою области, наднеюже поставлен есть⁵³⁰, яко нетокмо разума, но и речение, и склад возбраняет святый кирилл александрский пременяти: и преступати не попущает, ни сам себе ни иным: яко от лица всего собора, ибо вселенский собор бе. И тии предел положиша запрещения, и страшныя онех клятвы прогласиша, яже содержатся в соборной книзе⁵³¹. Глаголет же и келестин папа римский, иже бысть предстатель священнаго третиаго собора. Велия мука уготована есть отъемающему, или прилагающему к вере преданней нам от святых отец, сиречь символу. Темже убо аще толик имуще облежащ нас облак свидетелей, якоже глаголет апостол, иже неприлучшимися наказании в лучшая и изряднейшая подвизают нас: но грозными и страшными клятвами, елико и от смертных наветов блюстися завещевают. Сице образ веры невредим хранити повелевают, како неким дерзостне вознепщевася. Невем како глаголати от них, от коея любострасти победившеся. Или не испытавше древних харатейных преводов, глаголати в символе не против оных преводов новомногих местех овая оставлшим, другаяже приложившим, инаяже пременившым, якоже глаголати, и в Духа Святаго, Господа, и истиннаго приложити.

Яко Христос паки приити имать судити живым и мертвым, егоже Царствию не будет конца дионисий ареопагит в слове о божественных именех, в 5 главе, глаголет, царьствию Его не будет конца⁵³². Ксему да зрит всяк верныи в книзе кирилла иерусалимскаго во оглашении пятонадесятом написано, не несть конца, но не будет конца, такожде и в печатной книзе на листу первом, яже напечатана бысть в царствующем граде москве, в лет 7153. и паки тояже книги зрети подобает в листе 407, како символ предаша святии отцы, якоже грецы днесь еще хранят той благодатию Христовою. егоже и нам покорившимся истинне такожде подобает прочитати.

Убо зрящии и слышащии истинная сия свидетелства, да рекут иже снами не мудрствующии, которыми сердцы надеются оного царства внутрь быти мирнаго, толиким зде соблазном бывающе самодетели. И чии суть сынове? Отцев убо онех святых и боголюбезных небыти им чады. Егда станем вси страшному престолу предстояще, киих познают своих отец, отеческуюли веру, и богодухновенная святых отец предания отвергших, или нас православных, иже ничтоже нивчем изменших: не онех мню, но нас.

Прочее отложити подобает всякое сомнение и зависть, и лукавство, и наисправлших нероптати, да не якоже древле иудее неблагодарнии приемше хлеб небесный, на благодетеля пороптавше, в землю обетования невнидоша, в пустыне вси погибоша но не заблуждающую истину блаженных отец возлюбити: уразумевше от самовидцев служителей слова. И прочих вкупе блаженных отец от века восиявших во всякой премудрости духовной, и знаменотворениих, яко неподобает подвизати что от веры ни мало ни велико, но всяким благоволением и внимание сия хранити и облобызати от всея души, и отех подвизатися аще потреба будет и до крове. Новины бо ничтоже ино родити обыкоша, разве преступление и преслушание. Убо приимет всякое преслушание и преступление праведно мздовоздаяние, в день егда судити имать Бог естеству всякому.

нем же и о крестном изображении, яко первыми тремя великими персты подобает изображати всякому христианину на лице своем знамение креста.

Глаголанное прежде от лица его к Собору бывшему при нем, в лето 7165-е при державе царства Великаго Государя Царя и Великаго Князя Алексия Михайловича, всея великия и малыя и белыя России самодержца⁵³³ . Зазираху иногда нашему смирению, мне, Никону Патриарху, приходящии к нам в царствующий град Москву, потреб своих ради, Святыя Восточныя Церкве Святейшии Вселенстии Патриарси: Константиня града Афанасий, и паки святаго града Иерусалима, и святаго града Назарета, митрополит Гавриил, и прочии; и поношаху ми много в неисправлении Божественнаго песнопения, и прочих церковных винах. От них же едина есть и сия, яко треми персты, последними, двема малыми с великим палцем соединя, да двема прочими великосредними изобразующе творим на лице нашем знамение креста, от Феодоритова писания неведением внесшееся в печатныя книги, в великия Псалтири со возследованием, и малыя, и прочия рукописныя. А не повелением коего Царя или Патриарха, ниже Собором когда сошедшихся архиерей: прежде бо того вси треми первыми персты изображаху во образ Святыя Троицы: якоже и ныне многих еще видети есть, елицы не ведают Феодоритова писания, якоже в простых мужей, и во всех женах от древняго обычая держащих. И мы, милостию Божиею Российский Патриарх Никон, не токмо себе ползы ища по апостолу, но и прочим, воеже спастися, возбнув убо от сего и разсмотрив яко многая со древнима бывшима и прежде мене святительствовавшими на Престоле нашем, нынешняя неслична и несогласна. Ово в словесех Божественнаго писания, ово в церковных чинех, якоже ми глаголаху они⁵³⁴, ничим же иным доумевся внити во двор овчий, и искусити духи лстивыя, познати же истину точию дверми Божественнаго писания, а не сам собою. Многия убо собра елико возмогох обрести древних харатейных преводов книги славенска языка и сербска. И неудовлихся еще к сему, но болшаго ради уверения, послах и во святую гору Афонскую, в Грецию греческих ради преводов церковных и четьих, еже бы исправити новыя нынешния печатныя книги, и рукописныя неисправленныя их же по желанию моему и получих. И исправих ими елико поспешествовася мне. С ними же и сию настоящую книгу, юже глаголю Скрижали духовныя, или откровение таин церковных, по умолению нашему посланную от Паисия Вселенскаго Патриарха в лето 7161-е, юже вскоре и превести повелех с греческа языка на славенский, и печатным тиснением издати. К ней же и иныя подобающия вещи, такоже превести повелех с греческа языка на славенский, печатным же тиснением издати повелех, якоже слово премудрейшаго иподиакона Дамаскина Студита о Кресте. В нем же изложено яко треми первыми персты десныя руки изображати подобает всякому христианину на лице своем знамение креста во образ Святыя единосущныя и равнославныя Троицы, но новое сие и неприятное Церкви предание, еже печатаное глаголю московския печати, во Псалтирях со возследованием, в предисловии тоя Псалтири, лист 35 и в прочих. Еже глаголю Феодориту и Максиму Греку предати: о его же ми достоит ныне и изложити мудровании, якоже печатано тамо, како он мудрствует. Три персты равно имети вкупе повелевает: великий, иже глаголется палец, да два последних, и прочия тамо чтый да разумеет: в них же полагает Святыя Троицы таинство. Два же перста, вышний указателный, да средний великий вместе сложити, и простерти. Великий убо перст имети глаголет мало наклонно. Им же образует два естества Христова: божество и человечество; Бог по божеству, а человек по человечению, во обоем совершен. Вышним убо перстом образовати глаголет божество, а нижним человечество, понеже сшед от вышних, спасе нижния. Согбение же персту толкует: яко преклонь небеса сниде на землю нашего ради спасения, и прочая тамо речения его неприятая: еже всячкески по всему не приемлется Церковию сие предание его. Яко и всякому познати мощно есть, яко не праве сказует обоя таинства. Ни в триех бо перстех, во двою глаголю малых, и в великом пальце, исповедуется добре Святыя Троицы таинство. Ниже во дву, указательнем глаголю и великосреднем извещается употребителне таинство воплощения Божия слова, яко в триех убо предреченных перстех по его мудрованию велие неравенство⁵³⁵ обрящется Святыя Троицы: и како слышите. Яко аще кто великий палец вознепщует быти вместо Отча лица, всяко возмнится посему Отец быти болий Сына и Духа, великое бо к малому глаголется велико: яко же и великий перст палец к последним малым, глаголется великий. Во Святей же Троице несть первее и последнее, ниже велико и мало: но целы три ипостаси, и совершены суть, якоже Великий Афанасий во исповедании православныя веры глаголет. Его же начало. Иже кто хощет спасен быти. И хотяй мудрствовати кто по сему, Арию последовати имать, якоже и он умаляти будет Сына от Отца. Во двух же, указателном глаголю, и великосреднем персте, един простерт, а другий наклонен, по его мудрованию два Сына, и два состава, о единем Христе Бозе вознепщуется имети. Един убо иже от Отца рожденный, не отлучен Сын от Отца, другий же от Марии рожденный человек, по любви же соединився слову Божию, и тезоименно тому именуем: и будет посему Несторию еретику помогати, яко же и Феодорит иже (аще есть писавый сие предание) Несторию помагая, внегда на Кирилла Александрийскаго клевеща писа, и на правую веру, на третием Соборе иже во Ефесе, яко же пишет о несториеве ереси в деянии третияго Собора, в начале книги Кормчии на листе осьмом печатаныя на Москве 158-го лета. И о Феодоритове ложнем списании в деянии пятаго Собора, в той же книзе на листе 12. Аще ли же кто восхощет совершенное богословие уведати на несториеву ересь и на оное списание помогающее Несторию (еже два великосредния персты отлучена от прочих, и простерта имети повелевает, и от того мнети по сему два Сына, и два лица: единаго от Отца не разлучена, яко же и персты три показуют; другаго же разлучена, яко же и та два перста разлучена суть от триех), да слышит внятно о сем, в толковании исповедания православныя веры: еже есть верую во единаго Бога: в книзе толкования святыя Литургии на листе 371-м. Яко единаго исповедует Сына, от Отца прежде век без матере рождена, и Того же в последняя от матере, без Отца. Отец убо благоволи, сиречь добре восхоте, и созда тело своего Слова, Дух же содейстова: зане едино есть действо и сила триех, и Слово едино воплотися и пребысть паки Сын и Слово, якоже бе прежде⁵³⁶ Сын от Отца без матере, последи же Сын от матере без Отца. Не воплотися Отец, ниже Дух: яко же глаголет Великий Афанасий, но токмо Сын, да пребудет Сын един. Яко же есть рожден от Отца един без страсти, сиречь без жены, сице родися и от девы истинен Сын без страсти, сиречь без семене мужеска. И есть, и именуется Сын Бога и Отца по божеству, и Сын истинен человеческий по человечеству. Не два Сына, далече буди хула, но един Сын, соединен со двема естествома божества, глаголю, и человечества во единей ипостаси, сиречь во единем лице. И по сему предреченному истинному свидетелству, аще кто два простертая великосредния персты имать в крестном изображении слагати, и теми образовати хощет божество и человечество Сына Божия, всячески по всему неприлично творит, сопротивное же паче. Два бо Сына образовати будет: единаго от Отца, а другаго от матере рожденна, и два лица исповедовати, якоже и Несторий. Но Церковь Святая Православная сию ересь проклинает, учит же и проповедует о Сыне Божии два существа во единем же лице знати: единаго и тогожде Сына прежде воплощения и по воплощении, неразлучна от Отца и Духа по божеству, аще и воплотися, яко же Сам глаголет, яко⁵³⁷ един несмь, но Аз, и пославый Мя Отец. И паки. Яко Аз во Отце⁵³⁸, и Отец во Мне есть. И сего ради посему всякому возможно есть познати истину, яко идеже познавается, или исповедуется таинство Святыя Троицы во образовании, или в именех, тамо есть и Сын Божий во дву естеству, Бог по божеству, а человек по человечеству, лице же едино познавается, якоже и в триех первых перстех истинно образует, а не якоже по Феодоритову четвероипостасному разумению, еже единаго Сына в триех перстех, в дву малых и великом пальце исповедовати: в двух же великосредних другаго, по несториеве ереси познавати. И о сем убо тако суть. К сему же известихся о сем и уверихся наипаче и отонуду: и первее убо о сем ко Вселенныя председателю, Святейшему Патриарху Паисию архиепископу Константиня града вопросителне писах с прочими главизнами церковных вин, киими персты повелевает. Святая Восточная Церковь изображати на лице образ Креста; он же соборне вскоре возписали со многими подписавшимися архиерей рукама, еже и в книзе сей напечатавшася на листе 751-м, их же имена числом 39, яко треми токмо первыма персты Святая Восточная Церковь повелевает изображати на лице своем всякому христианину крестное изображение, а не инако. Потом же и настоящаго сего лета 7164-го и к прилучившимся при нас в царствующем сем граде быти потреб своих ради Божия града Антиохии Патриарху Макарию, и Сербския земли града Пеккска Патриарху Гавриилу, и Никейска града митрополиту Григорию, и Молдавскому и Сучавскому митрополиту Гедиону: такоже вопросителне писав послах, яко да подпишут на вопросе моем, како подобает имети о Кресте, коими персты изображати и на лице нашем. Они же вси без закоснения под клятвою подписавше сице. Аще кто не первыма трема великими персты десныя руки изобразует на лице своем образ Креста, да будет проклят, яко арменов подражатель; иже той вопрос и с подписанием их в книзе сей напечатася. Еще же и от сего, внегда прилучися сего же настоящаго лета во обители Чюдове святаго архистратига Михаила, на память святаго Мелетия Патриарха Антиохийскаго, Царю быти со всем своим сигклитом и множеству народа. Тамо же и Макарию Патриарху Антиохийскому и прочим с ним, во время утренняго пения на чтении пролога, внегда бяше о Мелетии Патриарсе Антиохийстем слово, яко егда показа той Мелетий три персты, и не бысть знамения, егда же два сложив и един к ним пригнув, тогда яко огнь от руки его изыде. И прочая тамо. Тогда Патриарх Макарий возгласи к сему, мне на сие подвигшу его, и вопросившу: кия Мелетий три персты показа? Он же рече: мужие всего православия, слышите: аз преемник и наследник сего святаго Мелетия престолу, вем известно, яко сей святый Мелетий три первыя персты разлучены показа друг от друга, от них же и знамения не бысть. Тыя же паки трие соединив, ими же и знамение показа. И аще кто сими трема персты на лице своем образ Креста не изобразует, но имать творити два последния соединя с великим пальцем, да два великосредния простерты имети, и тем образ Креста изображати, таковый арменоподражатель есть, арменове бо тако воображают на себе крест. К сему же и в Неделю Православия тому же Патриарху Макарию Божия града Антиохии, и Сербскому Патриарху Гавриилу, и Григорию митрополиту Никейскому в велицей соборней церкви пресвятыя Богородицы Успения, ту сущу Царю и всему сигклиту, той преблаженнейший Патриарх Макарий и прочии с ним стояще пред Царем и его сигклитом, и пред всем освященным Собором, внегда святым Божиим угодником подвизавшимся за Христа Церковь Святая вечное помяновение совершает, сопротивным же проклятие, показуя сложи три великия персты во образ Пресвятыя и неразделныя Троицы, сице глаголе, яко сими трема первыма великима персты всякому православному христианину подобает изображати на лице своем крестное изображение. А еже кто по Феодоритову писанию и ложному преданию творит, той проклят есть. Тако же тогда проклинал и Сербский Патриарх Гавриил, и Никейский митрополит Григорий. И егда убо сия бываху делу же, сия богодухновенныя книги в конец (уже) произношашеся, тогда аз, милостию Божиею Российский Патриарх Никон, изволением Божиим, советом же благочестиваго Великаго Государя Царя и Великаго Князя Алексия Михайловича всея великия и малыя и белыя России самодержца по правилом святых духоносных отец, яже на коеждо лето управления ради церковных вещей повелевают к великому архиерею приходити, повелех собратися всем архиереом сущым во области нашей во уреченный день настоящаго сего лета от создания мира 7164-го. От воплощения же Божия Слова 1656-го, индикта 9, месяца априлиа, в 23 день. Иже и собрашася. Им же с прочими церковными винами изволих и сий новозрелый плод, сию святую книгу во свидетелство на среду предложити, преоблеченную уже в красоту от славнаго греческаго языка во многородословный славенский язык, аще обрящут в ней яковый порок: они же ю пред нами соборне чтоша во многия дни с велиим прилежанием, всяку вещь и всяко слово со опасством разсуждающе. И обретоша ю всячески не токмо безпорочну, но к сему и славе, и похвале, и великому удивлению быти достойну. Видеша бо в ней все сокровище христианскаго таинства отверсто, и пользу всем неоскудно готову сущу предлежащу, и много о сем Бога благодариша, яко таковое сокровище безценное открыв дарова, его же ниже слыша кто когда. По чтении же тоя книги разсмотривши мы соборне от словес Паисиины грамоты, и иподиакона Дамаскина Слова о Кресте, и от подписавшихся к вопросу нашему Макария Патриарха Антиохийскаго и прочих с ним, яже суть писаны в сей книзе на листе 757-м. К тому же и от держащагося еще древняго обычая до печатных книг Псалтирей, в них же сказуемое Феодоритово и Максимово изложение о крестном изображении печатано, яко трема токмо первыма великима персты изображах на лице своем образ Креста, якоже и ныне многих видети есть, елицы не ведают Феодоритова списания, изгласихом вкупе и о крестнем изображении с прочими церковыми винами утвердити, якоже Святая Восточная Церковь содержит, еже трема первыма великима персты всякому христианину изображати на себе крест, а еже Феодоритово и Максимово обретаемое в книзе Псалтире со возследованием московския печати, и во иных рукописанных писанно, еже два малыя последняя соединити с великим пальцем, ими же неравенство Святыя Троицы показуется, и есть арианство. И еже к тому два великосредния простерты имети, и посему два Сына и два состава о единем Христе Бозе исповедовати, яко Несторию, о нем же зде напреди доволне рекохом, за кую вину неприятие есть Церкви: сия всячсески отринути повелехом изрекше правило о сем сице: аще кто отселе ведый не повинится творити крестное изображение на лице своем яко же древле Святая Восточная Церковь прияла есть, и якоже ныне четыре Вселенстии Патриарси со всеми сущими под ними христианы повсюду Вселенныя обретающимися имеют: и якоже зде прежде православныи содержаша до печатания слова Феодоритова во Псалтирях со возследованием московския печати, еже трема первыма великима персты десныя руки изображати во образ Святыя и единосущныя и неразделныя и равнопокланяемыя Троицы, но имать творити сие неприятное Церкви, еже соединя два малыя персты с великим пальцем, в них же неравенство Святыя Троицы извещается, и два великосредния простерта суща, в них же заключат два Сына, и два состава по несториеве ереси, якоже прежде рекохом, или инако изображати крест: сего имамы последующу святых Отец седми Вселенских Соборов и прочих поместных правилом, и Святыя Восточныя Церкве четырем Вселенским Патриархом, всячески отлучена от Церкве вкупе и с писанием Феодоритовым, якоже и на Пятом проклята его ложная списания на Кирилла архиепископа Александрийскаго, и на правую веру, сущая по несториеве ереси, проклинаем и мы. И к сему настоящему правилу и ко прочим вещем Божественнаго писания обретаемых в книзе сей, и руки своя подписуем лета от создания мира 7164-го, от воплощения же Божия Слова 1656-го, индикта 9, месяца иуниа, 2.

Макарий, митрополит Великаго Нова града и Великих Лук. (л. 18) Корнилий, митрополит Казанский и Свияжский. Иона, митрополит Ростовский и Ярославский. Маркел, архиепископ Волотоцкий и Великопермский. Лаврентий, архиепископ Тверский и Кашинский. Иосиф, архиепископ Астраханский и Терский. Макарий, архиепископ Псковский и Изборский. Александр, епископ Коломенский и Коширский. Троицы Живоначалныя Сергиева монастыря архимандрит Иоасаф. Из Владимира Рождественскаго монастыря архимандрит Иосиф. Чюдова монастыря архимандрит Иосиф. Всемилостиваго Спаса Новаго монастыря архимандрит Сергий. Симонова монастыря архимандрит Феодосий. Свияжскаго Богородицкаго монастыря архимандрит Антоний. Андроникова монастыря архимандрит Дионисей. Казанскаго Преображенскаго монастыря архимандрит Прохор. С Костромы Ипатиевскаго монастыря архимандрит Тихон. Из Нижняго Нова града Печерскаго монастыря архимандрит Иларион. Хутыня монастыря архимандрит Евфимий. Пречистые Богородицы Иверскаго монастыря наместник Филофей. Из Ростова Богоявленкаго монастыря архимандрит Дионисей. С Костромы Богоявленскаго монастыря игумен Герасим. Богоявленскаго монастыря из за торгу архимандрит Аврамий. Знаменскаго монастыря игумен Иосиф. Из Ярославля Спасскаго монастыря строитель Ефрем. Иосифова монастыря Волотскаго архимандрит Тихон. Из Суждаля Спаса Евфимиева монастыря архимандрит Аврамий. Из Нова града Антониева монастыря Римлянина архимандрит Макарий. С Унжи Макариева монастыря игумен Карион. С Рязани Спасскаго монастыря архимандрит Боголеп. С Вологды Каменскаго монастыря архимандрит Филарет. Отроча монастыря архимандрит Аврамий. Из Ростова Борисоглебскаго монастыря Сустия игумен Иона. С Рязани Рождества Богородицы Солочинскаго монастыря архимандрит Сергий. С Вологды Прилуцкаго монастыря архимандрит Иона. Великаго Нова града Духова монастыря архимандрит Иаков. С Вологды Корнилиева монастыря игумен Антоний. Переяславля Залесскаго Никитскаго монастыря игумен Моисей. Новинскаго монастыря игумен Иосиф.