Леонтий Федосеев

Во обители свят<аго> Богоявления Господа Бога и Спаса нашего Исус Христа общежительствующим: первее настоятельствующим братства, якоже иночествующим отцем Пафнотию[1251] с прочими, тако и верховнейшим сего, боголюбезнейшему обуреваемых напастми отишию Даниилу Викуличю[1252] и благоревнейшему молитвенными воскрилении отцу и господинови моему Петру Прокопьевичю,[1253] и церковнаго богодухновеннаго сладкопения ликовственником Трифону П<етровичю>,[1254] И<саакию> Е<вфимовичю>,[1255] А<фанасию> Л<еонтиевичю>,[1256] доброгласну певцу и изуграфу¹⁵⁸⁶ честному, и другому изуграфу господинови Ивану[1257] и прочим всем, кононархом[1258] и псалмочетцем малым и превозрастным, таже и других святотрудных служений первенствующим, благодателеви моему Марку Ф<еофиловичю>,[1259] и престаршему, яко отцеви моему, Павлу Л<аврентиевичю>[1260], Кириллу и Иванну Е<мельяновичам>,[1261] и благотруднейшему Иякову Ф<едоровичю>,[1262] и в Каргополи со всеми братолюбцы[1263] боголюбезнейшему Луце Ф<едоровичю>,[1264] и всему святому братству о Христе радоватися.

Извествую вы сим писмом о страдалце Божия истины, о нашем же вседражайшем и всечестнейшем уде¹⁵⁸⁷, о С<имеоне> Д<ионисиевиче>, о превезении¹⁵⁸⁸ его указом из Новагор<ода> в велик<ий> понед<ельник>[1265] в Питербурх и тамо его пребывание и пред царским величеством бытие, и прочая, и прочая, яже о нем бывшая тамо, и оттуду паки волею Божиею возвращение в Новгород, всяко вам уже известно грамотками А<ндрея> Д<ионисиевича>. О настоящем его житии и месте селения от Мене вам сице.

Июня в 1-й день от Питера в Новгород юзника привезоша паки, и седе в хлебни¹⁵⁸⁹ три дни, таже в тюрму преселиша и в глаголемую Орлову, обаче в ней прохладнее хлебни летом седети. Караулят его трое: двое от дворянских детей[1266] с приставом. Писа ми в первых днех юзник из Орловы, яко «зело прискорбно ми есть разлучение ваше; темница и о Христе юзы ножныя милостию Божиею и благодатию ея не опечаляют мя, благодарю благодателя Бога. Старец грек – учитель, чтомый архиереом,[1267] приходя ко мне, глаголаше: „Не печалуй, не прибудет ти ни едино досадително, яко от царского вел<ичества> ни перстом вредити приказано"».

Тако доныне ненасилуем ни единем от злых юзник есть, разве темничных печалей. И аз к нему в недели овогда 2-жды, овогда 3-жды, овогда же 1-жды писемком всякое ведение подаваю и увещание, еже не стужати¹⁵⁹⁰ в терпении и правде Христове. И он ко мне восписует, яко «радуюся, рече, – слышанием вашим и вседражайшия ти руки посланийца, яко самого тя, с собою имею. О, всесладчайший друже, доношай свету моему единоутробному братцу А<ндрею> Д<ионисиевичю> люб<езное>от мене целование и всему святейшему братству челоземное поклонение. О, колики труды и печали приложих свету братцу и святому братству». И проч<ая> подобная сим присно приемлю от него грамотками. И молит мя грамоточками сестру С<оломонию> Д<ионисиевну> увещавати, «дабы не излишествовала, – рече, – о мне печальми: есть бо ми в силу благодатию Бога Вседержителя нанесеное искушение». Точию вся молит молити Господа Бога и Пречистую его Богоматерь и вся святыя, яко да подастся ему терпение вся нанесения в терпении благодарне окончати. Саморучная написания юзнича¹⁵⁹¹ отсылаю в Питер ко Андрею Д<ионисиеви>чю.

Стужаем юзник от вметаемых к нему во Орлову сосед и прощения просит, яко и не хотя, рече, в празднословие с ними восхищаюся, и малое правилце[1268] мое презирается <от> вметаемыя к нему соседи, си есть старцы, протопопы, диякони и прочий причетницы[1269] церков<ныя>. За пиянство и за многая бесчиния их архиерей во Орлову их вметает, такожде и дьяков своих и подьячих.[1270]

Пребогатый яко заступлением, тако и милостию к юзнику Михаил Ивановичь Сердеков,[1271] якоже от дне изимания¹⁵⁹² Симеонова и до отвезения в Питер, упросив у архиерея, еже ему свободно ходити к юзнику и пищею удоволяти и. Тако и по возвращении от Питера, паки получи от архиерея волю, свободно посещает юзника и робяток посылает к нему с пищею. Они дети чрез град и торг на блюдах пищу и в кувшинцах квас, яко к некоему <от> славных града преносяще, доносят во Орлову. А другии кто от граждан не точию пищею миловати и или во Орлову приити смеет, но ниже слова явленным гласом беседовати при архиерейских дерзнет.

Михайл же И<вановичь>Сердеков и ныне у архиерея проси юзника на поруку и уразуме в нем, яко он без царского величества не может ни свободити, ни озлобити¹⁵⁹³, ни сущая в Питере кая высокая власть не дерзнет собою избавити юзника, зане в ведении царского величества юзник. А какова челобитна у Андрея Д<ионисиеви>ча уготовлена к царскому величеству;[1272] слышах, яко и к вам он посла список с нея.

В месяце июле морским флотом державнейшему преславна победа на шветов морский флот даровася;[1273] на водах еще таково одоление никогдаже явися. О той баталии писмо за рукою царского величества в Новегороде на день Успения Пресвятыя Богородицы в соборе на амбоне[1274] архидияконом чтеся, и архиерею во оном писме от державнейшаго лица речения от радости вметаема: «Господи мой, господи мой, архиер<ей> Иов, аще и мерна ¹⁵⁹⁴ победа, но зане на мори никогда такова преславна содеяся».

При сем вся вы, отцы и братию, молю, помолитеся ко всемилостивому Богу, да спасет мя, грешнаго, от плотских и душевных напастей и от враг видимых и невидимых. Леонтий Федосиев, с Новогорода, августа в нощь ко 25-му дню, земно челом бью.