Служба Собору преподобных отцов, на Валааме просиявших
Текст службы утвержден на заседании Священного Синода 23-24 сентября 2021 года (журнал № 67).
В Неде́лю по Преображе́нии Госпо́днем
Собо́ра преподо́бных отце́в, на Валаа́ме просия́вших
На велицей вечерни
Блаже́н му́ж: кафи́сма вся. На Го́споди, воззва́х: стихи́ры воскре́сны 3, и пра́здника 3, и святы́х 4.
Стихи́ры святы́х, глас 8.
Подо́бен: О, пресла́внаго чудесе́!
О, пресла́внаго чудесе́!/ Андре́й, апо́столов Первозва́нный,/ на гора́х Валаа́ма стоя́ше иногда́,/ зе́млю сию́ Кресто́м благословля́я/ и возсия́ти зде благода́ти Бо́жией провеща́я./ Ны́не же сбытие́ проро́чества зрим,/ собо́р святы́х Валаа́мских пра́зднующе,/ в ни́х бо благода́ть Госпо́дня/ вои́стину ве́лия яви́ся.
О, пресла́внаго чудесе́!/ Посреде е́зера вели́каго/ гра́д стои́т святы́й,/ егоже со́лнце — Христо́с,/ его́же луна́ — Пресвята́я Де́ва,/ егоже зве́зды — отцы преподо́бнии,/ в подвизе молитвеннем просиявшии,/ да вси, на свети́ла чу́дная взира́юще,/ пу́ть к Небеси́ обрета́ют.
О, пресла́внаго чудесе́!/ На безпло́днем ка́мени сад дивный процвете́,/ ра́йския красоты́ испо́лненный;/ его́же Се́ргий и Ге́рман насади́ша,/ и отцы́ мно́зи слеза́ми напои́ша,/ Госпо́дня же благода́ть возрасти́./ Сего́ ра́ди плода́ми его́ сла́дкими/ христиа́не изоби́льно насыща́ются/ и Бо́га, ди́внаго во святы́х Свои́х, прославля́ют.
О, чудотво́рцы Валаа́мстии сла́внии,/ кто воспое́т досто́йно труды́ и по́двиги ва́ша?/ Се́ргия и Ге́рмана житие́ сокрове́нное,/ Авраа́мия благоче́стие ре́вностное,/ Наза́рия му́дрость и милосе́рдие,/ Ге́рмана апо́стольское пропове́дание,/ Анти́пы человеколю́бие сострада́тельное,/ му́чеников дре́вних и но́вых терпе́ние тве́рдое?/ Моли́те, отцы́ святи́и, спасти́ся нам.
Сла́ва, глас 4:
Сла́ва Твоя́, Христе́ Боже́,/ возсия́ на гора́х Валаа́ма,/ я́коже на Фаво́ре иногда́,/ днесь бо зрим ве́лий сонм святы́х,/ Све́том Невече́рним па́че со́лнца блиста́ющих,/ и, виде́нию сему́ чудя́щеся,/ стра́хом и ра́достию одержи́ми глаго́лем:/ Го́споди, добро́ есть нам зде бы́ти,/ моли́твами святы́х оте́ц на́ших/ просвети́ и спаси́ ду́ши на́ша.
И ны́не, Богородичен догма́тик гла́са.
Вход. Проки́мен дне и чте́ния преподобническая.
На лити́и стихи́ры пра́здника и преподо́бных Се́ргия и Ге́рмана, глас 3:
Безнача́льнаго Све́та,/ из тьмы́ свет ди́вный созда́вшаго/ и све́том позна́ния Своего́/ просвети́вшаго ве́рных сердца́,/ Человеколю́бца Христа́ возлюби́вше, отцы́ Богому́дрии/ во све́те Того́ повеле́ний до́бре ходи́ша/ и, от Него́ све́том благода́ти просве́щшеся,/ нам, со тьмо́ю страсте́й борю́щимся,/ свети́льницы яви́шася./ И́хже моли́твами, Светода́вче Го́споди,/ умы́ просвети́ и сердца́ на́ша очи́сти,/ я́ко Благоутро́бен.
Сла́ва, святы́х, глас 7:
Манове́нием Ду́ха Святаго/ ко острово́м Валаа́мским пришли́ есте́, отцы́ честни́и,/ да, ве́тхаго челове́ка совле́кшеся,/ во све́тлость Христо́ву облече́теся./ И, жития́ жесто́каго не убоя́вшеся,/ вои́стину яви́лися есте́ преподо́бных светоза́рный верх./ Те́мже Светопода́телю о нас моли́теся,/ да просвети́т Собо́ю ду́ши на́ша.
И ны́не, пра́здника.
На стихо́вне стихи́ры воскре́сны гла́са.
Сла́ва, глас 6.
Подо́бен: Все отло́жше:
Жите́йскую пучи́ну преплы́вше,/ о́строва Валаа́ма, я́ко приста́нища спаси́тельнаго,/ дости́гли есте́, богоблаже́ннии отцы́,/ и, красоту́ его́ пусты́нную возлюби́вше,/ в безмо́лвии зе́млю серде́ц возде́лали есте́/ и ди́вныя цве́ты доброде́телей возрасти́ли есте́,/ небе́сными арома́ты благоуха́ющия./ Те́мже лю́дие православнии, я́ко пче́лы му́дрыя,/ в та́йный ваш сад притека́ти возлюбиша,/ ме́да духо́внаго и́щуще,/ ра́вно всем подава́емаго Бо́гом/ рука́ми ва́шими, отцы́ святи́и.
И ны́не, пра́здника.
На благослове́нии хле́бов тропа́рь пра́здника два́жды, и святы́х еди́ножды.
Тропа́рь святы́х, глас 3:
Днесь оби́тель Валаа́мская/ на трапе́зу духо́вную всех созыва́ет,/ соверша́ющи па́мять богоно́сных отце́в,/ по́двиги и́ноческими ю украси́вших./ Стеце́мся, ве́рнии, преподо́бных собо́р восхва́лим/ и житию́ их честно́му поревну́им,/ да прича́стницы Све́та Трисо́лнечнаго яви́мся,/ пою́ще Отца́ и Сы́на, и Ду́ха Свята́го во ве́ки.
На утрени
На Бог Госпо́дь: тропа́рь воскре́сен, два́жды. Сла́ва, святы́х. И ны́не, пра́здника. По стихословиих седа́льны воскре́сны гла́са с припе́вы и Богоро́дичны их.
Велича́ние святы́м:
Велича́ем вас,/ вси святи́и, на Валаа́ме просия́вшии,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.
И́но велича́ние:
Ублажа́ем вас,/ преподо́бнии отцы́ на́ши Валаа́мстии,/ и чтим святу́ю па́мять ва́шу,/ наста́вницы мона́хов/ и собесе́дницы ангелов.
Псало́м избра́нный: Терпя́, потерпе́х Го́спода, и внят ми:
По полиеле́и, ипакои́ гла́са.
Сла́ва, седа́лен святы́х, глас 3:
Днесь все отце́в Валаа́мских мно́жество, я́ко еди́неми усты́, моле́ние Тро́ице Святе́й прино́сит, глаго́ля: о, Всеще́дрый Царю́, низпосли́ бра́тиям на́шим, су́щим на земли́, благода́ть Твою́, да на по́двиги, любве́ ра́ди Твоея́, дерза́юще, бу́дут соль до́брая, мир от истле́ния храня́щая; вода́ жива́я, жа́жду духо́вную утоля́ющая; лучи́ пресветлыя, ду́ши людски́я просвеща́ющия; и та́ко жизнь ве́чную насле́дити сподо́бятся со все́ми святы́ми. Ами́нь.
И ны́не, пра́здника.
Ева́нгелие, воскре́сно. Сла́ва: Моли́твами апо́столов: И ны́не: Моли́твами Богоро́дицы: По 50-м псалме стихи́ра воскре́сна.
Кано́н воскре́сен на 4, пра́здника на 4 и святы́х на 6. Катава́сия пра́здника.
Кано́н святы́х, глас 8.
Песнь 1
Ирмо́с: Песнь во́зслем, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще,/ пои́м, Тебе́, Еди́ному Влады́це.
Припев: Сла́ва Тебе́, Бо́же наш, сла́ва Тебе́.
Песнь хвале́бную воспе́ти ны́не сподо́би, Спа́се, отце́м на́шим, о ни́хже оби́тель Валаа́мская духо́вне утверди́ся и ми́ру свет бысть.
Припев: Вси святи́и Валаа́мстии, моли́те Бо́га о нас.
Или́: Преподо́бнии отцы́ наши, моли́те Бо́га о нас.
Апо́столов Первозва́нный дре́вле стопа́ми свои́ми го́ры Валаа́мския освяти́ и, крест ка́менный воздви́г, прорече́, я́ко и́мать возсия́ти зде благода́ть Госпо́дня.
Руси́ кре́щшейся, мрак но́щи и́дольския на све́тлость дне преложи́ся. Тогда́ и о́стров Валаа́м житие́м и́ноческим украси́ся, Се́ргию и Ге́рману досточу́дным от стран восто́чных прише́дшим.
Сла́ва: Я́ко се́мена до́брая яви́лися есте́, отцы́ и нача́льницы на́ши, Се́ргие и Ге́рмане, вы бо, трудолю́бне зде подвиза́вшеся, стори́чный клас прозя́бли есте́.
И ны́не: Невестоводи́ши ко Христу́ полки́ и́ноческия, Богоро́дице Де́во, и́же, Тя Взбра́нную Воево́ду иму́ще, к подвиго́м дерза́ют, Ты бо исперва сосу́д де́вства Твоего́ Бо́гу дар принесла́ еси́.
Песнь 3
Ирмо́с: Утвержде́й руко́ю Твое́ю, Сло́ве Бо́жий, Небеса́/ просвеще́нием Твоего́ и́стиннаго позна́ния,/ утверди́ и нас, на Тя наде́ющихся сердца́.
Израсти́ пусты́ня Валаа́мская цветни́к духо́вный, житие́м по́стническим благоуха́яй. Прииди́те, боголю́бцы, добро́тою его́ наслади́мся и вся́кую печа́ль мирску́ю отринем.
Треволне́ния грехо́вная по́двиги мно́гими обузда́ли есте́, богоно́снии отцы́, и, на высоту безстра́стия возше́дше, Христа́, я́ко би́сер честны́й, обрели́ есте́.
Житие́ ва́ше ева́нгельское бысть ве́ры пра́выя пропове́дание, и́мже уловле́н, Авраа́мий до́блий ри́зы и́ноческия прия́т и гра́ду Росто́ву свети́ло яви́ся.
Сла́ва: О, Валаа́ме, коль красно́ десни́ца Вы́шняго тя живописа́! Ты се́рдце вся́кое на похвале́ние Созда́теля дви́жеши, ле́потою свое́ю бытие́ Бо́жие возвеща́я.
И ны́не: Тя, Пречи́стая Де́во, смире́нно мо́лим: мяте́ж душ на́ших в тишину́ преложи́ и у́мныя о́чи просвети́, да, созерца́юще красоту́ Сы́на Твоего́, не прилепи́мся сла́достем мира сего.
Конда́к и и́кос пра́здника.
Конда́к святы́м, глас 7:
На гора́х Валаа́ма, отцы́ преблаже́ннии, всели́лися есте́,/ сло́во ева́нгельское сердцы́ благи́ми восприи́мше;/ моли́твами, слеза́ми и мно́гими злострада́нии/ усе́рдно Христо́ви сораспя́лися есте́;/ сего́ ра́ди, блиста́ньми Све́та Его́ озаря́еми,/ свети́льницы ми́ру яви́лися есте́, велегла́сно пропове́дающе,/ я́ко Сы́н Бо́жий е́сть вои́стину О́тчее сия́ние.
И́кос:
Воста́нем, моля́щеся, бра́тие, и у́зрим у́мными очесы́ ли́ки оте́ц на́ших, и́же от лет дре́вних и до ны́не на ме́сте сем святе́м трудолю́бне подвизашася и оби́тель Валаа́мскую во сла́ву Преображе́ния Спа́сова созда́ша; ду́ши же своя́ благода́тию Его́ во оби́тели Све́та преобрази́ша, вся концы́ земли́ Ру́сския и да́льныя страны́ озаря́юще и велегла́сно пропове́дающе, я́ко Сын Бо́жий есть вои́стину О́тчее сия́ние.
Седа́лен святы́м, глас 6:
Сла́вою земно́ю возгнуша́вшеся, страх Бо́жий и па́мять сме́ртную стяжа́ли есте́, отцы́ богому́дрии, те́мже, по вся дни и но́щи сле́зы точа́ще и у́мно ко стопа́м Влады́ки припа́дающе, к неболе́зненному поко́ю пришли́ есте́. Моли́те о нас при́сно, честну́ю па́мять ва́шу све́тло соверша́ющих.
Сла́ва, и ны́не, пра́здника.
Песнь 4
Ирмо́с: Ты моя крепость, Господи,/ Ты моя и сила,/ Ты мой Бог, Ты мое радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче.
Целому́дрия рачи́телей мно́жество под кров оби́тели Валаа́мския стеко́шася, юже, я́ко ла́вру честну́ю и вели́кую, устро́иша и о́браз соверше́ннаго жития́ и́ноческаго се́верным страна́м земли́ Ру́сския показа́ша.
И́мене Бо́жия призыва́нием, слеза́ми и по́тами зе́млю сию́ освяти́ли есте́, Корни́лие, оби́тели Палеостро́вския основа́телю, и Арсе́ние, Коневе́цкому о́бщему житию́ нача́льниче. Те́мже, я́ко отцы преподобныя, вас почита́ем.
Свя́тостию жития́ твоего́ удиви́л еси́ ангелы и челове́ки, о́тче Алекса́ндре, в рассе́лине скалы́ на о́строве пусты́ннем подвиза́яся. И ны́не от нас ду́хом не отступа́еши, а́ще и на Сви́ри те́ло твое́ нетле́нное почива́ет.
Сла́ва: Восхвалим днесь, вернии, преподобных Савва́тия Солове́цкаго и Евфроси́на Синеезерскаго, с ними же и Генна́дия Новгородскаго, святи́телей украше́ние, и все отце́в мно́жество, зде благоче́стно некогда пожи́вших и обитель Валаамскую подвиги своими преславно украсивших.
И ны́не: Я́ко Ми́лостива, приими́, Влады́чице, моле́ния избра́нных Твои́х, Афана́сия, строи́теля Ся́ндемскаго, и Адриа́на Ондру́совскаго, днесь за оби́тель Валаа́мскую предстательствующих, я́же их духо́вне породи́.
Песнь 5
Ирмо́с: Вскую мя отринул еси/ от лица Твоего, Свете Незаходимый,/ и покрыла мя есть чуждая тьма, окаяннаго,/ но обрати мя и к свету заповедей Твоих/ пути моя направи, молюся.
Тле́нная на нетле́нная пременивше, не устраши́лися есте́, отцы́ честни́и, неви́димых враго́в боре́ния, па́че же ви́димых враго́в де́рзости тве́рдостию испове́дания пра́ваго посрами́ли есте́.
Инове́рных зло́бу кро́тостию ва́шею посрами́ли есте́, во́ини Христо́вы три́десять и три с Ти́том свяще́нным; и, я́коже а́гнцы закла́ни бы́вше, побе́дныя по́чести на Небесе́х восприя́ли есте́.
Источа́ют мо́щи ва́ша, Се́ргие и Ге́рмане, бога́тно исцеле́ния, а́ще и в скале́ глубо́це крыемы нахожде́ния ра́ди иноплеме́нных. Те́мже, к заступле́нию ва́шему притека́юще, от бед многоразли́чных спаса́емся.
Сла́ва: Гнев Бо́жий бу́рею потопи́ нечести́вых у брего́в Валаа́мских иногда́. Те́мже Ма́гнус, све́йский краль, еди́н сме́рти горькия избе́гнув, покая́ние облобыза́ и мних нарече́ся.
И ны́не: Рабы́ Твоя́ сохраня́й, Богоневе́сто, от вся́каго зла и в ве́ре правей утвержда́й, Тя бо Столп Непоколеби́мый Це́ркве и́мамы.
Песнь 6
Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о, Упра́вителю, и спаси́.
Егда́ Наза́рий преподо́бный жезл па́стырский на Валаа́ме прия́т, тогда́ оби́тель от разоре́ния лю́терскаго возста́ви и ста́до и́ноческое па́ки собра́. Те́мже, я́ко вторы́й основа́тель Валаа́мский прославля́ется.
Ше́ствовати путе́м оте́ческим наставля́л еси́ ча́да твоя́, о́тче Наза́рие, сам и́нок соверше́н быв; и возрасти́л еси́ я, доброде́тельми па́че лу́ч со́лнечных сия́ющая и вся земны́я концы́ просвеща́ющая.
Научи́л еси́ наро́ды алеутския сла́вити И́стиннаго Бо́га, о́тче наш Ге́рмане, благослове́нием и моли́твами преподо́бнаго Наза́рия укрепля́емь, сего́ ра́ди апо́стол Аме́рики наименова́лся еси́.
Сла́ва: Устна́ми ра́дости пое́м ны́не кра́сный ваш пра́здник, отцы́ святи́и. Вы же, любо́вию бра́тскою дви́жеми, ру́це преподо́бныя к Бо́гу воздева́ти о нас не преста́йте и в час су́дный бу́дите нам хода́таи теплии.
И ны́не: Ю́же и́ноческому сосло́вию и всем христиа́ном Ма́терь дарова́л еси́, приими́, Всеблаги́й Царю́, со отцы́ на́шими Тебе́ моля́щуюся, и оби́тель Валаа́мскую утверди́, да ве́рою и любо́вию сла́вит Тя во ве́ки.
Конда́к и и́кос воскре́сен.
Песнь 7
Ирмо́с: О́троцы Богочести́вии в Вавило́не/ о́бразу злато́му не поклони́шася,/ но посреде́ пе́щи о́гненныя, ороша́еми,/ песнь воспева́ху, глаго́люще:/ превозноси́мый отце́в и нас Бо́же, благослове́н еси́.
Моли́твы непреста́нныя и трезве́ния наста́вник прему́дрый был ес́и, о́тче Льве́, О́птинская похвало́, ты бо, на Валаа́ме благопло́дно пожи́в, и́ноки вода́ми Ду́ха напои́л еси́, я́ко струя́ исто́чника Паи́сиева.
Отца и покрови́теля имену́ет тя оби́тель Валаа́мская, святи́телю Игна́тие, сию́ бо зело́ возлюби́л еси́ и, я́ко ангел Храни́тель, ей явился еси́, те́мже не преста́й моля́ся, да и́ноцы ея́ степе́нями духо́вными удо́бно к Не́бу восхо́дят.
Труда́ми Дамаскина́, игу́мена боголюби́ваго, назда́ся оби́тель Валаа́мская, яко ди́вный и вели́кий град, гра́жданы в себе́ имеяй житие́м подви́жническим украше́нныя и мно́гим приходя́щим лю́дем е́же ко спасе́нию по́мощь подаю́щия.
Сла́ва: Афо́нския горы́ до́брое воспита́ние, Валаа́ма при́сное ра́дование ты еси́, о́тче наш Анти́по! Благода́ти бо ста́рчества испо́лнен быв, ду́ши стра́ждущия иску́сно цели́л еси́. И ны́не от моще́й твои́х нам врачева́ния ми́лостивно подае́ши.
И ны́не: Храни́т Пресвята́я Де́ва оби́тель Свою́ и пе́стунствует и́ночествующих собо́ры, житие́ равноа́нгельное провожда́ти науча́ющи, в не́мже Аре́фа и Илия́ све́тло просия́сте и Верхоту́рью свети́льницы яви́стеся.
Песнь 8
Ирмо́с: Разжжи́те пещь седмери́цею,/ до́ндеже до конца́ разгори́тся,/ мучи́тель рече́ халде́ом,/ Ана́нию, Аза́рию и Мисаи́ла, вложи́те я в ню,/ и́же о́бразу злато́му не поклони́шася, но глаго́лаху:/ мы Бо́га и́мамы на Небесе́х,/ Ему́же слу́жим и поклоня́емся во ве́ки.
И́́ноцы терпеливодушнии, отцем древним подо́бницы! Вы любве́ ра́ди Христо́вы пло́ти своя́ распя́сте, в годи́ну же богобо́рческую на по́двиги му́ченическия устремистеся и ду́ши своя́ за Христа́ положи́сте.
Несть Бог, ре́ша безу́мнии в сердца́х свои́х. Вы же, отцы́ святи́и Иереми́е, Андрони́че и Се́ргие, о́браз Христо́в в себе́ нося́ще, Сего́ я́вственне пропове́дали есте́. Те́мже, и убие́ни от нечести́вых бы́вше, ны́не живете́ на Небесе́х.
Юдо́ль земну́ю преше́дше, к неболе́зненному поко́ю востекли́ есте́, отцы́ на́ши Аре́фо и Патри́кие, ско́рби бо мно́гия и изгна́ние от беззако́нных претерпе́сте, в рабо́тах тя́жких тружда́ющеся, оба́че ду́хом непоколеби́ми пребы́сте.
Благослови́м Отца́, и Сы́на, и Свята́го Ду́ха Го́спода.
Тро́ичен: Сла́вим Бо́га И́стиннаго, я́коже отцы́ нас научи́ша, и Сего́ Тро́ицу бы́ти испове́дуем – ре́ша богоотсту́пником преподо́бнии Афана́сий, Галактио́н и Таврио́н, и от них мученическую кончину прия́ша.
И ны́не: Иска́паеши сле́зы те́плыя, Ма́ти милосе́рдая, о всех заблу́ждших ча́дех Твои́х, я́ко же́ртву благово́нную ко Престо́лу Вседержи́телеву принося́щи моли́твы страстоте́рпец, и́же за убива́ющих я моля́хуся.
Песнь 9
Ирмо́с: Благословен Господь, Бог Израилев,/ воздвигнувый рог спасения нам/ в дому Давидове, отрока Своего,/ в нихже посети нас Восток с высоты/ и направил ны есть на путь мира.
Ле́тнюю па́мять ва́шу соверша́юще днесь, отцы́ преподо́бнии, мо́лим усе́рдно: пода́йте нам, немощны́м, от кре́пости ва́шея, да не похвали́телие то́чию, но па́че подража́телие дел ва́ших яви́мся.
Ублажи́м ны́не досто́йно вся отцы́ и бра́тию на́шу, имену́емыя и безыме́нныя, явле́нныя и неявле́нныя, благоче́стно зде пожи́вшия и упокое́ния ве́чнаго со святы́ми сподо́бившияся.
Пра́вды Бо́жия алка́сте, отцы́ досточу́днии, в по́двизех терпя́ще, в гоне́ниих не стужа́юще. Ны́не же вси ку́пно пи́щи нетле́нныя насыща́етеся, любо́вию бра́тскою соединя́еми.
Сла́ва: Неизве́дани путие́ Госпо́дни, и кто позна́ет та́йну дний гряду́щих? Но ты, Валаа́ме, храни́ ве́ру Правосла́вную, я́коже о́тцы тебе́ преда́ша, и свет ми́ру бу́ди.
И ны́не: Умолка́ет вся́кое уны́ние, и ра́достию сердца́ ве́рных исполня́ются, на о́браз Твой взира́ющих, Богоневе́сто, его́же Али́пий, и́нок освяще́нный, благоле́пне написа́.
Свети́лен воскре́сен.
Сла́ва, глас 2:
Нощь греха́ отри́нувше, сы́нове дне яви́стеся, отцы́ честни́и. Те́мже в ра́дости неизрече́нней ны́не сла́ву Бо́жию на Небесе́х зрите́, Христа́ славосло́вяще, призва́вшаго вас из тьмы в чу́дный Свой свет.
И ны́не, пра́здника.
На хвали́тех стихи́ры воскре́сны 4, и святы́х 4, со сла́вным.
Стихи́ры святы́х, глас 5.
Подо́бен: Ра́дуйся:
Ра́дуются Не́бо и земля́,/ ве́лий сонм отце́в Валаамских зря́ще,/ в не́мже Се́ргий и Ге́рман, я́ко велия светила сияют,/ с нимиже Новгоро́дстии святителие Иоа́нн и Генна́дий величаются;/ Авраа́мий, Корни́лий и Арсе́ний/ вку́пе со Алекса́ндром и Савва́тием прославля́ются;/ Афана́сий со Адриа́ном лику́ют све́тло/ и Евфроси́н чу́дный ублажа́ется./ Темже и мы Христу́ благодарне возопии́м:/ сла́ва Тебе́, Бо́гу на́шему,/ показа́вшему нам Свет Безнача́льный.
Днесь оби́тель Валаа́мская,/ я́ко ма́терь о ча́дех, весели́тся,/ сыно́в свои́х глаша́ющи по и́мени,/ и́же украси́ша ю све́тло/ и просла́виша до коне́ц земли́:/ Наза́рия, игу́мена боголюби́ваго,/ Иувена́лия и Ге́рмана, ева́нгельския пропове́дники,/ Льва́, Игна́тия и Анти́пу,/ Илию́ и Аре́фу,/ и вся, по́двигом до́брым подвиза́вшияся,/ ны́не же торжеству́ющия на Небесе́х ра́достне.
Любо́вию Христо́вою плене́ни,/ се́тей ми́ра избе́гли есте́/ и ро́ждия до́брая оби́тели Валаа́мския яви́лися есте,́/ Андрони́че, Иереми́е и Се́ргие/ со честны́ми Аре́фою и Патри́кием,/ вку́пе же и Таврио́н с Галактио́ном и Афана́сием,/ вы бо, от богобо́рцев изгна́ние и му́ки претерпе́вше,/ ве́ры Правосла́вныя и́стиннии храни́телие/ и подо́бницы отце́м ва́шим,/ Ти́ту, Гела́сию и ины́м мно́гим, дре́вле пострада́вшим, бы́ли есте./ С ни́миже ныне прославляетеся.
Глас 8:
Прииди́те, празднолю́бцев собо́ри,/ пе́сненный лик соста́вльше,/ ублажи́м отцы и наста́вники на́ша,/ вся святы́я, на Валаа́ме просия́вшия,/ и к ним согла́сно возопии́м:/ о, свети́льницы пресве́тлии,/ свет любве Бо́жия ми́ру явля́ющии!/ О, дру́зи Христо́ви ве́рнии,/ с Ним досто́йно во ве́ки пребыва́ющии!/ Засту́пницы бу́дите ве́рою вас призыва́ющим.
Сла́ва, стихи́ра ева́нгельская. И ны́не: Преблагослове́нна еси́, Богородице Дево:
Славосло́вие вели́кое. И отпуст.
На Литургии
Блаже́нна гла́са на 4, и пра́здника песнь рядова́я на 4, и святы́х песнь 6-я на 4. Проки́мен, Апо́стол, Аллилуа́рий, Ева́нгелие воскре́сны гла́са. И святы́м, проки́мен, глас 7: Честна́ пред Го́сподем/ смерть преподо́бных Его́. Апо́стол к Гала́том, зача́ло 213. Аллилу́иа, глас 6: Блаже́н муж, боя́йся Го́спода,/ в за́поведех Его́ восхо́щет зело́. Ева́нгелие от Матфе́а, зача́ло 43 или́ от Луки́, зача́ло 24. Прича́стен: Хвали́те Го́спода с Небе́с: И святы́м: В па́мять ве́чную бу́дет пра́ведник:
Моли́тва
О, свяще́нный по́лче Небе́снаго Царя́, дру́зи Христо́ви ве́рнии, вси святи́и, на Валаа́ме просия́вшии!
В све́тлый день пра́здника ва́шего приими́те сугу́бое похвале́ние от нас, недосто́йных чад, па́мять ва́шу любо́вию чту́щих. Вы бо, ми́ра грехо́внаго отре́кшеся, не зре́ли есте вспять, но, я́ко о́вцы незло́бивыя послуша́ние па́стырем духо́вным творя́ще и на вся́кий час ли́ца слеза́ми покаяния омыва́юще, все́ю кре́постию на служе́ние Бо́гу простира́лися есте́. Кто изрещи́ возмо́жет по́двиги ва́ша, и́хже во спасе́ние души́ подъя́ли есте́, па́че же смиренному́дрие, милосе́рдие и ко Христу́ раче́ние непреста́нное? Сего́ ра́ди досто́йнии зри́телие Све́та у́мнаго яви́стеся и усыновле́ния боже́ственнаго сподо́бистеся. И та́ко, све́ты вторы́я бы́вше, лю́дем, в нощи́ ве́ка сего́ стра́нствующим, путевожди́ ко спасе́нию и в ско́рбех жите́йских уте́шителие показа́стеся.
Те́мже и ны́не, Престо́лу Бо́жию предстоя́ще, услы́шите моле́ние нас, гре́шных, и низпосли́те нам си́лу от си́лы ва́шея рабо́тати Го́сподеви со стра́хом и ра́достию, и́ноком уста́вы оте́ческия кре́пко храни́ти, па́стырем ста́до слове́сное до́бре соблюда́ти, всем же христиа́ном в ми́ре, любви́ и единомы́слии жи́тельствовати, да, в за́поведех Бо́жиих ходя́ще, вои́стину ученицы́ ва́ша и ча́да Отца́ Небе́снаго бу́дем, имя Его́ Свято́е на земли́ прославля́юще; по кончи́не же сего́ жития́ в Ца́рствие Святы́я Тро́ицы вни́дем и со все́ми святы́ми сподо́бимся воспева́ти Отца́ и Сы́на и Свята́го Ду́ха в безконе́чныя ве́ки. Ами́нь.
