Молебное пение на новый год

По оконча́нии литургии глаго́лет диа́кон: Благослови́, Влады́ко!

Свяще́нник: Благослове́нно ца́рство Отца́ и Сы́на и Свята́го Ду́ха, ны́не и при́сно и во ве́ки веко́в.

Ли́к: Ами́нь.

И чту́т: Прииди́те, поклони́мся.., три́жды.

И псало́м 64:
Тебе́ подоба́ет пе́снь, Бо́же, в Сио́не, и Тебе́ возда́стся моли́тва во Иерусали́ме. Услы́ши моли́тву мою́, к Тебе́ вся́ка пло́ть прии́дет. Словеса́ беззако́нник премого́ша на́с, и нече́стия на́ша Ты́ очи́стиши. Блаже́н, eго́же избра́л еси́ и прия́л, всели́тся во дво́рех Твои́х. Испо́лнимся во благи́х до́му Твоего́, свя́т хра́м Тво́й, ди́вен в пра́вде. Услы́ши ны́, Бо́же, Спаси́телю на́ш, упова́ние все́х конце́й земли́, и су́щих в мо́ри дале́че, уготовля́яй го́ры кре́постию Свое́ю, препоя́сан си́лою, смуща́яй глубину́ морску́ю, шу́му во́лн eго́ кто́ постои́тъ? Смяту́тся язы́цы, и убоя́тся живу́щии в конца́х от зна́мений Твои́х, исхо́ды у́тра и ве́чера украси́ши. Посети́л еси́ зе́млю и упои́л еси́ ю́, умно́жил еси́ обогати́ти ю́. Река́ Бо́жия напо́лнися во́дъ; угото́вал еси́ пи́щу и́м, я́ко та́ко (е́сть) угото́вание. Бразды́ ея́ упо́й, умно́жи жи́та ея́, в ка́плях ея́ возвесели́тся возсия́ющи. Благослови́ши вене́ц ле́та бла́гости Твоея́, и поля́ Твоя́ испо́лнятся ту́ка, разботе́ют кра́сная пусты́ни, и ра́достию хо́лми препоя́шутся. Оде́яшася о́вни о́вчии, и удо́лия умно́жат пшени́цу, воззову́т, и́бо воспою́т.

Сла́ва, и ны́не. Аллилу́ия, [аллилу́ия, аллилу́ия, сла́ва Тебе́, Бо́же], три́жды.
 

Посе́м диа́кон глаго́лет сле́дующую ектению́:

Ми́ром Го́споду помо́лимся.

О свы́шнем ми́ре и спасе́нии ду́ш на́ших, Го́споду помо́лимся.

О ми́ре всего́ мира, благостоя́нии святы́х Бо́жиих церкве́й, и соедине́нии все́х, Го́споду помо́лимся.

О святе́м хра́ме се́м, и с ве́рою, благогове́нием и стра́хом Бо́жиим входя́щих в о́нь, Го́споду помо́лимся.

О вели́ком господи́не и отце́ на́шем Святе́йшем Патриа́рхе и́мярек, и о господи́не на́шем высокопреосвяще́ннейшем митрополи́те (или́: архиепи́скопе, или́: преосвяще́ннейшем епи́скопе) и́мярек, честне́м пресви́терстве, во Христе́ диа́констве, и о всем при́чте и лю́дех, Го́споду помо́лимся.

О богохрани́мей стране́ на́шей, власте́х и во́инстве ея́, Го́споду помо́лимся.

О гра́де се́м, и вся́ком гра́де и стране́, и ве́рою живу́щих в ни́х, Го́споду помо́лимся.

О е́же ми́лостивно ны́нешнее благодаре́ние, и мольбу́ на́с недосто́йных рабо́в Свои́х в в пренебе́сный Сво́й же́ртвенник прия́ти, и благоутро́бно поми́ловати на́с, Го́споду помо́лимся.

О е́же благоприя́тным бы́ти моле́ниям на́шим, и прости́ти на́м и все́м лю́дем Свои́м вся́ согреше́ния во́льная и нево́льная, в мимоше́дшем ле́те зле́ на́ми соде́янная, Го́споду помо́лимся.

О е́же благослови́ти нача́ток и провожде́ние ле́та сего́, благода́тию человеколю́бия Своего́, времена́ же ми́рна, благорастворе́нны возду́хи, и безгре́шен на́м в здра́вии с дово́льством живо́т дарова́ти, Го́споду помо́лимся.

О е́же отврати́ти от на́с ве́сь гне́в Сво́й, пра́ведно на ны́ гре́х ра́ди на́ших дви́жимый, Го́споду помо́лимся.

О е́же отгна́ти от на́с вся душетле́нныя стра́сти и растле́нныя обы́чаи, стра́х же Сво́й Боже́ственный всади́ти в сердца́ на́ша ко исполне́нию за́поведей Его́, Го́споду помо́лимся.

О е́же обнови́ти ду́х пра́вый во утро́бах на́ших, и укрепи́ти на́с в правосла́вной ве́ре, и спе́шных к де́ланию до́брых де́л, и исполне́нию все́х за́поведей Его́ сотвори́ти, Го́споду помо́лимся.

О е́же низложи́ти вся́ е́реси и отсту́пства, и насади́ти всю́ду правове́рие и благоче́стие, и отврати́ти все́х отсту́пльших от пра́выя ве́ры к позна́нию Своея́ и́стины, и соедини́ти и́х святе́й Свое́й Правосла́вной Це́ркви, Го́споду помо́лимся.

О е́же изба́вити Це́рковь святу́ю Свою́ и все́х на́с от вся́кия ско́рби, беды́, гне́ва и ну́жды, и от все́х враго́в ви́димых и неви́димихъ; здра́вием же, долгоде́нствием, и ми́ром, и а́нгел Свои́х ополче́нием ве́рных Свои́х всегда́ огради́ти, Го́споду помо́лимся.

Заступи́, спаси́, поми́луй и сохрани́ на́с, Бо́же, Твое́ю благода́тию.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Марию, со все́ми святы́ми помяну́вше, са́ми себе́ и дру́г дру́га, и ве́сь живо́т на́ш Христу́ Бо́гу предади́м.

Ли́к: Тебе́, Го́споди.

Свяще́нник возглаша́ет:
Яко подоба́ет Тебе́ вся́кая сла́ва, че́сть и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Ли́к: Ами́нь.

Посе́м: Бо́г Госпо́дь, и яви́ся на́м…
И тропари́ сия́, гла́с 4:
Благода́рни су́ще недосто́йнии раби́ Твои́, Го́споди, о Твои́х вели́ких благодея́ниях на на́с бы́вших, сла́вяще Тя́ хва́лим, благослови́м, благодари́м, пое́м и велича́ем Твое́ благоутро́бие, и ра́бски любо́вию вопие́м Ти́: Благоде́телю Спа́се на́ш, сла́ва Тебе́.

Сла́ва, гла́с 3:
Твои́х благодея́ний и даро́в ту́не, я́ко раби́ непотре́бнии сподо́бльшеся, Влады́ко, к Тебе́ усе́рдно притека́юще, благодаре́ние по си́ле прино́сим, и Тебе́, я́ко Благоде́теля и Творца́ сла́вяще, вопие́м: сла́ва Тебе́, Бо́же преще́дрый.

И ны́не, гла́с 2:
Всея́ тва́ри Соде́телю, времена́ и ле́та в Свое́й вла́сти положи́вый, благослови́ вене́ц ле́та бла́гости Твоея́, Го́споди, сохраня́я в ми́ре Импера́тора и гра́д Тво́й, моли́твами Богоро́дицы, и спаси́ ны.

Диа́кон: Во́нмем.

Иере́й: Ми́р все́м.

Чте́ц: И ду́хови твоему́.

Диа́кон: Прему́дрость, во́нмем.

Чте́ц: Проки́мен, гла́съ 4: Воспою́ Го́сподеви благоде́явшему мне́,* и пою́ и́мени Го́спода вы́шняго. Сти́х: Возра́дуется се́рдце мое́ о спасе́нии Твое́м.

Посе́м чте́т апо́стол к Тимофе́ю, зача́ло 282:
Ча́до Тимофе́е, молю́ пре́жде все́х твори́ти моли́твы, моле́ния, проше́ния, благодаре́ния за вся́ челове́ки, за Царя́ и за все́х, и́же во вла́сти су́ть, да ти́хое и безмо́лвное житие́ поживе́м во вся́ком благоче́стии и чистоте́. Сие́ бо добро́ и прия́тно пред Спаси́телем на́шим Бо́гом, Иже все́м челове́ком хо́щет спасти́ся и в ра́зум и́стины приити́. Еди́н бо е́сть Бо́г, и еди́н хода́тай Бо́га и челове́ков, Челове́к Христо́с Иису́с, да́вый Себе́ избавле́ние за все́х: Ему́же че́сть и сла́ва во ве́ки веко́в, ами́нь.

Иере́й: Ми́р ти́.

Чте́ц: И ду́хови твоему́.

Диа́кон: Прему́дрость.

Чте́ц: Аллилу́ия, гла́съ 4: [Тебе́ подоба́ет пе́снь, Бо́же, в Сио́не, и Тебе́ возда́стся моли́тва во Иерусали́ме. Сти́х: Благослови́ши вене́ц ле́та бла́гости Твоея́, Го́споди.]

Та́же диа́кон: И о сподо́битися на́м слы́шанию Свята́го Ева́нгелия, Го́спода Бо́га мо́лим.

Ли́к: Го́споди, поми́луй, Трижды. Диа́кон: Прему́дрость, про́сти, услы́шим Свята́го Ева́нгелия.

Иере́й: Ми́р все́м.

Ли́к: И ду́хови твоему́.

Иере́й: От Луки́ Свята́го Ева́нгелия чте́ние.

Ли́к: Сла́ва Тебе́, Го́споди, сла́ва Тебе́!

Диа́кон: Во́нмем.

И а́бие иере́й чте́т Ева́нгелие от Луки́, зача́ло 13:
Во вре́мя о́но, прии́де Иису́с в Назаре́т, иде́же бе́ воспита́н, и вни́де по обы́чаю Своему́ в де́нь суббо́тный в со́нмище, и воста́ чести́. И да́ша Ему́ кни́гу Иса́ии проро́ка, и разгну́в кни́гу, обре́те ме́сто, иде́же бе́ напи́сано: Ду́х Госпо́день на Мне́, его́же ра́ди пома́за Мя́, благовести́ти ни́щим посла́ Мя, исцели́ти сокруше́нныя се́рдцем, пропове́дати плене́нным отпуще́ние, и слепы́м прозре́ние, отпусти́ти сокруше́нныя во отра́ду, пропове́дати ле́то Госпо́дне прия́тно. И согну́в кни́гу, отда́в слузе́, се́де, и все́м в со́нмищи о́чи бе́ху зря́ще На́нь. И нача́т глаго́лати к ни́м: я́ко дне́сь сбы́сться писа́ние сие́ во у́шию ва́шею. И вси́ свиде́тельствоваху Ему́ и дивля́хуся о словесе́х благода́ти, исходя́щих из у́ст Его́.

Ли́к: Сла́ва Тебе́, Го́споди, сла́ва Тебе́!
Абие диа́кон глаго́лет ектению́ сию́:
Рце́м вси́ от всея́ души́, и от всего́ помышле́ния на́шего рце́м.

Ли́к: Го́споди поми́луй, три́жды.

Го́споди Вседержи́телю, Бо́же оте́ц на́ших, мо́лимтися, услы́ши и поми́луй.

Поми́луй на́с, Бо́же, по вели́цей ми́лости Твое́й, мо́лимтися, услы́ши и поми́луй.

Ли́к: Го́споди поми́луй, три́жды.

Еще́ мо́лимся о Вели́ком Господи́не и отце́ на́шем, Святе́йшем Патриа́рхе (имярек) и о господи́не на́шем преосвяще́ннейшем митрополи́те (или архиепи́скопе, или епи́скопе) (имярек), и о всей во Христе́ бра́тии на́шей.

Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Благодаря́ще со стра́хом и тре́петом, я́ко раби́ непотре́бнии Твоему́ благоутро́бию, Спа́се и Влады́ко на́ш Го́споди, о Твои́х благодея́ниях, я́же излия́л еси́ изоби́льно на рабе́х Твои́х, и припа́даем, и славосло́вие Тебе́, я́ко Бо́гу прино́сим, и умиле́нно вопие́м: изба́ви от все́х бе́д рабы́ Твоя́, и всегда́, я́ко ми́лостив, испо́лни во благи́х жела́ние все́х на́с, приле́жно мо́лимтися, услы́ши и поми́луй.

О е́же благослови́ти вене́ц наступа́емаго ле́та бла́гостию Свое́ю, и утоли́ти в на́с вся́ вражды́, нестрое́ния и междоусо́бныя бра́ни, пода́ти же ми́р, тве́рдую и нелицеме́рную любо́вь, благочи́нное же строе́ние и доброде́тельное житие́, мо́лимтися, всеблагий Го́споди, услы́ши и поми́луй.

О е́же не помяну́ти безчи́сленная беззако́ния и лука́вая на́ша дея́ния, в мимоше́дшем ле́те бы́вшая, и не возда́ти на́м по дело́м на́шим, но в ми́лости и щедро́тах помяну́ти на́с, мо́лимтися, милосе́рдый Го́споди, услы́ши и поми́луй.

О е́же пода́ти дожди́ благовре́менны, ра́нни же и по́здни, ро́су плодоно́сну, ве́тры ме́рны и благорастворе́нны, и теплоту́ со́лнечную возсия́ти, мо́лимтися, всеще́дрый Го́споди, услы́ши и поми́луй.

О е́же помяну́ти Це́рковь святу́ю Свою́, и укрепи́ти, утверди́ти же, разшири́ти, и умири́ти ю́, и невреди́му а́довыми враты́, и все́ми наве́ты ви́димых и неви́димых враго́в непребори́му во ве́ки соблюсти́, мо́лимтися, вседержа́вный Влады́ко, услы́ши и поми́луй.

О е́же искорени́ти и угаси́ти все́ богоху́льное ага́рянское нече́стие, и ца́рство и́х ско́ро разруши́ти, и правове́рным преда́ти, мо́лимтися, всеси́льный Го́споди, услы́ши и поми́луй.

О е́же изба́витися на́м в сие́ гряду́щее ле́то, и во вся́ дни́ живота́ на́шего от гла́да, губи́тельства, тру́са, пото́па, гра́да, огня́, меча́, наше́ствия иноплеме́нных, и междоусо́бныя ра́ти, и вся́кия смертоно́сныя ра́ны, ско́рби же и ну́жды, мо́лимтися, милосе́рде Го́споди, услы́ши и поми́луй.

Иере́й возгла́с:
Услы́ши ны́, Бо́же Спаси́телю на́ш, упова́ние все́х конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны́. Ми́лостив бо и человеколю́бец Бо́г еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Аминь.

Диа́кон: Па́ки и па́ки, прекло́нше коле́на, Го́споду помо́лимся.

Ли́к: Го́споди поми́луй, три́жды.

Свяще́нник же чте́т сле́дующую моли́тву:
Влады́ко Го́споди Бо́же на́ш, Исто́чниче жи́зни и безсме́ртия, всея́ тва́ри ви́димыя и неви́димыя Соде́телю, времена́ и ле́та во Свое́й вла́сти положи́вый, и управля́яй вся́ческая прему́дрым и всеблаги́м Твои́м про́мыслом. Благодари́м о щедро́тах Твои́х, я́же удиви́л еси́ на на́с в мимоше́дшее вре́мя живота́ на́шего, мо́лим Тя́, всеще́дрый Го́споди, благослови́ вене́ц наступа́ющаго ле́та Твое́ю бла́гостию! Спаси́, Го́споди, и поми́луй вели́каго господи́на и отца́ нaшего имярек, святейшаго патриaрха моско́вскаго и всея́ Руси́, и господи́на нaшего преосвященнейшаго митрополи́та (или́ архиепископа, или́ епископа) [имярек, егоже область]. Умно́жи дни жития́ их в непоколеби́мем здрaвии, и во всех добродетелех преуспеяние им даруй. Подаждь свыше благая Твоя и всем людем Твоим, здравие же и спасение и во всем благое поспешение. Церковь Твою Святую, град сей и вся грады и страны от всякаго злаго обстояния избави, мир и безмятежие тем даруй: Тебе Безначальному Отцу, со Единородным Твоим Сыном, Всесвятым и Животворящим Твоим Духом, во едином существе Славимому Богу, всегда благодарение приносити и Пресвятое Имя Твое воспевати да сподобиши.

Та́же возглаша́ет: Сла́ва Тебе́ Бо́гу, благода́телю на́шему во ве́ки веко́в. Ли́к: Ами́нь.
И а́бие пое́т Славосло́вие вели́кое, сиесть:
Сла́ва в вы́шних Бо́гу, [и на земли́ ми́р, в челове́цех благоволе́ние. Хва́лим Тя́, благослови́м Тя́, кла́няемтися, славосло́вим Тя́, благодари́м Тя́ вели́кия ра́ди сла́вы Твоея́. Го́споди, Царю́ Небе́сный, Бо́же Отче Вседержи́телю. Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, Агнче Бо́жий, Сы́не Оте́чь, взе́мляй гре́х мира, поми́луй на́с. Взе́мляй грехи́ мира, приими́ моли́тву на́шу. Седя́й одесну́ю Отца́, поми́луй на́с. Яко Ты́ еси́ еди́н Свя́т, Ты́ еси́ еди́н Госпо́дь, Иису́с Христо́с, в сла́ву Бо́га Отца́, ами́нь.

На вся́к де́нь благословлю́ Тя́ и восхвалю́ и́мя Твое́ во ве́ки и в ве́к ве́ка.

Сподо́би, Го́споди, в де́нь се́й без греха́ сохрани́тися на́м. Благослове́н еси́, Го́споди, Бо́же оте́ц на́ших, и хва́льно, и просла́влено и́мя Твое́ во ве́ки, ами́нь. Бу́ди, Го́споди, ми́лость Твоя́ на на́с, я́коже упова́хом на Тя́.

Благослове́н еси́, Го́споди, научи́ мя́ оправда́нием Твои́м. Три́жды.

Го́споди, прибе́жище бы́л еси́ на́м в ро́д и ро́д. Аз ре́х: Го́споди, поми́луй мя́, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя́ твори́ти во́лю Твою́, я́ко Ты́ еси́ Бо́г мо́й, я́ко у Тебе́ исто́чник живота́, во све́те Твое́м у́зрим све́т. Проба́ви ми́лость Твою́ ве́дущим Тя́.

Святы́й Бо́же, Святы́й Кре́пкий, Святы́й Безсме́ртный, поми́луй на́с. Три́жды.

Сла́ва, и ны́не. Святы́й Безсме́ртный, поми́луй на́с.

Та́же вы́шшим гла́сом: Святы́й Бо́же, Святы́й Кре́пкий, Святы́й Безсме́ртный, поми́луй на́с].

Или́, вме́сто того́, пе́снь свята́го Амвро́сия, епи́скопа Медиола́нскаго:
Тебе́ Бо́га хва́лим, [Тебе́ Го́спода испове́дуем, Тебе́ преве́чнаго Отца́ вся́ земля́ велича́ет. Тебе́ вси́ а́нгели, Тебе́ небеса́ и вся́ си́лы, Тебе́ херуви́ми и серафи́ми непреста́нными гла́сы взыва́ют: свя́т, свя́т, свя́т, Госпо́дь Бо́г Савао́ф, по́лны су́ть небеса́ и земля́ вели́чества сла́вы Твоея́. Тебе́ пресла́вный апо́стольский ли́к, Тебе́ проро́ческое хвале́бное число́, Тебе́ хва́лит пресве́тлое му́ченическое во́инство; Тебе́ по все́й вселе́нней испове́дует свята́я Це́рковь: Отца́ непостижи́маго вели́чества, покланя́емаго Твоего́ и́стиннаго и единоро́днаго Сы́на, и Свята́го Уте́шителя Ду́ха. Ты́, Царю́ сла́вы, Христе́, Ты́ Отца́ присносу́щный Сы́н еси́, Ты́ ко избавле́нию прие́мля челове́ка, не возгнуша́лся еси́ деви́ческаго чре́ва; Ты́ одоле́в сме́рти жа́ло, отве́рзл еси́ ве́рующим Ца́рство Небе́сное. Ты́ одесну́ю Бо́га седи́ши во сла́ве Отчей, Судия́ приити́ ве́ришися. Тебе́ у́бо про́сим: помози́ рабо́м Твои́м, и́хже честно́ю Твое́ю кро́вию искупи́л еси́; сподо́би со святы́ми Твои́ми в ве́чней сла́ве Твое́й ца́рствовати. Спаси́ лю́ди Твоя́, Го́споди, и благослови́ достоя́ние Твое́; испра́ви я́, и вознеси́ и́х во ве́ки; во вся́ дни благослови́м Тебе́ и восхва́лим и́мя Твое́ во ве́к и во ве́к ве́ка. Сподо́би, Го́споди, в де́нь се́й без греха́ сохрани́тися на́мъ; поми́луй на́с, Го́споди, поми́луй на́съ; бу́ди ми́лость Твоя́, Го́споди, на на́с, я́коже упова́хом на Тя́. На Тя́, Го́споди, упова́хом, да не постыди́мся во ве́ки, ами́нь].

По сконча́нии же сего́, диа́кон: Премудрость. Иере́й: Пресвята́я Богоро́дице, спаси́ на́с. Ли́к: Честне́йшую херуви́м… Иере́й: Сла́ва Тебе́, Христе́ Бо́же, упова́ние на́ше, сла́ва Тебе́. Ли́к: Сла́ва и ны́не. Го́споди поми́луй, три́жды. Благослови́!

Иере́й: Христо́с и́стинный Бо́г на́ш, моли́твами пречи́стыя Своея́ Ма́тере и все́х Святы́х, поми́лует и спасе́т на́с, я́ко Бла́г и Человеколю́бец.

Диа́кон же возглаша́ет:
Великому господину и отцу нашему Святейшему Патриарху Московскому и всея Руси (имярек) со всею его богохранимою паствою и господину нашему преосвященнейшему (имярек), епископу (егоже епархия) и всему освященному собору подаждь, Господи, благоденственное и мирное житие, здравие и спасение, и во всем благое поспешение, и сохрани их на многая лета!

И пое́т ли́к: Мно́гая ле́та, три́жды.
Размер шрифта: A- 15 A+
Тёмная тема:
Цвета
Цвет фона:
Цвет текста:
Цвет ссылок:
Цвет акцентов
Цвет полей
Фон подложек
Заголовки:
Текст:
Выравнивание:
Боковая панель:
Сбросить настройки