Православный Календарь » Кирилл (Смирнов), Казанский » Служба священномученику Кириллу (Смирнову), епископу Казанскому

Богослужения

Служба священномученику Кириллу (Смирнову), епископу Казанскому

На Го́споди воззва́х, стихи́ры, глас 1:

Богому́дре блаже́нне, Кири́лле, / очервле́ньми твоея́ кро́ве, свяще́нную твою́ оде́жду украси́л еси́: / от си́лы бо благоче́стну в си́лу, / и от сла́вы в сла́ву боже́ственную ра́дуяся преше́л еси́, / и ны́не моли́ся, дарова́ти душа́м на́шим // мир и ве́лию ми́лость.

Же́ртву пе́рвее Бо́гу принося́ безкро́вную, / я́ко свяще́нник зако́ннейший, богоглаго́ливе всече́стне, / по́слежде я́ко всепло́дие и прия́тну же́ртву, / тебе́ сама́го кро́вию, я́ко му́ченик и́стиннейший, / Христу́ прине́сл еси́, // его́же моли́ о пою́щих тя.

Му́ченик во́инства, / Христу́ о́тче, приве́л еси́ уче́нии твои́ми и наказа́нии, / уча́ и наказу́я, / и я́ве о́браз богому́дре, тебе́ сама́го предлага́я. / С ни́миже моли́ся, дарова́ти душа́м на́шим // мир и ве́лию ми́лость.

Слава, глас 6:

Свяще́нник зако́ннейший, / да́же до кончи́ны твоея́ был еси, блаже́нне Кири́лле / священноде́йствуя бо боже́ственная и неизглаго́ланная та́инства, / кровь твою́ излия́л еси́ за Христа́ Бо́га, / и же́ртву благоприя́тную себе́ приве́л еси́. / Тем дерзнове́ние име́я к Нему́, / приле́жно моли́ся о ве́рою и любо́вию соверша́ющих твою́ пречестну́ю па́мять, / и почита́ющим сию́ изба́витися напа́стей // и вся́ких бед и обстоя́ний.

И ныне, глас тойже:

Кто Тебе́ не ублажи́т, Пресвята́я Де́во; / кто ли не воспое́т Твоего́ Пречи́стаго Рождества́; / безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог Сый, / и естество́м быв Челове́к нас ра́ди; / не во двою́ лицу́ разделя́емый, / но во двою́ естеству́ / несли́тно познава́емый. / Того́ моли́, Чи́стая Всеблаже́нная, // поми́ловатися душа́м на́шим.

На стихо́вне стихи́ры, глас 6:

Кро́вию обагри́в твою́ свяще́нную оде́жду, / вшел еси́ во свята́я святы́х, / свят ты быв Кири́лле сла́вне, / и я́ве всегда́ наслажда́яйся обоже́ния, / украша́ем и муче́нием сия́я, / и а́нгел показу́яся чисте́йшим причаще́нии. / Тем тя чтим, и любо́вию пра́зднуем // твое́ свяще́ннейшее торжество́ достоблаже́нне.

Стих: Пра́ведник я́ко фи́никс процвете́т, // и я́ко кедр, и́же в Лива́не умно́жится.

Желе́зом око́ван, непреткнове́нно стезю́ ше́ствовал еси́, преподо́бне, / к небе́сному гра́ду веду́щую, / честны́ми твои́ми ра́нами, Кири́лле, всему́дре, / я́коже у́тварию обложе́н. / В него́же вшед я́ко победи́тель и́стиннейший / и му́ченик непобеди́м, и священноде́йственник свяще́ннейший, / пое́ши со а́нгелы песнопе́ние боже́ственное чи́сто: // Свят, Свят, Свят, Тро́ице Единосу́щная.

Стих: Насажде́ни в дому́ Госпо́дни, // во дво́рех Бо́га на́шего процвету́т.

Восхо́дный степе́нь Це́рковь стяжа́, / свяще́нныя твоя́ по́двиги, священному́чениче Кири́лле, / ю́же и храни́ши незы́блему и ненаве́тну от волко́в держа́вных, / пропове́дающую до́блести твоя́, и велича́ющую твоя́ страда́ния, // я́же за Христа́ зако́нно пострада́л еси́ блаже́нне.

Слава, глас 4:

В це́рковь небе́сную свяще́нно вшел еси́, / свяще́нно облива́ем, блаже́нне, кро́вию, / и Тро́ице предстои́ши, / бога́тно сия́я отту́ду блиста́нии истека́ющими, пребога́те. / Те́мже днесь, Кири́лле, твою́ па́мять светоно́сную соверша́юще, // чу́ствия души́ просвеща́ем.

Тропарь, глас 5:

Я́коже со́лнце светоза́рное, / возсия́ днесь па́мять твоя́ святи́телю и испове́дниче, Кири́лле, / луча́ми благода́ти озаря́я ве́рных сердца́, / к прославле́нию ди́внаго во святы́х свои́х Бо́га, / дарова́вшего тебе́ кре́пость во испове́дании и терпе́ние в ско́рбех, / не премолчи́ о нас, уго́дниче Христо́в, / и изба́ви нас от вся́каго зла, / Це́рковь Ру́сскую сохрани́ от раздо́ров и нестрое́ний, / мир ми́рови испроси́ // и душа́м на́шим ве́лию ми́лость.

СЛАВА: И НЫНЕ:

Кондак, глас 3:

Столп и же́ртва Це́ркве Христо́вы о́тче быв, / сию́ непоколеби́му от искуше́ний лука́вого прему́дро соблю́л еси́, / и ко́зни вра́жия тве́рдым умо́м разори́л еси́, / и еди́ною Це́рковь апо́стольскую пропове́дал еси́, / Кири́лле блаже́нне, святи́телей Росси́йских похвало́, // моли́ спасти́ся душа́м на́шим.

На хвалитех стихиры, глас 4:

Благода́ть духо́вная, Кири́лле, о́тче / тебе́ возсия́вши, све́тло просвети́ тя: / отсю́ду ума́ли страстну́ю нощь, и безсра́стия день пости́же, / чи́сте чисте́йшему све́ту совоку́плься. / О не́мже жи́тельствуя, не забу́ди богогла́се священному́чениче, // ве́рою пою́щих па́мять твою́.

Благода́ть жела́нную, священному́чениче Кири́лле, / нося́ небе́сную, земны́я же небре́гл еси́: / сего́ ра́ди я́ко безпло́ден, страда́льческое избра́л еси́ житие́, / я́ко присносу́щнаго пото́ка пи́щи, / благонаслади́тися хотя благоприя́тне, / и слеза́ми изсуши́л еси́, му́тный исто́чник страсте́й, // и напои́л еси́ душепи́щные кла́сы.

Слава, глас 4:

Нов сад я́коже ма́слина, / на Бо́жией трапе́зе положи́лся еси́, / я́ко сын ходя́щих по пути́ Госпо́дню: / муче́ния ра́ди благослови́ тя Госпо́дь, / и у́зриши блага́я вы́шняго Сио́на, / наслажда́лся Боже́ственнаго ра́дования со все́ми, / священному́чениче Кири́лле, достойнопе́тый: // и́мже о́бщники нас бы́ти мольба́ми твои́ми сотвори́.

И ныне, глас тойже:

Богоро́дице всех Цари́це, / правосла́вных похвало́, / ерети́чествующих шата́ния разори́, и ли́ца их посрами́, / не кла́няющихся ниже́ чту́щих Пречи́стая, // честны́й Твой о́браз.

Система Orphus