Православный Календарь » Елисавета Феодоровна, Алапаевская » Служба святой преподобномученице великой княгине Елисавете

Богослужения

Служба святой преподобномученице великой княгине Елисавете

НА МАЛОЙ ВЕЧЕРНИ

На Господи, воззвах: стихиры, глас 7:

Приидите, восхвалим и воспоим Елисавету преподобномученицу, / верную оружницу Христова воинства, / звезду преславную, паче естества возшедшую на западе, / на востоце же путь свой скончавшую, / тьму века сего безбожнаго явлением своим просветившую, / послежде паче просиявшую во Царствии Христа Бога нашего, / Той же есть Царь славы и Восток востоков.

Повеждь нам, Елисавето, яже ныне зриши тайная; / сия же зрети от юности возжелела еси, / ихже ради небрегла еси привременнаго жития сего сладости мечтательныя, / мучителей же злобу нивочтоже вменила еси, / да и мы, желанием сим благим уязвившеся, / недугом сим спасительным добре поболевше, / вознерадим о временнем во еже вечная благая улучити.

Господни свидетелие, святии мученицы, / славы Божественныя зерцала чистая, / аще не бы светом подвигов ваших нощь безбожия просветися, / како быхом узрели путь, иже ко спасению? / Аще не вашими кровьми земля Российская утучнися, / како бы пустыне безплодней не уподобися? / Молитеся ныне ко Господу, да посетит виноград сей, / да укрепит ны в грядущих искушениих и временех скорбных, / во еже сподобити нас грешных подвиг по силам восприяти / и в немощи нашей величие славы Божия свидетельствовати.

Слава, глас 6:

Суд Господень над Российскою землею приближися, / оскуде бо любовь и милосердие истощися. / Пощади, Господи, отечество наше многострадальное, / молитвами святыя Елисаветы и всех новомучеников / и ради честных страданий их / даждь людем российским еще малое время на покаяние, / и сохрани, Господи, малое стадо — Церковь Твою святую, / да не одолеют ей врата ада по обетованию Твоему / и да воспоем хвалу чудным святым Твоим, / ихже кровьми Русская земля освятися / и Церковь утвердися.

И ныне, Богородичен.

На стиховне стихиры зри на велицей вечерни.

Тропарь писан на велицей вечерни.

НА ВЕЛИЦЕЙ ВЕЧЕРНИ

Блажен муж: 1-й антифон.

На Господи, воззвах: стихиры, глас 1.

Подобен: Небесных чинов:

Многажды от юности твоея испыта Господь веру твою, / и николиже кая неправда в тебе обретеся; / скорбь же и радость со благодарением прияла еси от Господа / и воле Его повинулася еси, / и тако от силы в силу возрасла еси.

Сие есть избрание Божие, / сия есть слава святых Его: / иже бо взыскует Господа, того взыскует Господь. / Сего ради изведе тя из земли сродства твоего / и в новом отечестве твоем светом Православия просвети тя, / послежде призва на путь скорбный и многотрудный, / имже шествовавши, достигла еси горних обителей, / идеже любовию упокоевает Господь верных крестной любви Его.

Егда в помазании святем дар Духа Святаго прияла еси, Елисавето, / и к Чаше Божественней со благоговением приступила еси, / тогда напита тя Господь Причастия Своего сладостию неизреченною, / яко чадо новоизбранное церковное. / Бе же день той Лазарева воскрешения память: / в той день призва тя с Собою Господь, грядый на вольную страсть.

Ины стихиры, глас 4:

Егда муж твой от безбожных злодеев убиен бысть, / никакоже возроптала еси на Господа, / но воле Его не обинующися предалася еси, Елисавето; / преподобием же и чистотою славно украсившися, / явилася еси звания Божия скорая послушница / и милосердия Христова усердная подвижница, / и Духа Святаго мудрая стяжательница.

Креста Владычня образ и милость в сердце своем носящи, / убийцу мужа твоего простила еси нелицемерно, / и, восхотевши даже до конца отвергнутися себе, / Богу же и ближним со смирением послужити, / обитель создала еси, в нейже и вселилася еси, / и подвигом добрым Господеви угодила еси.

Два пути и два образа любве ко Господу святии жены Марфа и Мария нам предуказаста: / ова яко Человеку Христу послуживши, / ова же у ног Его седящи и словес Его Божественных послушавши: / ты же сии два во единем служении премудро совокупила еси, Елисавето. / Господь же восхоте еще подвиг мученический на тя возложити, / да венцем славнейшим украсит тя во Царствии Своем.

Ины стихиры, глас 5:

Светлыя седмицы радость и Христова Воскресения торжество / со слезами смесиша сестры святыя обители твоея, / егда на подвиг великий и страшный тя провождаху; / ты же, паче укрепляющися духом, страха человеческаго никако устрашися, / ниже восхотела еси отринути чашу сию или пути крестнаго уклонитися, / но вся претерпела еси, яже от Господа, / да не разлучишися от Него.

Радуйся, Елисавето блаженная, / верная угодница Пресвятыя Троицы, / новая подвигоположнице и мученице, / от безбожников в бездну сброшенная и смерть приимшая, / мзду же на Небесех стяжавшая: / Сам бо Господь упокои тя от трудов твоих и прослави. / Мы же, припадающе, молим тя: / милосердною любовию не остави нас, / буди о душах наших молитвенница / и страны Российския теплая предстательница.

Слава, глас тойже:

Сынове погибельнии, убийцы святых, / восхотеша и самую память твою от Российския земли потребити; / Господь же разори совет злобы их / и сокруши державу хулящих Его. / Мы же, немощнии песнословцы подвига твоего, / величаем тя, прославляем и глаголем: / радуйся, царственная мученице, златовенчанная Елисавето.

И ныне, Богородичен воскресен.

Вход. Прокимен дне и чтения.

Пророчества Исаиина чтение

Тако глаголет Господь: вси языцы собрашася вкупе и соберутся князи от них. Кто возвестит сия в них или яже от начала, кто слышана сотворит вам? Да приведут свидетели своя и оправдятся, и да услышат, и да рекут истину; будите Ми свидетели, и Аз Свидетель, глаголет Господь Бог, и Отрок, Егоже избрах, да познаете и веруете Ми, и разумеете, яко Аз есмь: прежде Мене не бысть ин бог, и по Мне не будет. Аз есмь Бог, и несть разве Мене спасаяй. Аз возвестих и спасох, уничижих, и не бе в вас чуждий. Вы Мне свидетели, и Аз Господь Бог, и еще от начала Аз есмь: и несть от рук Моих избавляли; сотворю, и кто отвратит то? Сице глаголет Господь Бог, избавляяй вас Святый Израилев.

Премудрости Соломони чтение

Праведных души в руце Божией, и не прикоснется их мука; непщевани быша во очесех безумных умрети, и вменися озлобление исход их, и еже от нас шествие — сокрушение; они же суть в мире. Ибо пред лицем человеческим аще и муку приимут, упование их безсмертия исполнено; и, вмале наказани бывше, великими благодетельствовани будут: яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему; яко благодать и милость в преподобных Его, и посещение во избранных Его.

Премудрости Соломони чтение

Праведницы во веки живут, о Господе мзда их, и попечение их у Вышняго: сего ради приимут царствие благолепия и венец доброты от руки Господни, зане десницею покрыет я и мышцею защитит их. Приимет всеоружие — рвение Свое, и вооружит тварь в месть врагом. Облечется в броня правды и возложит шлем — суд нелицемерен. Приимет щит непобедимый — преподобие. Поострит же напрасный гнев во оружие; споборет же с Ним мир на безумныя. Пойдут праволучныя стрелы молниины, и, яко от благокругла лука облаков, на намерение полетят. И от каменометныя ярости исполнь падут грады; вознегодует на них вода морская, реки же потопят я нагло. Сопротив станет им дух силы, и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте; навыкните, судии концев земли. Внушите, держащии множества и гордящиися от народов языков: яко дана от Господа держава вам, и сила от Вышняго.

На литии стихира храма, таже стихира, глас 8:

Богоизбранная преподобномученице Елисавето, / егда буря безбожия на землю русскую найде, рекла еси: / якоже в бури нецыи бегут, инии поражаются, / инем же очи душевнии отверзаются, да видят величие Божие, / тако и в вихре житейстем бывает. / Сердце твое позна в скорбех десницу Божию: / лютое убиение мужа твоего научи тя служити Богу и ближним, / немощным, увечным и оставленным, / со смирением и любовию; / еще же восприяла еси иноческое житие, / и бежати от богоборцев не восхотела еси / без страха приимши мученическую смерть за Христа. / Мы же, почитающе благоуханныя мощи твоя, усердно просим: / моли о чтущих подвиги твоя и страдания.

Глас 4:

Жертвы Богу живопогребенныя, / в кладезеподобный ров низринутыя: / прежде всех Елисавета страстотерпица, / к горним устремленная княгиня милосердная, / бисер Православия в новом отечестве обретшая, / евангельски убийцу мужа своего простившая, / молитвою и благотворением Боту угодившая, / безбожными же не пощажденная. / Помолитеся за нас, святии князие, / помолитеся за всех, преподобнии страстотерпицы, / Елисавето с Варварою верною. / Услышите нас, в веси Гефсиманийстей погребенный, / услышите нас и тии, ихже погребение неведомо, / услышите нас паки, вкупе приятыя во обители небесныя: / святое воинство, моли Бога о нас.

Слава, глас 6:

В Церкви Российстей прославлена бывши, Елисавето, / потщися разделение Церкве нашея умирити любовию: / глаголют бо нецыи друг ко другу: / мы есмы доброе семя, вы же плевелие есте. / Аще пребудем тако, како узнают нас человецы? / Како уверуют, яко Господни есмы ученицы? / Приидите днесь, во единем лице совокупльшеся, воспоим Елисавету преподобномученицу, / с неюже и всех новомучеников российских, / да утвердит Господь Церковь Русскую молитвами их, / да сохранит от расколов и ересей; / священницы ея да облекутся в правду, / архиерее же ея да пребудут право правяще слово Христовы истины, / яко един есть тела церковнаго Глава и Владыка.

И ныне, Богородичен.

На стиховне стихиры, глас 3:

Славою царственною на земли осиянная, / Царство Божие внутрь себе имела еси, Великая княгине Елисавето, / сего ради неложно нареклася еси царственная мученица / и венец многоценный прияла от Царя Славы, Христа, / Емуже соцарствуеши ныне.

Стих: Дивен Бог во святых Своих, / Бог Израилев.

Царство Небесное вблизи нас есть: / царствует бо Господь во святых Своих; / Егоже моли, Елисавето, царственная мученице, / да избавит нас покаянием мучительства демонскаго / и воцарится в душах наших во веки.

Стих: В церквах благословите Бога, / Господа от источник Израилевых.

Господь, приемляй славу от Ангел и свидетельство святых, / да приимет ныне покаяние наше, / моли, царственная мученице Елисавето, / и отвратит гнев Свой праведный от отечества нашего / и милостив пребудет к прославляющим тебе.

Слава, глас 7:

Призри, Елисавето, на предстоящих и молящихся ти / от светлаго чертога, идеже со святыми упокоеваешися: / виждь, аще мнози в нас суть добри и велицы, / или премудри, или крепцы, или праведни? / От четырех бо ветр собрани быхом, / яко ладьи, в бурях моря житейскаго до зела обетшавше; / страстными треволненьми сокрушени кормила наша, / ветрила раздрани насильством сопротивных, / от камений подводных — бесовских прилог — избодени есмы, / вмале не погибохом в пучине, отягчени беззаконьми нашими. / Непотребни есмы, но твоими молитвами помиловани бывше, / покаяние от сердца Господеви приносяще, / молим тя: настави нас на путь праведен, / егоже держащеся, достигнем тихаго и вожделеннаго пристанища, / еже есть Царствие Христово Небесное.

И ныне, Богородичен воскресен.

По Ныне отпущаеши: и Трисвятом
тропарь преподобномученицы дважды и
Богородице Дево: единожды.

Тропарь, глас 1:

Смирением достоинство княжеское сокрывши, / Богомудрая Елисавето, / сугубым служением Марфы и Марии Христа почтила еси, / милосердием, терпением и любовию себе предочистивши, / яко жертва праведная Богу принеслася еси / Мы же, чтуще добродетельное житие и страдания твоя, / яко истинную наставницу усердно просим тя: / святая мученице Великая Княгине Елисавето, / моли Христа Бога / спасти и просветити души наша.

НА УТРЕНИ

На Бог Господь: тропарь преподобномученицы дважды.

Слава, и ныне, Богородичен воскресен.

По первом стихословии седален, глас 2:

Православными догматы просветилася еси, Елисавето, / истины взыскательнице и поборнице, / и научилася еси святых Божиих благоверно чтити, / ихже подвигом премудро поревновавши, / к сонму оному Божественному причтена была еси: / низложила бо еси безсильныя демонския дерзости / и суетную ярость безумных мучителей твоих, / обрела же еси дерзновение благое ко Пресвятей Троице, / и ныне моли со всеми святыми о спасении нашем.

Слава, и ныне, Богородичен:

Богородице, верных Предстательнице и Управительнице благая, / просветила еси душу рабы Твоея Елисаветы, во еже православно чтити Тя / и христолюбию Твоему и человеколюбию присно последовати. / И нас просвети светом славы Сына Твоего.

По втором стихословии седален, глас 6:

От земныя славы скудныя и доброты мимотекущия / восхитила еси богатство славы вечныя, / Елисавето, веры православныя рачительнице, / и звания Божия послушнице, / и милосердия Его подражательнице, / и преславная во святых мученице.

Слава, и ныне, Богородичен:

В Гефсиманийстей веси восхотела еси погребена быти, Пресвятая Дево; / тамо и верная ученица Твоя Елисавета погребена бысть, якоже восхоте, / и мощи ея тамо почивают, ожидающе всеобщаго воскресения.

По полиелеи величание:

Величаем тя, / святая преподобномученице Елисавето, / и чтим честная страдания твоя, / яже за Христа / претерпела еси.

Псалом избранный:

Бог нам прибежище и сила, помощник в скорбех, обретших ны зело:

Седален, глас 7:

Се Господь и Учитель зовет тя, / востани, что спиши безумно, душе моя? / И, не обинующися, поспеши к Нему, / виждь, яко милости твоея ныне требует: / жаждет бо и алчет, и не имать, где главы подклонити; / приими Его аки странна и послужи Ему, / двоякому подвигу святыя Елисаветы последующи; / якоже Марфа, земным подвигом согревающи бедствующия, / якоже Мария, научающися поучении Божественными, / да не вжаждешися николиже прочее / и да не убоишися грядущих искушений и напастей, / Господь бо с тобою и довлеет ти.

Слава, и ныне, Богородичен:

Да отверзет Господь уста песнословцев Твоих, Богоотроковице, / во еже пети Тя непрестанно, / яко земли Российския державную Владычицу / и всему роду нашему Предстательницу.

Степенна, 1-й антифон 4-го гласа.

Прокимен, глас 4: Дивен Бог во святых Своих, / Бог Израилев.

Стих: В церквах благословите Бога, Господа от источник Израилевых.

Всякое дыхание: Евангелие от Матфея, зачало 62.

По 50 псалме стихира, глас 6:

Приидите, людие российстии, / потщимся начало положити подвигу покаяния, / наемницы суще единонадесятаго часа, / да не пребудем прочее праздны, / косняще и лжуще, яко никтоже нас наят, / но да послужим Господеви хотя малое время, / яко делателие благии винограда Его; / аще ли не послужим, всяко вечер близ есть, / воньже искушени будем о делех наших / и мзду восприимем.

Канон Богородицы со ирмосом на 6, глас 8.

И канон преподобномученицы Елисаветы на 8, глас 8.

Песнь 1

Ирмос: Поим Господеви, / проведшему люди Своя сквозе Чермное море, / яко Един славно прославися.

Подаждь, Господи, души моей просвещение / и уста моя недостойная отверзи, / да воспою угодницу Твою, преподобномученицу Елисавету, / в нейже имя Твое святое славно прославися.

Чадо Господне возлюбленное, чудная Елисавето, / вкупе с телесною красотою и величием княжеским / духовною добротою украсилася еси приумноживши данный тебе от Бога талант / и себе яко дар Тому принесши.

Отечество и сродников оставила еси / и в новом отечестве, светом православныя веры просветившися, / Богу и людем любовию и милосердием послужила еси / и мучение от безбожных претерпела еси. / Сего ради прослави тя Господь и Небеснаго Отечества наследницу показа.

Богородичен: Воспоим славу Пресвятей Деве Богородице, / приведошася бо Царю Христу вслед Ея девы и жены, / с ними же и святая преподобномученица Елисавета, / небеснаго чертога жительница / и Господни трапезы брачныя причастница.

Песнь 3

Ирмос: Ты еси утверждение / притекающих к Тебе, Господи, / Ты еси свет омраченных, / и поет Тя дух мой.

Все упование твое на Господа возложила еси, / и Той утверждение тебе бысть, / Елисавето многострадальная, / егда честныя останки мужа твоего своима рукама собираше, / не ожесточила еси сердца твоего, / ниже отчаянию предалася еси, / но милостивно безбожнаго убийцу простила еси, / теплую молитву Господеви возносящи.

Красоту мира сего и сладость презревши, Богомудрая, / постническаго жития восхотела еси, / и обитель основала еси, / в нейже себе от утех мира сокрывши, / милосердием твоим мира не оставила еси / и страждущим добре послужила еси.

Христа Подвигоположника / пред мысленным взором всегда имевши, мученице, / Тому последовала еси не обинующися / и крест свой понесла еси, / себе отвергающися, ближним же послуживши, / и в послушании воле Господней пребыла еси даже до смерти, / юже мужественно приявши, / Господом укрепляемая, / за мучителей молилася еси.

Богородичен: О Пресвятая Мати Дево! / Светом Сына Твоего Божественнаго / омраченную грехми душу мою милостивно просвети / и теплотою молитв Твоих растопи лед жестокосердия моего / и укрепи мене, / да последую узким путем ко спасению, / наставницу имея преподобномученицу Елисавету.

Седален, глас 5:

От юности Господа возлюбивши, / Тому поработала еси, блаженная Елисавето, / и явилася еси яко почва плодородная, / на нюже доброе семя Православия всеяно бывше, сторичный плод принесе. / Сего ради буди нам ходатаица / и умоли Создателя безплодие сердец наших разрешити, / да принесем и мы Ему службу трудом и молитвою, / наипаче же любовию и смирением. / Аще же призовет нас Господь на подвиг исповедничества / и страданий за веру, / помолися за нас, во еже не отринути нам чашу сию, / но все до конца претерпети, / и тако краткою стезею Царства Небеснаго достигнути.

Слава, и ныне, Богородичен:

Не замедли, Пресвятая Богородице, / молитву Твою Богу принести о Российстей земли и о людех ея. / Погибаем бо от множества прегрешений и вопием Ти: / Ты еси управительница и Споручница / всех, упование на Тя возложивших.

Песнь 4

Ирмос: Услышах, Господи, / смотрения Твоего таинство, / разумех дела Твоя / и прославих Твое Божество.

Якоже Марфа, послужила еси Господеви, / преподобномученице Елисавето, / в малых сих и убогих, и недужных, и падших образ Его прозревши. / Научи и мене в ближнем моем Владыку Христа почитати / и Ему послужити.

Благую часть, о Елисавето, избрала еси, / уподобившися Марии, / и все помышление твое ко Господу простерла еси, / непрестанно молящися и во словесех Его поучающися, / и воле Его, сиречь промышлению благому, себе предала еси.

Помолитеся Господеви о нас, / святыя жены Марфо и Марие / с преподобномученицею Елисаветою, / яже, яко добрая наставница, / не токмо сама стезею подвига сугубаго пройде / и земли кротких достиже, / но и иных на оный спасительный путь привлече. / О святая Елисавето, / приими и нас яко учеников твоих / и на стезю спасения настави.

Богородичен: Блажено чрево Твое, Пренепорочная, / носившее Зиждителя всех, / Тобою к нам снизшедшаго, / и блажени людие, Тобою к Нему притекшия. / Сего блаженства причастники и нас сотвори, / Тебе присно прославляющих.

Песнь 5

Ирмос: Утренююще вопием Ти, / Господи, спаси ны: / Ты бо еси Бог наш, / разве Тебе иного не вемы.

Неизреченным смотрением Господним / горькия воды страдания причастившися, / сладость Духа Божественнаго в сердце своем обрела еси, / да не вжаждешися во веки / и да напоиши нас немощных водою живою любве и милости, / яже истече из твоего сердца.

Воля Господня во святых Его совершается: / ходят бо неотступно по стопам заповедей Его. / Такожде и ты, о преподобномученице, / всю себе Господеви предавши, / радость, вкупе же и скорбь от Того с благодарением прияла еси / и послужила еси Ему, подвизающися благочестно. / Научи и мене достойно Господу послужити / и в послушании воле Его пребыти, / да не будет мне иго Его благое в скорбь / и бремя Его легкое в тягость, / но да утвердится и упокоится в Нем сердце мое.

Помолися о мне, преподобномученице, / да будут молитвы твоя врачевством многоболезненной души моей, / недугующей грехми. / Никтоже бо просящий отыде от тебе без помощи и утешения.

Богородичен: Дерзновения не имам / просити у Господа отпущения грехов моих; / сего ради к Тебе, Владычице, припадаю, / преклонив колена души и телесе. / Тебе вверяю немощное моление мое, / да принесеши его ко престолу Всевышняго / и да приемлю Тобою от Него спасение, радость и мир.

Песнь 6

Ирмос: Ризу мне подаждъ светлу, / одеяйся светом яко ризою, / многомилостиве Христе Боже наш.

К кому прибегну в нищете моей, / аще не к тебе, святая преподобномученице Елисавето? / Обнажися душа моя от всякия добродетели, / уязвися от прилогов вражиих. / Но вем нищелюбие твое, / яко николиже отринула еси просящаго: / аще ли убог, и аще и грешен, аще и злое сердце име. / Тако и мене недостойнаго и уничиженнаго не отжени, / но помолися Господеви о исправлении жития моего.

Да не будет мне в осуждение молитвословие сие, / из глубины зол моих возносимое: / хотят бо сомкнутися надо мною волны моря житейскаго, / и пути благаго не вем. / Но ты помолися о мне, святая Елисавето, / хотящи мене спасти и на стезю правую наставити. / Ты бо и прежде, никем не гнушающися и к немощем грешных снисходящи, / многим путь ко спасению показа.

Приими мене с любовию, милостивая Елисавето, / якоже и всегда принимала еси подобных мне больных и сирых, / и крепостию оскудевших. / Утоли глад и жажду, / исцели болезни души моея и, присно ко Христу молящися, / испроси мне у Него еже потребно ко спасению.

Богородичен: Богородице Дево, / радости Виновнаго рождшая, / просвети радостию Твоею сердце мое, / помраченное страстьми многими, / тьмою уныния плененное, / лютым разслаблением недугующее. / Омый скверну души моея и подаждь ми светлую одежду, / в нейже представ ко Господу, не изгнан буду из чертога брачнаго.

Кондак, глас 2:

Величие подвига веры кто повесть: / во глубине земли, яко в раи светлости, / страстотерпица Великая княгиня Елисавета / со Ангелы во псалмех и пениих радовашеся / и, убиение претерпевающи, / о безбожных мучителех взываше: / Господи, прости им грех сей, / не ведят бо, что творят. / Тоя молитвами, Христе Боже, / помилуй и спаси души наша.

Икос:

Прежде кончины убиение претерпела еси, Елисавето мученице, егда убийца мужа твоего порази неисцельною раною душу твою, и тако для радостей мира сего умерши, воскресла еси, якоже древле Тавифа, во еже немощным послужити. Сему же подвигу радости нескончаемыя причастившися, напитала еси душу свою светом Божественный любве; сего ради не убоялася еси мучителей, убивающих тело, егоже разрешившися, душею востекла еси ко Господу, Егоже моли помиловати и спасти души наша.

Песнь 7

Ирмос: Отроцы еврейстии в пещи / попраша пламень дерзновенно, / и на росу огнь преложиша, вопиюще: / благословен еси, Господи Боже, во веки.

Согрешихом, беззаконновахом, / — взывают ко Господу российстии народи, / — отступихом от Тебе, якоже древле Израиль. / Сего ради оставлени быхом ходити в воле нашей и ныне наказание терпим. / Но молитвами святыя преподобномученицы Елисаветы / и всех новомученик Твоих, / умилосердися, Господи, / пощади нас и вразуми, / да обратимся и покаемся от злых дел наших, / и хвалу Тебе воспоем во веки.

Се суд Божий над отечеством нашим: / терние бо ненависти и волчцы безверия / произведе нам Русская земля; / еще же и плевелами ересей засеяна бысть от врага. / Сохрани, Господи, молитвами всехвальныя Елисаветы и всех новомучеников / благочестия добрыя злаки, / да не подавлени будут от терния, / ниже смесятся с плевелами, / но да возрастут и умножатся, / и да вопиют людие российстии: / благословен еси, Господи Боже, во веки.

Имамы ли надежду на спасение, / рцы нам, о преподобномученице Елисавето? / Не всуе ли моление наше? / Не сынове ли есмы избивших пророки? / Ни, но твои чада по духу есмы. / Ты же мати наша еси и наставница, / на твои молитвы надеемся и с тобою воспеваем Господеви во веки.

Богородичен: Радуйся, многострадальная Русская земле: / Божия бо Матерь покров Свой святый над тобою распростре / и молится о тебе неусыпно / со всеми новрмученики российскими, / во еже спастися всем чтущим Ю / и прославляющим во веки.

Песнь 8

Ирмос: Седмерицею пещь / халдейский мучитель / богочестивым неистовно разжже; / силою же лучшею спасены сия видев, / Творцу и Избавителю вопияше: / отроцы, благословите, / священницы, воспойте, / людие, превозносите во вся веки.

Егда убиваема была еси, / о преподобномученице, / не поколебася вера твоя и милосердие не оскуде. / В час бо предсмертнаго твоего борения / не оставила еси служения страждущим / и к Богу взывала еси, вопиющи: / благословите, людие, Господа, / и превозносите Его во веки.

Якоже древле, Господи, мученицы Твои / свидетелие веры в мире безбожном быша, / тако и святая преподобномученица Елисавета / веру свою от дел своих явила и смертию запечатлела есть, / и многия русския люди научила Тебе воспевати во веки.

Покажи Мне веру твою и любовь от дел твоих, / — взывает ко мне Господь, / — и не имам, что отвещати, / есмь бо яко древо безплодное, и несть мне оправдания. / Но смирися пред Господем душа моя и волю Его творити восхоте. / Укрепи мене, Елисавето, на подвиг сей, / да не отступит от мене благое сие произволение. / и да вопию присно: / отроцы, благословите, / священницы, воспойте, / людие, превозносите во вся веки.

Богородичен: Аще не имам любве, / есмь, якоже рече Апостол, медь звенящая и кимвал звяцаяй. / Смутися сердце мое от слов сих, / зане о мне речени суть. / Еще мало, и погибну во оскудении моем. / Но покрый, Всебогатая Богородице, милосердием Твоим скудость мою, / и спаси мя, превозносящаго Господа во веки.

Песнь 9

Ирмос: Ужасеся о сем небо, / и земли удивишася концы, / яко Бог явися человеком плотски, / и чрево Твое быстъ пространнейшее Небес: / тем Тя, Богородицу, / Ангелов и человек чиноначалия величают.

Восплакася душа моя, / яко видех землю Русскую кровьми святых Божиих обагренную. / Господь мой благ есть: како попусти сие? / Не плачися, о душе, / молися святой преподобномученице Елисавете / и разумей смотрение Божие: / Той бо мучеников Своих зело возлюби / и дерзновение им дарова / молитися о нас грешных.

Не ведомы нам судьбы Твоя, Боже: / что еще будет с нами в жизни сей, / киими путями хощеши нас ко спасению привести? / Но даждь нам волю Твою без смущения и ропота прияти / и добрым подвигом подвизатися, / и Царства Небеснаго достигнут, / идеже угодницы Твоя собраны суть, / с нимиже и преподобномученица Елисавета, / юже ныне прославляем.

Мощи твоя святыя / во Святей земли почивают, Елисавето, / душею же присно Господу предстоиши в Горнем Царстве Его / и молишися дерзновенно о всех людех, / наипаче же о прославляющих тя и подвигу твоему подражающих, / к ним же сподобит приблизити Господь и нас недостойных.

Богородичен: Се суд близ есть; / не попусти, Господи, поползновения стопам нашим, / не даждь уклонитися во зло, ниже в леность, / отжени от душ наших смущение и сомнение, / да не погибнем яко беззаконнии, / но да спасемся со святыми, / молитвами Пречистыя Твоея Матере / и святыя угодницы Твоея княгини Елисаветы.

Светилен:

Что сие бысть? / Лютая ли погибель или веры православныя торжество? / Иже херувимы образуюше тайно, / Господа в сердцах своих носили есте, / святии мученицы алапаевстии, / к Немуже и преставилися есте, / имуще на устех Херувимскую песнь. / Како забуду воспети страданий ваших? / В род и род память ваша, Богоноснии, / и во веки благодарение наше ко Господу, / Иже дивен есть во святых Своих.

Слава, и ныне, Богородичен:

Премудрость Ипостасную / и Слово Пресущное, / и врача душ и телес Рождшая, / гноения и раны души моея исцели лютыя и временныя, / и сердца моего устави болезнь, Дево.

На хвалитех стихиры, глас 8.

Подобен: О, преславнаго чудесе:

О, дивных твоих словес, / Богомудрая Елисавето, / о великия печали твоея, / яже по Российстей земли! / Уподобила бо еси народ наш недужному младенцу, / егоже паче любиши, нежели егда здрав есть и весел. / Сего ради восхотела еси страдания его понести / и стезею мучения доблественно прошла еси, / да приимеши дерзновение молитися о спасении его.

О, неложнаго твоего прозрения! / Великия России видевши безславное разрушение, / не устрашилася еси годины грозныя, / но величие Божия смотрения познала еси. / Святая Русь, рекла еси, не может погибнути, / ниже врата адовы Церкви Православной возмогут одолети, / но возсияет в душах верных свет аки солнечный, / иже тьму просветит.

О, преславнаго чудесе! / В бедах же и страданиих / милость Божия яве познается / и радость духовная ясно является, / рече княгиня: Господь, Иже наказует, Тойже есть, Иже и любит; / сего ради паки рече ко Господу: / да будет воля Твоя.

О, Божественнаго желания, / о твердаго на Господа упования! / Всю себе любви Божией предала еси, / преславная Елисавето. / Сего соуза никакоже возмогоша разорити / ни скорбь, ни теснота, ни гонение, ниже смерть. / Но престави Господь угодницу Свою к жизни вечней / и к радости неизреченней, / юже уготова любящим Его.

Слава, глас тойже:

Людие российскии неразумнии! / Чесо ради отвергли есте любящих вас? / Чесо ради словес Божиих не послушали есте? / Не прикасайтеся, рече, помазанным Моим. / Иго Божие легкое отринули есте, / яко неудобь носимо, / врагом же вашим поработилися есте, / иже вовлекоша вы во тьму беззаконий и бед. / Того ли восхотели есте, людие? / Но не плачитеся ныне, яко не имущия надежды: / се, тии, ихже отверглися есте, / не отвергошася вас, / но молятся ко Господу еже исходатайствовати вам спасение.

И ныне, Богородичен:

Владычице, приими молитвы раб Твоих / и избави нас / от всякия нужды и печали.

НА ЛИТУРГИИ

Блаженна от канона, песни 3 и 6.

Прокимен, глас 4: Дивен Бог во святых Своих, / Бог Израилев.

Стих: В церквах благословите Бога, Господа от источник Израилевых.

Апостол к Коринфяном, зачало 181.

Аллилуия, глас 1: Терпя потерпех Господа, и внят ми, и услыша молитву мою.

Стих: И постави на камени нозе мои, и исправи стопы моя.

Евангелие от Марка, зачало 21.

Причастен: В память вечную будет праведник, от слуха зла не убоится.

Система Orphus