Православный Календарь » Служба священномученику Петру (Звереву), архиепископу Воронежскому

Богослужения

Служба священномученику Петру (Звереву), архиепископу Воронежскому

Месяца ианнуария в 25-й день
Месяца иуния в 4-й день
СЛУЖБА
Священномученику Петру, архиепископу Воронежскому, новомученику Соловецкому.


Канон Богородицы, со ирмосом на 6, ирмос по дважды: и священномученику, на 8. Катавасиа по уставу.
Канон иконе Прествятыя Богородицы, именуемей Утоли моя печали, глас 2-й.

Песнь 1

Ирмос: Во глубине постла иногда / фараонитское всевоинство преоруженная сила, / воплощшееся же слово всезлобный грех потребило есть, / препрославленный Господь, // славно бо прославися.
Яже всем удобь послушная в скорби, / и в печали помогающая, Богородице благая, / благодать подаждь пети тя дерзающим, Владычице, // скорбящих радосте.
Многобогатную благодать стяжавши, Владычице, / дерзовенною твоею молитвою преславно изми мя от напастей, убогаго раба Твоего, // скорбящих радосте.
От враг видимых и невидимых избави, молимся, / к тебе прибегающих, Богородице, // и разори всяк совет борющих нас.
Отъими поношение человеческое и клеветы наветник / от мене, Богородице, молю Тя, // да усердно славлю Господа, Егоже питала еси.
Канон Священномученику, глас 8-й.

Песнь 1

Ирмос: Преславный в мори устроивый людем путь, / небесное нам шествие проходимо сотвори, // да новую песнь поим Тебе, Господи.
Припев: Господи Иисусе Христе Боже наш, помилуй нас.
Даруй ми, Господи, слово премудрости, / прославити по достоянию дивнаго во святых Твоих Петра достоблаженнаго, / святителя, мученика же и исповедника, / во дни последния подвиги добрыми просиявшаго, // и отечеству российскому много послужившаго.
Припев: Священномучениче Петре, моли Бога о нас. От юности Спасителем наставлен быв ко благочестию, / образ того любовию в сердце твоем носил еси, / добродетелем Христовым подражати тщася: / научаеми благонравныма родителема, / возрастал еси во страсе Божии, Отче, // кровом крил Его Божественных невидимо покрываемь.
Предъизбрание твое от Бога опрадал еси, святителю, / чистотою сердца дары благодати во множестве прияв, правостию Духа и деяний угодив избравшему тя, // воистинну явился еси царское священие.
Богородичен: Тайну Божия спасения во утробе девственней вместившая, / исполнением всесовершенныя любве Твоея к роду человечу / во обителех Отца Небеснаго пристанище душам уготовляеши; / животодавца Мати Чистая, / к животу вечному управи нас, к тебе бо в молитвах прибегаем, / тайну нашего спасения благодатию Твоею соверши, // Богоизбранная Марие.

Песнь 3

Ирмос: Утверди нас в Тебе, Господи, / древом умерщвей грех, // и страх твой всади в сердца нас поющих Тя.
Врагов наветы разори суетныя, / Всепетая Богородице, / и не оскудей молитвами Твоими, // снабдящи нас, восхваляющих Тя.
Призри, Чистая, милостивным Твоим оком, / и избави мя всякаго навета видимых и невидимых врагов, // ослепивши зеницы очес их.
Злое нападение врагов, яко огнь палящее, / ищущих всегда погубити нас, Дево, // росою молитв Твоих угаси.
Неугасимая лампадо, / заря присносиятельная, / нощию мя скорбей одержима просвети молитвами Твоими, // рождшая солнце славы Христа.

Ин ирмос: Утврждей на камени веры, / на сем созижду мою Церковь, рекий Господи, / спаси мя вопиюща: / Ты еси, Христе, Сын Бога живаго, // и в Тебе утвердися дух мой.
Всем житием Твоим верность Христу показа, / всякаго блага земнаго отвергся, / сердце любве исполнено, благодарением ко Господу простирал еси, / в премудрости Божии выну поучаяся. / Ангельскаго образа красотою украсився, / священства небесною мАстию помазався, / добре земное служение свое соверши, / с вышними чины ныне пред лицем Господним предстоиши, // пением хвалебным Церковию прославляемь.
Службу учителя духовнаго / и начальника обителем иноческим / во время оно совершал еси, достоблаженне; / воином российским в ратех проповедник Слова Божия / и утешитель милостив был еси. / Всюду созидал еси вся ко славе Господа, / прилагая души к житнице Христовой, / связывая плевелы соблазн, // и лукавыя духи разоряя.
Божественную благодать святительства / от десницы Тихона святейшаго, / первопрестольника российскаго и мученика славнаго, / достойно восприял еси, блаженне Петре; / силою ти свыше дарованною оболкся, / нивы Христовы делатель мудрый явися, плод творя в терпении, // Творца и Господина жатвы немолчно воспевая.
Богородичен: Имеяй всяку власть на Небеси и на земли Господь, / иже во умалении Своем волю пославшаго Его сотворивый, / возвеличил есть Тя, Благословенная Марие, / плотию Его объемшую и несказанно рождшую, / область Владычицы Небесныя даровати Ти благоизволи; / яко во Царствии Божия милости и благосердия / владычествуеши человеколюбием Твоим, Всепетая. / Приклони благоутробие Царя Небеснаго к нам грешным, / душ наших худость объими всесильною державою Твоею; / тех стропотная исправляя покаянием, / и дебри добродетельми исполняя, / да Царству Божию пришедшу в силе // уготовиши их невреждены.

Ин кондак, глас 6.
Подобен: Ангельския силы:

На Любовь Божественную всем сердцем отозвавыйся, / вся яже возмогл еси Благая, воздаде Тому, / златоустый правды Божия проповедниче, / златосердый хранителю Тайн Господних, / Фавора славнаго святительское отражение, / Голгофы Анзерския жертво всесовершенная; / исповедниче Христов, священномучениче Петре, // поминай нас, любовию чтущих святую память твою.
Седален, глас 2.

Веруяй в Мя, глагола Господь, / дела яже Аз творю, и той сотворит. / Темже вера твоя велия, святителю Петре, и инех подобных тебе, / во мраце неверия светло возсияла есть, / спасающи от погибели душы православныя, // хранящи Церковь русскую во утверждении Христове. Дважды.
Слава, и ныне, Богородичен, глас тойже.

Блаженство истинныя веры являеши нам, Богородице: / тоя бо силою Божественное слово к воплощению восприяла еси / благословенною утробою Твоею, / тоя святынею страдания крестная Сладчайшаго Твоего Сына / безмолвно претерпела еси. / Твоею благодатию нам веру приложи, Пренепорочная, / терпением конечным снабдевающи, / яко да вся возмогше верою, / и тою упование спасения имуще, / услышим глас Небеснаго Владыки, глаголющ: // вера ваша вас спасла есть.

Песнь 4

Ирмос: Услышах, Господи, глас Твой, егоже рекл еси, / глас вопиющаго в пустыни, / яко возгремел еси над водами многими, / Твоему свидетельствуяй Сыну, /весь быв сошедшаго Духа, возопи: // Ты еси Христос, Божия Мудрость и Сила.
Молитву неусыпну, заступление твердо молим: / умилосердися, и виждь нашу нестерпимую печаль, болезни, скорби, страсти, / и благопременно посети, Мати Божия, // радость скорую подающи.
Не непричастни есмы, Владычице, Твоего заступления в скорбех, / темже и ныне нам помози вскоре, люте обуреваемым, / руку простирающи, Чистая: / буди милостива болезнем нашим, Мати Божия, // радость скорую подающи.
Не уповаша на Тя, Владычице, беззаконнующии, / но уповаша на язык человеч, присно завистно излиявшийся, / неправедно пролияти кровь Искренняго, рыкающе: // Ты же, Чистая, челюсти их сокруши.
Смири, Владычице, врагов вознесенную выю велеречующих, / советы, и злонравия, и сердца, поучающаяся злым на мя по вся дни: / крепость же и победу подаждь призывающим Тя, Мати Божия, // радость скорую подающи.

Ин Ирмос: Яко Петру руку прострый в помощь, / и мене помилуй, // и спаси яко Человеколюбец. Господь временем и летом, / иже апостолы избра свидетели Слову быти, / поставляяй иереи во священие Имене Своего в людех: / яви земли российстей во дни богоборений лютых / верных служителей Своих, страха вражия не устрашившихся, / якоже архиепископ Петр, святитель Христов доблественен, // Небесному Архиерею преподобен.
Ревность Петрову по Бозе стяжав, досточудне, / егоже именем во иночестве наречен бысть, / якоже оный, рыбарь небесный явися, / в ловитву спасения Божия управлял еси души людския: // претя силам вражиим тыя губити.
Звание Господне подобаше ти, святителю, / егоже трикраты удостоися, апостолу Петру тезоименный, / сердце исполнь благодарения ведущу тайны Его предаде; / дела Божия творил еси, храня истину в правде, / се бо истинен звавый Тя, // пребываяй в век века.
Службу божественную возлюби зело душею, досточудне, / со всяким тщанием совершал еси ту благоговейно, / ни единому словеси слух сердца своего затворяя, / любовь же велию являя творением святых пророк и псалмопением давидским; / людем молящимся содевал еси радость и веселие, / иже с тобою вкупе Бога славословяще, / утешение в скорбех обретаху. / Ты же и в темницах сый, / со инеми архипастыри жертву благодарения Богу приносил еси, / к милосердию Вышняго взывая, // моля о милостех Его к земли российстей.
Богородичен: Боговместимым существом Твоим / свидетельство любве божественныя явльшая, / неизреченнаго совета Тайне послужившая; / Тобою бо Завета Новаго Податель нам явися благ и кроток, / любве спасительною заповедию закона смерти узы разрушаяй. / В дусе любве Христовы всех нас соедини, Пречистая, / мир Божий подая нам; / да тожде мудрствующе, и томуже служаще, / не изнеможем заповеданною нам любовию, // тоя Божествнною силою неприязни немощь побеждающе.

Песнь 5

Ирмос: Угль Исаии проявлейся, / солнце из девственныя утробы / возсия во тьме заблуждшим, // богоразумия просвещение даруя.
Молитвеннице неложная, / упование христиан, Обрадованная, / приими мольбы от нас, / прилежно призывающих и молящихся Тебе. Источник Тя жизни сущий, Чистая, / безсмертия источающий воды, // земнороднии, познавше, ублажаем.
Вооружися на ны лукавно враг, / языком якоже мечем погубити хотя, // но Твоею, Богородительнице, крепостию предвари.
Пучину, Чистая, заступлений кто изочтет силы Твоея; / темже нас сущих в нужде, // скоро предвари.

Ин ирмос: Утренюет дух мой к Тебе, Боже, / зане свет повеления пришествия Твоего: / имиже убо озари ум наш, Владыко, // и настави на стезю жизни.
Духовным оком созерцая / явление Господа воскресша учеником Своим при мори Галилейстем, сердечным слухом внемля Учителя божественным глаголом, / сладостию любве Христовы исполнялся еси, отче Петре, к пасению овец Господних уготовляяся душею: / пастырства жребий прияв от пастыреначальника Христа, / ко источником воды живыя заповедей Божиих // паству твою мудро управлял еси.
К тебе стяжавшему Христа в сердце своем, / множество взыскующих Его прибегоша, / яко ко источнику приснотекущему благодати Божия: / во святыни любве твоея обретающе утешение в скорбех, / живящеся силою Христовою, // от тебе исходящею.
Подвиг монашеский всем сердцем возлюбив, / монах совершен житием твоим явися, преподобне Петре: / посту и молитве, нестяжанию и инем добродетелем прилежа душею, / в схиме желая дни своя скончати. / Вышним изволением подвиг велий исповедничества подъяв, / мученически житие твое сконча в пустыни анзерстей: / ко ангельскому чину причтен ныне во обителех горних, // схимы небесныя удостоился еси от Благосердаго Владыки.
Богородичен: Богорадованною душею / гласу архангельскому внемшая, / радость миру несказанно рождшая, / Богородице Марие, / всех родов веселие явилася еси, Владычице, / и всякой твари Божии радование умиленное. / Сотвори, Благая, людем Твоим радость в Бозе совершенну, / простри над всеми земнородными Покров Твой державный, / и призри милосердием Твоим на все естество животное: / и мене, создание Творца моего, / утешения и радования о Тебе сподоби, Мати Божия, // яко да ублажаю Тя.

Песнь 6

Ирмос: В бездне греховней валяяся, / неизследную милосердия Твоего призываю бездну: // от тли, Боже, мя возведи.
Целомудрия сущи Ходатаица, / призывающым Тя ныне явися, // и от всяких избави напастей и бед, Богоневесто.
Злодейства вражия разори, / и клеветы неправедныя устави, / благословенная Пречистая, // избавляющи неповинныя от скорби.
Лютыми грехи окружени, / и напастными бедами потопляеми, // под Божественный покров Твой прибегаем, Мати Христа Бога.
Неискусомужно рождши Господа, / явися по рождестве паки девствующи: // О преславнаго чудесе, в Тебе соделаннаго, Богоневесто.

Ин ирмос: Бездна грехов и прегрешений буря мя смущает, / и во глубину нужднаго реет мя отчаяния: / но твою крепкую руку мне простри яко Петрови, // о управителю, и спаси.
Мнозем угодником Божиим / уста ко устом глаголати сподобился еси, Петре: / старцем обители Оптины и Дивеева старицам, / великому пастырю Кронштадтскому собеседник любезен явися. / Блаженней Феоктисте Воронежстей искренен бе, страстотерпче, / яже чтима тобою поучаше тя в промыслех Божиих: / проведением вышних путей и тайн откровением, // в подвизе крестнем тя укрепляла есть.
Тьма в нюже погрузися великая Россия / отступлением от Бога и веры ослаблением, / не возмогла объяти света Божия, / во истинных светильницех Его горящаго. / Ты бо еси, Петре, един от сих избранных, / учиненных и во мраце беззакония проповедати Христа; / на спасение мнозем предъуставлен бе, // вжигати в людех свещи веры.
Благодатию Божиею и величием духа твоего / множество людей от бед спасал еси, присноблаженне, / из глубины неведения извлачая просвещением божествннаго разума; / иже во узилищах с тобою сущих, / душы их от уз ада свобождал еси, / благость веры и сокровища любве божественныя открывая им любовию твоею; / немолчныма устнама проповедуя Христа, // спасению Господню служил еси безпреткновенно.
Богородичен: Пресвятая Владычице, Бога нашего Мати, / свет живота нам всесветло возсиявшая, / посреде скорбей многих святыню свою непорочно сохраньшая; / мертвость греховную душ наших оживи, / напояя их щедро покаяния слезами, / благодушествовати в скорбех благодать нам даруй, / радость во страданиих, яко тии ко спасению бывают нам; / силу духовную подаждь нам в бранех, / да малодушествуя, паки не распнем за ны распеншагося, / и сердца озлоблением не оскорбим живот нам Даровавшаго, / той бо во веки непременен есть. / сподоби нас, Богородительнице, по слову Сына Твоего / мир и любовь между собою имети, / печали на Господа возлагающе; // возрасти в нас семя Царства Божия.

Кондак, глас 8.

Во святительстве твоем добре подвизался еси богомудре, / и мученичества венцем светло украсился еси, / прещения врагов Христовых не устрашився, / кровьми твоими землю во отоце анзерстем освятил еси; / сего ради силы небесныя удивишася терпению твоему, / мы же с верою и любовию притекаем ко святым мощем твоим, досточудне. / Ныне со всеми соловецкими святыми моли о нас Христа Бога, всеблаженне Петре, да зовем ти: // Радуйся, отче приснопамятне.
Икос.

Совершен быв в ревности по Бозе и любви божественней, святителю, / благодатию в тебе животворящею дивная дела творил еси в простоте и кротости сердечней: / служителю Господень истинен, / пастырскую службу со усердием исполнял еси, паству Христову возращая в Дусе Божии. / Силою и чистотою духа твоего вражиим силам противостав, / свеща горящая во тьме безбожия явися, богоизбранне отче, / за Христа и веру правую гонения и муки радостию претерпел еси; никиими же скорбьми не отлучался еси от любве Божия, премудре, / и смерть его ради в приобретение себе вмени, еюже и прослави Господа, / праведною кровию своею землю анзерскую освятив. / Венец нетленне восприял еси от Христа Бога в Царствии Небеснем, / священномученик и страстотерпец явился еси доблествен, / церкве российския дивная похвала и Соловецкия земли неувядаемая слава. / Молися о нас ко Господу, всеблаженне Петре, да зовем ти: // Радуйся, отче приснопамятне.


Песнь 7

Ирмос: Да преславное рождество Твое, Христе, еже от Девы, / прообразиши яве, / неопалимы в пещи отроки сохранил еси, / песньми поющия Тебе: // отцев Боже, благословен еси.
От благоутробия Твоего, Дево Чистая, / решиши бо безмерныя печали и напасти призывающым в нужде и обстоянии: / темже и ныне помози, Благословенная, Тя восхваляющим. Покажи скорое Твое заступление, / покажи яко можеши, яко Мати Бога, / призываем Тя от сердца, со слезами припадающе, // скорбь укроти и болезнь рабов Твоих вскоре.
Уста человеков яко львов лютых, / гроба тяжчайше отверзошася горько поглотити мя; / но Ты, Богородице, явися надежда ненадеющымся, // и низложи крепость их, Благословенная.
Да узрят врази и постыдятся, / да уразумеют и видят Твою, еже по нам сопротив борющую силу, / и в пропасть преисподнюю низложи их, Благословенная, // надеждо ненадеющихся.

Ин ирмос: Безумное веление / мучителя злочестиваго люди поколеба, / дышущее прещение и злохуление богомерзкое, / обаче три отроки не устраши ярость зверская, / ни огнь снедаяй, / но противодышущу росоносному Духу, / со огнем суще пояху: // препетый отцев и наш Боже, благословен еси.
Велию веру имея ко святителема воронежскима Митрофану и Тихону , / архипастыря Антониа почитая, / в месте их подвигов святительство приял еси, достоблаженне Петре, / тихой святыни предшественника твоего Владимира преемство сотворив; / граду Воронежу радость велию яви богоугодными труды твоими, / множеству народа православнаго // утверждение и благодатную помощь подавая.
Оток благодати явися твердый, святителю Петре, / в стенящем мори безумия, воздвизаемем злобою сатаниною во стране российстей; зане идееже множится грех, тамо и благодать изобилует во избранных своих, // изливаяся щедро на спасения чающих.
Жалостию дому Господня снедаемь, / противостал еси учителем лживым, / страха ради человеческа отступившим учения праваго / и возмутившим Церковь российскую. / Предтечевым гласом во множестве тех к покаянию приводил еси, Петре, / радость православных людей исполняя; / возвращал еси пастырю доброму заблуждших овец, // многоценною жертвою купленных.
Богородичен: Источник любве Божия / исполни во оскудевающих сердцах наших, Благодатная Марие, / теплотою матерних Твоих молитв согрей хладность молений наших, / собери под покров милости Твоея птенцы Господни, / да во Имя Христово нам совокупленным / Сам Владыка посреде нас пребудет, / озаряя нас светом любве Своея. / Ты же до конца нас не остави, Мати Божия, / в мире соблюди житие наше, // Царству Сына Твоего премудро нас уготовляя.

Песнь 8

Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: // благословите вся дела Господня Господа.
Прибежище наше и миру радование, Богородительнице, / умилосердитися потщися, / и спешно благодать Твою подаждь нам оскорбленным, // и заступи, Благая, Твоя рабы.
Совет суетен совещаша люте на ны безбожных сонмища, / якоже прежде Ахитофел . / Но вопием: Твоими молитвами сей разори, // низложши сих крепость, Богородице.
Призывающих Тя, Богородице, от души неложно, / во всякой скорби, и в болезнех различных, и бедах лютых, / спешно услыши, Владычице, // сих избавляющи присно молитвами Твоими.
Да имя Твое, Богородице, на земли славословится; / иже из Тебе возсияв, грешником державную надежду и стену Тя дарова. // Тобою бо всякое дыхание к Богу притекает.

Ин ирмос: Победители мучителя и пламене, / благодатию Твоею бывше, / заповедем Твоим зело прилежаще отроцы вопияху: // благословите вся дела Господня Господа.
Многажды искушение приял еси темницею и узами / от беззаконник, во след сатаны себе развративших; / многажды мучимь бе болезньми и гладом, / скорбьми и неправдами лютыми. / Обаче страха злаго не устрашился еси, страстотерпче, / ниже любовь Твоя к Богу преста; / страдания твоя вере твоей утверждение деяху, // и муки безвинныя даяху души возвышение.
Во святых отоцех Соловецких / верх подвигом твоим обретеся, священномучениче, / в земли уничиженней наемники диаволими, / болезньми же и страдании лютыми мучеников новых множества прославленней; / в нейже такожде искушение веры твоея в похвалу и честь тебе явися, отче. / ничтоже бо можаше возбранити силе Божией, в тебе чудотворящей, / ниже служению твоему Богу воспятити; / звание архиерейское храня благоговейно, / и заточенных утвеждая в Бозе, / архиепископ Соловецкий наречен бысть верными соузники твоими, Петре, // якоже и брат твой во Христе, священномученик Иларион богоблаженный.
Люте стражда во всем житии твоем, священномучениче, / на конец онаго лютейшая страдания восприим оклеветанием клеветою богомерзкою, / во удалении от присных твоих в заточении ти бывшу; / болезнию о чадех твоих, пастыря лишенных и неправдою сею омраченных, / болезновал еси зело, страстотерпче. / Обаче все упование твое на всесильную волю Господню возлагая, / восстающая на тя востания вражия сокрушал еси молением твоим прилежным, / любовию и верою к тебе любезных чад твоих, / иже отлучена от тебе телесно, во единем дусе совокуплена с тобою быша, // во истинных путех Господних хождение свое всегда творяху.
Троичен: Благословим Тя, всесильне Господи, Боже Вседержителю, / присносущне Отче, / Слове Божий, нас ради плоть приявый и распятием голгофским смерть нашу умертвивый, / и Душе Всесвятый животворяй, / Троице единая и нераздельная; / воспеваем Тя с Петром священномучеником вкупе, / верным служителем Твоим, / в голгофе анзерстей смерть за тя приявшим, / и имя трисиятельное Твое прославившим, // и вопием: Благословите вся дела Господня Господа.
Богородичен: Слово от начала бывшее, / ко спасению мира плоть прияло есть от Тебе, Богоневесто, / дарова нам Духа Разума в сердца наша, / словеса ко благоглаголанию устом даде; имже свет истины в человецех возсия, / и благодати вселенная исполнися, / То бо в людех обитающе, / глаголы Божественныя нам остави, / в нихже живот вечный имамы. / Того яко Единородна Чада Твоего, моли, Пречистая Отроковице, / нам слово Божие в начале разумения имети: / исполни истиною души наша, / и Духом благодати глаголы наша раствори, / яко да оправдание приявше от словес любве, / во избытце сердца изливающихся, / глаголов неизреченных слышатели приснии явимся, / с небесными лики воспевающе: // благословите вся дела Господня Господа.


Песнь 9

Ирмос: Недоумеет всяк язык благохвалити по достоянию, / изумевает же ум и премирный пети Тя, Богородице; / обаче Благая сущи, веру примии, / ибо Любовь веси Божественную нашу. // Ты бо христиан еси Предстательница, Тя величаем.
Да заградится всяк язык лукавым поучаяйся, / да молчат устна льстивая, / и уста неправедно глаголющая на праведнаго беззаконие / гордынею и завистию враждебною вкупе, // Богородицы молитвою, и святых Христовых.
В молитвах бодрую, Чистую Богородицу призываем вси, / болезнию и скорбию одержими, взывающе: / Владычице Чистая, скоро избави от обдержащих болезней рабы Твоя присно, // яко по Бозе Заступницы иныя не имамы.
Отчаявшихся велие прибежище, / обуреваемых тихое пристанище Ты еси, Богородице. / Темже и мы притекаем, взывающе: / да не постыдимся, Мати Истиннаго Живота, // но да благодаряще, усердно Тя величаем.
Приими, Отроковице Пречистая, Божественную песнь, / воздавающи благодать на Тя надеющимся, / и мир испроси церквам присно послати, / и Отечеству нашему одоления и победы, // да христианский всяк язык Тя величает.


Ин ирмос: Разбойника подражаяй окаянный аз, / исповедаяй Тя зову Тебе, / Единаго от Отца, и от Девы неизреченно воплощенна, / и мене ради бывша по мне; / но яко свет умный солнце, / не воспомянув зол, во Царствии Твоем помяни мя, // егда судия Господи сядеши на престоле.
Во отоце Анзерстем / последнее земное обиталище уготовися Тебе, святителю, / идееже прежде пустыннии отцы песнь Богу воспеваша непрестанно; / во дни же области темныя мерзость запустения содеяна бысть тамо ненавидящими Сиона, / иже себе упиташа на день заколения, / неповинных же мучиша к воскресению живота их / Тебе отлученному Божественныя службы, / и скорбьми многими истязаему, / молитвою и богомыслием утоляшеся жажда души твоея; / откровении же Духа даровахуся ти словеса Божествнная // к прославлению первоначальника соловецкаго, Германа преподобнаго.
Лютою болезнию уязвився, / и страдания тяжкая претерпев, / кончину мученическую приял еси в Голгофе Анзерстей, присноблаженне, / во оскверненней обители Распятия Господня душу твою в руце Христа Бога предаде. / От юности по Бозе шед, и всею крепостию твоею Тайне Спасения послужив, / смертию всехвальною прослави Господа; / темже и Той ублажи тя в Церкви святых, / явлении чудными назнаменовав души твоея святость, // и мощи честныя твоя в поклонение и почитание священное твое нам милостивно остави.
Имя твое оправдися, горо святая, / от древле нарекшаяся второю Голгофою изволением Пресвятыя Богородицы, / множество жертв беззаконий яве предведевшия, / таже и жертву великую святителя дивнаго и славнаго мученика Петра, / исповедника Божия твердаго. / Господь бо весть, колико еще христиан предадят Его ради зде души своя, / пожирая победою смерть; / се, во свидетельство всем человеком, / во образ праведныя жертвы о Бозе, / безмолвно к Небу вопиет кровию безвинною священная Голгофа, // идеже незримо почивает стень Праведнаго Судии, грядущаго судити мир.
Богородичен: Паче всех земнородных страдание в любви ко Господу познавшая, / и страсть оружную Креста Сыновняго Божественною душею претерпевшая, / скорби людския вмещаеши благоутробно, Мати Дево: / мучеников за Христа оружием неодолимым правды Божия вооружаеши, / и страстотерпцем дерзновение непобедимое всесильным заступлением Твоим даруеши. / Сердце любве исполнено простри нам, / в печалех наших немощствующим и в борениих изнемогающым, / утеши души наша в тайне промышления Отча: / яко да входом страданий о Христе в Любовь Его Божественную внидем, // и радости небесныя ходатайством Твоим неотлучени будем.


Светилен:

Вся в тебе свет бысть, святителю Петре, / ни единыя тьмы не имый, / яко светильник извнутрь просвещаяй тя бяше: / се бо избран бысть от Бога свидетельствовати о Свете, / и просвещати тьму неверия в людех обращением к вере Христовой. / Просвети нашу темность духовную, / и душы сном лености отягченныя пробуди, / да видяще видим, и слышаще да разумеем, / и ко Господу обратим сердца наша, / во еже посетити Ему нашу немощь, / душ ослепление исцелити, // и благодатию своею не оставити ны во веки. Дважды.

Слава, и ныне, Богородичен:

Свет откровения языком рождшая, / страстей язычества избави ны, всесветлая Богоневесто, / во свете повелений Божиих ходити нас настави, / яко да добрая творяще в нем, Славу Отца Небеснаго умножим в человецех, // да и Той исполнит ны Божественнаго Сияния всепобеждающия Своея Любве.


На хвалитех стихиры, глас 8:

Небеснаго Царствия жителю, / Божественных благ сопричастниче, / Престолу Вышняго предстоиши, священномучениче Петре: / о дольнем Отечествии твоем моли, блаженне, / многострадальнем и многогрешнем, обаче же и богоблагодатнем, / безчисленными подвиги святых Его прославленнем. / Твоими бо и тех молитвами / чаем лютыя смерти избегнути, // и части избранны Господних сподобитися.
Выше естества дела творил еси, боговенчанне, / священней тайне совершающейся во светлостех души твоея, / любве неистощимаго источника, / Божественныя благодати неизреченнаго таинника, / невозмутимыя тишины сокровища / и ангельския чистоты хранилища, / из негоже добрая непрестанно износима бяху // ко просвещению и спасению душ мнозех.
Миру распяся, и вся яже в мире презре, / язвы Господни на теле и в сердце присно носил еси, Отче: / о Христе страдания в радость души твоей вменяшася, / и смерть Его ради безсмертие тебе сотвори. / Граду Воронежу слава и утверждение быв, архипастырю, / Голгофы российския жертва святая явися: / в земли соловецтей остави честныя мощи своя, // во обители вечныя возлете душею на веки.

Праведность души твоея возлюби Господь, / сего ради разум свят и подвиг крепок дарова ти, / благодатию и милостию Своею выну посещая: / темже и во узах сый, верою и твердым упованием жив был еси, священномучениче, / благовестием и жертвою хваления непрестанно Бога прославляя. / Тойже совершаяй тя во всяком деле блазе, / к лику избранных Своих причте, // и славою нетленною яже у Него, тебе прослави.

Слава, глас 5.
Подобен: Радуйся:

Во устех любве твоея, отче Петре, / слово истины чудотворило есть, / правде Божией победу содевая: / глаголы бо жизни вечныя дарованы тебе быша откровением Христовым / к разумению слышавших и ко спасению по словеси твоему веровавших, / к низложению сопротивных, не могущих глаголом сим противостати. / Се бо слово Божие судити имать вселенней в правду: / злобе грешных запретити навеки, // сыновом же мира даровати заповеданное Царство.

И ныне, Богородичен, глас тойже:

Утоли болезни / многовоздыхающия души моея, / утолившая всяку слезу от лица земли. / Ты бо человеком болезни отгониши, / и грешных скорби разрушаеши: / Тебе бо вси стяжахом надежду и утверждение, // Пресвятая Мати Дево. Аще служим таже иконе Пресвятыя Богородицы «Утоли моя печали»: Тогда Богородичен глаголем сей: Страшно и преславно, и велие таинство, / Невместимый во чреве вместися, / и Мати по Рождестве паки пребысть Дева: / Бога бо роди из Нея воплощенна. / Тому возопиим, Тому песнь рцем, / со ангелы воспевающе: / Свят еси, Христе Боже, // иже нас ради вочеловечивыйся, слава Тебе.

Славословие великое.
Ектении, и отпуст.


НА ЛИТУРГИИ

Блаженна от канона святаго, песнь 3 и 6.
Прокимен, глас 1-й: Уста моя возглаголют премудрость, и поучение сердца моего разум. Стих: Услышите сия вси языцы, внушите вси живущии по вселенней. Апостол ко Евреем, зачало 134. Аллилуиа, глас 2-й: Священницы Твои облекутся правдою, и преподобнии Твои возрадуются. Стих: Блажен муж бояйся Господа, в заповедех Его восхощет зело. Евангелие от Матфеа, зачало 67.
Причастен: В память вечную будет праведник, от слуха зла не убоится.

Молитва:

О священная и многострадальная главо, земный ангеле и небесный человече, священномучениче и чудотворче Петре! Ты, архиерею великий, в годину лютых гонений явился еси церковное светило и истинныя веры утверждение, зане противу богоборцев дерзновенно Христа исповедал еси, и яко кадило благовонное, в жертву Богу себе самаго принесл еси. Яви нам, смиренным и грешным, ко святым мощем твоим притекающим, многомощное твое заступление, и вкупе со всеми святыми, о отоце Соловецтем просиявшими, испроси у Господа всякий дар, коемуждо благопотребен ко спасению. Се бо грех наших ради не имамы дерзновения ко Господу и Владыце нашему, и праведный гнев его на ны наведохом, и всякия милости недостойны сотворихомся. Темже не смеюще возвести очеса наша к высоте небесней, ниже молебный глас ко Господу, сердцем сокрушенным и смиренным духом тебе молитвенника благоприятнаго к нему предлагаем, и просим тя со усердием велиим: буди заступник и ходатай наш пред Богом, судиею праведнейшим, се бо выну прогневляем Его согрешении многими. Ныне убо, во Славе Небесней пребывая, и с лики святых непрестанно славословя Пресвятое Имя Господа, призри на нас грешных, и избави всех, верою несумненною к Богу приходящих, от всяких бед душевных и телесных, от всех томлений и прилогов диавольских: укроти волны страстей и искушений, восстающих на ны, да ради святых твоих молитв не объимет нас напасть, и не погрязнем в пучине греховней и в тине страстей наших. Вознеси, богоносне отче наш, сие малое моление недостойных раб твоих Владыце Христу, да утвердит страждущую страну нашу Российскую в правой вере и благочестии, Церковь Святую да сохранит от ересей и расколов, и соблюдет невредимою от всякаго зла. Испроси у великодаровитаго Христа Бога нашего скорбящым утешение, недугующим исцеление, обидимым заступление, страждущим от бесов скорое свобождение, падшым во грехи покаяние и востание, от Церкве Христовыя отпадшым вразумление и на путь спасения обращение. Ты мученически душу твою за веру положил еси, даруй и нам мужество во всем подражати тебе, да ничтоже в жизни сей временней возможет отлучити ны от Любве Божия. О, святителю Христов, посети место сие, страдании твоими честными освященное, и укрепи молитвами твоими святую обитель сию, да процветет в ней ревность ко спасению и благочестие. Ты, непрестанно о часе смертнем память имевый, и благую часть избранных Божиих от Господа получивый, сподоби и нас в мире и покаянии живот свой скончати, и Царствия Божия наследники быти, идеже ты водворяешися со ангелы и всеми святыми, хваля Бога в Троице славимаго, Отца, и Сына, и Святаго Духа во веки веков. Аминь.

Рейтинг@Mail.ru
Система Orphus
(1 голос: 5 из 5)