Служба Пресвятой Богородице в честь иконы Ее «Всецарица»

Текст утвержден Священным Синодом
Русской Православной Церкви
26 декабря 2019 года (журнал № 163)

Месяца августа в 18-й день

Пресвятыя Владычицы нашея Богородицы и Приснодевы Марии
ради иконы Ея, именуемыя «Всецарица»

На велицей вечерни

На Господи, воззвах: стихиры праздника и Богородицы, глас 8.

Подобен: О, преславнаго чудесе:

О, преславнаго чудесе!/ Преблагословенная Богомати Всецарица/ от горы Афонския в Россию приходит./ Церковь Русская, взыграй, ликовствующи,/ зрящи святый образ Приснодевы,/ к нему же припадающе, благодарне к Богородице возопиим:/ радуйся, землю нашу благоухания исполнившая,/ радуйся, алавастре мира Божественнаго,/ радуйся, Державная Царице.

О, преславнаго чудесе!/ Всех Господь и Владыка/ благоволи от Девы воплотитися/ и плоть человечу восприяти/ и Сыном Пречистыя нарещися,/ Юже яви Споручницу спасения нашего./ Темже веселия духовнаго исполняемся/ и славословим Матерь Божию,/ Небесе и земли Царицу.

О, преславнаго чудесе!/ Источник чудотворений приснотекущий/ от святыя иконы Всецарицы/ землю Русскую напояет/ и благодать неоскудно подает/ и исцеления богатно дарует./ Темже к Богородице усердно вопием:/ уврачуй язвы душ и телес наших,/ Ты бо еси милости река неистощимая.

О, преславнаго чудесе!/ Пречистая Дева Богородица,/ мольбы недостойныя приемлющи,/ честным Своим омофором нас покрывает/ и прошения недужных исполняет/ и болезни неисцельныя врачует./ Темже вернии веселия исполняются/ и благодарения песненная возсылают,/ прославляюще Заступницу Усердную рода христианскаго.

Слава, и ныне, праздника, глас 4: Приидите, воспоем, людие:

Вход. Прокимен дне. И чтения Богородичная.

На литии стихиры, глас 4:

 Богоблаженная Отроковице,/ Ты еси Ангелов и человеков радование/ и Владычень Престол огнеобразный,/ светолучныя молнии благодати испущаяй/ и Божественное Слово на Себе херувимски носяй./ И мы ныне поем и песнословим Тя:/ радуйся, мира Державная Владычице.

Пресвятая Мати Дево,/ Ты еси Царица Небесе и земли,/ добродетельми, яко светлою диадимою, украшенная,/ темже восхваляем Тя, Преблагословенная,/ и, чествующе образ Твой святый, молимся:/ помози покаянием сердца очистити/ и благоуханием добродетелей исполнити.

Слава, и ныне, праздника, глас 5: Воспойте, людие, Матери Бога нашего:

На стиховне стихиры, глас 5:

Подобен: Радуйся:

Радуйся, земле Русская,/ имущи чудотворный образ Всецарицы Богородицы,/ иже, яко звезда светозарная,/ пределы твоя просвещает./ Приидите, вси людие, припадем к Пречистей Отроковице,/ болезни щедро исцеляющей,/ от злостраданий скоро избавляющей,/ от напастей духов злобы свобождающей/ и печали елеем милости утоляющей./ О, Мати Всеблагая,/ преукрашенная благочестия добротами,/ облецы ны целомудрия одеждами/ и не остави любовию чтущия Тя.

Стих: Слыши, Дщи, и виждь,/ и приклони ухо Твое.

Радуйся, земле Русская,/ дом Пресвятыя Богородицы нареченная,/ ликуй, красуйся и торжествуй,/ дар драгоценный восприимши/ от удела перваго Богородицы, Святыя горы Афонския,/ многоцелебный образ Приснодевы,/ емуже с верою покланяющеся,/ воспеваем из глубины сердечныя:/ о Благословенная Царице,/ Ты ведаеши чаяния и воздыхания душ наших,/ не остави нас, Любоблагая,/ подаждь нам помощь спасительную/ и утеши нас Твоим Небесным предстательством.

Стих: Клятся Господь Давиду истиною,/ и не отвержется ея.

Ныне соберитеся, людие Божии,/ приидите, вси концы земли,/ се бо образ небосветлый Марии Девы Всецарицы/ созывает к веселию верныя./ О, велия милость Владычицы!/ О, паче ума чудес множества,/ чрез икону сию источаемых!/ Темже песненными похвалами воспоим, глаголюще:/ радуйся, Всенепорочная Дево,/ радуйся, Ковчеже священный Слова Божия,/ радуйся, Обрадованная,/ радуйся, Цвете неувядаемый чистоты нетленныя,/ радуйся, Невесто Неневестная.

Слава, и ныне, праздника, глас 2: Давидскую песнь днесь, людие, воспоем Христу Богу:

Тропарь, глас 4:

Образом Твоим радостотворным,/ Владычице, Всецарице Богородице,/ болезни и недуги наша исцели/ и от всяких бед и напастей огради,/ к заступлению Твоему присно прибегающих. 

На утрени

По 1-м стихословии седален, глас 4:

Благослови ны, во юдоли земной странствующия, Всесвятая Богородительнице, Небесе и земли Царице, да, песньми и пеньми ликовствующе, воспоим пришествие святаго образа Твоего.

Слава, и ныне, праздника, глас тойже: В славней памяти Твоей:

По 2-м стихословии седален, глас 6:

Покаяния двери отверзи нам, Госпоже, и сокрушения исполни сердца наша, да сподобимся предстательством Твоим грехов оставление и недугов исцеление.

Слава, и ныне, праздника, глас тойже: Твое преставление, Чистая, вси вернии восхваляюще:

По полиелеи седален, глас 4:

Ныне приспе день светлаго торжества, вся земля Русская радуется пришествию честнаго и многоцелебнаго образа Пресвятыя Богородицы Всецарицы. Сей бо, якоже солнце незаходимое, возсия светозарными лучами, отгоняя тьму искушений же и бед от вопиющих верно: спаси ны заступлением Твоим, Всеблагая Владычице.

Слава, и ныне, праздника, глас тойже: Возопий, Давиде, что сей праздник:

Степенна, 1-й антифон 4-го гласа. Прокимен, глас 4: Помяну имя Твое/ во всяком роде и роде. Стих: Отрыгну сердце мое слово благо, глаголю аз дела моя Цареви. Всякое дыхание: Евангелие от Луки, зачало 4.

По 50-м псалме стихира, глас 6:

Радуйся, Богоблагодатная Дево,/ радуйся, златозарная Заре Света невечерняго,/ радуйся, неугасимая милости Лампадо,/ елеем радования сердца наша умащающая,/ радуйся, христиан Упование,/ радуйся, ненадежных Надеждо,/ радуйся, Радосте наша.

Канон праздника, глас 1, со ирмосом на 6, и канон Богородице Всецарице на 8, глас 4.

Песнь 1

Ирмос: Отверзу уста моя,/ и наполнятся духа,/ и слово отрыгну Царице Матери,/ и явлюся, светло торжествуя,/ и воспою, радуяся, Тоя чудеса.

О, Преблагая Заступнице наша! Недоумеем песнословити Тя по достоянию, обаче любовию понуждаеми, молим Тя: сподоби принести Тебе песни благодарственныя.

Приидите, вернии, ко всечестному образу Богородицы Всецарицы припадем, обымем сердцем и лобызаем устны, со умилением молящеся Всемилостивой Владычице.

От Небесных славимая и от земных ублажаемая, девственными добротами преисполненная, Пречистая Дево, приими моления наша и призри на нас благоуветливым взором Твоим.

Дивны чудеса Твоя, Господи, яко даровал еси миру преславную Богоотроковицу Марию, от всех родов избранную во спасение рода человеческаго.

Песнь 3

Ирмос: Твоя песнословцы, Богородице,/ живый и независтный Источниче,/ лик себе совокупльшия духовно утверди,/ в Божественней Твоей славе/ венцев славы сподоби.

Ты еси источник златоструйный, росу утешения источаяй сердцам скорбящим, о Царице Дево. Ободри ны в час испытания, от отчаяния избави и слезы претвори в росу небесныя радости.

Молим Тя о сродницех наших, Госпоже Всецарице, исцели недуги неисцельныя, устави раковыя язвы стужение, терпение неистощимое страждущим даруй и слезами покаяния омый сердца их.

Любы Твоя, о Богомати, якоже огнь небесный, да затеплит в сердцах наших светлосиянныя светильники молитвы и любве.

О, Всесветлая Владычице, покрый нас честным Твоим омофором и светоносными лучами благодати отжени темный облак печалей наших.

Кондак и икос праздника.

Седален, глас 8:

Днесь празднуем пришествие честнаго образа Твоего, Мати Божия, к немуже с верою припадаем, Всеблаженная, и молим Тя: посети сущия в болезнех и печалех, и покрый от бед и зол рабы Твоя.

Песнь 4

Ирмос: Седяй в славе/ на Престоле Божества,/ во облаце легце,/ прииде Иисус Пребожественный/ нетленною Дланию, и спасе зовущия:/ слава, Христе, силе Твоей.

В знои неисцельных болезней страждущим одожди капли небеснаго милосердия Твоего, Пречистая, и благодати прохладою услади души изнемогающия.

Купина Тя неопальная прообразоваше, о Царице Дево, не опали бо чрево Твое огнь Божества. Темже молим Тя: огня геенскаго избави ны.

Радуйся, Богоизбранная Отроковице, одушевленный Храме, Чертоже Слова Божия, во святый храм во младенческих летех введенная и тамо воспитанная. Темже молим Тя: научи и ны ко храму Божию усердно прилежати.

Ты от святаго Ангела пищу небесную приемлющи, под сению храма Господня пребывала еси, Дево Нетленная. Темже напитай и наша во страстех изсохшия души и сподоби Христовых Таин достойно причащатися.

Песнь 5

Ирмос: Ужасошася всяческая/ о Божественней славе Твоей;/ Ты бо, Неискусобрачная Дево,/ имела еси во утробе над всеми Бога,/ и родила еси Безлетнаго Сына,/ всем воспевающим Тя/ мир подавающая.

О, Всеблаженная Богомати, согрешающих исправление, умягчи изсохшую землю сердец наших, да, приемше семена слова Божия, достойныя плоды покаяния принесем Владыце Христу.

Погибших Ты еси Взыскание, Приснодево Марие, и Ходатаица о нас к Сыну Твоему и Богу, Ты еси Пристанище спасительное обуреваемым в мори житейстем и погружаемым напастьми многими.

Токами благодати, чрез святый образ Твой, Всецарице, на нас изливаемыми, омый грехов наших скверну и угаси страстей пещь, да обрящем чистоту сердечную и уневестим души Христу, Спасу нашему.

Радуйся, Всепетая Царице! Зарю, наставляющую к свету, возсияй душам нашим, рождшая Солнце правды Христа, Радость и Спасение миру.

Песнь 6

Ирмос: Божественное сие и всечестное/ совершающе празднество,/ богомудрии, Богоматере,/ приидите, руками восплещим,/ от Нея рождшагося Бога славим.

Не возгнушайся нас, многогрешных, о сладкоуханный Крине чистоты! Отжени плотское мудрование, устави молву лукавых помышлений и сподоби добродетелей благоухание Творцу присно приносити.

Помози нам, Богоневесто, нрав смирен стяжати, всегда радоватися, за вся Творца благодарити, и ко Христу, Спасителю нашему, непрестанно молитися научи ны.

Пришествием иконы Твоея озаряеми, молим Тя, Всецарице: буди нам, грешным, Споручница, на стези спасительныя настави, побори борющия ны и победу непобедимую во бранех даруй.

О, чистая Голубице, Нескверная Агнице, Агнца и Пастыря неизреченно рождшая! Воистину Ты еси ангельских чинов превысшая, умоли о нас Божественнаго Сына Твоего.

Кондак, глас 8:

Новоявленней иконе Богородице Всецарице предстояще/ и на лик Тоя взирающе,/ со умилением и любовию глаголем:/ низпосли, Владычице, цельбы к Тебе притекающим,/ и подаждь утешение в скорби сущим,/ да, восприемше милость, благодарне воззовем Ти:/ Радуйся, Всецарице, недуги наша благодатию исцеляющая.

Икос:

Ангел предстатель с небесе послан бысть, рече Богородице: радуйся, Благодатная, Господь с Тобою! И, со боговещанным гласом воплощаема зря Господа, возопи к Ней таковая:

Радуйся, главизно нашего спасения;

радуйся, Исполнение Зиждителева смотрения.

Радуйся, яко Тобою Бог воплотися;

радуйся, яко Невидимый в Тебе изобразися.

Радуйся, Милость мира внутрь приимшая;

радуйся, одеяние плоти Слову соткавшая.

Радуйся, уму непостижная горняя славо;

радуйся, сердца оживившая небесная манно.

Радуйся, Звездо, благодати сияние;

радуйся, Источниче, живыя воды излияние.

Радуйся, Богородице, в женах благословенная;

радуйся, рождшая Спаса, Дево нетленная.

Радуйся, Всецарице, недуги наша благодатию исцеляющая.

Песнь 7

Ирмос: Не послужиша твари богомудрии/ паче Создавшаго,/ но, огненное прещение мужески поправше,/ радовахуся, поюще:/ препетый отцев Господь и Бог, благословен еси.

Сподоби ны, Преблагая Богородительнице, преславное имя Иисусово умом и сердцем призывати и сею молитвою услади горечь печалей и скорбей наших.

Притецыте, вси здравия ищущии, ко благосердой Деве Марии Богородице и почерпите воду жизни от источника спасительнаго.

Благословен еси, Господи Иисусе Христе, Спасителю наш, яко в час крестных страданий Твоих благоволил еси поручити ны покрову Пречистыя Матере Твоея и чадами Ея соделал еси.

Радуйся, одушевленная Палато Божества, едина неискусомужная Дево Марие, во утробу девственную Бога вместившая. Темже с Гавриилом Архангелом вопием Ти: благословенна Ты в женах, и благословен Плод чрева Твоего.

Песнь 8

Ирмос: Отроки благочестивыя в пещи/ рождество Богородичо спасло есть:/ тогда убо образуемое,/ ныне же действуемое,/ вселенную всю воздвизает пети Тебе:/ Господа пойте, дела,/ и превозносите Его во вся веки.

О, Богомати Всецарице, просвети ны познанием Сына Твоего, да, наследствующе Царствие Небесное, воспоем Господа и превозносим Его во вся веки.

Сила Божия в немощи совершается. Темже сподоби ны, Госпоже, вся посылаемая нам со благодарением терпети и за вся Сына Твоего и Бога нашего славити.

Умири сердца наша и в тишине помыслов соблюди, Всесвятая Мати Дево, да, молящеся на всякое время, Господа благословим и превозносим во вся веки.

Во успении мира не оставила еси, о Богомати, но присно с нами пребываеши и предстательством Твоим нас спасаеши.

Песнь 9

Ирмос: Всяк земнородный/ да взыграется, Духом просвещаемь,/ да торжествует же безплотных умов естество,/ почитающее священное торжество Богоматере,/ и да вопиет:/ радуйся, Всеблаженная,/ Богородице чистая Приснодево.

О, Царице Дево, раковыя язвы предивная Целительнице! Яви Свою милость в долгонедужии сущим и подаждь им здравие, да воспевают выну Тя, Всеблагая Мати Божия.

Виждь, Владычице, неможение наше и приими смиренная моления наша, буди нам Благая Путеводительница ко спасению и настави путем тесным шествовати к жизни вечней, да Тя непрестанно величаем.

О, Мати милосердия и утешения! Ущедри ны неизреченною Твоею благостынею и благослови ны, тепле Тя воспевающия.

Вси роди христианстии ублажают Тя, Богородительнице Пречистая, яко призре Господь на смирение Твое и сотвори Ти величие неисповедимое.

Светилен:

Светел есть честный праздник иконы Твоея, Всецарице, егоже в торжестве духовнем благолепно совершающе, величаем Тя, светоносная Скиние Христа, Царя и Бога нашего.

Слава, и ныне, праздника: Апостоли от конец:

На хвалитех стихиры праздника и Богородице Всецарице, глас 1.

Подобен: Небесных чинов:

Небесных чинов радование/ и земнородных крепкое упование,/ Небеснаго Царствия пресветлое сияние,/ Пресвятая Всецарице,/ приими ны, славящия Тя,/ да, Тобою водими, сподобимся спасения вечнаго.

Светом Небесным осиянная,/ Отроковице Мати всех Царя Христа,/ таинству сокровенному неизреченно послужившая,/ Ты к горнему умы и сердца наша возводиши/ и святыя иконы Твоя людем даруеши,/ яко светильники света невещественнаго.

Небесный Хлеб во чреве приемши,/ Мати Спаса нашего,/ Жизнь и Свет всего мира родила еси,/ просвети убо души наша, грехми омраченныя,/ да с верою и любовию к Источнику безсмертия приступим/ и причастницы жизни вечныя будем.

Слава, и ныне, праздника, глас 4: Всечестное Твое успение:

На Литургии cлужба Богородицы.

Молитва

О, Пречистая Богомати, Всецарице! Услыши многоболезненное воздыхание наше пред чудотворною иконою Твоею, из удела Афонскаго в Россию пренесенною, призри на чада Твоя, неисцельными недуги страждущия и ко святому образу Твоему с верою припадающия! Якоже птица крилома покрывает птенцы своя, тако и Ты ныне покрый нас многоцелебным Твоим омофором. Тамо, идеже надежда исчезает, несумненною Надеждою буди. Тамо, идеже лютыя скорби превозмогают, Терпением и Ослабою явися. Тамо, идеже мрак отчаяния в души вселися, неизреченным светом Твоим возсияй! Малодушныя утеши, немощныя укрепи, ожесточенным сердцам умягчение и просвещение даруй. О, Всемилостивая Царице! Исцели болящия люди Твоя, устави раковыя язвы стужение и благослови врачующих нас, да послужат орудием Всемощнаго Врача, Христа Спаса нашего. О, Владычице, Радосте скорбящих и печальных Утешение! Простри руце Твои, исполненныя исцеления и врачбы, да, чудотворную помощь скоро получивше, прославим Живоначальную и Нераздельную Троицу, Отца и Сына и Святаго Духа во веки веков. Аминь.

Молитва болящаго

О, Всеблагая, досточудная Богородице Всецарице! Несмь достоин, да внидеши под кров мой! Но, яко милостиваго Бога любоблагоутробная Мати, рцы слово, да исцелится душа моя и укрепится немощствующее тело мое. Ты бо имаши державу непобедимую, о Всецарице, и не изнеможет у Тебе всяк глагол. Ты за мя упроси, Ты за мя умоли Христа Бога нашего, да прославляю преславное имя Его всегда, ныне и в безконечныя веки. Аминь.