Православный Календарь » Служба Пресвятой Владычице Богородице в честь иконы Ее, именуемой «Табынская»

Богослужения

Служба Пресвятой Владычице Богородице в честь иконы Ее, именуемой «Табынская»

На Велицей Вечерни в 9-ую Пятницу по Пасце.

Блажен муж: 1-й антифон.

На Господи воззвах: стихиры на 8, глас 4.

Высшую небес / прославим в песнех Богородицу, / всех язык вернии соберитеся, / в дом Божия Матере внидем, / и узрим образ древле явленныя иконы Ея, / и от источник сланых и пресных окропление приимем, / и чудотворней иконе поклонимся, / прощение прегрешений наших просяще, / мира мирови и милости.

Востани Владычице, / побори борющия ны, / презирая греси наша, / горькаго неверия рабы Твоя свободи, / да востанем гласы православными, / честную Твою Табынскую икону преднесем, / всяк бо град и весь торжетсвует / и обретает Тобою, Владычице, спасение, / и мы во умилении поклоняемся и вопием, / спаси ны Пречистая.

Ныне печаль преста, / ныне радость процвете / Источниче бо жизни, Чистая, / лечбою милосердия исцеляеши, / лютыя болезни свобождаеши, / зной и вар орошаеши, / расслабленныя укрепляеши, хромыя воставляеши, / слепыя исцеляеши, / тем же хвалим Тя. / Радуйся, Владычице, Господь с Тобою. /

Яко крин благоухаяй, / явися икона Твоя иноком честным, / дарующи Вознесенстей обители покров и заступление, / и на вратех яко Вратарница возсияла еси, / чудесы Своими осиявши грады Уфу и Казань, / темже паки прииди к нам Госпоже, / веселием сердца наша исполняющи.

Глас 5-ый: 

Яже от агарян поругание прияла еси, / слепотою очес на покаяние тех подвигла еси, / даровавши прозрение, / послежде един от них в подвизех просия, / хождением во след иконы Твоея честныя, / и в мраз и вар, и в день и нощь, / славословие творя Пречистей. /

Не престанем величати Тя, о Мати! / яве бо избираеши Уральский предел, / именующися Табынская, / идеже хощеши просветити заблуждшия, / возношающи смиренныя, напояющи алчущия, / низлагающи сильныя, расточающи гордыя, / и шествием Своим на подвиг веры нас подвизающи, / и тем весело спасаеши, / чествующих Тя, Владычице. / (Дважды).

Беззаконии людие в молве горькаго неверия, / наводниша враждою святую Русь, / оскверниша святыни христианския, / и убиша избранныя Твоя, / такожде икона Твоя Табынская / нуждею изыде от пределов страны Российския, / и послежде дивный Свой образ сокры, / благодать же Свою на источники преложи, / но паки явися нам молящим Ти ся /.

Слава, и ныне, глас тойже:

Непроходимая врата, / животворная вода, / заря присносиятельная, / во тьме негасимая лампада, / Се божественная гора добродетелей, / Богородица просия в мире. / Изсуши Пречистая мутныя реки струями умиления, / осени ны озноены, / приими наша моления, / и принеси Твоему Сыну и Богу, / да спасет Тобою души наша. /

Вход. Прокимен дне.

Бытия чтение (глава 28):

Изыде Иаков от студенца клятвеннаго и иде в Харрань./ И обрете место, и спа тамо: зайде бо солнце,/ и взят от камения места того, и положи возглавие себе, и спа на месте оном./ И сон виде./ И се лествица, утверждена на земли, еяже глава досязаше до небес,/ и Ангели Божии восхождаху и низхождаху по ней./ Господь же утверждашеся на ней и рече:/ Аз Бог Авраамов, отца твоего, и Бог Исааков, не бойся:/ земля, идеже ты спиши на ней, тебе дам ю и семени твоему./ И будет семя твое, яко песок земный, и распространится на море, и ливу, и север, и на востоки:/ и возблагословятся о тебе вся колена земная и о семени твоем./ И се Аз с тобою, сохраняяй тя на всяком пути, аможе аще пойдеши./ И возвращу тя в землю сию, яко не имам тебе оставити, дондеже сотворити Ми вся, елика глаголах тебе./ И воста Иаков от сна своего, и рече:/ яко есть Господь на месте сем, аз же не ведех./ И убояся, и рече: яко страшно место сие;/ несть сие, но дом Божий, и сия врата Небесная.

Пророчества Иезекиилева чтение (главы 43 и 44):

Тако глаголет Господь:/ будет от дне осмаго и прочее, сотворят иереи на олтари всесожжения вашего/ и яже спасения вашего,/ и приму вы, глаголет Адонаи Господь./ И обрати мя на путь врат святых внешних,/ зрящих на востоки, и сия бяху затворена./ И рече Господь ко мне:/ врата сия затворена будут и не отверзутся,/ и никтоже пройдет сквозе их;/ яко Господь Бог Израилев пройдет ими, и будут затворена./ Яко Игумен сядет в них снести хлеб,/ по пути Еламских врат внидет и по пути его изыдет./ И введе мя по пути врат святых, сущих к северу, прямо храму,/ и видех, и се исполнь славы храм Господень.

Притчей чтение (глава 9):

Премудрость созда Себе дом и утверди столпов седмь./ Закла Своя жертвенная, и раствори в чаши Своей вино,/ и уготова Свою трапезу./ Посла Своя рабы, созывающи с высоким проповеданием на чашу, глаголющи:/ Иже есть безумен, да уклонится ко Мне./ И требующим ума рече:/ Приидите, ядите Мой хлеб и пийте вино, еже растворих вам./ Оставите безумие и живи будете,/ и взыщите разума, да поживете,/ и исправите разум в ведении./ Наказуяй злыя приимет себе безчестие,/ обличаяй же нечестиваго опорочит себе:/ обличения бо нечестивому раны ему./ Не обличай злых, да не возненавидят тебе./ Обличай премудра, и возлюбит тя./ Даждь премудрому вину, и премудрший будет./ Сказуй праведному, и приложит приимати./ Начало премудрости страх Господень и совет святых разум:/ разумети бо закон помысла есть благаго./ Сим бо образом многое поживеши время,/ и приложатся тебе лета живота.

На литии, глас 5. 

Наста день праздника Твоего Пречистая, / наста нашея радости пресветлый день, / приидите, молящихся лицы, / приидите, вси вернии людие, / воспоим от чистаго сердца Матерь Божию, / и чудеса Ея у горы Табынския / явленная прославим. /

Велия чудес слава, / от источник Твоих, Богородице, / источник Тя показующи вся благая вреющий, / обилие же исцелений, / благодеяния источающий всем независтно, / требующим крепости душам и здравия телесем, / сланою водою сладкия благодати. /

Аки Синай и Фавор, / ублажаем гору Табынскую, / аки Влахернскую церковь, / чтим зде стоящий храм Владычицы, / зане явлением Твоим / место сие прославися. /

Слава, и ныне, глас 2.

Небесная врата и Споручница спасения нашего, / и веры православныя утверждение / Ты еси Богородице Пречистая, / Твоего убо предстательства чающе, / во един молитвенный лик снидохомся, раби Твои, / и подножию ног Твоих покланяемся, / просяще просвещения и спасения душам нашим. /

На стиховне стихиры, глас 1.

Умиление сердец и о гресех покаяние, / днесь возносится ко престолу Пречистыя Девы, / Та бо ныне молит Христа Бога.

Стих: Слыши, Дщи, и виждь, // и приклони ухо Твое.

Вси роди Тя радостно ублажают, / величают источник божественный, / темже веселящеся христоименитии вопиют: / благословенна Ты в женах / и благословен Плод чрева Твоего.

Стих: Лицу твоему помолятся // богатии людстии.

Воистину блаженно чрево носившее Тя, Господи, / и сосца яже еси ссал, / нам же совершающим празднество Твоея Пречистыя Матере, / младенцем сущим в вере, / вместити благодать Твою помози, / да и мы совершающе хвалу, / источника сего причастимся.

Слава, и ныне, глас 5.

Радуйся Источниче, / присно источаяй сладость исцелений, / всем притекающим верою ко храму Твоему Владычице, / Мати Христа Бога, / подающая мирови велию милость.

Тропарь, глас 4:

Наста днесь пресветлый праздник, / Пречистая Дево, / честныя Твоея Табынския иконы, Владычице, / яже паче лучей солнечных возсия, / от источника приснотекущаго / Христа Бога нашего, / источаеши целебныя дары, / с верою к Тебе притекающим. / Тя бо Христос помощницу людем Своим дарова, / покрывати и спасати от всякия беды рабы Своя, / Едину Благословенную. /

На утрени. 

На Бог Господь: тропарь Богородицы, трижды. 

По 1-м стихословии седален, глас 3.

Людие благочестивии, правовернии собори христоименитии, приступите верно вси, Божественному припадающе Божия Матери образу: Та бо исцеление болящим радостно подает, уязвляет же злословныя, яко стрела от лука, нас всех веселит световидно и благодатию озаряет молитвами Своими.

Слава, и ныне, глас тойже:

Всю Тя Бог освяти, Деву Добрую и Непорочную в женах, пророки прообразив честно, иереи благословив, во святая святых всели, Ангелом воспита, с Небесе пищу хлеб подая. Сам же Преблагий, Единородное Бог Слово вселися в Тя и плотию пройде из Тебе. Темже Ти поклоняемся и чтим, яко воистинну сущую Богородицу.

По 2-м стихословии седален, глас 4.

Гору мысленную, добродетелей сень, духом древле Аввакум боговидно Тя усмотрев очима и проповедаше Пречистая. Тобою бо Бог в мир прииде во спасение наше и обновление.

Слава:

Гору Тя велию несекомую Даниил духом виде, являя чистоту девства Твоего, Владычице, от неяже камень отсечеся Бог Слово, лести низлагая идольския.

И ныне:

Гору, Тя Давид чудну и тучну пронарече, Единородный бо Сын благоволи вселитися в Тя Чистая от Отца. Тем Ти, радуйся, духом зовем.

По полиелеи седален, глас1.

Правоверно чтущия Тя, к Табынстей иконе прибегающия и сему чудодейственному образу любезно покланяющияся, о Божия Мати, спаси и не даждь в расхищение сопостатом, ниже найдут на ны вся злая, яже грехи наша уготоваша нам, ниже беззакония наша превзыдут на главы наша, но да Твоя матерняя к Богу преодолеет за ны Богоприятная молитва.

Слава, и ныне:

Явленная Твоя икона, Богородице Дево, врачество есть всему миру духовное, к ней же прибегающе, Тебе покланяемся и почитаем, и лобызаем, и чтим, исцелений благодать почерпающе от Нея, и недуг телесных, и душевных страстей Твоими молитвами свобождаемся.

Степенна, 1-й антифон 4 – го гласа. 

Прокимен, глас 4: Помяну имя Твое // во всяком роде и роде.

Стих: Слыши, Дщи, и виждь, и приклони ухо Твое.

Всякое дыхание:

Евангелие от Луки, зачало 4.

По 50-м псалме стихира, глас 4: Непроходимая врата: Писана на велицей вечерни на Господи, воззвах: славник (зри страницу 2).

Канон Богородицы на 8, глас 4.

Песнь 1.

Ирмос: Отверзу уста моя, / и наполнятся духа, / и слово отрыгну Царице Матери, / и явлюся светло торжествуя, // и воспою, радуяся, Тоя чудеса.

Радости исполнишася вси концы Уральския земли, Пресвятая Дево. Во спасение бо наше икону Свою явила еси и рекла еси: да потщится братия богоспасаемыя обители сея прияти Мя во храм Господа Моего. Нас же не остави убогих и да приимем образ Твой святый в храмы сердец наших, вопиюще: Радуйся Благодатная.

Амвросий чернец мимоходя источника, услыша чудныя глаголы Твоя Богородице, но яко Адам иногда согрешив, от гласа Твоего побеже. Нас же молитв Твоих не отрини Всепетая.

Во он день паки инок сей шед путем тем третицею услыша под сению древес источника глаголы Твоя: прииди и виждь, и абие обрете на камени велием икону Твою Богородице. Нас же сподоби сея радости причастники быти имущих Тя пред Богом Ходатаицу.

Удивишася братия Вознесенския обители явлению Твоему Пресвятая Дево, со тщанием собрашася вкупе, последовавше Амвросию и узревше древле писанную икону Твою Богородице с радостию воспеша ко Господу, ублажающе Тя Матерь Божию. Мы же, тояжде творяще во бдении сем, да получим от Бога милости и похвалу Твою Владычице.

Велие чудо бысть во обители яко заутра икона обретеся во вратех. Познавше о сем волю Твою Пречистая, аки Вратарницу прославляху Тя и храмину семо создаша. Нас же яко юродивых дев не отрини, да обрящемся во вратех рая вожделеннаго, выну поюще Господеви: Аллилуия.

Вкупе собрашася братия, песнь Ти воспеша и поведаша вся бывшая воеводе Уфимскому и архиерею града Казани. Той же познав чудеса Твоя, Владычице, повеле чтити Тя соборне. Тако и мы ныне веселимся божественне и в радости воспеваем Тя.

Слава, и ныне:

Паче злата всякаго блистающи, и утра солнечнаго светлейши, радуйся Вратарница, жилище Христово, радуйся Одигитрие, радуйся Девице, радуйся Невесто Неневестная.

Песнь 3.

Ирмос: Твоя песнословцы, Богородице, / живый и независтный источниче, / лик себе совокупльшия, духовно утверди, / в Божественней Твоей славе // венцев славы сподоби.

Буря крамолы разори пустынь Твою Богородительнице, но Ты Чистая подвигнула еси честнаго игумена Евфимия, да укрепит братию на муки смертныя. Нам же стояние пустыни сей образ бысть духа крепости и терпения, да и мы воздвигнем гласы своя чистую веру поюще, православную.

Егда старец Иона возжела паки созиждити обитель Твою Богородице, испроси у царя Московскаго повеление на сие и к трудом труды преложив, воздвиже Тебе Пречистая пустынь, да во веки прославится имя Твое в заблуждших языцех и да почтут Бога истиннаго. Нас же в любви Твоей утверди Мати Истины.

Гора разверзе утробы своя молитвами Твоими Чистая и абие струи источник сланых людем Твоим источи, аки манну древле в пустыни Синайстей. Нам же Пречистая ниспосли манну чудес Твоих да не взалчем во веки.

Людие Острога соловарнаго зрящии таковую милость Твою, воздвигоша иконе Твоей церковь Божию, да святых чини честно Ти послужат, да мирстии концы поклонятся. Нас же сподоби блажити небесных Ходатаицу и воспети песнь Твоея святыни явлению.

Роди вси ужасахуся адстей злобе хулителей, егда пустынь Пречистыя и град соловарный паки поруганы быша, но Ты Одигитрия наша сущи воздвигла еси честнаго Захарию аки Предтечу в пустыни. Нас же сподоби сего божественныя ревности да поревнуем и мы о спасении.

 Ведущи Благая Мати яко обитель разорена имать быти в конец, извести братии о сем, они же любовию Божиею окриляеми, восхотеша венцы мученическия прияти. Нас же сподоби уведети отшествие свое, Пречистая, и мирную кончину улучити.

Слава, и ныне:

Днесь торжествует небесное воинство иноков пустыни и похваляет златую Тя стамну, и жезл, и трапезу, Пречистая Дево. Да глас Одигитрие, еже радуйся, Тебе со ангелы вкупе вопиет.

Седален, глас 8.

Идеже прославляется святое имя обрадованной Богородицы, тамо всяческих благих источницы проливаются. Почтим же людие Пречистую в чистоте икону Девы Богородицы и Тоя божественнаго младенца Христа Бога нашего, и лобызаем и прославляем Ю со страхом и трепетом: почитаем бо икону благочестно, паче же почитаем самую сущую Чистую Богоматерь. 

Слава, и ныне:

Ты еси похвала страстотерпцев, Ты еси надежда преподобных, Ты еси утешение всего мира и на Тя спасение наше возложихом вси. Одожди грешным рабом Твоим душеспасительныя Твоя милости.

Песнь 4.

Ирмос: Седяй в славе, / на Престоле Божества, / во облаце легце / прииде Иисус Пребожественный, / нетленною дланию, / и спасе зовущия: // слава, Христе, силе Твоей.

По времени образ Твой благословенный паки во тьме возсия, вечер во утро восхода зари претвори. Ныне же наша молитвы приими, Честнейшая, и славнейшую икону Свою нам паки яви Присноблаженная.

Силою вражиею ожесточени агаряне бывше, восташа на Славу Господню и Девы божественный лик уязвиша. Ты же, Владычице, очный мрак наложивши, сим просветила еси нечестивых людей. Нас же, греховную мглу потребляющи, пети сподоби славу Пречистаго образа Твоего второму явлению.

Хвалим, благословим милости Твоя Богородице, яко прозрение даруеши нечестивому отроку. Сей яко Савл прозрев покаянием истовым, иде во след иконы Твоея. Нас же во сретение Твое приими и к Богу благоутробному моления грешных принеси, поющих Тя во вся веки.

Воистину исповедуем, елика Ты хощеши, вся испросити у Сына Своего можеши, ибо Мати Бога еси. Молитвы грешных приемлеши, вопли скорбящих слышиши, тако и прощение агаряном у Бога испросила еси. Нас же в гордыни и зависти сущих в покаянии приими и в разум истины призови.

Сланою водою сладость исцеления точиши нам Пречистая Дево, такожде и частицы камене, на немже явися икона Твоя, в поможение людем бывает. Нас же припадающих к Тебе Богоизбранная щедрот Твоих причастники сотвори.

Людие Божии вельми чудяхуся явленней иконе Твоей и яко богоотец Давид скакаше играя, такожде и людие вси радостию исполняхуся и образ Заступницы с честию и пением в весь Богоявленскую принесоша. Нас же собравшихся в праздник сей Дево Пречистая благослови.

Слава, и ныне:

Недоведомая глубино, высото неизследимая, реко неисчерпаемая, целебную воду точащая, слепым бо видети даеши, глухим слышание, хромым и расслабленным хождение и всем сущим в недузех безмерное исцеление.

Песнь 5.

Ирмос: Ужасошася всяческая / о Божественней славе Твоей: / Ты бо, Неискусобрачная Дево, / имела еси во утробе над всеми Бога / и родила еси безлетнаго Сына, / всем воспевающим Тя // мир подавающая.

Табынская весь велием ликованием исполнися, икону бо Обрадованныя обрете и наполнися храм Господень славы Ея, и пришедшии языцы воздаша хвалу Богови и Пречистей Родительнице, нас же обрадуй Благая хвалящих сицевая.

Агаряне восклицаху и вельми пояху: велик христианский Бог, и истины познание сниде на единаго от них, и прием веру православную, множицею потрудися во спасение свое. Нас же сподоби подвигом добрым течение совершити и вечнаго живота достигнути.

Басурман великое множество ополчишася на Табынский град. Людие же Божии надежду на помощь Твою возложивше, противу супостатов идоша, и на месте явления образа Твоего силу вражию одолеша. В память же заступления Твоего, Богородице, сотвориша крестохождение и иконы чудотворныя водружение.

О преславнаго чудесе! Небесе и земли Царица, от святых сродник наших умоляемая, доныне землю Уральскую покрывает и милостями своими Табынский край обогащает. О, Владычице державная! Не престани и на будущее время, обитель нашу покрывати, верныя люди спасати, Ты бо радость наша и утверждение.

Егда Усольстии людие хотяху икону Твою имети во храме своем и принесоша ю, тогда Пречистая Мати на сие не благоволи, но паки в Табынстем храме обретеся. Такожде и упование наше на милость Твою не презри, но Сама благоизволи явитися.

Сияние благодати чудное бысть по всей Табынстей земли, яко создаша христолюбивии людие из камене церковь Твою, и воззваша вся окрестныя веси на восхваление чудес Твоих. Нас же пришедших на торжество сие приими, и праздника ради грехи отпусти. 

Слава, и ныне:

Кая Ти есть достойная похвала, сию ли наше принесет конечное неможение; яко явлением Пречистыя Твоея Божественныя иконы, светозарное нам возсия солнце, православных чудес лучи испуская, и тьмы лютых обстояний отгоняя священными Твоими, Владычице, предстательствы.

Песнь 6.

Ирмос: Божественное сие и всечестное / совершающе празднество, / богомудрии, Богоматере, / приидите, руками восплещем, // от Нея рождшагося Бога славим.

Зной и бездождие бысть Уфимстей земли, но тщетно моляхуся вернии, излияся бо гнев Господень за беззакония, но токмо икона Твоя, Преблагая, принесе одождение гибнущим злаком. Наша же изсохшия души одожди росою благодати Твоея, да произрастим класы добродетелей и спасение узрим.

Содому подобне наказан бысть град Стерлитамак, запаление и зной ту обдержаста. И токмо принесением иконы Твоея честныя абие Господь милости на землю одожди, темже печаль людей Своих на радость преложи.

Егда бысть мор смертный по всей Российстей земли, паки надежду возложи на Тя град Стерлитамак, и паки, Владычице, помощь Свою подала еси и абие мор преста. В память сего сотвориша вернии каждогоднее хождение с иконою Твоею, восхваляюще Тя Преблагословенная.

Таже Оренбург одержимь бе лютаго мора нашествием и велия скорбь обыде тамо живущих. Ты же, Пречистая, внушила еси  святителю Антонию прияти во град сей икону Твою. И егда сие совершися, болезни смертныя отступиша. Темже мы зовем Ти: покрый нас честным Твоим омофором.

Егда слава Пречистыя простреся во вся концы Уральстей земли, бысть повеление царево, во еже почтити Богоматерь  летным крестохождением на двести тридесять поприщ богохранимыя страны нашея. Тако и мы творяще, присно поминаем Твоя чудеса Всеблагая.

Мира Заступнице, Мати Всепетая, верных Твоих похвало! Не остави нас сирых без поможения, но присно пребуди с нами.

Слава, и ныне:

Радуйся, царей православных и воинств христолюбивых славо, покрове и прибежище всех, Царице. Радуйся, чудо чудес Одигитрие наша, весей и градов утверждение.

Кондак, глас 8.

Взбранной Воеводе победительная, / яко избавльшеся от злых, / благодарственная восписуем Ти раби Твои, Богородице, / но яко имущая державу непобедимую, / от всяких нас бед свободи, да зовем Ти:  / радуйся, Невесто Неневестная.

 

Ин кондак, глас тойже.

Взбранной Воеводе рода христианскаго и страны нашея известней Избавительнице. Хвалебныя песни принесем вернии Деве, Владычице Богородице. Ты же, яко имущая милосердие неизреченное, от всяких нас скорбных обстояний свободи, да с любовию зовем Ти: Радуйся, Похвало Табынская и всего мира Надеждо и Утешение.

Икос:

Смысл очистивше и ум, притецем к Богородице, светло песньми ублажающе Ю, и пречистую икону Ея прославляем и чтим, и припадающе покланяемся  яко Самой сущей оной: честь бо иконы на Первообразное восходит, и почитаяй и покланяяйся ей, почитает самое Первообразное, якоже Божественнии отцы рекоша. И аще кто не чтит Пресвятыя Богородицы и не покланяется иконе Ея, анафема да будет: посрамляет бо и погубляет не чтущия Ю, избавляет же от великих бед и зол благонравныя и Богобоящияся рабы Своя.

Песнь 7.

Ирмос:  Не послужиша твари богомудрии / паче Создавшего / но огненное прещение мужески поправше, / радовахуся, поюще: // препетый отцев Господь  и Бог, благословен еси.

Слава Табынския иконы Твоея, Пречистая, возсия в Верхнеуральстем граде, велие множество людей срете икону Твою и преложила еси неверие в познание истины. В память же сего утвердиша камень велий на высоцей горе. Нас же научи памятовати чудеса Твоя, Богоневесто.

Пустое езеро на пути икона Твоя освяти, милости источающи окрест живущим людем. Многих бо исцели ту от глада и мора, Пречистая. Темже воздвижеся храмина при езере том, нас же сподоби созиждити храмину нашея души и добродетельми украсити ю, Владычице.

Ныне ликует Сибирская земля, достигоша бо ю  величия Твоя, ликует Челябинск град, ликует град Тюмень и Кустанай, приемля икону Пречистыя, неоскудно бо действо благодати Ея, яже совершает великая и преславная чудеса во спасение всех и просвещение.

Град Уральск еретическим зловерием одержимь бе. Егда же сретоша образ Твой, Пречистая, козни вражия абие разрушишася. Людие же видевше милости бываемыя, во след Тебе течаху и веру православную прославляху.

Егда христолюбивии воини земли Оренбургския имяху икону Твою в полце своем, тем велию крепость и силу обретаху на враги своя. Орды бо неверныя покориша и дерзости их низложиша.

Поволжстей земли точиши благодать независтную пришествием Твоим в Саратов град. Икона бо Пречистыя демонов полчища отгоняет и души заблуждших просвещает. Мы же любезно покланяемся и лобызаем, и Тя Богородице величаем.

Слава, и ныне:

Всяк прибегаяй к покрову Твоему Чистая, не отходит туне. Ты бо еси отчаянных велие прибежище, обуреваемых тихое пристанище, Мати истиннаго живота, Едем человеком отверзшая Рождеством Твоим, приими и нас призывающих Твою помощь.

Песнь 8.

Ирмос:  Отроки благочестивыя в пещи / Рождество Богородичо спасло есть, / тогда убо образуемое, / ныне же действуемое, / вселенную всю воздвизает пети Тебе: / Господа пойте дела, // и превозносите Его во вся веки.

Лютая година постиже землю Русскую, и явишася безбожнии людие,  и бысть всему Уральскому краю велие возмущение: храмы Божии разориша, святыни оскверниша и крестохождения с иконою упраздниша. Мы же молим Тя: прости грехи отец наших.

Печалующися о стране нашей Российстей, Владычице, не хотящи иконою Своею покинути нуждею пределы земли нашея, стала еси недвижно у Амур реки, несомая гонимыми христолюбивыми воины. Вернии же со святители Мефодием и Нестором слезно моляхуся да не оставиши их сирых во стране Китайстей, но да идеши с ними помощь Свою подающи.

Удивишася китайстии народи зряще чудеса от иконы Твоея бываемая. Темже во храм Твой притекаху и крещение приимаху, сего ради безчисленный язык покорила еси и славити Бога истиннаго научила.

Австралийская земля величает Тя, Пречистая, слышащи о дивных чудесех Твоих. Ты бо любовию всех объимаеши и благодатию исполняеши.

Людие правовернии в разсеянии суще, память иконы Твоея несоша во всей земли, такожде и во Америце знаема бысть святыня сия, ейже  в скорбех  и обстояниих моляхуся и скорое поможение обретаху.

Всяк язык творяй беззаконие лишаемь святынь своих бывает, тако и Табынская святая икона тайнодействием Божиим сокрыта есть от нас, но тепле молим Тя: прииди к нам сирым и утеши ны.

Слава, и ныне:

Ум ангельский и человеческий ужасается, Богородице, како Младенца раждаеши, како Сына на руку носиши. Его же трепещут горния силы, вопиющя: Свят, Свят, Свят еси Боже, Богородицею помилуй нас.

Песнь 9.

Ирмос:  Всяк земнородный / да взыграется, Духом просвещаемь, / да торжествует же безплотных умов естество, / почитающее священное торжество Богоматере, / и да вопиет: / радуйся, Всеблаженная, Богородице, // Чистая Приснодево.

Мерзость запустения на месте святем бываше, егда источницы слании во врачебницу преложени быша, но Ты, Богородице, неверствующих чудесным Твоим  страхованием изгнала еси, да познают величия Твоя, Богоневесто.

Возскорбеша  христолюбивии людие егда беззаконнии храмину, стоящую на источницех сланых разориша, и место святое в запустение приведоша. Но до конца милость Свою не отвратила еси, Владычице, от рабов Своих и единожды в лето струи водныя в пещере подаеши, аки слезы точащи.

Утешение христианом даровала еси Приснодево, егда у древа яко в невидимем храме собирахуся и моление вкупе Тебе приношаху, Ты бо еси Богородице, христианом Благая помощница.

Се время благоприятное, се ныне день спасения наста для Русския земли. Храмы Божии открывахуся, обители святыя созидахуся. Тако и на горе Табынстей храм чудный, Пречистей, воздвигнут бысть, иноцы ту собрашася, обитель сотвориша и славу Богу воспевают тако изволившему.

Паки Благословенная изливает чудеса на рабы Своя, якоже прежде. Тако и ныне милостию исполняет, мироточение творящи от образа Своего. К немуже притекают вси чтущии Тя, получающе полезная ко спасению.

Велия слава Твоя, Богомати, на источницех сланых явися. Отвсюду стекахуся людие воздати благодарение Ти:  тяжко недугующих бо исцеляеши, матерем детородящим скорое разрешение даруеши, ожесточенно враждующим, нечаянное подаеши примирение, сопружных в единомыслии и любви сохраняеши, Радость бо Ты еси истинная.

Слава, и ныне:

Придите, вернии, чистым сердцем возвеличим Пречистыя Матере Бога нашего чудную икону Табынскую и Божественнаго Младенца, Спаса Христа, Егоже яко рождшая на руку носивши и матерне дерзновение к Нему имущи, непрестанно молит за ны и подает рабом Своим богатыя милости.

Светилен:

Да почтится Всепетая Мати Божия, Жизнь Сущую рождши, Христа Бога нашего, райских дверей отверзение и всего мира очищение, к животу возведение: / Сей есть пророком глаголавый, Тому поклонимся, Богу и Спасу душ наших

На хвалитех стихиры на 4, глас 4.

Целомудрия сущи Ходатаица, / призывающим Тя ныне явися, // и от всяких избави напастей и бед Богоневесто.

Неискусомужно рождши Господа, / явися по рождестве паки девствующи: / о преславнаго чудесе, / в Тебе соделаннаго, Богоневесто!

Приими, Отроковице Пречистая, божественную песнь, / воздавающи благодать на Тя надеющимся, / и мир испроси церквам присно послати, // да христианский всяк язык Тя величает.

Многая Твоя щедроты милостивно нас спасают, / едина Богомати, / от греховнаго суда, и различных напастей: // Ты бо рождши Бога, милуеши мир Его.

Слава, и ныне, глас 2:

Тихое пристанище / обитель Твоя Богоневесто / явися всем притекающим, / имущи в себе пречестную Твою икону, // всем неоскудно благодать подающи.

Славословие великое. И отпуст. 

На Литургии служба Богородицы.

Рейтинг@Mail.ru
Система Orphus
(1 голос: 2 из 5)