Козма Иванов

«Сего ради аз плачю, и очи мои излиясте воду, яко удалися от Мене утешаяй мя».[2313] Плачь святаго пророка Иеремии, глава 1-я.

Что тако, о, сынове церковнии, вместо радостных песней плачевная и словеса, и гласы слышатся днесь, Вскую христианское сие собрание вместо благодушия печалными воздыханиями дряхлует ныне? Кая вина настоящаго времене, яко все братство и сироты горкими слезами окропляют и лице, и сердце свое? – Любезнаго нашего отца Никифора Семеновича погребает. О, жалостнаго случая! О, плачевнаго известия!

Преставися в вечное житие благодати тезоименитый отец,[2314] отиде к небесным обителем твердость и утешение наше, остави нас девственнаго сиротскаго собрания бодрый попечитель, великодушный долготерпения образ. Пастырь добрый, а не наемник христианскаго пустыннаго стада. Человек Божий, всех утешающий и всех любовию своею привлачающий в братолюбное единомыслие душевнаго спасения.

О, нас плачевных! О, нас бедных! Бехом иногда богаты и светлы собором отеческим, но долготою времене²⁸⁴⁴ всех оных лишихомся. Остави нас Петр многоплачевный, церковнаго благолепия чиноукраситель дивный. Остави нас сила наша и свет очес наших – Андрей премудрый и твердое защищение древняго благочестия. Остави нас Даниил кроткий, основатель и распространитель пустыни сея. Остави нас Леонтий боголюбивый, книжнаго ведения златое сокровище. Остави нас Симеон чюдный, образ и прописание святаго отеческаго жития, и староцерковных законов крепкий хранитель и страдалец.[2315] Оставиша нас и прочии многочисленнии пастыри наши, неусыпнии самоделатели душеспасителных добродетелей, цветы благоуханнии и пресладкии плоды Выгорецкаго сего винограда. О, уже остави нас и последний благопослушный сын церковный, останок отеческаго совокупления, яко возолити ныне леть есть²⁸⁴⁵ и нам с плачевным пророком: «Отъя вся крепкия моя Господь от среды моея».[2316]

Но кое надгробное краткословие принесем днесь, чада церковная, своему отцеви, киими слезами проводим любимаго своего мертвеца. Принеси хотя кратко, аки в мимошествии, в малое утешение сетования своего воспомянем жизнь его добродетелную.

Сей бо боголюбивый отец наш от самого возраста на пятомнадесять году от рождения своего остави мир сей прелестный с похотьми его душетлеными и, пришед, вселився в чащи сея пустынныя, пребываніе с преждеводворившимися зде отцами, в них же мнози бяху тогда ангельскиме чином и высокими добродетельми светлосияющии, и сими укрепив себе во младости своей, на всякия труды готов бываше, церковныя молитвы и келейное правило всегда исправляше, праздники Господьския и великих святых пением и чтением охотно украшаше.

Добрый советник и послушатель бе предводительствующим настоятелем и братии, часто посылаем бываше во отдаленныя места, ко градодержателем и властем, воеже исходатайствовати милость христорадным пустынножителем, воеже у боголюбивых христолюбцев получити отеческое пропитание престарелый и увечный сиротам, воеже распространити и в знать²⁸⁴⁶ добродетелную привести место сие пустынное, воеже всеми силами помогати дому сему общебратскому.

Свидетельствует Чаженское местечко, его трудами полученное[2317] и распространенное. Свидетельствует сибирская сторана, коликое оттуду всеусердным попечением доброревнителных сих братий место сие получало изобилное пропитание. Свидетелствует душеспасительное о сиротах и о всем братстве отеческое старание шестинадесятолетняго его настоятельства, в немже коликия Божий сей человек подья терпением своим оскорбления и от внутренних, и от внешних приражений²⁸⁴⁷, коликих благодетелей к сиротскому сему богослужению любовию своею соедини, колико согрея под своими отеческими крилами бедных сирот. И таковыми неоцененными благодеяниями позлатив жизнь свою богоугодную, преиде ныне в вечное блаженство на десятьдесятом году века своего.[2318]

Собираются от здешняго маловременства в небесныя обители предводители наши христолюбивии, оставляюще нас во юдоли сей плачевне по стремнинам своеволных страстей скитатися и во многоволнуемом жития сего море корабль свой душевный во вседневных обуреваниях самим управлять.

Се угасе свеща всеутешителная, престарелых сирот сердца всегда веселящая! Померче звезда добродетелная, омраченныя страстьми души наши присно озаряющая! Увяну цвет благоуханный, сущыя в нищете благовонием любве своея услаждающий! Посечеся древо доброплодовитое, алчущыя отечески насыщающее. Преставися любезный отец наш к вечным обителем, нас остави в скорбех и сетовании.

Гости боголюбивии и вожделеннии, от конец²⁸⁴⁸ земли любовию отеческою к нам влекоми, воспоминайте ныне братолюбнаго своего странноприимца и собеседника. Уже не зрит на вас своими приятными очами, уже не объемлет вас престарелыми руками, ниже собеседует с вами любовными разговорами, точию неявленным ныне видом и гласом простирает к вам и длани²⁸⁴⁹, и взор и прилежно просит ваши отеческия щедроты, да не оставите своим человеколюбием многособранное бедных сирот постническое совокупление, самим Господам Богом приверженное в ваше покровителство.

Восплачите и возрыдайте днесь своего отца, бедное сиротское престарелых превеликое собрание, увечныя болничныя насмертники и душеспасителными молитвами воспоминайте во свое время вас защищавшаго и телесными и душевными вашими потребами всегда вас покоившаго.

А вы, сынове церковнии, провождайте ныне отца своего и благодетеля песньми надгробными. Провождай, общебратский соборе, наставника своего и защитника теплыми молитвами. Провождайте, постническое сиротское совокупление, надежду свою и хранителя со слезами и плачем. Провождайте и вы, окрестнии скитожители, древняго пустынножителя и приятеля своего братолюбною жалостию. Провождайте вси, и ближнии, и далнии, в путь отец своих отшедшаго отца возлюбленнаго.

Горо телоприемная, приими нашего защищения незыблемую гору, распространи своя недра и скрый нашего упокоения сокровище. Обитатели горстии, всеусерднии и единомысленнии братский жители, приимите своего единоревнителнаго трудоподвижника. Петре, церковнаго благолепия чиноположниче, приими своего добропослушнаго келейника, с тобою древле жившаго во едином храме и добродетелей твоих изобилно насладившагося. Данииле, отче вселюбезный, приими своего сына церковнаго, под твоею паствою жизнь свою имевшаго. Андрее и Симеоне, и именем и вещию превозлюблении, приимите своего единожителя и соученика, от юности своея благочестия лобызавшаго и в нем жизнь свою окончавшаго. Иоанне и Мануиле, приимите и соедините с собою единомысленнаго и единоревнителнаго брата своего.[2319] Страдалче Мемноне,[2320] своим страдалческим заступлением покрый от воздушных мытарств общебратскаго трудника.

Вси святии рустии чюдотворцы, восприимите отечески вашего всесветлаго благочестия твердаго хранителя и, спасше от всезлобных лукавых духов, вселите его во обители своя, в веселие ваше присноцветущее.

Ты же, о, наказующий и милующий нас Боже наш, Боже щедрот и всякия утехи, из глубины сердечныя прилежно молим всесвятую ти благость:

«Упокой душю раба своего, отца нашего Иоанна в недрех Авраама и Исаака и Иякова, во дворех дому твоего на место светлое и покойное,[2321] в вечьное веселие и лицезрение ненасытное тебе, Творца своего и Искупителя».

Тако убо, отцы и братия, любезнаго отца со слезами проводивше, тако многоплачевная надгробная припевания совершивше, о достодолжном поминовении онаго попечемся ныне, долг свой, яко дети отцу, яко овцы пастырю христиански да отдадим, поминающе труды его и тяготоношения, нас ради подъятыя; безпокойства и защищения, за всех нас претерпенныя, вся елика сила и усердие и во общем собрании и особно всяк наедине молитвами и молением о вечном упокоении души его Создателя нашего со благоговением помолим, Пречистую Богоматерь и всех святых прилежно попросим, сего бо точию и требует от нас боголюбивая отеческая душа, странствующая в вечных обителех.

Но, о, честнейший отче, защитниче наш и попечителю, елико мы своими упорными страстьми когда твои отеческия щедроты огорчихом, все смиренно молим ныне: в том во всем нас прости и не помяни наших грубостей своим великодушием. Аще же возимееши дерзновение у Царя Небеснаго, не остави нас своим отеческим заступлением, но не презри нас отцелюбно, и душетленныя наши страсти укроти и угаси, и всех нас на путь добродетелный настави, и укрепи своими молитвами, и житие мирное нам подаждь, да в любви и единомысленном согласии, друг с другом соединившеся, единым сердцем и едиными усты прославим Отца и Сына и Святаго Духа во вся веки. Аминь.

7283 (1775) г. марта 9 дня.

Чтено на погребении марта 11 дня.